Tatai 7

TATA-I (7)

Ziaktu : Toni Râlte

Chrisa chu a zin ta ngei a. A rilru erawh Tatai ang thoin a ritin a nuam hauh lo. Mahse, bialpa nei na nâ na chu a be hmasa duh bik si lo. Chrisa zin ni la lain Alice pawh Shillongah a chhuk ve nghal. Tatai pawh exam chawlh an nei bawk a, inah a awm vel mai mai. Jeje nen an inbe nasa, a tur nasat êm vangin Jeje pawn a bialpa tur zawnsak chu a tum a. Dik tak chuan Tatai lo hre satu tan chuan ngaihzawn kha a nuam miah lo ve thei tih hriain Tatai la hre ngai lo a zawn a ngai. A cousin Lunglei aṭanga lehkha rawn zir, hostela awm reng reng, tuna amaha in luah chu a hrechhuak ta. Ani hi a fel bakah a hmelchhe lo va, Tatai pawn a duh ve tho a ring. Chrisa'n Tatai chung a thiltih chu mak a ti ve viau. Khang amah ngei pawhin a lo rinhlelhna te kha awmze nei miah lo a ni tih chu rin harsa a ti ve tho. Mipa a nih angin Chrisa'n Tatai a melh dan kha a lem niin a hre tlat lo. Mahse, a ṭhiannu rilru lenzia a hriat avangin sawipui vak a tum lo. A ngaihdan a sawhsawn dawn lo tih a chiang ve tlat. A cousin Duata chu a be ta a. "I single rei tawh,nei ve tawh rawh" tiin bul a va ṭan a. Duata lah chuan, "Biak ka nei ve reng e a" a rawn ti. 

Mahse, a beidawng duh lo,. A tukah Tatai chu Duata ina lenpui a rilruk ta a. Tatai erawh a zâm angreng. Mahse, a lo sawi tawh si a , Chrisa avang pawn a tih ngei ngei a ngai. An chhuak dun ta ngei a, Jeje chuan Duata mizia a hrilh malh malh a. A thlalak te pawh a hmuhtir, a chhe vak lo a ti Tatai pawn. Mahse, Chrisa erawh tluk lo a ti thung. Duata in luah an va thlen chuan ani pawh a lo lai ṭût a, Tatai chu hmelṭha a ti. Mahse, a pa êm mai a, inchei nu ve deuh se a hmuh tlak viauin a ring. Jejea titi an ngaithla a ni ringawt mai. An ni chuan sawi ve tur hre hek lo le..an nui leh tawp zel bawk a. An leng rei lem lo . Tikhan phone kal tlangin an inbe ve tawh mai a niang chu. Zanah Duata chuan a rawn be ta ngei e. An inbe chho ve zel a, an chanchinte inhrilh tawnin Duata chu sawi tawh ang khan Lunglei, Electric veng a ni a. A pa a boral tawh, a nu hi Lecturer a ni a, unau pahnih chauh an ni. Tihian Aizawlah in luahin a rawn awm ta a, MA (mizo) final semester a zir ve mêk a ni. Jeje pa leh a nu te hi unau an ni bawk. Tatai pawn a chanchin tlem azawng a hrilh ve a, Duata'n, "I pa deuh sa tih Jeje khan a sawi a, mahse, nu viau ta la i inhmeh lo zawk ang. Tikhan i duhawm zawk" a tih chuan a rilru a tinuam ve huai thei. A inchei dan ṭhenkhat te pawh tlem tlem a tihdanglam ve erawh ngai a ti. Duata nen an inbiak lai reng paw'n Chrisa a ngaihtuah leh ṭhin. Mak a inti ve tawp, a lo duh ve hman dan hi. 

Thihna a la thleng leh ta rih lo va. Police lam erawh an awm mai mai lo. Kha pa Seni thattu nia insawi kha Chungliana a ni a, khawchhak lam mi a ni. A tan hun tur hriat a la ni lo va, a chhuah hun pawh a tan chuan a huphurhawm ve viau ang. Chhungkhat amah han venghim thei tur khawpa hnaih a nei si lo. 

Zing dar 6 bawr vela a nuin a rawn kaitho chu mak a ti ru deuh. A tho va, eng thil pawimawh tak ni ang maw a ti rilru. A va chhuah chuan a nu chu a thlabar hmel deuhin a hria, a ngaihbel pawh a ni maithei. In hnuaia an chhuk dun chu a pa a lo vei tuak sek a, Rinpuia leh Ruati te bakah Arami ten an lo thlir ṭhap. 

"Tata, kan roomah tun hnaiah i lut em?" A pa chuan a lo ti nghal tâwng a. 

"Lut miah lo, ngati nge?" A ngaihna hriat loh hmel deuhin a lo ti. Sen ṭâwn ṭâwn chungin, "Bank-a dah tura safe-a ka dah lailawk cheng nuai 5 a bo vek" a ti ta a. Tatai pawh chuan a hmui a lo hup vat. 

"Engtikah?" A ti thei hram. 

"Thil danga ka buai avang leh ka lo mangnghilh ve deuh avangin tukin zingah ka en chauh a. A bo hun awm pawh ka hre lo, ka dahna erawh a rei leh tawh" tlema inthlahdul deuh hian a ti a. 

Rinpuia'n, "Engtin nge safe ami chu a bo theih ang le? Chabi lah i dahna tuman kan hre ngai si lo" a lo ti ve vat. 

"Hria an awm a ni mai. Lalnunfeli chu call nghal r'u, a riak chhuak ve ziah a, rawn thlawk haw nghal rawh se" a ti leh tûn tûn. Nia, Mafeli a riak chhuak tak e. An chhungkaw boruak chu a nuam ta lo khawp mai. Pawisa hi hlimna ber chu a ni lo, mahse, buaina a thlen thei a, hlimna pawh a siam thei chu a nih hi. 

Ruati chuan, "Ka tan phei chuan a nuam lo zual ee..ka lo awm ve hmain thil bo a awm ngai si lo" a ti a. A sawi dikna chen pawh a awm ang. Tatai nuin, "Chutin ngaihtuah mah ta che, kan chhungkua ami pawh a ni kher lo ve thei" a lo ti var. 

Pu Hruaia erawh rilru hah hmel zetin a ṭhu ngawi reng. Pawisa chu a nei tawh lo pawh a ni lo, mahse, nuai a kai tawh hi chuan enliam ngawt a harsa ve ang. Cheng 10 pawh tihbo arâlah chuan a uiawm vek. Tukṭhuan pawh an ei tui hlawm lo. Arami pawh nidanga a titi nasat theih nen a ngawi hmak mai. Thleng a sil laia Tatai'n a lo hruk hul lai chuan, "A kuma kum ka awm tawh a, thil bo a awm ngai miah lo. Kei chu Ruati hi ka ringhlel tlat" a ti zawi sap a. Tatai erawh chuan a chhang lem lo. Tumah han rinhlelh tur a hre ve thiam vak lo. Mafeli a niang tih dawnin a ac-ah a pa hian thla tin a dahsak zel a, a ngah tawh tho si. Bakah a hautak zawngin a khawsa vak tlat lo. Mafeli pawh a rawn haw ve ta, a pain a lo dâwp nghal zat. Hawihai zetin, "A awihawm loh e. Ngatan nge chutiang zat zat ka tih ang a" a ti mai si. A pa pawh beidawn hmel zetin a ṭhu leh chawrh. 

"A thuhrimin kei ber kher chu min rinhlelh le? Ruk ka rûk in hre ngai ami? Tatai leh a nu te pawh an ni thei. U Ruati pawh a ni lovang tih tu nge sawi thei?" A ti ta phiar phiar mai a. Rinpuia'n, "Kan ringhlel bik che a ni reng reng lo, kan inzawt vek tawh. Nang pawh kan zawt ve mai che a ni. Thawk a phit hian Tatai te hi sawi fahran tawh suh. Ka beng duh mai ang che. I roomah chho nghal rawh" a lo ti nghut nghut. A û hi zawng a hlau ve bawk a, tum bûrin a chho hlawk hlawk. A pa chuan nuam lo a tih hmel kher mai. Pi Zuali pawh tun ṭum chu a tum ve hmak mai. Hetiang ṭawngkam feikibâr hi an dawng nufa ta zeuh zeuh a; hrehawm a ti. A pasal vangin a insûm hram hram zawk a, tih tak êmah chuan a fahrawnte chunga a ṭhat lohna hi midang pawn sawi tur an hriat a ring lo. Mafeli lakah ngat phei chuan a..

Chutiang chuan pawisa tam tham tak chu a khuangcher bo ta ringawt mai chu a nia, latu chu an awm ngei awm si a. A mak teh ngawt mai. Tatai ngaihtuahna pawh a kal thui viau. Chutiang zah zah pawisa chu a kutah a la awm ngai lo, a nu nen an awm lai pawh khan cheng nuai an neih phak a hre ngai lo. Rin dan a nei thiam ta vak lo, Mafeli a niang han ti dawn se eng atan nge a hman ang tih a ngaihtuah tho bawk si. Rinpuia te nupa lah a rinawm si loh. Arami phei chu kha chen an inah a awm tawh a, a lak a nih a rinawm loh hul hual. An nufate chu an lo ringhlel ang tih a hlau deuh. Dik tak chuan mi hrang ang an ni miau a. 

Pawisa chungchang chu sawi rik a ni leh ta rih lo va. Ani Tatai leh Duata te pawh an thleng thui ve zel e. A ṭhian dangte ang bawka kawm chin a nei ṭhin a, bialpa anga han kawma han cheibawl kha a thiam mang lo. Chrisa pawh a rawn haw hnai tih Mafeli te kâ aṭangin a hria a. A huphurh angreng deuh,. A thil hriat zana a thinrim ang em em kha chuan rim tawh lo mah se; awlsam taka a hma anga a biak leh theih chu a inring tawh lo. Tupawh hi eng mi pawh ni ila hlutna nei lo kan awm lo, tin mahni tawkah tuman midang infiamna leh an chhaih kual mai mai nih kan duh lo bawk. Tatai pawh chu chu a rilru dik tak a ni. Chrisa chu a tan a sang em em a hria, chutih rualin inchawi nana hman mai mai tur atan a inphal bik reng reng lo. Chuvang chuan Chrisa hi a hua a ni. 

Duata nen an leng chhuak ve dawn a, engtia han inchei tur nge a hrethiam vak lo. A thawmhnaw neih ho lah an pa hlawm mai sia! A nih ang anga lan chu ṭha a tih avangin a hma ang thoin a inchei a. A chhuak ve ta. Duata hian Chrisa ang thoin bullet a nei a,Chrisa ang êm chuan a inhmeh ve lo thung.. Senhri park-ah an kal a. He park hi an hawnna a la rei lo naa a lun thei mep mep viau. A nuam êm mai a, a in mi tan lah a remchangin inngaizawngte tan lah chance neihna a awm ṭha si. Chumini pawh chuan a lun viau. Tatai te pawh tlema mihring awm lohna deuhah an kal a. An lai dun ṭâwt mai. 

"Ehe le! Tatai te chu!" Mafeli leh Duhawma te nen an inhmu thut mai. 

"Ehe! Mafel" a ti ve hluai a. 

Mafeli chuan awmze nei zeta rawn melhin, "Kha kha mi?" A ti sep. Tatai lai chu a nui pût pût a. Duata pawh a lo nui ve ringawt. An hmingte sawiin an inchibai ta liam liam a, Duata hi Tatai te inah a la leng lo a ni. An inkalsan dawn chuan, "Tata, a chhe lo aw. I thlang thiam khawp mai" Mafeli'n a ti hram. Tatai chuan a chhang tawh lo. Chumini chu an hlim dun ve khawp mai. A fawh te pawh an infawh ve kha! Tatai zak lutuk chu a sen vek thei mawle. A'n zei lo laileng khawp a, Duata pawh a nui huk mai. Mahse, "Tikhan ka ngaih a ṭha daih zawk" a ti hmiah. Hlim takin an haw ta a. In chhung an lut chu Tatai a phu chiang kher mai. Chrisa lo ṭhu run a va hmuh chuan a lung chu a thlawk chhuak dawn emaw tih mai tur hian a awm. Duata lah, "Lo peng ve la" a tih avangin a lo lut ve tawh ting tang bawk si. Awmngaihna reng a hre mang lo. Chrisa lah chuan a rawn melh kur bawk si, a nuin a lo be bawrh bawrh zawk a. 

"Kha kha em ni i bialpa chu?" Chrisa aw chu a chang viau mai. 

A heh petin a bu nghat ringawt. Duata pawn an boruak chu a rih êm vang nge ni awm reng nuam a ti lo a niang, a chhuak ta vut a. Tatai pawh a pindanah a chho nghal. Khumah a ṭhu a, a lum pup pup thei. A âwm te chu a dawm thul, Chrisa chu a lo haw dawn tih a hre tho nain tun tut tutah a lo haw dawn tih a hre miah lo. Amah a hmuh khan a natna kha a hrechhuak nghal. A tan game a ni tih kha..Chrisa kha chuan na hmel pawh a pu ve lo..engahmah a ngai miah lo a nih hmel e. A inbual lai te pawh chuan thildang a ngaihtuah hleithei lo, Chrisa hmel ringawt a mitthlaah a châm. Duata kha a hrilhhai viau ang em? An awmdan kha a hrethiam ang em le?! Ama tawkah a rilru chu buai ve mam mam tak a ni. Chutihlai karin zanriah ei tura a chhuk thla tur chu Jejea'n a lo call a, a'n ding leh rih. 

"Chungliana kha a tlan chhuak an ti" a rawn ti! 

"Engtin?" A ti hap. 

"Ka hre lo, a tlan chhuak an ti tawp" a rawn ti a, a buai deuh nge a dah leh daih. 

A chaw ei pawh a tui nek lo ve a. Mafeli'n Chungliana tlan chhuah vel chu a lo hre leh tawh a, a sawi zat zat mai. Thil lah hi a hre thei mai sia maw. Zanah a inremfel a, a diary hlui, Higher a kal lai ami a hmu chhuak a. A chhiar leh ta mai mai. A lung a leng veng veng mai. 

"Jeje nen dawrah kan chawl a, a bialnu thar vel a sawi leh vak a, a lerh ve sia maw..mahse, a luck ve tho bawk nen" tihte a ni nuai mai. Mary nen an boruak a reh rih viau, Naute a neih hunah a hriat theih chauh ang chu maw…sex hi ani chuan pasal a neih hmaa hman a tum lo bur. Duata bulah pawh a sawi nghe nghe kha. Duata pawn a zahsak ngei a beisei bawk. 

"Inhmu ang.." Chrisa hnen aṭanga a dawn chuan a tiphu chiang hle. 

"Eng a?!" A va ti hû a. 

"Inhmuh ka duh, sawi duh ka nei" a rawn ti ve zel a. 

"Tihian sawi mai rawh" a ti ve tlat. 

"A va mak e aw. Ka rawn kal chilh che i duh loh chuan in chungah rawn chho rawh" a rawn ti ta hmiah mai. Tatai a ner sak, a duh duh dana bawlzan a tum chu a ngaithei bik hauh lo. 

"Ka rawn kal dawn lo" a ti a. A phone a off ta hmak. Mahse, Chrisa chu a rawn kal duh tak tak ang tih a hlau ru tho, a rilru a tumtlang ropui si. Thildang a ti pah thei bik lo. A thawmhnaw a thleh laiin a pindan kawngka an rawn kik a, hlauthawng ru taka a va hawn chuan Mafeli a lo nia! Sawm pawh a sawm hmain a rawn lut nghal rawk rawk. Manganna eng emaw nei hmel a pu bawk. 

"Eng nge thleng a?" Tatai chuan a ti a. 

"Ka rai" tih thu chauh a sawi. 

"Maw?! Tu fa?" A ti hliai a. 

"Ka hre lo" a tih chuan makti zetin Tatai'n a melh. 

"Eng nge a awmzia?" A ti vat a. 

"Duhawma fa a ni lo. Tu fa nge ka hre bik lo" pawisawi loh hmel zeta rawn melhin a ti ta a. Thil mak deuh deuh hi a tawng a tawng chu a nih hi maw. 

Ṭawng leh a tum lai takin Mafeli a tho hluai a. "Ka sawi lo angah ngai ang che. I hrethiam em? Ka unaunu hrawn i ni a, ka nunah buai suh. " A ti leh daih! A chhuak zui nghal a, Tatai pawn a enzui vung vung ringawt. 

"Unaunu hrawn.." tiin a phun zui sep a. A sawi dik reng alawm. Ni e, unau tak tak an ni tlat lo. Mahse, ti nge Mafeli hian a sawi chhuah fô mai le? A lo ngaithei lo hle tak tak a nih dawn hi. Chrisa pawh a ngaihtuah zui tawh lo. Mahse, amah Chrisa ngei a pindan chhunga a rawn luh takah chuan makti zetin a lo ding nghal hluai. A pindan chu a khat hmuk hian a hria. A rawn pan zel takah chuan a tawlh hnung hret hret a. 

"Ka be duh che ka ti a ni lo'm ni?" A rawn ti hniam ruih. 

"Ka be ve duh lo che" inthunun tum takin a ti sep. 

"I bialpa kha ṭhen ang che. Bialpa nei lai ka ngaizawng ngai lo. Ṭhen la, bul kan ṭan ang" Chrisa chuan a ti nghut nghut a. Tatai thin a rim tawh, he pa hian a hmusit a nih ber mai hi a. 

"Ka ṭhen bawk lo vang, ani kha ka duh ber. Nang chu ka ngaizawng ngai lo vang che. I infiamna hmanrua ka ni lo" a ti ve ta sak sak mai. Chrisa a nui hawk, "Maw? Infiamna a! Hmanrua maw? " Ti el lek lek hian a ti a. Mafeli thawm niawm tak an hriat avang leh Tatai'n midang hriat a hlauh êm avangin Chrisa ka chu a hupsak tawp. Chrisa chuan lo pawm vatin khumah chuan a bawhbet ta a, Tatai a tal nasa, an inhnaihchilh takah chuan Chrisa zu rim chu a hre ta chiah. A lo hetih vang a nih dawn hi heti taka a rawn zuam ni. Tatai chuan a nam ta vak a, Chrisa pawh chhuatah a let thla hlawl mai. Chutihrual chiahin kawngkaah Mafeli a rawn dak a, a melh tawn zak zak. Chek hlakin, "Ka pa in hi nawhchizawrh nan hman i tum elo? Ngawi tak rawh, ka hrilh vek dawn" tih leh chhuah a rual nghal. Tatai chuan a au zui naa, a rawn chhang hlek lo. Chrisa chu melhin, "Nangmah vang a nih hi..hmela,. Chhuak rawh" a ti tuar. 

"Engkim ka hrilh ang. Lo en rawh" Chrisa chuan inringtawk zet hian a lo ti thung. An ngawih dat laiin Mafeli leh a nu leh pate an rawn lang ta a. Tatai chuan nuam lo a ti kher mai. A pa chuan, "Eng nge thil awmzia? Christopher" tiin Chrisa a melh rulh a. 

"I hmuh ang hi a ni mai. Ani nen hian kan induh a ni." Awlsam zetin Chrisa'n a lo ti! Tatai ṭawng tum chu khapin, "Zêp a ngai hleinem, ka pu ka hrilh tawh ka tih kha" a lo tihsan leh hmiah. 

Mafeli'n, "Chu! Tatai chuan Duata leh Chrisa i lo kawp a ni maw? I lo va tenawm ve. Bakah pindanah mipa hruai lutin i mutpui ngam a nia.." a lo ti zat zat a. 

"Engmah kan ti lo. Ani hi a rawn lut ringawt a nih kha.." Tatai'n a nu melhin mangang deuhin a lo ti a. 

"Ni e, a sawi dik. Eng thil mah a thleng lo. Mahse, ka bialnu hi a titau a, a roomah ka kal chilh a ni mai. " Chrisa'n a lo ti ve bawk. Midang chuan engtin pawn ngai se pawi a ti lo, a nu tihzaha tihnat hi Tatai chuan a duh lo bur. Mafeli hmuhsit theih tura awm ngat phei chu. A nu chuan, "Hetia a rûk a râla inhmuh te chu thil mawi pawh a ni hleinem. Chrisa pawh i nu a lungawi miah lo vang. Duh leh kan hmuh laiin inrim ve mai u la" a ti a. 

"Nia, ka tihpalh, a rawn chhuak duh si lo va, ka lut ta tawp a ni. Min hrethiam rawh u. " Chrisa'n a lo ti ve vat. Tatai erawh a ngawi char char tawh, Chrisa chu a huat rualin a thlavâng a hauhsakna chu a lawm tho bawk si. Engtia han tih chi nge pawh a hrethiam tawh lo. A ni awm ve tawp mai. A pa ten engtin vak mah an tih loh vang nge Mafeli chu a thinrim tawp a, a âng zui char char. 

"He inah hian mi hur kan duh lo, falak lehnghal" a tih kher chu Tatai chuan a la na ngang a niang e. 

"Mafel, i eng pawi nge kan sawi a, heti taka min tih ziah le. I sual êm mai. Falak ka ni lo bawk" a ti ve ta tân tân a. Ṭawngkama mi hauh a thiam ve vak lo, insual a ni mai. 

"In nufa hian mi chuang in nih hi, kan khawngaih che u a tihian kan tuamhlawm che u a, min zah lo hrim hrim" a ti chu a pa thinin a diar ta lo nge a fanu chu a beng ri ta ṭhawk mai. 

"Hemi te nufa vang hian min beng a maw? Nangpa hi i nêp thlawt. He mite hian an ei zo tawh che a nih hi" Mafeli'n a ti tuar tuar. Rinpuia te nupa an awm lo hlauh a, a lawmawm e. A pain a pindana lut tura a tih chuan a kal tau sawk sawk a, "Zawngho, in la hria ang" a ti hram. 

Pi Zuali enin, "A pawi ka ti, hrethiam hram teh u. A mize danglam ta lutuk hi kei pawn ka hrethiam tawh lo" a pa chuan beidawn hmel zet hian a ti a. 

Chrisa'n, "Mafeli hi a dam lo a nih hi, natna a nei..kan hre vat ang" a lo ti nghut. A pa te kalsawn hnuah Tatai chuan, "I sawi kha a dik ang, natna a nei a ni. Eng emaw tak. " A ti ve a. 

"Ka rinhlelhna a rei tawh, amahah hian awm ve dang an awm a ni" Chrisa pawh chuan a lo ti ve. 

Tatai'n, "Kal tawh rawh" a tih chuan, "Ka sawi kha hrereng ang che. I bialpa chu ṭhen la, kan pahnihin kan inzui ang. A chiang em?" Tiin a rawn hnaih nghal, Tatai a tawlhsawn a, "A tawk. Kal rawh" a ti sap. A kal ve ta mai bawk a. A âwm dawmin a ding vang vang. Mafeli leh Chrisa ngaihtuah chhawk sekin a zan hun chu a hmang ta a. Duata chu ṭhen a tum lem lo, fair a tih loh bakah Chrisa toys nih a tum lo bur. 

A tukah pawh a tho ngui bûr mai.mak deuhin Mafeli lah a fel leh em em a, a mak a ni, he nu hi. A ngaihna tak pawh a hrethiam tawh lo e a. Class kal turin a insiam a, Duata nen an la inbe miah lo, a rawn biak loh hi chuan a va be hmasa ngai lem lo va, ani Duata lah a reh rih si. Mafeli nen an chhuak rual a, "Ka va thlah ang che" a la ti zui! 

"Ngai lo mai" tih leh kalsan hmak a rual. Na takin a siam a, a tihnat tawh hnuah ṭha zetin a be leh zel si. A namnul mah mah tawh a ni. Jeje te nen an inzui leh ta dat dat mai. Chhuna thil an ei laiin Duata'n a lo call a, "Zing aṭangin ka buai a, min rawn biak pawh i tum ve si lo" tiin a rawn vui nuah nuah mai. 

"Kei pawh ka buai ve lutuk a. " A ti ve tawp. 

"Ka û a lo zin a, naktuk tlaiah Jeje nen chaw lo ei r'u aw. A hmu ve châk che a" a rawn ti. Tatai'n, "Awii a zahthlak e" a ti ve thung. 

"A ho lutuk..engmah zah tur a awm lo" a rawn ti a. Jeje a tel ve dawn tho chuan a hreh ṭûng bik lo. Chrisa a ngaihtuah chhuak ve tho, mahse, an inchawina kha a hrechhuak nghal zel si! Nizanah khan Chrisa khan mak a tih hmel viau mai a. Mahse, lem a chang pawh a ni thei. Ani ang tawnhriat ngah lutuk tan khatiang mai mai a harsa lo. Chuvang chuan Chrisa sala tana a hmanrua nih a tum lo bur. 

An bang hma ve deuh bawk a, Jejea'n tshirt lei puiah a sawm nasa sia, an inzui leh ta hnak hnak mai. Dawr pakhata an lut chu Chrisa leh nula pakhat no zet hi an lo awm ve a. Tatai chuan chhuah leh mai a tum naa Chrisa'n a rawn hmu ta si, a rawn ko leh ta lauh mai. 

"Kimkim, hei hi ka cousin Tatai a nih hi, Tata, hei ka bialnu" tia a inhmelhriattir lai chuan Tatai chuan nuam ti vak lo hian a lo nuih ve sak. Kimkimi chuan, "Man deuh ve" tih pahin a rawn thlek zauh lehnghal. 

Chhan ngaihna a hre tawh si lo chu Jejea a kai dawr dawr a, an chhuahsan ta a.  

"I ṭha em?" Jeje chuan ngaihtuah hmel deuh hian a ti a. 

"Umm ka ṭha, engvangin nge ka ṭhat loh ang?" A lo ti zangkhai vah. 

"Enteh, Ta, kei chu Chrisa hian a duh che ka la ti fan, mahse, Duata nen in lo inzawm tawh sia, ṭhen tur chuan ka duh chuang lo che a" a ti malh malh a. 

"Chutiang sawi tawh suh, a hneawm" a lo ti hmak. A mood erawh chhe tîk têk tak a ni. Nizan lawkah Chrisa'n Duata ṭhen turin a nawr a, vawiinah a bialnu nen a inhmelhriattir leh a maw?! Hringnun hi a mak zung zung ṭhin teh e. Tshirt an lei zo a, an haw nghal nal nal. In a va lut chu Ruati âng thawm a hre zui nghal. Arami nen an lo indinchilh ran mai a, an thinrim dun hmel viau. 

Inthlahrung zetin, "Eng nge thleng a?" A ti a. 

Ruati'n, "Nang kha chu lo inrawlh lo law law rawh. He chhungkaw mi leh sa i ni ve lo" a lo ti chang fak mai. Ti nge mi chuang a nihzia hi an hrilh fô mai le?! 

"Aw le" ti ve hmakin in chungah a chhohsan ta a. Zanriah ei tura an rawn koh hma chu a tawm ta hmiah bawk. Ama tawkah a rilru a buai, a hah. A hne engkim mai chu. Zanriah ei lai pawn a ṭawng lo, a nu pawh a ṭawng hek lo. Ruati leh Arami intihbuai chhan a hre lo va, ni e Ruati sawi ang khan a hriat ve a ṭulna a awm lo te pawh a niang e. Lehkha zir tur a inchhawp rum a, a rilruah thildang hlir a awm bawk si. 

Sawma'n a lo call a. Rang zetin a la, "I lo hre tawh em? Seni thattu jail aṭanga tlanchhuak kha a ruang an hmu" a rawn ti! 

"Chuan" a ti mawl tawp. Thildanga rilru sen leh chu a zuam tawh hlawl lo. 

"Ih, a kawr hma ipteah lehkha an hmu a niawm e. Zovi, Nunpuii leh Peka te pawh kha a thah an nih thu a inziak an tia..mahse, investigation kal lai a nia, ka hre thui bik lo" a rawn ti duah a.

"Engmah ka ngaihtuah tak tak thei lo" a ti ta thlâwt a. 

"Ka hrethiam che alawm, naktukah kan sawi ṭha dawn nia. Test tur ka'n zir ang e" a rawn ti ve mai bawk a. Hah hmel deuha thawk la hawkin, "Ka hne tawh" a ti sep. 

Dar 9 bawr vel a niawm e. Mafeli thinrim inhrosa thawm leh Rinpuia ṭawng bul bul avangin a ngaihtuahna aṭangin a rawn harhchhuak a. Va inrawlh a tum hauh lo thung. Mahse, an ṭawng rin bakah a pate pawh an rawn chhoh avangin an thawm erawh a ngaichâng ve deuh. 

"Min timualpho hle mai. Shillongah i chhuk vang vang ang. Sex video nei tur êm chuan ka lo ring pha ngai lo che asin" A pa ṭawng khur dawt dawt avang chuan a meng zau kâwk. Mafeli chuan video a lo nei a maw?! Ni e, hetiang hun hi a thlen a la ring reng a ni. A rilru chhiat vang pawh ni hran lovin Mafeli chu khawngaihna a nei miah lo thung. A chantawk leh phutawk ve rengah a ngai hmiah mai. Mafeli lah chuan thiamthu a sawi zat zat mai a, a ṭap ang per lehnghal. Tatai chuan boruak a hne êm avangin ear phone vuahin a maimichhinsan daih. 

A tuk zinga whatsapp a en chuan an ṭhianho groupah Sawma'n Mafeli te video chu a lo dah a, Mak deuhin Duhawma nen an ni tlat lo. A la hmuh ngai loh mipa nen a ni tlat, sex hman chu nuam a tih hmel kher mai. Tatai chuan a en rei peih lo, a ten tlat! 

Duata nen an inbia a, tlaiah a in luahah chaw a ei dawn a nih kha..Jeje nen an ni tho va, a intiphur chawp ve mai. Chungliana ruang hmuh vel chu whatsapp leh facebookah pawh sawi dan a tam viau, an sawi dan lah a inang lo hlawm. News collector inti ṭhenkhatte hi chuan puangzar hmasatu nih an duh luatah thu belhchiandawl lo an update fô! Tikhan mipuiah inhnialna a chhuah leh phah a, muangchanga thu chiang leh belhchiandawl zawk ngaihchân hi a him ber mai e. 

Chungliana chu sawi tawh angin chite lui kamah a ruang hmuh a ni. A la chhiat loh danah a thihna a la rei vak lo a nih hmel. A iptea an lehkha hmuh erawh eng tak nge tih puanzar a la ni lo thung. Hriat vat a chakawm khawp mai. Tin, a hre thui deuhte sawi hmangin a kekawr hnunglam ipteah cheng 80000 hmuh a ni bawk. Ani jail tang tlanchhuak khan engtin nge chutiang zah zah pawisa a neih theih ang tih chu buaina a ni. A rûk a ni maithei. Police lamin an la chhui chhuak mai ang chu maw..

Mafeli video lah a darh nasa mai a, an sawi zui nasa bawk. Tatai chuan a ngaihven peih vel lo, a ṭhiante pawn an zawt naa sawi tur a hre lem lo. Class kal tura a insiam laiin Chrisa aw a hre thut. Mahse, a inthunun hram hram..

A va chhuah ve chuan, Chrisa chuan, "Keiman ka zuk hruai ang e. Entir i ngai Mafel, i dam lo" a lo ti mawlh mawlh a. Mafeli erawh a ngawi reng. Zak hmel pawh a pu hran lo. Ngen hmel zet hian a ding khawng lah mai, chutihrualin a mitmeng ngun taka en chuan eng emaw inphûm ru emaw a awm tih hai rual a ni lo thung. Chrisa chuan Tatai chu hmu mah se; a be lem lo. Tatai paw'n be lovin ngawi rengin a kal pel a. An rilru erawh inhriatsak tawn lo mah se; an inngaihtuah zui ve ve chu a rinawm. 

College-ah pawh Chungliana leh Mafeli video bak titi dang a leng meuh lo a ni e. Tatai chuan a hne ru viau thung. Chungliana chungchang erawh hriatchian deuh chu a châk, A tir phat aṭanga a rilrua awm Chungliana thiltih a nih rin lohna chu a la nei zui zel naa Jeje te ho bulah chuan a sawi duh tawh lem lo. Amanda kha a inrawlh ve dawn tih thawmte a awm a, inrawlh tak tak se tualthattu diktak te hi han thur chhuak nalh nalh se la ṭha tur. Tlai lam programme a neih chuan a ngaihtuahna a luah deuh tho bawk. An bang hma a, Jejea a lo nghah laiin Chrisa'n a rawn call a. Lak loh a tum zet naa chhungkaw thil a nih a rin avangin hreh angreng takin a la ta hram. 

"Zanin tlaiah ka nu piancham lawmna ruai kan buatsaih a, in chhungkua pawh kan beisei che u. Ka pu khan a lo sawi theihnghilh daih a, tin, Mafeli awmbo tur thlahna chawhlui te pawh a ni thei bawk ang" a rawn ti nghal mawlh mawlh, Tatai a ner sak thung. 

"Sorry, programme dang ka lo nei tawh a. Min hrethiam mai r'u" zâm lo anga lan tum takin a ti a. 

"Mahse, kan lo beisei tawh che u asin. In programme chu a sawn theih zawk loh em ni?" Amah ang lo deuhin zaidawh zet hian a rawn ti a. 

"Kan lo duan lawk vek tawh a nia, ṭhulh chi a ni tawh lo" luhlul takin a lo ti thung. 

"Okay, a ṭha alawm. Min pehhelna kawng i zawnna lamah fimkhur la, him ang che" a rawn tih nghut chuan Tatai rilru a hneh deuh. Mahse, ṭhulh ngawt chi a ni tawh bawk si lo. A hmain lo sawi lawk te chu nise a insiamrem ve mai tur a nia, a thiam lohna em em pawh awmin a hre bik lo. Chrisa chuan a dah ta a. Mafeli kha Shillongah chuan dah an tum tak tak em ni ang? He hmeichhe danglam zet hi Tatai pawn hei chen chenpui tawh mah se; a la hrechiang thei lo chu a nih hi. Jeje te an rawn bâng a, pengkawi lovin Duata in luah lam an pan zui nghal. Duata û kan han ti tak naa, a nu û fanu, an ina awm ve reng reng a ni , Duata te pawn unau pianghmun ang maiin an en tawh a ni. 

"Hei hi Tatai chu a nia, Tata, hei ka û chu aw. Cindy a nih hi.." tia Duata'n a hmelhriattir lai chuan Cindy chuan ngunthluk fê hian a lo melh chhuak vek thung. Nui rah rah chungin, "A va pa ve.." a ti sap. He thu dawnsawn ngai fô hi Tatai pawn a hne ve viau tawh. Mahse , a nuih sak ringawt. Duata in luah chu a felfai thlarh mai a, a zau over lo nain nuam reuh tak a ni. Vawksa leh arsa an lo siam a lo nia. Cindy chu Jeje te nen pawh lo inhre sa an ni bawk nen, an inkawm thei viau. 

Tatai erawh sawi tur êm êm a hre ve lo, an bulah a lo tawlh ve reng ringawt. Cindy chuan, "Tata, video viral kha i laizawn maw?" A tih chuan, "Ni lo, ka nu pasal fanu a nih kha" a lo ti vat. 

"A va lawmawm ve" a ti ve mai bawk a. Zêp nâk emaw Tatai chuan an chaw eikhawm chu nuam tihna a nei hran miah lo, Duata ngenna zahawm a tih êm vang chauh a nia. A rilru kil khatah chuan Chrisa te in lama chhungkaw ho kal khawm chu a awm ve reng tho. Chrisa kha thinrim âwm pawn a lang lo va, ni e, engvangin nge a thinrim ve ngawt ang? Bialnu hmelṭha tak a nei a, Tatai te chu a mamawh tawp nang. Chu thu hmang chuan a inhnem hram hram a ni ber e. Chaw pawh a ei lui ve deuh bawk a, a puar ve viau mai. 

Duata nen chauh an bathlara an din dun laiin, "Nuam i ti vak loin ka hria. A chhan ka hre thei ang em?" Tiin a zawt ta. 

"Nuam ka ti reng e a..ngati nge?" A lo ti let hû. Duata pawh a nui ta ringawt a. Cindy ten an rawn pawh ve takah chuan thudang an sawi ta daih. Dar 8 pelh hretah Duata chuan a thlah haw ta a. Leng lut tur pawn a sawm ta lem lo, an in chhung boruak a rit ru angreng si a, nuam a ti lovang tih a hlau a ni ber. Reivaklo erawh an ding dun a, "Ka rawn bia ang che. Nih phawt aw" tih paha Duata'n a rawn fawp zauh chu a lo dawh mawl tawp. Inah a luhsan ta a. 

A intleuh thuak thuak a. A inthlak fel hnua a phone a en chuan, Chrisa'n, "I thianghlimna hloh lo tur khawpin aw" tih thu a lo dah. 

"Aw le, tehreng mai" tiin a chhanglet ve. A la rawn ngaihtuah ve hram zel chu lawm tur nge lawm loh tur tih pawh a hrethiam ta lo. Mafeli a lo la haw lo nge a thawm a reh riau. Rinpuia te nen hi chuan an pindan a inhlat deuh bawk a, thawm a hriat ṭhat theih loh. Ruati'n a ṭawngkhum dan kha a la hrereng, he ina a nu nena an lut ve kher kher hi pawi tihna te pawh a nei dawn lek lek hial! Midang tan an hnawksak a niang ,an thinrim apiangin an mi chuanzia chhamkhum an ni ziah mai si. Duata nen an inbe zuai a, lehkhazir pawh a tum lem lo. A chau deuh nghulh mai. Mafeli thawm avangin a harh a, a thawm a dim vak bawk si lo. Dar 2 leh 34 mins a lo ni tawh. Tun ang huna hetia thawm a neih hian Tatai âwm a nuam lo ve ziah. A tukah thil thleng a awm ngei ngei bawk ṭhin. A hlauh ang ngeiin zing dar 6 bawr velah a pindan kawngka chu an rawn kik ta dawt dawt mai. A ranga rangin a va hawng a, a nu thlabar hmel a hmachhawn nghal. Engmah pawh a sawi hmain, "Rin harsa ka va ti ve..Tata, tualthattu maw i lo nih?" A ti ta mai! Tatai pawh a tawlh hnung dawrh..

"I sawi awmzia..ka.." a tih bak nak laiin, "In hnuaiah police ten an nghak che" a nu chuan a ti leh nghal zat. Thawk la hawkin thlak pawh inthlak lovin in hnuai lam a pan a, a nu sawi ang khan Police pahnih an lo awm. A pa leh Rinpuia te nupa an awm ve bawk. Tatai chu an rawn melh ṭhup mai a, ani lahin a ngaihna reng a hre si lo. Hrilhhai zeta a melh kual laiin Police pakhat zawk chuan, "Tukin zing dar 2 bawr velah i ṭhianpa Malsawma chu thah tuma beih a ni a, mahse, a lo beihlet ve avangin a that hman lo. Tualthah tumtu chu a tlanchhe ta a, a tlanchhiatna lamah he thil hi hmuh a ni a, nangma ta a ni tih i ṭhiante ka aṭangin kan hre tawh a ni. " Tiin an ṭhianho an la dam kim laia an order, silver ṭhi anmahni hming leh thlalak ṭheuh locket-a awm chu a rawn lek ta va mai le..

Tatai chuan, "Ka ta chu a ni ngei mai, mahse, tumah thah ka tum lo" a lo ti a. In chung aṭanga rawn chhukthla mêk Mafeli chuan, "Mahse, zing dar leh a chanve bawr velah khan eng nge i tih? Thawm dim taka i pindana i lut lai kha ka hre khiau asin" a rawn ti zat zat. 

Thinrim taka chhanlet a tum laiin Ruati'n, "Aw kei pawh ka hria. A tho satliah mai mai emaw ka tia" a lo ti var. Tatai chu an melh danah tualthattu niawm takin an melh vek tawh. 

Tihngaihna a hriat tawh loh avangin "Sir, Custody-ah kan sawi thei zawk ang em?"a ti ta tawp. Police pawh chuan,"Chumi ti tura lo kal kan ni rêng a ni" tih leh kutkawl rawn phawrh a rual a. 

"Kha chu a ngai lovang, khawiahmah ka tlanchhe lo vang. Thudik hi a bul rât aṭangin chhui a hun tawh rêng a ni. Nu, i fanu hian tual ka thah ring lo la, ka ṭhiante nunna phei chu nangma nunna tih loha ka ngaihhlut ber an ni. Khawngahin min ring ang che aw" tiin a nu a va melh a. A nu pawh chuan, "Beiseina sang tak ka lo nei ang e" tiin a thlah ve ta thlap. A hriat theih chinah a fanu hi patil ang thawthâng mah nise; tumah a va beiin a va tibuai hmasa ngai bik lo tih a hre ve tlat. Tin, nunna êm chu a lak theih a ring hek lo. A pasal leh fate lakah erawh a heh a hil hle dawn a nih hi. A pawi lo, a fanu tan chuan vahvaih nawn pawh pawi a ti bik hauh lo ve. Tatai chu an hruaichhuak ta poh a. Kawngtluanin a ṭawng lo, police lam pawh an ngawi ve reng ringawt. 

Station an thlen chuan case IO nen an inhmachhawn nghal a. Zâm lo turin amah leh amah a infuih nasa ve ngiang mai. Tu ten emaw an set up a nih rinna a nei lian hle bawk. Malsawma ngei pawh koh a ni a, ani paw'n Tatai chu a ringhlel thei ngawt bik lo. A sawi danin, "Games kan khel leh a, ṭhianpa Faka pawn riak mai turin min ti tawh mawle, mahse, ka ex Mamawii'n buaina a tawh thu leh hmanhmawh taka inhmuh a ngaih thu a rawn sawi sia, ka mu tawh zet a, ka haw ta a ni. Haw paha hmuh ka tum kha a nia, ka call a, a la leh thei reuh si lo. Min lo biakna number pawh ka la kawl thlap e, ama number hman ṭhin a ni lo. A hnu deuhah msg-in inhmuh a duhna hmun a rawn sawi a, rinhlelhna ka nei miah lo kha a mak angreng. Ka va thlen chuan a lo inkhuh hlûn a, min hnungchhawn zawngin a lo ding bawk. Kawih her ka tum rualin min vih a tum a, chemte kha ka lo hmuh hman avangin mim vit hman ta lo, a tlanchhe zui ta a, chuan ṭhi kha ka va hmu ta nghal mai bawk nen, Mamawii hmangin tu emaw hian min thlem chhuak a nih hi ka ti ta nghal a. Tin, Mamawii a hriatchian danah ka ṭhian hnai tak a nih ngei pawh ka ring bawk. Tatai hi ka ringhlel miah lo nain ṭhi kha a thlauh ta tlat bawk si, tu emawin a set up pawh a ni thei. Khawngaihin tualthattu diktak hi man hram rawh u" tiin. 

Jeje phei chuan Tatai chu rinhlelhna chhetê mah a nei lo. "Tatai a ni lo" tih bak a sawi hek lo. Police lam pawh an lu a hai viau mai. Tatai chuan a ṭhiante thah ngawtna chhan tur a neiin an hre bawk si lo, chutakarah a ṭang na bawk si, an thusawi zawng zawng an han ennawn leh chuan tu emawin Tatai ṭhiante chu nuai chimih a duh a, an inrinhlelh ṭhûm theih nan Tatai lem a chang a ni mai awm mang e an ti ve thei ta. 

Tatai pawh chuan engmah zêp hun a ni tawh lo tih hriain Mafeli awmdan leh mize danglam tak te, hetiang thil a thlen dawna zan emaw zing lama thawm a nei ziah te,a ṭawngkhum dan zawng zawngte chu a sawi ta hmiah hmiah a. Police lam tan pawh kawng a êng ṭan ta. Chungliana aṭanga an ennawn leha Nunpuii aṭanga an hrut chhoh a ngai leh dawn ta a ni. Mahse, mipui bum nan tualthattu dik tak chu Chungliana kha a nihzia an sawi ta tawp a. A lehkha hnutchhiahah khan khang mi pali a thah thu chiah kha a chuang a, chu chu ṭanchhanah hmangin tlang an bum rih ta phawt mai a ni. Tatai pawh koh a nih vangin hre tawk an awm lo thei lo va, khawi emaw laiah chuan ama remruat leh tihtir vek angin an lo sawi leh hut hut tawh. A ngaihpawimawh rih loh mai a ngai a ni. 

Ni 2 a liam hnuah chuan sex video viral vangin Tatai chungchang sawi pawh an bansan chho ṭan ta a. Mafeli pawh Shillongah a la chhuk lo fô, Tatai tana awm nawm lohna tur hlirin ṭawngka a cheh a, a pa pawn a khak hial tawh. "Tualthattu nena in khata chenho ka duh lo" tih thu phei chu sawi zing tak a ni. Duhawma lahin a video vangin a ṭhen ta hmak bawk sia..a rilru nâ leh hah tal vel chuan harhfim lai a nei mang lo tihtheih a ni. Zanah a chhuak reng a, a kalna tur a sawi ngai hek lo. A pa te pawn tihngaihna an hre tawh lo nge an en tawp ringawt. 

"Tualthattu diktak i hre duh em?" Chrisa msg chu a chhiar nawn sek. 

"Duh e" a va ti ve mai a. 

"Mafeli" a rawn ti tawi tak. 

"Ka ring alawm" a va ti ve mai a. 

"Mahse, amah a ni lo, amaha mihring dang awm thiltih kha a ni" a rawn tih chuan, "Maw?!" A va ti hû a. 

"I la hre vek ang..nakinah. " a rawn ti ringawt. A chhang tawh lo. 

A tuk chawhnu lamah number hriat loh aṭangin call a dawng a. A lak chuan Chrisa bialnu kha a lo nia! 

"Tata, lemchang tawh suh. Chrisa hi hnar tawh suh. I duh a, a duh che. Sawifel vat rawh u" a rawn ti teh ngawt!

"I sawi awmzia ka va hre lo" a tih chuan, "Kei chu a bialnu lem lem mai chauh ka ni. Chrisa hian ka hriat theih chinah nang tluka hmeichhe ngaihven a neih ka la hre lo. Inbum tawh suh u.." a rawn ti duah. 

Sawi mai tur a haihchham deuh, "Tun lawk khan i bialpa Duata'n hmeichhe dang a lo kawp avangin Chrisa nen an insual zo chiah.." a rawn tih leh takah chuan a ding hluai ringawt..