Tatai 6

TATA-I (6)

Ziaktu : Toni Râlte

Rinpuia te inneihna tur velah pawh an buai chho ṭan a. Tatai erawh a ngaihven loh lam ni bawk nen, a ṭangkai ve vak lo. Mafeli mizia pawh a buai leh ta vak lo. Mahse, Tatai chuan hnaih tam loh hram a duh. A nu pawh khatia Mafeli a awm takah kha chuan an inbe mang lo a ni ber e. Amah Mafeli erawh chuan khang thil thleng kha a hre leh tawh miah lo niawm hrimin a zia a dang leh vek tawh. Alice nen an inzui chhuak nasa a, inah hmuh tur an tam lo khawp mai. Pu Hruaia ṭhatna riau chu Rinpuia hnenah, "Inrawlh vak ka tum lo, i insensona tur âwm zat ka pe che ang a, chumi chuan inkhung len tum la, i hman ban leh i ta a ni zui tawh mai ang" tiin a pawisain a pe hmiah a. Rinpuia tan puitlinna kawng ṭha tak a ni. Nu leh pa tam zawk hi chuan kan fate kan ring tawk lo nge engkimah kan inrawlh ve zel a, an kuta pawisa hlan kha an hreh ni berin a lang.Nupui pasal nei mai tur an fate pawn mahnia inngaihtuah tum buai lovin nu leh pa an ring ta ṭhin a, puitlin an hlat tlat zel. Rinpuia erawh a pa finna azarah a rilru a sêng nasa a, a kuta pawisa a han awm takah chuan senso tlêm thei ang bera tiha a bang pawh an nakin hun atana khawl a duh ta chiah rêng a. Thil ṭha tak a ni. Nu leh pate chawm tura nupui neih ve ngawtte hi a fuh lohzia kan hriat chhoh zel mai hi maw…

Ruati te lam pawh an ṭang ve viau. Pui hut huta lawm an tum hran lo naa, an khawsak a pangngai ve bawk nen, thuamchhawm tur lamah an turu hmel viau. Ruati chu raino haw chi a ni ve bawk si a, a cherin a thu that mai. 

Hetih lai kara sawi hmaih theih miah loh chu Mafeli ex Duhawma rawn kir leh hi a ni, nge Mafeli khan dâwt a sawi zawk. A hma ai mahin an boruak a ṭha zawk a, Mafeli nen an chhuak zut reng mai. Pu Hruaia hi helam kawngah hian a strict vak lo nge ni, a enliam mai zel a. A ṭha vek a ni teh chêk ang chu..Chrisa pawh Malaysia-ah zin a tum deuh a, Rinpuia te inneih hnuah law law zin a tum deuh. Tin, khatia Tatai a dawra a hruai luh aṭang khan a be zui ta miah lo lehnghal a! Tatai pawn a ngaihven lem lo. Mahse, a ruk tak chuan chutia a reh leh hmak chu mak a tiin a ngei lek lek zel. Rinpuia'n ṭhiana a hman dawn vangin an inah pawh a rawn lut zing a, Tatai chu loh theih lohah bak a be ngai meuh lo. Mahse, nikhat chu Tatai te an ban hma deuh avangin Jeje leh Sawma te nen Lawmkima te restaurant-ah an chawl a. Chrisa leh Alice te bakah Amtea te an lo chawl ve a. Alice chuan a rawn nuih var var. A nuih let ve a. Chrisa erawh chuan a melh ṭhak lo. Eitur an chah a, an rawn dah har lutuk chu zaidam lem lo tak Sawma chuan waiter koin a chhan a zawt a. An inbiak lai mêkin nula pahnih an rawn lut ve a, rei pawh an ṭhut hmain an eitur chah a rawn thleng ta mai si. Tatai te chah kha siam harsa pawh a ni lo va, chuti taka hun an duh rei chu a thinrimthlak ve bawk a ni. Sawma bawk chu a va kal ta hmiah a, a hnu lawkah an inhnial ta deuh nge ni an thawm a ring deuh. Manager a rawn lang ta hlauh a. Sawma chuan thil awmzia a han sawi chuan, "Ekhai! Chutianga nghak peih lo te chu lo chawl malêk ula ti nia. Min chhuahsan thei ang" a ti ta daih mai. Awm ve dangte pawn mak an lo ti viau mai a. 

Lungawi lo zeta chhuah an tum lai chuan Chrisa aw hian, "Nang kha ban i ni. Manager ni tlak i ni lo ve. Tin, waiter pawh kha i tel ve ang..keini pawn kan lo hmu reng, dikna in nei miah lo" a rawn ti ta hmiah mai le..

Manager chuan, "Min ban turin tu nge i nih a? Ve mai mai a che" chapo zet hian a lo ti a. 

Ani hi kar 2 chiah a la thawhna a ni. Staff te pawn an sawisel zauh zauh kha a ni rêng a. Lawmkima ṭhianpa ṭhian lehchhawng a ni. A zia reng reng a chapoin a hnuaia thawkte tan chuan a tawrhhlelhawm ngawt tak ang. An manager ni ṭhin, Chhim lamah an pem thut vanga hmanhmawh taka an lak thar kha a ni a, zir chianna pawh an nei fumfe lo a ni.  

Chrisa chu a nui hul hak a. A phone phawrhin tu emaw a call nghal. "In manager hi a che mawi vak lo va, ka ban ta mai. A thar ka lo ngaihtuah ang" a ti leh hmiah. Manager leh waiter te chu an meng phâwk tawh hle. Eitur an pek hmasak zawk nula te khan, "Keimahni vang a nia, khawngaihin bantir lo hram rawh" an lo ti a. Mahse, an buai tirha an ṭawngkam kha awm vete chuan an la hre vek. "Kan landan aṭangte hian kan zahawmin kan zahawm lo ve alawm. Kan inthlau em a, min lo pe hmasa a nih pawhin sawisel ngam tur in ni lo, bakah hetiang dawr changkangah te chawlh ve in tum reng reng, ei man pawh in nei zo dawn em ni?" Tih kha an ṭawng duh dan a ni a. Chrisa chuan a ngaipawimawh tehchiam lo, chhan erawh a chhang lo thung. Lawmkima pa berin Chrisa thutlukna chu a pawm ta sia, Manager leh waiter te chu inthlak turin an kalsawn ta hnak hnak a. Tatai chuan a enzui reng, Chrisa thutlukna chu a râwng mah mah deuh em aw chu a ti a, mahse, engmah a sawi duh lo. Thil thleng tur ang a thleng zo vek si a. Dik tak chuan Manager kha a ngei ve lah tak bawk a, Lawmkima te pawn thil thlen dan hria se an thinrim ve tho vang. Eitur pawh an rawn pe ta a. An boruak erawh chuan a hma a pha tawh lo. Jeje te chuan Chrisa hnenah lawmthu an sawi a, dam thlup hian, "Ani kha soup a hawp leh thut ang e, a sa thei si" a lo ti daih! A ngaihna hre lo zetin Tatai an melh a, ani lah a lo nui rah rah. 

"Sawi chhuah kher a ngai lo" a ti sap a. Alice chuan, "Chris, haw tawh ila, zanin programme kan neih kha..Tata, kan kal ang. Zanin chu Chrisa te inah ka riak ang" tiin a rawn buk khum zauh a. Chrisa bânah a kuah bawk. A intih neitu hmel kher mai. A cousin hi a chhuang ve êm a ni. Bakah an inpawh zual bik bawk nen. 

Sawma'n, an ṭhut fel hnuah "I cousin thar chu leh! A melh dan che kha a puanhnuai riau" a ti zauh a. Tatai'n, "Ngawi rawh" a lo ti hmak thung. 

Zanah Chrisa chuan, "Ka hnaih loh che aṭangin i pa leh ṭan tlat..Zanin chu pangpar hlir lo ngaihtuah teh aw" a rawn ti a. Tatai nuih a za ngei mai. 

"Pianpui mizia a thlak ngawt theih loh, pangpar te chu ka ngaina reng alawm" a va ti ve a. 

"I pianpui ni mah se; ṭhenkhat kha chu i thiante aṭanga i neih te pawh an ni alawm.." a rawn ti. 

"Ka mizia thlak i tum tihna mi?" A va tih chuan, "Ka beidawng ngai lo ka tih kha" a rawn ti. Tatai lungphû a rang deuh. Eng nge maw a hriat ni..

"Ih maw, exam zawhah hian bialpa neih ve ka tum alawm" a va ti a. Chrisa a reh deuh vang vang, a hnu deuh fêah, "A ṭha alawm. Mipa hual lawk te i nei tawh em?" A rawn ti a. A sawi laklawh tawh si..

"Nei lo, Jejea'n a lo zawng dawn" a la ti tak deuh deuh. Chrisa chu a nuih a za viau ang. 

"Ka rintlak loh em ni?" A rawn tih chuan a rilru a buai deuh. A bialpa atan nge a tih a a bialpa tur zawnsaktu atan zawk..chhan dan tur a hre lo hle. Ṭawngsual a hlau bawk si. 

"Ka hre nang " a ti ta ngawt. 

"Ka lo bawhzui ang" a rawn ti leh. Eng zawk a sawina nge a zawt tawp ngam bawk si lo. 

"Aw le" a ti ta tawp..

"Hei kan chhuak dawn a, Alice te nen. Nih phawt. Lehkha zir nuam" a rawn ti leh thlap a. Midang hi chu a ang lo, Jeje nen pawh a kuma kum an inkawm tawh, hetiang deuh thlap thlap hian an inkawm ngai lo. Chrisa hian a ngaihsak lutuk mah mah tih a hai tawh bik lo va, a dawra a ṭawngkhum dan aṭang paw'n..mahse, a hnu lawka a inlak hran leh tak avang khan Chrisa chuan a fiam kual mai maiah a ngai tawh kha a nia, a lung pawh a awi lo lek lek hial. Chrisa duh anga lan chu a hreh viau naa, a biak tak miah loh aṭang khan a nunah engtin emaw hmun chu a chang tawh tih a hrethiam ve tlat. Mahse, sawi chhuak hmasatu nih erawh a tum lo bur mai a ni. 

 Exam a hnai ve tawh bawk a, lehkha pawh a zir ngawrh angreng. Rinpuia Shillongah a zin lawk a, an inneihna tur thil velah. Mafeli lah inah a awm tam si lo, in chungah chuan mal takin a awm a nih ber mai chu. Dar 10 velah a mu ta a. Zovi a ngaihtuah chhuak leh a, a thattu lah man tikni a awm thei si lo. Police te chu a dem lek lek tawh. A chhing siar siar tawh ang tihin Mafeli room lamah thawm a hre ta a. Mipa aw thum dût dût a nih vangin mak a ti deuh, Duhawma anih a ring nghal. An inzui nasa uchuak a, a pindanah hial a hruai lut ngam tawh tihna a ni mai. Thawm zawng zawng a hre thei bîk lo naa, an rawn luh atanga 5 mins hnu velah Mafeli rak thawm leh Duhawma rum nghut nghut thawm a hre zui ta a. Eng nge an tih tih chu a hre ve nasa. Nuam a tih loh êm avangin ear phone a vuah ta daih a, mahse, a hla ngaihthlakah a rilru a pe pumhlum thei bîk lo. An bei rei phian bawk sia..hehe..

A ear phone a hlih chuan an thawm a lo reh tawh. Whatsappah a lut zuai, Seni'n, "Ka rawn hrechhuak che" tiin Blenders thlalak hi a rawn thawn a. A nui hak. Nia, an in ho tawh chuan hei bak hi an in vak lo. 

"Nuam in va ti awm ve" a va ti a. 

"Kan la ṭan dawn chauh, Ṭhian ka chhar thar a, a show vek dawn.." a rawn ti ham ham. Zovi avanga a lusûn rilru nâ pawh a ziaawm phah ve deuh ang chu maw..an intext zawhah Tatai pawh chuan phone a dah hmak. Mak deuhin Chrisa te kalna âwm vel a ngaihtuah a, chu thil chu duh lovin a let tawn sek. 

A lo muhil ve ta a niang. Khawvar dawn hnaiah chiang zetin a harh a. A meng kual hrek hrek, eng emawni hlauhna mak tak mai hian a rawn tuam a, a chhungril a fan bawk. Dar 4 a la ri lo hlek. Khua pawh a la thim. Êng deuha mut a thiam lo va, thim leh lutuka mut a thiam hek lo. A zun chhuak chu a hre rauh rauh mai. A îp thei ta ngang lo nge tho phang zetin bathroom a pan a. A zun ker ker lai chuan a hriatsual nge a pindan kawngka ri rawk a hria. Mahse, a kalh tih a hrechiang. Hmanhmawh ru angreng takin a va chhuak a, a kawngka chu a lo la inkalh ṭhap e. Thaw huaiin khum a pan leh a, a la hma tho bakah class kal loh ni a ni bawk nen, thawh hma vak a tum hran lo. Arami'n a awl hneh ropui si. A muhil leh thei lawk lo va, a rilruah engmah a awm hek lo. A maimichhin chuan a chhungrilah hlauhna mak takin a tuam ta tlat! A meng vat a, engmah leh tumah a hmu si lo. A rilruin a ṭawngṭai nghal a, ṭawngṭai hi chu a peih ve riau. Ṭawngkam erawh a thiam lo viau thung. A ṭawngṭai thiam ber leh a dil tam nazawngin chhanna an hmu bîk chuang hleinem le..

"Tata" chiang lutuka a benga rawn ri chu mak a ti lutuk a, a meng phâwk hrâ mai. A hawi kual a, mihring tumah dang an awm ve bawk si lo. Kha aw kha a hriat hnu zawng a ni ngei mai. Mahse, a chiâi deuh avangin a ngaihtuah thiam lo. A ṭhian hnai tak chu a ni ngei ang. A mut a rawn chhuak ta êm êm a. A chhing siar siar tawh ang tihin , "Tata, min pui rawh" a rawn ti leh ta. 

"Eih" a ti hmiah. A aw lah chu a ring angreng. Chutah le a damchhunga a hlauh ber ṭum ni turin chu aw chu amah hual velin an phun ta sup sup mai. A chang leh ṭap thawm te, ngîk feih feihte, thinrim awrâwl te, engkim mai chuan amah an hual sup sup ni berin a hria. A beng a hup tawp a, a room chu chhuahsan tumin a buai khawp mai. A nu a ko tuar tuar a, in hnuai lam daih a nih avangin a thawm an hre pha si lo. Mahse, a rak thawm a ring deuh a niang, Mafeli pindan kawngka chu rawn inhawngin thlaphan hmel zet hian a rawn chhuak ta a. Tatai chuan a lo pawm chawt. Mangang êm êm hian, "Ramhuai" a ti tham ṭiak a. 

Mafeli chuan, "Maw?! Ramhuai a!" A lo ti tuar. Buk nghat nghat pahin, "Aw..ka roomah" a ti sawk sawk. Mafeli chuan hlauh loh hmel deuh hian a room chu a va bih a, "Tumah an awm lo, Tata.." a tih mêk laiin Tatai phone a ri ta tlang tlang mai. Dik tak chuan a hlau tawh. Chutiang huna call chu thil ṭha lam a ni ngai si lo. Mafeli chuan, "I phone a ri" tiin room lam chu a va melh zauh a. 

"Aih, ka la duh lo" a ti bur. Mafeli chu a nui ringawt..Amah chu va lutin Tatai phone chu a va la ta a. 

"Jeje tih a nia.." tiin a rawn lek vâ a. 

"La rawh" tiin a lo thlir thung. Hmeichhe chhel leh huaisen tak ni si kha zêp nâk emaw zing lam dar 4 bawr vela a thil tawn zet chuan a nihna diktak hmeichhe zia a rawn phochhuak chiang viau mai. Kha aw a hriat lah kha a hriat hnu a ang bawk si. 

Mafeli leh Jeje chu an inbe mawlh mawlh a, eng nge an sawi pawh a va hre mumal lo. Ṭi zetin a lo ngaichâng ve tawp mai a ni. 

"Tata, a mak êm êm khawp mai. I ṭhiannu Seni a thi leh tawh" Mafeli aw chu chu a ring lo naa, Tatai bengah chuan ṭêk den tluka ring a ni tlat! A zawi nghal nguai mai. A lu rawn hai muai muai avangin bang rinchhanin a ding khur ta hlawk hlawk a. A âwm chu hnawhtu nei ang maiin a rawn tawt hle bawk. Ti nge? Engvang nge? A mak a ni. Mafeli chuan a roomah a hruai lut a, "Engtin nge i kal dawn em? Kalpui i duh em?" A ti seuh seuh mai. Tatai erawh a ngawi reng thung. A rilru a buai a ni. Seni chu engvanga thi nge a nih ang le?! Jejea'n a rawn call leh a, a la vat. 

"A mak a ni tiraw? Engtin nge ni ang?" A rawn ti.

"Ka hre lo. Je, kei leh nang leh Sawma chiah kan bang tawh a nia" a ti thei hram. 

"Engpawhnise, ka rawn phei ang. Lo insiam la aw. A ruang an la postmortem dawn chauh e" mipa zawk nâ nâ na chu a inthunun thei deuh a nih hmel e. Tatai pawh khur ru der derin a insiam a. Mafeli khan a nute a lo zuk kaitho bawk. A nu pawh a mangang takzet tih a lang ta. A fanu hun hi a lo la thleng ve lo vang tih a sawi theih miah loh. Jeje a rawn thleng a , an kal nghal. Seni chu Beraw tlangah cottage pakhatah a ruang chhar a lo nia! A hmutu pawh cottage enkawltu a ni nghe nghe. Thah a ni tih a chianna chu a nâk dinglamah vihna hnuhma a awm a, tin, an inchai ve hrep tih pindan hnawk dan aṭang te, amah Seni tin kara vun them niawm tak lo awmte chuan a tilang chiang angreng. Police tan pawh chhui zui a tiawlsam ve deuh ang chu. Hmelma a neih âwm hriat a ni lo, a chhungte tan pawh a luhaithlak duh viau ang. Tatai leh Jeje te pawh an va thleng phei ve tawh a, ruang erawh a la thleng lo. Seni hi a nu hova awm an ni a, an unau zinga naupangber dawttu a ni. A nu a khawngaihthlak kher mai. A ṭap nasa si, a khawng thul. Seni unaute pawh an ṭap hawm hawm mai. Tatai pawh tun ṭum chu a ṭap ve ta fap fap mai. Ruang a rawn thlen hnu phei chuan ṭap riin in chhung chu a khat a ni ber. Ṭhalai kal khawmte pawh an inhru ve sap sap mai. Thil hi a mak êm a ni. A thinrimthlak bawk si, Police demna pawh a nasa leh ngawt ang. Heti zat an thi tawh a, chhui pawh an chhui chhuak thei lo chu a ni si a. 

A tawi zawngin Seni chu vuiliam a ni leh ta. Tatai pawh Seni thih sarhu lai chuan a chau thei khawp mai. Mut a hmu ṭha bawk si lo; Seni thih zana a thawm hriat zawng zawngte kha Seni rawn zualkona a nih a ring deuh. Khami hnu lamah khan eng thawm mah a hre zui tawh lo nen, amah mi dawihzep a ni lo bawk a, a hlau tehchiam tawh lo. Seni thih hnu aṭang phei chuan an fimkhur zual a, zanah phei chuan Sawma leh Jeje te pawh an chhuak mang mang lo. Tatai pawh Chrisa'n a rawn ngaihven leh ṭan a, a khawngaih ve bawk nen. Mahse, nulat tlangvalna ang zawngin a be vak ta lo. Seni thih aṭanga ni 3naah Tatai chuan thilmak deuh a tawng ta tlat! Mafeli inbual zo, a inthlak laiin a pain a call a lak theih loh thu leh Mafeli biak a duh thu sawiin a rawn call a. Mafeli rooma a va luh chuan a lo inthlak mêk a, ani pawh phone keng chungin a ding ve reng. Mafeli hnungzâng ti ila a dar veilam a niang chu, chu lai vel chu a pilh hrut mai a! Hamna hnuhma niawm tak hian a lang a ni. Seni a hrechhuak nghal nia! 

"Ngati nge i dar kha" tia a zawh chuan, "Nizan hmasa ka lem hnem deuh a, ka tlu a nih hi" a lo ti awlsam êt a. Ringhlel mah se; zawh nawn chiah a ngai tawh lo. Bakah engtin nge chutiang thil rapthlak chu Mafeli'n a tih theih reng reng ang?! A mizia zawng zawng nen pawh a inhmeh hlawl lo. A lu a thing nar nar mai. Mahse, mak deuhin a zan muthmunah te a ngaihtuah ta reng a. Mafeli zia hrim hrim te , a danglam thut thut ṭhinte, a nu leh amah Tatai a ngaihmawhzia te , engkim zawng zawng. A tho thut a, "Mahse, engvang nge ni ta ang?" Tiin a phun chhuak sep. 

Alice te nen an pathumin an bazar a. Hetia an awmho hi chuan Mafeli lakah pawh han ngaihbel tur a awm ngai lo. A duhsak ber emaw tih mai tur hian a awm ṭhin. Mahse, thinlung takin Tatai'n a pawh thei ngai lo thung. An bazar pawh chu an hawn lamah Chrisa dawrah an peng haw a, ani pawh a lo awm ve. Alice chuan a bawh leh cheng cheng a, Tatai mit a kham lek lek. Chrisa a en dan hi ani pawn a inhrethiam tawh lo. 

Chrisa chuan, "Tata, nang kawrfual em ni i hak ve dawn? In neih ni chu?" Fiamthu tih hriat zet hian a ti a.

"Aih..puan ka bih ve dawn" a lo ti vei hmak. 

Tifuh intih hmel zet hian, "Yes, hmuh i va châkawm tawh ve" a lo ti khauh a. Alice ner sak leh a mitmeng râng chu Tatai'n a hmuh hmaih miah lo. Chuvang chuan nuam lo a tih deuh avangin, "Ka ril a ṭam, thil ei ang u" a ti ta daih a. Sea food dawr hawn thar Chrisa dawr bul lawkah an lut dial. Octopus chu ei ve chhin reng reng an duh avangin an chah ta a. 

Alice chuan, "Awiii, mi râp e a. Ka duh leh lo mai. Kaikuang ka duh" tiin a order leh a. 

Kaikuang a rawn thlen chuan Chrisa hma zawna va dah pahin, "Min khehsak dawn em?" Tiin a melh ralh. 

Chrisa'n, "Naupang i nih tawh loh hi.." tiin a lo nuih suk ringawt. Tatai lam hawiin, "Eng nge a an?" A ti ta daih a. Tatai chuan Alice mitmei a veng si, "A tui" a ti sap ringawt. 

Alice chu a titau tih a lang reng. Mafeli erawh a lo ngaihven lem loh avangin engmah a hre ve lem lo. An ei zawhah an haw ta nghal a. Alice chu a ṭawng tawh mang lo, Tatai lah mi han biak sâwm vel a zeihawi si lo va, a ngawi ve reng tawp. 

Rinpuia te inneih ni pawh a rawn thleng ta. Zingkar aṭangin phur takin an che suau suau mai, Tatai pawn Jeje leh Sawma a sawm ve a. An ṭhian thi ta te an sawi an sawi mai. Ruati te lam pawh an rawn tel ṭhahnem viau. Biak in hawng lo va innei mah nise; an phal ang tawkin an innei ropui viau e. Rinpuia te inah Ruati a lâwi lut ta. Chrisa pawh a nalh narawh e, Rinpuia ai mahin hmeichheho mit a la. Tatai erawh simple têin a inchei ve, tu emaw mitah chuan a mawi ve viau tho turah ngai ang. Tlai lama inneih ruai an kil ho laiin Chrisa a rawn vei thuak thuak a, Tatai chhipa chul zauh pahin, "Ei ṭeuh ang che" a ti sup. 

A kal hnuah Jejea'n zawitê hian, "He pa hian farnu angin a en lo che ka tih kha" a ti nuah nuah. 

Tatai'n rum zeta melhin, "I ninawm" a ti hluk. Mafeli leh Alice bakah an cousin dangte pawh an hlimin chaw ei huaina an lem ve sek a ni ngei ang, an mitmeng aṭangin a lang reng mai. Mahse, tu'n an ngaimawh vak lo a nih hmel. A che buai leh a mualpho zawngin an awm lem lo bawk a. 

Zanah Rinpuia te chu hotel lamah an riak a. Tatai pawh a chau ve deuh nge, khum a deh rualin a muhil deuhthaw a ni e. A mumangah Seni leh Zovi te a la hmu zui. Biak ṭawng a tum a, an ṭawng duh miah lo..lungngai hmel an pu a, Tatai a harh chuan mak a ti kher mai. A ngai nghal vawng vawng bawk. Police lam lahin engmah thu thar an nei thei si lo. Mak tak a ni. 

Zing a harh ruala a msg dawn chuan a tinui sak mai. Chrisa hnen aṭangin ,"Nimin kha i nalh takzet. Hmeichhia i lo ni e" tih a ni. Huat tur a awm lo bawk a, "Ka lawm e" a va ti ve. 

Chawhnu lamah Rinpuia te pawh honeymoon hmang turin Shillong an pan ta rih a. Rinpuia'n ṭul a ti vak lo naa Ruati'n a duh tlat si, a hnial thei ta lo a ni. Zanriah an ei dawn hnai tihah Jejea'n a rawn call a. "Tualthattu an man tawh" a rawn ti hlawl mai. Tatai pawh a chiâi ve deuh, a nute a hrilh nghal a, Mafeli leh Alice te erawh an awm lo. 

"Tu nge?" Tia a zawh chuan, "Ka la hre bik lo, mipa a ni tih chiah ka hria" a rawn ti hlawp hlawp. Thu thar an ngaichâng leh mai a niang chu. Chutiang chuan thu chiang zawk an ngaichâng ta rân a. Tatai phei chu a za sek tawh. Jeje nen an inbe chhên mai, Jeje thu hriat dan lah a chhumbung angreng si. Seni thattu a inpuang tih kha a ni deuh tawp mai, Midang Zovi leh Peka, Nunpuii te thattu a lo ni kher ang em tih lah hriat a ni lo. Mi pakhat thiltih ni turah khan an ngai kha a nia, mahse, an ngaih ang ngawt kha a lo ni lo ve thei tho. 

Chrisa'n a rawn bia a, thil awmzia a lo hre ve tawh chu niin, "I mood a chhiat phah em? Engtin nge i awm?" A rawn ti a. 

"Ka chîâi ve deuh a" a va ti ringawt. 

"Ka lo kal ang aw" a rawn tih chuan, Tatai a lai ringawt. 

"Ngati?" A va ti hram.

"Ka khawngaih che..chuan ka ngai bawk che" tih chhanna chu Tatai'n a chhang tawh lo. A ngam lo a ni mah zawk ang chu. Khatianga a rawn tih khan a zak tlat! Engtin emawni a awm bawk si..

Mut dawnah pawh thu thar engmah an hriat theih tak loah chuan Tatai pawh chuan a ngaihven hluai duh ta bik lo va. A awm erawh a nuam lo ru viau. A muhil thei lawk lo lehnghal. A tuka a harh ruala a phone a en leh chuan, "Morning, tho dam ang che. " Tih thu Chrisa hnen aṭangin a dawng leh ta. Zêp nâk emaw nuam a ti veng veng nia! Chrisa chu a awm mai mai lai pawn a lo ngaihtuah ve fô tawh tih a inhriatchhuah phah. A sawi ang tak tak khan hmeichhe diktak a nihzia rawn lang chhoin bialpa a nei ve dawn tihna em ni ang? Tualthattu chungchangah pawh thu thar chu a rawn awm ta a. Kha pa khan Seni chu a huat vang pawh ni hran lovin Seni zu rui nen an inhnial thinrim chuan a tum loh deuhin a that tih a sawi a, Amah a inpuang a nih ber mai chu. Police lam pawn midang thihna chungchangah zawhna an nei ta rêng a. Mahse, khang midangte kha chu a thah an ni lo tih a sawi a , a ṭang ve tlat! An han dâwp ngial paw'n eng thu dang mah an hre thei ta lo. Tatai'n kha pa inpuanna a hriat phat khan awih loh riauna a nei ta tlat! Jeje pawh a hrilh a, Jeje erawh chuan, "Thil ni thei a ni ve tho, khami zan khan Seni kha a rui miau a, bakah a ruiha a kawlhzia i hriat kha.." a ti thung. Sawma pawn cpmplain a nei lem lo. Tatai ber zawk chuan a ngaihtuah nasa , "Thah tum sa ni lo se a vihna chemte kha khawi aṭanga a va lak nge ni ang? A pai sa nge a chhuak lawk ang a, a va la zawk" tih angreng, midangin hotham an tih tur ang chuan a rilru a tibuai riau. Tualthattu ber a inpuang zo vek tawh bawk si. Central jail- lamah an phur thla tawh lehnghal. Police lam pawn midang thattu te kha ngawrh takin an zawn chhunzawm zel a, mi pakhat thiltiha ngaite pawn an ngaihdan an thlak chho ṭan ta. 

Tatai te pawh an exam chho ta a. A zir lem lo bawk a, zep loh chuan a tiṭha lo. Zirlai moodah khan a awm lo deuh sek bawk nen, a demawm hran loh e. Chrisa'n a rawn be fô a, ṭha tak chuan a chhang ve tho bawk. A dawrah erawh a kal tawh ngai lo, tin, amah Chrisa pawh Malaysiaa zin turin a intintuah ṭan bawk a, an inah pawh a rawn lang ngai mang lo. 

Tatai class bang in a luh chuan Ruati a lo ṭhu vâng a, an lo haw dawn tih a hre lâwk miah lo. "In lo thleng tawh maw?" Tiin a be hmasa ve a. Ruati pawh chuan, "Kan pa a lung a lêng reng a, châm reng chi pawh a ni lo" tiin a nui har har. A dul erawh a la puar em em hran lo, sawi tawh angin raino haw chi a lo ni bawk nen, amah a cher deuh kuam a, a kî rût mai. Mafeli leh Alice te pawh inchei deuhin chhuah an lo tum ve mêk a. Alice hi a cham rei ta viau, khulam an buai lem lo te pawh a niang e. Tatai hian ngaihbel hreh viau mah se; a hmaa Chrisa te nen thil an ei ho aṭang khan Alice hian a biak tlem bakah a hma anga hmel hlim sârh ang khan a hmachhawn tawh ngai lo. Chrisa vang a ni ang tih chu ring tho mah se; nulat tlangvalna lam hawi ni loin unau an lo nihnaah ani mi hrang zawk a ngaihsak kha a thîk niah a ngai. 

"In chhuak dawn law?" Tiin a be hmasa a. 

Mafeli zawkin, "Chrisa kan thlah dawn, naktukah a zin tawh dawn sia, chaw kan ei chhuak dawn a" a ti sar sar. Mafeli hi a inchei phei chuan a hmel hmuh a nuamin a zangkhai sâwt ta riau. Tin, a natna ti tawh mai ang, a danglam thutna kha a chhuak leh ta miah lo bawk. A lawmawm lamah ngai ang, Alice vangte pawh a ni maithei, an inkualin an inzui nasa a, a veng ve te pawh a niang e. 

Alice erawh chuan Tatai chu melh pawh a melh lo. Tatai phone a rawn ri chiah bawk, Chrisa a lo nia! 

"In rawn kal dawn tawh em? Dawrah ka awm tawh aw" a rawn ti teh ngawt a. Hrethiam vak lo hian, "Khawiah maw? Class kan bang chiah" tiin a zawt hû.

"Aw..chaw kan ei chhuah dawn kha. An hrilh lo che mi?" A rawn ti zaw mah a. 

"Hrilh e, ka lo kal ve peih lo, ka chau"a ti deuh hmak a. A chhan pawh ngaihtuah thiam chuang lovin a thin a rim deuh hlur ringawt. 

A chek hluk a, "A mak! Ka lo beisei tawh che asin. " A rawn ti dam thlup a. 

"Mafeli te chu an rawn kal dawn" a tih mêk laiin Alice chuan na fê hian a rawn melh a.

"A changtunu ber i tel loh chuan a va ho dawn ve" a rawn tihte chu a ngei tlat. 

"Ka dah" tih leh dah a rual nghal a. Nizanah lehkha a zir rei deuh avangin phone pawh en hman loin a mu a. A tukah lah thawh a hai avangin hmanhmawh zetin a chhuak bawk, exam an ṭan nghal ta bawk si nen. Whatsappa a luh chuan, "I seen theih loh danah i buai a nih hmel. Ka zin dawn sia, chaw ka leisak ang che u ka tia..ka lo beisei ang che" tih thu Chrisa hnen aṭangin a lo dawng reng tak tak a, mafeli te bulah pawh a lo sawi tho a niawm a. Tunah an chhuak tawh dawn a, kamkhat pawn a tel ve thu an hrilh lo. 

Alice chuan, "Kal ila.." tiin Mafeli a melh a, Tatai ngei ve deuh chuan.."Ka chau deuh a, ka lo kal ve theih loh thu min lo hrilhsak mai r'u aw" a ti ve ngat. An chhang lo ve ve, an chhuak zui ta nghal a. Mood chhe zetin a roomah a lut. Khumah a mu zangthal thlawp a, a hui pap mai. 

"Alice hian a ngaizawng mawni le" a ti sep a. A lu thing nar narin inbual turin bathroomah a lut ta daih a. Mahse, a inbual lai te chuan engtin nge Mafeli te chuan an hrilh ve theih loh zawk tih a ngaihtuah char char. A inthlak zo va, Arami a zuk pui a, ani hi chu puih pawh a ngai êm êm lo. A mawng a zân bakah a che thiam riau a. Zanriah pawh an ei hma deuh, a pa te meeting dawn vangin. Ruati chu a ṭawng siam siam reng a, "Naktuk chu ka nu ten chaw eiah min sawm ve sia, kan va ei ve ang " a tih chuan, "Ti nge min va hrilh ve lo ve" Rinpuia'n a lo ti chat. 

A dar san âk pahin, "Keimah min hrilh chuan a tawk reng alawm" a ti ta thên a. Engmah an sawi zui tawh lem lo. Tatai erawh Mafeli te avanga a mood chhe ta hlek avang nge a ṭawng ve mang lo, a ṭawng tam lo ve hrim hrim bawk a. 

A pindana a chhoh hnu lawkah Mafeli te pawh an rawn haw ve. Room an luh rualin an ṭawng zui nghal bawrh bawrh a, eng nge an sawi tih erawh a va hre chiah lo, lungawi vak lo awrâwl niin a hria. Chrisa call a dawng ta chiah bawk. 

"Aw.." a ti mawl teh tawp a. 

"I tel lo va, a ho khawp mai. Chuan, ka rawn kal dawn" a rawn ti deuh nghal tâwng a. 

"Eng nge i lo tih dawn?" A tih chuan, "Ka rim dawn che" a la ti zui!

"Hey, unau an inrim ngai lo, bakah hmeichhia pawh ka ni.." sawi zawm lovin a ngawi leh daih. Chrisa nui huk a hre zui nghal, a ner sak a. 

"Hmeichhia pawh i ni, ka unaunu i ni lo bawk. A ṭha em? Ka pu pawh ka hrilh tawh. Ka nu pawh" a rawn ti ta mai. Tatai a meng phar nasa, bed sheet a ṭhâm a, "I zak em? Hmela, eng maw i hrilh a?" A ti nghek nghek. 

"Thil tam tak..i danglam bikzia te..engkim" a rawn ti nghut nghut a. 

"Mawla, i va han chhe tak. Ti nge hetia i awm a?" A ti tân tân. A zah vang nge a biang pawh a sen ṭân ṭân mai. 

"Ka lo kal" tih leh dah a rual daih zui! Awmhmunah a insawh a insawh mai. Jeje a call a, "Je, enteh, Chrisa khan min lo englo deuh tak tak a..ih, ka hre lo, engtin nge ka awm ang? " A va ti nghal nawk nawk.

"Engmah ka hai lo ka tih reng kha..kei chu i tan a ṭha ka ti, a fel a, a hlawhtling bawk a" a rawn ti duah. 

"Aih, ka duh lo. Unau alawm kan nih" a inrin hmain a ti a. 

"Ni lo, unau in ni miah lo, i hria alawm. " A rawn ti ta sak si.

"In â vek a nih hi, mipa ho hi.." tih leh a phone dah a rual nghal. Zauthau kan tih ang deuh hian a awm a, ani leh ni lo angin a phi ve sek mai. Darthlalangah te a va inen thul..

"Nula angin awm ve ta ila, ka chhe vak bik lo a nih hi" te a inti vei thul. A sawi dik, hmeichhe nunin nung se, make up te hmangin han induang ve se, patil anga ngaia enliam mai mai ho hian an kal pel satliah ngawt miah lo vang. A ṭha vul chûk lo naa, a duhawm tlat a ni. 

Anuin a lo call ta, lai ru zetin a la a. "Hei, i û a lo leng a, lo chhuk ve la" a rawn ti. I û a tih ri chu a bengah ring tak a ni. Ni e, thisena inzawmna awm miah si lo va, u leh nau kha an ni ve tlat si a. Phur ve tho si, phur vak lo anga lan tum siin a room a chhuahsan a, in hnuai pana a chhuk thlak lai te chuan a lung a phu dawt dawt thei mawle, chutiang êma zâm chu a la neih âwm pawh a hre lo. Sitting rooma Chrisa lo ṭhu run a va hmuh chuan a lei a chhuah khum ringawt. Chrisa hlat deuhah a ṭhu ve ta a, sawi mai tur a hre bawk si lo. 

"Ka bulah hian lo ṭhu teh" a rawn ti nghut a. 

"Aih" a ti deuh tlat. 

"I va sual e aw" tiin amah zawk chu a va insawn ta thurh a. 

"Eng nge" Tatai chuan a lo ti nghek. 

A nui suk duh chauh. 

"I hmelṭha" teh tawp a. 

"I chhia, nang chu" Tatai'n a tih lai chuan za fê hian a lo nui a, a ngeiawm thiam ve viau. 

"Nangmah chiahin chhia min la ti..chuan, ka bialnu chu i ni dawn em?" A ti ta thâwr mai le..Tatai'n a heh a pet a, chhuat lam a bih ngar bawk. A kut rawn laksakin a hum a. 

"I zak viau em ni?" A ti sup a. Khawngaih hmel deuh hian a melh a. 

"Aw ka zak" a aw chu a ri chang chang a ni. 

"Aw le, phone-ah i rawn sawi dawn nia. A ṭha em?" Zaidam zet hian a ti a. Tatai a bu nghat. 

"Awii! Chris, lo sawi ta che, i lo kal thu" Alice aw an hriat rualin Tatai'n a kut a lasawn vat. 

"Tatai hi ka rawn len chhan a" Chrisa chhan dan chu a chang mah mah. Mahse, Alice chu a phur sûrh thung, an bulah rawn inzep vein Chris chu a kuah leh thuak thuak a. 

"Ka ngai dawn che e. Kei pawh ka chhuk ve daih ang. I tel lo chuan a nuam lo" a ti ham ham mai. 

"Nia, i nuin a ngai tawh ang che. Dadina rawn hruaiin ka la rawn zin ang" Chrisa pawh chuan a lo ti ve a. 

Alice chuan, "Tata, juice in ila, va la rawh" tiin a rawn en a. Ngawi rengin a tho va, mahse, Chrisa'n a lo chelh ding hmak. 

"Juice kan in duh lo, Ka va haw ang e. Hawh, Ta-i, min lo thlah rawh " tiin a ding a, a kal nghal. Tatai chu a kaih avangin a zui lo thei si lo. Kawngka thleng a thlah ve a, "Ka zin chhung chu lo fimkhurin lo inenkawl ṭha rawh aw. Ka lo haw vat ang. Muttui le" tia Chrisa thlahna kha a mut dawn thlengin a bengah a cham nia! Ani pawh hian a zêp thei lo vang, a duh ve tawh tih hi. Jeje leh Sawma lah chuan chhang ve mai turin an rawn tur sek lehnghal. 

Jeje a chhanna tur a type mek laiin room lehlama awm Mafeli leh Alice te ṭawng lawng lawng chuan a rawn tibuai deuh. A hriat ngei tura sawi an ni tih a hriat theih. 

Mafeli chuan, "Amah saw hrilh tawp ka duh, ka unau tak tak ni lo mah se; hetianga inchawi nana hman atan chuan ka phal lo" a ti a. Tatai a bo viau. 

Alice chuan, "Lawk, hei ka ni pawn min lo bia alawm" tiin a hello nghal a. 

"Aw, keini pawn Christopher chu kan hrilh nasa lutuk, a awih duh si lo va. An lo inbet vel khanglang kha kan ngei ve tawp a, Tatai tan a zahthlak bakah Chrisa a lo duh ve tak tak a nih phei chuan a la khawngaihthlak dawn. Chrisa a lerhin a bialnu lahin tikhawp hian a duh a, lo zilh ve teh. Maw..aw ni e, an inchawi dan chuan, 'Tatai hi hmeichhiaa siama a bialpa ni hmasa thei hnenah ₹50000 kan pe ang" tih a nia. Chrisa te chu mi rethei pawh a ni lo va, ka duh lo tianga intih hi.." a ti mawlh mawlh a. Mut hmunah Tatai'n lukham a lo hmer ngawt ngawt thung. A thinlung chu chemte zuma vih ang maiin a na zawk zawk a, a âwmah a rawn hnawh a, boruak pawh a kham khawp lo ṭan. A ṭhu chhuak a, a heh petin bang lam a melh ngat ngat. 

Chrisa chuan infiam nan mai mai maw a lo hman a?! Khang a lo ngaihsakna zawng zawngte kha plan vek maw lo ni a?! Pawisa a duh vang lekin a lo hnaih a nih chu! A hmai a hup vawng vawng. Ṭah êm chu a duh lo, mahse, a mittui a rawn tla. A kuangah a leng hlawl lo. A nu nen an hmeithai laia falak anga an sawia an diriam vanga a natna te kha chu nêp tak a ni. Mipa vanga a dawnsawn leh hmachhawn ngai loh thil a ni a. A vawikhatna chu a na ve tur pawh a ni, Tata, ṭap ta che mawle..ṭap bawrh bawrh zawk se a thawl zawk ang mawle. Chrisa call a rawn kal zui! A phone melh ngawt ngawtin a mittui a hru hul a. 

Zangkhai takin, "Aw" a ti a. 

"Chuan.." rawn titu aw chu mawi ti ṭhin viau mah se; tun dinhmunah chuan a ten..

"Pawi ka ti, duh zawk dang ka nei a ni. " A ti sap a. Chrisa pawh a ngawi vung vung, a hnuah, "Ta-i, i ti tak tak em?" A rawn ti sup a. 

"Aw ka ti tak tak, hmaichhana sawi kha ka hreh êm a, Jeje khan ka duhzawng tak mipa min lo hmuhsak tawh a ni. Nang chu ka pahrawn farnu fapa ni reng zawk rawh" a ti nghet charh charh a. A inrintawkna pawh a rawn ṭhanglian chho leh ta. 

"A ni maw?! Aw le..mangṭha le" a rawn ti a. Tatai zawkin phone chu a dah. Bathroomah lutin a ding vang vang a, a taksa lum pup pup leh sahal avang chuan a thawmhnaw te chu hlip sawk sawkin shower a on a, a inbual ta bawrh bawrh. A mittui erawh a rawn luang lum leh piat ṭhin. Bang chu hnekin, "Hetiang mipa tenawm avang hian ka tla chhe lo vang. Ngurtluangpuii ka nih hi..mipa ang maia thinlung khauh neitu ka ni. " Tiin amah leh amah a infuih a, chu chuan a tichak viau mai. Khuma a mut leh chuan a chau hnêp, mahse, a mut erawh a chhuak lo tih piahlam a ni. 

Bialpa nge a neih ang bialnu tih a ngaihtuah a. Bialnu a neih chuan a nu rilru a na dawn êm mai a, Jeje puihna nen bialpa chu a nei ngei ngei tur a ni. A duh emaw duh lo emaw. Chrisa runluihnaah a ngai lo, a lo sawi tawh si a, hlen ngei a duh a ni. Hmeichhe dang ang thoin Chrisa nen an inlaichinna a han chah takah chuan a lo ngaihsak tawhna te, midang laka venhim a tumzia te a ngaihtuah lo thei bik lo. Dik tak chuan khatianga duata ngaihsak kha ani pawn a lo mamawh ve êm a ni. Chrisa chu a hlawhchham ta phawt chu a nia, bialnu chhe lo tak a nei reng a, a hlawhchhamna chu a tan engmah a ni lovang chu. 

Christophera pawh a mu meng kâr. Zial a zu sek bawk. Tatai chhan dan kha a ngaihtuah let a. A ṭhu chhuak hluai..ama hriat tawk lekin, "Thil thleng a awm a ni ngei ang. Tatai hian min duh, Christophera a confi sual ngai lo" tiin a phun sup a.