Tatai 5

TATA-I (5)

Ziaktu : Toni Râlte

A inbengkang a. A beng a chhi rân mai. Mafeli chuan eng buaina nge maw a tawh leh tak le..ngaihven zui vak chu ṭha dawna a hriat loh avangin a mu ṭha leh ta a. Mafeli mizia leh awmdan chu mak a ti tawlh tawlh, a rapawm riau ten a hria. A nu thihna kha a tuar viau niin an sawi a, a chumi tuar kalzel te chu a ni thei ang em? Mi dang hmuh leh a langah chuan a pangngai vek bawk si. Aaa.. a ngaihtuahna a rawn kaipeng leh tawh. A ṭap ring hrat tawh a tin ni. Lungchhe êm em hian a insût hlawp hlawp a, a ngaithla kur ringawt. A ṭah chhan a hre der bawk si lo, va thlema va hnem vel chu a tum lo chiang viau. Khati khawp khan a ti mangang tawh a. A timuhil thei lo chu a thinur ru ṭeuh mai. Lukhamin a bengte chu a hup thul. Duh angin a chesawn hleithei bawk si lo. Mafeli ṭah zawh hun chu a nghak tawp mai a ni. A tawpa tawpah chuan a muhil ve thei ta hrâm e. 

A tuka a harh phat aṭangin a ke chu a na ngut ngut a, a khuate a tisik ve hial mai. Thawh pawh a tho peih lo, a nu a call ta ringawt. Kawngka hawng tura a thawh chhuah pawh chuan a luhai lutuk chu a tlu lek lek mai, a inkhelh luih rah leh bathrooma a tlukna nghawng chu a ṭha lo hle mai. A nu chuan nachhawkna a eitir a, engmah a ei châk si lo, mahse, a pum a ruak bawk si. Arami'n buhhawp a lo chhumsak chu niin dar 11 velah tlem a ei a, soup a hawp bawk. Tlem chuan a zia ta deuh. A phone pawh a khawih peih meuh lo. Jeje nen reivaklo an inbe zuai a, rawn kan ve a tum kha. Msg erawh a en peih hlawm lo. Mafeli thawm a hre rih lo bawk. Inveng ru râna awm chu a hne tawh. A nu bulah khan sawi a tum zet a, mahse, zanin ngaihchân leh phawt a rilrûk a ni. Mafeli kha a rui pawh a ni maithei. Mahse, a ruih dan a dangdai âwm hle mai. 

Chawhnu lamah a zia deuh avangin inbual harh a tum ta a. Tuilum sa ver vawra uluk taka a han inbual takah chuan a dam sawng sawng mai. A sam a huh avangin mu tawh lovin a ṭhu a, phone pawh a khawih ve leh peih ta. 

"I tho dam em? Kan zin leh thut a" Chrisa a ni. Zing dar 7-a a msg chu dar 2ah a seen chauh. Khawiah tak zin ang maw. 

"Umm ka ṭha" tiin a reply ve a. Ngaihtuahtu leh ngaihsaktu ber a ni a, biak chhiata namnul chu a duh bîk lo. Alice msg pawh a lo awm leh kalh tawh, "Kar tawp lamah hian ka rawn zin dawn e. " Tih thu a ni. A khi sak a, Alice chu a taka hmuh a châk tawh viau. A cousinte zingah Chrisa nena whatsappa a biak ve awmchhun an ni. Nunui, kimkimi leh Aziri te ho nen chuan an inpvt ngai lo. An number pawh a save hek lo. A ke a tuam ṭhat laiin Chrisa'n a rawn call hlawl mai a. Speaker onin a bia a. 

"I ke kha maw i lo rap lui leh vak vak ang e. Chuan ka lo call nachhan che chu, in lehkhazirpui thin nen kan inkawm a" a rawn ti ve luam a. 

"Maw?! Tu?" A ti hû. 

"Nancy i hre ngai em? Synod-ah kan zirho ṭhin a tia" a rawn tih chuan a chhing vang vang, "Ehe! Lawngtlaiah i zin law?" A ti ta hluai a. 

"Zin ka tih kha, Nancy te inah zanriah kan ei dawn a" a rawn ti hluk. 

"Eng nge in va tih teh daih a? " Tatai chuan a ti a. 

"Ka nu hna chungchângah survey kan nei zuai..amah a kal thei si lo va" a ti mai a .

"Nih chu a.." a ti ringawt. 

"I ṭha em?" A rawn ti leh daih a. 

"Ka ṭha ka tih kha" dawhtheih loh hmel zetin a ti hlak. 

"I aw atang khan i nawmsam loh hmel êm a. Nancy chuan a fak nasa lutuk che" tiin a rawn nui hak hak a. 

"Ka fel alawm" khik sak pahin a ti. 

"Chuan maw mipa buaipui chi vak loh ni mah se; nizan ka mumang a mak reuh lutuk a, Mafeli khan tuiah a lo namthla che a, chhan che ka tum laiin Alice khan min lo chelh bet tlat a! A mak reuh tiraw?" A rawn ti duah a. Tatai a meng phâwk deuh. 

"Mak tak ve..i mumanga min hmu tehdaih pawh chu a mak tawh hrim hrim" a ti ve luam a. 

Chrisa chu an rawn ko nge a eih lauh a, "Ka dah aw. Lo ṭha rawh" tiin a dah zui nghal. Tatai chu a khua a har nghal vawng vawng thei. Awmdun changin inngeih lo viau mah se; amah hnaih bertu na nâ na chu a ngaina lo thei lo. A mumang pawh nizan a thil tawn nen ngaihtuah chuan a makin awmzia a nei ni hial ten a hre ve. 

Zanriah chu a zu kil ve peih a. Mafeli erawh an ṭhianho an ei khawm dawn a, a awm lo. Rinpuia leh Ruati chungchang bawk an sawi leh a. A hma thei ang bera inneih chu an duhdan a ni. Rinpuia pawh pa a ni ve thuai dawn e. 

An team te voleyball khel Arami nen an en dun a. Zan lamah an khel tawh a ni. Awmhmunah an lo ṭang ve nasa mai. Hunthar nen an intum si, khel ṭhang an tam mai sia. An ni team lam lah Msi leh Dini bak han khel ṭha thei tur an awm si lo. An chak zo ta lo. An mipa team lam erawh an la dam ve thung a, Rinpuia a che ṭha thin viau. Nuhah pawn a tibuai pha meuh lo a niang e. Tatai chuan an chak loh chu a la na tehchiam tawh lo, an thlen san kha a beisei ngam tawh lo bawk a. A intifai a, a mu ve ta mai. Eng thil danglam mah a tawng ta lo ve. Mafeli lo hawn lai pawh a hre lo. 

Alice pawh a rawn zin ta, Tatai ke pawh a rah ngamin class te pawh a kal ve tawh a, a khua pawh a sik tawh rih lo. Alice chu a thlalak ai mahin a hmelṭha zawk, a vun a nalh bawk si. An inhmuh phat aṭangin an inngaina nghal a, an inkawm nghal bawrh bawrh mai. Mafeli pawn a chang meuh lo. Chrisa te inah Alice nen, Mafeli nen an pathumin chaw an ei dawn a. Chrisa chu a zin lo hawn aṭang khan ama buai buaiin a buai bawk nen, Tatai nen pawh an inbe mang lo. MA a chhuah hnu khan a pu a chhun nge ni sumdawnna a buaipui chho va, chutihrualim sports lam a tui bawk a, eng emaw changa ruaitu a nei zeuh zeuh bawk. Mipa e ti lo chuan Mizoramah a hlâwk tih hriain tlereuh bakah thawmhnaw a khawih tel a. Designer lar tak pahnih ruaiin an dawrah puanṭhui tur a ruai tel nghal bawk a. A dawr a lian tham bawk a, Spa leh parlour te pawh a awm thlap. A nuin a sumdawnna kawngah a pui nasa bawk a, a bulṭanna atana a sum hman pawh tam tham tak a ni. Mahse, kar lovah a hlawkna a tel ṭan der tawh. A beutician rawihte an professional hlawm bawk nen, thawmhnaw lam lah a nei chikimin a dawra thawkte an polite bawk a, a lûn ber pawl a ni awm e. Amah a la naupan nen mipa hlawhtling tia sawi theih mai turah a tel ve ṭan reng mai. A nau Dadina Shillonga awm kha chu zirna lam tuichilh chawt a ni a, a tet laia a Aim in life an zawh pawha , 'IAs" ti nalh kha a ni ve a. Tunah competitive exam a la hmachhawn duh lo mai mai zawk. A zirna a la laklawh bawk a. A û ang lo takin ani chu a tuai lek lek em ni aw tih theih tur chi, nêm leh a fuke engkim pawh ni deuh zên mai a ni a. A awmna a putea hian a tet lai aṭanga a duat em em a, pa ang thawthângin a nei hial a ni. A û erawh a nu fapa duat a ni a, a thîk ngai bik lo. Bakah a û hi a ngaisang, a inrintawkna leh tumruhna te avang pawn. Unau inngeih tak mah nise, mipa na nâ na chu han inbiak hlut an ti vak bik lo. 

Tatai chuan Pi Dingi a pawh ṭhat vak loh avangin an ina chaw ei chu a hreh ru deuh, mahse, Alice te'n an nawr ve tlat si. Simple tak bawkin a inchei leh a, Rinpuia'n a va thlah ta hlawm. Alice hi Rinpuia te inneih thleng a châm dawn nghe nghe. An va thlen chuan Chrisa a lo awm lo va, dawrah kal a ni maithei. A dawr hi a luahlum tehchiam lo nain tun hnaiah dawr dang hawn belh a tum avangin a chhuak tam deuh. Pi Dingi te nula senior tawh lam, an chhungkaw zing anga an ngaih tawh Puii chuan a lo be nghal suam suam a, kuhva a duh ve bawk a, chaw a ei lai tih lohah hi chuan a hmuam sen ve thei reng mai. A nelawm bawk a, Tatai pawn a nêl nghal mai. Pi Dingi office bang pawh a rawn thleng chawpchilh nghal. Alice nen chuan an inkuah chûk chûk a, Alice te inah hian a nia Dadina a awm ni. 

"He lamah i rawn thleng ang chu tih nak alaiin" A nî chuan a ti a. 

"Nia, Hei mafeli leh Tatai te hi ka ngai ve bawk sia..ka hawn hmain ka la rawn riak ang" Alice chuan a ti sar sar a. 

"Ka'n inbual lawk ange, lo ṭhu r'u, Bawihpuia pawh a rawn haw ve ṭêp ang. Tata, ka pangparte han en kual rawh u..ti ila pangpar i ngainat loh hmel si" pi Dingi chuan nui chungin a ti mawlh mawlh a. Tatai pawn a ngai haw hran lo. Tihtur vak awm ta lo chu in chunga Pi Dingi pangpar chu an han en ve ta mai mai a, an mawi hlawm khawp mai, a enkawl uluk bawk a, thlate an la ve a. An pathuma an thlalak chu Tatai pawn a status ve ngei. Christophera'n a rawn comment ve ngei, "A tu zawk hi nge i bialnu?" Tiin. 

"Ngawi rawh" a va ti a. A nui tho. Status hi a nei ngai mang lo, a neih ve pawn funny video emaw picture emaw a hmang ṭhin. Mi status pawh a view zen zen lo. 

In hnuaia an chhuk hnuah Puii rawngbâwl an pui ve a, ui, ar, vawk, kêl an lo siam duah chu niin, Uisa erawh Tatai hian a ei lo thung. Khaw thim thet thetah Chrisa pawh a rawn haw ve ta a. A chauh hmel angreng. 

"Ril a va ṭam tawh ve" a rawn ti lut nghal. A inbual leh tê tê a, a tlai tak tak hmain an ei ta a. Tatai pawn a ei ṭeuh mai, chaw hi a heh viau naa a thau pui vak lo. A thahrui lamah a kal ni hmiang, a chak vei phian. Chrisa chuan, "Tata, ti nge uisa i ei loh? " A ti dût a. 

"Tui ka ti lo alawm" a ti ringawt. Pi Dingi pawh a mood a ṭha bawk a niang, a ṭawng siam siam reng a, "Tatai leh Mafeli pawh college in zawh hunah Shillongah zu chhuk ve ula, in unau hoin in zu luah u la, Dadina lah khutah awm hlen a tum a niang.." a ti bawrh bawrh. 

Mafeli'n rang zetin, "A! Tatai bialnu maw min ti ang" tiin a nui har har a, Tatai chu a nui ve naa a chhungrilah damlo eng emaw a awm tlat! Mafeli chet dan kha a la theihnghilh awzawng si lo. Chrisa chuan, "Ngawt a! Tatai te chuan bialpa ṭha deuh a nei dawn alawm..tiraw?" Tiin a rawn melh zauh. 

Thil a hrechhuak nghal, Jeje bula bialpa zawnpui tura a tih kha Jeje chuan a rawn nuihzat ngang mai a.."I duh khirh zêk ang, exam zawhah law law kan zawng dawn nia" a rawn ti kha a nia. Tatai pawh a lungawi ve mai. 

"Exam zawhah ka nei dawn alawm" a ti ve hmiah a, an vaiin an nui dar dar. Pi Dingi pawh chuan, "Mawina, i hmel hi a ṭha sia, i chezia leh inchei dan a pa a ni mai. Hetiang hi mipa ṭhenkhat hian an duh thei phian a nia" a lo ti ve bawk a. Tatai rilru a nuam sawt. Pi Dingi chu a lo ralkhat pawh lo ve ringawt a, an han inhnaih takah chuan misual leh kherkhiap tak chu niin a hre leh ta lo. An ei kham a, Chrisa roomah an lut diak. Alice chu a tlangnel sârh mai a, Chrisa chu a û bik hliah hliah ti mai ang. A movie te an laksak ve a, Chrisa closet te an en vel thul. Tatai erawh chairah ngawi rengin a ṭhu a, zahzelah a phone te a khawih leh ngawt zel. Chrisa chuan, "Tata, ka dawrah naktuk chu rawn kal ve la, hmuh pawh i la hmuh loh kha" a ti thut. 

"Class kal a ngai alawm" a tih chuan, "I va ṭang bik ve, inrinniah te class i kal dawn bik a" ngeiawm zetin a lo tih khum.

"Ehe! Ka lo theihnghilh daih" a ti hliai a. Mafeli leh Alice erawh khumah bawkin laptop an en. Chrisa ṭawng tum lai takin Alice chuan, "Chris, Tenui nen in la inbe thin ami? He nu hi chu i theihnghilh tak tak thei loin ka hria..a lo chhe lo ve bawk a" a rawn ti a. 

"Kum khat kan inbe tawh lo. " Tih chauhin a chhang. Tatai chuan Tenui chu a hming hre tawh thânin a inhria. 

Mafeli'n, "A nih Jolie nen khan le..ani kha chuan a duh ve huam huam che a" a rawn ti. 

"Thil hlui sawi sawi suh u. A hneawm.." a lo ti hluk. 

Alice'in , "Mawina Tata, Chrisa ex te hi an chhe lo thei teh mai a nia..model, doctor, lecturer an ni fur bawk a. A duh class ve thei sia maw..keima unaupa hian" tiin a nui var var a. Chrisa a ner suk ringawt. 

"A lerh em alawm" a inrin hmain Tatai'n a lo ti. Chrisa'n, "Lerh tur pawn luck a ngai ka tih tawh kha..Lawngtlai-a i ṭhiannu Nancy nau kha a tuihnai khawp mai, ka la bawhzui ang" a lo la ti zui! 

Tatai'n a melh nghek ringawt. 

Dar 9 pelhah hawn lam an hnaih ve ta a, Chrisa'n a va thlah. A rawn pengkawi lo thung, "Mi hmuh lawk ka ngai" a tih vangin. Tatai pawh ṭhu khawmuang lovin a mu nghal a. A chang chuan Alice hi a zo lo ṭêp zel, a chau ve thei lo a niang a ti tawp. A ṭawng char char a, a nui nasa thei bawk si, mi pawi a sawi lo naa mood chhiat chang chuan a ninawm ve ang. 

A ke leh kut te dam viau tawh mah se; damdawi a la ei zel tho. Nia, mi ṭhenkhat hi chu kan damloh chang pawn damdawi kan han ei a, kan dam deuh hi chuan a course zawh thleng ei ta lo hian kan han thlah ngawt zel a! A hnu lawkah hnâi a rawn la leh fô mai. A muhil thei lawk lo. A let tawn sek a , Phone te chu a'n khawih leh thul. Biak tur a hre mai bawk si lo. A va zung a, a zung zo tui a in lai takin Mafeli room kawngka inhawng ri rak a hre ta a, Alice nen an riak dun kha a nia. Ani pawh a mu ve leh nghal, a chhing vang vang a, Amah hringtu a pa a ngaihtuah chhuak thut. Thansanga a ni tih leh Aizawl Dintharah an awm ṭhin tih chiah a hria. A nu pawn chu aia thui chu a hre bik lo. A pa a mamawh ngai lo va, a nu khan a mamawh engkim a phuhruksak vek thei. Tin, a nu laka a pa chetdan a hriat khan a pa huatna a piantir nghal bawk nen, a pa chu zawn chhuah tumna a nei hran lo. A thi nge a dam tih pawh a ngaihven hek lo. Mahse, eng emaw chang chuan eng ang hmel pu nge tih a hre chak ve thut zel. Mi hian a nu a chhun an ti thin tak naa, a pa pawh chhunna lai chu a nei em emin a ring. 

A hriat loh karin a lo muhil ve a niang. A harh chuan dar 7 a lo ri ṭêp, a zik mar leh tê tê hnuah a ṭhu chhuak a. Mut pawh a kham ṭha viau e. A ha a nawh laiin Sawma'n a rawn call a,. 

"Ta, Zovi a thi ṭêp, tunah Civil hospitalah a awm" a rawn ti leh ta. Ngati fahran nge mawni le. A inphihfai vat vat a, a chhungte bulah thil awmzia a hrilh nghal sawk sawk. A insiam ta nghal a. A mak teh fô mang e, an ṭhianhoin hetiang thil an tawk ziah hi..a ngaih a ṭha thei ta meuh lo. A nuin, "Chaw hi bar phawt la mawle" a lo ti var a. 

"Saw tah ka inhnawh puar mai ang" a ti mai a. 

A pa in, "Mafeli scooty khan va kal rawh" a lo ti a, a lu a thing. Khalhsak leh a tum tawh lo. A hmaa an boruak kha a la hre kur tlat..a chhuak a, taxi a hmuh hma chu kein a kal a. Vanneihthlak deuhin two wheeler a rawn tlan a, a lo phar ta vat. 

Damdawi in a thlen chuan Seni leh Sawma te pawh an lo awm tawh a. Jeje pawh a rawn tlan mêk a nih hmel. "Eng nge thil awmzia?" A ti nghal a. Seni lah chu a mit a sen râm bawk. 

"An chhan theih pawh ka ring lo, a hliam kha nâ an ti êm mai" a ti a. 

"Eng nge thleng?" A ti nghek. 

Sawma chuan, "A zing walk motorin a su a, a malah a chil zui lehnghal nen, a sâwp vek an tia, ka va hmu ve lo kei pawn. " A ti ta a. 

"A sutu chu tu nge le? Eng motor nge?" A dilchhut lutuk chu amah pawn mak a inti. 

"Chupawh an hre lo, nikhaw hre lo va a awm tawh hnuah an va hmu chauh a niang, an bâwihsâwm laiin 'Motorin min chil' tih a rawn sawi e an tia..nikhua a hre lo zui nghal" Sawma bawk chuan a ti mawlh mawlh a. Jeje a rawn thleng ve chiah. Zovi chhungte an va pawh a, Zovi nu a ṭap a ṭap mai a, rilru a tihrehawm khawp mai. Police te pawh an rawn thleng a, Zovi chhartu, damdawi ina hruaitu chu an be nghal. Tlangval senior emaw patir lam a ni ngei ang, sa ṭha nelh nawlh leh amah aia cher leh hâng zawk te an ni a. An ni pawh exer la ve tho an ni. Zing lam kha khua a nuam vak lo va, a duaiin ruah sur mai thei anga a lan avangin exer la pawh an tam lem lo a nih hmel. Zovi te hi Kulikawna khawsa an ni bawk a, Ngaizel lamah a va walk kha a nia. 

Pa sang zawk sawi hmangin, "Kan lêt lamah a nia kan hmuh. A lo let reng sia, kan buaipui nghal. Sawi tawh ang khan a rawn harh zawk kha motorin a chil thu a sawi a, zawh leh hman lohin a thidang zui leh ta nghal a ni. " A ti a. 

"Motor tlan hrim hrim in hriat theih chin kha min han hrilh ula" Policein a tih chuan, "A la zîng ve deuh bawk a, chutin tlan an tam lo, ka hriat theih chinah Lunglei sumo pahnih, bike 1 leh eco van pakhat a ni deuh mai.." tiin a thianpa a melh a, ani pawh chuan, "Umm a dik..chu bak tlan an awm pawn ka hre lo" a lo ti vat a. Police lam chuan nakina kawm leh a tan an kalsan ta rih. 

Doctor a rawn chhuak a, a tarmit chu chawisan zauh pahin, "A pawi ka ti hle mai. Kan chhan thei ta ngang lo a ni" a ti sup a. Zovi nu a puak ta râwih râwih mai. Zovi û pasal nei tawh nen an inkuah a, an ṭap hawm hawm, Seni pawh hmai hupin a lo ṭap khur ve ngawt ngawt bawk. Midang Zovi ṭhian bakah an chanchin rawn ngaihventu te pawh a tul ṭul ti turin an phe buai ta hlawm a. Tatai te pawh chuan Zovi ruang chu an va en ve a, a hmaiah hliam a nei miah lo! A dân erawh a dâng viau, thisen a hloh hnem em bawk a ni. A taksa chu an khuh vek bawk a, hmuh ve kher ṭul an ti lem lo. Engpawhnise, Zovi hi motor chil hlum a ni a, a chiltu hian a tilui nge tih erawh hriat ni lo mah se, a tlan tlang daih danah hriat a hlau a, man a hlau tih a lang. Chu chuan tum reng vang chil a ni ang tih rinhlelh a ti awl riau. Tu tak ni ang maw?! Zovi pain FIR a thehlut bawk a, an bawhzui chuan tualthattu hi an rek chhuak vat êm ang chu maw. Amah chhartute pawh rinhlelh thil thuah an lak nghal chu a ngai ve tlat! Mahse, An hmel leh nungchangah khatianga ti duh tur chi niin a lang lo. An veng chhungah pawh an fel tih zel an nia, tin, Zovi te nen an inhre ngai bawk si lo, thah ngawtna chhan tur a awm lo. Pawngsual a ni bawk si lo va. Tichuan, Tatai te pawn Zovi ruang chu zui haw vein tukṭhuan te ei ve phawta vuina lama kal an ti a. Jejea'n a thlah haw. Ngawi rengin an tlan mawp mawp tawp mai a ni. An ngaihtuahna erawh a kal thui angreng viau, an ṭhian pathum ten nunna an chân ta phawt chu a nia! A bak la damte pawh hi an him zel ang em tih hriat a ni hauh lo. Dâwihzep tan phei chuan a hlauhthawnawm duh dawn viau. Tatai pawh a thleng a, châk viau lo mah se; chaw chu tlem azawng a bar ve hram. A ngaihtuahna a kal ding bawk a, an biakna pawh a lo hre mang lo. Mafeli a la mu a, Alice erawh a pa Lawma te inah tukṭhuan ei turin a kal tawh. Pu Lawma te hi vawiin chawhnu lamah an zin dawn avangin zing zingah Alice hian a va ei ve hram a ni. 

A pain, "A mak mang e aw. In ṭhianho zing ami thih pheuh pheuh mai chu! Tata, nang pawh fimkhur rawh aw. Chhuak vâk tam lo la a ṭha..kei ngaihṭhat lohna ka nei tlat mai" a ti charh charh a. 

A nu pawn, "Ni e, in ṭhian hian hmelma te hi in lo nei reng a ni lo maw ka ti! A rapthlak em mai" a lo ti ve mawlh mawlh. Tatai erawh a ngawi reng. Thleng a sil laiin Mafeli a rawn rak tuar tuar mai a! Phâwk hrâin in chung lam an melh ṭhap. Rinpuia a room aṭanga rawn tlan chhuakin a nau room chu a kik dawt dawt a. Midang pawh chu an chho ve nghal. Mafeli room kawngka chu a inhawng thei si lo, amah lah a ṭap hlawp hlawp bawk si. Rinpuia leh a pate chuan an nêk vak vak a, a nghet bawk si. Mafeli an ko pah reng bawk. A ṭap ri a reh a, kawngka a ri rak..an va luh nâk chuan Mafeli chu a sam tuai thur vekin an hmaah a lo ding ngawi reng a. Hnuai lam a bih tlat bawk. A pain thil awmzia an han zawt a, a ṭawng duh si lo. 

Rinpuia'n a zawh tak sekah chuan, "Ka roomah hian thlahrâng a awm. Ka inthiar hlanin ka khum hi a lo suasam vak a, ka make up pawh saw en ula a darh nuaih saw" a ti ta ṭiau a. Amah lah a sam chuan a hmel a hliah vek si, a rapawm riau. A û bawk chuan a sam chu a huih chhoh sak ta a. Pi Zuali a tawlh hnung dâwrh, Mafeli hmai chu a rang buâi mai a, eye shadow leh lipstick duhdah deuhin a hnawih ni maiin a lang. A mit hnuai lamte chu a dum rûih mai a, a hmui pawh a dum huam. A u leh a pate chu inrâwnin, "A dik dawn lo tlat! Damdawi inah hruai mai ang u" an ti ta a. Mahse, Mafeli chuan a duh awzawng lo. 

"Min hruai ai chuan min tihlum zawk mai rawh u..ka ṭha mai ang. " A ti lawi si..

"I hlau lo mi? Ramhuai a awm i ti bawk sia" a pain a tih chuan, "Tatai'n min riahpui ṭhin se la" a ti sap. Tatai a lo inhum ruh, a châk hlawl lo. Inveng reng rengin zan hun a hmang dawn a nia. Phur chu a har ve ang. 

"Alice cham chhungte chu in riak dun thei alawm. A haw hunah te chuan i dam fel hman ang chu..a thuhrimin Doctor râwn leh hrim hrim chu a tha" a pa chuan a ti a. Tatai a lo thaw deuh huai. 

"Ni e. Mahse, Damdawi ina awm ka duh lo" a ti ve mai. A tira a hlauh tehreng nen, tunah chuan a danglam leh vek tawh. Mafeli diktak kha a ni leh tawh ti mai ang. A chhungte ngaih erawh a ṭha lo nasa tih an hmelah a lang. Tatai pawn a rilru tê têin ramhuai hian a tibuai tak tak a niang a ti. A hmaa a awmdan te a ngaihtuah chhuak a; eng emaw tak tibuaitu emaw thununtu chu a awm chiang a ni. He lam hi a ngaihtuah ngai vak lo va, hlauhna em em pawh a nei lem lo. Mahse, Mafeli nena zan hun hman chu a duh lo bur..

Jeje a rawn thleng a, Zovi te in lam panin an tlan nghal. A rilru kaptu thildang a tam lutuk a, a thaw te a ipik vek thei. Midang bula sawi zut zut chi a ni bawk si lo. Zovi chu ṭhalai a ni bawk a, a thi ropui zet mai. Bakah amah hi a changa han nawi ve thei mai mah nise, a fel a chhuah chuan sawiselbo khawp ang kha a ni lawi a. Kohhranah nise a phak ang tawka inhmang a lo ni bawk nen, tin, chhungte an ngah a. A ruang hmuh ve ngei an duh hlawm avangin vui hun pawh an sawn ringawt a ni. Tatai rilru a buai êm em, a ṭhiannu thi chu mak a ti a, a ruang bula a ṭhut lai reng paw'n a thi tih chu awih harsa a la ti tho. Nunpuii kha mak deuhin a thi tawh a, Peka lah awihawm loh lutukin inawkhluma hmuh a ni bawk. Tunah Zovi walk chu motorin a chil ringawt bawk. A dawt lehah tu tak ni ang maw?! Serial killer chetdan a ang tlat. Mizoramah serial killer an awm ve ta a nih chuan a mak danglam khawp ang.

Vui zawhah haw nghal mai lovin Jeje te inah a peng kawi ve a, an inhre ṭha tawh bawk a, an lo be nghal siam siam. Jeje roomah chhukin an ṭhianho chunga thil thleng mak an tihzia chu an sawi dun a. 

"Je, han ngaihtuah teh, rinhlelh tur tu emaw tal pawh i hre lo maw? Kei chu ka ngaih a ṭha vak tawh lo a nia..chhungte lahin min ngaihtuah bawk si" a ti niah niah a. 

"Ka ngaihtuah nasa tawh lutuk, mahse, hmelma kan neih âwm hi ka hre thlâwt lo a ni. Keini pahnih phei chu tette aṭanga inkawm ang kan nia. Hawtu kan neih ka hre lo" Jeje chuan a ti thung. An ngawih dun vang vang laiin, Tatai chu a nuin a rawn call a. 

"Mafeli a buai leh deuh a, hei damdawi inah kan chhohpui ta mai..i peih leh rawn tlang ve la aw" a rawn ti. Rilru hahna tur hlir..a chhing vang vang a, a inbunruah loh chuan a puakkeh mai dawna a hriat avangin Mafeli awmdan leh mize danglamte chu a sawi ta bawrh bawrh a. Jeje chuan makti fêin a lo ngaithla bawk. A chang leh a chek leh hluk thin. A sawi zawh meuh chuan Tatai pawh a thaw huai huai thei, a lo ipik mah mah tawh a ni maithei. A lo tlai lam ta bawk a, hawn lam a hnaih ve ta a. Damdawi in lama va tlang chu a tum hran lo, a eng emaw ti chauh riau mai a, mut hahdam a châk. A nu a bia a, mahse, a nu pawh chuan, "Hei an admit lo, kan haw dawn mêk e" a rawn ti. Admit mah se, pawi a ti vak miah lo. Mafeli chu a hlau ti ila a râp tlat tawh. Zinga a hmel landante kha a mitthlaah a châm reng mai. In a thlen chuan a nute an lo la thleng lo, a inbual a, a mu hmak. Chaw ei nan a la hma bawk a. 

Chrisa'n a rawn bia a, "I ṭha em? I ṭhiannu chanchin ka lo hria a, mak ka ti" a ti ve tawng mai. 

"Aw ka ṭha, nia a mak khawp mai" a ti ve sap. 

"Fimkhur la aw" a tih chuan, "Engvang" a ti vat. 

"Ka hre lo, ka lo hlauthawng ve tawp" a rawn ti a. 

"Nia, mahse, i ngaih ang kha a ni kher lo ve thei" a ti ve mai a. 

"Umm nia engpawhnise, fimkhur a ṭha" a rawn ti nghut. A rawn biak danah chuan thu a neih hmel viau. A lo chhing hlek a, a nuin a rawn ko. Alice pawh a lo ṭawng leh sar sar tawh, a nung ve thlawt a ni he nula hi chu. Chaw pawh a ei tam lo, a ka a tui hlawl lo a ni ber mai. Zan lam pawh Zovi te ina kal a tum chiah lo, a chauh dan chu mak a ti, a chauh nâk alaiin Alice a roomah rawn kalin a titi leh char char a, zêp nak emaw mut daih a châk takzet. A thusawi pawh a hre fumfe meuh lo. Mafeli'n a rawn koh avangin a chhuak ta hram a. Tatai pawh a ranga rangin a mu nghal. Phone pawh a khawih peih lo. 

A tukah Police stationah koh an nih angin class pawh kal lovin an kal hlawm a. An ngawichawi hlawm kher mai. Case IO Pu Saingura chuan khunkhan zetin a lo kawm hlawm a, "Han ngaihtuah let vang vang ula, in inkawm hnuah thil eng emaw ngaihbel theih tur in hria em?" Tiin. 

An ngawi ṭhap a, an ngaihtuahna chu a kir vawng vawng mai. Seni a rawn ṭawng chhuak ta phâwng a. 

"Sir, thil danglam em em chu a ni lo va, mahse, ṭhian pakhat tuna kan kawm tak loh chu a awm. Remruati kha in hria em?" Tiin a ṭhiante a melh kual a. Remruati chu an lo la hre hlawm, Sawma chuan, "Mahse, ani te kha chu Aizawlah pawh a awm tawh loh kha.." a lo ti vat a. 

Police chuan a han zawt chiang deuh a, Remruati chu an thian zing ami a ni ve thin naa, Jeje hi a ngaihzawn ṭhin avangin leh Jejea'n a duh si loh avangin a thinrim kha an zingah a tel ve duh ta lo va, chumi hnu lawkah an khua Serchhipah chhungkaw buaina avangin a haw ta a, a rawn let leh ta lo a ni. Remruati chuan a that hauh lo ang, a mizia reng reng pawh dâwihzep ve tak, mitthi hlau tlat chi kha a ni lehnghal a. Police te chuan kil tin an dap a ngaih miau avangin an lo bawhzui tho chu a rinawm. Zovi chiltu motor lah a number hriat a ni si lo. Thu chhuah siamin khami zinga kha lai kawnga tlan hrim hrim te kha in report turin..sumo pahnih te kha chu an rawn in report a , mahse, motor dang tlan ve ho kha an motor number an lo chhinchhiah sî se lo. Tin, mak deuh chu kawngah khan Zovi exer la kha an tawk miah lo! Motorin a sut hnu emaw sut hma pawh nise hmuh awm tak kha a nia. Chu chuan Police te lû pawh a tihhai phah viau. Motor chil ni lo se a mal te kha a sâwp vek si a, innghaisakna chu a ang lo deuh zawng a ni e. A hmaa an ruang chhar thattu pawh an la hre thei si lo, buai viau tur pawh an ni e. 

Tatai'n in a va thlen chuan Chrisa a lo ṭhu run a. Alice nen an lo inkawm mek. A nu chuan an chanchin a lo zawt var a, sawi vak tur pawh a hre mumal lo. Mafeli pawh a rawn thleng chawpchilh a, a harhfim lo tih a hriat viau. A nu chuan, "I pa rawn haw hmain han inbual harh rawh, a hau ngei ngei ang che" a lo ti sawk sawk a. 

An rin loh deuhin Mafeli chuan, "Ka thu thu, nang pitar hian thu min pe reng reng suh. I fanu ka ni lo" a ti ta mai a! Pi Zuali pawh a hrilhhai kher mai. 

Chrisa'n, "I va zakthei lo tak. Han chho vat rawh. Khatiang kha nute chhan dan tur em ni?" A lo ti hrâwk a. 

"Nangpa hian an ni nufa thlavâng hi lo hauh ve sek suh, nuhrawn chuan engmah sawi ve suh se.." Mafeli'n a lo ti khar khar. 

Alice chuan, "Awii Mafel, i mak ê..ti nge khatiangtea i ṭawng a..hawh, ka hruai chho ang che" tia kaih mai a tum chu a lo nam lêng lawp nia! Ṭhutthleng bânah tak a lu a va tauh lehnghal a, a dawm vung vung mai. Chrisa'n a buaipui ta vat a. Mafeli chetdan chu mak an ti hlawm ngei mai. Pi Zuali chuan, "Ni e, i nu tak ka ni lo, ka hria alawm. Chutitakin min lo hua tih ka lo hre lo a ni.." a ti ta tawp a. Hrehawm a tih hmel viau bawk. Rinpuia a rawn lut a, an hmel landan avang chuan thil awmzia a zawt hlawm a. Alice in a hrilh chuan a nau chu a dinchilh a, "I va zahpuiawm ve..ti nge hetia i awm a. Vawikhatmah ka nu leh Tatai te hi khatiang khan ṭawng khum tawh ngai suh ang che" a ti charh charh a. A û chu a chhang ngam ta lo nge tâu bûrin a room lam a pan ta a. An boruak zet chu aw…!

An zanriah ei pawh an mûk hlawm hle. A ṭawng duh ber Alice pawh a ngawi kâr tawh. Pa ber chuan a hrethiam nge, "Ti nge in va ngawichawi hlawm ve..thil thleng a awm mi?" Tiin a en kual a. Mafeli chuan zanriah a ei lo hrim hrim. Rinpuia'n, "Mafeli'n ka nu a lo ṭawng khum a..la zilhhau rawh, zaktheilo lutuk" a ti ta hmiah a. Pu Hruaia pawh a mitmeng a danglam nghal. 

"Ka la hau dawn nia" a ti ve mai a. An sawi zawm tawh lo. Tatai erawh a rilru a na ngut ngut mai. Mafeli hian an nufa a hmusit ni berin a hre tawh. A hmain scooty vangin khati khawp khan a lo ṭawng tawh bawk a; a hnuah ṭha em emin a be leh bawk si. Chuta karah tenawm takin a la khawsak khum zui a! Engkim chu sawi ve phiar phiar a châk thut. Mahse, a pa leh Rinpuia te thatna avangin ngawih a chuh leh ta hram a. Engtikah emaw chuan a la sawi chhuak mahna. 

Zovi te in lama len an tum avangin a insiam nghal a, ṭhiante thihnaah a kal a kal ta chu a nia. A room aṭanga a chhuak chiah chu Mafeli a rawn chhuak ve chiah a, rawn nuihin, "Khawhar inah i kal dawn mi?" A ti sap a. 

"Umm" tih chiahin a chhang. 

An chhuk thla rual a, A inchei danah chhuah ve a tum a nih hmel. Alice rawn chho mêk chuan, "I chhuak dawn mi? " Tiin Mafeli zawk a en a. 

"Umm, Lalêngi birthday a nia..ka va kal ve ang nge" a ti mai a. 

A mizia a zawiawi nen party tih luklak hi a peih ve khawp mai. Tin, tun hnaiah a rui deuh reng bawk si, rilru hahna eng emaw chu a nei ve a ni maithei. A mood lah a inthlak sek bawk si. Tatai chuan Jeje a lo nghak a, ani pawh a rawn thleng rang angreng. Zovi te in lam chu an pan ta a. 

"I pa fanu kha a va ruih hmel ve" Jeje chuan a ti a, Tatai chhuah rual khan a chhuak ve a, a lo hmu a ni ngei ang. 

"A ruihte pawh a rui ang" Tatai pawh chuan a lo ti hmak. Tlaia an thil tawn erawh a sawi duh kher lo. Ṭhiante mah nise nuam a ti bik lo a ni. Zovi te in an thlen chuan an lo awm nual tawh a. Seni te an lo nghak..an ni pawh an rawn tlan rei hran lo. An vai chuan an lut ta a. Zai pawh a nuam viau e. Zovi nu erawh a ṭap reng mai a, a fanu thih dan hi a runthlak ve bawk êm a ni. Thih thutna hi chu a mi nghawng a na bik hrim hrim. Tun laiah ṭhalai thi thut thut an tam bawk si. Tatai pawn a ngaihtuah ve nasa a, thi thut ila vanramah ka kal awm si lo tih vel a ni. Tunah mai chuan piantharna a la chang lo tih pawh a pawm thlap mai. Banah chuan an ṭhian ho bawkin an chhuak leh dial a. Jeje nen an inphur haw chu chak zeta bolero rawn tlan nen an insu thawi thuak mai. An tlu ṭêp nghe nghe, Jeje a thinchhe ve bawk a ,"I va mawl ê" tiin a auh zui hram kha. Eng em an ti lo bawk a, Bolero lah a tlan zui daih bawk nen, phun nuah nuah chungin a tlan ve leh mai bawk a. 

A chhuk hnuah, "Je, fimkhur teh aw. Kan fimkhur a ngaih êm hi.."tiin a chah hram. Ani pawh dik tak chuan a hma ai ngawt chuan a a fimkhur tawh a ni. Khum a deh rual deuhthawin a muhil a ni mai e. Ti nge maw tunlai hi a chauh em em ṭhin ni. 

A tuk a class kal chu tlemin a zangkhai ta deuh. Nizana Mafeli chhuak kha a lo haw lo nge a la hmu miah lo. An ṭhian liin an inzui leh ta rak rak a, midangte chuan an en hrek hrek ni hian a lang. Ni e, a âwm ve reng mai. An class bang chu Jejea a pen khawtlai dawn avangin kein a haw hnak hnak a, kea kal tam hi a duh deuh bawk nen. 

"A la hma tho, ka dawrah lo peng ve rawh. Alice pawh a awm" rawn ti ngawttu lam chu a en vat. Christopher a lo nia! A bullet nen chuan a va inhmeh tak e aw. Kamiz dum ban tlawn a ha a, a bân chu hnawk hnai deuhin a thlep chho bawk, a jeans kekawr dark grey a ha thlup bawk. A combat zawng zawng nen chuan a chhe lo ve thlawt, a sam pawh a ṭawn leh vah tawh. A sun glass chu a la thla bawk a, Tatai pawn ani leh ni lo angin a melh ve reng ringawt. 

"Peng lo mai ang. Khaw nge i kal a?" A ti a. Chrisa chuan a bike chu a hung rem hlek a, a rawn chhuk ta a. 

"Saw lai lawk saw alawm ka dawr..kal ang le..ka ṭhianpa nu vuina aṭangin ka rawn haw chiah" a ti dam thlup. Tatai pawh chuan a zui ve ta mai. Bakah mi kal vel an awm ve reng sia, din reng kha a zia lo deuh a ni. A sawi ang khan a dawr chu a lo hla lem lo. Tatai chuan a lo hre ve nasa, Chrisa dawr a ni tih a hre lo reng reng. An lut dun chu a hnathawkten zah hmel takin an lo nuih sâng hlawm a. 

"Guys, in inhralh ṭha maw?" Zangkhai zetin a ti a, a hnathawkte lakah a inla boss tehchiam lo khawp mai. Manager rawn kal tum mek chu zaizirin a dang a, "Nakinah aw..Hei inleng ka nei a" a ti zauh. An lut ril zel a, a dawr zau zia chu Tatai'n mak a ti. Hmeichhia leh mipa thawmhnaw changkang zet zet lo inkhai dulte chu mawi a ti ve reng. Mipa thawmhnaw lamin a mit an la zawk mah awm e. Chrisa rooma an luh chuan a hawi kual a, "Khaw nge Alice chu ?" A ti hâ. 

"Ka hre nang" a lo ti mai si. 

"Hmm, min bum a ni maw? Phakar lutuk" Tatai'n a ti nghat. 

"Ka bialnu emaw an ti lehpek dawn che a nih kha..mahse, bialnu pa deuh ka ngaina lo tih ka lo hrilh mai ang" a ti zawt zawt a. Ngei lutukin Tatai'n a lo melh nghek.

"Hmela..i chhia i chhia" a ti tân tân chu Chrisa'n a lo nuih leh suk. 

Rawn hnaih rûakin chairah chuan a bawh titih a, Tatai a eu nasa mai. 

Mitmeng tak leh hriatthiam harsa zeta Tatai chu melhin, "Hmeichhiaah ka siam ang che. I duh em?" A ti hniam raih a. Tatai'n nam letin, "Christopher, eng nge i hriat? Kal teh.." a ti tuar. A ding thut a, Tatai'n thinrim zetin a melh kal bawk. 

"Ka ti tak tak a nia..Ngurtluang" Chrisa aw chu a ring hran lo, mahse, dâwt sawi hmel leh ti mai mai hmel a pu hauh lo. Tatai a zâm ru êm êm, hetianga huhâng ngah mipain an la hnaih ngai lo. 

"Ka duh lo. Keimah nih reng hi ka duh. Tin, hmeichhia ka ni" a ti thâm ṭiak a. Kal tuma a inher rual chiah chuan, "I zâm zia kha..chuan Christophera a hlawhchham ngai lo, Bawihi.." a ti nghut. 

"E.." tih chiahin a chhang. A chhuahsan pawh chu rawn umzui pawh a tum lem lo a niang..Tatai chu chak zetin a kal nal nal. A chhan sawi fak thei si lovin a thinrim êm êm. A ṭahte a chhuak ut ut bawk. Taxi ruak lo tlan a hmuh hmasak ber chu a phar ta vat a. 

In a thlen veleh a inbual nghal. A lum pup pup reng chu hrehawm a ti, Chrisa khan hmeichhe biakin a bia a, a ngaizawng tia sawi theih ni si loin chulam rawngkai chuan a treat tih erawh a lang..Tatai a hlauthawng ve ringawt. 

A inbual zo a inthlak fel hnua a phone a en chuan Christopher hnen aṭangin, "Min duh tih ka hria..tlanchhe suh, hlauthawng lo bawk ang che. " Tih thu a ni. A ner sak ..

A zangthal zawng chuan a mu thlawp a. Ceiling melh vang vangin, "Aih, ka duh lo..ka duh lo hrim hrim" a ti sep..