Tatai 4

T T -I (4)

Ziaktu : Toni Râlte

A tukah chuan a ke pawn zia lam a pan ta deuh. Mafeli ṭawngkam dengkhâwng tak kha a pain engtin tin emaw a lo hria ni tur a ni. A zilh hrep mai a, Mafeli lah chuan, "An dawthei a nih chu. Engtinmah ka ti lo hrim hrim" tih ṭanin a ṭang tlat. A pa pawn tihngaihna a hre tawh lo. Tatai ke nâ chu an veng LC ten pawi an ti ber âwm e. An rawn lut zut mai a, a tel lo va an match khelhah an chak a nih chuan a lehpek tal chu khel ve leh hram turin an han ṭahawh thul. A nute tan tak pawh a buaithlak. Tatai lahin a lo châk ve ngawih ngawih bawk si, Damdawi hnawih ṭhat bakah a zût thiam zûttir chu an tihtheih tawk a ni ringawt bawk si. A pain, "Christophera a awm alawm, aniin tlai tin rawn zûtsak se, ni 4 chhung chuan a dam hman hrim hrim" a ti awlsam êt a. Tatai erawh chuan Chrisa ni lo zawk se a ti deuh, a chhan pawh a hre chuang lo. Chrisa chu an bia a, ani lah chuan awlsamtêin Aw le a lo ti mai bawk a! An inkhelh bânah a rawn peng kawi ziah dawn a nih hmel. Mafeli lah chuan awihawm loh khawpin a ngaihsak a, a hmaa a ânkhumna te kha theihnghilh hmiah niawm takin a tîm map lo. Tatai tak pawn mak a ti viau. Mahse, ṭha takin a dawngsawng ve zel tho. Tihchet vak rih loh an chawh avangin zun ber hi a buaithlak..zun bur inchhawp a duh bîk der si lo. A bai auh auh zel avangin a dam har zawk maithei a ni. 

Chrisa rawn pen hmasak ber tlaiah chuan Tatai roomah an pahnih chauhin an awmdun a, Tatai chuan inkhel chanchin hlir a lo sawipui. A hmunah a en ve thei si lo. A tuk chu an vengte inkhelh hun a ni a, chak hram se a ti ngawih ngawih. 

A ke chu an han phelh a, a vûng pawh a lo thêp suai tawh. Têl sâin Chrisa chuan a han zût a, a kut a dam thlup mai roh si. Tatai pawn amah nen a inhmeh lo riauin a hria. 

"Mafeli nen inboruak a ṭha leh tawh tiraw?" A ti sup a. 

"Umm, ṭha a ni mai. Min ngaihsak lutuk" a ti ve mak a. A rilru tak tak erawh a la dam kim lo nasa. 

"A mizia danglam chak lutuk hi mak kan ti fô. Damdawite hi a lo ti ve mawni aw " a ti vang vang a. An unau ho zingah upa ber lo mah se; Alice sawi ang khan an û en a, a thu hla an ngaihchan bakah a unaute huikhawmtu ber a ni ve a, Mafeli pawh a ngaihthah ngawt thei lo a niang e. 

"Tihian a na em?" Tiin a na lai chu a hmet kual dan dan a. Tatai a eu zawk, "Aw khalai kha a nâ " a ti nak a. 

"Umm, ka hmet na deuh dawn aw..inring la" tiin a rawn en a. 

Tatai a inhumruh nghal. Chrisa'n a na lai a'n hmet thut chu a lo inrinlawkna te a bo nghal duak, A tum loh deuhin Chrisa ban puamah a va hmer a, a ṭhen chak chak bawk. 

"Lawk aw..tuar hram hram" tiin a han nem leh sawk a. Tatai a rum lek lek, a insehruh nasa viau. "A zo e..i chhel lutuk" a ti dam thlup a. 

"Ka lawm e.." Tatai chuan a vawikhat nan lawmthu a hrilh ve ta. Mafeli a rawn lut ve hlawl mai a, Tatai ke an tuam mêk lai a ni. 

"Tata, kha i ei châk ka ring, ruh tan a ṭha an tia..ei rawh" tiin a hringa inpack eng emaw ni hi a pe a. Tatai'n a kheh ve vat, kuhva rah ang deuh, mahse, hnip hnaih si hi a lo nia. A ei ve mai. A tui hran lo. 

"Chuan, kawr ka chah a, hei ka chah kêp che" tiin tshirt pa lam lek lek hi a pe bawk a. Tatai leh Chrisa an inmelh zauh. Mafeli chu a hmaa ânkhum hreptu kha a ni tih a hriat tawh loh reng reng, laizawn ṭha ber, ngaihtuahtu ber niawm takin a lang a ni. 

"Ka lawm e" Tatai chuan a ti sap a. 

Chrisa erawh a ṭawng miah lo. Mafeli zawk chuan, "Chris, chaw ei ve la" a ti siam siam a, a lu a thing ringawt. A tuamsak zawh chuan, "Chaw eikhamah leh mut dawnah damdawi ei tur i neih kha aw".tiin Tatai a melh zauh a. 

"Umm ka hria" a lo ti vat. Mafeli chuan nui rah rah chungin, " n deuh in nei..inngaizawng in ang" a ti ta phawng a! 

Tatai'n tawng a tum lai takin ,"I ngaihtuahna mai mai a nih chu" Chrisa'n a lo ti vut. A lo tlailam ve ta deuh bawk a, a haw phei ve ta a. 

Zanriah ei laiin Rinpuia'n, "Pa, sawi ka hreh viau naa..ih, englo..Ruati a rai a" a ti khur dat a. Phâwk zetin an melh ṭhap. 

A pa chuan muangchâng hian, "A va hun lo ve mawle Mama le" a lo ti chuar chuar a. Pi Zuali tan erawh lo ṭawng ve vakna chi niin a lang lo. 

"Nia, pawi ka ti lutuk. Nichin mai khan a intest a, min rawn hrilh.." Rinpuia chuan a ti a. Lehlamah amah ngeiin a pa a hrilh ngam chu a chhuanawm. Ruati nen hian kum fê an lo inzui ve tawh bawk a, an Kohhran huangah ngat phei chuan hre lo an awm lo hial maithei a ni. Ruati te chu an khawsak a ṭha pangngai a, Pu Hruaia te ai chuan an che hniam deuh maithei. An fanu neihchhun a ni ve a, an inah pawh a lal viau. Tatai nen pawh an inhre tawh a, hmeichhe lu zo tak, mi biangbiak thiam em em a ni a, mi ngainat pawh a hlawh viau rêng a. A hmel pawh a ṭha..chutihrualin an chhungkuaa thil langsar pawi deuh mai chu an in chhunga nu ber a lal zawk chu a ni. An ni chuan, "Ka pa a lal zawk" ti eng ang mah se; va len ringawt pawn nu ber lalna a nihzia chu a hriat theih mai. Pa ber thutlûkna hi Ruati nu thutlukna siamsa a ni deuh zel mai. Chuvang chu ni maw Ruati pawh a fel leh hmelṭhat ang aiin duhtu an tam vak tlat lo. Mipa awm mual mual, nung ho ve tak emaw kan tihte pawh hian nupui tur meuh chu an lo chîk ve hle a ni ngei ang. Mahse, chutia nau hialte a pai takah chuan Rinpuia chuan a neih mai a ngaih hmel. 

Mafeli'n, "Mo neih ka la peih vak lo sin le" a ti sap a. A pain a khak hram kha. Tatai leh a nu chuan engmah an sawi ve lo. 

Zanah class a kal thei rih bawk si lo va, lehkha a zir a. Zir tihah a chhiar mai mai a ni ber. A rilruah pawh a lut vak lo hle. 

Mutchhuakin a rawn zêm chiai chiai a. Damdawi a ei vat, a va zung a. A baina lamah a harh leh vek tawh. Mahse, mut tam a mamawh nge ni khum a deh rual chuan a mutchhuak pawh a rawn kal leh ṭan a. A chhing ta diar diar a. A mumangah Christopher leh Lawmkima te nen hian sahuan niawm takah an lo kal a, zawngtê harh zet chu hlim takin an thlir a, mahse, reivakloah sakei lian zet mai hi an hmaah a rawn ding ta luau mai. Rang takin an tlanchhe nghal a, Chrisa te hnungah chuan a tlan ve zel a, Sakei chuan a rawn hap thuak thuak mai. A tlu ta thlawrh a, Chrisa hi rawn tlan lêt lehin kaihthawh a tum a, sakei chuan a ke dinglam a rawn hmuam ta pûk mai. A rak ṭhawt a, Chrisa chuan theihtawpin a pawt bawk. Chutia an inchai buai lai chuan hah lutukin a ṭhangharh ta hlawl a! A meng nghal kâwk. A ke nâ lam chu rizaiin a lo delhbet a lo nia. Rang takin a phawi a. A lungphu pawh a rang dat dat khawp mai. A mutchhuak a bo diak avangin tuite a in leh rih a, zun sek a tan a harsat avangin a in tam lo thung. Chutia ngawi renga a mut men kar lai chuan Mafeli room lamah chuan thawm a hre zui ta a. Zawitê têa ke pen thawm a ni. Mafeli hian a pheikhawk hi a hnuk hruih hruih ṭhin rêng a. Tunah dar 2 rik nan 4 mins chiah a awm tawh. Tun ang hunah Mafeli chu ti nge maw a vei sek le..a hnu deuhah a bathroom kawngka inhawng ri rak thawm a hre zui a. Zan rei vanglai tak a nih avangin thawm pawh a ring lo thei lo. Tatai lah chuan a beng a chhi ngun bawk nen. Tui herh haw thawmin a rawn zui a, a ngaihṭhat lohna chu dahbo luiin, "A muhil thei lo a inbual a niang" tiin a chhinsan ta daih a. 

A phone riin a kai harh a, dar 5:43 a ni. Lo calltu chu Jeje..ner sak chungin, "Aw..a va zîng ve" mutchhuak zetin a ti a. 

Jeje chuan aw khur dawt dawt hian, "Peka a thi!" A rawn ti ta! Eheu! Tatai pawh a ṭhu chhuak nghal vat. 

"Maw?! Engtin?" A ti tuar a.

"Umm, a inawkhlum, an kawmthlangte inrelah.." a rawn ti zawi sup. A buai nge phone a dah daih a, Tatai chuan a call leh nghal naa a la thei tawh lo. Khumah chuan che châng lovin a ṭhu ngawi reng a, a ngaihtuahna a buai nuaih nuaih mai. Hmanni lawkah Nunpuii a thi a, tunah Peka! A mak a ni! Peka chu mahni nunna la duh khawpa dâwihzep a ni lo tih a hrechiang. Inawhhlum ngawtna chhan tur a nei lo bawk. Engvangin nge chutiang chu a tih thut le? Muthilh lehna chi rual a ni ta lo. Thei leh thei lo va thoin Lawmkima tiang hman hlui a hmansak tak chuan in hnuai lamah a inhawl thla a. Hun a hmang rei khawp mai. Tuite a lum a, thingpui a in laiin Arami pawh a rawn tho ve. 

"I va tho hma ve..ti nge?" A ti nghe nghe. 

"Nia, ka ṭhianpa a boral a" a ti ringawt. Arami chuan thutak deuh zawkin, "A va zia lo ve, engtia boral nge ?" A ti hâ a. 

"A inawkhlum an ti. Mahse, ka awih lo" a melh ngai melh ran chungin a ti zawi sap. A chhungte an rawn tho sap sap a, Peka chu a nu pawn a hriatchian lutuk a ni ve a, mak a tiin a ṭhawng ve khawp mai. Jeje nen an inbe leh a, ani chu kal thei turin an beisei ngam chiah lo tih a ṭawngkam aṭangin a hriat, mahse, kal a tum ruh tlat. Jeje tih loha a ṭhian kawm tam leh a bula awm nuam a tih em em Peka thlah liam tur chuan engmahin an dal thei lo vang. 

Mafeli'n, "Tata, a mak e! In ṭhianho hian hmelma in nei a ni lo maw? Hmanni lawkah in ṭhiannu a thi tawh bawk sia" a tih chuan a rilru a tikalthui viau. Mahse, Peka chu thah niin a lang si lo. Nunpuii avang khan a inawkhlum tihna nge? Huiham..engmah a hrethiam hauh lo mai. 

Chaw eikham veleh a insiam a, A nuin a rawn pui bawk. Rinpuia'n , "Ka va thlah dawn che nia, in ban hunah rawn sawi la, ka lo hruai leh mai ang che. Inkhel ka en dawn a, ka hman tho alawm" a lo ti var a, an fel ṭhin mang e. 

Jeje te lo nghahna hmun thleng Rinpuia chuan a va thlah ta a. An ṭhianho chu pahnihin an kim ta lo phawt. Tunah chuan panga chiah an ni ta. Amah Tatai, Jeje, Sawma, Zovi leh Seni te..Seni hi Nunpuii thih lai khan Siahaah a zin a, a rawn lang ve hman lo a ni. Tichuan, Peka te in lam chu an pan ta hlawm a. An postmortem tawh a, a damlai hmel ang chiahin a lo mu..Zovi leh Seni te an ṭap hawm hawm a, Jeje pawn a ṭhianpa hmai chu a chul a chul mai. Tatai erawh chuan thildang daih a ngaihtuah. 'Peka hi thah a ni' tih chu hrilhtu nei niawm takin a thinlungah a ri nawn tluk tluk mai. Amah pawn mak a ti a, thildang a ngaihtuah thei bawk si lo. Peka pain thu a sawi pawn an fapa chuti tehthuta a han kal chu mak a tiin a hriatthiam loh thu a sawi uar viau. Ngaihbel tur îk pawn Peka kha a damlaiin a awm tlat lo. A hlim a, a mizia a pangngai reng tlat. Chuvanga a thihna pawh hrethiam lo an ni rêng a. A sawi dik viau ang, Peka sawi hmangin vawiinah an class ban pahin Tatai rawn kan an tum kha a nia. Mahse, a rawttu ber heti hi a ni leh ta si! 

Lehkha emaw eng emaw han ngaihbel theih tur pakhatmah a hnutchhiah bawk si lo. A bialnu Ateii mawlh chu a khawngaihthlak. A bialpa intihhlum chhan a hre bawk si lo, pasalte anga han sûn viau lah amah mi zakzum chi ni bawk nen, mi mitmei a veng lo thei si lo. Kilkhatah a ṭap zawih zawih reng mai a ni. Peka chu ropui taka vuiliam a ni ta. An veng chhunga tlangval fel leh tlawmngai, rualkawm thiam tak a ni bawk a, an ui ve hle a ni. 

An hawn hma deuhin Peka pain an ṭhianho chu rawn panin, "In hnuaiah khuan Police ten thu zawh ve che u an duh a, zuk hmu lawk ta che u" tiin. Nia, Peka ṭhiante an nia, hmelma a neih leh neih loh an hriatte pawh an ring a ni mahna le. An chhuk ta dial a. 

Police hmel fai leh hmuh nuam zetin a lo dawngsawng a. An rin ang ngeiin Peka hawtu an awm em tih te, a bialnu nen an inkar a ṭha em tih te a zawt ta malh malh a. An chhanna a inang deuh vek, "Peka hi mi fel tak a ni a, tu pawi mah a sawi kan hre ngai lo. Hawtu a neih pawh" tiin. 

A hnu deuhah Sawma chuan hreh hmel zet hian, "Ih, hmanni deuh lawk khan Ateii nen an inkar chu a ṭhat vak loh thu a sawi a. Ateii chuan a rûka biak a nei tlata a hriat thu te, a ngaihṭhat loh thu te vel a nia. Mahse, an inthen phah lo. Chu chu Ateii nen an inkara buaina ka hriat awmchhun a ni mai" a ti a. Ateii pawh an la ko dawn tho va, an ni ho kawm chu an duhtawk ta rih a niang, an haw ta hlawm a. Jeje chu a û Durtlanga awmin rawn hruai tura a tih avangin a chhoh a ngai si. Sawma leh Seni an inphurh a ngai a, Zovi lah a scooty a chhiat avangin two wheeler taxi a lo chah tawh a. Tatai pawh chuan Rinpuia va tihbuai ai chuan tiin taxi chân mai a rilruk a. Mahse, Rinpuia zawkin a rawn call ta tlat..

"In bang tawh maw..ka rawn lam ang che. Ka dropnaah che khan min lo nghak mai rawh" a ti zung zung a, Tatai tan pawh han hnial ngaihna a awm lo. A ṭhiante hawn hnuah pawh a ṭhu ta ngat ngat a. Rinpuia motor pawh a rawn lang ve ta hram e. Mahse, Rinpuia ni lovin Chrisa'n a lo khalh a. A rawn nuih suk mai. 

A tiang nena car pan a tum lai mêkin, "A rei" tih leh rawn pawm lawp a rual a, veivak an la awm ve nuk si, "I va â tak" Tatai chuan a ti hluai. Engahmah a ngai lo. Front seatah chuan a ṭhuttir ta thân a. Amah rawn lut nghalin an tlan zui nghal. 

"Ti nge? Nangmah" Tatai chuan a ti a.

"Rinpuia ka dil a,." A tih chuan hrethiam lo fê hian a va melh a, "I bula awm ka chak a" tiin a rawn melh zauh. 

"I zak lo" tiin a phun sep a. 

"Ka zak ve lutuk" a lo tih chuan Tatai a dang chiang ngang mai. Za lo zetin a nui ringawt. 

I ril a ṭam em? Kei chu a ṭâm..chawl ang" tih leh Lawmkima te restaurant lam pan a rual a. "A ṭam ve lo" a ti naa, a pum ruak zet chu a hre rauh rauh. Thingpui chiah an in kha a nia, tukthuan lah kha tihtham a ei mang si lo. Restaurant an lut a, mi an lo tam vak lo, Tatai chu a tiang rinchhan chuan a ding ran a, Chrisa chuan rawn pawm leh a tum a, a lo ṭeu hlar, a tilui ta êm lo. A thlang lam kilah an ṭhu dun a. Lawmkima farnu Akimi a rawn lang vat. Nui var var chungin, "Eng nge in ei ang?" A ti zangkhai vah a. Akimi hian lehkha zir tawh lovin tihian an dawr hi a vil ve deuh tawp tawh a ni. A la naupan nen, a fel tak tak a nia. 

Menu a lo en kual a, Tatai hi a vir tehchiam lo bawk nen, eitur hming ṭhenkhatte chu a hriat ngai pawh a ni lo. Chah sual a hlauh avangin a hriatchian leh tui a tih em êm beef rolls a chah ta ngawt. "Soup rawn pe tel rawh. A ka a tê sia, a helh ang" Chrisa chuan nuihzat hmel fê hian a ti hluk a. Tatai ngei tawk a lo tling leh hman tawh. Mahse, Akimi a awm ve avangin engmah a sawi lem lo. 

"Vawiin inkhel chu?" Tiin a zawt a. 

An team an la khel ve lo thung. 

"Khawhai leh khawbêl saw an ṭha khawp mai. In team chu an chak zawh ka ring chiah lo, i awm bawk si lo" a ti duah a. 

"Chak hram se" a ti ngui nghiai a. Ngun taka lo entu Chrisa chuan, "Chak lo mah se, a pawi lo. I ke nâ kha inkhelhpui chi pawh a nih loh kha" thunei fê hian a ti a. 

"A na vak tawh lo" a ti ringawt. Nia, a zia ve sâwt viau tawh bawk a. 

Eitur an rawn dah a, An siam tui phian mai. Lawmkima te sumdawnna bulpui ber a ni lo naa, an restaurant aṭang pawh hian tam fê chu an lakluh a rinawm. 

Soup a hawp chu a chhem hmasa si lo, a sa lutuk chu lem ngam ta lo chuan roll an rawn dahna plateah chuan a chhak ta tawp a! A zak ve deuh nge a sen ṭân tân mai. 

"Khaw maw" tih leh Chrisa chuan rawn hawpsak a rual a …"Ummm" tiin ani pawh chuan a chhak ve vut. 

"A sa em nih hi..an va â tak" a ti hluk a. Tatai chuan a lo nuih char char…"min nuih suh, mipa mah ni ila sâ leh thak ka ngam lo" a ti leh hmuk a, a lei a chhuah zuk zuk..tui vawt a in nghal bawk. 

"Kei chu thak ka ngam " uang zetin Tatain a ti a. 

"Hmm, i ngam chen ka ngam ve tho vang" tlawm zawk nih hreh zetin a lo ti. 

"Kan la ineisiak dawn nia" Tatai'n a ti thung. 

A rilru tê têin Chrisa mizia chu a ngaihtuah a, chimawm mah se, a fel a ti! Tunah te khan a zah hlauin soup kha a hawpsakah a ngai hmiah. Tin, a lawmawm a ti, amah hrim hrim..Chrisa hian a mizia pawh hi a lawm ve tho tih erawh a hre miah lo thung. 

An inei puar hnuah muangmarin Tatai te in lam chu an pan a. Chrisa chuan tu emawni a call, "An khel ṭan chiah maw? Aw le.." tiin a dah zui mai. Tatai chu melh chuang lovin, "In team te an khel ṭan chiah, i en ve chak em?" A ti a. Tatai chuan en a châkzia sawi ngaihna a hre lo zawk. "Aw châk" a ti vat. 

"Ka ring rêngah" tih pahin a kual leh ta a. Tatai pawh a hlim hle. Phone aṭanga lo en ngawt chu a famkim thei lo ve bawk a ni. A hmun an va thlen chuan Chrisa chu official te ṭhutna lama thu mai tur a nih laiin Tatai chu ṭhutna âwl lo awm hnai berah chuan a ṭhutpui ta a. Hmeichhehoin an melh hrek hrek mai. Chrisa chuan half pant buang simple tak a ha a, sneakers brand bîk lem lo dum a bun bawk. Tshirt dum a ha leh tawh a, ruckshak a ak bawk. A sam chu a ṭawn leh vah a, hmuh a nuam ve bawk em a ni. 

Tatai erawh chuan an team te chu a lo au ve nasa mai a. Mahse, lehlam pawlin set khat an la ta phawt . Chawlh lai reilotêah chuan Msi leh Dini ten an rawn pan a, "Awii, lo lut ve mai rawh" an la ti zui! A nui tawp. 

"In hneh thei, an ṭhat bik loh saw. Ms, Hanna saw cover a ngai zual..a no leh tlat a" Tatai chuan a ti hmiah hmiah. Ṭan tawh chuan lo inla no fâl chu ngeiawm duh tak tur a ni ve rêng a. 

Msi pawh chuan, "Nia, a bialpa a rawn kal ve a, chuvang a nia..dam vat teh aw" a ti thur thur a. Chrisa chuan an inkawm lai chu a lo thlir vung vung. An ṭan leh ta..Tatai a ṭang si, zah pawh a sawi thei tawh lo. A kut a beng, a ding dawn uaih uaih fô, Chrisa pawh a ṭan phah ve vek. A chang leh Chrisa mala chum pahin, "Ṭang ve ta che..nge i ngawih hmuk a?" A ti leh hlak hlak ṭhin. Chrisa nuih a za ngang mai. Set khat an la ve leh ta phawt e. Boruak pawh a sosang ta hle. An LC hruaitu a rawn kal a, "Tata, kan va mamawh che ve le aw tiraw? Mahse, i la dam chiang si lo" a ti luam a. An ṭang ve bawk si a, an demawm loh. A ke tina kher kher chu amah Tatai ber chuan pawi a ti zual. Inkhel chu an ṭan leh ta a. 

Hanna chu a che no mah mah zel a, a bulah ball a tla mawl tawp zel, zah a hnêkin a hmui a hup a, a nui chen chen zel bawk si. Point box ah lehlam chuan an hmang a ni ber. An chak lo takngial dawna hriain a ṭang ulh tawh bawk si chu, "Hanna saw ka lo thlak teh ang..min luhtir r'u " a ti ta mai a. Chrisa'n a lo pawt, "I â lutuk" a ti hluk.

"Aih, sawtiang no lutuk saw ka ning, ka tlan vak dawn hleinem, awmhmunah pawh ani ai saw chuan ka ṭangkai zawk ang" a ti bawrh bawrh. 

Msi lah chuan, Refree bulah a lo sawi thawt thawt lehnghal. Hanna chu an ko chhuak ta nge nge a, a tum bâr mai. Jersey chuang a lo awm hlauh a, a ha sawk sawk a, bai auh auh chungin a lut ta. Chrisa'n ama hriat tawk lekin, "Luhlul lutuk" a ti sup. 

Lehlam ho chuan an lo au êl nasa mai a. Tatai lah sawi tawh angin a zam reng reng si lo. Msi hnungah a ding ran a, a hlap thei dawn lo va, a set sak thei tal ang chu..a ke lehlam a la rap nghet ngam lo naa, a tumruh bawk a, a bulah ball a tla mawl ve ta tawp lo khawp mai. An point pawn hma a sawn ta. An veng lam thawm a ṭha chho ve leh a. 

Tatai te lamin hma an hruai ta e. A lut chu a hriat ngei mai. Lehlam pawl chuan auh zâm tumin an rawn hnaih deuh deuh a, a ngaihven ṭhak lo. An game nan point 2 chiah an mamawh tawh tihin Msi tawlhthluk azarah lehlam serve a ni ta hlauh. Ball chu a rawn ving phei fua a, lak sual tum lo zeta hmalam a pan chu a duh aiin a ke na lamna rap na deuh nge ball chu la hman thoin a tlu bawkkhup ta thlawrh a! A ṭhiante chuan an ngaihsak luatah point khat chiahin hma an hruai ta. Insehruhin a ding sai ngar ngar a, ball chu uluk mangkhenin a melh ngat ngat. An zinga tê ber Feli a rawn bitum ta chat a, Feli'n a la pial ta hlauh, line pâwnah a vawrh luah a, a hnunga ding Tatai ṭang tawh si chu eng dang ngaihtuah chang tawh lo chuan ball chu a um ta. Chrisa pawh a ding tawp ringawt. A kut pakhat chauh hmangin a la a, a fuh ta. A ṭhu hnawk ringawt. A ke chu a na lutuk tlat. Mahse, point khat an la mamawh si, khur der der chungin a ding ve ta tho a, Msi serve niin ani hi chu a thiam pangngai a ni bawk a, "Tata, kan chak dawn e" tia au lauh chungin kawh zetin a service ta a. A sawi dik, a out emaw tia an lak duh loh kha a right ta tlat. An veng aṭanga rawn entuten an rawn chim ta huk a, Tatai pawh an pawt buai nasa si, a ke na tawh bawk si chu a ṭhen chak chak mai. Chutiang zawng zawng lo hmuh hmaih miah lotu a cousin Chrisa chuan a rawn keu sawt sawt a, Tatai chu a pawm kang ta lawp a, an ṭhutna lamah a phei pui nul nul..

"Min pawm ziah suh, a zahthlak" Tatai chuan a ti tak naa, a lawm angreng viau. A na thawkhat a niang e. An ṭhut fel hnu chuan, "Khaw maw" tih leh a ke ensak a rual nghal a. 

"A dam har phah ngei ang".a ti zui nghut. 

"Kan chak phah tho alawm, thiam min ti em? " Nui ver ver leh hmai uang takin Tatai'n a lo ti a. Chrisa pawh a nui ve ringawt. 

Rei awm lovin an inthlah haw a.

"I ṭhianpa chu a inawkhlum tak tak em ni?" A tih chuan Tatai chuan Peka vui ni a ni tih a hrechhuak chiah. A va inthiam lo tak êm. 

"Ka hre bik lo, kei chuan ka ring lo" a ti ta hmiah a. 

"Hmanni lawkah i ṭhiannu a thi bawk sia, a mak riau. " Eng nge a ngaihtuah tih hriat har takin a ti sup a. 

"Nia, a mak ê..ka hrethiam tawh lo e a" a ti niah niah ringawt. 

"Fimkhur la aw. Chhuak tam lo la a ṭha a ni mai" a tih lehzel takah chuan, Tatai chuan, "Chu! Kan ṭhianho hi min bitum bîk i tihna em ni?"a ti hliai a. 

"A ni mahna" a ti duh chauh. An in an thleng a, Chrisa chu a rawn peng ve nghal, Tatai ke zût a ngai tho bawk nen. A pindan lamah an inkuah chho a, lehlamah a ke a han hmang lui chu a ṭhatna pawh a awm ve tho mai. Dimdawih leh lutuka enkawl pawh hi kan chhel loh phah fô. 

"Ka inbual hmain kan zût dawn tihna mi?" Tatai chuan a ti hâ a. 

"Va inbual lawk la" a lo ti ringawt. 

"Nia, ka lu suk loh ni a nia. Mahse, ka thlan nasa sia, ka su mai ang, ka rei hlek maithei, duh leh in hnuaiah lo zu awm la" a ti zung zung a. 

"Umm, ka pu khu biak ka duh , ka zu chhuk ang e. Inchiah rei lutuk suh,." Tih pahin a tho va. 

A inbual lai chuan Chrisa'n a ngaihtuah leh ngaihsak êm em hi mak a ti a, a ngaihtuah thiam vak lo. An chhungkuaa a inhnimluh ve tak avangin ani an unau zinga thunei ber chuan nuam lo a tih hlauin a ngaihtuah bîk niah a ngai ta ngawt a. Engpawhnise, Chrisa hi fel a ti. An inmil bawk sia. A inngaihtuah tui a talângin a lo inbual rei deuh nge a bathroom kawngka chu a rawn kik dat dat a. 

"Aw ka zo dawn" a ti vak. A intleng ta puat puat a. A bathrobe a la tur chuan a bai deuh bawk nen, sahbawn bâwm a pal a, sahbawn a rap nghal zat bawk. A tlu zangthal ta huang mai. A rak ṭhawt a. A ngum a la sawh zui! 

Kawngka chu uar zeta rawn kikin ,"I ṭha em?" A rawn ti. 

"Ka hre lo" mu zangthal chung chuan a ti a. A aw pawh a khur deuh. 

" Lo hawng teh" a rawn ti hrâwk. 

A tho mai thei bawk si lo mangang ve tawh si chuan kawngka kalhna chu a han ban a, a ban pha chiah chiah. A pawt ri rak a, a rawn inhawng nghal. Chrisa chu rang zetin a lut a, Tatai chu a melh chhuak thuak, a mangang hmel chu a hmu thiam nge a pawm tho vat a, bathrobe la nghalin a tuam ta hlân a. Pawm kang nawlhin khumah a va mut a. 

"Chris, ka ngum hi…" a ti thâm ṭiak a. 

"Ka hria e, lawk" tiin a sam huh hnuang chu towelin zei lo zet hian a rawn tuam nawk nawk a. A taksa a rawn hru leh nghal, Tatai pawh chu a lo che ve ta vat a. A ke na lam phei chu a sawh fuh deuh nge a tur ut ut a, a ngum erawh a han ṭhut rei chuan a zia ta deuh. 

"Fimkhur rawh ka tih kha" a ti nghut a. 

"Ka hmu bik hleinem" a lo ti hlar. 

"Khaw nge i underware dahna?" A tih chuan, Tatai a meng phâwk hrâ…awiii! A hrechhuak ta. Engmah a inbel lo tih chu..a hmai a hup a, a thlah leh, bed sheet te chu a ṭham nawk nawk. 

"I hmu tiraw?" A ti ṭuau a. 

Nuihza insûm tih hriat zetin, "Hmu e" a ti mai si. 

"I zak em? I hmu bawk lo" a ti hlar a. 

"Aw..ka hmu hman lo hrim hrim" a ti ve leh mai bawk a. 

"Aaa…i hmu..hmela, ti nge i lo luh a? Awiii, ka zak ka zak" tiin khumah chuan a bawkkhup zawngin a mu tual a. A lei a chhuah thul. Chrisa chuan, "Ka hmu lo angah ngai la a ṭha mai. Khaw nge i panty chu" a ti dam thlup a. 

"Drawerah" hmai hup chungin a lo ti. A va en vut a. Panty dum sexy lo zet chu va la chhuakin, "Kha ha rawh" a ti sup a. 

A lo ha ve sawk sawk. A zak ngang a niang, a biang pawh a sên ṭawn ṭâwn mai. 

A inthlakna tur a rawn laksak chu a inbel leh sawk sawk a. A ke nâ pawh a hrechang meuh lo a niang. Chrisa chu a zah thar thut a ni ber e. Dik tak chuan hmeichhe awmin a awm ngai lo va , a tan chuan khatianga a rawn hmu kha thil zahthlak tâwp a tling. Unau diktak an ni bawk si lo. 

A ke a zûtsak lai te chuan chhuat lam a bih ngar ngar. Engmah nâ pawh a hre lo a chha a ni e. A tuam lumsak leh thlap a. 

"A theih hram chuan ring lutuk tawh rih suh, dam vat i duh chuan" tiin a chah a. 

"Umm, haw tawh rawh" a lo ti thlâwt. 

Nui hawk hawkin, "I va ho tak. Nei mawi lo pawh i ni lo va" a ti ta..chimawm a chhuah leh dawn chiang mai. 

"Hmela..nghala, haw rawh" Tatai chuan a ti hlak hlak. 

"Umm, ka va haw ang e. Lo dam rawh. Ka sawi kha, fimkhur ang che" a ti dam thlup a. A chhuak zui nghal. 

"Sahbawn vang vek, awii..ti nge kawngka kha ka hawn le..keimah vang vek..tikhan mi bulah sawi ta se, awii Anu..ka zak ê" tiin Tatai chu a phun mawlh mawlh. 

Mahse a chang leh, "Ani te chu a lerh a, a hur pawh a hur ang. khatiangte chu a hmu tam tawh awm êm mai" a ti thul. Peka thihna leh an team chakna pawn a zahna chu an pawlh buai pha lo. Zanriah pawh tihtham a ei lo, a pain a khak a. "I ke a dam har phah dawn asin, a dam chian hma chu khel tawh miah suh. Hun ṭha dang a awm vat tho ang" tiin. A sawi dik chiah bawk, a ngawi reng. 

Rinpuia te chungchang an sawi bawk a. Sâwn man an rawn ṭhin hmaa va len chu an titlu ta a ni. Mo an nei dawn ta a nih hmel..tunlaiah mi an fel tawh a, mo sual, lawina sual tih pawh hi sawi a tam tawh lo. A awm a nuam vak lo, a chhungrilah a khua a sik ser ser. A pindanah chhoin nachhawkna a hmawm pawp a. A mu hlûn mai. Phone a khawih a, An ṭhianho groupah Peka chungchang an lo sawi laih laih mai. 

A chhungte sawi dan kha chuan, Peka chu inkhel enin a meng rei a. An mutsan nghe nghe, zan dangah pawh zing dar 3 thlengte a en ṭhin. Amahah ngaihbel tur thil a awm lo bawk a, zan dang ang tho turah an ngai. Peka pi tar ve tawh tak hi tar pangkham thin tih takah a mu rei ngai lo va, dar 5 rik hmain a tho tawh. A thawh chuan tv a lo in on vû a, Peka mutna erawh a ruak hiai. Reivakloah an kawngka rawn kikin pitari chuan a va hawnsak a, An veng ami tlangval pahnih exer la ten Peka ruang an hmuh thu chu an rawn sawi ta mai a ni. A lo khawng vek tawh danah a thihna a rei thawkhat tihna a nia. A chhungte kha dar 10 velah an mu a, Peka chu Doctor ten an sawi hmangin dar 12 leh 2 inkara thi a nih hmel. A phone an hmu zo ta miah lo va, an call paw'n switch off a inti zel. A hnuah phei kha chuan a sim card kha phawrh a ni ta daih a. A phone aṭang chuan chhui zui ngaihna a awm lo tluk a ni. A bialnu Ateii chuan dar 11 thleng an inbiak thu leh a mutsan thu a sawi a, an inkarah hmelma emaw Peka tina duh khawp an awm loh thu a sawi bawk. Sawma sawi a hmaa an intihthiam loh vena deuh kha chu Ateii ex in a lo biak ṭhin vang a lo nia. A ex lah chu kar 2 kalta khan Lawngtlaiah hnathawkin a awm daih lehnghal, biak pawh a rawn be ngai tawh lo a nih hmel. Jeje te chuan Peka thih dan an rinhlelh thu an sawi ve nak nak a, Nunpuii vang khan a rilru a na thar leh ang a, a intihlum ta mai em ni ang tihte pawh an sawi tho. Mahse, hei hi chu a awihawm chiah loh. A rilru thar chu nise Peka hian a ṭhiante bulah a thâwi tal pawn a sawi êm êm ang, an inpawh ṭha hlawm êm a, zep leh thup an nei ngai mang lo. Engpawhnise, Peka chhungten FIR an thehlut si lo va, Police dan bawhzui ngaihna a awm lo. A thiante tan erawh a mak kumkhua tawh dawn a nih hmel. 

A nachhawkna eiin a rawn chhawk nge a thaw a sa phat phat mai. Mafeli a rawn lut hlawl mai a. A chhuak lo a nih hmel. A khumah a rawn ṭhu ve a, "I ṭha lo mi?" Ngaihtuah hmel deuh hian a ti a. 

"Ka zia leh tawh zawk, ka khua a sik deuh a" a ti a. A tho kang ve nghal. 

Mafeli chu a cher riauin a hria, a lo en chik vak ngai lo va. A dâng bawk si. 

"I ṭhat loh hmel zawk daih, inentir leh la" a ti ve ngial a. 

"Damdawi ka ei a, course khat ka ei zo ve phawt ang. Ka ṭha mai ang. Nang pawh dam vat rawh" a ti siam siam a. 

"Nia, ka tha ve mai ang. E taka! Nizan ti ila zing dar 1 velah khan i inbual mi? I mu thei lo ve tho a nih ka ring a" Tatai chuan a ti a. 

Mafeli chuan phâwk fâ hian, "Ka tho â leh mawni le..tunlai chu ka tho â ve ziah..ka taksa chak loh vang a niang, chuan ka haihawt bawk" a ti duah a. 

Tatai chuan a sawi zawm duh tawh lo. Mafeli thusawi chu thudik a nih leh nih loh a hre lo naa, awihsak phawt chu a fuh rih maiin a hria. 

An ngawih dat hnuah Mafeli chuan, "Tata, bialpa nge bialnu i neih ṭhin?" A ti ta thâwr a. He zawhna hi a vawi 4 dawnna a ni ta. Huatah pawh a la tawh bik lo. A nui sak a, "Ka la nei lo ve ve" a ti var..

"A van mak, ih maw zep loh chuan i les ka ring a, bialnu i neih loh reng ka ring hleinem" Mafeli chuan a ti hluai a. 

"Nia, mi pawn an ti ziah" a ti ringawt.

"I pa êm alawm" a tih chuan an nui har har a. Mafeli chu a hmaa nasa theihtawpa ânkhumtu kha a ang tawh hlawl lo. A mak zawk, chuti em êma mihring inthlak danglam thei chu. 

"Duhawma hi ka hnê lek lek fô, kei chu maw thil thar hi ka lâwm..tih chhin zel ka châk ṭhin. Zu te, damdawi te pawh ka tikim vek tawh. Ka nuam tih chi an nih loh chuan ka bansan leh mai a. Ka inhrethiam tawh bik lo" Mafeli chuan a ti bawrh bawrh a, ani ang mize zâwi lutuk kâ atanga chhuak atan chuan a mak lam deuh chu a ni. Tatai chuan sawi ve tur a hre meuh lo. Zu chu a in ve zauh tawh a, ruih nuam tihna a neih chang a awm a, nuam tih miah loh chang a nei bawk. Damdawi phei chu ngaihtuah pawh a ngaihtuah duh lo. 

Mafeli titi a ngaithla ve ta reng a. A lo ṭawng duh ve hle tih a hriat thar phah. Tin, hmeichhe sual leh rilru chhia a ni vak lo. Hmeichhia a nihna angin eng emaw han enliam theih loh zawng a nei ve mahna. 

Mafeli'n a chhuahsan hnu lawkah damdawi a ei a, mut mai a tum. Vawiinah a inkhel ṭang lutuk kha a niang a chau ve nghulh mai a. A mut pawh a chhuak. Phone pawh a khawih zui ta lo. A muttui vanglai takin thil rit angreng tak hian a rawn delh bet tlat mai niin a hria a! A han tal thin, a tal chhuak hleithei si lo. A thaw te chu chham mai dawnin a hria a. A hnutê chu na angreng taka ṭhâmtu an awm! A meng ta hlawl mai. A beisei loh lutukin Mafeli ngei mai chuan a hnutê a lo ṭhâmsak a, a lo melh rûn bawk. Tatai hi chiâi mai mai chi a ni lo va, mahse, zanin zet chu a chiâi bakah a hamhaih takzet a ni. 

"Mafel.." a tih rualin a hmui a rawn hup a, mahse, Tatai a tal vak. Khum aṭangin Mafeli chu a tla thla ta a. Tatai pawh rang takin a inbeng kâng a, a ṭhu chhuak nghal. Chu thil chu a beisei loh lutuk a ni tlat. Mafeli chu a rawn ding chhuak phat a, a mitmeng chu a mak takzet, a de sawr sawr a, a hmai a tai hlar bawk. Zêp nâk emaw a hur hmel ngawih ngawih. 

"Tata…engtinmah ka ti dawn lo che,. Hlau suh, mipa chiahin min la khawih a, hmeichhe khawih hi eng nge a an tih hriat ka châk mai a ni.." a ti sar sar a. Râp zetin Tatai chuan a melh kal a..

"Min chhuahsan rawh" a ti hriam hraih. 

A rawn nuih tlawn a, "Inzêp suh, patil i nih kha..i bialnu te i khawih ang khan min han khawih ve teh..ka inhawng teh mai a nia" tiin rawn hnaih a tum a. A lo namsawn dâwrh..

"Patil ka ni lo, ka ni hauh lo. Khatiang thil kha ka ti ngai lo va ,ka ti ngai hek lo vang" a ti khur dar dar..a thinrimna a rawn inmung mêk bawk. 

"Unau tak tak pawh kan nih loh hi..khaw maw..insiam nuam tawn ang" a rawn ti leh ngher ngher a..Tatai chuan a ten takzet tawh. 

"I chhuak lo a nih chuan i pa ka call dawn a nia" tih leh a phone lek kan a rual a, a duh angin a che hleithei si lo va, hetizawnga a vau mai loh chuan..

"I ṭang rei thei chuang lo vang" ti sapin Mafeli pawh chuan ngawi rengin a chhuahsan ve ta mai a. A hlauh vang ni miah lovin a chhungril a khur..Ni e, Zoram khawvelah tuai leh patil hi an kat nuk tawh, a hai bik lo. A landan a pa deuh vang maia rawn beiseitu hmeichhe pangngai tak emaw a tih te pawh an awm. Mak a ti rêng a. Ani chuan sex lam a ngaihven ve lo. A pianken ve a ni a, a landan a nu zên lo a ni mai. Mawngkawhur te, patil te hi chu an nih ang angin an lang mai a, an zak lo thei bawk. An inzêp ve lo bawk a, mahse, khang mawngkawhur te lo pâwl duh mai mipa te, Patil inkhawihtir thei mai hmeichhia te kha mak a ti deuh! Ruih lutuk vanga pawisak nei lo te chu ni ta se a la ngaithiam deuh ang..mahse, an ni si lo. 

Kawngka a va kalh ta hmak a. A zung leh tê tê , a mu leh ta. A mutchhuak erawh bo chiang tak a ni. Kha thil tenawm zet kha a chhungte a hrilh duh ang em? Hrilh ta se, Mafeli kha ṭan tak têin lo ṭang ve leh ta se, ani ṭawngkam thiam lo lutuk si chu an ring lo zawk daih mai ang em? A rilru a buai. A thinrim lah a la reh fel hleithei bawk si lo. Chrisa a hrechhuak zawk, ani hi a hrilh mai dawn em ni ang? A awihsak ang em? Mafeli chu an thisen zawmpui a ni, ani erawh mi hrang daih. A tawpkhawkah chuan a dingchang lo zawkah a ṭang mai lo'ng maw?! A hui pap a. A nu tal hrilh a tum ta a. Mafeli chu hlat a duh bawk, a mize ten ber chi nen in khata an khawsa ho zel tur chuan a tihnual ngawih ngawih. Rinpuia a fela a hnawksak loh tehlul nen. Khatiang khan Mafeli khan beisei fô ta se…ni lo. A theih loh. 

"Bialpa ka neih a ngai ve dawn ta a nih hmel.." a ti sap a. A ngaihtuah zawng ringawt paw'n a zak! Mipain hmeichhe ena an en theih a ring lo bawk. 

A phone chu a hmet êng a, Jeje a la men chuan bialpa chungchang chu sawipui a tum rilru deuh a ni. Mahse, Jeje-a hmaah Christophera msg a lo awm vâ a. A seen lo thei lo.

"Hnutê mawi tak i nei reng sia, junior bra hmang khan thupbo tawh suh. " Tih thu hi..a ner sak..

Jeje msg tur a type san ta daih a. 

"Je, bialpa neih ka duh a, min lo zawnpui teh. A ngai tlat. Ka nula tawh dawn" a va ti ta a. Engtin tak dawngsawng ang maw..

Chrisa chhanlet dan tur a ngaihtuah rauh rauh laiin Mafeli pindan aṭanga ṭap faih faih thawm chuan a rilru a rawn la pêng ta dâwrh a..!