tatai 3

T T -I (3)

Ziaktu : Toni Râlte

A pindan chu hnawk namên lohin a lo hnawk a lo nia! Bed sheet chu pawhthlak niin rizai lah tukverhah a lo inbâng a, lukham chu dressing table chungah a lo bawk rûn bawk. A thawmhnaw chu chhuatah an let phung a, a pheikhawk pakhat phei chu bathroomah a lo awm daih! Mak a tiin a hawi nasa mai. Tu sulhnu tak ni ang maw! A chhuak leh vut a, tumah han zawh tur an awm si lo, an la tho hlawm tlat lo a ni. Rindan erawh a nei, Mafeli pindan kawngka bulah chuan a ding rân a. A inkalh avangin a kik duh ta lem lo. A pindanah lut lehin thawmhnaw chu a chhar khawm a, khumte pawh phah ṭhain a hma angin a chingfel leh thei hram. Mahse, a intihfel zawh meuh chuan dar 7 a ri thuak tawh. Muthilh leh dawn pawn hun a ngah tawk tawh lo. Nunpuii vuinaa kal ve a duh bawk si chuan..in hnuaiah a chhuk a, a nute pawh an lo tho tawh. A rooom tihnawktu chu a zawt tawp mai dawn em mawni tih a ngaihtuah rauh rauh a. Mahse, an hre kher lo thei,. Hre lo ta se a tifel leh vek tawh si a, an awihsak duh kher ang em? Rilru buai ru zetin thingpui a in ta a. A taksa sawizawi pah fâwmin in chhungah chuan a che a. A rilru a kawm mawlh mawlh mai. 

"Ka biak che chu, koh i va hre thei lo ve" a nu awin a rawn tih chuan a phu uih. 

"Min ko law" a ti vut a. 

"Umm, chaw ei siam r'u ka ti..ei hma ang u, chhuahna tur kan nei sia" a nu chuan a ti a. Ani pawh a kalsawn ve nghal. Mafeli'n tukṭhua a rawn kil peih lo. Eng thil danglam em em mah a thleng lo. Tatai'n a pindan chungchang kha a sawi chhuak bawk si lo. A rilruin tum chu a nei ve a, Mafeli chu chîk rûk a tum tlat. Hman zan a thlabar viau zan aṭang khan a dik tlat lo, eng emaw chu a awm a ni. 

Chaw eikhamah a inbual leh tê tê a, tlem chuan a harh ta deuh e. Jejea'n a lo sawm leh dawn a, hmanhmawh chûk a peih lo. A nu a rawn lut a, "Puante bih la" a rawn ti ve ngei. A hma zawngin a ti ngai tawp si lo. 

"Aih" a ti nghat. A nu pawh a nui ringawt. Inkhawmnaah pawh pawnfen a feng hram zel, puan bih hi mawi a ti lutuk, a kalpui thiam mang tlat lo. A tlak zel loh leh a pen hleithei ngai lo. Tun ṭumah erawh Biak in a ni lo bawk a, smart pant a ha a, nula tak takte pawh a ang ve khawp mai. Jejea call a dawng ta bawk a, a chhuak ta vat. Mafeli a room aṭanga rawn chhuak nen an intawk chiah.."I kal dawn law?" A ti sap. Mut a hmuh ṭhat loh hmel viau. Tatai chuan en chîk ru zetin, "Umm, va kal ve loh chuan" tih pahin a kalsan a. A rei lo bawk a, eng thil danglam mah a hmu lem lo. Jeje nen Nunpuii te in chu an pan leh ta phawt a. 

"Mary chungchang kha.." Jeje chuan a ti sup a. 

"Umm, engtin? " A lo ti vat. 

"A rawn thinrim ve vak ringawt a, a zaktheilo ê" a ti hluk. 

"Thinrim ve bawk ang chu" a ti mai a.

"Zaninah inhmuha sawifel kan tum a" tiin a rawn melh zawk a. 

"A ṭha alawm..e taka! Je, tukin chu maw.." tiin a pindan lo hnawk nuaih te, a hmaa a inbual hlana a thawmhnaw lo inchep darhte kha a sawi ta mial mial a. Jeje chuan mak a tih hmel kher mai. 

"Thlahrang a ni lo maw?" A ti hû a! Tatai'n ngei hmel zetin, "Thlahrângin thil an khawih thei mi?" A ti khauh. 

Nunpuii te in an thleng a, in chhung an chan tawh loh vangin pawnah an ṭhu ve a. Nunpuii a fel bawk a, ṭhian a ngahin rawn sûntu an ṭhahnem khawp mai. Roberta kha Police- lamin thu chu an zawtfiah ve ngei a, mahse, rinhlelhawma a lan loh vang nge Nunpuii vuinaah pawh chuan hmuh tur a awm ve a. A bialnu thihna chu a tuar tih a landan aṭang pawn a lang chiang ngawih ngawih. Tu ten emaw rinhlelhna mitin an melh ṭhup bawk si a, a lainatawm letling zawk e a. Tatai te pawn Nunpuii kuang chu thla an lakpui ve a,. Zoi leh Seni te pawh an ṭap nasa khawp mai. Tatai erawh a chhel hrim a, bakah ṭah hi a hreh ṭhin em mai a, a mittui erawh a tla lo thei bîk lo. Chutiang chuan thlanmual thlengin an zui ve a, an ṭhiannu fel leh hlim thei em em Nunpuii chu an thlah liam ta. 

Chrisa pawh a ṭhian dangte nen an rawn lang ve a, Roberta bulah an tâp ve reng mai. Jeje bike lam an pan dun laiin an hmaah a rawn lang leh ta siah mai. Tatai mood a danglam nghal. 

Mahse, a rin loh deuhin, "Tlaiah practice i ngaih kha aw..i chauh viau chuan rawn kal lo mai rawh, ka lo sawisak ang che" a ti dam ta thlup a. Jeje pawh khan an inphurh dawn khan, "I mu ve leh hlek lo mi? I chauh hmel ê" a lo ti tawh a nih kha. A hmel landanah a lo chauh hmel deuh a ni maithei. 

"Nia, ka lawm ngawt ang" polite tak chuan a lo ti ve mai a. Chrisa pawh a kalsawn ve mai bawk. Jeje chuan zawi sup hian, "A ngaihtuah mah mah chein ka hria" a ti a. Tatai a nui hawk, "I â a nih chu" a ti hmak bawk.

Tîm zetin a pindan kawngka chu a nam hawng a. A thaw huai e. Eng thil danglam mah a thleng ta rih lo ve. A inthlak sawk sawk a, a mutchhuak lutuk chu a mu thlawp a, rizai sinin a muhil ta bawrh bawrh. Zanriah ei tura an rawn kohin a harh chauh. An rawn kaihthawh hma deuh khan maimizial nge a mumang zawk a hre chiang lo. A pindanah chuan tu emaw a rawn lut a, khuma a mu lai chu uluk fêa rawn thlirin a chhuak leh daih niin a hria. A hlau riau lehnghal..mahse, Arami aw hriain a ṭhangharh ta hlauh kha a nia. Ngaihtuah zawm duh lo luiin in hnuaiah a chhuk thla thoh thoh a. Mafeli pawn zanriah chu a rawn kil ve peih a. 

"Pa, naktuk chu incheckup ka duh..tunlai chu ka muhil ṭha thei lo, ka hlau riau zel a. A hrehawm" a tih chu, Tatai'n a lo ngaithla uluk viau. 

Pu Hruaia pawh chuan, "Aw va incheckup la a ni mai lawm. Phone hi in khawih nasa lutuk ṭhin a.." a ti nuah nuah a. 

"Phone pawh a ni lo, maimizialin ka awm nasa thei bawk si" Mafeli chuan a ti ringawt. Chaw pawh a ei tam lo kher mai. Ṭhat lohna eng emaw tak zawng a nei a nih hmel. A tan lo sawi ve vak tur awm hek lo, a ngawi liam tawp. Rinpuia pawh a ṭawng lo. Khawhar ina kal a tum lem lo, Assignment a la ti zo bawk si lo. 

Nunpuii thattu chu chhui zui zel a ni dawn a, Roberta pawh thu zawhfiah fô tur a la ni ngei ang. Nunpuii chhungte lam chuan rinhlelh an nei lo, a mak hran lo. Amah kha a felin tu pawimah a sawi lo êm a, amah han huaa tina duh tur an hre lo êm bawk a ni. Postmortem result-ah chuan a hrawka rehna avanga thi niin a lang. A thawk dâwt hnawh a ni tlat! Roberta phone hman chhung kha 5 mins vel a ni a, tualthattu tan chuan chetna hun a awm reng. Amah Roberta sawi danin, "Ka nuin min rawn bia a, ka û leh ka pa chungchang a nih avangin nuam ka tih loh deuh avangin ka kalsawn a, Nunpuii hnungchhawn zawngin zial zûk pahin thingkung nghengin ka bia a. Kan inbe zo ka lêt leh chuan Puii chu a lo mu zangthal a, mi tihderh a hrat êm vangin a tider lehah ngaiin ka kaitho duh lawk lo. A hnua ka zuk kaihthawh dawn khan a zawi ta vek sia! Ka sawi vak vak a, a mar ka dek nghal. A lo phu tawh si lo va, ka mangang ta lutuk a" tiin. 

Mak deuh mai a ni. An lenna hmun hi Hlimên park a ni a. Hmun fianrial an duh ve avangin tlang lamah chhoin an inkawm ta daih a. An awmna thlang deuhah chuan ṭhianho chu an awm ve bawk a, chu bak midang ka hmu lo ti khan Roberta pawn a sawi. Lehlamah Park-a thawkte pawh an pawimawh dawn a ni. Khaminia park tlawhtute list leh coupon an pek chhuah dan aṭangin tualthattu pawh chhui dan a awm ngei ang. Roberta phone pawh an check sak vek a, a nu nen 5 mins vel chu an lo inbe ngei a, an inbiak hun leh Nunpuii a thi tih a chhungte a hrilh hun vel a inmil thlap. A bangbothlak dawn riau mai. Police lam pawh an ṭang viau, tun hnaiah ruang chhar a awm zeuh zeuh bawk si. 

Tatai pawh Assignment a ziak malh malh a. Hajmola a ei nam ham ham bawk. Tihian a ziahsa hi a ṭhiante chuan an copy ve leh mai dawn a ni, thu tlem phuah belhin..chu chu an nih dan fô a ni reng a. Tatai hi an zingah lehkha a lo thiam ber bawk a. Ani pawn a ui ngai bik lo. 

A phone rawn ri chu a ziah zawh ṭêp tawh avangin a ngaihsak duh lo law law a. A ziah zawh rualin a rawn ri leh chiah! Khi sak chungin a la ta a. Jeje bawk..chanchin a rawn hrilh dawn a ni ngei ang. 

"Sawi teh" a ti sap a. 

"Kan inhmu zo chiah, a sa khawp mai. Mahse, ka dinna ngaiah ka la ding. Ka thinlung hian ka fa a ni lo tih min hrilh tlat! Ka pawm thei thlawt lo. Kan chetsual hun leh tuna a nau pai dan ka chhutin a inmil thei lo reng reng. Pathlawia fa bak a ni lo vang" a ti leh nghal tûn tûn a. Tatai chuan, "A ṭap em?" A lo ti daih. 

"Ṭap e mawle..a mak khawp mai. Min lo kawp tih ka hriat khan ka nat tehlul nen, tunah chuan a thawitham pawn ka thinlungah a tla na tawh lo" Jeje chuan a ti hmiah mai. 

"I fa lo ni ta se" Tatai'n a ti leh khauh. Jeje chu a chek hluk a, "A ni lo. Mahse, hma an lak zel chuan DNA kan test mai a niang chu" a ti ta a. Chu bak Kawng dang a awm lo miau a. Ni e, thudik chu a rawn lang mai ang. Lehlamah a nau pai thla 2 a ni tawh a; a hrechhuak har angreng. Hei hi hmeichhe vengva leh vengva lo lanna pakhat chu a ni ve deuh. Thi neih hunbi mumal lo te tan chuan hriat har pawh kha thil awm thei a ni ngei mai a. Chutiang ni lo, thla tin thi nei ziah ten an nau pai thla hnih thum hnua an hre chauh hi chu an inhrechiang tawk lovin an ngaihvenna lam a nih lohzia a lang, inthlahdahna chi khat ti pawn a sawi theih awm e. 

Jeje nen an inbiak zawhah a tui laksa a zawh avangin thun turin in hnuaiah a chhuk a. A nute chuan tv an lo en, a nu thlamuang hmel a hmuh hian a hlim ve ṭhin. A tui thun zo a chho leh tur chiah chu Mafeli a rawn haw a. A chhuak tih a hre miah lo. A inchei nalh angreng viau bawk..

In chung panin an chho rual a. 

"I chhuak ni maw?" Tatai chuan a ti ringawt. 

"Umm, a pawimawh tawp a" a ti ve mai a. A perfume rim chuan a hnar a rawn verh riau. A pindan hnawk nuaih ṭuma a tihfai khan a tawnzau greyah khan a perfume ang ni lo rim kha a nam hak a, tuna Mafeli rim nen hian a inang riau. A ngaihbel pawh a ni mahna. Inbe zui tawh lem lo chuan an pindanah ve ve an lut. 

A phone a khawih chuan Chrisa msg a lo vah a. Mahse, chhiar duh lawk lovin thildang a chhiarsan a. A tawpah loh theih lohin a seen ve chauh. 

"Ih maw..Tata.." tih ringawt. A va ho tak. Tatai pawh a nui hawk hawk. 

"Aw, eng nge" a va ti hram a. He pa hi huat dawna huat hleihtheih si loh, kawmngeih hleihtheih ni bawk si lo a ni tih a hrechiang ta khawp mai. 

"Muttui" a rawn ti daih a. Tatai a hnual ve ringawt, mahse, "Muttui le" a ti let ve ta tho va. Chawhnuah a mut nual avangin a mut a chhuak tehchiam lo. Tihtur awm ta lo chu story te a chhiar kual a, a moodah erawh a cheng tak tak thei lo. 

Nunpuii thihna pawh ni 3 lai a liam ta, thawm vâng engmah a la awm lo. A thattu nia rinhlelh takngial pawh an la nei bawk si lo,. A ṭhiante bakah a chhungte pawh an ṭang ve khawp mai. An volleyball ben hun pawh a rawn inherchhuak ta a. An khelh nî bak class chawlh a ngai lo bawk a, a nu te pawn an phurpui leh hle. An khelh ni chu Rinpuia te khelh nî a ni ve si lo va, class a kal ngei ngei a ngai bawk, an test dawn. Chuvang chuan taxi hman mai a tum a. Mahse, "Khaw nge Tatai chu?" Ti lûng lungtu aw a hriat rual chuan, "Amah bawk" a ti nghat. 

A nuin a rawn ko ta ngei a, Mafeli nen an chhuk thla rual. Mafeli chuan, "I khel ve dawn mi?" Tiin Chrisa chu a bia a. 

"Dawn chiang e mawle..lo en ve la" a lo ti vut a. 

"Doctor ka hmuh leh a ngai a" Mafeli'n a lo ti. Nia, a va incheckup khan damdawi a rawn chawh nual a, mahse, a ṭhatpuia a hriat loh avangin doctor dang râwn a tum leh a ni. Hmuh theih khawpin a cher bawk. Family groupah phei chuan, "Nang hi i rai mawni le?" An ti fiamthu ṭhin. A bialpa Duhawma hi a rawn leng ve zeuh zeuh a, Tatai nen pawh an inbe nêl ve viau tawh. 

"Kal ila" Chrisa'n Tatai en chungin a ti nghut a, hnial buai chi nia a hriat loh avangin a zui ve zat, a pain a rawn ko leh a. Rs. 1000 phawrhin, "Kha, i chhun thingpui inna tur, kan rawn en ve hman mang si lo che u a " a ti duam duam a. A pa hi a felin a ṭha ve ngawt mai. Amah hian han pawha han biak siam siam a thiam lo êm mai pawh a. Lawm takin a la a, Chrisa nen chuan an inzui chhuak ta nghal. 

Car zawk a rawn keng chu a lawm rilru hle. Langsar taka Chrisa nena inphurh chu a duh lo, a zak! Bakah an star thei sia, zawhna a dawng nasa thei si, a peih lo. An va thlen chuan chuminia khel turte chu an lo tlim hmûr tawh a. An veng awmna lam pan mai a tum laiin, "Ṭha takin aw..i pawimawh ber a nia" Chrisa'n a rawn ti a. 

Nui chungin ,"Theihtawp ka chhuah ang" a ti zangkhai vah. Chuta Chrisa rawn melh dan chu a hrethiam chiah lo. Eng emaw a awm tel! Mahse, a ngaihtuah zui duh lo. A ṭhianten an lo be nghal sawt sawt a, Msi nen an thiam fâl deuh avang hian tuman an tichhe ngam lo. 3 rd match-a khel tur an ni a. Midang khel chu an thlir ve ta reng a. An thiam em em bik lo, team khatah thiam fâl bîk pahnih khat tal erawh an awm ve zel thung. Msi'n, "Ka tha a va za tawh ve le" a ti sek a, an nui leh dar dar thin. 

An khelh hun a thleng ta. An position ṭheuhah chuan an han ding a, Tatai serve tur a ni. Kawh zetin a han service ta a, an lak sual ta phawt. An coach hi Chhuana a ni a, a pate reuh si, a ṭang thei sia, a nuihzatthlak zawk. 

An han khel chho ta zel a, Msi leh Tatai'n an cover a ni ber e. A hah pawh an hah. Set khat an la ta phawt a. Chawlh lailawk lai chuan, "Inthlahdah loh tur aw" tiin an infuih a. Tatai thlan hrufai hawi kual chuan an ep chiah Official ho ṭhutnaa Chrisa lo ṭhu chu a han hmu ta a. Amah chu a rawn melh vung vung mai. A ṭhutpuite ho lah chu an patling si, a langsar bik vuah mai. Tatai chuan a melh rei duh lo. Mahse, inkhel tura an luh leh hnu thlengin Chrisa chu a mitthla vel mawle! 

An han inkhel chho leh ta bian bian a, Mission veng lam pawh an ṭang kher mai. Fans an ngah bawk si. Mahse, hetiang hunah hian Tatai hi a confi sauh zel a, lo au zâm tumtute thawm chu a thêngthâwngah a thawk ve ngai meuh lo. A fingering sual palh hlauh a, a kutzungte û leh zungtê a tina ta tlat. Mahse, chawl thei a ni si lo. A han ti ve leh ṭang tâng a. Tun set hi an lak leh chuan an chak a ni mai dawn a, theihtawp a chhuah a ni e. A serve hun a rawn thleng leh a, lehlam pâwl chu an inmitmei nasa, a serve hi lak a har ṭhin miau a, centre-a ding an thiampuinu nula lian ziaih zuaih lamah ball chu a ving phei fûa a, Nula chuan lak fuh ngei tumin hmalam a pan a, mahse, a pial leh ta tlat! Game point a ni ta. Tatai te veng lam thawm pawh an tam lo naa a ring sâwt hle. A tawpna tur a ni bawk a, ball vawrh kangin a zuang zawk a, a hlap ta a. Ball chu a laiah a va tla mawl tawp. An chak ta. 

Chhun chawlhin a zui nghal a. An ni pawh haw mai bik loin an inhnawhpuar ve phawt. An inei puar zawh chuan Tatai chuan hawn mai pawi a ti hran lo bawk a, a ṭhiante nen an inthlah dawn lai chuan hmeichhe thinrim inhrosa thawm an hre ta thut. An hawi dual mai. Volley ball court sirah chuan an lo ding khawm laih a. Intibuai an awm lehpek tawh em mawni le..hetiang nikhua hian intibuai an awm ve ziah! A changkang lo ṭhin teh e. Veng pakhata an player thau lam deuh hian hmeichhe pakhat hi a va kêk nawk nawk mai a, thawm a ri huk. Lo chhan tumtu mipa chuan tipalh niawm takin hmeichhe thau lam chu a nawr nawk a, a tlu ta a, chutah chunu lam ṭangte an rawn thawk ve leh. An ri ta buan buan mai. Official lamin an rawn ṭhelh tak naa, veng leh veng ang zâwng a nih tawh avangin ṭhelh mih a harsa hle. Chrisa chu a palian bawk a, a hmuh hmasak sak chu a theh per lawp lawp mai. Tatai pawn a lo thlir ve reng. Pa pakhat kawr hlip, sa chhe ve lam hi Tatai ta dinna chhak aṭang chuan a rawn tlan thla phut mai a, a rui bawk nen, Tatai lo inring si lo chu a su thlu tawp mai le! Ani a tlukna lamah a chal a zuk tauh kher bawk nen, thisen lum lai ni ta bawk si chu a thi ta bawk si..Msi'n, "Hei thisen i chhuah hi, Putar" a ti tuar. Chrisa chuan a rawn hre pha nge Tatai tlu mêk kaih thawh an tum mêk chu a va hmu a. Insehruh chungin a rawn pen phei pâwk pâwk. Zo zetin Tatai chu a pawt tho lawp a, a kekawr ipte aṭanga scarf la chhuakin a chal thi lai chu a hub bet hmiah bawk. A sutu lah kha awmze nei loin a va tal ve vak vak ringawt a. Chrisa chuan zawi sup hian, "Tah hian min lo nghak rawh" tih leh chu pa pan chu a rual a, Tatai auh zuina pawh chu a hre tawh lo a ni chêk ang chu..chu zurui thau khawh niawm hrima che vel ruai chu a nghawngah a man lawk a, Bang deng rawkin a thehper ta mai. Hmeichhe ṭhenkhat lo thlir vetu te pawh an rak tuar hlawm. Chu pa chu che zui tur a awm lo. Chrisa chu Tatai te awmna lam panin a pen sâu pâwk pâwk a, a kutah chelhin, "Ka thlah ang che" tih leh kalpui a rual nghal. Lo hmutute chuan inngaizawng emaw an ti ngei ang. Thisena inzawmna awm si lovin unau an ni tlat! Tatai pawh chuan a zui ve dat dat ringawt. A chal thi pawh a hup beh avangin a tawp ta nge, nat phei zawng a na lutuk lo. Cara an ṭhut luh hnuah , "Khaw maw" tiin a rawn ensak a. First aid box la chhuakin cream a hnawih a, a bel ta a. A awlsam phian mai. 

"A na em?"a ti nghut a. A mitmeng lian zet chu a la hlauhawm ru riau. A thinrim a la reh fel lo a ni maithei.

"Na lo, ti nge kha pa kha i khawih kher?" Lungawi vak lo hian a ti a. 

"A â em a nih kha" a ti ringawt. Muangchangin in lam an pan ta a. Traffic jamah an tâng leh ta reng mai. 

"Mafeli pawh a haw ve dawn mêk a nih saw" Chrisa chuan a ti sup a. A hawina lam chu a hawi ve zat. Ani chuan a rawn hmu ve lem lo. Mafeli an hmuh takah chuan Tatai chuan a rilru kap deuhtu, tuma bula sawi rem si lo nia a hriat chu sawi chhuah a chak ta et et mai a.  

"Ih, Mafeli hi.." a ti hap a. "Umm" a lo ti nghut. 

A sawi pawp laklawh tawh si a, a inbual hlana thil thleng aṭang khan a chinchhuakin engkim a sawi ta vek a. Chrisa chuan a ngaihven hmel khawp mai. Mahse, engvak a sawi lo. "A mak hle mai" tih chauh a sawi. An in an thlen chuan, "Lo peng la" a ti ve hrâm a. 

"Peng lo vang, saw lam kha ka kalsan rei thei lo" a ti a. A tlan zui nghal. Tatai pawh inah a lut nghal a, Arami a lo awm. A nute chhuak an la haw lo a nih hmel. Tuilum sa ver vawrin a inbual a, a harh ta vâk mai. A fit avang hian taksa rawl leh na ṭhûm hi a nei ngai mang lo. A kutzungṭang erawh a na ta riau mai. In hnuaiah chhukin têl a hnawih thuak thuak a, a ulh ve deuh em ni aw a ti deuh, a chal erawh a tifai a, a thi tawh lo. A ser êm lovang chu maw. An rawn haw khawm chuan Tatai chal inbel var vû an hmuh chuan a chhan an zawt nghal a. Pehhel deuhin a sawi ve mai. A chal ai chuan a kutzungṭang a na a ti zawk. Mahse, a sawi duh lem lo. 

Zanriah an ei laiin Rinpuia'n, "Kar tawpah chuan kan picnic dawn ta em?" Tiin a pa a en a. 

"Umm, ka û kha chuan kartawp lam a tinzawn ve kha mawle.." a pa chuan a lo ti var a. 

Mafeli'n, "Kei chu ka kal peih lo. Tunlai chu Akimi te ho ka hmu peih thlâwt lo" a lo ti nang nang. Picnic hi nizanah khan an rawt a, chhungkaw picnic hi kum khatah vawi 3 tal an nei ṭhin. Tatai pawn kal a châk hran lo khawp mai. 

"Ringawt a che, unaute han hmuh peih loh ngawt" a pa chuan a lo ti hmuk a. 

"Aih, ka mood swing nasa lutuk hi tumah ka hmu peih lo" tih leh kham a rual daih! A pa pawn a enzui vawng vawng mai. Mafeli zia hi a dang a ni, hei hi chu Tatai tan thil thar a ni lo. A chîk telh telh a ngai dawnin a hre lehnghal. 

Zir tur a awm lo bawk a zanin chu a mu zâl mai mai. Tho leh thutin a thawmhnaw tam vak lo chu a thlep ṭha a. A hriat tawk lekin a zai rât rât bawk. Mahse, ṭawng thawm a hriat avangin a zai tawp chawt. 

Mafeli rooma ṭawng bul bul chu a sawi tak va hre lo mah se; inhnial thawm ni hian a hria a. A û nen an inhnial a nih ringin a ngaihven zui duh lo. Mahse, a ri ta bur a! A phu zawk nghe nghe. Darthlalang keh chhuai ri a ni chiang lutuk. Hmanhmawh zetin a tlan chhuak a. Mafeli room chu a lo inkalh lo hlauh. A lut nghal a. Dressing table hmaah Mafeli chu a lo ding khawng reng a! A hmaa darthlalang keh chu a lo melh ngawt ngawt nia! 

"Mafel, i ṭha em?" Tiin a be mawlh mawlh a. Rinpuia chu a len chhuah avangin a rawn lang lo. A nute lah in hnuaiah an awm si, an hre ve lehpek lo vang. 

Mafeli chu a chechâng eih si lo, a melh ngai a melh ngur ringawt. 

"Hei, mafel" tia a sawi nawk nawk takah chuan a harh thut nge a phu uih a. 

"Ehe!.." tiin darthlalang keh nuaih lam chu a va pan a. 

"Hei ti nge a? Tata,i tikeh mi?" A ti hâ a. Tatai chuan a lo melh nghek ringawt. 

"Nangman i tikeh" a ti sap.

"Maw?! Ngati nge? " A la ti zaw mah. 

"Ka hre bîk lo. A keh ri ka hria a, ka rawn kal alawm" a ti khur dat a. Mafeli chu a hmai hupin khumah a ṭhu hnawk. Makti zetin Tatai'n a melh thung. 

"I tha em?" A ti leh a. 

"Umm, ka ṭha e. Ka rilru a na lutuk a, Duhawma'n min lo kawp alawm..ka pa bulah sawi miah suh aw, ka rilru na ka rui ṭhin a..eng nge ka tih pawh ka hre ngai lo" tiin a insût hraih a. 

"A va zia lo ve. " A ti ringawt. Hnem dan tur a hre mai si lo. 

"Va phei tawh rawh..ka ṭha aw.." Mafeli chuan a ti sawk sawk a. Tatai tan a hrilhhaithlak letling. Ngawi reng chuan a chhuahsan ve ta mai bawk a. Mahse, a ngaihtuahna a buai tulh tulh thung. Mafeli awmdan chu a hriatthiam phak bak a ni. Damlohna a nei a nih a ring. Duhawma khan a kawp angin a sawi naa, awih harsa a ti ru deuh, a chhan chu Duhawma hian a atchilh lo chauh zawk sia, duhtu zawk chuan a kawp thei dawn em mawni le…a la tawnhriat ve loh thil a nih avangin ngaihtuah zui loh a thlang. 

Ear phone vuahin movie a en ta daih a, a lo muthilhsan daih lehnghal. A harh chuan dar 6 a lo pel hret tawh a, han mut leh kha thawh a hai zawk ang tih hlauin a tho ta zawk a. 

Kar tawp pawh a rawn thleng ta. An lo sawi lâwk tawh angin chhungkaw picnic tur chuan an inbuatsaih a. Mafeli pawh a hun a thlen takah chuan a tel ve leh duh ta tho. Tatai erawh chuan a châk hlawl lo, a tan mi thar chan an la chang bawk nen. A hnaih deuh ber Chrisa lah chuan programme dang a neih avangin kal a tum si lo. Jeje tal awm ve thei se chuan a phur mahna. Mahse, a nu mitmei a vensak bakah a pahrawn a zah avangin a insiam ve ta a. Tui a cheng thiam chuang lo bawk a, tui chen kawr pawh a keng lem lo. Arami a pui tawh mai ang chu. Rinpuia'n car a khalh a, Mafeli erawh an cousin tho Kuri nen an inphur. Spot an thleng a, boruak pawh a nuam viau. Puitling ho pawn tui an cheng ve sup sup. Arami leh Tatai bakah tui hlau ve tho Pu Lawma nupui Pi Diki te chu choka lamah an buai a. An ri ve chul mai. 

Pi Diki chuan, "Tata, Mafeli te hi i chungah an ṭha em?" Thutak deuh hian a ti a. 

"Umm ṭha tehreng mai. " A lo ti var. 

"Mafeli tak hi ka lo huphurhpui deuh che a, a sual hran lo naa, a nu kha a ngai thei êm a" a ti siam siam a. 

Tatai chuan a chhang tawh lo. Chhan dan tur a hriat loh vang a ni mah zawk ang chu. An inbâwl zo hma angreng sia, tihtur a vâng riau. Ball an beng laih laih a, mahse, a kut a tihnat avangin tel ve a tum lem lo. Amah chauhin pool thlang lam chu a pan a, di în nawm hmel deuh mai bakah enkawl ngun tih hriat tak huan tê fel ren rawn awmte chuan ani leh ni lo angin a lung a tilêng ve tlat! A hawi a hawi a. In tê-ah chuan a lut ta a. A kawngka chu hmanlai kawngkhar anga nawr tawlh ang chi kha a ni. A luh chuan a lo fai hun mai. Tapchakte pawh a awm ve thlap. Namthlak chu a lo inhawng sa a, thlifim a rawn thaw lut nghal heuh heuh. A ṭhu thluang duai a, râl lehlam a thlir ta doh doh. A khua a har, mal tak anga inhriatna a nei ve tlat mai! Hetiang hian a awm ngai miah lo. Nu chiah niin ka pa tia koh tur nei ngai lo mah se; a chantawkah a lungawi ṭhin. A nu avang pawhin, tuna a awmdan hi chu khawtlang lunglên te pawh a ni mahna le. 

Engtia rei nge a ṭhut pawh a hre lo. 

"Tata" ti suptu aw a hriat rual chuan a ngaihtuahna aṭang chuan a ṭhangharh ta hlawl. A hawi let vat a. Kawngka bula Chrisa lo ding run a hmuh chuan, a hriatthiam hauh si lohin lawmna mak deuh a nei ve ringawt nia! Amah pawn mak a inti! 

"Nang maw?" A ti hluai a. Rawn nuih var varin, "I mal dawn sia, ka khawngaih che lawm" a tih chuan Tatai pawh a nui ve ringawt. A bulah a rawn ṭhu a, thlam chu a tê sawtin a hria. 

"Vawi thum ka kohnaah che i hre chauh" a ti a. 

"Nia, thil ka lo ngaihtuah a " a ti ringawt a. 

"Keimah maw?" Tiin a rawn melh rûn a. Tatai chu tawlh sawn hlekin, "I zak lo" a ti hlar. 

Za zeta nuiin, "Ni dawn tak, Patil i ni tak e" tiin hmalam a en a. 

"Patil ka ni ziah lo" a ti ro halh. Patil a nih lohzia hria se a duh lutuk chu mak a inti, a hma kha chuan miin patil emaw an tihte khan engahmah a ngai ngai lo. Thudik a ni chuang lo va, lo sawi mai mai rawh se a ti mai zel. Mahse, Chrisa'n patil a nih lohzia hria se a duh viau chhan chu a ngaihtuah thiam miah lo. 

"Chu chu engvanga min hrilh nge i nih?" A ti ta khauh mai. Tatai a dang titih dêr..en pawh en ngam lo chuan, "Ih, ka ni miau hleinem" a ti ringawt. 

"Tui i cheng ve lo va,. " Zawhna mitmeng hian a ti leh daih. 

"Ka hleuh thiam hleinem" a ti nghat. Tifuh intih hmel zet hian, "Yes..hawh, ka zirtir ang che.." tiin a che hrut. 

"Aih, ka duh lo, ka hlau" a lo ti vat. A hlau tak tak tih a hmelah a lang vek. 

"Ka bulah hlauh i nei a maw?" A mita rawn melh kalh chungin a ti thawp sup a. Tatai chu engtin emaw a awm! A sawi thiam lo. A mur pawh a ni lo, a chhungrilah che dat a awm mawle. 

Mahse, ngaihsam hmel zet hian, "I â a nih chu" a lo ti hmak. 

Chrisa chuan zawitê hian, "Patil ve si, tui han hleuh thiam loh" a ti ta. Tatai bengah a ring ropui si, "Eng a?! Hmela" a ti nghek. 

"Engmah ka sawi lo..a meng rum leh ta.." a lo ti nem duai a. Rum zeta melhin, "Chho rawh. I ninawm" a ti hlak. 

"Tui hleuh kan zir dawn kha..hawh le..nge puak chhoh i duh zawk?" Tih pahin a ding a. 

"Ka duh lo hulhual" a lo ti khauh fur mai. Ni e, tui hleuh thiam lo nih hi a zak lo, hleuh thiam tur mi a nih a ring lo tawp tawh. 

"Ka nghak tlat dawn che" tiin a ding ve tlat bawk si. 

"Ka kal dawn chuang lo" a tih hmak lai chuan, "Ê..hetah law in lo awm? Chris, tui hleuh min lo zirtir ve teh, Mafeli ten min nuihzat si" Pu Lawma fanu Akimi chuan rawn luh pahin a ti nghal hmawk hmawk. 

"He nu hi min zawn chhohpui la" Chrisa'n a tih chuan Tatai a ding hlawl.."I va han ninawm tak e aw..ka hleuh thiam duh lo. " A ti chiam. Akimi chu a lo nui hawk hawk, "Aw..tata, reilotê zir ve lawk mai rawh, Chrisa a beidawng ngai lo" a lo ti a. 

"Kei pawh ka beidawng ngai lo" a ti ve sak. Chrisa chuan zaidam hmel fê hian a lo melh vung vung. 

"Kal ang" Akimi'n Chrisa a kai a. Tatai nen an la inmelh ngat ngat. 

"Tak che hian aw" ti supin a tlawm zawkah a ṭang ta nge Akimi chu a zui chhuak ta nge nge a. Tatai chu ruak huaiin a inhria mawle! Inhnialpui tur a nei reng chu lehlamah a khawhar hnemtu a ni mah tawh zawkin a hria. Chrisa chu a haw lo va, huatna chhan tur pawh a nei lo, mahse, pangngai tak chuan an inkawm ve thei ngai dawnin a ring lo. Minute tam a ral hmain amahin a awm ning ve ta bawk nen, a chho ve ta a. Pool a thleng chho tur chu a inchhuih hlauh mai a, hmalam a bawh rawk rawk, mahse , a tlu êm lo. A kut na lai ber kherin lei a zuk nem chu a rak ṭhawt! A na mah mah a ni. A piah lawka ṭhu Pi Dingi chuan, "Awii! Ti nge" tiin a rawn au vat a. 

Insangmarin, "Ka kut ka ti ulh emaw ka tia" a ti ta ngawt. Naupang chenna tura siam sirah chuan a va ṭhu ve a, a rukin a kut chu a zut a zût mai. Eng a ang dawna a hriat loh avangin chokaah a chho a, tel hnawih lehin a zut leh ta a. A na tulh tulh lehnghal. A kutzungtê phei chu a kawi deuh ngâwk thei.."A tliak ami le" tiin a en vang vang a. 

Chrisa leh Akimi te ho an rawn lut ve a, ni a rawn sat nat deuh vangin a daih hnua tui chen leh tumin an chawlhsan rih a ni. 

"I intina em ni?" Chrisa chuan a bula ding chung hian a ti a. A kut a la vat, "Aih, na lo" a ti ve tlat. 

"Khaw maw, ka lo en" tih pahin a rawn ban a, "Ngai lo" tih pahin a hnunglamah a thukru ve tlat si, "A va mak e aw. Khaw maw" tiin a rawn chelh thut a. 

Mafeli'n, "Ngati nge?" Tiin a rawn bih ve a. A kutzungtê kawi deuh chu Chrisa chuan a khawihsak mêk a, Tatai nâ ti chu a ṭhen chak chak mai. Mahse, rum erawh a duh miah lo.

"Awii, a tliak a mi? A va kawi em êm?" Mafeli chuan a ti hû a. 

"A ulh a niang" a ti thei hrâm. 

Chrisa chuan an bula ṭhutthlengah chuan a nem ṭhu sauh sauh a. Tel chulh belh lehin a zût ta a. Akimi chuan, "Tata, a zût thiam alawm, a letling zawngin a piang a" a lo ti ve phar phar. 

A zût na tho naa, a nuam deuh huaiin a hria. "Ball beng tawh rih suh" thupe âw fê hian Chrisa chuan a ti a. 

"Beng ang.." a lo ti. 

"Nia, i beng ang. Luhlulnu" a lo ti nghek. Tatai pawn Chrisa vîn lek lek chu makti deuh takin a lo melh a. A nui der bawk si lo. 

Ngawi rengin Chrisa lah chu a kalsawn daih. 

An picnic chu a nuam viau naa, an nu leh pate an awm ve tlat avangin tuman a veilam ti ngam hek lo, an tan chuan a ho ru riau maithei bawk. Puar taka chaw an ei hnuah haw turin an insingsa ṭan a. 

"Tata, scooty saw lo khalh haw mai ta che. Chrisa carah hawn ka tum sia" Mafeli'n a rawn ti a.

"Nia, a pawi hleinem" a ti ringawt. A kut nâ avangin a khalh thei ang em a hre lo, mahse, a inringtawk lui hram hram. Puitling ho chu an chhuak ṭan a, Tatai pawh scooty chu tinungin a tlan chhuak ve a. Amah chauhin a ni bawk a, nuam a ti daih zawk. A hnungah Chrisa te pawh an rawn tlan ve, a kian ṭhin naa a tlanpel duh tlat lo.

A chesual ta tlat! Kawngkawia pickup rawn tlan chuan side a la lo nasa mai a, Tatai a chetbuai phah. A kawi ta nawk nawk a, a kut lah a hmang ṭha ngam si lo..a tlu ta ṭhuai a! Scooty pawh thui vak lo chu a tleng ve. Amah Tatai erawh kawngsirah a bawkkhup a, a kerêk chu a na ngut ngut..

A hnunga tlante chu an ding vat a. An rawn kaitho sawk sawk mai. Midangin scooty an lo va tung ṭha bawk. Ngaihtuah hmel fê hian, Chrisa chuan, "I ṭha em? Khawi lai nge nâ?" Tiin Tatai chu a en kual a. 

."ka ke" a ti tham ṭiak. A ke dinglam chu a tiche ṭha ngam lo. 

"A tliak lo hlauh e, i kheimit hi engtin emaw i tauh a ni maithei. " Chrisa'n a ti mawlh mawlh. A pawm tho nawlh a, Car hnungah chuan a muttir ta a. 

Mafeli chuan, "I khalh thiam loh chuan sawi mai tur alawm. Saw a chhe nual lehnghal.." a rawn ti nghal bawrh bawrh. 

An rin loh deuha Mafeli ṭawng chu mak an ti hle tih a lang. Tatai tak pawh a hrilhhai kher mai. 

"Ka tihpalh lutuk..ih, ka kut hi ka hmang ṭha ngam lo va" a ti niah niah..pawi a ti takzet a ni. Mafeli lah chu a thinrim hmel nasa si, a meng ling hlar a. Tatai chu seh duh mai hmel a pu a ni. 

"I chawi a ngai ang. Ka scooty i tichhe ringawt a nia. Mi rethei hnamchawm lutuk scooty pawh khalh thiam loin i lo risk ve ringawt hi a pawi a ni" a ti hlawih hlawih a. 

"Mafel, a tawk..ngawi hmak rawh" Chrisa aw chu a ring hran lo, mahse, a hlauhawm takzet a ni. 

"Ka sawi dik lo em ni? He nu hi ka unaunu tak tak anga ka en theih in lo ring a ni maw? A teuh hnaisai lo mai. Ani ang class lo lutuk, patil lehnghal nen hian kan intype hlawl lo" a ti leh bawrh bawrh. A unaute chuan chhan ngaihna pawh an hre lo a niang, hawihai zetin an melh ngawt ngawt ringawt. 

"I ka kha chip hmak rawh, patil a ni hauh lo.." Chrisa aw chu a khur lek lek.. Tatai hrehawm tihzia leh inthlahrunzia chu aw! A ke a na bawk si. 

"Eng nge he hnamchawmnu chu i ṭan viau a?! Ṭan tlak a awm lo, khatin lo inla fel suh, Christopher.." Mafeli aw chu a fiak ṭhak mai. 

Akimi zawk insum thei lo chuan, "I zak lo em mai a, i rapthlak lutuk" a lo ti ve bawrh. 

"A nih tak chu..buaipui ula ti nia..khawih pawh ka khawih ten e a.." a tih rual chuan Chrisa a va tawlh hma dâwrh a, mtea a che zawk , Chrisa chu a va chelh titih a. 

"Eng nge a?! Nang pa hi i va danglam sâwt ve..saw nu saw i eng nge a nih a? Mawh?" Mafeli chuan a ti tuar tuar. 

Nunui'n , "Amah a ang lo tawp" a ti zawi sap. A rapthlak bawk a niang. 

Chrisa a let vut a, "Kal ang u. Tatai hi damdawi ina kan hruai a ngai" a ti nghut a. Carah a lut nghal. An rawn chuang nghal sap sap a, Nunui chuan Tatai chu kuah titihin, "A la na em? Hrehawm ti suh aw. Mafeli kha a lem hlek a, a kai a niang" a ti mawlh mawlh a. A heh a pet fan fan ringawt. Mafeli tawngkam tinte kha hmaih nei miah lovin a thinlungah a vawng rân mai. Na a ti a, a zak takzet a ni. Chrisa chu a tlan chak kher mai. Mi dangin an chhungte chu chanchin an lo hrilh bawk a. Damdawi in hnai ber an pan zui nghal. Tatai chuan a ke chu a rap ngam meuh lo. A chhel êm zawk a,. Nurse pakhatin a lo buaipui vat. 

A lo vung bûr tawh a, a duk ruih bawk. Damdawi a hnawih a, a tuam lumsak ta a. A tliak lo chu a vannei kher mai. Volley ball erawh a khel thei dawn ta lo. Ruh lam hi chu a dam mawh angreng si a. Chrisa bawkin a thlah haw leh thlap. A la ṭawng lo reng reng, a hmel a tak run reng a, tuman an be ngam lo a niang. 

Mafeli kha chu Amtea ten an rawn phur haw a, a scooty kha a chhe nasa lem lo, Lawmkima'n a rawn khalh haw sak thung. Mafeli ṭawngkam te chu an sawi duh bîk lo va. A room thleng Chrisa'n a pawm chho a, khuma a nghah hnuah, "Sawtah khan i inbual tiraw?" A ti hmuk a. 

"Umm..ka intleuh zuai" a ti ve mai a.

A pang a rawn dek a, "I khua chu a sik lo ve. " A ti sup a. A hmel thutak rûn kha a bo leh duak tawh. Dawhthei tak hmel a pu tawh. 

"Ball ka beng thei dawn lo a nih hi" a tih chuan a na zawk thei. A nuam tih ber kha a ni ve sia. 

"Khalh loh tur che a nia..i kut i hmang ṭha ngam lo tih i hrereng sia" a ti a. 

"Nia, mahse, hnial kha ka hreh ve sia" a ti ringawt. 

"A ṭawngkam kha chu theihnghilh daih rawh. A ruih vang a nih kha.." Mafeli thup mawi hrâm a tum chu Tatai chuan fel a lo ti viau. 

"Nia, a thinrim êm a nih kha.." a ti a. A nute an rawn luh tak avangin Chrisa chuan, "Muttui le..lo dam vat rawh" tiin a thawhsan ta a. 

Mi zawng zawng an muthilh hnuah pawh a la meng kar..Mafeli ṭawngkam kha a hrechhuak leh ṭhin. A thaw leh hawk zel a..ngaihtuah loh luih tumin phone te a khawih thul..awmzia a awm thei si lo. Zan a rei telh telh a, a nachhawkna ei kha a thawk zo ta nge ni a ke lah chuan a rawn tur ta et et a. A tiche ṭha ngam bawk si lo. A zun lah chu a chhuak uchuak bawk si. A mut dawn khan a nuin a va zunpui kha a nia. A khum leh bathroom a inhlat lutuk lo bawk a, bawkvak mai teh ang tiin a tho a. A rum nghat mai. A ke lah a vûng ûl tawh si. Khum atanga a chhuk tur chu hun a duh rei hle. Chhuat a thlen chuan a bawkvak ta hriau hriau a, a innuihzat thut. Bai auh auh a fuh zawk awm reng sia tiin khum chelhin a ding leh a, a ke na lam chu a rap ngam lo hulhual. 

Bathroom thleng chu a bai phei thei hrâm..comode erawh a pan buai peih lo,. Chhuatah chuan a zung ta hiau hiau a. A hahdam suai suai thei. Khuma a let leh chuan a chau nghulh thei. Nachhawkna kha a hmawm tawh bawk a, a rawn chhawk mai ang chu maw..

A phone rawn nghawr dat avang chuan a la kang vat a. Whatsappah Chrisa'n a rawn bia. Tun ṭum chu thildang tikhawtlai lovin a hawng ve ta zat. 

"I muhil thei êm ang chu.." tih a ni. 

"Zun ka cheh ṭêp a..mahse, ka bai phei thei hram" a va ti ve a. Nidang chu ni se, "Ka ṭha" a ti leh ngei ang. 

"Ni dawn tak..a bur ruak ka hauh" a rawn ti a. Huat a hnêkin Tatai nuih a zâ.

"I tenawm" a va ti tho a. 

"Hmeichhe mak tak chu i ni" tih thu a rawn thawn chu a awmze dik tak hriat châk deuhin a chhiar nawn sek..