Tatai 2

TATA-I (2)

Ziaktu : Toni Râlte

A tuk chu chawlh a nih vangin an awmpui Arami a pui ve a. A nu nen chauha kha chen khawsa an ni bawk a, in chhung chet leh rawngbawlte hi chu a hnehsawh vei phian a. Mahse, a che sawk sawk thiam lo. A che muang a, a sulhnu chhui a ngai ve vak lo thung. Arami nen pawh an inkawm thei ve ta phian e. A nute erawh a pa nen eng emaw tiin an chhuak a. Rinpuia te unau chu an meng rei bawk a niang, chawhnu lamah chauh an rawn tho. Tatai tan chuan a pain a fate a zilh miah lo chu a mak! Mi hausa ho nundan tur rêng a niang a tih tak ngawt kha. Bakah Mafeli te kha a bialpa nen tikhan an insi rial reng a, a û kha a zah lo nge Rinpuia pawn engmah sawi a nei lo zawk ni. A ṭha vek zel e. Chawhnu lamah thawmhnaw pho a han seng a, eirawngbawl nan a la hma deuh sia, a pindanah muin phone a kheuh ve mai mai a. 

Lalchungnunga Family groupah an lo add ve a lo nia! Lalchungnunga chu a pahrawn pa a ni. Aizawl mihlun ho hi chuan an hriat ve a rinawm. Sumdawng lar tak ni ṭhin, mahse, vanduaithlak deuhin a hnathawka a chhawr nula pakhat a khuaikhem vanga tar alama hmingchhe ta kha a nia. A thih hnuah kha case kha tharthawh lehin Pu Hruaia te lamin hnehna an chang ta nghe nghe a nih kha. A pa hausakna zâr zoin an unau pawh an rawn nuamsa chho viau a, Pu Lawma leh an naupangber pu Ramsiama ten sumdawnna kawng an rawn zawh zui ve ta zat a. An neinung viau bawk. A bak an unau dangte erawh sawrkar hnaah inhnîmphumin hna sâng leh zahawm tak tak an nei hlawm a. Chrisa nu Pi Dingliani leh an naupangber dawttu Pi Linda Zothanpari pawh an nuṭa te puih ngai lovin an inchawm thei ve vek a ni. 

Chhungkua anga ena an family groupah hial an lo add chuan Tatai a tilawm ve angreng a. Misual leh kheuhbeuh an nih a ring vak lo. Mahse, a va ṭawng ve ngam lem lo va, an inkawmna chu a chhiar thla mai mai. Nizan an hawn hnu dar 1 velah daih Christophera rawn sawi chu a chhiar ngun viau. "Tatai nen kan hawn khan ramhuai kan hmu" tih vel, midangin an rawn zawt fiah a, ṭha tak chuan a chhang ve tho a. Sawi chhuah kher kha ṭul a ti vak lo asin le aw. 

Shillong lam daiha awm amah Tatai pawn a la hmuh ve loh, Alice inti chuan, "Chris, Tatai chu a fel em? I lo hmu tâi leh ringawt em?" A rawn ti pek a! Puitling pawh an awm ve vek sia, Tatai zawk chuan nuam lo a ti letling. 

Chrisa lah chuan, "A awm ve reng hi, zawt la.." a la rawn tizui! A hnu lawkah Alice chuan pvt-in a rawn be ta ngei a. A thlalaka a landan chuan amah aia û hlek tur sam tawi, hmelṭha leh piannalh zet mai a ni a. Inchei pawh a thiam hmel khawp mai. 

"Ka rawn zin ṭêp a, in inah ka rawn thleng ang. Mafeli'n fel a tih thu che a sawi nasa a..i sual lo a niang" a rawn ti nghal bawrh bawrh a. Tatai pawh chuan, "Ka fel lo, an fel êm zawk a.." a ti ve ringawt. Mafeli'n fel a lo ti ve chu a lawm viau thung. 

"Chrisa kha a la chimawm em?" A rawn tih chuan a ṭhen sak.."Nghal tak a ni" a zuk ti ve a. Alice nen chuan an inpawh ta viau. A hnu zelah pawh an cousin te mizia a hrilh ta fô a. Tatai tan a ṭangkai viau, a chhan chu mi thar a nih avangin kawm dan tur leh biak dan tur tâwk a hriat lawk kha a ngai ve tlat a ni. 

"Rinpuia kha chu a pa ang chiah, a fel, a dam ruih a. Mi kawm pawh a thiam, a lerh lo lutuk kha a buaithlak zawk.Ruati nen khan an inneih ka ring. Mafeli chu khati tawp kha a ni mai, a rilru a na hma, a no tawp. A a pangchang bîk. Amtea kha i hria ang a, harh tawp, a tetlai pawn a ninhlei vanga hrem tuar nasa a nia, a fel lutuk, tawng duh ve deuh a nia. A lerh pawh a lerh. Lawmkima kha chu a thinchhe bawrlawk tawp aw. Zoremi te, Nunui te ho kha chu an zia a inang tlangpui, hmeichhe mizia ang kha aw..kan chhungkaw nawm vena chu ngheuh kan nei lo, kan ri nghal bawrh bawrh zel. Chrisa erawh a dang bîk, a sual bakah a luhlul..mi chimawm leh nghal khat tlat a nia, mahse, kan unau zingah a upa ber lo nain a thu kan ngaichâng ber thung..a mak tawp..a nu duatsual a nia, Mahse ,kan ngai ber zel.."..tih thu vel chu Tatai pawn ngun takin a lo chhiar ve ṭhin. La inhmu lo mah se; Alice nen chuan an inkawmngeih ta viau. Pu Thianga fanu naupangber Nunui hi a chhan sawi fak tur awm si lo hian pawh har chu a ti deuh. A thil sawi duhdan hi a mak thei êm a..entirnan: Mi harsa ve tak, inchei mang lo ten emaw chawhmeh rawn zuar ta se; "Va inbual fai phawt la, i thil zawrh pawh lei a châkawm sawt ang" ti chi kha a nia. Tatai'n a hrethiam ṭhin lo. 

Class pawh an la kal ve zel a, Jeje leh a bialnu an inṭhen leh tak avangin an awm dun tam phah. Sawma te ho nen pawh inzui tho mah se; Jeje nen bîk hi chuan an inkawmna a rei ve tawh êm a, inthlah tur chi an ni lem lo. A nu pawh a hlim vang nimaw a taksa te pawh hmuh theih khawpin a rawn ṭha chho va, a no sûk mai. 

Amtea birthday an lawm aṭanga ni 3naah thil danglam tak a thleng a. Ṭhalai dangte ang bawkin Tatai pawh hian thawh hma a harsat ve a, chumi zingah pawh chuan a nuin a rawn kaitho a ,dar 7 a pel tawh. Ham bâi bâiin a tho a,a'n zimar leh tê tê a, in hnuaiah a chhuk ve ta a. A beisei loh tawpin an inlengte chu police an ni tlat! 

A nu chuan, "Kha hman zana in thil hmuh chungchângah rawn biak che an tum a nih kha" a lo ti var a. 

"Eng thil maw?" A lo ti hû. 

Hmeichhe hleitling leh hmelṭha tak, inrintawk hmel zet chuan nui sâng chungin, "Amanda ka nia, lo inchibai ila" tiin a kut a rawn phar chhuak vah a. Awiii! Amanda te chu a hre ve lutuk. A hmel a la hmu lo mai mai zawk. Pasal a neih hnuah hian case lian tham a la meuh tawh lo va, a fapa Malsawmpeka khan a ai a rawn awh chho ti mai ang. Mahse, Amanda chu nu a ni tawh chung pawn nula tam tak tluk loh a la ni tho. Fa pakhat chiah a nei a ni bawk a. Tatai pawh chuan Amanda a ni tih a hriat atang chuan ngaihngam takin a hmachhawn thei ta a. 

"Eng chungchângah nge le?" A ngaihna hre vak lo hian a ti a. 

Amanda chuan nelawm zet hian, "Englo a nia. Nizan ti ila zing lam dar 3 velah khan Dominic picnic spot leh Lawipû inkarah hmeichhe ruang chhar a ni a. Chu hmeichhe ruang chharna bâwr velah chuan ni 2 liamta khan hmuh in nei niin kan lo hria a. Chung thil chu rawn zawhfiah che kan tum a ni e" a ti felfai thlap a. Tatai chuan, "Christopher alawm" a ti hliai a! Mahse, a tel ve tho avangin a ngawi leh daih. A nuin, "Chhungkaw groupa in sawi kha tak tak em ni?" A lo ti vat a. 

"Aa..amah khan a rawn sawi ringawt alawm. Kei chuan rahuai a nih ka lo ring a" a tih chuan, Amanda asst a pasal ni bawk Samsona chu a lo nui hawk a, nuihsawh râwng erawh a kai hran lo. 

An hmuh dan diktak chiang leh dilchhut taka an han zawh chhuah dap hnu chuan, "A lawmawm e. Chrisa nen insawi dan pawh a inang vek e. Kan han chhui bîk chhan chu Doctorin a thihna kha ni 2 liamta vel a nih thu a sawi vang a nia..kan lawm e, kan kal phawt ang" tiin Amanda te chu an ding a. Pu Hruaia te nupain an thlah thung. 

Chaw ei laiin Mafeli'n , "U Chrisa khan a sawi kher a. Mahse, a mak ê, mihring ni ta se, ti nge khatia kawngthlangah te a tlan thlak le?" A ti a. 

"Nia, thawm a nei zui bawk si lo, a zuanthlak rual khan a thi nghal a niang" Tatai'n a lo ti ve. A rilru a nawm loh phah angreng viau. Kha mihring niawm tak tlan thla kha an ruang chhar a nih chuan a zuangthla kha a thi nghal a nih a ring ber. 

Canteena an chawlh laiin tu emawin a rawn call a, "Keimah Christopher"a rawn tih chuan a ner sak. 

"Eng nge?" A ti hap a. 

"Amanda te khan an rawn hmu ve che maw? Chawhnuah ruang kha en turin min tia, i rawn kal ve a ngai" a rawn ti a.

"An la phum na nge?" A ti ringawt. 

"Phum lo a niang, tu nge a nih an hre lo" a ti nghut a. 

"Aw le, ka rawn kal ang. Dar 3-ah " a tih chuan, "Ka lo hruai ang che..dar 2:30-ah" a rawn ti nghal chut. Hnial chi a ni lo tih hriain a um e ve mai bawk a. A ṭhiante bulah erawh thil thleng kha engmah a la sawi lo. Zêp nâk emaw an mi hmuh kha a hmel pawh a hmu chiang miah lo. Kawr var lam deuh chu a ha tih a hria, tin, ngaihbel theih tur ting chuan a sam a sei tih pawh a hmu thawi thuak. Ruang pawh en ringawt mah se; an mi hmuh kha a ni nge ni lo a hre dawn chuang si lo va, awmzia a awm vak awm lo ê. 

Chrisa a rawn thlen chuan bang an awm ṭan nek nek a, an college gate bula bullet nena a lo ding run chu a hmuhnawm phian. A palian angreng sia, a bike nen chuan pafa ni mai âwm an ni. Tatai pawh chuan a va hmu nghal a, Bike-a a thut dawn lai takin an college miss contest-ah pawh tel ve tawh Ruatsangi'n, "Awiii Christophera" a ti hluai a! A ṭawng ring angreng sia, an hre deuh vek ang. Engmah sawi lem lo chuan an tlan nghal a. 

"Ruatsangi kha i hria mi?" Tatai chuan pangngai takin a ti a. 

"Hre miah lo. A chhiat loh kha" a ti duh lek. A hnunglam aṭanga melh nghekin, "Lerh ve siah" a ti sap. A hriat phak pawha a rin loh tehlul nen, "Lerh chu bumhmang te hi alawm..ka lerh dan a fair " a la tizui! A chhang tawh lo. 

Ruang pahnih lo awm zinga pakhat zawk chu Constable pakhat hian a khuhna chu a hawng a. Hmeichhia vun êng lam chu a ni ngei mai. Mahse, a thihna a rei tawh vang nge a vun a da bûi mai a. A hmaiah hliam engmah a awm lo, a hmelchhe hran miah lo naa, hmelṭha tia sawi vul chuk theih pawh a ni hek lo. Tatai chuan, "Ka hre ngai hauh lo mai" a ti zawi sap a. 

Chrisa pawh chuan, "Kei pawh" a lo ti vut. 

An chhuahsan hnuah, "Tikhan zo tawh se ka ti, min rawn tibuai tawh lo se" Tatai chuan a ti a. 

Chrisa erawh chuan, "Thah a nih chuan hman deuha nula pakhat thattu nen khan a thattu thuhmun an ni ngei ang" a lo ti nghet charh. Ni e, thla 2 liamta khan nula pakhat, modelling lama tui ve tak, hmel pawh chhe lo zet hi a ruang chhar a ni tawh bawk a nih kha. A thattu tun thlengin man a la ni lo. 

"Ka thlah nghal mai ang che. Rinpuia hmuh lawk ka duh" a tih laiin mipa sang thlerh thlawrh, pian nalh tak, fit hmel zek zawk hian Tatai chu a rawn be hlawl mai a. 

"Vawiin tlai chu practice leh ang aw. Hei kei pawh ka rawn tlai deuh ang,. " Tiin. 

Tatai pawh chuan, "Nia,. Ka kal ang" a lo ti ve mai. Chu pa chuan nui sûn sûn chung hian, "In pa mi?" Tiin Chrisa a melh zauh. Tatai'n chhan a tum lai takin, "Bawihi, kan tlai ang e" Christopher chuan a rawn ti thum chhak a. Tatai a meng phâwk angreng. Mahse, lo betu mipa kha a ṭhiante umin a kal zui ve daih a, ani pawh thuawih hmel zetin bike-ah a lawn kai nghal zat. 

"I zak em?" A ti nghal thâwr a. Chrisa a nui hawk hawk. 

"Nui suh, i zak thlawt em?" A ti leh a. 

"Thlâwt lo..ka nau i nia" a ti daih! 

"I nau tak tak pawh ka ni lo. " A ti hlar a. 

"Chu! Û tak tak angin min en lo chiang" a tih chuan a run kher mai. 

"Mi zaktheilo tak i ni..i ngaihtuahna kha a tenawm" a ti hlak hlak a. Chrisa chu sik hlau niawm takin a hlat dâ mai. 

"Eng nge ka ngaihtuahna chu?" A rawn ti leh khauh! Tatai a dang ta ringawt..a chhang ngam tawh lo zawk nge pawh a hriat loh. 

In an thlen rualin a pindanah a kal nghal. Practice a hun mai tawh dawn bawk a, a insiam nghal sawk sawk. In hnuaia a chhuk chuan a nu leh Chrisa te chu mûk fê hian an lo inkawm a, mak a ti deuh. 

"Nu, ka kal aw" a tih chuan, "Min lo nghak rawh" thuneih hmel fê hian Chrisa'n a rawn ti. 

"Eng nge" a ti vin ṭhak a. 

Nuih suk pahin, "Ka lo en ve dawn che u" a ti nghut. A nu lah chuan, "Lo nghak rawh, va kal rual rawh u. I u pawh a kalna a la rei lo" a lo ti siam siam a. He pa bula tâp hi a peih tawh lo asin le..chimawm si. A chhang dang thiam ve ngai bawk si lo. 

An inphur leh ta nge nge a. "Eng nge i lo tih dawn?" A ti leh khar khar a. 

"Ka en ve châk che u ka tih kha" a ti zel si. A ngawi ta hmak. An practice-na tur an va thlen chuan players an lo kim titih tawh a. Chrisa a hmuh rual chuan an coach chuan, "Ekhai! A va tihzia êm..i rawn kal hma theih pawh ka lo ring vak lo va.." a lo ti luam a. Tatai a hrilhhai deuh. Chrisa lah chuan, "Hei Bawihi hi ka rawn nghak a. " A ti leh tawh. Bawihi ti hian a nu takngial pawn a ko ngai lo. Khatianga inkoh duatna kha a duh ve lo. 

A hnuah a teammate te hnen aṭanga a hriat leh danin Chrisa chu an coach-in an inkhel lai rawn thlir tur leh rawn zirtir turin a ruai a lo nia! Volleyball a khel ṭhin tih chu Tatai pawn a hre tho, Basketball leh football lam a tuipui zawk emaw a tia..Chutia midang zirtir tur khawp chuan a lo pro viau tihna em ni ang..

Hmeichhe lam an inkhel hmasa a. Dik tak chuan Volleyball hi Mizoramah chuti tehluain a lar lo va, mipa lam hi chu han beng ve thei mai an kat nuk naa hmeichhe lamah erawh tui ve pangngai tak lo chuan an beng thiam tehchiam lo. An vengah pawh chuan khel ṭhang deuh chu pathum chiah an ni. A bak chu zirchawp tura an pawhchawp an ni hlawm a. An beisei ṭhenkhat lahin ,"Ka peih lo e a" an tih zel avang leh hna te , zirna avangtea an buai nawk hlawm avangin practice thei chu an tam lo viau. Tatai hi spiker atana an han dah deuh chu a ni. Setter ṭha deuh mai patil Mpi a awm bawk. A bak chu service kai thei ngawr ngawr te an ni mai a, zir hle an la ngai. Kar khat pawh zir nan hun an nei tawh lo. Chrisa chuan ngun zetin a lo thlir a, nula no leh attention seeker an tih ve mai Zorini chu a lai deuh tlat pek a! A chesual deuh reng mai. Tin, a no zual sawt bawk. 

An khelh zawhah Chrisa chuan, "Mipa angah khan inngai ula, no hni hne, ti hni hne khan khel suh u. Pa takin..Hei Tatai leh Msi ang chiah hian lo thlirtute lam kha care lovin ball chiah ngaihtuah rawh u" tiin a fuih a. A hma zawnga service kai zat zat ṭhin Chhanhimi te lai lai chuan ball an vawrh kai zo ta lo. Chrisa chuan a han zirtir chho a, an nui har har reng mai. Tatai leh Msi erawh kil khatah chung ho thlir chuan an ṭhu ran a. 

"A thiam a nia aw..Chrisa saw..nikum an champion ṭum phei kha chuan che ṭha tak a ni " Msi chuan a ti siam siam a. 

Nikumah khan Tatai hi a khel ruh nat avangin tournament-ah khan a tel ve thei lo va. Inkhel kha a en ve reng sia. Chrisa hi a hrechhuak zo tawh miah lo, thiam deuh tih kha chu a nei ngei mai a, hmeichhe dang anga han ngaihven chiam chi a ni ve si lo va, tumah a hre zui tawh ngai lo. 

"A khel lai ka en ve châk" a tih chuan, "A khel dawn alawm. Chanmari aiawhin..i hmu em em ang. Hmeichhehoin an star thei a nia" Msi chuan a ti sar sar a. 

"A niang" a ti ringawt. 

"Tata, ka bialnu pic ka hmuh ang che aw..chhe lo i ti ve tho vang" tih leh a phone phawrh a rual a. A entir nghal. Chu tleirâwltê chu a lo chhe lo reuh êm lak tak a! A nu hnâp mai bawk si. "A duh che maw?!" Makti zetin Tatai'n a la ti zui! 

Msi a nui hawk hawk a. 

"Duh tehlul e, ka min ṭhen thei lo" a ti ham ham. Tatai chuan hmeichhia leh hmeichhia han inngaihzawn chu tunlaiah thilmak ni lo mah se; Msi chu patil rau rauah a hmelchhe reuh si, a tê bawk sia, an lo duh ve mai chu mak a ti ru viau. 

"Khawmaw. In nu chu show ve la" Msi'n a tih chuan bangbo zet hian, "Ka..ka nei teuh lo" a ti nawk nawk a. 

"Nang chu i chhe lo bawk a, an star thei ngawt ang che..nichin in lo kal hma paw'n Remremi te sawn "A va lo kal har' an tih an tih che kha.." awmze nei zet hian a ti mawlh mawlh a. Tatai chuan, "Bialnu ka nei ve ngai hleinem, bialpa pawh" a ti nghat..

Msi chu za lo zeta nui hakin, "A va mak ve, keimahni ang i ni emaw ka tia sin" a ti sap a. Tatai tan a mak hran lo. Hmeichhia hialin an ngaizawng tawh kha a nia! 

"Va beng leh lawk r'u le.." Chrisa aw an hriat rual chuan an tho nghal vat. An va beng leh ta a, an ni pahnih tel lo chuan 1st matchah an tla nghal ang. Coach pawn chu chu a hrechiang, chuvang chuan an inhliam palh ang tih hlauin tun aṭang hian a dim thiam viau. An ban meuh chuan a thim lek lek tawh. Chrisa vangin an bei rei reuh phian a..a duh uluk angreng bawk nen..

"Ka rualin haw rawh" midang awm ṭhup laiin a rawn ti a. Chhan a tum buai peih lo. Chrisa a kal sawn lawk hlanin Kimkimi a rawn vir nghal vat..

"Tata, a number i nei em? Min lo pe" a ti sar sar. 

"Nei miah lo" a ti zet a, a lo call tawh tih a hrechhuak zawk, "Êe..ka nei leh si" a ti leh hliai a. A phone phawrhin Chrisa number chu a pe nghal. Chrisa a rawn thleng phei ve chiah bawk..Bike-a a chuan rual rualin, "Ka phalna la lovin ka number i lo pe a! " A ti nghut a. A lungawi hmel vak loh. 

"Min dil sia lawm" a ti ve ringawt. A inthiam lo ve deuh nge, a pawr hran lo. 

An in an thleng a, a rawn peng tawh lo. Ruang chhar chungchang an sawi leh tawh rih lo. Tatai pawn a ngaihtuah leh ta vak lo e. Zan lamah hi chuan a tlem berah darkar chanve tal lehkha a zir thin. Assignment ziah tur a ngah deuh avangin a ziak ta ngat ngat a. A phone rawn vibrate dût dût pawh a lo hre lawk lo. A hriat rualin a la ta vat a, "Tata, keimah Mary, Enteh, ka rai a.." a rawn ti nghal tâwng. Tatai a meng phar nasa mai. Mary chu Jeje nena inṭhen zo chiah kha a ni. 

"Tu fa?" A ti nghek. 

"Jeje-a..engtin nge ka tih dawn?" A la rawn ti zaw mah. 

"Ka hre miah lo" a ti sep a. Jeje nen an inṭhen tawh bawk si, a va buaithlak tak. 

"Ka hrilh a, a awih lo alawm. Ka fa a ni lovang a ti tlat a " Mary chuan ṭah chhuah hmel zet hian a ti a. 

"Ka lo bia ang" a ti dam ta thlap a. Mary sahâwk nasa lutuk pawh a zia ta hawkin a hriat. Assignment ziah chhunzawm ta lo chuan, Jeje a call ta nghal a. 

"I sawi tur ka hria..ka fa a ni lo" a rawn ti nghal ringawt. 

"I fa a ni lo tih engtin nge i hriat?" A ti nghat a. 

"Ka hria alawm. Kan engloin cd ka hmang ziah, chuan, kan inṭhen chhan pawh i hriat kha" a ti ta duah a. Ni e, an inṭhen chhan chu Mary'n a lo kawp vang a ni. A hma pawn a ringhlel tawh a, mahse,fiahna a nei thei si lo. Hmanni lawk khan a kawpna nena aj inbiakna a mansak ta a. Mary pawh inzêp thei hek lo. A inpuang ta a nih kha, A kawpna pa chu an ṭhenawm hnai lawk ami pathlawi hawiharh zet mai a ni a; a nupui nen an inṭhenna pawh thla 6 chauh a la ni. Fa pakhat a nei hman. 

"Chupawhnise, i fa a ni thei tho alawm" Tatai chuan a ti hrâm. 

"Ni lo ni lo. Kha pa nena an fa kha a ni mai. Kha pa puh lova kei min puh daih hian chhan a nei ngei ngei ang" Jeje chuan a ti hmak hmak a. Mary hi a chhiat loh bakah a zei riau a, Jeje pawn a duh ve hmanin a ngaihzawngah chuan a la atchilh ve ber a niawm e. Chuvang chuan an inṭhen pawh a tuar na reng a. 

"Aaa..engpawhnise, i faah pawm mai rawh" Tatai chuan a ti ta ngawt a. Jeje lah chuan pawr zetin, "A teuh lo. " A ti hmuk. 

Phone a la dah tau zui! An tihdan ve reng a nia. An pahnih inkarah hian ṭhian thikthu hi a nasa thei a nia..Jeje hi ṭhenkhat chuan, "A va tuai awm ve" in lo ti maithei. A tuai lo mah mah hi Tatai buaina a ni fô! Insual te hi a hrat zêk a. Tatai nen hian an sawi duhzawng ,an buaina engkim a inan theih êm vanga heti taka inkawmngeih an ni. Unau ang thawthângin an inen zawk ti mai ang. 

Lehkha pawh a zir tui ta vak lo. Assignment erawh a ziak zo hram a. A mu daih. You tube lamah movie clip tawi tê tê a en a,. A mit a thîp êm vangin phone dahin a chhing vang vang a, a lo muhil sek a ni maithei..Mahse, a meng nghal kâwk. A room lehlama awm mêk Mafeli thlaphâng awrawl a hriat vangin. A tho nghal hluai a, Mafeli au ri chu a tawp hmak thung. Mahse, a ngaih a that loh êm avangin khum atangin a chhuk a. Dar 12 rik nan minute tlemte chiah a awm tawh. Rang fahrana a silipar inthawlhin a room chu a chhuahsan a, Mafeli lah chuan a pindan a kalh tlat si. A chum dawt dawt a. A ko pah bawk. 

Rinpuia pawh a rawn lang ve vat a, ngaihṭhat loh hmel fê hian, "I hre ve maw?" Tiin Tatai a melh a, a lo bu nghat. Mafeli an koh tak sekah chuan leh an nghah reng si avang chuan a rawn hawng ta nge nge a. 

A pangngai lo tih han en mai paw'n a hriat ngawih ngawih. A sam a thur hle a, a meng sen rûm bawk. A hmel phelh phangah chuan hlauhna a chambang bawk. Thup a tum hle naa, Tatai chuan a chik êm avangin a hre mai. 

Rinpuia'n, "Eng nge thleng? Ti nge i au chiam" a ti a. 

A chil lem khawlhin, "Engmah, movie ka en a, ka hlau a" a ti khur dat a. Dâwt a sawi tih chu mi mawl ber tan pawh a hriat theih. 

Tatai chuan khum lam chu a va thlêk a, sakawrbakcheh a fawng sen leh sam lem dum sei zet hi a lo awm ran a. Mak a ti deuh, mahse, engmah a sawi hran lo. 

"Va mu r'u, engmah a ni lo" Mafeli'n a tih tak tlatah chuan Rinpuia nen ngawi rengin an lêt leh ta a. A nute erawh in hnuai lamah an pindan a awm avangin engmah an rawn hre ve lo a nih hmel. A muhil leh thei mai si lo. A phone chu a khawih ta mai mai a. Whatsappa a luh chuan, Kimkimi'n, "Tata, Chrisa hi a induh ve ê, min reply duh miah lo" a rawn ti a. Reply dan tur a haihchham deuh. 

"A buai a niang" a va ti hrâm. 

Biak tur em em nei ve ta lo chu a phone a dah leh a, mahse, a rawn nghawr dat takah chuan a lakang leh vat. 

Christopher hnen aṭangin, "Patil ve si, han menrei" tih thu a dawng. A ner khum nghek ringawt. 

Chhan pawh a tum loh lai takin, "Patil ve si, han ner chiam kher" a rawn ti leh. A va ngei tak e aw.."Hmela" tiin a phunchhuak hial..

"Biak tur nei ve niawm taka mengrei ve ziah ho hian eng nge an tih ve thin ang le?" Tih thuin a rawn zui leh..

"Mu rawh.."tiin a reply ta nge nge a. 

"Ka bialnu ka la be tui" a rawn tih chuan, "E..mangṭha" tia chhangletin phone a dah hmak. He pa han sualzia leh chimawmzia hi aw. Patil treat in a treat tak tak mawle..

"Ka patil bawk lo,. Bialpa pawh ka nei ve dawn" tiin a phun sep a. A thusawi ngei pawh chu a ring zo chuang lo. A nui leh hak a. A saisir ta daih. 

A lu na ngut ngut chuan a kai harh a.Dar 7 a la ri lo deuh. A pang a deh chuan a lo dai diak a. A tho vut a, in hnuai lam a pan nghal. Chaw eikhamah nachhawkna a ei ta pawp a. A chhel viau naa, lu nâ leh pum nâ hi tawrh harsa a ti ṭhin. Class kal tura a insiam laiin Mafeli a rawn lut a. Class kal a tum lo tih hriat takin a inchei miah lo. 

"I kal dawn na nge?" A ti sap a.

"Umm, ka nuamsam lo lutuk a. Ih, nizan kha.." tiin a ngawi leh dat a. Sawi duh nei hmel a pû. 

"Sawi rawh, eng nge?" Tatai chuan a ti vat a. A hre châk ve tho bawk. 

"Ka..ih, âaa..engmah a ni leh lo. A ho lutuk" a ti ta mai mai a. Tatai chuan thil serious tak a nih a ring thiam mai. 

"Ti nge khatia i rawn au vak a?" A ti ta a. Mafeli a melh kal bawk. A zâm tih hriat zet hian a hawi kual hrek hrek a, a heh liak zauhin, "Mumang rapthlak deuh ka nei a. Chu chu mawle.." a ti zawi sap a. wih harsa a ti deuh, mahse, zawh dilchhut vak kha dâwp te pawh ang dawn dawna a hriat vangin, "A nih chu! A zia lo hle mai" a ti ta ngawt a. Mafeli pawh a sawi tum ber sawi ta lo chuan a chhuak leh nulh. Tatai chuan a rilru te têin, "eng emaw tak chu a ni" a ti a. Hlauhna erawh a nei hran lo. Mafeli a kal dawn si loh avangin taxi chan mai a tum a, mahse, A pain, "Khawiahmah a chhuak nang, va keng rawh" tiin scooty chabi a pe a. A la ve mai, a tlai deuh tawh bakah taxi han chan kual leh kha a rei dawn tlat. Rilru zangkhai angreng takin an college lam chu a pan a. 

2nd period an kal zawh rual rualin Jejea'n canteen lam panin a kai phei nghal. An ṭhut fel rual rualin, "Ka lawm lo takzet, Mary chungah" a ti nghut a. 

"Engvang chuan" hre sa deuh tho mah se a zawt ve duh hrim hrim .

"Tukin zingah sâwn man min lo ṭhing. Ka pa a thinrim lutuk " a ti ta a. Tatai pawn mak a ti deuh, Mary te chu an che rang viauin a hria. 

"Chuan" tiin a melh kiau a. 

"Ka pain pek a tum a, ka ṭang na ve bawk si, ka nuin ngaingam lovin 'Pe rih lo phawt ila, Naute lo piang se kan hre mai ang chu' a tia..kan pe rih ta lo" a ti mawlh mawlh a. 

"Ti nge i ṭan tlat le..i fa a nih theihna chance a sang hle sia" Tatai awki chu a lawm loh hmel angreng. Amah ai maha nelawm loh zawk hian, "Ka fa ni se ka pawm lutuk, neih hial pawh ka duh ang. Mahse, thil hi hre ve phawt rawh. A bialpa pathlawia khan an nu kha a hruai leh tawh alawm..tikhan i man em?" A ti ta chat chat a. Tatai a meng buai nghal, "Eng atan nge pathlawi chu?" A ti hû a. Jejea a chek hluk, "I â siah..a awmzia chu kha pa fa kha a nia, nupui a neih leh tak si avangin keima fa anga puh a tum tihna a ni mai. Tunah thla hnih dâwn a ni tawh. Ti nge kan inṭhen hma khan ka hriat loh? Mary te ang nula vengva tan nau a pai tih tunah chauh hriat thu a awm lo. " A ti ta tûn tûn a. Tatai pawh a bu nghat nghat, a hrethiam ve ta deuh ruak e. 

"Mahse, in inṭhen hma khan a hre lo ve thei tho a" a la ti ṭâlh a. Jejea a meng rum viau, "Ngurtluang, i ninawm. Min ṭan ve ta che. Mary nau pai saw ka fa a ni lo tih ka chiang, ka fa nise ka thinlung hian hriatna a nei ang. Ka engahmah a thawk lo" a ti ta bawrh bawrh a. Tatai pawn ngawih a chuh ta rih. 

An class bang in a thlen chuan a lo reh huai mai. Arami a ko a, thawmhnaw pawm bawr ṭûin a rawn lut ve chiah, puan pho a seng a ni chiang. In chungah a chho nghal a. A pindan a luh dawn lai takin Mafeli room aṭanga phun mawlh mawlh avang chuan a ding leh dat..a'n ngaithla chiang a, a hre chhunzawm leh ta mai si lo, a lu thing nar narin a pindanah a lut ta a. Vawiin tlai chu an practice dawn lo, an coach- ten programme pawimawh an neih avangin. A inbual sar sar a, zing lama a lu nâ khan a la ṭham nge ni a chhungril a nuam mang tlat lo. Tui pawh khawih rei duh loin a inbual zo ta thuai a. Bathroom aṭanga a chhuah chuan makti fêin a meng kâwk..! Khuma a thawmhnaw hak tur a dah chu chhuatah darhsarh deuhin cheh chhiat tih hriat tak hian a lo inzam a. A luh hma khan fel takin a dah kha a ni sia. Kawngka lam a en vat, tlem a lo inkau deuh. Rang zetin a va hawng a, a hawikual zak zak..tumah a hmu si lo. In chungah hian an unau thumin an awm a, Mafeli pindan hi a laiah a awm. Kawngka chu kalhin thawmhnaw dang a la chhuak ta ringawt a. Mak a tihna chuan a rilru a lapêng nasa viau. Engvang teh ngawta a thawmhnaw chu cheh chhiat ni ang maw? Nizana Mafeli khuma sakawrbahcheh te kha a mitthla nghal uar uar a. Mahse, Mafeli chuan a thawmhnaw a cheh chhiatsak ngawt nachhan tur a hre bawk si lo. A nu te a hrilh ang nge hrilh lo vang tihah a buai riau, la hrilh rih lo mai chu a duh ta a. Hêk chan a chang dawn tlat. 

Zanriah an ei lai pawh chuan a rukin Mafeli chu a melh zauh zauh. Mahse, engmah danglam a hmu bawk si lo. Ama tawkah a rilru a buai viau. Zanah a ngaitê bawkin note a copy a. Thawm a ngaichang pah ran bawk. Mahse, eng thawm mah a hre lo..a ngaihtuahna a kal ding lai takin a phone a rawn ri, a phu chiang kher mai. Sawma a lo nia. 

"Aw .." a ti vat. 

" Lalnunpuii a thi!" A rawn ti teh ngawt! Tatai a phu chiang ngang mai. 

"Maw?! Eng maw i sawi?" A ti chûl a. Ani leh ni lo angin a chiâi ve tlat! 

"Aw..Nunpuii.." hamhaih hmel zet hian a rawn ti ve a. 

"Engtin?" A ti nghal vat. A chiâina pawh a reh ta deuh e. 

"An lennah a thi.." a rawn ti leh tawp ringawt. Tatai thin a thawk nge ni, "Malsawmtluang, i a mi? Sawi chiang ta che" a ti vin ṭhak. 

"Robert-a nen an leng dun a, Roberta phone biak hlanin a lo thi ringawt. Tun mai khan a ruang an han hlawm..ka kal ve lo" tih chiah a sawi thei. 

"Aw..a va zia lo em..kan kal ve a ngai ang chu..tiraw" Tatai chuan a ti a. "Kal ve loh ten..ka lo sawm ang che..Jejea ka'n hrilh ange" a rawn ti ṭha ve mai bawk a. An dah ta. Nunpuii chu an ṭhian zing ami a ni a, mahse, college a kal tawh lo thung, a nihna takah chuan Peka bialnu a nih vanga an ṭhian zinga an sengluh a ni a. Amah a lo felin kawm a nuam em a, Peka nen an inṭhen hnu thleng pawn an la kawm zui ta zel kha a nia. Nula tlawntlai ṭha tak, hlim thei zet mai a ni a. Tumah huat a nei ngai lo, hawtu pawh a neih âwm an hre ngai lo. Chutia a thi thut ringawt chu a mak êm a ni. 

Hmanhmawh takin a insiam nghal sawk sawk a, Jejea'n a lo call ve sek bawk. 

"Aw" a tih rual chuan, "Ka rawn sawm ang che" tih leh dah a rual nghal. Tatai pawh a insiam rei lem lo ve. In hnuai pana a chhuk thlak lai chuan Mafeli pawh a rawn lut ve mêk a. 

A chhungte bulah chuan, "Awiii, Nula thi kha in lo hre ve em? " A rawn ti lut nghal a. 

A nute chu an lo phawk hrâ thung. 

Tatai chuan, "Kan ṭhiannu a nia, hei ka kal dawn kei pawh" tiin a nu te chu a melh kual a. A pa zawk chuan, "A va zia lo ve. Va kal ve rawh..a pawi hle mai, engtia thi nge le?" zawh bîk pawh nei lo chuan a ti a. 

"Ka hrechiang bik lo, a ruang an chhar kha an ti tawp a" Tatai chuan a ti mai a. Mafeli chuan, "A bialpa nen an leng dun a bialpa phone hman laiin a lo thi ringawt an tia! A mak ka ti lutuk. Tata, tu nge a hming ni reng reng? " A ti a. Tatai chuan a sawi var..

A nu chuan, "Jejea'n ami lo sawm dawn che" a lo tih chuan a bu nghat. Kar loah Jejea horn pe ri chu an hre nghal. Tatai pawh chuan engmah sawi tawh lovin a chhungte a chhuahsan nghal. Jejea nen chuan vung zetin Nunpuii te in lam chu an pan ta nghal a. Mary chungchang pawh an sawi hman tawh lo. An rilruah thildang a lian zawk tlat a tin ni. 

Nunpuii te in an thlen chuan mi an lo tam khawp mai. An zi nuai nuai tawh. Ṭap thawm nen, in singsa thawm nen, thil thlen dan chu a rapthlak angreng khawp mai. Tatai te pawh ding khawmuang lovin an ṭhiante awmna lam an pan ve nghal a. Nunpuii chu an postmortem avangin a ruang a la rawn thleng lo. An va ṭhu lut ve a, Nunpuii nu a ṭap hawm hawm mai. Tatai pawh ani leh ni lo angin a mittui a tling pam e. Tupawh mai chuan thu chiang hriat an châk hmel kher mai. Mahse, tuman engtia thi nge tih chiang taka sawi thei an awm hauh si lo. 

Dar 11 a ri dawn tihin ruang pawh a rawn thleng ta a. Ṭap thawm a nasa kher mai. Thalai an tam viau bawk. Nunpuii nu mawlh chu a lainatawm, a ṭap khawng thul..A pa meuh pawh a fanu neihchhun a ni bawk a, awrâwl chhuah meuhin a ṭap ve hawm hawm nia! A nâ ngawt ang. Roberta tak pawh a meng sen rûm a, a mittui a hru a hru ve mai. Ani phei chu Police in an koh vat a rinawm lehnghal,. Rinhlelhawm ber kha a ni miau a. A hma hun a thim angreng, mahse, a thah a rinawm vak loh. 

Tatai te pawh chu an ṭhu ve ta reng a, An ṭhiannu Zovi phei chu a ṭap a ṭap mai. Peka tak pawh a inhru ve zauh zauh. Nunpuii hi a fel êm mai a, an inthen hnuah pawh ṭhiantha tak an ni zui a..a uiawm ve bawk êm a tin ni. 

Zing lam dar 2 velah Jeje nen zun zungin an va chhuak ve a. An mawng a kham dun tawh viau. Jeje chuan zial a ṭan nghal a, Tatai pawn zun in lam a pan nghal vat. A zung zo Jeje lam a pan lai takin, "Teh daih che chuan" ti thum dûttu Chrisa chu a melh hâ a. 

"Nang pawh" a ti let ve zat. 

"Roberta hi ka ṭhian a nia" a ti ve mai a, Tatai pawn an inkawm thin thu a sawi ve mai. 

"Ka kal dawn" tih paha kal a tum chu a bânah a rawn vuan leh chat. An piah deuhah ṭhalai rual an ṭhu ṭaih a, an lam an rawn hawi lem lo. "Eng nge?" Ring vak lo hian a ti hlak a. 

"Tu nge i kalpui?" A ti sup.

"Ka ṭhiante" a ti ve mai a. 

"Ka bulah ṭhu rawh" a ti leh tawp. Tatai a ner nasa mai, "I zak lo. Saw min nghak a nia." Tiin a bân chu a thing a, a thlah ve mai. 

"Saw pa saw maw?! A dawh chi nge a hawlh chi?" A tih chuan thinrim zetin, "Ṭawng fimkhur rawh" a ti hlur a. A ṭawng ring ngam chiah si lo. 

"Ka fiamthu a nih kha..sorry..i bialpa em ni?" A ti leh daih. 

"Ni lo, ka ṭhian" ti nghatin a kalsan ta a. A ṭhianpa Jejea thlavang chu hauh ve tak a ni. Mahse, Chrisa fiamthu phena thil awm kha a hrethiam ve tho. Tunlaiah mizo mipa zingah a ruka mawngkawhur an tam tawh viau nia sawi a ni a. Tuai kan tih mai langsar taka tuai ngam te chu hriatsa ni tho mah se; khang tuai kan tih mai lo pâwl duh mai mipa pangngai tak tak, nupui fanau te pawh nei an awm ru nuk tlat tawh a. Heng ho hi tuai te ai mahin natna hrik thehdarh nasatu zawk an ni tlat! Tin, mak ve deuh bawk chu tuai kan tih, hmeichhe an tuma hmeichhe incheia inchei zingah mawngkawhur ni kher lo an awm ang bawkin, hmeichhe ân châka va inpho langsar ve lem lo, naupan laia pawngsual tawh vang emaw pian vanduai vang hrim hrima tuai ti mai ang, hmeichhe rilru pu hi an awm tho bawk. Mipa ang tho va inchei, mipa activities pawh ti ve vek mahse, an mawng dawh thei mai hi an awm ve, a tlangpuiin hetiang ho hi chuan sex an hman pawn a ruk takmeuhin an hmang ṭhin. An khawngaihthlak letling..kan nunah hian hneh harsa tak tak hi kan nei ṭheuh mai si a! 

In chhunga an luh leh hnu chuan zai pawh an lo ṭan chho leh chiah a. Tatai pawh hla a hre vak lo naa a hriat chhunah erawh a zai ring thei viau. 5 mins hnu velah Christopher leh tlangval pahnihte hi Tatai te hnungah an rawn ṭhu ta chat mai. Chimawm a chhuah leh ang tih a hlau deuh, a zaidam tehchiam bîk si lo. A hnung chiahah Chrisa chu a la ṭhu zui a! A bass ve nasa,. Pa pakhat a rawn ding a, thupuifun fê hian eng eng emaw inphaman lo zet zet a rawn sawi pek a! Hetiang khawhar in emaw mitthi ina ding ve ziah hi veng tinah an awm ve châwk! Chu pa thusawi lai chuan Tatai ngûmah chuan Chrisa khup chuan a rawn do a, chumi rual chiah chuan a beng bulah, "Ngheng rawh, i kawng a kham tih ka hria" a rawn ti sup. 

A ngheng duh chuang lo nain a khupin a dona chu a hre rauh rauh thung. Phone khawih a duh ngai miah lo nain a rawn rik sek avangin a ipte aṭang chuan a la chhuak a. Hnunglam a hawi vut, Chrisa lah chuan thusawitu lam a lo melh daih si. A va han nghal tak. Rawn call tu kha Chrisa lek a nia! An incall hnai ve khawp mai. A chimawm zel hlauin a phone a off ta hmak a. Tui a in nasat deuh vang nge a zun pawh a rawn chhuak leh ṭan ta. 

Dar 4 a la ri lo deuh a, khua a la var bawk si lo. Jeje a hrilh ru sa sa a, "Chhuak hmasa la" a rawn ti ve mai a. Zung tur bawkin an chhuak leh ta a. 

An luh leh hmain, "Kha pa kha ka hria..Christopher tiraw?" Jeje chuan a ti a. 

A bu nghat. 

"An star thei ania aw. Engtin nge in inhriat teh daih?" A tih chuan a hrilh zung zung. 

"A va nau chei vel che ve, nge a star zawk che?" A tih chuan, "Mawla" a ti hlak. An lut leh ta poh a. Khawvar thleng an ṭhu ta. Bân dawn chuan , "Ka lo thlah ang che. In inah thil lam ka ngai a" Chrisa chuan a ti leh ta tlat. 

Midang an awm ve si, Jeje lah chuan, "Inthlahtir mai rawh, kawng hnuai aṭanga hawn ka duh, ka mut a chhuak sia" a lo ti sek..an inphur leh ta dawn nge nge e. 

Car-a a luha seata a han ṭhut ar ar takah chuan a nuam huai huai thei. Nghenchhan nei lo, ṭhutphah ruh zeta ṭhut tlaivar ṭhak hi chu taksa a na lo thei bîk lo. A mut pawh a chhuak ṭan..

"Puante bih ve ta che" a kekawr rawn melh zauhin a ti a. 

"Ka thu thu" a lo ti chang rât. 

"Nia, puan bih ve la, ka nuih châk che" hmalam bih chunga a tih chuan, Tatai run lutuk chuan a inrin hmain a bengah a va pawt a. 

"Ai-ah..i va pawt na thei reuh ê.." a ti duh lek. 

An in thlen hma kawng kawiah a ding thut a, "Zial ka'n ṭan lawk" a ti! Muangchang fahranin a ṭan a. Tatai ngei tawk a lo tling..

"I va han ngeiawm zozai tak.." a ti nghe nghe. 

Tlan leh pahin, "Tihthinrim che hi a har miah lo. I thinchhe êm a.." a la tizui! 

"Ka hre ve" a lo ti vei hmak. An in an thlen chuan a rawn chhuk ve dawn emaw a tih laiin, "Ka lawm e..ka thlah i duh a. Tlem tal muhil rawh aw..chuan, i sam i vial chhoh khan i sexy" tih leh tlan a rual nghal. Tatai chuan ke per tân tân chungin, "I va han chhe tak..an lo star che hi a mak ka ti..ngeiawmlian.." a ti hlak hlak a. A hre pha tawh dêr si lo..mood chhe zetin inah a lut a. 

A pindan a luh rualin maktiin a ding chawt a..a hawi kual nghal ruai bawk..!