Tatai 12

TATA-I (12)

Ziaktu : Toni Râlte

A tukah mut a kham lo bawk a, thawh pawh a hai chiang viau. Khaw ên hnuah a muhil ve chauh kha a nia. A harh rualin, "Tu nge nizana thawm rawn nei kha ni ang?" Tih hi a rilruah a rawn lut nghal. Ham bâi bâi chungin in hnuai lam a pan a, tukṭhuan an lo peih ṭêp tawh. Chaw ei pawh a châk meuh lo, mut hmuh ṭhat loh na nâ na hi chuan chaw ei pawh a chakawm loh thin. Rinpuia tuilum in mêk bulah chuan ṭhu vein, "Nizan khan i va lo haw tlai ve" a ti sap a. Rinpuia chuan makti deuh tak hian, "Nia mawle, kan inkawm tui laklawh lutuk a" a ti ve mai bawk a. Thil thleng zawng zawng kha sawi a tum rih lo, a nute hian hre ve rih lo se a duh a ni ber. A pa phei chu a rilru a hrehawm phah vek ang tih a hlau. Chaw an ei a, inkhawm hrâm a ṭhat nen Tatai chuan a peih ta ngang lo va; "Mut ka kham loh bakah ka nuamsam lo lutuk a, ka inkhawm lo mai teh ang" a ti ta ngawt. A nuin ngaihthat loh hmel fêa a rawn melhna chu ngaipawimawh lo luiin, "Kan practice-na hi ka rawl a la reh lo va" a ti liam puat. Midang zawng inkhawm tura an chhuah hnuah pawh Living room ṭhutthleng seiah a la tluzâl. A pindanah amahin a mu ngam ta tlat lo. Chhun khaw ên lai lehnghala chutia a roomah pawh a mu ngam lo chu a inhua. Hetiang hi a ni ngai lo asin le. Mahse, a han intihpachan viau paw'n a ngam thlawt si lo. A muhil pawh chu a phu leh zawk zawk zel. A mu nghet thei meuh lo a ni e. 

An rawn bâng ta hlawm a, Rinpuia chu a pindanah a chho tlang nghal, Tatai chuan a zui ve nghal zat. Rinpuia roomah hian a lut khât viau, luhna chhan tur a nei vak lo bawk nen. Rinpuia pawh chuan thil pawimawh a awm a ni ang tih ringin kawngka a kalh nghal rap. 

"Ih, nizan khan he number hian min lo call a, tu nge a nih ka hre lo naa, min tihhlauh a tum niin ka hria".tiin lo call tu number kha a pe ta a. Rinpuia pawh chuan a lo save bik lo, a call nghal ta zat a. Mahse, a tlang thei tlat lo. Mahse, "Amanda kan hrilh ve hrim hrim dawn nia, chuan nizan khan ti nge min lo call teh tlat a" chîk zeta melh chungin Rinpuia chuan a ti a. 

Tatai chuan engmah zêp ṭula a hriat loh avangin thawm a hriat thu te chu a sawi ta malh malh a. 

"An sawi hi a lo dik tak tak êm mawni le..kei lah hian hmuh ka tum luat vang nge ka hmu ve thei si lo" a ti nghut nghut a. 

"Ka hrethiam lo, amah Mafeli a ni ngei em tih pawh ka hre lo. Va lut chhin ila" tiin Rinpuia a melh a. Buk nghut pahin Rinpuia pawh chuan a zui ve mai bawk. Mafeli room chu a lo eng uâr mai a! Light an off vek kha a ni si. Khumah chuan Mafeli'n a damlaia a duh leh a ngainat êm êm, a pyjama leh tshirt var hi fel taka inthlepin a lo awm a! Bathroom kawngka a lo inhawng sa bawk. Rinpuia'n bathroom a va en chuan bucketah tui a lo tling pum a, tap aṭangin a la far fep fep bawk. A va herh tâwp nghal a, thilmak tak chu a ni. Tatai pawh ṭi zetin a hawi kual ruai ruai, hmuh dang erawh an nei lem lo. 

Chrisa'n a rawn call a, Rinpuia'n, "Chrisa a nih chuan rawn phei lawk teh se, thil thleng hi sawiho a ngai" a tih avangin Tatai chuan a hrilh a. Chrisa pawh chuan, "Okay, ka rawn chhuak nghal" tiin phone a dah ta a. 

Thingpui an in laiin Chrisa chu a rawn lut ta a, Arami'n thingpui a lo thlit ve nghal zat. Pu Hruaia te nupa pawh chhuak turin an insiam a, an tih fô angin thla khata chawlhni hnuhnung berah damdawi inah an kal thin a, damlo tlema khawsak harsa deuhte an va ṭanpui ṭhin. An tiṭha nupa ngawt mai. 

A nute chhuah hnuah an pathum chuan Mafeli roomah an chho leh ta a, Chrisa chu thil awmzia an hrilh pah bawk. A en chîk ngang mai. Phone number pawh kha a la ve a, ani pawn a lo save bik lo. 

"Kei chu thlarau chetna a ni thei dawn em ni ka ti..ka rilru ang hi in pu ve em?" Chrisa chuan a rawn ti hlawl mai. Rinpuia pawh chuan, "Thlarau chuan khawih theih âwm loh tak" a lo ti ve zauh. 

Chrisa chu a vei thuak thuak a, a ngaihtuahna erawh a châwl miah lo tih a lang. A kut a beng thak a, "Hmm, ka hre ta, Camera kan kam a ngai, thlarau a ni emaw mihring a ni emaw thil thlen dan hi kan hre thei mai ang" a ti ta a. 

Rinpuia pawn, "A dik, ti nge maw kan ngaihtuah chhuah vat loh le" a lo ti ve a. 

"Inah phone spare va lak lawk a ngai ang, tuna ka hman chu official a ni sia" Chrisa chuan a ti a. 

Rinpuia'n, "A ngai kher dawn em ni? Laptop hi kan hung zawk mai dawn mi niang" a lo ti a. 

"Mihring a nih chuan kan thangkam tih a hrethiam maithei..engpawhnise, ka va la lawk mai ang,. " Tih leh Chrisa tlan chhuah a rual. A hmanhmawh ngei mai. Mihring thiltih a nih hlauh chuan engkim hailan theihna hmanrua a ni ngei ang le..

A nu nen an la inbe mumal vak lo. Dadina lah a chhuk tawh bawk si, an in chhung boruak a nuam vak lo khawp mai. Nufa luhlul ve ve an ni bawk nen, engtikah tak ngai awh leh ang maw? A phone pakhat zawk chu a ak ṭha sauh sauh a, a tlan chhuak zui leh nghal. Tatai te pawn an lo la nghak ran a. Phone hmuh awlsam theih lohna lai ber, Tatai room nena a inpindanna chungah camera set sa vekin an dah ta ran a. Zaninah che leh tak ang maw? 

In hnuaia an chhuk chuan Tatai bulah, "I hlau em?" A ti sup a. 

Ani mi frank tih takah, "Umm, hlau ve e" a lo ti. 

"I patil rilru i hman ṭangkai hun lai tak" a rawn tih chuan, Tatai'n a melh râm râm mai. Chrisa lah a nui pût pût si. 

"Haw rawh, i nu a rawn kal leh ang" Tatai chuan a ti a. 

"I bula awm ka la kham lo. Hawh, bathlarah va ṭhu chhuak lawk ang" tih leh kaih a rual a. Rinpuia erawh Zorina te inah a kal. Arami pawh movie a en mai mai. 

Bathlara an ṭhut chhuah hnu chuan, "Volleyball hi beng ve lo mai la" a ti a. 

"Engvangin?" Tatai'n a lo ti hlar. 

"Mipa mit râwp tak takin an en leh ṭhup dawn che asin" ngaihtuah thui hmel fê hian a ti a. 

"Min en se, a ho. Bialpa ṭha deuh ka zawng dawn" Tatai'n a ti let ve hmak.

"I ngam phawt chuan" intipa zet hian a lo ti nghut. 

"Chris, ka eng lai hi nge i duh a? I â ka ti" Tatai'n a ti hluai. Chrisa chuan a rin loh deuha thutak fê hian, "I engkim hi ka duh. Chung zawng zawng zingah chuan i mizia a buk a rit ber thung" a ti ta a. Tatai chuan a chil a lem khawlh ringawt, han sawi leh mai tur a vân riau. A ngawi ta reng ringawt a. 

Chrisa chuan call a dawng a, a va be zuai. Rawn ṭhut leh pahin, "Alice pawh a rawn zin thei dawn e" a ti a. Tatai chu engahmah hmain a tûm vei hmân. 

"Khati zawngin ngai lo la mawle. Kan mamawh tih i hriat kha" Chrisa chuan a ti dam dup. Tatai pawn a hrethiam reng, zep loh chuan Alice chu a hmu peih hlawl tawh lo a ni. Pu Hruaia te lo hawn hmain Chrisa pawh a haw ve ta a. Rinpuia erawh Zorina te inah zanriah a ei, Arami'n, "Kan pathlawia hi Zorina te nau, Thingtlang aṭanga rawn awm nen khian an ni chiang" a ti a, a nui har har bawk. 

Pa berin, "A va hnip leh si ve, an nu hluite an rawn che leh ang e" a ti zauh. Rinpuia chu an sawi ang deuh kha a ni thei viau. A hmain hetiang takin Zorina te inah a tam ngai lo. Mahse, tun laitê hian Zorina te inah bak a kal lo tihtheih a ni. An nu hlui hi chhetê pawhin a ngai lo a niang. Mi bulah erawh, "Fa hi nei se, rem an tih chuan ka enkawl ang" te chu a lo ti a niawm e. A fa thlahthlam a tum lo pawh hi a lawmawm tawh hrim hrim e. Tatai te chungchang an sawi lo bawk a, rilru hahdam takin ani pawh lehkha zir turin a roomah a lut ta a. Camera kha an kam ta chu a nia, zaninah a che leh ang em tih ngawt a ngaihtuah. Che tawh lo mah se pawi a ti vak lo naa, mihring nge thlarau a nih tih erawh hriat a duh viau thung. 

Jeje nen an inbe zuai a, "Sawma hi damdawi a lo ti ve reng a! A pawi tak tak a ni. Engtia han tih chi nge niang aw" a rawn tih chuan Tatai'n mak a ti nasa. Sawma chu zu han in zauh chang nei mah se; mi zawiawi, ṭawng tam lo, ṭhiante tih ang anga awm ve mai a ni a. Damdawi êm ti tur chuan Tatai paw'n a ring phal lo a ni ber e. 

"Naktukah a lo kal chuan kan kawm dawn nia" a ti ta ngawt a. 

Jejea'n, "Duata te pawh Melody chhung ten an duh lo ve khanglang a, an inrem theih pawh ka ring lo" a rawn ti thuphung. Tatai a nui hak a, "Inrem rawh se, inrûk tawh berte chuan" a ti ve mai. Duata chu a thêngthâwngah a thawk vak lo niin a lang. Jeje nen an inbiak zawhah a lehkha zir lai chu a chhunzawm a, a rilruah a lut mawh angreng. Helhhawlh ang hian a awm tlat pek a! An camera kam rûk nghawng vek kha a la ni. Chrisa nen mumalin an la in be leh lo. Va biak hmasak hi a tlawmlâk zawng tak mai a ni a. Midang hrim hrim pawh Jeje tih loh chu a be hmasa ngai lo tluk a ni. A rilruah lut thei hlawl hek lo, a dah ta tawp a. A mu ta daih. Mut chhuak si, muhil thei si lo angin a awm leh dawn. A ning tawh e. 

A vannei nge vanduai ni dawn ni, eng thâwm mahin an tibuai ta miah lo! An thil chân hi a lo fing ve viau zawk êm mawni dawn le..Rinpuia pawn eng thawm mah a hre lo. Mahse, Camera chu an en tho va, engmah leh tumah an lang lo. Tatai pawh nidang aiin a class kal tur pawh a pheikhai a zâng ta deuh e. Jeje nen an inhmuh veleh, "Sawma chu a lo kal em?" A ti nghal chat. An ṭhian thum chiah an dam tawh a, inngaihsak viau tur an ni. Duh angin veng a lo inan loh vangin an inngaihsak thei lo zawk a. Canteen an pan ta phawt, Sawma an hmu lo. 

"Engtin nge damdawi a ti ve tih i hriat?" Tatai chuan a ti a. 

"A nauin min lo hrilh mawle..mak ka ti tawp a. Tun hnaia min hlat riau chhan pawh hi a ni ngei ngei ang" Jeje chuan a ti a. Sawma chu an call ta tawp, "Ka rawn thleng ṭêp" a ti tak naa, khawi hmunah emaw a awm a ni tih hriat takin hmeichhe nui ri bakah mipa ṭawng nawk nawk thawmte pawh a awm. 

Jejea'n, "Ngawi rawh, chaw eikhawm rawt a ngai a nih hi. A hmun tur ka lo ngaihtuah ang" a ti ta a. 

Class lak lai laiin a lo muthlu a, a bula ṭhuin a rawn kai harh. Mut hi tunhnaiah a kham thei malêk a! A bp te hi a hniam emaw a sang emaw te a lo ni ve thei tlat! A chauin a zawi nguai zel bawk si. An class bang gate-a thlen chuan Christophera a va hmu nawlh. A rawn melh vung vung lehnghal. 

Lâi zetin a hawi kual vak vak ringawt, a rawn pan ta a. "Practice tura kal vat a ngai sia, ka lo nghak ta mai che" a ti thum chhak. Tatai chuan an rawn en ṭhupin a hria, ti nge maw a zaha a laih theih viau zel ni? Tihngaihna awm tawh hek lo le, Chrisa hnungah a ṭhu leh ta vâng a. An in lam pan phawtin a inthlak sawk sawk a, practice-na hmun an pan zui nghal. 

"Kan ramhuai pawh chu a lo va fing âwm ve le..a che duh miah lo a nia" uang thuang zetin Chrisa chuan a ti a. 

"A ṭha daih zawk alawm" a lo ti sep. 

Chrisa te inkhelh chhung chuan hmeichhe hoin Tatai an bawr ṭaih mai, engdang a ni lo. Chrisa nen an inlaichinna an hre duh a ni. Ani lahin han sawi râwt kha a hreh ve bawk si nen, "Ih, ka nî fapa a nia, a strict tawp a, bialpa neih pawh a phal lo" a ti ta ngawt. Amah Tatai mizia leh nungchang enin dâwt a sawi an ring lo nge, Chrisa number an han dil ngei ah! A pe ve leh ta mai bawk. Neihpuii phei chuan a hma aiin a be ṭha zawk. Tatai pawh Chrisa vang liau liauin a mi chuang ta bik lo ve. Mipa chhe lo deuh hmelhriat nihte pawh hi a lo ṭha hle a nih dawn hi a. 

Hawn lam pawh Chrisa chuan a thlah leh a. Inah erawh a rawn lut lo. Rinpuia pawh a lo hawng a, pathlawi hi a ngeih a niang, a thau tlat! Ruati te thawm vâng engmah an hre leh tawh rih lo. Zanriah ei khamah test tur a zir a, a hratlak deuh bawk a, a zir thei ta phian. Dar 10-ah Chrisa'n a lo bia a, "Ka ngai che" a rawn ti ril ruih mai. Tatai chuan lâi zet hian, "I zak lo" a'n ti ngawt a! A ngai ve reng sia. A sawi zak leh tlat! 

"Ka nu nen pawh kan inbe thei ve ta deuh e,." A tih chuan Tatai a tilâwm. Pi Dingi hian a rilru a thlak ve tak tak a ni maithei. An inbiak zawhah a inphihfai a, a mu ta mai, a thiam tawh tho bawk a. A mu fel erh âwrh tihin call a dawng leh pek a. Number save loh aṭang bawkin, "Hello" a ti zawi sap. 

Mipa aw hian, "I dam em? Ka fanu" a rawn ti ta. Tatai a ṭhu chhuak nghal zawk. 

"Tu nge?" A ti hû a. 

"Keimah, i pa mawle..ka zawng rei ta khawp mai che" a rawn ti leh ta zêl. 

"Maw?! Ka pa maw? " A ti nghek. 

"Umm, i pa ngei ka ni e. Thansanga kha " a rawn ti ve zel a, a confi viau lehnghal. 

"Ni lo, ka pa i ni lo" Tatai'n a lu a thing nar nar. 

"I number nei tur pawn ka hah viau asin. I pahrawn te unau zinga upa ber nupui khan min pe thei hlauh a, ka lawm tak tak a ni" a rawn ti duah. 

"Mahse, ka pa i ni lo" Tatai'n a ti ve tlat si. 

"Engtikah nge ka hmuh theih ang che" a rawn ti daih a. 

"Ka hre lo, hmuh che ka duh hauh lo mai" a ti chhum hmak. 

"Enteh, Ngurpui, ka hmuh châkzia che hi, kum hei chen i nuin a thukru che a, ka zawnna che lamah ka hriselna paw'n a tuar hial tawh asin" a rawn ti chuai raih. Tatai a chiâi vek tawh, a pa a ni tak tak dawn em ni? 

"Ka pa i nih takzet chuan tu nge ka nu hming?" A ti a. Zawhna atthlak tak a ni a ti rilru leh thung. 

"Rinzuali mawle..ka û te bula awm ṭhin, ka hmangaih êm êm ṭhin ngei kha a ni" a rawn ti hlur a. A dawhtheih loh hmel ṭan hle. Mahse, Tatai chuan a ringngam chiah si lo. 

"Min hrethiam la, inhmuh ka duh lo. Tin, pa ka nei lo" a ti khur dat dat a. 

Mipa chu a rum hawk, "In ina rawn kal chilh che i duh leh duh loh a ni mai alawm. Ka rawn lan vaih chuan i nu leh i pahrawnte kha an buai dawn" a rawn ti ta hmiah hmiah. 

Tatai tihngaihna hre tawh lo chuan a hmet hlum ta ngawt a. A thaw a rangin a lung pawh a phu nasa hle. Thil thleng tam tak awm tawh mah se; tuna thleng mêk hian a la ṭhawng ber awm e. A pa a ni takzet ang em? Zep loh chuan mahni hringtu pa takngial pawh hre loin hei chen a seilian tawh a, a pa chu eng ang hmel pu nge, eng ang mizia nge tihte chu hriat ve a châk tho. A nu rilru nawm loh a hlauh avangin a sawi ngai lo mai zawk a ni. Falak nihtir duh hial khawpa lo hawisantu pawh nise a pa a nih takzet chuan hmuha chhuahchhalh sak sak a châk ve lutuk. Mahse, he thil hi inbumna pawh a ni thei. Tui a in a, a luak te chu a chhuak ut ut mai. A nu a hrilh duh ang em? Hrilh ta se amah ang bawkin a chiâi ve ang em le? Nge a hre ru vek tawh zawk ang. Kha pa khan a rawn hriatchian hmel angreng si a, pahrawn a neih thu te nen lam a sawi fai vek si, Pi Sangi aṭanga a number nei ang khan a insawi a, amah Pi Sangi hian tihbuai nan hrim hrim a hmangte a ni thei ang em? A buai khawp mai. A buai luatah Mafeli room lama ke pen thawm pawh a lo hrechang tawh lo. Almira hawn rîk ṭhuai a hriat rualin a harh zawk. A beng a chhi ta ran a. Hlauh nachâng pawh a hre lo. A â huih a ni ber e. Pen ri thlep thlep thawm a hre leh a, bathroom a hawng a, tui a herh haw leh tawh. An camera kam kha a hmu êm lovang chu maw..Thawm chu a hnu lawkah a reh leh ta hmak a. Tatai chuan a ngaichâng reng naa, a che zui tawh lo. Va thawha va fiah kher a tum hran lo. Cameraah a lang vek dawn tho. Mahse, whatsapp-a Chrisa leh Rinpuia bakah Amanda te nen chauha an awmnaah chuan, "A rawn che leh e. Tun lawk khan a thawm a tâwp" a ti a. An la seen hlawm lo. 

A hlau lem lo bawk a, a muhil zui ta daih. Tunlai chu sawi tawh ang khan mut hi a duh êm êm ringawt mai a ni, remchang hmasa berah a bp la checktir a ngai a ni. Zinga a harh rualin a phone a ban nghal. Groupah chuan, "Engtin tak nge a chet?" Amandain a rawn ti a. 

Rinpuia'n, "Naktukah eng nge a nih chiah kan hre thuai ang" a rawn ti bawk. 

Private msg-ah Chrisa'n, "Morning, sweetheart" a rawn ti. 

Sweetheart han tih kher a ti rilru nang nang a. A chhang let ve tho bawk. Test an nei dawn bawk nen, nidang aiin a kal hma a, Jeje te pawh an la thleng lo. Canteena a ennawn lai takin Sawma leh an college-a lar ve tak Samuela te an rawn inzui lut a. Tatai chuan, "Sawm, lo ṭhu ve r'u" a lo ti var. Tîm deuh dui hian Sawma chu a rawn ṭhu a. Samua chuan, "I zir nasa thei bik eee" tiin a rawn nuih sâng a. 

"Kan test dawn vang mai mai alawm" a lo ti. Samua a awm ve si a, Sawma chu hauh chi ni hek lo, an college chhuah huna an kalna tur lamte an sawi ta mai mai a. Tatai hi chuan zir zawm pawh ṭul a ti vak tawh lo. Sport lamah hian rilru pe taka kal law law a duh deuh. Jeje a rawn thleng a, a rawn ṭhu ve zat. 

"Sawm, chaw ei chhuak ila, naktuk tlaiah, kan tiho khat tawh riau" a ti nghal bawrh bawrh. Samua chu an ṭhianpa Dina'n a lo koh avangin a va kal zawk a, chumi chhung chuan Tatai'n, "Damdawi te engtin nge i lo tih ve theih zawk" tiin Sawma a en kar. 

Sawma lah chuan, "Ka ti lo e a" a ti ve tlat. Sawi bawl bawl chi a ni bik si lo. 

"Chaw chu ei chhuak ila a ṭha a ni mai" Jejea'n a lo ti vat. Sawma pawh chuan a hnial bik lo. Ngaihbel tur tingin a cherin a dâng viau a, a lo luhchilh thuk tawh viau em mawni. 

Class an ṭan a. Tatai pawn a zir ve nasa bawk a, an test pawh a tiṭha viau. A ngaih pawh a ṭha. Classa a ṭhut lai reng pawn a pa anga rawn inchhal leh Mafeli rooma camera ringawt a rawn lang sek a, hawn vat vat a châk kher mai. Tlai an banah a hmaa an inhmuhna hmunah khan Amanda hova record pawh en an tum kha a nia, an lo nghak ve dawn a ni. Bul an ṭan tawh a, chutimaia tawpsan theih a ni tawh lo. An bâng ve ta hram e. Jeje a inthlahtir a, "Mi hmuh lawk tur ka nei a" tiin Miracle Restaurant kawtah chuan a chhuk ta a. In chung lam a pan nghal vat. An lo ṭhu ṭhap tawh a. 

"Le, kan en thei e. Rinpui, han phawrh la" Amanda chuan a ti var. 

Rinpuia chuan a phone ah lai chu phawrhin Mafeli room suasam ṭhintu chu eng nge a nih chiah an en dawn ta. Khai aw! Engmah a lang miah lo! An kam chiang si. Pindan chhung pawh a lang chuang lo. Camera chu off ang chiah a ni mai. A va ho mai mai tak. Rinpuia chuan insehruh chungin, "A tu phiangsen nge mawni lo off le! A va ho tak e aw" a ti a. A thinrim hmel viau, Chrisa pawh chuan.."He thil hi kan rin loh lamah daih a kal dawn te pawh a niang e. A mak hle mai" a lo ti ve nghut. An en tum ber, nghakhlel taka an lo thlir ve chuan awmzia a nei ta lo. Amanda chuan, "Cctv zawk in dah a ngai a nih hi. In fit tih nangni pathum chiahin hre bawk ula" a ti a. An pawm tlâng hle. Rinpuia chuan lei hawn nghal a tum nghe nghe. Hrilhhai ru takin an haw ta hlawm a, Chrisa chuan a sumdawnna chungchângah mi hmuh tur pawimawh tak a neih avangin, "Ta, ka thlah lo mai ang che aw. Ka rawn practice hman lovang, tunah min nghak tawh bawk sia" inthiam loh hmel tak hian a ti a. 

"Umm, taxi ka la mai ang, va kal rawh" Tatai pawn a lo ti ve var. An inbye bye zauh a, an inthen ta. Taxi ruak a hmuh mai loh avangin kein a phei zel a, Rinpuia kha dawrah a pen dawn avangin a inthlahtir lo law law kha a nia. A hmanhmawh teh chung peih lo bawk. Chutia amaha a kal hnak hnak lai chuan a bânah tu emaw hian a rawn vuan ta chawt a, a hawi let vat. A la hmuh ngai loh mipa sang lam, patling tih hriat tak, zu a in ve nasa tih a hmelhmaiah a lan bakah a dulte pawh a kiar lek lek a, en chian chuan a vanglai chuan a hmelchhe lovang tih theih tur a ni. 

"Tata, ka fanu" a rawn ti zawi ta sup mai. Tatai a tal vak a, a thlah duh si lo. 

"Ka pu, min hrethiam teh..khawngaihin" a ti a, a kut chu a elh ngat ngat bawk. 

"Thil sawi dun lawk ang, engtinmah ka ti dawn lo che..hawh" tih leh an piah lawka thingpui dawr lian lo tak lam panpui a rual a. Miin an en duh êm avangin Tatai pawh chu a tal buai tawh lo law law. Midangin am buaina an hriat a hlau zawk. An ṭhu fel a, a pa anga insawi chuan thingpui a lam nghal zat. Pitar tawh lam inhnawihsen zet hian a rawn pe var a. 

"Hun ka ngah lo a nia, sawi vat vat rawh" Tatai chuan a lo ti sek sek. Dik tak chuan a chhungril chu chiâina leh hamhaihnain a la khat. A pa a ni tak tak ang em? 

Chu pa chuan, "Aw le, i nuin eng thu nge a fah thin che ka hre hauh lo va. I pian aṭanga reivak loah i nu chuan min chhuahsanin ka lak aṭangin a thukru char char che, a chhan i hre hauh lo vang. A chhan chu ka lakah a uire a, vawi tam ka phâwk tawh. Mahse, ka ngaidam zel a, ka nau lehzel a lo mutpui takah chuan ka thei ta ngang lo va, chhuak turin ka ti ta a, mahse, nang erawh hruai ka phalsak lo. Mahse, a hminga hlawh nei ka nihna laiah nakinah nangmah hmanruaa hmanga ka hlawh cut theih inbeiseiin ka mut tawh hnuah a rukin a chhuahpui che a, a uirena fô ṭhin Lunglei lam mi nupui nei lai, mahse, he lama eizawnna vanga amaha awm inah a luhpui che a. Kar khat vel chu in awm hman ang, ka rawn zawng chhuak ta che u a, nang chu ka la leh ta che a ni. Mahsw, thla 2 erh awrh chauh ka awmpui hman che. Ka chhuah hlanin i nu chuan a rawn ru chhuak leh ta che a ni. Ka zawn chhuah theih lohna hmunah a awmpui che a, ka hlawh pawh a cut ta rêng a. Kei lah hmun dangah eizawnna vangin ka awm leh ta bawk nen. Mahse, hei ka zawng hmu ta che a, ka lawm khawp mai" a ti ta dap dap a. Tatai a mit sulh thei. Dâwt chiang lutuk a sawi thei chu rapthlak a ti. Mahse, mi dawra awm an nih avangin engmah a sawi ve duh lo. 

"I sawi zawh tawh chuan ka kal dawn aw" tih leh din a rual a. 

Chu pa chuan, "Tata, khawngaihtakin, vawikhat chauh chu zanriah min kilpui thei ang em? Min haw viau niin a lang a, min huatna chhan tur ka ngaihruat thiam si lo . Engpawhnise, ni e, hun thawl zawk kan la nei turah ngai ila aw" a ti a. Tatai pawh chuan, "Nia, hun thawl a la awm mai ang, ka kal phawt ang" tih leh chhuah a rual ta a. A thaw a sa phat phat mai. Taxi a hmuh hmasak ber a la a, a âwm dawm vang vang chungin kha pa thil sawite kha a ngaihtuah lêt rauh rauh. Khatianga a nu a rawn puh kha mak a tih bakah a awih lo hul hual, a nu hi khawvelah a ring ber. A nu na taka siama amah thleng pawha falak tia an sawi chhan kha kha pa ngei kha a nih ngai chuan hmuh leh pawh a duh tawh lo. A thla a lo la lo kha pawi a va ti tak. A nu a hrilh ngei a ngai tawh, a serious tlat. Tin, a nuin a tawrh ve phah ang tih pawh a hlau bawk. In a thleng a, a chhungril khawsik ser ser nen a practice peih ta ngang lo, bakah a tlai tawh si. An coach a bia a, a nawmsam loh thu sawiin chhuanlam a siam ta tawp. 

A nu chuan Arami puiin rawng a bâwl a, midang awm laia sawi chi niin a hre si lo. A pa anga inchhal a lo lang ngawt leh an tunlai boruak a ngaihtuah a, inzawmna a nei thei ang em tih thlengin. A rum hak, "Ti nge maw buaina hi ka tawh reng bîk le" a ti sap. Hmeichhe naran chu ni se a dinhmun hi a chauhpui tawh maithei a ni. Tatai kha a ni miau a, a hmachhawn thei mai mai zawk. Rinpuia pawh a rawn haw a, "Cctv chu ka lei a, mahse, zaninah chuan kan fit hman loh hmel, a fittu ber a chhuak daih a, naktukah a rawn kal thei ang" a ti a. 

"Camera kha tuin nge lo off ang le?" Tatai'n a ti chuai raih. 

"Ni e, mak ka ti ê..tuman kan kam tih kha an hre ve bawk si lo, amah kan ramhuai bawk khan a off tih dawnin a luh hma daiha in off tawh a nih hmel bawk si" Rinpuia pawh chuan a ti ve a. Sawi zui vak tur pawh a awm lo. Zanriah an ei a. 

Pu Hruaia'n, "Mama, Ruati te lam hian sawi an nei leh tawh em i bulah" a ti vut a.

Rinpuia chuan, "Neih âwm pawh ka hre lo, ngati nge a" a ti hû a. 

A pa chuan a aw thian kharhin, " a..ka ti deuh mai mai, tlangkam aṭanga ka hriat danin 'Rinpuia chuan rawn luh mai pawh a hnial lo, a pa ten an remti si lo va' an lo ti a niawm e. Mak ka ti deuh hlek a" a ti a. 

Rinpuia a chek hluk, "An hneawm êe..amah hi chuan min rawn biak zauh chu a nei, ka chhang lo hrim hrim a, chutiang thute lo sawi leh hmanhmawh chu..fa hi nei se, la vat ila ka duh. Saw ina ka fa a seilen ka remti lo" a ti ta nghut a. A lungawi vak lo a nih hmel. 

A nu pawhin, "Ni e, naute chu kan theih hram chuan enkawl dan ngaihtuah ang u. Kan khawhar pawh a chhawk dawn lutuk, kei lahin tihtur ka nei mang si lo" a lo ti ve a. Chhungkua an hulharin, Mafeli a awm lo lehzel bawk nen, han inkawma infiam bawng bawng chi an lo ni bawk si lo va, a khawharthlak ve viau rêng a ni. Chhangchhiat laite hi a tuartu tan chuan ninawm han tih mai theih tur a nih laiin fate an lo puitlina nu leh pate an tihbuai tawh loh chinah chuan khawharthlak thei tak hi a nia, in hrethiam vek mai âwm e. 

Arami'n, "Rinpui, Zorina te nau chu tu nge a hming ni reng reng? " A lo ti hmanhmawh. Rinpuia pawh a khi ve suk mai, "I ho thei siah. Zari an tiin ka hria" te chu a'n ti khawmawi ve a. 

"An tiin ka hria te a ti vel, i hre mah mah aw. Mi pawn an sawi, vawiina surf ka va lei paw'n pi Thluaii'n 'In pathlawi chu a va thar hma ve..Zorina te nau a birh tlut tlut alawm' a lo ti aw.." Arami chuan a ti a, a nui ar ar bawk. 

"In ninawm, ka birh kher lo, tak taka a fel ve reuh a, kawm a nuam ve a maw" thawh pahin Rinpuia chuan a ti a. Amah leh amah a inpuang a ni ringawt. A lawmawm lamah ngai ang. Mihring rilru hi a lêt chian tawh zawngin hnulam hi an ngai lo mai ni loin a hawi pawh an hawi let tawh mang lo a ni e. Rinpuia pawh kha chen a lo zui tawh Ruati nen an han innupa ve a, a nupui mizia a han hrechiang telh telh a, a rilru a sak tawlh tawlh chu a nih ber hi a, Ruati te dawr dan lahin zir bik hek suh. Tunah an inchhir reng bawk a, neih let leh tum eltiang mah se; amah Rinpuia'n mitmei takngial pawh a hmuh duh tawh si lo va, an insawh an insawh ringawt mai chu a nih hi. Zanriah ei khamah Tatai pawn tv a en ve a, a tana remchang tak maiin a pa te an meeting dawn a, a insiam sawk sawk a, a chhuak ta vut. Arami lah a roomah a phone biain a tawm leh kûk tawh bawk si. Rinpuia pawh len chhuah a tum lo nge a pindanah a la awm. 

A nu chu a ṭhut hnaih a, "Nu, sawi duh ka nei a" a ti tê tê a. 

"Hmm, pawimawh hmel ve..eng lam biahthu nge?" A nu chuan nui chungin a lo ti a. Tatai chuan a nu chu a zah tharin tihnat a hlau viau, mahse, sawi ngei ṭha a ti tawh si. 

Tichuan, a pa anga inchhalin a lo biak ṭhin thu te, vawiin tlaia an inhmuh thu bakah a pa thil sawi zawng zawngte chu a hrilh ta mial mial a, hmuh theih khawpin a nu hmelah chuan mak tihna a lang thei. Thansanga'n a chanchin a sawi duh dan a han hriat phei chuan a insehruh hle. A kutte a lo hum ruh ve nasa mai. Tatai chuan a sawi zo ta, ngawi rengin 1 min vel chu an ṭhu âwm e. Chutah a nu chuan, "I pa tak tak pawh chu a lo ni ve thei tho, mahse, engvangin nge tunah chauh a rawn lan ang?" A ti sap a. 

"Chu tak chu lawm ka hriatthiam lo, Pi Sangi'n ka number a lo pek danah chhungkaw ho chuan an hre leh fur tawhin ka ring a. I chanchin a sawi duhdante kha an hriat lek phei chuan an ṭawng tam si, buaina a chhuak leh ngei ngei ang" Tatai chuan a ti a. 

A nu pawh a bu nghat mai, "Chutiangtea min lo sawi mai mai le! I pian leh pian loh pawh hre lo hian a zawn che hi ka va ring lo tak. A thi daih tawh turah ka ngai zawk a nia. Hnathawh a neih ka hre hauh lo, engtin nge khatiang dâwt chiang lutuk kha a sawi theih zawk le" a ti vawng vawng mai. 

Tatai chuan, " A thusawi kha chu ka awih loh bakah ngatan mah ka ti lo. Engvanga min zawng nge a nih tih leh eng nge kan lakah a duh tih ka hre châk" a ti hap. 

A nu pawh chuan ngaihtuahna hmang nasa tih hriat takin, "Kan chhungkaw buaina nen te hian a inzawm ang em le? I nî bakah i nu Sangi te ho ruahmanna a ni lovang tih pawh a sawi theih loh. Mahse, mak deuh chu tuman i pa hming min zawh loh bakah a chanchin kaihhnawih pawh min la sawipui si lo, i pa pawh hian tu nge i pa tih a hre miah hleinem. Falakah an ngai laklawh tawh che a, keipawn buaina a chhuah loh zawk nan ka ngaizam mai mai a" a ti charh charh a. 

Tatai pawh a rilru a buai kher mai, "Nu, tian ti ila chaw chu ka ei chhuahpui ang a, chuan ka thiam ang tawkin ka lo kawm dawn nia, min zawn dan leh engtin nge min hriatchhuah dante..a thla ka lo la tawh bawk ang" a ti siam siam a. 

"Ni e, a ṭha alawm, a nun a lo sim ve twh pawh a ni thei a. I pa tak tak a nih chuan nang pawn haw reng lo la ka duh, ka lak atang hi chuan tuman an la hrang thei dawn lo che a, mahse, falak tia an sawi fô che ai chuan i pa nen pawh inhnaih ve deuh mah ula a pawi ka ti lo a nia" a nu chuan a ti a. Tatai chuan a chhang tawh lo. 

Chrisa bulah erawh a pa chungchang chu a la sawi lo. A mimal nun midang bula sawi vak vak hi a mizia a ni ve lem lo. Miin an privacy a bula an sawi lah khawiahmah a chhuak tawh hek lo. Miin min rina an thurûk engkim min hrilh a nih chuan an rin anga awm ve mai hi mi pangngai nihna a ni. Zanah an ramhuai a rawn che lo hlauh. Tatai pawh ngaihtuahna buai tak chungin a muhil ve thei hram. 

A tukah Jeje lo sawi tawh ang khan Sawma te nen chaw ei chhuah chu an tum ta a, Zo chokaah dawhkan a lo hauh thlap tawh. Sawma pawh pawr fe hian a rawn lang ve thei a, Tatai chu a practice leh thei dawn ta lo. Mahse, an hrethiam ve mai turah a ngai. Chrisa bulah an chaw ei tur chungchang chu a sawi a, "Duh ai chuan mipa i kawmngeih ka ti. Mahse, a ṭha tho e. Jeje te chu ka ringtawk" a rawn ti vei thlup. Bialnute thunun tum tak, engkima khirh kual vel vek mipa hi an awm ve a. An thikthu chhiat vang êm êm pawh ni lo, an rilru kheuhbeuh luat vanga hetianga che pawl hi an awm ve tlat! A ṭha zawnga inthunun hi chu tu tan pawh thil ṭha a ni, a engkim zawng zawnga khap vek hi chi a rilru chhiatthlak. Ṭhian kawm pawh phalsak lote zuk awm chuan! An ni pawn thunun an ngaithei bik tawp si lo. 

An pathuma an han ṭhut hnu chuan, "Sawm, tun hnai i danglam viau chhan hi kan hriat a hun tawh lo maw?" Jeje chuan a ti ta a. 

A heh liak zauhin, "Ka danglam viau em mawni le" a ti duh chauh. 

"I hria alawm,. Kan lo hriat danin damdawite i lo ti ve a niâwm a, nâ kan ti. Hmana kan ṭhianpa kha kan ngai tawh" Jeje chuan a ti leh a. 

Sawma chuan, "Nia..tak taka ṭhiante u, ka hria lawm. Mahse, ka zah êm che u a, ka sawi duh lo a nih kha. Damdawi tak hi chu ka tihna a la rei lo, zep loh chuan a tam si, a tlawm bawk sia. Ngaihtuah chiang hlei lovin ka lo ti ve ngawt mawle, mahse, nghei ka tum..chuan, nia hetia ka awm chhan chu in bulah chiah ka sawi ang, ka rilru a hrehawm takzet a ni. Chhungkaw thil a ni a, mualpho theihna a ni bawk nen, nangni chu ka ring êm che u a, ka sawi mai ang. Thla tir lam khan ka pa hi a hna avangin Siahaah a zin kha a nia. In hriat angin U mafaka, ka pain a khawngaih vanga kan ina a rawn hruai luh kha kan la awmpui reng a. A fel bawk nen, kan en hrang ngai lo. Khatia ka pa a zin hlan khan zan khat ka leng haw chu an mut tawh vangin thawm dim takin ka lut a. U mafaka room chu kan choka lamah a awm kha, khata ṭang khan thawm ka hre ta a. Nupa nun hmang thawm a ni. Mak ka tih bakah enthlak ka chak ta tlat a, bialnu a neih awm ka hre bawk lo nen. Ka bih thla ta a, ka thil hmuh kha awih harsa ka ti ngawih ngawih, ka nu leh Mafaka te chu an lo mu dun a nih chu! Va luh nghal rap rap ka tum a, mahse, ka ṭhulh ta rih. Ka tlaivar chiang khawp mai. Sawi nuam a ni lo va, a hma pawn ka nu hian whatsappah mipa dang a biak ṭhin avangin ka pa nen pawh nasa takin an inhau tawh, tunah ka pa a uiresan ta chu a nia. Ka inngaihtuah a, ka pa ka hrilh chuan mafaka nen a hnawtchhuak nghal dawn. Kan pafa hoin kan awm dawn tihna a nia. Ka nau Nonoi lah wheelchair-a ṭhu, enkawla buaipui ngai a ni. Ka û lah a hna avangin inah a awm tam thei si lo, ka rilru a buai êm êm a. Ka nu hi ka hmangaih em em bawk si. A tel lo va khawsak chu ka zuam ta tlat lo. Ka thinrimin ka rilru na viau mah se; ka pa hrilh rih loha Mafaka zawk hi hnawhchhuah mai ka ti ta a. Tin, ka nu bulah engkim ka hriat thu ka sawi bawk ang tiin..mahse, hei vawiin thlengin engmah ka la ti lo. Ka pa a awm tawh avangin an chetsual tawh chu ka ring lo va, ka nun ram a chau, ka â mai dawnte hian ka inhria. Inah ka awm tlem phah a, nia, ruihhloah ka ṭuan a..ka thil pai leh tawrh hi a namai lo êm a tin ni" a ti ta mawlh mawlh a. Tatai leh Jeje pawh chuan sawi tur an hre mai lo, mak an tiin Sawma chu an khawngaih ngawih ngawih. 

Eitur an rawn dah avangin tumah an la ṭawng leh lo. Tatai chuan a fork a titla palh a, a chhar vat, a hawi chhuak leh chiah chu Chrisa nu leh a pa anga insawi nimina a hmuh ngei maite kha an rawn lut dun ral ral a..

(Nizan khan net ka nei lo char char a, a tlai tawh hnuah a rawn awm chauh a, ka rawn dah ta lo law law a nih kha. Ka dan bawhchhiain sundayah ka rawn dah. In lawm em😀