Tatai 11

TATA -I (11)

Ziaktu : Toni Râlte

"Maw?! Christopher, i zak em?" Tatai aw chu a ring hrat a ni. 

"Zak lo, tun baka chance ṭha kan nei lovang" luhlul zeta a lo tih chuan, Tatai a sa phat phat. 

"Haw ang, haw mai ang" a ti sek sek tawh. A nuin a rawn call leh hma ngeia hawn a duh. A mangang hmel chu a hmu thiam ni tur a ni, "Okay, ka hruai haw ang che. Mahse, ka nuin a rilru a thlak hma chu hetah ka khawsa ang" a ti hmak a. Motorah a lut zui nghal. A tinung ta vut vut a, Tatai pawh ngawi rengin a lut. A rilru chu nuam chiah lo mah se; tihlan a duh lo, Pi Dingliani theih chin chin a kal ve tawh mai ang chu. Tun dinhmunah Chrisa chu a thlahthlam rih a ngai. Ani chu mipa a nia, amah aiin a chak zawk bawk. Ngawi rengin an tlan ve mawp mawp, Chrisa hmel tak ngulah chuan lungawina hmuh tur pakhatmah a awm lo. Eng nge a ngaihtuah hriat a ni lo, Tatai pawn hmalam a bih ngar a, engmah sawi a tum bik lo. 

An in an thleng a, "Ka hruai lut ang che. " A rawn ti sup. A lo nghak ve mai bawk a, ngawi rengin an lut ta a. A nu leh pate an lo ṭhu dun ral mai. Chrisa chuan an ṭawng hmain, "Hei himdam takin ka hruai haw e. Ka nu chungchâng leh a anhla ka hre duh lo a nia" tiin a intlawhkhalh nghal hmiah. 

A pu chuan, "Aw, a ṭha alawm,Chris, mahse, duh aiin thu i duh rum ṭhin. I nu neihchhun in ni tawh a, a thusawi pawh ngaihthlaksak a ṭha" a lo ti dap dap a. 

"Tatai laka ka rilru sawhsawn thei tur eng chhuanlam mah a nei lo, chuan, ani hi lo hau miah lo ula ka duh. Tihsual a nei hek lo, ka kal leh nghal mai dawn" tih leh biak hman rual loha chhuah a rual. Hrilhhai zetin an enliam ringawt.

Tatai pawh a lai ru ṭût mai. Pu Hruaia a pa tak a nih loh chu thuhran, Chrisa putea a lo ni ve kher chuan a tilâi kual vel vek a ni ber e. 

A pa chuan, "Tata, ṭhu lawk rawh, kan hau dawn lo che a, mahse, sawiho ve chu a ngai a ni" a lo ti var a. A ṭhu ve vat. 

"Hei i hriat angin chhung leh khat kual vek kan ni a, I nî kha a rawn sa hle mai pek a! Ni e, a thusawi zawng zawng phei chu i nu ngei pawn hre lo se ka duh avangin ka sawi kher duh lo. Engpawhnise, I nî Dingliani hi chu û te mah nise; zêp thu a chêng lo, kan unau zingah Alice-i nu nen hian an danglam êm êm bik a. Mi huaisar ve tawk tak, mi hmai eng pawh zah lem lo kha an ni ve a. I nî Dingi hi chu a demawm lohna chinte pawh a awm ve âwm e. Chrisa pe nena an boruakin a lo nghaisa nasa tawh a, a fapate bak hi innghahna leh han chhuan tur nei bik lo a lo ni ve bawk nen, a hauh pawh a hauh nâ..chulai kara nang, ka fahrawn i lo nihna laiah a lakawi ka ti dawn nge, a rem lo a ti bur mai si a. Ka tan pawh han sawi vel nuam thil nuam tak a ni lo. Engpawhnise, rilru i siamfel chu a ngai a ni. Eng nge i rilru ni reng reng?" Fimkhur leh dimdâwih takin a fahrawn bulah chuan a han ti leh ta dap dap a. Tatai paw'n a pa chu a zah thar sawt mai. 

A chil a lem khawlh a, a nu pawn a lo melh kar mai. 

"Nia, ih englo, hmanni-a Chrisa nu nen kan inhmuh aṭang khan thutlukna pawh ka siam fel vek tawh alawm. Ṭhen ka tum a, kalsan ka duh. Amah hi a luhlul êm a, tunah pawh 'ka nuin a rilru a thlak hma loh chu farm-ah ka awm dawn' a tia. Keima lamah chuan ka kalsan thei" a ti ta a. A pa pawh a bu nghut nghut mai. 

Pu Hruaia chuan, "Chutianga nangma lam i insiamrem theih chuan a ṭha lutuk alawm. Chhungkua kan buai phah ang tih a hlauhawm ve riau a. I nî lah sawi tawh angin a duhnaah pawisak nei vak chi a ni lo bawk nen..a lawmawm e, tikhan ngaihṭha takin han mu tawh rawh" a ti dam thlup thlup a. 

Tatai pawh a chho ta hnak hnak a. A pindana a lut khuma a tluzâl chu a chauhzia a inhrechhuak chiah. Eng êm êm ti lo mah se; an boruak tawn vang nge ni a ni nghulh mai. A inbual tawh tho naa, a intleuh leh thuak thuak a. Chrisa chauh a ngaihtuah, a sawi ang khan farm-ah a awm tak tak ang em? Pi Dingi hian engvanga heti taka duh lo nge a nih ang? A tam mai. A ngaihtuah sêng lo a ni ber. A inthlak sawk sawk a, a chau bawk nen, a mu ta hlân a. Vawiin lamah Chrisa nen Mafeli chungchang an khel hman meuh lo kha a nia. Mafeli diary pawhthlak chungchangte kha hrilh ta se a ngaihven leh viau maithei a ni. He thil leh boruak hi chu reh daih tawh se a ti. Chrisa khan Mafeli lehkha kha Police kutah a hlan ta nge nge kha a nia, mahse, thil fel lo a awma a hriat vangin a rûkin Amanda a ruai ta ngawt kha a nia, an ni lam lahin thu thar an la rawn nei si lo. Police lam hi chuan Mafeli kutziak kha an zirchiang ang a, thutakah an pawm ta mai a nih hmel. Nge a rûkin an la chhui kal reng zawk hriat va ni suh. 

Rinpuia pawh ama tawkah a buai viau. Chhuah tumin a insiam fel ap tawh. A lehkha pawimawh bakah thlalak te chu a khungkhawm vek a, hmuh mai theih lohah a thukru khiau tawh. Duhawma nen inhmuh an tumna lam pan chuan a tlan ta vang vang a. Engpawhnise, a farnu thih dan kha a ringhlel a ni tawp mai, tumah pawh hrilh chuang lovin ama tawkin a lo buaipui ve nasa a. Khang thlalak bakah Mafeli diary aṭanga a hmuhte aṭang khan ngaihdan la siam fumfe thei rih lo mah se; felhlel a awm tih leh an chhungkaw mi leh sate ngei an inrawlh niin a hre tlat a. Duhawma pawh hi chulam hawia kawm tuma pan mêk a ni. An inhmuhna hmun tur a va thlen chuan a lo awm ran tawh a. Mafeli thih pawh khan Duhawma hian a rawn ṭâwiawm ve thlap a ni, kha chen lo inzui tawh an ni bawk a, chutimai chuan a thlah liam thei bik lo, a tawrh pawh a tuar nâ. Khatia amah ni lo nena an video a viral khan an inṭhen zui kha a nia, a rai thu kha an hre hmasa zawk naa, Duhawma khan ama fa a nih leh nih loh kha a chian bik rih loh avangin a rai tih an hriat hnu pawh khan a la ṭhen tak tak bik lo. Mahni bialnu te ngei, mipa dang nena sex video an neih tak meuhah chuan a kalsan lo thei ta lo kha a nia. A thih thuin a'n den leh zet phei kha chuan awmngaihna reng a hre bik lo. Mipa a nia, a insûm hram hram zawk a ni. 

Inhmatawnin an ṭhu ran a. 

"Ka ngenna i ngaipawimawh a, ka lawm takzet" Rinpuia chuan a ti a. 

"A pawimawh hmel êm a..eng lam nge ni reng reng" Duhawma pawh chuan a lo ti var. 

Rinpuia chu a hawi kual tê tê phawt a, "Mateii boral danah hian felhlel eng emaw awmin ka hria a, tin, tualthattua puh a nih dante pawh i hriat ka ring a. He thilah hian ka hriat ṭula i tih te min hrilh ve thei la ka lawm viau ang. Kha chen inzui tawh in nia, kei ai mahin i hriatchian zawk ka ring" a ti ta a. Duhawma pawh a serious sâwt ta viau. 

"Kei chuan a thi tih hi awih harsa ka la ti reng. Nia, mahse, i han sawi takah chuan felhlel chu a awm maithei a ni. Thah a nih rinna i nei deuh tihna em ni?" Duhawma chuan a ti a. 

"Chutianga rina rin loh tur paw'n ka thlen chin a la tawi angreng. Lawkin, hei hi a diary aṭanga ka pawhthlak an nia, i chungchangte pawh a tel ve. Heta ka hmuh aṭanga mak ka tih deuh chu, Alice a huatzia a ziak nasa lutuk hi. I bulah hei hi a sawi ve ngai em?" Tiin lehkha phekte chu a entir ta a. Duhawma chuan a lo thliar zung zung, a ziah pakhat chu a'n lek kang deuh a, "Alice hi ka nun aṭanga hnawhbo daih theih ka va châk tak êm. Duhawma te hi a sawi chhe vak vak zel a, a thurûkte hi hre lo turah min ngai em mawni..ka kâ ka an ve chuan a nasa lo teh ang chu" tih thu a ni. 

A dang pakhat leh chu, "Tatai ka hmuh hian ka zak ṭhin. Ti nge hetiang hmeichhe pawisawilo haw tura thunun ka nih tlat bik? " Tih a ni bawk. 

Duhawma chuan, "Ka bulah vawikhatmah Alice a huat thu a sawi lo, Tatai erawh zêp loh chuan a rêl ṭhin. " A ti ta a. Rinpuia a indawm vung vung. A farnu chuan a va tibuai tak êm..bansan mai a châk laiin a farnu thlarau vakvai tur anga a ngaihtuahin a ngaingam bawk si lo. 

"Chuan, tual kha a thah a nih i ring em?" Duhawma mitah tak a melh chat bawk. 

"Ka ring a, ka ring lo bawk. Ka sawi awmzia chu a châng chuan Mafeli kha mi dang daih angin a awm ṭhin. Hmeichhe kawlhsen leh thinchhia, kutram tak a ni fô, kei kha chuan ka hmangaih avangin ka dawh thei mai zel a, kha a ze maksak zet a chhuah chânga ka bula a awm loh lai khan pâwi chu a khawih thei tlat" inngaihtuah tih hriat tak hian a ti charh charh a. 

Rinpuia pawh bu nghut nghut mai. 

"A nih, Duhawm, Ka nî, Christophera nu hi i hria ang a. Ka nî chungchang hi vawikhat tal i bulah a sawi tawh em?" A ti leh ta. Duhawma a ngawi vung vung, a hnuah, "Umm, vawi hnih emawni chu a sawi tawh e. 'Ka nî hi ka hlau' a ti. Vawi khat erawh, 'Ka nî leh Alice hi nufa ni zawk awm tak an ni' a ti. Chutin ka lo ngaihven tehchiam lo va" tiin a chhang ta a. 

Rinpuia chuan a hriat duh chin hre kim taah a inngai nge, a ding a. "Ka lawm lutuk a nia. Engpawhnise, ka nau khan tina viau che mah se la; a dikna chanvo hi chu a hmuh ve ṭha i tih ve tho ka ring. Khawiahmah kan inbiakna hi a ri chhuak lo turah ka ngai bawk e aw".tiin Duhawma chu a nuih suk a. 

"Ka tan tumah mi hrang in ni hleinem, ṭangkaina ka neih phawt chuan inthlahrung reng reng suh" Duhawma pawh chuan a lo ti ve var a. Rinpuia chuan a kalsan zui ta nghal. A kal lam ai chuan a ke pen pawh a zâng ta deuh e. Tun hnaiah a farnu thlâ niawm tak an hmuh thu an sawi zauh zauh a, an ni lah hian an hmu ve thei dêr si lo. In thlen hma kawng zau laiah a ding a, hmalam melh vung vungin, "Mate, tual i that emaw that lo emaw he thil inzawm dan mak tak ka chhui chhuah theih nan min pui rawh aw" a ti zawi sup. 

Amanda pawh a buai lo bîk hauh lo, Chrisa hna pêk, awlsamtê anga lang, khirh ru zêk si hian a ngaihtuahna a tibuai hneh ve riau. Chrisa lahin a rûk thei ang bera zawh a duh si a, midang a kawm kual thei mang bawk si lo. Amah Chrisa nen hian an inbe leh chawt zel a, thu thar pawh a nei hleithei rih lo. Chrisa'n a target ber Alice lah Shillongah a chhuk leh ta bawk si. A mit thip tawh si chu a nuai chat chat, khuma a pasal muhil sûk sûk Samsona va melh zauh pahin, "Ka vawiin hna chu tikhan zo rih teh se" a ti sap a. 

Tatai zing tho pawh a hma ai chuan a harh ta vâk mai. In hnuai a pan lai chuan thinrim awrâwl nge eng nge a nih a hre chiah lo ṭawng thawm a hria a. Zing kar aṭanga hetiang tawn hi hne, tunlai a nun a nguai sa tawh tehlul nen. A zu thlen thlak chuan a hlauh ang ngeiin Pu Thianghlima nupui Pi Sangi a lo awm a, Tatai a hmuh rual rual chuan, "Nangtê phiangsen avang hian kan darh lovang tih pawh a sawi theih tawh loh a nih hi. Nangmah vangin Dingteii a tlaivar zak tih i hria em?" A lo ti nghal tâwn tâwn mai. Tatai lah a hawi â hêu mai si. 

A nu zawkin, "Tata, Christophera chu i lo fuihpawrh reng reng em ni? Hei an lawm lo nasa si" a lo vat, dik tak chuan an pa chhungte a hman hmanin an ṭawngkhumna hi a hne ve thawkhat tawh a, inṭhen mai pawh pawi a ti vak tawh lo. A fanu chuan tihsual zawng a nei ve ngei ang, mahse, engkima Tatai an burbun vek chu a ngaihdan a ni lo ve tawh lutuk a ni. Pu Thianghlima hi sawi tawh angin Pu Hruaia te unau zinga upa ber a ni a, an nu pawh an pa unau nupuite pawn an û en ve vek a ni, tin, Pi Dingi nen mize inang tak an ni a, an titi pawh a rual. Pu Lawma nupui Pi Tlani hi a fel thung, Tatai lakah pawh a sualna sawi tur a awm ngai lo. 

"Engvangin nge ka fuihpawrh ngawt ang a? Eng nge maw ka tihsual a hetia min rawn ânkhum ziah hlawm le.." Tatai pawh chuan a ti ve ta phat mai. A ni êm êm tawh bik lo ve bawk a ni. 

Pi Sangi lah chuan, "Nangni nufa cheng chawng vang hian a niang Mafeli pawh duh aia kan chân hma ni..in lo tel ve aṭang hian engmah a dik thei tawh lo" a ti ta mai. Pi Zuali a vir zawk, "U Sang, eng nge keini nufa chuan kan tih? Sawi rawh, hetiang zawng chuan min nawr miah suh aw. Ka dawhtheina ramri kham hi pel duh suh. In pawi kan sawi lo chung paw'n hetianga min tih fahran mai le..chuti taka kan lo hnawk nufa a nih chuan kan chhuak ang" a ti ve ta buan buan mai le. Tatai pawn chuti taka a nu thinrim chu a la hmu ngai hauh lo. Nu insûm thei leh dawhthei fahran kha a ni ve bawk a. Pi Sangi lah dang duh lo, "A hranpain kan pawi in sawi lo, Mafeli pawh Tatai nen an inngeih lo nghal a, Ruati lahin Tatai a mil lo bawk. Ni lo, in mil lo zawk. Chutah Dingteii innghahna leh a chhuan ve ngawih ngawih a fapa sîk thlûk tumin in hmanhlel leh a, in pa lah kan hlatah i hruai khawlo zo tawh bawk. Chhuak daih ula pawi kan ti hleinem" a ti hlawih hlawih mai. Mo ve si, thu a nei âwm teh e. A pasala nau nupuite nufa tihian a ânkhum phiar phiar chu a ni si a, engvang taka Tatai hi duh lo em em nge maw an nih ang le?!

Pu Hruaia'n an sawi tawp lam a rawn hre hman a,ani hi a lo zing len daih a lo nia. Eng sawi set set lovin, "U Sang, ka nupui hnawtchhuak tur hian tuin nge thuneihna pe che a?" A ti ta chat mai le. 

Pi Sangi chuan, "Aw..tikhan an ei zo vek tawh se, hman ang kha i ni tawh lo. I û ka bia ang a, engkim hi sawifel ang u. He nu vang hian i û Dingi a tlaivar tih i hria em?" Tiin Tatai a kawk siah. 

"Engah nge a tlaivar ve ngawt a? Tatai vang chuan. A va peih zawk ve" Pu Hruaia'n a lo ti awlsam êt. 

"Aw..an nufa hian Chrisa an fuihpawrh a, ina haw lo turin..a chiang reng alawm. Chhungkhat anga en dawn paw'n a nî fapa a lo ngaizawng duh zel bawk si a. A harsa a nih hi" a ti hlaih hlaih. Nu nasa leh zâm lo ve tak chu a ni. 

Pi Zuali chuan, "Paa, a buaithlak êm mai, kan nufa hian kan chhuak mai ang e. Theihtâwp ka chhuah chung pawha min rem thei lotu te nen chuan inthen darh a la ngai tho tho ang, min hrethiam mai rawh" zaidam deuh hian a ti a. 

"Tata, i thawmhnaw han siam rawh le" a ti zui nghal zat. 

Rinpuia rawn chhuk thla mêk chuan, "Ni lo ve, ka nu, in chhuak reng reng lo vang. In hrang aṭanga min hmangaih ber niawm taka min rawn chimbuai rengtute ka khamna hi a rei tawh. Tu emaw rilru chhe lutuk aṭanga rawn inṭham chho a nih hi..in chhuak tur a ni lo" a rawn ti ta hmiah mai. 

Pu Hruaia paw'n, "Chhuah lam kha chu a thâwi pawn sawi tawh suh, he inah hian thuneitu ka nih hi..in nufain ka chhungkua atan ka lalut tawh che u a, tuman sawi buai theihna an nei lo ve" a lo ti nghet ve charh bawk. Pi Sangi chu a âng zui ngam lo nge ân dan tur a hre tawh lo zawk ni, a chhuak tau ta nghawng nghawng a. Beidawn hmel zeta dawhkan chum pahin Pu Hruaia chuan, "Hengte hi engtik aṭanga rawn thleng nge maw an nih le..buaina tipunluntu hi pawnlam mi an ni âwm hauh si lo" a ti hrâwk. 

Rinpuia'n, "A bul ber chu ka nî..englai mahin ka nî hi ka ngaina ngai lo rêng a ni. " A lo ti hmiah. A sawi dik maithei a ni. Tatai te nufa tan chhuah luih tum chi ni hek lo, tui lo zet chuan an awm ve ta phawt a. Tatai thinrim erawh chutimaia reh chi a ni lo. 

Christophera a call ta nge nge a. Vawi 5 zet a call hnuah a rawn pick up hram. 

"Sangha ka man daih a, i ṭha em?" A rawn tizangkhai vah. 

"Tha lo, engmah a ṭha lo" a ti chhum hmak. 

"Chuan?" A rawn ti duh lek a! A ngai awlsam lutuk chu a ngei lek lek zawk. 

"Khawngaih takin ka nun aṭang hian kalbo rawh. Khawngaihin" Tatai chuan a ti ta mawlh mawlh mai. 

"Kan sawi vek tawh kha" a rawn ti hmuk a. 

"Chhungkaw dangten min haw nufa vek tawh. I nuin ka fuihpawrhah a ngai che a, Ziri nu a rawn kal a, ka nu thlengin an chham a, ka lawm tawh bik lo. " Tatai chuan thawk pawh la hman lo lêkin a ti bawrh bawrh. A ap ve tawh bawk a ni. Chrisa rum nghut chu a hre zui nghal, "Nu Sangi thleng thlengin a lo pun a ni maw? A va ṭul lo tak. Ngawi rawh, chawhnu lamah ka rawn chhuak chho lawk ang.." a rawn ti a. Chrisa hi chu Chrisa nge nge a ni, chiâina tura ngaihah pawh a dam dup reng thei a. Tatai tan pawh han thinrim khum chiam hi a nuam ṭhin lo. 

"Mahse, inhnaih tawh lovang" a ti hrâm a. 

"Ka thu thu kha chu, i theih ang angin hlat min tum la, i tum zat ai khan ka chak zawk zel ang" a rawn ti hmiah. Awiii! He pa tumruh dan em em hi, Tatai tan pawh a beidawnthlak ngawt ta ve ang. An sawi ang deuhin a englai hi nge maw a duh le? Ani aia ṭha a hmu ṭeuh awm si a. A hmangaih em ni ang? 

Rinpuia pawn tukṭhuan ei kham veleh Chrisa a be ve nghal. Amah zawkin Farm-ah a zu pan dawn. Chrisa nena sawi dun tur dang an nei tlat a tin ni. 

Tatai class kal tur chu Arami'n, "Tata, an sawi hi chu engah mah ngai miah suh, i kal ngaiin kal par par rawh. An zuam anga i awm a nih vaih chuan tho leh tur i awm tawh lovang, i lamah ka ṭang tlat a nia" tiin a lo fuih ve a, Tatai tan chakna hnâr ṭha tak a niawm e. Tunah tak hi chuan lamṭang a mamawh ve tlat. Pi Sangi te, Pi Dingi te thiltihtheihzia a hai bik si lo. Lehlamah a pa lahin a û te chu hlauh leh zah chin a nei lo thei dawn lo bawk. Mood ṭha vak lo nen class pawh chu a kal a, Sawma a rawn kal lo, he pa hi tunlai chu a rui ve deuh reng mai a. Jeje nen lah tihvak ngaihna an hre si lo. La kawm chian deuh a ngai a ni. Mafeli scooty kha a la khalh ta chuang lo va, tun dinhmunah phei chuan khalh chhuah chiah a ngai lo, Ziri te, Julie te hoin engtin tin emaw an ṭawng khum leh duh dawn tih a chiang ve tlat! An sawi ang tura awm loh hram chu buaina pumpelh nan a duh rih phawt a ni. 

Jeje a nghah laiin Chrisa'n a lo call a, hreh zetin a la ta tho. 

"Hei ka rawn chhuak chho a, Amanda hmuh lawk a ngai a, i rawn tel ve a ngai" a rawn ti a, a ṭawng danah a hmanhmawh hmel riau. 

"Engtin" a ti ringawt. 

"Ka rawn hruai mai dawn che em ni? Traffic hi a jam leh nasa sia, engloin ti mai ang, Miracle Restaurant-ah a chungah kan awm a, in college aṭangin a hnai tho bawk a, taxi rawn hmang lawk mai ta che" a rawn ti sawk sawk. Thu hmanhmawhthlak te a ni bawk a, Tatai pawh chuan hnial a tum bik lo.

A rin ai daihin Restaurant chu a thleng phei hma. Jeje bulah chhuanlam a siam ta ngawt kha a nia. A sawi nawi lem lo vang chu maw. A chungah chuan a pen chho pâwk pâwk a, Chrisa hrilh angin cabin lian vak lo chu a kik ta a. Chrisa'n a rawn hawnsak vat. A luh chuan a tum loh deuhin Rinpuia pawh a lo ṭhu ve ran mai. An inmelh zauh ringawt, inah pawh hian an inbe tam lo khawp a. 

Amanda chu felfai tak leh hahdam hmel zetin a lo ṭhu thân a, note bu hlai vak lo a inchhawp rân bawk. A ṭhut fel hnu chuan, "Aw..hun kan ngah lo bawk a, sawi ṭan mawp mawp mai ang aw. Tata, Mafeli chungchang i hriat theih zawng zawng, hmaih nei miah lova min hrilh theih chuan ka lawm viau ang" a ti dam ta thlap a. 

Tatai pawh chuan, Mafeli chungchang chhuikir pahin an chenho aṭanga thil danglam thlengte chu a sawi ve ta par par a, hmeichhiat hmeichhiatna lam hawia a chetdan pawh a sawi fai ta kêlh mai. Rinpuia meng phâwk leh zauh chu a hmu reng, mahse, tun hun hi a pawimawh êm avangin thurûk neih thiang loah a ngai, Mafeli tana thawkho vek an ni bawk a. A sawi zawh chuan, Rinpuia'n a hriat ang angte a sawi ve leh bawk. Amanda chuan a lo chhinchhiah zel bawk a. 

An sawi zawh vek hnuah Amanda chuan thlalak pakhat hi rawn entirin, "Engtik hun nge i la hria em?" A ti a. Chu thlalak chu Rinpuia kawl tak, uniform a hâkna kha a ni. Tatai chuan a melh vang vang a, "Heite chu class xii ka nih lai ami daih a nih hi" a ti sap. Kum 3 a liam tawh. 

Chu thlalak Amandain a neih ngawt dan chu a hre lo hle mai, an sawi lem bawk si lo. A bô viau. 

Amanda chuan, "Engpawhnise, kan dawhtheih a ngai dawn viau mai a. Kamtam lo tlâng bawk ila, Chrisa te pawh in chhungkaw vua leh vâng chanchin engkim ka hre duh dawn a, He thil hi in chhungkaw thil aṭanga lo irh chhuak leh chumi kal zel chu niin a lang tlat! Pawn lam mi an inrawlhna ka hmu thiam rih lo. Alice hi a theih chuan a rang lama he lama zin tura in chah chhoh ka duh viau mai, hmun hrang ami daih veh hi chu hmaih kan ngah ṭhin" a ti ta dap dap a. An pawm tlang hle a niang, Rinpuia'n, " Chrisa ngei hian sawm se a rawn chho rang viau ang" tiin a nui deuh sâng a. Chrisa pawh a nui hawk ringawt. 

Amanda chhuah hnu lawkah Rinpuia chuan, "Hun ka pe ang che u, sawi dun turte in nei ang. Kalna tur ka nei tho bawk a" tiin a chhuahsan ve ta daih. Tatai pawh a lâi chhe tawh êm êm bik lo. 

"I thin a rim viau em ni?" Dam thlup hian Chrisa'n a ti a.

"Rim e a" a ti ve sak. 

"Ka nu pawh ka be tawh e. An rawn tibuai tawh rih lo vang che u. Ka nu hian kan lakah thup a nei zawk niin ka hria" a ti ṭha ve mai a. 

"Chuvang chuan inhnaih tawh lo mai ang" a lo ti leh hmak. 

A rawn pawt dâwrh a, "Inhlat thu sawi teivet suh, ka ru daih mai tur che nia..i graduate veleh ka nei ang che" a ti hniam raih. Tatai lo ṭang ve bawk si chu an inchai deuh titih, mipa tha zawng hneh rual ni hek lo le, Chrisa chuan a âwmah a pawm bet a, a lungphu ri a ngaihthlaktir ta a. Tatai pawh a thaw dêp dêp mai. An boruak teh ṭeuh hi ani tawnhriat la nei lo tan chuan a harsa lam chu a ni e. A kuai dâk a, a fâwp ta. A biang leh a nghawng bâwr vel a rawn chul kual dan dan pah a, a hnutê erawh a khawih lo chiah chiah zel thung. Vawi leh khatah a inla hrang ta vat a, "Ni lo, tunah chuan ka phal rih lo" a ti thâm ṭuâk. Tatai chuan a lo melh nghek.."Rinawm la a tawk rih mai. Engkim hi a ṭha vek ṭêp tawh aw" a ti leh daih. 

Hawn dawnah an inṭhen ta phak a, Chrisa'n thlah hawn tum teh mah se; a duh lo bur. A nu leh pa hmuh laia awmdun kha a duh tawh mawlh lo a ni. 

In a thlen chuan a lehkha tur Arami'n a lo kawhhmuh vat, a'n en nak chuan an veng ṭhenawm ten an veng aiawha Volleyball khel tura an ngenna a lo nia. Hmm, he lam hi a ti lo rei bawk a, ti ve leh ṭan tawh mah se a pawi lo. A nu leh pate a râwn chuan ṭha an lo tihpui viau mai. Tun tournament khelh tur hi a puitham viau dawn a nih hmel. Zan lamah vek a ni bawk a, a class kal a tibuai dawn chuang lo bawk nen, a tel ve theih thu chu a va hrilh ta a. A rilru pawh tlem chuan a hlim ve ta deuh e.

A tuk tlai aṭangin class banah Volleyball chu an practice chho ta bawk a, a lo fit vak tawh bîk lo a niang, zanah phei chuan a rawl ngei mai. Tuilum chi-alin a inbual a, a zia phah pawn a hre meuh lo. Mut erawh a mutui kher mai. A tuk chawlh a ni bawk a, a taksa rawl leh kham ṭhêm ṭhum nen a tho hma peih lo. Tukṭhuan an kil laiin Pi Dari a rawn lut leh tawh. Eng tak rawn sawi leh ang maw..Pu Hruaia chu a kham hmasa ber a, "Awii! Puia pa, mi sawi hi in lo hre ve tawh em aw ka ti mai mai, Mafeli thlâ niawm tak an hmuh thu vel hi" a ti ta chiah a. An hre lo a ni lo, an haider lui ve bawk a ni. 

"Hre ve deuh e, keini lah hian kan hmu thei ve reng reng si lo va" Pu Hruaia chuan a ti a. 

"Ni e, hmu ula ka tihpui khawp mai che u. A hmutute lah hian khawhar hmel deuha a awm an hmu an ti zel bawk sia,. A zia lo êm mai, a boral danah te khan felhlel a awm deuh em mawni aw ka tia" a ti leh ta barh barh a. Ṭawngkam lah hi a thiam thei si. 

Rinpuia'n thawh pahin, "Felhlel a awm chuan kan buaipui mai ang,. Tin, ka nau thlâ hmu anga an insawi hi ka awih ve lo ve" a lo ti ram hmuk. Pi Dari a mil lo sa ve bawk nen, bakah Rinpuia ṭawngkam hi a nêm lo ve ṭhin hrim hrim. Pi Dari pawh chu a dang ta deuh nge, an pa chhungte a rêl ta zuah zuah a. Tu vak man an ûksak si lo va, nuam a ti lo nge a chhuak leh vat. 

"Rawn kal fô lose ka duh. Kamtam ropui si" Arami'n a ti hlak hlak. 

Pu Hruaia paw'n, "Ni e, a bulah ṭawng insumkar deuh r'u aw. A thu thlen dan a dikhlel tawh ṭhin si a, a hlauhawm thei tlat" a lo ti ve vat. 

Tatai pawh a insu leh a, a insûk zawhah a room tukverh darthlalang a nawt bawk. A han inthawh zal chuan a taksa rawl pawh a hrechang vak tawh lo. Chawlh te a lo ni bawk a, practice pawh an sawn hma hlek. A vanneih asiamin an ṭhenawm hnai lawkah mipa team-a khel tur an rawn sawm ve a awm hlauh a, an kal rual thei ta. Ani hi Bza an ti mai a, Biakzuala ni awm tak a ni. Sang ve deuh, hmulphurh chhe ve angreng tak a ni a, a nelawm huah huah hle thung. Rinpuia pawh kha an lo sawm naa, a lo khelh ṭhanna zawkah a khel dawn ta kha a nia. Bza nen a hmun an va thlen chuan an lo la awm mang lo. Tatai chuan a tu vak mah hriat a la nei lo, bakah veng dang aṭangin amah chiah a lo ni bawk nen, a hrang leh deuh tawh. A ninawm a ti, mi hrang anga awm reng bik hi. Mahse, a tiṭhang tawh a, a hmachhawn ve leh thei mai ang. 

An spiker Neihpuii chu a pian a nalh bakah a hmel pawh a ṭha viau, an teamah chuan a hmuh tlak ber awm e. Tin, a ṭang thei bawk a, Tatai nen an inman riau bawk. Tatai pawh a che ṭha thawkhat e, mipa ho khelh chhung an lo chawl ve rih a, an jersey tur an thlang nak nak bawk. Tatai chuan 13 bawk a chang leh ta. Chrisa a hrechhuak leh thut ṭhin, a rawn be tak naa a chhan let ngai loh avangin a reh ve leh rih. An volleyball khelh tur thu pawh engmah a hrilh lo. A wrist band a siam ṭhat mawlh mawlh laiin, "In ṭha maw?" A aw hriat ṭhan êm êm chuan a rawn ti a. A hawi chhuak rang kher mai. Chrisa chu sport dress nena inthuamin a lo ding khawng lah, nula ho an phun nghal sar sar bawk. 

"I rawn lang thei chu a va lawmawm tak, kan sawmna i hnar taah kan lo ngai hman tawh asin" an coach Pu Thara chuan a lo ti var a. A nui vur vur bawk. 

"Englai pawha ka venhim tur a tel ve miau alawm" a lo tizangkhai vah thung. Tatai a lo lâi leh ringawt tawh. Chrisa chu court chhungah a han lut ve ta a, a fit zak zak ngei mai. A hming lo chher sa a ni tawh bawk a, a thu pawh an ngaichâng vei phian. 

Neihpuii chuan, "A va han chhe lo tak, hausa bawk si, ka duh hluah hluah" a ti sar sar a. Tatai chu engtin emaw a awm. Thîk tih dawna ni thei chiah si lo ang khan. 

Nunui pawh chuan, "Kei pawh ka duh e, ka stalk nasa thei tawp. Mahse, a lerh vak lo a niang. Bialnu a neih âwm ka hre ngai lo, Sangsangi kha a hnuhnungber niin ka hria" a lo ti ve zung zung. Tatai ai mahin an lo hrechiang a nih âwm chu a. 

"Ka bem dawn" Neihpuii chuan uang zetin a lo ti a. An nui hak hak hlawm. An khel zo va, Chrisa chu an lam panin a rawn phei a. Tatai erawh khel turin a lo ding nghal awt, a rawn bia ang tih a hlau zawk. Mak an ti leh dawn nasa si. 

"Min lo hawnsan leh nul nul ang e. Ka thlah dawn che" a hlauh ang chiahin a rawn ti leh ta hmiah mai. Hmeichheho chuan Tatai an melh ṭhup ringawt. 

An khel leh zuai a, Chrisa awm ve vang nge practice na mai mai pawh nise, a ṭang viau. A chet pawh a che ṭha reng bawk a. Banah chuan, "U Bz, min lo nghak rawh, ka inthlak lawk ang" tiin Bza a va au lâng lâng a. 

A inthlak tur chu a rawn dang leh chaih, "Mipa dangin an sîk che pawh phal lotu ka ni tih i hriat kha. Nguri" a ti hrâwk. 

"Kal sawn teh, min en duh a nia" Tatai'n a tih chuan, "A ho! Inthlak a ngai lo, kal ang" tiin a kai nghal zat a, a bike dahna lam a panpui dâwr dâwr. Neihpuii te ho chuan engtin tak sawi ang maw..nuam lo a tithei. 

"I over lutuk, hmela, ti nge tihian i awm ziah a?" A ti tân tân. Bike a ni bawk sia, a ṭawng ring vak duh bawk si lo. 

"Ka bialnu i ni tlat alawm" a lo ti fel êt. Tatai a ner vak ringawt. In an thleng a, "Ka rawn pêng lo vang. Chaw i ei tlem a niang, i cher tlat, ei tam ang che. Chuan zanah a call chhang tawh bawk la" a ti leh nghut nghut. 

"I uitê ka ni lo" Tatai'n a ti tuar. 

"Ka uitê ni tur chuan ka phal teuh lo che. Hmeichhia ka duat awmchhun ni la a tawk. Ka kal, bye" tih leh tlan a rual. Ke per tân tânin, "Hmela, i va han luhlul tak..a ninawm" Tatai chuan a ti hlak hlak. A rawn hre pha tawh dêr si lo. 

Zanriah ei khamah muangmarin a inbual a, a inthlak laiin Arami'n a rawn ko. "Tluanga a lo lêng" a rawn ti. 

"He pa lah hi" tia phun sapin phur fahran lo chuan in hnuai lam a pan a. Tluanga lah chu a lo ṭawng tui leh nasa tawh. Pu Hruaia lah hian a bâwl deuh roh ṭhin em mawni, a be sâwm chiam zel, hengte hi a phur phah a niang. A nute an rooma an kal hnuah Tatai bulah a rawn ṭhu chat , a lo melh no lo viau thung. 

"Tata, ka sawi tam tawh, phone-ah pawh. I rilru hi sawi chian a hun tawh viau lo maw?" A ti sur sur a. 

Hah hmel deuha thawk la hawkin, "Tluanga, ka rilru chu i hre chiang viau tawh emaw ka tia. Bialpa ka nei, beisei chi ka ni lo alawm" a ti ta a. Hetia tih khawl khawl loh chuan a â roh sia, a ngampa tulh tulh dawn tlat! 

"Nâaa. Tu nge i bialpa chu?" A ti lehzel. Tatai phone a rawn ri ra si, Chrisa a ni. Tluanga awm lai chu ni lose a pickup lo maithei, Tluanga hnar nan a duh ve bawk si. A la ta a. 

"Khaw nge i awm?" A rawn ti thum chhak. 

"Living roomah" a ti ve mai a. 

"Tu nen" a va dilchhut e aw. 

"Tluanga a lo lêng a" pangngai takin a ti a. 

"Ani pui roh kha a â sia, khawi ngam suh. Hawntir rawh" a rawn ti leh tawp. 

"I a mi?" Tatai chuan a ti ringawt. 

"Okay, 5mins hnuah ka rawn call leh ang che. Haw tawh bawk se la" a rawn ti duam a. A dah zui nghal. 

Tluanga chu hnar a ni chiang ve bawk a, len nuam a ti ta bîk lo nge a zi ṭuah ṭuah a, "Ka va haw ang e, i mak hle mai, Tatai chu.." a ti zui ham ham. Chhan pawh a chhang tawh lo. 

A sawi ang ngeiin a rawn call leh ta a, "Ka nu chuan a rilru a thlak tur thu a sawi a, naktukah ka rawn haw ang" a rawn tih chuan, awih nge awih loh tur a hrethiam lo. Tupawh hi a ringhlel ṭhûm tawh. 

"Aw le, a ṭha lawm, bialnu tha deuh te i nei tawh ang a" a ti el kual ve ngei a. 

"Sawi pawh i harsat a nia, ka neih tak tak chuan i ṭap keuh keuh mai tur asin" inringtawk zet hian a rawn ti. 

"I va chhe tak" Tatai'n a ti nghek. Chrisa nui hawk hawk ri chu ngaihthlak nuam a ti. Ni e, zêp nâk emaw bul an ṭan chauh a, harsatna an tawk nghal nen, chulai karah a dinna sawn tum miah lo khawpa duha ngaihsaktu mipa chu ani pawn a ngaihlu ve hle tawh tih a lang. Pi Dingi rilru thlak dan tak chu a hrethiam lo naa a ṭha lam ni hram se a duh ve khawp mai. Amah pawh a inhrethiam vak tawh lo, ka ti ang, ka ti lo vang a tih tawhah hlen loh leh zuihral a nei ngai lo tihtheih a ni a, chung a luhlulna te chu Chrisa hian a rawn ṭhiahsak zel ni maiin a hria. Bansan a tum ve alawm, theihtawp pawh a chhuah, Chrisa thinlung zaidamna leh dawhtheihnain a tibuaiin a hneh leh zel si chu a nih hi. Hei hi inhmangaihte hringnun kailawn a ni ve fô rêng a nia. 

Chrisa nen an inbiak zawhah a mu nghal a ni deuh mai. Rinpuia erawh a lo la haw lo thung. A mu deuh chiah tihin a rawn haw nge ni an kawngkapui chu a ri khap mai. In chung panna kailawn chu a rawn zawh chho thlep thlep a, Tatai chuan a ngaithla reng, a nau vang hian Rinpuia pawh a rilru a chawl hman mawlh si lo. A hriat sual nge Mafeli pindan kawngkhar zawk chu a inhawng ri khep mai. A beng a chhi uluk zual..Pindanah chuan a tei vel a, bathroomah pawh lutin tui herh haw ri niawm tak a hre bawk. A beng chhe ri niin a hre si lo, sawi tawh ang khan Rinpuia room leh a room inkarah Mafeli room a awm avang hian thawm a hriat ve vak theih loh. Tuna a hriat erawh a chiang viau lawi si! Almira inhawng thawm te a hre zui zel a, a ngaih a ṭha thei ta ngang lo. Mahse, a hma zawnga hlau ngai eih si lo kha a hlau ta riau. Va fiah turin a tho ngam ta tlat lo. Hawi kual zak zak chungin Rinpuia number a hmet chhuak a, a call ta. 

"Hello, Tata" a rawn ti sup a. 

"Khaw nge i awm?" Zawitêin a ti sap. 

"Hei Zorina te inah ka la awm, ngati nge?" A rawn ti ta. 

"Eng..eng ni lo ve. " Tiin a dah nghal daih, a lungphû chu thlawk chhuak mai tur ang hian a awm. Thawm erawh a reh hmiah thung. Han insangphek viau mah se; zanin zet zawng a fiah ngam ta ngang lo va, a muhil ngam bawk si lo. Darkar chanve dâwn a men kar hnuah Rinpuia tak tak chu a rawn hawng ta a. Thaw huai tur a nih laiin a teuh lo, Rinpuia hawn hmaa lo haw kha tu nge ni ta ang? An sawi fô ṭhin Mafeli thlâ chu em ni ang? A hre lo, a hre lo takzet. Zing dar 2ah pawh a la men kar avangin a tihngaihna hre lo, hrehawm ti bawk si chu "Mai mai a " tia insehruhin a tho a, a va zung ta. 

A khuma a lêt lai mêkin a phone a ri ta. Tun ang hunah bawk maw?! Khur der derin a la kang a, number ringawt a ni. 

"Hello" a ti sap a. 

A ri nuai nuai, nui ri, ṭap ri, na tuar ri niawm takte a ni. 

"Hello, tu nge?" A ti leh tuar. 

"Tata..," hmeiche aw fiah fel tak a ni. 

"Aw..tu nge?" A ti leh vak. 

"Keimah" a ti a. A thi nghal daih. Call back a tum a, a tlang thei tawh hauh si lo. Heng thil zawng zawng hian a rilru hahdam chho ve mêk pawh a rawn chawk buai leh ta vek mai. 

Khuma mu zangthalin a inhum ruh a, "Ka hne tawh, ka hnê..Lalpa.." a ti ta sep sep a.