Tatai 10

TATA-I (10)

Ziaktu : Toni Râlte

Chrisa chuan hmun dangah a va be ta daih a. Eng thu tak nge an sawi an hre lo. Chrisa kalsawn hlan chuan Alice chuan, "I lo hriat ve atan, Chrisa nu hian huat namên lohin a hua che. Hnaih lo la a ṭha zawk" a ti sak sak a. 

Tatai'n, "Ka hnaih hleinem, aman alawm min hnaih. I lo na hle a nih dawn kha. Nangmah vang hrim hrimin Chrisa hi ka ngaizawng ang" a ti ve ta hmiah mai le. Alice mitmeng chu a tûr ngun mai. A thinrim takzet tih a biang taih hlar danah pawh a lang. 

"I nasa reuh hle mai a" a ti phawt a, Tatai ṭawng hmain, "I ngam phawt chuan ngaizawng rawh. I hre mai ang " a ti leh. Tatai chu a nghal thiam ve bawk a, a nui hawk hawk. Chu chuan Alice a tithinrim zual. 

"Min nuihsawh vel elo? Hmeichhe zakthei lo tak chu i ni e. Inla patil, hurherh bawk si, mipa râwp huam huam..ka ten che. " A ti bawrh bawrh mai. 

"A ni ngawt mai" Tatai'n a la tizui. Alice'n chhan ngaihna a hre tawh lo lutuk chu keh tumin a va ban a, a kut a lo chelhsak vat. A mitah tak melhin, "Kutthlak chu ti ve duh suh, min hneh lovang. Ka dim dawn hauh si lo che a" a ti vawt raih. Tatai mitmeng tak leh ling hlar avang chuan Alice chu a huaisen zo ta lo nge ṭap mai tur hmel pu hian, "I la hre viau ang" tia rum zeta melhin a kalsan ta a. Tatai chuan a en zui vawng vawng mai. A rilru tê te chuan, "I va â tak. Unaute han ngaihzawn reng reng" a ti thung. Ani rilru let but mi a ni ve bawk nen, Alice vang hrim hrim paw'n Chrisa chu ngaihzawn hmiah a duh. Chrisa phone hmang zo pawh a rawn let leh tawh a, "Hawh, phei ang.." tiin a rawn en a. 

Tatai lah chuan beisei loh deuhin a zui ve mai bawk a. An pahnih chuan farm house lam an pan dun ta ral ral mai. Farm house kawta lo ṭhu te chuan an rawn en ṭhap lehnghal. Tatai pawh a lai lek lek alawm le. 

Tui an chen hlanin amahin a lo awm a. Tluanga'n a lo call sek lehnghal. He pa pui roh hi a zia dawn lo tlat! Na deuha chhan fawk a ngai. 

"Tui hi hlau suh, ka awm chuan i tla ngai lo vang" Chrisa aw a hriat rualin a hawilet vat. 

"Ka hlau lo ngawt thei lo" a ti ringawt. A bulah a rawn ṭhu ve a, a sam a huh hliam mai. Tatai chu a rawn ngheng ar ar a. "Kan inngaizawng tawh em?" A la ti zui! 

"Umm" a lo ti hmak. Chrisa nuih hi a za khawp a, a bianga rawn piai zauh pahin, "Alice runluih nan maw" a ti. Tatai chuan makti fê hian a lo melh ringawt, a rilru a hria em mawni tih tur a ni. 

"Ni lo" a ti vak ringawt. 

"A nih chuan ka fawp dawn che a nia" tih leh a lama kuah hnaih a rual a, a fawp ta. Tatai chuan chhanlet ngaihna a hre lo. 

"Ehe!" Tih ri avangin an inṭhen nghal phawk. Akimi hmela mak tihna chu a langsar kher mai. 

"Engtin nge ..nangni pahnih maw" a ti bah nuaih. 

Chrisa'n, "Hahdam rawh. Tatai nen hian bul kan ṭan chiah e. Ani hi ka duh a ni" a lo ti nghet charh. Tatai erawh chuan zep loh chuan nuam a ti chiah lo, Alice chuan hre mah se pawi a ti lo va, midangin an hriat kha nuam lo a ti. 

Akimi chuan, "Mahse, unau kan nih hi" a ti a. 

"Kan ni hleinem, ani chu hrin hran a ni. Thisenah inzawmna kan nei lo" Chrisa'n a lo ti leh hmiah. Amtea a rawn lut ve a, "In va muk hlawm em em.." a rawn ti bawrh bawrh. 

Chrisa lah chuan, "Tatai nen kan inngaizawng tih Akimi hian a hre ve chiah a" a la ti zui! Amtea chu a nui huk mawle..engkim a hresa tihna em ni ang? 

"Va hre har ve. Kan Akimi hi chu music hi a man ngai lo reng reng" tih pahin zial a ṭan a. Akimi lah chuan, "In lo hre vek tawh a maw! Ti nge min hrilh ve loh!" A ti hap. 

"Hrilh ngai lovin i hriat tawh reng chu" Amtea'n a lo ti bawk. Tatai rilru erawh a buai leh deuh tlat, Amtea ten chutia an lo hre lâwk vek chu inchawi vel kha a hrechhuak lo thei lo. Alice khan thudik a lo sawi a ni maithei asin. Alice laka a thinrimna avangin Chrisa game-ah a tla lut tihna a ni thei ang em?  

Chrisa'n, "Hawh, ka sazupui te chaw va pe ang" tiin a rawn kai a. A tho ve mai bawk. Rilru buai ru em em chungin a zui ve ta zel chu a nia! Nêp te pawh a inti lek lek . Dil piah lawkah sazupui te chu an lo awm a, an va duhawm hlawm tak. An thianghlim reuh si. Chrisa chuan chaw a pe diat diat a. 

"Hnathawk an awm si lo va, tihian i zu pe ziah em ni?" Tatai chuan a ti a. 

"Hnathawk maw ? 3 an awm alawm, vawiin chu chawlh ka pe a" a lo ti ve mai a. Chaw a pek zawh chuan "Lo kal teh, hmun nuam deuhah ka kalpui ang che" a ti leh ta. A zui lo thei si lo. An kal hla telh telh a, thingkung upat hmel deuh deuh an hmu zeuh zeuh bawk. A tawpa tawpah tlema hmun sang ve deuh, phul hmun hring dup an thleng ta a. Thingkung sang tak takin a hual vel a, a mawi reuh bawk si. Tatai pawh chawp leh chilhin a hahdam nghal. Chulai hmunah chuan an ṭhu dun ta a. 

"Mafeli'n min rawn tlawh tak asin" Chrisa chuan a ti sup. Tatai a meng phâwk nasa.

"A thih hnuah maw?" A ti nghek.

"Umm..zan 2 min lo tlawh tawh. Mahse, ka be ṭawng thei ngai lo. Azêli rawih mai te ka duh rum rum tawh" Chrisa chuan hahdam hmel fê hian a ti a. 

"Tu nge Azêli" Tatai'n a lo ti. 

"Thlarau hmu thei kha mawle..Mafeli hian sawi duh a nei a ni, a thih danah khan fel lo a awm chiang alawm..min hahdamtir thei lo. Nang ka venhim che a ngai bawk nen" tiin Tatai chu a rawn melh a. Tatai a lai deuh naa Chrisa mitmeng thûk zet avang chuan engtin emaw a awm ve. 

"Chris" a ti ringawt. 

"I hlau em ni? Hlau suh. I bulah chauh engkim ka sawi ngam" a ti hrâwk. 

"Hlau lo, mahse, tuin nge that ang?" A ti sap a. 

"Ka hre lo" a ti bung nghut. 

"Amanda chuan a chhui chhuak thei ang" tiin a hnem ve a. 

"Ka beisei" a lo ti leh nghut. Thudang sawi tawh lovin Tatai chu a kuah a, a fâwp vawng vawng mai. Tatai pawn a thiam ang tawkin a chhanglet ve bawk. Duata fawhna aiin Chrisa fawh chu a thlum zwkin a hria. An infawh chuan lai zetin lehlam a hawi a, a khi vur vur ringawt. 

"Kal tawh ang. Mak min ti ang" a ti lawi rât a. 

"Umm nia, thil ei pawh a hun tawh ang" a ti a. An kal ta a. A tu vak mahin an lo ngaihven lo va, Tatai a lawm viau. Khua a lo tlai lam ve ta bawk a. Chaw pawh an ei ta a. Alice chu Chrisa bulah a tâp leh chawt mai. Tatai chuan a enliam thei mai. A haw vat dawn tho a. Hawn lamah pawh Amtea te nen an haw rual leh. In a thlen chuan a chau ve deuh, tuiluim a inbual a, a vawiin hman dan a ngaihtuah neuh neuh mai. Chrisa nen bul an ṭan ta chu a nia; engtin zel nge an awm dawn a hrethiam lo naa, buaina tawh a hlau angreng. 

Zanah pawh a mu hma, Chrisa nen an inbia a, ani chu a dawr velah ziah fel tur a nei a lo nia. An imangṭha ta vat. Alice te thawm pawh a hre lo, Chrisa te ina riah an tum kha a nia, an riak ta a ni maithei. An thawm a reh êm mai. 

Jeje nen an inbia a, Duata nupui ruk thu a rawn sawi! Tatai nuih a za zawk. A ṭhiannu ngei kha a la ni zui a. Thil hi a lo thup bo tak tak theih loh a nih hi. A tuar hran miah lo naa, Duata lemchan thiamzia a ngaihtuah chuan a zak zawk. Chrisa hian a lo bum ve reng ang em a hre lo. Alice te pawh an haw ve ta hram e. An chhungkaw bîla an han awm takah chuan a rehin a khawharthlak viau mai. 

Ruati te paw'n bungrua an rawn la dawn ta. An rawn thawk rip angreng khawp mai a, Ruati nu lah chu thinrim inpeihsa at hian a awm bawk si. Pi Zuali bakah Pu Lawma nupui te'n an lo dawngsawng a. Pu Hruaia erawh a ṭawng ve mang lo. Rinpuia lah chuan, "Lak hmaih te innei ang e..en chiang ula" a lo ti ve leh nghut ṭhin. Ruati te run tawk a tling nasa mai. A tawpa tawpah insûm zo ta ngang lo chu, "I fa ka pai mêk a, tiang khawp hian min chachhuah thei a nia. I mak ve thlawt" a ti ta tâwn tâwn a. Rinpuia chuan, "Thla 3 êm pawh kan ina i awm hmain in dan i rawt nghal a nia. Chuta kârah ka pa laka ka chanpual la turin min nawr bawk a. Tu mipa hi nge lawm se i tih?" A ti ve ta fak fak a. 

Ruati nuin, "Mipain a chhungte kalsanin a nupui a vuan ang"tih a nih kha..i lo pa lo êm mai" a lo ti ve sak sak. Pu Lawma nupui insûm zo tawh lo chuan, "Khanglang che u hian, in duh dan dana kan fapa hi in hruai kual theih a ni lo aw. Bungrua la vat ula, haw vang vang rawh u" a ti ta hmiah hmiah mai. Tih tak êmah chuan Pu Hruaia te vua leh vâng hi khawsa thei ve tak tak an ni bawk a, han hlauha han tlawm dûk hi an zia a ni vak bik lo. Mi an va chaldelh hmasa ngai lo thung. Hetiang hi mihring nunzia a nihna chen pawh a awm ve a, miin zahpah lo taka min ṭawngkhuma min diriam fô chuan , tupawh hian kan ze chhungrila kawlhna, huaisenna hi a rawn chawk tho ve mai ṭhin. 

Ruati te lam chuan tihtheih nei tawh hek lo, Rinpuia lah chuan a hawi lo nasa tawh mai si a, bungrua an la fel thei ta. Mafeli thihna chungchangah khan khati tak khan ṭawngkam cheh lo se, heti êm êm hian an thinlung pawh a khauh bik kher lo maithei a ni. Ṭawng tam lutuk hi zawnga pawi ngawt mai. 

Chrisa pawh zan 3 vel riak turin Lungleiah a phei a. Tatai hnenah a chin zawng zawng a hrilh ve vek zel a, hetia a lan dan mai chuan a ngaihpawimawh hmel khawp mai. Tatai pawn lo rinhlelh ngawt zel a duh bik lo. Nitin class a la kal a, thu thar em em an hre rih lo bawk. Mahse, tlai khat chu Chrisa nu Pi Dingliani'n a ko ta tlat mai. Lawmkima te dawrah a lo nghak a. Zâm lo tura infuih mawlh mawlh chungin a va lut ta. Pi Dingi chuan a lo melh ran a, a hmelhmaiah a thinrim nge lungawi hriat theih a ni lo. Tatai chu a hmaah tak a ṭhu ta a. Tuisik an rawn dah chu a in nghal khawlh khawlh. 

"I ṭha em?" Pi Dingi chuan a ti sap a. Ani hi nu lian leh hmelṭha, ngo sen duah, a aw erawh ngaihnobei vak lo a ni. Dadina hian a chhun mah zawk awm e. 

"Ka ṭha e..eng nge min hmuh duh chhan ni ta?" Pangngai thei ang berin a ti a. 

A ṭhut dan a han siamrem tê te a, a kut pahnih suihkawpin, "Ka fapa chungchang a ni. I hrethiam em?" A ti zawi raih. 

A lo rin dan sa a ni bawk a, Tatai chuan mak a ti lem lo. 

"Umm, sawi la" a ti zangkhai vah. Amah leh amah a infuih ru mawlh mawlh mai. Dawhkan hnuaia a kut pahnihte chu an awm hle hle thei bik lo. Chrisa nu a hmachhawn miau si a! 

"Ani hi bansan la ka duh a ni" a ti nghal thâwr. A tih dan teh tâwng chu Tatai chuan mak a ti ve deuh, a thluaithlum bawk si lo. 

"Maw?! Engvangin maw?" A inrin hmain a ti a. 

"A chhan a awm a ngai em ni? Ka fapa tan ka duh lo che a ni mai. Chu aia chianga hrilhfiah i duh loh chuan, bansan ang che" Pi Dingi aw chu a chang ta fak fak khawp mai. 

"Chrisa hian min bansan ta lo se" Tatai aw chu a ri chang chang a ni mai e. 

"Ani chu ka thunun thei ang. Nangin i hlat miau chuan; a rawn umzui lo tawp ang che..mipa a ni tlat" a fapa chhuan hmel zet hian Pi Dingi chuan a ti a, ngeiawm zetin a nui sâwng bawk. A bag a la a, "Ka chhuahsan tawh ang che. Ka sawi kha hrereng la, zanin aṭangin zawm i lo tum dawn nia" a ti leh hram. Tatai chu 10 mins vel zet amahin a ṭhu rân mai. A rilru a buai lo va, a inngaihtuah chiam hek lo. Pi Dingi rilru kha Alice aṭangin a lo hre thawi tawh a, a nuin a warning tawh bawk. Chuvang chuan khati taka inhnarna chiang fek fawk kha chu paidam mai mai a tum lul lo mai. Chrisa chu hlat ngei a tum, a nu kha a confi bawk a, a fapa chu a thunun thei tak tak ang e maw chu le! An en ang chu. 

In a thlen chuan Akimi leh Ziri te an lo awm ve a, Mafeli sulhnu an lo chingfel a lo nia. Ani pawh chuan a va pui ve nghal. Mafeli thawmhnaw ṭhenkhat chu a cousin hmeichhe ho ten an insem dawn a ni. A bookshelf an han dap chuan Diary chhah ṭha ve tawk tak a lo awm ran a. Tatai chuan kawl theih a duh hle, mahse, an inlaichinna a vangin engmah a sawi ve ngam si lo. Diary a ni tih an hre lo nge an dah sawn ta daih a. Tatai chuan an dahna chu a lo chhinchhiah rân mai. Mafeli laptop chu Rinpuia'n, "Tata, nangin chang rawh" a ti a. Mahse, a ranga rangin Ziri'n, "Ngai lo, thil pawimah mi hrangin an hriat ve loh tur a tam ang. Keiman ka kawl dawn" a lo ti hmak. Tatai a zakin a hrilhhai hle. Rinpuia chuan, "In ṭawngkam fawk fawk zel hi aw. Tatai hi ka pa nupui fanu a ni a, chhungkaw zing ami a ni tawh. Khatiang ṭawng kha kha hmang tawh ngai suh u" a lo ti ta hmiah a. Engmah an sawi zawm ngam ta lo. 

Zanriah an ei laiin an ṭhenawm nu a rawn lut a, "In hmelchhiat lai a ni maw? Pawi lo, ka sawi tho mai teh ang. Puia pa, sawi nuam chu a ni chiah lo va, mahse, min lo hrethiam mai u la, Mafeli khan a damlai khan ka pawisa 15000 min hmansak a, laklawh thil lutuka min rawn dil a ni si a, ka lo pe ve mai bawk nen, hetia a han awm loh tak hnua han indil leh hi a nuam miah lo nain, a tam tham ve tho si a, zah pqwh dâwn lovin ka rawn kal tawp mai a ni" a ti ta dap dap a. 

Rinpuia leh a pa an inmelh rulh. 

"A ni maw? A va pawimawh êm aw. Inthlahrun a ngai hleinem. Lo ṭhu rih lawk rawh aw" Pu Hruaia chuan a lo ti vat a. 

Pi Dari chu a titi nasa mai a. Ani hi mize mak deuh mai a ni. Ṭhenawm te mai ni lo, veng chhung chanchin hi a hre thei khawp mai a, mi sâwn pai, mi tlan dun,. Engkim mai hi a lo hre zung zung zel. Mak tak a ni. Tin, a lenglâm nasa bawk, inah hian a tawm thei lo a ni ber mai. Fanu pahnih leh fapa pakhat a nei a, an pa hi PHE -ah hian a thawk ve a, chu chu an ei bêl ber a ni ti ila a fanu û zawk nuthlawi hian eng sumdawnna emaw a buaipui ve a. Khawsak harsa êm êm an ni lo nain an khawsak erawh a sang thei bik lo. A fanute lah hi a nu siar a nu siar an ni a, mi chotuah an thiamin, thu veivir an ching em em bawk. Hetiang mite hi veng chhunga mi hnawksak ve tak zawng an ni. Pa ber lahin a ngam lo nasa bawk si,.Rinpuia te nupa karah pawh Ruati fuihpawrhtu lang lo lam aṭanga Pu Hruaia te chhungkaw er em em an ni. Mafei nundante kha thup mawisak a hnêka puangzar duh an ni bawk. Chuvang ni tak ang maw Pu Hruaia te nen pawh inṭhenawm hnai fû e ti lo chuan an inlenpawh meuh lo. 

Chaw eikhamah Pi Zuali chuan pawisa chu a pe ta a, Mafeli hmakhua ngai leh a thihnaa pawiti ber angin a ṭawng zat zat reuh a. A zia an hriat tawh avangin a thusawi tam zawk chu an ngai thutak duh meuh lo. Pawisa ber a dawng ta bawk a, a chhuahsan leh ta nal nal. 

Rinpuia'n, "Mafeli thihna a hmang ṭangkai tih hriat reng, ka awih hlawl lo, ani pawisa ber kher kha ka nau khan a puksak lul lo vang" a ti tûn tûn a. 

Pu Hruaia'n, "Kei pawh ka ring vak lo, Mafeli'n tu pawisa mah a puk ka hre ngai lo tlat, mahse, remchanga an lo hman duh phawt a hnu, sawi zui tawh suh u" tiin a khap dai hram hram. 

Tluanga a rawn lut leh ta hlawl mai. Tatai a ner sak. Mood chhiat lai laia..Pu Hruaia chuan a lo be sâwm vak lehnghal a, he pa hi a hman si, mipa hman lutuk bialnu te tana hun nei reng hi chu pasal tlak pawh an ni meuh dawn êm mawni. Tluanga chu a titi suam suam a, Pu Hruaia te nupa chu Mafeli thih hnu lawka boral, an Kohhran chairman nupui an râl dawn avangin an kal ve a. Rinpuia pawh a inchei hliau hliau a, a chhuak ve daih. Ani hi bialnu te hi a lo nei em mawni dawn ni. Arami erawh a roomah a tawm thung. Arami hi nula senior lam lek lek a ni tawh naa, mipa hi a ngaihsak vak tlat lo, ngaihzawng a neih sawi tur pawh a la awm lo. Tluanga chuan a rawn ṭhut hnaih sauh sauh a, Tatai mitmei pawh veng chuang lo chuan a titi chiam mai. 

"Mafeli thla i hmu ve tawh em?" A ti leh lûng lûng. 

"Hmu lo" a lo ti chhum hmak. 

"Kei tak chuan ka la hmu ve lo, mahse, hmu an awm nual tawh asin. Thlanmual chhaka awm te phei khu chuan an sawi an sawi asin. " A ti sur sur a. 

"Dâwt bak a ni lo vang. Kei pawn ka la hmu ve lo" Tatai chuan a ti tlat! Chrisa'n a hmuh thu kha chu a hrechhuak tho nain, Tluanga bulah erawh sawi chiam chiah a ngai lo. A ngei ve deuh tho bawk si. 

"Kei chu a thih danah hian dik lo a awm a nih ka ring tlat" a tih leh chuan, "A ninawm. I sawi peih" a ti hlar a. Tluanga pawh a hrilhhai hmel viau. 

"Thingpui min lum la, ka haw ang" a la ti zui! Tatai a tho nalh a, a va lumsak ta nge nge. A in zawhah muangchangin a tho ṭual ṭual a, "Ka va haw ang e. Ka rawn bia ang che" a ti ham ham. Tatai a ngawi hmak tawh. Kawngka bul thleng erawh a thlah ve hram kha. 

Mu turin a inbuatsaih chho ṭan a. A inphihfai lai chuan Mafeli room lama thawm ri bak bak thawm a rawn awm a. A phu ve zawk thei. Mahse, a lu thing nar narin khum lam a pan a, rizai a sin dawn lai takin a rawn ri leh tawh. Engahmah ngaih loh a tum viau naa, va enfiah chu ṭhain a hria a, a tho leh vut. Mafeli room hawn a tum chuan a sak tlat. A'n nem deuh ṭhin a, chhunglam aṭanga kalh niawm takin a sak ṭung bawk si. A sawi nawk nawk a, a tawpa tawpah a inhawng ta hram. A lo thim rup mai a, kawngka bulah switch a awm a, a ban nghal zat. Pindan chu a êng lutuk a, a mit a vai deuh chum chum mai. Eng thil mah a va hmu lo va, engkim erawh a inrem fel thlap mai. Chhunah khan an chingfel nasa bawk a. A hawi kual ruai ruai a, hlauhna engmah a nei lo chu amah paw'n mak a inti! Thawm a rawn ti leh bak, a phu chiang kher mai. Mafeli khum zâwna tukverh aṭanga lo ri chhuak niin a hria. A va pan ta vat a, tukverh chu a lo inkalh nghet lo chu niin, thli thawin a lo ti ri ṭhin a lo nia. A khar ṭha vat vat. Hei hi a nia thil hi kan fiah ngam ṭhin lo va, hriatchian meuh chuan engmah a lo ni leh ngai tak tak si lo. Tatai pawh ngaihṭha takin a room lamah a lêt leh ta a. A phone a'n en chuan Chrisa msg bakah miscall a lo awm nual. Tluanga a lo len lai khan a charge daih hrim hrim a, tin, Chrisa chu biak a tum lo hrim hrim bawk. Block ngawt erawh tlawm thlak a ti ve deuh si. A msg pakhatah chuan a rawn thinrim hmel viau, "Eng thil nge maw i hriat reuh le? Min biak duh miah loh a?" Tih a ni. A chhang duh chuang lo, Pi Dingi mitmeng leh thusawi duhdan aṭang khan hnaih ai chuan hlat a thlang fan e. A phone dahin a inngaihtuah a,. Mahni inkhawngaihna neih hi a duh ngai loh thil chu a ni. Mahse, zanin erawh chhun lama a thil tawn zawng zawng nen, amah ang lo deuhin inkhawngaihna a nei ve ta tlat mai. 

A pa pawh tu nge tih hre miah lovin hei chen a ṭhanglian ta a, falak nia ngaitute sêlna avangin hnual loh hram a tum ṭhin. Zirnaah Pathian zarah a tluang hlauh zawk a, sports lam a lo ti ve thei phian bawk nen. Patil anga ngaih niin ṭhenkhatin an nuihzat a, ṭhenkhatin an lo ngaizawng titih bawk. Bialpa a nei a, a bialpa hmasa ber lahin a lo kawp a, tunah nupui a la ru zui! Chrisa mipa danglam tak a tawng leh a, hmalam hun thlir thiam chiah lo mah se; reilotê chhung kha chu a lo hlimpui ve hman kha a nia. Tunah Chrisa nu ngeiin ngenna pawh ni loin Chrisa hlat turin thu a pe leh ta chu a nia! A chang chuan mite hian an duhna lamah an kai kual mai mai nia ngaih châng a nei..inngaihtuah lungpuama "Ka depress..ka chuti khati" tih a tum miah lo nachungin, Depression neia mahni inkhung chawt ṭhinte dinhmun hi a pawh pha ve ruai ruai tlat. A muhil siar siar tawh ang tihin Mafeli room-a dawhkan nge chair zawk tlu ri ṭhuai avang chuan a meng nghal kâwk. Rinpuia lah hi a leng rei thei zêk a. In chungah an pahnih chauhin an mu bawk si! Thawm a ngaichang leh vang vang a, engmah thawm vâng a hriat leh tak loah chuan a inlet thawk a, a chhing leh ta vang vang. 

A pindan chu chhumin a lo tuam phui mup mai a, thawk harsa a ti kher mai. A han che dawn ṭhin, a chesawn thei dêr bawk si lo. A pindan kawngka chu a ri rak a, a rawn inhawng ta, a va melh ṭâwk tâwk a. Mafeli ngei mai kha chhuat pawh rap lo niawm takin a rawn tawlh phei ta delh delh mai. Hlauhna mak takin a rawn tuam chiai a, au a tum a, a thei bawk si lo. Mafeli lah chu a nui sen sen lehnghal. A khum mawngah tak chuan a ding ta a. A rawn melh ta kur mai. Maimizialin a awm tih hriain a ke zungpui chu a theihtawpin tihchêt a tum a, a hah ngang mai. A tawpa tawpah a rum chhuak thei ta hram. A ṭhu chhuak nghal a, thlanin a lo bual huh hnêp nia! Khua a lum over miah lo kha a nia. Tui a in a, a tha khur der der avang chuan intichak turin khum aṭang chuan a ke a hlang thla a, "Khum hnuaiah awm ta se" tihna rilru a put avangin a ranga rangin a ke chu a hlang chho lehnghal. Mahse, chutia ṭhut char char chu dik dawna a hriat loh avangin intihuaisen luiin a chhuk a, bathroom lam a pan ta nghal bawk. 

Hetih lai mêk hian Rinpuia erawh a khum bul dawhkan bawhin a lo muhil ve mêk thung. Dawhkanah chuan thlalak chi hrang hrang an let phung a, Mafeli tel vena zel a ni bawk. Duhawma nena an lak dun te, hnamdang niawm tak te nena an lak dunna pawh a awm. Thlalak pakhatah erawh a ni Dingliani leh Alice te nen inkai ṭhâmin an ding kual a, Alice phei chu a khi sâng mai. Chumi thlalak bul chiahah chuan Tatai, school uniform nena a ding lai a awm bawk. Higher secondary a kal lai vel a ni maithei. Engti tiha chu thlalak chu nei thei nge a nih tak ang? Tatai thla laksak hun hi Pi Zuali leh Pu Hruaia te inneih hma thil a ni bawk si. Rinpuia chuan khawi aṭanga a neih nge ni ang? Eng dang a ni lo, Vawiina Mafeli room an chinfel hma ni 2 liamtaah khan amah chauhin a farnu pindan chu a lo chinglet vek tawh. A laptop pawh password a dah avangin a ṭhianpa a hawntir a, folder hrang hrangah a lut vek. Khang thlalak ho kha folder pakhat, "Secret" tiha a lo dah khawm an ni. A print out ta vek nghe nghe. Thlalak chauh ni lo, Mafeli diary pawh kha Tatai khan han keu ngat se la zawng, pawhthlakna hnuhmâ a awm phung ang. Rinpuia hian a farnu thihna hi dik tawk lova hriain amah chauhin a lo chhui ve tihna em ni ang le?! Hunin hril teh se. 

A tuka Tatai harh chu a ni lûk mai a, mut a kham mawlh lo. Nizan a harh hnu khan thinthiin a muhil tawh bawk lo nen, Class kal loh mai a duh ta a. Jeje a bia a, a nu a be ve leh. In hnuaia a zu chhuk chuan a nu leh Arami te chu an lo titi nasa mai. Pi Dingi thil sawi te kha a nu hi a hrilh ve duh ang em? Hrilh rih loh mai a duh, ṭul hlei lovah a nu rilru a tihah hrep ang tih a hlau ve bawk nen. Tukṭhuan an ei khamah Arami a pui ve leh zuai zuai a, a insu zui ta bawk. A insûk zawh chuan tihtur êm êm a nei ta lo bawk nen, Mafeli rooma luh rûka a diary kha chhiar a tum ta a ni. Rinpuia a awm lo bawk a, in chungah hian an rawn chho zen lo bawk nen, Mafeli roomah lutin a diary chu a va la sawk sawk a, a pindanah a luhpui ta a ni. Mahse , a han keu chuan a beisei loh lam daih a lo nia! Diary chu pawhthlakna hnuhma a awm phung mai! Pawhthlak loh thu inziak ho lah a thihna nena inkaihhnawih hlek lo thil an ni si! A beidawng viau. Chutihrualin tuin nge pawtthla ang tihah a buai ta chiah a, hriat ngaihna lah chu a vâng nasa mai si. Beidawng zetin a va dah lêt leh ta ngawt a. Engmah neih a nei lo, rilru han hmana han sen vena tur hmanrua lah a nei bawk si lo. A ning rilru hle. Chrisa chu a la reh rih a, a beidawng ve ta nge pawh a hre lo. A be duh miau si lo va. 

Pi Dingi pawn a rawn be bik hek lo. Chawhnu lam puan pho a han seng a chhuk leh chuan a beisei loh lutuk Chrisa leh Lawmkima te an lo ṭhu rûn mai. A nu te nen an lo inkawm a lo nia. A puan pho seng ho a dah fel lai chuan, "Tizo la, chhuak lawk ang" Chrisa'n a la ti zui! Teh thut zel hian a. 

"Ka hman lo" a ti hlar tak naa, a nghak chhuak leh dawn tho tih a hre ve kur. A nu a awm bawk si, "Han intifai rawh, a bak kha chu ka rawn khawih zawm ang" a nu chuan a lo ti ve bawk si. A che buai vek, a rawn haw dawn tih a hre reng reng lo va, ngaihṭha takin a lo awm ve kha a ni si a. 

"Zanriah ka ei chhuahpui dawn aw. Lo nghak lo mai r'u, ka rawn thlah leh ang" Chrisa awm dam ruih phênah chuan lungawi lohna eng emaw awm tlat hian a hria. Pi Zuali tan lo hnial vak kha thil nuam ni hek lo, Tatai pawh intifai turin a chho ta a. A inbual laite chuan a insawh a insawh mai, "A duh duha mi tihkawi hi a tum a" ti ten a phun chhuak thul. 

A chang leh, "Engmah inṭhenna thu ka la sawi bik lo ve bawk a" a ti bawk. Phur fahran lo chuan a insiam ve zel tho va. Inchei vak pawh a tum lo, a peih lo. A zu chhuk leh chuan Lawmkima a lo awm tawh lo. Dar 4 a la ri lo deuh ang tihin in an chhuahsan ta a. Chrisa chuan a farm house lam a pan pui leh ta. Mahse, engmah a sawi duh bik lo. Sawiin awmzia a nei dawn lo bawk a. An tlan muang lem lo bawk a, an thleng hma angreng. Tatai chuan a zui dat dat mai. An in zui lut a, "Lo ṭhu la, keiman ka bâwl ang. Restaurant tih vel ai chuan ka eisiam a tui zawk" Chrisa chuan a ti bung nghut a. 

Motor aṭangin vawk sa bakah thlai eng emaw a va khai chhuak bawk. Tatai lai laklawh si chu chokaah chuan a hawi a hawi ringawt. 

"Mak i va ti âwm ve, hetah hian kan ei ang" a ti leh hmiah. Vawksa chu a va sil fai rawk rawk a, anṭam then sa vek nen a chhum nghal sawk sawk. 

"Eng nge ka lo tih ve dawn?" Tatai chuan a ti ta ringawt a. 

"Engmah. Lo ṭhu tawp rawh" a ti si. 

"Ka duh bîk lo, khawi ka lo thian ang" tiin anhnah Chrisa phelh mêk chu a va laksak a, "Chutia chet i duh viau chuan tomato kha lo zai rawh" a rawn ti a. A la chhuak a, a va sil nghal. 

"Sangha hring chhum hân hi ka ei châkna a rei tawh lutuk" tiin nghalim ṭhah mai chu Chrisa chuan sawhthing leh anthur rêp nen a chhuangkai lehnghal. Anhnah chu a thian zui ta bawk a. A chetdan zawng zawng chu amah a ang lo tawp, intipa ve satliah ngawt chu a lo ni bik lo a nih dawn hi. Tatai chuan an pahnih inkar sawi chhuah hmasa chu a hreh ve deuh bawk si, Chrisa a ngaichâng ta ngawt a. Ani lahin thudang hlir a la sawi zui. 

"Kan hotel thlenna a fuh lo reuh lutuk a, mut ka hmu ṭha lo" tih vel mai mai a ni. Ani leh ni lo angin a ṭawng duh phian bawk a. Chawhmeh ho an chhuan kim meuh chuan dar 6 a pel vah tawh. Chrisa lah a hmanhmawh lo nasa mai si. Chawhmeh vil chhung chu an ṭhu khawmuang ve ta rih a. Boruak pawh a rit chho ṭan leh tawh. 

"Ka nu thusawi te avangin ngaihdam ka dil che. I lo ngaih thutak loh hram ka beisei bawk" Chrisa chuan thutak zetin a ti ta a. 

Tatai'n, "I hria maw?" A ti hâ. 

"Lawmkima'n in inhmuh thu a rawn sawi a, rin dan ka nei thiam nghal. Min bansan turin thu a pe ngei ang che. A dik em?" Inringtawk zet hian a ti a. 

"A dik e. Nia, bansan che pawh ka tum" Tatai pawh chuan a ti ta hmiah. Chrisa a thaw hawk a, rawn melhin, "Chutin min bansan ngawt thei lo" a ti sup. 

"Buaina a kal zel loh nan leh chhungkua kan innghirngho hmain inṭhen zawk ang. " Tatai'n a lo ti ve bawk. Thinlung sak ve ve, luhlul dun ve ve chu an inhneh thei ngût ang e mawle. 

"Kan en ang chu. Ta-i, i rin aiin ka duh ang che. " Chrisa aw chu a ring hauh lo, mahse, a ril tlat. 

"I nu thinrim ai chuan ka ṭhen ang che. Ka intiam vek tawh" Tatai'n a ti khauh ve fung si. 

"Engpawhnise, zanriah ei phawt ang. Ka ril a ṭâm" Chrisa'n a ti ta daih. Chaw ei chu an siam dun ta rak rak a. Ril a ṭam ve tawh bawk a, Tatai paw'n a rin aiin a ei tam daih. An ei chhung zawng an inbe mang lo a ni e. An eikham Tatai'n a tihfel lai chuan Zial zua hahdam hmel zeta ṭhu chungin Chrisa chuan, "Kan inneih hunah chuan in hi zauh ila, awm thla daih ang aw" a rawn ti pek a. 

Tatai a ner nghek ringawt. 

"Hmun fianrial hi ka ngaina. Ka nu leh Dadina an awmdun thei alawm" a la ti zel a. 

"I ninawm" Tatai'n a lo ti hlak. Chrisa pawh a nui hawk hawk mai. An intifel zo va, dar 8 a pel tawh. Tatai chuan, "Haw tawh ila, ka nuten min ngaihtuah ang" a ti sep. 

"Ka bulah chuan tuman an ngaihtuah lo vang che" a lo ti bur. 

"Heta awm reng hi awmzia a awm lo, miin an ngai kawi ang" Tatai chuan a ti ve ṭâng ṭâng. 

"Thutlukna kan la siam zo lo" Chrisa'n a tih chuan, "Kei chu ka sawi tawh ang kha a ni mai. Ka ṭhen che." Rang fêin Tatai'n a lo ti. 

"I thei lo, kan thei lo" Chrisa chuan a rawn hnaih nghal rûak.

"Tin, mipa emaw hmeichhe dang vang ni lo va, chhungte avanga inṭhen hi ka mizia a ni lo. Ka nu ka hmachawn ngam chuan engah nge i hlauh bîk? Ka awm e ka tih hian, a chang chang chauhin i tan ka awm dawn tihna a ni lo. I tan ka awm reng dawn tihna a ni. Hria la, mipa dangin an khawih ai che chuan ka tina duh hial zawk ang che" Chrisa chuan a ti ta siah siah mai. Tatai pawn sawi tur reng a hre lo, mipa rilru pu deuh reuh a nihna laiah Chrisa mipatzia chu a lo ngaihsan rûk ṭhin mizia kha a ni miau a. Hmeichhe dang lakah a bula a awm ang hian awm ve se nâ a ti ve viau tho vang. 

Chrisa phone rîk rual deuhthawin a phone a rawn ri ve nghal. A nu a lo ni. 

"Aw nu" a ti khur dat. 

"Khaw nge in awm? I nî a rawn sa viau a nia. Tata, ka rilru a hah lutuk. " A nu hi a rilru a haha a buai tak tak chuan a ṭap âw ṭiau zel reng a. 

"Hei kan lo haw dawn mêk e" a ti dam thlap thung. 

Chutihrual chiahin Chrisa'n, "I rilru i thlak lo a nih chuan, hetah ka bulah a awm reng tawh ang. " A lo ti ve thung. 

An phone hmang zo chu inmelh vang vangin, Christophera chuan zawitê leh thupe aw deuh si hian, "Kawng dang kan nei lo. " A ti zawi raih a. 

(Zan khat dan a nih pawhin min hrethiam hram teh u. Ka che buai kal tluang a nih hi..next story aṭang chuan hmana Toni kha ka rawn ni leh zar zar ang 🔥