Tatai 1

TATA-I (1)

Ziaktu : Toni Râlte

A in tharah chuan a hawi kual hrek hrek a. In ropui lutuk tia sawi tur chu ni lo mah se; in pangngai tak erawh a ni. An chenna in ve tehlam ai kha chuan a zia lutuk mah mah. 

"Hei i pindan tur aw. Han en kual teh" titu chu a melh zauh a. Ngawi rengin a pindan tharah chuan a lut ta a. An in luaha a nu nen an pindan inṭawm tiat zet kha a niawm e. A thawl dawn rek rek khawp mai. Bungrua han dah mawi khawp a nei ve bawk si lo. A nu chuan, "A nuam em?" Tiin a rawn en a. 

Bu nghatin, "Aw" a ti zawi sap. 

A nute kal hnuah a pindan tharah chuan insingsa nghal a. A thawmhnaw tlemtê chu remfelin khum te pawh chu bed sheet a thlak a. Hotela thleng angah a inngai deuh. Hei hi a duhdan a ni em tih erawh a hrethiam lo. Hrethiam tur pawn a la nau ve bawk a. A puitling lo chi a lo ni bawk nen. A insingsak zawhah a inbual a, a khawvel lo danglam ta chu engtia dawnsawn tur nge tih a ngaihtuah buai peih lo. A ho mai mai, a awm awma awm ve tawp chu a duhdan a ni. 

A inthlak zawha in hnuaia a chhuk chu nula hmai fai ving veng hian, "I ril a ṭam em ?" A rawn ti vat a. A lu a thing nar nar. Filtera tui chu a in khawlh khawlh a, a la ṭi ru hle tih a hawi hrek hrek danah chuan a lang reng. Tihtur êm êm a hriat loh avangin thlang lama bathlar zau deuh mai indawh duaiah chuan chhuak thlain pangpar mawi deuh deuh chu a thlir kual a. 

"Eheu! Kan Tatai chuan pangpar te i lo ngaina ve tawh a ni maw?" Titu lam chu rang zetin a hawi a. A nu pasal a ni. A lo nui sûng bawk. 

"Ka ngaina lo chuang hleinem" a ti nghat a. A la nêl tak tak thei lo hi a inthiam lo lek lek thin. 

"Lo lut lawk ta che, i unaute an rawn thleng tawh a" a rawn tih chuan a hnual ru hle. A chhan sawi fak tur erawh a hre lo. A lut ve mai bawk a. Living room zau deuhah chuan amah ang rual hmeichhe tleirâwl hmeltha leh nu zet mai bakah amah aia û hlek tur mipa inchei duhdah zet a lo ding ve bawk. An lo melh rân avangin a zâm lek lek. 

"Hei hi Mafeli a nia, chuan hei hi Rinpuia..chuan in unaunu thar hi Tatai a nih hi aw. Inchibai r'u le" a pahrawn chuan a ti zung zung a. An inchibai ve mai bawk, Mafeli chu a nui sâng a. Rinpuia erawh chuan melh pawh a melh tehchiam lo. 

Mafeli nen kum khat chhuak an ni a, Rinpuia hi an ni aiin kum 3-in a upa tih a hnuah a hre leh..Mafeli chuan 1st sem BA a zir mêk a, Rinpuia erawh MA (English) a zir thung. 

An zanriah hmasaber chu a puar leh puar loh pawh a hre mang lo. A zah vang pawh a ni chiah lo, chawhmeh an ngah angreng sia, hmeh ber tur a hre mang lo. A nu chuan a fahrawnte chu a be bawrh bawrh a, nuhrawn nih a tlin dawn hlein a hria. Nu sual tak kha a ni lo ve bawk a, a lawmpui thei ngei tur a ni. Ni e, amah vangin kha chen rethei bakberhin a lo awm tawh a, tuna hlimna leh nawmsakna a hmu hi thinlung taka lawmpui thei tur a ni tlat..

Chaw eikhamah a pindanah lut leh nghalin a phone a khal nghal..biak tur erawh a nei hran lo. A phone chu hmet thimin a nu nena an khawvel a hriat theih tirh ata chu chhui kirin a chhing ta vâng vâng a.

Nikhua a hriat theih tirh ata a nu nen chauh an khawsa a nih kha. Midang tumah an chenpui ve lo chu mak a ti ṭhin. Hun a lo kal deuh a, thil awmzia a hre chho ve ta zel. Ni e, amah chu hmanlai pi leh pute aṭanga an lo hmuhsita an lo hnualsuat tawh Falak a lo nia! Falak chu hmeichhiain nau a paia a pa puh tur ber a hriat loh hi a ni. Pawngsual vang emaw hmeichhe buanchaklo tak an nih vang emawa falak hi lo awm a ni deuh mai. Ani erawh a case a dang. Pa a nei a, a nu ngei pawn a pa chu a hai hauh lo, mahse, a nu mi ina mi awmpuia awm, vanlaia tla an tih ang tur ni bawk kha a pa chuan chhungpuinu atan awzawng a lo duh lo va. Nawmchen nan mai mai a lo kawp a lo ni. A nu chu Bunghmun khua niin kum 16 a nih kumah a nu leh pate chu a kum zâwn deuhthawin an boral a ni. Nuṭa pakhat a nei ve a, ani nen chuan a pa nu a pite inah an khawsa chho a. 

An khawsak a harsat piah lamah a patea te chhungkuain an mil loh êm vangin a û nen chuan an in a nu leh pate lu nghahna hmunah kir lehin a û chuan zu a zuar ta ngawt mai a ni. A pi leh pute boral hnuah an in chu a patea ten an rawn chuhpui zui a! Mahse, document felfai tak a pa khan a lo nei ve hlauh mai a. An chhuhsak thei ta bîk lo. Mahse, a û zu zuar chuan zu in ching chho vein nupui ṭawmkailo zet a nei ta bawk a. Chu a nupui lah chuan fa pahnih sual zet zet a rawn chhawm bawk si! Tatai nu Pi Zuali tan chuan hremhmun patê a ni ta ngawt mai. A û lahin a thlavang hauh chu sawi loh a ruih sual changin a hnawtchhuak zauh zauh thin bawk si. A nupui lah nu nasa leh paurau, ân chhe bawk si a ni a, lehkha pawh a zir thei ta lo. A tawi zawngin an ṭhenawmte hian Aizawl lam mi mikhual an nei a, chumite chuan Zuali chu mi ina awm a duh chuan an hmuhsak theih tur thu an sawi ta a. Mi ina awma hlawh neih kha a tan a thlanawm zawk a ni mahna,. A û te chhungkaw bula inthlahrung leh an mitmei veng reng renga awm ai chuan tiin chumite chu a zui ta tawp a. A û phei chuan, "I thatchhiat leh hurherh chhuanlam a nih kha, khawpuia nawmchen i duh a, rawn kir tawh suh" tiin a thlah hial! Zu in a ei chhe nasa bawk a, rei han dam thei tur hmel pawh a pu lo. Chuta karah a û chhuahsan lo thei lo va a awmna chhan a rilru natna êm êm ni bawk chu an in leh lo chu a û chuan a nupui hmingin a dah hmak tawh a ni. Amah Zuali pawh râwn hmasa eih lovin, chuti em ema mihring danglam nasa thei chu Zuali pawn a la hre ngai lo. Hmeichhe thiltihtheihzia leh mipa tlaw laklawh nêpzia a hriatchian phah viau. 

Aizawlah chuan amah hruaitu leh sawmtu deuh bîk Pu Sawma û Pu Khawtina te inah a awm ta a. An hausa viau mai. A awm tirh chuan hah pawh a hah..a rei a, kum khat zet a awm ve takah chuan nuam pawh a ti chho vein a pi leh pute bakah an fate nen pawh an inpawh ta viau. Misual chhungkua an ni lo naa hrawn nuam lutuk erawh an ni lem lo. A tuar dai ve a nih ber chu. Kum 2 leh a chanve a awm hnuah a pi nuṭa, pathlawi hi an inah chuan a rawn awm ve lailawk a. A nupui nen an inṭhen hlim lunglen lai a niawm e. A hming pawh Thansanga. Thansanga chuan a ngaizawng ta tlat a! Zuali'n a theihtawpa a hnar chung pawn bansan duh hek lo, hmeichhia leh uitê tih takah Zuali pawn a lo duh chho ve ta viau a. In khata awm reng ta na nâ na chu an inveng seng ta lo nge an chesual ta a. Zuali pawh an vawi thum chetsualnaah chuan a ruak ta lo..Thansanga a hrilh chuan titla turin a hrilh nghal hmiah! An innei turah a lo ngai nghet hmiah kha a nia, a bum chiang ve khawp mai. Tihtlak a duh tak si loah chuan a pi leh Thansanga te ṭangkawp chuan a tihtlak loh chuan an ina a awm theih loh tur thu sawiin an vau ta a..mahse, tihtlak tumna a nei chuang lo. "Engkim huamin ka pai tawh a. Ka tihlum thei lo" tih chu a dinna a ni. 

"I fa paah khan min puh hlek suh ang che. I duh leh midang hming i ziak dawn nia. Ka fa a tan ka duh lo ve.." tia Thansanga'n a thlah ni khan a awmna in pawh a chhuahsan ta a. Pawisa tlem azawng a lo inkhawl ve te hmangin Aizawl veng pakhat mawngah in Rs. 800 man luahin a fa pai mêk chu a vahvaihpui ta a ni. 

Tatai a lo piang a. Zuali hi Sailo hnam niin, a nu leh pa a ngaih êm êm te hming chawiin Ngurtluangpuii tiin a fanu hming a phuah a. Mahse, a fanu chu falak a ni, a pain a duh lo miau a..pa a nei lo tihna a ni mai. A fanu a pai laia a retheihna kalkawng hi rapthlak tak a ni. A in luahna bakah thenawm khawveng ten an pui nasa bawk. Mizo nih nawmna a ni mai ang chu..he lai a zinkawng hi chu nakinah thawnthu tawi daih turin kan la chhawp chhuak dawn nia. 

Ngurtluangpuii chu an ṭhenawmte fanu hian a lawm êm êm mai a, amah ṭawng fiah lo a lo ni bawk nen, "Tluangtluang" tia an koh chu lam thiam hek lo. Tâta tiin a ko ṭhin a, a rei a, tupawn Tata tiin an ko ta a nih hi..He amah duat em emtu Chhanhimi hi Tatai kum 10 a nihin vanduaithlak takin a thisen a cancer a! Thla 5 hnuah a boral zui ta mai a. Tatai pawh a ṭap nasa khawp mai. Chutiang chu a hringnun rawn inṭanna chu a ni. A nu chu chawhmeh kharchhawng ṭhin a ni a, a zawrh loh niin pickle te siamin a zuar kual ṭhin bawk. Chutiang chuan a fanu hi kum 19 a nih thlengin a chawm seilian ve ṭhak a ni. Tatai hian college kal ve tawhin BA (Pol. Sc) 3rd sem a zir mek a ni. Kum 2 kal ta khan tuna a pa ni ta, Pu Hruaia hian a nu chu a rawn hel ṭan a. Engdang a ni lo. Kum 5 liamtaah kha pu Hruaia te office canteenah a nu hi thawk vein chuta ṭanga inhre chho, ṭhian anga inkawm an ni a. Mahse, a rei ta telh telh a, pu Hruaia, nupui sûn tawh lungleng khawhar ve bawk si chuan Pi Zuali chu a ngaina chho ta tial tial a. Tihian tun dinhmun hi an thleng ta hial chu a nih hi. 

Pu Hruaia hi pa nelawm leh nui huah huah ṭhin, ṭawnghmang thiam tak a ni a. A hmel pawh a chhe lo. A hna bakah an chhungkaw thlah kalzel inrochun hausakna zâr a zo ti mai teh ang, a khawsa thei phian a. A nupui a sûn hnuah pawh amah iai lo nula no nalh tak tak leh nuthlawi tlawngawl tak tak pawh a hmu ve ṭûn..mahse, Pi Zuali hian a lung a len ta ber chu a nih hi..pi Zuali pawn "Tatai hi pahrawn ka hrawn tir lo vang" a lo ti tawh naa, a upa ve zel a, pa uap an mamawh nufa tawlh tawlh si, tin, a fanu zir leh zelna tur te a han ngaihtuah a, a la hautak zel dawn si..tin, pu Hruaia lah a lo ngaina ve em em tawh nen, an innupa hlen theih dawnte chuan tiin a fanu nena an dinhmun vangin neih a hnial ta lo mai a ni. Gold digger tia sawi ve theih mai a ni naa, a nih dan a ziktluak hauh lo. Tiang chuan nupaah insiamin pu Hruaia inah an nufain an lawi lut ta a nih hi..an boruak a ṭha zel êm ang chu maw..

Pu Hruaia'n a nu a rawn rim thin lai kha chuan amah zawk hi a lo lai ṭût zel. A nu hian mipa a ngaihsak ngai loh vangte pawh a niang. Mahse, a rei a, an innêl chho ve zel a , tunah chuan a nu pasal, a pa a lo ni. Pu Hruaia nupui hmasa hi internal bleeding vanga boral a ni a, Pu Hruaia pawh hian a tuar viau a niawm e. An chhungkua hi an hung angreng a. Pu Hruaia te unau hi paruk lai an ni, a naupang lam pahnihte erawh Shillongah an awm a. A dang palite chu Aizawla inbengbel nghet vek an ni. Pu Hruaia hi an unau zinga a upat dan indawtin a pathumna a ni bawk. 

"Tata, Bawihi" a nu aw a hriat rual chuan a meng kâwk a. A ṭhu chhuak nghal. A room kawngka chu a va hawng a. A nu chuan, "I pa unaute an lo lêng a, lo chhuk ve lawk ta che" a ti sap a. A inthlahrun hmel letling. Pi Zuali hian chhungkhat a neih tawh loh avangin a hrana palai tirh pawh awm lem lovin man leh mual an inhlan tawp a. Pi Zuali te in luahna Pu Zahlira'n a man chu a dawng ngawt mai a ni. Tin, inneih lawmna pawh awm hran lovin tihian an lut ve râwih bawk. Ṭul an ti lo tawn ve ve bawk a. A û lah kha a thi nge a dam pawh a hre tawh lo, dik tak chuan a luhlul laklawh a, a ngaihven duh bik lo ve bawk nen, tihian an reh dun tlawk tlawk tawp mai chu a nih hi. 

A nu zuiin in hnuaiah a chhukthla ve hnak hnak a. Tatai hi han sawi leh hram ila, tleirâwl tih dawn chuan a lian uaih tawh bawk si. A hmelhmaia a naupanna erawh a la langsar viau tho. Ria lam, sang thlerh thlawrh, a fuke engkim sei thlurh mai a ni a. 5'4 ft hi chu mizo nulaah chuan a hniam lam an ni thei lo hrim hrim. Tatai hming sawi rik apianga sawi tel ngai ve ziah pakhat chu 'patil' hi a niawm e. Mahse, patil a ni hauh si lo! Hman deuh tawha a nu zêm lohna hmang ṭangkaia model anga sawi ve theih mai Doteii , Drose-i nu ang deuh kha a ni ti ila a sawifiah theih ber awm e. A hmelṭha a, a vun a hi a paw phek reuh a, a sam hi a sei ngai miah lo nain kum 2 liamtaah khan a nu hian a zuah luihtir ve ta a, a dar a pel vah tawh. Mak deuhin a piantirh aṭangin a sam hi a buang lam lek lek a pâwl a, a dye paw'n a dum hlen thei ngai lo. A school luhnaa an zirtirtute pawn an hrethiam ve mai zel. Hmai tung lam, sin lam lek lek a ni a. Pi Zuali a hmelchhe lo bawk a, Tatai pawn a chhun viau. A hnar ngul a sang vah reuh a, a hmui erawh a chhah viau hran lo. A pan êm em lo bawk. A mitmeng hi a ti deuh riai mai a, thawkkhat lai phei kha chuan a rui emaw tiin an hrem ngawt tawh! A nu a sa ve viau. Mahse, zirtirtu te an pangngai êm a, ngaihdam an dil ta vat a, an inrem thei ta hram a nih kha. Mizote ang thoin a mitmu erawh a dum chiang viau, mit tlangkawm kan tih angin a nei nasa lo ve a, mahse, a mitmeng a lian thawkhat a, a mawi viau mai. A hnutê hi a nu a chhun a, a lian lo naa a kawh riau a, amah hian a duh lo thin. Junior bra a hrên rei phah viau tak asin. A dul thep zaih hi a ṭhianten an awt thin teh e, a mawngbawr erawh chuti faluaa lian a ni bik lo va, a pian nen a inrem ti mai teh ang. Sawi tawh angin a nu zêm loh avangin hmeichhe pahnih pawn an bem vel tawh. A lo hau zêk lehnghal a!

Elementary a kal lai khan nitin deuhthaw insualpui a nei ṭhin a, a nu pawh a mangan hman viau. A kawlh em em pawh a ni lo, mahse, kut thlawn a ba duh ngai lo hi a buaithlakna a ni. A insual zin tawh avangin insual lah chu a thiam roh zêk bawk si. High School a kal aṭangin insual pawh a bansan ve ta tial tial a, han inrîkrap deuh rap rap chang erawh a la nei zauh ṭhin. A nu hian siam a tum bawk a, a hrem pawh a hrem nasa..a pa te lam hi pawisak nei vak lo, tharum thawhna lam ngaina angreng tak an nih vangin an ze ṭha lo a chhawm ve a ni mahna le..a nute chu a tet lai pawha tumah sual eih lo kha a nia. Chutiang mizia leh nungchang a nei chungin zirna lamah erawh a rualpawl tawk a ni ve zel a; lehkha zir a thatchhe êm zawk a. Sports a tui a, volleyball leh footballah chuan loh theih loha a hming lam a ni ṭhin. A nu pawn a kalna tur a niang tiin a tuipui ve viau. Graduate phawt se a kalna tur lama kal tir pawh a tum rilru ve hle a ni. Hetiang mi hi kan Tatai chu a nih miau avangin ngaihzawng lamah chuan sawi tur chhetê pawh a la nei ve lo. Star a nei ngai lo va, mipa hi mipa an nih angin a en ngai lo nge a ṭhian kawm nghal hmiah hmiah zel. Chutihrualin mak deuh chu romantic movie erawh a en duh ve thei zêk! Pa viau e ti lo chuan sazu notê a hlau a, tui a hleuh thiam lo bawk! A bak chu thlabâr khawpa hlauh a nei meuh lo. 

A pa chhungte chu an lo ṭhu ṭhap mai a. An la kim lo mah mah zawk. Tatai tan erawh an tam mah mah a ni. An hmel hmuh erawh a nuamin an welcome hle tih a lang. A pa a tangin misual tak an nih kha a ring lo ve hrim hrim. Pu Hruaia te unau zinga upa ber chu Pu Thianghlima a ni a, Zarkawtah a nupui leh a fate pali nen an khawsa a. Chumi chhang chiah Pi Dingliani chuan pasal a sûn ve tawh a, Zarkawtah tho a fate pahnih nen an khawsa bawk. Officer a ni bawk a, hmeithai e ti lo chuan an neinung phian. Pu Hruaia chhang chiah Pu Lawma pawh Chanmari-ah a nupui leh fate pathum nen an khawsa a, chumi naute erawh sawi tawh ang khan Shillongah an awm thung a ni. 

A pa chuan an hming a sawi diat diat a, Pu Thianga nupui Pi Zamteii chu a nelawm zual bik hle. Pi Dingi erawh Tatai nêl theih chi a ni vak lo. A zahawm mah mah nge a inhmuamup zawk ni, a pawh har ngawtin amah pawn a ring. Mahse, nu sual chu a ni hran lo vang. Amah ang rual te pawh an awm ve tho a, a cousinte an ni tawh dawn a nih hmel. 

Pu Lawma nupui Pi Manui chuan, "Tatai chu a hming hi ka hre tawh tlat.Volleyball i khel ṭhin tiraw?" A lo ti vat a. Tatai a lawm ru viau. 

"Umm khel ve thin " a ti sap a. 

"I thiam ka ti lutuk..ka en ziah alawm" a ti hlut a. Chu chuan an boruak pawh a tizangkhai ta deuh. 

Kawngkapui chu a ri rak a, an hawi ṭhap. 

Nui hukin, "Ka tlai lo in ka hria..Mo thar lawmna party chu a va boring hmel ve" a rawn ti thum chhak. Tudang ni lovin Pi Dingliani fapa duat sual Christopher Zolianzuala ngei a ni.Tlangval sa nghet tlet tlawt, 6 ft a sang, inphut mawi tak, han en reng reng pawha Sunday School kaikim lawmman dawng khât ve tak tih hriat zet a ni a. A sam kir lek lek chu a chhipah a bâwk vah a, a khabe hmul vang chuan a kum aiin a lang upa bawk. Hmai tung lam, mitmeng lian kel kawl, mithmul dum leh buk angreng fâ a ni a. A mit veilam hnuai chiaha khuavang chhinchhiah awm kalh chuan a hmel chhinchhiah a tiawlsam angreng. Tshirt dum a taksa nena fit thlap leh blue jeans fit lutuk lo a ha a, jelly leather dum a rawn bun ṭâwt a! Mahse, a inhmeh phian bawk si. A nuin 'Bawihpui' tia a koh ngat Chris hi Rinpuia aiin kum 1 in a upa..a rawn luh dan thawveng vel lutuk chu Tatai'n a mil lo lek lek. Bakah a chapo hmel a ti. Tatai mihring huat ber chu mi chapo an ni. Chupa lah chuan an lo melh ṭhap chu ngaipawimawh lo zetin, "Ka tui a hal lutuk" tih leh choka lam pan a rual zui! 

A pa chuan, "Kha kha i ni Dingi fapa upa zawk Chrisa a nih kha, a nau Dadina erawh Shillongah a pute bulah lehkha zirin a awm a.." a lo ti ta vat a. A bu nghat ringawt. Mafeli bakah Pu Thianga leh Pu Lawma fate chuan thingpui an lum a, Tatai chuan han puih loh kha nuam ti hek lo, chokaah chuan a va phei ve ta a. 

Pu Thianga fanu naupangber Aziri chuan, "Lo ṭhu ve rawh. " A lo ti var. An fel hlawm viau. Mafeli phei chu a pa fa a ni bawk a, a ngaihsak ṭha viauin a hria. Thingpui an thlit laiin Chrisa leh Rinpuia te hi an rawn phei ve a. 

"Bro, i nau thar chu a va zahzum hmel ve.." tih pahin a rawn melh nghal chat a. 

"Tata, hei Chrisa aw..ka cousin zinga fel ber" Rinpuia'n a tih lai chuan midangho chu an lo nui huk. Chu chuan Chrisa mizia tur awm chu a rawn hril vek mai. 

"Aw le" Tatai chuan a ti ringawt a. Chrisa chu melh pawh a melh lem lo. A rawn luh tirh khan a lo en chîk tawh tho bawk a. 

"Nang hi ka hria che..Ngurtluangpuii i ni em?" Chrisa aw chu duh aiin a ring! 

"Ni e" a ti sap a. 

"Wow! Hmeichhe kawlh lutuk hi ka ngaina eih lo.." Chrisa'n a tih chuan makti fêin an lo en hâ a. 

A heh liak zauhin, "Ka sawi awmzia chu i kawlh viau tiraw? Rosy i hria ang chu..i bânrek i herh tliahsak kha.." Chrisa chuan a ti ta mai a! Tatai pawh a meng deuh kâwk. Midang lah chuan hriatchian châk hmel fê hian an lo thlir a. 

"Ka hriain ka hria" Tatai chuan a ti leh tawp. Chrisa chu a nui sâwng a, "Ka ex a nih kha" a la tizui! 

Tatai lah Chrisa ang bawka 2nd thought hmang hman lo a lo ni bawk nen, "A lerh lerh nen" a lo ti hlak. Midang chu an lo nui ta rah rah a. Tatai chuan a sawi dik thawkhat a ni ngei ang. 

"Nih lawk, ti nge Rosy kha tikhan i tih? " chrisa chuan thuneih hmel zet hian a ti leh a. 

Tatai chuan chiang zeta melhin, "Ka pawi a sawi alawm. " A ti hmak. A mitthlain Rosy nen an intihbuai lai kha a hmu nghal. Ni e, Volleyball tournament an neih laia thil thleng a nih nghe nghe kha. Rosy te lam khan an hneh lo tlawmla kha an bei ta chiam a, ṭawngkam feikibâr nen an rawn chhun deuh sek hlawm a nih kha. A tirah a ngai haw bîk lo. Mahse, Rosy khan, "Falak a nih saw..a awmzia chu a nu chu tlangsum an tih ang hi" tiin a nui har har a..Ṭawngkaa mi bei ve thiam lem lo Tatai chuan chet a la ta phat a, Rosy hmaah va dingin, "Ding rawh" a ti ṭhat. intivei zeta a rawn ding chu hnai taka melhin, "Ka nu chungchang kha han sawi leh teh " a ti dam thlap. Ani Rosy lah miin an thlir ṭhup tawh tlawm anga lan hreh bawk si chuan nuih sâwng pahin, "I nu chuan falak a pai a, tlangsum, a pa ber puh tur pawh hre lo a ni tihna a ni mai" a ti sak sak a. A ban vai lai chu Tatai'n lo mansakin a banrekah a hmer chat, "Sorry, a na dawn a nia" tih leh herh rik rawp a rual a..Rosy a rak ṭhawt..chu zawng chu, a zo der..Rosy te lamin eng thu hla mah an nei zui ngam hek lo. An dik lo miau a..

Thingpui an va sem chhung chuan Chrisa bawk chuan, "I nu i chhun vak lo" a ti leh sup a. Tiêl rawng a kai hran lo. 

A chhang lo. A pa chhungte chu an lengrei a ti..mut a châk.

A khawvel thar chu a hmang chho ve ta naw naw a, a la sarhu bawk a, harsatna a tawk lem lo. A pa a fel bakah a unaute chu an politein Mafeli nen phei chuan an inkawm thei phian. An titi erawh zep nâk emaw a inpersan thei angreng. Mafeli chu sawi tawh angin a nu zêm mai si, Lehkhabu chhiar a ngainain love story hian a lung a len takmeuh. Phone tel loin a awm thei meuh lo bawk. Tatai erawh phone hi mut hmunah hla emaw pasalṭha thawnthu ngaihthlak nan bak a hranpaa han khawih vak a nei ngai meuh lo. A facebook profile picture pawh kum 3 a hmanna a ni tawh. Whatsapp nise news group pakhatah awmin, ar sual huai group tih loh chu sports lam sawina group vek. A mizia la belchiang vak lo te hian an star thin si, an rawn bem ve leh chawt zel a. Ani lahin chhan dan hre hek lo, a ngawihsan tawp zel a, an be zui ngai meuh lo. A nu pawh a hlimin a hmel hmuh a nuam thei viau. A pa chu koh mai harsa a ti ṭhin, a fela a laka a ṭhat tehlul nen, "Pa" tih thu hi a hmang khât ve bawk êm a tin ni. College a kal nitin a, Mafeli hian scooty a nei a, an college inang lo mah se; Mafeli hian an college thleng a phur ve ṭhin. A pain kum thar lamah scooty leisak a tum ve kha..nei ve lo mah se, khalh erawh a hnehsawh viau. A ṭhianṭha ber Jeje a ni a, a hmeichhe ṭhian Zovi, Nunpuii leh Seni te bakah Peka te, Sawmtea te ho nen an inzui nitin ve ṭhin.  

Inter village volleyball tournament pawh huaihawt a ni chho ṭan a. Tatai pawn tel ve a tum ruh viau, an vengah kha chuan amah pawh insawi ngai lo khawpin an LC te'n an rawn hrilh var zel ṭhin a. Tunah an awmna an sawn ta si, tu vakmah hriat a la nei bawk si lo, a rilru a hah ve deuh. A pain an veng LC te lo bengvar vatin an veng aiawha khel ve turin an rawn ngen ta a. A pawm chiang khawp mai. Rinpuia pawh lamah a khel ve dawn nghe nghe. Chuvang chuan class ban veleh an pahnihin practice turin an kal nghal thin. An innel phah zualin an inkawmngeih phah ta viau. Rinpuia chu Chrisa anga sang a ni lo naa, sa ṭha ve pangngai tak, ṭuanrang zet leh fit zet mai a ni. A hmel pawh a ṭha, bialnu nghet a nei thung a, kum 4 lai an inzui tawh. Chrisa angin a ngeiawm ve lo va, a ṭawngkam engkim a polite in dawnsawn a nuam thei viau. Tatai pawn a ngainat chhan a ni. 

Tlai khat an practice haw , ina an lut chu Chrisa leh an cousin tho Pu Lawma fapa Amtea te an lo awm a. An luh rual rualin, "Zanin kha aw..in theihnghilh ka hlau a, ka book vek tawh nia" Amtea chuan a lo ti var a. Ani pawh hi hmel fai veng, nelawm zet a ni. 

Rinpuia chuan, "Ni dawn tak..Tata, i lo kal ve peih ang tiraw? Amtea birthday a nia, kan lawm dawn" a ti nghal a. 

Tatai phurna lam a ni lem lo nain, "A ṭha lawm" a ti ve mai a. Amtea a zah vang a ni pakhat. 

"Nia, i rawn tel ve ngei ngei a ngai aw. Chung vel chu kan rawn hrilh zuai che u" Amtea'n a ti mawlh mawlh a. Chrisa erawh chuan Tatai hlir a lo melh! A taksa engkim chu a melh chhuak vek, Tatai pawn a hai bik lo. A ngei viau, han khak kha a hreh deuh si. In chungah a chhohsan ta ngawt a. Zanriah ei kham aṭangin Mafeli a buai nghal, a thawmhnaw hak tur chungchangah. Tatai erawh chuan chhuanlam siam mai a rilruk deuh..mahse, Rinpuia leh Mafeli ten an rawn luh chilh a, an rawn sawm char char. An unau ho bak an ni dawn lo an tih avangin tel ve mai pawi a ti ta bik lo va. Mafeli te anga kawrfual chhing tiu teu hak erawh a tum lo bur. An tilui bik lo. A dress code ngai têin tshirt chungah kamiz hain jeans kekawr a ha leh tawp. A sam chu mar zetin a phiar ve thung. Rinpuia carin an kal a, An party na hmun chu a hla ṭêp. An va thlen chuan an lo ri laih laih tawh a, Amtea leh a bialnu Mamawii te pawh an nalh takzet. Tatai chu hetiang party tih vela a vawikhat kal vena a nih avangin a bo angreng. A cousin hmeichhe ho nen an awm khawm ve tak naa, a mal riauin a inhria. An titi duhzawng a danglam si, a changkang thei bawk si. Star an sawi reng bawk a! A ning deuh thin. A ṭhu ngawi ran a, theitui te chu a han in ve leh ngawt zel bawk. A hnu reivakloah Amtea'n thu tlem sawiin a piancham lawmpui tura lo kalte chungah lawmthu sawiin nuam taka hun hmang turin a chah bawk..Party an ṭan tak tak ta..Tatai tan chuan a ninawm chho ṭan ti mai ang. Lam an han thai chho va, Kalvari dance takngial pawha la lam ngai eih lo Tatai te ang tan chuan mi lam su nghawng nghawng chu a nuihzatthlak letling awm e. Awm pawh a awm rei peih ta lo rêng a. An awmna thlang lawka in tê fel ren rawnah chuan intiharh turin a chhuk thla ta a. A eng pap naa, a reh viau. Kawngka chu a inkalh lo bawk a, a lut ta a. A te fel ât a, a thianghlim hle bawk. A phone a rik avangin a lek chhuak vat a, tukverh inhawngsaa dah pahin a be ta a. A rawn betu chu tudang ni lovin Jeje-a a ni. 

"Khaw nge i awm?" A rawn tih chuan a sawi a. Jeje nui huk chu a hre nghal, "Chu! A changkang hlawm riau ang a..i in em?" A rawn ti nghal a. Jeje chuan zu chungchang a rawn sawi tih a hrethiam nghal mai. 

"No khat chu ka in a, eng ka ni lo" a ti ve mai a.

"A taste kha hre vek ta che.." a la rawn ti zui! 

"Je, kei chu zu hi in vak ka duh tawh lo,ka sawi tawh khaa" a ti hluai a.

"Hmm, nia nia ka hria. Mahse, kan bulah chuan i in ang. Nang ber i ruih loh chuan a famkim lo" a rawn tih chuan Tatai pawh a nui ringawt. Dik tak chuan tunlai khawvelah hmeichhia pawh zu han in thei ve mai hi an tam tawh a, mipa ṭhenkhat anga a nazawnga in erawh an ni bik lem lo. Chung zingah chuan Tatai pawh a tel ve chiang. College a kal tirh khan a in chho ve ṭan a. Thla khatah vawi 4 vel chu a in ve ṭhin ang. Chu pawh eng emaw programme a awm deuh chauhin. Tin, a in tam ngai lo bawk, a dose a hniam angreng a, no khat lekah pawh a ni deuh chhâ thei zel. A ṭhiante tihhmuh mah nise; a ṭhiante a mawhpuh duh ngai lo. A duhthlanna kha a tel ve miau a. A nu phei chuan a in ru ve ṭhin tih a hre lo hulhual. Hetia chhungkaw pangngai tak nia a hriat ina an awm tak hnuah chuan in tawh loh hmak a tum ve a ni. Mahse, zaninah kha chuan a zahzumna tibo ve hlek turin whisky chu a lem ve hrâm a nih kha. A rilru a tluan êm vang hian hetia a han lem ve zauh zauh pawh hi thil sual tiah a inngai lem lo. In ve dangte pawh a hmuh pangngai loh phah lem lo bawk. 

Jeje chuan a bialnu nena an buaina a rawn share leh nghek a, han hnem vel kha thiam lehpek hek lo, a ngaithla tawp ringawt. An dah hnuah tukverha dâk vauh vauh chung chuan thil ho deuh deuh a ngaihtuah a. Nia, a ho takzet..

Bialpa nei ve ta ila infawh hunah ka maimichhing ang nge ka meng ang tih vel mai mai a ni. Amah pawh a nui ṭhâ mai. 

"Ka ring rêngah" a hnunglam aṭanga rawn titu lam chu hawiin a inher vat. Chrisa chu mitmeng ti deuh riai hian a lo ding khawng luh a. A rawn melh rûn bawk. Tatai ṭawng hma chuan, "I lo chhiat em êm hran loh hi" a la tizui! Tatai chuan rum zeta melhin, "I chhe ve thung alawm" a ti nghat. 

Chrisa lah chu a nui hawk hawk mai si, a ngai haw miah lo tih a lang reng. 

"Hmeichhia ni ve atan i îtawm ṭêp" elsen rawngkai zet hian a ti a. 

"I chhia" a ti ringawt. 

"Ka ṭha..min en chiang la, ka hmelṭha " tih leh rawn hnaih a rual a. Tatai a chesawn zauh. A hlau pawh a ni lo, a ngei ve hrim hrim a ni ber. 

Kal mai tuma kawngka lam a pan tur chu a bânah a rawn vuan chut.."Hey" a ti vin ṭhak a. A kawlh leh hrâ tawh. 

"Ka pawngsual dawn lo che..chutianga îtawm i ni lo bawk a" ngeiawm zeta a tih chuan Tatai'n "Min thlah vat rawh.." a lo ti tuar..

"Ka nau thar hi a patil miah lo" tih leh na zeta a lama hnuh hnaih a rual a, Tatai lah lo inring hek suh. Chrisa âwmah a va bei deuh thlawp a. Mahse, a ranga rangin a inla hrang vat. A kut chu theihtawpa thingin Chrisa vawnna chu a thingthla thei hram. Chhoh melh vah chungin ,"Ka u pawh i ni lo.." a ti vin ṭhak. 

A nui hawk a, a biang veilama biangsum tereuhtê chu a khuar kêk mai. A inhmeh lo letling..amah a pa hrak si a. 

"Rosy ai khan i chhe lo daih zawk..mahse, hmeichhia ni rawh..a ṭha em?" Chrisa ṭawngkam tinte chu a ten em êm thil an ni. Mipain hmeichhia anga an en hian a awm a nawm loh bakah a thin a rim hlur zel.

"I tan chuan hmeichhia ka ni duh lo.." tih leh chelh zui hman loha tlanchhuah a rual a. Chrisa chuan thlir zui pahin, "Kan en ang chu..Thinlung zawng i nei ve em em ang" a ti zawi sup a. 

A unau te lah chuan hawn an rawt har zêk a. Dar 10-ah pawh an la lam tui bakah Mafeli phei chu a hmu zo tawh lo. A kawp te tein an kal hrang thliah thliah hlawm a. Rinpuia erawh a bialnu Ruati a hruai ve loh vangin Chrisa te nen an ṭhu khawm a, an titi ve nasa mai. An lem hlek hlek pah bawk a, an titi a nuam chho ṭan dawn chauh..

Tatai haw châk, haw thei bawk si lo ninawm ti lutuk chuan zu ûm pakhat chu lain noah a thli chhuak sawk sawk a, a tlak nghal pup mai. A pum rawn sa ham ham chuan a inrintawkvena te a rawn tipung sauh a, a chevel pawh a zangkhai ta sawt. 

Mipa amah aia tlema sang hlek tur hmel phei chu chhe fahran lo hian a rawn belbul ve ta chawt a. A hming pawh Faka..

"Kulikawnah sawn kan awm a.." tia bulṭanin a hnu lamah "Ka pate office-ah ka kal a, chuti khati..ka nu dawr ka nghahsak a, chumi zat chu ka hralh ve.." tih vel a sawi tak duahah chuan Tatai chuan a mit a khap fak fak ringawt tawh. A chang leh a thaw hawk ṭhin. Faka chu a hne, a ning hluah hluah. Chutiang em ema mipa insawithei chu a la kawm ngai lo va, Chrisa ai pawn ngeiawm a ti. Faka chuan a pawi a sawi hauh si lo. Hmeichhia a nih ve miau avangin mipa insawithei chu a ten ve tihna a ni mai..

A ham bâi bâi laiin a hnung lam aṭang hian, "Mipa bula ham bûi bûi te chu a" a rawn ti dût a. Christopher leh bawk. A hawi let vat a, mahse, a lo kalsawn leh daih tawh. 

Faka chu kalsan daih dan tur a ngaihtuah ngat ngat a. A hre mai bawk si lo, mahse, Chrisa kha zu no keng chungin a rawn phei leh a. "Lalfak, saw Amtea ten an ko che" a rawn ti ta hlauh a. Tatai a thaw huai mai. 

Rawn melh zauhin, "Min ba ta"a ti sup a. 

"Engvang chuan maw?" A lo ti vat. 

"I hriat zawh chiah kha.." a ti ringawt a. Tatai pawn a sawi awmzia chu a hrethiam ve reng..

"Hawn i duh tawh em?" A rawn tih chuan rang fahran hian, "Aw.." a ti vat a. 

"Haw ila" a rawn tih tak si-ah chuan, "Mafeli te ka hawnsan daih chuan" a ti sep. 

"An haw lawkin ka ring lo" a ti a. 

"Rinpuia hian hawn a duh ve tawh tho ka ring" tih leh Rinpuia lam va hawi a rual a..an la titi tui angreng. 

"Ani nen chuan ni lo ve.." Chrisa aw thawp sup avang chuan a meng deuh kâwk a. 

"Maw?!" A ti hluai..a thusawi a hriat loh vang ni loin a sawi awmzia a hriat loh vang zawk a ni. 

"Engmah..hawh, ka thlah ang che. Ka haw dawn alawm.." a ti zangkhai vah a. He pa nen khera hawn dun chu a hreh deuh. A nghalin a chimawm si. 

"Mahse, Rinpuia te…" a tih lai mêkin, "Zankhuaa awm i duh em ni?" A lo ti nghut. A zuj ta nge nge a. Hawna mut hahdam a thlahlel tawh êm a ni. 

Rinpuia te bul an va thlen chuan Chrisa chuan, "Kan hawnsan mai ang che u. Hei Cousin thar hi a nuamsam lo va" a ti thur thur a. Rinpuia chuan ngaihṭhat loh hmel fê hian, "Maw? Tata, engtin nge i awm?" A ti hluai a. 

Hamhaih ru deuh hian, "Aa..ka ṭha reng. Ka haw châk tawh a" a lo ti bah nak. 

Pu Thianga fapa Zuitea chuan meng rulh rulh chungin, "Han haw r'u..kan naua pawh kha a kim lo a nih pek kha. Sangteii tel ve lohna hmun zawng hmun khawhar city a ni" a lo ti lûng lûng..a rui deuh bawk nen, a meng phâwt a, a ṭawng pawh a sehchilh nawk nawk. 

Chrisa chuan za lo fêa nui chungin, "Awm mai mai teh..kal ang " tih leh Tatai en a rual a. An kal chu a ni mai. 

Chrisa chuan car kawngkhar a hawnsak thlap! Tatai a ner nawk thung. Hetiang inlak romantic vel hi a tan chuan thil zahthlak a ni. Chak vak loin car chu a khalh a. 

"Rosy kha a ṭha zel maw?" Tatai zawk chuan a ti ve sap a. Ngawih dun tlawk tlawk chu nuam a ti chiah bik lo a ni. 

"A ṭhat ka beisei" tih chauhin a chhang. 

Sawi leh mai tur a hre si lo. A ngawi ta reng a. Chrisa lah a ngawi run bawk si..

Khaw lo awm hmasa ber luh hma deuh kawngzau laiah tak chuan thil mak deuh an tawng ta a! Chrisa pawh a ding chawt mai. Eng dang a ni lo. Kawng chhak awih vak lo aṭang chuan an va thlen phei hma siin mihring ni ngeia lang hi kawngah chuan rawn tlan tlangin kawngthlangah chuan a tlan thla puat nia! 

Tatai chuan phawk hrâ hian, "Tu nge kha kha" a ti halh a .

Hmalam melh run chungin, "Ka hre hauh lo mai"Chrisa pawh chuan a ti ve nghut. 

"Mihring a nih kha.." Tatai bawk chuan a ti a. 

Chrisa erawh ngawi rengin a chhuk a. Kawngthlang lam chu a zuk thlir vung vung. Tatai pawh chu a chhuk ve vat a, a ṭhut rei deuh vang bakah a zu in vang kha ni maw a pai khet khet..Chrisa bulah chuan va dingin a zuk thlir ve a. Tumah leh engmah hmuh tur a awm lo. Eng sawi set set lovin Chrisa chuan a bula lung chu chharin a vawm ta mai a! Eng thawm mah an hre zui ta chuang lo. Makti fe hian an inmelh a, "A mak hle mai" an ti rual ṭhawt. 

 Car-a an ṭhut leh hnuah Chrisa chuan sikret phawrhin, "Ka zu dawn asin" tiin a râwn khawmawi ve a. A lo buk khum nghat. An thil hmuh khan a rilru a la luah tlat! A mak em mai. Ramhuai tihna em ni ang? Ramhuai la tawng lo ve ve an ni a, an râwntlak loh dun viau ang. Mahse, an pahnih ngeia an hmuh a nih avangin kha thil kha a lem chu a ni lo tih erawh a lang. 

Khaw chhung an lut a, "Ramhuai a niang" an ti rual leh ṭhawt! An inmelh a, an nui dun ta tawp. An ngaihtuahna a lo inang lutuk chu mak an ti ru zawk. 

"I hlau em?" Chrisa chuan a ti a. 

"Hlauh ngaihna pawh ka hre lo " a lo ti sap. 

"Pa takin aw. Bro" chrisa'n a tih chuan Tatai chuan melh nghekin, "Hmela" a ti hlar a. 

"Ka sawi sual emaw ka inti hman alawm le" ngeiawm zet hian a ti leh zat! 

Tatai chuan, "I ninawm" a ti tawp. A tira an bulṭan dan a fuh lo laklawh a, eng emaw hlekah an inbakkaih zel mai. Cousin chu an ni ve bawk sia..Tatai te in an thleng a, dar 12 a ri ṭêp. 

"Kha thil kha i khum hnuaiah a lo mu lovang tih a sawi theih miah loh a nia aw.." Chrisa'n a tih chuan, "Ngawi hmak rawh" Tatai'n a ti fiak ṭhak. Chrisa a nui hak hak..mangṭha pawh inmangtha lovin an inkalsan tawp. A va ho e aw..

A pindana a luh chuan light a on hmasa ber. Engahmah hmain a khum hnuai chu a va bih dûk dûk a! A ruak..

"Hmela mai mai chu" a ti sap a..

(Thawnthu chhiar ṭhin ten ka youtube channel in lo la subscribe lo a nih chuan, khawngaiha min lo subscribe ve turin ka ngen che u. 

Ka channel hming : Toni Ralte Official. 🔥