Zor last

ZÔR..(Last Chapter)

Ziaktu : Toni Râlte

Ka la muhil dawn chauh emaw ka tih laiin, Viteii aw hian, "Teber, teber, Mama'n lo tho rawh" a ti' a rawn ti lâng lâng a. Sana ka en chuan dar 7 chauh! Class kan kal dawn si lo va ka mu âm ang ka ti ve kha a nia. A pawimawh viau a niang chu maw, Mama meuhin min lo kaihthawhtir chuan. Phak chuapin ka tho a. Ka ham bai bai bawk. Ka inphihfai laiin Mama a rawn kal a, "Inthlak fel la, Pu Zoa a rawn thleng ṭêp. Chhungkuaa sawiho ngai a awm" a ti vut a. Ka pa rokhawm chungchang vel a ni ang tih ka hrethiam mai e. Ka inthlak sawk sawk a, Room aṭanga ka chhuah chuan Pu Zomuana, Advocate lar tak chu a rawn lut ve mêk a. Ka nute pawh an lo tho daih tawh a lo nia. A hmel ngui nghiai avang chuan nuam ka ti letling. Mahse, ama bulṭan a ni miau a. Khawngaih a sâwt lo ve. In chungah chuan ka chho a. Ka nu leh ka û te bakah, ka nî te nupa leh pu Zova te chu kan ni mai e. Kan ngawih ṭhap hnuah Pu Zomuana chuan, "Aw le, hei tukinah tiang hian i pa thurochhiah kan han sawi dawn a nia. I pa mitmu êm pawh a la keh hmaa hetiang thil tih hi in duh ka ring chiah lo naa, a ṭulnain min nang tawh si a, kan ti poh a ni ang chu..in lo hre thuak tawh ang a. I pa khan fel takin ro a sem thliah thliah tawh a. Chu chu ka han chhiar ang e. 

(File cover aṭangin lehkhaphek chhah vak lo a rawn phawrh a..a chhiar ta a) kei Lalsawithanga, Lalrivunga fapa hian ka thih hnua ka ro insem dan tur hetiang hian ka ziak fel e. 

Aizawla ka in luah hmasak ber, tuna Lalramzaui ten an luah mêk hi, amah ka farnu neihchhun Lalramzauvi hmingin ka dah a. Tuma sawibuai theih a ni lo vang. Tuna kan luah mêk, ka in hi ka fapa naupang zawk Malsawmtluanga hmingin ka dah bawk e. Khatlaa ka in lei leh a hmunhma zawng zawng saw ka nupui Lalthanpuii pualin ka dah bawk a. Venghluia Ka fapa Malsawmdawnga nena kan lei thar in leh a hmunhma saw ka fanu neihchhun Malsawmsaki tan ka dah bawk e. Ka fapa upa ber Malsawmdawnga hi amaha inenkawl thei leh eizawnna ngelnghet nei, chhe thei tawh lo tura ka ngaih ni mah se; ama puala ka hnutchhiah ve duh hrim hrima vangin, Tanhrila ka huan leh ram bakah Lungleia ka in hmun zimtê saw a pualin ka dah bawk a ni. Ka pension hlawh hi ka nupui Lalthanpuii'n pasal a neih leh hma chu a chang ang a, pasal a duh a, a lo nei ta a nih chuan ka fanu kuta awm tur a ni. Ka fanuin pasal a neih hnuah erawh sawrkar kut a ni tawh ang. Lunglei-a ka ram man kha ka nupui leh ka fanu ten zat leh zata an insem turin thutlukna ka siam tawh bawk. Ka bank account leh passbook leh a pawimawh tur zawng zawng chu ka fapa Malsawmdawnga kutah a awm a. Ani in remruatna fel tak nen hma a lo la ang. Heng ka thurochhiah hi duhthlanna felfai tak nena ka siam a ni a, tuma sawibuai leh tihdanglam theih a ni lo e. " Tiin..a chiangin a felfai fek fawk kher mai. 

Heng zawng zawngah hian ka nu chan a la ṭha ber chungin engvangin nge a lungawi theih tlat loh le..Khatlaa ka pa in lei chu a pension tirha a lei, a sum zatve dâwn a hmanna kha a ni a. In ding sa, a hmunhma pawh zau ve tawk tak,in chhawng, a hnuai kaw hnih phei chu dawr atana ṭha tak a ni. Ka in erawh a lian lo va, nupa reka awmna âwm tawk vel a ni. Ka lungawi hle thung. Tuna kan in luah mêk Au Bawiha kuta dah hi a lian ṭha viau naa, a hmunhma erawh a zau lem lo. Mama chan a chhe ber han ti ngawt ila, ani chu sawi tawh angin a sumdawnnaah a tluang a, ka pa pawn tlachhe thei tawh lo tura a ngaih kha a nia. Ka pa chu a fingin a rel fel thiam hlein ka hria. Ka nî te pawh an lawm takzet. Tin, ka pa fing ka tihna êm êm chu in hmun lo ram a lo ngaihvena a lo ngaihsak êm êm kha. Khatiang ni lovin tuna kan luah lai chauhte hi a ram neihchhun ni ta se, kan buai nasat tur zia hi..ka nu hian min hnawtchhuak unau phiar mai lo'ng maw le…tuman kan sawi buai tak lohah chuan Pu Zoa pawh a ngawi ta vang vang a. Ka nu chuan a aw a thian kharh a. 

"Compensate suma ṭanga ka chan tur kha lak chhuah nghal ka duh a ni" a rawn ti ta a. Mama ka melh zauh, pangngai takin, "Vawiinah kan va tifel nghal dawn nia. Sum lût kha kan lo hriat tlan atan nuai 84 a ni e." A lo ti felfai thlup. Tuman engmah kan sawi tawh lo. 

Pu Zova hawn hnuah ka nî chuan, "Mathan, ka û mitmu êm pawh a la keh lo va, i thiltih dan leh i awmdan hian ka lung a va tiâwi lo tak êm. Mahse, ni e, in i chhuahsan dawn a, ka sawi tam lo mai ang e. Ka û chungah khan lâwm hle ang che. A chunga hetiang thil i ti chung pawha hnutchhiah a la nei che hi" a ti ta bawrh bawrh a. Ka nî chu ka dem reng reng lo. Ka nu chuan, "Inven nan ka ti mai a ni e. Sangbera leh Bawiha te ringawt kha chu nise mipa an nihnaah ka hlauthawng lo. U Thanga pawh khan tihsual a nei ve tho alawm, Malsawmsaki hi a fa a ni tih ka bulah takngial pawh a zêp tlat a, ka lawm bîk hleinem" a lo ti tân tân a. 

Mama'n, "A tawk, duhtawk rawh u. Inhauha inhnial a sâwt tawh lo. Ka nu pawh i duhâmna avanga min chhuahsan tur i ni tih inhria la, ka pa kha la damin i thiltih zawng zawng hi hria nise chuan chanvo pakhatmah i nei lo vang. I vannei hle tih hria ang che" a lo ti chang fak fak a. Tumah kan ṭawng zui tawh lo. 

Mahse, kei chu zawhna ka la ngah takzet. Ka nu inpuanna engmah ka hre ve bawk si lo. Tute nge a thurualpui tihte, ka pa thisen kai ka ni tih te kha engtin nge a hriat tihte..a tam mai. Ka la hre ve mai ang chu maw. 

A tawi zawngin tukṭhuan hnuhnung ber kan kil tlan hnuah ka nu leh nuteii te chuan kan in chu an chhuahsan ta a. Mama'n taxi a chahsak thlap bawk. Bungrua pawh an ngah viau, ka û te chuan an enliam thei mai zel a, an fel ka ti. 

Ka nute kal hnuah Au Bawiha'n, "Mam, i duhtawk hma deuh lo maw? Rosum vang ni loin ka pa thihdanah khan kei chu ka ngaih a la ṭha thei hleinem" a ti ban chhalh a. 

Mama chuan, "Ka hria e. Ka hre vek alawm, mahse, finfiahna kan nei lo va, a hunlaiin report kan ziaklut tawh bawk si lo. Amah hian engtikawngmaha a sawi chhuah ka ring lo bawk. A chhan chu kan ngaidam dawn lo tih a chiang. Tikhan kan hlatah awmin kalbo se, ka pa thihna chu hunin thudik a rawn herchhuahpui mai ang" a ti charh charh a. 

Kei erawh buai ru deuhin, "Mam, kei chu engmah ka hre ve si lo. Ka nu khan eng thil chiah nge a lo tih..ka hre ve duh" ka ti ta tâwng a.

Hahdam deuha ṭhuin coffee a in a. "Ka nu khan ka pa a neih chhan chu rosum vang a ni. A pasal fanaute kalsanin dâwt hmanga bulṭanin ka pa a nei a. Zorina te pafa lainatawmzia saw i hria em? Zorina te avang chauh pawh sawn ka nu hi hmeichhe rapthlak tak a ni ka ti ngam..kan naupan lai zawngin kan duh lo chung hostelah min dah a, ka pa rilru a hneh thei tlat si. A nau ka nuteii te tan lah sum eng emaw zat a pe chhuak reng bawk a. Kan harsat lai tak tak i hre hman lo va, i vannei a nih kha. A langah min tirethei ngam lo naa,ka pa chu kan lak aṭangin a pawtsawn hret hret ṭhin. I hria ang chu, kan chhungkaw boruak chu..i ṭhiannu Desy te pawh i awt ṭhin tih ka hai lo, khatianga inbiak bawrh bawrha infiam kha a awm ve ngai lo. Ka pa aṭangin kan mûm run tawh hlawm a. Ka nu duhdan a ni miau a. Mahse, kan lo puitling chho a, eizawnna Pathianin min pe a, hlawhtling tia sawi theih kan han nih ve takah chuan ka nu chuan kan lakah ṭhat a chhuah lo ngam ta lo chauh a nih kha. Kum 4 kaltaah ama sawi dan ngeiin ka pa fanu, a thisen kai i ni tih ka pa diary a chhiar ruk aṭangin a hre ta a. Nang chu a hmumawh chho ta che a ni. Keini unau chu eizawnna kan neih avangin ka pain min ngaihtuah dawn lo, nang erawh hmeichhia, zirlai naupang mai i la ni tlat a. Ka pa lah a upa ve zel si. Duhâmna chuan a nunah hmun khuar thuk zelin, Nunpuii kha i nu anga min chhaih buai turin a ruai ta a nih kha.

Ka pa ngei pawh a chhaih buai a, mahse, ka pain a hmel a hmu ngai lo. Kei pawh tikhan min tibuai a, Kei leh Bawiha ten kan hmangaihzia che a hria a. I thlavâng kan hauh zel dawn tih a hai loh avangin kei upa ber na nâ na chu min target leh ta a. Kan puitlin hnuah ka pa khan kawng engkimah min ringin a thutlukna leh ruahmanna engkim min hrilh tawh si a. Kha kha a ngaithei lo. 

Nunpuii hmanga min vau zâm tumin leh nang chu i nu kuta daha inzawmna chhu chat turin min duh a. Kei lah ka lo chesual ve ta hlauh si a, Nunpuii kut ka thlak a, mahse, kha pawh an ruahmanna vek, a â anga kan hriat te kha an ruahmanna vek. Zorina nen in intawn takah khan kha thil kha a rawn hmang ṭangkai ta chiah a. Zorina kha a hre sa daih tawh, Zorina pawn a hre bawk. Zorina'n tum ruk a nei tih a hriat si avangin a buai a, in inṭhen theih nan kawng a dap ta chung a. Kei pawh min vauin Zorina nen in inṭhen theih nana hmala turin min ti a, I nu anga inchhal, ka khawihna avanga ât phah ta anga an sawi hmang khan min vau ta chiah a. Kei lahin kha thil kha i hriat hlauin an lam ka ṭang lo thei lo. Rilru hrehawm leh ka nuin Zorina a duh loh chhan hriat tumin ka buai a. Mahse, Zorina kha a inthup thei êm a, bakah mi luhlul tak a ni bawk nen. Ka nu fapa a ni tih khang lai khan hrechhuak ta ila, hetiang teh hrep hian kan buai lo vang. Ka nu lah chhui ngaihna awm miah lo turin a chi leh kuangte tumah hriat ka nei lo, ka nuteii lah ka nu kaihza vêngtu a ni si. Ka pa a han na ta a. A boral ta hial a, rosuma a buaina a lian telh telh. Ka pa thurochhiah hretu leh kawltu ka nih avangin kei chu a hmuhmawh ber ka ni leh ta a. A fapa ngei sawisaktirin kei chu jaila dahbo ka nih theih nan misual a ruai ta hial a nih kha! Thildang a lo tih tawhte kha chu ka enliam thei. Rosum avanga mipa naupang a nih laia a kalsan tak, a fapa ngei rosum vang bawka hmabak êng tak a neih laia a khawihtir thei kha paidam harsa ka ti a, ka chenpui thei tawh ngang lo a ni. Chuta karah Zorina rilru hneh tumin dâwt chiang tak nen a vehthlem a, Zorina nat tirh, intihsiakna a hmachhawn thei dawn lo tih a inhriat tirh laia a rilru na lutuk khan kei ngei pawh min huain ka thiltihah a ngai hman tak tak a nih kha..Zorina te lam hneha kei chu a na thei ang bera hremna hmachhawn turin ka nu lahin a va vir chhen bawk si. A inenkawlna mai bakah nakin zela an hman atan sum te a va hmatheh thul, mahse, kha tah tak khan Zorina thluak rawn fîmin a nu laka phuba lak duh ta rêng rêng chuan a nu chu a ringhlel ta a. Naute, nizan khan Zorina video clip avang chauhin ka nu kha an inpuantir thei asin. I bialpa khan ka nu chu a lo inpuantir diam tawh a. Chu video chu police kutah dahin, ka nu hrem dan tur erawh kan kutah a dah thung. Ngun taka ka nî te nen, Bawiha te nen kan ngaihtuah hnuah kha chen ka pa nun lo tihlima ka pa tana a lo awm ve pawh kha a hlû alawm tiin case lakirin defamation case pawh file lo vin kan ngaidam ta vek a ni. Chutiang a nih takah chuan Zorina te lam pawhin ka nu chu an inenkawlna senso tumtira kaltir mai an lo duh ve ta bawk a. Tiang hi kan thleng ta a ni e..chhungkaw buaina maksak leh rapthlak tak zawng a ni e.." a ti ta dap dap a. 

Milim angin ka ṭhu ngil ût ringawt. Chung zawng zawng chu ka nu thiltih maw lo ni a?! A va mak tak êm. Thil dang zawng aiin Zorina hmanga Mama hremtir a tum dan kha mak ka ti zawk. Engtin nge Zorina te chuan an ngaihdam theih le? Ti hian a la nuamsa êm êm tho sia..Zorina te ka dem zawk daih mai, keini chuan kan ngaidam hi a âwm tihna chen ka nei. Engtin nge an tetlai, nikhua pawh an hriat hmaa kalsantu an nu, an puitlin tawh hnu pawha tina zui zeltu chu hrem loha an kaltir theih?! Ka nu kha nu chu a ni ngei a, mahse, nutling a ni lo thung a nih kha.

"Zorina te chuan engtin nge an ngaihdam theih?" Ka ti sap a. Ka vei ngang a niang. 

"A pa thutlukna a ni si a, amah leh a û te chuan an hnial ve tho a niâwm e. " A lo ti vat. Ka thaw hawk ringawt. 

"Mam, thil dang pawh a la awm. Damdawi ina ka awm laia ka nuin a biak hmeichhia te, a rûka phone atanga a biak fô ṭhinte kha.." ka ti duah a. Nia, ka la hrechiang tlat lo. 

"Naute, i ngaihtuah chikim lutuk a nih kha, tu emaw a thurualpui a ni ngei ang a, ka nu khan a sawi tel loh danah a pawimawh lutuk lo a niang..hei an hlawhchham ta bawk sia" a ti a. 

"A nih nang chu lo dahbo thei ta tehreng che pawh nise, eng nge tihtheih a neih chuan?" Hrethiam lo fê hian ka ti leh a. Nui sukin, "Thurochhiah kha tihdanglam a tum a ni mai alawm..chu chu a tum leh duh ber a ni rêng a.." a ti ta a. Zawhna ka nei ta rih lo ve. 

Mama chu chinfel ngai a ngah bawk a, a chhuak ta a. Dar 12 a pel tawh. Kei pawh lehkha zir tur ka nih laiin ka thei teuh lo mai. Viteii nen ka pate room chu kan chingfel ta a. Ka ṭah a chhuak. Ka pa khan a thih hnu lawkah hetianga buaina hi a thlen a ring bik awm si lo va. Tunah chuan a rauhsan tak a pindan pawh luahlumtu an awm dawn ta lo. An pindana thil hlû leh mutbu zawng zawng tihtheih deuhthaw ka nu khan a keng vek a. A ruak viau. Hetia dah ṭawl tawp ai chuan, eng emaw tia pindan ṭangkai taka hman chi a la nih dawn hi. Mama emaw Au Bawiha ten an hre leh thei mai ang. 

Eirawngbawl hma siin ka pindanah awmin thawmhnaw thleh fel ngai ka thlep mual mual, hetia ka chet reng lai pawh hian Zorina chunga ka nu thiltih dan kha ka ngaihtuah reng. Ka harh thut nge ni, Zorina ka call ta a. Mutchhuah hmel zet hian a rawn la a,. "Ti nge i nu kha i ngaihdam? A lakah phuba i la duh a ni lo'm ni?" Ka ti hrâwk a. 

"Ka ngaidam tuin nge ti?" Thutak zet hian a rawn ti ve. 

"Ngaidam lo ula a tâng ang chu" ka ti ṭhak a. 

"Kan thinlungin kan ngaidam hleinem. Ka pa kan zah avangin a thu kan awih mai zawk a ni" a rawn ti dam thlup a. Keia thinchhe pingling lah dawhthei hek lo,"I pa pawh chu a va â ve. Khatiang khawpa a ti chung pawha la ngaihdam theih chu" ka ti nghek. 

"Mahse, ka pa tan chuan a fate hi kan hlû a, a fate hrinsaktu chu ka nu a ni miau sia lawm" a rawn ti. A pa a dem duh miah lo naa a nu chu a ngaidam fel thei bîk lo tih ka hrethiam ve tlat. 

"Chuan, tihian in awmtir ringawt dawn a maw?" Ka ti leh nghat a. "A chawi tur zat kha min pe ang a, a kal bo tawh mai ang chu" a ti ringawt. 

"Nep em mai" tiin ka dah daih. Ka lo lungawi lo ve vak chu ka inthiam lo tho nain, Zorina te ka khawngaih leh ṭhahnem ka ngaih vang a ni bawk si. Tihsual nei lo ang hrima khawlai a leng vel tur ka ngaihtuahin ka nu chu ka hmumawh ngawih ngawih. Nu rapthlak tak a ni miau alawm le. 

Kan zanriah ei pawh kan ṭawng tam lo hle. Mama chuan ka pa pawisa min hnutchhiahte chu a va sem fel ta vek a, ka account-ah a transfer nghal vek bawk. Engmah ka ti miah lo chungin nula hausa ve pangngai tak ka ni ta. Ka hlim phah êm êm lo. Ka pa la dam se ka duh fê zawk, a fa ka ni ve tih ka hria tih hi hre hman tâl se a ṭha tur. Mihring nih chhung hi chuan lungawi lohna hi a tam zawk a nih hi a.

Lehkha ka zir ve ngial a. Tun ṭum exam chu ka tiṭha vak dawn lo hle mai. A pawi lo, Next-ah ka ṭang tawh mai ang. Zorina nen kan inkarin min tibuai ta vak lo, a chhan chu kan inṭhen lo tlat a. A nu an tih danah lawm vak lo mah ila, anmahni ber an lungawi miau te chuan ka lo sawi ve tur kha a awm lo êm a ni. Asangi erawh a la awm si a, ka ngaimawh deuh. A ṭangkai tho bawk si. Dar 11 velah ka mu a. Zorina msg a lo awm vâ.."A tirah kha chuan ka nu fanu i nih avangin hmanrua atan ka ngaizawng che. Nun nuam lo taka hun a hman theih nan. A nuam lo ta rêng a, i pa leh i û te khan a fapa ka ni tih an hriat kha a hlauh ber a ni. I pa kha a bum miau si a. Mahse, ka inrin hmain ka duh ta viau che a, ka nu ka huatna a pung zel bawk. Mahse, amah zawk khan kaw dang hreuhin falâk i nih thu min hrilh ta a. A fanu diktak i nih loh chuan ka tawpsan mai a beisei a niang e. Kei lahin tawpsan che harsa ka lo ti tawh si..falâk i lo ni kha ka lawm letling asin. Mahse, tikhan tawhsual ka tawk a, Ka nuin U Sangbera nen a hmehbel che uin, dâwt awihawm tak tak min fah reng a. Ka lo awih ve ta hial a! Ka nu ṭawngkam nâlah leh a lemchan thiamnaah ka tlu lut palh ta a ni ber..tikhan U Sangbera nena inzawm tur angin ka ngaihtuah che a, ka na tlawk tlawk zel..mahse, ka nu ṭawngsual azarah ka mit a var leh thei ta a..U Sangbera ka thurualpui ta zawk a nih kha..ka bulṭanna a dik tawk lo tih ka hria..mahse, ka hmangaih che" tih thu a rawn dah ve duah mai. Chhiar a va hrehawm loh tak êm..

"Video clip kha ka lo en ve" ka va ti a. A lo la meng ve mial a, min rawn thawn ve mai. An ina a pindanah ka nu nen an lo inkawm a lo nia. Chhun chu a ni chiang. Zorina chuan, "Buaina ka nei a. Min khawihtu zinga pakhatin min lo bia a, ngaihdam min dil bakah U Sangbera pawh a hriat loh thu a rawn sawi asin. U Sangbera hi a fihlim a nih chuan kan lakah case te file lêt ta hlauh se. Kan chhe vek a ni mai" a ti a. Ka nu chuan, "Pawisa hmang hian tihtheih loh a awm hleinem.. Tuna MSP in an pek tur che u hmang hian misualte chu Sangbera kan kawhtir LEH mai dawn a ni. Kei chuan neih ka nei tawh mang lo va, in pawisa hmang phawt ila, ka chanai ka hmuh hunah kan cover leh vek dawn nia. He lai inah pawh hian in khawsak a ngai tawh lo vang.." a ti ta ham ham a. 

Zorina'n, "I sawi hmangah chuan khang min khawihtu te kha pawisa pein u Sangbera hming sawi turin i lo ti tawh a ni maw? I va che mawi ve..tichuan, Jailah a lut ang a, nangin engkim i tifel ang a..a dik em?" A lo ti var. Ka nu chuan, "Ni mai mai e..Mahse, pawisa chu pekbelh an phût ngei dawn a nih hmel..kan pek loh chuan engkim a chhe vek a ni mai..in pawisa chu ui lo rih phawt rawh u. I pa i lo be dawn nia" a ti leh a. Chu mi chin zawng chu a ni. A bak Zorina khawihtute pawh ama rawih vek an nih thu erawh Police stationah a sawi chauh a nih hmel. Rapthlak hian a..

"I nu hi a rapthlak ka ti, a sual êm mai" ka va ti leh hmiah. 

"I nu ti tawh suh, ka nu chu a thi tawh.." a rawn ti..nia, sawipui vak ka duh tawh lo. A rilru ka tibuai mai mai. Hun a kal ang a, ka nu chuan tawrh hun a la nei tho vang. 

"Leh lawk, a tawp nan, pawisa engzat nge in phût?" Ka va ti leh hrâm. Ka hre duh tlat. 

"Ka pain vawi tam a chhût hnuah ,"He hmeichhe hnen aṭang hian siki them pawh kan la lo vang" a ti.." a rawn ti ta a. Pu Sawma rilru chu ka hrethiam ta deuh e. 

"Hmm, chutiang tur si, jailah khung awm che u" ka ti leh ṭâlh. Ka sawi lo thei thlawt lo, "Ni lo ve. Jailah pawh khung ila, a chhuak leh vat ang. A pawisa kha kan mamawh lo va, kan mamawh ngai bawk lo vang. Tikhan nung ve tawp se, Chunglamin a thungrulh hun a thleng mai ang. Keini lo chet ve a ngai lo" a rawn ti a. 

"Mama i rinhlelh lai kha chuan i ngaidam si lo va, jaila awmtir kha i duh sia" ka va ti a. 

"Khatia ka tih kha a ngai alawm, i nu thudik sawi tir nan khan.." a rawn ti ve leh..ka zawt zui ta lo. Tui takin ka muhil ta. 

Exam chhung zawngin buaina ka tawk lo va. Ka nu te chhuak lah an reh zui hmak, Mama case lah a fel tawh a, Zorina te ngaihdamna avangin misualte pawn zalênna boruak an hîp leh thei ta. Mahse, an inchhirzia leh hrehawm an tihzia Zorina te ina kal meuhin an zu sawi a, an nun an sim hmak tur thu nen. An sual sim phah theih nana an hman chuan ngaihdamna kha a lo hlu hle dawn mai. Pu Sawma chuan thutlukna dik tak a siamah ka ngai thei ta. Exam chhung kan inhmu lo va, "Ka lo inla fit ang, exam i zawh hunah ka veng tawh dawn che sia" a ti ngei. Kei pawn exam ka phur phahin lehkha pawh ka zir ṭha ve leh thei ta viau. 

Exam zawh nî chuan min rawn hruai a,. Len kan tum ve kha a nia. Kei ka mize harh ang hi ka ni lo, bialpate nen a khawlaia len duna khawi hmun emawa kal dun hi ka ti vak lo. Mahni in luma inkawm dun melh melh hi ka thla a muang zawk, nuam pawh ka ti. 

A rawn thlen lai chuan main gate bulah Desy te nen kan lo ding ṭaih a. A helmet a phelh chu kan sira ding hmeichhe pathumte chuan, "Awii, Zorina.."an ti sar sar. A dinna a lansarh vang ni maw ,an en duh hlawm viau. Sawi tawh angin mi lar chu a ni miah lo nain Ultimate fighting aṭangin a hming a lo chher ve bawk nen, an lo hre ve hlawm a ni ngei ang. Mipa lam pawn an en duh viau. Kei pawh khawmuang lovin ka va pan nghal a. Denim, Light plain hnuaiah tshirt var a ha a. Slim fit dum dak hlarh mai hain, Canvas pawl dal raih mai a bun bawk. A dam kawr vanga a hmul rawn ṭo ve te kha a shave vek tawh a, a lang tharlam sûrh mai. A lu erawh a la buk deuh tlat, mahse, a mawipui tho si. Bikeah chuan ka chuang tharh a, min en ṭhupa ka hriat avangin, "Tlan vat rawh, ka zak" ka ti sap a. A tlan zui ve mai. 

"Khaw nge kan len dawn?" Ka ti a. 

"Hmun nuam deuhah..chuan zanriah kan ei dun bawk ang" a ti a. "Viteii ka'n hrilh ang e" ka ti nghal. Ka be nghal a. Kan tlem tawh sia, chaw in eichhuahsan pawh a nuam thin lo. 

"I chhang ṭha em?" A ti chuan, "Pangngai, kan zawh ni a ni sia, ka helhhawlh a" ka tih chuan a nui huk.

"Hmeichhe naupang tak hi chu a" a ti hluk a. A hnunglam aṭangin ka lei ka chhuah khum nghek. "Khatin min chhiatkhum vak suh, ka tukhum a za" a rawn tih chuan, rang fahranin, "Ehe! I hria law? Engtin?" Ka ti chul a. 

"Ka sense organ zinga pakhatin min hrilh" a tih chuan ka nui awr awr. Ka uang châk tlat a, a kawngah ka kuah that, a hnungah chuan ka bei thlawp bawk a. "A nuam ami?"a rawn ti. 

"Umm.." tih pahin a tshirt ka hlim a, a dul ka khawihsak a. 

A nui hawk a, "I va uang tak" a ti ringawt. Mipa hi an dul a kiar mawh bîk e, a kiar tawh lailêng lah a kawh luah thung a! Haha..Ka uang zel châk, motor kan tawh chuan ka awm ṭha leh zel a, "Ka nâk kha dêk miah suh, kan tlu nghal a ni mai" a rawn ti. 

Khaw chhung kan luh hnu chuan ka ṭhu ṭha ta a. Maubawk lamah kan kual thla a, Lawipû kan pelh chuan, "Reiêk kal nan a tlai tawh" ka ti vat. 

"Reiêkah kan kal dawn lo. " A ti nghut. He lai hnaiah len vahna tur ka hre ve si lo, a lo hre leh khiau a ni mahna. 20 mins vel kan tlan hnuah kawng pêng zau vak lo a lo awm a, a tlan lut ta. Kawng ṭha vak loah chuan a tlan zel a, a tawpah gate lian vak lo kan pawh ta a. A ding ve ta. Gate chu a hawng a, ke in kan lut a, "Ka thawhna workshop neitu U Sanga te huan a nih hi..kan kal zauh zauh ṭhin a. A nuam reuh a nia" tih pahin a hawi kual a. Chawhnu lam a ni tawh a, ni a sa vak lo nen. A hahdamthlak hle. Huanah chuan kuhva leh coconut bakah oil palm te pawh a awmin ka hria. Zawngtah bakah Theihai a ding pheuh pheuh bawk. A zawl nuam bawk si, thlifim lah a thaw heuh heuh. Gate aṭanga hla lo teah thlam a awm a, kan pan nghal. Thlam pawh a ṭhain uluk taka sak a ni chiang. Kan lut a, thlanglam tukverh a hawng nghal. Tukverh zâwl chuan khum an dawhkan chu a awm bawk a. Kan ṭhu nghal. A jacket chu a phelh a,min rawn kuah..ka lo melh vak chu maktih hmel deuhin, "Nge ni teh vak?" A ti hluk a. 

"Ti nge Mama a dik a ni tih i hriat hnu pawh khan min rawn runluih hrâm a" ka ti daih. A nui hawk hawk a, ka biang rawn tuai hlakin, "I nu te nen inla chen ho vek kha. Kha lam chu duhtâwk ang.. ka ngai tawh che" tih leh a lama min pawh a rual a, min kuah thlawp. A rimtui zet hîp vang vang pawhin, "Ka ngai ve lo che" ka ti sap a. A rum nghut. 

Min rawn fâwp a, ka lo chhanlet danah ka lo thlahlel ve tawh hle tih a lang. Khumah chuan min bawhthlu ta a, a kut pawh a awm mai mai tawh lo. A mitmeng lah a nung sârh bawk. Mahse, tâwp chin neih ṭha ka ti. Kan induhtâwn nasa si a, tuna a tawp kan thlen chuan kan fianrial hun apiangah kan zawngchhang dawn tih ka chiang. Ka nam a, "Aih, tunah chuan chi loh" ka ti sep. A tho nghal hmiah, hei hi a nia ka duh êm êmna. Aw lâwi deuh hian, "Min tirethei ṭhin" a ti sup a. Nui hakin, "A ṭha lo alawm, kan zawngchhang ang" ka ti vat. 

"Nia, bakah a ho vek ang" a ti ve leh thluam. 

Kan ṭhut ṭhat hnuah, "Englo, MSP sum min pêk bakah ka lo khawlsa ve te hmang khan ka û chu thla tharah ka zuk hruai leh dawn a.." a ti a. 

"Engzat nge an pek che u" ka ti vat. 

"Nuai 2 a nia, ka khawlsa nen nuai 5 chu a awm thei mai ang" a ti a. 

"Zôr, i û hi a kal leh theih tak tak i ring em?" Ka ti thut. Min rawn melh rulh a, hriatthiam harsa fê hian, "Beiseina chu ka nei alawm. Amah hi chu a beidawng tawh" a ti a. Chutiang lam zawhna chuan a tihngui êm avangin ka zawt duh ta lo. Vawiin na nâ na chu hlim taka hman ka duh. A phone ka laksak a, ka hawn luihtir. A whatsapp ka checksak ta a, ṭul ka ti ngai miah lo nain tihtur dang a awm lo bawk a ka ti. Ani pawn ka phone a khawih ve tho. Melody msg chu ka chhiar zo peih lo, midang hmeichhia thikâwm ve deuh tur pahnih bakah Asangi msg a awm bawk. Hmeichhe pahnihte chu ka block daih, cheap ti mah ila ka block châk. A chhan chu an zam lo tlat. "Bialnu nghet ka nei" a tih tawh hnuah pawh,.."Hei hi ka lo chahsak che a, lo lam la." Tih angreng, "Chumi khamiah kan picnic dawn a, kalpui ka nei lo, ka ring che" tih vel..an zak lo si. Zorina'n a reply loh pawn an rawn be reng peih. 

Amah Zorina paw'n, "I block elo? Khamite kha an â tak tak,. An taima bawk sia" a ti tho va, a ngai haw lo tihna. Asangi leh Meloi te erawh Zorina tan an pawimawh ve rih avangin ka block lo. Asangi ka ngeizia chu, "Teberi chu chhia ka ti, a tê si..bakah a inlak hmel..mo atan ka duh lo a nia" te a lo ti vel. A cher êk ûak nen a..

"Asangi hian ti nge a ngaihzawn che? I nî fanu a ni bawk si" ka tih chuan, "Ka nî tak tak ni hek lo, ka pa cousin fanu a nia.." a ti mai a. 

"I damloh chhung khan a enkawl che sia, engtin emaw in awm em?" Ka ti leh. Ka meng rum nghal bawk. 

"A va hahthlak e aw. Ka bialnu chu Malsawmsaki, mi te taktê, thinchhe deuh, meng lian thei deuh a ni. Midang sawi tawh suh" a ti nghut nghut a. Ka lo nui..ka thinrim rei lo ve thei bawk sia maw..

Lâna nen kan inbiakna chiah ani chuan a chhiar. Bakah ka luck vak lo nge mipa dang han thîk tur khawpa min betu ka nei ve lem lo. Lâna msg erawh chhiar uluk tak a ni. Biak pawh ka be buai ngam lo. A chhiar zawhah phone min pe a, "Mi vanduai tak a ni..mahse, phatsanna hi tihpalh a ni ngai lo" a ti dam thlup. Duh êm êmin ka lo melh thung, ka hnâr a rawn tuai zauh a, "Min tilai a nia" a ti a. 

"Zôr, i nu hi i haw ve em?" Sawi ka tum miah lo a nia, eng nge maw ka hriat ṭhin le..

."I nu alawm..nu ka nei tawh lo" a ti nghut. Ka zawt zui tawh lo chiang. A lo tlai ve ta bawk a, hawn lam kan hnaih ta. Mama bialnu anga an sawi mêk Sangkimi te Restaurant-ah zanriah chu kan ei dun ta a. Hmarcha ka heh lutuk chu min ngei si, waiter a ko a, "Hmarcha hi lo la bo lawk teh, kan ei nasa dawn mah mah. " A ti a nih chu! Ka va melh rum tak. 

"I pum ngaihtuah rawh. " A ti hmiah thung. Ka puar viau mai. 

Kan in pana kal kan tum lai takin call a dawng a, "Aw, ka rawn haw" tih leh dah a rual a. 

"Sawmsak, hawn lawk ka ngai, min zui dawn nge motor ka kohsak dawn che" a ti vut a. Chutiang taka hmanhmawhthlak chu tiin "Ka lo kal ve ang" ka ti vat. An veng lam panin kan tlan ta nghal a. A ngawi run si, ka zawt hreh ve bawk nen, kan ṭawng lo tluan parh. An in kan luh chuan Pu Sawma leh ka nu te bakah Asangi te an lo awm a. Ê! Nuteii pawh a awm ve tak e. 

"Eng nge i rawn tih?" Zorina chuan a nu en chungin a ti nghal. 

"Ka fanu damlo ka rawn kan.." ka nu chuan a lo ti ve hmak. 

"Hetah i fanu an awm lo. Chhuak rawh" Zorina aw chu a chang kher mai. 

Nui lek lek hian, "Min haw viau a ni maw? Min la mamawh dawn chauh, Zonuni enkawl nan ka pawisa in mamawh a ni lo'm ni? " Awki sang miah lo hian a ti a. Zorina a ner sawk, "I kut bawlhhlawha i khawih tawh pawisa kan mamawh lo. Kan duh ber chu kan hmuhah rawn inlan tawh suh. A chiang em?" A ti fak fak a. 

Ka nu chuan zâm hauh lo hian, "I u damna i duh a ni lo'm ni? Pawisa i nei em ni?mawh?" A ti sak sak a. Pu Sawma'n, "Chhuak mai teh u. I fapa ngei sawisaktir duh khawpa nu tenawm hian i fanu damlo hi hmangaih ber niawmin rawn awm suh. Eng emaw tak beisei i nei leh tawh a nih kha.." a lo ti bawrh bawrh. An boruak a sosâng kher mai. 

"Zorina kha khatiang khawpa nâ khan sawisa turin ka ti reng reng lo. Kei pawh hian pawi ka ti asin. Ka inthiam lo rêng a, chuvangin pawisa pawh rawn pek che u ka tum a nih hi" ka nu chuan a ti hlaih hlaih. 

"Kan duh lo. Kan mamawh lo. Ka û chu kan enkawl dam ve mai ang. Kal bo la, kan duh" Zorina bawk. 

"Ka fanu, ka hrin ve tho a ni a, chutin min ti ngawt thei lo. Nu ṭha tak chu ka ni lo pawh a ni thei, mahse, thisena ka zawmpui awmchhun in ni tawh..min hnar thei lo vang" ka nu lah chuan a ti khauh ve fang. Eng chu nge maw a tum le..

Pu Sawma a ding hluai a, "Bawiha,i thurawn ka lo pawm lo kha a pawi a nih hi, he mihringnu hian tum dang a la nei chêu a nih dawn hi, Police phone mai rawh" a ti ta mai a. Ka nu a meng râng kher mai. 

"Malsawm, i zak em? Zawnga, min mantir i tum vel a maw? Nangni pafa hian ka chungah engmah in tithei tawh lo. Case a tawp tawh. Ka chapo e te in tih khanglan le..in retheih theih nen" a ti ta hlawih hlawih a. Zorina a ding hluai a, a nu chu a kai lawk a, kawngla lam a panpui nghal. "Kan dawhtheihna leh i laka kan zaidamna hi fiah suh. Hremna kan pe lo che kha lâwm la a tawk. Ka pa kher kher i hmachhawn a, i vannei khawp mai. Kei chuan ka mantir ngei dawn che sia..haw vang vang la, rawn kal leh tawh ngai suh. " Tiin a nam chhuak a. Nutei pawh a ranga rangin a chhuak nghal. A reh ta duk mai. 

Pu Sawma chu a kun ngaih a, "Ka tihpalh a ni. Ngaihdamna khan a siam ṭhat ka lo beisei a, in nu a nihnaah a chhe ber chu thlentir lo ang ka lo ti ve a. Mami a hmangaih vang a nih lohzia chu maw..a rawn luh phat aṭangin , "Ka enkawl ang a, mahse, thil min tihsak ang" tiin phût a rawn nei nghal a. Eng ang hmeichhia nge maw a nih le" a ti vawng vawng mai. 

"A zuam laklawh che a nih hi..ngaidam kher a. I chak lo emaw a ti tawh a nih kha..mahse, a reh tawh turah ngai ang" Zorina'n a tih chu ka pawmpui khawp mai. Kan chenhonaah hian kan tlawmna te, kan dawhtheihna te hi tute emaw chuan kan chak lohna angah ngaiin min zuam phah fô! An laka kan ṭhatna te hi engtianga rei nge tih hriat châk niawm takin an fiah ṭhin. A châng chuan anmahni anga lo rik ve ṭhak emaw lo dodal ve hmak hi a fuh châng a awm. 

Dar 9 velah in kan thleng a. A haw nghal bîk lo. Exam ber kan zo tawh a. Enghelh tur a awm lo. In chung zâwlah kan ṭhu dun leh ta rial a. A nu in a chhuahsan dan leh an pafa zinkawng a sawi ve bawrh bawrh mai. 

"Ka sawi tawh ang khan ka nu hi ka hre hman meuh lo. Rabung khua kan nia, ka pi te bulah kan lêt leh a niawm e. Tichuan,ka pa hna avangin Serchhipah kan awm leh a. Ka û hi ka nu ang a ni ta. Ka û min enkawl seilen ka ni a, ka pa lah ka nuin a tlanbosan avangin zu bâwihah a lut a, a harhfim chuan a thinlung na lutuk hi a thi mai dawnin ka hre ṭhin..chuvang chuan a zu in kha kan enliam lo thei lo. Eng anga zu ngawlvei pawh nise, ka pa a ni a. Ka nu angin min phatsan ve lo, ka tan a hlu êm êm. Aizawlah kan rawn awm a. College ka han kal chho a, Ka û a la dam ṭha a, ka graduate ve hram. Mahse, ka pa heti mai hi a nih tak avang leh a hlawh a tlem tak êm avangin zirna chawlhsanin ka inhlawh ta a. Insual hi nu tel lo va seilian ni ta na nâ na leh zu ngawlvei pa ka neih avangin hmuhsit ka tawk ṭhin a, chumite ka thungrulh ve theih na awmchhun chu an taksa tihnat kha a ni mai. Ka nunah a bet ti ila ka sawi sual lo vang. Tihian tun hun hi kan thleng a nih hi" tiin. Zorina te unau zinkawng hi a hrana ziah tham a tling hial ang. A remchan hunah kan la ziak mahna le. 

Hun a liam a. Ka nu awm tak loh achin chu kan chhungkaw boruak pawh a nuam daih zawk. Mama hi nupui nei turin kan nawr fô a. A nui mai zel. Vawi khat erawh Sangkimi chungchang ka zawt a. "Nei mai la" ka tih chuan, thutak deuhin. 

"Thinlung pakhat,hmangaih pawh pakhat..mahse, engtikahmah thleng ngai lo tur.." tih ringawtin min chhang. A ngaihna ka hre chiah lo naa, hmangaih a nei tawh tih a lang. 

"Mam, Mapuii kha.." ka tih mêk laiin ka hmui a rawn hup a. "A hming sawi tawh suh. A ṭha em?" A ti hniam raih. Ka ngawi chiang khawp mai. (Sangbera love story hi chu thawnthu pakhat daih a nih avangin kan zep tel lo mai ang. Remchangah kan la ziak dawn nia) 

U Zonuni pawh Zorina'n a zuk hruai leh a. Kar hnih zet an zu thang. Ka ngaihzia chu aw..darkar khat dawnte kan inbe ṭhin. Hma an sawn a, ka pa ang deuh khan zawi zawia hmasawn tur a ni. Amah U Zonuni'n a tum bawk a, a dam vat ka beisei. An rawn haw hnuah pawh ka tlawh ve fô a, Zorina hian a va pui nasa tak e aw. Zing tâwkah in chhung dungah kal an inzirtir a, Zan mut hmain a u kawng hnuai lam chu malisin damdawi a hnawihsak ziah bawk. U Zonuni pawn a nau tumruhzia hriain theihtawp a chhuah tih a hmasawn dan aṭangin a lang. Pu Sawma pawn zu a thlah fel ti tawh mai ang. Mama'n Tanhrila kan ram kha a enkawltir a. A taima bawk a, huan pawh hmuh theih khawpin a hnuhma a lang thei. Huana a feh loh karah inhlawhna a hmuh ang angah a inhlawh ve a. A pension hlawh tlemtê kha chu khawih che phal loin an dah ṭha ve zel tawh a ni. Zorina'n a puala dawr a hawn ve theih nan an vaiin theihtawp an chhuah ṭheuh mai a ni. Mama'n puih a tum ta a. Hnial mah se, an hnial rei thei ta bîk lo. Zorina duh ang ngeiin a pualin workshop changtlung tak dinna khawp pawisa a puktir ta a, Tuikualah tho Zorina chuan a hawng ve ta. Hlawhtling tia sawi theih ni lo mah se, mi hnuaia inhlawh a ngai tawh lo ringawt pawh chu thinlung takin ka lawmpui a ni.

Zorina nen kan inkar a ṭha a, a nuam a. A hlimawm êm êm. Nuihzatthlak deuh pakhat ka sawi hmaih phal loh chu, zan khat a rawn leng chu sawi tur êm êm hi kan hre tawh si lo. Games ka download chiam a, Inkah lam chi hi ka tui vak loh avangin Zorina pubg khel ve ziah pawh ka hau ṭhin. Kan pahniha khelh dun theih, nuam si ka zawng nasa ṭhin. Viteii khelh ṭhin, Fashion week ka khel ve chhin a. Mi pahnih thawmhnaw inchawih leh a hun leh hmun azira incheina hmanga inelna a ni. Ka tui ta viau mai a. Zorina chu khelhtir ka tum ve ta. Ka ngaihtuah zawng pawn ka nui vur vur thei. A mizia leh a hnathawh zawng zawng nen a inrem lo lulai êm a ni. 

"Kha hei hi xender on rawh, khel ve rawh. Kan inêl ṭhin dawn nia" ka ti a. A on ve mai, ka thawn a, a lut chiah chu a chek hluk. "Eng nge awmzia?" A ti hû a. 

"Tihian, kan inel ang, online games a nia. Ka lo add che ang a, i lo accept dawn nia. Ni khata pawisa hlawh tam zawk zawkin eitur kan show ṭhin ang" ka tih chuan a nui huk a. 

"A va ho ê..tiangte chu a.." a ti bul bul. Nuihza insûm zetin, "Pubg tih vel ka thiam ve si lo va, kha kha kan khelh dun theih ber a nia, a nuam lutuk" ka ti tlat. An en ṭhin, a tui lo tih hi a hriat ngawih ngawih. 

"Kha ka lo add che aw" tiin a phone-ah chuan ka accept a. "Ka lo invite ang che" ka ti zui. Kan khel dun ta alawm, awiii awii! Winter-ah te khan bikini nen a rawn ramp ta ṭhin a, Formal-ah pawh sexy tak vek. Thawmhnaw engkim chu a themlem zel a rawn ha chhuak ta ṭhin a. Sports-ah chiah a chak.."Sexy ringawt i ngaihtuah a..i â mi? A season milte kha ngaihtuah ta che" ka ti hlak hlak a. 

"A nalh êm kha" a ti duh lek. Eitur a show zing khawp mai. Vawikhat a dawra kan class bang kan pen haw ṭumin Buanga leh Johna te an lo awm ve a. 

"Ekhai! Teber, inpa hian nulat a tum a nia aw. Hmeichhe fashion show kal lai game a khel ṭhin" an lo ti sawt sawt. Ka nui vak vak a, amah Zorina lah chuan nui miah lo hian, "Ama min tihluihtir alawm..a tûm bâr zel sia, ka tih mai lohin..mahse, hei a nuam reuh tawh lutuk" a la ti zui a! Desy lah chuan, "Lalbuang, khel ve ang. Inlak pa vak a ngai lo. I khel ve dawn hrim hrim" a lo ti. Kan va hlimpui tak. 

Au Bawiha nuna hmeichhe pakhat a rawn lang a. Tudang ni loin Viteii a ni! Mak ka ti hauh lo. Ka nu awm loh hnu phei chuan an inhnimhnaiin Parvula te hi an bual dun zing riau zel a! Au Bawiha room a tifai deuh mawlh mawlh zel bawk. Au Bawiha chawhmeh duhzawng kan hmeh zing riaute chu Mama pawn vawikhat chu, "Vite, Bawng hi kan vulh em ni? Samṭawk hi a va rem har êm êm ve le" a ti fiamthu tawh. Kan nui vak vak a, Au Bawiha lai chu Mama'n, "Tlangval, Kei aiin hmasa rawh" a ti sup..Viteii felzia leh rilru tluanzia hrechiangtu kan ni bawk a. Ka lawmpui lutuk. Au Bawiha zawk hi a lâi ṭût zel a! Mahse, Chhunah a hnathawhna aṭangin kan inah kher thingpui a va in ziah danah ka û hi mi chut leh zakzum over a ni lo tih ka hre ve chiang e. Inneih erawh an hmanhmawh lo. 

Friday zan Zorina nen thatchhe zeta kan ṭhutdun laiin Desy'n min rawn call. "Awii,.Te, ka zak em mai. Vanlalruati leh Kima te an tlan dun daih! Kan thinrim lutuk. U Vani a zahawm bawk si, a ṭap a ṭap mai" a rawn tih chuan, Hmana ka thil hmuh ka lo sawi chhuak lo kha ka inchhir nghal. Lo sawi ila, Desy chuan tihdan te pawh a hre tur. "A va pawi tak êm.." ka ti vawng vawng a. 

"Ka pain a tuithlar dawn. A zak lutuk leh rilru na lutuk hi ka khawngaih" a rawn ti hlawp hlawp. A unaute an fel tehlul nen, Ruati hian a chhungte a va timualpho zing tak. A pawi êm mai. 

Zorina pawn a hre pha ve vek a, "Lo thlir reng rawh, an innei hlen miah lo vang. Mi rilru na lutuka siamtu te hi an tluang hlen ngai lo.." a ti nghut nghut mai. 

Zorina piancham nî chuan kei pawh class ka kal lo va . Nilênga awmdun kan tum a ni. Hlimen lamah kal in park kan tlawh a. Tlema daihlim deuh lai, a thengthaw lai siah puan phahin kan ṭhu dun a. Boruak a lum tawh lo va, a zia viau. Couple tshirt a lo chah ve ngat kan ha dun a, kekawr dum ve ve kan ha bawk. Ka gift leisak chu ka pe a,. Kan pahnih thlalak dun, ka frame tir bakah envoelope a awm a. Maktih hmel deuhin a hawng a. Lehkha chu a lo chhiar ta. Hamhaih zetin min en a, "Tak tak em ni? Ka dawng thei lo vang hei chu" a ti thâm ṭuak. 

"I dawng ngei tur a ni" ka lo ti nghet charh. Chu envelope-ah chuan eng dang a awm lo. A dawr hawn nana Mama pawisa a puksak a la rulh bakte kha ka rulhsak tih ziahna mai a ni. Mahse, a birthday hma khan ka ngaihtuah nasa a, kei he lamah hian ka ngawng riau a, eng nge ka pek ang aw tih ka ngaihtuah khan, a tana hlu ber tur nia ka ngaih, a pawisa puk rulhsak chu niin ka hre ta a. Mama bula ka sawi chuan a lo remti thliam bawk si. Ka ti ta mai a ni. Tikhan ama pual tak takin a lakluh ang ang chu an chhungkaw ta a ni tawh ang. Min rawn kuah thawk a, "Ka lawm e aw..Te, ka hmangaih che. Vawiin hi ka damchhungin ka theihnghilh tawh lo vang" a ti mawlh mawlh. Ka hlim takzet kei pawh. Ni e, he nî 17, December hi ka bialpa ka hmangaih em êm birthday a ni miau a..

Eiturte eiin kan titi a. A changin games kan khel bawk. Pubg min zirtir ve ṭan a, "Bawk rawh" a tih ruala ka bawh theih kha a tawk reng. A changin a awmna lai ka hre lo va, ka zui thiam tawh si lo, a rawn lêt leh nge nge zel. Frying pan bak hmanrua ka chuh ve hman bawk si lo. Ka keng ve tho zel. Chhuk dan ka thiam tawh loh avanga motor min bomb hnan ṭumte pawh kha hun hlimawm a ni vek e. Ni pawh a lo hniam ta viau a. Chaw kan ei chhuak dawn bawk nen, hawn lam kan hnaih ta. A bike dahna bula lo ding khawm laih te chu an rui angreng a. 

"Ehe! Zorina kha i ni chiang..insual thiam kha..i la thiam em le? Ṭhianpa" pakhat chuan a rawn ti thâwr a. 

"Thiam tawh nang" a lo tihsan. Zu rui ṭhing ka tih ang chi mi tihbuai châk tlatna nun a nei a ni chêk ang chu.." Hawh, tah hian ti ve ila, street fight a ni mai" a ti ham ham. 

"Ka cho lo che, ṭhianpa.." a ti dam thlup a. Keiin " Kal vat ang" tiin ka lo kai bawk. A bike-a a lawn tawh chu an zinga pakhat sam tibuang thur mai hian, "In nu hi kan lo phur haw zawk dawn mi?" Tiin min rawn kai ve ngawt mai a. Englaiin nge Zorina chu a bike atanga a lo chhuk hman ka hre lo, chu sam buanga chu lei charah a hmai tauh zawngin a nem thlu ṭhuai mai a. Ka rak ṭhawt. Posi an lak nghal avangin, "Te, bike bulah saw va ding rawh. Hlau suh" a ti zawi ruih a. Ka phei vat. A tira rawn tibuaitu khan a va bawh dawn a, awlsamtêin a lo hnek dak âwrh. A hnar a thi nghal puat, pakhat thau lam rawn phei mek chu a tlawh chawrh bawk. An rui êm a, an che thei lo a ni bawk ang chu. Mahse, Zorina tihbuai chu an inchhir ve tho ka ring..hehe..an chawh ka ti viau. 

A rawn phei a, "I ṭha em?" A ti sup a, ka lo bu vat. Bike a tinung a, ka chuang tharh. Kan tlan ta nal nal mai. 

Ka phone a rawn rik sek avangin, "La rawh, a pawimawh a niang" a ti a. 

Au Bawiha a lo nia. "Aw.." ka tih rual chuan.."Ka nu kha pasal ang deuha a awmpui khan thah a tum a. Tunah ICU-ah a awm mêk" a rawn ti a. 

Zorina ka hrilh ve nghal. 

A tlan muang sawt a.."Kan thiltih phuba hi kan damlai ngeiin kan hmachhawn ṭhin. " A ti chang rût.. 

Zangkhai zet hian, "Min rawn kuah teh..ka tlan chak dawn a nia.." a ti zui zat. Ka kuah ve ta vat a. Kan ṭhianten min lo nghahna, kan zanriah eina tur hmun lam panin kan tlan ta vawn vawn a…

A TAWP TA.