Zor 9

ZÔR…(9)

Ziaktu : Toni Râlte

"Ti nge a beidawn ve ngawt a?" Ka ti chang fak a. Mama chawp hian ka ngei dawn ringawt. 

"A ngaizawng che tih i hria lawm?" A ti ve mai a. 

"Min ngaizawngtu apiang ka lo duh dawn tihna em ni?" Ka ti hâ a. A thinrim lo tih hriat takin a nui suk a. 

"Zorina ai chuan a laktlak zawk lo em ni?" A ti a. 

"Ka duhzawng a ni hleinem. Zanin aṭang khan ka ten riau lehnghal" ka tih takah chuan a nui ta hawk hawk a. Ka chhip sama rawn tuai pahin, "I lo chimawm thiam ve tawh mang e. Mahse, Zorina chu kalsan turin i rilru i siam tho a ngai a nia" a ti a. Ka chhang tawh lo, awmzia a awm dawn chuang lo.Mama leh Au Bawiha te hian adopt ka ni tih ka hria tih hi an hriat loh ka duh ve tho. Ka hria tih hre ta se, min care lehzual ang a, ka nat emaw hrehawm ka tih hlauin an danglam vek dawn. Chu chu ka duh lo. Ni e, kha chen an fanu leh an farnu angin ka lo chenpui tawh a, ka nu leh pate bakin ka inhre tawh tih hi hre lo law law se, ka tan pawh a nuamin a zangkhai zawk ka beisei a ni. Ka mu ta daih a. Ka mutui khawp mai. 

Ka tho nuam ta deuh e. Viteii lo awm leh ta chu tho tlai ta deuh pawh ni ila hmanhmawh buangbara chet a ngai ta lo. Lehlamah Viteii kutah engkim daha mâwn hmeta lo ṭhut erawh ka duh bik lo. Tukṭhuan ka bar sawk sawk a. Desy nen bawk kan zirna hmunpui lam kan pan leh ta. Ruati bawk kha ka hrechhuak leh ṭhin. Engtin emaw hmalak dan tur hi chu ngaihtuah a ngaiin ka hria. An lo inkawp a nih ngat chuan an mualpho vat dawn tih a lang reng. U Vani a khawngaihthlak dawn bakah Desy te nena an inkar thlengin a chhe vek dawn. Ti nge mipa lerh hian an tar hnu thleng pawn an sim theih loh le aw…hmeichhia hi chu thilsiam danglam tak zawng kan ni. Nulat laia che ho ve tak, tlang sum tih theih thâwthânga khawsa te pawh pasal pangngai tak an neiha chhungkaw pangngaia an lawi luh chuan hmeichhe pangngai, nupui leh mo ṭha, fate tana nu ropui an ni leh thei mai zel a. Tlakna leilungin a zir te pawh hi a lo ngai viau, chutihrualin mi ṭha chhungkuaa lawi pawh anmahniin an tum miau loh chuan hmeichhe sual takah an chhuak thei tho. Tin, hmeichhiate hi kan va chhel tak êm aw. Tunah pawh U Vani chu an pain khati khawp khan a tina a, a bialnu lah a rawn zâm lo nasa si. "Bawihteii avangin ka tuar" a ti rêng a. Fate chu la nei lo se, a tumtawk hmu lo bik pawh a ni lo reng reng, a ṭhen daih tawh ang. Fate avanga pasalte leplerhna, zu ruih sualna ..hetiang an han tuar dai ṭhakte hi aww…an ropuiin an ngaihsanawm ka ti. Chutihrualin , "Nupa innghirngho reng kara fate seilentir zawng an ṭhanlen nan a ṭha lo ve" tia pasalte tel lova fate avang tho va khawvel âr khaw thim dai ve chawm te pawh ngaihsanawm tak an ni. Hetiang taka kan ropui avang hian kan lû zawk mipate erawh hnuaichhiaha mipa tlukpui anga awm ve tur ka ti lo a nia..kan hlutna hi hria ila, siam kan nih chhanah chiang bawk ila. Nun leh chenhona boruak a lo nuam mai. 

Zorina pawh a hnaah a kal a. A hlawh hi ka la zawt lo. Hlawh zat inzawh ṭût hi ṭhing ve tak a ni a,. Workshopa thawkte hi Head mechanic ni lem lo hi chu an hlawh a la sang vak lo chuan ka hria. Hei vang tak hian Zorina paw'n tharum hmangin pawisa a hlawhchhuak ta a ni rêng a. Zirna lamah pawl engzah thleng nge a kal tih pawh ka la hre chuang lo. Khatiang lam zawh vak kha harsatna avanga kal zawm thei lote a lo nih hlauh takin zawh nuam ka ti lo a ni. Tin, a pawimawh ber lo. Nunphung leh chintawk a hria a, Lehkhathiam a ni mai. 

Vawiin zet chu Rinpuii ze dik tak kan hmuh belh leh pek a! Nia, an hausa a, kan hre vek. Hausak avanga keini aia dinhmun harsa zawkte hmuhsit leh endawng erawh mi mawlzia a ni. Canteen-a kan chawlh laiin waitress, tleirâwl hâng lam, hmel hmuh nuam deuh hian Rinpuii te chu Lassi a va pe dawn a. Rinpuii bula ṭhu Judy ding thut nen intauhin a lassi ken chu a thlauh ta a. Rinpuii sneakers a per palh a, chutia kai tam pawh a ni lo. Chu tleirâwlte chu zuk bêng a mawle! "Ka pheikhawk hi kum khata i thawh hlawh paw'n a lei pha lo vang. Mawl hî hê lutuk" tih chu a ṭawng duh dan a ni. Mahse, chutia thinrim taka a ân buan buan lai chuan Physics department lam an rawn lut ta a. Valpuia an tih mai hi kei pawn hmelṭha ka tihzawng tak a ni a, chu chu a rawn tel ve. Valpuia te a hmu chiah chu chawp leh chilhin a hmel landan a thlak thei nghal vek mawle! Mak ka va ti tak. Nui sâng chung hian, "Aw..ka mood a lo fuh lo deuh a, ka tihpalh aw..kha hei la rawh..ka tihpalh lutuk" tiin ₹500 hi pek a tum a. Waitress chuan, "A ngai lo, a ho lutuk. Ka thiam loh zawk a nih kha" a lo ti vat. 

Waitress kal hnuah Valpuia te ṭhutnaah va kalin nêm tak takin a ṭawng a, a nui har har bawk. Veng khata awm ho an ni bawk a, inhre ṭha sa tak an ni. Rinpuii mizia hi ka hlauh zawng tak a ni a. Mi dang tilawm thiam deuh, tlawn hiam ching, an ka pawh zên se an seh lo vang tih tur khawpa an tih zawngte laka ṭha leh lutuk ho hi ka ngaina lo, ka hlau ru zawk. A chhan chu an pawisawi palh hlauhin ân chhe theihtawpin an ânkhum a, an ṭawng a hlâwkin an rapthlak takzet. An rahbeh nih ai chuan mal taka awm ka thlang zawk. Tumah ka tlawn ngai lo va, tuman min tlawn lo bawk se ka duh. Ṭhian ve si, an pawisawi emaw an huat zawng sawi hlau reng renga inven ngai te bula awm te hi ka peih lo. Min kawm lo se ka lawm daih zawk. 

Puipuii'n, "Rinpuii hi chu retheihna awmzia a hre lo a ni bawk a, an awmpuite pawn a tawrhhlelhawm an tih teh kha" a ti sâp sap a.

"I va hrechiang âwm ve" ka ti ringawt. 

"An sawi alawm, a hrechiang ten. Awmpui te hi thla 4 danah te an zâwng ṭhin. A awmzia chu awmpui an nei rei thei lo. Tumah kum khat awmpui an la nei lo" a ti ta bawrh bawrh a. Thil mak pawh va ni suh. Mahse, thil dang ka sawi ta daih a. 

Chawhnu class ṭan hma deuhin Zorina'n a lo call a. 

"Thil i ei tawh em?" A rawn tih chuan ka ei tawh thu ka sawi a. 

"In lo pen haw dawn chuan ka lo haw hma ang, sawi chiang la" a rawn ti. Nizan khan kan sawifel tawh emaw ka tia! 

"I inthlahrun viau chuan kan rawn peng lo mai ang. Niminah i chawl tawh bawk sia.." ka ti a. 

"Kei chu chawlh an phal lutuk. Pu hi a fel a, khalam kha chu ngaipawimawh suh" a rawn ti zung zung. A nih chuan Bena beidawn nan pawh pen haw leh ka rilrûk ta a ni. Desy pawh sawm leh tho ka duh, keimah chauh chuan nuam ka ti lo. Fianrial hun kha ka va thlahlel ber lo, a bula awm hrim hrim kha nuam ka ti. A rawn leng zantin thei bik bawk si lo. Kan bâng hma deuh a, main gate bula U Lala dawrah thingpui in pahin Desy ka lo nghak a. Lawmsanga te ṭhiandun pawh an rawn lut ve a, ka bulah an rawn ṭhu. 

"Teber, hei hi i hria em? In veng ami?" Tiin thlalak pakhat hi min entir a. 

"Ka hriat hnu a van âng..tu nge?" Ka tih chuan, "Ka bialnu" a ti zauh a. A nui bawk. 

"Sawi teh, tu nge?" Ka ti leh a. 

"Ani chuan a hria che lawm..tak taka Bsi a nih hi.." a ti ta a. Thlalak kha ka en nawn leh ngat! Ka hre leh si. Mahse, thil dang pawh ka hrechhuak nghal. Mahse, sawi kher ka tum lo. Bsi chu a pi hova khawsa an ni a. A pi hian chawhmeh kharchhawngin ei a zawng a, Bsi û hmeichhia hi mi dawr nghakin a inhlawh bawk. Bsi putea hi taima rumrût a ni bawk. Chuti taka khawsak harsa an ni lo nain, Bsi hi an sawi rûk danin call girl ang deuh hi a ni awm e. A thawmhnaw leh a bag, a engkim mai chu zep nâk emaw an in leh lo leh a chhungte eizawnna nen a inphû lo ve bawk a. Kei aiin engkim a nei changkangin a nei manto zawk. Mahse, thil ka hrechiang bîk lo va, a bialpa bula sawi thawt thawt chu ka duh lo. 

"A fel alawm" ka ti ta zawk a. Ka inthiam chiah lo thung. Lawmsanga hi sawi tawh angin a hmelṭha a, a palianin an neinung bawk nen, a nun a tlawmin a chapo lo fahran si a. Bsi tan chuan ka lo ui ve ringawt pek! Amah Lawmsanga ka va star e tihna erawh a ni lo a nia. Mi ṭha takte hi chuan mi ṭha bawk hi an lo phû e. 

Desy te an rawn bâng ta bawk a. Zorina te ina pen chu ka lo sawi vat a. Pawi tih hmel deuhin, "Awiii, Te, pawi ka ti. Lalnui'n pheikhawk min enpui rawh a tia, ka lo intiam tawh sia..chu chu a nia, sawi ka tum sa tho a, hawn lamah pwh ka va thlah zuai mai ang che ka ti tho a. " A ti ta a. Lalnui chu a nu û fanu a ni. Kei nen pawh kan inmil hle. 

"Aa..a pawi lo, ka peng lo mai ang. I tel lo chuan ka duh lo" ka ti a. Ka lungawi lo hran lo. Desy hian min phatsan ngai lo miau a, chutiang laklawh chu ka hrethiam lutuk. 

Ner sak chungin, "Ka tel lo pawn i kal thei alawm, in lo inbiak tawh phei chuan..nangmah vanga a lo haw phei chuan" a ti nang nang a. 

"Lawk aw, ka'n call ang e" ka ti a. Zorina ka call ta a. 

."In lo haw tawh mi?" A rawn ti nghal a. 

"Haw dawn mêk, i haw tawh nge i la awm?" Ka ti a. 

"Haw a, hei ka inbual dawn mêk, in rawn tlan chhungin ka zo hman ang" a ti ta si. Nuam lo ka ti ê. Desy chuan min mitmei nasa bawk nen, "Aw le, Desy a rawn tel thei dawn lo va, ka zak e" ka tih chuan, "I ho..fimkhur u la aw.." a rawn ti. Ka peng lo thei ta lo. Lehlamah inah haw ta ila, Bena khan min rawn sawm ta tlat se, ka nuin min nawrlui leh ngei dawn tih ka hria. Khaw thim thlenga Bena bula a dera va nuih kuala polite kual vel kha ka ngaihtuah zawng ringawt pawn ka hah sa..Zorina bulah chuan awm teh poh ila a ni mai lawm. 

Zorina te in chhak kawngpui thleng min thlah thlap a. Hawn lam chu Zorina'n min thlah ve tawh mai a niang chu. Kawngka chu a lo inkhar leh khap a, ka kik kârh karh a. A rawn hawng vat. Tawnzau dum leh boxer ringawt a lo ha a. A lang thar vûk mai , a sam chu a lo hru hul mêk bawk. 

"Khaw nge i pa?" Ka ti sap a. 

"A chhuak lawk a" a ti ringawt. Ka zawt thui duh lo. 

"I u a muhil mi?" Ka ti leh a. 

"Umm, a mu tui reuh tak tak a ni." A ti ve leh mai a. Insi rialin kan ṭhu dun a. Ka kut a rawn hum leh chat. Ka lai leh tawh, ka ning â..

"Lai ve ziah suh, kha i biang a sen leh tawh" a ti sup a. 

"Ka lai bawk lo" ka ti hlar a. Kan nui dun. Kan infâwp lo rei tawh bawk a, min rawn kuah hnai a, min fâwp ta a. Kei pawn ka thiam ang angin ka lo chhang ve. Diktak chuan ka hmeichhiatpuite hi in ni ve em ka hre lo va, kan duh ve thote nen kan inngaihzawna kan han infawhte pawh hian ka chhanletna hi engtiangin nge a lo dawnsawn ang tih ka ngaihtuah zui ngai lem lo. Zorina erawh ka duh ve êm vang nge, kan infawh lai rengte chuan ka fawh hi nuam a ti ve ang em le tih te ka ngaihtuah nia! Ka zei tawk lovin ka inhre ziah bawk. 

Kan infawh zawhah, "Thingpui ka lum ang aw" a ti a. 

"Ngai lo, ka in tawh" ka ti vat. 

"Bena kha a rawn len apiangin lo sawi rawh aw. Eng anga ka laklawh pawn ka rawn kal zel ang" a ti ta daih a. Ka melh vak ringawt. 

"A nia lawm..Kei aia mipa fel, kei aia hausa zawk a nih avang khan ka enliam thei ngawt lo" a ti leh a. A rilru tur âwm chu ka hrethiam reng mai. 

"Bena kher chu thik suh. Ka ten a nia" ka tih chuan a nui hawk a, "Hmeichhe ho tak hi chu aw..mi ten ringawt suh. " A ti a. Ka hmui ka tipawrh zauh. 

"Zaninah ka rawn kal dawn lo aw" a ti leh a. Kei ai mahin kan awmdun chuan a ṭawng duh tawh zawkin ka hria. 

"Umm, hla ka zir ka ring, kei pawh" ka ti a. 

"Mipa bulah va ṭhu hlek suh ang che" a la ti zui. 

Ka phone a rawn ri ṭût a. Awiii! Lâna ber kher lehnghal. Ka hmet thim a, ring ral se ka duh a ni. Min melh rulh a, "La ta che" a ti nghut a. 

"A ho mai mai" ka ti a. 

"Tu nge?" A ti ta si. Ka hrilh ve mai a. "I ex maw" a tih chuan ka bu nghat. 

"Ex te em êm chu ka thîk lo vang. La duh ni la, i ex a ni nang..a ni lo'm ni?" Tiin min rawn melh a. Ka lo nuih ringawt. Min rawn fâwp leh a. Mahse, kawngka rawn inhawng ṭhuai thawm avangin ka in la hrang vat. Zorina pa rawn pai lut khut khut chu inthlahrung zetin ka lo en reng tawp. Ka bialpa inthlahrunzia ka hmuh vang khan ka lo inthiam lo ve ringawt..ka khawngaih takzet. Zorina pa hi Pu Malsawma a ni. 

"Pa, fimkhur rawh" Zorina chu a ding uaih a. A pa chu a va kuah nghal vat. Pu Sawma chuan, ṭhut hnawk pahin, "Zoliana leh Remthanga ten min phatsan a, ka lawm lo. Ka zu leisain an rui a, an leisa min khilai phal leh mang si lo..khaw nge ka va hnek teh ang" a ti chhar chhar a. 

Thawh a tum uaih chu Zorina'n a lo chelh vat. "Muhil rawh, kha kal pawh i kal theih loh kha..mu hahdam rawh" tiin a mut luihtir a. Chutia a fapain a han nawrluih takah chuan phun nuah nuah chungin a mu ve ta mai bawk a. Kei pawh hrehawm ka tih deuh avangin, "Ka va haw ve tawh mai dawn mi ka ti" tiin Zorina ka melh a. 

Inthlahrung tih hriat ngawih ngawiha min melhin, "Nia, hrehawm ka ti..ti mai hi kan ni sia. Ka va thlah ang che" tiin kawngka lam kan pan dun a. Kawngka pawh pawn lamah a kalh hmiah mai. A ṭawng tlem ta viau bawk. Kei lahin sawi mai tur ka haihchham ve bawk si. Ngawi rengin kan veng lam kan pan ta a. Kan in kawt zawnah a ding chat a, "Ka rawn peng tawh lo mai ang. Rawngbawlte ka la ngai sia" a ti a. Ka phût lo hrim hrim..kan inthlah ta phawt a. 

Ka inbual a, ka inthlak zo ka va chhuak chu ka nu chuan, "Bena'n a nghak reng che a, eng êm em nge i tih khawtlai a?" A lo ti hlak hlak a. 

"Zorina te inah ka leng a" ka ti ve ngat. Ka nu tak a nih loh vang ni lovin Bena a sawi peih lutuk ka nin vang a ni. 

"Eng nge i tih a? I zak lo'm ni? Mipa ina lente chu?" A ti hlar a. A awki pawh ngaihno a bei tehchiam lo.

"A û damlo ka kan ve" ka ti leh hmiah. 

Viteii inbual tura bathrooma a luh rual rualin, "Ka fa tak i ni lo tih i hriat aṭang chuan i chaltlai sâwt hle mai tiraw? Ni e, tette aṭanga enkawl seiliantu che i nu hi min lo zah ta lo hle mai" a ti ta a. A sawi ka rinsa deuh vangin, zaidam tak hian..

"Nu, i ngaihdan ang kha a ni lo. Ka chhanlêt nachhan che chu Bena i sawi peih lutuk hi a ni. Engtikawng mahin ani saw ka duh dawn chuang lo" ka ti a. 

"Saw aia ṭha saw i beisei em ni? Nang ve tehlul khan ani aia ṭha saw piang nawn leh mah la, i hmu lo tawp ang" a ti kher a. 

"Ka lawm daih zawk. Piang nawn leh mah ila, ka duh dawn chuang lo va" ka lo ti. A thinrim tawh hle tih ka hrethei, mahse, ka thinrim duh miah lo thung. Ka û a rawn haw ta hlauh a, kan sawi zui ta lo. Mama erawh Bena te inah chaw a ei dawn a. Kan eisan. 

Zanin chu hla zir ka peih leh vak si lo va, lehkha ka'n zir ve teh ang ka tia..ka inchhawp hnawk ve rum mai. A mooda ka chen laklawh chuan lehkha ka zir loh hlek chuan ka khua a har vawng vawng zel. Coffee ka in chak thut a, ka va lum a. Ka chawh mawlh mawlh laiin Mama a rawn haw. Ka ngaihbel em mawni a mitmeng chu a dik lo. A rui niin ka hria. Ka la sawi lo tak a. Mama hian zu han in ve zauh a ching a, chutianga rui chhe khawpa a in ka la hre lo thung. Au Bawiha erawh thawkkhat lai khan ganja a zu ṭhin a. Ka pa leh Mama ten nasa taka an hauh hnuah a sim ta a. Aman a bula ka mut ṭumin, "Ka zakzum sia, weed ka zuk hian ka confi sawt a, bialnu te bulah pawh sawi tur te ka hre ve ṭhin" a ti. A ni maithei. A mizia hi a ṭhing tih tur nisi lo hian, a chut ka ti dawn nge a ni ve hûih zel a. A ṭawng tam lo hrim zawk a, a lang lo mai mai. Mama chu in chungah a chho nghal a. A mood a ṭhat hmel vak loh. Coffee chu roomah ka la phei a, ka in pahin phone ka khawih pah. Whatsappa ka luh chuan Desy nau Ruati hnen aṭangin msg ka lo dawng a, ka en vat.

"U Te, hman zana U Kima nen min hmuh kha ka û hrilh suh aw. Ih maw, U Vani nen an buaina, a hmaa a bialnu ve deuh nen khan kan inhria a, an la inṭhen si lo va, tihian min hmang ṭangkai a. Hman zan khan ka inhmuhpui a nih kha, i rawn phei hma khan a bialnu chu a haw tawh a..nuam lo ka ti lutuk a. Ngaih loh lamah i lo ngai ang tih ka hlau bawk nen.." a rawn ti a. Vawi hnih ka chhiar nawn, awihsak tur a nih leh loh pawh ka hrethiam lo e. Ka awih hreh deuh. Mahse, sawi chhuah chu ka tum hran chuang lo. Keima tawkah pawh buaina ka ngah ve rih êm mai. 

Lalchhandami'n min lo call teh hlawl a, "Lo inzêp thei ngei mai a. Chiang taka min hrilh ve ka lo beisei a" a tih chuan ka nui ringawt. Ka inthiam lo ve deuh, mahse, a hriat daih tawh ka rin vang a nia. Bakah Rpa nen min hmehbel ve bawk nen, Zorina nen zawk kan ni tih han hrilh tawp kha ka zak ve deuh a ni ber. 

*Hrilh che ka tum reng alawm" ka ti tho va. 

"Hmm, tak taka veng nasa rawh aw, a luck a nia" nui har har chunga a tih chuan, "Tu te lakah" ka duh aiin ka thutak. Ni e, hretu an tam ve nek a, tleirawlho duhzawng tak a ni tih ka hai hlek lo lehnghal. 

"A atchilh nasa bertu chu an in luahna te fanu saw a nia. Melody..ani lakah sawn veng nasa ber rawh, midang chu an nasa ve lo" a ti ve mai a. Ka rilru a nuam lo ringawt. An in luahna te an ni sia, a tan biak chhiat a nuam dawn hauh si lo. Ka thîk nghal ngawt. 

"Melody chu eng ang rual nge?" Ka ti ve zel a. Ka zak buai peih vel lo.

Keini ai chuan a nau deuh ang, a chhe vak lo. A lerh vak lo naa, mipa ngam deuh ang type hi, ka sawi thiam lo. I hrethiam ang" a ti duah a. Ka hrethiam tawp si lo. 

"Chu! Ngaih a va ngam lo ve" ka tih chuan, a nui vak vak a. "Nghal ringawt a che. Zorina bialnu ka hriat awmchhun i la ni aw. A duh ve hle che tihna a ni mai" a rawn tih leh takah chuan ka nuam huai mai. Kan dah tak hnuah erawh lehkha zir lamah rilru pek a har ta hle. Ka tilui tho naa, ka tirei ta lem lo. Ka mu ta daih a. Zorina nen hian mut dawn leh thawh hlima kan inwish bak hi chu kan inbe tam vak lo, kan hman ve ve deuh changa eng emaw kan han sawi ve hluai hi a ni mai. Kei tiang kawngah hian ka khirh lem lo. Ka û te aṭang hian mipa tana intext reng hi a lo peihawm reng lo tih ka hrechiang a, ka hrethiam viau. In call tawp hian a zia zawk mah e. 

Inrinni a ni bawk a tiin ka'n mu âm deuh teh ang tih ve nâk alaiin ka nuin min rawn kaitho a. "Va bazar mai rawh, Ka nuam lo lutuk a, Viteii'n rawng a bawl a ngai sia" a rawn ti. Dar 6 a pel âwrh. Mut ka kham vak lo naa, chhunah ka mu mai ang ka ti rilru. Ka inphihfai sawk sawk a. Tho phang zetin bazar lam panin ka tlan ta nghal a. Lei tur list a ziak thlap a, a lawmawm. Ka haihawt lutuk a, bakah ka ei châk zawng emaw kan siam vak ngai lohte hi ka lei ve ṭeuh zel a. A tawpah a chhe leh mai mai zel. A uiawm. Keimahin ka vei thoh thoh a, Bawngsa ti chiah lei ka ngai ta. Ka bag ah pawh a rit ta viau. 

Bawng sa ka lei fel a. Ka nuin bekang min rawn chah leh sia, ka va lei leh zawk zawk a. Ka let leh dawn chiah tihin bawng sa zawrhna aṭanga Zorina leh hmeichhe pakhat rawn chhuak dun hi ka va hmu ta a. Ka ding chawt. Ka lam an rawn hawi lo hlauh. Hmeichhia chu a sam a sen thar a, hmai tûng lam, ria ve lam deuh, vun êng lam a ni a. A hmelṭha tih vût tur chu a ni lo naa, a chhe lo tih theih tur a ni. A titi sar sar a, Zorina chuan a ngaithla ṭha hlein ka hria. Ka thinah hian engin emaw min hnawh ka ti mai. Ka tawt up up mai a. Ka luakte a chhuak dawn dawn mai. Mahse, inpet ruhin an hnungah ka pen ve ta pâwk pâwk a. An din deuh leh ka ding ve zel a. Zorina chuan basket a khai a, thlai lam a awm nual mai. Half pant dum hain tshirt pawl a ha bawk. Ka scooty dahna ka thleng a, an ni erawh kawngsirah eng emaw enin an ding. Scooty-ah chuan ka ṭhu ren rawn a. Mipui zi nuai nuai kara mi pahnihte chu ka en vawng vawng. Thîkna mei alh hlup hlup chu ka thunun zo ta lo a ni teh chêk ang chu…

Ka phone ka phawrh a, Zorina chu ka call ta a. A ring quit ṭhak. A keng lo êm mawni dawn le. Mahse, ka hmu tih hi a hriat ka duh tlat, ka bag chu scooty-ah ka remfel phawt a. Ka lam pana an rawn lêt mêk chu ka mitsirin ka hmu..ka bul an rawn thleng dawn tihin ka inher zawk a, an hmaah tak ka va ding ta a. A hamhaih eih lo va, mitmeng danglam zawk pawh hmuh tur a awm hauh lo. A kalpui zawk chu a lo phâwk deuh. 

"Kan hnungah khan ti nge i kal char char?" Ka ṭawng hmain a ti ta a nih chu! Awii, ka ngei lutuk. 

"Ka thu thu" ka ti ram hmak a. A nui lo naa, lungawi hmel a pû tlat. 

"Hei Melody a nih hi, in chung nula..Melo, hei hi ka bialnu Teberi chu a nih hi" a ti ta zung zung a. Ka hrilhhai letling. Meloi mitmeng râng leh min thîkna chu intithei ru zetin ka lo melh kar. Mi â nileng ni ta lo ve ve chu kan innuih liam ve thei mai. 

"Ka haw dawn" ka ti thut a. Ka lung chu a awi chiang tawh lutuk, mahse, tihtauh châkna thlarau sual chuan min luh nget nget mai si a. 

"Umm, zanah ka rawn lêng ang" a ti dam thlup a. Meloi ner ru sak avanga nui sakin, "Yes boss.." ka ti sap a. Ka kalsan ta nghal. 

Mipa ṭhenkhat anga ṭawng buai nuai, rinhlelh tur hrima bah nak ang ten awm ve nise ka thinrim kha ka nasa viau maithei a ni. Mahse, chawp leh chilhin ani khan min bengdai chu a ni si a! Nakinah Melody vel kha chu ka la zawt chiang tho ang. An awmdun reng ka remti teuh lo. Tukṭhuan ei hmain room ka tifai vek hman a, ka zângkhai leh ta sawt e. Kan inseng fel laiin Nuteii a rawn lut a. A rawn tlan leh dawn a niang chu ka ti! Parvula bawk ṭha hle hle lai chu a lo pal ve deuh bawk nen, "Nang rêu ruau lah hi, kal teh. I râpawm roh si" tiin a vin nghek a. Au Bawiha awm hnaih lai a ni lo ka lawmzia chu a..

Para lah a rum hruih duh chauh. Ka nu chuan, "Buaina in nei leh deuh em ni?" A lo ti vat a. 

"Nei e..ka hne tawh. Inṭhen hlen ka duh tawh a ni e..tum ṭum chu ka ti tak tak tawh" a ti hlak hlak a. Ka lo ner ru deuh, tihian a rawn tlan hian a ti ve ziah. Thinrim laia thil sawi hi chu bawhchhiat a awl thin êm mai. Ka pa zawkin, "Tihian i ti pûng pûng zel a, rei i rial leh thei tak tak ngai si lo" a lo ti khauh a. 

Nuteii chuan, "Aih, a ni lo tun ṭum chu. Ka tuar thei tawh lo. A nat chhung zawngin dawhthei takin a thinchhiatna leh a âng te ka tuar dai tawh a, tunah a rawn zia deuh a, a farnu ten 'Chumi khami chuan min indan ve rawh' an lo ti dêk dêk a. Amah kan enkawlna senso pawh engtia tih thu loh, a atm card a pe a, "10000 han la chhuak rawh u" a ti leh ringawt a. A damloh theih loh lai pawn vawikhatmah an rawn insengso lo, chutih a hnêkin a nat tirhah an rawn kan ve. Chuzawng chu..mi mah retheih harsat nâk alaiin, Lalawma te zirna sensoah a ngai zel bawk si..hetiang reng reng chu ka tlin tawh lo" a ti ta bawrh bawrh a. A sawi hi a dik a nih ngat chuan, Pa Hmaa chu ka dem hlâwm tawp. Nuteii pawh hian dik lohna tam tak chu a nei ngei ang, mahse, Pa Hmaa bakah a chhungte hi an ṭha lo ve êm mai a, a farnute pahnih ṭawng thei zette sawn ka nuteii hi an tham loin zahna an nei lem lo. Nuteii hian an zik bulhzia leh han tlan tauhna tur a nei ṭha bik lo tih inhriain a dawh ve hram hram ka ti lo thei lo. 

Ka nu pawn a lo vuipui ve viau. Mahse, ka pain, "Vawiin lamte ngaichâng ila, Hmaa pawh a rawn kal a nih chuan kan lo fuih ve ang a" tiin thutlukna a siam ta rih a. 

Kei pawh ka che zo thawkhat ta bawk a. Mut ka tum zet a, chhun mut zawng min ṭhing ziah sia tiin Viteii nen sam kan oil ta daih a. Nuteii pawh tv enin a tlu zâl a, a muhil bawrh bawrh mai. Ka nî a rawn lut a. Nuteii a hmuh chuan awmze nei zeta min rawn melh zauhin, "Exer lain a rawn tlan leh tawh em ni?" A ti sur sur a. Nui chungin ka lo chhang. Ani hi chu a zia hi a dang ve a, nui duh mang hlek lo va thil nuihzatthlak deuh sawi te a chingin, a ṭawngkam bungrua hrim hrim hian nuih a tiza fô. 

Mapuia pawh a hma aia a len tlem tawh thu te a sawi mawlh mawlh a. Senteii chu a taka a kawm ve tawh thu te leh a lo ngaih aia a fel thu te a sawi bawk. Khati dawn rêng kha asin. Mizo te hi chu kan buaithlakna chu tu ten emaw tu emaw chu, "Chutiang khatiang chuan a awm an tia sin" tia an sawi tawh dêk dêk chuan, kawm chiang hlei lo hian awmhmunah ngaihdan tâwk te kan lo neiin kan duhdanin thutlukna kan lo siam ve tawp tawp zel a. Tupawh mai hi han inkawmchiana han inhriatchian tak tak chuan mi sual tak hi kan lo awm bîk lo. Ṭhatna lai nei ṭheuh kan ni a, chu chu hmuh lensak mai tur, tichuan, keimahni bakah midang kan chhehvela awm te tan pawh khawvel nuam kan siam tihna a ni mai. 

"Tak ana..Tei, Ruati saw a lo va nikhua awm lo reuh ve..Desy a'n fel tehreng nen..mi pa a ngaizawng an tih kha Ruati chuan" ka ni chuan a ti leh a. Ka sawi thuipui duh ta lo. A buaithlak. Ka nî hawn hnu lawkah ka pate khawhar in lêng an lo hawng a. Ka pa chu ka ngaihbel êm mawni a hlim loh hmel riau. Ka nu nen an inhnial deuh a ni maithei. 

In chunga puan pho ka seng laiin ka nu a rawn chho ve a, a pangpar ho tui a pe turah ka ngaih laiin thinrim hmai sen ṭeuh hian, "Malsawmsak, i pa bulah engtin nge min lo sawi a?" A ti nghal bawrh bawrh a. Mak ka ti nasa..ka ka hô ringawt. 

"Sawi ta che, i pa nen kan inhmuh thiam loh phah tih i hria em? Hman zan pawn aṭanga ka rawn luh zante kha engtin chiah nge i lo sawi a..mawh" tiin min rawn hnaih sauh. Kut min thlak duh hial khawpin a thinrim thei mawle..

"I sawi awmzia pakhatmah ka hre lo" ka ti sap a. 

"I hre lutuk, nang lo sawi tur midang an awm lo. Nangmah bakin min hmu lo. Khami zan khan pangpar chi a bo leh bo loh en tur ringawtin ka kal. I pa bulah mi nena inhmu ang ten min lo sawi a, hre rawh, i hnawksak ṭan khawp mai" a tih chuan min deng dawt thei. Ka nu chu ka melh tlawk tlawk ringawt. A lo danglam ta lutuk chu mak ka ti takzeta ni. 

"Engmah ka sawi lo, ka pa chu zawt ila a ni mai lawm..tuin nge chutiang thu chu hrilh tih chu" ka ti ve ta a. Ka hamhaih kha a reh tawh a, ka nu min puh chhe lutuk chuan ka thin a tirim tlat! 

"Zawh kual a ṭul lo ve. Nang bak an ni lo. I pa laka mark tihthat tumna tih hriat reng reng, hrereng rawh. Eng ang pawn tum nasa mah la, i pa ro hi i khawm dawn chuang lo. He in chhungah hian chanvo pakhatmah i nei ve lo. Mi chuang,bawlhhlawh bâwma paih mai mai tur kan chhanchhuah hian engahmah inrawlhna tur i nei ve lo" a ti leh ta hlawih hlawih mai! Mi râp zawk. Ka nu ṭawng theihzia leh a ânchhiatzia ka hre ta chiah. 

"I mize diktak chu a va rapthlak ve. I sawi ho kha ka rilruah pakhatmah a awm lo. Chu! Min lo hmumawh tawh hle a ni maw?"ka ti ve ta ngat a. 

Nui sâwng chungin, "Englai pawha i lama ṭang thin i U Mama lahin a support tawh der mai si lo che a. I lak aṭanga a hran tawhzia te hi i hmu thiam em? Kan thu awihin Bena te hi lo kawp ve mai mai la, chanvo te pawh i la nei mai tur..zu ngawlvei fapa, eizawnna pawh nei mumal lo ka thlang e i tia. I chawh dawn khawp.. " a ti tâwn tâwn a. Chhan ngaihna ka hre tawh lo. Ṭawng thei ka intiin ka thinrimin pawisak ka nei lo ve hle thin nia ka inhriat laiin kei chu ka lo la nêp hle tih ka nu aṭang hian ka hrethiam ta chiah. Ka nu dik tak a ni lo te chu ka lawm hnuhnawh letling. Hetiang nute chu chhun pawh ka duh mai mai lo e a. Ngawi rengin ka nu chu ka chhuksan ta a. Ka pa erawh la biak ngei ka tum. Khatianga inpuh chhiat ngawt kha ka duh bik reng reng lo. Mahse, Mama chungchâng a sawi kha chu pawm harsa ti viau mah ila, a dikna chen a awm ka ti. Tun hma ngaihtuahin min thlahthlamin min duat tehchiam tawh lo. Duat hliah hliau ka beisei miah lo nain, Mama hi ka innghahna a nih miau avangin chutia min dô anga a lang pawh chu ka tan a nuam lo hle. 

Ka inbual chhung zawngte chuan ka ngaihtuah nasa a. Ka nu rilru diktak kha. Sum leh ro chungchangah a lo buai der tawh te kha..A thuhrimin a fapate pawh an la awm a, keite chu pasal chhia ṭha ka hmuh chuan chhuahsan mai tur ka nih laiin min lo huphurh lutukte kha mak ka ti. Nu rilru ṭha leh tluang tak ni khan ka hre ṭhin si a. Ka nu tak ni lo mah se, nikhua ka hriat aṭangin min enkawl danah han sawiselna tur ka hre vak lo. Nau khawih leh han chhawnchhaih a thiam lo va, kei pawh kha min duat hliak lo a ni mai. Ka mamawh engkim chu min tihsak vek zel. An fa ka ni lo tih ka hriat tak vang khan engtin emaw chet ka la ang tihte a hlau a niang. A lo ngaihtuah thui mang e aw. Kei lahin khalam reng reng ka lo ngaihtuah hauh si lo. Kan in chhung chu nuam ka ti lo chho dawn a ang ta riau mai. 

Nuteii pawh an rawn ko ta lo nen, a awm tlang a. Zanriah ei laiin Ka u in, "Taka Teber, Zorina te kha Tuikualah tiraw an awm" a rawn ti hû a. A ngaihtuah hmasak apiang hi a sawi chhuak mai zel emaw tih mai tur a ni. 

"Um ni e" ka ti ringawt. Sawi zawm ka duh loh tehlul nen, Nuteii chuan, "Ehe! Zorina nen chuan in lo inhnimhnai tak tak elo! Ka sawi tawh kha aw. Misual, insual hrat si, chuta karah a pa lah zu ngawlvei..in kal thui hmain ṭhen vat rawh" a lo ti tân tân a. Ka hne..tupawh maiin ṭhen rawh an ti sek hi. Ka rilru an tikhauh mai mai zawk. 

Ka nuin, "Ka hrilh reng alawm, a zawm duh lo reuh a nih hi..Doctor pawn a duh reng a. Khatiang mipa maksak lutuk kha a thlang tlat alawm..a la hre viau ang" a lo ti ve hlawih hlawih. Ka chaw ei pawh an titui nek lo ve a. 

Mama'n, "Chaw hi ei zawhtir ve law law phawt u la." A lo ti khauh. 

Ka u pawhin, "Dik chiah. Bakah Nute, i sawi ang em em kha chu a ni lo a niang. Tuikuala ka hmelhriatte ka zawh ho hian a felzia leh taimakzia hlir an sawi. " A lo ti ve hmuk. Ka û te avangin ka chaw ei tur bituk chin chu ka ei zo thei hram e. Ka ṭawng ve chuan kan inhau nghal dawn si a. Inhauh moodah ka cheng rih lo. Ka pa pawhin ka nute chu a khak ve kha. Ei khamah ka tihfelpui leh vek a. Zorina'n rawn len a tum avangin ka lo insingsa ve deuh. Dar 7 leh a chanva rik hma deuhin a rawn thleng a. Mama a chhuak tawh a, Ka u erawh a pindanah parvula nen an awm. Ka nute chuan living roomah tv an en a. Nuteii pawh a awm ve. Zorina rawn lut chu ka nu leh nuteii chu melh zâm an tum emaw tih mai tur hian an lo melh uluk a. Min va run tak. Ka bulah a rawn ṭhu chat a.. 

"Ka rei em?" A ti sup. 

"Rei..i peng kawi a niang" ka lo ti a. A nui suk. Ka nute avangin boruak chu a uap churh mai a. Pawisak loh a har ve angreng riau. Ka hlauh ang ngeiin Nuteii chuan, "Zorin, Teberi kha i rawn rim ve tihna em ni?" A ti ta chiah a. 

Zam hauh lo hian, "Aw ni e" a lo ti hmiah. Nuteii chu ngeiawm râwngkai lek lek hian a nui hak a. "Vanram leh nawhfe ang mai lah ni" a ti a. Chhan tuma ka an zuau laiin Zorina chuan, "Ngati maw? Nute" a va ti a. Nuteii leh ka nu rawn hawi phâwk zet chu ka va hmu chiang ngang mai. Nuteii chuan, "Ehe! I va ngampa ṭan ve, i nuteii ka ni lo aw" a ti chang fak a. 

"Eng nge maw in hriat le? In va ninawm ve" ka ti ta nghek a. 

Mahse, Zorina chuan ka nute lam hawi chungin dam ruih mai hian, "Ka tihpalh..Nu Ramte.." tiin a nui hawk a... Ka nute mitmeng lîng phât chuan min tihlauthawng ve deuh. Mahse, amah Zorina a zâm eih si lo. Ka pa a rawn inrawlh ta a, "Eng nge maw nangni pahnih pawh chu in va inrawlh sek a? Mi nula rim ṭha hle hle lai in va tibbuai sek" a lo ti rûm ve ûl a. Bakah tenis a en a, a bula mi dang ṭawng reng a ngaithei ngai lo. 

In tâwng zui tawh lo mah se, kan boruak erawh an tichhe zui ta tho a. Mahse, a runluih ve nge ni a leng rei ve ta phian. Melody chungchangte pawh kan sawi ve nual kha. Zirna a chawlhsan tawh a, Eng em em a thawk lo. Zorina pawn Melodyin a ngaizawng tih a pha buai lo va, mahse, "Ka hmeichhe duhzawng a ni lo. I tan hlauhthawn tur a awm lo ve" a tih hmak danah ka ringtawk e. Bakah Zorina hi hmeichhe dang chhaikuala bialnute phatsan tur chi mizia a puin ka hre lo. Mahse, mihringte hi kan inhrechiang lo viau zel a. Engpawhnise, ring ve rih phawt mai teh ang. 

A tukah kan inkhawm dial a. Nuteii'n in a lo nghak thung. A tih dan hi a ti ve tak tak dawn te pawh a ni maithei a ni. Zorina avangin ka mil lo ṭan riau lehnghal. Nge ka bialpa a lo huat ve vak ni. Ka nu min ṭawngkhum dante kha engmah ka la theihnghilh miah lo naa, palzam ka tum ruh khawp mai. Engahmah min ngai ta miah lo tih a chiang a. Rosumah tun aṭangin a buai bawk nen, chuvang chuan ka awm awma awm ve zel ka tum hmiah. Ka pa leh Au Bawiha ka la nei alawm le. Tih tak takah chuan Mama pawh hian a hma ang kha chuan Zorina ṭhen turin min nawr vak tawh miah lo. Ka nu hian ka lakah zep a la nei tih pawh ka chiang. Ka nu diktak awmna pawh ka la hrechhuak ngei ang. Chawhnuah Desy te inah ka va leng phei ve a. An ni hi zawng an awm kim phei chuan an awrâwl a ring hlawm nen, an bengchheng thei a nia. Mahse, a nuamin an inpawh daih zawk. Ruati chu ka ngaihbel bawk nge a zûm dûkin ka hria. Mahse, ka be ta bawrh bawrh a, a pangngai leh viau. Desy nuin sanpiau a siam a, ka'n ei ve leh ṭeuh kha. 

Ina ka va haw chu Pa Hmaa leh nuteii an lo inhau nasa mai a. Pa Hmaa chuan ben te a tum uaih uaih mai, mahse, Ka nî pasal Pa Muana'n a lo dang bet a, pawnah an innawr chhuak ta a. An ṭawng thei nupa dun ropui si. Pa Hmaa lah mipa e ti lo chuan a'n dakthei khawp a! Tenawm hluak hluak mang e. "Rami, ka farnute i hmangaih thei lo a nih chuan, ka sah sawm hma sawn i bungrua rawn la rawh" a ti piap piap mai a. 

Ka pain, "Ni e, Hmaa, a zahthlak em mai. Va haw phawt teh. Naktuk zingah bungrua chu kan rawn la dawn nia" a ti ta a. Nuteii erawh thinrim ṭûn siin a ṭap par a. Ka nuin a hnem ve nasa. Kei erawh inrawlhna chi a ni lo bawk a, ka tum buai peih lo. 

Zanah ka nu chauh chu in khawm turin a insiam a. Ka pa chu a nuamsam vak lo a nih hmel, kan boruak kha khati tehnuai a ni bawk nen. Thleng ka sil vek hnuah Parvula ka chulh rimtui leh te tê a. Min ngaina tawh bawk a, ka ngaina ve vek tawh. Ka nu a awm lo bawk a tiin ka pa chu biak ngei ka tum ta a. Nuteii pawh mikhual roomah a tawm daih. Tu tu te emaw a be kual a, an pa hêkna hlir..Pa Hmaa ka ṭan hran lo bawk a, lo inhêk kual vel mai mai teh se. Tih tak takah chuan nuteii pawh ka nuteii diktak a ni lo bawk nen. Mahse, a chang chuan chutia inla hrang anga ka inngaihtuah chuan ka inthiam lo deuh ṭhin. An mi lo enkawl tawhna te, ka zirna senso, ka mamawh engkim..vawiin thleng ka la damkhawchhuah ve theihna chhan hi anmahni vang liau liau a ni a. Zahna chu ka lantir zel tur a ni. Ka nu erawh nimin kha chu a ngaihna a awm ngang lo a ni e. 

Ka pate roomah chuan zum zetin ka lut a. Ka pa chuan an khum bula dawhkan kilin eng emawni a lo ziak mual mual. 

"Pa" ka ti sap a. 

A phu deuh zuk mai. Rawn lehhawi vatin, "Ee..aw. lo ṭhu rawh, eng nge ni ta?" Pangngai takin a ti thluam a. 

Khumah chuan ka ṭhu a. 

Bulṭan mai dan tur ka haihchham deuh. Mahse, intichak luiin, "Ih ,pa, biak lawk che ka duh a" ka ti a. Ka aw ka thian kâwk. 

"Umm sawi la, a va pawimawh hmel ve" en pawh min en loin a ti a. 

"Niminah khan anuin i bula thil sawi angin min puh a. A pangpar chi dahnaa midang nena awmdun angin i bulah min sawi a tia..ka sawi bawk si lo va, bakah ka hmu bawk si lo. Ka bangbo êm a. " Ka ti tluan thei ta hram. 

A rum nghut a. A tarmit chu la thla leh te têin, "I sawi hauh hleinem.." a ti mawl tawp a. 

"Nia, .ka lakah a thinur lutuk a" ka ti ve ta zel a. 

 Chiang zeta min rawn melhin, "A zawh leh hunah che chuan, "Au Bawiha'n alawm ka pa chu hrilh" i lo ti dawn nia..a ṭha em?" A ti ta a. Ka ding zawk, "Au Bawiha'n maw?" Ka ti nghek a. Ka meng lian hlein ka ring. 

A bu nghut a. 

"Aw..i u Bawiha hian engmah a hai hleinem.." a ti zawi sup a..