Zor 8

ZÔR..(8)

Ziaktu : Toni Râlte

Ka din tlat avang chuan, Rpa te chuan, "Ti nge? Lo kal ta che" tiin min rawn kai a . Ka lo ṭang tlat! Ka chiâi a ni deuh ber mai. Desy pawh chuan a va hmu ve a, mak a tih hmel ngang mai. Mama chu kal tum niawm takin a ding a, Desy nen a rang arangin bathroomah kan tlan lut nghal. Min hmuh chuan buaina a chhuak dawnin ka hria. Mahse, eng nge a va tih erawh hriat ngei ka duh. He thilmak, eng emaw inthup hi ka hriatchian a ngai. Desy chuan a va bih dêk dêk a, "A kal tawh" ti sapin kan inzuichhuak leh ta a. Zorina te awmna lam chu panin maktih hmel takin kan ṭhiandun kal phei chu min lo en ṭhap. Zorina hmel erawh a buai ve lem lo. 

Johna chuan, "Ngati nge khatia in lêt leh zuk a?" A lo ti ta chiah a. Ka chhan hmain Desy'n, "Ka zun a chhuak lutuk a, chuvang a nih kha" a lo ti vat. Zorina erawh chuan hrethiam hmel a pû. A û chu a hming pawh ka hre ve chiah, Zonunsangi a ni a. Zonun tiin an ko. A taksa dinhmun chu thuhran a rilru lamah tawrhna a hmachhawn fô ngei ang a, chuvang a ni ngei ang, a cher êm êm a, a dâng bawk si. A lo muhil a. A kawng a chin hnuailam phei chu a zuih vek a ni ber e. Hman loh na na na chu kan taksa engkim hi a lo tla dâwk thei zel a nih hi a. Thluakte pawh hi hmang nasa apiang thluak a chak rêng bawk a. Lehkha zir tuichilh laia kan thiam zung zung ang hi a ni mai. Eng em em ka sawi ve lo, ka rilru a buai êm a tin ni. U Zonuni chu enkawl vak dan an hre lo nge, nerve damdawi chuan an jection tho a. Damdawi ina an luh chhan ber chu a nerve vang êm êm pawh ni lovin, ni 3 liamtaa a thaw hah thut kal zel a lo nia! A vanduai êm mai. Dam ṭha pangngai nise, nula hmelchhelo tak ni mai tur hi a nia. A ṭhatlai leh vanglai a hmang chho dawn chauh a, hetianga awmhmun pawh sawn thei lo va han awm leh mai chu! Pathian pawh hi a fair lo tih mai a awl rum rum ta ve ang. 

Nurse ten chhuak tawh tura min tih avangin kan tho suau a. Zorina chuan, "Teber, lawk" a ti sup a, ṭhianten min kalsan. 

"I û avang khan i rilru tihrehawm suh aw" a ti ta a. Ka nui lui ringawt, a sawi avangin ka rilru a buai loh phah dawn si lo. 

"Thil ṭha lo engmah a thleng lo a nia. Min rawn hmu fuh a, a rawn lut ve mai mai a nih kha" a ti leh a. Ka ringhlel tulh tulh thung. 

Ṭhiante an zahawm bakah nurse hoin min tur sek tawh nen, "Lo dam vat rawh u, kha thil kha chu nidangah kan sawi dawn nia" ka ti a. Kan chhuak ta nghal. Hawn kawngah pawh ka ngawichawi riau chu Desy chuan a hrethiam ve a niang, "Khatin ngaihtuah lungrun vak suh. I bialpa tih a hria a, chanchin a zawt satliahte pawh a ni ve thei" a ti mawlh mawlh a. Chutiang chu ni thei tak tak se ka duh hle. Mahse, ka ring hlawl si lo. Ka nu leh Mama te leh kei leh Zorina inkungkaihna te hi eng emaw zawng takin a inthlunzawm tih ka hre tawh a. Kan inthlunzawm dan tak erawh chhui chhuah ngai a ni thung. Mahse, bulṭan dan tur ka hre hauh lo. In ka thlen hnuah pawh tumah ka be hmasa lo, ka pain chanchin min zawt a, bah deuhin dâwt ka sawi tak ngawt kha. Ka mu a, muthilh a har kher mai. Mama khan Zorina bulah, "Ka nau hi ṭhen rawh" tih thu vel a sawi turah te ka ngai thul. 

"I reh hmak sia, i muhil nghal em ni?" Zorina'n a rawn ti a. 

"Hil lo ve. Ka rilru a buai" ka va ti ta tawp a. 

"Buai suh ka tih kha. Engmah a ni lo" hrethiam zetin a rawn ti a. 

"I bulah eng nge a sawi? Ka va ti hram. 

"Ka û chanchin min zawt a, chuzawng chu.." a rawn ti a. Dâwt a sawi ka ring chiah lo. Mahse, ka ngaih a ṭha chuang miah lo thung. Engtin tin emaw ka lo muhil ve leh ta a. Class kal turin ka insiam nghal. Viteii awm lo chu kan buai phah deuh, ka nu lah a lo inthlahdah ve tawh si. Chaw pawh ka ei mumal lo, Desy nen bawk kan inzui thla leh ta a. Timothy nen an chanchin a sawi thla leh mawlh mawlh a, ka ngaithla mumal lo. A atchilh ve thlawt a ni. Pangngai takin ni vat vat se ka ti khawp mai. 

Nilêngin ka mood a off. Desy meuh pawn min kawm hlim zo lo a ni ber e. Mahse, ka bulhnaia awmte tana hrehawm tur khawpa nguina tihlan hi ka duh lo, chuvang chuan lem ka chang tluan ṭhak a, ka hah ngawih ngawih. Nuih lui man hautakzia te hi aw. Ka hlim loh chhan ber han hlin chat tur lah chu ka hre der si lo. A hahthlak mep mep hle. In ka thlen veleh Viteii awm rih bawk si lo, ka nute an lo feh ve bawk si avangin rawng ka bâwl nghal a. Siam thar ngai êm êm a lo awm lo hlauh zawk a. Ka inbâwl zawhah ka inbual nghal. Ka nute rawn thlen chuan ka inpeih fel vek tawh. Class kha nidang aiin kan bang hma ve hrim hrim bawk a. Mama erawh an sumdawnna thilah Kolasib lamah an zin leh thut dawn a, a rawn haw zawk a, a kal lehnghal. 

Zanriah kan ei lai chuan Au Bawiha'n, "Viteii hi engtik nge a rawn haw dawn?" A ti a. 

Ka nu chuan, "Naktukah chuan lo haw ve tawh awm tak. " A lo ti ringawt. 

Amah bawk chuan min rawn enin, "Teber, Bena hi a va reh ve, râwn ka duh riau asin, ka hnungzâng rawn na leh vung vung thin hi" a ti nuah nuah a. 

"Ka hre lo, a reh ve satliah a niang" ka ti ringawt. Zorina a sawi kai hram ka hlauh avangin thildang ka sawi daih. Hla zir zan a ni naa, kal ka tum vak lo. Mahse, Desy'n min lo call ta si a, ngaihtuahna a kai pêng thei deuh ang tiin ka insiam a. Zorina nen vawiin lamah kan inbe tam vak lo. Doctor ten enkawl ngaihna an hriat chiah loh avangin chhuah an dil kha a nia. Mahse, zanin erawh a thawhah a rawn awm leh deuh avangin an riak leh dawn a ni. Kan hla zir chhung chuan rilru a pêng ve bawk a, ka zia viau. Zai hi nuam ka ti ve hrim a; zaithiam phei chu ni ila ka lar tawh ngawt ang. Ka inzir peih dawn sia.. 

Kan bang har lem lo. Hall aṭanga kan chhuak chiah tihin Zorina call ka dawng a, kal muang nghalin ka pick up bawk.

"In bang tawh maw?" A ti a. 

"Umm, eng nge in an?" Ka ti vat a. 

"A muhil ve thei tawh a. Kan zia ve zel ang. Haw nghal rawh aw" a rawn ti a. Ṭawng thawm a hriat vang a ni maithei .

"Haw nghal loh ten. Naktukah in chhuah chuan class ban pahin inah kan lo peng ang. " Ka ti a. 

"A ngai lo" a ti hmuk. 

"Ngati maw? In in ka hmu ve châk" ka ti a. 

"A ṭul ber lo, miin an hmu che ang a, an sawi duh palh ang che" a ti duah a. Ngaihṭhat lohna neihsa nen, an inah lehzel kal a remti lo te chuan ka rilru a tibuai zual daih zawk. Mahse, ka hnial duh lo. Engkim hi ka la hrechhuak dawn tho tho. Kan in thlen hma hian ṭhenawmte puandahna in a awm a, puan hi an tah nasa ṭhin. Chulai leh kan in inkarah chuan street light a awm loh bakah an puantahna chuan veranda light a neih loh avangina êng vak lo va. Ka hlau hran lo, kal ṭhanna a ni bawk a. Chulai thim lai muangchanga ka kal lai chuan zawitea phun ser ser thawm ka hre ta a. Ka hlau lo naa, tu te emaw nula leh tlangval fianrial hun hmang an nih ka rin avangin tihbuai hlau ru takin ka pen zâwi deuh a. Ka rin ang ngeiin chu in phên aṭang chuan ṭawng ri a lo chhuak, tu te tak ni ang maw..ka tih rilru laiin a rawn êng thut a, flashlight an on a nih hmel. Ka va thlêk ve kher bawk nen, Desy nau Vanlalruati leh U Vani pasal Kima te an lo nia! Ruati kha an zinbotir emaw ka tia! Chuan Kima pawh U Vani pasal a ni sia! Ruati te in hnuai an la luah zui! Ka ding tawp ringawt. An ni pawh chuan min rawn hmu ve bawk. Hmanhmawh zetin an phei dun ta hlawk hlawk a! Mak ka tiin min ṭhawng ngei mai. Kima chu leh! A hma lawkin U Vani khati khawp khan a tinain tlawm takin a siam tawh a. Vanlalruati lah a bialpa avangin a chhungte pawn an hauh râwn lai mek a ni si..Mumal lo zetin inah ka lut a. Ka pain amah chauhin tv a lo en a. Amah pawh en chuang lo chuan, "Khaw nge Anu?" Ka ti satliah a. 

"In chungah a pangpar ho a han en leh a nih kha" a ti ve mai bawk a. Kei ṭhawn thut reng tih takah tun ang huna pangpar han en daih chu ngaihṭhat lohna leh rinhlelhna ka nei ta a. Ka lung a phu nghal dûp dup bawk. Ka roomah ka lut phawt a. Ka inthlak leh tê tê, Ruati te kha Desy ka hrilh duh ang em tih ka ngaihtuah pah bawk. Kha bak baka chiang..an ni pahnih kha khatiang hmun reh leh khatiang huah khalaia an lo awm ngawtna chhan tur ka hrethiam pha lo. Mahse, hrilh nghal thawt thawt pawh chu…a tak tak lo ni loin eng emaw vanga inhmu satliah lo ni ta se; ṭawng thei chan ka chang dawn tihna a nia. Ka rilru a insual nasa angreng viau. Engpawhnise, in chungah chuan han chhoh phawt ka duh. 

In chung pan chuan ka chho hnak hnak a. Ka pa pawn engmah min zawt lem lo. In chung chuan chhoh dawn, step bulah hian sintex a awm a. Chumi zâwn ka thlen chuan ka nu ṭawng lawng lawng thawm ka hre zui nghal. Muangchang zetin ka pen a, ka nu chu sintext in a hliahna lai a pangpar chin tharna bulah a ding tih ka va hmu thei. 

"Aw le..ka lo tifel ang,. Sangbera chuan nizanah a lo va hmu a niawm e. Teberi'n a lo hmu lehnghal a, kan hlauh deuh thil te hi a thleng ang tih ka hlau riau a nia. Nangni lah in che muang si.." a ti mawlh mawlh a. 

Ka ding hmak. Tun hun hi a pawimawh lutuk. A ngawih leh vang vang hnuah, "Naktukah a rawn haw leh mai ka ring. Tunah i tihtur chu Teberi nu lo dan kha a ni. A bak Sangbera nen in inkar chu keiman ṭan ka la ang. Keiin Zorina te pafa hneh ka lo tum bawk ang a. Zorina nena kan pawh ṭhen theih phawt chuan engkim a kal tluang mai ang. " A ti leh bawrh bawrh a. Ka hmai ka hup tawp..ka khur hlawk hlawk bawk a, ka thu hriat kha a rapthlak lutuk. 

'Teberi nu' tih thu khan ṭêk tla ang maiin min rawn deng dawt a ni ber e. Ka nu leh pate hi ka nu leh pa diktak an ni lo maw?! Engtin?! Ka bo hlawm tawp a ni ber e. Ka rin phak hauh loh thu mak danglam tak chuan ka ngaihtuahna zawng zawng a chawkbuai ta vek mai. Lalpa, a va mak êm. Ka vir muai muai a, ka tlu mai dawna ka hriat avangin stepah chuan ka ṭhu hnawk a. Ka awmdan tak kha keia ṭawngkam thiamna hian a sawifiah zo lo vang. Nang ni ta la, engtin nge i hmachhawn ve tak ang le?!

Kum 23 i nih hnuah daih i chhungkuate chu i thisen zawmpui an ni lo tih leh fa lâk i ni tih in hre ta la; engtin chiah nge i dawnsawn tak ang le? Kei zawng ka chhe zo ta vekin ka hria. Ka thluak a fim lo va, ka chiâi a, ka lu bûrah hian buaina leh hamhaihna zawng zawng a inhawrkhawm tup tup a ni ber e. Ka nu ṭawng mawlh mawlh pawh chu ka bengkhawn tawh lo. Ka hriat tur ang ka hre vek tawh. Kei hi ka nu leh pa te fa ka ni ve lo tih ka chiang tawh a, a tawk e. A dang hriatbelh zel ka duh tawh lo. 

"Teber…" ka nu aw-ah chuan thlabârna a tel. Hawi pawh hawi let lovin, "Ka hre vek" ka ti sap a. 

Min rawn ṭhutchilh nghalin, "Eng maw i hriat? Eng chu" a ti ta sek sek a. Ka nui nghek ringawt. Ka mittui luang chu hruk pahin, "I fanu ka ni ve lo tih kha mawle" ka ti khur dat a. A thawk hawk danah ani pawh a buai ve tih ka hre mai. 

A ngawi veng veng hnuah, "Ka lo fimkhur tawk lo deuh a nih kha. Mahse, ka fanu i ni alawm..ni lo, ka fanu ang thoin ka hmangaih che" a ti zawi sap a. Mi â ang maia hawi kualin, "Tak tak maw? " Ka ti hâ a. Lainat hmel deuha min rawn melhin, "Tei, kan hmangaih che alawm..buaina tur a awm lo, kan naute i ni reng a, i ni zel bawk ang" a ti charh charh a. 

"Tu nge ka nu?" Ka lo ti zawi raih. 

"A thi tawh" ka rin aiin a chhang rang. 

"A thi lo" ka lo ti hmiah. Hlauhthawn hmel deuh hian, "Heng thil i hria tih i û Mama'n a hriat chuan a kehchhe vek ang, Teber, Mama hian a hmangaih êm êm che tih i hriat kha..i û tina suh" a ti duah a. 

A thusawi ngaipawimawh miah lo hian, "Engvangin nge Zorina nen kan inṭhen a ngaih?" Ka ti leh daih, a âng phuau a. Hamhaih zetin min melh ran bawk. 

"Sawi ta che" ka ti leh, ka aw pawh a nelawm vak loh. 

"Aa..ani chu mi tha a ni lo alawm, chhungkaw pangngai tak kan ni a, ani ang insual mi, a pa zu ngawlvei bawk chu miin an hriatchian hunah min hmusit lutuk dawn asin" a ti bah nuaih a. Ka lo nui leh tawp. Ka nuih a zat hlawl loh vangin , ka nui a ni zawk e. 

"Ka pa ka hrilh dawn, engkim ka hria tih a hriat a ngai" tih leh din ka rual a. 

Mahse, ka rin loh deuhin, "I pa ber berin Zorina chu a duh lo. I rilru tihnat a hreh vangin i hriat laiin a sawi lo mai zawk a ni. Tin, ni e, kan fa hrin i ni lo tih i hria tih erawh chuan a ṭhawng maithei" bahlah miah lo hian ka nu chuan a ti ta a. Engmah ka sawi thei tawh lo. Ka chawmawlh vek. 

Ka pa chuan tv a lo la en a, a hmaah tak dingin, "Pa, tu fa nge ka nih?" Ka ti nghek. A rawn hawi phâwk kher mai. A ding dawn ûk a, insûm lehin a ṭhu leh ta a. 

"Bawihte, eng thu nge i sawi?" A ti thâm ṭuak. 

"In fanu ka ni lo tih ka hre tawh. Reitak chhung fa lâk ka ni tih hi engvangin nge in zêp?" Ka ti tuar tuar a. Ka pa hmel landan chu danglam chak tak a ni. A chau nghal ngawih ngawih niin ka hria. 

"Teber,.inbengdai teh, miin an hre palh ang e.." aw khur dar dar chung hian a ti a. 

"Sawi mai rawh u, ka hre duh a ni. Ti nge thudik chu a hma khan min hrilh mai loh?" Tiin ka ṭap ta a. Ka mittui chu a tla hma, mahse, ka ṭap har ka tih tawh kha. Ka ṭah meuh hi chuan ka na tawpkhawk a ni tihna. Ka pa chuan ka inhup lai chu min rawn pawm chawt a. Ka pa rim ka hriat rual chuan ka tetlaia min pawm vung vung lai te, ka nulat tawh hnu thleng pawha a mal lukhama thatchhe zeta ka mut lai te kha ka hrechhuak zut zut. Ka pa hi khawvela pa ṭha ber niin ka ngai ṭhin. Mahse, kei leh ani hian inzawmna pakhatmah kan lo nei lo a nih chu! Ni e, Au Bawiha nen 6 laiin kan inthlau a, ka nuin nau chhiat anga a insawite kha ka lo awih fai vek a. Ka hmelah ka nu leh pate chhunna reng reng ka nei lo. Ti nge keia pawh hi ka lo va inringhlel har ve le! Engdang a ni lo, ka chenpui ka chhungte hian min hmangaih êm a tin ni..

Ka pa kuah chung chuan ka ṭap hlawp hlawp a. Ka nu pawh a rawn chhuk tawh, kan pafa inthlem lai chu min lo thlir reng ringawt. Ka pa chuan min ṭhuttir a, ka bulah a rawn ṭhu ve zat bawk. 

"Ṭap tawh suh le..enteh, ka naute,. Thudik i hriat avang khan engmah a danglam phah lo. Kan hmangaihna che a bo phah lo va, kan fanu i nihna a bo hek lo. Kan ta, kan neihchhun i ni" a ti dap dap a. Chungte hlei hlei chuan ka lung a tichhe zual. Ka ṭawng thei lo. 

Ka nu chuan, "A bul aṭangin engkim hrilh vek mai ang" a lo ti a. Ni e, chu chu ka duh ber a ni. Ngaithla tur pawn ka intihchak a ngai. 

"Ni e, Pa, sawi vek rawh u, ka dam zawk ang" ka ti sap a. Ka inpetruh bawk. 

Hah hmel deuha thawk la halhin ka pa chuan, "Ni e, ka fanu..,Fanu kan awt ve êm êm a, i nu hian a nei thei tawh si lo. Engtin nge kan tih ang tia kan buai êm êm laiin, Ka ṭhianpa nangmah enkawltu Doctor Hminga puihna kha ka ngen ta ngawt a..aniin fanu kan awhzia hriain, min lo ngaihvensak a. Chutihlai chu Lungleia kan la khawsak lai a ni. Hminga chuan raipuar pakhat a fa tihtlaksak tura Doctor ngentu hi engtin tin emaw a lo hre pawp ta hlauh mai a. Dân phal loh mah nise, a nau pai kha hmeichhia a ni tih a hre bawk nen, min hrilh ta a. Amah vekin rem pawh min ruatsak nghe nghe. Chu raipuar chuan sâwn a pai a lo nia! A mipa khan a nei duh ta lo nen, a rilru mangang khan tihtlak a duh ta hial a. Tichuan, kei hian i nu min ngenna angin chu nu chu ka be ta a. A nau pai chu pai chhunzawma a neih huna min pe turin..chutia min paisaka min pek theih dawn chuan, a inenkawlna senso engkim bakah pawisa fai pawh pek kan inhuam vek a ni. Ani pawh chu sum a lo mamawh bakah a nau pai kha tihtlak a hlauhawm tawh bawk a, a remti ve ta mai a. I nu hian miin fa lâk i ni tih an hriat a hlauh avangin i nu pawh chu kan inah kan awmpui nghal a, nang a nei che a, kan ta i lo ni ta a. Tichuan, ka hna avangin Aizawlah kum 2 lek i nihin kan phei ta bawk a. Aizawlah chuan tuman kan fa tak i ni lo tih an hre ta lo rêng a ni. Chuan, sawi chhuah kher ṭul kan ti lo va, i û te pawn an farnu tak fak angah ngai chein an hmangaih êm êm che a ni. Chuvang chuan, Bawihte, fa lâk i ni tih hi sawi chhuak tawh lo la ka duh a ni. Chhungkua kan ni a. Nih zel ka duh bawk" a ti ta dap dap a. 

"Ka nu chu a la dam em?" Ka ti sap. Ka nu ṭawng kha ka ngaihtuah let a, a la dam chu a nih hmel si. 

"Ka hre hauh lo mai! Lungleiah a la awm emaw a boral tawh emaw a ni maithei. I pianhlima ka hmuh kha ka hmuh hnuhnunber a ni tawh" ka pa chuan a ti a. Ka chil ka lem khawlh, ka nu ka va melh a, chhuat lam a melh daih. Kan ṭhut ṭhap laiin Au Bawiha a rawn haw a. Parvula'n a rawn pan nghal. 

"In va mûk hlawm êm êm, ehe! Teber, i ṭap elo?" Parvula chûl chung chuan a ti a. Min melh tawn sek mai. 

"Ṭap nang.." ka ti ringawt. Ka nu leh paten min ngen ang khan an farnu tak tak ka ni lo tih ka hrechhuak ta hi an hriat ve kher ṭulin ka hre lo. Kan inlaichinnain a tawrh phah ka hlau. Kei pawhin ka û te chu ka hmangaih êm êm si a. 

Ka han mute chu ka ni deuh lûk mai, ka awm thiam lo. Ka la buai angreng. Mahse, ka pain thil awmzia chiang taka a han sawi takah kha chuan tlemin a tira mi den dawt dawtna ang kha a bo deuh. Ka nu chu a la dam a nih chuan zawn chhuah dan a awm ngei ang a. Ka nu sawi hmangah a la dam ngei ni pawn a lang. Ani ka zawnchhuah theih chuan ka pa pawh hriatdan a awm ngei bawk ang. Tuna ka buai rûkna ber erawh fa lâk ka nihna leh Zorina nena kan inlaichinna inzawm ngawt dan chu a ni. Ka nu khan a sawi zawm vek ka ti lo thei lo. Ka lakah thup a la nei tih ka hai hauh lo, mahse, a thil thup chu engti kawng zawng mahin min hrilh ka ring lo. Tin, a fimkhur zual tawh dawn a, chutimaiin kei hian ka chhuichhuak lo bawk ang. Chuvang chuan Zorina zawk hi hriatchian a ngai zawkin ka hria. Ka ngaihtuah a, an ina kal a phal tlat lo te kha..ka harh thut. Ka phone ka en vat a, miscall 3 a lo awm. Amah vek. Whatsappah ka lut a. 

"Engmah i sawi si lo va, muttui le..kan ṭha aw" tih a lo dah. A la tlai chhe lutuk lo bawk a, ka call ta a. Mahse, a ring ral ṭhak. Ka tinawn duh ta lo. A hriat miah loha veh kuala enthlak ruk chu ka hreh bawk si, engtin nge hma ka lâk ang aw..engpawhnise tiin engkim chunga thuneitu Pathian hnenah ka buaina leh manganna zawng zawng chu ka bunruak fai ta leuh a. Ka thawl hawk nghe nghe. Mahse, mut a chhuak lo a ni e. Zeldinna nen boruakah ka lêng kual a, thil tam tak ka ngaihtuah a ni tawp mai. 

A tukah mut kham lo fê hian ka tho a. Viteii a rawn haw tawh dawn a, a zia e. Tukṭhuan pawh ka ei ta lo mai. Mama a awm lo bawk a , midang chu ka palzam thei. Ka scooty kan khalhchhuak ve thung a. Ka damdawi ei ka ngeih nge ka nâ pawh a rawn chhuak khât ta. Englaipawn nachhawkna ka pai thung. Desy ka hmuh khan nizana a nau leh Kima te ka hmuh kha ka hrechhuak nghal. Mahse, sawi ta ngawt ila, ka rin ang kha a lo nih si loh chuan keimah zawk ka mualpho dêr thei. Bakah mi inkar va sawi ve vak kha nuam ka ti lo. Chutihrualin ka ṭhiantha ber nau a ni a, ka mawhphurhna a nihna chen chu a awm ve tho mai. Ka ngawi ta rih. 

Niminah ka mood a fuh lo nilêng tawh a, vawiin lah nimin aiin ka mood a chhe zual..mahse, ka inthunun hram hram a ngai. Mahni inngaihtuah hah vak hi mahni inhremna a ni tih ka chiang tawh bawk a, ka inthunun ve hrâm hrâm..thil pawh ka ei ṭeuh mai. Zorina nen zingkara kan inbiak bak kha kan la inbe lo. Mahse, Rpa ka bia a. "An chhuak dawnin ka hria. Hei Sairângah kan kal daih a.." a rawn ti. 

An chhuak a nih chuan an inah chuan ka pêng dawn êm mawni aw ka ti rilru a, mahse, a remtih lohzia kha ka ngaihtuah a, han palluih kha ka ngam chiah lo. Hriatchian erawh ka la tum khawp mai. Chawhnu lamah chuan ka mood pawh a ziaawm ta deuh. 

"Kan chhuak fel chiah e. Ka û pawh a ṭha e" Zorina'n a rawn ti a. 

"Kan lo peng ang aw" ka tih chuan, "In thu thu" a rawn ti lawi a! Nizan lawkah a phal loh nasat nen, tunah lem a nêm leh viau bawk si. Hriatthiam a har ve ngawt mai. 

"Aw..kan rawn pêng ang" ka han ti a. Kan inbe ta rih lo. Zorina vang ni maw ka mood pawh a fuh chho ta viau a. Bakah ni e, ka pa sawi ang khan ka chungchang thu-ah chuan han lungngaih vak emaw mahni inngaihtuah lungpuâm vak hian awmzia a nei dawn chuang lo va. Ka inngaihtuah hah duh lo law law . Kan bang ve ta hrâm e . Main gate-ah Desy'n min lo nghak ran tawh a. Coffee kan in leh hram. Zorina te ina pen chu ka rawt a. 

"An in awmna i hria mi?" A ti hâ a. 

"Hre chuang nang, a zawn theih ang. Dami kan zawt dawn nia" ka ti a. Ani Dami hi vawiin a rawn kal lo va, an ina a awm chuan zawn hmuh a harsat ka ring lo. A duh aiin ka tlan chak deuh nge ni, "Zorina hmu tura chuti taka hmanhmawhte chu niminah te khan lo kal tawh tur che alawm" a ti hlawk hlawk a. Ka nui hawk hawk. Ka tlan muang ta a. Kan sawrkar chak takin Mizorama Zirna in sâng ber kawng a han ngaihpawimawh takah hian chetsualna pawh a thleng zeuh zeuh, kawng a ṭhat hi chuan tlan chak a lo awl ve bawk nen. 

Tuikual kan thlen chuan Dami te in kan pan hmasa ta zawk a. Kan zu thlen chuan a lo inbual mêk a. A nau mipa zakzum deuh chu kan zawt ta ngawt a. Dami te in aṭangin a lo hla lutuk lo. Kan hre thei mai turah ngai ang. Dami nau sawina bâwrah chuan dingin kan zawng ta a. Kan hmu har lo viau. Building lian lutuk lo hnuaiah a ni a,. Kan luh hmain, "Des, lut hmasa rawh aw" ka ti sar sar a. Ner nâwng chungin, "A hun loah hian zak ve ziah suh. Ṭhing lutuk" a ti hlak hlak. Ka nui ringawt. Kawngka chu a kik ta dat dat a. Patling aw hian lut turin min ti a. Kan lut ta. 

An in chu a zau lutuk lo. Luh chiahin choka zau vak lo a awm nghal a, choka dawtah ṭhutkhawmna pindan a awm bawk. Chumi piahah chuan room niawm tak pahnih a awm bawk. An in chu a te fel ât a ni ber. Rin ai tak chuan a thianghlimin han hnawk rem rum hmuh tur a awm lo viau. A û a che thei si lo va, a pa leh amah ringawt che thei awm ta chu a lo hnawk viau ka ring deuh a nia. Min lo chhawntu patling ka tih kha Zorina pa chu a ni ngei ang, Chokaa chaw ei dawhkan kil chuan a lo ṭhu a, thlangraa buhfai a lo hai mual mual mai. Min lo melh hû mai a, mak a ti tih a hmelah a lang tih a hriat theih. A mitmeng chu Zorina nen danglamna vak a awm lo, mahse, zu a in nasa tih a hnâr leh a biang aṭang chuan a lang chiang viau. A cher chhe lutuk lo naa, zan tam riak pai lo an tih ang deuh hian a vun reng reng a thi bul a, a dâng bûl bawk si. 

"Lo leng rawh u, eng nge in duh ve tak mial?" Harh chhuak thut niawm takin a ti a. A aw chu Zorina aw anga pa a ni. Min lo chhawn pawh khan Zorina aw a ang kha ka ti deuh rêng a. 

"Ih, Zorina te an awm em?" Desy chuan a ti a. 

"Awm e, a û pindanah an awm a niang, lo ṭhu rawh u" a ti sawk sawk a. Kan ṭhu ve mai. Kan zûm deuh dûk,. A tho nalh a, pindan pakhatah chuan lutin Zorina chu a va ko a ni ngei ang. Reivakloah an rawn inzui chhuak ta a. Zorina chu mut hmu ṭha lo hmel a pu deuh. A hmel chu a tha lutuk tho. A nuk suk a, "In lo kal tak tak pawh ka ring lo a nia." A ti ve luam a. Desy lah phawk ta reng reng chu, "Min rawn accident pui lo chauh, i hîp hi a na hle a nih hmel" a lo ti sar sar a. Ka nghawk sawk. A pa kha ka zah ve deuh reuh bawk sia. Zorina chu a nui hawk hawk, a nui hmelte hi a va hmuhnawm tak. Kei hi bialpa dinhmunah ding zawk ila, ani hi ka bialnu ni ta se, ka va fak thiam zual dawn tak. Ka en ngawih ngawih zel ang. Hmeichhia ka nihna hian min titîm mai mai. A ha var rual ṭhah leh a hmui chhah lam lek lek han inchawihzia te chu aw. A lu chu tuai thuakin , "Pa, hei Teberi chu a nih hi, chuan hei hi Desy ..Teber, ka pa aw.." tiin a pa nen chuan min inhmelhriattir leh hnuhnawh a. A pa pawh chu a khi ve suk mai. 

Pa ṭawng tam lo ve tak chu a ni e. A fapa lah hian a chhun tih hriat reng reng. "I û chu a muhil mi?" Ka ti sap a. 

"Aw, muhil tam se a ṭha" a ti a. 

A pa chuan, "Bawiha, Thingpui te hi lumsak ta che. A hmeh pawh a la awm kha" a rawn ti a. 

"A ngai lo, kan rawn kal dawn khan coffee kan in alawm" ka lo ti vat a. 

"A ṭhat chu, thingpui ka lum tui lo thei lutuk a" Zorina chuan a ti nuah nuah a. Desy chuan, "Tihian in pathumin in khawsa a maw?" A lo ti a. 

"Umm nih ve hi.." tih chhanna a dawng nghal zat. 

A pa chuan fridge hawngin Apple pum li, lian vak lo, tai hlar mai hi a va phawrh a. "Kha hawn ve rawh u, kan huanah rah khu a nia. A thlum tui teh mai a nia" tiin saranga a dah hnuah min rawn pe a. " A ngai lo" ti sasâwi mah ila min pe lui tlat si, lawm takin kan lo dawngsawng a. Pa ṭawngtam lo leh zu in mi mah nise, pa rilru tluang tak a ni phawt ang. Sana ka bih zauh a, Zorina chu a la inbual loh bakah hahchawlhte a duh ka rin si avangin, "Phei mai pawh a pawi lo,." Ka ti a. Desy ka melh bawk. 

Mahse, kan thawh hmain a û pindan aṭang chuan ṭap hawm hawm thawm kan hre ta phut a. Desy nen kan inmelh rual ṭhawt. Zorina leh a pate chu an tho vat a, hmanhmawh zetin a û roomah chuan an va lut nghal. Keini pawh kan inthurual nge zah pawh sawi lo chuan kan va dâk ve nghal a. A mawi lo tih kan hrechang tawh lo. A u chu a ṭap uar êm a tin ni. Chu pindan chu a zau lutuk lo nain khum pahnih a awm a. Almira pakhat a inhung bawk. A û khum bulah chuan dawhkantê a inhung a, bottle leh damdawi a let rum bawk. Khum mawngah wheelchair lian vak lo a awm bawk. Zorina chuan a û chu a âwmah a pawm bet a, a hnungzâng chu chulsak heuh heuhin, "A ṭha vek aw..ṭap bawrh bawrh rawh. Mahse, beidawng suh aw.." a ti sûp sup a. A pa chu zei lo zeta dingin a fate inkuah lai chu a lo thlir reng ringawt. 

U Zonuni chuan, "Bawiha, a harsa êm mai. Ti nge min thihtir mai loh?" A ti hlawp hlawp a. Zorina chuan, "Thih thu sawi tawh lo turin min tiam tawh kha..khaw maw, engvangin maw i ṭah leh vak? Han sawi teh le" tiin a u mittui luang chu a hruksak a. A u laka a chetdan leh a ṭawngdan te chu a puitling ngawih ngawih. A û chu a nau zawk ang maiin a cheibâwl ka ti mai. 

U Zonuni chuan, "Nidangah chuan ka hre ziah sia..ka kekawr khu dap la..zun ka cheh alawm" la inhnit faih faih chung hian a ti ta a. Zorina leh a pa an nui huk. 

"Awhaw! Chuvang chuan kan nula senior hi a lo ṭap ruah ruah a maw? A va pawi tak..zun te hi i cheh thei lo vang tih hlauh nak alaia..inzirna zel ka tih kha" Zorina chuan a ti leh mawlh mawlh. A u kekawr chu a zuk dap bawk. Desy'n min rawn nghawk zawk a, "Kal ang" a ti sap bawk. 

Amah bawk chuan, "Zorin, kan haw phawt ang aw. Kha in buai bawk si, U Zonun, lo dam vat rawh aw. Kan rawn kal leh ang, engmah eitur pawh kan rawn lei hman ta si lo va" a ti nghal mawlh mawlh a. U Zonuni chu a rawn hawi vat, "Awiii! In lo awm a law?! Awiii, ka van zak..Ti nge in sawi loh a?" Tiin a pa leh a nau a melh tawn a. 

"A ho ê.." a nauin a lo ti sup. U Zonuni chu a nui leh hawk hawk a. Keini pawh kan lo nui ve, a hlimawm letling ta phian. Zorina chuan, "Lawkin, reilotê..ka û ka thlak fel ang a, ka lo thlah ang che u" a ti sawk sawk. Chuti na nâ na chu tiin kan lo nghak ta a. A pa erawh a rawn chhuak tawh. 

"A nau hi chu awm lo se, kei ringawt hi chuan ka zo ṭha tawh si lo va. A buaithlak tak tak" a ti mual mual a. 

Desy chuan, "Tisawn a buaipui vek em ni?" A lo ti vat. 

"Buaipui vek e. A bual fai a, zingkarah a inthiarpui fel vek bawk a. Eitur a chhawp vek bawk. Kei hi ka laktlak loh êm zawk a.." a ti chuar chuar a. Zorina ka duhna leh ngaihsanna chu a inzat thuak awm e. Hetiang mipa an a awm avang hian Mizo tlangval an chhe tawh viau anga kan ngaihna pawh a tlahniam ngei ang chu. Ka bialpa mimal nun, a mizia engkim hi ka la hrechiang fahran lo. Ruihtheihthil a ti ve em tih te, hmeichhe lamah a lo nghal viau em tihte pawh chiangkuangin ka hre lo. Mahse, he pa hi ka duh a, duh zel pawh ka tum. Ka chhung ten kan inkarah hêm thlak tum mah se; kei chuan ṭhen hmasak ka tum lo bur..Ka pa thisen kai lo mah ila; kha chen ka lo chenpui tawhte zia hi ka kai a ni ve chêk ang chu! Ka luhlulna lamah chuan khauh ve fang tak mai hi ka nia. Zorina chu a inpeih ta a niang, a rawn chhuak ta a. Inthlahrun hmel deuh hian, "Ka rei em?" A ti a. Ka lu ka lo thing. Kan chhuak ta nghal a, a pa khan, "Lo la leng leh rawh u aw..in fel hle mai" a ti a. Ngaih a ngam sawt e. 

Kawngpui kan thlen chhoh chuan, "Ka û kha hrethiam rawh u aw. A rilru hi a no lutuk a, naute ang chiah hian a awm ṭhin a" a ti a. A inthlahrunzia a hmelah pawh a lang. 

"A ho lutuk, kei chu ka hrethiam tawp, amah ang kha ni ta ila awii ka tuar thiam lo viau ang" Desy chuan a ti hluai a. Keimah ka ni ve tho mai. Scooty-a kan chuan tawh hnuah, "Hengte hi khalh ve ziah suh. I la dam ṭhat loh tehreng nen, bakah i tê si" Zorina chuan a ti hluk hluk a. Ka lei ka chhuah khum ringawt. Kan inthlah liam ta a. 

In ka thlen chuan Viteii a lo thleng tawh a. A lo inbualfai diam tawh. A awm loh chhung reilotêa ka khawharzia kha..laizawn nei lo ni ta na nâ na chu Viteii hi ka lo ngaina tawh hle a nih dawn hi. Laizawn tih thumal ka ngaihtuah chhuah rual chuan ka na zawk thei. Mahse ,ka inthing harh vat a, awmzia a nei lo va ,ngaihtuah reng ka duh lo. Ka inbual pahin ka zai rât rât a. Darthlalanga ka han inen chuan, ka nu hmel âwm ang tur ka mitthla leh ta. Keimah ang tak a nih chuan a nu len ka ring lo ve tawp a, tin, a hâng lo bawk ang. A la dam ngei rinna ka neih hi dâwt a nih ka ring thei lo. Ka nu thusawi avang pawh khan, engtik niah emaw chuan min hringtu ka nu chu hmachhawnin, "Engvangin nge i thisen, i rilarah hi pawisa vang chauha min hrin?" Tiin ka zawt ngei ang. Tin, ka pa a la dam a nih chuan ka zawng chhuak bawk ang a. "Ti nge kei min pai lai khan ka nu kha i phatsan ?" Tih zawhna hmangin ka hualbet bawk ang. Ka nu leh pa diktak te chu huat ka duh lo, chutihrualin ka la hmu lo ve ve bawk a, hmangaih dan ka hre chuang hek lo. Tunlaiah fa nei thei lo emaw khawngaihna avang hrim hrim pawha naupang adopt hi an tam tawh tih ka hria. Mahse, fa lâk tam zawk te hi chuan fa lâk an ni tih hi an puitlin hmain an hre ve vek tawh ṭhin. Kei erawh a theih chhung zêp an lo tum tihna a ni a. He thil hi Zorina nen kan inhnaih aṭangin a rawn lang chhuak ta chiah a. Hei tak hi a ni a awmzia ka hriat châk êm êm ni..min tihlauthawng bertu leh ka ngaihti ṭha lotu ber a ni rêng a ni. Hriatchhuah vek hun a la awm êm ang chu maw..

 Mama pawh a rawn haw tawh a. Kan la inbe mumal lo. Au Bawiha erawh Parvula a kai chhuak a, han teivahpui ve zauh zauh hi a ngai ṭhin. An rawn haw hnu lawkah zanriah pawh kan ei ve ta a. Viteii bai thak ka ei leh thei chu ka lawm ngei mai. Mama men rum thleng chaw ka ei! Nge ka eitui miau alawm le. Thleng ka sil zawhah Au Bawiha'n min tirh avangin Parvula, powder ka hnawih a. A taksa ka han chûl kual vel a nuamti chu a chik nghur nghur mai. Chutia kan inchhaih nghur nghur lai chuan doorbell a ri tlang tlang. Tu tak lo leng ang maw ka tih rilrûk laiin Bena a rawn lut hlawl mai. Ka nu phur leh sârh chuan mi run viau. Mahse, pangngai takin ka lo chhawn thung. Parvula ka khawih leh ka pawm vel a hmuh chuan, "I va che ho e aw. Natna hrikte i kai ang e" a ti a. 

"Kai lo vang" ka lo ti. Parvula ka be zui leh bawrh bawrh. Ka bulah a rawn ṭhu a, min rawn ngheng titih bawk. "Eng nge i an zel?" A ti a. Ka ṭhat thu ka hrilh. 

"Naktuk tlaiah ka pa piancham kan lawm dawn a, i rawn kal ve loh chuan" a ti a. Ka thlêk hâ ringawt. 

"I kawr hak tur ka rawn dahtir ang, naktukah. Chuan class pawh kal lo mai rawh aw" a tih leh chuan ka sa phat. Thinrim insûm ṭâng ṭâng chungin, "Ka lo kal thei lo vang, Zorina nen kan inhmu dawn a" ka ti chang fak. Bena chu ka ngainat vena te kha a bo vek. A rawn luh phat aṭanga tun thleng hian a awmdan leh chezia, a ṭawngkamah min bialnu chei ve ngawt! Vei tak a! A upa tawh ropui si..

A thinrim duh miah lo. 

"I chhungte phalna ka la tawh. I u Mama pawh a rawn tel dawn" a ti a. 

"Chupawhnise.." ka ti hmiah. 

"Ka chhungten an hmu ve châk che alawm" a tih chuan, "Ti nge min hmuh châk ve ngawt a? I bialnu pawh ka ni lo va, i ṭhian ka ni bawk si lo" ka ti ve ngat. Ka zahpah duh tawh vel lo e a. 

"Ka bialnu tur i nia" ngeiawm zeta nuih sâwng pah chuan a ti a. Ka ten lutuk. A nui hmel chuan ka luak a tichhuak. 

"Enteh, U Ben, Mama ṭhianpa i nihnaah ka zah viau che a. Tin, ka tana i thatna leh damdawi ina min ngaihsakna te vang khan ka lawm. Mahse, ka bialpa i ni lo va, i ni ngai bawk lo vang" ka ti ta kalh kalh a. A mitah ka melh ran bawk. 

Ṭawng a tum mêk laiin door bell a rawn ri leh a. Viteii'n a va hawng. Zorina a rawn lut hlawl mai! Boruak chu a ṭang ta kher mai le..mahse, Zorina rawn kal chu ka lawm ngawih ngawih. Bena hnawhbo tluka châk ka nei rih lo. 

"I va rawn thleng har, i pengkawi chiang" a rawn kal dawn tih hre lâwk miah chuang lo chuan ka lo ti nghal bawrh bawrh a. Ka mitmeng chhiarthiam êm êmtu Zorina chuan puih ka ngai tih a hai lo nge, Bena chu a ngei ve hrim hrim pawh ka hre lo. 

"Inleng i neih leh pek ka ring a, an haw hun âwmah ka lo kal" a ti ve salh. 

Bena chuan Zorina melh zauhin, "Bawiha, Aizawlah hian kum 10 in awm tling tawh em?" A ti a. A ṭawng paha a melh dan aṭang chuan Zorina chu a hmusit hliah hliah tih a lang. Ni e, ka bialpa chu doctor a ni ve lo va, mahni in leh loa khawsa a ni ve hek lo. 

Zorina chuan pawisawilo zet hian, "Tling tawh e..ti nge?" A lo ti hû a. 

Bena chu a nui huk a, "In in luahman engzat nge?" A ti leh. Ka ṭawng ṭêp a, mahse, Zorina a rawn ṭawng hman ta si. "3000 in kan luah ve a. In luah tur tlawm deuhte i hre lo maw?" A ti a. Bena'n a hnuaichhiah ang aiin Bena chu a ngaisang fahran bik lo tih a mitmeng aṭang chuan a lang reng. 

"Thingpui ka'n lum ang e" tiin ka tho a. 

Zorina'n, "Ka duhzawng i hriat kha..Sawmsak" a ti zauh. Lehhawiin ka khi sak a, "Zôra., Ka hria e" ka ti a. 

"Ah! Thuawihnu, i thlûk ve ta" a tih chuan ka lo nui var var. Bena'n a ngaihna hriat loh hmel angreng taka min melh tawnna chu engahmah ngai loin choka lam ka pansan ta a. Ka nute pawh Bena a awm ve bawk a, Zorina lakah sual an chhuah dawn lo tih ka hre ve kur. A nuam angreng phian e. Thingpui kan in laiin Au Bawiah a rawn haw a, a lo haw hma angreng. A rawn ṭhu ve a, Viteii'n thingpui a rawn pe ve vat bawk. Parvula khan Zorina a lo hnaih ruak ruak lai a ni bawk a, Zorina te inchhaih chu a en duh ngei mai. A tawpa tawpah, "Ka hria che..insual thiam deuh kha i ni tiraw?" Au Bawiha chuan a ti hluai. Zorina a rawn hawi chhuak ve vat bawk. Au Bawiha hi a len daih zel avangin Zorina hi a la hmu ve lo hrim hrim. A hming erawh a hre tawh tho. 

"Engtik nge in insual leh ang?" Ka u chuan a ti a. 

"Karleh lamah a niang,. I en ve ṭhin mi?" Nelawm deuhin Zorina chuan a ti a. 

"En ziah, ka lo ṭan ve thei che alawm. Karleh chu a hmunah ngei en ve tawh tur a ni" ka u lah chuan a ti bawrh bawrh a. Ka lo lawm ru veng veng. Bena chuan bet deuh angin a inhria nge, "Mizo ho chu a sek sek hi a taima loah an ṭang a, a ṭha lo. Hei Zorina chu i sek vak lo hlauh a, i laktlak dawn e" chaldelh zet hian a ti leh a. 

Zorina lah chuan, "Teberi hian mipa sek deuh a ten tlat a, sek lo tura ka beih nasatzia chu aw" a lo ti! Ka nui chhuak ṭêp a ni. 

Ka u chuan, "U Bena chu i ti ngawt tak naa, kei gym-a kal emaw gym kal kher lo va work out nasa, six pack nei hial khawpa thawkrimte hi thatchhia ka ti thei ṭhak lo. Hun ka nei lo êm a, in hnuaiahte khuan duh angin ka kal tam thei lo zawk a. Hetiang taksa nei thei tura an insumtheihna te, an thawhrimna te hi kei faktlak ka ti. Ruihhlo laka an fihlimna ringawt pawh " a lo ti ve mawlh mawlh a. Bena hi a mil vak bîk lo em mawni ka ti rilru hial. 

Tihngaihna a hre ta lo nge, "A ni viau mai" Bena chuan a ti ringawt. Ka u chhoh hnu lawkah Zorina pawh chu a tho ve ta a. Bena'n haw tum hek lo. Ka ngei tak tak a ni. Veranda thleng ka va thlah a, ka beng bulah, "Kan infâwh lohna a rei leh tawh ê.." a ti sup a. Kan dinna lai a êng bawk sia, infawhna chi a ni si lo. 

"Naktuk tlaiah kan lo peng leh ang aw. I phal em?" Ka ti a. 

"Ka hna aṭangin ka ban hma a ngai dawn a nih chu..welcome reng i ni" a ti nghut..kan inmangṭha ta a. Bena te ina kal chu ka ha se…

Ka biak ṭhat duh vak loh vang leh phone ka hmehsan zeuh zeuh avang chuan ani pawh a tlai ve deuh tawh bawk nen, a haw ve ta hram a. Ka nu pawn a mangṭha ve leh hram kha. Mi ṭhenkhat chuan mizo nula nih chuan ngei deuhte pawh a mâwi tawka biaka kawm ve tur, phone inkhawihsan te hi a mawlthlak an ti leh maithei. Ka pawisa lo, an duh leh mâwl min ti daih rawh se. Hmeichhiain, "Ka ten lutuk" kan tih tawh chinte lakah a der paw'n ṭhat kan chhuah thei ngai lo…Kha kha ni mai..nge tenawm taka a khawsak roh ni..

Zorina msg, "Kha pa khan min cho se, ka hnek chak" tih chu nui vur vur chungin ka chhiar a..Mama aw-in, "Bena i tibeidawng hle mai maw?" A tih ri avangin ka hawi chhuak zawk..