Zor 7

ZÔR..(7)

Ziaktu : Toni Râlte

Mahse, ngaihtuah zui ka duh lo. Rilru a hrehawm mai mai. Rilru kilkhatah Zorina a awm ve tlat bawk si. Ka va inthiar a, ha te nawtin mu turin ka inbuatsaih a. Viteii pawh a mu tawh. Phone a khawih pah a. Kei pawh phone chu ka la dah phal lo. Zorina te chu an insual zo tawh ang em le aw..ka en châk deuh si, en hreh bawk siin ka awm. Ka thinrim tak tak hran miah lo, ka taksa lam harsatna nen, ka mood a chhe laklawk a ni ber. Sangteii nu chu bench dawh zawmin a mu a, Sangteii chu a muhil chiah chiah ni maiin ka hria. Ka lainat ve lehchhawng khawp mai. Kan ward-ah hian damlo pali chiah kan awm a, Pitar lam pahnih leh kei leh Sangteii chu a ni mai. Ka dâwih tehreng nen, nurse duty an awm a ni bawk a. Mahse, ka mut a chhuak hlawl lo. Dar 10 velah ka va zung leh a, Ka zung zo ka mu leh chu Zorina msg a lo awm a. 

"I muhil thei em?" Tih a ni. Biak tur dang awm ta hek lo chu , titau angin lang mah ila ,"Thei lo" ka va ti a. 

"Kei pawh ka mu chiah" a rawn ti. 

"I chak em?" Ka tih chuan, "Chak hram. Mahse, ka sil angreng" a rawn ti a. 

"Ka ring reng a ni" ka ti hmak. 

"I sual" a rawn ti..

"Sual e.." ka ti ve lehzel. 

"Naktukah ka rawn kal ang, a pawi em?" A rawn ti a. Ka awm a nuam sawt. 

"Pawi pawh ka hre lo" ka ti mai a. 

"I nu kha" a rawn ti hram. Ka chhan leh hma takin Sangteii chu a rawn thaw ri bawrh bawrh mai a. A nu a rawn tho vat, a fanu chu a sawi nghal nawk nawk a. A ko pah bawk, kei pawh ka tho vat a, ka va pan ve nghal. Sangteii chu a hrawk aṭangin a rawn ri bawrh bawrh a ni ber, a meng bawk si lo. Hmanhmawh zetin nurse ka va ko a, an ni pawh an rawn tlan phei chawn chawn. Sangteii chu a mit te an keu a, an han mut remtir pawh chuan eng a ang thei tlat lo. Pakhat chu doctor ko turin a tlan let leh a. Sangteii nu lah a ṭap pur tawh. Damlo dangte leh a awmpuitute pawh an rawn tho ve vek. Doctor nghah chhung pawh chu rei tak a ni. Ka lo mangang ve em êm ringawt. Doctor a rawn kal a, Sangteii âwm te chu a han nem a, oxygen an rawn vuahsak nghal bawk. ICU-a nawrlut tura tih a nih laiin Sangteii chu a leng ta awrh awrh mai a, kan ṭeh hak. Kei phei chuan thih sual ka la hmu ve ngai si lo va, min barakhaih lutuk. A zawi ta hnawk a, Doctor chuan a mar a dap vat, a sawi bawk a. A âwmah nemin thawktir han tum sateh mah se; Sangteii chu a thi tawh. A kal tawh. Nurse te chuan a ruang chu an sâwngbawl ta nghal a. A nu a ṭap nghal hawm hawm. Kei erawh ka khum ban chelhin ka ding khur der der..ka hlauh chu thuhran, a rang teh thut lutuk a, ka buai vek. Sangteii nu chu dam lo awmpuitu vengva deuhte chuan an buaipui a, biak ngaite an biaksak nghal vat vat. A mak ê, a muhil reng emaw kha ka tia. A khum bul chiaha awm ka ni bawk si chuan min tibuai lo thei lo. Zanin chu ka tlaivar dawn chiang khawp mai. 

Ruang an zawn chhuah hnu lawkah Zorina'n a lo call a. A ranga rangin ka la nghal. "I reh daih sia, i muhil emaw ka tia..mahse, min mangṭha lo va, i na leh deuh em ni?" Min ngaihtuah hmel deuh hian a rawn ti a. 

"Na lo ve, ka khum bul ami a thi a..awii ka hlau ê" ka ti bah nuaih. 

A thaw hak a, "A va zia lo ve. Chuan an zawn chhuak tawh em?" A rawn ti a. Ka hrilh a. 

"Mitthi hlauh chu mahni inhremna a ni asin. A ruang kha lo khawih bawrh bawrh lo a nih kha mawle.." a tih chuan, "Ka ngam i ring ami?" Ka lo ti hlar. 

"Ring chuang lo ve. Ka van khawngaih che..i muhil thei awm si lo" min ti êl miah si lo hian a ti a. 

"Ka tlaivar mai ang" ka ti sap. 

"I chau lutuk ang" a ti a. 

"Ka muhil dawn chuang lo. " Ka ti khauh bur. 

"In nula nen khan khum khatah mu u a" a tih lahin, "Ka hlau tho ang, ka hmu chiang si, a hmain ka mumangah ka hmu tawh lehnghal. " Ka ti zawt zawt a. 

"Aw le..nih ka lo menpui ang che. " A ti a. A dah nghal daih. Mahse, whatsappah min rawn text a, ka inthlahrung nain chutia biak tur neih chuan min thlamuan ve bawk si. Dam lo dang te pawh an mu leh ṭhap tawh. 

"I insual chau awm bawk sia, i mut a chhuak viau lo maw? " Ka ti khawmawi a. 

"Chau lo, ka sil ringawt. A kutthlak a na reuh lutuk a. Inthlahrung suh" a rawn ti ve ngial. Chutia kan inkawm tak rau rauah chuan tiin, "A nih chuan i chanchin min hrilh rawh. A vaiin" ka va ti a. 

"Ka nung ve tawp" a rawn ti leh daih. 

"Ka hria, nung lo la kan inngaizawng nang, i tetlai hunte, in chhungkua te..engkim" ka va ti duah a. 

"Sawi tlak a awm lo asin" a rawn ti hram. 

"Kei pawn ka sawi kha" ka ti ve tlat. Ka sawi ve kha chu a kimchang lo tih ka hria. 

"Aw le,eng nge i hriat duh ber?" A rawn ti a. Saisir thakin, "I naupanlai" ka va ti a. A type nghal char char, intext a ning tih ka hria, mahse, phone call-a inbiak lung lungna chi a ni tawh si lo va. Tihian ka mut te pawh a rawn chhuak maithei asin. Lo nghah pahin groupah ka lut kual a. A rawn thleng ta .

"Ka tet lai hun kum 10 ka nih thlengin Khawzâwlah ka pa pa ka pute inah kan khawsa a. Chumi hnuah ka pa hoin a hna avangin Serchhipah kan awm leh a. Kum 17 ka nihin Aizawlah kan rawn awm ve chiah. Ka type sei duah thei lo,. Hmaichhanah i hriat duh chu kan la sawi zawk dawn nia" tih a ni. 

"I û khan eng nge a tih ṭhin?" Ka ti ta tawp a, a chhan chu a û natna chungchang a sawi hreh lutuk hi ka khawngaih a ni ber. A reh vang vang hnuah, "A damlo va" tihtê ringawt a rawn thawn. 

"Kum engzat nge a nih tawh" ka ti hrâm. 

"32 a ni ve tawh. " A rawn ti. Chutia ani ṭawng tam lo ber, insual zo chiah ni bawk si, a chauh ve dawn nak alaia biak reng chu ka inthlahrung thut. Dawt ka sawi ta tawp a, "Ka mut a rawn chhuak ve lutuk a. A hunlai hian muthih ka'n tum ang aw" ka ti ta a. 

"A va ṭha ve. Tui deuhin muhil rawh. Hlauh tur a awm lo. Mitthi phei chu i hneh sa" a rawn tih chuan ka nuih a za. Kan inmangṭha zui ta a. Ka ngai nghal veng veng. A danglamna tak hi min hîptu a ni tlat. Ka mut a chhuak chuang lo naa, ka vanneih asiam nge ni dawn ni,ka ep chiaha damlo chu a rawn khuh leh kharh kharh thin a. Ka thla a timuang ve tawp. Hlauhna chuan min zem chiai mah se, ka muthilh lai ka hre lo, ka harh chuan zing dar 6 a lo pel der tawh. Nâ pawh ka nei rih ta lo e. Tui bak ka in thei si lo. Tui pawh in tur chin min bituksak leh ta nghal a. Viteii hawn hnu lawkah ka nu a rawn lang ve leh a, Ultrasound ti tur chuan kan inkai chhuak ta nghal. A titunu chu nu nelawm deuh mai, nu thau sen suah mai hi a ni a. Ka mut zangthal hnu chuan, "Nau i lo pai reng te hi a ni mai ang ah" a ti hlut a. 

"Awihawm loh, ka la virgin asin" ka ti pûng pûng. A nuih a za nasa mai a, "I va fel êm êm ve, nangmah ang rual virgin hi an tam tawh lo asin" a la ti zui a! Hei hi chu a sawi dik maithei. Ka fel leh ṭhat bîk vang pawh ni em êm lovin kum 18 ka nih kuma ka piancham kan lawm ṭumin Pathian hnenah, "Virgina pasal neih ka tum" tiin ka intiam ve a. Pathian pawh hian min pui ve a niang, Ka bialpate hi min tilui ṭâwng tâwng an awm ngai lo. Kei lah ngaihṭhatthlak loh khawpin ka feelings hi a chhuak har a! Ka sak ṭung ka ti mai. Mahse, ka tan vanneihna a lo ni. Bakah ka û te hian an sawi ngun thei êm a. Anmahni pawh an virgin tawp si lo.

Ka kâl (kidney) ah lungtê a lo awm a lo nia! Mahse, zai ka ngai dawn lo. A tihsawmna damdawi hmanga la zun chhuah theih a lo la nia, damdawi erawh ei ṭhat ka ngai dawn viau. Chhuah dil mai ka duh rum rum, zan khat lek riah leh pawh ka hreh tawh a ni ber. Mahse, ka nuin zanin chu awm leh rih la, zinga doctorin ward a rawn fan hunah kan dil dawn nia a tih avangin leh ka nuin min riahpui tawh dawn avangin ka awm leh hram dawn. Damdawi in hi chu damlo na tak law law nih si loh chuan a boruak hrim hrim pawh hi chauhpui tham a ni vein ka hria. Chawhnu lamah a rawn nat leh deuh avangin nachhawkna min khaisak a. Muthilhna a tel nge ni ka lo muhil daih. Ka nu leh tu emaw ṭawng thawmah ka harh a. Men mai ka tum laiin an thusawi chuan ka beng a verh ta riau. 

Ka nu chuan, "Hmu tawh lo la ka duh. A hmuh phâkah awm tawh suh. A thinrim a rapthlak a nia" a ti bal bal a. Ka meng dere a, mahse, a biak chu ka hawi lohna lamah a ṭhu si. Ka inleh chuan ka harh tih an hre dawn bawk nen, insangmar ṭeuhin ka lo ngaithla a. Hmeichhe âw ka hriat tawh hnu, khaw nge ka hriatna tih ka ngaihtuah chhuah tawh si loh hian, "Lungngai suh. In thawk dun a, ti nge i rin tlat loh?" A ti fiah kâk a. Tu chungchang tak sawi ang maw. 

"Mahse, nang nen kan inhmu tih hria se, min veh nghal ang. Kan inhria tih a hriat pawh ka duh lo. " Ka nu bawk chuan a ti leh a. 

"A hre lo turah ngai ang, robot a ni bik hleinem. Ka duh ka hmuh nan min pui la, i duh i hmuh theih nan theihtawp ka lo chhuah bawk ang. A ṭha em?" Hmeichhia chuan a ti a. A ding niin ka hria. Ka che zawk a, mahse, ka hawi rualin a hnunglam chiah ka va hmu! Ka nu nen an inzui chhuak lai chu ka thlir liam ta ringawt. Hmeichhe inchei smart tak a ni tih chauh ka va hre thei. Ka hamhaih buai nen, ka lo chîk hman tawh lo pawh a niang e. Ka thaw hawk a, tu chungchang leh eng chungchang nge an sawi ka hre lo naa, ka chhungrilah ka hah ve ringawt. Ka nu lah tunhnaiah a danglam ropui si. Eng emaw tak a awm tih hre mah ila, khawi aṭanga bul han ṭan tur nge ka hmu thiam hlawl lo. Mama hrilh mai chi a ni ang em tih ka ngaihtuah a, mahse, thil ka hrechiang fumfe si lo. 

Ka nu chu ka chîk ru ta viau a. Mahse, amahah danglam engmah ka hmu lem hlei lo va. Buhhawp bawk ka ei leh a, mahse, Viteii sangha fry tlem ka hmeh tel a. A hma ai ngawt chuan ka ei thei ve deuh e. Ka cher vak ang tih ka hlau deuh. Ka nu inthiar hlanin Desy nen kan inbia a, Vanlalruati avanga an buaina kalzel pawh min hrilh a duh tehlul nen, a moodah ka la cheng thei si lo. An buai deuh avangin tlawh pawh min rawn tlawh thei ta si lo va, a inthlahrun thu a sawi leh chiam. Ka nu lah chu a inthiar rei hrep a! Ngaihṭhat lohna ka nei thut. Ka puan sin ka hlim sawk sawk a, ka nâ a awm rih lo bawk nen, toilet lam pan chuan ka chhuak ve ta nghal a. 

Kaw hnih a lo ruak a, pahnih erawh a inkalh ve ve. Ka ding vang vang a. A sir ber chu a rawn inhawng a, pitar lam tawh a rawn chhuak. A nih chuan pakhatah hian ka nu chu a awm ngei ang ka tih rilruk laiin a rawn inhawng leh khep a, tleirawl a rawn chhuak daih! Khaw nge ka nu chu a awm le..

Ka let leh vut a, cooler awmna lam ka pan vut. He lai hmun hi a fianrial deuh a, thawmhnaw pho nan te pawh an hmang ṭhin. Ka rin ang ngeiin ka nu chu thlang lam hawiin a lo dak a, phone a be pah bawk. Thawm dim zetin ka phei ṭhem ṭhem a, Cooler phênah chuan ka ding ta a. 

"A tawk, i duh duh rawn sawi suh. Ka engmah i ni lo va, ṭanpui che hi ka ba lo. Nanga suahsawl rawngbâwl nan khan ka pawisa hi ka phal awkâwng lo mai. Min rawn be tawh suh. I hria em?" A ti tân tân a. Tui rawn fill tur an rawn phei si, zahzêlah cabin lam panin ka kal ta ngawt! Mak min ti ru maithei. 

Ka kir leh chuan ka nu chu a lo awm tawh lo. Kan ward-a ka va luh chuan a lo ṭhu a, makti zeta min lo enin, "Khaw nge i kal?" A ti sap. 

"Ka vei kual vel mai mai, a uap lutuk a" ka ti ringawt. Min zawt zui lo. Phone kan khawih dun mial mial a. 

"Teber, i va ṭha tawh awm ve..kha.." ṭawng ri ka hriat rual chuan ka hawi chhuak vat. Ka beisei loh tawpin Zorina leh Rpa te an lo nia! Zorina chuan hlim hmel pu deuh hian min lo melh. Ka nu ka melh zawk a, a lo melh ve ran. 

"Lo ṭhu r'u, in va fel ve" ka ti sawk sawk a. Kei pawh ka insiamrem nghal. An ṭhut hnu chuan ka nuin, "Hei a dam tawh lutuk..in rawn kan ṭhin a, a lawmawm lutuk e. " A lo ti ve luam a. Ka âwm a nuam sawt. Rpa chu tlem chuan ka zah deuh, mahse, ani pawh nupui a ru ve tho a. A ho êm mai. Eiturte chu an rawn keng nual a, ka la ei thei si lo. 

A apple rawn ken chu vel mawlh mawlhin, "Apple te chu ei an phal tawh ang tiraw?" A ti hnuhnawh a. An phal thu ka sawi chuan a khi suk. Ka nu chu a hnawk tlat, a ṭhu ve tlat si. Ka duh loh tawpin Bena a la rawn lang zui! Zorina apple vêlsa ka ei mêk lai a ni a, a rawn nui var var. 

"Kan damlôtê chu a râwp ṭan der a ni maw?" A ti a. Ka lo nuih ve ringawt. Ka nu lah chuan a'n be ṭha lailêng khawp a, ka ngei zo vek. Zorina te chu an ngawi reng a..ka nu ka ngei ve deuh nen, "Zorin, ti nge tukinah min lo wish loh?" Ka ti ta ngat a. Min lo wish lo ve bawk a. A thawh tlai vang a ni. 

"I hriat kha, thawh ka hai alawm" a ti ve mai a. Ka nu mitmeng râng chu ka hmu lo der tlat! Bena erawh mi â a ni lo va, a phanchang zawk bawk nen, "Teber, i ṭhiante chu an va fel ve..ka hriat hnu an la ang êm êm zui" tiin a khi sâng a. 

Ka nu chuan, "I hria ang, Hei Zorina phei chu a insual ṭhin" a lo ti hmawk hmawk. 

"Awhaw! A va hahthlak dawn ve.."Bena lah chuan ngeiawm zet hian a ti a. 

"Mahse, a hlawh tam ê" naupangchhia zetin ka lo ti hmak. 

Bena chu a hranpain ka be duh dêr lo. Rpa emaw Zorina emaw chu ka be lui ngat ngat. Ka nu chu a ding ta hluai a, "In zahawm viau naa, gate an khar dawn tawh ang, amah lah kha damdawi ei a hun bawk nen, tiru, i chhuk ang u. Ka lo thlah ang che u, kuhva lei pah ka duh" a ti ta a. Ka lum pup pup thei. Bena erawh chutihlai chuan ka khum epa pitar kha a va be daih a. 

Zorina chuan ka rin loh tawpin, "Ka pi chu i duh loh i pe na ve hle mai. Mahse, Teberi bialpa ka ni" a ti hmiah. Ka nu mitmeng chu a alh phat phat mai. Mahse, a insûm thei hram. An ding a, Zorina chuan ka bianga rawn piai zauh pahin, "Dam vat la aw. Ka lo bia ang che" a ti sup a. An chhuak zui ta nghal. Ka nu pawh chuan a zui chhuak ve nghal a. 

Bena a rawn phei leh. Ka tûm bùr a, min be lui sek chu ka ning..ka tana a lo ṭhat tawhna te avangin han hauh kha ka hreh ve bawk si. A tawpah phei chuan, "U Ben, ka bialpa kha hmelṭha i ti em? Zorina kha" ka ti ta hmiah a. 

A hmel landan danglam eih lo hian, "Mahse, a rethei a nih kha" a ti! A hmaiah hian ka hâm dawn em mawni ka tih rilruk laiin ka nu a rawn lang a. Rizai hnuaiah ka kut ka hum vang vang mai. Bena mize diktak ka hre ta bawk a, ka lo duh chawp lo kha ka inchhir lo nasa..Zorina chu a hausa lo, a taksa nat leh inhliam pawh sawi lova pawisa thawkchhuak ṭhin a ni. Mahse, ama tan a ni hauh lo, a farnu neihchhunin ama ke ngeia a pen leh theih nan leh khawvel a hmachhawn theih nan a ni. Chuan, ani kha ka bialpa a ni bawk. 

Ka nu rawn lêt chu a meng no tehchiam lo khawp mai. Kei pawh ka meng rum tho. Khatiang kher khera a ṭawng kha ka ngaihdan a ni lo ve êm a ni. Mai mai a na. 

"I rawn lang ta bawk a, ka zu chhuk tawh ang e" Bena chuan a ti a. Ka nu chuan, "A la hma hî..i awm khan thla i timuang ve alawm" a ti nem hliai a. Ner sak chungin, "Gate an khar dawn i ti maw ka tia" ka lo ti fak. Bena chu a kal nghal. Kan nufa inchhalna chu a hre chak lo te pawh a niang e. Lehlam ka hawi tau nghat. Ka hriat phak lek tura zâwi hian, "I U Mama'n hria se i nasa lo teh ang chu..ka rin aiin i lo nasa" ka nu chuan a ti a. 

"Kei pawh ka rin aiin i lo sual" ka ti hmak. Chhungkaw inhau khât tak kan ni a, ka pa hi chu Mama thlengin tuman min hauh tawh chuan kan chhang ngai lo. Ka nu erawh han inhniala han inchhan let ve châng a awm. Kan zah loh vang erawh a ni vek bik lo. 

"I hre viau ang" a ti nghat a. 

"Aw le" ka ti sap a. Ka maimichhing nghal daih. Hlauh pawh ka hrechang tawh lo, an muthilh vek tawh hnuah te chuan ka ngaihtuah let a, ka nu awmdan leh ṭawngdan khan ka thin a tirim telh telh. Ka ṭhu hlawl a, ka inpetruh bawk. Ka nu muhil hmel chu ka va thlêk a. Ka tetlai, nikhua ka hriat theih tirh aṭangin ka nu ngheng chawt leh a bula tâp chawt ṭhin ka ni. Mahse, ka nu hi fate han duata chhawnchhaih thiam chi a ni lem lo va, a theihtâwkah erawh min duat viau. Ka û te phei chu mipa an nih bakah an lo upa tawh bawk a, a duat hluak ngai lo. Tunah ka lo inti nula chho ve ta a, ka nu nen chuan kan inhlat ta sawta hriatna ka nei. Zanina ka hun tawn vangte pawh a ni maithei. Ka tleirawl lai khan Desy te chhungkua hi ka awt ru fô ṭhin. An ni chu a nu hi a phawkin a fate nen an innêl êm êm a, Desy te khan a star te, a bialpate thleng khan a sawi zut zut zel a, a nu khan hauh a hnêkin a lo fiam a, an nui vak vak zel. Khatiang kha ka nu nen kan inkarah a awm ve ngai lo. Sawi tawh ang khan ngaihzawng chungchangah phei chuan ka û te kutah min dah ka tih kha, ka bialpaah pawh Lâna bak an hre lo,. Lâna kha chu ka tawrh nat ve êm avangin an hre lo thei lo va. Tunah Zorina an hre leh ta a, Ka nu leh Mama'n an duh lo tih ka chiang tawh bawk. Mahse, ka khauh tulh tulh emaw tih mai tur a ni thung. Ka hmalam hun erawh ka ngaihtuah buai peih lo. 

"Hey,..tei, Teber..tho tawh rawh" ka nuin min rawn sawi harh a. Nizan lama a hmel rum ûl kha hmuh tur a awm tawh lo. A thar vâk ni maiin ka hria. Ka tho ve mai a, ka va inphihfai a, vawiinah kan haw theih ka beisei bawk a. Ina awma ka pindana zalên taka awm ka châk tawh. Doctorin ward a rawn fang a, ka nu chuan chhuah chu a lo dil a. Damdawi ei ṭha tur leh kar hnih hnua incheck up leh tura min hrilhin min discharge ta a. Ka thaw huai mai. Bungrua kan ngah lutuk lo bawk a, taxi hmang mai ang kan ti a. Mahse, Mama'n min lo hruai thei dawn hlauh e. A rawn thleng a, muangchâng lovin in lam kan pan ta a. 

In kan thleng a, ka nu chu kan bungrua nen a chhuk a, ka chhuk ve tur chu Mama'n, "Nizana thil thleng kha ka hria a ni" a ti nghut a. 

"Umm" ka ti ringawt. 

"Vawi khat ka sawi kha a tawk mai dawn emaw ka lo tia" a ti chang rût a. 

Ka chil ka lem khawlh, "Mam, eng nge Zorina hi i duh loh chhan?" Ka huaisenna zawng zawng sawm khawmin ka ti a. 

"A chhan a awm a ngai em ni? Mi ṭha a ni lo va, chu chu a tawk viauin ka hria" a ti duah a. 

"Misual pawh a ni hran hleinem" ka lo ti sep. Chiang zeta min rawn melhin, "Zaninah titâwp ang che. I tan vek a la ni dawn..i nat ka duh lo. Tuman an tihchhiat che ka remti hek lo" a ti nghet charh a. Mama aṭangin chu thu chu thutawp a ni tih ka chiang viau. Mahse…mahse..tih thuin a la zui hi chuan a tâwp fel miah lo tihna a ni. 

"Chhuk rawh" a ti leh hmuk. A ranga rangin ka chhuk a. In ka luh rualin Pavula'n min lo zuan nghal. Ka ngai ve deuh tawh nen, ka pawm vat a, ṭhutthlengah kan inpawm uaih mai. A chîk nghur nghur bawk. "I inbual a ni maw? I rimtui hle mai" tih pahin ka nui a, ka chûl kual bawk. Ka pain, "Kha, a puin a zinsan dawn sia, tumah min hlau si lo va, a buaithlak viau ang" a lo ti chuar chuar a. Ka pa en vatin, "Au Bawiha a zin dawn maw? Khawiah" ka ti hâ. 

"Lungleiah an bungraw ṭhenkhat an va dah dawn a niawm e. Chawhnuah an chhuak ang" a lo ti mai a. Parvula chu melhin, "Ka thu a awih tawh alawm tiraw" tih pahin ka chukz zauh a. A meng duar duar mai, a tenawm thei sia..ka pindanah pawh min rawn zui ve zel. Dik tak chuan Viteii hian Au Bawiha emaw kei ka awm loh chuan a hnaih ṭha ngam lo va, ka nu leh pa leh Mama te lahin an ngaina hlek si lo. A pu Au Bwiha awm loh chuan kei hi min nâwk ve reng mai. Ka bâl riaua ka hriat avangin tuilum sa ver vawrin rei ngial ka inbual ta a. Fai hi chu a nuam mang e aw. Fai sawi takah chuan Zoi bialpa Samua'n an zu in ṭhin lai a sawi apianga a sawi ve ziah, "Bâl deuha zu inte hi a ruih a nat bakah a nuam lo. Zu hi chu han inbual fai hlarh ila, eirawngbawl pah hian han lem hlek hlek ila, a nuam ber.." a ti ve ziah. A nih duh hmel tak tak. Ka inthlak laiin Viteii a rawn lut a, "Eng sa nge i ei châk" tiin a nui sen sen a. 

"A ngai" ka lo ti vat. A bu nghat. Sawi duh nei anga a la lan avang chuan, "Hawn chu i dil ta lo mi?" Ka ti ta zawk a. Ngui hmel a pu deuh, "Dil a, nangmah kha damdawi inah i awm leh bawk nen, haw lo mai rawh min tia" a ti sap a. 

"Hei ka lo chhuak tawh alawm..haw rawh, ka lo sawi dawn nia" ka ti puat a. A nau lungphun a nia, haw ve ngei se ka duhsak. 

Au Bawiha a rawn haw a, a han insiam sawk sawk a. A rawn chhuk leh chuan, "Teber, Ka Vulluaia hi i kutah ka dah a nia. Zan khat lek riahchhuahsan pawh ka khawngaih a nia. Chaw kha lo pe ṭha la aw.." a ti mawlh mawlh a. Ka lo um e ve mai. A ui chu a va pan a, a lo thlir dauh dauh mai. A chul thuak thuak a, chuk zauh zauh pahin, "Lo fel hle rawh aw. I pu Mama tibuai lo la a tawk mai. I khua a har viau chuan i û teberi bulah i lo riak dawn nia..ka lo haw leh vat ang" tiin a be mawlh mawlh bawk. Hmuhnawm ti zetin ka lo thlir reng a. Ka nu chuan, " A mak mawlh mawlh ṭhin e aw. Mihring ang hrim hian in cheibawl a, ṭawng thu chhe loah boral ta se in tuar na dawn lutuk" a lo ti bawrh bawrh a. Au Bawiha chuan a ngaipawimawh lem lo. Kawngka a kan dawn lai tak chuan Parvula chuan a ngen leh ta tlat! A ṭap ve ngei a..a mittui lah chu a far ve fup fup a, a pu lah chuan kalsan harsa a ti si..Mama rawn chhuk thla chuan, "Parvul, a tawk. A lo lêt vat dawn. Note pawh i nih tawh loh kha. " A ti fiak ṭhak. Parvula chu a tawp hmak. Au Bawiha chuan ngui zetin a kalsan ta a. Parvula chu ka ko ta vat a. Ka lainat kher mai.

Zanriah ei laiin Viteii chungchang chu ka sawi ta a. Ka nu chuan, "I damlo leh bawk sia, kei lah ka nerve ṭha lo hi a lo chhuak fô sia, Viteii a awm loh chuan ka phâng deuh mawle" a ti charh charh a. 

Mama'n, "Lungphunte a nih chuan haw ve zawk se..rei a châm nang, ni lawm ni? Vite" a ti a. Ka pa chuan engmah a sawi lo. Viteii chu a haw thei turah ka ngai. Chaw eikhamah an khaw sumo counter be turin ka ti ta nghal a. 

"Ka lawm lutuk, ka lo haw leh vat ang. Thei tui tawk tâwk ka lo hawn ang che.." a ti siam siam mai. Kei pawn ka lawmpui e. 

Ka nu leh Mama te nena kan inkar rit ru zet chu ka pa te chuan an hre ve kher lo ang. Kei erawh ka awm a nuam hleithei lo. Zorina nen kan intext zeuh zeuh reng a. A thu rawn sawia min hneh deuh chu, "I chhungte tan chuan ka ṭha tawk lo vang.Nghet taka min vuan a nih erawh chuan ka thlahthlam lo vang che" tih thu chu a ni. Ani ang mipa hi chuan thu an tiam kur ve duah ngai lo, an thutiamah erawh an ding nghet ṭhin tih ka hria. Ka nu leh Mama te pawh ka dem êm êm lo, dik tak chuan an farnu, fanu neihchhun ka ni ve a. Zorina, eizawnna nghet nei lo chuta karah insual mi a lo ni bawk si. Kan chhungkaw dinhmun nena khaikhin phei chuan kan inthlau ve êm a ni. Mahse, ka sawi tawh kha, duhzawngtê ka nei ve a, pa ka tihzawng te, ka ngainat zawngte..ka duh ve a ni mai. Ka ṭhen dawn mai mai lo. 

"Lo len ka duh viau naa, Ka pa a dam ṭha lo va" a rawn tih chuan, a pa zu ngawlvei a ni tih ka hrechhuak nghal zat. Engvang taka damlo nge ni ang aw. 

" A va pawi ve..nia, i hman hunah a ni mai" ka va ti a. 

"Lo len hi i phal pawh ka ring chiah tawh lo va. I hlau lo em ni?" A rawn ti a. Ka nui deuh naa min zawhna hi zawhna âwm reng a ni ve tlat. Min vengthawng lo thei bîk tlat lo. 

"I hlauh loh te chuan" ka ti a. 

"I huai nen, mitthi i hlau tho bawk sia" a rawn tih chuan ka nui hawk hawk. 

Mama a leng lo teh mial a, min veng dawn te pawh a ni mahna. A tih dan loh deuhin thingpui a rawn lam a, Viteii a che nghal vat. Ka bul maiah a rawn ṭhu ve a, dar 9-ah damdawi ei tur ka neih avangin ka la mu lo mai mai a ni. Ka nui vur vur chu min rawn enin, "A va thlum awm ve" a ti hmuk a. 

Ka nui tâwp chiang teh e. Ka chhang lo. Thingpui chu dawmin keimah pawh min en chuang lo chuan, "I theih chen chen luhlul rawh,. I hah rei a ni mai" a ti leh hluk a. Ka dawhtheihnain a tlin ta ngang lo. Ka ding thut a, "Ka ṭhen dawn lo. Engvangin nge i duh loh tlat a?" Ka ti vin ṭhak. Ka thin a rim tawh chuan pawisak ka nei ngai bik lo. Ka nute pawh an rawn hawi phei vat a, "Ṭhu rawh. I awki san hlek suh" Mama chuan a ti nghut a. Ka la ding khawng ve reng. Ka hlau tho nain ka tlawm mai duh bîk lo. Ka nu chu a rawn phei a, "Eng nge a?" Awki nelawm vak loh hian a ti a. 

Titau ngal chungin, "Ka bialpa in haw tlat hi ka lawm lo. Duhthlan theihna min pe a ni lo'm ni?" Ka ti ngat. Ka la naupanzia ngaihtuahin chutianga ka chhungte ka ṭawngkhum ngam chu mak ka inti. Zorina nen lah kan la thleng tawi viau bawk si,. Ka â tawh a ni ngei ang. 

Ka nu chuan Mama a melh a. Min lainat ve ang chu tih nâk alaiin, "I bialpa misual kha maw..engvangin nge kan duha kan ngainat huam ang. Kan hmangaih vang zawk che a ni tih i hre lo em ni?" A ti hlaih hlaih a. 

Ngawi rengin ka phone ka la a, ka pindan lam ka pan nghal. Mahse, ka pain, "Tei, Teber, ding teh" a tih avang chuan ka ding dat a. 

Ka pa chu ka va melh a, a lo tar ve tawh hle mai ka ti rilru.."Lo kal teh, ka bulah hian lo ṭhu la" a ti a. Ka phei ve mai, ka nu leh Mama te chuan makti zetin ka pa chu an melh a. Kei pawn ka pa awmdan chu mak ka ti ve tho. A bula ka ṭhut hnu chuan, "Engvangin nge a bialpa chu in ngainat loha a tana hrehawm tur khawpa in dodal le?" Tiin ka nu leh Mama te a melh tawn ta rulh rulh mai. Ka lungphu chu rang tak a ni. 

Ka nu chuan, "I hria alawm, ani kha hnathawh mumal nei lo, insual mi a nia..a pa lah zu ngawlvei.. " a ti sehchilh nak a. A hmel landan chu a mak angreng hle. 

Mama chu melh ve lehin, "Nang, eng nge sawi tur i neih ve?" Ka pa chuan a ti sup. 

Zah hmel taka ka pa melhin, "Nangmah vangin.." Mama chuan a ti daih! Hrilhhai leh makti êm êmin Mama chu ka melh ngawt ngawt. Ka nu erawh mi lim angin a ding ngil ut a, hmalam a melh ngat ngat. 

Ka pa chu a rum nghut a. "I sawi chiang thei em?" A ti leh a. Mama nen chuan pafa pawh an ang lo, interview te pawh an ang lek lek zawk. Mama chu a ding hluai a, "Pa, ka do ngai lo che. Mahse, Malsawmi hi tun ṭum zawng keiman ka lo thunun ang e" ngenngâwl zetin a ti a. Ka lo inhum ruh..

Ka pa chuan min rawn en a, ka lû-ah chûl thuakin, "Va mu hahdam rawh. I pa ka la damchhung chuan tuman an tina lo vang che" a ti dam thlup a. Ka thla hi a muang nghal ngawih ngawih. Thuawih takin ka pindan lam ka pan ta a. Engtin nge an awm zui a, eng thu nge an sawi zui tih ka hre lo va, ka ngaihven lo bawk. 

Ka mumangah Parvula nen thim zingah kan lo vak dun a, eng nge kan zawn pawh ka hre lo, Parvula khama a liam thla tur chu va bawh rawkin ka lo pawt vak a. Ka harh nghal. Dar 1:20 chiah chiah a ni. Ka mut a chhuak leh tawh si lo. A va hrehawm tak. 

A tukah pawh ka mit a thîp hlur mai. Ka zawi nguai bawk si. Tuilum ka in laiin call a lo kal a, Zorina a ni. 

"Chhunah ka rawn kal ang. Eitur ka rawn keng dawn a, min lo nghak la aw" a rawn ti nghal zung zung. A va hmanhmawh thei tak. 

"Ngati nge?" Ka lo ti hû thung. 

"Ka û piancham a nia. A pualin cake ka order a, aman a ei zo thei dawn si lo va" a rawn ti zawi sup a. 

"Ehe! A ni maw? Umm, ka lo nghak ang che" phur zetin ka ti a. 

Kan dah leh ta rih. Che dangdai thei bawk sia maw. A û hi a hmangaih ve hle a nih dawn hi a. Au Bawiha a awm lo chu hrehawm ka ti,Viteii a haw bawk si. Kan pali tlawnga tukṭhuan kil chu ei pawh ka ei tam thei nek lo ve. Kan inbe miah lo bawk. Ka ngaihbel nge ka pa pawh chu a hlim thlawt lo. Eng emaw hnawk leh buarchuar hi zawng a awm chiang. Chumi zawng chhuaka chingfel turin ka thluak hi a châk tawk si lo. 

Mama a chhuak a, Ka pa chu huana kal turin a insiam mawlh mawlh bawk. Ka nu erawh min veng dawn nge a ṭhu reng ringawt.. ka pa chhuah hnuah ka pindanah ka tawm ta daih a. Ka la damkawr ve tho nen, chet vak ka tum lem lo. Movie ka en laklawh laiin ka nu chu a rawn dak a, "Teber, i nu Maziri te inah ka phei lawk dawn a nia.ka rei lo vang " a rawn ti ta hlauh mai. Ka lo buk khum nghat ringawt. Phur deuh anga lan ka duh teuh lo. A chhuak fel ta maw tihah Zorina ka call nghal. 

"Keimahin ka awm" ka ti a. 

"Ka rawn phei nghal" a rawn ti ve bawk. Dar 11 a pel âwrh chauh a ni. Mahse, hun thawl kan duh ve tho alawm le. A fimkhur bawk a, cake vang pawh a ni tho ang a, taxi a rawn hmang a. A rawn luh rualin kawngka ka kalh nghal rap. Cake chu dawhkanah ka va dah a. A lian lo naa a sial reuh kher mai. "I û chuan a la ei lo mi?" Ka ti hû a. 

"Khatiang chiah kha ka ordersak tho alawm, kha chu kan pahnih ei tur" a ti a. Mak ka ti deuh, mahse, ka sawi zui lo, a aia pawimawh sawi tur a awm ṭeuh. Insi rialin kan ṭhu dun a, kan inzawmna la rei lo viau mah se, a bulah hian ka ngam sârh. A hma anga han laih leh han zah kual kha ka nei tawh hauh lo. 

"Ka pa leh ka û ten an hmu ve châk che a" a ti sup a. 

"Ka zak e a" ka ti tak naa, a hmel thutak lutuk avang chuan, "Hmuhte pawh kan la inhmu ang chu" ka ti leh hnuhnawh a. 

"Teber..min la hmangaih lo tiraw?" A ti thut. A mak thei e, ti nge hetia a ṭawng thut zel le. 

"Ti nge?" Ka ti thuai a. A heh liak zauhin, "Ka hre duh a..ka sawi awmzia chu…" tiin a ngawi leh daih. 

Ka ngaih a ṭha ta vak lo, "Sawi la,..eng nge sawi i tum?" Ka ti a. Ka melh kiau bawk. Chhuat lam a melh ran a, a mithmul sei er tan chu hmeichhe thenkhat hian an awt ngawt ang, a mit a khap fak fak a.

"Zaninah kan insual leh dawn a, a tawp nan" a ti ta a. 

"I taksa a na tawh lo em ni? I sîl deuhte kha..a reh tawh mi?" Ṭha deuha ka tih chuan mak a ti deuh nge, nui lek lek hian min rawn thlêk a, a va hmelṭha tak. 

"I phal tihna tiraw?" A ti sup a. 

"Phal lo mah ila, i ti dawn tho sia" ka ti mai a. 

A ṭawng leh hmain, "Ka kal ve châk" ka ti hlut a. A chek hluk, "Mipa bumro leh tharum ngaina deuh deuh bula i awm ka phal lo. Ngaihtuah pawh ngaihtuah tawh suh" a ti nghut. 

Parvula a rawn kal a, an in chul leh thuak thuak tawh. Thingpui lum tura ka tho chu, "Kha pa kha hmaichhanah hian i eng nge a nih sawi teh" a ti zawi raih a. 

"Tu?" Ka ti hû. A hmain tu chungchang mah min zawt si lo. 

"Damdawi ina rawn kal ve, nui rengpa kha" a tih chuan ka nui hawk hawk. "Bena a nih kha, Mama ṭhianpa" ka ti liam puat a. 

"Ani kha em ni? I nu leh i û ten an duhpui che chu" a ti leh a, a mitmeng chu a tak ngal bawk. 

"Ka hre lo. Ni lo vang..chuan engtin nge ka nu leh ka û te chungchang kha i hriat?" Ka ti a. A nui tawi tak a. 

"Ka risk" a ti sup. Ner sak chungin choka lam ka pansan ta a. Parvula a be mawlh mawlh chu ka hre pha reng, au Bawiha nen an inang ka ti riau. Ran an duat dun bawk si, Au Bawiha chu ui chauh pawh a duat lo, zawhtê vakvai thleng hian a kawi ṭhin. Mahse, ka pa thaw a hah aṭangin zawhtê chu vulh an phalsak ta lo va, ar thlengin a ngaina. Mama hian Ar sual huai chu a ngaina ve,. Mahse, a vulh tawh lo. Sumdawnnaah a bur chawt mai a nih hi. 

Thingpui kan in dun laiin ka nu a rawn haw ta thut! Zorina chu a danglam eih lo. Ka nu zawk chu a hrilhhai letling. Engmah a sawi lo chuan ka hrilh a lo tihai ve thung. Ngawi rengin an pindanah a lut daih. Za vak lo va nui chungin, "I nu chu kan surprise ve hle mai" a ti a. Ka inthlahdul leh thei ta deuh. Ka nu khan Mama a va biak ka hlau deuh, Mama a rawn lan vaih chuan buaina eng emaw a chhuah ngei ka ring tlat a ni. 

No ka sil zo ka va phei leh lai chuan a phone a ri a, a la vat. "Aw..khai aw! Aw..aw le..ka rawn haw nghal e.." tiin a ding vut a. Min rawn enin, "Te, ka kal a ngai. Lo ṭha rawh aw.." tiin ka biangah a rawn chuk zauh. 

"Ngati teh thut?" Tia ka auh zui chuan, "Ka rawn be vat ang che..bye aw" a ti ringawt. A mak rum rum ṭhin ê..

 Ka pindanah ka lut zui nghal. Ka inbual a, a la hma tho naa, tihtur a awm lo nen. Ka inthlak zawhah Zorina ka call ..a la thei lo. Buaina a tawk em ni? An rawn call khan a hmelhmai a danglam a, hlauhthawn nei niawm takin a awm a nih kha. A û a zual em ni? Nge a pa zawk?! Ani pawh hi Mama te ang tho, ka lakah hian a la ngam sârh lo, zêp eng emaw hi a nei ni tlatin ka hria. 

Tlaiah na dang ka nei lo bawk a, eirawng ka va bawlpui ve. Viteii awm lo chu a khawharthlak bakah a hrehawm. Ka nu nen lah kan inbe mang si lo. Khaw thim hma deuhin Au Bawiha a rawn thleng ta hlauh a, ka lawmzia mai chu a..Boruak danglam em êm awm lo chuan zanriah pawh kan ei ve leh thei hram e. 

Zorina lah a reh vung vung mai a. Ngaih a tiṭha lo. Dar 8 velah mut mai ka tum ta a, ka phone a rik avangin ka hmai ka phih zo thuai thuai. Rpa a lo nia! Ka la ta tho. 

"Zorina te chanchin kha i hre tawh em?" A rawn tih chuan ka buai vek. 

"Hre lo, eng nge?" Ka ti ṭial rûan a. 

"A û kha a hniam leh deuh a, tunah Trinity hospitalah an awm. Hei kan kal dawn a, keini pawh" a rawn ti a. Chu chu a ni ngei ang, hmanhmawh taka a hawn chhan kha. Ti nge engmah min rawn hrilh ve loh le. Mahse ,ka ngaihtuah a, a pa a rintlak dawn si loh, amah bak a u buaipui thei tur an awm si lo va, a buai dawn êm a ni. 

"Min lo sawm ve ula..Desy ka lo sawm ang.." ka ti ta ngawt a. Ka chhungten an remti dawn lo tih ka hria, mahse, ar talh dan chi khat chauh a awm lo. 

"Aw, a va tihzia dawn ve..ka lo be leh ang che" a rawn ti a. Kei pawh ka inthlak sawk sawk. Desy ka call nghal bawk a, "Mate, Zorina u va kan ve ang, mahse, ka chhungten chhuah an phal dawn lo, ka la dam chiang lo nen, pleasein i thluak hmang la, min rawn sawm chhuak teh" ka ti ta mial mial a. 

"Urgent thei mai mai" a rawn ti sap. An ni pawh an chhungkua an buai ve lai a ni a, rawn len luh takngial pawh a hman loh laiin ka mamawh miau si a. 

Ka biak aṭanga reivak loah a rawn kal ta a, a ṭawng hlut chu ka hrereng. A cousinte inneih lah kha ka tel ve thei ta si lo, a nuam lo zawk. "Teber, i hman em" a rawn ti lang lâng a. Ka nuin, "Khaw nge in kal dawn?" A lo ti nghat. 

"E! A la sawi na nge, kan ṭhiannu Dingi kha a pu a boral a, zaninah an khuaah a haw nghal dawn sia, va thlah ve ang kan tia, kan rei lo ang" a tih zat zat lai chuan ka lo nui vur vur. Thihna ber kher chhuanlamah a hmang a! wm a tinuam lo e a. 

Ka pa hi hetiang chhiatna lamah chuan pa bengvar tak a ni bawk a, ka nu ṭawng hmain, "Ekhai! A va zia lo ve, va kal rawh u. Dingi kha khawi khua nge khah?" A ti chuar chuar a. 

"Hnahlan daih..a hla sia maw, han zui ve dawn pawn, Teberi a dam ṭha si lo va, keimah chauh chuan ka kal hreh deuh a" Desy lah chuan a lo ti sauh sauh. Ka insiam zo va, kan chhuak ta nghal. Ka thaw huai mai. 

."Dingi kha hrilh lâwk a ṭha lo maw? Motheri'n a lo call ang e" ka tih chuan, chiang zeta min rawn melhin, "Zep i neiin ka hre reng a ni. Zaninah engkim sawi vek ang che. Dingi pawh ka be vek tawh e" a ti dam thlap a. Ka ṭhiani chu ka kuah tawp. Ka tan hian a va ṭangkai ṭhin ta êm..

A scooty bawkin Trinity Hospital lam chu kan pan ta nghal a. Rpa te nen kan inbe bawk, Hospital kawtah min lo nghak dawn a ni. 

Kan va thlen chuan an lo ṭhu ṭhap tawh a. Khawmuang lovin kan lut nghal. Step kan zawh thui angreng sia, ka tai a na leh ṭêp a ni. Zorina û an dahna ward kawngkaa ka pen lut chiah chu Zorina leh Mama lo ṭhu dun chu ka va hmu ta thut a! Ka ding chawt mai.