Zor 6

ZÔR…(6)

Ziaktu : Toni Râlte

"Engvangin maw?" Ka ti hluai. Duh aiin ka aw pawh a ring hrat. 

"Ani kha chu ka ngaina lo" a ti leh tawp. Makti zeta melhin, "Ka ngaina thung alawm" ka ti sap. Zorina vanga ka huaisenna chu kei pawn mak ka ti. Ngaihzawng chungchânga ka chhungten min kam khatin tumah ka chhang let ngai lo. 

"I ngaina thei lo. Mi ṭha a ni lo" a ti leh hmuk. 

"Ka ngainat theih lohna chhan tur ṭha tak i nei a nih loh chuan, ka mimal nunah rawn inrawlh suh" ka ti hmak. Mama chu a rawn ding hnai sauh a, mitmeng rum ûl hian, "Malsawmsak, i û thu i hnial ang maw?" A ti vawt raih. Chhan chi a ni tawh lo tih ka hriat avangin ka ngawi ta a. Tuilum pawh ka in zo thei lo,. Titau chungin ka pindan lam ka pan ta a. Ka mu pawh ka mu deuh chawrh chawrh..ti nge Mama kha tiang khan a awm? Zorina chu hriat pawh a la hrechiang awm tawp si lo. Insual mi a ni tih lo hre ve ta pawh nise, a chanchin diktak a hriat chuan a rilru a danglam ka ring. A chhan chu Mama hi hetiang khawnga rilru hneh awlsam tak a ni tlat. Kum 5 lai chu kumtin zirlai naupang pahnih a sponsored tawh. Tlema mi chanchai deuh nia a hriat te hi a rukin vawi tam a pui tawh bawk. Zorina te dinhmun dik tak hria se khatiang thu kha a sawi ka ring miah lo. 

Ka leh ka leh laiin Zorina msg ka dawng ta a. 

"Ka thleng. I mu tawh em?"a rawn ti a. 

Inla thîkthu chhe deuhin, "I va thleng har ve , khaw nge i penkawi?" Ka ti ve ngial a. 

"Rpa te inah" tih chauhin min chhang. 

"Insual tawh suh aw" ka'n ti ngawt a. 

"Ngah maw?" A rawn ti duh lek. 

"A ngai lo, a hlauhawm" ka ti thung. 

"Vawi hnih chiah a la ngai a" a rawn tih chuan, rang lutuka typein ,"Engtikah" ka ti vat. 

"A la chiang lo" tiin min chhang. 

Ka reply leh hmain, "Ka'n buai lawk aw. Chuan muhil rawh. Muttui" a rawn ti nghal daih. Mahse, a û emaw a pa emaw buaipui an ngai a nih ka ring. Ka thinrim duh vel lo, ka mut pawh a rawn chhuak ve ṭan e. 

Ka zing tho chu ka awm a nuam lo viau mai. Min zaina lai kha a na et et reng mai a. Pawnlamah chuan engmah han pûn leh dik lo a awm si lo. Chokaa ka va phei chuan ka nu chuan, "I va nawm loh hmel ve" a lo ti vat a. 

"Nia, min zaina lai hi a rawn na leh deuh a" ka ti ringawt. 

Mama tuilum rawn in chuan, "Khaw maw, a ṭhuina te kha hnâi a rawn la a ni lo maw" tiin ka kawr hlim a rual a. A hil vek bawk si. Ka sawi thiam danin an zaina laiah chuan chemte hriam vak lo hian rin tâwk tâwk se chutiang chu niin ka hria. Nachhawkna ka hmawm a, pum damdawi hi ka nghei ta miah lo bawk. Nachhawkna ka ei nasat lai khan ka lo ei tawh lo zawk a. Tukṭhuan pawh ka ei châk lo kher mai. Bar hnih vel âwm chu ka bar awm e. Ka kham ta mai. 

Ka nu chuan, "Kan han inentir leh mai dawn em ni? Kha i hmelhmaiah pawh a lang alawm" min ngaihtuah hmel tak hian a ti a. 

"Aa..ngaichang phawt ila,. " Ka ti ringawt. Ka pa ka chhun nge inentir hi ka hreh tlat zel. Mama'n, "Ngaihchân a ngai lo, va kal r'u, ka nu nen" a lo ti khauh fung mai. Ka ner sak ringawt. Mahse, nia a nat dan nget nget chu a hrehawm ve êm avangin inentir mai chu pawi ka ti lo. 

Zorina'n min lo call a, pindanah ka lut nghal. Ka ṭhat vak loh thu ka sawi chuan, "Incheck up rawh" a ti vat a. 

"Nia, anu nen kan kal ang" ka tih chuan, "Ka nu ti rawh" a rawn ti nghut. 

"Ka peih lo" thei leh thei lo va nui chungin ka ti a. A thaw hak ringawt. Dar 11 velah ka nu nen chuan kan chhuak ta a. Mama hian a pualin 'Thar' a nei a, ka pa a pension khan Scorpio 2nd hand kan la ve bawk. Au Bawiha leh keiin scooty kan nei ve ve a. Kan Scorpio hi chu a tlan chhuak mang mang lo, Au Bawiha hian eng emaw changin a khalh chhuak a, ka pain a khalh thiam bawk si lo. Driver pawh a hranin kan la lo, kan hman duha Au Bawiha a hman si loh chuan kan ṭhenawm tlangval U Lawma hi kan chhawr mai zel. U Lawma hoin incheck up tur chuan kan kal ta a. Nachhawkna khan min chhawk deuh naa a nat chu a la na kâl relh relh tho. Min zaitu Dr. Hmingtea hi ka pa nen inhmelhriat ṭha tak an ni ve bawk a, nghak rei êm êm lovin kan lut thei ta. 

A nat dante chu ka sawi a, "A chhung lamah hian a septic deuh em mawni le..hmarcha i ei nasa em?" A ti a. 

Ka chhan hma hmain ka nuin, "Ei chiang e, ka hau reng, a chaw ei rawn tui thar hian chintawk hre hek lo" a lo ti hmawk hmawk a. Ka nui ringawt. Pu Hming chuan, "Antibiotic ka chawh phawt che ang a, thil thar, uih leh al lutuk te insûm rih la, tuisik in tam bawk la aw.." a ti mual mual a. Ka bu nghat ringawt. Damdawite kan lei fel hnuah hawn lam kan hnaih ta a. Ka nu chuan, "Tikhan lo zu haw la, Sawtah i nuteii te ka va tlawh lawk ang e, kal hma khan min rawn bia a..an buai leh deuh nge mawni" a ti a. 

Ngawi rengin motorah ka lut. Mama sawi ang deuh khan tunhnaiah ka nu hi a lênglâm riau. Nuteii te chu an lo buai tak tak pawh a ni ve thei tho. U Lawma chu a titi leh suam suam a, ka ngaithla liam mai mai. Ka rilruah engmah a lut lo. In kan thleng a, ka pa chu Kohhran hnatlâng a lo thawk a. Ka pa hi rawngbawltu a ni tih ka'n sawi hram ang e. Viteii nen tlawng kan awm leh ta. Mahse, U Vani a rawn lut a, Tun ṭum chu Alu chop leh pakora a rawn zuar ve thung, ka lo chelh leh a. An pa nen an inkar pawh zawh a lo ngai lem lo. 

"Awii, a zahthlak nge a lawmawm ka ti dawn. A bialnu anga insawi nau pai kha kan pa fa chu a lo ni lo tak tak a, a nî fapa fa a lo nia! Chhungkhat an ni sia, kan pa kha tal awhtir an lo tum niawm tak a ni. An hrechhuak leh ta sia" a ti suam suam a. A tan chuan nâ chu awm tho mah se; a thawventhlak huai tho ang. 

"Indanna te ei mai awm alawm le, rai hlauhte chuan" ka ti a. 

"Ka hre tawh bîk lo, a fa hmasa pawh kha an inneih hmaa a pai tho a nia, thla 3 na velah a hre chauh an tih chu! A va nêpin a va invawng awm lo ka ti..kei Bawihteii ka pai tirh kar thumnaah ka hre nghal hmiah" a ti leh bawrh bawrh a. 

Desy'n min lo call avangin ka biaksan lawk a. "Ka rawn phei ṭêp..nizan ka mu hma lutuk a, nimin kan boruak vel ka hrilh châk tawh lutuk che" a rawn ti nghal mawlh mawlh. Ka khi sak a. 

U Vani chuan, "Laldesy nau Ruati pawh saw kan pain ka bula a sawi a nia, mi pasal a ngaizawng an ti a nia aw.." a tih chuan ka mengphâwk deuh. Sawi tawh angin Ruati chu a lerh ve riau a. Thilmak vak a ni lo. Tunlaiah pawmlai nei ngaihzawng neih ching leh lo ngaizawng ve duh mai hi a mikhual tawh lo. Mahse, Ruati chu nau anga ka en avangin ka lâi a na deuh. 

U Vani haw hnu lawkah Viteii chuan, "Teber, ka muhil lawk dawn. Ka lu a na reuh lutuk a, rawngbawl dawnah min kai tho rawh aw" a ti a. Mu turin a pindan a pan nghal. Kei pawh chu tihtur êm êm a awm loh bakah ka awm a nawm vak loh ve tho avangin Living room ṭhutthlengah ka tlu zal a. Zai ka ngaithla pah. Zoramchhan hi Mizo hmeichhe zinga zaithiam ka tih ber a ni a, mipa lamah chuan H. Lalrempuia hi ka ngaithla nasa. Rap tih vel lam hian ka lung an len vak lo nge ni, an hla ka neih âwm pawh ka hre lo. Ka lo chhing sek aniang, ka harha ka men chuan ka nu hian min lo dinchilh reng mai a. Ka hlau hman ṭhelh a ni. 

"I lo haw law?" Ka ti thuai a. Ka aw pawh a lâwi deuh. Ka ngaihbel nge ka nu mitmeng chu a hlim loin eng emaw tawng a ang. 

"Umm, Viteii hi a mu em ni?" A ti a. A aw erawh a pangngai viau. 

"Aw..a lu a na a, a mu a nih kha" ka ti mai a. 

"Va kaitho rawh. Chutia a mut daihin" a ti hlak a.

Ka tho ve mai. Viteii chu ka va kaitho a, "I zia deuh em? A la nat chuan la mu rawh. Eirawngbawl êm êm a ngaih loh hi" ka ti a. Ka khawngaih deuh a ni ber ang chu. Ka nu khan nizan khan vawiin tlaia chaw ei tur kan neih tur kha a sawi vêl a, zingah khan bazar turin min rawn kaitho tawp si lo. Zorina hnar nan a hmang tih hriat reng..

"Ka zia tawh reng, nachhawkna ka ei a" tiin Viteii chu a rawn tho ve mai a. 

Mahse, ka pui ta tho. Kei vaipaden hi tui ka'n ti khawp a. Au Bawiha hian khawi aṭanga a thiam nge ni dawn ni, tlai khat a rawn haw hma a, a siam ve ta a. Tui kan ti tlâng teh e. Kei pawh thak ei insûm tur ka nih laiin ka ei châk sia, vawiin tlai chu ka siam ta hmiah. 

Bawkbawn leh vawksa rêp hi a inrem ber ka tih nen, bawkbawn kan lo nei tawh si lo, bean nen a tui tho tiin bean nen ka siam ta a. Ka siam dan hi ṭhenkhat hre châkte an awm leh maithei a. Bean kha sin ve deuh hlekin ka chan a, Vawksa rêp ka chan bawk a, chumi-ah chuan purunsen leh var, bahkhawr, sawthing, hmarchapui pum 5 vel, hmarcha hring a awm loh pawn a rêp hi a pumin ka ngam tâwk ka thlak, chi, ajiono, aiêng, chilli powder, tel tlem nen. Tui daiah ka chhuang nghal vek a. Tui a chim chang chang ka leih a, tui a kang hunah suanin ka deng chip leh ṭhin. A duh tan chuan tui ve tak a ni e. Ṭhenkhat uih ngaihna chuan dangpuithu pawh an tel hlek ṭhin. Chutiang chuan ka siam suah suah a, Viteii'n min lo nuih rah rah mai. 

"Nge?" Ka ti hû a. 

"I thiam ve zâwng hi i siam phur thei ê" a tih chuan ka nui hawk hawk. Ka siam zo inbual ka tum lai takin kan in kawtah tak motor insu an awm nge an rak chel chul mai a. Hmanhmawh zetin kan tlanchhuak nghal. 

Car leh pickup an lo insu a lo nia . Kan in kawt kawngpui hi a zim hlek a, dik tak chuan kawng chhak lam hi tu te emaw thiltithei deuh te'n hardware dawr atana hman turin an sa mêk a, vantlang kawng an rawn nêk mah mah a, ka pa pawh a phun nasa ṭhin. Tihtheih kan nei ve si lo va. Car aṭang chuan hmeichhe pakhat a chal aṭanga thisen rawn chhuak nguah nguah hi an rawn pawm chhuak a, kan in bak in awm hnai hek lo an rawn pawm lut ta a. Ka nu a philî leh chung tawh. Pickup front seat-a ṭhu mipa pawh chuan a chal a dawm vung vung mai. Traffic police an call a. An inberem thei mai ang chu maw. Nula chu ṭhutthlengah an muttir a, a chal thi bak hliam dang a neih loh vangin damdawi in êm êm han thlenpui chu driver te an la inbiak a ngai bawk nen, an ti vak lo a ni maithei. Ka nu chuan first aid box la nghalin a theih ang tawkin a buaipui nghal a. Kei erawh ka lo en reng ringawt, ka hmuh tawh hnu a ang riauin ka hria. A thisen chhuak te an han tihtawp hnu, damdawite an hnawihsak hnua a rawn tho chhuak chu ka phu zawk mai. 

"Mapui.." ka ti nghek a! Min rawn melh hâw laiin, kawngka bul aṭangin, "Hetah eng nge i tih?" Mama âw hian a rawn ti thum chhak a. Mapuii leh Mama chu an inmelh ta ngat ngat mai. Ka nu leh midangte chuan makti zetin an thlir reng a. Kei erawh chu min ṭhawng tehchiam lo. Mama chuan awki hniam angreng tak hian, "Eng nge thleng?" A ti halh a. 

Mapuii chuan, "A ṭha vek e. Ka pi, ka lawm lutuk e. Min lo buaipui a..kan kal phawt ang.." tiin ka nu a melh a. A che sawk sawk a ni ber, a rawn pawm luttu tak pawh chu a hrilhhai hmel kher mai. Kawngka a pel fel dawn vel tihin Mama chuan, "Ding rawh" a ti nghut a. Mapuii pawh a ding chawt mai. 

"He inah hian eng nge i rawn tih?" Tiin a va kuaiher sawk a, Mama awmdan chu ka duh lo takzet. Thinrim hmel a pu bawk si. 

Nui sâng chung hian, "Engmah ka ti lo" tiin Mapuii chuan a melh let ve sak a. Ka inrawlhna tur ni lo mah se, Mapuii chu chhan ngai nia ka hriat avangin, "Mam, an insu a, hetah an rawn pawm lut a nih kha. Ti nge khatia i tih vak?" Ka ti a. 

Min rawn melh hrâwk, a nelawm lo lutuk chu kei pawh ka chhungrilah ka khur lek lek. Mahse, zâm miah lo angin ka lang lui ve tlat. Mapuii te chu an chhuak a. Mama chuan in chungah min kai chho dawr dawr , a ngaihna hi ka va hre lo tak êm. Ṭhutkhawmna pindanah min dinpuiin, "Tun hnuah kei min hretu nazawng hi biain hnaih tawh ngai suh ang che. I hria em?" A ti chang fak. Hawihai zet hian, "Engvangin ?" Ka ti hâ a. 

"A chhan chu i tan mi ṭha an ni lo a ni" a ti thâm ṭuak. A sawi awmzia pakhatmah ka hre lo. Ngaihtuah dan tur lah ka hrethiam hek lo. 

"I â tawh a nih kha" ka ti hliai a, ka banrekah nghet zeta rawn hmerin, "Ka nau i nih angin ka thu chu i zawm ngei tur a ni. Ani kha i tan mikhual a ni a, ni zel rawh se.." mitmeng tûr zeta min melh chungin a ti leh a. Ka chhang ngam ta lo. Ka bu ta nghat a. Ti nge tunhnaiah Mama mizia hi a danglam thut thut le? Chupawh keima kaihhnawih a ni zel lehnghal a. Mapuii kha tu nge a nih ka hrechiang châk lehzual. Mahse, Mama'n ka ngaihven tih a hriat vaih chuan nuam ka sa hauh lo vang. 

Ka la hrereng. Kum 8 ka nih kum hian kan ṭhianho kha kan â ve bawk a, Rih Dil kha kan kal châkin hmuh ve kan châk ngawih ngawih si. Inthurualin kan ṭhianho parukte chu Champhai road nia kan hriatna lamah kea Rih dil han thlen tumin kan kal ta hmiah a. Kan kalna lah kha a lo dik awzawng lo, Ngaizel lamah Lunglei lam panna kawngah kan lo va kal daih chu niin, chhungten min lo zawng nasa mai a. Chumiṭuma Mama hlauthawng lutuk leh ka chunga a thinur lutuk chuan min hrem ta a. Kan in hluiah khan in hnuaiah hnawmhnawk dahna kan nei ṭhin, a thim ruk mai a. Chutah ngei chuan tlai dar 6- 9 thleng min han dah ta tehreng a. Ka ṭahna lamah ka aw pawh a chhang vek. Au Bawiha min lainat hian a rukin kawngka min lo hawnsak tawp a. Chumiṭuma Mama thusawi vawiin thlenga ka benga la châm thin chu, "Teber, ka hmangaih che a. Mahse, ka phal loh thil i ti emaw ka thin i tirim a nih chuan i tan misual ber ka ni thiam tho a nia" tih thu kha. Khata ṭang khan Mama tihthinrim emaw a thu awih loh kha ka ngam ta lo. Tun hnuah ka han nula chho ve ṭan a, han palzam chang nei mah ila, ka bula a remtih loh thu a sawi fak tawh chin chu ka tilui ngam ngai chuang lo. Mahse, tunah hian buai rûkna ka nei. Mapuii kha chu a ni lo, Ka bialpa thar Zorina kha Mama hian hnaih lo turin min ti tlat! Ka thei ang em? Ka ngaihtuah zawng pawn ka tâwt nghal up up thei. 

Kan zanriah ei pawh boruak chu uap tak a ni. Ka pa takngial pawn hrehawm a ti tih a lang. Au Bawiha lah ngawi rengin a ei mual mual a, a eikham veleh a chhuak daih. Mama lah tuman kan be ngam si lo. Ka nute an inkhawm a. Desy lah kha tlaiah khan a rawn kal naa, eng han sawina khua kaw hek lo. Ka va bia a, a rawn phei thei dawn hlauh. 

Zorina msg ka dawn awmchhun, "Naktukah chhuak dun ang" tih lah chu ka la chhang lo. Ka taksa lamah harsatna ka tawk ang em ka hre lo, chu ai mah chuan tunhnaia Mama mizia avangin a rûk pawh nise, Zorina han chhuahpui chu ka ngam chiah ang em ka hre lo. Zaninah chuan Badminton an khelh tur thu a sawi a, a reh tur thu nen. Mama avangin kan inbe vak thei lo pawh chu ka lawm angreng zawk. Desy a rawn thleng a, Viteii'n ka laptop ami movie a en a. Keini pawh ka pindanah kan awm ta daih. 

Intihlim lui hram hramin Timothy nen an chaw ei chhuah vel chu ka zawt a. A phur ngang mai. 

"Awii,ih maw..ka kal hma khan vawi li ka inthlak hman. Mahse, Timothy mizia ka ngaihtuah a, simple deuh a ngainat ka ring a. Tiang chuan ka kal a. Sawtah Bai bâwmah kan ei a, ka puar leh puar loh pawh ka hre lo, a thusawi ka ngaithla a, ka lo nui leh vur vur zel a niang. Min fiam a, ka zahzia chu. Chuan, eikhamah min thlah nghal a. Kan in kawta kan din laiin, "Des, i rilru ka hria a, ka lawm. Mahse, khawngaihin kar khat min lo nghak la, pangngai takin kan inzui dawn nia" a ti ta a. A chhan ka hre châk a, ka zawt ngam bawk si lo. "Aw le" ka ti ta ringawt..chu zawng chu. La inngaizawng lo mah ila, nuam ka ti. Ka atchilh ngawih ngawih nena kan insi thei ringawt pawh kha" a ti hluam hluam a. A moodah kei pawh ka awm ve titih. Desy chu ka lawmpui rualin Timothy chuan eng nge chinfel tur a neih ang le?bialnu te hi a lo nei ṭût ang a, chung vel chu em mawni le..mahse, a hnual zawnga ka ṭhiannu sawipuia a hlimna tihchhiatsak ka duh lo. Kei pawh Zorina vel ka sawi ve a, ka nu leh Mama'n an ngainat loh thu erawh a chhan ka la hriat chiah loh avangin ka sawi tel lo. 

 A leng ve ta reng a, kan tih ngai loh deuhin wai wai te kan bâwl a, kan eitui phian. Ka nute rawn haw hnuah a phei ve ta a. Kei pawh ka intihfai hnuah ka mu ta nghal. Zorina a la reh a, a sawi lâwk tawh tho va, ka tau hran lo. Tun lai hi ka taksa chak loh vang nge ni dawn ni ka mut a chhuak hma ve thei riau. Khawvar dawn lam zing dar 4 bawr velah ka harh a, ka zun a lo chhuak nasa chu niin, ka va zung a. Ka tui laksa a lo zo vek mai a, Ka room bathroom ami han lak ngawt chu zia lo ka tih deuh avangin choka lam panin ka phei a, tui chu ka thun nghal. Ngawi renga ka dawh lai chuan ka ngaihbel em mawni pawn lama ṭawng thawm niawm ka hre ta a. Ka ngaichâng ren râwn a, choka leh garage inkara ka nu pangpar ṭiak ho dahkhawmna aṭanga lo chhuak niin ka hria. A hma pawn heta ṭang hian ka nu a rawn chhuak tawh a nih kha. Thawm chu a reh thut a, ka ngaih a ṭha lo letling. Ka hlau miah lo thung. Zawitêa kawngkapui lam chu panin a inkalh lo tih ka han hmu nghal mai bawk. Tun ang hunah kawngkapui a inkalh lo ngai lo. Dik lo eng emaw chu a awm niin ka hria. Ka nâm deuh a, a sak tlat. Kan kawngka hi a thing a chhah bakah hawn rual hian ri ring vak lo a chhuah ṭhin a. Chuvang chuan ka ding leh ta rih. Bottle pawh ka keng ran a. Chutah kawngkapui chu a rawn ri dat a, a rawn inhawng ta thut. Ka phut chian dan rapthlakzia chu aw..ka thlawk lo kha a mak! Chu aia mak lehchhawng chu, lo lut mêk chu ka nu a ni tlat! Ani pawh min hmuh rual chuan a dâng nghal sâwp sâwp mai. A mitmeng lah chu a alh phat lawi a! Ka nu pawh a ang nek lo ve. Ka thakhur a zia ta deuh tihin, "Nu" ka ti thâm ṭiak a. 

"Ti nge hetah eng nge i tih?" Vin deuh hian a ti a. Ka mitah a en ngam miah lo. 

"Eng nge i tih zawk?" Ka lo ti let ve sak. 

"Ka pangpar ṭiak a bo nge bo lo ka va en mawle..rukru an tam tawh sia" namnul tum zet hian a ti a. 

Ka awih lohzia chu ani pawn a hmu thiam viau ang. Dâwt a sawi tih hrethiam lo rual ka ni tawh tlat lo. 

"Mu rawh, kei pawh ka mu dawn" a ti khur dat a. Amah zawk chuan kawngka kalh sawk sawkin an pindan lam min pansan nghal. Kei erawh reifê chu ka ding khawng reng âwm e. Ka mut leh hnu paw'n muthilh chu khawilamah..ka ngaihtuahna a buai nuaih nuaih mai. Hman zanah tu emaw a vauna niawm tak ka hre tawh a, tunah zan rei tawh lutukah pawnah a chhuak leh a, tun hnaiah inah a awm khât hle bawk. Ka nu chungah hian eng nge maw thleng le? Dik lo zawng a awm, eng nge ka hriat a ngai a ni. 

A tukah ka mit a thip angreng. Ka nu chuan zing lama thil thleng kha hre lo ang maiin min lo be bawrh bawrh a. Kei erawh ka ni hûih mai. Ka sawi thiam lo, ka nu chu ka lo en leh kur zel. Midang erawh hrilh kher a ṭulna ka hre rih lo. Tukin zing ka mu leh hnu khan ka ngaihtuahna a kal lawr nasa a, thil pakhat ka rilru luah deuhtu chu ka pa hi a kum a tamin a lo tar ve ṭan tawh si a, ka nu lah a la ṭhalaiin a hrisel ve angreng si, nupa nunah ka pa hi a duhkhawp ta chiah lo em ni ang? Tih te a ni. Pawn lamah mipa dang a va hmu ta mai em ni ang? Chutiang êm chu ka ring phal si lo. Kan hriat theih tirh ata ka nu hian ka pa a zah piahlamah a ngaihsak êm êm reng a, nu leh nupui ṭha tak a nih lohna tur han hlin chat tur ka hre miah lo. Chuvang chuan a sawi ang khan bo a awm leh awm lohte chu a va fiah tak tak te pawh a ni ve thei. 

Inkhawm laia chhuah hi ka zah zawng tak a ni naa, ka pum rawn na leh riai riai avang chuan ka awm a nuam thei thlawt lo. Ka chhuak ta ringawt a. Ka haw nghal nal nal. Nachhawkna ka hmawm leh nghal vat a. Na tawrh hi ka peih kual lo. Duhdah deuhin ka mu a, Phone ka khawih. Zorina nena kan inbiakna te chu ka chhiar nawn leh a, vawiinah chhuah dunpuiah min sawm kha a nia, zingah pawh khan a rawn sawi leh. Ka châk ve reng. Ka nute ho lo bang phawt se ka ti rilru a. An lo haw ve ta sap sap, ka chhuah thut takah tiin ka nâ chu ka sawi duh lo va, ka ek a chhuak lutuk a tiin dawt ka sawi ta ringawt. Min zawt zui bîk lo. Thingpui in zawhah roomah ka tawm ta rih a. Ka nu leh paten ka nuteii te an va tlawh dawn tih ka hria. Pa Hmaa zu rui niminah khan bathroomah a tlu sual palh a, a ke lam a tina deuh an tia. An va kan ve dawn a ni ngei ang. Mama leh Au Bawiha te erawh in chungah an awm a , ka kalna hrilh kher ka tum hran lo. Zorina chu kan in aṭanga hla vak lo kawng zau laia min lo nghak turin ka hrilh a. Mama'n kan inphur lai a hmuh ka duh lo a tin ni. Ka nâ a zia ta bawk nen, ka insiam sawk sawk a. Viteii bulah, "Ka ṭhiannu Dingi te inah ka lêng lawk dawn a, an zawh che pawn lo sawi mai rawh aw" ka ti a. A bu ve nghat nghat mai. 

Zorina min lo nghahna lam chu ka pan ding nghal a. Min lo thlir rêng vang nge ka kal te chu ka dik lo, ka lai tlat! Ka bân te kha ka vai rual êm mawni..ka va ṭhing thei tak. A bike chuan kan tlanchhuak ta nghal a. Zemabâwk dâiah dingin kawng chhakah kein kan chho a, hmun zâwl nuam fahran mai, thingkungin a zar hlim si-ah kan ṭhu dun ta ran a. Ka lungphu ri chu a hriat phak ka ring. Ka zak ta riau chu ka inngei hial mawle. Ani pawh a chuti teh lua lo. Mahse, mipa zawk ta na nâ na chuan, "Ka lawm e, min chhuahpui a" a ti sup a. 

"I ho e a" ka lo ti leh ringawt. 

Ka kut a rawn la a, a hum nget nget. "Rawn lên chakawm viau mah se, in zahawm chhungkua sia" a ti leh a. A ṭawngkauchheh hi a thluaithlum ngai lo reng reng. 

"Kan zahawm kher loh..i zah vang a nih kha" ka ti a. Kan boruak pawh a zangkhai ta deuh, a nui a. "Zak e.." a ti tawi tak a. Min rawn thlêk hâin, "Min duh thu i la sawi lo" a ti nghut a.

"Sawi kher a ngai mi? Hei ka zui che a.." ka lo ti hlak hlak. 

"Aw. I sawi angah ka ngai mai ang..chuan" a ti a, a ngawi leh daih. Ka va melh a, min lo melh ve kiau. Chutihlaia a mitmeng chu sangha anga vawt kha a ni tawh miah lo. A ngainatawm a, a thûk hle bawk. 

"Eng nge chuan" ka ti hâ a. 

"I hming hi a nalh ka ti. Sawmsaki han nih tawp mai chu" a tih chuan ka ner sak. "Nang pawh Zawra" ka ti vat. A rawn ṭhu hnai ta hrat a, a rimtui zet chu a! Au Bawiha nen an perfume hman a inang chiang. 

"I chanchin min hrilh rawh" tiin min rawn ngheng deuh a. 

"Engtia chanchin?" Ka lo ti. 

"Eng pawh, i tetlai, i tleirawl lai. I duh duh" a ti duah a. 

"Hmm, sawi ber tur ka van hre lo. Nangman sawi zawk la, i chanchin" ka ti a. Ngui hmelpu lek lek hian, "Kei chu a pangngai. Ka pa leh ka û te nen kan awm a.." tiin râl lehlam tlâng chu a melh vang vang a.

A chanchin tlêm ka hre tawh tih chu sawi mai ka châk naa, eng emaw zawnga a ngaih ka hlauh avangin ka sawi duh ta lo. 

"Keini pawh i hmuh ang kha kan ni mai..ka û te leh ka nu leh pate nen ka awm " ka ti a. Kan inchhhan dan a rultawk thei lutuk chuan ka nuih a tiza. 

"I nu kha hman zan kha a tawk nuam lo ve ê" a tih chuan ka nui hawk a. 

"Hrethiam rawh" ka ti vat. 

Min rawn kuah ta a. Min fawh hmain ka zawh châk deuh ka zâwt châk si, "Lawk, Zorin, ngati nge min duh?" Ka ti hluai a. A kun zauh a , a nui deuh tih ka hmu thei. 

"Min duh vangin" tiin hnai takah min rawn melh a, ka zâm chhe dêr mai. Zawimuangin min rawn fâwp a, ka lo chhing tawp. Ka rin loh deuhin a zei hrep lehnghal. Mahse, infawh aia thui kal ka duh lo. Min nawrlui hek lo. 

."I zei danah bialnu i ngah tawh a ni chiang" ka ti sap a. A nui hawk, "Pakhat" a ti teh ngawt a. Makti deuhin ka melh hrâwk. 

"Pakhat chiah i la nei a maw?" Ka ti nghek a. 

"Aw.. pakhat chiah" a ti nawn sak. Awih harsa ti viau mah ila dâwt sawi hmel a pu si lo. 

"Nang chu pathum" ka ṭawng leh hmain a la ti zui! 

"Hmm, Laldami sawi a nih kha" ka ti a. Ka zak lem lo. Ka rualpui zingah a nei tlem pawl ka la ni tho. 

"Zora" ka tih chuan rang fê hian a rawn hawi a. "Ti tawh suh, thlûk rawh ka tih kha" nui chungin a ti. 

"Thlûk i duh chuan insual tawh lo la" ka ti ta daih a. 

A chek hluk a, "Chu bawk chuh" a ti duh lek! 

."nge bialpa insual chingte chu..ka tan a nuam hleinem" titau lek lek hian ka ti a. 

"Vawi hnih chiah a ngai tawh ka tih kha" ngenngâwl zet hian a ti a. 

"A nih, ka lo kal ve, in insual hunah" ka ti ngat. 

A ner suk a, "I hlau lo mi?" A ti dam thlup. 

"Ka lo au dawn che alawm" ka tih chuan, "Mipa dang bulah i awm dawn sia, ka insual tui thei nang" a ti nia! Ka rilru tê têin a thikthu hi a chhiat viau chuan ani insual a hrat sia, min khawih duh mai ang a..ka ti niah niah. Mahse, a mizia enin hmeichhe chunga kut lek duh tur chi niin ka hre lem lo. 

Khua pawh a lo tlai lam ta a, infâwp leh vawng vawngin hawn lam kan hnaih ta. Bung thar kan kai ta bawk a, kei pawh ka chhungte hmin lo mah se; ka thawveng a, ka hlim..

Zorina chu kum 28 a lo ni tawh a. Ka rin aiin a upa, a hmel landanah a la upat loh hmel nen. 28 chu an la upa chuang lo tho a. Bike pawh khalh chak dan tawk a hre viau e. A hma aia kan inpawha kan innêl zual ka beisei. Chhungkaw chanchin lam erawh kan sawi ta vak lo kha a nia. Ka hriat chin kha ka duhtawk ngawt dawn lo, hriatbelh tur neiin ka la inhre tlat. A hmaa min lo nghahnaah bawk khan ka chhuk leh a, "Zanin chu ka rawn kal lo vang. Zoa te inah kan leng dawn, min ngai ve sia, a chhung ten" a tih avangin zan lam chu ka khua a har leh dawn tih ka hai lo. Lehlamah Mama venthawn a lo ngai bawk si, buaina lian zawk a chhuah palh hlauhthawn thuah a lo leng lo tur chu a ṭha tho mai. 

Ka vannei hlauh, Mama chhuak a lo la haw lo. Ka nu te erawh an lo haw tawh. Ka nu ka hmuh hian engtin emaw ka awm ziah. Ka thil hmuh vangte pawh kha a niang e. Zanah pawh ka inkhawm ta lo mai. Ka nî te inah ka va tei phei mai mai a. Ka leng rei lo. Ka khua a har chiang. A tuk aṭanga class kal ka tum ve tawh nen, ka mu hma ta ringawt a. A changtupa nen kan inmangṭha hnuah vei leh enghelh nei lo zetin ka chhing ta vang vang a. 

Ka nuten scooty khalh an la remtih loh avangin Desy hnungah ka bet leh vâ a. Khawpui kan pelh hnuah a âng ta a. 

"Vanlalruati'n ka thin a tihrimzia hi aw..nimin chawhnu khan a bialpa nupui leh a farnu te an rawn leng mawle..chuvang a nia nizan pawh tumah kan inkhawm loh. He nu lerh thak lutuk hi ka kham takzet. Zah lah hi a hre ṭhak lo lehnghal a..ka kek hrep châk a nia" a ti tâwn tâwn a. U Vani thil sawi kha ka hrechhuak chiah. A lo sawi dik a ni maw..Ruati mizia leh nungchang hrechiang tan chuan thilmak a ni lo, Desy te erawh an zak dawn lutuk tih ka hria. 

"Khawi veng nge? A bialpa chu" ka ti a. 

"Chaltlang ami mawle, khapa reng reng pawh kha a tenawm tho..Vanlalruati tawr tawr hi lawm hriatchian hmasak ve tum tur a nia. A bialpa nupui lah kha a zahawm khep reuh a, a thinrim duh ṭhak lo lehnghal, hnar a len duhzia" a ti leh hmarh hmarh a. A hmel zawng zawng nen Desy zak lutuk tur chu ka ngaihtuah a, ka nui char char. 

"Nui teh suh. Ruati lah zak ve tho, "Ka hre hleinem..a sawi si lo va" te a ti mai mai a. Ka nuin, "Tuin nge 'Nupui ka nei a, min duh tho em' ti duh ang a tia..ka pa phei chu a zah vang nge a ṭawng ve mang lo. Mahse, an haw hnuah ka nau chu a hau hrep mai" a ti leh mawlh mawlh a. Desy te hi ri ve bawrh bawrh chi, inhauh pawn ṭhenawmte hriat phak tur khawpa awrawl ring an ni ve a. Râlte tih takah..hehe..

Mzu kan thlen chuan main gate-ah Lawmsanga a lo ding a, "Lo chho ve nghal la" a tih avangin ka inphurh chhohtir a. Bân hunah Desy in min rawn lam leh mai ang chu maw..ka kal lo rei deuh nen, ka ni dûk mai. Puipuii'n min lo be nghal var a, a fel reuh tak tak a ni. Ruthi te leh Rinpuii te erawh kan boruak a la dik hleithei chiah lo. Ka be hmasa bik awm lo ê..an pawi ka sawi pawh ni hlei lo. Ruata'n a material min hawntir thei dawn hlauh, ka xerox leh tawp mai a niang chu. Chhunah pawh kan canteenah ka chawl ve ta mai. Veivah sek kha ka ning deuh. Egg roll ka ei châk tawh bawk a, roll hnih ka ei! Mama chuan hria se a meng no leh vak lo vang. Ka châk miau sia lawm le. Chawhnu 1st period tâwp dâwn lamah ka tai chu a rawn na leh ṭan ta. Nachhawkna kha ka keng sa hrim hrim a, ka hmawm ta vat. A chhawk mai dawn emaw ka tih laiin a reh fel hleithei lo. 

Zorina'n min lo text ve zeuh zeuh a, ka tai nat thu ka sawi chuan, "Engtin tak nge i awm? Tawrh a hrehawm em?" A rawn ti vat a. 

"Ka ṭha mai ang" ka ti ringawt. 2nd period atang phei chuan ka bawk tawp. Hawn dawnin Desy ka biak a ngai ang a, hawn an lo phalsak ve kher lo thei. Motor hman mai tur a awm ka ring bawk si lo. Ka mangang lek lek. A khat tawkin tui ka in leh pawp ṭhin. Ka egg roll ei ṭeuh vangte kha êm mawni dawn ni..ka luak te a rawn chhuak ut ut. 

Sir a chhuah rual chuan an ri hak a, ka hawi chhuak chuang lo. Ka thlan fim a bawl ṭek ṭek. Ka darah hian dimtêin a rawn khawih a, thei leh thei lo va ka hawi chhuah chuan ka tum loh tawpin Zorina ka hmu ta mai! Ka meng phâwk teh e.

"Haw ang, kha i hmel pawh a dik lo" a ti sup a. Ka bag chu lain lehkhabu leh pente chu a khung sawk sawk a. Midang chuan an lo en ṭhap ringawt. "Mahse.." ka tih rual chuan, "Ka dil tawh" a ti nghut a. Min kai tho a, ka ding ngil thei lo, ka nâ chuan min pawt kun tlat! Dimtêin min kuah chhuak ta a. Pawn boruak ka han hîp chuan ka zia hawkin ka hria. Step zawh chhoh a ngai si. Step tâwpah chuan a ding a, "Hawh le" tih leh kun a rual a. Min puak a tum tihna..

"Ka kal thei" ka ti sap a. Ka tai leh ka pum chu a sa hum hum ni berin ka hria. Dawhthei loh zet hmel zet hian,"Hun khawhral suh" a ti a. Thu min pe a ni ringawt. Ka inpuaktir ta nge nge a. Miin min hmuh ka hlau si, ka hawi chhuak ngam lo. 

A bike dahna kan thleng a. 

"Lawk" tiin ka tai na lai chu a rawn khawih a, ka lo eu zawk. Ka bag-a ka romol chu phawrhin ka tui pai chuan a leih huh thuak thuak a, a sawr leh hnuah ka nâ laiah chuan a rawn bel a, "Chelh rawh" a ti zawi sup a. Ka chelh ve mai. A dai huai huai thei. A nachang ka lo hre lo hle mai. Kan tlan haw ta vang vang a. Ka ṭawng peih meuh lo. A lo kal ngawt dan te chu ka zawt châk, mahse, a dara ka lu nghatin a kawngah ka kuah bawk a..ngawi rengin kan tlan mawp mawp. Khawchhungah erawh thei leh thei loin ka hawi chhuak hram hram zel. 

Kan in kawtah a ding chat a. Hawn nghal ka duh thu kha vawi 3 vel ka sawi hram a, a ngaipawimawh ve a niang. Damdawi inah min phur lut ang tih ka hlau a ni. Ka nu leh Mama te avangin. 

Ka nu erawh a rawn chhuak tho a, Bike aṭang chuan Zorina chuan min kuah thla leh a, ka nu chuan, "Ehe! Eng nge a awmzia?" Lungawi loh hmel lek lek hian a ti chul a. 

"A ṭha lo va" tih chhanna chiah a hmu. A tawi thei tek tawk a nia. 

In chhungah min luhpuiin ṭhutthlengah chuan ka mu zangtha nghal..ka nu chuan min rawn ṭhutchilh nghal a. "A na leh em ni?" A ti dam diai a. Ka bu nghat ringawt. Zorina kal tur chu han melhin, "Ka lawm e aw" ka ti thei hrâm. 

"Dam vat ang che.." tia min rawn melhin ka nu a melh leh zawk a. A chhuak nghal vut. Ka nu lah chu a hrilhhai hmel êm êm zui a. Mahse, Zorina bike ri a reh hnuah chuan, "Damdawi inah chho leh mai ang hmiang. A na zing si" a ti a. Pawi ka ti vak lo. An ṭhuina septic a nih ka ring lo. Na dang ka nei a ni. Ka rilphir lah an paih daih tawh si. Ka ngaih a ṭha tawh bik lo. U Lawma a lo awm si lo, Au Bawiah an ko haw a, min han hruai ta a. Min lo admit ve leh ta phawt mai. Ka va ning reuh tawh e aw. Damdawi inah hian ka hriat theih chinah ka vawi thum luhna a ni. 

Doctor pawn min han en a. A tuk lamah ultrasound tih tur a ni. Engmah ka ei leh thei ta lo ve. Mahse, ka ril chu a ṭam lem lo, ka ei hnem êm alawm. Ka nu chuan, "Viteii lo riak se pawi i ti em? Zanin kha MHIP Executive committee meeting kan nei dawn sia.." inthahrung tak hian a ti a. Ka nu hi MHIP-ah Asst. Secy a ni. Kohhranah erawh committee member a ni. 

"Pawi ti lo ve, Desy pawh a rawn riak thei ang, riahpui êm êm pawh ka ngai lo" ka ti leh lawi a! Nia, mahnia zunram thiar thei lo êm pawh ka la ni hleinem le. 

"Aa..eng emaw pawh a awm thei, Viteii chu ka rawn kaltir ang. Desy chu ti lo mai rawh, a inthlahrunawm" a ti a. Ka hnial ta bik lo. Ka nu min hawnsan hnu chuan reilotê ka chhing zuai a. Mumang ka la nei zui, mahse, maimizial a ni zawk mah ang chu. Ka khum bula kei aia û hlek tur mu hlawm reng chu rawn thoin ka khum mawngah a rawn ding reng mai a. Reitawk fang kan inmelh awm e. Hlauh namên lohin ka hlau a, au chhuah ka tumin ka thei si lo, a hnu deuhah chu nula awmpuitu a nu niawm tak chuan min rawn sawi nawk nawk mai a. Ka harh kâwk mai. Maktih hmel tak hian, "I rûm nasa lutuk a, ka kaitho tawp che a nih kha" inthlahrun hmel lek lek hian a ti a. Lawmthu hrilh hrep ka ba zawk. 

Ka harh laklawh ta bawk nen, ka ṭhu chhuak a, kan inkawm ta daih a. A zia phian. A fanu a lo ni chiah a, a hming pawh Sangteii..A lung ṭhat loh vanga vawi tam damdawi ina lut thin an lo nia. Tunah phei chuan a thaw a hah lehzel a, a chuap lam pawh a chiang lo an tih avangin an lo thlaphâng ru hle a niawm e. Zirtawpnia lut an ni a, inrinni zan leh sunday chawhnu thleng khan ICU-ah a lo awm lehnghal. Vawiin chawhnu ka luh hma lawk khan Emergency ward atangin female wordah hian an sawn leh chiah a niawm e. A zia ve deuh tihna a nih chu. Hunthar veng an lo nia. A nu chu kawm a nuamin a bula awm a hahdamthlak reuh tak tak a ni. Viteii a rawn lang ta a. Au Bawiha'n a rawn thlah a lo nia. 

Au Bawiha chuan, ka chal a rawn dek zawk a. "I khua chu a sik lo a ni maw?" A ti puat, a ngaih hi a sam thei sia. Mama la rawn lang lo erawh ka vui ru hle. A buai deuh a ni maithei. 

Awm rei theih ni hek lo ka u chuan min chhuahsan leh ta nghal a. Viteii nen kan inṭhutchilh ran mai. Khum ruak a awm hlauh a, Viteii mut nan ka laksak ta a. Ka va inthiar a, ka thawl hawk mai. Nachawknain min chhawk rih bawk nen, lut leh ta mai lo chuan a vawikhat nan Zorina ka call ta a. 

"Aw..lawk aw..bawihi, ka lo call leh ang, ka laklawh lutuk" a rawn ti a, a buai hmelin ka hre rêngah. Ka dah a, Desy ka call ta a. 

"Lo call che ka tum chiah a. Ka rawn riahpui dawn che em?" A rawn ti zangkhai leh vah. A ngaih loh thu ka sawi a, "Vawiin chu che rang deuh an awm chiang..a nuam âwm" a rawn tih chuan ka nui hak hak a. 

"Mak ka ti tawp" ka ti ve mai a. 

"A nih duh loh hmel ê" a tih chuan ka khi vur vur..a sawi dik. Zorina chu ka rin loh dan ang zelin a che. Kan inbiak laiin Zorina call ka dawng ta sia, Desy nen chuan kan titawp ta rih. 

"Ka hawn phei aṭang khan ka buai nghal a. Khaw nge i awm?" A rawn ti a. Ka sawi a. 

"Tunah chuan inkan an phal tawh âwm si lo va" a ti chuai raih. 

"A ngai lo, a pawi lo" ka ti ringawt a. 

Nuam lo tih hmel deuh hian, "Ih..ka insual dawn a" a rawn ti sup a. Ka inrin hmain ka phone chu ka hmer nghek. 

"A ngai lo ka tih kha" duh aiin ka aw a ring. 

"Ka sawi tawh kha..vawi hnih chiah a ngai" a ti a. 

"Nih tak chu..i va mamawh awm ve, pawisa chu" ka ti vak a. Ka tau ve ringawt. A insual thin tih ka hre sa reng sia. Tin, pawisa a mamawhzia te pawh. 

"Aw. Ka mamawh a ni" a ti sehchilh nak a. 

"Nih tak chu..va insual rawh. Insual nuam le" tihtauh a kal tluang tlat..dah ka tum lai takin, "Sawmi, Sawmsak, dam ang che.. " a rawn ti a. Ka chhang tawh lo. 

Tûm bûrin ka mu a. A la hma bawk si. An insual pawh ka en lo vang. Thu a awih lo si..mahse, inthiam loh rûkna ka nei tho. Ka hre sa vek sia, khatia a rilru tihnawm loh ve kher kha ṭul ka ti lo hnuhnawh hle. Ka va be duh tawh bîk si lo. 

Viteii chuan, "Te, ka lo kal hma khan maw. mama leh api an inhau a" a tih ri chuan ka ngaihtuahna a rawn tibuai ta daih. 

"Eng thilah?" Ka ti vat a. 

"Ka hrechiang chiah lo. U Bawiha'n a rooma a chabi la turin min tir a, Mama pindanah api kha a lo âng nasa mai a. Mama'n ,"Ka chingfel mai ang. Lo buai suh" a tia..Apiin, "Englaimahin nang hian ka lam a i ṭang tak tak ngai lo. Ka ring zo lo che" a tia..ka chhuksan daih a, ka hre tawh lo. Ngaihthlak rûk kha ka duh si lo va" a ti ta nuah nuah a. 

A mak hle mai a! Nîkhua ka hriat tirh ata ka nu leh Mama inkhik khak emaw inhnial takngial pawh ka la hre lo. Ni e, ka hre hauh lo. Nu leh fa lo inhnial te chu thil thleng pangngai a nia, Ka nu leh Mama chu lo inhau ve zeuh zeuh ṭhin nise Viteii thusawi chu a mak lo vang. Mahse, ka nuin, "Englaimahin ka lam i ṭang ngai lo" a tih mai dante nen lam chuan a mak ta êm êm a ni. 

Dik lo hi zawng a awm chiang e…