Zor 5

ZÔR…(5)

Ziaktu : Toni Râlte

"Ngati nge min ngaihtuah a" ka va ti a. Ka tho nghal. Ka intihfai laia msg tone ri bel chu ka hre reng. Ka inhrukhul veleh ka en nghal. Mahse, Zorina msg awzâwng a lo ni lo va. Laldami lek, "Bawihte, râl i ngai dawnin ka hria. Lalropuia'n nupui a ru" a rawn ti ! Ka nui hawk ringawt. 

"Ehe! Tak tak ami? Khawi mi nge?" Ka va ti duah a. 

"Tak tak e mawle,.a lerh tak tak a ni. Tak tak ana Dinthar ami a nia, a rai an ti" a rawn ti ve zat. Rpa chu a va inthup thei ve mawle. 

"A ṭhat nasat chu, sa feee kan ei vat dawn chu" ka va ti a. Ka la na hran lo, ka bialpa pawh ni lo pui chu ka lo nat ve vakna chhan tur a awm lo. Ka lawm ru daih zawk. Zorina ka vei sia, Rpa te nen an inkawm ve bawk sia, a buaithlak. Tukṭhuan ei dawn thleng pawn Zorina msg ka dawng leh tawh lo, a buai a ni maithei. Ka la din ngil hleihtheih loh avangin class pawh ka la kal rih dawn lo. Ka chawl rei ve deuh sia, rilru chu a hah ve deuh. Mahse, kan zirtirtu te an fel êm mai a, bakah Ruata a rintlak a, Material chu ka dil mai ang. 

Kan chaw ei laiin ka nuin, "Bawiha, i nî a rawn vui leh deuh kha. 'Kan khum bula hun tur drawer min siamsak rawh tih tih pawhin a muangchâng tlat a, midang a ngaipawimawh zawk zel a" a tih nang nang kha..siamsak ve hnai teh u" a ti bawrh bawrh a. 

Ka u chuan, "Hman vêk vâwkah uluk deuha siamsak ka tum vang a nia. A vui hma thei sia maw" a ti ve mai. Mama'n, "Vui hma ang chu, nangte chu a fate aia a fapa kha i ni miau a" a lo ti nghut. A sawi dik. Ka tetlai phei chuan Au Bawiha hi anî fa emaw ka ti thin. A duat dan chu a ngeiawm zawk. Nikhua ka hriat ve vek tawh hnuah vawikhat an fa pahnihna tur a pai lai hian a rawn tlan ve a. Mapuia pawh a rawn hruai lo. Chutihlai chu Au Bawiha thinlen lai an inenkawl mêk lai a ni a. Vawksa chhum kan hmeh a, Au Bawiha khan a ei ve châk si, a natnain a haw bawk si kha, a nuten dawhkantê laksakin a hranin chaw an eitir a. Anî chuan a hmu thei lo, a va eipui a, a hnuah phei chuan a tihtauhpui a, a lenchhuahpui daih mai. Chutiang khawpa inhne bik, inla bik an ni bawk a, tun hnu Au Bawiha puitlin tak hnuah thleng hian a lakah ka ni chu a pangchang bik zual. 

"Ti nge ani hian Au Bawiha hi a duat êm em bik le?" Ka ti hû a. Ka nuin min rawn melh zawk, Mama pawh chuan nuam tih loh hmel lek lek hian min en ve bawk. Ka pa chuan, "I u Mama tetlai hian a sualin a luhlul si a, i nu hian an pahnih chuan enkawl ṭha thei hek lo, i û hi i nî in a chang ta chawt a, chuvang mawle" a lo ti dam duai a. Ka hrethiam chawpchilh ve mai. Mahse, ka uang châk a, "Mama chu anuin a duat bik a, kei chu tuman min duat ve lo" ka ti hrâm a. 

Au Bawiha'n, "Tak che hian aw. Kan duat sual vek tawh che a nih hi" a ti hluk. A sawi dik lo hran lo. Ka tettê aṭangin ka awh zawng chu hmaih an nei ngai mang lo. Tea set aṭanga barbie engkim hi ka ṭhiante aiin ka nei ṭha filawr ziah. Ka tleirawl chhuah paw'n inkhawm apiang deuhthawin kawr thar ka ha ṭhin. Thil ṭha ber zawng ni lo mah se; hmeichhe awmchhun leh naupangber ni bawk si chu min ngaihtuah ṭheuh mai a ni ber. Ka pa phei chu pawisa ka dil ve ṭum chuan ka mamawh zat aia tam min pe zel. 

Mama'n, "A dik, kan duat khawlo dawn tlat che. Ka nu pawh rawngbawlah te hian i ring lo lutuk a, chet tamtir rawh. Viteii ringawt chu a hah, pasal te nei se a mualpho mai ang a sin" a lo ti ve mawlh mawlh a. Inzilh hun an ṭan leh dawn ta. Ka ning. Ka nu lah chuan, "A tlaw roh lutuk hi ka hmu thei ṭhin lo va, ka chetsak leh duh zel a" a lo ti! Ka pa a nui vur vur thung. Nia, ka nêp ka tih tawh kha. Keimah aṭang hian chhungkaw inenkawlna ngaihpawimawh a ṭulzia ka hrethiam. Min hmangaihna an lantir thiam dan hi ka hnualsuat miah lo nachungin eirawngbawl leh sekrek khawiah ka tlaw riau a. Min rinngam loh bakah min khawngaih vang zel a nia. Sal chhawr taka fate chhawr chu ka duh miah lo nain, a âwm tawka fate thil ti tur rinngam leh zirtir hi puitlin hnuah a lo ṭangkai hle tih ka hria. Awmpuite kuta innghah lutukte hi thatchhiatna hmawr..

Class ka kal dawn lo naa, "Vite, vawiin chu ka pui lo mai ang che aw. Indim ka la ngai ve sia" chhungte min zilhna kha hre ru rân chungin ka ti a. 

"A ho lutuk, mu hahdam rawh" a lo ti ve zat. Viteii hi a felin pawi a sawi lo bawk a, Mama pawh hian a duatin thawmhnaw te hi a leisak ve reng zel. A hlawh hi chu a chhungte thawn zel turin kan ti a. A bazar dawn lahin a leina tur aia tam ka nuin a kentir a, a bang chu a pocket money ve atan a ti ṭhin. Amah zuk hmuam ti lo a nih bakah kamram vel a ei bawk si lo, a inkhawl thei zêkin ka ring. 

Ka phone ka'n en chu ka beisei rûk ang ngeiin Zorina msg a lo fu vâng a. "Ka ngaihtuah ve tawp che, min ngaihtuah ang khan" a rawn tih chuan ka mûr er erin ka hria. Ka lei ka chhuak zuk ringawt. 

"Ka ngaihtuah ve che mi?" Ka va ti ngat a. Ka nuih erawh a za deuh hle. 

"Umm,. Ngaihtuah lo em ni?" A rawn ti zaw mah. A confi lutuk chu ka ngei letling. LalDesy hian a lo va hrilh thawt thawt em mawni le? Ka thu hmu hmasa leh min hrilh hmasa lo chuan a va hrilh ka ring chiah si lo. 

"I ho e a" ka va ti teh ngawt a. 

"Inhmuh i duh em?" A rawn ti tawl mai. Teh thut zel a! A hmanhmawh reuh mang e. 

"Ka la dam chian loh hi" ka ti a. 

"I dam chian hunah aw" a rawn ti ve leh diam.

"Umm..chuan hnaah i kal lo mi?" Biak zui zel ka châk sia..zawhna ka zawh loh chuan..

"Kal e, kan âwl rih a. Rpa nen khan in ni emaw ka tia" a rawn tih chuan ka thaw hawk. Hmaichhanah ṭawngmawh viau mah se; whatsappah chuan a kawm tlak ve fû hi a. 

"Ni mai mai lo, nupui a ru ni lo'm ni?" Ka va ti vat a. 

"Umm..ru..i rilru a na em?" A rawn ti leh kher! 

"Nge a nat ngawt ang. Ka bialpa a ni hleinem" ka va ti, ka tau deuh nghat nghat bawk. Amah lah ka bulah a awm chuang der lo a. 

"Nia, i lawm zawk ka ring. Keimah vangin" a rawn tih chuan, "Hmela.." ka va ti. A rawn inringtawk leh min hrechiang lutuk chu ka ngei tak tak..a duhawm tho bawk sia. Haha..

"Ka sawi sual lo tih ka hrethiam..hna ka'n thawk ang e. Bye ..lo dam ang che" a rawn ti duah a. Mak tak maiin Zorina chu ka ngai nghal vâwng vâwng thei mawle. A hnathawk tur, a motor siam lai vel turte ka mitthla a, a nuam vêng vêng. Zorina nihna leh hnathawhte hi ka ex te emaw ka hmelhriat ṭhenkhat te chuan hria se, "I mit a va hniam" an ti leh maithei. Kei ka vannei nge ka vanduai pawh ka hre lo. Dinhmun avang hian mi ka tehna leh endan a danglam phah lo ka tih tawh kha. Zorina pawh workshopa thawk, motor siam ve ṭhin mai a ni. Chuta kârah mi nawlpuiin an la paidama an la pawm hleihtheih loh insual mi a la ni chêu! Kei pawh hi ka â ta a niang, ka ex teah insual mi chu sawi loh tharum thawhna lam support an awm ngai lo. Mihringin duhzawng kan lo siam vete, kan duhzawng emaw kan lo tihte hi a lo ni tak tak vek lem lo a nih dawn hi..

Nilêngin ka mood a fuh. Ka nî a lo leng a, a pasal Pa Muana hi PHE-ah hian a thawk ve a, ka ni hi a taima khawp a, chuktuah huan a siam a, a huan a zau loh tehlul nen, thlai chi hrang hrang a ching khat dul zel. Chung a thlaithar te chu hralh thamte pawh a ni ve ṭhin a, ṭhenawm hnaiah a hralh ve ṭhin. An fa û zawk Mapuia hian College a la kal a, a zo ve ṭêp. A nau Peki erawh a sak deuh nge ni class xii a repeat ve mêk bawk. Senior tawh lama pasal nei a ni bawk a, ka ni hian fa pahnih bak a nei thei ta lo a ni. Thingpui hâng a va in lum a, "Tei, Mapuia saw lo hau ve teh u. Nuthlawi zûnah ka uai e a tia, ka lawm lo" a ti bawrh bawrh a. 

"Tu nuthlawi" ka lo ti vat. 

"Pu Lawmsanga te in hnuai rawn luah, a naute nena rawn awm thar khi mawle. A hmel zawng a ṭha vur naa, fa pakhat a nei a, a buaithlak" a ti leh ringawt a. 

"A..chutin an innei dawn pawh a ni kher nang" ka lo tihsan a. 

"E..i hre lo a nih kha, laklawh te a awm thei, bakah Nuthlawi zûna uai te chu chhuah an harsat tawh êm hi, saw i pa Muana nau pawh amah aia kum 7 vela upa a nei a, an buai an buai fô saw" a ti duah a. 

Mapuia bialnu a tih chu ka la hrechiang ve lem lo. Ka tuallim lo bawk nen. Engpawhnise, nuthlawi/ pathlawi an nih tak avanga fate nupui pasal atana nu leh paten an lo iaisak ve ngawt hi thil ṭul ber niin ka hre lo. 

"Nuthlawi a nih vang maia i duh loh ngawt..a lo fel phian maithei asin. Bakah fa pakhat chauh a nei a, Mapuia'n a iai loh phawt a hnu.." ka ti a. 

"I hrethiam lo a nih kha..nuthlawi a nih vanga va duh lo pawh ka ni chiah lo. Nupui pasal neiha fa bîk emaw an inkara an awm tawh chuan eng emaw hlekah innghirnghona a tam duh. Mapuia lah a nep chi a lo ni bawk sia, nakin zelah anmahni karah fanaute piang se, a fahrawn kha a hmangaih zui thei zel ang em tihte ngaihtuah a ngai asin. Kan dampui reng dawn lo. Bakah ka duh lohna pakhat bawk chu a hîp hneh leh lutuk. Inah a awm hman thlawt lo, a chho zut reng a, englaipawha invil hi a ngai lo. Chetsual a awl duh" a ti ta duah a. A sawi chu a dik lo tia han khenthlakna tur ka hmu hran lo. 

"Mahse, amah Mapuia pawh ṭha takin hrilh la, tunlaiah nuthlawi hi an fingfel daih zawk asin. Tawnhriat nei tawh an nia, mi mo an nih pawn an sual ngai vak lo. Invil tihthuah kha chuan ka lo hrilh ve dawn nia.." ka ti a. Ka nu dawr kal a rawn hawng a, kan sawi zawm tawh lo. 

"U Zau, tunlai kan pa awmdan hi mak ka ti riau, A aw hi a rawn chhang leh ngawt zel a, chaw helh a hrat bawk si. Inentir ka sawi lahin a duh bau si lo, nangin lo nawr ve teh, nang chu a hlau deuh che" ka nu chuan a ti bawrh bawrh a. Ka pa chu ngati nge mawni dawn le..ka nî pawh chuan, "Zopa tih takah hian inentir hi a hreh ṭûn zel a, ka lo hrilh dawn nia. A ngaihṭhatthlak loh a nih chu" a ti ve a. 

Tuilum sa ver vawrin ka inbual a, ka dangdai ve a kei zawng. Khaw vawh lai hian tuilumin ka inbual ngai mang lo, a tawpkhawkah lo chuan. Khaw lum lai hian tuilumin ka inbual hlauh zawk a, min vawng dai ka ti mai. Bakah ka taksain a mamawh ka ti ve deuh bawk. Ka inthlak fel hnuah ka lu ka su lo bawk a, khumah ka tluzâl mai mai. Zorina lah a reh vang vang si. Desy te ban hun ka nghakhlel kher mai. Ka lo chhing sek a niang, Desy awin min kai harh a. Ka pindanah a rawn lut nghal. A hmel hmuh a hahdamthlak leh hle. 

"Eng nge i lo an?" A ti sar sar a, khumah a rawn bawk ve nghal. 

"Ka ṭha reng, naktukah chuan kal ve tawh tur a ni" ka tih chuan, "Kal lo law law rawh, Friday a ni tho a. Kar leh aṭangin kal rawh" a ti zung zung. A ni âwm teh tak e a. 

"Êe..lawk..kha chhiar rawh" tiin Zorina nen kan inbiakna chu ka entir a. Nui vur vur chungin a chhiar nghal. A chhiar zawhah khi ṭhâ chungin, "A va confi ve leh! A inhmeh lo ti ila a inhmeh phian tho" a ti niah niah a. 

"A zei i ring em?" Ka tih chuan, "Ka hrethiam lo, ngaihzawng a ngaihsak loh hmel sia..ka ti. " A ti nang nang a.

"Nia, a mak e, min rawn be ve ringawt pawh kha" ka ti a. A tho thut a, maktia ka melh laiin, "Nang aiin ka thleng sang hret..naktuk tlaiah Timothy nen zanriah kan ei chhuak dawn" a ti ta hlut a. Amah tluk zetin ka lawm..kan inkuah chung chung a, "Awii, ka lawmpui che..Duati..nuam i ti awm" ka ti a. 

"Nuam tih piahlam a ni. Ngaihtuah la, college aṭangin ka star tawh a nia. Pathianin min khawngaih tawh a niang" a tih chuan ka nui hawk hawk. A dress tur a sawi leh nghal sar sar. A cousin te inneih pawh karleh mai a ni tawh a. Kan kawr erawh kan la khul lo. Desy haw hnu lawkah ka û te pawh an rawn haw a. Zan lam inkhawm avang hian dar 6 hi kan zanriah ei hun a ni tlangpui. Zing lamah dar 8 : 30-ah. Lunch hi dar 1-ah a ni tlangpui bawk. Ei leh in hunbi hi Mama bawkin a ngaipawimawh a, kan zâwm tlang ta dial mai chu a nih hi. 

Chaw ei lai chuan ka pa chu melh rûn rûnin, "Pa, ti nge inentir chu i duh loh? Naktukah han inentir rawh u, a ngaihṭhatthlak loh" ka ti a. Ka û te pahnih an hawihai deuh. Ka nuin a la hrilh lo a nih hmel. 

Ka pa chuan, "I nu hlauthawng mai mai hi lawm, nâ ka nei lo" a ti a. 

Ka nuin Mama te bulah ka pa awmdan vel te chu a sawi a. "Ekhai! Ngah nge in va sawi har zawk ve. Ka nu a hman loh pawn keiman ka hruai ang che. I aw chhâng ringawt zel kha chu i âwm nat vang emaw ka lo tia..a rang lama kal a ngai a nih chu"Mama'n a ti zung zung. Ani hi zawng nu leh pa thachhang dawltu a ni bawk a, a mawhphurhna a hai lo ṭhin. 

Ka pa pawh chuan hnial ngaihna a hre bîk lo nge a ngawi zui daih. Ka nu chuan min rawn melhin, "Kan Teberi pawh Bena hian a vei khawp a, vawiinah pawh eitur a rawn thawn leh hram kha..Mama, Bena te hi an khawsak dinhmun eng nge?" Tiin Mama a melh a. Kei erawh ka tûm deuh. 

Mama chuan, "A sawi ngun ka ti rêng a. Bena te chu an pangngai lutuk, a pa hi Pharmacist a nia, a nu erawh a khawngaihthlak,a hrisel lo va. Bena nau hmeichhia hi chu Teberi pawn a hria ang, Cindy, designer lar deuh hi..an te ber erawh Pune-ah a awm thung. An fel chhungkua lutuk" a ti mawlh mawlh a. 

Ka nu bawk chuan, "Makpa atan pawh ka iai lo riau ania" nui chungin a ti leh a. Ka ngei ṭêp. Au Bawiha'n, "Teberi duh chi ni pawn ka hre lo e a.." a lo ti sup. Ani hi chu thu nei ve zen lo, engkim pawmzam chi a ni ve a. Mahse, khatia a rawn sawi kha a lawmawm ve hrim hrim e. Ka kham tak daih vangin an sawi zui lo. 

Tv en pah siin phone ka khawih a. Zorina a la reh. Rpa zawkin, "Min duh si lo va, nupui ka ru ta mai"a rawn ti a. Kan innamnul dun teh e. A ṭha daih zawk. "Nia ka lo hria a, ka lawmpui che, inneih hunah min sawm loh vaih" tiin ka vau lawk a. 

"Ṭhianpain a rawn hruai ngei che beisei ang" a rawn tih chuan ka phâwk deuh, "Tu i ṭhianpa maw?" Ka va ti a. A out leh hman tawh. Zorina a sawina a ni ang em? A ṭhiante a lo hrilh tihna êm mawni le. 

Bena msg chu ka open châk vak lo , mahse ,ka nu sawi ang deuh khan min ngaihtuah si a, lo ngei ve ngawt chu ka inthlahrung. 

"Lo len i phal em!" Tih a ni. 

"Mut hma ka lo tum a" ka va ti. 

"Eu! I ṭha em?" A rawn ti vat a. Ka ṭhat thu ka sawi a, phone chu ka dah daih. Mahse, a rawn ri leh nghal a. Ka en vat, ka rin loh deuhin Zorina a lo nia. Engtin emaw awm chung chuan ka la ve ta tho. 

"Msg type hi ka ning" a rawn ti nghal.

"I haw tawh mi!" Ka ti a. 

"Aw, ka inbual zo chiah, vawiin eng nge i an?" A rawn ti a. A mizia hi mak ka ti telh telh, hmaichhanah ṭawng thei lo ang maiin a ngawichawi a, phone-ah lêm a ṭawngkam a felfai thlurh mai bawk si.

"Ka ṭha reng " ka ti a. 

"A lawmawm. Chuan, ka dah rih..chhuahna tur ka nei a. Bye, muttui nghal" a rawn ti duah. Ka chhan hmain a la dah zui! Ka ner sak, a va hmanhmawh awm êm êm.A la hma angreng sia, In chungah Mama library hi a awm a, phone khawih reng ka nin avangin chhiar tur ka han dap. Mama pawh a la chhuak lo. Lehkhabu ka melh kual dan dan lai chuan Mama room aṭanga thinrim aw tih hriat zet lo chhuak chuan ka ngaihtuahna a rawn thlak nghal. Library room dep chiah hi a pindan a ni bawk nen. Ka ding vang vang a. 

"Engpawh chu nise, nang khan tihtheih i nei tawh lo. Kan ta a nih hi, rawn inrawlh chu tum buai duh suh" a ti hrâwk a. Eng chungchang nge an sawi ka hre hauh lo. 

Chutah, "Pawisa a!? Hehe, i sawi theihna lêi kha ka pawhdawhsak nghal loh che a..ka pek tawh sa che kha a tâwk ta viau e. Engpawh ti rawh, hnehna ka chang dawn. " mama bawk chuan a ti leh khur khur a. A thinrim takzet tih ka hre thei. 

A ṭawng ta lo va, kei pawh lehkhabu pawh la ta chuang lo chuan, thawm dim takin ka pen a, In hnuai panna kailawn bul ka thlen chuan Mama pindan chu a rawn inhawng rawp, ka va lehhawi chu kan inmelh ta reng a. A hamhaih rei lo thung. Mitmeng hriatthiam harsa zet hian, "Hetah eng nge i tih?" A ti hmuk a. 

Amah pawh en lo chuan, "Lehkhabu chhiar tur ka rawn en a, mahse, ka duhzawng ka hmu lo" inthunun tum takin ka ti a. Ka rinphak miah lohin min rawn kuah thlawp a, a rimtui zet chu ka lo hîp kâwk. Ka chhipsama tuai hliau hliau chung chuan, "Ka naute,. Ka hmangaih che, I hria em?" A ti sup sup a. Ka bangbo kher mai. Eng nge a awmzia ni ta ang le? A hma lawka ka thu hriatte nen ka han ngaihtuah zawm a, ka ipik nghal mup thei. In hnuaia ka chhukthlak hnu pawh chuan ka la ni hûih mai. Keima chungchang em ni Mama te khan an sawi le..nia, Mama hi chuan eng emaw chânga min hmangaihzia thu sawi hi a hrât ṭhin. Thilmak a ni hran lo, a mitmeng hriatthiam harsa zet avang khan ka buai mai mai zawk a ni lo maw? Nge a thinrim ângthawm kha ka hria tih a hria ang a, min bengdaih nan tiang khan a che ta a ni thei. Ngaihtuah zui loh ka tum ta mai. 

Desy call ka dawng a, phur zetin ka la. 

"Tunah khan youtube-ah lût la, Mizo Street Fight channelah lut la, in pa te insual lai an live dawn.." a rawn ti zung zung. Inpa te chu a ti vel a! A dah leh daih bawk si. Hamhaih ru takin ka lut a, hei vang hi a nih dawn kha kan inbiak laia hmanhmawh taka a tihtâwp ni. 

Rin bial chhungah a bitum tur nen an ding leh ran a. Tshirt dum, a nghawng V a ha a. Jeans pawl dal lek lek a ha bawk. Sneakers dum a bun a, a sana chu a phelh mêk,. A bitum tur chu a in la sek nasa mai a. Tawnzau var fit deuh mai hain kekawr bul dum a ha a. A zuang thoh thoh mai. Entu an ṭhahnem leh hle. A hmun hi ka hriatsual loh chuan Falkland- Cottage awm ṭhin, tuna an luah tak loh kawtzawl kha niin ka hria. Ka chiang chuang lo. An au nasa bawk a, Zorina hming lam pawh an awm ve nuk e. Ka pindanah ka lut sauh sauh a, khumah rem taka ṭhu mûin Zorina te insual chu ka en ta. Awmhmunah ka lo ṭang ve ṭeuh ringawt. An inpawmchilh laite chu ṭul hlei lovah ka lo insehruh ve vak a, ka ke te ka lo mar leh awt awt ṭhin. A tumpuipa chuan a dulah a hnek dawp mai a. Zorina chu a pai awt awt, a dul chu a dawm bawk a, a hmaa an vihna laiah khan a hnek fuh em mawni dawn le.. bawhthluk ngei tuma a rawn kun lai tak chuan a chhoh dâwm ta a. A hmaiah tak a ni bawk nen, a dak âwrh mai. A hnar a thi nghal puat bawk. Thawm a ṭha ngei mai, chutiang khawpa tharum thawhna ngaina mizo ṭhalai an lo awm chu mak ka ti. An inhneh dun thial thial ngei mai. Ka rilruin, "Thahrui i hmang nasa sia aw. Tlawm ve mai rawh, hmanniah i chak tho kha" ka lo ti vei thul. Ka en lo thei bawk si lo. 

Mahse, 20 mins dawn an in beih hnuah Zorina chuan a tha thlah thutin a inbawhbehtir a, mahse, chupain a bawhbeh rual chuan a kea a kawng khawkherhin a lu chu a kuaikun ta tlat mai a, rei a daih ta lo nge a tlawm ta. Engtin nge eng lai tak nge nâ ka hrethiam ve lo. Zorina'n a thlah rual chuan boruak khamkhawp lo ang hrimin a thaw hulh hulh mai. A ṭhiante niawm takin an buaipui ta a. Zorina chuan ₹80000 a dawng leh ta. Zan khatah chuti zat chu a hlawh thei chu a nia, engtin nge a hman ang aw. Bullet a lo nei mak ka tihna pawh a reh duak mai. A insual azâwngin a lo tuak tih hriat reng. Mahse, insual chu ka support chuang lo. A nunrâwnthlak bakah a risky, nunna tan pawh vawikhat chetsual zeuhah a thih theih dawnin ka hria. Bakah a hneh takte thinrim phuba lak tumte khan a inrin loh lai ten vit leh ta se…ka ngaihtuah ngam lo. 

Rpa ka call ta tawp a. Ka sahâl deuh tlat! Zangkhai zet hian min lo chhang a. 

"Rp, ti nge Zorina kha a insual kher le? An rethei viau em ni?" Ka va ti tawl. Mak a ti deuh nge a ngawi dat a. 

"Ti lo thei lo dinhmunah a ding alawm.." a ti sup a. 

"Engvangin maw?" Ka ti hluai. Ka ngaihtuahzia a hrethiam hialin ka ring. Ka zah duh hran lo. A ho êm mai. 

"Ti nge hriatchian i châk deuh em ni?" A rawn ti a, a nui hul hak bawk. 

"Aw, tunah khan an insual ka en zo chiah a. A mak em alawm, eizawnna dang a tam tehlul nen" ka ti hmawk hmawk a. 

Thawk a lak hawk hnuah, "Mahse, zan khata nuai hlawh theihna i hria em ni?" A ti ta a. 

Zawitê hian, "Hre lo" ka ti ringawt. 

"Chuvang alawm Zorina pawh a tha leh zung sênga thih mai theihna hmunah a zuan luh ni..a tan chuan pawisa a pawimawh ber" a rawn ti ta khak khak a. Ka dang titih. Mahse, "Chuti taka pawisa mamawh chu, an rethei ve viau a niang maw" ka ti a. Ka ṭawngdan chu a mawi loin a chaltlai deuh tih chu ka hre tho, mahse, a thluaithlum thiam si lo, ka hre châk bawk si a ni. 

Rpa chuan, "Sawi nuam a ni hran lo va. Englo, a pa hi zu ngawlvei a nia. Zu tel lo va awm thei tawh lo ang kha. A pension hlawh hi a in zo a ni mai. Zorina û hi a nerve vangin kum 3 liam ta khan a kawng hnuai lam a zeng bawk a. Phai lam doctor panpui a nih chuan damna chance a la awm thei ang an tih avangin tihian a û damna tur a tuak ṭhin. Nikum june thla khan a zuk kalpui tawh a, thla tharah hian kalpui leh a ngai sia, ṭhahnem a ngai zual a nih hi" a rawn ti ta dap dap a. Ka phone ka hum nghet hle tih ka hria. Sawi tur reng reng ka hre lo bawk. Rpa chuan, "Hello, Teber, i dah mi?" A rawn ti dût dût a. 

Harh thutin, "A va khawngaihthlak êm êm, ka lawm lutuk aw. Ka hriat duh min hrilh a" ka ti ta zung zung a. 

Zorinsanga chu ka khawngaih satliah lo. Puih ve theih ka châk takzet. Chutiang êm êma mihring vanduai chu an awm lo ka ti lo, mahse, vanduaina inhnehtir lo va, hmalam pan tum hrâm hram leh a û leh a pa tuamhlawm thei hi amah ang rual lekah an awm ang em le?! Ka za sek a, tih ber tur ka hre chuang bawk si lo. Ka va chhuak leh a. Ka nu leh pate TV enna bulah ka va ṭhu ve ringawt. Ka khatliam ngang bawk si. 

"Pa..enteh, kha insual i en ve ziah te kha i hria em? Zorina te kha" tiin ka pa ka melh a. A rawn hawi zuk a, "Hria e ti nge?" A ti nghut a. 

Ka nu chuan, "I bialpa a ni tih sawi i tum chu a ni êm lo maw?" Nui chungin a lo ti a. 

Hah hmel deuh hian, "Aih, chulam a ni lo. A chanchin ka hrechiang chiah a, ka khawngaih tawp" tiin a chanchin ka hriat ang angte chu ka sawi ta bawrh bawrh a. Ka beisei ai daihin an ngaihven, ka nu phei chu a chek tlat tlat a. 

"A va mak ve! A zia lo hle mai a.." a ti sap a. Ka pa pawh chuan, "A chhuanawm phian bawk a nih chu..thlate lo thar se puih dan kan ngaihtuah dawn nia" a ti chuar chuar a. Ka rilru a nuam deuh huai mai. Ka nu chuan, "A nu a boral tawh i ti em ni khah?" A ti a. Ka bu nghat. 

"A û pawh chu a va lainatawm tak êm..nerve ṭha lo hi a pawi êm mai..a pa pawh chu chutiang khawpa an buaite chuan zu in loh ve mai awm" a ti duah a. Ka chhang lem lo. Nia, a pa hi ka dem ve deuh, fate rim taka an thawha an mangan êm êm laia zu ringawt lo ngaihtuah chu..a fate a hmangaih miah lo a nih hmel. 

Ka mu naa, ka harh kar reng mai. ,Zorina chu ka be châk a. Ka ngam si lo. An haw daih tawh awm sia, min lo biak leh awm te ka ti thul. Mahse, ka indahsang mah mah, min ngaizawng ang pawn a la awm tak tak lo va, ka lo beisei sang ve vak ringawt. Mak ka tih chu hmeichhia hi kan duhna tak takah chuan kan lo tlawmin pride hi kan lo dahbo thei teh e. Kha chen ngaihzawng ka lo nei ve tawh, ka duh ve ber Lâna ngei pawn mittui tla chunga ngaihdam min dil paw'n kalsana tawrhna hmachhawn thlang zawk kha ka nia. Midang phei chu sawi loha lum, "I chapo, i induhtawk" tia buai ṭhin kha an nia. Zorina erawh zah pawh dâwn lovin min beisei ve deuhtu Rpa hial ka va biak phah a! Ka khawngaih luatah ka nu leh pate bulah ka la sawi zui! Ka tlawm ka inti tawh. Mahse, ka inchhir chuang miah lo. He pa hi a danglam a ni. 

A tukah ka pa duh vak lo chung Mama leh ka nute chuan an hruai chhuak a. Han incheckup tak teh se. Parvula bual a ngai a, Au Bawiha pawh a la awm. Bual hi a hautak tawh êm a, ka pui ṭhin a nia, ka la ṭhat lutuk loh avangin Viteii'n a pui, bathroomah chuan an ri lâwng lâwng a, Viteii a nui ar ar reng bawk. 

Ka nî rawn tirh nimaw Mapuia a rawn lut hlawl mai a. Tunhnaiah a ngaihzawng neih vang ni maw a rawn teilut khât viau nghe nghe. Ka lo chiauâu vat a. Ka bulah a rawn ṭhu ve nghal. 

"Tu maw i bialnu chu" ka lo ti a. 

A khi suk a, "Ka nu tak hi chu aw..a lo sawi leh ka ring rêngah..i hre ve lo vang..Senteii a nia. Pu Lawmsanga te in luah khi" a ti ve mai a.

"Nuthlawi tiraw" ka ti leh. 

"Ni e, nihte chu..mahse, a fel asin" a ti ve zat. Sawiselsak ka tum tawp si lo va.

"Khawi khua nge ni reng reng, eng nge a thawh thin?" Ka ti duah a. 

"Phuldungsei khua an nia. A naute a rawn awmpui, a nau chiah hi College a kal ve tho a, chumi nau leh chu Peki te nen an inpawl rual..thawh tihah an in chhak Bakery dawrah khan a thawk a, a fapa pawh a hruai mai zel. Zanah kuhva a siam leh bawk a. A hah reuh a nia aw" a ti duah a. Hmm, hmeichhe puitling tak chu a nih hmel viau. 

"Chu chuan a naute a châwm a maw?" Ka tih chuan, " Ni bik lo ve. A pa te hian an rawn thawn ve ṭhin..an harsa vak lo a niang" a ti ve mai a. A nih ka ring deuh rêngah. 

"Neih i tum mi?" Ka tih chuan, "I â mi? Ka la naupan êm hi, Au Mama te pawn an la neih loh laia lo neihte chu a" a ti hluk hluk a. Ka nui vak vak. 

"Anî kha a hlauthawng êm a, nuthlawi an nihna laiah" ka tih chuan, "Ka nu lah hi aww, a hlauthawng thei sia e. Nuthlawi dang ang a ni lo, a zei lohzia te chu a. Bakah a puitling bawk sia" a ti duah. A bialnu chu a fak ve ngang mai. 

"Engtia nuthlawi nge?" Ka ti a. An thlawi chhan azir hian nuthlawi ṭhenkhat chu an mizia tur âwm hi a hriat an ti fô a, a dik ange maw. 

"A bialpain a nei duh leh si lo va, sâwn a pawm a" a ti zawi sup. Ka rilruin, "A va vanduai ve aw" ka ti. Ṭhenkhat inla fêkfawn deuh chuan, "Nau pai lo turin sex hman loh mai tur alawm" tiin dem tur an dem kân leh daih maithei a ni. Mahse ,kan chenna hi khawvel a nia, sual hian min hîp reng. Chumi chu palzam tur ka ti miah lo, mahse, dai chin tluk chin nei lo thei lo mihring kan nia. Chuta tlûk tawh a hnu siamṭhat tum lo va kalsana phatsan ching te hi ka mi ngaihnep ber pawl an ni ve tlat! An duh an hmu a, lawm tak arûangin an la chirhtheh lawi a! Mipa ṭhenkhat hi chu Pathian anpuia siam an ni ve lo a nih ka ring hial zel. Chutihrualin nuthlawi ṭhenkhat an han dêua an chirhtheh te hi hi chu "A âwm ve tho mai" tih theih tur chia nung an awm ve tho mai. Nulaah pawh an tam mai. Nuthlawi hnua sawisep kai chin hi chu an nulat lai pawha nung ho ve tak leh nungchang ṭha zawk zawk an ni mawh viau, nuthlawi an ni chunga nula tam takte aia nun zahawm nei leh mahni inhai kaw takte pawh an nulat laia sawisep kai ngai lo an ni châwk! Mote pawh hi an tlakna leilung azir kan ti tak naa, a dikna chen a tam viau ang, chutihrualin an lawinaten mo sual tia an ṭhenawm khawvengte meuh pawn an sawi an sawi hi chu an lo sual piahlamah an nulat lai pawha fel tia sawi an ni tehchiam lo..chutiang vel chu..

Thingpui in zawhah Mapuia chu a phei ta a. Tihtur a vâng leh ta pharh mai. Ka phone lah ka khawih peih reng si lo. Ka biak châk deuh lah a reh vung vung a, va biak hmasak ka hreh ve tumhrang si. Ka nute an lo haw a. A hmel a ngui riaua ka hriat ni. Chanchin ka lo zawt ve vat a. 

"Damdawi an chawh a. A aw bâwm lam chiang lo an ti ngawt a, kei chu ka duhthusamin an en lo. Bena hi ka la râwn ang" a ti hmarh hmarh a. 

"Aw damdawite pawh chu a ngeih phian maithei asin. I mangang hma a nih kha" tiin ka lo hnêm a. Ka pa pawh chuan, "A ni teh tak e..i philî chûk zel a..lungngai suh" a lo ti ve bawk..

Inbual hmain Viteii ka pui zuai. Kuangkua a rawn lei haw chu ka la ei ngai pawh ka hre lo. Chawhmeh hming a hre mak thei tawp. A tui thei phian lehnghal a. Ka nu chu a inbual fai a, "Sawtah i nu Ṭhiangi te inah ka va kal lawk ang e. 2nd hand bale a hawng a..mi en tam hmain ka va en teh ang" tiin a chhuak nulh. Ka pa erawh tv a en. 

Viteii chuan, "Api te hian an remtih chuan karleh tawpah khian hawn lawk ka duh ê..ka nau lung kan phun ve dawn a" a ti sap a. Viteii te hi an chhungkaw chanchin ka hre thui lutuk lo. 

"An phal ang. Dil la" ka ti a. Phal lohna chhan tur em êm ka hre vak lo. 

"Nia, nimin khan Api bulah chuan ka sawi thawi a, 'A hunte thleng phawt se' a tia" a ti ve mai a. 

"Vite, unau engzat nge in nih ve? In chhungkaw chanchin han sawi ve teh" ka ti a. Ngawih reng aia chuan a zia zawkin ka hria. 

"Unau panga kan nia. A milai ka nia, kan upa ber chu Zopuiah nupui a nei a, an nute inah an awm daih a. A nau chiah hian sâwn a pawm ve a, a lian tawh naute pawh. Ka nau chiah mipa hi thingkung aṭangin a tla a, a boral. Kan te ber chu kan khuaah school a la kal ve..anu leh apa hian leilet zau vak lo an nei ve a, chuzawng chu a ni mai" a ti sar sar a. An khawsak a harsa over lo turah ka ngai. 

Au Bawiha a lo haw a, "Naaâ, vawiin chu a, ka thin a va rim tak. Kulikawn pain bel bâwm a rawn order a, a sawi ang thlapin kan siam sia, a rawn en a. A duh lo leh a. Kan siam rei tehreng nen, ka hnek chak tak tak a ni" a rawn ti lut bawrh bawrh. 

Ka pain, "A va mak bawrh bawrh ṭhin. Insûm rawh. Hralhna tur a awm leh mai ang. A thuhrimin ani reng reng pawh chu a va tiâng lo bawk ve mawle" a lo ti vat. Ka u pawh ngawi rengin in chungah a chho. 

Thim hnuah ka nu a rawn thleng a, Mama kan la nghak. "Khaw nge i 2nd hand thin chu" ka lo ti a. 

"Ka duhzawng a awm lo" a ti ringawt a. Ka pain, "I va rei si ve..i lênglâm mah mah, Viteii awm hnu hian" a lo ti khauh mai. 

"Aw..kan han titi leh rih mawle..Mama pawh a lo la thlen chuan loh hi" ka nu chuan a ti ṭâlh a. Ka pa erawh a ngawi leh daih. Mama pawh a rawn haw ta. A hmel a thim raih mai a, lungawi lohna eng emaw tak nei a ang. 

"Ka ril a la ṭâm lo aw. Min lo eisan r'u" a ti nghut a. 

Ka pain, "Chungte chu rawn sawi ve bawk tur alawm, kan lo nghak char char che a" a lo ti hmuk. Ka pa hi zanin tlai chu a mood a fuh chiah lo a nih hmel. 

Zan a rei leh dawn sia, ka ning sa. Movie ka en ta daih a. Phone ka khawih chuan Bena'n min lo text ka hlau deuh. Lo len a tum ka hlau a ni ber. Ka tana mi ṭha lutuk mah nise, ka tui lo. Û angin en thei zawk ila, nau angin min en se ka duh daih zawk. Zorina pawh a lakah ka titau ve ngawt bawk. A reh thei lutuk chu ka ngei. Ka lo beiseisang ve vak chu zaktheilo ka inti tho bawk sia. 

Ka movie en moodah ka awm ve dawn chiah tihin ka phone a ri a. Ner nak chungin ka en nghal. Ka rilru a insual nghal hmak bawk. Zorina a nia, lak nge lak loh turah ka buai. A vawikhatna chu ka la ta lo phawt. A rawn call leh chuan ka la ang ka ti. Mahse, zuk reh leh daih chuan…nâaa, ka va ngei tak. Ka movie en pawh ka tui leh ta nek lo ve. Ka dah tau sawk a. A zangthal zawngin ka mu meng kur. 

Viteii'n ..ka pindan kawngka lo kikin, "Inleng i nei a" a rawn ti lâng lâng. Phun zui hlakin ka tho a. Bena a nih chuan ka tûm bûr ang ka ti rilru vel. Ka va phei chuan ka rin loh lutukin Zorina a ni tlat! Amah chauhin a lo ṭhu ngal mai a. Min melh rân bawk. 

"Ehe!" Ka ti hluai a. A nui suk a, a va nui rei lo tak. 

A bulah ka ṭhu ve nghal a. "Ti nge a?" Ka la ti zui! A va atthlak tak. Ka hamhaih êm a tin ni. Amah maia a rawn kal ngam hi ka ring lo ve tawp kha a nia. 

"Ngati nge ni ang?" A ti sup a. Kan inmelh chiang ngang mai. A mitmeng vawt nguih reng kha a la bo miah lo naa, a dam ruih tho si. Ka hrethiam tehnuai lo ve a. 

"I lo leng a.." ka ti lawi rât a. 

"Ti nge ka call i lak loh" a ti nghut. 

Chhuanlam tur dang hre tawh hek lo, "Ih,..ka lo muhil a" ka ti bah nak. A nui huk a, "Dawheh" a la tizui! Midang min tihna chu nise ka meng rum leh ngawt ang. 

Ka ṭawng leh hmain, "Khaw nge i nu te" a ti a, a hawi kual bawk. 

"Ka hre miah lo, roomah ka awm daih sia.." ka ti ringawt. 

Parvula a rawn kal a, Zorina chu a ngûr ang tih ka hlau tawp. Ui kawlh chu a ni lo naa, mikhual ti mai ang a la hmuh vak loh hi ngùr khum a ching ṭhin. A lian sia, naupang te phei chu an ṭap rawng rawng zel. Mahse, Zorina chu a rawn si thuak thuak a, Zorina lah chuan a lo chûl bawrh bawrh bawk. 

"Nuam i va ti ve..i chhin suar suar a" nelawm tak hian a ti mawlh mawlh a. Parvula lah chu a chhing tak suar suar a, a tenawm roh tak tak. 

"Vulbawih, i mutnaah va kal tawh rawh le" ka tih chuan, "Aih" ti niawm hrim hian a chîk nghur nghur a. Ka'n melh rum sasawi pawn engahmah min ngai lo. 

"A la awm ve duh a nih hi..eng maw a hming kha" Zorina chuan a ti a. Ka sawi chuan nuihza insûm zet hian, "A va common lo ve" a ti hap. Nia, he hming hi Au Bawiha phuah a nia. Engti tiha Parvula tih phuah nge a nih ka hre lo. A inhmeh zui ta phian a. 

"Nang pawh i hming a common lo tak e. Sawmsak" a ti zui leh sup. Ka phâwk hrâ a, va melh nghekin, "Ve che. Nang pawh Zora i nih kha.." ka ti ve sak. 

"Ka zawr hleinem. Thlûkna dah rawh..chuan ka pawm ang" ngai haw eih lo hian a la ti zui a. Ka ner khum vak ringawt. 

Thingpui ka va lum a, Para nen an lo inchhaih. Ka u chuan hmu se, Zorina chu a kawmngeih leh ringawt maithei a ni. A ui ngainatu te chu a ngaina ve tawp zel. Thingpui kan in laiin, "In insual khan i na em?" Ka ti ta phawng a. 

"Na ve e. A hnek a na zêk a" nui hak hak chung hian a ti a. Ka hmu hmelṭha ngawih ngawih. Mipa ṭhenkhat chu nise, "Na teh nang..khatiang mai mai" an ti leh ham ham maithei a ni. 

"Chuan, a nih thil ka zawt ang che aw" ka ti hluai a. 

"Ummm" a tih chuan, "Ih, hetia in insualnaa in hlawh hi kal khawmte thawhkhawm nge an sponsor che u" ka ti duah a. 

"Aw..a huaihawttu an awm a. Kal khawmte hian an thawh bawk a. " A ti ringawt. A va chhang tawi tak. 

"Nih engzat nge i hlawh tlem ber?" Ka ti a. Keia reng reng pawh ka mak ve fahran e. 

"12000 ka hlawh khan a niang. Ka hneh lo ṭêp lehnghal" a ti ve mai bawk a. Awmdun takah chuan a tira ka lo rindan ang êm êm kha a ni lo tih ka hrechiang telh telh. Kawm nuam lo êm êm a ni miah lo. Mipa ṭhenkhat inlak cool tum over lutuk, ṭawngmawh nih duh vanga biakna pawh min chhang ṭha duh lo ang a ni ve lo va. A class riau. 

Thingpui no ka sil laiin ka nu leh pate an rawn lut a. Ka pain Zorina a hmu chu, "E! Kha..i ṭha maw? Kan insual thiam chu" a ti bawrh bawrh mai a. Mak ka lo ti viau. 

"Aw..ṭha e. Nang i ṭha em?" Polite takin a lo ti ve a. 

"Ṭha a, mahse, Teberi te nufa hian damlo treat-in min treat pek a..min tiawm nuam lo" a ti chuar chuar a. 

Ka nu chuan, "Tirawh, mu nghal mai ila, vawiin kan tei tam deuh a, ka chau riau" nui miah lo hian a ti a. Nidangah ka pain a han kah châng chuan a nui hawk hawk ṭhin. A hmel landan chuan ka awm a tinuam tehchiam lo. Ka pa chuan, "Vut vut ṭhin a. Thingpui hâng min va thlit phawt teh, chhawl a hâl" a ti a. Ka nu a kal nghal. Zorina chuan ka nu vangin nuam lo a tih ka hlau hle. Mahse, a hmelah engmah a lang lo. 

Ka pa bawkin, "Insual hi a hlawk ve phian dawn anih hi ,mahse, mi nazawng tih chi chu a ni hauh si lo, engtin nge zirna te i nei em? I hratlak ve tawp nge?" A zawt dilchhut mai bawk sia aw. 

Zorina pawh chuan, "Zir êm êm lo, ka hratlak a ni ber ang chu..exer ka lak hi a ni deuh mai" a ti ve mai a. Ka nuin thingpui a rawn dah a. 

"Teber, mu har suh aw. Naktuk zing karah Viteii nen va bazar rawh u. Naktuk tlaiah chaw ei kan nei leh dawn sia..Bena pawh a rawn kal dawn kha" a ti zawt zawt a. Chutihlai kher chuan ka nu chu chhan hrep ka châk, Zorina avangin ka hreh si. Ka ngawi tawp. A ngaina lo a nih pawhin tilang tur a ni lo. Lâna pawh a duh hran lo, a be chhe ngai miah lo kha a nia..ka ngei mang e aw. 

Ka pate mut hnuah Zorina pawh chu a ding ve ta hluai a. Ka tho ve nghal. 

"Thawh hma i ngai sia..ka va phei ang. " A ti a. 

Veranda thleng ka va thlah. A ding dat a, rawn lehhawiin, "Sawmsak, ka duh che a nia. Midang lo ngaizawng suh aw. Muttui" a ti hniam raih a. Ka ṭawng hmain a kal daih. Ka thin a phu dat dat thei nia..a tihdan tehtawp kha ka inring hman lo, lo inring hman tehreng pawh ni ila, ka hamhaih tho vang. 

Tuilum ka in laiin Mama a rawn haw a. Dawhkan bulah a rawn ding ve reng. 

"Nge.." ka ti hû a. Min rawn chhuk melhin, "I bialpa tur chu keiman ka thlang ang. Ani kha chu ni suh se" a ti vawt raih a..ka mur sung sung thei…