Zor 4

ZOR…(4)

Ziaktu : Toni Râlte

Thil danglam êm êm thleng lovin kan lâm intihsiak hun pawh a lo thleng ve ta reng mai. Ka phur teh hâwrh lo naa, Kan department tan chuan theihtawp chhuah erawh ka tum ve viau. Desy erawh an department aiawha lam zingah a tel lo va, kan kal dun leh tho. Hall kan thlen chuan lut nghal mai lovin a sirah kan ṭhu khawmuang a. Dami pawh a kal ve tawh a, Desy tih loh ka kawm ve ṭhinte hi Dami, Zoi, Mateii leh Dingi te an ni. Zoi leh Mateii te hi Republic-ah an awm a, Dingi erawh Hnahlan khua niin an unauin Vaivakawnah in an luah thung. Kan ṭhu khawm dâl a, Dami, Desy leh Zoi te hi Education department vek an nia, Dingi leh Zoi hi Economics an ni thung. Keimah chiah ka hrang. Kan intihsiakna tur chu kan sawi vak lo, kan vei lo tlang a niang. Zoi'n, "Awii, enteh u, news kha in hre tawh em?" Zawi deuh hian a ti sar sar a. Kan melh nghal ṭhap. Hmeichhia tih takah kan beng a vir a, chanchin ṭha emaw chhe lam hi kan ngaihven hûrh zel. 

"Tuna Bank tur an sak tharah khian hman zan khan hosteller pakhat an pawngsual an tia..mahse, Case an file lo nge engmah thawm vâng a awm lo. Tak tak a ni lo nge pawh ka hre lo" a ti ta niah niah a. 

Dingi chuan, "An pawngsual chu tu nge? Kan hre ngai em?" A lo ti var. 

Hawi kual ruk rukin, "Mipa a nia" a ti sap a. Kan lo Ê dual! A dangdai riau a, Ram dangah chuan thleng fô mah se, Mizoramah hi chuan hman deuha lar ve hat bak kha chu mi nawlpuiin kan hriat hi a awm ka hre miah lo. Victim tam zawk hi chuan mualpho an hlauh vanga sawi chhuak lo an nih ka ring. Mizo thenkhat hian kan la dawngsawng thiam vak lo bawk nen, Hmeichhiain pawngsual a tawh pawha a victim zawk mawhpuh la tum hi team 10 daih lai an la kuh ve ṭên ṭûn a. Mipa thahrui nei zawk phei chu dem tâwk an tam leh viauin ka ring. 

Mateii'n, "Awiii, tuai ami? Nge mipa pangngai? " A lo ti nghek. Dami'n a nghawk sawk, "I ṭawng ring lutuk" a ti sap a. Zoi chuan bengdaih tum takin, "Tuai chu a ni lo naa, mahse, hei a aw leh a mizia, a kal dan vel hi a nu ve deuh a. Chutianga tuai dangte anga inchei nû leh khatiang rilru kha a pu hran lo. History department a mi an tia, ka la hmu chiang miah lo" a ti ta zung zung a. 

Kei chuan, "A nih pawngsualtu chu hosteller tho em ni?" Ka ti a. 

"Aw..hrechiang phei chuan room indawt chiahah an awm te an tia" a tih chuan mak ka tiin, victim chu hre ve lo mah ila, ka lo khawngaih ve tawp. Mipa tana pawngsual nat zual dan tur hi, hmeichhia a na lo e ka tihna ni lo se. Mahni mipatpui ngei maiin tharum hmanga a han sawngbawl kual vel tur chu, mipa ka ni inti ve tan chuan a rapthlakin a tlawmthlak ngawih ngawihin ka ring. 

"Report an thehlut lo chu a mak mang e" ngaihtuah zui zetin ka ti halh a. Kan CR Ruata'n, "Teber, kan ṭan dawn hnai a nia. Lut tawh r'u, a lam hmasa pâwlah kan ṭang dawn bawk si" a rawn tih tak avangin, "Nia..hawh u, lut phawt ang u" ka ti a, ka ding nghal bawk. Engmah sawi zui tawh lo chuan Hall-ah kan lut ta a. 

Ṭhut pawh ka ṭhu rei ve lo, inthlak a ngaih avangin ka chhuak leh nghal a. Green roomah an lo zi hut hut mai. Ruthi chuan a sawi ang ngeiin hmarâm chhing chu a feng a, kei leh Puipuii'n a fual kan feng thung. Vakiria erawh khum kher ṭul ka ti lo bawk a, a tla duh bawk nen, kan khum lo. Ka sam chu a kawih ang angin ka thlah a. Tikawi chawp emaw hi min ti ve ziah. A ni der si lo. Min ko ta a, zâm ru tak chungin kan lut ta ṭhâm ṭhâm a. Kan department bakah ka ṭhiante an au ring hle. Kan han lam ta a, kan zir lai ai mahin kan tiṭha zawkin ka hria. Tumah han zak ṭît ṭêt kan awm tawh lo bawk a. Ruthi pawh a uar fâl ngang mai. Kan lam zawhah Judge ten min han comment ta hlawm a. 

Art & Culture lamin a bik taka an sawm, Mizo Department Proffessor Dr. Lalnunpuia chuan, "In lam thiamin chheih lam rawn entir tawh 2 te aiin in lam dan pawh a dikin a zo raih mai. Amaherawhchu, kha Bawihi kha..hmarâm chhing feng kha i zei hah hah hle mai a..(an au dur dur, Ruthi pawn intithei fêin min rawn melh vah) i tidik lo nasa hle thung mai..(Desy a rawn nui hak a.. a hmui a hup nghal) kan pi leh pute hunah mawng shake a awm ngai lo va, an vir dawn pawn zâingai leh dim takin an inher hret hret chauh ṭhin. I uar dan kha a nalh viau naa, i ṭhiante kha lo entawn leh la, an uar aia uar thiam si khan mawi takin i lam thiam ngei ngei ang" a ti ta dap dap a. Ruthi chu a hawi nawi nak mai. Sir Nunpuia kha a la ṭawng na lo zawk a, a hmasa bera lam chheih lam entir ve tho te phei chu an inthing îng-euh nasa lutuk a, "Ekhai! Tawr tawr che u chuan..tu zirtir che u nge aw" a lo ti deuh hrep. Tumah a zahpah lo va, a ṭhahnemngaihna thil a ni bawk nen, Ruthi pawh a la dim mah mah zawk a ni. 

Kan chhuak kan inthlak lai chuan, Lawmsanga a rawn lut, "Kha maw..nangmah vangin kan point a hniam dawn a nih kha.." a rawn ti bung nghut a. Ruthi chu a ngawi reng. Ka khawngaih ta deuh nge, "A ho lutuk, khatia kan va lang ve kha a ṭha lutuk tho" ka lo ti vat. 

Rinpuii'n, "Kha judge ve kha a..Mizo department lam tih takah a ṭhing ber âwm e. Inti hre ve ropui si, mizo zirtirtu ve mai mai. " A lo ti hlawih hlawih a. Kei aiin Ruata a ṭawng hmasa zawk. Awki chang bêng bâwng hian, "Mizo chu i va ngainep awm ve le! Mizo i ni ve lo em ni? Mix te hi i lo ni reng a ni lo maw? Khanglang che chuan..i hnam i hmuhsit chhung chuan eng anga nalh leh hausa pawh ni rawh tuman an ngaisang ngai lo vang che. Chuan, i changkan lohzia ka hre chiah tikhan..i lo va han class lo rem rem ve le" a ti ta zêk mai. Ruata mi zaidam, mi pawisawi hlau êm êm, leadership nei ṭha tak ni bawk siin thinrim taka chutianga mi dang a ṭawngkhum ka hriat vawikhatna. A ṭawngkhumna kha a âwm ngawih ngawih bawk. Rinpuii pawh chu a hamhaih deuh nge a ngawi dat a. Mahse, "Ve khanglang a che. CR nih vanga khatia ṭawng tur i ni lo. I ṭhin rapthlak nen, Thingtlang mi mai mai lehnghal" a ti zui hlak a. 

Apuia'n, "Ngawi tawh r'u, in zahpuiawm êm mai. Rinpui, nang kha i changkang viau lo. Unit test-ah lehzel pawh entawn duh, entawn master i nih kha. I ṭhing uchuak" a lo ti ve hrep. Kei erawh chutiang buainaa inrawlh ka peih loh vangin ka inthlak zo a, ka chhuak daih. Rinpuii erawh ka hmuhdan a dang ta hle, ka thlak danglam mai mai tawhin ka ring lo bawk. Ṭhiante bulah pawh engmah ka sawi lem lo. A zahthlak mai mai. 

Refreshment an rawn sem chuan zun pahin tiin pawnah kan keng chhuak a. A hmaa kan ṭhutnaah bawk khan kan ṭhu leh dal. Zoi leh a bialpa inṭhen thu vel sawiin kan inkap leh nak nak a, Dami'n, "Kan Teberi pawh hian bemtu a nei thar a nia aw..ka sawi duh ang em aw" tiin a nui vur vur a. Ka lo melh vak ringawt. 

."Sawi vat teh" Zoi'n a tih chuan, "Ka u ṭhianpa Rpa kha in hria em? mobile phone dawr nghak kha..nizanah pawh an lêng" a ti ta sar sar a. Ka lo nui hawk. 

"Teber, i single rei ve thawkhat tawh lawm, chhang ve la.." an ti sap sap a. 

"Ka duhzawng a ni lo" ka ti ringawt. Kan inhnial dar dar lai chuan kan piah lawka mipa ṭhu khawm lamah thawm a ri deuh huk a. Kan va hawi phei vat. Zorema, MSW ami lar ve deuh, phunglung leh chapo ve deuh mai hian an ep chiaha ṭhu mipa pahnihte chu a va au lûng lûng a. 

"Ehh, an zak vel..zanin chu min khilai ve tawh thung la..châk lo pawh kan ni bîk lo va..mawh" a ti vel a. A ngaihna ka hre vak lo. An epa ṭhu mipa pakhat zawk chu hmuh tawhna ka neiin ka hria. Pakhat erawh ka hmuh vawikhatna, an zakzum tih han en mai pawn a hriat ngawih ngawih. Kal mai tumin an tho a, Zorema bawk chuan, "Saite, kal mai lo la..kan la en kham lo che.." tih pahin ka hmuh tawh hnu bânah chuan a va kai a. 

Thinthlak vat pahin, "Min tibuai tawh suh" a ti ṭuak a. A hnuk a ulh deuhin ka hria. Kan thlir deuh ṭhup tawh vangin a zak chu a sen ap ap bawk. Awmhmunah ka lo insangmar ve vak ringawt. 

"Aw..Puia aiin ka pa zawk, ka man zawk..induh viau suh" Zorema chuan a ti leh a, mak ka tih chu a ṭhian mipate an lo nui a, an ṭhianpa khap an tum miah lo chu. Zorema hmaah tak ding siahin, "Zoremsang, fiamthu a ni lo aw..min hmusit rei tawh bawk a, i hre viau ang. " Mipa khan mittui tling ṭeuh hian a ti ta a. A rilru a nâ tih chu a thlirtu te tan hai chi a ni lo reng reng. La duhtawk ta mai lo chuan, Zorema chuan, "Min hnek hrep dawn em ni? Haha..i hnek na awm bawk sia..tuaia, nang hian mi vau ve suh, nangni hian mipa min timualpho..Puia kha va mutpui leh mai mai rawh" a ti ta chhur chhur a. Engtiklaiin ka va tlan phei ka hre lo, Buainaa inrawlh hi ka duh ngai miah lo a nia, chhungrilah min ap ka ti mai. Zorema bula va din pah chuan, "Mipa i ni lawm ni? I mipatpui khatiang khawpa zak leh rilru nâa i siam a. MSW zirlai ve si..i mawl hle mai" ka va ti ta fak fak a. A hamhaih ve deuh nge mi en vung vung ringawt. A ṭawng leh hmain a ṭhiante zinga phanchan hmel ber chuan, "Thianpa, duhtawk rawh. Lut ang u" a rawn ti a. 

"Nang hi ka sawm ve che mi? I lo inrawlh ve ngawt a. " Zorema chuan a ti nghut nghut a. Mahse, Ka la hriat ngai loh mipa sa ṭha nelh nawlh hian, "Hmeichhia lehzel pawh khing duh chu nangmah zawk kha i lo tuai ru zawk daih a nih kha..nep pêng pûng em mai a" a lo ti hmuk. An buai chho ta zel a, kei chu ka ṭhianten min rawn kai sawn daih. Chuan Zorema chhaih hrep te pawh kha an kal kiang tawh. Ka thlavang rawn hauhtu te ṭhianho leh Zorema ṭhiante chu an inphek sual titih dawn ta mai a! Security an lo tlan lut ta nual a, an rawn ṭhelh thei hram. Mipa ve si Zorema chu hmeichhe ânthiam ang chiahin zuk âng thiam a! Ka va hmu tuihnai lo pêr pûr tak..

Boruak a dai ta deuh a. Keimah tak chu tuman min notice tawh lem lo. Hallah lut turin min rawn ti ta vek a. Kan lut ta a. Ka awmdan a la dik tak tak thei lo. Zorema kha ka ngei êm a ni. Tuai ho bik hi a over chin, a tenawm zawnga khawsa hi kei pawn ka ngainain ka ngaithei bîk lo. Mahse, nichina a chhaih kha chu tuai ni pawn ka hre lo, a pa hrâk lo tih erawh a lang. Khatianga mihring ve lem mi dang awm ṭhup laia inrahbeh kha ka ngaihdan a ni hlawl lo. Zorema bakah lo supporta lo au phurtu a ṭhiante kha Zorema ang tho an ni. 

Ni khatah kan zo hman lo va, naktukah result puan nen a bak la intihsiak turte chuan an perform leh dawn a ni. In ka thlen chuan ka nu chu damdawi in lamah a lo kal leh a. An khaw pa chu a zual a ni maithei. Ka pa erawh a feh a lo haw tawh thung. Mama lo hawn hnu pawn ka nu chu a rawn la haw si lo, Kan phone lahin a ring ral zel si. Mama'n, "Ka nu hi pawnlamah a tam mah mah, in chhung hi luahlûm ve deuh se a ṭha. Damdawi inah pawh a ṭul a nih chuan keini kan awm a, amah aiin kan ṭangkai zawk ang" a ti hmuk hmuk a. Ka nu chungchanga complain a neih vawikhatna niin ka hria. A sawi dikna chen a awm ka tia. Tihtur nei êm êm lo pawn ka pa nen tala khawi khawi emaw len vah hi a hrat riau zel. Zan lamah pawh chhuahna tur remchang a hre thei mah mah a, hetiang hi a hma chuan a ni ngai lo asin mawle. Ka pa chuan, "An buai deuh a niang. Eisan mai ang u" a ti a. Ka nu dem zâwngin engmah a chhakchhuak duh lo. Nu ber tel lo chuan kan ei ta a.

Thleng ka sil laiin ka nu chu a rawn haw a. "Awii! A zia lo tak tak a ni. Ka phone ka tibo daih a..chanchin rawn hrilh tur che u pawn, i pa number takngial pawh ka lo vawng si lo " a ti nghal bawrh bawrh a. 

Ka nu chu ka khawngaih leh hnuhnawh ta viau zawk a. Bakah an damlo kha a lo hniam zual bawk nen, han hawnsan daih bik kha a hreh ve a lo nia. A âwm viau e. Mama pawn inthiam loh hmel deuhin, "A nih chu aw. A va zia lo ve. Naktukah ka rawn lei dawn che nia.." a lo ti vut. Upa lam an ni ve tawh a, ka u te hian an theihna zâwnah chuan ka nu leh pate hi an chhawmdawl zel tawh zawk. An ni pawh ka ute-ah hian an innghat pumhlum a tihtheih âwm e.

Ka sam ka chhemro laiin ka nuin min rawn ko va, "Inleng i nei" a rawn ti. A tu chu nge ni lehpek ang aw..ka nu lah a kal nghal daih bawk si. Phur fahran loin ka va chhuak a. Bena bawk! He pa hi a..ka ning ang tih ka hlau, a fel angreng si a. A lo nui var var a, ka nui lui ve tawp. Cake a rawn keng a, "Ka ur ve a nia, ei ve chhin teh u" a la ti zui! A va inhmeh fahran lo tak. 

"I thiam elo?" Ka ti hâ a. "Thiam êm êm lo, ka nu hi a tui thar vel lutuk a, mi tibuai tel ve zel sia, ka ti ve ta ngawt a nih kha" a ti puat a. 

Ka va dah ṭha a, nakin thingpui in huna hmehah ka ti deuh. Ka nu chuan Bena chu a lo be ve mawlh mawlh bawk a. Ka nu hian a ngainat hmel ka ti. Ngaihzawng chungchangah ka pa nen hian an inrawlh ngai lo tluk a ni. Kei phei chu ka û te kutah min dah ka tih tawh kha. Vawikhat Au Bawiha hian khawlai mi ve deuh mai bialnu a nei a. A neih chiah a duh ka ti mai, Au Bawiha lah khan a duh phian a. Thil pawh an inleisak hman nasa. Mahse, Mama'n ,"Hmeichhe ṭha a ni lo" tiin a zilh a. Au Bawiha a ṭang ve tlat, "Fiahna i duh a ni maw? Ka hmuhtir ang che" Mama chuan a ti ta a. Kar khat hnu velah Mama chuan kan inah ngei chu nu chu a rawn hruai ta mai a! A hma khan kan inah a la rawn leng lo hrim hrim. Chhungkaw awmkhawm laiin "Hei hi ka bialnu a nia" a ti pek a! Au Bawiha leh a bialnute inhmu chu an phâwk teh asin. Au Bawiha pawh a harhchhuak ta a, Mama nen erawh kar hnih vel kha an inbe mumal loin ka hria, a chhan pawh kha nu khan Mama bulah, "I nau kha chu ka kawp satliah mai mai, nang chu pasal atan pawh ka duh che" a lo la ti kual vel niawm tak a ni. Hmeichhe nasa tawh lailêng hi chu an sawi ang tak tak hi kan lo ni a nih dawn hi. Mahse, Mama chuan, "Ka nau rilru a let theih nana ka hmanrua mai i ni. Ka nau tan pawh i tling tawk lo a nih chuan kei a û zawk chu min beisei buai duh lo mai rawh" a tih hial takah chuan ṭawngkam chhe pui pui nena ânkhumin a rehsan ve ta chauh a ni. Khatah pawh khan ka nu leh pate chuan Au Bawiha kha a tirah bansan tura an hrilh bak an inrawlh lem lo. Min dah zalên mah mah zawk em âw tih theih a ni. Duhthlanna hman thiam loh chuan kan la chawh viau ang. 

Bena chu a titi suam suam reng a. Thingpui ka va lum a, cake chu kan hmeh ta a. A tui zêk a. Ka thiam ve loh thil a ni. Eisiam lam hi ka tui hlawl lo. "Engtik nge i rawn inentir dawn?" A ti leh a. Ka nuin a lo hre pha si, "Ngati nge a.." a rawn ti ta chiah a. Awii! An phî leh chûk dawn a nih hi. Ka sawi ve mai a. A rang arangin ka nu chuan, "Naktukah va incheckup ang che..ngei ngeiin" a ti ta ngei a. 

"Naktuk chu ka la hman lo, programme a la zo lo" ka ti hlar a. 

"Tlaiah i rawn hawn pahin ka clinic-ah rawn pêng kawi mai rawh. Ka haw har dawn alawm" Bena chuan a ti a. 

"Tihian damdawi min chawh ve mai la" ka tih chuan a nui hawk a, "Check i ngai alawm..chutin damdawi ka pâwng chawh ve ngawt duh lo" a ti ve si. Hmm, a sawi zing tawh bawk a, inentir chu a ngai a nih hi. Bakah vawiin kan lam zo pawh kha a rawn na fîk ṭhak ṭhak mai a, damdawi ka hmawm leh ngawt kha a nia. Rilphir puakkeh chu a hlauhawm an ti sia, a tlai hmaa ve inentir chu a ṭha. 

Ka rin aiin a leng rei lo. Engmah han ngaihbel tur eih pawn min ngaizawng tihtheih turin ṭawngkam a nei lo hrim hrim. A thawventhlak angreng. Duh vak loh ten hmaichhana min han bem ngat ngat hi chuan an hmai zah ve bawk nen, a nuam hlawl ṭhin lo. Kei phei chu han inthupa han nuih luih vel hi ka hmelhmaiah a tak a ni lo tih a lang bîk.. 

Bena haw hnu lawkah ka U a rawn haw a. A tih fô angin bathroom bula a ui riahna atana an va tihpûk lam a pan leh nghal zat. A rawn lêt rang kher mai. "Khaw nge Parvula saw" a ti a. A ko nghal lâwng lâwng bawk. Ka nu chuan, "Ka chaw ei lai kha chuan a la awm reng kha" tih pahin a ko zui ve nghal a. In chungah te an han chho a, a awm bawk si lo. Parvula hi LC ten ui chhuah an khap chu thuhran, amah a len êm vang hian an hlau thin a. Thlung lo mah ila a chhuak ngai lo. U Bawiha a mangang ṭan, a ui tel lo chuan a hlim thei lo tih hretu kan ni bawk a. Kan chhung buai a ni ber mai. Pawnah chhuakin ṭhenawm khawvengte kan zawt, an lo hmu bawk si lo. U bawiha chu a phi sek tawh, a ṭap ṭêpin ka hria. Kei tak pawh ka mangang, Parvula hian ka u tih lohah min ngaina ve ber a, ka thu pawh a âwih chho ve ṭan kha a nia. Bakah chutia a awm lo ringawt chu a dik thei lo hrim hrim. Zan dar 10ah pawh kan la vei thuak thuak mai. Mama lah a la rawn haw thei si lo. Ka pa meuh pawh a philî ve khawp mai. U Bawiha lo lêt ,a kal lohna lama kal a tum lai takin in hnuai step aṭangin Parvula ngei mai chu a rawn chho ta hnuk hnuk a. Hamhaih zetin kan lo melh ṭhap ringawt. U Bawiha harhchhuak thutin a zuk pawm ta vat a. 

"Ka ditê, ngati nge i lo kalbo daih? Ka mangang alawm..i â lutuk. Hawh, lut ang le.." tiin a chul heuh heuh a. Kan thaw huai hlawm mai. Para lah chu a chîk nghur nghur mai a. In hnuai zuk enna chang kan hre lo kha a mak ve reng reng bawk. Kan lut ta dial a. 

Mut dawna tuilum in hi ka tihṭhan a ni a, ka in laiin ka nu mu tur chuan, "Hman zana lo lêng te kha an va rawn leng leh ta lo ve.." a ti a. 

Rpa te kha a sawi a nih ka ring. "An zin a..Lungleiah" ka lo ti vat. Nia, Rpa hian min la rawn be reng a. Mahse, aw ka pawh duh lo. Ṭhian inbia kan ni mai. Johna nen khan Lungleiah an sumdawnna thilah an va zin kha a nia. An lo haw hun tur pawh ka hre lo. 

"An ṭhianpa haw ta daih kha insual mi kha em ni?" A tih chuan mak ti deuhin ka nu chu ka en a, "Engtin nge i hriat?" Ka ti hâw. 

"I pa hian a en ve ziah alawm.. eng nge a hriat pawh ka hre lo.." a tih chuan ka tui in lai ka phuh lo chauh. Ka pa ber kherin a lo en ve chu..

"Umm, a nih kha..i va hre thei zawk ve, Apa chuan a hriat leh miah loh kha" ka ti a. 

"Tv ringawt en hek.." a ti puat a. A kal zui nghal. Kei pawh ka in zo va, mu turin ka intintuah ta a. 

Ka zing tho chu ka awm a nuam lo riau. Chhungrilah hian ka khua a sik niin ka hria. Ka pang erawh a sâ pawn ka hre si lo. Ka che pawh ka ni nguai rêng a. Chaw ka ei hlek a, nachhawkna ka hmawm leh ta nghal. Tiang chunga kal chu ka mood a chhe dawn lutuk. Ka scooty ken ni a nih vangin ka hrufai thuak thuak a. Desy a rawn tlai ve mial! A rawn phun nghal hlak hlak a. 

."Hmanhmawh tawh nâk alaiin ka niteii a rawn âng leh hrep a. Saw lah saw a hneawm, vui dur dur reng ringawt" a tih chu ka lo ngaithla mawl tawp. Thilmak ni hek lo, A pa te unau zinga naupang ber dawttu a nî hi Desy nu tai reng, vuivaina tur hre êm êm reng mai hi a nia. A hneawm ve ngawt ang. Ka nî a fel tehreng nen. Sawi zui loin kan tlan thla ta nghal vang vang a. 

Vawiin chu boruak a zangkhai zual, kei pawh ka damdawi eiin min chhawk ta bawk nen. Ka sâhâwk ve leh viau tawh. Laldami zunchhuak rak reng bawk si kan va zunpui a,. Lut leh ta mai lo chuan thla te kan han la leh rih. Kei in pose hi ka'n thiam lo khawp a, ka lang chhe thei bawk si. Ka uar ve vak lo. Chutia kan in click mawlh mawlh lai chuan, Mipa rual khat hi an rawn ri phei hulh hulh mai a. Kan va hawi phei chuan Zorema te bawk an lo nia. Mahse, an hnung lawkah rual khat tho hi an rawn phei ve bawk. Hall chhung lam boruak a rin vangin Zorema te inhrosa thawm chu hriat a har mah mah zawk. Ka hriatchian deuh erawh, "Fair fightin aw" tih thu an sawi chu a ni. Insual an awm leh dawn tih ka ngaihtuah chhuah rualin Zorinsanga ka hrechhuak nghal. Mahse, hetah chuan a awm ve lo. Nimina ka thlavâng rawn hauhtu leh Zorema chu a laiah an ding ta ran a. Zorema'n a chhaih hrep pawh kha a awm ve bawk. Mahse, an inkhawih tak tak hmain Security an rawn thleng leh hman chiah. An um darh leh ta a. Thil ṭhing tak a ni, University zirlai ve lai si, hetia lo insual vel hi.. An kal darh tak tak hmain Zorema chuan nimina a chhaih kha a su per nawk a, a tlu tur chu zuk kaitho lehin, "Nangmah vang a nih hi..Tuaia..ka pawngsual hrep dawn che mawni le.." tih leh a hmaia hnek a rual a, a dak âwrh mai. A ṭhianten an rawn pawt sawn ta hrâm a. A hnek pa chu a hnâr a thi nghal ṭuam ṭuam mai. A ṭhianpa khan a romol phawrh vatin a hupsak nghal a. A hnar thi hup chungin Zorema chu a melh zui ṭâwk ṭâwk mai. A ṭhianpa chuan, "A tawk, dawh tawh suh. Ka hrilh dawn" tih leh a phone phawrh a rual a. Ani pawh hi a pa hrâk lo, mahse, a ṭhianpa ai chuan a kal dan pawh a nu lo deuh. 

Hall aṭangin pawn lam mite lut tura min auh sek avangin kan luhsan ta a. Sawi chhuak lo mah ila, kha pa kha kan khawngaih ru ṭheuh tih ka hria. Ka ngaihtuah zui a, nimina Zorema tawngkhum dante kha, Zoi sawi pawngsual tawk kha kha pa kha a ni mai lo maw aw ka ti..ngaihtuah zui duh loin lâm lamah rilru ka pe lui ta daih a. 

Tlaiah result chu an puang ta a. Kan rin lawk angin Mizo Department in pakhatna an hauh ta. Keini chu kan lang pha ve ta lo. Pawi ka ti lo,. Ruthi te ho khan nuam lo ti ve se ka duh vangin. Ka tâi a rawn na leh ṭan a, ka kal pawh ka ni deuh khûn mai. Ka sawi duh chuang lem lo. Hawn vat vat ka duh avangin Desy pawh ka tur sek mai. Main gate kan va thleng chu an lo awm khawm ṭhup mai a! Hmanhmawh nâk alai chuan aw..

A ngaihna hre vak lo va kan din mâwl ve reng lai chuan Zorema ngei mai kha a ṭhianten rawn kuahin a hmai chu thisen hlirin a khat nia! Romol chuan khuh ve mah se; a chal tak a thi avangin an titawp thei mai lo , a rang arangin motorah an nem lut a, an tlan chhuahpui nghal. An kal darh tak deuh hnu chuan ka tum loh tawpin Zorinsanga ka va hmu! A bulah khang Zorema tihbuai te pahnih kha an lo ding ran bawk. Ka hre ta chiah, Zorema chhaih vak pa kha hmanni khan a rawn phurh tawh tak kha mawle! A chhungkhat an ni ngei ang. Mahse, ka ngaihtuah hleithei lo, ka tâi nâ chu a rawn puakkeh mai dawnin ka hria..

"Des, khalh mai teh, ka thei lo" tiin ka kun ta ngawih ngawih a. Desy chuan, "Eng nge a awmzia? Te.." thlabar zet hian a rawn ti a. Thei leh thei lo va ka hawi chhuak chu mi chu an tlan haw sung sung tawh, kan lam pana Zorinsanga te pathum rawn phei chu ka va hmu phê ruai..ka insehruh a, ka tai chu ka dawm ngawih ngawih. Desy lah a philî buai chi a ni ve bawk nen, a rak chul a. Laldami te ho ṭawng ri ka hre zui ta bawk. 

"Te, hei, Teber,.damdawi inah kal ang aw..Sir, lo paw mai teh, kal pawh a kal thei lo" Desy aw chu a mangan hmel kher mai. Mahse, ka aw hriat zen zen loh, ka hriat tawh nisi hian zawi sup hian, "Ka lo pawm ang e.." a ti a. Zo zeta min pawm kang lawp chu ka hre thei, Tu motorah nge min dah luh ngawt pawh ka hre tawh lo. An ri nuai nuai bawk si. Ka chal chu kut dam zet hian a rawn dawm a. "I ṭha a nia. Harh tum la aw" a ti zawi raih a. Zorinsanga hmel chu ka hmu phê ruai mai. A bak ka hre zawm hleithei tawh lo. Ka taksa pum chu a nâ ni maiin ka hria. Ka rilru kilkhatah "Lalpa, thih ka la duh lo" ka tih mawlh mawlh erawh ka la hre ve thei ṭâwk ṭâwk e. 

Ka harh leh chuan ka nu ka hmu hmasa ber. Ka meng zau tial tial a, Mama lo ding ût ka han hmu bawk. Desy rawn lut mêk pawh ka hmu ta zel a. Ka mutna chu ka khum a ni lo. Ka hawi kual chuan room lian vak lo thianghlim tak mai a lo nia. Damdawi in cabinah ka awm a ni tih ka hrethiam ve mai. Nâ ka nei tawh lo va, mahse, ka chau, ka ni nghulh mai. 

"Nâ i nei em? Bawihte" ka nu chuan ka sam huihkian pah chuan a ti sap a. 

Ka lu ka thing dawn a, ka zawi êm avangin zawitê hian, Aih" ka ti ta zawk a. Nurse a rawn lut a, "Ê! I lo harh tawh maw? Na in nei em?" A rawn ti siam siam a. A aw zangkhai leh a nui sâng chuan min chhawk huai huai thei. Ka nuin a lo chhang var a.

"Hei hi khai a ngai a..ti lawk ang aw" tiin thisen chaw a rawn khai lang a. Ka dawh mawl tawp. "Tui bak a in thei lo aw.." a kal tur chuan a ti leh hrâm a. Ka ril a ṭam lo naa, ka tui a hal. Desy'n min rawn tulh vat. Mama chu rawn kal hnaiin, "I hriselna i ngaihthah lutuk a, tlema tlemah i thi lo chauh a nih kha" a ti nghut a. Lungawi lo hmel erawh a pu lo. Ṭawng ka tum a, ka aw a chhuak hleithei lo. Ka chet hlek rual chuan ka dul a rawn thip zawk. "Che rih suh,. In thiar i duh em ni?" Ka nu chuan a ti a. Ka lu ka thing. Ka serh chu a na deuh, a hnuah ka zun an siak vang a ni tih ka hre nghal. 

"Ti nge?" Tiin ka nu ka en a. Ka bangbo deuh a ni. 

Ka nu chuan, "I rilphir kha a lo puakkeh tawh a. Mahse, i vannei êm a, an zai nghal che a. Tihian i rawn harh leh ta a nih hi" a ti nawk nawk a. Ka chhing sawk. Min zai a maw? Ni e, a natzia kha ka la feel thei deuh reuh. Ka taksa pum kha a nâ ni mai khan ka hria a. A bikin ka tai chung dinglam kha a nat dan a ril ka ti mai. A tira ka lo inentir duh lo kual vel kha ka inchhir deuh. Mahse, Pathian zarah ka harh leh thei ta hlauh chu lawm tak ka ni. 

Emergency-a zai tâwk ka ni bawk nen, ka chhungte pawh ka timangang hle a niawm e. Ka ṭhiante lah an lo ṭap pur tawh bawk. Zankhuain ka harh ta lo va, tunah ka harh ta chiah a nih hi. Desy'n, "I chhel ka ti zawk ê, a nâ an tih theih tehreng nen" a tih chuan thei leh thei loin ka nui hram hram. Mama chuan, "Ka kal tawh mai dawn, i harh ta bawk a. Ban pahin rawn tlawh che ka tum dawn nia. Muthilh tam kha tum rawh aw" a ti sup a. Ka chal a rawn dek zauh bawk. Ka lo khi ve sak bawk. 

Ka muhil leh ta daih a. Ka harh chuan a lo thim tawh. Ka nu hi ṭhutthleng seiah a lo tlu zâl a. Phone a khawih pah bawk. Ka thawm a hriat chuan a rawn tho vat a. Ka ril a ṭam ve deuh. Naktuk aṭangin buhhawp min pek theih tur thu kha an sawi a. Ei a va châkawm loh tak. 

"Nu, ka zun a chhuak" ka ti thâm ṭiak a. Ka zun an siak tawh lo. Ka duh tawh lo. Zun bur a va la vat a. Min kuah chung chuan engtin tin emaw ka zung ve thei mai. Tui ka in laiin Desy a rawn lut. "Ehe! I lo harh tawh maw? Nu Mathan, hei kuhva chu aw.." tiin kuhva chu a pe a. Polythene-in eitur eng emaw a khai nual bawk. 

"I riak dawn mi?" Ka lo ti a. 

"Riah lohin..nizanah ka rawn riak tawh bawk si lo" a ti liam puat. He nu tak hi chu aw..amah bawk chuan, "Nu Mathan, muhil rawh..nizan in meng rei bawk si, i chau viau ang" a ti leh zung zung a. Ka nu chuan, "Ka va inthiar lawk ang e. Ka mut pawh a chhuak lo" tiin a tho nghal a. 

Ka nu inthiar lai chu remchangah chuhin, "Des, engtin chiah nge nimin khan ka awm?" Ka ti a. Lays bawm chu hawngin pakhat a hmawm nghal that, tep chuap chuap chungin, "Sir Vla motorin an phur chho che a, keini khan kan zui bawk che. Kan thleng a, an zai nghal deuh rawp rawp che. Ka phili buai ve tawp a, mumalin ka hre vak bik lo" a ti a. 

Ka zawh châk, ka zawh zah deuh si a awm. Mahse, "Kha..ih, Zorina khan min pawm lutin ka hria, a ni em?" Ngaihpawimawh loh hmel deuh hian ka ti a. 

"Umm, a fel tak tak a ni. A zo bawk che sia e..Atea te ṭhian dun pawh khan an ngaihtuah ve tawp che" a tih chuan, "Tu nge Atea?" Ka lo ti hû! 

"E..i la hre lo tak ang. Zorema hnek pa kha mawle..an thlavâng i lo hauhsak ve vang kha nge an buaipui ve tawp che" a ti sar sar a. 

"Zorinsanga kha damdawi inah a rawn kal ve em?" Ka inrin hmain ka ti a. 

"Aih, a haw nghal daih a niang. E tak! Sawi takah chuan Zorema kha Zorina hnek alawm lo ni..Atea te a chhanna lamah.." a ti hluai a. Min ringhlel lo chu ka lawm angreng. Ka mitthlaah Zorina hlir a awm leh tawh. He pa hi ka vei tlat! Kan inbe ngai pawh a ni si lo. Mahse, ti nge motorah khan min pawm luh ngawt le? Rpa te nen an lo len tawh vang kha a niang. Ka nu a rawn lut a, "Naupang ward lamah sawn zual deuh an awm a niang, an buai hmel khawp mai" a ti a. Desy en lehin, "Laldesy ṭhin hi chu aw..engmah a ei ve theih loh kha, tikhan awhthîk suh" a ti hlak hlak a. Desy lah chuan ngaipawimawh lo fê hian, "A ho em mai, a ngaina ve vak chuang lo" a ti mai mai. 

Ka rin aiin ka muhil thei. Harh zeuh châng erawh ka nei. Ka nu chu a chau ve deuh bawk nge, a mu tui ngang mai a, ka kaitho duh lo rêng bawk a. Desy zelin ka zun a chhuah pawn min buaipui. A tukah chuan Desy a haw a, Viteii'n chaw a rawn dah. Kei pawh buhhawp ka ei ve a. Ka ei tam lo nain ka puar pui ve tho mai. Ka nî fanu tleirâwltê Peki a rawn kal a. Ka nu pawh intifai turin a haw ve ta rih. Peki te hi unau pahnih an ni a. An ni chu an chhang a zing deuh, ani hi a naupang zawk a ni. A û chu kei aiin kum 2-in a nau. Kan inhlat lo bawk a, unau tak tak angin kan in en ti ila, Peki bik hi a zakzum reuh a. A buaithlakna chin a awm ṭhin. Ka zun chhuah pawn kuah chungin bathroomah ka kal thei tawh a, a zia viau e. Chawhnuah ka nu a rawn chho leh a, Peki pawh a haw ve nghal. Tuilumin ka nu chua min hru chhuak vek a, ka thawmhnaw ka thlak ta bawk. Ka zâng ve hawk mai. Taksa a nih chuap hian a hrehawm. Ṭhiante class bang an rawn peng haw bawk a. An ni zawng an ri leh ham ham tawh, a thawventhlak phian a. 

Zan tir deuh, ka nu chaw eikham kuhva zuk lei hlanin Rpa leh Zorina an rawn lut hlawl mai le! Ka hamhaih nasa mai a. Mahse, ka inthunun hram hram. An rawn sawi lawk bawk si lo va, a laihthlak ve deuh bawk a ni. 

"Vawiin lamte i ṭha zel maw?" Rpa chuan a ti luam a. Ṭha takin ka lo chhang ve mai bawk. Zorina a la ṭawng lo, min melh run run ringawt. 

" I Ei châk ka hre si lo va, heng hi ka rawn lei tawp" tiin nepnawi eng eng emaw a rawn phawrh a. 

"Engmah ei an la phal lo. Buhhawp ka la ei..i tilawmawm tho tho e" ka lo ti vat a. 

"Dam vat la, i dam veleh picnic ang u. Lalchhandami pawh ka hrilh tawh kha" a ti leh a. "Nia, a chakawm " ka ti ringawt. Zorina chu ṭawng ve se ka ti , sawi tur a hre lo nge a ṭawng mawh ve hrim hrim zawk le..êm êm a na. 

Ka nu a rawn lut a, Rpa te a hmuh chuan a phâwk ve deuh. Bena bak mipa min rawn kan an la awm lo ve bawk a. Bena chu a felin a bengvar ṭhin khawp mai..a hna avangin a rawn lang tam thei lo zawk a,.

"In va fel ve " ka nu chuan a ti a. Zorina bulah a ṭhu ve nghal. 

"Fel hma thei lo a nih hi, vawiinah kan zin kan lo haw chiah a. Hei a zia lo tak tak, a lo damlo ringawt a" Rpa chuan a ti mawlh mawlh a. Mi pangngai tak a ni bawk a, a ṭawngkam pawh a puitling thin e. Zorina chu a ding leh hluai a, "Zial ka va zu lawk..min lo au mai rawh, hawn dawnah" tiin Rpa a melh a. Ka lo hnual ve ringawt. Ka inzahpui e a. Keimah min rawn melh lehin, "Lo dam vat rawh" a ti sup a. A nui lo va, a mitmeng erawh a dam ve ruih mai. Insual tur a ni bik lo bawk a. 

A chhuah hnu reivakloah ka nu phone chu a ri a. "I pa a nih hi, tikhan lo inkawm r'u,." Tih leh chhuah a rual a. Rpa nen chauh kan awm ta. A lai deuhin ka hria. 

"Dam vat rawh" a'n ti ngawt a! Ka nui tawp. 

"Tak takin ka zinnaah pawh ka rilruah i awm char char mawle..nang chuan min ngaihtuah awm der si lo va" a ti nuah nuah a. 

"I â siah" ka ti ringawt. Ka sawi tawh ang khan hetiang hunah hian chhan dan mai tur ka hre ngai lo. 

"Nge..ka duh che tih i hria alawm..i rilru diktak sawi tawh la" a ti a. A hmel pawh a thutak ṭan hle. 

" a..Rp, ṭhian ni zawk ang. Tunah chuan bialpa lam pawh ka ngaihtuah lo" ka ti ta tawp a. Min nawrlui chiam ta se, ka thinrim maithei. Min force vak vak ṭhin mipa ka ngainat lohna chu sang tak a ni. 

"Hmm,.a mak hle mai maw..a ṭha lawm..nia, keite chu ka tling ve tawp nang. Mahse, ka lo nghak ang che" a ti hrâm a. Ka ngawi hmiah. Sawi tur hre hek lo i..ani pawn nuam a ti ta lo nge, "Gate an khar dawn tawh ang. Kan va haw ang e. Lo dam vat la aw" a ti a. 

"I fel lutuk. Ka lawm lutuk aw..a nih leh le.." tiin ka thlah ve hnâp kha. 

Ka nu pawh a rawn lang ve leh tawh a. "I pa lah hi mi hi a ngai thei sia maw..zan khat riahbosan pawh hi a hrehawm lek lek zel" a ti bawrh bawrh a. A ni tak ang, ka pa hian sawi ve luam lo mah se, ka nu hi a ngai a ni. Ka phone ka hmet malh malh a. Ka rilrua tu emaw châm reng hi tu emaw ka hrilh thawl loh chuan ka ipik tlat. 

"Des, Zorina hi ka veiin ka hria, ka ngaihtuah reng zel" ka va ti ta a. 

A seen rual rualin, "Wow!" A rawn ti nghal. Hmeli mai mai chu aw. 

"Tak tak alawm..zaninah pawh Rpa nen an lo kal a. Mahse, min be lo ang a ni. A mak ê, star ka duh lo asin. A sual si" ka va ti duah. Ani nen chuan sawi hreh kan nei ngai lo rêng a. 

"A pa êm alawm..tak taka a nih ka ring a, nizana min zawh danah te khan. Mahse, Rpa'n a bem ṭût che sia" a rawn ti a. Hei hi kei pawh ka buaina. 

"Chutin va ngaihzawn ka tum hran lo. Ka rawn sawi mai mai" ka ti lawi a!

"Amah pawh hian a lo vei ve reng che a ni maithei asin. Motora a pawm luh danah che khan" a rawn ti. Khatiang lo inngaihbel vel chu ka duh bik lo,a tlawmngaih vang kha a nia. Thil dang a awm ka ring lo. 

"Naktukah rawn peng rawh aw. Zanah riak bawk la" ka va ti ta daih. 

"Sure, ..chuan Zorina number chu neih ka lo tum ang" a rawn ti ve leh hrâm a. Lalfeltheinu hi aw. Mahse, ka be ngam chuangin ka ring lo. Chutin ka huaisen viau lo e. 

"Teber..biak i va hre lo ve, vur vur che chuan" ka nu aw ka hriat chuan ka phu zawk. Ka va melh vat a. Ka nuihtlawn ringawt. 

"Min bia mi?" Ka ti a. 

"Bia bia bia, I ṭhianpa Rpa em mawni kha, a fel hmel viau kha..eng nge a thawh?" A ti a. 

"Eng em em mah. Phone dawr hi pahnih an nei a, pakhat a nghak thin" ka ti mai a. 

."Pakhat zawk lah kha a ṭawng thei lo emaw tih mai tur a ni. Insual bak ngaihtuah a nei lo a niang " a ti hlak hlak a. Ka nuih a za hle. Ka la nui ṭha vak ngam si lo. A sawi dan kha a nih duh hmel êm a. 

"Bena hian a duh ve tak tak chein ka hria" a ti leh. Ka nuihza a reh nghal. 

"Mama thianpa a nih vangin nau angin min en alawm" ka ti tlat. 

"A ni lo, ka hrethiam ve alawm..kei chu makpa atan pawh ka iai lo riau asin. A fel si, a hna a zahawm bawk si" a ti duah a. 

"A upa tawh ê" ka ti ringawt. 

"Ekhai! Upa hi an ṭha hlei hlei alawm. I pa nen te hian kan inthlauhzia i hria ang a, min duatzia te hi..an rintlak bik" a ti leh siam siam a. 

"Aa..Bena chu ka duh lo" ka ti zawi sap. Titau lek lek awki hian, "In duhzawngte lah hi an mak thei siah. Khang insual ṭhin angte kha i lo duh mai mai ang e..pasal hi thlan fimkhur tur" a ti a. Mak ka ti deuh, hetiang lam hawi hian kan titi ngai mang lo. Bena leh Zorina khaikhin chuan mi zawng zawng ngaihah Bena a buk a rit zawk ngei ang. Mahse, Zorina hian min hîp tlat! Hei hi kei pawn ka duh bik miah loh thil a ni naa, ka titawp ngawt thei si lo .

"I ho em mai a. Mu tawh rawh" ka ti ringawt. Kei pawh ka insiamṭha sawt sawt a..ka maimichhing daih. 

Pathian zarah min ṭhuina pawh an phelh ta a. Damdawi ina ka awm chhung zawngin ka chhungte chu sawi loha lum ni ta se, ka ṭhiante leh Bena te an felin min rawn kan deuh reng a. Rpa erawh a rawn lang leh tawh lo. Pawi ka ti hran lo. Desy a ṭangkai filawr leh zak bawk. Zan thum lai min riahpui hman. Zorina number erawh a la nei thei lo. Dami a zawt hreh ve tlat a tin ni. Ka hrethiam. Damdawi in aṭanga ka chhuah ni tlaiah Mama'n ka ṭhiante chaw eia sawm turin min ti a. An rawn kim ṭhap. Kei pawh ka ei ve ṭeuh mai. Ka la ding mar thei lo deuh a, a bak na dang ka nei tawh lo. 

Chumi zan ka chhuah zana ka mu chu ka mutna ka sawn vang nge ka mut a chhuak hleithei miah lo. Tlai chhe tak erawh a la ni lo va. Ṭhianho groupah kan nawi leh vak. Mateii leh Dingi hian Mama hi an star ngawih ngawih a, an rawn rak leh hlut. Zoi erawh chuan, "U Bawiha hi kei chu chhe lo ka ti zawk" a ti ve ziah bawk. Bialpa nghet a neih avang hian a star ngam lo zawk mai mai a. Chutia nawi paha ka khik vur vur lai chuan msg pakhat hi number save loh atangin a rawn lut a. Ka open duh lâwk lo. Chat ka clear vek hnuah ka open ta chauh a. 

"I dam leh avangin ka lawmpui a che" tih thu ringawt hi..a DP-ah "Rule no.1, Nerver be no.2" tih inziak hi a hmang a. A hming zawnah erawh 'Zee' a hmang thung. Tu tak chu ni maw tiin, "Ka lawm e..tu nge aw?" Tiin ka reply a. 

Reivak loah, "Zorina.." tih thu a rawn thawn. Ka khur deuh. Mahse, rang fahranin, "Ka save aw." Ka va ti a. 

"Aw" a rawn ti teh tawp. Ka lo beisei reng niawm taka chutiang chhanna tehtlawng hmuh hnu pawha la biak zui chu ka tlawmlak zawng tak a nih ve avangin ka seen a, ka reply tawh lo. 

Ka mumangah Bena leh Lâna hlir ka la hmu zui..a va ho tak..ka harh ruala ka phone ka'n hmet êng chu dar 7 a pel tawh. Whatsappah ka lut nghal a. Midang zawng zawng aiin tu emaw hming chu a langsar bîk..a msg chu ka hawng nghal var a. 

"Nizanah ka ngaihtuah che.." tih thu zawng hi..a tawi hle naa..ka nui..