Zor 3

ZOR..(3)

Ziaktu : Toni Râlte

Ka hriat loh kârin ka lo muhil ve ta a niang. Ka harh chuan a lo eng uar tawh. Inrinni a ni bawk a, ka mu lui ve deuh bawk. Ka phone ka'n en chuan nizana Dami ka va zawhna chhanna ka hmu ta nghal a. Mu chungin ka chhiar nghal..

"Chutin ka hrechiang over lo, A pa leh a û hmeichhiate nen an khawsa a, a nu hi a boral tawh a niawm e. A pa hi a zu in nasat lutuk vangin voluntary pensionin a chawl a. A û hi chu ka hrechiang lo, a chhuak ngai lo, a hrisel lo an tia, Amah Zorina hi workshopah a thawk a, chuan, street fighter a ni bawk. Nizanah pawh khan Nuai khat hlawhin a insual a, a chak nghe nghe. Kan veng hlun an ni lo va, an lo awm ṭan hun ka hre tawh bik lo. Ngati nge min rawn zawh? I star chiang" tih thu a ni. Ka khi sak a, "Star awkawng lo, nizanah an insualna ka en a. Mak ka ti mai mai mawle" tiin ka reply vat a. Ka tho ta a.

Tukṭhuan ei laiin ka nuin, "Kan khaw hlui ami Pu Thanmawia an rawn kalpui a, hetah chhungkhat hnai an nei meuh si lo, ka nîin lo buaipui ve deuh teh a rawn ti teh ngawt a. Han lan ve tur a ni" a ti mawlh mawlh a. Ka la sawi lo tak a, ka nu leh pate hi Aizawl mihlun an ni lo ve ve tih hi. Ka pa hi chhim lama khaw lian pangngai tak Haulawng khua a ni a. Ka patea te pawh saw lamah an inbengbel ta rêng a. Ka pa erawh kei ka pian aṭanga reivak loah Aizawlah hian an inbengbel ve a, ka nîteii hi an awmpui bawk, ka nî chuan kan in aṭangin pasal a nei nghe nghe. Ka nu erawh Khawhâi khawchhuak an ni thung. Ka pa nen an intawn dan a sawi fiamthu ṭhin dan chuan ka nu nu nuṭa, a pute hi Lungleiah hna avangin an awm a. Ka nute khawsak a harsat deuh vangin a pute inah chuan a zuk awm a niawm e. Puanṭhuite a zuk zir a, an awmna vengah chuan ka pa hi a thawk ve bawk nen, tikhan an inhmelduh chho ta niawm tak a ni. 

Ka u chuan, "Tka pawh chawhnu lamah ka va kan leh ang" a lo ti ve a. A hnathawkte hi a ngaihtuah thei a nia. Ka nu bawkin, "Mama chu aw..chanchin engmah a rawn sawi bawk si lo,. Ngati nge maw hetia a awm thut ni?" Ka pa melh zauh chungin a ti a. 

" a..ani hi zawng hriatthiam a ngai a nih hi. A rawn haw ve mai ang. A buai ve deuh pawh a ni maithei asin" a lo ti charh charh a. 

Keimahah inthiam lohna a awm. Mama bulah khan Mapuii hming kha sawi ri lo ila tiang hian a awm âwm si lo, Mahse, Mapuii avanga hetiang khawpa mipa inla pa ve tawk tak a han danglam em êm hi chu a chhan hriat ka châk tazet. Amah Mapuii kha hmuh leh ka châk viau. Va zawn ngawt chi lah a ni der si lo. Chaw ei khamah kan insengfel a, ka awm ve ni hi chuan in chhung chet ka khawih vek ṭhin. Insuk hi ka nin avangin Viteii a insu ṭhin thung. Chawhma chhungin in chhung chu ka khawih zo a, bal lem hek lo le. Ka nu pawh an khaw pa damdawi ina awm chu a han hmu a ni ngei ang, a lo la haw lo. Ka pa erawh huanah a kal thung. Scooty hi a nei ve a, khalh thiam a inti nasa..

Desy te in luahtu U Vani'n zo chhang a rawn zuar a, ani hi Desy nen kan inkawmngeih azarah min nêl ve êm êm a, kei lahin ka lo ngaina ve bawk si. "Ṭhu ve rih rawh..kha pahnih chiah i nei tawh tho, thingpui in ve law law rawh" ka lo tih vang chuan a ṭhu ve mai a. An ni hian fa pakhat fel ve tawh tak an nei a, an pa hi nitin inhlawhin a chhuak bawk a, an khawsak a pangngai ve reuh phian. 

Thingpui chu ka lum vat a, chhang chu U Vani ka ahtir thung. Ka ât thiam vak lo, a pherh duai zel. Dawhkin kila kan in dun lai chuan a phone a rawn ri a, ner nak hian, "He nu leh bawk chu" a ti sap a. Ka lo ngaihven êm êm lem lo. 

"Hello" a ti a, vin deuh hian, "I ninawm mang e aw. I zak hlawl lo mi? Chutiangtea min rawn biak ngam le.." a ti hlaih hlaih a. Tlem chuan mak ka ti ta deuh. 

A off ta hmak a. A hmel pawh a inthlak danglam nghal. Min rawn enin, "Tunlai hmeichhe ṭhenkhat han zahtheih lohzia hi aw. Enteh, kan pa a ngaizawng a, kan pa lah tenawm ve bawk, an lo chesual nge ni..nau ka pai e a tia..pawisa min rawn dil ṭhin nia" a ti zui nang nang a. 

"Awiii! A va zâm lo tak ve. In pa in a hria em? " Ka lo ti vat. 

"Hre tehlul e, a ṭang ve tlat a. 'Chetsual chu kan chesual ngei, invenna ka hmang. Vawikhat chiah kan mudun bawk, ka fa a ni thei lo" a ti ve fun a. Hauh pawh kan inhauh nasat phah..tunlai chu rilru a chawl hman thlawt lo" a ti bawrh bawrh a. An pa U Nuna hi pa hmel fai ving veng, fiamthu duh ve tak a ni a. Nupuite phatsan hmel a pu lo asin le aw. Tunlai mipa ho tak hi chu a..

"U Nuna pawh a thiam lo ve tho a nih chu, amah ngeiin sawipui se la..khatianga a rawn tihbuai reng dawn che chuan a ninawm dawn êm mai" ka lo ti ve a. 

"A thiam lo zawk chu kan pa mawle..ka pawm alawm. Ka thin pawh a rim reng a. Kha i hria ang a, thla khat liam taa râwng hnawiha an va inhlawhnaa an fanu, nuthlawi fa pakhat nei kha a nia tuna min rawn vau ṭhintu hi..an zahpuiawm dun asin. "Ka chhuak mai ang, nei mai rawh" ka tih lahin ngaihdam min dil char char a, a thinrim ve duh bawk si lo. Fate pa a nih bakah pasalte na nâ na chu kan lo hmangaih laklawh ve tawh bawk nen..a hrehawm a nia" a ti tan tân a. 

"Ka sawi ang chuan ti ngei ngei rawh. In pa nen i hriat lai ngeiin inbia se..a ṭul chuan chu hmeichhe chhungte pawh chu va lenchilh hmiah rawh u. Inṭhen tih pawh in fanu a khawngaihthlak, bakah u Nuna pawn a sim ve tawh maithei a..hmeichhia hi chu kan vanduai thei eee" ka ti ve mawlh mawlh a. 

Thawkkhat lai khan pathlawi nia insawi, hmelchhe lo tak, hna pawh ṭha tak nei hian min rawn be nasa mai a. Whatsapp group pakhat aṭanga inhria kan nia. Kei pawn ṭhian angin ka lo be ve mai. A fapa thlalak te min rawn thawn ṭhin a, reitak kan inbiak hnuah min duh thu a sawi ta a. Ka duh lo pawh a ni hran lo. Mahse, pathlawi a nih avang khan tîmna ka nei deuh a. Mahse, ka be chhe chuang lem lo. Ni khat chu hmeichhe pakhat hian min rawn be hlawl mai a, "Ka pasal hi lo be tawh suh, tihmualpho i duh loh chuan" tih velin. Mak hi ka ti khawp mai a. A pasal hming a sawi chuan min bemtu pathlawi emaw ka tih kha a lo ni reng mai. Ka zak khawp mai a, mahse, ka thiam loh a ni hran lo bawk a, tlawm dûi ang chuan ka awm duh lo. Engkim ka hrilhfiah ta vek a, kha nu reng reng pawh kha a nasa ve hle ka ti, chutia thil nihdan ka sawi tawh hnu pawh chuan, "Beiseiawmin i awm a ni mai, beiseiawm lo chu mipain an hêl reng peih lo" a rawn ti hrâm. Ka ngei ve deuh chuan, "In pa khan maw min bem ngar ngar a, pathlawi anga a insawi avang khan ka duh leh hope te chu ka pe ang chu, ka thu thu aw..i pasalin bialnu dang a neihsan zing che a niang. Ṭhen ngam si loin a bialnu te i tâwng vak vak ṭhin a nih ka ring, cheap êm mai" ka va ti ve ta hrep a. A reh ta daih. 

He thil hi Zorama nupa tam zawk buaina a ni ta reng mai. Mipa lerh tawh na lailêng lah hian bum tur apui an hre em êm a. Kha pathlawi pawh kha vawi hnih a rawn leng hman a, an veng lama ka hmelhriatte ka zawh lah khan, "Aw..an intitlan ve deuh reng zel a. An inṭhen tak tak a nih dawn chu" an ti mai si a! Kei atan khan mi pa a ni tih kha hriat a lo har ve bawk a ni. Ka lut thuk lo hlauh a, ka lawm tak tak. 

U Vani haw hnuah Viteii nen rawng kan bawl a. "Teber, vawksa nge bawngsa hi ka siam dawn le?" A tih chuan, "Vawksa le..mizo hrawkah a tui ber" ka lo ti vat. A hne hi a na lo ber ka ti ve tlat. 

Ka nu a rawn haw a. Chanchin ka lo zawt ve var, " aa..rei a daih ka ring lo, a cancer tih an hrechhuak har bawk si, tikhian a râwp ral mai ang" a ti a. Cancer hi chu a va huatthlala tak êm aw. 

"Nu, Khawhâi khua ami Rca, Story chhiar ṭhin hi in khawchhuak a ni sia, chaw eiah sawm ve ila" ka ti daih chu a nuih a zâ nge ni, "Tehdaih zel che hian. Tak taka kan la sawm dawn nia, kan khua kan awm lohna a rei tawh si a, a nu leh pa, pi leh pute aṭang lo chuan tu nge a ni tih pawh ka hre tawh lo vang" a ti duah a. Nia, Rca story chhiar hi ka ngaithla ve zeuh zeuh, PC Hras pawh hi ngaihthlak ka duh viau laiin ka dâwih êm vang hian engmah a tluantlingin ka la ngaithla lo. Pasalṭha lam hrût ṭhin Tlanhlua aw hi ngaihthlak nuam ka ti bawk,. ka û hi chu Chcha Vartê fan ruhkawl a nia, a play reng zel. Ka pa erawh Tuesday Nightmare chan a ni thung, ina a awm ve tawh chuan Tuesday Nightmare leh Pu Vanneihthanga hi a ngaithla ngei ngei. 

Viteii chuan, "Teber, Youtube channel hi siam ve la" a ti zauh a.

"Iii, eng nge ka tih ve ang" ka lo ti vat. 

"Mukbang ve la, chawhmeh in ngah ṭhin tho hi" a tih chuan, ka nuin, "A ṭul lo. A thau palh ang. " A lo ti vat. Ka nu leh Mama te hian piannalh an ngaisang ber a nih hi a, Ka pa leh ka û hi chuan min enliam vel mai mai asin mawle. 

Ka inbual zawhah ka pain, "Tei, nang tirh hnial lohah Pu Zaia te hnenah he lehkha hi han dah lawk mai teh. " Tiin Envelope min pe a. Pu Zaia te chu veng chhakah an awm. A han chhak ve deuh avangin scooty ka keng hram. An in thlen hma deuh hian chho ulh zet hi a awm a. Fimkhur ru deuhin ka tlan chho a, peng ka thlen chhoh lai takin Bike a rawn tlan ve thut si,Chhak lam aṭangin pickup a rawn tlan thla bawk nen, ka che hrut a, ka kawi zuk zuk ,ka balance a buai ta pek a!, zâwl thlen tawh hnu siah chuan hreh zetin ka tlu ta a. Pickup chu a tlan tlang a, han ding turin kawng chhuk a ni si a, a âwm ve tho. Bike erawh a ding a, hmanhmawh zetin ka scooty rawn tung ṭhain min rawn kai tho a. "I ṭha em?" A ti sup. Zorinsanga lek a lo ni! Mak ka ti viau. Ani erawh chuan min hre âwm hmel a pu lo. Vawikhat bak kha min hmu lo bawk a, hriat chat te chu ka har ve bawk ang. 

"Ka ṭhain ka hria" ka ti bah nak a. Ka inbeng fai thuak thuak,.kawngpui char laia tlu ni mah ila, nâ ka neih ka hre lo. Ka tlu ruai ruai kha a ni bawk. Min rawn melh thum ruih chungin, "Aw le". A ti nghut a. A bikeah chuangin a tlan zui nghal daih. Ka va hrilhhai letling tak. Scooty khalh hi ka pa hian a phal lo a tir kha chuan. Ka tet vang hian min ring zo lo ve bawk a, mahse, ka rilruin a ngam hrim a, ni khat bak ka zir lo. Chutichung chuan ka inkhalhchhuah hi chuan an thla a lo muang lo ve ziah. Vawi hnih chiah ka la tlu..mahse, tun hnuah kan ṭhiannu Labawihi accident dan rapthlak tak avangin eng emaw changa han hlauh leh khalh hreh chang ka nei fô..nia, Labawihi kha lung ṭhilh hmuna a tlan kha a bula truck lian lo tlan hnuaiah a va inkhawh lut kha a nia. A pum a keh vek..rapthlak tak a ni. Khata ṭang khan ka fimkhur ve leh zual. 

Pu Zaia te ina lehkha ka dah zawh chuan haw nghal mai ta loin a la hma tho tiin U Jenny dawrah ka tlang a. Ka sunscreen a zo dawn a, nghei ka hlau viau. Ṭawng duh tih takah a lo ṭawng leh siam siam a, nula senior, inchei thiam zet a ni. Ka u chungchang min zawt leh nual hman, U Bawiha hi a star tih kan hai lem lo a, ani pawn a zep buai hran lo. Mahse, ka u hi a duhtui ve nge amah aia upa chu a iai ve khanglang zawk, a hâwi lem lo. Sunscreen chu ka la a, sumdawng thiam tih takah a mascara thleng thar a fak tlawr leh duah a, thil lei awlsam ka ni bawk si, ka la leh ta nge nge e. Thil zawrh hi ka nuam lutuk a, ka nu min hauh fôna a ni. Ka hawn thlak leh meuh chuan a lo tlai duai tawh. Kan in thlen dawn ṭêpah Zorinsanga bawk chu ka tawk leh a! Kawng lam mawlh a melh a, min hmu ve lo. A bullet nen chuan a inhmeh phian. Mahse, insual a hrat êm mai..a den tlat! 

Mama pawh a lo haw ve ta. A hmaa a hmel ngui leh mûk tak kha hmuh tur a awm tawh lo, a zangkhai vah a. A ṭawngkam chhuak pawh a pangngai e. Ka hlim sawt. Zanriah kan ei ho leh thei ta. Ei khamah ka nu leh pate inkhawm turin an chhuak a, min phût ve viau ṭhin mah se; Sunday zing leh zan bak hi chu ka peih ngai meuh lo. Ka thatchhe ve fahran ngawt mai. Ṭhutthleng seiah phone hmet pahin ka mu der der a, Viteii erawh a roomah a awm thung. Mama rawn chhuk chuan, "Mapuii khan thildang sawi a nei em?" A ti tâwng a. Ka lo bo hman deuh, mahse, harhchhuak leh vatin a thil sawi zawng zawngte chu ka hrilh ta a. A sawi tlem êm mai pawh a. A khi suk a, "Ka bialnu hlui a nih kha..a chhe lo tiraw?" A ti a.

"Umm, a hmelṭha ka ti. Ti nge in inṭhen" ka tih chuan, ngui lek lek hian, "Tu emaw vang mawle.." a ti ringawt. A hmel landan avangin zawh zui zel chi-ah ka ngai lem lo. Mama a chhuah aṭanga 10 mins velah Bena a rawn lut hlawl mai! Ka lo chiauâu vat a, Mama awm loh thu ka sawi chuan, "Sangbera ka rawn lenchhan hleinem. Nangmah ka rawn rîm dawn che" a ti thur thur a. Inleng neiha kawm vel hi ka ninzawng tak. Ṭhiante chu thuhran, nula leh tlangval inrim ang hi chu uar pawh an uar tawh lo. 

"Ti nge min rim?" Ka ti hû a. Mawl der ka duh tlat! Min ngaizawng tak tak ang tih ka hlau a ni. 

A khi sak a, "I duhawm tlat a" a ti hap a. Ka lo ner deuh, "Hey, min ngaizawng vel a nge aw..i â si" ka ti hluai a. A nui hawk hawk ringawt. 

"Ti nge ka ngaihzawn loh ang che..i hmelṭha a, i duhawm a.." a ti duah a. 

"A ngai lo, ka peih lo" ka ti teh tawp. Kan kum a inthlau bawk a, naupanchhiatna a la bo lo bawk nen, chutia frank deuha chhawnchhaih chu a ṭha ber dawnin ka hria. 

"I â siah" a ti ve hluk rinngawt. Thingpui ka va lum a, thingpui hi in tir vat zel ila an leng rei lo deuh tih an sawi ka hre ve tlat. Thingpui a in pah chuan tu emaw a bia a, kei pawn ka phone ka lo khawih daih. Dami bawkin, "Mate, naktuk kha aw..in rawn kal ve ngei ngei a ngai a nia" a rawn ti a. Nia, va ṭâwiawm chu a ṭha viau mai. Ṭhian dangte an kal dawn leh dawn loh a ni mai. Bena chu ka rin aiin a leng rei daih, mahse, a titi ngaihthlak a nuam tal a, a zia. A tenawm rawng a kai lo ka ti mai. "U Ben, enteh, ka nâk bul ka tai chhak si hi a na vak zel a, eng nge awmzia ni ang le" ka ti a. Ani hi medicine specialist a ni. 

"I rilrphir te hi a ni lo maw? A na zing em?" Ngaihtuah hmel deuh hian a ti a. 

"Na zing ve tho, mahse, a rei lo va. Nachhawkna ka ei mai zel" ka tih chuan, "Nachhawkna ei ringawt tawh suh, rawn inentir rawh. I rilphir a nih chuan a hlauhawm a nia" a ti a. A thutak ngang mai. Ka nute ka la hrilh miah lo, inentir hi ka nin theih êm vangin ka sawi duh lo a ni. Incheck up an ti leh ngei dawn si a. A tawpa tawpah Bena chu a haw ve hram. Zanin aṭangin keimaha mut ka tum ve tawh dawn a, vei run ka duh lo. A hrehawm. Light ka off ngam lo. 

Mutchhuah nan story ka'n chhiar teh ang ti rilruin Facebook group Thu ngaihnawm Huangah chuan luh ka tum a. Mahse, ka feed-ah chuan Troll group pakhata video an rawn dah chuan ka mit a la ta tlat! Nizan maia Zorinsanga te insual lai video kha a ni. Captionah, "Insual hmanga eizawng.." tih an dah a. Comment a tam ngang mai. Ka en kual a, "Zorina a nih hi..ka duh teh mai a nia. A pa ber mai" tih te, "Hnathawk se a hlawk awm sia, a peih mai mai e" tih angreng, "A pa zu inna tur a tuaksak a ni maw" tia diriam lam rawngkai hmuh tur a awm nual bawk. Mipa lamin an thîk nge an ei lo nge pangngai taka comment an tam lo, hmeichhia erawh a tam zawkin pa an tih thu an sawi. Ka rilru erawh ka sawi ve thiam lo. Hriatchian châkna ka nei, ka star vang niin ka hre lo thung. A mize ngêng leh ṭawng tlem lutuk te kha..a boring ngawt ang. Thawnthu ka chhiar pawh chuan ka rilruah a lut tak tak thei lo. A pawnlâng. Mahse, ka mut a rawn chhuak chiai chiai a, tui takin ka muhil ve thei ta hrâm e. 

Inkhawm turin Viteii nen kan kal a, midang chuan min kalsan tawh. Desy'n kawtah min lo nghak hram. Banah an inah kan peng zuai a, "Ka lo sawm phei ang che. Dami chu va ṭawiawm ve ila" a ti. Ka hreh lem lo, tihtur a awm lo bawk a. A lum deuh avangin ka in tleuh zuai a, inchei vak pawh ka tum hran lo. Ka nute bulah ka chin ka hrilh a, an sawi nawi hran lo. Desy a rawn inpeih hma leh viau. Kan chhuak ta nghal a. Dami te in kan va thlen chuan ani pawh thingpui lumnaah a lo ṭhu daih a, Kohhran programme a nih vangte pawh a niang. An veng ami ni ngei tur nula pahnih ka rualpui tur vel an awm ve bawk a, mipa pahnih an lo ṭhu ve bawk. Ṭhian dangte khan chhuanlam an rawn siam deuh sia, Desy nen chauh kan nih mai hmel. Kan ṭhu fel chiah tihin, "Chaw ei ve nghal r'u aw..ka lo ring vek tawh che u" a ti nghal ngawt a. 

"I ti ang lo êm mai a. Ei lo vang" Desy chuan a ti vat. 

"Nge a..ka u thianten an rawn râl dawn a, chaw ei siamsak kan duh ve sia, min puih ve a ngai alawm" Dami'n a lo ti ve vat bawk. Desy nen chuan a puih ang zawng a nih si chuan han hnial ṭûn kha kan hreh ta deuh nge, kan chhungte ve ve kan hrilh ta a. Laldami reng reng pawh sawi sa ve tur hi a nia a. An zai tui phian a, lam te pawh an awmin ka hria. Thingpui kan va sem a, a bak chu eirawngbawlna lamah rilru kan pe zui nghal. Dami te makpa a fel thar thar khawp mai. U Zosanga ṭhiante an tam lutuk lo bawk a, a hautak vak lo. Tomato ka chan laiin U Zosanga ṭhiante chu an rawn thleng ta a. Kan eirawng bawlna hi Dami te in sîr, Dawr atana an hman ṭhin, mahse, an luah tak loh a ni a. Hnawmhnawk leh engilo dah nan an hmang. A rem vei phian a. 

Zorinsanga pawh a rawn tel ve, an vaiin panga an ni. A hmaa mipa lo awmsa leh nulate kha an haw tawh thung. An ni kha chu thingpui lum tura rawn kal an niawm e. Bench an rawn hûng lut a, an ṭhu ṭhap, ina va luh chi a ni rih lo , an zai tui bakah an hlimrui ka ti mai. An ṭawngṭai rual mêk a, an Halelui nasa. Dami chuan, "Zorin, hman zan kha i va che fuh leh ve, khawih pawh a khawih hman eih lo che a nih kha" a ti siam siam a. Dami hi a ṭawng hian nawm hmel ka lo tithei tawp, ka sawi thiam lo. 

Zorina chu a khi suk duh chauh, "Nia, ka vannei" chu a tih ve leh hnuhnawh kha a. A bula ṭhu cher sâng lam hian, "Kan Zorina ter pha hi an tam vak lo vang, hman zan kha chu bet a sang sia, ka lo ṭanzia mai chu" tih pahin Zorina chu a melh zuk zuk a. 

Dami bula ṭhu chuan sikret ṭankaiin, "Kei tak..Amah Thansanga lah kha a sa a ṭha ve tho sia..Zorin, i hlau ve deuh tho em?" Naupangchhia angreng tak hian a ti a. Zorina chuan, "Hlau ve e.." a lo ti leh tawp. Ṭawngkam a thiam lo nge han thluaithlum vel a thiam lo hrim hrim ka hre lo. A teh tawp zel hian. Tomata ka chan zo chu a dang nena mix turin ka tho a, Sikret zu bawk khan, "Lalchhandam,i hâwih lo êm mai, i ṭhiante hmingte hi sawi ve ta che" a ti hluk a. Dami chu a nui ar ar, "Ni dawn tak, ka lo theihnghilh daih alawm..hei Desy, chuan ani saw Teberi.." a ti zung zung a. 

Zorina awin, "A hming a pu zo hle mai" a tih sup ri chu ka hre pha. He ṭawngkam kher hi chu ka dawng zing tawh a, eng ah teh vak ka ngai lo. Ka khi sak ringawt. Dami bawk chuan, "Te, Desy, hei hi Zorina, chuan Rpa, Johna, Buanga, Arema…" tiin a kawk dan dan a. Ka bu nghat ringawt. Tihtur em êm a awm rih lo, chawhmeh a hmin vek tawh a, duh chuan siam mai theih a ni. Mahse, zaikhawm ho an la tawp thei si lo. 

Zorina bula ṭhu Arema chuan, "Ṭhianpa Zorina zârah Zoa pawh kan râl ve thei dawn a, a lawmawm. Zorin, thu chu sawi ve rawh aw" a ti mawlh mawlh a. Zorina lah chuan, "Aih, Johna'n sawi rawh se" a lo ti hmuk. Thusawiin ding se eng thu tak sawi ve ang maw tih ka ngaihtuah chuan ka nuih a za. A thiam lo ve teh ang chu. 

Desy leh Buanga chu an inkawm thei phian a, an ṭawng bawrh bawrh mai. Dami chuan, "U Hruaii hi in hmu tawh em? Ka u boral hnu hian" a ti thut! Hruaii chu U Zosanga bialnu, mi dang fa a pai vanga inawkhlum anga an ngaihna kha a ni. 

Rpa chuan, "Nimin an veng lama motor ka va checktir kha chuan an dawrah a lo awm a. Biak pawh ka be lo. Ka be châk hlawl lo" a ti hmarh hmarh a. 

Desy chuan, "Awii, kei pawh Teberi hi tu emaw vangin intihlum ve ta se, biak chu sawi loh ka tina ve duh ngei ngei ang" a lo ti bawrh bawrh a. Ka nui ringawt. 

Buanga'n, "Nia, nunna hi a hlu sia, a pawi ngawt mai" thutak fêin a lo ti ve bawk. Zaikhawm ho an rawn bang ve ṭan a, Dami nu a rawn lang a. "Mate, chaw ei in peih tawh chuan ei mai a pawi lo" a rawn ti a. Kan che nghal sang sang. Chaw ei kham lamah an râl dawn bawk nen, muanchan lutuk chi pawh a ni vak lo. Dami te makpa Chhana chu eisiam a thiam phian mai. Kei tak pawn ka ei tui, vawksa, arsa leh uisa an siam a. Bai leh dailuah hâng a awm bawk. Kan ei lai mêkin Dami cousin, ka hmuh fô tawh kei aia nau hlek tur hi a rawn kal ve a. Ka uisa ei a hmuh chuan, "Uisa te hmeichhiain han ei.." a ti kher! 

"A tui alawm le" ka lo ti mai a. 

"Uisa ei hi chu an pangngai vak loah ka ngai kei chu" a ti leh kher a..ka ngei ve deuh chuan, "Uisa ei lo pangngai lo an tam ê..i tehfung tehdaih chu" ka ti ve ngat. Dami a awm lo va, tumah ka vengthâwng duh hran lo. Ner nâwng chungin kan piah deuha Zorina te chaw kil chu va panin, "In bulah ka ei ve dawn. U Zorin, tawlh teh" a ti ham ham a. Ka ngaihven zui duh ta lem lo. Mahse, a hnu lawkah "Awii, a thau ka ei palh..awiii" a ti ngher ngher a. Ka va chum châk nghawr nghawr tak. Inla no ve bawk sia maw..a ding leh hluai a, "Tui tel lo chuan ka ei thei lo kei chu, khatiang dâk hâng tih vel chu a patling si" a ti leh a. 

Desy in zawitê hian, "Sik ila a pilh duai ang a" a tih chuan ka nui hak. Zêp nâk emaw hmeichhe dang pawh hi an nih ka ring ve tho. Kei zawng hmeichhia ni tawh na nâ na, inla no, inla ṭawng no kual, mipa awm laia awmdan thlak vek, meng zek zek rengho hi ka chekin a mil hlawl lo. 🤭🤣 (A tak takah pawh ka ni ) No ve hrim hrim, ṭawng nêm ve hrim hrim hi chu an awm. Mizo thil hming, tlema hlui ve tawh lam hre lo der tlat, changkanna emaw ti tlat ho te, an chawhmeh ei reng uih lam mipa awm laia ei ngai lo anga han insawi deuh tlatte ho hi ka kawm peih chi an ni lo hul hual. Tikhan an duh angtê khan kan hmuh phak lovah lo va awm no hlêi hlûi se ka duhtawk. 

A rawn let leh a. Keini erawh kan kham chiah. Ka puar nuam tawk viau e. Kan ding chu Johna chuan, "In lo haw daih ang e aw. La awm ve r'u " a rawn ti a. Desy chuan, "Nia, awm ang" a lo ti vat. Chaw nawi ho chu then law law ka duh avangin ka thlengah ka huikhawm a, Dami cousin chuan, "Au Zoa ṭhiante in nih chuan ka van hre ngai lo che u.." a rawn ti a. Desy'n chhan a tum lai takin a bula ṭhu Zorina chuan, "Dami ṭhiante an nih hi" a lo ti a. 

Nui chung hian, "Ê..teh daih a! Sa free hi chu a hîp a na ve bawk a ni" a ti leh kher a! Ka ngaithei ta tlat lo. Desy pawh a hmel a rum nghal ûl mai. Ka va pen hnai a, "I ṭawng tam reuh kher mai a. I inla no ve ropui si, kha i meng nge i chhing..Inlak no ngai lo va no tum ta che" ka ti ta sak sak a. In chhungah naupangber niin, kei pawh ka pangchang ve fô, pawnlamah ka tilang ve chiam ngai lo. 

Min rawn melh rum ngang mai, engahmah ka ngai der si lo. "Uisa ei ngam chin kha i nia, i nasa pawh a mak lo ve" a ti leh khanglang. 

"Uisa ei lo zawk kha i hur hmel hem huam mang e" ka ti leh hmak a. Zorina dâiluah hâwp chuan a rawn phuh ṭhawt..a nui zui nghal huk. Midang pawh an khi ṭhâw hlawm mai. Chu nu lah chuan Zorina melhin, "Eng nge nuihzatthlak awm a?" A ti hlar a. 

Muangchanga tui a lem tê tê hnuah, "A sawi dik êm a" a ti ta sup a. Chu hmeichhia chu a ding nghal vat, thinrim êm êm hian, "Hmela leh! A eng kha nge a sawi dik a?" A ti ta chiam a. A aw a ring ve angreng sia, a zia dawn lo tlat. Kalsawn tuma kan inher lai takin Dami a rawn lang ta a. Thil awmzia a rawn zawt vat. Buanga'n a lo hrilh a, A cousin chu a lo ṭawng ve sek lehnghal. 

Dami chuan, "Muanawm, in chhungah thleng va seng rawh. Buaina siam ve ziah mai" a ti ta fak a. A cousin chu phun zui nang nangin a kal nghal. Muanawmi a nih chu a hming chu. Ka insûm theih loh rah a têl ve hlak a nih kha, ka inchhir eih lo. Thleng kan sil nghal daih a, a tam lem lo bawk a, kan zo thuai. Kei hi zûk leh hmuam ka ti lo naa, chaw ei khama kuhva rah han seh châng ka nei thin. Vanneihthlak deuhin Buanga a rawn kal a, kuhva chu min ṭheh ta a. A la hma deuh tho bawk nen, kan ṭhu khawmuang rih a. 

"Nichin ami kha chu hrethiam rawh u, a dangdai ve a. A mizia ve rêng a nih kha..mil pawh a nei lo" a ti suam suam a. Ka û ai chuan a nau hlek ka ring,. 

"A ho lutuk, khatiang mi kha an awm ve alawm" ka ti mai a. 

"Kan Zorina lah hi thukhuh thiam hek lo, tikhan a rilru diktak a sawi leh ngawt kha..Muanawmi hian a ngaizawng ṭhin a. " A ti leh a, Ka rindan chiah. Khatiang khan ka ngaihzawn rukin min ti ve se, awiii…ka zak lutuk hi ka ṭah tawp ka ring. Hur hmel tih kha ka sawi tum êm êm pawh a ni lo, keia ṭawngkam thiam bîk lo duhthawh si khan ka sawi tel ta ngawt a nih kha..

"Zorina khan a hranin insual a zir em?" Desy chuan a lo ti hû a. A zawhna ber kher chuan ka nuih a tiza deuh. 

"Zir hran lo ve. A tleirâwl chhuah aṭanga insual hrat a nia..heta an rawn awm hnuah a chhawm ta zel a niang. " A ti ve ta ngawt a. Tunlaiah insual ṭung ṭung te chu thil mawi pawh va ni suh. Dami a rawn kal a, "In chhungah lut tawh ila..an thawl tawh riau" a rawn tih chuan, kan tho nghal vat. Kan va luh chuan Dami te chhungkhat leh ṭhenawm hnai deuh chauh an lo awm tawh a. Zorina te pawh an lo ṭhu ṭhap tawh. Buanga pawh an bulah a va inzep ve nghal a. Rei mâwi tawk kan ṭhut hnuah Johna chuan, "Chutia puithu deuh taka râl pawh kan tum hran lo a nia. Mahse, thu tlêm kan sawi ve ang a" a ti lâng lâng a. Dami pa chuan, "E! In duh tawkin sawi rawh u, In duh chen chen hun hmang rawh u" a lo ti var a. 

Johna chu a ding ta a. Ani hi an ṭhian zingah rau rau ṭawngkam thiam deuh a nih ka rin bakah a upa ber maithei a ni. A aw a then kharh kharh hnuah hetiang hian a sawi ta a. 

"Aw le, hei zaninah kan ṭhian duhtak, Zosangliana râlna hun kan hmang dawn a. Hetianga râl ngaia kan ṭhianpa a han awm ta hi mak kan tiin awih harsa pawh kan ti takzet a ni. Zosanga kha a thih tawh hnua ka fakna lam ni loin, ṭhian zingah pawh min huikhawmtu ber, eng emaw tih dawna kan râwn ber a ni ṭhin a. Ngaihdan fing tak nei tlat ṭhin a ni. Ama nunna ngei la duh khawpa harsatna a tâwk tih keini a ṭhianten kan lo hre lo hi nêp kan inti takzet. Lo hria ni ila kawng dangte pawh a awm tur. Ni e, hei zaninah tihian kan lo kal khawm a, zanina kan rawn râlna hi ka'n sawi ve hrim hrim ang a, keini ṭhianho thawhkhawm bakah Hei kan ṭhianpa Zorina'n nat huamin a thawkchhuak a, a zârah kan rawn râl thei ti ila kan sawi sual âwm lo ve. Ṭhiante hi an hlû a, thisena inzawmna ai mahin ṭhenkhatah chuan ṭhian hi kan inzawmna a thûk zawk fô. Amah hriatreng nana kan thil lei ve hi Nu Zuali khan min lo dawnsak se la, pawisa fai erawh Ka pa khan lo dawng se.." tiin. 

Parcela tuam hi a lek chhuak a, Dami nu chuan a va dawng ta a. Envelope a la chhuak leh a, "Hei hi chu Zorina'n hlan ve reng reng teh se" tih pahin Zorina a pe a, ani pawh chuan thutak zetin Dami pa a hlan ve ta a. Boruak a reh duk mai. An hmelah ti mai mai an nih lohzia a lang chiang viau. U Zosanga a ngaihawm thar sawt bawk. Chutia râlna te an han neih zawh takah chuan Dami cousin ten thingpui an rawn sem a, ka in lo thung. Thingpui hi chhunah bak ka in peih meuh lo. Muanawmi bawk kha a rawn lut leh nghawng nghawng a, Dami nu bula ṭhu a nu niawm tak bulah chuan ṭhuin, a hrilhru nghal sur sur. Zorina ka va melh zawk a, ani lah chu min lo melh ve kûr! Ka mit ka va la sawn rang tak. Dar 8 a pelh takah chuan hawn lam kan tintuah ve ta a. 

Dami te nen kan inzui chhuak a. "Muani kha lo hrethiam hram hram r'u aw. A zia hi a dang ve a" tiin thupha a chawi mawlh mawlh mai. Ka lo hre chang leh tawh lo. 

"A ho êm mai a" ka ti puat. Kan inmangṭha ta a. Kal kawngah "Kha Muanawmi khan min ṭawng khum leh se, ka sawp nep châk" Desy chuan a ti hlaih hlaih a. Ka nuih a za tawh zawk. 

Eng em êm va ti lo mah ila, ka ni ve nghulh mai. Ka chau a ni ber ang chu. Zingah ka inbual mai ang, chhunah ka intleuh tho ti rilruin ka mu nghal daih. Facebook video ka en a, whatsapp msg a rawn luh sek avangin ka lut ta zuai. Laldami lek..

"Mate, Rpa khan i number min dil reng a, ka pe a nia. A star che a niang. " A rawn ti! A va ṭul fahran lo tak. Rpa chu a hmel awmdan pawh ka hrethiam chiah tawh lo, a ṭawng tlem ve bawk nen, ka lo notice lem lo. Dami msg ka reply mêk laiin msg rawn lut a awm , amah a nih ka ring deuh. Mahse, Bena a lo nia! 

"Vawiinah ka rawn kal thlawn. Naktukah rawn inentir rawh aw. " A rawn ti. Ka ngei hran lo naa, mipa hetia min force deuh tawp zel hi ka ngaina ngai lo. Min intineitu nghal ngawt ang te hi..chapo ka nih theihna kawngah chuan ka chapo pawh a ni maithei. Ṭhian hnai leh nel tak pawh ni lo min video call tawp tawp chingte hi ka mil lo nghal! Call pangngai pawh hi ka zêp lo, ka chhang peih lo fô! Msg hi a tawk ka ti. Pakhat min ngaihzawng chei ve deuh ringawt, a changa reh ve vang vang , a changa min hrechiang leh min hnaih ber niawma min rawn be leh nulh ṭhin hi a awm a. A msg ka seen loh reng changte a awm ṭhin. Video call ve sek lehnghal a. 

"Naktuk chu lâm zir a ngai a, nidangah aw" Bena chu ka reply hram. 

Lâna msg chu open loh harsa ka ti. Ani leh ni lo angin a rawn type ve ṭeuh lehnghal. 

"Te, ka ngai ṭhin takzet che. Ka lo chesual kha ka inchhir tâwp thei lo, ka tina che a, tunah chuan i tan engmah ka ni tawh si lo va tiraw? Lo lêt leh thei la, bulṭan leh ka va châk êm.." tih thu a ni. Ka chhiar nawn sek. Let ka tum hauh lo naa, Lâna hi ka thiam lo vek bîk lo. Zodini khan a zîm buai ve êm a, Lâna cousin thoin a hmain min hrilh tawh bawk. Mahse, cousin te êm êm chu a flirt ka ring phal lo. Mahse, mipa hi an lo easy viau nge, tiang kha a thleng ta si a. Tun thlengin Zodini pawh hian min hmuh hreh phah tih ka hria. A hlêp a ni ve mai. Lâna chu ka reply ta rih lo phawt. 

."Mu tawh em?" Tih rawn thawntu chu Dami sawi Rpa ngei a ni. A dp ka hmuh chuan ka hre ve leh thei mai. A hmelchhe hran lo, mahse, a tâwi deuh ka ti. Hleitling lo ber si hian an figure-ah ka duh khirh ve zêk a. Ka chhuanlam mai mai pawh a ni ve thei tho. Kan duh vak lohte hnarna tur chhuanlam hi chu kan hmu rang ṭhin viau bawk a. 

Ka chhang ve tho. 

"Naktuk zanah lo len kan tum asin" a rawn tih chuan ka meng phâwk deuh. 

"Tu te nen" ka ti chu kei pawn mak ka inti! Tu emaw hmel ka mitthla titih tlat! A mak mang e. 

"Kan ṭhianho khan" a rawn ti ve mai a.

" A ṭha lawm" tih chauhin ka chhang. A hnua a msg chu ka seen ta lo. Video ka en zui leh daih. Ka thawh hmain ka nu âng thawm ka hre nghal. A zaidam hran lo naa a âng chiam ngai mang lo. Makti ru zetin ka va tho a, Nuteii leh a pasal Pa Hmaa te nen an lo indinchilh ran mai. Eng chu nge maw thleng le..

Ka nu chuan, "Hmaa, a ni êm êm tawh lo. Kha tunah pawh i rui chhur mai a. Siami hi i tikhawngaihthlak tawh mah mah..inṭhen ula a ṭha, tlai lamah bungrua kan rawn la ang" a ti hlak hlak a. Nidangah buai fô mah se; an inṭhen tak tak ngai lo. Nuteii pawh chuan ngui zet hian, "Nia, U Hma, fate avangin ka tuar hram hram zel a. Ka thei tawh lo. Mite anga zu ina rui i ni ve ngai si lo, kutthak hnawih nan mi hmang a, hmel tihtlak alawi pawh ka neih tawh loh hi..hetiang reng a nih chuan inṭhen hun a la awm dawn tho tho, tunah hian inṭhen tawh mai ang" a ti khur dar dar a. An fate erawh an lo kal ve lo a niang. 

Pa Hmaa lah chuan ding bu lûk lûk chungin, "Ve khanglang a che. Ka châwm ka hrai i nih hi, rawn haw vat la a ni mai. Thawk aphita tlan ziah zel, min timualpho zawng hian i khawsa ziah mai a.." a ti chhur chhur a. A ṭawng pawh a sehchilh nak. 

Ka pa a va inrawlh ve ta nge nge a, Pa Hmaa chu an nam chhuak a, Nuteii pawh mikhual roomah a lut nghal daih. A vanduai ngawt mai. A fela a dawhtheih tehlul nen. Pa Hmaa chhungte lah a chungah an ṭha êm êm bawk si lo. Inṭhen daih tak tak se a ṭha ang. 

Tukthuan pawh a chhuak hma tur ten kan ei hmasa zung zung a, tukin chu kan ruaibut deuh a tin ni. Zing kara boruak ipik vang nge ni class kal pawh ninawm ka ti ru hle. Lecture pawh ka ngaithla mumal lo. Ka chawmawlh deuh tlat. Rpa lah chuan min rawn wish bakah a la rawn ti deuh sek reng a, ka open duh leh ta lo. Lâm kan zir leh a, kan thiam ve tawh viau. Ka ngaihbel em mawni ka nâk mai bakah ka tai bul vel chu a rawn na leh zawk zawk ṭhin. Bena sawi anga a hlauhawm chuan inentir vat pawh pawi ka ti lo. Thut thleng thei reng hi kan ni tawh si a. Kan haw lam pawh ka zawi nguai mai a, ṭawng pawh ka ṭawng peih meuh lo. In ka thlen chuan Nuteii ka hmu lo va, ka nu ka zawh chuan, "Kha..Hmaa chhungten an rawn ṭah awh leh ta sia, tun chiah tiin a haw leh ta a nih kha.." a ti nghat a, a lungawi vak lo niin ka hria. Ka inbual zo ka va chhuak chu kawta Mama car ding chu ka va hmu a, kar loah hmeichhe pakhat nen an rawn lut dun ta a. Ka hmuh vawikhatna a ni. 

"Vite, ka sawi ang khan i ti em?" Viteii va melh chungin Mama chuan a ti a. 

"Umm" a lo ti sep. Mama chuan a bula nula ding chu min inhmelhriattir zung zung a. Nancy a ni a, Kanân vengah an awm. A ngo a, a hmaifang chu a ṭha êm êm pawn ka hre lo. A pangngai ve tawp. A aw erawh a mawi zêk a, lehkhathiam a ni tih a hriat hle bawk. Awmdan tawk leh sawi tur chin a hre hrang hle. Ka nu nen an inkawm thei nghal mai. Chaw a rawn ei ve dawn a lo nia. 

Au Bawiha a rawn haw a, ani hi mak deuh chu mikhual neih hian a zum dûk zel. A hma phei chuan amahin chaw a ei hmasa ṭhin. Tun hnuah Mama avangin chaw ei kan nei ta fô a, ngaiah a nei ve ṭan niin ka hria. A hma lamin zanriah chu kan ei a. Nancy pawh a ei ve tân tân mai. Mil lohna tur ka nei hran lo va, tin, ka ngaihsak êm em lo bawk. Mama bialnu a nih rinna ka neih loh vangte pawh a niang,Mama'n a duh ka ring lo ve tawp. A ex te ka ngaihtuahin a chhe bîk ka ti mai, a mizia erawh a class viau thung a. Û te bialnu emaw nupui tura duh lo thlan emaw lo uluk ve viau hi ka tum lem lo. Puitling an ni tawh a, an tana ṭha leh ṭha lo thliar thiam an ni tawh. Keimah ber hi ka ngaihtuahawm. Mipa puitling, hna pangngai tak nei te aiin tlema street boy ve deuh, ni ve deuh phawng phawng ho hian min hîp zawk mah a. Kei aia upa leh lutuk chu felin hna ṭha tak pawh nei mah se, ka awm thiam lo, ka ten ni si lo hian min hîp hlawl lo. Mipa ṭhenkhat chuan ka rilru hi hria se, "Thawhchhuah nei lo an duh zawk alawm chuti khati" tiin a hmeichhia zawng zawng huapin an sawisel leh nuai nuai maithei a ni. Mahse, khawvela kan lo pian rual hian duhzawng leh duh loh zawng kan nei ve vek tih hriat tur, kan duhzawng tak kha thawhchhuah a nei emaw a sual emaw kan duha kan neih miau chuan kan tifuh lo a nih pawhin kan tawrh tur a nia. Awmhmuna lo thinrima lo insawh ve nghawng nghawng kha a hahthlak mai mai. Duh zawng lo pui, an bula awm nuam kan tih miah loh te, an neihnun vang emaw an fel vang emawa duh anga lan der hi ka zia a ni lo hulhual. Ka'n sawi zau lawk, Keimah ang lo taka an hmalam hun ngaihtuaha an nawmsak vena tur thlangtu te Gold digger tia an sêl luai luai laiin kei anga duhzawng pe na ve tlut, thawhchhuah êm êm pawh nei lem bik lo, la â ve tak te thlanga neite lah "Kut hnathawk an zahpui, an iai..thawhchhuah nei lo, lirthei nei an thlang tho" tiin an sêl leh luai luai tho a. A ngaihna tak pawh a awm lo. Mipa laka mark ṭhat duh vanga duh tak ni lem lote va neih ngawt thu lah a awm si lo. 

Mama leh Nancy te inthlah tur an chhuah hnu lawkah kawngka an rawn kik a. Viteii'n a va hawnsak. Ka beisei loh lutukin Rpa te chu an rawn kal tak tak mawle! Ka phone ka charge daih bakah an lo leng dawn tih kha ka lo theihnghilh daih a. Ka tho vat, ka thiam ang tawkin ka lo dawngsawng a. Ka pain tv an e avangin sitting roomah ka chhuk thlak pui a. Rpa, Johna leh Zorina te an ni.

"In rawn leng tak tak a" ka ti teh ngawt a. Ka sawizo chu ka inchhir nghal. Ka mawl thei ê..

"Nia, kan lo leng dawn ka tih kha" Rpa chuan a ti ve mai a. 

"Engtin nge kan in in hriat?" Ka tih chuan, Johna'n, "In thenawm lawk Papuia saw ka ṭhianpa a nia, kan zawt fuh khawp mai" a ti a. A remchang lehzel hle mai. 

Ka nu inbual zo, an room aṭanga a rawn chhuah chuan kan lo ṭhu ṭhap chu mak a ti deuh nge, "Teh ṭhap che u chuan" a ti ringawt a. Ka ep chiaha ṭhu Zorina kun nghal zuk chu ka va hmu, ka nuih a za deuh. A zak a ni chiang. Ka nu bulah chuan, Dami û thiante an nih thu leh sawta kan inchhar thar thute ka sawi ve luam a. Ka nu chu a bu nghat nghat ringawt. Ka nu chu ka pa bulah a phei a, inlêng ka neih hian chutin an be ve luam hran lo, an duh loh leh an ngainat mang loh pawh lo leng se, an tilang ngai lo. 

Zorina chuan.."ka haw dawn .." tih leh thawh a rual a. Mak ti zetin ka lo melh..Johna chuan, "I va nawm loh hmel ve.." a ti nghal var a, Nia, Zorina chu khawsik hrep mai hmel a pû..zawitê hian, "Ka dul ṭhuina hi a pûn deuh a, tlaiah pawh khan nachhawkna ka hmawm tawh" a ti sup a. A kal zui nghal daih. 

"Eng nge awmzia?" Ka ti hâ a. 

Rpa chuan, "Hman zan an insual zawh hnu khan a inrin loh laiin a tumpuipa cousinin a dulah a lo vit thâwi a. Chumi ṭhuina chu a peh deuh a niang, a chhel khawp a..a nât viau ka ring" ngaihtuah hmel deuh hian a ti a. Zorina na tuar hmel kha Rpa te len chhung zawngin ka mitthlaah a châm reh leh ta lo. He pa hi ka vei em ni? Ka ngaizawng maw?! Aih, ni lul suh se…