zor 2

ZOR..(2)

Ziaktu : Toni Râlte

Class kal tura ka insiam malh malh laiin ka nu a rawn lut a. "Class ban rualin rawn haw nghal rawh aw. Chaw ei tur kan neih kha" a ti a. 

"Tu te" ka lo ti vat. 

"I u Mama sumdawnpui, hnamdang te pawh an tel" a ti puat a. Ka ner sak, ka ning. Mama vang hian milian ho chet ang deuha zanriah ei tura sawm hi kan nei sek a, inthup kual vel a lo ngai ve deuh nen, ka hah vek zel. In chhunga ka nih ang anga lan a rem lohna chin a awm ṭhin si a. Desy aw ka hriat rualin pindan aṭangin ka chhuak nghal a. Vawiin chu Desy scooty kan hawl chhuak. Ka nuin, "Des, tlai lamah chuan Teberi rawn pui ve rawh aw. " Tiin a lo sawm nghal zat. Ani hi chu mikhual kan neih apianga themtlengtê zawk ang hrima kan chelek zin ve kha a nia, a hnial ngai hek lo. An ni pawh an ina chaw eikhawm tih vel a awm chuan ka phei ve ziah tho. Chawlhhmun kan thlen thlak chuan, "Damdawi min chah a, tah kher hian a tia , ka'n lamsak lawk ang e" tih pahin a ding a. MZU hostela awm ṭhian pahnih khat hi kan nei ve tho a, an hostelah pawh kan leng lut zeuh zeuh. A rawn phei leh vat a. "Eng damdawi nge" ka tih chuan, "Alprazolam" a ti sep a. Ka meng zau kâwk. 

"Ehe! Ngati nge? AP ber kher" ka ti hâ a. 

"Ka hre bîk nang. Mut nan a hmang a niang" a ti liam puat a. Ka la hrereng, hman tawhah College week kan hman laiin kan ṭhian ti ila kan inzui lutuk lo, Saii hian AP hi mum 5 a bâr a, "Nuam chiai chiai ve" a ti deuh sek. Mahse, a hnu lawkah an lam tur kha confi nan tiin mipa ho zu a dil ve a, no 1 leh tlêm a in sak ve a. An lamzo thlansa kha stage hnung bathlarah a dak a, a kawrte pawh a phelh vek. Awmngaihna a hre ta lo va, a thaw te rawn hahin boruak khamkhawp hmu lo tih hriat zet hian a thaw kâwk kâwk mai a. Kan mangangin damdawi inah kan tlanpui a, kan thlen aṭanga darkar chanve velah a thi ringawt a nih chu! Kan hamhaihin kan hrilhhai tlâng teh e. Mahse, kan ṭhianho bakin AP a bar leh zu a in thu kha tuman kan sawichhuak ta lo kha a nia. Khata ṭang khan kei chu damdawi ruihtheih lam hi ka ṭih riau. Ka vannei nge ni Zu te hi tui lo hi ka'n ti khawp a! Zu tui ti tak hi chu an vâng viau tho ang a, mahse, a ruih pawh nuam ka ti chhetê lo. Kan picnic ṭumin an in vek si a, kei a harha harh ta ngang chuan, "Sawi ve reng rengah" tiin no 2 ka in ve pawp mai a! Ekhai! Pool sirah ka mu hle hle. Ka luak a chhuak bawk si. Chumiṭum ka haw chu ka kal heithei si lo, Mama a awm lo hlauh zawk a. Au Bawiha'n min zilh hlak nghe nghe. Ka nu leh pate hian ka û te hi an ring thiam nge, inzilhhau tih velah pawh ka û ten min zilhna hi an duhtawk a niang, a hranpaa min zilhna hi chu chhiat ṭhata awmdan tur vel hi a ni deuh mai. 

Campus kan luh hmain a la hma tho tiin coffee kan in leh zuai a. Kan department awmna hi a inhlat deuh a, Desy hi chu main gate aṭangin ke pawn a hla lem lo. Chuvang chuan a scooty chu khalhin kan department lam ka pan zui ta nghal a. Ka zu thlen chuan kan CR Ruata chuan,"Teber, hnam lamah thiam eng nge i neih?" A lo ti var a. 

"Ka thiam vek" ka lo ti var. Ka sawi lai khan ka inchhuang rilru ve deuh. Ni e, tunlaiah hnam lam thiam hi a tlem zawk an ni deuh zel. Mahse, ka tleirawl chhuah phat aṭang khan ka nu hian hnam lam zir ve turin min nawr nghal a. Vanneihthlaktakin Art & culture lamin School hrang hrang aṭangin hnam lam zir duh an rawn collect a, a tirah chuan inlak changkanna ve hun lai ni bawk, hnam lam zir chu ṭhing riaua ngaihna kan neih avangin kan hming kan pe duh lo va. Zanriah einaa ka han sawi chuan ka nu leh Mama'n, "I changkan tum ve dan chu le'h! Mahni hnam lam êm pawh thiam lo nih kha a ṭhingin a zahthlak fê zawk. Naktukah i hming thehlut ngei ngei ang che" min ti zêk a. Tichuan, ka hming thehlutin School ban hnuah darkar khat zel thla khat chhung kan zir ta a. Cheraw, khuallam, chawnglaizawn, sarlamkai, tlânglam bakah chai leh chheih lam thlengin ka thiam chhuak ta vek. Kan zir rei loh ngaihtuahin ka thiam tam hman ka inti. Kan class aṭangin keimah chiahin ka zir nghe nghe. 

Ruata chuan, "Chheih lam i thiam maw" maktih hmel fê hian a ti hluai a. 

"Ka ti ve thei sawlh sawlh" ka lo ti mai a. Kan classah hian têt larin ka lar a! Kan class-a hmelṭha leh dapartment dang pawhin an star êm êm ṭhin chu Rinpuii a ni. Zarkawta khawsa, hausa bawk si a nia. Tuman er phâkah kan ngai lo. Rinpuii chu a rawn lut ve chiah a, Ruata chuan a lo zawt ve var ,ner sak chung hian, "Ngatan nge? A ho ê" a lo ti daih! Ruata chu a hrilhhai hmel letling. 

Eng dang a ni lo, Department hrang hrangin hnam lam intihsiakna kan nei dawn a lo nia. Hei hi a ṭha viau, Mizorama zirna in sâng berah Mizo Hnam Lam intihsiakna an huaihawt hi, Art & Culture lam an ṭang khawp mai. Chutihrualin hnamdang tam tak an awm ve avangin chung hnamdangte erawh chu anmahni hnam lam entir tura beisei an ni thung. A department anga intihsiak tur a nih avangin kan CR a ṭang hle. Amah Ruata hi keini aiin a û hlek a, patling tak, Hmeichhe ṭhenkhatin a ṭhing an tih tur ang a ni. A chhan chu a fel dan hi a patling ka ti mai, a thawmhnaw pawh ni deuh khup zel a ni a. Mahse, a fel ka ti kei chuan, tin, Kan classah a thiam ber tlat bawk a. Hmuhsita ngaihnep ve ngawt chi a ni lo. Hmeichia hi 8 lek kan ni a, mipa lamin sawrkarna an la a nih chu! Mahse, kan inngeih ti mai ila,rilru kheuhbeuh pu kan awm lem lo. Rinpuii te ṭhian panga hi tlemin an hrang deuh naa eng emaw tihpui nikhuaah erawh min zawm ve thei zel. Kei nen tak erawh kawm tak takin kan la inkawm lo. 

Hun a tepter tawh si avangin zurtirtute dilin chawhnu lamah lam chu kan zir ve ta a. A tirah cheraw an ti phawt a, mahse, cheraw kan thei pangngai kha pathum chiah kan ni. Kan class mipa zinga chhe lo ve ber Lawmsanga'n, "Mizo nula in ni lo mi? Zahpuiawm hlawm lutuk" a ti hluk hluk mai. Rinpuii'n, "Kan zir ve hman lo alawm. Bakah mizo nih vanga hnam lam thiam kher hi kan bat a ni lo" a ti vei hmak. Lawmsanga mipa a ni hlauh a, a chhang zui lo. 

Lam dang han entir dawnin tlêma tam tham ve deuh a ngai zel si, mipa leh hmeichia kan inkawp kim meuh bawk si lo. Ruata'n, "Hmm, tian ti mai ang. Chheih lam entir mai ang u. Teberi leh Ruthi ten an thiam a, mipa lamah Zomuana leh Apuia ten an ti ve thei sawlh sawlh bawk, zir mai ang u" a ti ta ringawt a. Mahse, naktuk aṭanga zir ṭan kan ti ta thung. Mikhual kan nei dawn tih hre kâr chungin Desy chu tlan chak deuh turin ka nawr sek mai a. Tlemin kan tlai deuh tawh tlat a tin ni. 

In chhung ka luh rual rual chuan, ka nuin "Teber, lo kal teh" tiin min hui nghal a. Livimg roomah chuan vaipa thau angreng tak leh a nupui niawm tak hmaifai ve tak mai bakah Mama partner U Zothana te an lo ṭhu a. Mi pakhat ka la hmuh ngai loh, cher lam deuh Mama nena inrual khat vel tur , smart taka inchei a ṭhu ve bawk. Ka nu chuan kan mikhualte chu min hmelhriattir dan dan a, Vai nupa te chuan english an nal viau mai. U Zothana bula ṭhu chu, " Doctor Bena a nih hi..Bena, hei hi kan fanu neihchhun Malsawmsaki aw" ka nu chuan a ti sawk sawk a. Nui sâng chung hian min rawn chibai a. Ka lo nuih ve ringawt. In chung aṭanga rawn chhuk thla mêk Mama chuan, "Bena, ka farnu kha melh no hlek suh aw" a rawn ti lûng lûng a. 

"I remtihna ka lak hmasak a ngai tihna em ni?" Hnehsawh zetin Bena chuan a lo ti ve bawk. Kei pawh zangkhai takin intifai turin ka pindan ka pan a. Muangchâng lovin ka inbual nghal. Desy pawh a rawn thleng leh der tawh, Vaite chu hindia biak teh a tum a, a thiam ṭha mang si lo. Kei pawh Hindi hi ka thiam lem lo, thiam hi a ṭha ngawt mai. Au Bawiha rawn haw hnu lawkah zanriah chu kan buatsaih ta a. Mama leh a sumdawnpuite chu ka nu leh pate nen an kil ho a, kei nin kan lo vil thung. An tam lo bawk a, a hahthlak hran loh. Desy nen kan titi leh chiam. Sawi tur a hre lutuk ṭhin hi mak ka ti zawk. An eikhamah Au Bawiha hovin kan ei ve leh a. (Tun hnuah Bawiha hi Ka û tiin ka sawi tawh ang) ka ei hnem phian. Kan intihfel zawh meuh chuan Vaite chuan hawn an lo tum der tawh a. A pawi lo, an tan pawh a nuam zawk ang, Mizo ṭawng an thiam si lo. Desy ka chelh rih, Bathlar thlanglamah theitui kan in dun a. 

"Tima number chu ka nei tawh a, ka be ngam thlawt lo" a ti sar sar a. Timothy hi chu a duh ve ngang a nih dawn hi. 

"Be rawh, a seh lo vang che" ka ti nghat a. Tima hi MA a zo tawh a, Collegeah khan kan senior a ni ṭhin. Tunah chuan private schoolah a inhlawh ve mek. 

"Engtin nge ka biak ang?" A ti nang nang a. 

"Ngam deuhin va bia la,. Mipate chu an ei loh zawng leh mil loh zawng an tilang ve vak hleinem, a ei lo vang che tihna ni lovin" ka ti duah a. A va biak bawrh loh chuan engtikawng zawng mahin an inzawm lul lo vang. 

"Nia, mut dawnah ka bia ang" te kha chu a tih ve kha maw. 

"A va nuam âwm ve. " Kan hnunglam aṭanga rawn titu chu kan en vat, Bena kha a lo nia. A nui var var reng hi hmuh a nuam. Mama leh U Zothana an nuih khât tehreng nen. Kan bulah chuan a rawn ding a, "Lo ṭhu ve rawh" tiin ka tawlh hrat a. A rawn ṭhu ve mai. 

"U Ben, khawi vengah nge in awm khah?" Desy chuan a lo ti a. Nui sâng chungin, "Min û suh u. Ka duh lo a nia, sawtah Chanmari-ah sawn.." a ti dam duai a. 

"Chuan, Tunah khawi hospitalah nge i thawh" ka lo ti ve var. 

"Ebenezar-ah sawn..Vawiin lamte class in kal em?" A ti nghal zat a. 

"Umm kal e" ka ti ringawt. 

"I û sawn a hauh riau mai che a, la fiam hlak tur a ni" a tih chuan, ka mâwlna a chhuak leh ta nge ni, "Mama nen in inkawmna a rei tawh em? Ka hmu ngai lo che ee" ka lo ti daih pek a. 

"Rei ve thawkhat tawh e. Hmu ngai lo vang. Lungleiah rei fê ka va awm alawm. Kuminah ka rawn phei ve chiah" a ti ve mai a. Desy'n Lunglei lama a hmelhriat thenkhatte a lo zawt zut zut, a har ve dawn ê.."Lungleiah chuan Thari kha i hria em?" Tih ringawt te chu. "Delhiah khuan Rajua i hria em?" Tih ang vel a ni. 

Mama a rawn chhuak ve a, "Ben, phei dawn hnai ila.." tiin a sana a melh zauh, Bena pawh chu a ding hluai a. "Nia,.a nih chuan Teber, mangṭha u aw. Nidangah kan inkawm leh dawn nia" tiin min rawn nuih a. Ka lo chhang ve vat. 

Mama'n, "Boruak inthlak hun lai a nia, pawn daiah awm rei lutuk suh u, in hritlang ang" a ti ve bawk. An kal hnuah Desy pek chuan, "Doctora khan a star chiang che" a ti hak a. 

"Kal teh a..ve leh ngawt a che" ka ti hmak. 

"A melh dan che leh a biak dan velah che khan ka hai lo aw" a la ti ṭâlh. 

"Lut ang, movie en ang" ka lo tihsan daih. 

Ka u leng ka nghak a, Viteii nen tv te kan en ta vel mai mai a. Ka nute an mu tawh a. Mama erawh a rawn tlai ka ring. Ka u pawh chu a rei ta phian a, ka mut a chhuak ṭan deuh bawk si, ka call ta ringawt a. "Hei Tka kha pickup nen an insû a, damdawi inah kan kalpui" a rawn ti a. Ka ner nawk. Tka chu a hnathawk te zing ami a ni. "Kan la awm rih ang, tlaivar pawh a ngai maithei" a la ti ta deuh deuh. Ka hnual rawih bakah ka mutchhuak pawh a bo duak. Viteii chuan min khawngaih deuh nge, "Ka lo riahpui mai dawn che mi?" A ti a. Dik tak chuan ka sawm hreh a, nuam lo a tih ka hlauh vangin. Chutia a inhuam chuan lawm takin ka lo pawm hmui hmak mai. Ka pindan lam kan pan ta a. 

Mutchhuak a bo laklawh nen, viteii nen chuan kan titi mai mai a. 

"Vite, in khuaah bialpa te i nei ve em?" Ka tih chuan a nui har har a. "Nei ve chiang e. Mahse, hetah ka lo awm daih sia, kan inbe khât tawh lutuk" tlema ngui leh deuh si hian a ti a. 

"A va pawi ve. Hetah Aizawl ami nei daih la a ṭha zawk alawm" ka tih chuan, "Tuman min duh nang, mi awmpuite chu" a ti sap a. 

"Chutiangin ngai mah ta che. Mi kan changkang zel a, tunlaiah mi pangngaiin mi awmpui an hmusit tawh hleinem, bakah i eizawnna a nia, midang eizawnna ngainep turin tumah hi kan sang tâwk lo. " Ka ti duah. Ka rilru diktak pawh a ni ve a. "Awmpui" tih thumal a han nih tak avanga hmuh hniama lo iai ve ngawt hi a mize hniamthlak ka ti, an eizawnna a ni tlat. Bakah dawra thawk thenkhat inla changkang ve tak, biak nuam lo ve tak tak ho ai hian awmpuite hian an hlawh ṭha ve zawk. Chhiahhlawh leh sal ang maia la ngai, mi changkang lo hi an la awm ve ṭhin tlat a! Ka pa min zilh fôna hi keini hi chuan kan ṭhanhnan ka ti mai. Hmunphiat aṭanga Officer thleng hian mahni phak tawka eizawng vek kan ni a, inhmusit thei chuang kan awm lo. Kan hnathawhna leh eizawnnaa kan rinawm phawt chuan mi zahawm kan ni mai tih hi..

"Nang, Teber, bialpa i nei em?" A ti ta khauh a. 

"Neih loh lai tak" ka ti sap. 

"I luck awm awm nen" a la ti zui! Ka ex tharlam ber Hruaia ka mitthla nghal. Ka ner sak. 

"Nakinah ka love story ka la hrilh ang che..a mak i ti viau ang" a ti leh a, Viteii hi a hmelchhe miah lo va, a mizia a zâwi ve a, mipa tan chuan a ngaihzawnâwm viau ang. A muthilh hnu pawh chuan ka la meng kar. Ka hlau hran lo naa, ka mut a chhuak thei miah lo chu hrehawm ka ti. Phone te chu kan khawih leh hnuhnawh a. Ṭhianho groupa ka luh chuan, Dami'n, "Sundayah lo kal ve leh vek r'u aw. Zanin in reh ṭhuap a, a khawharthlak" a rawn ti a. Ni dawn tak e, kan mikhual neih atalângin kan va lang leh ta miah lo. Sundayah chuan kal ngei a ṭha e. 

"I va reh ve, nge ka number i delete" Lâna a ni. A mak ngawt mai! Mi dang ai hi chuan min deh dan a la danglam reng mai. A cousin nen lah khan an inzui leh ta miah bawk si lo. Mahse, ka luhlul lakawh tawh a, "Ka theih chen chen ngaihdama enliam ka tum ang, mahse, vawikhat bak ṭhen ka tum lo" tia ngaihzawng chungchanga ngaihdan leh thutiam nghet nei ve kha ka nia. Ka lêt thei tawh lo a ni. 

"Delete lo" ka va ti a. A seen rang khawp mai. 

"I status ka hmu ngai si lo va, min delete ta emaw ka tia" a rawn tih chuan ka ṭhen sak. Status hi nitin ka update ve ziah a, nimin leh vawiin erawh ka reh ta daih sia, chuvang chu a ni ngei ang. Mutchhuakin min rawn zêm chiai chiai ta a, Lâna pawh reply ta lo chuan ka phone dahin ka maimichhing ta daih a. 

"Te, vawiin ka chawlh a ngai, Piteii te nufa ka bazarpui dawn a" Desy msg ka hmuh chuan ka hnual rawih. A tel lo hi chuan ka kim thlawt lo asin mawle. Chawlh ve ngawt chi lah a ni mang si lo. Phur lo zetin University lam chu ka pan ta a. Temple thlang lawka MZU bus stand bulah chuan an lo dingkhawm deuh khup mai. Ka hmelhriat niawm takte pawh ka va hmu. A chhak deuhah ka ding a. Patling thinrim inhrosa thawm ka hre zui nghal. A hnu lawkah kawr ha lo kum 45 bawr vel tur sa chhe ve fahran hi a rawn lang hlawl mai a. Ka dinna opposite chiaha motor workshop lam chu kawkin , "Lianzual, rawn chhuahtir rawh. Ka fapa kutthlaktu hi ka hlau thertê hleinem, ve khanglang a.." a ti chiam chiam a, a sachhiat nen a aw chu a ring phian a! Lianzuala niawm tak chuan, "Hawsan rawh, a cho lo che a nih hi..a zahthlak, kha miin an en duh êm che kha" zaidam deuh hian a rawn ti a. Ani pawh kum 40-45 bawr vel a ni maithei. 

"Lo hrilh ang che. Vawi khatmah ka fapa hi kut lo thlak tawh suh se. Ka ṭawng chu i hria em? Zorinsang, nang mi chhe lubâwk, zungawlvei fapa mai mai khan ka fapa khing ngam tur i ni lo aw" a ti leh ta piap piap a. Zorinsang a tih ri chuan ka beng a rawn verh zawk, hman zana mipa kha ka hrechhuak nghal. An thum hak a, Lianzuala chuan, "Kal suh, Zorin" a ti tuar. Mahse, kawng kân zawnga rawn tlan phei mêk mipa chuan lêt a tum eih lo. Amah chotu ka hma lawka ding chu a bawh rawk a, a hnek ta mial mial mai. Ka zuk hmu chiang nasa si a, ka lo îp zawk zawk. Zep loh chuan mipa thinrim ngam leh ngam insual hi rei ka en thei lo. Ka hlau dawn zel. Mahse, mi an tam hrim a, Zorinsanga chu an pawt tho ta vat a, an chelh hneh lo lek lek zel. A thinrim takzet a ni tih chu a mitmeng nelawm loh sa zet a thim raih danah chuan a lang reng mai. 

Pa khan, "Zawnga leh..i pa rual kut min thlak a maw? I va zak lo êm êm ve" tih pahin a hnar thi chu a tuai a, a biang dinglam pawh a vûng ngei dawn tih ka zuk hmu thiam. Zorinsanga an tih chuan melh ngur chungin, "Min cho kha mawle" a ti sup a. Amah an chelhna chu thingthlain zawimuangin workshop lam a pan leh daih. He pa chezia hi a mak mang e aw. Dami sawi kha a dik ang, buaina a tawk reng a nih hmel. Ka ngaihdan pawh a la ngai, amah hi a dik bik lo tihna a ni mai. Mi an kal kiang ta bawk a, ka tlan ve leh ta nghal a. Kawngtluanin Zorinsanga'n kha pa a hnek bawrh bawrh lai kha ka mitthlaah ka la hmu zui! A va ho tak. 

Vawiin chu lam kan zir a. Zomuana nen kan inkawp a. Apuia leh Ruthi..Zomuana chu a zei hah hah ngei mai. Ruthi lam chu ka sawisel ta a. Min en ṭhap mai. 

"Chheih lamah hian mawng shake-a vir kual nghek nghek kha a awm lo. Lam delh delha mutê leihrût dik taka tih diai diai tur zawk a nia..Ruthi chu i mawng i shake nasa mah mah, Apuia pawh i vir leh vut zel a. I vir pawn chheih pah khan muangchângin vir rawh" ka ti ta a. Anmahni ka ngei vang a ni hran lo. Ruthi chu a tûm hmak a, "Hmm, ka ti lo anga a ni mai lawm. Intihthiamthlak êm mai a" a ti nghat a. Ṭawng ka tum laiin Rinpuiin, "Dik chiah, khatia modify ve khan a mawi alawm. Tihdanglam hmiah hmiah tur, a mawi zawk chuan" a lo ti phar phar a. Kei lah hi ka tê na vang vangin mi ṭawngkam thlawn ba duh ngai ṭhak lo ka ni ve a, "Hnampui zawk te hian an hnam lam an modify ngai pawh ka hre lo. Mawng shake duh te chuan twerk law law ila, in thiam vek zawk ang chu. Chheih lam aiah va ti daih ang u" ka ti ve ta ngat. An nui hak a, mahse, Ruthi chuan, "I lam dan diai diai kha a hot hlawl lo, boruak siam ve a ngai alawm. Ṭhing lutuk a" a lo ti a. 

"Mizo department lam chuan an rawn ti îng-euh ve vak lo vang. In duh phawt a hnu ka shake ve thiam lutuk alawm. Ti ila" cho zet hian ka ti a. 

Ruata a rawn inrawlh ta vat. "Teberi hian a hre dik ang, a sawi ang khan lam ang u. A mawi ai mah chuan a dik hi a ṭha zawk e" a ti ta a. CR a nih bakah a huaihawttu ber a ni a, a zahawm ve reng. Hmeichhe ṭhenkhat lam peih chuang si lote chu an titau kual a, an phun an phun a, a chang leh min runluih tih hriat zetin ṭawngkam mei nei fê fein an ṭawng a, an nui leh hak ṭhin. Ka ngaipawimawh lo nasa. Rinpuii'n, a ṭhiante bula "Zahzeh phâk lek ho hi chu ṭawng ve vak lo se" a tihte chu eng hê hûah ka ngai hran lo. 5 ft tling lo hi an tam ve ê. Amah ngei pawh 5'2 ft vel bak a ni tawp si o. Ve a..

An tihtauh leh Ruthi pawh a lâm that duh loh takah chuan Mi thinchhia tih takah Lawmsanga ning chuan, "In va hneawm ê. Puipui, va zir rawh. Nang hi i zeihawi..Teberi tih ang khan ti la a tawk..Ruthi chu lam lo tawp se a ni mai. " A ti hluk hluk a. Ruthi hian tih takzetin Lawmsanga a star tih hretu te vek kan ni, Sawi tawh angin Lawmsanga hi kan class mipaah a hmeltha ber leh lehkha pawh thiam tak a ni a, an hausak bakah a nun hi a ngainatawm, chapo ve lo. Chuvang chuan, Ruthi chauh lo pawn a rûkin an star ṭhûm, Ruthi hian a tihlan theih êm vangin an tilang ngam lo mai mai zawk a ni. Kei chuan ka star ve lo thung. Puipuii hi ze harh ve tak, thawveng ve halh, mahse, ngeiawm si loh ang hi a ni a. A rawn chhuak ve mai. Ruthi meng râng chu ngaipawimawh duh lo vin, "Tihian.." tiin kut pharh dan leh khup thleh dante chu kan inzirtir ta malh malh a. A step a tam lo bawk a, a ti ve thei zel mai. Naktukah chuan a lam thei pangngai tawhin ka ring. 

Kan ban dawn chuan, "Chuan tikhan ka tel dawn lo maw? Sawi chiang r'u, Ruata" Ruthi chuan dâwih aw lek lek hian a ti a. Ruata chhan hma chuan, Lawmsanga'n, "Aw..titau peih leh rilru tê deuh te kha chu tel ve suh u. Buaina a tam" a lo ti hmawk hmawk. Ruata pawh a nui tawp. Ruthi chu a ṭah a chhuah hmel hlein ka hria. A atchilh êm êm laka a tlak nat lohzia a hre ta bawk nen..ka lo khawngaih hranpa lo thung. Puipuii nen kan innêl phah ta daih a. Kan classah hian han kawm em em bîk ka nei tlat lo va, ka kawm thei vek thung. 

Ka haw chhoh lama Zorinsanga te workshop lam ka va hawi zauh chuan Zorinsanga ka hmu lo. Kha lai workshopah khan a thawk a nih ka ring. Ka hmuh ve chhunah buaina a tawk ve ve a, a mak ve ngawt mai. In ka thlen chuan ka nu a lo awm lo. Ka pa erawh a lo ṭhu run a. 

"Khaw nge anu" ka tih chuan, "I nuteii te nupa an buai leh deuh a, i û nen an va kal a nih awm kha" a lo ti chuar chuar. Nuteii te nupa hi an buai ve deuh reng a, an pa hian zu in a ching tlat a! Mi pate zu in ang a ni si lo hi a buaithlakna a ni. A kainam tawh chuan buaina a zawng tlat mai ṭhin a. Fa hi pahnih an nei a, an fate avang leh han belh tur em êm nei bik ta lo chu Nuteii hian a tuar ve ngat ngat zel. A ruih loha pa fel duam ni si, ruih chiaha mize thlak vek thei hi mak ka tihzawng tak a ni. Viteii ka pui ve vat a. Ka rin loh deuhin Mama pawh a rawn haw hma ve khiah. 

"Naute, ka pindan khi han tifel lawk teh, Viteii a buai rih si" tiin min tir a. Ka kal ve mai. A khum chu ani leh ni lo angin a lo la siam pek lo va, ka siamsak vat. A rawn lut a, "Chhuat kha nawt la a tawk mai ang" a ti nghut a. Thil ka hrechhuak zawk, "Taka! Mam, Mapuii i hria em? Khatla a mi" ka ti hluai a. Ka ngaihbel nge ni, a inher tum chu a ding dawt mai. Min rawn dinchilh nghal a, a va sang tak e aw. "Hre lo. Ka hre ngai lo" min chhuk melh run chung chuan a ti zawi sup a. A hmel landan chu mak ka ti deuh. Na tuar hmel te pawh a langin ka hria. 

"A hria che a, hmanniah dawrah kan chawl ho va. A sam pawh a tawi..a hmel pawh.." ka tih mek laiin dawhtheih loh hmel zet hian, "Sawi tawh suh" a lo ti tuar! Mak ka ti nasa..Chutianga a awm chu ka hmuh vawikhatna. A khum bul dawhkan a nem a, bang lam a hawi ngat ngat. "Mam, ti nge?" Ka tih rual chuan, "Chhuk rawh. " A lo ti chang fak. 

Hrilhhai zetin ka chhuahsan ta a. Mapuii hmel kha ka mitthlaah a rawn lang, nula hmelṭha leh vun nalh tak, nelawm tak kha a ni a. A sam tawi pawh kha a inhmeh khawp mai. Mama bialnu hlui tihna em ni ang? A bialnute hi a hranpa takin tumah ka hriain ka la hnaih ngai lo. Chaw eia sawm te hi chu a nei ve zauh zel a, an fel êm êm zel vek. Mahse, a hnu lawkah mi dang daih a lo ngaizawng leh tawh ṭhin. Chuvang a nia Playboy ka tih tak mai. Mapuii hming khan a tidanglam thei khawp mai. Hriatchian ka châk riau, ka zawt ngam teuh si lo. 

Ka nu a rawn haw a, Nuteii'n a rawn zui haw ve bawk. Zan khat han tlante chu a nei ve fô a, a tukah a haw leh nge nge ṭhin. Chutiang turah chuan kan ngai tawh a, mak pawh kan ti lem lo. Nuteii te hi sawi tawh angin Tuikualah ve tho an awm a, Dami te pawh a hre ve. Ka û te hnathawk Tka kha a ṭha chiah lo va, ka u pawh kan ei hmain chaw a bar sawk sawk a, a han chho ve lehnghal. A zia lo tak tak a ni. Zanriah ei dawnah ka nuin Mama han ko turin min ti a. Ka han koh chuan, "Ka ei peih lo" a lo ti hmuk. Tlaia ka thil sawi vang nia ka rin vangin nuam lo ka ti hle. A room a kalh tlat bawk si. Ka zu chhuk a, ka sawi chuan ka nu chuan, "Chaw nghei a duh loh tehlul nen, ti nge mawni le" ngaihtuah hmel fê hian a ti a. Ka pa chuan, "Nakinah a ei ve leh dawn a niang. Ngaihtuah suh u" a lo ti vat. 

Chaw ei lai hi keini chhungkua chu kan ṭawng nasa ṭhin. Inzilh nan kan hmang bawk. Chuvangin thutak leh ngawi rûna chaw ei hi ka thiam lo, mi ina chaw ei ka hrehna ber pawh a ni. Nuteii awm ve bawk nen, Dami U Zosanga thih dan velte chu a sawi siam siam a. A ruang an va hmuh dan tak kha kan la hre bik chiah lo ve bawk a. Nuteii chuan, "Chhunah pawh kei pawh ka puan zuarin ka hmu reng, a rui pawn ka hre lo. Tikhan tlaia a haw, a kamnam kha chaw a ei peih lo an tia.. an chaw eikham an upa ber fapain Zosanga rooma a phone charge a va la tur khan a va hmu ringawt a niawm e. A mak khawp mai" a ti a. 

"Nih Nute, Zorinsanga i hria em? In veng tho" ka lo ti daih. Antui hâwp a tum tawh chu ṭhulh lehin min rawn melh vak a, "Zorinsanga, Workshopa thawk kha em ni i sawi" a ti ta a. 

"Aw a thawkin ka hria" ka ti ve mai a. 

"Engtin nge in inhriat?" A ti leh ta zel a. Mak ka ti deuh, a serious angreng bawk si. "Chutin kan inhre lem lo, U Zosanga lumen zan khan an intibuai a" ka ti ringawt a. 

Thaw huai hmelpu hian, " A ṭhat chu..misual a nih kha. Buaina a nei reng zel, pawisa hlawh ten zuk insual duh a! A rapthlak ka ti lutuk" a ti hlut a. Sawi mai tur pawh ka hre lo. 

Mahse, "An khawsak a harsa ve mi?" Mawlmamg zet hian ka ti a. Ka sawi chhan tak zawk chu Dami te ina kan kala scooty ka lakchhuah dawn khan Bullet in min dal a nih kha, Dami khan, Zorina bike emaw a ti a, a ko ta kha a nia. Bullet nei thei si chuan an harsat lutuk ka ring vak lo va, pawisa hlawh nana insual êm em chu mak ka tih vâng zawk a ni. 

"Harsa ve tho e. Harsa ve tho, a pa saw zu ngawlvei a nia. A pension hlawh saw chu a in zo zel a niawm e. Tisawn Zorina thawhchhuah saw an ei ve a ni mai. Lehlam takah chuan a fel phian" a ti leh lawi a! Ka zawh thui vak chuan ngaih loh lamah a ngaih ka hlau a, ka ngawihsan ta a. 

Test tur kan neih ṭût avangin hla zir pawh duh ru viau mah ila, ka kal thei ta lo. Ka zir ve loh chuan. Lehkha hi thiam tak ni lo mah ila, exam hi ka thiam a niang, class-a kei aia tiṭha te ai pawh hian final examah hi chuan ka ti ṭha ve leh tlat zel. Viteii'n thingpui a rawn dah zawk tih loh chu ka roomah tumah an rawn dîk dâk lo. Thingpui in paha ka online chuan, Lâna msg bawk ka hmu leh a. "Tun lai chu ka rilruah i awm reng mai..i dam ṭha tak tak em?" Tih a ni. Mak deuh chu in ni ve em ka hre lo va, ngaihzawngte nen kan han inṭhen a, a tirah chuan eng emaw na zek hi a awm ve vek âwm e. Min palliama eng ah mah ngai lo niawm fahrana min han pelh ngâk ngâk hi chuan kan chapo vang nge kan tlawmlak vang ni dawn ni, anmahni va duh riauna, va ngaih riauna hi a awm ve châwk! Chutiang ni lo va min duhtu zawk an la niha min la rawn tih huam hi chuan kan rilru a lêt daih a, engahmah kan ngai lo zui duh viau. Lâna pawh hi a ni. Kan inṭhen tirh khan chapona kha chelek hle lo ila kan ṭha leh ang. Khatia ka han ṭhena ka rehsan khan ani pawh a reh zui ve hmak a,. Huai taka ti niawm taka min han ngawihsan hmak thei kha nâ ka ti a, ka ngai vawng vawng zel. Mahse, ka intipachang zel a, tun hnuah min rawn hawi leh ta deuh a. Ka rilru a dang leh daih tawh. "Ka tuar zo vek tawh" tih rilru ka pu bawk nen,. Chutihrualin ka first love a nihnaah erawh engtikahmah ka theihnghilh ka ring lo. Ka chhang liam puat a. Ka vei zui hran lo. Dami status zawk chuan ka rilru a la pêng daih. "A ṭhiante han hmuh te hian a tel ve dawna hriatna ka nei ṭhin. Û, ka va ngai dawn che êm.." tih captiona hmangin u Zosanga thiante ho a rawn hmang a. Chu thlalakah chuan tlaia nuteii nen kan sawi zui chiam Zorinsanga kha a tel ve tlat a tin ni. Dami te kawt an tuizêm bul ṭhutthlengah an ṭhu ṭhap a. Zorina chuan in lam a melh daih,. Ti nge he pa hi ka lo ngaihtuah leh ngawt zel le? Rindan ka nei. Buaina ngah tak a nih vang leh a mizia kha Lâna nen an inan riau vang a ni ngei ang. Ṭawng tam lo, luhlul tak kha. Lâna pawh kan inngaihzawn laia min hîp na bertu chu a mizia kha a ni. Zorina ai chuan a hniam hlek ang. An hmel erawh a inang lo nasa. Lâna chuan khabe hmul a nei a, Zorina erawh sawi tawh angin hmul a zuah lem lo. Kan ṭhiannu pakhat Zoteii'n, "Mipate chu khabe hmul emaw hmui hmul emaw hi sei vak loin han zuah ve se, an lang pa mai" a tih kha a lo ni vek kher lo tih chu Zorina hmel aṭang hian a lang ka ti mai, a ṭhiante zingah rau rau pawh a ngeng ngalh mai a, a lang pa riau alawm. Mahse, hetia ka sawi chiam avang hian ka star hran lo a nia. Insual hrat phei chu ka hnaih duh teuh lo. 

Viteii nen bawk kan riak dun leh ta. Dâwihzep lai taka tu te emaw kan lamhnai leh hriatchian êm êm thi tawhte hmel mitthla tlat te hi sim theih nise aw. Thildang ngaihtuahsan dawn pawn a tih hleihtheih loh, a mak ve ê..dawihzepna hi hralh theih nise cheng 1 paw'n ka hralh phal. 

Ka thawh chuan Nuteii pawh a lo haw leh daih tawh. Tlan hi a awlsam viau pawh a ni bik lo, an pa inhrosa thawm ngaihthlak reng ai chuan a riakbo mai ṭhin a ni zawk. A fate hi a u zawk nen kan inrual a, Opa a ni. A nau hmeichhia erawh Teteii a nia. An zum dun khawp a, an rawn len ve pawn kawm hleihtheih pawh an ni ngai lo. A pate lamah hian an bet deuh bawk a. 

Desy nen kan kal dun leh thei ta. Friday a ni bawk a, thaw a veng halh mai. Nimin lama kan lam zirna boruakte ka hrilh thla zut zut a, "Rinpuii ve kha..inla si..a hmelṭhat a chhuang an ti" a la ti zui! Ka sawi zawmpui duh ta lo mai. Hmeichhia hi chuan mi rêl kan hrat ti ila, Mama hian min hrilh nasa bawk a. Desy bulah bâk mi ka rêl ngai lo. Ka thin an tihrima ka lung a awi loh viau chuan hmaichhanah ka hrilh mai zel. Tin, min eilotu, min ngeih miah lotu te biak hmasak kuala tlawn ang ziazanga va tlawm dûk hi ka talent a ni ve lo bawk. An peih chhung min huain min ngei se ka buaina ni loin an buaina a ni. Mi dang ngeia ei loh hi mahni tan bawk a hrehawm ṭhin avangin tumah hi ngei loh hram ka tum bawk. 

Classrooma ka luh rual deuhthaw chuan, Ruthii'n, "Teber, midang pawn mawng an shake vek aw. Ka tel leh dawn , ka duh danin ka lam ang" a lo ti nghal ringawt. A ṭhut pawh ṭhut hmaa â..

"Aw i thu thu" ka ti mai a. Lam loh chu a hlauh hmel phian. Rinpuii'n, "A ho lutuk, i duh dan dan khan lâm rawh. I thiam ber" a lo ti hlang hlang bawk. Ka chhang peih vel lo e a. 

Test pawh ka chhang ṭhain ka hria. A tam lo bawk a. Lunch chu Desy nen gate bulah kan han ei daih. Tui miau hek. Tomothya nen an inbiakna te chu min chhiartir a, a fuh dawn e. A star rei ve tawh bawk a, ṭha deuhin inngaizawng se ka tihpui hle. Taka! Ka sawi theihnghilh, nizan khan Bena khan min lo be ve ngei a, "Nula rim angin ka la rawn rim ang che" te a rawn tia. Ka mutchhuah tawh vang khan ka chhang zui tawh lo. Ani pui hi min ngaihzawn te hi a tum roh ang tih ka hlau. Ka type a ni hlawl lo. A hmel chhe lo, a eizawnnna lah a zahpuiawm loh. Mahse, duhzawng kan neih ve vek hi. Ani ang kha chu ṭhian atan an ṭha. Kan kal hrang tur gate bula kan din dun leh dat laiin Bike a rawn tlan a, ka tum vang êm êm pawh ni loin ka va hawi kher a, Bike khalhtu chu Zorinsanga ngei kha a ni. Mipa keimah ang rual vel tur a phur a. Kan piah lawk Guard lo dinna bulah chuan a ding a. Ka va en zui chu Desy chuan, "Hey..maki..eng nge ni leh ta hê hû" a lo ti nghek. 

Ka nui ringawt. Zorinsanga chu kan department kawng lo lamah a tlan thla a. Eng tak rawn ti dawn chu ni maw..chawhnuah lam kan zir leh ta a. Kan thiam ve ta viau. Ruthi pawh a châk bawk a, a tel ve leh. A lam lerh ropui si, tawr tawr mai a! Ka mit hi a lo kham leh thin. Mahse, engmah sawi ka tum tawh lo. Ka ning. Dress tur kan sawi a, Ruthi bawkin hmarâm leh kawrchei a rawt a, Puipuii'n, " aa. Ka chawn a lian si, ka zak. Puanchei emaw bih zawk mai ang u" a lo ti vat a. Kei chuan ka hreh lo ve ve. 

Ruthi chuan, "A ho ê, hmarâm nen a mawi ber,." A ti nghat a. 

"Hmarâm chu a mawi tho rualin a chhing angreng si a, chheih lam nen a inrem tehchiam lo. Mal a lang thui dawn lutuk" ka lo ti ve a. 

Ner nâng chungin ,"Chu! Mal lan i va hlau âwm ve..midang a hîp zawk dawn alawm" a ti khanglang a! 

Ka ter leh at, "Tak che hian âw..midang hîp nana hmaram te lo hman tum. A chhin vanga mipa in an en duh viau che i beisei a ni maw? Nangman feng la, kei nin a fual kan bih ang. " Ka ti nghet charh. 

Ruata a rawn inrawlh lo thei ta lo. Hmarâm biha hmaram nena mix kawrvar nena lam chu kan tithlu ta. Ruthi a chak lo leh tawh. A tum lian bêr bûr khawp mai. Kei an ṭawng fek fek ka kham bawk nen, hawn dawn chuan, "Lawmsang, haw rual ang" ka ti ru sap a. A hrethiam ve nge a bu nghut. Ruthi te hmaah ngei Lawmsanga chu ka kalpui ta a, naupangchhia viauin lang mah ila, chhungrilah kan indo ve nen a eng emaw ti nawm phian. Hawn lamah Desy ka hrilh a, a nuih a za ngang mai. Zanin chu hla zir ve kan tum kha. 

Mama a lo la haw lo. Nizan kan mut hnu khan a chhuak a. A dawr hnungah hian pindan a nei tho a, eng emaw hna laklawh chânga han riah changte pawh a neih thin avangin chutia a chhuak pawh chu mak kan ti lem lo. Kei phei chuan a mood chhiat vangah ka ngai nghet hmiah. Mapuii kha hmuh leh ka duh mang e. Heti taka ka û nungchang tidanglam thei chu…U Bawiha pawh TKa kha a zia tak deuh avangin zanin chu nula rim a tumin ka hria. Ani hi bialnu ngaihsak vak lo a nih laiin tunhnaitêah hian lak lungrun ve deuh a neiin ka hria. Tu nge tih erawh ka la hre lo. U Bawiha hi chu a zei tehchiamin ka ring lo. Hla zir turin ka chhuak a, biak in a hla lo bawk a, kein ka phei. Veivak an la awm nak nak e. Desy te ina ka luh rual chuan a nu Nu Parteii chuan, "Lalteber, i nu a awm em? Ani hi fehchhuah kha a mangnghilh em mawni le" a lo ti nghal a. "Awm..a theihnghilh a niang, a ṭhu der der" ka ti ve mai. Desy a hman ta bawk a, kan chhuak nghal. 

Kan va thlen chuan an lo awm nual tawh. Hruaitu ṭhenkhat ten min lo be ve luam bawk. Zirlai kan la nih avang hian a zawng zawnga inhmang tur chuan min beisei bîk lo. Ka aw hi ka têt ang aiin a lian reuh a, sang lah ka tlin ve zêk. Mahse, ka control thiam miau loh avangin a nalh thei ta lo mai pawh a! Contralto part ka sak leh tak nge nge kha. A nuam daih zawk. Break lai chuan phone kan hmet mawlh mawlh hlawm mai. Kan bula ṭhu keini aia la nau lehchhawng Rindika chuan, "Insual hi chu a thiam mawle..a chak leh ngei ang" a ti sup a. Ka beng a verh riau, eng nge ka hriat pawh ka hre lo. "Tu maw?" Ka ti hû. Min rawn melh zawkin a phone a bih lehnghal. 

"He pa hi mawle..Zorina a nih hi, zaninah an insual leh a, an bet pawh a tlem chhe lo. Nuai khat lek mawle" tiin a nui hak hak a. Ka va bihpui ve vat, an insual chu live-in a lo thlir mêk a lo nia. A hmun chu ka hrethiam chiah lo. Hmun zâwl, phul hmun chu a ni. Hrui hian an hung bial ve tak naa a derthawn hmel angreng. Hung bial chhungah chuan Zorina leh mi pakhat, sa muk lam hang rin ren, hmelṭha fahran lo hi an inhmachhawn ran a. Hung pawn aṭang chuan an lo au nuai nuai bawk. Hmeichhia an tel ve lo. 

Zorina chuan tawnzau dum a ha a, kekawr bul dum a ha bawk. A bitumpa erawh chuan kawr a hlip a, a sek ve thawkhat viau, kekawr bul pawl a ha bawk. Posi a la hârh hârh a. A chezia hrim hrim chu a confi hmel tawp. Hlauhthawnna ka lo neih ve ngawt chu le! Rindika phone chu ka lamah ka kuai hnai sauh sauh a, maktih hmel taka min melh hû pawh chu ka ngaipawimawh duh lem lo. A tumpuipa chuan hnek tumin a ban veilam chu a vai fua a, mahse, Zorina chu a petek zauh a, chutih rual chuan chu pa nâkah chuan a va hnek zauh a. Chu pa chu a pai deuh nawk, mahse, a zuang leh nghal thoh thoh a. Zorina va pawmchilh tumin a va bawh rawp a, Zorina a kun zauh, a din leh rualin chupa dulah chuan hnek dawpin a nghawngah a kuah zui a, leiah chuan a bawkkhup zawngin a paih thla ta a. A zo der.. a tho thei naa, a tlawm. A nâk leh a dul chu a dawm vung vung mai. Rindika lah chuan ngaihsan hmel fê hian, "Kha maw..ka tih rêng kha..a chak lo thiang lo" a ti ham ham. Kei atak pawh ka inthahdul ve thei hram. Zorinsanga kha ka hriat miah lohin ka lo ṭan ve hle a nih dawn kha..a mak mang e aw. 

Hla kan zir leh pawh chu ka kânghlâng riau. Ka sawi thiam chiah lo. Kan hawn hnu Viteii nena kan mut hnu thleng paw'n Zorinsanga hmel tak ngâk, mitmeng thim raih leh tawhkhirh hmel tak ngawt chu a ni ka mitthlaah châm..ka inlet thawk a. "Kher kher a" ti sapin ka phone ka hmet êng a. Dami msg tur ka type nghal zat. 

"Dam, Zorinsanga kha tu nge a nih?" Tih thu chu..ka zawhna khian awmze ril tak a nei tih Lalchhandami hian a hrethiam ngût ang e maw…