Zor 17

ZÔR.. (17)

Ziaktu : Toni Râlte

Zorinsanga chuan Mama nen kan inkara thildang awm angin a ngai hmiah tawh tihna a nih chu! Kha thlalak kha tu lo lak nge ni teh hrep ang aw. Arema ka text nghal a. 

"Mama nen kan thlalak kha khawi aṭanga i dawn nge?" Tiin. Ani pawn a seen vat a, "Ehe! I hmu mi? Engtin?" A rawn ti daih! Buanga ss a ni tih sawi kher ka duh lo. Eng emaw zawngin Buanga an ngaih ka hlau. 

"Ka ṭhian pakhatin min lo thawn a. Mawh..tu hnen aṭangin nge i dawn?" Ka ti leh a. 

A hnu daihah, "Ka cousin min thawn a nia. Khalai Hotel bulah khan dawr a nghak a. " A rawn ti. Chhui chhuiin awmzia a nei lo tih ka hria. A hmu turin an hmu vek tawh. 

Mama ka han text a, thlalak chu ka thawn tel bawk,. "zorina chuan kei leh nang hi unau angin kan inen lo angah a ngai a. Kan inkar pawh a titâwp. Nang lah police in an lo man ve kher bawk che nen" ka han ti duah a. 

A mu tawh nge a seen thei ṭhak lo. Kei erawh ka harh tulh tulh thung a. Zorina a la meng bawk a tiin ka va text ta chawt a. 

"I thlalak hmuh a ṭanga ngaihdan i siam ngawt a nih chuan i tisual hle ang. Thil hrilh duh che ka la nei ṭeuh a, i rilru pawh i thlak ngei ka ring.." tiin. A seen ve nghal mai a. 

"I lak aṭangin engmah ka hre duh lo. Ka hriat tur chin ka hre tawh. " A rawn ti. Na ti tho mah ila, Zorina hian min block hmak loh danah eng emaw ti tala ka hrilhfiah a la beisei ve a nih ka ring. Chuvang chuan kan inṭhen emaw ṭhen lo emaw thudik hi chu a hriat ngei ka duh. Mama hian thil nihna dik tak han chhui chhuak se la..

"Ih maw, ka nu ka hre tawh asin. Zaninah khan Hotelah khan Mama hoin kan va hmu a. Chu chu a nia hrilh che ka tum..tin, ka pa pawh hmannia boral Mama pa te pa tho kha a lo ni bawk. Thil tam tak a thleng a, I nu hian buaina tam tak min thlen a ni. I hnenah eng thu nge a sawi ka hre lo. Mahse, Ka unaupa ngaizawng tur khawpa inlaichinna ngaihlu lo ka ni lo. Engkim hi i nu thiltih vek a ni.." tih thu ka thawn ta a. Ka zahpah duh tawh bîk lo. A nu laka phuba lak tum si, tuna kei aia a nu a ring leh zawk si hi ka hrethiam lo a ni. A seen a, ka nghak deuh reng a nia, a rawn reply miah lo. Kei pawh chutiang boruak hneawm tak chu ka hriat loh kârin ka lo muthilhsan ve ta a. 

Class kan kal tawh rih lo va, ni 2 study leave min pe ve. Kei lah chu ka'n zir tlem khawp a, chuta karah rilru hah leh natna tam tak ka la hmachhawn zui. Tuisik ka in laiin Mama a rawn chhuk a. Ka msg kha a hmu ve chauh nge ni, "Vawiinah ka va hrilhfiah ang" a ti teh ngawt a. Ka nu te an awm ve bawk si,. Ka chhang zui lo. Tukṭhuan pawh kan unau leh Viteii te nen kan ei a. Ka nute chu an ṭhu tlat! A ho êm mai. Kan ei kham a, kan tihfel leh vek hnuah, "Lehkha ka'n zir ve ang e. Vite, i buai deuh chuan min lo ko hreh suh aw. Kan exam a hnai tawh sia" ka ti lâng lâng a. 

"Va zir rawh, engmah buaina tur a awm lo. Thingpui tui tâwk ka lo lum ang che" tiin a nui sâng. Viteii hi kan bulah a awm rei telh telh a, a felzia ka hrechiang tulh tulh. Au Bawiha nen te hian ni daih se..ka ngaihtuahna avang chuan ka nui hawk. Nuihna te hi a hlawha hlawhchhuah a ngai ta fô mai. Kan thil nuihzat zawng te lah tu emaw tana nat vawng vawngna a lo ni tawh a. Kan tunlai khawvelah hi chuan a chhel leh midang ngaipawimawh lo lui thiam apiangte an damkhawchhuak a nih ber tawh hi a! Thil pakhat ka vei deuh erawh "midang tinui tura tu emaw tihnat a nih dawn ai chuan, tumah tinui lo ila a ṭha zawk" tih hi. Kan tunlai ṭhangtharte mamawh ber pawl niin ka hria. 

Ka han inchhawp hnawk ve nuaih a. A tam lutuk a, zir tur ber pawh ka hre lo. Lehkha zir dawn veleh hian phone khawih mai mai te hi a nuam phian a, a hma zawnga engah mah kan ngaih loh, Games naran mai mai te pawh darkar chuang kan khel peih fô! Exam hian kentel zawng a lo ngah ve khawp mai. 

Rilrua Zorina leh Mama inbe tur ngaihtuah rân chunga lehkha zir chu a sâwt lo viau naa, zir loh tawp ai chuan a ṭha zawk tho. Chhun thingpui in laia phone ka khawih chuan, "Sangbera hi rawn kaltir turin ka ti che em ni? " Zorina hnen aṭangin ka dawng. 

"A lo kal elo!" Hre lo niawm takin ka ti a. 

"I hria alawm." Tih chiah a sawi. Mama ka call duh rih bawk si lo, an inbiakna chuan rah ṭha a chhuah lo em mawni dawn le..

Ka inzir tui ve lai takin Buanga'n min lo call a. 

"Hei an chhuak dawn, a ning tawh sia, in lama inenkawl theih a ni tho bawk a, an chhuak ta mai" a rawn ti a. A la awm a nih chuan naktukah ka kal ve leh ang ka ti rilru kha a nia, an ina an hawn daih chuan ka kal ngam awm si lo. Kan inṭhen hlen tak tak thei ang a..ka rilru a buai lâwk. 

"A va lawmawm ve..lo dam zel rawh se" ka va ti a. Ka inthunun nasa hle. 

"In inkar pawh kan lo sawipui reng che a nia..a rilru hi a la dam hleithei lo va, hmanhmawh lo mai rawh aw.." a rawn ti..

"Nia, engkim a ṭha mai ang" ka ti ringawt. 

MSP lam khan an insual hun tur kha sawn an ti tawh naa, an ngaihtuah chian leh hnuin Zorina dinhmun leh a dam chian vâk hun chu a la rei deuh dawn avangin a bitum tur Rinawma te lam nen inremsiamin Rinawma chak zawka puan a ni a. Chutihrualin Rinawma'n a lawmman lak aṭangin hmun 3/1 a pe ve dawn thung, tin, Pahnihna lawmawm kha an pe tho bawk. An khawsak dinhmun an hre ve bawk nen..an tiṭha ti tawh mai ang. 

Tlaiah a ngaitê bawkin Viteii ka pui leh a. Kan titi suam suam mai. Ka nute erawh an chhuak leh a, khaw nge an kal dawn ka hre lo. Mama pawh a lo la haw lo. Dar 4 leh a chanve a ri ṭêp tawh ang tihin Au Bawiha a rawn haw a. A kut veilam zunglai chu a tuam lûk mai. "Ngati nge?" Kan lo ti vat. 

"Thingzainaah ka ti palh a, a bung lo hlauh" a ti mai a.

"Ka inbual ang a, ka inbual zawhah min tihfaisak ta che" a tih chuan, "Awii mi râp ee..Viteii tihtir la, kei chu tiang hi ka hmu thei lo" ka ti vat. A khi suk a, "Vite, tlawmngai mai rawh aw" a ti a. Viteii pawh chuan, "Yesii.." a lo ti var. Zing lama ka thil ngaihtuah kha ka ngaihtuah chhuak a, ka nuih a za hle. 

Kei pawh ka inbual a,. Ka work out leh tawh lo va, exam zawhah ka bei tak tak ang ka ti rilru deuh. Rilruah Zorina a thi thei lo, dik tak chuan ka la la lâp ti mai ang, kan tawp hlen ka rin loh luatah hian ka nat tur ang pawn ka la na thei lo. Nat ka duh e tihna ni lovin..Zorina hmuh leh phawt ka duh a ni. 

Ka sam ka chhemro a, a bengchhen deuh vang nge min kohna ka hre thei lo a niang. Mama a rawn lut hlawl mai. Hair dryer chu ka off nghal a. 

"Lehkha i lo zir maw?" A ti a. 

"Umm..Zorina i va hmu mi?' ka ti a. 

"Hmu e. A tawhkhirh zêk a.." a ti sup a. Mama meuh paw'n tawhkhirh a tih chu a luhlul thawkhat ang tih a lang mai. 

"Eng nge i hrilh?" Ka ti hâ a. 

A kekawr ipte zen ṭût chungin, "Thudik ka hrilh a, mahse, finfiahna ka nei lo va. A rilru a la khauh rih..in tawp hlen erawh ka ring lo" a ti ta a. Hma kan sawn tehchiam lo naa, Mama va kal chu pawi ka ti tehchiam chuang lo. An chhuah thute pawh ka hrilh ve a. 

A chhuah hmain, "Zaninah i nu lem lem nen kan inhmu dawn a" nui chungin a ti a. 

"Ka lo kal ve" ka tih chuan a lu a thing nur nur, "Lehkha i zir a ṭha. In exam a hnai tawh" a ti nghut. Ka hmu ve châk asin le. Engtin chiah nge Mama'n chet a lak dawn ka hre lo naa eng emaw tak hmasawnna chu a rawn hun chhuah ka beisei tlat. Ka nute chu zanriah ei hunah pawh an rawn la haw loh avangin kan eisan ta a. Au Bawiha chu a hnaah a chawlh rih deuh a ngaih hmel. A intipalh ve fô a, chutin kan la serious lem lo. Mipa a ni bawk a. 

Thleng ka sil laiin ka nute chu an rawn haw a. Viteii thingpui an lumtir nghal. 

"Pi, chawhmeh hi ka tilum dawn em? In ei nghal dawn nge?" Viteii'n a tih chuan, "Kan ei tawh.." a lo ti hmuk. 

Ka thleng sil zo, ka pindana luh ka tum chu ka nu bawk chuan, "Teber, lo ṭhu teh" a ti nghat. Kei pawh ka ṭhu ve mai. Thingpui a dâwt khalh hnuah, "I nuin hmuh che a duh a. " A ti a. Zanina Mama nena inhmu tur kha a nih ka ring. 

"Ngati nge?" Ka ti a. 

"Ngati nge ni ang? I pa a boral tawh a, i û te lah mi hrang an nia, a ngaihtuah che a ni mai lawm. A bula awmtir che a tum pawh a ni maithei..i hmu ve châk lo em ni?" A ti hlak hlak a. Ka nuih chu a za deuh naa, "Hmu châk ve e. Tun hnuah daih a rawn lang a. A ho ê" ka ti liam puat. 

Nuteii nen an inmelh ralh chu ka hmu reng. Tum an nei leh pek a nih dawn hi. 

"I va khawlo tak, mahni hringtu ngeite chu hmuh châkin an za ruai zel a ni ngai a. Naktukah a rawn kal dawn a, inhmu u la, chaw eiah te pawh kan sawm dawn nia" a ti ham ham mai. 

"A ṭha alawm..lo kal se. Mahse, a bulah chuan ka awm duh kher lo" ka ti a. A ner sak. Min nawrluih vak chu a la hreh rih ang. A zia a thup rih a la ngai tlat. 

Lehkha ka zir hmain phone ka khawih leh zuai a. Ṭhianho Groupah Dingi'n, "Ka pa te chuan an hre tawh a. An thin chu a rim khawp mai. Mahse, chhungte na nâ na chuan min khawngaih leh si a niang. Exam chhung min awmpui turin ka nu a rawn chhuk dawn" a ti a. Thinlung takin ka lo lawm ve tawp. MA chu nau pai chungin a chhuak ve dawn a nih hmel. Final semesterah chuan a puar ve luah tawhin ka ring. 

."U Tluanga chu sâwn man in ṭhing em?" Ka va ti a. 

"Ṭhing a, Ka fa a ni lo a ti tlat sia..min pe ta lo. Lehlamah sâwn man min pe ta se an inneihna tur a nghawng dawn sia..pawi ka ti lo. Tihian min chuhpui thei lo ang a. Kan in luah pawh exam zawhah kan sawn ang" a rawn ti a. Nia, U Tluanga'n nupui a neih phei chuan in hnuai leh chunga khawsak ho chu a nuam vak dawn lo tih ka hai lo. 

Zoi'n, "Teber, tunlai in buaina hi sawi i tum miah lo mi?" A rawn tih chuan ka meng kâwk. Dik tak chuan ṭhiante mah nise, kan buaina hi sawi nuam zawk zawk a ni bîk si lo va, ka ngawi tawp mai a ni. 

"Nia, hmaichhana kan awm hunah sawi ka tum a" ka ti ta ngawt a. 

Desy'n min lo chhan vat, "Nia, hrethiam r'u, exam hnai tawh nen" a rawn ti ve vat. 

Dami'n, "U Sangbera an man ringawt hi chu kei chu ka ring thei lo. Zorina thiante pawn an ring lo. Amah Zorinsanga hian eng nge maw a hriat ni.." a rawn ti duah a. 

"Zorina chu an rawn chhuak ta sia, an inah te pawh va kan ve ila" nuam lo ti ru deuhin ka ti a. Va kal dawn ta ila, keimah chauh chuan ka hreh êm a ni. Dami chuan, "Nia, exam ṭan niah hawn pahin peng ila" a rawn ti a. Ka pawm thlap e. 

Mama pawh a chhuak tawh. Au Bawiha erawh a kutin a tur ve deuh nge inah a awm ve a. Parvula nen an inngheng leh reng tawh. Au Bawiha awm loh lai hian ka nu leh nuteii te hian Para hi hauh an hrat a, vawikhat chu ka khak tawh. Au Bawiha awm laia hau ngam tawp si lo. Para kher hi chu ui azawnga hnawksak lo ber a niawm e. A zun leh ek a thlahdah ve si lo, inleng kan neih laiin a teikual sek ngai bawk si lo. Hmel thar a hmuha a lo bauh ve ṭhin hi a ni mai e. 

Helhkam nei rûn chungin lehkha chu ka zir a. Sawi tawh ang khan zir tui laklawh a awm ve ka tih kha..dar 9 velah chuan ka rilru pawh ka pe thei ta viau. Dar 10ah thingpui ka in a, Viteii leh ka nute an mu tawh. Mama hi a lo la haw lo a ni maithei. Ka in laia whatsappa ka lut chu number hriat ngai loh aṭangin msg ka dawng a. Thlalak ringawt a ni. 

Thlalak ka hmu chu ka phâwk deuh. Zorina, ṭhutthleng seia hahdam hmel taka a ṭhu lai leh hmeichhe pakhat ka hmuh tawh hnu mal chunga a ke a hlang lai a ni. Camera lam an rawn hawi a, an nui sâng bawk. Hmeichhia chu ka zoom vak vak a, ka hre ta. Vaivakawna Desy nena kan hmuh, a cousin anga a sawi kha a ni chiang. Kan inrual khat vel maithei. A sam chu a sen lek lek a, a vun a ngo bawk a, a inhmeh angreng. Hmai sin lam deuh, thinchhiat hmel lek lek a ni. Mahse, hmeichhe chhe lo tak a ni tlat! A cousin anga ka ngaih avangin ka thîk hran miah lo. 

Mahse, "Eng nge a awmzia?" Ka va ti ta tho. 

"A hlimzia hi" a rawn ti! Min hria tihna em mawni le..nge Zorina'n kha thlalak kha thawn turin a ti zawk. 

"Chuan?" Ka ti ringawt. 

"I tel lo hian a hlim ka tihna mai a nia.." a rawn ti ngat! Awmzia a nei ta deuh e. 

"A cousin kha i niin ka hria" ka va ti a. 

"Cousin satliah ringawt chu kan ni lo..I û nena in inlaichinna ang deuh kha a nia" a rawn ti ta ..ka ner sawk, "Zorina'n a tihtir che a ni maw?" Ka ti vat a. 

"Tihtir lo..mahse, min hriatpui vek e. Hei i msg pawh kan chhiar dun" a rawn tih leh chuan ka na zawk zawk..ka zaidam lo bawk nen, ka type zawt zawt a, mahse, ka clear leh vek. Fîm taka inngaihtuah pahin muangchangin ka type ta a. 

"A ni maw? Chu! Zorina chuan a duat ve viau dawn che chu a. Kei pawh pa hmun, nu hrâng mah ni ila, Mama hian min duat khawp mai, ka tan unaupa ṭha ber a ni" tih ka va thawn. 

Ka thinrim ve tawh bawk si avangin Zorina ka text ve leh ngat bawk. 

."Hetiang êm êma i lo danglam chak hi ka rin phak bak a ni e. Aw le, i farnu, i cousin nen chuan mu dun ula, fa te in nei dawn nia.." ka va ti deuh hrep. Ṭawngkam ka thiam loh a leiah hian ka ṭawngkam hi a na ṭhin. Zorina lah chuan a seen thei malêk a. A tlai ve tawh bawk si. Ka rilruah lehkhazir lam reng reng a lang thei tawh lo. 

Zorina cousin lah chuan, "Engpawhnise, ani pawn a tibuai lo che u a, keini pawh min rawn tibuai lo a niang chu" a rawn ti hmak hmak a. Ka kek châk hle mai. A hming lah ka hre si lo. Zorina lahin min chhang thei si lo. Buanga ka va text ta tawp a, "A cousin kha tu nge? An inngaizawng ami?" Ka va ti hmiah. 

"Eng a?! A awihawm loh ê..a cousin chu Asangi..ngati nge a" a rawn ti hû mai. 

Min rawn text dante chu ka ss a, ka va thawn ta vek. A hnuah, "A va zâm lo ve. Zorina te nen an in chhun dan a hla ve deuh tawh a, a lo ngaizawng ru reng a niang. Zorina chuan chutiang zawngin a en ka ring lo" a rawn ti duah. 

"Engtin nge Zorina nen kan buaina te a hriat theih?" Ka ti si..

"A hre lo thei lo vang. Zan tirah khan a roomah kan ṭhianhoin kan sawi leh a, Asangi pawh a awm ve reng a, a hre ve a niang.." a rawn ti a. Ka number hi chu Zorina phone aṭangin a la a nih ka ring. Rilru dam lo chungin ka mu lui ta ringawt. Ka zung sek lehnghal. 

Mak deuh mai chu ka pa a borala loh theih loha a ruang ka han khawih leh ka han chul aṭang khan mitthi han hlauh vakna kha a reh ve deuh a. Mahse, khati chung pawh khan ka pa thih sarhû chhung kha chu Viteii nen kan mu dun zel tho. Mahni pate êm hlauh kha ka duh bik lo va, ka hneh ve ka ti mai. Mi hrang chu ka la hlau maithei a ni. 

Ka mu tlem takzet a ni. Ka tho pawh ka rit bûr rêng a. Mama lo hawn lai ka hre lo. Ka thawh hnu lawkah a rawn pen thla chhak chhak a. Ani chu a hmel hmuh a nuam angreng. Sawi leh sawi hnu khatia misual ang hrima man a tawhna khan an sumdawnnah pawh tlemin nghawng a nei lo thei lo va. Mahse, a ṭhiante leh a sumdawnpuite a lamah an ṭan tlat avangin an chhiat tur angin an chhe lo ka ti mai. Khawiah mah a zin thei lo thung. Court vat vat se ka ti. Zorina khawihtu te pawh bail-a chhuahtir an ni tawh a, Zorina te tan chuan a lungawithlak loh ka ti..Mama chungchangah pawh dik taka ngaihtuah chuan ka û a nih vangin Zorina te lam ka ngaihtuah lo mai mai a ni. Amah khawihtu te ngeiin, "Sangbera min tihtir a ni" an tih miau chuan Zorina te tan chuan a dika pawm mai loh chu kawng dang a vâng ve êm bawk a ni. Ka ûin a dodalzia a hai bawk si lo. Tin, kei tak pawh ka inthiam lo ru fô! Ka û a nih vang maiin a dik lohna leh a sualna ka lo hmuh kân êm ni ang tihte ka ngaihtuah..Mama hian khang misualte kha a lo chhawr tak tak lo vang tih hi ka sawi thei bîk miah lo. Thudik lah a rawn lang nghal ruak si lo. Rilru buai deuhin a ni ka awm ve tho..

Mama chuan thingpui a in a. "Vawiinah mikhual i nei dawn a ni maw?" Tiin a khi suk a. Nizana ka nu nen kan inbiakna ka hrechhuak nghal. 

"A nih hmel..chuan eng tin nge?" Ka ti hliai a. Ka nute an la tho lo. 

Zawitê hian, "Luahpuii pawh a rawn kal ve dawn" a ti a. Ka bu nghat. Vawiinah hian thil a nih dan tur angin ni vek law law tawh se ka ti mang e. 

Ka inthiar pahin phone ka hmet a. In nih ve tho kha aw..inthiar paha phone khawih hian inthiarte pawh a tinuam bik. Zorina msg a lo awm ran e. Rang fahranin ka hawng a. 

"Eng thu nge maw i sawi le? Nangmahni ang turah min ngai suh" a rawn ti. Nia, nizan khan Asangi avangin ka va ankhum hrep kha a nia. 

"A rawn confi hrep a! I cousin kha..hehe" elsen zetin ka va ti ve hmiah. 

"Sangbera angin maw?" A rawn ti ve zat. 

"Ani chuan thudik a rawn hrilh che a. A mipatpui lakah khatiang khan a tlâwm ngai lo. I âwih theih ngang loh nachhan chu Asangi'n i rilru a luah tawh vang a nih kha.." ka va ti hmawk hmawk. Ka bulah phei chuan awm se ka melh rum dan turzia chu..

"I ṭawng ṭeuh zel sia aw.." a rawn ti duh lek. 

"Ka ṭawng ang chu..nang pawh i lo fihlim tawp si lo, i fihlim loh vangin min puhchhiat i tum a.."ka va ti leh nghek nghek. 

"I â êm ṭhin êm mai" a rawn ti..a tawi thei sia aw..hmela hian ka thinrimzia a hre lo mawni le.

"Thil ka zawt ang che. Min chhang la..chuan, rilru ka siam fel ang. A ṭha em?" Ka ti ta a. Bathroom aṭangin ka chhuak tê tê a,khumah ṭhuin mûk takin ka inngaihtuah bawk. 

"Aw sawi rawh" a rawn ti a.

Tlâwm inti ru takin, "Kan inṭhen em?" Tih thu ka va thawn ta. Heta min chhan dan a zirin ka awmdan tur a chiang ang. 

"Engtin nge min sawisa tura misual ruaitu farnu leh ka nu pasal fanu chu ka hmangaih zui zel theih ang?" Tih thu a rawn thawn chu vawi 3 ka chhiar chhuak. Zahpuiawm takin ka mittui a luang bawk. 

Khur dar dar chungin ka type a. "Aw le..ka hrethiam e. " Ka pride sawm khawm chungin ka ti thei hrâm. 

Khumah ka mu zangthal a. Ka ṭah a chhuak ngawih ngawih. Zingkar aṭangin ka mood a chhe hle chu a nia. Zorina, ka mipa duhthusam tia duh leh lungchim taka ka lo ngaihzawn nen kan inkar a tawp ta chu a nia. Nizanah te kha chu na viau mah ila, amah hian thutawp a la sawi chiang tawk lo tiin beiseina ka la nei ve hram hram kha a nia. Mahse, hei tunah chuan amah ngeiin min hmangaih zui zel theih loh tur thu a sawi ta..a tawp ta vek e. 

Tukṭhuan pawh tihtham ka ei lo. Ka luak a chhuak. Zawhna dawn ka hlauh avangin, "Thingpui ka in a, ka ril a ṭam lo reng reng" ka ti tlat. Ka tihfel zawhah in chung lam ka han tifel a, Viteii a insu bawk. Ka chet mual mual laiin Viteii a rawn au tuar tuar a, Au Bawiha nen rang lutukin kan zu tlan thla. Viteii chu parvula bulah lo ṭhuin mangan hmel zet hian, "A luak" a ti khur dat a. Au Bawiha'n rang lutukin a va en nghal, Parvula chu a mutna bul chhuatah hnâng thlir thler hian a lo luak a, a rimchhe em êm lehnghal. Amah lah chu a chauh hmelin a mittui te chu a tling pum mai. A pu chuan a zut kual a, "Ti nge? Tukinah eng nge i ei le.." a ti sûp sup a. A pu kut a lo liak hlup hlup. Ṭap ang deuh hian a hram ruai ruai a, "A awmdan hi a dik tlat lo. Motor ka khalh thei rih si lo va. Tei, ka pawm ang a, scooty-in han chhohpui mai teh ang" a ti vat vat. A hmanhmawh danah Parvula chu a ṭha chiah lo a ni ngei ang. Kei pawn rang takin chabi ka va la a, ka awmhmun thawmhnaw nen ka chhuak. Para chu a lian tawh sia, a pu pawh chuan a zo lo lek lek a ni. Mahse, engtin tin emaw an inpawm thei ta a. A che lo va, a tal hek lo. A zawi nguai ringawt. Ui hri parvo kan tihte khan a nang êm mawni le..chak zetin kan tlan chho ta a. Au Bawiha chuan a be mawlh mawlh mai. A tana a hlutzia ka hrechiang ve êm a, ka lo thlaphang ve ngawih ngawih. Clinic kan thlen chuan awm an lo tam lo, pahnih kan nghah hnuah kan tlan luhpui a. Doctorin a han en vel chuan, "Tun hnaiah hri a rawn tam leh tlat mai a. A man ve a nih hi. Hei hi a chawah phulsak ula, hei hian zing karah in jection dawn nia" tiin damdawi a chawh nual. A man a to hlawm êm êm lehnghal. Tiang chuan Parvula chu kan tlan thlak pui leh ta phawt a. In kan zu thlen chuan ka nute leh hmeichhe pakhat an lo awm! Ka nu anga a sawi chu em ni ang? 

"Khawiah tehlul nge in lo kal a? I nu a rawn kal dawn ka ti a ni lo'm ni? Kan nghak rei lutuk che u" ka nu chuan a lo ti tan tân a. Nia, para a en chhung kha a rei ve deuh a, darkar 2 dawn chu kan thang ang. 

"Hei Para a damlo a" ka ti mai a. Ka zia ka thup ve deuh. 

"Khatiang ui cho mai mai vanga buai pherh êrh reng mai" ka nu chu a ṭawng ring lo naa, Au Bawiha bengah a ring hle ni tur a ni. 

"Ngawi hmak rawh. Nang hmeichhia kha" a ti fiak ṭhak. Chutiang taka ka u hmel nelawm loh chu ka la hmu ngai lo . Ka nu pawh hnâra khawn ang hlauh..a ngawi chiang teh e. A sawi loh tur a sawi ve ṭâlh bawk a ni. Ui ngaina tu tan chuan 'Uicho' han tih maite hi a nat dan tur ka feel thei. 

In chunga ka tihfel bak kha Viteii'n a lo tifel diam a. Ka nute bulah chuan ka ṭhu ve ta a. "Hei i nu chu a nih hi..reitak i hmel hmuh châka lo nghak tawh tu che chu" a ti a. Kan inchibai. A nulian lo va, a hmai a dûk nasa, a sam chu a uk deuh a, a dar thleng vel a ni. Ka sawi thiam danin a ṭawp riau! A kut leh ketin te chu a uk khuih mai bawk si. Zu a heh hmel riau bawk. Ka lo hriat tawh dan kha a ni miau a, ngaihdan ka neihsa chu a thiangin ka hria. Tin, a mitmeng chu a phakar! 

Mahse, ka be ve hram hram a. Chaw a rawn ei dawn si a, Viteii a buai bawk nen, "Viteii ka'n pui ve ang e. Lo inkawm r'u" tiin ka thawhsan ta a. Engmah an sawi lem bîk lo. Zawitê tê hian an phun sêp sep mai. 

Ka thaw a sa deuh a, kan bawl zo thawkhawt bawk nen ka va inbual a. Chutihlai chuan ka nute chuan tv an en a. An nui hawr hawr reng mai. An hlim phian a! Ka inthlak zo ka va chhuak chu Mama a rawn haw ve chiah. Mama hnungah ka nu bakah ka nî te nupa an rawn lang ve zat bawk. A hnung berah Police Officer leh constable an rawn lut ta. Ka nute bakah kei ngei pawn hamhaih takin ka lo melh,. Ka nu chuan, "Eng..eng nge a awmzia? Sangber" a ti bah nak a. 

Mama chuan hahdam hmel tak hian, "Awmzia a awm lo ka nu..Inspector hi misual man turin ka rawn hruai " a ti dam thlup. Ka nu mitmeng chu buai niaih niaih tak a ni. 

"Tu misual maw?!" A ti nghek. 

Mama chu va kal hnai hretin, ka nu ang inchhal hmaah chuan a va ding chat a. "Teberi nu anga i lo inchhal ṭhinna hun chu a liam dawn ta a ang hle mai..tiraw?" Nuihsawh rawngkai hian a ti a. Chu nu chuan hamhaih zetin a lo melh reng ringawt. Police lam chu hawiin, "Inspector, hei hi a ni e, ka farnu hringtu anga inchhala vawi tam min blackmail tu chu" a ti fiak thak a. Police ten an rawn hnaih nghal ruak..

Mahse, chu nu chu a tawlh hnung a, a ban pahnih pharin, "Ngawi lawk teh u..lawkin, kei ringawt min man thei lo vang. He mite pawh hi in man tel a ngai ang. Anmahni min tihtir vek a ni" a ti ta chûl a. Ka nu chuan rum elkhenin a lo melh.

"Lalnunpui, eng nge i sawi a? Khanglang a che. Min rinlut reng reng suh aw" a ti hlawih hlawih a. 

"Ekhai! Chu! Tawlh leh mai i tum elo? Ka ka ka an chuan nangbak hlin tur i awm dawn lo a nia" Pakhati'n a lo ti bawk. 

Officer chuan, "Aw le, a tha e. In pathum hian min rawn zui r'u le.." tiin a hote chu a mitmei a. An va hnaih nghal. Ka nu chuan, "Engmah ka hrethiam lo, tel vena ka nei hek lo. He nu hi Teberi nu angah asin ka lo ngaih,? Tu nge Teberi nu chu ni a?mawh u. Sawi ta che u" a ti tuar tuar a. A tal nasa bawk si. 

Ka nu chuan rawn panin inringtawk zet hian, "Min hre tawh lo maw? U Mathan,. Keimah Luahpuii kha ..keimah hi Teberi nu, a hringtunu ka ni" a ti fiah ta kâk a. Ka nu chu a meng tâl tawp tawp thei. Ka nu chuan a lo la hai lo nasa a niang e …"Engtin nge?" A ti ringawt. Rei kan buai hmain an hruai ta phawt a. A la awm te chu kan ṭhu ta ṭhap mai. Ka nî chuan, "Kha mihring kha Mama lo vau thintu a nih hria i la aw..tiang thil kha Mama pawn a tawn a ngai lo tur" a ti hlak hlak a. 

"Engkim a fel tawh alawm..rin ai takin a lo awlsam kha. " Mama'n a ti a. Kei pawh a awlsam ka ti. 

Chumi tlai chuan ka nî te chhungkua nen, ka nu te nen chawhlui kan kil ta a. Kei pawh ka chhungril na nget nget khan min kiansan zauh châng a awm a, ka lawm hle. Mut hun erawh ka huphurh thung a ni. Zorina lah a reh veng veng mai si. Mama chu in chung aṭangin a rawn chhukthla thoh thoh a , chhuah a tum niin a lang. 

."Police station aṭangin I nu nen min rawn ko a, Kan va phei ang e. " a ti a. Sana a melh zauh. Ka nu pawh a ding ve nghal. 

"Ka lo kal ve" ka lo ti vat a. 

"Ni lo ve, exam hmachhawn tur i nih kha" Mama'n a lo ti dam thlup.  

Ka chau viau naa ,ka mut a chhuak thei lo. Mama te ka lo nghak deuh kha a nia. Eng êm êm nge maw an va tih ang le..engmah hi ka hrethiam tawh lo e a. Kan ṭhianho groupah voice msg ka thawn a. Kan chhungkaw buaina te chu ka sawi ta vek. Inhmuh hun ka nghak thei lo, ka ipik lutuk tlat. Zorina nen kan inṭhen thu ka sawi bawk. Ṭhiante chuan min rawn hnem liam liam a. Dami'n,"Zorina pawn thudik a hriat chuan a ngaihdan a thlak êm êm ang. Hrethiam rawh , a rilru a la buai ve dawn êm a ni" a rawn ti a. Hriatthiam ka duh a, mahse, mahni chauh dik leh fel nia inhriatna khawvelah ka la cheng ve miau si. 

Desy'n, "Keiman ka'n hau hrep teh ang. U Sangbera nen a hmehbel hrim hrim che u hi ka lawm lo. Ka duh lo reng reng" a rawn tih chuan, "A ngai lo" ka ti tlat. Kan chhungkaw buaina, ka nu diktak leh a lem tih te, ka nu Mathani chetdan te chu an sawi zui vak lo. Hrehawm ka tih ve an hlau a niang. Nia, chhungkaw thil hi chu sawi zui vak a nuam lo ve êm a ni. A zahthlakna chen a awm bawk si. 

Zorina msg ka dawng ve leh ta hlawl mai. Ka hawng duh lawk lo va, chat ka clear vek hnuah ka open chauh. 

"Ka nu in lo mantir a! Hehe..ka rinsa ang zelin thil a thleng" a rawn tih chuan ka rum ngal ngal. Thinrimna hlirin ka khat. A thu dawnsawn dan dik lo lutuk hi engvang nge ni ang le?!

"Kan mantir lo e. Thil tam tak a lo tisual tlat a tin ni..ka nu tak ni lo, nu lem lem a lo ruai a. A chhan chu sum leh pai a duh vangin..chuan, i nu laka phuba lak tum vanga min ngaizawng si, i nu chu i va ring ta si ve..i nu nen in lo thawk dun hial a nih ka ring. I nu fapa i ni bawk a, sum bak i duh loh rêng hi..kei pawh pawisa vang chauha min ngaizawng i lo nih mai mai hi. In tenawm nufa khawp mai" ka ti hmiah hmiah. Ka kut a khurh nasat vangin ka type dik lo nuai mai. Mahse, ka thawn tho. Ka thinrim lutuk chu ka sa vek thei. Zorina chu ka hua, ka ṭawngkam te kha a nain hmeichhe rapthlak tak angin ka lang tih ka hai lo. A pawi ka ti lo. Ka puakkeh tawh a ni mai. 

A reh vang vang a. A chhiar nawn sek a nih ka ring. Nâ chu a ti ve maithei a ni. 

"Malsawmsak leh!" Tih thu chiah a rawn thawn nia! Hmela hi..ka duhkhawp hlawl lo. Duh leh min rawn ankhum ve hrepin ṭawngkam pawh rawn duhtuilo se ka duh zawk. 

"Ka sawi dik hle a ni maw? Tiraw? Sawi tur pawh i nei lo a nih kha" ka va ti leh hmak. 

"I sawi dik lo lutuk zawk a. Sawi tur ka hre lo" a rawn ti a. 

"Asangi nen in mu dun mêk em? A kuah che mi? I la na awm sia, i che thei awm si lo" ka va ti leh ngat. Ni e, Teberi hi a va rapthlak êm êm in ti ang. Ih maw u, kei chu ngaihzawng ka neihin midang tlakzeh ka duh loh bakah intihthiam loha ka thinrim tawh chuan 2nd thought ka hmang hman ngai lo. Ka rilrua awm ang ang ka sawi hmiah hmiah zel. A let leh ka ngaihtuah tawh lo. Chutiang chu mi fing lo te awmdan a ni tih pawh ka hre hnehsawh lutuk. A awmzia chu e…zorinsanga hi ka lo duh êm a nih hi. A bak a awm lo. Chân ka duh lo va, inthen ka duh bawk si lo, ka tihngaihna hre tawh loin tihian cheap takin ka khawsa a nih hi..mahse, ka inchhir eih lo aw. 

"I ṭawng duh dan chu aw..min lo hmangaih takzet a nih hi.." a rawn ti! Vawi 10 vel ka chhiar nawn. Awmdan tur leh chhan dan tur ka hre miah lo. Mahse, a hun lo puiah he chapona tereuh hian rawn lanchhuah a ching reuh a. 

"Farnu te pawh mutpui duh chu engtin nge ka hmangaih zel theih ang?" Ka ti ve ngat. 

"Muttui..exam tur i nih kha..good luck.." a rawn ti hmak. Dar 12 a ri mêk bawk. Exam tur ka ni tih ka hrechhuak chiah! Ka ti tak tak..awiii! Malsawmsaki hi ka â zo tawh chu a ni e. 

Mahse, ka lo zir silâwn tawh avang leh kan tih hmasak ber tur hi chu a awl ve deuh ber avangin huphurh ka duh lo lui tlat. Zorina ka ngeina chu, lei si lo van si lo, tuilairap kan tih ang hian min siam. Ka beidawnsan thei lo va, ka beisei thei bawk si lo. Misual tak a ni. Mahse ,ka inânthawl vang nge a msg hnuhnung ber vang zawk ka thawl huai a, ka na ut ut, min tur et ettu kha a bo vek. Lawm phawt mai teh ang. 

Ka thawh chuan ka nu te ka hmu lo. Nizan khan Mama lo haw lai ka hre lo va, engtin chiah nge an va inbiak ka hre lo. Class kal tura ka insiam laiin Mama'n, "Nangmah râwn lovin thutlukna ka lo siam a. Ka case file ka withdraw ta mai. Kha chen ka nu boral hnua min enkawla min chenpuitu a ni a. Ama bulṭan mah nise, ka pa avang pawhin zahna lantir a phû ka tia. Mahse, chenho erawh amah pawn a duh tawh bîk lo. Pu Zova remchan veleh rokhawm chungchang kan tifel ang a. Min chhuahsan dawn e.." a ti mawlh mawlh. 

"Nia, Mam, dik tak chuan ka tetlai khan hetiang hi a nih ngai ka hre si lo va, a mak ka ti" ka ti ve luam a. 

"I hre lo vang. Pawi i sawi lo a, rilru kheuhbeuh i pu lo êm a ni. Kei leh Bawiha ten min enkawl dan chu kan hria alawm. Mahse, a liam tawh. Sawi thar a ṭul tawh lo ve. Ṭha takin zuk exam la, i pass chuan i duh ber ka leisak ang che" tiin a nui var var a. A lang upa sawtin ka hria. A naupang tawh lo ve bawk a. 

Ka nui ringawt. "Taka! Zorina nen eng nge?" A ti leh puat a. 

"A ṭha lo" ka lo ti ve tâwng. A kal hmain, "mam, ka nu chu a inpuang em ni?" Ka ti a. Ka hre châk ve tho si a ni.

"Aw, engkim a puang vek e. Mahse, naute, i hriat ang kha a ni mai aw. Rosum hian mihring nunah hian thil a lo tithei êm a ni" a ti bung nghut a. 

"A nih i case kha..Zorina sawisak vel kha..?" Ka ti vat. 

A nui hawk a. "Kha pawh awmze nei lo a ni tawh e. Ka case IO nen vawiinah Magistrate kan va hmu ang..lungngai suh. Engkim a ṭha vek e. Ka fihlim vek tawh" a ti dam ta thlup a. Ka awm a lo nuam huai huai mai. 

Exam tur kan nih avangin tlai a hlauhawm si, Desy a rawn kal ta bawk nen, thil hriat châk ru tak siin kan in chu ka chhuahsan ta a. 

Desy nen kan inkuah thla leh ta boh boh a. Kan rilru kan kawm nge kan ṭawng tam lo dun tak tak a ni. Exam hall ah kan lut a. Kâr loah kan ṭan nghal..ka thiam chian pali chiah a la rawn chhuak zui a! Mahse, ka chhang vek tho. Engtin tin emaw mark chhetê te chu ka hmu ve tho turah ka ngai. Thil dangin min tlakbuak nasa lutuk a. Exam pawn rilru a luah hleithei thlâwt lo. 

Dami'n, "Kan peng ngei tur a ni..Hmaichhanah inbe rawh u" a ti tlat si a. Ṭhian dangten an thlâwp vek lehnghal. Nuam lo ti ru chung chungin ka zui a. Dik tak chuan Zorina chu ka hmu chak ve tawh lutuk. An in kawngka chu a lo inkhar lo bawk a, ngampa takin Dami'n hma a hruai a. 

"Pa Sawm,..pa sawm" a ti lauh lauh bawk. Pu Sawma a rawn lang vat a. A thar vûk nia! Zu kha a la nghei char char a niang. A hmelṭha tawh lutuk. 

"Ekhai! In va fel ve..lo thu ru..amah pawh a rawn ṭhu chhuak dawn e" a ti sawk sawk. Pa Sawma chu ka nu Mathani pasal hlui a lo nih tawhnaah ka zah deuh, engtin emawni ka awm. Ka sawithiam lo. Reivak loah Asangi nen an rawn inzui chhuak ta a. A rukin ka kut ka hum vang vang. Zorina chuan min rawn melh kual a. 

"In va zahawm" a ti sup. 

Dami'n tlangnêl takin, "Min zah hle rawh. Ṭhenkhatte duh lo chung kan rawn kai lut a nia" a la ti zui! Zorina chu a nui hawk hawk, a dam lo a ni bawk a, a hmuihmul leh khabe hmul a rawn ṭo ve suar suar a, chu chuan a tilang senior. Mahse, a hmelchhiat phah dêr si lo. Desy bula ṭhutna âwlah chuan a ṭhu a, Asangi erawh chairah a ṭhu thung. Ka melh duh ṭhak lo. A intithei hmel ka hmu peih lo. 

"Tichuan, in exam chu eng nge in an? " Tih bîk pawh nei lo hian a ti a. 

"A pangngai" an lo ti sap sap hlawm a. Ka ngawi tlat. A bîk taka min biak ka phût..

"Sawmsak, i ti ṭha lo ni maw?" Zorina chuan nui sâng chungin a ti ta a.

."Ti ṭha" ka lo ti deuh hmak. Ka ṭawng dan chu a naupangchhia ka ti. Ka inlak no vang a ni lo a nia. 

"I tih ṭhat pawh ka lo ring vak lo va, nizanah i zir si lo" a ti leh a. Ṭhiante lo ehem kual vel chuan mi run tawp. 

"Ka zir êm mai a" ka ti nghat. 

Pa Sawma'n, "Sangte, thingpui lum la..hei an rawn kan ve vang vang si" a lo ti a. Asangi tûm bûr chu hmuhnawm ka lo ti! Zorina nen an inngaihzawn chu ka ring ngam tak tak lo va, mahse, Amah hian a ngaizawng a nih ka ring ta. A tho a, a lum ve mai bawk. 

Zorina bawk chuan, "Chhanseki hi chuan a hre tawh a, Asangi hi ka nî fanu a nih hi..a fel a nia, ka damloh hma khan a rawn zin a. Ka damlo ta sia, a awm ve ta reng a nih hi.." a ti duah a. Keimah chu min hrilh bik niin ka hria. 

"Chuan, Asang, hei Teberi chu..a hming ringawt i hre hlur a, a takah hian hmelṭha i ti em?" A ti leh a. Ka va melh nghek. Asangi chuan min rawn melh zawk a, nui lui tih hriat zet hian, "A chhiat hran loh kha" a ti sap. Zovi meng rum sawt leh ṭawng tum chu mitmeiin ka va khap vat. 

"I farnu Asangi nen chuan whatsappah -ah kan inbe tawh alawm. A fel khawp mai" ka ti ve ta ngat a. Zorina nuihza insûm hmel chuan min tihrilhhai letling. 

Asangi lah a no khawihte chu a ri bur bur tawh si, Dami a tho vat a .."Khawi ka lo siam ang, ka hnehsawh alawm" a va ti..an han inhnial leh rih.

Desy'n, "I û hi a muhil ami?" A ti a. 

"Aw..in rawn kal hma lawk khan a muhil.."a ti a. Sawi tur ka hre ve si lo, ka phone te ka'n khawih ringawt thul. Thingpui kan in zawh chuan haw mai pawh pawi ka ti tawh lo. 

Kan hawn dawn chuan Kawngka thleng min lo thlah ve a. A ṭha tawh angreng. A taksa lang theiah engmah hliam a nei tawh lo va. An zaina avang khan indim deuh a la ngai tih a ni mai. Kawngka biang aṭang chuan, "Sawmsak.,Ṭha takin zir ang che. Zorinsanga theihnghilhin .." a rawn ti hram..a ngaihna hre lo zet hian ka zuk melh a. Mitmeng dam ruih hian min lo melh a. Ka nui lo va, ka ṭawng hek lo. Mahse, thinrim lo va, min elsen miah lo tih pawh ka hrechiang. Mahse, a thil sawi dan kha mak ka ti a, nâ ka ti bawk. Amah theihnghilh turin min duh a maw?! 

In ka thlen chuan ka nu leh nuteii te lo insiam niawm tak ka va hmu a. Chhuah an va tum hma ve aw. A nuam lo riau. "Nu, khaw nge in kal dawn?" Ka ti hrâm. Min rawn en zawk a. 

"Ka inah mawle. He inah hian chanvo kan nei ve tawh hleinem" a ti chang rât. 

"In va hmanhmawh ve.." ka ti a, ka ṭawng el miah lo. 

"Chenho reng chu a buaithlak mai mai. Nangni lahin min ngai dik lo tawh si.." a ti a. Ka khawngaih deuh ringawt. 

"Heti lo hian in kalsan dan a awm ang mawle" ka ti sap a. 

"A awm lo, Sangbera'n chhuak turin min duh alawm" a ti sap a. 

"Mama chu ka lo bia ang" ka tih lahin, "A ngai lo. In ka nei ve reng alawm. Chuan, Compensate pawisa kha chu kan sawi fel leh dawn nia. Ka chanpual ka la ang a, a tawk mai" a ti a. Sum bak hi a ngaihtuah lo a niang. A mak ê.. kha chen a fa hrin te ni lo mah ila, kan lo chengho tawh a. Hetia sum leh pai vanga a chhe ber thlen duh hial khawpa a duhâm hi mak ka ti ngawih ngawih. Tumah chawm tur a nei a zeng pawh a ni si lo, Zorina te tan a ti a niang tih dawnin an intlawh pawh loh bakah a sawi pawh an insawi ngai si lo. 

Zanriah erawh Mama tel lovin kan kil ho. Naktukah chhuah an tum a nih hmel. Naktuk kan chawl a, ka inthlahdah deuh. Dar 8 velah Mama pawh a rawn hawng a. Chaw a ei tawh thu a sawi. A hnu lawkah Desy'n, "U Sangbera te hi" tiin Sangkimi nena Zanriah an kil dun lai thlalak hi a rawn thawn a. Ka en ngun nasa, Sangkimi hmelṭhatzia chu aw. An lo inngaizawng ve tak tak a nih dawn hi a. A ṭha vek e. Au Bawiha hi zawnpui ve a ngai a ni. Parvula ringawt a atchilh a, Para pawh damdawi te a han ei a, tlem chuan a zia ta deuh. Enkawl ngun erawh a la ngai viau. 

Lehkha ka zir nin avangin dar 10 velah mut mai tumin ka inbuatsaih a. Ka sam ka khuih laiin Zorina'n a lo call. Ka la lo têp a ni. 

"Aw" ka ti nghat a. 

"I zir zawh tawh ka ring a" a rawn ti. 

"Umm, ka mu tawh dawn a" ka ti a. 

"Okay,.inbia ang" a rawn tih chuan, "Asangi a awm lo mi? I hlau lo mi?" Ka ti leh hrâm. 

"A ninawm..Sawmsak" a ti hluk a. 

"A nia lawm. Nupa ang in nia" ka ti leh a. Ka nuih a rawn za deuh, "Min runluih reng lo teh. Ka ngai che nia" a rawn ti. Ka thlawk dawnin ka hria. 

"I daw" ka ti hmak a. 

"Engkimah ka tihpalh. " A ti nghut. Ka nêm leh mah mah tawh a ni. 

"Chuan.." ka ti sap a.

"Phuba ka lak theihna hmanrua i nih avangin ka lawm..Mahse, ka hmangaih che" a rawn ti thawp sut a.. phuba bawk chu…

"Eng nge a awmzia?" Ka ti vak a. 

"Naktukah i hre mai ang. Naaa..ka û a harh, ka va buaipui lawk ang e.." a ti leh daih. Min va tivir tak.. eng chu a hria chu ni maw..keiin hriat ka nei thung alawm. 

ZORINA nen kan inṭhen lo tih hi…ka khi ta sak a.