Zor 16

ZÔR.. (16)

Ziaktu : Toni Râlte

"Zorin.." ka ti zawi sep a. Ka thil vawn lai chu hum nghet lo deuh ila chuan ka tlu maithei a ni. 

Ni e, eng thu nge a sawi khah? Khang Mama thurûk leh ka nu chungchang zawng zawng hrilhtu kha amah Zorina chuan, "I pa nupui, ka nu sawi a ni" a ti a nih kha. A awmzia chu ka nu, Mathani saw Zorina nu maw lo ni a?! Thil hi a buai lutuk. Ka hne zozai ta. He buaina manganthlak lutuk hi kalsan ka duh,.eng khawvelah nge ka chen..

Mitmeng danglam eih lo va min melhin, "Haw rawh. Rawn kal a ngai tawh lo vang" a ti vawt raih a. Mittui tling pama enin, "Eng maw i sawi? Eng nge tihsual ka neih? Khang thu kha ka sawifiah thei..thil tam tak a thleng asin. Mama'n i chungah hetiang thil hi a ti lo" ka ti khur dat dat a. Duh leh awm vete chuan min ngaithla mahse pawi ka ti lo. 

"A nih chuan tu tih nge?" Chhanna hriat chak zet hian a ti a. 

"Ka hre lo. Mahse, Mama hi tu emawin a tal awhtir a ni" ka ti thei ṭâwk. A nui hawk a, "Ka chhungkaw tan, ka û tan he intihsiakna hi ka hmachhawn a. Ka innghahna awmchhun a ni rih asin. A tawp ka khar hmain hetiang hian chet pawh che thei loin ka awm leh a. A natzia i hrethiam em? Tihtheih nei miah lo va, ka pa beidawng hmel hmuh hi thihna ai pawn a na zawk..chung zawng zawng thlentirtu chu i û phuahchawp Sangbera a ni. Infiamna tlak ka ni ve lo, mi hausa infiamna hmanrua mai ka lo nih hi…" a ṭawng zawng chuan a kut veilam venflon an vuahna chu a hum ruh nasa lutuk nge a rawn thi ṭiam ṭiam a. Ka zu ensak vat. Lak kan ka tum chu ka kut a lo paihthla vat a, "Kal rawh. Hmuh che ka duh tawh lo ve" a ti chang fak bawk. Johna rawn lut mêk chu huiin, "Nurse min kohsak lawk mai teh, hei a thi a" tiin a kut chu a lek a. Johna hmuhah chuan a thinrimna leh rilru natna te kha hmuh tur pakhatmah a awm tawh lo. Mama ang chiaha inthunun thei kha a ni miau a..

Min biak duh miau loh vang leh nurse ten an buaipui takah chuan ka chhuahsan a. Verandaah erawh ka la ding. Au vak vak ka châk. Hetiang thil hi ka beisei miah lo asin. Zorina khan Mama kha thlavâng a lo hauh ve ka lo beisei a, mahse, a letling vek. Thil ngaihtuah chiang tur pawn ka thluak chu a nu but a, a mang vek a ni ber. 

"A ṭha vak lo a ni tiraw?" Johna aw ka hriat chuan ka insût hraih a. 

"Eng nge thleng?" Ka ti sep. 

"Tukinah Police an rawn kal a. Zorina khawihtu te an man thu leh a mawhphurtu chu i û a nih thu an rawn sawi a. A tir kha chuan Zorina chuan a awih paw'n ka hre lo. Kei pawn ka awih lo. Police te kha han zawh chian dawnin an hmanhmawh lutuk a. I rawn kal hma deuh khan call a dawng a. Tu nge ka hre lo. Amah chu a ṭawng ve vak lo. A bak engmah a thleng lo..thil hi a mak êm mai. I û chuan a lo tihtir tak tak em ni ang?" A ti mawlh mawlh a. Ka chil ka lem khawlh. 

"Engtin nge misualte chu an man?" Ka ti hap a.

"Pakhat sawi danin an zinga pakhat kainam khan midang bulah uan nan hmangin a lo sawi thawi a niang, police an hrilh leh sia, an va hling ta phiar a nih hmel"a ti ta a. 

"Zorina hi kei leh a ṭhiante ni lo, nang pawhin i hriat vak ngai loh ten an lo tlawh tawh em?" Ka ti leh a. Ka zawhna chu mak a tih hmel, "Ka awmpui chhung chuan chutiang an la awm miah lo" a ti sup. 

"John, engpawhnise, ka haw phawt ang. Min haw rih sia. Nang pawn lo hnem rawh aw. Mama hian engmah a tisual lo tih ka finfiah em êm ang" ka ti charh charh a. Ka derthawngin hmeichhia ka ni naa, he thilah hian pumpelhna kawng a awm lo. Keimah ngei hian pawimawhna lian tak ka nei tlat. Johna paw'n min hrethiam hlein ka hria. "A rilru hnehte pawh kan lo tum ang. Lungngai lutuk suh" tiin min thlah ve a. 

Damdawi in kawtah chuan mi awm lohna deuhah dingin, Au Bawiha ka call a. 

"Hei Police Stationah kan awm mêk, lo kal ve rawh" a rawn ti a. 

"Mama chu in hmu thei em?" Ka ti vat. 

"Aw..hei Pu Zoa'n bail dan tur a buaipui mêk a." A rawn ti. Phone ka dah a, Police station lam pan chuan ka inkhalh chhuak ve leh ta a. Ka va thlen chuan Pu Zomuana leh Au Bawiha bakah P Muana te an lo awm a. Mama erawh lockup-ah a awm a ni awm e. Ka va khawngaih tak e aw. Police te pawh an felin biak an nuam hle. Pu Zomuana lahin hmelhriat a pui a lo ngah ve bawk a. Mama chu jail-a luhthlak ngai loin bail theih a ni dawn hlauh mai. Pa Muana'n a bail ta a. An va koh chhuah chuan a pawr fup mai a, lungawi lohna leh thinrimna nasa tak a nei tih hai rual a ni lo. Mak deuh chu Zorina meuh paw'n Mama kha mawhpuhin misualah chhiar mah se, tun ṭum kher chu Mama ka ring tlat. Khatiang thil kha a ti lovang tih hi thinlung takin ka ring ve tlat a ni. A chhan chu mi inring lo lai beiha hnuaichhiah ching a ni lo tih kum tam tak ka lo chenpui ve tawh avangin ka hre tlat a ni. Zorina chungah ngat phei chuan khatiang kha a ti thei lo vang. Kan inla chhuak fel a, court ngaipawimawh tura inchah mawlh mawlhin Mama te nen chuan in lam kan pan leh thei ta. Sawi tur ka ngah tawh lutuk hi ka puakkeh lek lek a ni. Pu Zoa chu a hna lamah hmanhmawhthlak a awm avangin kan in thleng a rawn kal ve lo va. 

Kan in kawtah kan ding ta dawt. Pa Muana pawh a rawn lut ve a, kan va luh chuan ka nute bakah ka nî te an lo ṭhu ṭhap. Eng thil mah hi zêp buai ka tum ta lo. 

Kan ṭhu fel ta maw tihin ka ding ang ren râwn a. "Thil mak tak ka va hria a. Ka sawi nghal mai ang aw. Ka bialpa Zorinsanga hi ka nu fapa a lo ni reng a! Amah Zorina ka ngei aṭanga ka hriat a ni e. Sawi tur nei in awm em?" Cho zetin ka ti ta fak fak a. Ka chhungril chu a khur ,mahse, zâm hun a ni lo tih ka hria. Hetiang thu in thup leh zêp rûk vel kara chen hi ka hne tawh. A nih tur angin thil chu rawn ni zawt zawt tawh rawh se. 

Mama'n, "Kha thil kha ka rinhlelh rûk, Zorina ngei biak ka duh chhan a ni rêng a ni. Mak ka ti hran lo ve..ka nu, sawi tur i nei em?" A ti ve ta sak a. 

Ka nu chuan zâm miah lo hian, "Ni e, a dik alawm. Sawi tum lo pawh ka ni lo, mahse, buaina a awm zel a, tunah chuan zêp a ṭul tawh hleinem. Zorina hi ka fapa, ka pasal hmasa laka ka fa ngei a ni e. Ka fapa a la nih ve miau avangin a chunga râwng taka chea nghaisatu Sangbera hi thiam loh chantir ngei pawh ka tum" a ti ta piap piap a. 

Ka nî erawh a thu hriat chuan a ṭhawng hle a niang, a ka a chip hmak a, a ṭhu ngil ût ringawt. Nuteii pawh ṭawng vena chi niin a hre lo nge , a ngawi ve hle hle mai. 

Au Bawiha'n, "Ka rindan a dik a nih chu! Ka rinhlelhna che a la dik tluang zel e. Mama tâl awhtir i tum dan pawh hi han sawi law law teh" a ti bung nghut a. Ka nu kan melh ṭhap. Elsen rawngkai zeta nui ham ham chung hian, "Chu kher zawng i ring sual chiang. Sangbera hi ka tâl awhtir lo chhiava lutuk. Kei ngei pawn hetiang thil a ti hi mak ka ti lutuk a nia. In rindan chuan khang misual, Zorina khawihtu te kha thamin "Sangbera min tihtir' ti rawh u.." tia ka hneh in ring tihna a ni em? Haha, fiahna in hmuh phawt chuan ka tâng ngam e" a ti sak sak a. A inrintawk hmel êm avang chuan kei pawh ka rilru a buai ta deuh. Ka nu tihtir hi a ni lo ve thei tho. Mahse, Mama chu ka la ring chhe phal chuang lo. 

."A nih chuan thiam loh ka chan theih nan theihtawp chhuah la, keiin ka thiamzia pholan ka tum thung ang" Mama'n a lo ti nghet tlut. 

Ka nî chuan aw lawi zet hian, "Mathan, engtin kha khang kum chhung zawng khan i lo zêp theih? Mak ka va ti êm..min lo bum vek tihna a ni maw? Ka û pawh khan a hre miah lo tihna a nia. I lo mak hle mai" a ti khur dar dar a. 

Au Bawiha'n, "Ni lo e. Ka pa khan a hria. Kha thu dengkhâwng zet a hriat avang khan alawm a stroke..a hmain a taksa lamah kua a lo hreuh tawh bawk nen, a dik tiraw? Ka nu" tiin ka nu a melh ta rûn mai. 

Ka nu chu a chiâi ta deuh ni hian a lang. 

"A hre lo.. a dam hunah hrilh ka tum a, mahse, tikhan min boralsan leh ta si..engpawhnise, Nangni pawh ka hrin in ni lo ang bawkin Zorina pawh i pa thisen a kai lo a ni mai. Nangni leh kei kan inang reng . Tumah insawi thei kan awm bik lo" a ti bawrh bawrh a. 

Mama chuan zawi sup hian, "Tichuan, i fapa leh ka farnu te inzawmna chu duh lovin kei min hmang ṭangkai a, Teberi nu chunga ka lo chet tawhna hmanruaa hmangin min vau bet a. Teberi hnena thudik hrilha aman min huat theih nan…hmm, thluak zawng in lo nei ve e. Mahse, vanduaithlak takin Teberi'n thudik a hre vek tawh. Tunah min hup beh theihna tur in neih takah loah chuan Zorina hmanga min phih awh in tum leh a! Mahse, eng nge thleng zel kan hria ang.." a lo ti a. Ka fiah ta, Mama khan an vau tih kha a sawi duh miah lo va. A sawi loh chhan pawh ka nî kâ aṭanga ka hriat, Ka nu chunga Mama'n kut a lo thlak kha kei hian ka hriat chuan, amah Mama ka huat phah dawn a. Chumi a hlauh vang chauh chuan Mama khan ka nute thu a lo awih tihna a lo ni. Thil nihdan chu a lang cho zel e. Ka nu hmel pawh a buai ta deuh a. Mahse, zâm hmel a pu chuang lo. 

Ka nî chuan, "Chutiang thilte chu ti nge min hrilh ve loh? Zorina nen a inkungkaih ka lo ring miah hleinem. Mathan, a va mak ngai êm, engtin nge i theih zawk? I fapa a ni tih a tir aṭangin sawi la, hetiang buaina hi kan nei lo ni mai tur" tiin ka nu a en a. 

Ka nu lah chuan, "U Zau, ka pasal farnu i ni naa, kan in chhung buainaah hi chuan sawi ve tur i nei miah lo a nia. Chuan, ka duh dan ang thlapin ka che. Aw a dik, Teberi leh Zorina an inngaizawng erawh a pawi ta a ni. Zorina'n ka laka phuba lak nan Teberi a ngaizawng a. Keiin Zorina chu ka fa a ni tih U Thanga khan a hriat ka hlau thung. Chulai inkara buai leh thlaphâng reng reng chuan ka awm a. Sangbera hmanga Zorina ka hnawh bo theih nan tikhan ka che ta mai a ni. Mahse, hetia a sawisak êm êm hi chu ka ring phak lo. Ka pasal leh faten ka fapa a ni tih an hriat duh lo viau mah ila, ka thisen ka hrin ngei a nih miau avangin hetiang thleng thleng hi chu ka beisei lo va, ka lainat ve lo thei lo. Tin, Malsawmtluanga hian min huphurhna lamah a pa thihnaa inhnamhnawihna nei angah min ngaiin min veh ru reng bawk a. Ka lawm zozai tawh bîk lo. Pa ber a han boral chu ka hnawksak chho a, anmahni hringtunu ka nih lohna a lang ta zauh zauh chu a nih hi..tunah pawh min hnawhchhuah in châk viau tawh ang. Mahse, hei hi ka in a nih hi" a ti sak sak a. A hawi deuh larh bawk. Zorina chuan a nu laka phuba lak a duh avangin min lo ngaizawng a maw?! He thil hi a khirhin kan buaina hi a ril ta viau mai a..

Au Bawiha chuan, "Ka huphurh vang chea veh che ka ni awkawng lo. Ka pa nupui i nihnaah ka zah che. Mahse, a rûk arala zan laia midang i hmuh aṭang khan ka ringhlel ta mai che a ni. Kha ta i mi hmuh kha tu nge tih i sawi ngam em?" A lo ti chat chat a. 

"Ka sawi kher a ṭulna a awm lo. Ka puihna mamawhtu a nih angin ka pui mai a nih kha.." a tih laiin, "A nih phone-a vawi tam i biak, Mama chungchang i sawipui ṭhin hi tu nge?" Ka lo ti khauh. 

Rum angreng taka min melhin, "I hriat ve a ṭulna a awm lo. I nu pawh a ni maithei tih erawh ka'n sawi hram ang e" a ti a. 

Ka nîin, "Teberi nu chunga thil thleng kha Teberi'n a hre vek tawh. Khami hmang kha chuan Mama i vau dai tawh lo vang" a lo ti chang fak a. A thin a rim ve hle tih a aw phâwi leh a mitmeng aṭangin a hriat. 

Ka nu chu a nui lui kual a, "Police hrilh ta ila, tuna a case pawh hi a rih phah sawt maithei a ni. Hmeichia kut a thlak bakah ramtuileiloin a siam a nia. Chupawh a farnu hringtunu" a ti a. Mama chuan min rawn melh zauh..a mitmenga inthiam lohna lo lang chuan ka ngêng a chhun deuh. Nizan maia ka mi hmuh chungchâng kha ka sawi mai dawn em mawni ka ti hman a. Mahse, amah hmuh leh phawt ka duh avangin ka ngawi ta zawk a. 

Mama chuan, "Hetiang tehhrep hi kan ni ta si a. Chengho thei kan niin a lang ta si lo. Min chhuahsan mai dawn em ni ang?" A ti zawi raih a. Zâmna awrâwl a lang lo mai ni lovin tumruhna a langsar êm êm. 

Ka nu leh nuteii te chu thinrim meng tal tawp tawp chungin an per tân tân a. "Malsawmdawng, kha leh chen ka enkawl seilian che u a, i pa a boral tak avang maiin ka in aṭangin min hnawtchhuak ang maw? In lo va tenawm ngai ve..he in hi ka in ka tih tawh kha, chhuak tur zawk kan awm a nih chuan nangmahni in ni e" a ti hlawih hlawih a. 

Mama'n, "Ka pa thurochhiahah kha chuan he in hi Bawiha hminga awm a ni e. Nang chu a pension dâwna a lei Khatla-a a in kha a dahsak che. Teberi tan Venghlui-a a in a dah bawk. Kei erawh chuan ṭul ka ti lo va, tin, keimahin ka inenkawl thei bawk. Chuan, bank-a a sum kawlsa leh Lungleia kan ram aṭanga compensate a lak te kha Teberi nena in insem atan a dah vek bawk. " A ti ta charh charh a. Ka lo hawi â hau mai. Nia, Lunglei Lunglawnah sawn ram zau tak a nei ve a. Sipai hoin an luah tak avangin compensate pawh a la nual a ni. Chung chu khawih che lo vin a la dah ta reng a ni. 

Ka nu chu a ṭap lo chauh tawh. " Kha thil kha a thih hma , a dam loh hmaa a siam a ni a. Khatia a damloh a theih loh hnua a rawn harh ve deuh lai khan siam ṭhat a duh thu a sawi reng. Tikhan a kal ta si a. He thil hi en nawn leh tur a ni. A nupui ka ni a, ka pasal kalsan tak in leh lo leh pawisa chu ka chan tur a ni. Malsawmsaki phei chu kan falâk a ni a, chanvo engmah a nei thei lo. "A ti tâwn tâwn a. Sum vanga hetiang zawng zawng hi thleng a ni tih ka fiah ta uar mai. Nichina a thusawi, "Zorina'n phuba lak nan Teberi a ngaizawng a" a tih kha kei chuan ka lo la ngaihtuah zui char char. Awih harsa ka tih rualin Zorina nen kan inngaihzawn tirh laite ka ngaihtuah chuan a dik theihna lai a awm tlat! Ka nu fanu ka ni tih a hre sa em ni ang? Ka nu nen an inhmuh hmasak ber zan kha ka hrechhuak nghal. A kun daih a, chhuanlam siamin a haw nghal a nih kha, Damdawi inah lah tiang tho khan. A hnuah erawh a zâm lo leh viau lawi a! A nu chanchin ka zawh ṭuma a mitmeng buai nak te..ka nu fa ka nih loh thu ka sawi ṭuma a ṭawngkam leh chezia buai nuaih leh phelh phang te kha. Zorina hian engkim a hre sa bik lo ang a, ka nu hmel a hmuh khan ruahmanna siamin min ngaizawng der ta chauh a ni ngei ang. Zan hmasa berah te chuan Rpa a rawn lenpui ringawt a nih kha..

Engpawh chu ni ta se, ka na tawh tho a, nat belh leh tur chuang ka awm tawh lo. Hmanrua mai ka lo ni hi ka zak a, tlawm ka inti. Mahse, Zorina chu ka haw thei reng reng chuang lo. Ka bula a awmdan, a ṭawng dan, min ngaihsak dan zawng zawngte kha a der vek ni tur chuan a famkim mah mah ka ti. Nge lemchan thiam ber a lo ni zawk? 

Ka nî te nupain, "Tun ang boruaka in chhuahtir rum rum chu a fel lo e. Mi mitmei te pawh ven a ṭha. I patea te pawh rawn ve la..dawhthei leh hram rawh u. Thil eng emaw te pawh hriatchhuaha man chhuah dan a awm zawk maithei asin" an tih avangin ka nute chu an la chhuak êm lo va. Mahse, boruak chuan engtikawng mahin a hma a pha tawh dawn lo tih kan hrethiam vek. Hriatthiam loh erawh ka la nei ṭûn mai. Mama tal awhtir an tum chhan tak hi eng nge ni ta ang? Zorina nen kan inkar a tawp nan nge? Mama chu jaila dahbo an duh zawk? A pahnihna hi ka ring zawk. A chhan chu Mama rorelna leh ruahmanna hnuaia kal kan ni tlat a, ka pa a awm tawh miau loh avangin Mama'n chhungkaw thil engkim a khawihin a buaipui tlat a tin ni. Mama awmbo hlana ka pa thurochhiah tihdanglam an tum pawh a ni thei. 

An duh ang takin Zorina pawn kan inkar a titâwp a. Ka û chu huat namên loha huain kei thlengin ṭawngkam ngaihnobei lo takin min puh a nih kha. Zorina ngaihtuah dan erawh a dang. Mama hian min ngaizawng emaw a ti tlat! A hma pawn kan buai tawh kha. Keiin Mama thlavang ka hauh avangin kei thlengin min rinhlelh phah a. Unau dik tak kan ni lo tih a hre tawh bawk nen, Mama chu a ngai dik lo kual vek tawh. Ka nu te hian engtin tin emaw a rilru hneh an tum ngei ka ring bawk. Ka nu nena kan inhmuh leh awmdan aṭangin nute na nâ na chu a huat kumkhua theih loh tih ka lo hre tawh a, Zorina pawn a tirah ka nu huain tihnat tum ve viau mah se, hetia a han damloha engmah a tihtheih tak loah chuan ka nu ang lemchan thiam lutuk chuan a hneh chho a ni mahna. Hringtunu a nih miau avangin Zorina chu a tlawm ta zawk a ni thei…

Viteii pawn engkim a hre lo thei ta lo va. Mahse, ani chu kan ringtawk ṭheuh a niang, pawi kan tih hmel vak loh. Mi ngaiha chhungkaw zahawm, hausa, inngeih tak angin kan lang a ni maithei. Kan in chhung boruak erawh a chîrî takzet a, rilru kan intihnatsak tawn bakah kan inveng ru tawn ṭhâm tawh. Che hlek ila a ruka min chîktu an awm dawn..chutiang bawkin keini lam pawn eng emaw hlekah beng kan chhiin mit kan lên bawk ang. Eng chena rei nge chutiang boruak chu kan tawn dawn ka hre lo. He thilmak leh buarchuar tak tuartu ber chu keimah ka ni ka ti lo thei lo. Thumak tak tak hmanga ṭhawn thut thut ka ni reng a. Ka nu dik tak nia ka hriat chu mi â emaw ka tih laiin nizan maiah ka nu anga inchhal ka hmachhawn leh a. Ka pa nen inzawmna nei ve miah lo anga inngai kha a thisen ka lo ni ve tlat bawk. Ka nu, ka pa nupui fate chu Zorina te an lo ni a. Zorina pa Pu Sawm chu ka nu pasal hmasa a lo ni bawk. Zorina tawhsual tawh chungchânga misual ten an kawh chu ka û a ni a. Ka nu lahin inhnamhnawihna a neih loh thu sawiin a ṭang kawh viau. Ka hriat miah lohin nula hausa tak ka lo ni reng bawk a, ka pa min hnutchhiah thil hlûte chu neih vek tumin ka nuin hma a lo la tumhrang bawk. Umm, nia, an falâk ka ni miau a, chanvo ka nei ve tur kha a hmu thei lo a ni phawt mai. A demawm êm êm loh. Mahse, nu nasa leh rapthlak tak zawng a lo ni e. 

Zorina pa nen an inṭhen chhan ka hre lo. Mahse, an inṭhena ka pa nen an inneih tirh lai vel chuan Zorina hian kum 3 a la tling lo tih a lang. Chutiang khawpa fa naupang a la nei chunga pasal dang neihsan thei hmeichhia chu thildangah a ropui a ni thei e. Engtikahmah nu ropui a ni thei ngai lo vang. Chung thil thlen hnuah a fapa ngeiin kei a falâk min ngaihzawn hnuah pawh a fa a ni tih kan hriatchhuah hlauin Zorina pa thleng thlengin a vau a. Ka pa ber a awm tawh loh chuan engvanga la vengthawng nge a nih ang? Mama bawk..Fa nei tawhin chhungkua min bum let dêr a ni tih Mama'n a hriat chuan a tum angin thil a kalpui thei dawn lo tih a hria a, a zêp ta ngawt mai a nih kha. Mama an lo vaua an lo thunun dante kha a va rilru chhiatthlak tak. Kei hi an chetna hrûlah engmah hre ve si lovin ka lo kal ve char char tihna a nih chu..

Shower chuan kan inphuhtir seng seng a. Ka taksa chu a harh, ka rilru lamin min uai rit êm mai a, ka ni mûai tho mai. Darthlalangah chuan ka inen vang vang a. Zorina'n thinlung tawt leh nâ ti lutuk a, "Kal rawh. Haw rawh, hmuh che ka duh tawh lo" a tih kha ka bengah a rawn ri nawn leh a. Ka chhing sawk..Zorina na tuar hmel kha a der a ni miah lo. A nih chuan phuba lak nana a hmanrua mah ni ila ka rilru ang hi a lo pu ve tawh tihna a ni thei ang em?! 

Ka inthlak zo va., Ka room aṭanga chhuah pawh a châkawm loh angreng. Chhuah ka tum laiin call ka dawng a, Ka nu kha a ni. Nizana ka hmuh kha. 

"Eng nge chanchin?" A rawn ti var a. A aw ka hriat chuan ka hahdam deuh sawtin ka hria mawle..

"A ṭha ti ila , a ṭha lutuk lo. Mama erawh kan bail thei hram a" ka ti a. 

"A ṭhat nasat chu.. ka lo biak chhan che chu nizana i thu hriatte kha i û kha hrilh mah la a pawi lo. Zaninah amah nen hmuh che u ka duh hial..mahse, amah i û khan min haw bawk si. Heti taka min huatna chhan pawh hi ka hre chak reng reng" a rawn ti duah a. 

"A ṭha alawm. Ka lo hrilh ang. Inhmuh hun tur erawh kan sawi ṭha dawn nia" ka ti a. 

Chokaah ka lut a, Viteii chuan maian a lo hîk a. Au Bawiha hian maian a duh khawp a, kan lei deuh reng zel. Ka pui ve nghal a. A thu hriat tam takte avangin nuam a ti bik lo tih a lang. Mahse, ka be bawrh bawrh tho a. Viteii hi midang nise chuan kan chhungkaw boruak hi veng chhungah a darh tawh maithei a ni. Ka nu lah pawlah nihna nei a lo ni ve bawk si, Kohhranah lah kan langsar ve tho bawk nen, mi bula kan nihna zawng zawng pholan hi chu a ṭul rih vak lo. 

"I nu te hian min hnawtchhuak daih mai angah" a tih chuan, "Awihawm loh, engvangin nge an hnawhchhuah ngawt ang che.." ka lo ti vat. 

"In lama ṭang ang hian min ngai sia, ka ṭang bawk rêng a. Min ngaihtheih loh ka ring deuh mawle" a ti ve mai a. 

"Mama remtihna tel lo chuan i chhuak lo tawp ang" ka ti hmiah. Zanriah pawh Mama chuan kan rualin a rawn kil ve lo. Tuman kan beisei lo hrim hrim a. Ka nu leh nuteii pawh an ṭawng lo hrim hrim, kan boruak a uap a, a nuam lo tih hian sawifiah mai se a ṭha e. Ei khamah kei leh Viteii tih loh chu an pindanah an lut bo leh diak. Keini erawh kan tifel a. Johna khan chaw eihma khan min lo bia a, Zorina ṭhat thu leh zanin chu Rpa'n a riahpui tur thu a sawi a. An inchhawk ve zel a ni. 

"U Sangbera tih a nih ka rin loh thu vawi tam ka sawi a, hneh pawh ka tum. A rilru tibuaitu ber nia ka hriat chu 'Unau tak tak ni miah lo, heti taka an inṭana an inhauh hi a mak ka ti' tih a nia. Thildangah a ringhlel zawk che u niin ka hria..nangpawn ṭha takin a nih lohzia hrilh la" a rawn ti a nih kha. Ka hriatsa a ni a, mak ka ti lo. Ka pa thisen kai ka ni tih ka la hrilh lo va, thudik a nih leh nih loh ka chian bik loh vang a ni pakhat ang. Tunah a sawi theitur ber ka pa a awm tawh si lo, ka pa fa ka nihzia hi engtin tak finfiah ang i maw?! 

Ka intihfel zawhah Mama room ka pan ta a. Au Bawiha pawn hre ve mah se; pawi ka ti lo. Kawngka ka kik dat dat a, a rawn hawng ve mai. Awmhmun kawr nen a lo la awm a, a chhuak dawn lo a nih hmel. Media lamah a la darh lo va, darh ta se, hretu an tam ve angreng si a, hrehawm a ti ngawt ang. Tin, ka hming pawh loh theih loha sawilan zingah a tel ngei bawk ang. Thil hi a inzawmna a kual thui lutuk si a. Sofaah ka ṭhu that a. Ka inkuangkuah hlân bawk. Min melh rulh rulh a. 

"Chhuah i tum lo mi?" Ka ti sap. 

" Aw.."a ti tawi tak. 

"Sawi duh ka nei a" ka ti a. Khumah chuan a ṭhu a, sawi turin min mitmei bawk. 

Nizana thil thleng zawng zawng chu a bul atangin ka sawi ta malh malh a. Thawk a la hawk ṭhin tih loh chu engmah a rawn sawi lo. Ka sawi zawh meuh chuan ka dang a ro nghal huam ,tui ka va in khawlh khawlh a. Mama erawh a ṭhu ngil ût a, ngaihtuahna nasa tak a hmang tih a lang. 

"Eng ang hmelpu nge?" A ti sup a. 

"A thim deuh a, mahse, nu hmelṭha tak a ni. A ngo hle bawk. Chuan, keimah ang chiaha tê a ni" ka ti a. 

"Hei hi thil serious tak a ni, Mahse, fimkhur taka kan chet a ngai ang. Zaninah kan hmuh nghal a ngai a nih chu" a ti ta zung zung a. Ka lo phur ve ringawt. 

"A nih Mam, ka pa khan he thil hi a sawi miah lo em ni? I bulah tal" ka ti ta a. 

A rum nghut a. "Sawi hauh lo. Mahse, phaiah khan a buai hma lawk khan min ko va, "I nu tel lova biak che ka duh" a tia. Mahse, sumdawnna thila phone ka hman zawk hlanin tikhan a buai ta thut a ni. Engmah a sawi hman lo" a ti a. A sawi lai meka a thinlung nâ chu a mitmengah a rawn lang chhuak thei mawle. Ka pa vui nia chhungkaw aiawhah thu a sawi khan khatiang kha engmah a sawi lo va,ka pa buai thut thu chiah a sawi. Vawiin thlengin ka nî bulah takngial pawh tuna a sawi kha a la sawi lo a nih hmel. Kei lah ka rilrua awm ang ang sawi chhuah zel duh tawh chuan, "A nih chuan ka nuin eng emaw takin a ti a niang" ka ti hmiah. Min rawn thlek vat a. 

"Ngawi rawh. Bangte pawn beng an nei thei. (A va chhuak zuk a, a va en kual a ni maithei..a rawn lut leh a, kawngka a kalh nghal) 

Hei chu ka kutah dah rawh. He thil vang hian alawm thildanga ka inhambuai theih loh. Ka thinlung hi a na asin. Ka pa kha khatia hniam thut thei dinhmunah a ding lo. Ṭhat lam a pan mek..mahse, zanina kan sawi hi tawk rih rawh se..i chungchang thu chu ka nî takngial pawh a hrih lo va. Mahse, eng emaw tak zawng a hnutchhiah ka beisei. Ka pate room kan chindarh a ngai ang" a ti ta mawlh mawlh a. Ka ṭah a chhuak zawk e a. Engkim hi ka ning tawh tia kalsan vek theih nise ka ti. 

"I nu chu be rawh le" a ti a. Kei pawn thuawih takin ka phone ka hmet nghal. A ring ral ral a. 

Aw fiah tak bawk khan, "Aw..Teber" a rawn ti dam raih. 

"Ih, Mama chu ka hrilh tawh a. Zanina inhmuh a duh a ni." Ka ti nghal tâwng. 

"Khawiah nge ni ang?" A rawn ti ve mai a. 

Mama ka melh zauh, phone chu ka pe ta a.

"Hello, keimah aw. Dar 9-ah Senhri Hotel-ah aw. Lounge-ah min lo nghak la, kan rawn kal nghal ang" a ti ta zung zung a. Ka lo thaw huai. 

"Zuk insiam rawh. Bawiha pawh rawn kal rawh se, engkim hi kan pathum zela kan hmachhawn a ṭha" a ti nghut a. Kei pawh ka chhuk nghal. Ka nute an la tawm bo chu a lawmawm angreng. Mahse, an tawm sen satliah ka ring lo. Ruahmanna eng emaw tak an siam ve tho ka ring. An tum ber Mama lah jailah a tâng ta bawk si lo va, kawng dang an dap ve ngei ka ring. Ka inthlak sawk sawk a. Zorina erawh hetia ka chet mawlh mawlh lai pawn ka theihnghilh ngai lo. Min huat rih êm avangin biak luih ka tum lo. Mama case hi a fela thiam a chan hunah engkim a that leh ka beisei. Mahse, Mama leh au Bawiha te hian ka nu thisen kai Zorina chu an lo hnawl ve leh daih thei. Ka nu fapa a ni miau si a. Engtin nge an chhungkua an kehchhiat ka hre lo va, hriat tumna pawh ka nei rih lo. Tuna ka hriat chinah pawh hian ka buai tawk tawh. Mama'n min lo call a, "In chung aṭangin kan chhuk ang. Garage-ah kan lo nghak ang che" a rawn ti. Mahni in chhungah ngei pawh fimkhur a va ngai ta êm. Ka va chhuah lai chuan Nuteii zung zo hi a rawn chhuak ve chiah a. Mikhual roomah bathroom kan dah ve lo. Min hmuh chuan, "I va inchei ve..khaw nge i kal dawn?" A ti nghat a. 

"Zorina ka hmu dawn" ka ti tawp. 

"A sâwt lo vang. Hmu buai duh suh" a tih chuan mi run hle. Mahse, "Ka tum dawn alawm" tih pahin ka chhuak ta a. Min rawn en zui loh ka beisei. Garage-ah chuan an lo awm tawh a. Au Bawiha motorin kan kal. Engmah la hre ve hek lo, a bangbo tih a hriat reng. Mama'n, "Teberi hringtu diktak nia inchhal kan hmu dawn a ni. A hmaa kan hriat ṭhin kha ni loin" a ti ngial a. A la bo hû tho mai. 

"Mam, a thuhrimin ka pianlai te chuan nang pawh kum 9 lai i ni tawh a, ka nu hmel te chu i hre awm tho sia.." ka ti nuah nuah a. 

"Hre hauh lo. A chhan chu kum 7 ka nih aṭangin hostelah ka awm a. Kum tawpah chiah ka rawn haw ṭhin. Ka rawn haw chuan nang chu i lo piang tawh.." a ti mai a. 

"Au Bawih, nangin i hre lo maw?" Ka ti a.

"Aw hria a. Mahse, a hmel ka hre tawh lo. Ka pa khan hnaih a remti ngai lo.." a ti a. A beidawnthlak ê. 

Ka hrechhuak thut ,"Mam, a nih kan inah te pawh ka nu nia i hriat kha a rawn kal hial thu Anî khan a sawi a. Apa khan a lo hre miah lo nge le? I hmu ve em?" Ka ti ta hluai a. 

"Ka nu chiahin a hmu. Midang kan awm lo vek. Ka nu sawi a nia. Ka pa ngei pawn a hmu ve lo" a ti bawk si. 

"A nih ka nu anga i va hmuh, i ben tak kha eng ang mi nge?" Ka ti leh a. Ka dilchhut a ngai. Ka hre châk et et a ni ber e. 

A ngawih dat hnuah, "Nu fai ving veng, tê lam chu a ni. Mahse, ruihhlo sulhnû a hmelah a lang" a ti a. A duhtawk ringawt. Kan titi chhungin Senhri Hotel chu kan thleng ta a. He Hotel hi Mama ṭhianṭha ve tak U Zothana te hotel a ni. Hetah bak hian Mama pawh mi hmuh duh a neihin a kal ngai lo. Luh hmain ka nu chu ka call leh a. "Lounge-ah ka awm e." A rawn ti sap. Kan lut ta nghal a. Recetionist chu Mama chuan a va be nghal bawrh bawrh a, an lo hre ṭha bawk nen, Manager a lo be lâwk tawh bawk a. Room chabi pawh a la nghal. Kei leh Au Bawiha te erawh lounge-ah chuan kan phei a, ka nu chu shawl bat hlân bawkin a lo ṭhu fel leh at. Min hmuh rual chuan a ding vat a. Mama a rawn thleng zui ta bawk. Lift-ah lut dialin room no. 043-ah chuan kan lut ta dial a. Dar 9:10 chiah chiah a ni. 

Ngawi renga kan ṭhut ṭhap hnuah Mama chuan, "I hming kan hre duh a.." tiin ka nu chu a en a. 

Inringtawk takin, "Ramluahpuii ka ni a. Luahpui tiin min ko tlangpui, tun hnuah erawh Rampui min ti tawk pawh an awm" a ti a. Mama pawh chuan an hmingte chu a han hrilh khawmawi ve a. 

Ka nu chuan, "Bawiha hi chu ka hrechiang a, nang erawh hostelah i awm daih a, i thlalak chiah ka hmu. I tetlai hmel pawh i la paih lo hle mai. " A ti siam siam a. 

Au Bawiha chuan, "Teberi nu i ni takzet maw? I la naupan hmel sia" a lo ti. 

"Naupang e. Teberi ka neih khan kum 18 lek ka la ni. " A lo ti chat. 

Mama'n, "Aw le, Luahpui, ka û lo mai ang che. Teberi hnen aṭangin ka pa nen in inlaichinna leh thil nihdan tlangpui kan lo hre tawh a. Thudik a ni em tih kan chiang lo thung. Teberi nu anga inchhal hmeichhe pakhat a awm bawk si. Zanina kan hriat duh chu Teberi nu i ni takzet em tih leh finfiahna i nei em tihte..tunlaiah fimkhur a ngai tawh a, sum vangin chhungkaw tam tak an kehdarh ang chiahin pawisa vanga dâwt hmanga Teberi nu anga inchhal pawh hi an awm ngei ang tih ka rinsa a nia. Hriatchian che kan duh a ni. " A ti ta charh charh a. A ṭawngkam chu a na deuh ka lo tia, mahse, ka nu chu a nui sâng thung. 

"I mi rin dan chu danglam viau mah se; ka ngai haw lo mai ang e. I sawi kha thil thleng fô a nih miau avangin. I fimkhurnaah ka lawm zawk. Tin, ka sawi hmain Pathian zarah kei hian thawmhnaw dawr changtlung tak pahnih ka nei ve a, Teberi bak fa ka nei lo bawk nen, mahni tawkah ka nuamsain midang puihna ka mamawh bik lo khawp mai. 

Chuan, i zawhna kha ka'n chhang ang e. Teberi hi ka fa a nihzia fiahna chu Civil Hospitalah ,Lungleiah sawn kum 23 liamtaa nau neite record aṭangin a hmuh theih ang a. Chuan, hei in en duh takin tiin Teberi birth certificate original ka rawn keng bawk e. " Tiin a bag aṭangin lehkha a rawn lek chhuak a. Mama chuan a lo en vat. Ka hriatchhuah tak chu birth certificate hi a bo an tih avangin kan siamtir leh a, ka neih hma chuan baptisma channa certificate kha ka ring ṭhin. 

Mama chuan, "Siam chawp theihah ngai rih phawt ila, ka fimkhurnaah min hrethiam la..Teberi avang hian pawi ka lo khawih tawh a. Chetsual leh ka duh tawh lo a ni" a ti khauh a. Au Bawiha erawh a lo ngawi hle hle, ka nu erawh a melh ngun hle tih a hriat. 

Ka nu pawh chuan, "Ka hrethiam lutuk e. Fimkhur tluk a awm lo. Document ang zawng chuan kha bak lek chhuah tur ka nei hauh lo. Mahse, i pa khan diary a ziak ṭhin a. In la tirirâl lo a nih chuan a ziah lan ngei ka ring. I pa em êm chu i ringhlel lo turah ka ngai" a ti a. A inringtawk lutuk chu hmuhnawm ka lo ti. Tin, nizan aṭang khan ka ngaina tlat tawh. 

"Ka pa nen in awmdan chu engpawh lo nise, Teberi i neih hnuah khan engtin nge i khawsak zui a? Ka pa nen in inhmu leh rêng em? Rem i tih chuan, i chanchin tlangpui min hrilh ta che. Tin, tuna ka nu Mathani nen sawn in inhmu leh em tihte.." Mama bawk chuan a ti a. 

Ka nu chu ṭhu ṭhain, "Aw le, a tawi thei ang bera sawi ka'n tum ang e. Teberi ka neih hnu khan i pa min pek pawisa nen khan ka nu laizawn ka nuteii te khua Bunghmunah ka chhuk a. Ka pa khan min hnawtchhuak tawh a, lêt leh tumna ka nei tawh lo. Nuteii te bulah rethei takin ka khawsa chho a. Ka pawisa tam zawk kha bank-ah ka dah a ni. Kum 7 dawn ka nuteii te bula ka khawsak hnuah Aizawl lam mi ka hriatchian hauh loh pasalah neiin khawpui ka rawn chuang chhuak leh a. Mahse, kha ka pasal kha No. 4 hmanga sumdawng ṭhin, nupui pawh pa 2 lai nei tawh a lo nia! A hausa, mahse, ka hlau. Tlansan dan kawng ka dap char char reng a. Zan khat chu a ṭhiante nen inhnial thinrimin nasa takin an inhau a, kutte pawh an inthlak hial. An thawm hriain Police in an rawn man ta a. Kan pa chu an hruai ta daih a. Mahse, a fate leh a nupui hmasa te an rawn lang nghal. An pa pawisa an theih ang ang chan an duh vangin. Kei pawn ka tihtur ka hai lo, safe chabi spare ka kawl bawk a, safe-a pawisa awm zawng zawng la chhuakin kan pa jail-a an dah thlak zanah kan in chu ka chhuahsan a. A rawn chhuak leh vat dawn tih ka hriat avangin, Aizawlah ka awm duh lo. Lungleiah phei lehin sumdawnpui tur ka chhar thar a, tuna ka sumdawnna hi kan bei ṭan a. A kalkawng a thui khawp mai. Kan hlawhchham zat pawh a tam. Mahse, tihian a tawpa tawpah chuan ka hlawhtling ve ta ka ti thei ang. I pa pawisa min pek pawh kha ka hmang ṭangkai viau. Ka pawisa rûk vanga hetiang dinhmun thleng ka ni tih ka hrereng a, ka rilru a nawm loh êm avangin ka neih ve deuh hnuah khan ka pasal hlui, a sumdawnna tlachhe ta leh amah pawh natna khirh tak tawk mek hnenah ka ruksak zat chiah kha ka va pelêt leh a ni. Hriat pawh min lo hre lo. Mahse, ka bâ ka tlakah ka ngai tho. 

Tichuan, ka tlawngawl tak hnuah chuan, "Ka fanu pawh ka enkawl ve thei tawh ang" tiin Teberi hi ka ngaihven ṭan ta a. Kum 5 vel liamta mai kha a ni. Aizawlah in pem tih hre loin Lungleiah reitak ka zawng che u a. Mahse, Aizawlah in pem tih ka hriatin ka rawn phei ta a. Sangbera aṭang hian ka hre thei ta a ni. I sumdawnna bakah Sumdawng pawl intelkhawmah GS i ni a, i hming Malsawmdawnga tih leh i pa hming aṭang khan U Thanga fapa ngei i ni ang tih ka ring ta a. A hmasa berah ka rawn be nghe nghe che. Mahse, nang chuan min lo hmelma en nghal a. Ka bangbo hle tak asin. Thapui thawh ka tum mêk laiin ka ka dar ruh mawih avangin rei tak ka inenkawl leh ta rih a. Khatih chhung khan i pa a boral hman ta a. A vui ni khan ka rawn kal ve asin. Mahse, tuman min hre tawh lo. I nî ngei pawn. A chhan chu hmana tleirâwl derthawng leh dawldâng tak, hlauthawng hmel pu reng renga hun hmang ṭhin kha ka ni tawh lo va. Ka inringtawkin ka taksa te pawh a lo mam ve tawh a ni. I pa khan ka naupai tirh khan min tinain haw hle mah ila, ka fanu a enkawl danah demna tur pakhatmah ka neih loh avang leh a lo enkawl kha a that zawkzia ka hmuhin ka dem lo mai ni loin, lawmthu ka hrilh hman lo va a kal mai kha pawi ka ti. 

Fanu a awt a ,ka pe a. Ka fanu kha keiman lo enkawlin emaw lo titla ta ila, tunah te hian ka la dam ang em? Emaw pasal neiin hrehawm takin ka nunkhua ka hmang maithei. Teberi hi lo enkawl ta zawk ila, rethei leh rual awt reng rengin a seilian ang a, ka natna thlentu a nih bakah amah Teberi ngei pawh hian tun ang dinhmun hi a thleng lo vang. Engkim hi Pathian ruat vek zawk a lo ni. Tunah hian Teberi hi ka bulah awm tawh rawh se tia rawn hruai tum ka ni lo, a nu ka la dam ve a, thudik hi hre ve se tih ka duh vang chauh a ni. Tin, a pa a boral takah kha chuan min hrethiam u la..nu hran a lo nihnaah enhranna emaw U Mathani aṭang pawn eng emaw tak a tawn ka hlau ve tho a. Chuvanga rawn ngaihven ta vat ka ni e. " A ti ta dap dap a. Kan ngaithla uluk bawk a, thawm dang hriat tur reng reng a awm lo. 

Mama'n, "Ka mi rinzawng tak i ni tlat mai..ka ring thlap che. Teber, i nu a nih hi.." a ti zawi sup a. A thutakzia ka hmu thei. 

"Min ngaidam dawn nia, min rawn biaka ka lo hua che chu. Teberi nu anga inchhal hmeichhe pakhat leh a unaunu te hian min rawn vau chamchi a. Ka pa hriatloha sum ka pek zozai pawh an duhtawk lo. Teberi hi kan hnen ata hruai hran an tum avangin an duh ang ka tihsak zel lo thei lo va. A chhan chu ani hi venhim ka duh a ni. Ka pa thisen zawm vek kan nih vang pawh a niang e, a nu bula seilentir kha ka thei thlawt lo a ni. Ka pa khan kei tal kha chu thudik min lo hrilh se, kei pawn hmanah ka chingfel tawh mai tur. Mahse, ka pa pawh ka dem lo. Tuna ka nu bakah keimahni mitmei veng reng reng leh a thurûk kan hriat chhuah hlau reng renga hun a lo hmang kha ka lainat zawk. Nupui fanau nei chungin sâwn a thlak miau a. Mahse, ka dem ngai lo vang. Teberi kan farnu a nih theih phah si a" Mama ṭawngkam tinte chu ngaihthlak a nuam takzet a ni. Ka nu pawh a hlim tih a lang. 

Ka nu chu Chaltlangah a lo khawsa ve a. Tunah hian a nuteii fapa upa ber fanu keimah aia naupang leh a unaupa te a lo awmpui ve a lo nia. A mangan laia lo tuamhlawmtu a nuteii te thlauhthlak chu a tum loh thu a sawi ve bawk. Pasal neih lam a ngaihtuah lem lo va, "Teberi a him dam a, nula hmelṭha leh lehkhathiam tak a ni tih ka hmuin ka hre ta bawk a. Thlamuang takin ka nung thei tawh ang" a ti nghe nghe. Remchang hmasa berah a inah pawh kan leng dawn. Tin, Mama'n, Kan boruak hi khawiahmah la sawi chhuak lo tur leh ka nu anga inchhal kha ngaihven zui a tum thu a sawi a. Kan zawm tlang viauin ka ring. 

Kan in thlen hnu motor aṭanga kan chhuk hnuah Au Bawiha'n, "Engkimah hian ka nu hi a inhnamhnawih ang" a ti nghut a. 

 Mama'n, "Engkim kan chhui chhuak vat ang. Ka nu hi tu nge a nih chiah tih hi.." a ti hriam hraih. Ni e, Au Bawiha ang chiah khan, ka nu hi engkim kan buaina zawng zawngah hian a hnar kaitu a nih loh atakah…Hun hian hril mawlh teh se. 

Ka mu thlawp a. Ka chau. Mahse, ka mut a chhuak lo. Desy'n min lo call, ka buai bawk a, kan inbe lo kher mai. Ka la vat a, "Mate, Buanga'n an ṭhianho group ami a rawn SS a. Ka rawn thawn che. Lo chhiar rawh. A mak lutuk" a rawn ti ringawt a, a dah leh daih. Rang fahranin ka lut nghal a. 

Arema'n Senhri hotel kawta Mama nen kan ding dun, Au Bawiha motor kan nghak lai thlalak hi a up a, a hnuaiah, "Zorina rin dan hi a dik a nih hmel " tih a dah bawk. 

Buanga leh Johna'n min ṭan tlat thung. An inhnial laih laih a, thinlung na êm êmin ka chhiar zel. Rpa'n, "Phuba lak i tum a, mahse, i rin loh lamah a kual ta daih sia" tiin Zorina a mention a! 

Johna'n, "A tira an bulṭanna kha chu thuhran a ni. Mahse, Zorina hian Teberi hi a hmangaih tawh tih ka chiang, A hmangaihna aia sangin Teberi'n a hmangaih bawk" a lo ti ve bawk. A awmzia chu a nu laka phuba lak nan min lo hmang tak tak a ni. A thiante pawn an hriatpui vek. Hmanrua chu ka lo ni takzet e..

A tawpa Zorina msg erawh a nat dan a dang zak mai. 

"Ka nu pasal fapa tan chuan ka lo hnawksak mah mah a, Chem lovin ka lû a la ta a nih chiah hi..Mipa a ni. Nuṭa ni lovin.." tih thu hi. 

Zorinsang leh! Mawla..🥺