Zor 15

ZÔR…(15)

Ziaktu : Toni Râlte

A muthilh chhungin chanchin hriat châkin Au Bawiha ka call a, "Engtin nge? Mama chu?" Ka ti nghal. 

"Ka la hre lo, hei Tka nen kan phei dawn mêk e" a rawn ti a. Mama chu ka call ve hrim hrim a, mahse, a switch off. Engtin tak va khawsa ang maw. Rilru a hah duh khawp mai. Zorina pa a rawn kal a, a la muhil si a, va tih vak tur awm hek lo. Pawnah chhuakin verandaah bench an dahah chuan kan ṭhu dun a, coffee ka zuk lam bawk. A zakzum ka ti dawn nge, a inkiltawih lutuk chu ka khawngaih angreng. Chuvang chuan keiman ka biaka ka tihtlangnel a ngaiin ka hria, he lamah hian ka zeihawi lo ve nasa si a.

"U Zonuni a ṭha em?" Ka ti a. 

"Aw..a ṭha ti ila, a rilru a na lutuk a. A buaithlak khawp mai. " A ti a. A dik ang. 

"Nia, a rilru natthlak bawk êm a ni. Chuan, tunah tuin nge awmpui" ka ti leh a. 

"Kan nau pakhat he ta a lo zin lai a ni hlauh a, a awmpui a, a lawmawm tak tak, a lo awm remchang hi" a ti a. Hman nia Zorina damdawi leipui kha a ni ngei ang. U zonuni lo buaipuitu an awm chu amah Zorina tan tak pawh a thlamuanthlak viau ang. Coffee chu ngawi rengin kan in dun a.. 

"Teber, i pa boral kha ka lo hre ve a, pawi ka ti hle mai. " Pu Sawma awah chuan tihderna a tel lo. 

"Nia, a pawi ngawt mai" ka ti ringawt.

"I nu khan min lo bia a" a ti ta a. Hei hi zawh ka châk, ka zawh ngam chiah si loh a ni. A rawn sawi pawp ta chu ka lawm tak tak a ni. 

"Nia, ka lo hria a, a pawi ka ti, a zahthlak bawk sia" ka ti a. 

"Aa. A awm ve tho alawm, keini chhungkua chu innghahna tlak kan ni lo ve êm a , Bawiha lah a eizawnna heti hi a nia. A chhuanawm loh ve êm a ni, in chhungkaw dinhmun a ṭha si a" a ti luam a. 

." aa..dinhmun hi kei chu ka ngaipawimawh vak lo" ka ti ringawt. 

"Tunah phei chuan hei a û enkawlna tura a beihna lah a chhunzawm theih hmel si loh a, a buaithlak dawn khawp mai" a ti nang nang a. A rilru hahzia chu a hmelah a lang thei. 

"An final hun kha an sawn maithei a ni. Zorina heti hi a ni sia, Mama khan a sawi tlat" ka ti vat a. 

"Sawn pawh nise, ka tihtir thei tawhin ka ring lo, a hlauhawm êm mai. " A ti zawi dap a. 

Pu Sawma hi ka dem hran lo, tuin nge fapa te thichhawnga an awm tawh hnuah indona mualah tir liam thei tawh ang. 

"Mahse, u Zonuni enkawlna a ngai sia" ka ti hrâm a. 

"A dik alawm, kawng dang kan dap ve mai ang chu..kei pawh insiamṭhat ka ngai. Ka fate hi ka fate ni lose kei pawh hian tun dinhmun ka thlen ka ring lo. Ka lo bo rei lutuk a, ka ti lungngai rei lutuk hi ka inchhir vawng vawng asin" a ti ta dap dap a. Chutia a thiltih ṭha lo te avanga a inchhir chu ka lo lawm ve ringawt. A nun te siamthain sim hlen ta se Zorina tawhsual tawhna hi a thlawn lo vang. 

"Pa Sawm, nia.. ka sawi phak chu a awm lo naa, zu te hi chu in tawh lo la a lawmawm ngawt ang. Zorina pawh a lawm viau ang, U Zonuni pawh ngaihtuah la.."ka ti ve a. 

"Ni e, hei nizan aṭang khan ka la in leh tawh lo. Bakah i nuin min rawn biak aṭang khan rilru ka siam ve bawk a, chhungkaw chhuanawm kan ni miah lo naa, hetiang taka hmuhsitawma awmtirtu chu keimah ka ni tih ka inhria a, chuvang chuan hmasawn ka tum. I nu ka huat vanga sawi ka ni lo a ni" min vengthawng tak hian a ti a. 

"Nih leh ka nu khan engtin chiah nge a lo biak che le.." ka ti ta chawt a. A ngawih vung vung hnuah, "Englo a nia..ih, 'I fapa hi lo thunun rawh. Ka fanu nen hian an inkawp ka remti lo" tih vel a nia. Ka rindan sa a ni bawk a, mak ka ti vak lo. " A ti ta a. Ka nu chu âw..Zorina te lam va biak hi a ṭul lo chiang asin le. 

"A nih chuan engtin nge rilru i siam?" Zak chung chungin ka ti a. Pu Sawma chu mite ngaihah zu ngawlvei, han en mai pawn pa zahawm leh hna sang thawk a ni lo tih hriat ngawih ngawih mah nise, Zorina pa a ni tlat! Ka tan chuan a zahawm lo thei lo. Min rawn melh a, nelawm taka nui chungin, "Ka rilru dik takah chuan, 'Bawiha hi a la na mai mai âwm sia, tha taka hrilh tur a nih hi' ka ti. Mahse, hetia tawhsual a tawh leh si takah chuan rilru siamthiam harsa ka ti..tin, a luhlul êm a, a tumna leh duhna hi sawh sawn sak mai mai theih a ni lo. I nu meuhin min rawn biak takah chuan chapo taka ring lo tihkhawng tlat ai chuan a sawi ang kha lo zawm mai ka tum a. " A ti mawlh mawlh a . Ka dem hauh lo, amah ka nu tak pawn Zorina te a tih dan ang chiah hi tawng ve nise, bansan turin a vauin min vau hial tawh zawk ang chu mawle. Johna a rawn kal tak avangin kan thusawi kan thlak ta daih a. La kawm chian ka châk viau, hun remchang a la awm êm ang chu maw..

Chawhnu a lo nih meuh chuan Zorina pawh a rawn harh ve tawh a. A in chi lam kan tulh a, a zun siak chu a nin tawh êm avangin an phelhsak a. An zai hlawhtling naa, indim erawh a la ṭul dawn hle a ni. Desy nen kan inbia a, a lo tlai ve tawh tho nen, hawn lam kan hnaih ve ta. 

Ka hawn hmain a bulah ka va ding a, "Ka hawsan phawt ang che. I ṭha zel turah ngai ang. Mut tam kha tum la aw" ka ti a. Min rawn enin, "Nia, haw tawh rawh u, hei ka pa leh Johna an awm alawm..E chuan,U Sangbera chu eng nge a chanchin?" A ti a. An chhuah rih phawt thu ka sawi a. 

A bu nghut. "Nia, amah chu a ni lo vang. Ka call log-ah a lo lang ve si a, chuvang a nih kha.." a ti a. 

A bianga chul zauh pahin, "A nih aw.. ka lo bia ang che" ka ti a. Ka kalsan ta rih. Pu Sawma paw'n, "Teber, lo ngaihtuah lutuk suh u..hei a ṭha ve zel ang. " A ti ve luam. 

In ka thlen chuan Mama pawh a lo haw tawh a. Ka nu leh nuteii te erawh an chhuak. In chunga ka han chhoh chuan Mama chu a lo inbual a. Ka chhuk leh rih. Ka pa kha la dam se, hetiang thil buai nuaih hi a chinfel dan a hria ang em aw..ka nu lah a chhuak zut reng ta mai a. Zalên a châk tawh âwm mang e. Nu chhûr pui tawh si hian ngaihzawng te pawh a nei lo vang tih a sawi theih miah loh. 

Eirawngbawl nan a la hma deuh si a, ka thawmhnaw uluk zualte ka su a, pho tura in chunga ka han chho a, ka pho zawhah Mama a inbual zawh takin tiin a roomah in chung aṭang chuan ka chhuk a. A lo inthlak fel diam tawh. Min hmuh chuan, "Lo kal teh" a ti a. A rooma safa a hunah chuan ka ṭhu nghal. 

"Mam, engtin nge an tih che?" Ka ti a. Ka hre châk zek zek tawh a ni ber. 

"Nizana kan inbiak dan min zawt a, kan inhmuhna hmun tura ka kal leh kal lohte" a ti a. 

"Nizan khan i va kal tho mi?" Ka ti vat. 

"Kal e mawle, amah Zorina ka hmu tawh si lo va, a lo khatih vang kha a ni ngei ang. A bike erawh a lo awm a" a ti a. 

"Mam, ti nge Zorina kha hmuh i duh chhan?" Inthlahrung ru deuhin ka ti a. Khumah ṭhu thlain min rawn hmachhawn a. 

"Ka nau, thil tam tak hi buai a awm a ni. Chu chu hriat ngei ka duh tlat a, Zorina hian min hrilh theih ka beisei a ni" a ti a. Ka la duhkhawp lo nasa. 

"Eng buaina?" Ka ti leh hap. 

Dawhtheih loh hmel zet hian, "Ka nuin Zorina a huat chhan hi mawle..ka nu hi Zorina hian a lo pui em tih te" a tih chuan ka bo telh telh. 

"Sawi chiang ta che" ka ti vak.

"Ka la sawi chiang thei lo alawm. Ka nu hi rosum chungchangah a buai viau tawh a nia. Vawiinah pawh ka pa ukil a va hmu dawn a nih kha.." a ti ta a. Hei chu a bengvarthlak ta deuh e. Ka hriatsa a nih avangin mak erawh ka ti lem lo. 

"Eng em êm nge a duh a?" Ka ti leh ringawt. 

Duhâm ka ti êm a ni. Bakah kan la khawsa ho vek a, tuman ka ta bik ka ta bik kan ti lo. 

Mama chuan, "Ka pa fa i nih ve loh vangin i puala ka pain a hnutchhiah che saw a hminga dah a duh a ni" a ti ta a. Ka meng kâwk, ka nu êm êm chu âw..

"A tidanglam thei dawn em ni?" Hrethiam lo takin ka ti a. 

"Ka hre lo,. I signature a mamawh dawn a. Chuvang chuan Zorina kha biak ka tum.." a ti leh hmuk hmuk a. 

."Zorina'n eng nge tihtheih a neih ve?" Ka ti vat..

"Tihtheih a nei rih lo, mahse, ka nu hian haw ber âwma lang si hian a lamṭanga siam a tum te hi a ni lo maw tih ka ngaihtuah a..an inkungkaihna zawh ka tum kha a nia..tikha a ni ta sia. Rindan ka nei a, Zorina chunga a lo hneh tawh ten phuba lak an duh avangin zui ruin tiang khan an sawisa a ni thei. Tin, Zorina nen kan inhmu dawn tih hriaa keimah ka tâl awh theih nan tu emaw ruaiin an va sawisaktir a ni thei bawk. Tu tan nge ka hnawksak tih chu nang pawn i hria ang" a ti ta mawlh mawlh a. 

Ka rilru a buai viau naa, Mama ṭawng chhuah azarah ngaihdan ka neiin rilru ka siamfel ve thei ta deuh. 

"Bakah Mama, Zorina kha ka nu pawn a va vau ve tho a, Police bulah pawh ka sawi sia, ti nge ka nu an koh ve loh?" Ka ti a. 

"An ko mai ang..emaw koh chhan tur an nei lo ve thei..Zorina phone kha tu emawin khawihin call log-ah kei chauh rinhlelhawm turin a dah a ni thei.." a ti leh duah a. 

"Mam, i van fing..Boss Amanda i star ṭhin chiang " ka lo ti fiamthu a. 

A nui suk a, "A pasal Samsona ai hi chuan ka chhe lo daih zawk sia tiraw?" A ti ve a. Kan nui dun vur vur..boruak pawh a ziaawm ta deuh.

A hun tawh tho a tiin Viteii nen rawng kan bawl dun a. Chawhmeh siam thar vek a ngai a, kan bei rei phian. Ka nute lah rawn haw thei lo. Nuteii lah hian a mei ang hrimin a zui ve zel bawk a. Kan inbawl zawh meuh chuan Au Bawiha pawh a lo haw der tawh. Bal thlansa hluama chaw ei hi ka thiam thlawt loh avangin ka inbual sawk sawk a. Ka lu ka suk loh ni hi chu ka inuluk vak ngai lo. Ka thatchhia te pawh a niang e. Serum ka inhnawih lai takin ka phone a rawn ri a. Number ringawt a ni. 

"Hello" ka tih chuan a reh vung vung, "Hello" ka ti leh a. 

"Teberi a ni em aw?" Hmeichhe aw sin lam, fiah angreng tak hian a rawn ti a. 

"Aw ni e. Tu nge aw?" Ka ti a. 

Chu nu chuan, "I nu ka ni" a rawn ti ta mai a! Ka phone ka thlauh lo chauh a ni. 

"Hello, i la awm em?" A rawn ti leh a. 

"A..aw..tu nge i nih?" Ka ti leh nghek. 

"I nu ka ni, Ramluahpuii..nangmah hringtu" a rawn ti a, a aw lah chu a fiah tial tial niin ka hria. 

"I â sia.." ka tum loh tawpin ka ti a. A rum nghat a, insût hraih hian, "Tuin nge chutiang chuan sawi?! " a rawn ti chuai raih a.

"Ka nu i ni tak tak lo" ka ti a. Ka chiang miah hleinem, tunhnaiah thilmak leh thu thin ṭhawng tak tak kan dawng reng a, lo âwn dual dual kha ka tum rih lo. 

"I nu ngei ka ni..kum engzat chhung nge ka zawn tawh che i hria em?" A rawn ti leh a. Ka chhing sawk. 

"Min hrethiam teh, a nih engtin nge ka number i neih!" Ka ti ta khauh a. 

"Hna bera ka neih miaute chuan neih a harsa hleinem..min hmu duh ang em?" A rawn ti leh a. Ka rilru a buai takzet. Ka nu min hringtu zawn chhuah ka tum kha a nia, tunah ka zawn pawh ngai loin min rawn be ta chu a ni sia. Mahse, ka nî aṭanga thu tam tak ka lo hriat tawh avangin bawh rawk rawk chi a ni ang em ka hre si lo. 

"Engtin nge ka nu i tih ka rin theih ang!" Ka ti a. 

"Ring tawp mai rawh. Chuan, tuna enkawltu te khan eng thu nge an hrilh che ka hre hauh lo naa, kei chu min sawi bo an tum zel ka ring..a dik ngei bawk ang. Chung thil te chu chiang taka i hriat a ngai a ni..hetia ka lo biak che hi i chhungte kha i hrilh loh ka beisei, a chhan chu englaimahin nang leh kei kan inhmuh hi an duh ngai lo" a rawn ti ta bawrh bawrh a. 

"Aw le, khaw nge kan inhmuh ang?" Ka ti a . Ka phone chu duh aiin ka hum nghet bawk. 

"Zanin dar 8-ah in biak in sir chhuk thlakna stepah khan ka lo awm ang" a ti ta a. A chian hmel bawk a, thil hi chu fiah zel a ṭha. 

"Aw, ka rawn kal ang" ka ti ve sap. A dah ta a. Chaw ei tura min rawn koh thlengin mûk taka inngaihtuahin ka lo ṭhu char char. 

"I va mûk teh rûn ve"Mama'n min tih chuan ka phu zawk. Ka nu chuan min lo chîk hle tih ka hre mai. 

"Ka rilru a kal ding lutuk a" ka ti ringawt.

"Ngaihtuah ngut ngut suh. A ṭha vat mai ang" Zorina ka sawina emaw tiin Mama chuan a lo ti ve bawk a. Ka nute pawn damlo na tuar a nih vang nge ni, amah dodalna lam an sawi ri lem lo. 

Au Bawiha'n, "Naktukah Bungraw ṭhenkhat Serchhipah kan han dah dawn a, Tei, Parvula saw i lo ngaihtuah deuh dawn nia, zingah kan chhuak ang" a lo ti a. Ka bu nghat. Naktuk hi class chawlh a ni bawk a, a zia viau zel e. Tin, Zorina te final hun kha a ni bawk a. Mahse, tihi a ni ta si. Hrechhuak thut niawm takin, "Mam, final kha in sawn dawn ta lo mi? Zorina tihi a ni sia" ka ti vat a. 

"Zaninah kan meeting dawn e. " A lo ti vut. 

Nuteii chuan, "Sâwn sawn a ngai mawni le..Dam ṭha leh pawh nise, insual leh tur chuan hun a duh rei viau tawh lo'ng maw?" A lo ti ve a. A sawi dik lohna ka hre hran lo. Mahse, Zorina an ngaipawimawh tih lantir nan hrim hrim pawh hmalakna eng emaw tak chu an neih ka beisei tlat. Thleng ka sil lai te chuan zanina ka mi hmuh tur ngawt chuan ka rilru a luah a ni. A thlalak te lo hmu sa tawh ni tal ila, ka nu dik tak a nih leh nih lohte chu ka hre thei mai thei. Risk ka la dawn chu a nia..nge mawle, nu dik tak pawh hmu leh hre hman lova thih a hlauhawm. Ka chhungte hrilh chu châk ru viau mah ila, thil a buai zo vek ang tih ka hlau ve bawk si. Rilru mawlhtu nei rûn chungin ka pindanah ka lut a, khumah te chuan k'n ṭhu ngawt a. Dar 7 a pel âwrh chauh. 

Zorina biak ṭhain ka hria a, ka call ta a. Mahse, a la thei lo. Police lamin an la kawm êm mawni dawn le. Kawl pawh nise, lehlamah ani che ṭha thei lo tak chuan phone chelek reng kha a peihawm dawn loh. A kawchhung lam thipût siamtu kha a dulah an ṭum vang nia ngaih a ni a. Hmanrua leh thil hriam lam sulhnu a taksaah hmuh a ni lo. A bek dinglam, a beng chung deuh hi hmun 8-ah an ṭhui a. A hmai lam chhe vak lo hlauh. A kut veilam benrêk hi a tiche ṭha ngam lo bawk a, an herh a nih a rinawm bawk. A bak han ngaihtuahawm vak a awm lo  

Johna ka call ta a. A lo la var. "Eng nge a an?" Ka tih chuan, "A ṭha ti ila, a dar dinglam hi na a rawn ti leh deuh a, nachhawknain an jection a, tunah chuan a muhil rih" a rawn ti luam a. Ka rilru a nuam huai e. 

"A pa a haw tawh mi?" Ka ti a. 

"Aw.. in lam ngaihtuah a ngai ve bawk sia.." a ti a. 

"A ṭhat chuan a lawmawm chu..a harh hunah ka lo be dawn nia" ka ti a. Kan dah ta rih. Eng emaw tia ka buai leh deuh hnuah dar 7:45 a rawn ri ta a. Min hringtu ka nu hmu tur chuan ka insiam ta a. Ka chhungte bulah chuan, "Desy te inah ka va kal lawk.." satliah deuh a tiin ka chhuak ta a. 

Lungphu pawh a rang ṭan ta. Keimah chuan ka phei chhat chhat a. Kan in aṭangin Biak in a hla lem lo, ka nî teah chuan ka peng ṭêp a, mahse, an rik deuh laih laih avangin ka ṭhulh leh ta mai. Ka sana ka bih leh zauh a, dar 7:56 a ni ta. Thawk ka la kâwk a. Zaninah hian thla kaw chhung min paia harsa taka min hring chhuaktu ka nu nia insawi ka hmachhawn dawn a, Ṭhiante u, falâk in awm ve ka ring a, he lai scene tak hi a harsa in ti ve em? Palzam a har tiru? Eng mi pawh kan nu leh pate chu lo nise, kan piantirh ata la hmuh miah loh, han hmuh dawn meuh chuan zâmna leh huphurhna, feelings mak tak hi a awm nia! Kei pawh chutiang mood hrang hrang nei chung chuan ka phei zel a. Biak in chu a lo ding luah a. A piah lawka step lam chu ka va hawi phei ta a. Step bula bawhhlawh bawm lian an hun bulah chuan tu emaw chu a ding chiang e. Ka kut ka lo hum ruh hle mai, ka inthlahdul tak naa, ka chhungril erawh la ṭang nasa tak a ni. Ka ke pen pawh a muang deuh sawt. A bul chu ka thleng ta. Showl dum lam hian a inkhuh hlûn a, a lu pawh a khuh vek avang leh a dinna lai tak a thim deuh avangin a hmel pawh ka hmu chiang thei lo. 

"Teber.."ka ṭawng hma chuan a ti ta a. A aw sin leh fiah zet avang chuan phone-a min rawn betu kha a ni tih ka chiang viau. 

"Umm" ka ti ringawt. Kea kal tak chu an awm lo naa, Motor veivak an awm nak nak..a kut a rawn phar chhuak a, ka lo ban ve vat. Kan inchibai ta. Ka nu nia insawi chu kei aiin 2inches vel chauhin a sang awm e. Chuvang chu ni maw ka nu a nih ngei ka ring ve tawp. 

"Hawh,." Tih leh min kaih a rual a. Stepah chuan min chhukthlakpui ta a. A thui hran lo bawk a, ka zui ve zel. Step tawpa kawngpuiah chuan car a lo ding a. A sen duk lam niin ka hria, a ên dan a fiah lo em mai a. A hawng a, "Lut rawh" a ti sep a. Ka hlauthawng thut. He thil hi inbumna ni ta se tiin, a rawn nui hak a. 

"Khawiahmah kan kal dawn lo, car chhungah hian thil sawi dun lawk ka duh a" a ti a. Kei pawh ringhlel tawh lo chuan ka lut ve ta a..a a tih ên takah chuan a hmel pawh ka hmu chiang thei ta deuh, a shawl khum a hlip ta bawk a. Chiang takin ka hmachhawn ta. A sam chu a kir lek lek a, a dum hlap bawk. Ka sam ang chiah. A hmai a bial a, a ngo hle bawk, nu hmelṭha tak a ni. Chutihrualin a la upa lo tih pawh a lang chiang viau. A thau lo va, cher chhe tak pawh a ni chuang lo. 

Sawi mai tur ka hriat loh laiin, "Min la ringhlel em?" A ti sap a. Ka lu ka thing ringawt. 

"Ka hmu ta che hi ka va lawm êm" tih leh min kuah a rual a. Ka lo kuah ve chawt. Nute meuh chu huata do tlat zawng a har a nih âwm hi maw..

"Mahse, zawh duh che ka nei a" inlak hran pah chuan ka ti a. 

"Sawi teh" a ti sep a. 

"Ih, ti nge min tihtlak i tum? Chuan, sum vangin min hring bawk a tiraw?" Ka ti hrâwk a. Ka thin chu a rim miah lo, mahse, ka sawi zawng chuan ka nâ..

Ka kut a rawn vuan a, a kut nêl thep chu ka nausen lai khan ka mamawh ve tho awm si a. "Chu chu i hriat dan a ni ngei ang..ka rinsa a ni e..i lakah thudik an zêp vek alawm..an zêp tur pawh a ni rêng a. A chhan chu kei chu huat rawn ka ni a, ka hnawksak tlat a" a ti ram hmak hmak a. A nitmeng pawh a danglam deuh. 

"Mahse, eng nge thudik chu?" Ka ti hliai a. 

"Thudik maw..Ni e, dik tak in ka sawi ang, nang ka pai che khan ka pain in aṭangin min hnawtchhuak a. Kum 18 chauh ka la ni miau a. Ka fa paina chu i hre duh em? Mak i ti maithei. Ni e, I pa, hmanni maia boral ta Sawithanga kha a ni! Khatin meng phâwk viau suh. Awih a harsa ang tih ka ring alawm. I nu nen an inneih tawh hnu kha ni mah se; i nu kha a duhkhawp lo nge, a school naupang hlui ka ni a, chunglai chuan fel ka tiin, ka ngaina. A zirlai ka lo nih tawhna hmangin min kawmin min bum ta a ni. Kan chhungkaw dinhmun a chhe êm êm a, kan rethei a, incheina ṭha te ka duh ve si a, mahse, ka tan tihngaihna a awm si lo. I pa khan thil tam tak min leisak a ni. Kei pawn khatianga ka chunga ṭha ta na nâ na chu ka ngaina lo thei ta lo va, chutihlai chuan i pa te ṭhenawm hnuai kan luah ṭhin. Chutia a rûk arala inkawm ta fô chu kan chesual ta a. Vawi hnih chauh kan chesual a, mahse, nau ka pai ta tlat si. I pa chu ka hrilh ta vek a. 

(A heh a pet a. Sawi hrehawm a tih hmel viau)..ani chuan ka rin loh takin min neih theih loh thu leh fanu a awh vanga min kawp a ni tih a sawi ta a. I nu khian fa a nei thei tawh si lo va,. Kei chu a hmanrua lek ka lo ni tihna a nih chu! Ka pain min hnawtchhuak ta bawk si. Ka mangang takzet a, i pa chuan, "Naute hi min hrinsak la, a senso leh i mamawh engkim ka tum vek ang, tin, i neih hnua i inenkawl zuina tur sum ka pe bawk ang che. Inneih chu a theih si loh a" tiin min thlem ta a. Nau tihtlak kha ka tum reng reng hleinem. Ngaihtuah pawh ka ngaihtuah hek lo. 

Ka dinhmun avangin i pa thu chu ka hnial thei ta lo va. Ka pawm ta a. An inah ka khawsa zui ta a. Ka chhuak ngai lo , incheckup a ngaih pawn Dr. Hminga a rawn kal mai zel. I nu kha chuan i pa kha a pasal a ni tih a hre lo . Kan zêp tlat a ni. Ka nei ta che a, i duhawm asin. Mahse, zan khat chiah ka mutpui che a. A tukah i pa te chuan an la ta che a ni. Kei pawh sum ṭhahnem tak min pe a, I pa khan , "Tihian ka enkawl ang a,ka fanu a ni a. Ngaihtuah suh, a rethei lo vang. Engtik niah emaw chuan in la inhmu leh em êm ang. I chunga ka tihsual avangin ngaihdam ka dil a, fanu min pek avangin ka lawm bawk. Mahse, kan fanu hi a puitlin hma chuan rawn lang rih lo la ka duh a ni. " Tiin min chah a. I pa kha ka hua a, mahse, ka haw tak tak thei lo. Kei pawn dik lohna ka nei miau a. Mi pasal a ni tih hrereng chungin ka mutpui a, min bum ka ti thei bîk tlat lo a ni. Chuta karah mi fate an vanduai em em laiin ani chuan min la tuamhlawmin sum min la hnutchhiat thei a, kan fanu nang lah enkawlna ṭha ber a la pe thei bawk che a. Khatihlai khan i pa duhdan kha hnialin keiman enkawl ve ta che ila, tun dinhmun hi i thleng ang em ka hre lo. 

 

I lo puitling ta a. Tin, i pa a boral ta si. A hun tawh e tiin ka rawn zawng chhuak ta che a ni. Tin, tunah chuan Pathian zarah nangmah enkawl ve thei tawh tur chein ka sumdawnna te a lo lian ve tawh a. I pa sum min pekte peipung ve zelin nangmah vangin khawvel ka sual ve a, ka hlawhtling chu ka ti ngam lo naa, nang chauh na nâ na chu ka huphurh tawh lo che.." a ti ta dap dap a. Ti nge kei mi derthawng, kum la naupang tak hi thumak leh thin ṭhawng tak tak hian min den reng bîk chu le! Ngaia neih theih ni bawk si lo. 

"A va mak ve" ka ti thei ṭâwk. Ka nu chuan dâwt a sawi nge, ka chhungte zawkin? Ka pa khan heng thu hi min hrilh miah si lo va. Ka nu te bakah Mama te pawn thudik hi an hre lo tihna em ni ang?! 

Ka nu nia insawi chu ka melh leh a, "Ka pa chuan khatiang khan a sawi ve lo. Chuan, Mama pawn engmah a hre lo" ka ti ta zung zung a. 

"Sangbera chuan nasa takin min hua a ni. A chhan ka hre hauh lo. Engkim hi felfai taka tih ka duh avangin I pa mi rin ber a nih avangin ka rawn be tawh alawm. An nun aṭanga kal bo nghal turin min vau a, mi rapthlak tak angin min chhuah asin.." a ti ta a. Mak ka ti êm mai. 

"Ni lo, chutiang a nih loh kha..Mama nen in inhmuh tawh kha, tichuan, a tum loh deuhin kut a thlak palh che a. I ât phah hial a ni lo'm ni?" Ka ti nghek nghek. Ka sahal vek. Ani pawn ka awmdan chu a hrethiam nge, car kawngkhar chu a hawng thawveng ta vat a. 

"Inbengdai rawh..teber..chutiang thil chu a la thleng lo reng reng. Sangbera nen vawi khatmah kan la inhmu lo" a ti ta mai a! 

"Dawt a nih chu" ka lo ti tuar..engvang nge ka hre lo, ka mittui a rawn tla a..ka rum kâwk kâwk bawk. Ka thil tawn hi ka duh lo, hetiang tawn fô hi ka duh tawh hlawl lo. Tu nge rina rin loh tur pawh ka hrethiam tawh lo. 

Dimtê hian ka hmai hupna chu a rawn la thla a. A lamah min kuai pheiin, a kut dam tak chuan min chul heuh heuh a. Chuti tak chuan nu kut hi a lo dam ang tih ka la hre ngai lo, ka lo thlakhlelh luat vang nge chhuak zetin ka ṭap ta hlawp hlawp a. Ka samah chulin ka hnungzângte chu a zut hliau hliau a. Ka nu Thanpuii lak atangin hetiang kut dam hi ka la dawng ngai lo. 

"A ṭhawng hle che a nih hi, engkim hi ka thiam loh vek a ni. I pa boral hma khan rawn lang tur ka nia. Mahse, buaina ka tawk ve hlauh si..ka lo lang har lutuk a, min ngaidam rawh aw..i pa khan min ngen nasa êm a tin ni..i pa khan ka hmangaih ang bawk chein a hmangaih si che a. A thlazar hnuaiah khan i him tawkin a hre tlat a. Mahse, eng thu thang dik lo zozai nge i lo dawnsawn tak mai le.." a ti mawlh mawlh a. A aw chu a damin ka nâ te chu a kiang hawk hawk hian ka hria. Nu leh fa inzawmna thûkzia hi aw..chu nu chu ka nu diktak a ni ang tih rinhlelhna chhete mah ka nei tawh lo. 

Ka han ziaawm a, mittui te ka hrukhul hnuah, "Mama nen chuan inla inhmu lo tak tak em ni?" Ka ti leh ngat. He lai tak hi a buai riau tlat a ni. 

"Aw..hmu lo. Mahse, ka rawn be tawh. I pa thachhangdâwltu a ni miau a. Misual hmuhin min lo hmu ta bawk si a. .eng thu nge i hriat chu han sawi teh" a tih laiin ka phone a rawn ri. Viteii a ni. 

"Aw vite" ka ti sap a. 

"Khaw nge i awm? Ih, api ten u Desy an bia a, i kal loh thu a sawi bawk sia. Tu nge a va hmuh le an ti an tia..ka lo hlauthawng" a rawn ti ta a. 

"Hlauthawng suh. Ka rawn lêt ṭêp, ka u te an lo haw tawh em?" Ka ti a. 

"U Bawiah a lo haw tawh. Chuan, Api chuan tu mawni a bia a, an inhau deuh hrep a..an hlim bawk si lo va, ka pindanah ka awm daih. Lo haw vat rawh, a nuam lo" a rawn ti a. 

"Aw le..thlamuang deuhin lo awm rawh" ka ti a. Kan dah ta. 

Ka nu chu thil awmdan ka hrilh a. 

"Sawi tur kan la ngah hle mai. Mahse, chutia i chhungte an buai tawh chuan haw phawt rawh. Remchang a awm leh turah ngai ang. Tin, phone aṭang pawn kan sawi thei ang. Engpawhnise, Tuna kan inhmuh hi tumah la hrilh lo la ka duh, ka hlauthawng a ni. Sangbera'n khati taka min huat chhan te pawh kha hriatchhuah a la ngai ang. Hei hi ka tiam a che. I nu ka ni a, ka ni reng bawk ang, saw mite sawn i chungah thil ṭha lo an ti a nih vaih chuan ka theihtawp chhuahin ka dodal ang..hrereng ang che..kal tawh rawh le..ka rawn bia ang che" ti mawlh mawlh chungin min chhuahpui a. Stepah chho dun lehin kawng chhuahah min chhuksan leh ta a. Zawhna tam tak la nei ṭûn chungin in lam ka pan ta a. Ka mawl hûih a, ka ni chhû a ni tawp. 

Ka nute pawh an lo la meng a, "Desy te inah i kal si lo va, khawiah nge i kal a?" Nelawm loh zet hian ka nu chuan a lo ti a. 

"Ka nî te inah" ka ti ram hmak. Biak hman lohin pindanah ka lut daih sia, a phun zui hlak erawh ka hria. Ka pawisa dawn teuh lo. Mahse, kha chen min lo enkawl tawhnaah chuan ka zah tur chu a ni. Tuilum pawh in loin ka mu ta a. Ka awm thiam vak lo. Mahse, rilru kaptu a awm tlat a, a tihluih theih mai e. Kawm deuha muin ka ngaihtuahna chuan kil tin a fang a. Ka nu kha khaw nge a chen a, eng nge a thawh tih pawh ka zawt lo va, ka hamhaih êm a tin ni. 

Mama nen an la inhmuh miah loh thu a sawi khan a ni min kap ta ber chu! Ka nî leh Mama te hian dâwt min fah nge, ka nu khan dâwt a sawi zawk?! Ka nu kha hmeichhe nung ho leh tladah tak hmel a pu hlawl lo. A hmelah ruihhlo zunzâm hmuh tur a awm miah lo. A nih chuan Mama te hian dâwt min hrilh ni ta se, engvangin nge ka nu chungchangah dâwt an sawi kher ang? Ka û chu rilru chhe tak ka han puttir a , ka pa thisen kai ka nih ve miau avangin min huphurh a..ka nu pawh a hua ti dawn ila min huphurh a nihte chuan min lakbotir daih tawh tur a ni bawk si. Tun thlengin ka tan û ṭha ber leh min venghimtu nih a la bâng si lo. A nih leh ka nu hian heng thil hi a hre ve miah lo tihna nge a lo hriat ruk vek vang zawkin heti tak hian min hmumawh ta ni ang? Chu chu thil ni thei a ni. Ka pa fa ka nih ve miau avangin rosum chungchangah ka pa khan min hmaih dawn lo tih a hria ang a, ka û te chu an puitlin tawh avangin a nêk ngam si lo va, kei a hmeichhia ber chu min dodal ta hle tihna a ni thei ang em?! Nge ka pain a fanu ka ni tih zêpa mi fa la anga a insawi vangin min haw zawk? Heng thil zawng zawng hai chhuaka thudik phochhuak tur chuan ka nu puihna ka mamawh dawn a ni. 

Zorina pawh ka rilruah a lang vak thei tlat lo. Ka inthiam lo deuh. Mahse, Johna'n engmah a rawn sawi lo va, an ṭha ni turah ka ngai. Ka mu tlem khawp mai. Ka thawh chuan Viteii chauh a lo la tho..tuilum ka in laiin Police an rawn lut leh ta. Viteii nen chauh kan ni sia, ka hamhaih takzet. 

"Malsawmdawnga kan rawn la dawn a. Zorinsanga kutthlak thubuaiah mawhphurtu a nih avangin.." a tih ri chuan na takin min rawn vaw sawk niin ka hria. Teberi hi a tê viau naa a lo chhel a nih dawn hi, thu thinṭhawng tam tak a dawngsawng tawh chung pawn a la dam thei a! Hehe..

"Khawngaihin i û chu min kohsak ta che" zaidawh deuh hian a ti leh a. 

Ka harh chhuak thut. "Aw le.." tiin in chung ka pan nghal. Mama room kawngka chu ka chum bur bur a, "Tho rawh. Police an lo kal.." tiin ka au tuar tuar a. Mama pawh a reh rei lo, a rawn hawng vat a. Au Bawiha a rawn chhuak ve nghal zat bawk. 

"Mam..eng thil nge i tih? Engvangin nge Zorina chu i sawisaktir? Mawh…" tiin a chum dawt dawt a. Ka ṭap hlawp hlawp bawk. Min pawm bet a, "Naute, hei..khatin awm suh. Engmah ka ti lo. Min ring rawh" a ti dam thlup. In hnuaiah kan pathum chuan kan chhuk a. Ka nu pawh a lo tho tawh. A hmel a ngui ve hle.

"Sir, eng thil mah ka ti lo." Mama chuan a ti chang fak a. 

"Engpawhnise, min rawn zui phawt rawh. He tah chuan sawifel theih a ni lo" Police chuan a ti a. A fel hmel ka ti. Mama chuan zâm hauh loin, "Ka naute u, lo hlauthawng suh u. Thudik chu kan hai chhuak vat ang" a ti nghet charh. Ngawi rengin kan en liam ringawt. 

Ka nu chuan, "A va pawi tak êm..Ti êm êm hian Sangbera'n Zorina a lo hua ang tih ka lo ngaihtuah phak ngai lo" a ti zawi sap a. Ka ling phat, "Nangman i huattir a nih kha, Zorina nen kan inṭhen theih nan Mama i fuihpawrh a. I tel ve, i bang bik lo" ka ti tuar tuar. 

Vin zet hian, "Pâng pâng che hian, nangmah vang vek a nih zawk hi..Zorinsanga i ngaihzawnna rah chhuah a nih hi..i chawh ngawt mai" a ti hmiah mai. Ka thinlung a na vawng vawng. 

"Nu rapthlak tak i nih hi" ka ti thei hram. Ka pindan lam ka pan. Ka nî te ṭawng ri ka hriat hma chu ka khumah ka bawk reng a. Ka nî te thawm ka hriat hnuah ka va tho chhuak leh chauh. 

"A rang lama kan buaipui a ngai a nih chu..ukil bia ila.."ka nîin a tih mawlh mawlh laiin, ka nuteii'n, "Chutiang a ṭul teh duah lo, Thil tihsual chuan tawrh ngam tur. Zorina te dinhmun a chhiat tehlul nen, a farnu vang maia lo sawisaktir chu..hremna hmu tlak a ni" a lo ti hlaih hlaih a. Au Bawiha insûm zo ta lo chuan, "Nang kha ngawi hmak rawh. He ina i la awm duh chuan ngawi chipchâm rawh. " A lo ti ṭhak. Au Bawiha hi tihthinrim zawh loh khawpa zaidam a ni a, a thinrim ṭawngkam chhuak erawh na thei fak fak tak a ni. Nuteii pawh a ngawi hmak mai. Ka nuin, "Malsawmtluang, i zak na nge? Khatianga i nuteii te i ṭawngkhum a?" Tiin a lo chhan ve a. 

"Thisena inzawmna awm lova ka nuteii hian he in chhungah hian engmah sawi ve tur a nei lo ve. " Au Bawiha'n a lo ti hriam leh hraih. Ka nîin khap a tum naa, Pa Muana'n a dang ve tlat. 

Ka nu chuan, "I nu tak ka nih lohna chu i hre ta hle mai maw? I pa an boral chiah chu kan lo hnawksak ta hle a nih dawn hi.." mei nei fê hian a ti a. 

"In tan kan unau hi kan hnawk zawk alawm..ka pa thihna hi a rûktêin ka chhui ve bêk bek a nia, hre rawh aw..ka nu..i theihtâwpin min dan chu tum ang che. Min su her zo lo vang. Nang leh i nau hi ka target hmasa ber in ni e" Au Bawiha chuan a ti leh ta sak sak mai. 

Ka nîin, "Bawihpui, a tawk..a tawk e..insûm rawh" tiin ka u chu a kuah a. Ka nu leh nuteii te hmel landan chu ka lo en reng thung. Hlauthawng si, palzam tum tak si hian an awm lui ni berin ka hria. "I pa thihnaah te min lo ringhlel elo? Min lo va huphurh tawh awm ngawih ngawih ve aw..i duhtawkin chhui rawh. Min ringhlel tih chu damdawi ina kan awm aṭang khan ka hai tawh lo ve..mahse, tuman i pa kha an that lo, a natna vanga thi a nih kha.." ka nu âw chu a khur deuh..

Pa Muana'n, "Duhtawk teh u. Tunah chuan khalam kha buaina tur a ni lo a nia. Sangbera hi engtin nge kan ngaihtuah dawn tih sawiho a ngai" a lo ti ta a. 

Au Bawiha'n, "Pu Zomuana ka lo bia ang. Ani hi ka pa pawn a rawn ber ṭhin a nia. " A lo dam thlup. A hmaa a thinrimna te kha hmuh tur a awm tawh lo. Thil ka hriatchhuah thar chu ka pa boral hnua ka u leh ka nute inbiak khâtzia hi. 

Ka nî chuan, "Ni e, Zomuana hi a ṭhat bakah kan chhungkaw ṭhian a ni bawk a, tihdan a hria ang. " A lo ti ve a. Kei chuan sawi tur ka hre lo . Thil pakhat erawh ka ti dawn. Zorina ka han hmu dawn a ni. 

Ka nî te hawn hnuah Au Bawiha chu ka zui chho a, "Serchhipah i zin dawn maw ka tia" ka ti a. 

"Nia, nizan mut hma deuh khan chhiat an tawh avangin karlehah kan ti ta a nih kha" a ti a. 

"Zorina ka han hmu dawn asin" ka ti sap a. 

"Awmzia a neih ka ring lo. A tan eng nge thudik hriatthiam a harsa dawn sia" a ti sup. 

"Ka bei ve hrim hrim ang.." ka ti khauh ve fang a. 

Ka dar rawn vuanin, "Tei, U Sangbera hian engmah a ti lo..a tal âwk palh a nih hi. Mahse, lungngai suh, a tawp kan hnaih chho ṭan tawh e. " A ti nghut a. Ka bu nghat. Kei pawn hei hi ka ringin ka beisei tlat a ni. 

Ka insiam vat vat a, chaw kha tihtham ka ei meuh loh avangin ka pum a ri rûk ruk mai. Viteii bulah, "Ka kalna an zawh che chuan, A ṭhiannu te inah ti tawp mai rawh aw..eng emaw thil thleng a awm chuan min lo bia la" tiin ka chah a. Chhungkaw mi ang chiah a nih ve tawh avangin Mama chungchang vel pawh a ngaihven vein awmhmunah a lo ṭang ve êm êm zel. 

Ka tlan chak bawk a, ka thleng hma viau. Gate pawh an lo la hawng lo. Kawtah ka nghak a. Ka nu (Luahpuii) khan min lo call. Ka la vat a. 

"Sangbera an man elo?" A rawn ti a. Thil awmzia chu ka sawi a. 

"A mak hle mai.." a ti ve ringawt. 

Zorina leh a kaihhnawih engmah a la hre lo va, hrilh pawh ka tum rih lo. "Chuti chu i rilru a buai dawn sia..ka lo tibuai rih lo vang che. Chanchin min lo hrilh ve rawh aw" a rawn ti dam diai a. A bula awma kan buaina engkim a bul rât aṭanga sawi ka châk,. Ṭhianthate bula inbunruah chu thuhran nise, ka tan chuan reitak ka hmuh loh ka nu min hringtu hi chu a danglam lo thei lo a ni. 

Gate an hawng a. Ka lut nghal. An ward kawngka atang chuan Johna'n a lo muttir mêk chu ka va hmu a. A inthiar zo vel a ni maithei. An wardah hian damlo panga an awm a. Serous deuh pahnih an awm. A bak chu an harh ṭha tawh viau. Muangchâng lovin ka lut a. 

Johna chuan min lo nuih var var, an va han felin ṭhian nih an va tlin tak êm. 

"I lo kal takah chuan zial zuk pahin ka va inthiar ve ange " tiin a kal zui hmiah bawk. Zorina chuan ngui deuhin min lo en a. 

"Eng nge i an?" Ka ti sap. 

"Ka ṭha..zanin hi final zan kha a nia" a ti a. A rilru luahtu chu aww..a demawm loh. A tir phat aṭangin theihtawp a chhuah a, a bei a, tunah hetiang hi a tawk leh ta si! A na viau ang le..

"A hun kha an sawn ta lo em ni?" Ka ti a. Mama kha zawh hman a ni tlat si lo. Nui lui tih hriat takin, "Sawn e, Mahse, ka bansan tawh dawn. Ka pa thutlukna a ni" a ti a. 

"Aa..hriatthiam tum rawh..Zôr..ih maw..sawi duh ka nei a" ka tih chuan, a puan sin lai hlim pahin, "U Sangbera an man thu kha em ni?" A ti a. Ka melh nghek, "I hria maw?" Ka ti vak a. Ka hmui ka hup leh vat. 

"Hria e. Mipa dik tak emaw ka lo tia..engtin nge khatiang game ṭhing lutuk kha a khelh theih ka ti" thinrim tih hriat takin a ṭawng pawh a sehchilh nak mai. Ka tum loh ang taka thil a kal leh ta chuan min tihnual ngawih ngawih. 

" Zôr..ni lo, Mama tih a ni lo. Engmah a ti lo" ka ti bah nak a. Min rawn melh râw a, a mitmengah huatna niawm tak ka hmu thei nia! 

"Chuti chu khang mi tenawm ho khan dâwt muhlum an sawi i tihna em ni?" A ti hrâwk. 

"Aw..dawt an sawi a ni mai lawm. Mama'n hetiang thil hi a ti thei lo. A ti lul lo vang" ka ti mawlh mawlh. 

A nui hul hak a. "Nia, nang chuan a ti lai pawh hmu la i haider ang chu..tenawm dun lutuk" a ti hluk. Makti zeta melhin, "Eng a?!eng maw i sawi kha..Zorinsang" ka ti tuar. 

"Engmah..haw rawh. Sangbera tana ngaihdam i rawn dil a nih chuan.."Aih..ka ngaidam ngai lo vang" tih hi ka chhanna a ni e.." a ti vawt raih. A aw chu a ring miah lo. Mahse, a hlauhawm. 

"Zorin.." ka ti thâm ṭiak..

"I û leh i bialpa chu jail a luhthlak hmain va fâwp rawh..kal rawh" 

Ka ding hluai a, tumah ka vengthawng tawh lo. "Zorinsang,. Eng thu nge maw i sawi le..i lo va mak ve a.." ka ti tuar.. awm ve dangte chuan min rawn en ṭhap tih pawh ka hai lo. A pawi lo reng reng. 

Ka khurh nasat em avangin khum lû chu ka chelh ngawt ngawt bawk. Zorina chuan zaidam deuh hian, "Dâwt ka sawi em ni? Ani sawn a hmangaih che..a ni lo'm ni? Chuan, a farnu diktak i ni lo bawk a. I nu dik takin rawn hmuh che a tum paw'n a hruai daih che hlauin i nu ngei pawh kut a thlak a..a ni lo'm ni? Malsawmsak.." a tih chat chat lai chuan za zetin ka lo nui! 

Ani pawh a hamhaih ve deuhin ka hria. 

"Chung thil chu tuin nge lo hrilh che a..mawh..ka hriain ka hria.." elsen zet hian ka ti ve a. 

Dam dup hian min rawn melh a. Min thlakhlelhna chambâng pawh ka hmu thei. Aw ki hniam reih rawih hian chung thil hrilhtu chu a sawi sup a. 

"Dâwt a sawi lo tiraw?" Tiin a nui hak bawk. 

Kei erawh ka ral riai riai niin ka hria.