Zor 14

ZÔR..(14)

Ziaktu : Toni Râlte

"Eng a?! Engtin nge a awm?" Ka ti nghek. Midang chuan min lo melh ṭhap mai. 

"A pawi ka ti khawp mai" a ti chuai raih a. A dah nge ,"Hello, Hello, Mam" ka tih pawn min chhang thei lo. Ka khur nasa mai a, ka beisei loh tawp ka thu hriat chuan min ṭhawng takmeuh a ni. 

Ka u te chu ka hrilh ve nghal a. Au Bawiha pawh a phâwklêk khawp mai. Viteii pawh a che buai nghal. Ka nî a rawn lut rawp a, a ṭap nghal hawm hawm, Pa Muana leh a faten an rawn zui bawk. Kei erawh ka hul der. Nuteii pawh a ṭap rawih rawih a. Ṭap ri vang leh ka pa dinhmun hre ve vek an nih avangin ṭhenawm hnai an rawn lut ṭak ṭak. Ka nî chuan min rawn kuahin, "Tei, Tebrer" a ti mawlh mawlh a. Mawlmâng takin ka ding khawng reng. 

"Ti nge in ṭah vak vak a? Apa chu a hniam ringawt alawm" ka ti sap a. Mahse, ka mittui a rawn luang thung. An chet dan rawp rawp chuan min tingaihṭha lo, Mama kha chuan a hniam thu chauh a nih kha a rawn sawi. An enkawl dam leh vat dawn alawm..Au Bawiha ka va en, in chung panna kailawnah ṭhuin a hmai a lo hup tlawk tlawk bawk si. Ka hawihai takzet. Ka phone ka lek kang a, Mama ka call..a la thei lo. Ka ti leh, a rawn la ta. A aw chu ka sawithiam lo, hmanhmawh chiâi, hamhaih zawng zawng inbelhkhawm ang mai a ni. "Mam, hei an lo kal khawm a..ti nge?" Ka ti a. 

A ngawih vang vang hnuah, "Teber, pa kan nei tawh lo" a rawn ti ta. Ka puak dur ni hian ka hria a, mahse, ka la him pial si. Ka din khawng reng vangin tu emaw hian min kuahin ka pindanah min nawr lut a, Viteii'n min rawn umzui bawk. Khumah min ṭhuttir a. 

"Teber, hrethiam rawh aw. Ṭah theih tum rawh..i thawl hawk mai ang" titu chu ka han melh a, U Lawma a lo nia! Kawngka a rawn inhawng a, Desy a rawn ṭap lut..awmngaihna tak pawh ka hre lo e a. Min rawn kuah thlawp a, "Ka ṭhian..a va pawi tak êm" a ti hlawp hlawp. Ka ṭah a chhuak lo va, ka la meng kual ruai ruai ringawt. Ka pa a thi maw? Nizan lawkah Mama khan karleh lama an rawn hawn tur thu a sawi kha mawle! Engtin nge a nih theih? A theih loh tawp..ka pa chu a thih ka ring hlawl lo. Min prank a niang tiin ka ngaihtuah leh a, ṭhalai ho thawm pawh a ring zel. Ṭap thawm lah a nasa tial tial. Au Bawiah a rawn lut ve a. A mit a sen râm mai. Khumah chuan rawn thu vein, "Teber, hriatthiam tum rawh aw. Intipachang rawh. Kei engmah ka ni si lo va, va chhuak phei rawh u. Kei chu ka thei ve lo" tiin a insût hraih a. Au Bawiha lungchhe lutuk insûm si ka hmuh chuan ka puakkeh ta. Ka kuah rawp a, "Au Bawih…" tia rak ṭhawtin chhungrila min rawn nawrna ang ang chuan ka'n ṭap tak tak mai a! Ani pawh mipa e ti lo chuan a khur zawih zawih. Kan unau chuan kan ṭap zo hleithei lo a ni ber e. Ka nî ten min rawn pawh hrana min rawn hnem hma chu..Mama ber a awm bawk si lo va, ka nî te nupa chuan lo kal te pawh an lo dawngsawng lo thei lo. Nuteii pawh a ṭangkai ve phian e. Kan ziaawm tak hnuah ka nî chuan, ka pa chu vawiina an rawn chhuahpui tur thu a sawi a. Zanin kan lumen ang a, naktukah kan vui ang. Ka pa a thi tih hre mah ila, ka thinlungin ka la pawm hleithei chuang lo. A ruang ka hmuh hunah te chuan ka danglam mahna. A mak teh thut em a ni. Desy a bengvar êm a, ka ṭhiante bakah Zorina a lo hrilh vek a. An rawn kal ve nghal. Zorina ka hmuh chuan ka hnuk a ulh zual a, mahse, ṭhalai dang an tam ve si a, han ṭah khum chiam kha ka zak ve bawk si. Ka pa ruang a awm bawk si lo va, ka ni hûih reng mai a. A hrehawm. Desy bawkin min ngaihven bawk a, "In chung zawlah han chho harh ila" a ti a. Ka hnial lo nasa. 

In chungah chuan kan chho ta a, ka patea te pawh an hriat rual rualin , an rawn phei a, an rawn thleng har lo vang. Mi lo lut chhuak chu ka nîte kutah ka dah tawp mai, an ni pawn min phût ka ring lo ve tawp. Zorina chuan ka kut a hum char char, min hnem vak dan a thiam lo tih ka hria, mahse, ka bula a awm hi a tawk viau. A awm hian ka thla a muang. 

Ṭhiante pawh an fel a, Dingi pawh a rilru a hah dawn tehlul nen, min hnem ber bertuah a ṭang thiam a. An va fel tak ê aw. 

Buanga'n, "Teber, pa ten min han thihsan zet hi chu khawvel a tawp emaw tih mai a awl a nia. Kei ka pa kha ka dawm hlum a, ka lawm angreng. Lusûn hi chu a na êm mai a, kan hnem thiam kher lo vang che. Nuam i tih dan, i hlim theih dan tur ang khan awm tawp rawh, i duh leh ṭap la..ṭah hian kan thawl duh ber..insum miah suh" a ti dap dap a. Ni e, Buanga hian nikum kum laihâwlah a pa a lo chân ve tawh a ni. Ani zawng mipa a nih bakah a puitling êm a, ka tluk lo khawp ang. Zorina leh a ṭhiante hi chuan falâk ka nih thu kha an la hre lo va, ka ṭhiante pawn an sawi chhuah ka ring lo. 

Desy chuan, "Hawh u, Zorina nen hian lo awm se, eng emaw buaipui ngaite a awm tâkin, zu chhuksan rih ila" a ti siam siam a. Chance kan mamawh vang ni loin Zorina nen chauha kan awm khan ka ṭhat deuh a beisei vang tih ka hrethiam. Ṭhiante pawh chuan min hrethiam takin min kalsan ta hlawm a. 

"I chau em?" Tiin min rawn kuah a, a kokiah ka lu ka nghat a, râl lehlam ka thlir vawng vawng. 

."Chau lo, ka zawi" ka ti tham chhal a. 

"I tla kuamin ka hria, i ril a ṭam em?" A ti leh. Ka lu ka thing a. Nizana ka pum dik lo ka tlan sekna khan min la nghawng deuh bawk nen, ka zawi ngawih ngawih a ni ber mai. Mahse, muthilh tum dawn ila ka thei leh kher lo vang. 

"A harsa a ni tiraw? Mahse, kei pawh ka nu ka chân ve tawh tho a, Û leh pa ka la nei a, lawm theih ka tum asin. Nang phei chu nangmah ngaihtuaha tihtheih tam zawk nei û leh nu i la nei alawm.." a ti mawlh mawlh a. 

Ka thurûk kha hrilh ka châk thut a. Ka aw ka thian a. "Zôr" ka ti sep a. Min rawn melh vat, ka lo melh ve chiah, min khawngaihna leh min hriatthiamna hmel thûk tak ka hmu a ni. A der a ni hauh lo. 

"Englo.. hrilh duh che ka nei a" ka ti sap a.

" Umm ka ngaithla " a ti sup a. 

"Falâk ka nia. " Ka ti phawt a. A awmdan a danglam leh danglam loh ka ngaichâng ru deuh a, a danglam ka hre lo. Mahse, ngaihbel theih tur chuan a insangmar hlein ka hria. Maktia phâwk vak kha min vengthâwng a nih ka ring. 

"Chuan.." tiin min rawn melh a, thildang a danglam vak loh laiin a mitmeng erawh sawi fiah thiam si loh hian a buai nak ni maiin ka hria. Mahse, ka en rei ngam lo. Ka heh ka liak a, hmalam en chungin, "Ka pa fa ka ni ve lo.." ka ti ringawt. A ṭawng hmain, "Mahse, ka hmangaih lutuk.." ka ti tham ṭiak a, ka hnuk a rawn ulh leh a, ka inhumruh nasa mai. Ṭah tawp hi ka hreh ṭhin êm a ni. A ngawih char char avang chuan ka melh hâw a, hmalam a lo melh daih, "Zorin" ka ti a. A rawn hawi hû,. A mitmeng buai niaih pawh kha a la reh miah lo. 

"Aw.." a ti nghut a. 

"Ti nge i ngawih reng?" Ka ti nghat a. 

"Sawi mai tur ka hre lo va, a lawmawm tih chi a ni si lo va, a pawi tih dawnin i chhungte hian an hmangaih che sia" a ti ta duah a. Tehdaih a! A sawi dik ve tho bawk sia, ka ṭhen sak ringawt. 

"Mak i ti em?" Ka ti a. 

"Umm, mak ka ti. Tin, thildang daih ka ngaihtuah bawk a.." tiin min rawn melh rûn a. A hlauhawm lek lek,. Ka chhungril a dek phak ka ti mai. 

"Eng chu" pangngai tak chuan ka ti a. 

"U Sangbera'n heti taka min dodal chhan tur âwm hi..a nau diktak i ni lo va..chuan.." a tih mêk laiin, "Zorin" ka lo ti nghek. A sawi tum ka hrechiang êm a ni. Hetiang rilru chu pu lul suh se. A nui hawk a, "A dik ka ti hleinem, ka ngaihtuahna ka sawi ringawt" a ti a. Mahse, nui mah se; a thutak ru riau tih ka hai bik tlat lo. 

"I ti ang lo êm mai. Chutiang rilru Mama'n a pu lo a, a pu ngai hek lo vang. " Ka ti chat chat a. 

"Mipa ka ni a, mipa rilru chu ka hre zawk dawn lo em ni?" A ti leh khauh. Thinrim lek lekin, "I mak êm mai a, chutiang rilru tenawmte han put reng reng. Mama hian a nau tak tak angin min en, kei pawn ka û tak tak angin..au Bawiha nen ka endan a danglam lo ang bawkin, ani pawhin Au Bawiha nen min endan a danglam bik lo" ka ti bawrh bawrh. 

"A nih engvangin nge heti taka min duh loh?" A ti chang fak a. A thinrim hmel êma ka hriat avangin mak ti zetin ka thlek hâw, a ngeng ngulh mai a. Sut tlang huphurhawm deuh hmel a pu. 

"Ka hre lo. Ka bulah chuan ka nu ngen vang niin a sawi a..â…ih maw..ka hrethiam lo. Mahse, i rindan leh ngaihdan ang kha chu a ni lo tih ka chiang" ka ti bah nawk nawk a.

"I nu chuan engvangin nge min huat ve thung?" A ti leh hmuk a. 

Mangang zetin, "Ka hre lo..ih, insual mi i nia, englo..in chhungkua te..i pa te.." ka ti leh nuaih a. Ka ṭawngkam thiamnain a daih tawh thlawt lo a ni ber. 

Khawng zeta min rawn melhin, "Ka chhungkua a?! Eng nge ka chhungkua chu? Ka pa pawh chu.." a ti hriam hraih a. 

Bengdaih tum takin, "Ti nge i thinrim ngawt a?! Kei pawn a chhan ka hre lo ka tih chu. Ka nu chu nangman la zawt mai rawh. " Ka ti hlak hlak a. A bânah ka va chelh bawk. Mahse, ka kut chu a lasawn vut a. Inla hrangin a inkuangkuah thân mai. Hrilhhai taka ka en reng laiin, "Umm,. Ni e, ka chhungkua leh ka seilenna hi a chhuanawm loh bawk a ni. I nu leh i û te tan chuan ka ṭha tawk ngai dawn lo" a ti chuai raih a. Va hnaih nghalin, "Tiang hian awm suh. Khalam kha sawi tawh lo vang. " Ka ti ta tawp a. A rilrua thil chhiar niawm tak hian hmalam a melh a, mahse, min rawn en lehin, "Ka tihpalh..ka ngaihtuahna ka lo kalpui vak a" tiin min rawn kuah thawk. Ka la hrilhhai tho. A awmdan thut thut hi ka pawh thiam lo. Mahse, inhauha inhnial buai ai chuan a zia tho tho e. 

Chutiang chuan ka pa ruang awm lo mah se, min hnem tura rawn leng veng chhung mi te avang chuan kan khawharna pawh a ziaawm ve viau, . Tlai lam dar 4 velah, ka pa ruang chu a rawn thleng ta a. 

 Zorina'n, "Thil ei rawh, Tlem tal i ei a ṭha" a ti a. In chung aṭang khan chhukin kan ṭhian hoin kan ṭhu khawm dal a. 

"Ka ril a ṭam thlawt lo" ka ti sep a. 

Min nawr lui bîk lo. Khatia ka thurûk ka hrilh avang khan inchhirna ka nei hran lo va, ka thawl hawk zawk. Ka nihna dik tak hre ve vek se, ka laka a rilru diktak pawh a lang mai ang ka ti a ni. Mama vanga kan han inhnial ve deuh bak kha buaina leh inbahfuh loh kan nei zui tawh lo. Ani hi awm lo se nî a rei dawn mang e aw. 

Ka patea te pawh an lo thleng tawh a. Haulawng leh Lunglei aṭangin an rawn kal tam khawp mai. Thihna meuh hi chu a tawp chiang bawk a. Kan inngaipawimawh ṭhin hi mizo nih nawmna ber pakhat a ni âwm e. Zorina leh a ṭhiante bakah ka ṭhian ten chhin khat mah chhing lovin min menpui ve ṭhak a. Ka taksa a chauh luatah ka muhil zeuh zeuh zawk. Zorina nen a fâlin kan awmdun tawh lo naa, ka bula a ṭhut ve khiau reng avangin ka thla a muang thung. 

A tawi zawngin aw.. Ka pa hmel ka han hmu chu ka puakkeh râwih râwih mai. Ka nî aṭangin min hmangaihzia leh ka hmalam hun thlenga a lo ngaihtuah kimzia ka lo hre tawh bawk nen..Ka pa chu ka ngai dawn lutuk. Tin, hei aia puitlina min hmangaihna te rulhlet ve theih ka duh asin le aw. Ṭahtu pawh a ngahin puan leh pangpar chu dawng hnem tak a ni. Dik tak chuan a na thut a, phaiah an zu kal a. Tihian a rawn haw ta bawk si a, veng chhung mite pawh a ṭhawng lo thei lo a ni. Ka nu pawh a ṭap zawih zawih reng a. A pawr chhep mai. Mama erawh chhungkaw aiawhtu a nih avangin a buai a, a chauh ve dawn tehlul nen a phe buai si. Ruang pawh a rawn kil hman meuh lo. Mahse, kuang chhin dawnah a rawn phei a, ka pa biang leh chalte chu a chûl a. A mit khap fak fakin, "Pa, a nih leh aw.. he lam chu rawn ngaihtuah miah suh. Thlamuang takin chawl ang che aw" tiin a phun sûp sup. Chu chuan min chhun na zual. Mipa ṭap insûm hmel leh hnukulh vanga tawng ṭha hleithei lo te hian lungchhiat an tizual fô. Au Bawiha pawh rawn kal hnaiin, "Pa,..ka ngai dawn hle mai che. A nih leh aw.." a rawn ti ve a. Ka lo ṭap khur ngawt ngawt thung. Mite angin ka chham kur ve duah thiam lo, mahse, ka thinlung hi a rûm a, ka pa chu ka ko mawlh mawlh a ni. A awm ta lo ringawt tur hi pawm theih a harsa êm a ni. 

Ka pa Lalsawithanga chu ropui taka vuiliam a ni ta e. Pa ber tel loin khawvel kan hmachhawn dawn ta chu a nia. Kei chu ka û te pahnihah ka innghat pumhlum ta. 

Ka pa thih sarhû lai chuan Zorina leh ka ṭhiante an ṭangkaiin ka tan an hlu khawp mai. Desy ngat phei chu a rawn riak ngat a, heti taka ṭhian nih tling ka lo nei hi ka lawm ngawih ngawih. Zorina erawh rawn lang ve tho mah se, a rawn lang tam thei lo. Practice a ngai ve bawk si. Thawhleh zanah chuan an insual leh a, mahse, kan en lo. Phone aṭang pawn ka en lo. Mahse, an khelh zawh rual deuhthawin, "Sawmsak, final ka lut e" a rawn ti zangkhai vah a. Ka pa thih hnua hlim taka ka nuih hmasak ber ṭum a ni awm e. 

."Ka lawmpui lutuk che, ka chhuang che" ka ti chûl a. 

"Min hmangaih em?" A rawn ti hniam raih chu ka nui tawp hmak. 

"Maw.." ka ti nghek. 

"Min hmangaih em?" A ti nawn leh sak. 

Ka bialpa te tumah 'Ka hmangaih che" ka la ti lo! Lâna takngial pawh. Ka induh leh inlak vang pawh a ni lo. Ka sawi zak thin. Tin, ka hmangaih che ka tih chuan a tawp thlenga hmangaih turah ka ngai a, hmalam hun ka hriat lohna khan min titîm a ni bawk ang chu..Zorina hi ka hmangaih em? Chhiartu, ka hmangaih niin i hria em? Hmalam hun ka hre lo, tuna ka hriat chhun erawh Zorina hian a chhe ber pawh tawk se, ka phatsan theih ka ring lo. Chuvang chuan, "Aw , ka hmangaih che" zawi lutuk hian ka ti sap a. 

"Takzet! Tak tak tiraw?" Hlim zeta a rawn tih chuan ka huaisen sawt. 

"Aw ..a nih nangin?" Ka ti ve zat. 

"Ka hmangaih che. " A ti nghet charh. Nuam hi a nuam famkim hle mai. Ka hlim vanga ka nui ri te chu kei pawn mawi ka ti! Dodalna kan tawk leh ang em ka hre lo, tawk dawn pawh ni ila, engpawh thleng se kei chuan ka vawnna ka thlah lo vang. Amahah hian mipa ka duhthusam hi a awm kim vek ka tih chuan dâwt ka sawi hlek maithei. Mahse, ka ngaihtuah thui deuh chang chuan ka nuten min dodal reng ta se, inrûk te hial ngai ta pawh nise, ka zui duh mai ka rin danah Zorina hi ka tana mipa famkim chu a ni mai lo em ni? Hunin hril rawh se aw. 

Lusûn buai nen, ka nu nen pawh kan la inbe mumal lutuk lo. Mama pawh a ṭawngmawh zual si, sumdawnna a ngaihthah ngawt thei bawk si lo. A chang chuan library-a lehkhabu chhiar chuang si lo va, a melh ngai melh ngawt ngawta a ṭhu ngat ngat hi ka hmu fô! Ka be châk a, ka tibuai duh si lo. Ka pa thihna hi a tuar hle a nih dawn hi ka ti. Tuar lo chi a ni lo bawk a, fapa û zawk, ka pa thachhang dâwltu a ni miau a. Kei leh Au Bawiha bakah ka nu chenin a kutah kan innghat miau si a, a mawhphurhna san êm avang pawh hian lungngaia inngaihtuah ngut ngut chu a mamawh niin ka hria. Mahse, mi inthunun thei tak a nih avangin mi hrang bulah erawh pangngai takin a lang thung. 

Au Bawiha erawh ka beisei ai daihin a tuar thiam a, a mizia avangin buaipui a ngai chho ang tih ka hlauh viau laiin a nunphung a danglam lutuk hran lo. Mahse, sawi leh sawi hnu ṭawng tlem tak a nihna erawh Mama ang thoin a zual lo thei lo. Mama ai mahin min ngaihtuahin ka ṭhat leh ṭhat loh a chîk reng niin ka hre ṭhin. 

Ka pa thihcham kan hman zawhah Patea te pawh an haw ve ta a. Patea te leh Mama te ṭhukhawma mûk taka an inkawm kha vawi thum emaw lai a niâwm e. Eng chungchang nge an sawi ka hre lo va, ka hriat ve ṭul a nih chuan min hrilh mai turah ka ngai. Chhungkaw bilin kan han khawsa leh ṭan ta a. Nuteii pawh a la awm ve zel a. Viteii phei chu a la ṭangkai tluang zel e. 

Vawiin hi sunday a ni a. Zorina te pawh zirtawpni zan dar 8-a insual tur an ni. Chuvang chuan kan inhmu khât viau. Final a nih avangin theihtawp a chhuah a ngai miau a. A beih tur hi Serchhip khua Rinawma, Zorina aia palian leh sa ṭha zawk a ni. A tumpuitu apiang a hneh theih êm avangin ka lo huphurhpui ve ngawih ngawih. Zoram titi a tling hial reng a, Zorina ṭantu pawh an ṭhahnem ve khawp mai. A district ang zawnga inepna te pawh a awm dawn dawn mai. Kei pawh ka pa boralna avanga ka rilru kal khat kha a rawn lakiang ka ti mai. Awmhmunah hian ka lo ṭang ve ngawih ngawih zel. Zorina chu a hnathawhnaah pawh chawhma chiah a kal ṭhin. An hrethiam êm êm a, an supportin a mamawh te an lam khawmsak zung zung zel. Hetiang taka duhsaktu a lo nei hi ka lo lawm ve vawng vawng zel. Kan inbe reng a,hmeichhe lamah ngaihṭhat lohna ka nei ngai lo. Keima lamah ani pawn a nei hek lo. Lâna leh Bena an reh a, mi thar an awm bawk si lo. Class pawh ka kal ve tawh a. Lehkha zir erawh a la harsa angreng. Kan class te pawn min râl ve a, an fel tak tak a ni. 

Nilai zanah kan zanriah eikham ka tihfel zawhah ka note ka chingfel a, Ka dah ṭhat mawlh mawlh laiin Zorina'n min lo call a, "Zanin chu ka lo leng dawn " a rawn ti a. 

"I hman ami?" Ka ti hû. 

"Zanin chu chawlh ka dil a. I bula awm ka duh" a rawn tih chuan ka khi sak. "Umm, lo kal la" ka ti a. Kan dah zawhah ka che hmanhmawh ta deuh. Ka va chhuah chuan ka nu leh nuteii te chu chhuah tum niawm tak hian an lo insiam a, "Khaw nge in kal dawn?" Ka ti thuphung a. 

"Maziri te inah kan va leng lawk" ka nu chuan a ti ringawt. Ka ngaihven zui hran lo. Nu Maziri chu kan venga a kawm ve deuh ber a ni. Zorina a lo kal dawn bawk sia, leng bo daih mah se pawi ka ti lo. Mama erawh a pindanah a awmin ka hria. Min hau tawh ngai lo bawk a, ka vengthawng lutuk tawh lo. Zorina pawh a rawn thleng a, bathlarah kan ṭhu chhuak leh daih. Thu ril tak tak sawiin intiam ve dûm lo mah ila, kan hlim tawk. 

"Kei chu i beih turpa hi a lian sia, ka huphurh ê" ka ti a. 

"Nia, a huphurhawm.." a ti ringawt. 

"A khawih nat vak che ai chuan tlawm daih ang che" ka tih chuan a nui hawk hawk a, "Mipa nih te chuan a tawp thleng law lawin le" a ti thum chhak. 

Mama rawn dâk chu kan lo hre lâwk lo va, Zorina va hawi zauh chuan a va hmu a niang. "U Sangbera chu..min tiphu alawm" a ti a. Ka hawi let ve vat. Mama chu ka sawi thiam dan berin a chauh hmel takzet. Mut a hmu ṭha vak lo tih hi chu ka hre tawh a. Thil a ei tlem bawk si, a cher pawh a cher kuam tawh. A rawn pen phei chhat chhat a. 

"Zorin, i pa a ṭha em?" A ti daih. 

"Aw a ngai reng, a ṭha a ni mai" ṭha deuhin a ti a. 

"I û chu a kea a kal leh i beisei em?" A ti lehzel..a thil zawh dan chu mak ka lo ti deuh. 

"Beiseina chu ka la nei alawm" Zorina chuan a ti sup a. 

"Beiseina hi chu a hlu ngawt mai. In insual pawh rawn en ve ka tum ang, chak ngei ang che" a ti a. Ka awm a nuam deuh, "Nia, theihtawp ka chhuah ang.." Zorina'n a lo ti nghut. Mama chuan ṭawng leh a tum laiin call a dawng a, a ner sawk chu ka han hmu reng. A phone chu a hmet thim a, "Teber, ka chhuak lawk dawn nia" tih leh chhuah a rual nghal. A chetdan hi ngaiah neih harsa ka ti ṭhin. A ni thut thut zel sia. 

Zorina paw'n, "A ṭha vak loin ka hria..i u kha" a ti chiah a. 

"Ka pa thihna hi a tuar lutuk a.. a buaithlak khawp mai" ka ti ve ringawt. 

"A chhel alawm, a tha vat mai ang" tiin min hnem a. Thingpui a in châk thu a sawi ve mial, phur takin ka va lumsak a. Viteii pawh tunhnai chu phone a khawih ngun riau mai a, a khi leh vur vur ṭhin bawk. Kei ang bawkin hmuh ṭha a hmu a ni ve maithei a ni. Thingpui no 2 keng chungin bathlar lam ka pan a, Zorina chuan phone-ah tu emaw a be mêk. 

"I duh duh rawn sawi suh. Ka pa hi tibuai tawh lo a a ṭha a ni mai" a ti hmuk hmuk a. Ka va pawh hreh ta tlat. Ka ding ta reng a. "Mi zaktheilo tak chu i ni. Engkim ka sawi ang" a ti leh nghut. A hnungah ka awm tih a hria nge a rawn hawi zawk a, "Ka dah a nia. " Tih leh dah a rual nghal. 

Thingpui chu ka pe a. Ka buaina tur ni lo mah se; ka zawt duh tlat. Inthlahrung ru tak si hian, "Tu nge i biak bawrh bawrh kha" ka tih chuan..

"I nu" a ti ringawt. Makti zetin ka melh hû a, rum nghutin, "Aw.. i nuin ka pa a lo be ṭhin a. Kei hi nangmah bansan tur chea hrilh turin..i hrethiam em?" A ti ta a. Hrethiam tak ka ni. Ka nu tehchai chu aw! A va huangtau sâwt ve le. 

"I pa a hria em ni." Ka ti vat a. 

"Hria.." a ti tawi tak. A mitmeng lah chu a rum angreng si. Ka awm thiam lo. 

"Ka nu chu ka lo hrilhfiah ang. A inrawlh thûk mah mah..i pa chuan engtin nge a tih?" Hre châk ru zetin ka ti a. 

Reifê a ngawih hnuah, thawk la hawkin, "Ka duhthlanna a nih thu a sawi." A ti nghet charh. 

"Ka nu hian engvangin nge a duh loh che?" Ka ti zawk mah a. 

Nui hul hakin, "Hria ila ka ti ngawt mai" a ti zawi raih. Kan boruak a danglam ta dâwrh a, ka nu chu ka ngei satliah lo. Ka hua a ni tawp mai. Hetiang êm êma ka ngaihzawng chungchanga a inrawlh hi ka ngaithei tawh lo. A nasa mah mah tawh. A tum aia hmaah Zorina pawh a haw ta a. Kei pawh mood chhe zetin ka mu kawm ngal mai. 

Zorina nena kan inlaichinna kalkawng hi a chhuk chho ṭan ta hlein ka hria. Kan inngaihzawn tirha ka suangtuah ang ngawt kha chu a lo ni ta lo. Ka nu hi ka tan a hnawksak ta miau si a. Zorina pa pawh chuan engtin tak ngai ang maw..keimah thlengin min hmuhdan a dik loh phah ang em tihte ka ngaihtuah. Ka rilru a hah , khua lo var se, ka nu bakah Mama pawh hrilh vek ka duh. Amah Mama hian ka nu chu khak ve se ka duh a ni ber. 

Ka hriat loh karin ka lo chhing ve hlek a niang. Ka phone nghawr dat dat chuan min tiharh hlawl. Buanga a lo ni tehdaih..A tlai tawh viau tura ka ngaih laiin dar 11 a pel fel awrh chauh. Mutchhuak aw zetin hello ka ti a. 

Buanga chuan thaw hlawp hlawp hian, "Teber, Zorina tawhsual tawh kha i hre tawh em?" A rawn ti ta mai! Ka va tho rang tak. 

"Maw?! Eng maw?" Ka ti nghek. 

"Aw..hei damdawi in kan pan mek, keini pawh Johna û-in min rawn hrilh a. I peih chuan Civil Hospitalah lo kal la" a rawn ti. Ka bangbo lutuk, eng nge thleng ta hi le..! 

Ka che chu ka che sawk sawk mai. Desy ka call pah bawk, khur dar dar hian Zorina chungchang chu ka hrilh. Buanga'n a lo la hrilh bîk lo a niang. A mu tawh a, mahse, a rawn phei tur thu a sawi nghal. Ka va chhuah chuan ka nute an la haw lo! In chungah ka pen chho pâwk pâwk a. Mama a la haw lo, Au Bawiha ka kai tho a, ani pawh a phawk ve ngang mai. Ka bialpa a ni tih an hre vek tawh bawk a, "Ka va hruai ang che u" a lo ti thliam a. Ka thla a muang nghal. Mama ka call leh a, a la thei si lo. Hre ve hrim hrim se ka duh a ni tawp. Ka nu erawh ka call hauh lo vang. 

Desy te nen kan pathum chuan damdawi in chu kan pan ta vang vang a. Ka ngaihtuahna chu a mumal lo, ka rilru a hah pawh a ni lo. Ka bo hû a ni ber. Ka pa thih hlima ka awmdan ang kha a ni mai. Kan thleng a, Desyin Buanga a call, an awmna an sawiah kan inzui lut ve nghal a. Zorina chu a kawchhung thi pût nasat vangin emergency-in an lo zai nghal a lo nia. Kan thlen hma deuh khan OT-ah an nawr lut chiah a niawm e. Tihtur pawh ka hre lo, min ngaihtuah tih hriat takin a ṭhiante chuan min lo dawngsawng a. Pu Sawma pawh a rawn lang ve, rui hmel a pu miah lo bawk. Buanga chuan Zorina chanchin an hriat dan a sawi mawlh mawlh a.

"Heta thawk nurse ah hian ka cousin a awm a. Dar 10:45 bawr velah khan taxi driver leh a ṭhianpa niawm tak te hian Zorina chu casualty-ah an va zawn lut tawp a niawm e. A thi nasat bakah nikhua engmah a hre lo bawk. An buaipui nghal zung zung a, ka cousin chuan Zorina a ni tih a hriat veleh min lo call nghal a ni" tiin. Ka hmai ka lo hup tawp. Zorina chuan nghaisakna a tawk ta nge nge maw? Hei hi a la thleng dawn khan ka hre rêng a ni. A eizawnna hi kan ram angah chuan a la him ve hlawl lo alawm..ka rilru ipik lutuk chu bathroomah tlan lutin bang nghengin ka va ṭap khur ngat ngat. Ka ṭawngṭaina lah a chhumbung nuaih bawk. "Lalpa, thihtir miah suh, a thi thei lo" ka ti mawlh mawlh a. Tu phiangsenin nge Zorina chu lo khawih ta ang? Ka inhrufai a, ṭhianten min ngaihtuah lutuk ka hlau bawk si. 

Ka phone a rik chuan ka phu zawk..Mama a lo nia! Miscall kha a hmu a ni ngei ang. 

"Mam" tiin ka ṭap leh par a. 

"Eng nge thleng?" A rawn ti nghal vut. 

"Zorina..zorina an sawisa" ka ti khur dat a. A rum nghut chu ka hre zui, kan awmna min zawt a, ka sawi chuan, "Ka lo kal e" tih leh dah a rual. Ka va chhuah phei chuan an lo ṭhu ngui nghiai mai. Au Bawiha pawh a la ṭhu ve. 

Rpa'n, "Teber, chutin i rilru tihah lutuk suh. An zai ang a, a ṭha vat mai ang" tiin min lo hnem a. 

Ka chhang thei lo. Chhan dan tur ka hre lo. Intihsiakna a tawpna a hmachhawn mêk laia hetiang a tawk hi ngaihtuahna a kal thui viau mai. Johna paw'n, "Tu dang an ni lo vang, Rinawma te thiltih a ni ngei ang. " A ti hmiah. Zorina an huphurh luatah tiang hian an che ta mai em ni ang? 

Police hmel pawh kan hmu ta. Taxi driver te kha biak an rawn tum a, mahse, an ni kha a hnua ka hriat leh danin thingtlanga an chhungte boralin an lo hmang a lo nia! Taxi hmaa ṭhu kha a hmangtu a lo nghe nghe a niawm e . An kal hmaa mamawh an lamnaah Zorina kha an va hmu niawm tak a ni. An hming leh phone number Doctor bulah dahin hmanhmawh takin an lo kal tawh a lo ni. Hmuha lawmthu hrilh te pawh an chakawm mang e. Va hmuin damdawi in panpui nghal ta lo se; Zorina hi zai tur pawh a lo awm tawh lo maithei a ni. A pa chu Police te chuan an kawm a, pu Sawma tan pawh sawi tur a vâng viau ang. Kei pawh Pu Sawma'n Zorina bialnu ka ni tih a lo hrilh nge, Police te chuan min rawn be ve a. 

Kan inkawm dan tlangpui, a haw hun te min zawt a. Ṭha takin ka chhang ve. Thil danglam a thlen leh thlen loh min zawh lai chuan Mama a rawn thleng a. Ka nu leh Zorina te inbiakna kha ka sawi ang nge sawi lo vang tih ka ngaihtuah rauh rauh..Sawi ta ila, Ka nu an ringhlel ngei ang,. Hmanni lawkah ka pa a boral a, chhungkaw mualphona a thleng mai ang em tihte thlengin ka ngaihtuah a..mahse, tuna hetia Zorina nghaisakna hi ka nu te thiltih ni ta se;..

"Sir, ih, thil pakhat chu a awm" ka ti ban chhalh a. Ka nu ngei ka chhuitir dawn chu a ni a, ka nu tak ni lo mah se; thil nuam a ni lo. Mahse, thudik lal se ka duh ber. Ka nu thurûk zawng zawng pawh kan hriat phah maithei asin. 

Police te bulah chuan Zorina call dawn chungchâng te, ka nu a nih thu leh ka nuin Zorina a duh loh thu te chu ka hrilh ta vek a. Mahni nute hêk chan ka chang dawn ta chu a nia! Ka dinhmun hi a awlsam miah lo. Police te nen kan inbiak zawhah Mama chuan thil thlen dan min zawt a. Ka hriat chin chu ka hrilh ve mawlh mawlh.

"Ka tlai hlek a ni maw!" A tih sup chu hriain, "Maw? Eng maw i sawi?" Ka ti vat. 

Bah deuh hian, "E..engmah..thil dang alawm ka sawi" a ti a. Mak ka ti deuh. Mahse, Zorina an rawn nawr chhuah tak avangin Mama nen chuan hmanhmawh takin kan va pan ve a. Doctorin, "Kan zai hlawhtling chuan ka hria a. A ṭha vat turah ngai ang aw. " Tia Zorina pa a biakna chu ka bengah ring tak a ni. Thawk khat chu a veng huai e. Zorina chu surgical ward -ah an nawr lut a. An lo tam vak lo. Luh huk an phal si lo va, Rpa'n, "Teber, Desy nen Pa sawma te nen khan va kal r'u.." a lo ti var a. 

Kan va luh chuan, an lo mut fel diam tawh. A la harh lo. A hmai dang bai chu ka melh ngawih ngawih a, thisen a hloh hnem a ni ngei ang. Heti taka a lo dân hman danah. A pa chuan a fapa chu a hmai, a bân a kawr chhanah a âwm te chu a chul dan dan a, zu a in nasat avang nge a kut pawh a khur dar dar mai. 

"Bawiha,.mipa i nih kha, pachang takin aw, kei leh i û te innghahna i nih kha" a tih chuan ka thinlung a dek ngawih ngawih. Desy pawn a mittui a hru zauh. Kei chuan sawi tur ka hre lo. Chutia kan ṭhut chawrh chawrh lai chuan nurse senior tawh lam hi a rawn kal a. 

"Tuin nge riahpui dawn le..? Gate khar a ni tawh dawn a" a lo ti a. Pu Sawma meng buai nak chu ka hmuhin, "Keiman" ka lo ti vat. Pu Sawma chu riak thei a ni tlat lo, In lamah U Zonuni tuin nge awmpui ta ang? An dinhmun hi a va khirh tak êm aw..

Desy chuan, "Nurse, a serious tho sia, pahnihin a riahpui theih mai lo'm ni?" A lo ti a. 

"Pakhat kha a tawk aw. Ngaihtuahawm a ni tawh hleinem" nurse chuan a ti a. Buanga a rawn lut ve, "Teber, riahpui kha chu keimahni'n kan lo riahpui ang. Nangni chu va haw phawt rawh u. A ṭhiante kan awm alawm, bakah eng emaw velah hmeichhia chu a buaithlak" a lo ti zung zung a. 

Desy pawh chuan, "Nia, Te, amah a la harh chuang lo va, duh leh naktukah i awmpui mai ang a. I nute lah an den bawk si" a ti zawi sap. Pawi ka ti vak lo. Lehlamah nupa êm pawh kan la ni lo va, chutia han inriahpui chu thil mawi pawh a ni bîk lo bawk nen..an tih ang chuan awm mai ka tum ta a. A lo tlai ve tawh bawk nen, haw tur chuan kan inpuahchah a. 

Kan hawn kawngah Au Bawiha chuan, "An man vat turah ka ngai, pawikhawihtu te chu.." a ti bung nghut a. Desy chuan,"Nia, man vat se ka ti. Îtsikna vang bak a ni lo ang" a ti hmarh hmarh a. Kei erawh ka ngawi reng. In kan thlen chuan ka nu te pawh an lo haw tawh a. Kan thawmah a rawn tho leh. Au Bawiha chuan thil awmzia a sawi zung zung a, kei chuan ka nu mitmeng leh chezia ka lo chîk hle thung. Mama erawh in chungah a chho nghal daih. Ka nu chuan, phâwk zetin, "Awii, chu! Tlema tlemah a thi lo chauh a nih chu! A va khawngaihthlak ve" a ti hluai a. A lem riauin ka hria. Mahse, ka rilru kil khatah ka nu ka ringhlel chu nuam lo tihna ka nei tho. Khatiang thil êm êm kha chu a tihtir ngam ka ring lo deuh. Mahse, ka nu hi ka hrechiang tawk lo êm mai a, ka rin loh deuh pawn a khawsa thei tlat. 

Ka tal ka tal a. Ka zung zing hle bawk. Ka muhil mang lo a ni e. A tukah pawh class kal ka tum loh avangin ka tho duh lawk lo. Ka thawh rualin Buanga ka call nghal a. 

"A harh tawh e. Hei, ṭawngte pawh a ṭawng ve peih e " a rawn tih chuan ka thaw huai mai. Ka va tho chhuak a, ka nuin, "Class kal i tum lo mi?" A lo ti vat. 

"Umm" ka ti mai a. 

"I dam ṭha lo em ni?" A ti leh. 

"Dam ṭha e. Zorina ka han awmpui ve ang e" ka ti fiah kâk. Min hauh hrep kha ka ring khan a nia, engmah a sawi bîk lo. Chaw ei laiin , " Intihsiaknaah pawh a tel thei dawn lo ni maw!" A ti a. 

"Aw" ka ti leh tawp. Tumah ka be châk hlawl lo a ni e. Mama'n thawh pahin, "Hetia finalist a awm si chuan kan ngaihtuah ṭha ang, a hunte pawh kan sawn maithei" a ti a. Nia, a fair dawn lo tlat! Zorina khawih tute hi chhui chhuak ve phawt rawh se. Social media lamah engtin chiah nge an sawi leh ka hre lo, ka en peih lo. Natna tizualtu mai mai a ni e. 

Viteii nen thleng kan seng buai lai takin, "In awm maw" tih leh Police hmel hmuh kan rual a..kan lo en ṭhap. Pathum an ni a, an zinga thuneih hmel ber mai chuan,.."In tlangval Malsawmdawnga thu zawh fiah tura rawn lak kan tum a" a ti ta a. 

Ka nuin, "Eng thilah maw!" A lo ti var. 

Mama chu in chung aṭangin a rawn chhuk mêk, tawnzau a la hak danah chhuah a la tum hnai lo deuh tihna. Police a hmuh chuan ani pawh a phâwk deuh a, "Eng nge ni ta?" A ti nghut. 

"Malsawmdawnga i ni tiraw? Hei Zorinsanga kutthlak chungchângah zawhna zawh che kan duh a, kan rawn hruai dawn che a ni" a hma ami bawk khan a ti a. Ka ding khawng reng ringawt. Tupawh mai chuan mak kan ti! Mama meuh pawh a hamhaih ka ti ngam sak,. Bangbo deuha nui chungin, "A va mak tehdaih ve..aw le, ka han inthlak lawk ang e" tiin a lêt leh a. 

Ka insûm zo lo, "Sir, ka û khan inrawlhna a nei ve nge? Eng chungchangah nge thu zawh a ngaih le?" Ka ti ta tawp a. 

"A inrawlh ngei em tih kan sawi lâwk thei bîk lo. Mahse, tuna kan chhui chinah chuan i û-ah hian a tawp tlat a ni" a tih chuan, au vak ka châk. Ka hmui pawh ka hup hial nghe nghe. 

Au Bawiha'n, "Engtin nge a nih theih a? Thil awihawm loh lutuk, ani ber kher chuan engmah a ti lo vang" a lo ti ve nghek. 

Nelawm tak hian, "Ni e, kan han inzawt ve phawt ang a, chutin a ni ngei e kan ti bik lo a nia. Kan dan leh kalphung chu in hriat kha" a lo ti ṭha ve mai. 

Mama pawh a rei lo, a rawn pen thla thoh thoh a, a hamhaihna leh hrilhhaina te kha hmuh tur a awm leh tawh lo. "Kal ila" a ti zangkhaih vah. 

Min rawn en kualin, "In ngaih lo tiṭha lo suh u. Thildang vak a ni lo ang" a ti dam thlup. Kan enliam ta ringawt a. 

Ka nu chuan, "Tunlai kan chhungkaw chunga thil thleng chu a rapthlak ṭhin hle mai. Zorina nen lo inngaizawng lo ula chuan i U Mama pawn hetiang buaina hi a tawk lo mai tur" a ti lang lâng a. Thawh lawka va keh hrep ka châk kher mai. 

"Mama'n eng pawi mah a khawih lo vang. Zorina nen kan inzawmnaah kaih luh tum suh" ka ti hmak. 

Kan boruak khatiang teh hrep kha ni mah se; Desy nen Zorina tlawh turin kan chhuak ta tho a. A ṭhiante hi âww..Zorina vanneihna hlawm an va ni chiang tak. An dinhmun khirhzia hrerengin Pu Sawma chet ve ngai miah loin an lo chetsak zung zung a. Vawiin pawh chaw la ei thei lo mah se; thil tuiril lam tal ei tam se tiin taksa chakna lam an rawn lam khawmsak leh a. Buanga a haw a, Johna'n a rawn thlak ve leh a ni. 

Zorina chu a lo harh a, a khum bula ka ṭhu chu min lo melh vawng vawng. Nui chungin ,"Na i nei em?" Ka ti a. Hlim hmel put hram hram hi ka duh ve a ni. 

"Nei lo ve" a ti a. A aw pawh a zawi hle. A la chau viauin ka ring a ni. Nizana thil thlen dan ka hre châk viau nain a la chau sia, ṭawngtir vak ka hreh si. Mama chungchang erawh sawi lo thei lo nia ka inhriat avangin, "Police an lo kal a. Mama an hruai asin" ka ti a. 

Hah hmel deuha thaw halhin, "Tukin zingah an rawn kal alawm..thil thlen dan min rawn zawt a" a ti tham ṭuak a. 

"Chuan, Mama chu a lo inrawlh tihna em ni?" Ka ti hluai. Ka lung lah chu a phu dawt dawt bawk. 

"Ka hre lo..ka hre lo a ni, Teber..nizan thil thleng kha chiangkuangin engmah ka hre tlat lo va" beidawn hmel zet hian a ti a. 

"Min han hrilh teh..khawngaihin." ka ti ta thlawt a. 

A ṭawng hmain nurse-in a rawn jection lawk a, min rawn melh zauhin, "Damdawi mum lian bulah chuan a meng fîm hle mai a" a ti a, a nui har har mai. Nizana nurse senior ai ngawt kha chuan a nelawm deuh. Nurse kal hnuah ka melh vat a. Desy leh Johna te an rawn inzui lut ta si, a ngawi leh ta daih a. 

"Te, tihian lo awmpui la, hawn i tum rih chuang lo,. Makimi naute ka zu en ve lawk ang e" Desy chuan a ti a. Ka bu nghat. Johna pawh chuan, "Teberi awm chhung kei pawh û te ka zu pui ve lawk, khu lai lawkah khuan an awm a. Ka rei lo vang, Teber, i hawn dawnah min lo be mai la aw" a ti zung zung. Hun thawl kan mamawh tho a, pawi ka ti lo. 

An kal ve ve hnuah Zorina chu ka melh leh ta ran a. Tui ka inti leh tê tê hnuah nizana thil thlen dan chu a sawi ta a..

"Khatia ka haw kha, bike-ka khalh laiin call ka dawng a, nangmah i nih ringin ka ding a, i û a lo nia. "Hmuha biak lawk che ka duh a, Vanapa hall hnuaiah khan lo ding la, ka rawn kal nghal ang , i remchâng em?" A rawn ti a. A pawimawh hmel bawk nen, hmu tur chuan ka tlan leh ta nghal a. Vanapa Hall hnuai ka thlen chuan a lo la awm lo. I msg tur type-a bike-a ka ṭhut lai chuan ka hnungah car a rawn ding a, i û a nih ringin ka va melh zawk ringawt. I msg ka type leh nghal a. Ka kun ngar ngar laiin ka tukhum a ri dup a,ka lu a hai nghal mawp. Ka chhip hi a ri leh dawp a, engmah ka hre zui ta lo a ni. Mak ka tih zawk chu vanapa hall hnuaiah tho khan damdawi ina min hruaitute khan min hmu sia, heti taka hliam tuar tur khawp hian engtin nge khalai hmunah khan min sawisak theih ka ti..veivak neuh neuh an awm ve tho sia..Police ten i û an lakna chhan chu ka biak hnuhnun ber a nih vang a niang. " Tiin. Ka lo inhum nasa lutuk a,ka hah vek thei. 

"Mahse,nizan khan ka nuin a vau thu che kha ka hrilh a, ka nu chu an rawn ko ve si lo" ka ti vat a. 

"An la koh ve vat dawn chu" a ti ringawt. 

"Ka hne tawh,egkim hi" ka ti nghat a. Min khawngaih hmel deuh hian,"Buaina ka ngah vangin i lo buai ve zel sia..ka tihpalh aw" a ti sup. Ka inthiam lo leh si..

"A ho lutuk"ka ti leh hnuhnawh a. 

Harsa tih hmel zet hian,"Kei hi chu damlo hman ka ni ve lo asin le. "A ti zawi ruih a. Mittui tling pam chungin a kut ka vuan chawt…ni e, ani hi damlo thei a ni ve miah lo asin le..