Zor 13

ZÔR..(13)

Ziaktu : Toni Râlte

In ka va thlen chuan Mateii leh hmeichhe pahnih hi an lo awm ve a. "E, in lo thleng tawh law" ka ti a. 

"Umm, Kan va inhmu khât tak" a lo ti ve chul a. Mateii hi kei aiin kum 2 in a naupang a, mahse, kei aiin a lian daih zawk. A inti nula hma ve bawk a. A che senior angreng. A fel ve reng mai. Viteii chuan bahkhawr a lo sil a, salad tur silfaisa dawhkana a dah chu ka ṭhutchilh nghal. Mateii ṭhiannu pakhat zawk, sam boyscut, lu zawh hmel tak mai hi a rawn ṭhu ve nghal a, "Khawi ka lo chan ve ang" a ti sap a. Kei aiin a sang ang, a vun a nalh reuh hle bawk. Mateii leh pakhat zawk sam kir chuat mai, inha tight zet te erawh phone khawihin an phûl hlut a. 

"Awii, a chhiat lohzia hi..a va man tak" a ṭhiannu chuan a ti a, Mateii'n, "Kei chu Dinpuia chhe lo ka ti zawk..mahse, a bialnu hi ka duhpui thlawt lo, a sin reuh si" a lo ti zung zung. 

Ka bula ṭhu chuan nui chungin, "Star nei rual pawh an ni tawh si lo va tiraw?" Tiin min rawn en a, ka lo nuih ve ringawt. 

Nuteii a rawn phei a, "Vite, i va che muang ve, ar chu i hem hmin tawh em?" A ti a. 

"Lo en lawk, hei ka laklawh" Viteii chuan a ti a. 

"In che hi a muang ṭhin lutuk a" Nuteii chuan a ti nang nang. Ar chu a la chhuak a, a lo hmin tawh. Dawhkanah chan theihin a dah a. "Kha kha ti zo la, va chan rawh aw" a ti zui leh hlak. 

"Mate, Viteii a buai sia, ar hi lo chan lawk u la" tiin ka va au a. Nuteii mitmeng rum nghal sawt chu engah mah ka ngai lo. He inah hian thuneitu a ni lo va, Viteii tir kual tura lo lut a ni hek lo. Mateii te pawh chu rawn kalin a ṭhiannu lah chuan, "Awwii, arsa kan hmeh dawn tih hria ila ka kal miah lo vang" a ti sap a. Mateii'n a nghawk zauh chu ka hmu reng. Ka chhan let chuan boruak a nuam lo zual dawn tih ka hriat avangin ka ngawi ta daih a. Ka bula ṭhu sam tawi chu Ruby a lo nia, samkiri chu Cci an ti mai a..Chanchini a ni maithei. Engtin tin emaw ei rawng chu kan bawl zo va. Kei pawh inbual turin ka pindan ka pansan a. Bathlarah an ṭhu a, an titi char char. An hlim chuan a ṭha vek mai e. Au Bawiha a rawn haw a, a inbual phawt. Cci an chhaih an chhaih danah Au Bawiha chu a star mawni ka ti deuh. Mama'n min lo call a, ka be hreh angreng. Mahse, intipachangin ka la ta a. 

"Min va ngaihven lo ve, min rawn biak pawh in tum lo" a ti hmuk hmuk a. Nia, kan zu be hmasa bawk si lo va, kan ngaihtuah loh hmel ve bawk êm a ni. 

"Ka buai ve deuh a" ka ti ringawt. 

"Aw le, ka pa pawh a ṭha e. A ṭawng a ṭawng ve tawh a. Kan lo haw vat turah ngai ang" a rawn ti a. 

"A va lawmawm ve. Lo haw vat rawh u, chuan ka pa chu a kal leh thei dawnin an sawi em?" Ka ti vat a. Ka rilru pawh a hlim deuh. 

" a..chutia kal vat thei tura beiseiawm chu a ni lo va,mahse, hma a sawn zel turah ngai ang" a rawn ti charh charh a. Nia, hetiang lam hi chu an dam har ṭhin viau, mi pangngai anga an chhuah pawhin kal pangngaia kal thei hi chu an awm mang lo a ni. A pawi êm mai, ka pa chu a. Upat tawh alamah. 

Kan inbiak zawhah chaw ei ka rawt a, Kan siam nghal. Au Bawiha erawh "Ka ril a la ṭam lo" a ti deuh tlat! A zak leh em mawni le..

"Ani hi zawng a zakzum lutuk a" nuteii pawh chuan a ti a. Kan han ei ta a, Mateii te ṭhian thum an ṭawng duh bawk a, kan boruak a zangkhai viau e. Kei pawh ka ei ve ṭeuh mai. Cci chuan, "U Teber, U Sangbera bialnu ka hria a nia aw" a ti thut mai a. Kan ngawi ṭhap. 

"Tu nge?" Ka ti a. 

"Sangkimi ..Model lar ve deuh hi " a ti ta a. Sangkimi chu ka hria. Mahse, Mama nen an inzui ngai ka hre miah lo,. A hmelṭha viau naa, a thinchhiat hmel ka ti. A lo thinchhe miah lo ve thei bawk a. 

"U Teber, U Bawiha hian bialnu a nei em?" Mateii'n a ti leh phawng. Ka nui hawk a ,"Ka hre bik miah lo.." ka ti ringawt. 

Ruby chuan, "A neih loh chuan star tu ka hria ah" a lo tih chuan, Cci'n a melhrum ngang mai. A hlimawm ta phian a. Eikhamah Ruby chuan Viteii a sengfelpui leh vek. Kei chuan thleng ka sil thung. Ka rilruah thildang a leng vak thei ṭhin lo. Thil dang han ngaihtuah ve ṭhin pawh ni ila, a tawpah ka nî thu min hrilhte kha a rawn lang leh nge nge ṭhin. Mama mizia leh ka laka a awmdan te ka han ngaihtuah lêt a, min hmangaihin min duat êm êm, ka nu chunga khatiang thil a tih tawh hnuah pawh min endan a danglam lo va. Min venhim a la tum hrâm hrâm tih ka hria. Ka nu chunga a chetna avangin ka lakah a lo inthlahrungin ka hrechhuak ang tih hlau êm êmin hun a lo hmang ṭhin tihna a nia. Ka khawngaih rualin a hmate khan lo hre tawh zawk ila kan dam tlâng zawk tur..ka laka zêp leh thup an neih rei luatah tunah a puakkeh a, kan buai phah ta nuaih a nih hi. 

Mama chungchangah chuan ka ngaih a ngam huai tawh naa..thil dang a la awm! Ka nu fate ve ve emaw ka tih laiin a fahrawnte lek an lo nia. Chu chu ka'n ngaihtuah chian chuan ngaihbel theih tur thil chu ka mitthla thei tho mai. Mahse, tuna ka buai rûkna chu, ka nu hian tu emaw thurualpui leh biak rûk a nei ṭhin a, rosumah a buai ru hle bawk. Tin, ka pa laka chu a thurualpui nena an zêp rûk, ka pa damloh tak avanga a venthâwn tawh loh, a namnul tawh kha eng nge ni ta ang? Kha mawlh khan min la tibuai a ni. Damdawi ina ka awm laia a biak mawlh mawlh , a hnunglam aṭang chauha ka hmuh kha tuna a biak ṭhin ngei hi a nih ka ring bawk. Ka pa lakah eng emaw an zêp a, Mama khan a hriatpui emaw ka tih laiin a hriatpui miah lo tih ka nî thu min hrilh aṭangin ka hre thei. Thleng ka sil zawh veleh in chungah ka chho a. Au Bawiha chuan guitar a lo perh a, Guitar hi a pianchama Mama'n a present ve ngat a ni. Amah a zakzum êm a, a intilar thiam lo mai pawh a, thiam ve tak mai a ni. Min hmuh rual chuan guitar pawh chu a dah ve nghal a. 

"Parvula chaw i pe em?" A ti vat. 

"Umm…i ril a la ṭam lo tak tak mi?" Ka tih chuan, "Ṭam lo, hawn hma khan Nu Zingteii chhangban ka ei a" a ti mai a. 

A bulah ka ṭhu a, ka ngawih dat hnuah, "Thil zawh duh che ka nei a" ka ti sap. Ka thutak lutuk chu makti lek lek hian min melh a. 

."Eng" a ti nghut. 

Ka heh ka liak zauh a, "Ih, englo..hman zana Anu i hmuh kha tu nge a bulah lo awm?" Ka ti ta a. Tuna hetia ka sawi chhuah tawl theihna chhan chu ka nu fa diktak an nih loh vang chauh a ni. Min phuartu a awm ta lo ti mai ang. 

" Ka pain a hrilh che mi?" A ti daih. 

"Aw..ka nu khan ka pa bulah ka sawi emaw a tia, min hau hrep a. " Ka ti duah. 

A aw a thian kharh a, "Tu nge a lo awmpui kha ka hre lo, shawl a bat a, a inkhuh hlun bawk. Hmeichhia ngei erawh a ni " a ti sup a. 

Damdawi ina lo kal ngei kha a nih ka ring nghet hmak. 

"Engtin nge i hmuh? Kei chuan amah chauha ina a lo lut kha ka hmu a" ka ti a. 

"Khami zan khan ṭhianpa Lawma zu ruiin zan rei tawhah khan hruai turin min rawn ngen a. In chung kawngka a tangin ka chhuak. Ka rawn let leh lamah a nia ka hmuh ni..an ṭawng ri ka hriat vangin ka va enthla, mahse, thawm ka lo nei nge hmanhmawh takin a kal ta sawk sawk a, ka nu pawh a rawn lut ta chauh a nih kha..ka umzui lo kha ka mawl ngawt mai" a ti ta mawlh mawlh a. 

Kan sawi pawp ta sa sa a, Au Bawiha bulah chuan ka nu aṭanga ka thu hriat leh ka rinhlelhna te, falâk ka ni tih ka inhriat tawh thu te chu ka sawi ta vek a. 

"Adopt i ni tih hi chu i hre sa daih tawhah ka lo ngai hrim hrim a, i hre chauh chu a va mak ve" a tih chuan dâwt a sawi ka ring lo. Ni e, kei ang rualah falâk ho hi chuan adopt an ni tih an inhre deuh vek tawh zel. 

"Chuan, keima chungchang chu thuhran ni ta se, ka nu chu eng nge i ngaih ve dan?" Ka ti a. A ngawi vung vung..

Chutah muangchang hian, "Rinhlelhna ka neih tak tlat avangin ania ka pa pawh kha ka awmpui tlat ni. Nu Masiami ten ka pa leh hmeichhe pakhat inhmuh thu an sawi aṭang khan ka nu te thiltih a nih rinna ka nei nghal a. Ka pa kha amahin ka awmtir thei thlawt lo a ni.." a ti ta dap dap a. Ka lo rin rûksa a ni a, mak ka ti lo. 

."Eng nge ka nute hian an zêp ang le?" Ka ti hawk a.

"Rosum chungchang chu a nih ka ring. Kan nu tak a nih lohnaah hlauhthawnna a nei a niang" a ti ringawt. Kei pawn chu bak puh tur dang ka hre chuang lo. 

"Mahse, ka pa laka an zêp tlat, ka pain a hriat an hlauh si, tuna a damloha nikhua a hriat tak loh hnua mi dang hriat pawh an pawitih loh tak kha eng nge ni ang le ka ti…" ka ti niah niah a. 

"Nia, thil hi a mak a nih hi. Mama pawh hi a rûkin an veh thoin ka hria. Mahse, thildang pawh a ni thei" a ti mai a. 

"A nih Mama leh keima nu diktak chungchang kha i hre tawh em?" Ka tih chuan min melh hû a! "Eng thil" a ti vut. 

Zêp chi a ni tawh lo bawk a, tin, hre ve se ka duh hrim hrim bawk nen, ka nîin min hrilh zawng zawngte kha hmaih nei loin ka hrilh ta vek a. A ngaithla uluk viau mai. 

"Chu chu a nih chu! Chung i sawi lai vela Mama awmdan danglam êm êm kha. Zanah te hian kan mut tawh hnuah chhuah chang a nei ṭhin. A sumdawnna vang a nih ka lo ring ringawt a" a ti a. A dik ngei ang tih ka ring. 

Zorina'n min lo call avangin Ka u chu ka chhuksan ta rih a. Ka pindanah ka be daih. Mateii te pawh an lo awm tawh lo. 

"I pa chanchin eng nge?" A rawn tih chuan, Mama sawi kha ka hrilh a. 

"A lawmawm chu, dam har dawn mah se, hma a sawn ve zel kha a ṭha hrim hrim. Ka û ang hi chu ni ve suh se" a rawn ti a. A û ka mitthla chuan ka lainat zual sauh. 

"Chuan, engtik nge in insual leh dawn khah?" Ka ti a. 

"Karleh thawhlehni-ah..chuta ka chak chuan final ka lut aw" a rawn tih chuan, "Tu nge i bitum tur?" Ka ti vat. 

"Mawizuala, Reiek khua kha..a huphurhawm tak tak a ni" a ti a. Kei pawn Mawizuala chu ka hre ve, a hmain boxing a khel ve ṭhin a, a thleng sang thawkhat naa, eng emaw vangin a chawl vang vang a, tunah a rawn intuaithar leh ta kha a nia. Ka lo huphurhpui ve tawp. 

"I hneh leh tho vang" ka ti ringawt. A rawn nui hawk hawk a, "I lo ṭawngṭai ang a" a rawn ti sup. Ka rilruin, "Lutuk, i hming ka lam ziah" ka ti. 

"Ka ṭawngtaipui ziah che alawm, i û eng nge a an?" Ka ti a. 

"Hei ani pawh hma a sawn. A thil ei a tuia a mut ṭhat hi chuan a ṭha a ni mai" a ti a. Kan dinhmun azir zel hian kan lawmna te hi a hoin a ho lo mai mai a lo ni. Zorina hnenah hian adopt ka ni tih hi sawi chu ka la duh a, mahse, ka hmanhmawh lo. A tan buaina tur awm lo mah se, thildang lo tlakzehtir rih kha ka duh lo. Zanah an practice tawh dawn avangin a chhuak thei vak tawh dawn lo. A thleng sang zel a, an veng te pawn hrechiang chhoin an veng hruaitute lam pawn an hmelhriat chho a, a tira ṭhiante puihna leh ṭawiâwmna bak dawng lo kha duhsakna leh supportna a dawng nasa tawh a. Rpa phei chuan," Pakhatna a ni emaw ni lo emaw kan LC ten in hmun pek an tum an ti tlat! Kan veng aṭangin hetiang hi an la chhuak vak lo a niang" a ti kha a nia. Ni tak tak se ka lawmpui ngawt ang. Kan rethei emaw kan hausa emaw mahni puala in leh lo neih tluk hi a awm lo ka ti ve, chutihrualin mi in luahte ka hnualsuatin ka enhniam tihna a ni lo thung. 

Lehkha ka zir ve a, exam a hnai ve ṭan a, zir loh lutuk chu a dik lo. Ka nî bulah khan ka la sawi bak, ka nu chungchangte kha la sawi ka tum tho. Ka nî hian chhui chhuah dante a hre mial maithei asin. 

Dami'n min lo call a, ka la vat. "Te, thlalak ka lo thawn che, en vat teh" a rawn ti sawk sawk a. A hmanhmawh thei sia maw..a buaithlak e. 

Whatsappah ka lut nghal a. Thlalak ka hmuh chuan ka phâwk hrû..tin, ka na zawk mai. Melody status a lo screenshot a lo nia. Melody leh Zorina te, in chung zawla an din dunna, Zorina'n a kokiah a kuah a, Meloi'n a âwmah a va pawm titih bawk. An nui dun sâng a, Melody chuan captionah, "Mine 😍 " tih a hmang. Ka darh lo chauh a ni. Ka phone chu ka hmet sawk sawk a, Zorina number ka hmet chhuak nghal. Inngaihtuah buai miah loin ka call nghal a. A ring ral takngial dawn tihin a rawn la a, a hah hmel angreng. An buai lai pawh ni eng ang mah se, ka be dawn a ni ringawt. 

"Min va ngai leh hma ve" a rawn tih chuan thinur lutuk, ṭawng pawh ṭawng ṭha thei lo hian, "Melody status kha eng nge a awmzia? Melody ta chauh maw i lo nih a? Min lo bum char char a maw? Hmela.." a tawp lam phei chu ka aw a khur tawh. Dik tak chuan Mipa a ni a, ngaizawngtu a nei tur pawh a ni. Kei pawn ka nei ve tho. Mahse, Bena pawh ka duh lohzia sawiin Bena tan chance takngial pawh ka siamsak duh ngai lo. Chuta kara ani Melody in a atchilh tih hrereng chunga khatiang hlim hmel lutuka thla a lo lakpui kha ka lawm hlawl lo a ni tawp mai. 

"Eng nge a?" Zaidam deuh hian a rawn ti a. 

"En la ti nia..a tawk..ka dah" tiin ka hmet hlum nghal. Ka awmdan hi hmeichhe zaidam lo ho awmdan a ni. Kan thinti rimtu kan tawna kan lanchhuahtir dan tlangpui a ni e. Thin a rima ngaihbel tur a awm hi chuan pawisak kan nei ngai lo. Inngaihtuah fim phawt tihte chu tih mai mai a ni e. A thei fa erawh an awm lo ka ti lo a nia.

Rei pawh a ni lo, a rawn call nghal a. Ka la ngei tur a ni, a insawifiahna ngaithla lo va thutawp sawi ngawt chu ka duh bik lo. 

"Aw" pawr zet hian ka ti a. 

"I thin a rim viau em ni?" A rawn ti dam thlup. 

"A rim lohin, i â mi?" Ka ti nghek. 

"Umm, a rim viau ang. Ka tihpalh. Melody thla ka lakpui avang khan" a ti zawi raih a. 

"Pangngai takin in la dun thei lo em ni?" Ka ti leh ṭhak. 

"Amah khan min rawn kuah ringawt a, bakah hetiangin a post dawn tih ka hre hleinem" a ti a. 

"A captionte kha i hmu em? Hmela, khatianga caption nei ngam khawpin nang hian i lo hnaih tihna a ni mai. Ni r'u, hlim deuhin awm r'u..kei aiin a tihlim thiam zawk ang che" ka ti zawt zawt a. Chhungrila min pump tu a awm hi chuan kan ṭawng zawt zawt zel chu a nih hi maw..

A nui hak a , chungte chuan ka thin a tirim zual..ka ṭawng leh hmain, "Ka lo kal " tih leh phone dah a rual. Phone chu ka melh vung vung ringawt. Tunah dar 9 a ri dawn tawh a. Au Bawiha tih loh midang an mu tawh. Au Bawiha ngaihdan a ni lo viau ang em tih ngaihtuah tho mah ila, rawn kal mah se, pawi ka ti lutuk tlat lo. Tin, thlalak ka hmuh tirha ka thinrim ang êm êm kha chuan ka thinrim leh tawh lo bawk. Nghak ru si, nghak anga lan hreh si hian ka awm a, lehkha zir te chu khawilamah. Ka khungfel hmiah. A rawn tlan chak viau a niang, ka rin aiin a rawn thleng hma. Min lo call a, "In in chungah ka chho dawn..ka lo nghak ang che" a ti teh tawp. A dah leh daih. Hmm, chhoh ve loh chuan..Pawn aṭanga in chung pannaah ka chho hnak hnak a. Boruak a thiang nuam hle. 

In chung zawla ṭhutthleng kan dahah chuan hahdam hmel zet hian a lo ṭhu a. Ka ner vak ringawt. Thinrim ka la duh sia, chutin a rim êm êm tawh bawk si lo. A bulah ka va ding a, min lo melh kûr..

"Lo ṭhu teh" tiin ka bânah a rawn vuan a, ka thingthla lawp..mahse, ka ṭhu ta tho a. 

"Melody nen kan inngaizawng lo,. Chu chu chiang phawt rawh" a ti zawi sup a. 

"Ti nge khatianga a rawn post si?" Ka ti hlar. 

"Ka hre lo, hmeichhia i nia i hre zawk ang…mipain kan bialnute lo pui bialnu angin kan post ve ngai si lo va" a ti duah. 

"Awii, i daw lutuk..in duh vak loh pawh duh angin in awm thiam..Tikhan Melody status hmu thei te chuan an ring vek tawh ang che u" ka ti tân tân a. 

"A va buaithlak e aw.." tiin a rum nghut. 

"I ngai holam viau a ni maw? Zorinsang..kei chu ngaihzawng ka kawp ve ngai lo va, ka duh lo a nia. Ka zak bawk" ka ti leh hlaih hlaih. Ka thin pawh a rawn rim leh chawpchilh hmak. 

"Ka ngai ho lo. Mahse, min ring la" a ti duh chauh. 

"Melody kha hrilh rawh. I bialnu a ni lo tih" ka ti hram. 

"Hmanniah pawh ka sawi kha, ka bialnu i ni tih chu" a ti ve mai a. Han ân leh vak dan tur ka hre mai si lo. Ka ṭhu tûm bûr ringawt. Min rawn hnaih hret a, ka beksam min bengzehtirin, "I va meng lian tak" a ti sup. A sawi dan teh tawp khan ka nuih a tiza si, nuih ka hreh bawk si chu lehlam hawiin ka khi ṭhâw a. 

"Min en chungin han nui teh" tiin ka lu a kuaiher a. Min nuihsawh ka rin nen, thûk lutuk hian hnai zetah min lo melh a. Ka lai letling. 

"Ka nuih a za lo" ka ti hmak a. 

"I nuih hma chu tihian ṭhu reng ila a ni mai" a la ti zui! Hmeichhe thinrim thlem a thiam ka ring vak lo sa a. Mahse, kan inṭhen phah dawn ta lo chu a nih hi..

"Va haw tawh rawh, in practice a ni lawm ni? Bakah a tlai tawh" ka ti a. 

"I phakar ka ti" a tih chuan a ngaihna hre lo zetin ka melh chho a. A khi suk a, "Min ngaih vangin i titau der" a ti ta nih chu! 

"Hmela.." tih leh thawh ka rual, a ranga rangin hnunglam aṭangin min rawn pawm a. Ka chhipah a khabe nghatin, "Ka tihpalh..ka ngaih vang zawk che a nia. Tunah pawh hian ka ngai che" a ti zawi sûp sup a. 

Sawi mai tur ka haihchham..mahse, ka ding ve hle hle tho a. 

"Min ngai tiraw?" A rawn ti leh a..zawitê hian, "Umm" ka ti. A thaw hak a. Min kuaiherin kan inpawm ta vawng vawng a. Lungawi lohna leh thîkna te chu an bo leh ta duak mai. He pa hi mipa danglam a ni. 

Kan inthlem lungawi ta bawk a. Kan inthlah ve thei ta hrâm. Ka mimal nun erawh ka la hrilh ta lo phawt. Thildang sawi kha ka ui a ni ber. Kei pawh tui tak chuan ka muhil ve leh thei ta e. A tukah class ka kal a, Friday hi chu ni zawng zawnga nuam ber kha a ni bawk a, ka pa vanga ka nguina te pawh ka hneh ka ti mai. A nuih pawh ka nui tam e. Mi hian min ti ṭhin, Teberi hi smiling face a nei lo si, Desy lah a hmel hi nui reng a nia. An inkawmngeih bawk sia tiin. Hei hi min ngamtlakte pawn min hauh tamna, smiling face hi ka nei lo. Ka tûm bûr chu a ni bik si lo. Mahse, min hre ngai lote tan ka lo nelawm vak ngai lo a niawm e. Desy erawh tupawn an ngaina nghal niin ka hria. Ban pahin Dingi te inah kan peng a. Ani a lo damṭha lo va, class pawh kha a rawn kal peih lo kha a nia. Aman "Lo peng teh u aw. Sawi tur ka nei" a ti bawk nen, kan kim leh ta ṭhap mai. 

 Dingi chu a lo inbual zo deuh chiah a. A nau a lo awm lo. Dingi te in luah hi a zau tehreng nen, an luah tlawm phian. 

Dami'n, "Eng nge i sawi tur chu?" A lo ti thawt thawt. Ani hi chu beng vir deuh kan tih ang kha a ni ve a. Dingi chuan, "Cheng chung zel a che..ka sawi dawn reng" a ti hlar a.

A aw thian leh tê têin, "Ih,..min hau miah suh u. Ka rai!" A ti ta phawng mai. 

"Ehee.." Zoi nen kan ti rual ṭhawt. 

Desy zawng rilru puitling tih takah, "Tu fa nge?" A lo ti chat a. 

Dingi chuan nuam lo tih hmel zet hian, "Chu chu a nia ka sawi tum ber chu..ih, U Tluanga fa a nia.." a heh a pet a..a hnukulh deuhin ka hria. Tluanga chu an in luahna te fapa a ni. Mama ai chuan a nau hlek ang. 

"Chuan.." Dami'n a lo ti vat. 

"Pawi deuh chu U Tluanga hian thla thar ni 3-ah nupui a nei dawn" a ti ta a. Kan ngawi ṭhap mai. Kan beisei loh tak thu kan dawng a ni bawk a. 

Zoi chuan, "Aman eng nge a sawi?" A rawn ti hrâm. 

"Titla turin min tia..pawisa pawh min pek a tiam..mahse, thiante u,nau tihtlak kher chu ka ngam thlawt lo a ni" khur dar dar hian a ti a. 

Rang zetin, "Titla miah suh..titla suh aw" ka lo ti! Min rawn melh ṭhap chu ka lâi leh si,"Aa..rilarah fa chu tihtlak a uiawm êm asin.." ka ti ringawt. Ka ṭawngkam thiam lo lutuk hi chu..

"Nia, mahse, ka pa ten hre ta se..ka ngaihtuah ngam lo. U Tluanga nen lah inngaizawnga inzui kan ni si lo" a ti tham ṭiak a. Kan ṭhian zingah Dingi hi a lerh lo ber ang tihtheih a ni. Bialpa a ngaihven ngai lo, a awm ve mual mual tawp zel. Star erawh a nei ve zeuh zeuh. 

Desy chuan, "Thla engzat nge?" A ti leh a. 

"Thla hnih vel chu a ni tawh a" a ti a. 

Zovi'n, "Mipa zawkin titla rawh a tih a hnu, titla hmak rawh. Mawhphurhna pawh la ngam hlei lo" a lo ti hmarh hmarh. 

Dami'n, "Nia, nang mi lerh lo lutuk hian i thlem hmasa dawn lo tih a lang reng..nawmchen nan chiah a duh che hi ka lawm lo " a lo ti nghat nghat. 

Desy chuan a lo hnial ka beisei tehlul nen, "Thla 2 chiah a a nih tho chuan a la insiam vak nang, titla mah la a pawi vak lo vang" a lo ti ve daih a. Ka ding hluai a..makti zetin min melh leh ṭhap.

"Ding, titla lo la ka ti ê..dik tak chuan, nang pawh i duhthlanaa sex hmang ve tho i nia..a pain mawhphurhna la duh lo mah se; Tualthah ai chuan pai tlang la, ih, in rethei bik lo vang" ka ti bah nuaih a. 

Dami'n, "Nang hi tizawng khan lo ṭang tlat suh. A pa ten an hriat chuan engtin nge an tih ang?" A lo ti hlar a. Ka thaw a ipik tlat, ka tei sek a. Desy ngaihṭha lo chuan, "Te, i ṭha em?" A ti thuai a. 

Ṭhiante lam chu hawin, "Kei pawh hi ka piang lo ṭêp asin. Ding, nangmah ang bawk khan min hringtu ka nu chuan min tihtlak a tum a..mahse, ka pate sawn min la ta a ni.." ka ti ta hawk a..chawp leh chilhin ka ipik kha a bo nghal duak! An ngawi ta ṭhap a. 

"Chuvang chuan piantir rawh. Enteh, i enkawl theih loh pawn keimah ang taka hmangaihtu chhungkua a la nei maithei asin. Tunah khan i thisen a ring tawh a nia.." tiin Dingi chu ka melh a. 

Zovi chuan, "Teber,U Sangbera saw i û a ni lo maw?" A lo ti daih! 

"Aw.." ka ti hul hak. Ka nihna diktak hi ka ṭhianṭha te chuan hre mah se pawi ka ti lo. Min endan a danglam phah ka ring hek lo. Dingi pawh chuan kan sawi kan sawi takah chuan, "Ka lo inngaihtuah ang..Zanah groupah kan sawi dawn nia" a ti a. A nau a rawn haw bawk nen, sawi ho vak chi a ni ta si lo va, kan hawnsan ta a.

Kan in kan thleng a, ka luh hmain Desy chuan, "Te, nichin kha ka tihpalh aw. I rilru tur ka lo ngaihtuah lo va. " a ti sep a. Ka nuih a, "Ka ṭhianthaber i ni.." ka ti a. Ka luhsan ta a. 

Boruak danglam êm êm a thleng lo. Nuteii pawh a zia a thlak nge ni rawngte chu a bawl ve sûrh sûrh a. Viteii nen pawh an inkawm ve nuah nuah kha. Mama nen kan inbia a, "Karleh lamah rawn hawn kan tum e. He lamah tih tur em em a awm tawh lo bawk a. Khalama muangchânga inenkawl chhoh bêk bek kha a ṭha zawk ang. " A ti a. 

"Nia, bakah kan in hi a ruak, in awm loh chuan" ka ti ringawt. 

"Zorina nen te eng nge in chanchin?" A rawn tih chuan ka ngawi dat a. Inti huaisen luiin, "Kan la ṭha ve zel e. " Ka ti sap. 

"A û eng nge a an?"a ti leh a, "A ṭha a niang..engmah a sawi lo" ka ti mai a. 

Thil ka hrechhuak thut. 

"Taka Mam, ih, Trinity-a an va awm ṭum khan eng nge i va tih? Zorina te kha i va hmu sia" ka ti hluai a. A hamhaih deuh nge ani pawh a ngawi dat..

"Eng ti lo ve, ka ṭhian pakhat ka va tlawh a, ka hmu fuh sia, ka va tlawh ve a nih kha" a ti ringawt. 

"Mahse, then turin min ti reng tho sia" hrethiam lo zetin ka ti a. 

"Ka sawi vek tawh kha..ka nu min ngenna ka tih kha" a ti a. Ka awih hreh tlat! 

"Mam, ka awih lo ê..sawi tha teh, ka nute hian an vau che mi?" Ka ti ta bawrh mai.

A thaw hawk a. " Ka naute,. I inngaihtuah nasa lutuk a nih kha..ka nute chuan min vauna chhan tur an nei reng reng hleinem" a ti nghut nghut a. 

"Anî bulah pawh i sawi vek kha" ka ti nghek. 

"Kha chu ka nuten tihtheih an nei hleinem. Zorina nen engmah inkungkaihna an nei lo bawk. " A ti nghet charh a. 

"Mahse, tun hnaiah an la vau tho che a ni lo'm ni? Tu te emaw te khan" ka ti lehzel a. Ka ngampa laklawh tawh, hriat zel ka duh. 

"Teber, a va mak e aw. Aw..ni e, engkim i hre tawh tih ka hria e. He thil hi chu hmaichhana sawi chi a ni lo maw?" A ti dam dup a. 

"A nih thil pakhat chiah ka zawt ang che..chu chu min chhang rawh aw" ka ti a. 

"Sawi la" a ti sup. 

"Zorina hi mimal takin i haw lo tiraw? Chuan, min dodal tawh dawn lo tiraw?" Ka ti ta a. 

"Huatna chhan tur ka dap fê paw'n ka haw lo chu a nih hi..ni e, ka do tawh lo che tih chu ka pa nat hma pawh khan hre lo'm ni?" A ti ve ta kalh kalh a. Ka awm a nuam ta huai e. A bak thildang buaina chu Mama bawk hian a chingfel thei mai ang. Ka inrawlh pawh a ngai lo vang. Kan dah ta a. Ka mood pawh chawp leh chilhin a rawn ṭha nghal. 

Ka nu ten Zorina an duh loh chhan chu ka nu chauhin min chhang thei tih pawh ka chiang e. 

Nuteii ṭawng suam suam lai chuhin ka chhuak nulh. Ka nî te in ka pan ta nghal a. Pa Muana nen an lo awm. Peki chu hla a lo zir a, ka tluk lo ngawt mai. Hla zir piahlamah Kohhran activities ah hian ka tel ṭha peih thlawt lo. A mak tak tak a ni. Pa Muana a la awm si avangin leng satliah angin ka insawi a. Ka nî chuan a hrethiam a niang, an pa chu, "Pu Râwna damlo pawh i la kan ve lo, nitin i chhuah a ngai sia, zan lamah tal ve leng ve teh" a ti ta hlauh a. Pa Muana lah nupuite thuawih tih takah a tho vut a, a va inthlak sawk sawk a,a chhuak ta nul nul. 

"Nî , ngaihthat lohna riau ka nei a.." tia bulṭanin ka nu ka rinhlelhna zawng zawng chu ka sawi fai ta vek a. Ngun zetin a lo ngaithla. Ka sawi zawh chuan, "Ka hlauh ruk ang ngei a nih chu. Tun aṭangin rosumah a buai hleinem, pasal ka neih hma pawh khan a buai chho dêr tawh. Amah ka fak lohna ber pawh a ni rêng a. A bakah chuan nu ṭha tak zawng a ni. Tuna kan awmna in in kan luah luh dawn te khan i pa nen an inhauh nasat phah alawm, ani chuan man chawia luahtir min duh a, bakah kan luah a nih chuan i pa hian ka kutah a dah mai a hlau a ni ber. Ka û lah a tih tawh chu ti rûm rût chi a lo ni ve bawk nen, bakah kei hi chu an farnu neihchhun ka niin amah i pa nen phei chuan inzui kawi reng, a fate thlenga tuamhlawmtu ka ni ve tlat a. Chuvang chuan, i nu thusawi kha chhetemahin a ngaipawimawh lo. "Ka fate tan nî a ni a, nu a ni bawk" tiin tuna kan in pawh hi ka hmingin a dah ta hmiah a. I nu chu a lawm lo teh asin. He a rilru hi a rawn lanchhuah kha ka la ring rêng a ni. 

Tihian, Mama leh Bawiha ten sum an lalut ve ve ta a. I pa pension hi chu i nu pual a ni tawh mai. Nang lah i hautak si lo. Mahse, a la duhtawk thei lo va. I pa a damloh hma lawk khan Mama bawkin he thil chungchâng hi min rawn sawipui tawh alawm..I nu chuan i pa boral hnuah i pa rosum, a bo a bang awm lo va ruh fai vek a tum a. Chu chu Mama leh i paten an remti lo. I u te pahnih ngaihtuahawm an ni tawh lo va, nang hi eng emaw tal hnutchhiah che i pa chuan a duh. Engkim i hre vek tawh ta sa sa a, ka'n sawi law law ang e. I pa lah mi pangngai a rawn ni leh phak ang em kan hre si lo. Kumin kumtira Venghluia i u te pahnih leh i pa te inthawh ṭawmin an lei, in kha i pual ve atana an lei a nih kha. I nuin a lo hriat khan a buai chho ta chiah a. I pa nen pawh reitak an inbiak loh phah nghe nghe asin. Inah i awm tlem êm a, i hrethiam lo vang. Mahse, i pa hian a hmet dai thei zel a.

Tunah i pa a han damlo ta a, a chhe ber thleng ta ila, i nu chu kan rin phak bâkin a che maithei. Mahse, eng ang pawn ṭan khawh mah se; a tichhe pha lo che. I pain ziakin a dah vek tawh. Ka han sawi thui zel ang e, naupang ber i nih bakah sawi leh sawi hnu an fa tak i nih lohna laiah i lakah zêp leh thup te an nei lo thei lo va, nang pawn ngai haw suh. I rilru tihhrehawm an hreh vang mai mai a ni. 

Tuna i pa damlohna chungchang pawh i u te pahnih hian a rûkin khaminia i pain a hmuh hmeichhia kha tu nge tih hriatchhuah an la tum reng a ni. Mahse, tihian an khaihlak rih a ngai lo thei si lo va. I nuteii rawn tlan hunte saw an ruahmanna vek a nih ka ring hial asin. Nizana a awm ve tlatte kha. Hman zana i U Bawiha'n i nu leh tu emaw a hmuh hma khan thil eng emaw a danglam tih an hai lo va. A rûkin an chîk reng tih hria la, Bawiha pawn i pa dam loh chhung zawng a riahpui hmiah mai kha..i nu saw an nuhrawn a nih ve thona laiah venthawn chin leh fimkhur an ngaihna lai a awm ve tlat a. Dik tak chuan mihring hrisel pangngai, insawiselna êm êm pawh nei lo khatianga a tluk piahlamah a han zeng ta ngawt te hi a laina te tan chuan ngaihṭhatna chi a ni hleinem. Mahse, mualpho a hlauhawm tiin engmah kan sawi duh lo mai mai zawk a ni. Mama tihdan takah i nuin falâk i nih thu a ruk niawm taka a sawite kha ruahmanna vek a nih kan ring hial tawh asin. Chuvang chuan, nang pawh fimkhur la, i nu diktak chungchang pawh ngaihven chung suh. In rilru a la puitling tawk lo va, i nu diktak hmang hian an duh anga kaihruai tur chein hma te pawh an la la lo vang tih a sawi theih loh..hrereng ang che.." a ti ta mawlh mawlh a. Ka nî zet chu kei ai mahin a lo khatliam zawk a nih hmel. A sawi zo chu a thawl ve hawkin a hriat theih. 

"Chuan, nî, ka hriatthiam theih loh, chhui ngaihna ka hriat miah loh bawk chu ka bialpa Zorina, ka nu leh Mama ten ṭhen tura khati khawpa min ti nasa kha a ni..tuna kan buaina nen hian a inzawm tlatin ka hre bawk.. " ka ti bân chhalh a. 

Tv va off-in, "Ni e.. hei hi kei pawn ka hrethiam thei lo. An inzawmna âwm reng reng ka hre bawk si lo. Mahse, Mama kha chuan i nuin a ngen vang chauha dodal che ni khan a insawi a. " A ti a. 

."Ka nuin a ngen vang maiin khati em em khan min dodal lo vang. Chhan dang a awm ngei ang" ka ti nghat. 

"Ka hriat a tawp..khalam chu ka hre tawh lo, Mama pawn a sawi lem lo." A ti a. Dâwt a sawi lo tih ka hria. 

Harhchhuak thut niawm takin, "Nî, Zorina pa hi ka nu pasal hmasa kha a lo ni reng a niang a!" Ka ti thut. Ka nî chu a meng lian kher mai. Mahse, " aa..a ni dawn mi le? A pasal hmasa chu Rabung khua daih niawmin a sawi asin. Mahse, Aizawlah hian an awm ve hman chu a niawm e. Bakah a pasal khan kawngka sûlah a ma alawm, fa a neih theih loh avang khan..Zorina pa chu a ni thei dawn em ni? " A ti a. 

A ni thei bawk si lo, rilru a buai. Ka nu leh keini buaina kara Zorina lo awm ve ngawt hi hriatthiam a harsa êm a tin ni. Ka nî bawk chuan, "Khatin ngaihtuah ngut ngut suh. Zorina ka va ṭan loh vang ni loin i nuteii te nen veng khat an nia, i nuteii pawn a hrechiang ang a, nang nen in han inzui takah chuan a iai ve si hi i nu bulah a sawi te pawh a ni ve thei asin. " A ti mawlh mawlh a, a dik ve thei tho mai. ..ka â thei mai ang , hetia ka ngaihtuah reng chuan. 

Au Bawiha'n min lo call a, ka lak chuan, "Bena a lo leng a..lo haw la" a rawn ti! Ka hnual rawih thei. A reh hlen dawn emaw tih nâk alaiin. 

"Ka peih lo, hla a zir ti rawh" ka ti hmak. A rawn nui hawk a, "I sual ve sia aw" a ti hluk a. A dah nghal. 

"Bena lah hi ka ning..upa tawh si" ka ti nghat a. 

Ka nî chuan, "I tih tawh lohah lah hian i nawrluih theih bawk si loh a. Bena te chu a hlawh a ṭha sia, duh ve mai la" min fiam pah hian a ti a. Ka ner nasa , "Aih, duh luih tum paw'n ka thei lo. Ka ten laklawh" ka ti hlak. 

"Thingpui ka'n lum ang e, a hâng in ang aw. Khawlailung kurtai kan nei a nia." Tih pahin a tho a. Bena a vangin ka leng ve ta rêng mai. A hrilhhai teh ang chu..Mipa pangngai a nia, bialpa ka nei tih a hre ve vek, bakah hman zana kan inchhan dan lah khati kha a nia, a rawn lawr ngam ka ring vak tawh lo a nia. Misual chu a ni lo, mahse, a chapo. A chapo tih lanna chu Zorina a biak dan aṭang khan a ni. Ka bialpa khatia tham lo taka a be kual vel khan amah ka ngainatna leh a laka ṭhat chhuah ka tumvena te kha a paih bo vek ka ti lo thei lo. 

Dar 9 velah ka phei ta chauh a. A lo reh ṭhap tawh. Viteii'n ha a lo nawt mek , kei pawh tuilum ka in leh lawk a, phone ka khawih pah. Zorina te an practice a, ka tibuai duh lo. An hawn hunah min lo be ve mai ang chu maw. 

Dar 10 velah min rawn be ta a. 

"I muhil lai ka tiharh che em?" A rawn ti zangkhai vah. 

"Muhil lo, ka lo nghak che" ka ti a. 

"Tu nge i biak?" A ti hû. 

"Nangmah" ka lo ti. 

"Ni lo, ka practice chhung khan lawm ka tih" a rawn ti nghut. 

"Tumah, groupah te ka lut kual mai mai" ka ti a. 

"Min ngai em?" A rawn ti leh daih. Bialpa te'n, "Min ngai em?" An tih hian a nuam riau! Mipa ho hian an hre lo mai mai alawm. Sawi zahah an nei zawk em mawni..

Lai ru si, nuam ti si hian, "Ngai.. " ka ti hmuk. 

"Sundayah lêng ang aw. " A ti leh daih. 

"Nia, kan tum dawn nia.." ka ti ringawt. 

"Sawi tur a vâng tawh ee" a tih chuan ka nui hak, ani pawh a rawn nui ve. Ani ang ṭawngtam lo tan chuan a vâng ve ang. 

"I duh duh sawi rawh" ka tih chuan, " a..sawi tura ka ngaihtuah lâwk ka sawi zo vek tawh..zawhna min zawt bawk si lo" a rawn ti dût dût a. Za zetin ka nui.

"A nih in practice chu a nuam em?" Ka ti a. 

"Nuam nang..ka kheimit ka tina deuh lehnghal a" a rawn ti a. 

"Intidam vat rawh, i chak loh phah ang e" ka ti vat. 

"A nasa lo.." a tih mêk laiin a pa âw hian, "Ve mai mai a..ka dawhtheihna hian a tlin tawh lo ṭêp a ni…" a ti bul bul mai. A ṭawng dan lah chu a ruih hmel bawk si.

"Te, ka pa a buai leh deuh a. Ka dah ang aw" inthlahrun hmel deuh hian a ti a. 

Hrethiam takin, "Aw..kei pawh ka mut a chhuak ṭan..muttui aw" ka ti a. Phone ka dah a, ka chhing vang vang. Zorina phur hi a rit ve ngawt mai. A û chauh pawh buaipui ngai a nih nasat tawh tehlul nen, a pa hetiang hi a ni lehzel bawk si. Heng vangte pawh hi a niang ka khawngaih bakah ka duh zual êm em ni. 

Thawh ka hai! Eng dang vang a ni lo, zing dar 2 bawr velah ka pum nuam lo lutuk vangin ka harh a. Ka va inthiar a, ka kua a tha lo ringawt mawle. Rei tawk ka ṭhu a, ka mu chiah a, ka tlan lehnghal. Vawi 4 lai ka tlan takah chuan ka chau lutuk a, ka mu hle hle mai. Ka muhil leh thei lawk si lo, zing lamah ka chhing ve leh hlek chauh a. Ka harh meuh chuan dar 8 a lo ri tawh. Zawi zetin ka tho chhuak a, ka chau hluah hluah. Ka va chhuah chuan, "I va mu rei ve" Nuteii'n a lo ti nghal a.

"Nia.." ka ti sep. Chokaa ka va luh chuan Viteii'n, mak ti fê hian, "awii, i tla dûk mai, ti nge a..i hmel kha" a lo ti vak. Mak deuh chu kua a ṭhat loha vawi hnih khat kan tlan pawh hian kan tla dâwk thei mawle..

"Nia, nizanah ka kua a ṭha lo va" ka ti sap a. Tuilum ka in nghal. Ka ril a ṭam naa chaw ei pawh ka châk lo. 

"Morning..U Sawmtê" Zorina msg avang chuan ka khi sak.

"Morning, u Zawtê" ka va ti ve. Ka kaw ṭhat loh vel erawh ka sawi duh bîk lo. Min ngaihtuah leh vak palh ang. 

Mama'n min lo call a, "Aw mam" ka ti tham ṭiak a. 

Aw thûk reih rawih, dam tak si hian, "Naute,. Ka pa a hniam tlat mai.." a rawn ti a..