Zor 12

ZÔR…(12)

Ziaktu : Toni Râlte

Ka nî nena kan inbiak vat a ngai tih ka hrethiam tawh a. Chutin ka nuteii hian min zarbuai sek thei bik dawn lo. Ar talh dan chi khat chauh a awm lo nasa. Mama te pawh an thleng tluang a, Mizoram House-a thleng lovin a ṭhianpa, a sumdawnpui inah an innghat a, a nuam daih zawkin ka ring. Ka pa erawh a dinhmun a la ngai reng. Thil tam tak ngaihtuah kual nuaihin ka muhil ve ta hrâm. 

Ka thawh hmain Nuteii ṭawng lâwng lâwng thawm ka hria a, a âng leh pek em mawni..ham bai bai chungin ka tho a. Ka thawh rual hian khum hi ka siam fel nghal vek zel. Mama min zilhna ka la hriat reng chu, "Hmeichhia chu a nulat lai aṭanga mutbu thianghlim a ngaihpawimawha a kil khawr thlenga a kher fai peih chuan, nu a nih hnuah pawh chhangchhiat chhuanlamin a che ṭawp ve mai mai ngai lo" tih hi a ni. Thleng sil tur laklawh vang em em pawh ni lo va, dah khawlte hi a hmu thei ngai lo. Ka chhuah phei chuan Nuteii fapa Opa leh a thianpa niawm tak an lo ṭhu a. Nuteii chuan min hmuh rual rualin, "Teber, lo kai thawh che ka tum mêk a. Enteh, tunah engmah pawisa kawl lai ka nei ve si lo va, hei Mama hi an inkhel dawn a, a ball boot a chhe tawh sia, a leina tur lo pe ve mai teh" a ti zawt zawt a. Zing kar kara chutiang lo sawi. Mahse, ka inthunun vat a. 

Opa chu enin, "Engzat man nge a?" Ka ti sap a. 

Nuteii zawk chuan lo ṭawng khalh lehin, "A ṭha law law tihsak ve la, 8300 man i ti ni lawm ni kha?" Tiin a fapa a melh a. Ka meng kâwk. Ball boot-a chutiang zah zah man han bun chu leh! Nia, thil ṭha na nâ na hi chu a man pawh a to tih ka hre tho a. Mahse, Opa chu in khelh thiam em em pawh a ni si lo, 1500 ban ve bun se a tawk reng. 

"Chutiang zah zah ka nei bik hleinem" ka ti nghat a. Nuteii a meng râng nghal. Ka pawisa duh bik lo. Tunah ka pa damlohna avangin Mama pawn pawisa ṭhahnem tak a la chhuak tawh a. An ni ball boot mai mai atana chutiang zat zat sên chu kan bat ni chiah pawhin ka hre lo. 

"Tihsak ve la a nih mai chu a. Engmah in tihsak ngai hleinem" a ti hlak hlak a. 

"Tihsaka tihsak loh tur pawn rawn kal ngai hek lo, min tlawh pawh lo êm a lawm" ka ti ve hmak. A ni lah tak bawk a, chhungkaw chaw eikhawm nikhuaah pawh rawn lan loh chang an ngah zawk, an chut unau êm mai. Ka ni fate ve lemin an duh duh an rawn la ngam a, an inah keini kan duh duhin kan tal bawk. 

"Bawiha, chu aia tlawm deuh a awm lo mi?" Ka nuteii chuan Opa bulah chuan a ti a. 

"5200 man a awm. Chu chu ni mai" Opa chuan a lo ti a. Chupawh to ka ti tho naa, han hnial leh êm ka hreh avangin pawisa chu ka va la chhuak a. Ka nuteii chuan, "Vawiin tlai chu Mateii nen chaw rawn ei r'u aw. Teber, vawksa rêp rawn lei haw la" a ti ham ham. Ka mil lo ṭan riau. Ka nuteii diktak a ni lo bawk nen. Falâk ka nih avangin min thuhnuai a tum riaua hriatna ka nei bawk nen, mahse, chutin min thuhnuai thei ngawt âwm lo êm mai. 

Ka chhang lo. Tuilum ka va in daih. Au Bawiha rawn chhuk laiin Opa te chu an chhuak ta a. Kei pawh ka insiam nghal a. Zing lamah hian Viteii ka pui ṭha hman si lo va, a buai thei tawp. Au Bawiha chuan, "Vawiin chu kan chawl dawn. Kan hmanraw ho a zo laklawh a. " Hrilh bik pawh nei loin a ti a. Parvula chaw a siamsak pah bawk. 

"Zanin kha Zorina te insual kha a hmunah va en ve kan tum a" ka lo ti a. 

"A ni maw? Kei pawh ka lo tum deuh asin. In kal dawn chuan ka lo awm mai ang" a ti a. Nuteii'n, "In te chu ka nghak thei alawm, va kal r'u" a lo ti vat. 

"Aih, ka awm a nuam vak lo deuh a, tv-a en hian a zia zawk" Ka u in a lo ti vat. 

Viteii melhin, "Vite, vawiinah i hman chuan ka pa te room saw lo tihfaisak ta che..mutbu pawh thlak a pawi lo. " Ka ti a. 

Viteii ṭawng hma hmain, "A ngai lo, mi nupa rooma va luh kha thil mawi a ni lo, tihfai a ngaih chuan ka tifai mai ang" a lo ti hlar a. 

"Aw le, lo tifai la..nizana ka va luh khan a hnawk riau" ka ti ve mai a. Kan chhungkaw ṭhanhnan tawh thil a ni a, pindan luahlum loh tur te hi kan tifai phawt a, an rawn luah dawnah kan tifai leh ṭhin. Mama room pawh nimina an chhuah hnuah Viteii'n a lo tifai vek tawh a ni.

Ka insiam zo a, ka kal tur chu ka u-in min zui chhuak a. Zawitê hian, "Ka ni chuan eng nge a hrilh che, nizan khan" a ti a. 

"Engmah, Nuteii a awm ve tlat a.." ka ti vat. A bu nghut a, eng nge a ngaihtuah ka hre lo. Ka u bulah hian falâk ka ni tih ka hriat tawh thu ka la sawi lo va, ka nu ka rinhlelhna pawh. Sawina hun a la awm chiah lo ve bawk nen. 

Desy nen kawng ngaiah kan tlan thla leh ta par par a. 

"Nizanah U Vani te an inhau nasa mai a, U Kima khan kut te a thlak a, ka pain a zu ṭhelh alawm. U kima hi a mak ê, an rawn awm tirha a fel tehreng nen, khawpui nun hi a zo chiah lo mawni" a ti sar sar a. Hman zana ka thil hmuh ka hrechhuak nghal. 

"A va zia lo ve, ti nge an inhauh ang le..an inngeih theih nen nen" ka ti a. 

"A hmaa an buaina lam bawk kha, ngaihzawng neih hi a la sim thei lo a nih ka ring. U Vani chuan, 'Bialnu i nei' a tia..mahse, tu nge a bialnu a sawi maithei lo nge ni..chutiang vel chu" a ti hmawk hmawk a. Vaivakawn kan thlen chuan, "Lawk aw, Vanlalruati thil chah ka va lamsak ang e, hawn lamah ka theihnghilh takin " a ti a. Kei pawh a remchang êm mai tiin mouth freshner ka lei a, zuk leh hmuam tih loh hi chuan kan mamawh ve tlat! A rei ta zêk a, a rawn phei chuan, "An zawng leh kual a" a ti nang nang. Scooty a start a, ka chuan hma si hian kan ep chiaha Zorina leh hmeichhe tleirâwltê mai damdawi dawr kawta dingte chu ka va hmu ta thut a! 

"Des, saw.." tiin ka mitmeiin ka hmuh a. A hawi ve vat.."Ka au dawn" a tih rual rualin, "A ngai lo" ka ti vat. Scooty-ah ka chuang a, "Kal ang" ka ti hmak bawk. 

A tlan ve mai a. Zorina ka call nghal. A ring ral ral a, "Hello" a rawn ti thum chhak. 

"Khaw nge i awm?" Ka ti a. Tun ang hunah ka biak ngai loh avangin mak a ti maithei a ni. 

"Vaivakawnah , damdawi kan zawng a" a rawn tih chuan ka lo rinhlelhna kha a bo nghal duak. 

"Tu nen" ka ti leh kher a. 

"Ka cousin nen, a lo zin a" a ti leh mai a. 

"Aw le" tiin ka dah leh daih. 

Desy chuan, "Thikthu pe chhe ve mai siah" a ti hlak a. Nui chungin, "Fiah ve zel hi a ṭha" ka lo ti. Rilru a nuam leh ta deuh e. 

Hmeichhia ka nihna a lang ti mai ang ,Desy ka rintawk vang pawh a niang a. Lawmsanga leh Bsi te chungchang vel chu Desy bulah ka sawi ve malh malh a,a chek tlat tlat hnuah, "Lawmsanga chu a va â zawk ve. Beiseii te chu kan vengah phei chuan tuman ngaihzawn enah an en tawh hleinem..amah pawh hian a inzêp vak tawh lo ni maiin ka hria" a ti ve bawrh bawrh a. Ka rilru a kal thui angreng. Bsi chu sawi tawh angin an khawsak a awlsam bik lo va. Zirna chawlhsan tawh mah se, a ṭhian kawmte an hausa angreng si a, a rualawhna chuan kawng dik lovah a hruai tihna a ni mai. Dik tak chuan kan thawhchhuah phu loh hian kan incheina a sang vek tawh a. Nula hmelṭha leh hriat hlawh ve deuhte tan phei chuan mi nawlpui aia man to leh class zawk an inbel a ngai ni tawh hian a lang a. Eizawnna mumal neih si loh chuan sum duh ve tho si chuan dik takin sum a lakluh theih loh a nih ber tawh hi a..ram rethei kan ni tlat si a lawm le. 

Zorina nen kan intext zeuh zeuh. Zanin a programme avangin a inbuatsaih a ngai ve bawk nen. Kei pawh ka helhhawlh ka ti dawn nge, ka rilruah thildang a lut thei vak lo. A tumpui tur Rohlua an tih chu a profile te ka check kual vel a. A sa a ṭhain a huai hmel kher mai. San zawngah chuan Zorina nen an inchen a. Mahse, a sek zawk. A hmel pawh a chhe lem lo. Classah pawh mipa ho chuan Ultimate bak sawi tur an hre vak lo. Hmannia Zorina'n min rawn hruai hawn khan an lo en chik vak lo nge ni, bakah lukhum hmathlawk kha a lo khum bawk nen, Zorina chu ka bialpa a ni tih hre loin an ṭan thu leh a thlensan an rin thu an sawi ve bawrh bawrh a. Ngaihthlak a nuam lo miah lo. Lawmsanga pawh a rawn kal tawh a. Nimin kha chu an ṭhenawm nu rei tak bawksawp tawh, a dinhmun a hniam thut avangin a lo kal lo a lo nia. Bsi chungchang reng reng a sawi tawh lo. A kalsan hlen theih tluk a awm lo e. 

Vawiin chu Desyin min lo nghak ve tlat! An bang hma zawk ve mial a. Buanga nen an nih aṭang hian a nun a hlim zual a, nui hmel pu reng ang hian a awm ka ti mai. Ka lawmpui êm êm e. Peng khawmuang loin kan tlan haw nghal a. In pawh kan thleng hma viau. 

Viteii'n rawng a lo bawl buai angreng a. Ka inthlak sawk sawk a, ka pui ve nghal zat. Nuteii chu a chhuak tih a sawi, Ka pate room a tihfai leh fai loh ka zawh chuan, "Aih, chhuat ka nawh laia a chhuak kha a lo la haw lo" a ti mai a. Ka sawi zui duh ta lo mai. Kan inbâwl zo va, Mama nen kan inbe zuai. Ka pa chu test an nei leh vek phawt a. Result erawh naktukah lam a ngai thung. Nuteii a lo haw a. "Tei, vawksa chu i lo lei em?" A rawn ti lut nghal a. 

"Lei nang" ka lo ti awlsam êt. 

"Ka chah reng che kha, Mateii ten chaw an lo ei dawn ka tih kha" lungawi lo zet hian a ti nghat nghat a. 

"A ho ê, arsa ṭhing a la awm tho kha.." ka ti leh hmiah. 

A phone a ri a, a la vat. A biak zawhah, "An lo kal leh hman lo hlauh a nih chu, naktukah lo lei ngei ngei tawh rawh. A ṭhiante a rawn sawm ve dawn bawk nen" a ti leh a. Lo lungawi loh sa nen, "Engvangin nge an rawn ei ringawt ang a? Ka pa te awm loh hlan lehnghalin, bakah chutia ṭhiante sawm tih vel, an ti ang lo êm mai a. Mi mah buai ve nak a laiin. Ka pate lo hawn hunah lo ei zawk rawh se.." ka ti ve ta sak sak a. Ka hne ṭan riau tawh. 

"I pa te awm lo chu lal i va hrawt ve le..ve khanglang a" a ti hmak a. Ka chhang tawh lo. A thu thu leh a duh dan dana kan awmna chhan tur ka hre tlat lo. Ka u hi chu a palzam ngam a, kei erawh a duh anga a bâwlzân theih ka ni dawn lo bur. Ka pate awm loh remchanga hmanga chhungkaw chaw eikhawm pawha rawn dîkdâk ngai hlei lo, an awm loh veleh ṭhiante nena rawn ei tum..ka ngaihdan a ni hlawl lo. 

Ka u a lo haw a, a inbual zawhah zanriah kan ei nghal. Zorina te kha dar 7-a ṭanga programme ṭan tur a nia. Kan intifel sawk sawk. Viteii pawh a kal ve dawn a. Kei pawh ka inthlak sawk sawk. Ticket chu a hmunah a lak theih avangin kan ring ta mai. Desy'n min lo call a, "Ruati ka phur ang a, Viteii phur mai rawh aw" a rawn ti a. 

Kan chhuah hmain Nuteii chuan, "Zorina te insual dawn vanga a zana zana han chhuah chu, i nuin hria se a lawm miah lo vang" a ti a. A hmaa kan sawi pawn engmah a sawi tawp si lo. 

."A ho em mai" ka ti a. Kan chhuak nghal. Viteii ka phur a, kan inzui ta a. Hawla indoor stadium hi ka kal vawi hnihna chiah a ni. Scooty dahna mai tur a vâng sia, Hall pelh fê-ah kan hung ve thei hram. An tam hle tawh a nih hmel e. Zorina nen zanriah ei hmaa kan inbiak bak kan inbe tawh lo.

Rpa'n min lo call a, ka la vat. "Kan ṭhutna bulah kan lo laksak tawh che u. " A rawn ti a. 

"Pali asin kan nih" ka tih chuan, "Tihdan a awm mai ang, lo lut phawt r'u" a rawn ti a. Kawngka bula min lo nghak tura ka tih hnuah a dah ta a. Kan phei ve ta ṭhâm ṭhâm mai. Hmeichhia pawh tam tak an ni. Kawngka bulah kan innêk nulh nulh mai a, thaw a ipik lek lek. Rpa chuan min lo au a, Ticket khawntu nen an inbe zui nghal. A bu nghut a, min rawn hui luap luapin keini pawh chu kan lut ve ta a. Inbo hlauin kan inkai ṭhâm hlawm mai. Rpa te ṭhutna chu a lo langsar angreng a, a zia viau e. Kan han ṭhu fel a, Zorina te kha 2nd -a inkhel tur an nia. 

Rpa'n, "saw..inpa chu" tiin a kawk vâ a. Zorina leh tu emaw inbe mêk chu ka va en vat. A chak lo ang tih ka hlau ngawih ngawih. Desy te chuan an lo au vel a, ka lo lai zawk e a. A rawn hawi phei a, a khi suk mai. Hlauthawng takin kei lahin ka lo melh kar si..A hmunah chuan boruak a lo sosâng duh ngei mai. A hmasa bera insual te chu Champhai leh Khawruhlian pa an nia. An inhneh dun thial thial ngei mai. Mahse, a tawpa tawpah Khawruhlian pa a chak ta a. Thawm pawh a ṭha viau e. Ka mawng a za ka ti mai, ka zun lah chu a'n chhuak êm êm khawp a. Desy nen kan va zung leh rih..zun in aṭanga kan chhuah chuan, "Des, ṭawngṭai ve rawh,.awi a chak loh chuan kan en ve si, hrehawm a ti dawn lutuk" aw lâwi lek lek hian ka ti a. A nui vak vak, "I dâng vek alawm le, kha..hlauthawng suh. Hahdam deuh khan awm tum rawh. A chak ang, Zorina te chu a insual ṭhang alawm" a ti sasâwi naa, ka thate chu a khur der derin a nia ka hriat ni. Kan luh aṭanga reivak loah Zorina te chu an insual dawn ta. Lunglei lam thawm pawh a ṭha hulh hulh ngei mai. 

A bitum tur Rohlua chu Ramthar veng, Lunglei a ni a. A phur hmel zak zak hle mai. Zorina erawh a cool ngaiin a cool ruih reng a. A ṭhianten an au nasa viau, a rawn hawi phei a, min rawn melhim flying kiss a rawn pe zauh…ka va nuih a, ka hmelhmaiah ka ṭan zia a hriatthiam mai ka ring. An ṭan ta. Zanin match bika mipui tam zawkte en châk leh boruak nei lian ber a ni bawk a. Thawm a ṭhat rualin a chang chuan a reh leh duk a. 

An inveh rei lem lo, Zorina zawk chuan a va hnaih hmasa a, rei ngial insi chat chungin an in elh ka ti mai. Chiang lutuk tak mai hian Rohlua chuan Zorina chu a bekah a hnek ta dawp mai le. Zorina chu a pai nawk a, mahse, a tlu ta lo hlauh. Ka hmai hupin ka en lo phal bik si lo, au chu sawi loh ka thaw ngam ṭâwk a ni e. In ni ve tho ang, in bialpate insual intihsiakna en ve ula, in en reng ngam bîk lo vang. A ṭhianten an lo au phur reng a. Chutah ṭanhmun han siam vein Rohlua kawngah a vuan chat a, Rohlua chuan chet la thutin a keuh thlu ta thung a, a hnek mawlh mawlh naa, a fuh vak lo. Chulai tak chu ka en ṭha ngam lo. Desy hian ring zetin, "Zorin, Teberi tan aw.." a ti pek a! Ka nghawk sawk. Zorina chuan a hre pha kher lo vang. 

"Aw le, Zorinsanga, Tuikual sakeibaknei a ṭang dawn e..hei raw." A ṭhiante bakah Tuikual lam niin ka ring,chung ho chu an au rual dual dual a. Zorina chuan kherh lêtin Rohlua chu a keuh thlu ve ta, bawh zui nghal ruakin Rohlua bân dinglam chu a khupin a nawr bet a, a hnek ta siah siah mai. Rohlua a tlawm ta. A hnek fuh êm mai a, bakah indan a lo harsat tawh nen, a hmai pawh a thi nasa angreng. Mi an au dur dur laiin khur der der chungin, "Lalpa, ka lawm e" ka ti sap. A ṭul ka ti tlat a tin ni. Rohlua kha thahruiah Zorina'n a hneh ṭha mang lo tih ka pawm thlap, mahse, Mama tihdan takah skills a pawimawh a, Zorina tha thlah, rawn insangmar leh thut kha Rohlua khan a lo dang zo loah ka ngai. An break lawk a, haw daih tawh mah ila pawi tihna ka nei tawh lo. Mahse, Ruati te an la phur nasa mai si a. Viteii pawh a au nasa ve khawpin ka hria. 

Serchhip tlangval leh Chawnpui tlangval an in sual dawn lai chuan Zorina chu kan bulah a rawn phei ve ta hlawl mai. Ka lo beisei miah lo kha a nia. Rpa'n a ranga rangin a seat a lo kian nghal. Zorina te insual chhung khan an ṭhutnaah an ṭhu hman lo hrim hrim. Ani Zorina pawh chu a khem ve phung a, a mitko veilam a kak bakah a biang pawh a duk dawnin ka hria. Vur in a dep a, "Awm ve lo la chu ka tha ka thlah ang" ka beng bula a rawn tih chuan ka nui sak. Chhungril hi a nuam veng veng a ni ber e. A ṭhiante lah chuan ring zet zetin , "A changtunu a rawn lan meuh chuan, tu emaw pawh chak loh a hreh khawp mai" an ti lûng lûng a. A nui a nui ve ringawt. 

Kan chhak aṭangin hmeichhe aw tliang ral mai hian, "Zorin..I love u" a rawn ti pek a! Kan hawi chho suau..Hmeichhe tleirawl chhe lo zet zet ṭhutkhawmna aṭanga lo ri niin ka hria, kan han hawi chuan an zak leh lai chu an lo khi ṭha hlawm a. Johna phawk ta vel chuan, "A muhil leh thei dawn lo a nih hi" a han ti vel..ka bialpa chu tleirawl hoin an en bîk dawn tih ka hai lo. Mi lar a ni miah lo naa, tun an intihsiak chhung na nâ na hi chuan ka mit tikham thei thil ka la hmu fo ang tih ka ring. Mahse, ka ringtawk. 

"Chhuak daih ang" ka beng bulah a rawn ti leh a. Ka melh nghek ringawt. A mitmeng chu ka sawi thiam lo,. Zauthau riau ang hian a awm. "Khawiah" ka ti hak a. 

"Ka hre lo, scooty i keng tiraw? A la rei dawn alawm..kan let leh hman ang" a ti mai a. Mipui boruak so hulh hulh chu ka zo lo lek lek bawk nen, Desy ka hrilh a. "Va chhuak r'u, ka rawn call mai ang che" a ti awlsam êt a. Buanga nen an ṭhu dun bawk nen, nuam a ti viau. Viteii lah ka rin phak bakin insual chu hmuhnawm a lo ti bawk a. Ruati chu a ngaihtuahawm loh..A hawi leh valh valh tawh a, bialpa tur a hmu leh ringawt maithei a ni. Ka ṭhiannu nau mahnise, lerh ka ti ve thlawt. 

Kun titih hian kan inkai chhuak ta a. Tuman min notice loh ka beisei. An insual ṭan tawh bawk a, lut leh chhuak an awm ve nuk bawk nen, min ngaihsak bik lo vang. Pawn boruak ka han hîp chu ka harh sawng sawngin ka hria. Ka thaw hawk hawk bawk. Min kai zel a, ka scooty dahna lam kan pan nghal. Lukhum a khum bakah Summer jacket a lukhum awm a ha bawk nen, a hmel an hmu vak thei lo ang. Scooty chu a va nawr chhuak a. 

"Ka khalh ang" a ti nghut a. Chabi ka pe ve nghal. Khawi lam nge kan pan dawn ka hre lo, mahse, a bulah hian ka him tawkin ka hria. WBR lamah ka rin ang chiahin a tlan ta a. A la tlai chhe lo bawk a, veivak an la awm ve nak nak. Kan kal thui zel a, motor bakah mihring veivak an tlem tial tial. A tawpah phei chuan motor takngial pawh kan tawk tawh lo. Kawng sir zau laiah a ding a. 

"Hawh le" tiin min rawn kai chat. Ka zui ve nghal. Kawng te reuhtê, fai angreng tak si , thui vak lo kan zawh hnuah zawl zau vak lo a lo awm a. Kan ṭhu ta. Ka zâm leh ṭan. Tihian ngati nge ka awm ve ziah ni,. Thil dang a sawi hmain min kuah a, min rawn fâwp nghal. Kei pawn ka chhang let ve mai. A duhthawh telh telh a, ka âwm bawr te pawh a rawn ṭhâm ṭan. Ni dang a ang miah lo. Mahse, a pawi tur a la thleng chuang lo tiin ka hnar duh lo va. A duhtawk thut, ka beng bulah a rawn thaw lum ham ham a, ka nghawng leh biangte chu a rawn nul thuak thuak bawk. A za si, ka mur chem chem mawle..kei pawh ka dik lo ṭan tih ka hai ta lo. Mahse, ka rilru kil khat a la fîm a, tin, min nawrlui dawn lo tih ka chiang. 

A tawp tak mai lo vah chuan, "Duhtawk ila" ka ti hap a. Ka aw pawh a khur..a inla hrang vat a, ka kut erawh a rawn hum vung vung. 

"Ti nge?" Ka ti ringawt. Min rawn melh a, a mitmeng mutchhuah hmel zet leh pherh deuh niaih chu hrethiam zetin, "A la hun lo" ka ti leh a. A nui hak. Ka biangah a rawn piai zauh a, "I duhawm si" a ti sup. 

"I chak tawh dawn lo emaw ka tia sin" ka ti ta daih a. 

"I awm tlat a, ka chak lo ngam hleinem" a tih chuan ka nui var var..

"Champion rawh aw" tiin a kokiah ka lu ka va nghat a, ka bek rawn chul vat pahin, "Ka theihtawp ka chhuah ang.." a ti zawi raih a. 

"I luck si.." ka ti leh daih chu za zet hian a nui a. 

"Sawmsak..eng nge i ngaihtuah?" A ti nghut. 

"Tian i lar ang a, nakinah chuan kei aia hmelṭha ten an la zar che ang a, min kalsan mai ang" ka ti leh nghat nghat a. Ka titau deuh ringawt. 

"Lar turin ka insual hleinem. Pawisa chiah ka duh. I hriat kha" a ti a, ka la duhtâwk si lo. 

"I duhâm zel ang a, nakinah ram dangah te an la kaltir che ang a.." ka ti leh tân tân a. 

"Hmeichhe ho tak hi chu aw.." a ti ringawt. 

"Eng nge?" Ka ti hlar a. 

"Ka bansan dawn. Insual hi eizawn nana hman ka tum lo. " A ti nghet charh. 

"Chuan.." tiin ka thlek ha a. Thutak zeta min rawn melhin, "Mahnia eizawnna ka neih hunah nupui ka nei ang" a ti sup a. 

"Tu?" Ka ti hâ a. 

Nui sukin, "Mi te taktê" a ti a..kan nui dun hawk hawk. 

Desy'n min lo call a. "An la zo lo naa, hawn mai pawh a pawi lo" a rawn tih takah chuan hawn zai kan rêl ve ta a. Engkim chu nuam ka ti. Venthawn tur leh enghelh tur nei miah loin min siam thei a, he pa nena kan inṭhen a nih chuan, ka chhiatpui tawh maithei a ni. Lâna vangin tikhawp khan ka lo tlachhe tawh si a..Kan inṭhen loh hram ka beisei. 

Desy ten min lo nghak a. Khawmuang lovin kan veng lam panin kan haw ta nghal a. Ka hlim leh mood fuh lutuk chu Viteii'n min nuih reng mai. Au Bawiha pawh a lo la meng a, in chung tv a lo chiang lo va, in hnuaiah a lo en a lo nia. Kan luh rual rualin, "Zorina chu a va chak mawi ve" a lo ti nghal. 

"Nia, a zia tak tak" ka ti ve vat. Tuilum ka in a, ka inphihfai hnuah lungmuang zetin ka mu ve ta a. Mahse, hetia khum ka deh rual hian ka chhungril buai, mangan rukna leh thurûk inthupte ka hrechhuak leh zel a. Ka muhil thei lawk lo ṭhin. Ka ngaihtuah nasat poh leh ka buai bawk si. Mama khan dâwt min hrilh ang em aw. ,Zorina kha ka nu vang tak takin a lo duh lo ve ringawt tak tak ang em? Nge Thildang a la awm chêu zawk? Au Bawiha pawh hi biak ka la duh, kan awmdun khât si a. Khatiang thu serous sawi dawn chuan hman vêk vâwk leh fianrial takah nise ka duh a ni. 

A tuk chu chawlh a ni bawk a. Ka tho pawh ka zangkhai hle. Tukṭhuan kan ei laiin, nuteii chuan, "Vawiin tlai chu Mateii te chuan chaw chu an rawn ei dawn aw. Bawiha, nang pawh lo hawn hma deuh tum la" a ti a. 

Ka uin,"Eng tihpui nge awm dawn a?" A lo ti hû. 

" ww..engmah, i nauten chaw ei an châk a, i nute an awm lo bawk nen, lo ei r'u ka ti a nih kha..bakah hei kan awm hrang rei ve tawh sia, a ngaihte pawh ka ngai ve deuh tawh e" a ti mawlh mawlh a. Ka hnial buai peih lo. Vawksa bakah chawhmeh dang chu a sawi leh a, "Kei chu chetna tur ka nei a, ka hman lo. I hman tho va, va bazar lawk mai rawh" ka ti a. A ngawi ta hmak. Lungawi lo daih mah se, pawi ka ti lo. Inla thu ve em em ringawt mai. Chaw eina vel kan tihfel zawhah, "Nute, Ka pate room chu keiman ka'n tifai ang e, chabi min lo pe la" ka ti a. Ka nuin ka kutah a dah lo hi ka vui chuang lo naa, min rin lohzia a chiang viauin ka hria. 

"Ka tifai mai ang. Tihfai ngai a awm hrim hrim em mawni le.." tiin a sawi nawi a. Chutitaka ka pate pindana luh a phal lo chuan ka ngaih a tiṭha lo deuh, luh ka châk zual sauh. 

"Awm e..niminah i lo tifel bawk si lo va. Bakah ka file pakhat a awm a. Ka la duh" ka ti ta a. Min hnial ṭung kha a hreh ve nge ni, hreh zetin min pe ta a. Chawhmeh leina tur pawisa ka pe a, "An duh tur awm kha va lei mai rawh. Viteii a buai takin Mateii te pawh chu rawn phei hma ve se" ka ti sawk sawk a. A ṭawng hmain ka kalsawn daih. 

Ka pate pindana ka luh chuan hnawk leh then ngai ka tifel nghal zung zung a. Mutbu ka thlak bawk, Hmunte ka phiah leh hnuah ka pa dawhkan chu ka chingfel leh a. A hnawk hran lo. Bible hlui tawh lam, a ziak pawh hraw deuh ang kha ka lak kan chuan ka lo keng nghet lo deuh nge a lo rit ve nulh nen, ka thlauh ta a. A kawm a tla nghal a, chutihrualin chhuatah chuan hmuh ka nei ta a. Ṭhi locket a ni. A chain erawh a awm tawh lo. A phek thlep a. Love sign-a desgin a ni. Ka la a, a rit nalh mai. Bible karah khan a awm tihna a ni ngei ang. Chu thil chu ka melh vang vang a, chiang zawka ka'n bih hnaih chuan a lo hawn theih reuh a. Ka kheuh hawng ta vat. Thlalak pahnih hlui hmel tawh zet hi a lo awm bal a. Mipa chu ka pa a ni tih ka hai miah lo. A la ṭhalai hle a, kum 30-35 bawr vel a nih lai a ni ngei ang. Hmeichhia erawh ka la hmu ngai lo. A sam chu a lai takah bari a ṭhen phak a, hmai hlai lam, ngo deuh mai a ni. Nu hmelchhe lo tak a ni chiang e. Ka melh reng ringawt. Ti nge Bible karah hian a lo awm ngawt le? Ka pa ka hrechhuak nghal..

THANGPUII kha a ni thei mai ang em? Ni ta se, ka pa ngaihzawng hlui tihna em ni ang? Nuteii ṭawng thawm ka hriat rualin ka dah fel sawk sawk a, Locket chu ka ak hmak bawk. A rawn dak a, "I va che muang ve,.." a la rawn ti zui! 

"Nia" ka ti ringawt. 

Ka zawh felah ka pindanah ka lut a, ka tei ka tei. Ka chhuak leh vut a. "Vite, Desy te inah ka va kal aw, a movie ka va la ve lawk" tih leh chhuah ka rual a. Nuteii a awm avangin dawt ka sawi. Ka nî te in lam chu chak fein ka pan hlawk hlawk a. Ka be lâwk lo naa, tun ang hunah chuan inah a awm ka ring. Nizana hrilh tur min neih kha hrereng chung leh zawh duh ka neih vanga pan chûk chûk ka ni. 

Kawngka a lo inhawnsa vangin ka lut nghal thâwr a. Ka nî chuan vaimim tenkhang tur a lo deng mêk. Min hmuh chuan mak ti hmel a pu deuh, a bulah ka va ṭhu nghal sawt sawt a. 

"Sawi tawh rawh, nizana min hrilh tur kha" ka ti thâwr bawk. 

"Teh chûk a che. A pawimawh leh tawh lo" a lo ti daih! Ka va ngei tak. Mahse, "Ka awih lo, a pawimawh aniang, min rawn koh chûk chuk kha, phone ah pawh a sawi theih reng laiin" ka ti ve tlat. 

Chutah kawngka chu khar turin min mitmei zauh a. 

Ka va khar hnu chuan, "Mama'n min lo bia a, Falâk i nih thu i hre tawh tih a rawn sawi a. Hrehawm i tih a hlauh vang leh i nu vel i ngaihven vak a hlau a, chuvangin engkim hrilh chiang tur chein min rawn ti a ni" a ti ta a. Ka rin loh lam a ni naa, ka beisei rûk kha a ni tel tho ti tawh mai ang. 

"Nia, ka hre tawh alawm. Ngati nge ka nu chu ka ngaihven a hlauh a?" Ka ti sap a. 

A chil a lem khalh. Sawi hreh hmel zet hian, "Englo a nia..mi â a nia" a ti ta a. Ka ṭhu ngil zawt mai. Ka nî chu ka melh kâwk a, "Maw?! A â maw?" Ka ti nghek a. 

"Ṭawng ring vak lo teh. Aw.. mi pangngai a pha tawh lo" a ti sur sur a. 

"Sawi chiang teh" thawk harsa ti zetin ka lo ti hrâwk. Ka dang a ro nghal huam huam mai. 

Ka kut a rawn chelh a, "Teber, i pa leh i u te hian nasa theihtawpin an hmangaih che a ni. Chu chu hria la a tawk" ngenngâwl zet hian a ti a. Ka lu ka thing nar nar..

"Aih, sawi rawh. Ka hre duh. Khaw nge ka nu chu a awm? Tu nge a nih?" Ka ti sek sek. Ka nî chu chhuahsan mai ka tum awkawng lo. 

Ka awmdanah bengdaih chi ka ni lo tih a hria nge..

"Aw le..ngun takin lo ngaithla rawh aw. Mama leh Bawiha te hi i nu fa an ni lo tih i hre tawh ang chu tiraw?" A tih lai chuan phâwk êm êm hian ka lo melh a, ka ding hluai bawk. 

"Maw..engtin a?! Mama te hi ka nu fa an ni lo maw? " Ka ti ta chiam chiam a! Min khap a tum , mahse, vawiina min ṭhawngtu thilte hi an namai lo lutuk a, awmngaihna ka hre tlat lo. Mama leh au Bawiha te hi chu ka nu leh pate fa emaw ka lo ti asin. Kei chauh ka hrang emaw ka lo tia! Heng vang hi a ni maw? Ka nu khan hman zan khan Au Bawiha a hlauhawm thu a sawi kha. Lalpa leh! Thil hi a va mak ngai ve le!

Ka nî chuan min rawn nem ṭhu a, "Chiâi suh, i hre daih tawh tura ka ngaih vang a nia..ka tihpalh. Mahse, i la hre dawn tho a, a pawi lo ve. A bul aṭangin ka'n sawi ang e.." a ti ta a. Kei pawn thuawih takin ka nî chu ka ngaichâng ta ran a. 

"I hriat angin keini chu Haulawng khua kan ni a. A pawhmawh lai tê zel ka'n sawi ang e. Tuna i nu (Mathani) leh i pate hi Mathani tleirawl tirhtê hian an inru ve zuai a, mahse, Mathani a la naupan êm avangin a chhungten inneih an remti ta lo va. Lunglei atangin an khua Khawhâiah an hruai chho ta daih a ni. Chuan, kum 3 hnuah i pa chuan nupui a nei ta a. A nupui a felin keipawn û ang tak takin ka en ṭhin. Mama an han nei a, an hlimzia tak kha aw. Mahse, Bawiha a han pai leh kha a hrisel lo ta riau a, Damdawi inah pawh a lut zak zak a ni. A nau pawh an zai chhuak ta rêng a. Mama lah kum 3 a la pum lo deuh a, hnutê a la nghei si lo. Bawiha chu keiman ka khawih tam zawk mah âwm e. Mama khan tumah a nu bak duh nei hek lo. A tawi zawngin vanduaina rapthlak tak kan tawng chho ta a. Bawiha ,kum 1 leh thla 5 lek a la nih laiin a nu chu khawsikpui vangin a boral ta a. A natna kha a tam êm a, Khawsikpui ringawt pawh kha a ni lo. Mama erawh a lo fel ve deuh tawh a, i pa nen an inkuah chawt a, i pa hi ka ngaisangin ka chhuang asin. An nu thihna kha tuarin â dawn khawp ten a han awm hial a! A fate avangin hmalam a pan leh a, nupui sûn mah nise, a fate a ngaihthah eih lo. I U Bawiha erawh ka chang ta a, ka enkawl seilen a nih avangin ka hmangaih bîk lo thei lo. Mama pawn a thîk ngai loh hi..Chutia khawhar leh lunglêng reng renga i pa a awm lai chuan, Mathani hi a rawn lang leh ta hlawl mai a! Ani pawh a lo vanduai hle mai a! Pasal a neih hnu lawkah a chhul cancerin a ṭaidarh hmain a chhul chu an lo paihsak ta a lo nia! Fa a neih theih tak si lohah chuan makchhiat tawkin Lungleiah a pute bula a tihtheih ang ang ti turin a rawn awm leh ta ngawt mai a lo nia! Pathian remruat te pawh a niang e. I pa nen an han intawng leh ta chu hmana an lo induhna te kha a lo la bo vek lo a ni teh chêk ang, i pa lah a lunglen khawhar lai a ni bawk nen, an inrim chho ṭan a. Keini i patea te nen lah i pa chu a la upa lo bawk a , a fate avang pawn nupui nei leh se kan duh êm êm bawk nen. A hriat leh tak lohin I nu lah fa nei thei tawh lo a lo nihnaah i û te chu a hmangaihpui thei turah kan ngai a. Tichuan, kan nawrna angin an innei ta a. An bulah ka la awm zui ve zel. Mathani pawh hi nu fel tak a ni a, i û te a enkawl danah sawiselna tur ka hre lo. Fanu an awt ve si, i pa pawh a ni tho a. Tichuan, i nu diktak hian tihtlak che a tum a, chu chu remchangah hmangin i pate chuan an la ta che a ni. 

Aizawlah kan pem a. Kei pawn pasal te neiin tihian kan lo puitling chho ve ta a. I nu diktak chungchang kha chu..ni e, kum 3 liam taah khan i pa hian min rawn hmu a, Chu chu nangma nu dik tak nia insawi hian a rawn be ṭhin niawm tak a ni. I nu hming chu Ramluahpuii a ni a. Luahpui tiin an ko ṭhin. Tuna ka sawi tur hi Teber, i û Mama thurûk a ni a. Hmaichhanah a hrilh theih ngang loh che avangin keimah hi hrilh tur chein min ti a ni. 

I pa chu i nu chuan rawn vauin nangmah hi rawn chhuhsak che a tum thu a lo hrilh ṭhin a. An lak lai che khan an lo ngaihtuah thui lo bawk nen, lehkha fel taka siam a ni lo va. I nu inenkawlna senso an tumsak bakah pawisa an pe vek a, kha kha a duhtawk mai an ring a ni. Mahse, i nu chuan i pa bakah i û te eizawnna avangin in lo neinung ta tih a lo hre bawk nen, pawisa a rawn phût fô a, i pa chuan i nu leh i û te hriat lohin a lo pe zauh zauh tawh a lo nia. Mahse, Mama hi mi fing tih takah i pa awmdan leh chetzia avang chuan a lo ringhlel nge, i pa buai rûkna chu a rawn hrechhuak ta a. Nang hi an farnu neihchhun i ni bawk a, an hmangaih takzet si che a. I nu Luahpuii lah sawi tawp mai ila, nun ho ve tak, zu pawh in thei mai, pasal angreng nei lawr zut, khawlaia tei kual ve zut ang kha a lo ni si. A kuta dah leh che chu an tan tih chi a ni lo hulhual. Tin, nangin falâk i ni tih i hriat an hlau takzet bawk. Tichuan, a tawi zawngin Mama chuan i nu chu inhmuh puiah sawmin, sum ṭhahnem tham tak pein tibuai tawh lo turin a ngen a. Luahpuii pawh chuan pawisa a dawn takah chuan tibuai tawh lo turin a intiam a. Mahse, hun a lo kal leh deuh a. A pawisa a hmang zo ta nge, a rawn lawr leh ṭan ta a. I nu Mathani pawn a hre ve lo thei ta lo. Bawiha erawh a chut mi a ni bawk a, a hre lo a nih ka ring. Vawikhat phei chu in inah sawn a rawn kal ta hial a! Class i kal hlan a ni hlauh a, khata ṭang khan a zual telh telh a, a zâm lo bawk si. "Ka fanu, thih leh thau pawlha ka hrin a ni a, min enkawltu ka mamawh..ka rawn lalêt dawn,.courtah pawh kal ila, thiam ka chang ang" tiin a vau reng a. I pa te lahin an fa ngei i ni tih an finfiah thei lo va, Luahpuii hnen aṭangin dan ang takin an la che tih fiahna an nei bawk si lo. An buai em êm a ni. I hrechhuak ang tih an hlau bawk si. An khawngaihthlak asin. 

 

Mama dawhthei ta lo chu a mihring rilru a chhuak ta nge,i nu chu a chhui ru ta a. Kan hlauh ang ngeiin nang chu an kut aṭanga lak chhuah chea phai lama nawhchizuar tura hralh che a lo tum reng tih a va hrechhuak ta a. Rapthlak kan ti viau. Engtikawng zawng maha a kuta dah che an tum ta lo bur mai a ni. Mahse, i nu a huangtau ta zel si a, Zan khat chu Mama hian inhmuhpuiah a sawm a. I chungchang felfai taka sawipui turin. Mahse, thil pawi tak a thleng ta a. I u Mama duhdan chu Luahpuii'n a lo hnial fithla ṭhak a, tihmualpho leh engkim hailan vekah a lo vau zawk mah a. Mama thin thawk khan a beng ta a. A tlukna lamah lungah zuk insawhin kawng thlangah thui vak lo a lum ta bawk a. Mama hlauthawng ve bawk si chuan zuk bawihsawm ta lo chuan a rawn hawnsan ta ngawt mai a ni. A hnuah chanchin a ngaihven leh tho a, Luahpuii chu engtin tin emaw kawngah rawn inham chhuakin taxi driverin a lo hmu niawm a ni. Damdawi inah a hruai ta nghal a. Luahpuii chuan a lu a lo sawh na deuh a, mi â ka'n ti ngawt tak naa, a hriatna a hloh ti mai ang. A changin a hrechhuak a, a changin a hming takngial pawh a hrechhuak zo lo. Zawi zawia harh chhuak tur niin an sawi. Chutia a hriatna te a han hloh zeuh zeuh aṭang chuan nangmah lam a ngaihven ta miah lo va, i pate chuan Mama kutthlakna vang a ni tih an hre lo, a reh ta hmak chu an lo lawm ve êm êm tawp. 

Tihian tun hun in thleng ta a. Mahse, Mama thil tihsual kha thup hlen theih a ni ta lo nge.. tunah hian vauna a tawk leh ta zeuh zeuh a. Tu hnen aṭangin nge a sawi duh miah lo lehnghal. Mahse, falâk i ni tih i inhria tih a hriat khan a thaw ta huai a. "Teberi chuan a nu laka ka thiltih avang khan min haw dawn mah se, engkim hi hre law law se, hetianga min blackmail tum rengtu te pawh hi an reh mahna. Ka ning thawkhat tawh e. Engkim i lo hrilh dawn nia. A nu laka ka thiltih avang khan pawi ka ti.." tiin min chah ta a ni…Teber, i û hi dem reng reng suh. Khawvela û zawng zawngte aia hmangaihna nasa zawk hi a pe che a ni. Khawngaih zawk rawh" tiin.

Ka ngawi a, ka ngawi zel. Sawi tur ka hre lo. Sawi loh tur lah ka hre chuang hek lo. Thil nih dan leh awmdan ka han hre zet chu ka inthunun hle chungin ka â muih mai…

Ka thaw hawk a. 

"Sawi tur pawh ka hre lo, nî.." ka ti sap. 

"Ka hrethiam che alawm, a ṭhawng dawn che tih chu..mahse, engtik nîah emaw i la hrechhuak dawn tho tho a..engpawhnise, thil chu a nih dan anga pawm thiam mai hi a ṭha ngai" a ti dap dap a. A dik ka ti a, mahse, ka la chiâi rih êm mai. 

Ka locket ah kha ka hrechhuak thut.."Nî, hei hi em ni? Mama te nu chu" tiin ka entir a. Phâwk taka enin, "Awii, a nih hi..Thangpuii ngei chu a nih hi" a ti hluai a. Ni e, Thangpuii a nih kha ka ring rêng a ni. 

Sawi tur dang ka la neih avangin ka inhumruh a. 

"Nî, thil pakhat a la awm a.. ih, ka nu chungchang a nia..Ka nu hian tu emaw…" ka tih lai mêkin, "Zauvi, Bedsheet min dawr ve rawh" tih pahin kan veng nu azawnga nu kamtam leh cctv kan lo tih ruk hial ṭhin Nu Masaii a rawn lut hlawl mai a..Kei pawh ka ngawi chiang khawp mai..

"Nî, ka va hawng phawt ang.." tiin ka ding hluai a. 

Nu Masaii chuan, "Teber, i bialpa ka hria a nia aw…Insual thiam kha.." a lo ti a, a nui hawr hawr bawk..