zor 11

ZÔR..(11)

Ziaktu : Toni Râlte

"Aw, i thleng tawh mi?" Ka ti nghal a. 

"Thleng lo deuh, Johna bialnute inah ka peng kawi a" a rawn ti. 

"Haw teh..ka nuteii kha i hria tiraw? Chhuani kha..a pasal Pa Hmaa khan a rawn vau a, Mama nen an rawn chhuak" ka ti bah nuaih a. 

"Aw le, ka'n haw nge. Chanchin ka rawn hrilh leh ang che" a ti a. Kan dah nghal. Tui in tur ka lak laiin Viteii a rawn tho a, "I la muhil na nge?" Ka tih chuan,."Umm, in thinrim hlawm sia, mahse, ka rawn chhuak hreh a" a ti mai a. Kan thusawi zawng zawng a lo hre ve vek tihna a nih âwm chu! Pawi chu ka ti hran lo. Thil pawi tur chin entirnan: falâk ka nih thu vel kan sawi lo hlauh a. 

"A zia lo hle mai"ka ti ringawt a. 

A nui sak, "A ho lutuk, U Zorina kha ka lo khawngaih lutuk zawk a . A zak dawn hian ka hre lutuk a maw.." a ti hluai a. 

"Nia, zak ve ngawt ang" ka ti ringawt. 

"Piteii lah kha a rawn ṭap thut sia, ka hlauh hmanzia chu" a ti leh a. Ka nuteii hi pite tiin a ko ve mai zel. Mikhual room hi a tirah tuna Viteii pindan nen hian a ni vek a, mahse, Viteii a rawn awm takah khan a laiah kan pingdang a, Nuteii hian a rawn luah ve ta a nih hi. 

"Ka mutsan dawn che..i muhil thei ang tiraw?" Viteii chuan a ti leh a. 

"Umm thei e..min ngaihtuah suh" ka ti vat. A pindanah a lut nghal a, kei pawh ka pindanah lutin ka sam ka khuih a. Mut dawna sam khuih hi ka tihṭhan a ni. Ka mut a chhuak lo nasa, Desy ka be dawn mawni ka tih laiin ka rin aiin a lo tlai tawh a. A mut tawh ka ring si. Ka mu zangthal a, ka khap fek fek, ka thaw leh hak ṭhin. Zorina lah chuan min rawn be har hrep bawk nen..rilru a phir duh teh e. Nuteii te pawh chu engtin lêk nge an va khawsak ang aw..thihna hmanga invau hi kei a tlawmthlak hi ka ti khawp a! Hmânah ka tleirawl chhuah tirhin kan ṭhenawma rawn awm ve ṭhin, an nau pakhat hian min atchilh pek a. Ka duh bawk si lo, "Ka inawkhlum dawn" tiin a hrui suihte kha a thla a la a, mi rawn thawn vei thul. Ka chhang duh der si lo. A tukah rilru hah ru ve deuh thoa ka thawh chuan a lo a dam sen lul tih ka va hmu a, ta ṭang khan thihna hmanga invau tih vel hi ka nuih te lam a za tawh. Thih duh tak tak te hi chu an thi tawp mai zel..tu emaw vanga kan khawvel nuam ta lo vek leh chhe vek tur anga kan inngaih ṭhinna hi kan âtna leh kan mutân ber a ni. An tel loin kan piang a, an tel lovin kan thanglian tawh, an tel lo bawkin mutmu kan tuah zantin a. Inlaichinna kan han nei a, inṭhen avanga kehchhia leh darh vek turin kan han inngai ta ṭhin a. Mahni inngaihhlut te mahni inhmangaih hunte hi a awm tur a ni ka ti tlat..chapona te pawh hi a ṭha zawnga hman chuan a ṭangkai viau a nia. ..ka tui leh lutuk dawn..duhtawk ang 🤭

Ka phone a ri ta. Amah a ni. 

"Pu Hmaa chu a rui a chatthla ringawt an ti.." a rawn ti nghal tâwng a. Ka nuih za thut chu ka nui hawk, ani pawh a rawn nui ve ta bawk a. 

"A chatthla chiah tihna nge?" Nuihza insûm zetin ka ti a. Ani pawh nui chhuak mai thei dinhmuna ding chung hian, "Ka thlen phei hma daih tawh khan a lo chatthla tawh.." a rawn ti. 

Thutak deuh zawkin, "Nuteii te chu i hmu em?" Ka ti a. 

"Aw..ka hawnsan tawh" a ti a. Thu dang daih kan sawi , "Zorin, i hriat angin ka chhungten tikhawp hian min dodal a, nangin min phatsan leh vaih chuan min nuihzat ngawt ang" ka tih chuan, "Ngaihtuah suh..chutiang. Hmalam hun chu kan hre lo a.." a ti ban chhalh a. 

Ka ngaih a ṭha lo thut, "Mama khan, "Zorina hian hmanruaah a hmang che" min ti asin. Sawi tur i nei em? Chutah chuan" ka ti hluai a. 

A reh dat hnuah, "Hmanrua ka mamawhin i hria em ni!" A rawn ti khauh. 

"Chutak chu lawm ka hriatthiam loh..engvangin nge hmanruaah chuan min hman ang? Ti nge Mama leh ka nute hian an do êm êm che, a hmain in lo inhre tawh em ni?" Ka ti ta mawlh mawlh a. Ka khatliam a ni tawp mai. 

"Hre lo. Hre ngai hauh lo. Kei pawn heti taka min duh lo hi mak ka ti ve tho" a ti a. Ka ṭawng leh hmain a pa âw hian, "Mama, biak che ka va duh ve" a rawn ti a. A aw pawh a felfaiin ruih nei âwm ang pawn a awm lo. 

"Te, ka pa nen kan inbiak lawk a ngai..ka û chungchangah a niang..a tlai tawh sia, inmangtha mai ila" a rawn ti a. La ui ru tak chungin ka mangṭha ta a. 

Ka va zun leh lai takin ka nuteii te pawh an rawn thleng. A rawn âng lut bawrh bawrh a. Ka va chhuak duh tingtang tawh lo. A thusawi pawh ka hre mumal chuang lo. A va awm nghal daih ka ring a nia, a rawn let leh tho si a. Mama erawh in chungah a chho nghal a nih ka ring. Kei pawh reivaklo hnuah ka muhil ve ta a. 

Zingkarah ka workout ve leh ṭan. Hah hnêpa han beih hi chuan zan mut te hi a tui bik. Ka tho hma bawk a, ka harh vâk mai. Ka inbual zawhah tukṭhuan ka bar sawk sawk a. Mama lo chhuk thla mek chu ka han hmu nghal. A nalh leh thlup tawh. Hmel dam dup hian, "Ka pa chu Civil Hospitalah an refer a, vawiinah kan phur phei ang. Phai lam pawh pan a ngai maithei a ni" a ti a. 

"Mam, kei chu mak ka ti. A hmain insawiselna vel engmah a neih awm ka hre si lo va" ka rilrua awm zawng zawng sawichhuak chiah loin ka ti a. 

"A han inentir hnu lawk kha chuan "Ka damdawi ei ka ngeih lo nge ni. Ka ke leh bân te hi a mu churh churh zel a" te kha chu a ti ṭhin. Kha vang khan a nia exer han lakte a uar thar ni. A nerve lam hi a ni ang em aw ka tia, vawiinah Civil lam doctor ten test han nei leh se a hriat mai ang" a ti ve mai a. 

Nuteii pawh a rawn tho ve chhar chhar. "Vite, thingpui" a ti nghal a. Viteii chuan Mama eitur Artui a kang dawn mêk,. "Lawk aw" a ti sap a. 

"Va inthlit ve mai la, a harsa lo e, a buai a nih kha" ka ti a. 

Ner sak chungin a va inthlit ve mai bawk a. A han in chuan, "Viteii chu i lum zin tawh nen thingpui i lum tui ṭhin lo. Thingpuife i ren leh mah mah zel a" a ti leh kher a. 

Nui chungin, "Vite, Nuteii hian a lum thiam tawp, lumtir ziah tawh rawh" ka ti ve leh hmak. Awmpui an nih vanga an hman lo chung tirh luih tlatte, sawisel sek te hi ka pa min zirtirina a ni lo. Siamthat an ngaihna laiah chuan ṭha takin hrilh tur. Nuteii hi a rawn awm aṭangin Viteii a tirh peihzia leh a awm âwlzia ka hria. Nu a ni tawh a, phût êm êm chi chu a ni hauh lo. A mutna êm pawh siam duh loa kalsan thei kha a nia. Chhunah nise a mut loh leh a lengkual a. In hrang chang ta se a mawngah ek a chhuak lo vang. Pa Hmaa'n a lo ngeih lo viau te, a faten an zui duh lo tlatte pawh hian chhan ṭha tak zawng a nei ve maithei a ni. Kei pawh tunlai chu ka rilru a chhia ka ti mai, buaina neuh neuh neih fô hi chuan rilru te hi a kawi hma duh zêk a nia. 

Chutia ka han ṭawng takah chuan Nuteii pawh chuan eng a sawi lo. Mama zawk chuan, "Nizan khan Zorina kha Pa Hmaa te in bul velah khan ka hmu a, kal turin i ti ni maw?" Tiin min rawn en a. Dâwt sawi buangbar ka peih loh avangin , "Aw..a nih kha" ka ti ve mai a. 

"Awiii, chhungkaw chungchang i bialpa bulah i lo sawi a maw? Eng hmuhin nge min hmuh ang a? I va chhaw tak" Nuteii chuan a ti hlawih hlawih a. A meng rum hle bawk.

"Ka hlauhthawn vang zawk a nia. Mahse, kha a lo chatthla daih sia" ngeiawm zeta nuiin ka ti ve hmak. Sual leh ngeiawm chu min ti ngei ang. Mahse, ani chawp chawpa Zorina an duh lo hi ka kham ve tawh. Amah tê zik zek hian Mama bula pawh Zorina hi a rêl hrep ka ring, an veng a lo inang ve bawk nen. Thudang an sawi leh hmain ka tho a, ka pindanah ka lut ta daih. 

Thawmhnawah hian ka mit a lerh tehchiam lo. Ka hleitlin tawk loh avang hian mom jeans tih vel ka ha ve ngai lo. Inhmeh hek lo i..! Ka tawi naa ka thau ve vak loh a vang hian kawrfual khup khuh ngawr ngawr ka ngah.. Kekawr ka hak chuan tight ṭang ka duh bawk. Min tilang sang ve deuh a. Desy a rawn au lauh lauh a. Ka chhuak vat. Ka scooty kan keng ve thung. 

"Nui suh aw, thil ka sawi ang" a tih chuan ,"Nge ka nuih ngawt ang?" Ka ti vat a. 

"Ih maw, Buanga khan min bem a.." a ti ta a. Buanga chu Zorina ṭhiante zing a mi, ṭawng duh ve tho, a bula awm nuam tak kha a ni. 

"A bem daih tawh che maw ka tia" ka ti a. 

"Bem êm êm lo, keimah khan Star ka neih thu ka sawi zuah zuah a, a ngam lo a niang. Tunah ka single tih a chiang ta sia, min bem ta a nih hi..engtin nge ka tih ang?" A ti mawlh mawlh a. 

"Chhang rawh, a fel ka ti..Zorina paw'n 'Buanga hi kan zingah chuan a puitling ber" a tih kha" ka ti a. Ka duhpui tak tak. A hmel nise a chhe bawk si lo. 

"Nia..ka hrethiam lo le.." a ti ringawt. Hmeichhia ten bemtu kan neiha, "Awii ka ten tawp, min lo bem ve ringawt mawle" emaw "Min be ve peih sia, ka hne.." kan tih ve lohte hi chu rilruah duh rûkna kan lo nei ve khiau a ni duh hle. "Ka hrethiam lo, min duh tak tak ang em pawh ka hre lo va" te kan han tih chin hi chu kan duh a, kan nervous mai mai zawk a ni. 

Class room ka luh rual rualin Lawmsanga'n min rawn zui nghal a. Ka bulah a ṭhu ve zat. Ka lo en deuh hâw a. A cool angreng, a hlim viau lo tih pawh ka hre thei. Zirtirtute an la rawn lut lo va. 

"Teber, kan hriat dan kha a lo dik chiah mawle" a tih chuan ka hrethiam nghal. 

"I hmu mi?" Ka ti vat a. 

"Niminah ka rawn kal loh kha maw..kan chhuak dun a. Ka chîk ru char char. Restaurant-a thil kan ei laiin a va zung a, a zun hlanin a phone a rawn ri ta a. 'U Fela' tih hi a nia. Mahse, ka pickup lo. Fela number chu ka la ta tho a. Kan chhuah hnuah a rawn call leh a, 'Ka cousin a nih hi' ka bulah chuan a ti a. "Nakinah ka rawn bia ang che ka buai lawk" tiin Fela chu a be ta a. An in thleng ka thlah leh thlap. 

Chuan, zanah dar 8 rik hma deuhin ka va call a, a hma lamah khan ka u te ui ka zawnsak avangin ka be hman lo. A la thei ta miah lo va. A chhungte number hi ka nei lo, amah hian min pe duh tlat lo va, anmahni ka zawt hreh ve bawk nen..Fela chu ka call ta a, ani pawn a la thei lo. chuan, ka ṭhianpa nen kan tlanchhuak tawp a. Ka ṭhianpa patea hi call girl dawr ṭhang ve tak a ni a, a hnen aṭangin hotel an hman thin tlangpui kan hre thei a, chung hotel pathumah chuan kan kal risk ve tawp. Amah Bsi thlalak kha hmuhin, "Ka farnu a nia, an bumchhuak" tiin vau titihin manager te ka be ta a. A tawpa tawpah an room no. Min hrilh ta a ni. Room service angin kawngka kan va kik a. Patling tih hriat lutuk hian a rawn hawng a. Khumah Bsi chu ruak vekin a awm tih hriat takin rizai hian a lo intuam hlân a. Min hmuh chuan a phâwk teh asin. Chuan, engkim ka chhu chat ta mai. A tawmpuipa chu Fela ngei kha a lo ni bawk. Tukin zing thleng khan a la rawn insawithiam char char mawle..ten tak ka ni" a ti ta bawrh bawrh a. A sawi zo chu thaw huai hmel a pû. Mipa te pawh hian inbunruahna tur an lo mamawh ve hle tih ka hriat phah. 

"I hrechhuak hma a, a lawmawm zawk ti tawh mai ang" ka ti ve ngial a. Mi hnem hi ka'n thiam lo lulai khawp a. Bakah Lawmsanga chu rinhlelhna nen a lo nung rei tawh a, fiahna a hmuh takah chuan a dam huai zawk ka ring. Amah nen ka intehkhin a, kei pawh ka nu leh Mama ten ka lakah thurûk an neiin ka hria a, eng nge a nih hrechhuak thei si lo vin, rilru mawlhtu nei rûn chungin hun ka hmang a. Ka nih dan tur ang leh ka hlim tur ang pawn ka hlim thei lo chu a nih hi. Langchhuak si lo va chhungril tinuam lotu zawng a ni chiang e. 

Vawiin pawh thil danglam êm êm a thleng lo. Lehkha zir nasat erawh a ngai chho ṭan dawn a nih hmel e. 

Ka pa pawh Civil Hospital lamah dah ni tawhin, ni 3 lai a awm tawh. Au Bawiha leh ka nu bawkin an la awmpui zel a. Au Bawiha chu keimah ka kal changin inah a haw zawk ṭhin, a hnathawhna hmunah te pawh va kal ve zuaiin a va endik ve zeuh zeuh. Ka pa chu sawi tawh ang khan a nerve lam an puh ta ngawt kha a nia. Ka rilruah eng emaw hi a riak reng tlat a, eng nge a nih chiang takin ka hre thei bawk si lo.Ka A

Pa chu taksa a che thei lo va, a thluak lam pawn a hma a pha tawh lo. A hriatrengna a buai a, a fate pawh min hriat châng a nei zeuh zeuh chauh. Mama'n phai lama min refer turin doctor te a rawn dawr a, beiseina chu a la nung ve deuh e. Tuna an enkawlna damdawi hi a course zo phawt se a hmasawn dan azirin phai lam panpui a ngaih leh ngaih loh kan hre chauh ang. Doctor Hminga a fel ṭhin ngei mai. Ka pa ṭhianpa a ni bawk a, amah enkawltu ni chiah lo mah se; a rawn kan reng a, a ngaihtuah khawp mai. Ka nuteii pawh kan inah a la khawsa ve zel a, Pa Hmaa hian koh a tum miah lo nge ni dawn ni, hman zan intihhlum a tum zan bak kha Nuteii pawh a va lawr tawh lo. Chhun lamah ka nu a han chhawk ve zeuh zeuh a. A ṭangkai ve tho mai. Au Bawiha mawlh hi a ni, Mama pawn, "Kei pawn ka riahpui thei, mahni in luma mut i thlahlel lo mi?" A ti fô. 

Rin dan pakhat ka neih chu ka nu a veng a nih ka ring ber. A hmain tu emaw nen zanlaiah a lo hmu dun tawh si a, eng emaw a thlen leh hlauin ka pa bulah a tâp ve chawt niah ka ngai. Amah lah hian engmah a sawi duh bawk si lo. Kan chhungkaw boruak chu sawi thiam si loh hian a buai ru riau a, a nuam lo hle bawk. 

Zorina te pawh competition an ṭan chho a. A zan hmasa ber chu ka en lo, An rawn pek chhuahna channel ka lo hre fuh lo pek a! Ka zawng rei ngang mai. Mahse, a chak a, ka lawm tho e. Ṭhalai thaza rual, fit zek zawk 100 rual tehmeuh han insual chuan titi a titamin entu pawh an pung chak viau. Kei erawh ka pa avangin rilru ka pe hleithei meuh lo. Mama nen pawh kan la in kawm leh ta lo, a chhuak zut reng a. Zanah tlai tak takah a rawn haw ṭhin bawk. A sumdawnna lamah thapui an thawh lai a lo ni ve bawk nen, amah pawh a pawr ve fap mai, ka pa thachhang dawltu a ni bawk nen, mawhphurhna hrang hrang chelhtu nih hi thil namai a lo ni lo a nih hi. A tawi zawngin sawi ang, ka pa chu eng a an theih loh avangin phaia kal turin kan inbuatsaih ta a. 

Mama leh ka nu an kal dawn thung. Au Bawiha chu zep thu a cheng lo, English leh Hindi duh angin a thiam nal tawk lo va, lehkha zir lamah khan rilru pe hek lo le. Mama a kal dawn tho a tiin a ngaih a ngam ta a niang, kal ve a chuh teh ṭung lo. A awm loh hlana lo buaipui tu ber ka nih avangin Parvula pawn min ngaina tawh êm êm a, mi zui kawi reng tawh mai. A rang lama kalpui a duh avangin Mama pawn pawisa te a la chhuak vat vat a. Sum leh paiah chuan kan la buai chhe lem lo. Mahse, eng chen nge kan indaih dawn tih hriat a ni lo va. Sum leh pai sawi takah chuan mizote mamawh tak nia ka hriat chu Savings hi a ni. Hetiang dam lohna, natna khirh tak tawha hmun danga kal a ngaih emaw inenkawlna senso a hautak chiah hian a tam zawk chu kan buai ṭhin. A chhan chu pawisa khawl nachang kan hre lo va, a awm ang ang kan hmang pawp pawp a, vai hote chu cheng 50 lek pawh bank-ah an dah duh a nia! Sawrkar hnathawkte tihturah hian kan ngai deuh em mawni, a thawk lo hlei hlei hian kan manawh. Nitina kan lakluh aṭangin a tlem emaw a tam emaw ni khatah cheng 100 tal pawh hi khawl zel ila, a rei chuan a lo tlingkhawm tam ve zel mai. Helam hi kan inhrilh tam a ngai viau. 

Mama te phai kal dawn bâwr velah Zorina pawh a theng sang chho ve zel a. Kan inhmu khat angreng a, ngaih pawh ka ngai. Mahse, a tan lo kal reng a nuam bîk lo ve bawk a, tin, a û te a uap loh ve deuh vangin zan lam chu inah a awm tlangpui. A pa erawh zu a la nghei lo tluang zel e. 

Mama te kal dawn zanah chuan Viteii nen kan insiampui a. Eng chen nge an zu thang dawn kan hre lo. Mama chuan, "Fel takin lo awm la, i u Bawiha thu lo awih ula..rilru tihah zawngin lo khawsa miah suh" a ti mawlh mawlh. Ka lo um e ve mai bawk. Chutin ka va tal ho viau dawn lo tih ka inhrechiang ve êm a ni. 

Kan insiam lai mêkin in hnuai lama nuteii âng thawm kan hre ta a. Kan zu chhuk vat. Ka rin loh lutukin kawngka bulah Zorina a lo ding reng mai. A rawn kal dawn tih min hrilh miah lo. Tlaiah kha chuan rei tawk kan inbia kha a nia. Ka nuteii chuan, "Teberi chhungte hi i runluih em ni zawk? Ti nge heti khawpa a pa vanga an rilru a hah laiin i rawn lawr ve sek a?" A lo ti tâwn tâwn a. Zorina hmaah va ding vatin, "Lo kal rawh" tiin sitting roomah ka kai phei hmak. Mama a rawn chhuk ve mêk. Mahse ,ka ngaipawimawh lo. A rawn leng duh a ni ve mai. Mizo danah inleng an hnar ngai lo. Mama chu ka rin loh deuhin a thinrim vak miah lo. Mi pangngai a ni tlat a..hman zan erawh kha chu thinrimna a nei sa a ni maithei. 

"Naktukah i pate an kal tawh dawn sia ka rawn phei thut" Zorina chuan a ti a. 

"I fel lutuk. I rawn sawi si lo va, mak ka ti deuh alawm" ka ti a. Ka nu leh nuteii te tv en chu an phun an phun a, eng nge an sawi erawh kan hre pha lo. 

"Nuam lo ti suh aw" ka ti sap a. 

"Ka beisei sa kha a nia, engmah a ni lo" a ti nghut. 

Mama a lo phei a. "Zorin, engtik nge in insual leh dawn?" A ti a. A awah lungawi lohna emaw han tielna a lang lo. 

"Nilai zanah a nia" ṭha takin a lo ti ve mai bawk a. Hman zanah khan Mama kha keima chungchangah a vau kha a nia. Mama hian a sawi zui leh ta miah si lo, kha kha engtin nge a paidam theih tiin ka rilru a buai ru viau kha a nia. Tin, khami zan aṭang khan Zorina nen kan inkar engmah a sawi tawh ngai miah lo. Thildangah a buaiin a hah bawk a, a ngaihven hman lo a nih ka ring ve tawp kha a nia. Mahse, "Zorina nen in inkarah engmah ka sawi tawh lo vang, i duhthlanna a nia, chuti khati" tia min hrilh chat hma chuan ka thla a muang chuangin ka ring lo. 

"I beih tur kha Lunglei tlangval kha a ni em kha? Rohlua kha" Mama bawk chuan a ti leh a. 

"Aw..ni e..thahrui kan inneih hleih dawn lutuk a, ka huphurh angreng" Zorina chuan a lo ti ve var a. Kei erawh Mama a thinrim ang tih hlauin ka lo insangmar ṭung mai. 

"Thahrui ringawt pawh a ni ber lo, skills neih that hi a pawimawh.." Mama chuan a ti a. MSP huaihawt a ni bawk a, Mama pawh GS a nih angin a va en ve zantin kha a nia. Khata ṭangte khan Zorina hi a ngaina ve ta a niang te ka ti rilru mai mai. 

Rei pawh a lêng bîk lo. "I nute sawn mut mai an tum loh hmel sia, an chau lutuk ang. Ka va haw ang e. I pa chu hei hian ka lo kan ve ang" tiin pawisa min rawn hmehbel a. 

"Awii, a ngai lo. I lo kal hi a tawk" a ti hluai. Ka hnara rawn tuai zeuh pahin, "Hluai zel che hian..damdawi inah ka rawn kan ve hman si lo va. Tikhan ka kan ai zawng zawng a ni mai" a ti leh duah. Lak loh chi ni bik hek lo. Ka ak a, kawngka lam panin kan inzui phei ta a. 

Ka thlah zo ka lut leh chu ka nuin, "I lo huaisar ngei mai" a ti nghat a. 

Ka chhang ta lo mai. An unauin an ṭangrual leh ang a, inhnial ka peih lo. In chungah ka chho a, Mama bulah Zorina pawisa min pek chu pein, "Ka pa a rawn kan vena a nih kha" chhuang ru zetin ka ti a. A vaiin ₹8000 lai a ni. A thawhchhuah a tan a harsat tehlul nen, chutiang zah zah a rawn keng chu ka hnuk a tiulh lek lek. 

Mama chuan, "Misual tak chu a ni lo a ni tiraw!" A ti sup a. 

"A sual lo, mi fel em em tia sawi tur a ni chuang lo. " Ka lo ti vat a. 

"Engpawhnise, hunin a la hril zel ang chu" a ti nghut a. Tlem chuan ka awm a nuam ta deuh e. 

Ka mut hmain ka pa ka va hmu leh zuai a. Thil tuiril lam kan eitir thei tawh a. A muhil niin ka hria. Ka melh vawng vawng a, an na chiah chu a tar bâwih bâwih thei nia! A kum a tam ve tawh tho bawk nen, ka lainat mang e. An rawn chhuah aṭangin tumah min la ko lo, mamawh a neih chuan fiah lo ruai hian a sawi ve thei a. Au Bawiha hian a ṭawng a hrethiam ber. Tihharh hlau taka lêt leh ka tum lai takin , "Thangpui.." tia fiah zeta a phun sup thawm chuan min tiding chawt mai. Ka lehhawi zawk a, "Pa..eng maw i sawi?" Ka ti vat. A maimichhing tho si, a ṭawngvai a ni chiang. Tu hming nge a lam khah? Thangpui tih a nih kha..kan chi leh kuang, kan lamhnaiah Thangpuii ka hre lo. Mak ka va ti ê..ka din leh ngial hnuah ka pa chu a harh si loh avangin ka chhuahsan ta a. Ka nute pawh mu turin an lo intintuah ve mêk. 

Engin nge min mawlh ka hre lo, ka inlet ka inlet a. Mut a chhuak lo a ni tawp mai. Zorina nen reivaklo kan intext a, intihsiaknaa a tel avang hian zan lamah a mu hma ve ṭhin a. Mut kham an mamawh ve nen, kei pawn tihbuai vak ka duh lo. Ka nu leh Mama te an awm dawn lo bawk a, an insualte pawh a hmunah ngei en ve ka tum. Nuteii hi chu ka indâl tir hauh lo vang. Au Bawiha lahin a phal dawn chiang sa. Amah pawn a en ve duh maithei a ni. Ka tui inchhawp ka in zo leh ta. Mutnaa tui in chhawp loh hi ka thiam tawh lo, ka dang a ro hma êm a ni. Ka harh lailawk pawh hian lem khat tal ka lem ziah. Chuvang a nia ka zun zin êm êm zel ni. Tui la tur chuan ka chhuak phei leh ta a. A reh ṭhap tawh. Botlle kenga ka phei leh lam chuan ka pate pindan kawngka inkhar phui lo chu ka va hmu a, ngaihṭhat lohnaa khat ta rêng rêng chu ka pan hnai leh kher a. Zawitê hian ka nam a, ka pa chu amah chauhin a lo mu! Ka lut a, ka hawi kual pawn ka nu ka hmu lo. Thil dik lo a awm leh ta tih ka hai lo. Zaninah ngei hian thuruk hi ka hre tawh tur a ni. Ka chhuak vut a, kawngkapui lam ka va pan. A lo inkalh ta lo chiah e. Ka thaw halh a, thawm dim takin ka hawng ta a. Garage bula a pangpar chi dahna intê lam chu ka va en a, a reh tlawk tlawk ringawt. Ṭawng thawm pawh ka hre lo. In chung zawl hi Mama te pindan aṭang leh pawn aṭang hian a kal theih ve ve. Step chu ka zawh chho ta ṭhem ṭhem a. Thil lah chu a thaw vûk vûk lehnghal. Dar 1 a la ri lo deuh a, mi zawng zawng chu an mu tawh emaw tih mai tur a ni. In chung zâwl ka thleng dawn ta..ka ding leh dat a, thawm ka ngaichâng..a la reh tho. Mahse, inhumruhin ka pen chho leh a, ka chuang chhuak ta. In chung thlanglam kilah chuan tu emaw chu a ding ngei mai..thla a êng vak lo naa, rawn lehhawi ta se, min rawn hmu nghal ang. Mahse, sintex phenah ka tlum nghal a. A awmna a hlat deuh avangin a ṭawng ri ka hre mai thei si lo. Kun zauh zauh chungin ka va pan hnai a, Pot lian zet zet a hun tlar phênah ka ṭhu ta kâk mai. A ṭawng ri pawh ka hre ta. 

"Ni e..ka ti ang. Dama kan rawn haw ta lo a nih chuan i tihtur i hriat kha..ka nau kutah engkim ka dah. Sangbera aiin Malsawmtluanga a venthawnâwm tawh zawk.." a ti sar sar a. Ka hmui ka hup. 

"Aw..an ni lam kha chu ka ngaihven tawh lo, kan buaina ber tihian a damloin mi pangngai a pha tawh dawn chuang lo va. Tupawn hre mah se, pawi tihna ka nei tawh lo. Mahse, Sangbera hi kan chelh dawn lo thung.." a ti leh a. A awmzia pakhatmah hre lo mah ila, ka chungchâng kaihnawih leh ka pa damlohna thil a ni tih ka hria. 

"Aw..hei a tlai tawh..ka mu phawt ang. Keiman ka rawn biak loh che chuan min rawn be tawh suh aw" a ti sawk sawk a. Ka mangang deuh, a rawn phei hnaih chuan min hmuh ka ring si. Bangah chuan a bet thei ang berin ka bet thlawp a, a rawn phei ta. Ka thaw ri pawh ring ka ti.. a thla a muang nge min kal pel ta mai a! A hawi kual lo chu ka tan vanneihna a ni e. Nge ka awm ve tih a hre leh kur zawk?! A chhuk fel hnuah ka thaw chauh. Ka hah nasa mai. Ka harh zawk, kawngkapui kha a kalh dawn chiang. Engtin nge ka luh leh tak ang? Ka zu chhuk chuan min hmu dawn bawk si. Ka phone ka keng bawk si lo. Ka thaw a sa phat phat thei mawle. Chulai in chung reh lutuka zan khua hun hman chu ka hlauh dawn bakah ka tlaivar dawn tih ka chiang. Ka hawi kual a, Mama te pindan aṭanga in chung chhuahna kawngka chu ka va nem a, a inkalh. In hnuai aṭangin thawm a hriat vak loh bawk a, ka chum ta a, Mama leh Au Bawiha ka ko pah bawk. Ka nute chuan lo hre ta pawh nise, pawi tihna ka nei tawh lo. Ka pa natna chungchangah inrawlhna an nei niin a lang a, ka pa lakah zep rûk lian tak an nei a, mahse, tunah ka pa chu a thluak lam buaiin, mi pangngai a pha leh ang em tih hriat a ni lo, chuvang chuan ka pa chu a vengthawng tawh lo. Tum eng emaw an neih chu tihlana eng emaw tak sual chhuah an tum a ni. Chu chu ka nu thusawi aṭanga ka zeldinna a ni. A dik ngei pawh ka ring. Zorina te nen a la inkaihhnawih zel bawk. Chu lai tak erawh ka buai ta a, Mama hian a hriat ka beisei. 5 mins vel zet ka chum hnuah a rawn ri rawk a, a rawn inhawng ta hrâm e. Mama a ni. 

Mak ti hmel a pu hauh lo nia! Ani hi zawng inthunun thei ta reng reng kha a ni bawk a. Ka lut vat, stepah chuan kan inzui thla ta a. Ṭhutkhawmna pindanah ka ṭhu a, ani pawh a rawn ṭhu ve zat. 

"Ka ngaithla e" a ti nghut a. 

Sawi ṭan mai dan tur ka hre lo kher mai. 

"Ih, ka nu a nia..Mam, ka pa nat danah hian eng emaw thil a inphum ru niin ka hria" ka ti hawk. 

A ngawih vang vang hnuah,"Nangma nu ngei i puh chhia a maw?" A ti sup a. A mi den dan a danglam deuh. 

Zawitê hian, "Ka nu a ni lo" ka ti a. A kâng deuh zawkin ka hria. 

"Maw?! Engtin maw i sawi?" A ti ta hluk hluk a. 

"Ka nu a ni ve lo, falâk ka ni tih ka hre tawh" ka ti ta a. Ka thawl huai nghe nghe. 

A mitmenga natna niawm tak rawn inlar zawk chu thup bo tum takin, "A nih tu nge i nu?" A ti ta daih a. Ka beisei loh lutuk lam a ni. 

"Ka hre lo" ka ti tawi tak. 

"I hriatna a rei tawh em?" A ti leh a, ka hriat dan leh ka pa thusawi zawng zawng ka hrilh ta vek mai. A chek hluk a. 

"I nu i hre lo a maw? A awmna takngial pawh" a ti leh a. Mak ka ti deuh. 

"Hre hauh lo mai. I hria em ni?" Ka ti ta khauh a. A nui hul hak a. "Hre lo" a ti nghut. 

"Mam, ka rilru a danglam phah lo, ka inla mihrang lo bawk. Tuna buaina zawk chu ka nu nena in thurûk hi eng nge?" Ka ti ta a. Zial a ṭan a, a hîp kâwk kawk, rilru hahna emaw mawlhtu a nei niin ka hria. 

"Thurûk a awm tawh loh chu" a ti dam thlup a. 

"A awm" ka ti ve tlat thung. Min rawn melh zawk a. "Eng thuruk maw?" A ti a, namnul tum taka ṭawng mah nise, ka ngaihbel nge eng emaw thup tum niawm hian ka hre tlat. 

Ka nu thusawi zawng zawng ka ngaihthlak te kha ka sawi vek a, a tawpah, "Zorina nen kan inkara in buaina hi thuruk chu a ni. Chu chu eng nge ka hre duh" ka ti ta bawk. Ka inringtawk ve ṭan nen, eng thil pawh dawngsawng thiam turin ka inkau ru sa reng. 

Mahse, Mama chuan, "Amah Zorina zawt ta che. Engtin nge keiin ka hriat teh daih ang" a ti a. 

"Mam, sawi mai rawh. Ka rilru a buai a nia" ngenngâwl zeta ka tih chuan, "Kei chuan ka farnu tak tak i ni lo tih i hriat kha ka hlauh ber a nia. I nu chungchang ka zawhna chhan che pawh i nu i zawng chhuak ang a, min chhuahsan daih ka hlau a ni. Ka nau i ni a, ni reng la ka duh. A bak a awm lo." A ti ta dap dap a. Awih loh ka duh naa, a mitmengah ti der hmel a pu der si lo. 

"Mahse, Zorina hi ka nu ang bawkin i do em êm si a" ka ti hrâm a. 

"A chhan chu ka nu min ngenna vang a ni. Zorina mizia leh eizawnna te, an chhungkaw dinhmun te avang hian ka nu chuan a iai a, kan chhungkuaah ka thu i ngaihchân ber avangin dodal tur chein min ngen a ni. Bena hi a ngaina a, mahse, i ngaina ve si lo. Chu zawng chu a ni e. Kei chuan ka hlauh ber thil i hria tih ka hre ta a, i danglam lo tih ka hriat hian ka dam huai zawk e. " A ti leh mawlh mawlh a. Ka lo dam ve huai huai thei nia. Mama berin ka bialpa a dodal loh chuan kan ṭha a ni mai. 

"Mahse, thil dang, ka pa kha khati teh thuta a awm kha mak i ti lo em ni? Ka nu lahin, 'Kan buaina ber a damlo ta sia' a ti bawk si" ka ti leh a. Ka dilchhut telh telh bawk si, Mama chuan engkim a hria emaw ka ti a ni maithei .

"Chuzawng ka hre ve hauh lo. Kei pawn a tirah khan ka ringhlel a, han chhui ngaihna ka hre mai si lo. Doctor ten a nerve vanga tlu an tih hma phei kha chuan tu emawin a phiarru angah ka ngai ve tho. Mahse, ka sawi tawh kha Naute, ka pa khan a hmain nerve tha lo a lo nei ve tawh ang a, a kut leh ke mu churh churh ṭhinte aṭang khan a lo inṭham mêk tawh a nih ka ring a, ka pawm thiam ta bawk..nunna êm kan chân lo va, lawm tum phawt ang" a ti leh ta dap dap a. Ka hmin titih der mai. Mipa zinga ka ngaihsan leh ka chhuan ruk em em ka uin chutianga ngaihṭhat lohna a neih loh chuan khang ka thu hriatte kha palzam ka tum ve mai a ngaih hmel. Mahse, ka nu khan ti nge khatiang khan a sawi kher le?!

"Ngaihtuah vak vak suh. Lehkha lo zir ṭha la aw. Thil ei ṭha bawk la, lo work out nasa bawk ang che. " Tiin min chah leh thlap. 

Ka chhuk hma chuan, "E taka! Mam, ka mut hmaa ka pa ka va hmuh khan a ṭawngvai a, "THANGPUI" tih hming a rawn lam a. Tu nge Thangpuii chu i hria em?" Ka ti a. 

Mama chu a ding mar awt mai. Na zet hian min rawn melh a, a mitmeng chu a nelawm ta miah lo. 

"Mam" ka ti leh a. 

"Zuk mu tawh rawh. Thangpuii ka hre ngai lo" a ti chuai raih. A tlai tawh nen, rilru bangbo leh ruak zetin ka chhukthla ta chhat chhat a. 

 Ka chau tawngkhawng nge ka muhil ve ta thuai a. Thawh erawh ka hai. Ka nu te chu chaw eikhamah an kal dawn a, thlah ka duh ve viau laiin test kan nei sia, miss chi a ni si lo. Ka kalsan ta a. Desy'n Buanga felzia leh a care dante a sawi thla siam siam a, ka rilruah a lut vak lo. Thil pahnih hriat châk êm êm ka nei. Thangpuii chungchang leh Zorina leh ka pa natna inzawm dan hi..khawi aṭanga bulṭan tur nge ka hre si lo. Ka â mai dawnin ka hria. 

Test pawh ka chhang thuak thuak, ka hmu chhe ngawt ang. Kan classah hian a ti chhe pawl ka ni ngai bîk lo naa, Ruata hi ka tluk thei ngai lo. Ani hi zawng a zir peih êm a ni. Lawmsanga a rawn kal leh lo. Ani hi a tuar na viau em mawni dawn le..test ni hi chuan kan kal kim vek zel a nia. Hmangaihna hian mipa leh hmeichhia a tihnata a tihhlim theih dan a danglam bik si lo va, thil la runthlak deuh chi a nih chuan a tuar na viauin ka ring. 

Hawn lamah, "Des, naktuk zan chu a hmunah va en ve ila, Zorina te chu" ka ti a. 

"A pawi hleinem. Ticket engzat man nge?" A ti vat. Ka lo hre miah lo. Mama chu dil ngam ila, ticket tel lo pawn luh dan a awm ang mawle. "Zorina ka lo zawt dawn nia" ka ti a. 

In ka thlen chuan ka nute pawh an lo kal tawh a. A reh dûk mai. Nuteii lah hi a lenglâm nasa mah mah. Ṭhenawmte inah pawh a chuangkai ngun ta viau, an nin ka lo hlau angreng. Inla fêkfawn chi kha an ni ve bawk nen. Au Bawiha pawn hna a thawk leh tawh. Viteii ka pui nghal a. Kan titi bawrh bawrh mai. 

"U Zorina hi a pa ê.." a rawn ti hlawl chu inthiam lo leh niawm takin, "Ka sawi awmzia chu hei a pa, mipa a ni thiam" a ti nawk nawk a. Ka nuih a za, "I star chiang" ka ti a. 

"Hmm, star lo, star mah ila i bialpa a nia..a chi nang. Chuan, ka rin aiin a fel, a zaidam bawk si" a ti leh nauh nuah a. 

.

"A zaidam mawni le" ka tih chuan, "Nizana Piteii'n a lo ṭawngkhum bawrh bawrhte khan a chhang ve lo reng reng.." a ti a. Zorina chu a ngaihsan hmel angreng. 

"Naktuk zanah an insual kan en dawn a, lo kal ve la" ka tih chuan, "Tak tak maw? Ka châk ve e.." a ti hluai a. Kan insawm thlu chu a ni dêr mai. Chhungkaw puipa te kalbo ta vek chu chhungkaw pawisa pawh ka kawl a, ka nu khan Nuteii kutah eng emaw a dah thute kha a sawi a, eng tak ni ang maw. An pindan chabi a ni maithei. 

Au Bawiha lo hawn hnu lawkah chaw kan ei a. 

Nuteii bak a ṭawng meuh lo. Sawi tur hi a hre ve khawp a, ..thleng ka sil laiin ka phone a ri a, Au Bawiha'n a pick up. A biak zawhah, "Teber, Anîin i hman hunah lo phei teh se a ti a nih chu" a rawn ti lûng lûng a. Eng lam tak ni leh ang maw? Mapuia hian a bialnu kha a ru te hi a ni lo maw le..thil pakhat ka rilruah a rawn lang nghal zawk. Ka nî chuan THANGPUII kha a hre maithei a ni..ka zawt teh ang ka ti rilru a. 

Ka chhuah dawn chuan Nuteii inthiar zo chuan, "Zanah chhuak chhuak suh, a him lo" a ti hlak a. Mi lah hi a khak ve peih sia, amah hi a vah tam tam nen. 

.

"Anîin min ko alawm" tih leh chhuah ka rual a. 

"Tei, Teber, min lo nghak teh. Kei pawh phei ka tum alawm..kal rual ang" a rawn tih chuan ka ner sak. Kan phei dun ta a. 

"I nu chu ka ngaihtuah lehchhawng mang e, i pa hi a kal mai ang tih hlau reng reng hian a awm a. A cher kûam rêng hi..damin an rawn haw leh êm ang chu maw" a ti zat zat a. 

"Nia" ka ti ringawt. Ka nu chu a cher pawh ka hre lo, tin, ka pa dam loh aṭangin chutitaka a lungngaiha a tlakhniam lah ka hre hek lo. Engkim hi ka ngaihbel tawh a, a buaithlak zawk. Ka nî te in kan va luh chuan, "E..i lo thleng maw.. Ê.. kha Chhuani pawh chu, i lo phei ve ni maw?" Ka ni chuan a lo ti zung zung a. Mapuia leng tur a pindan aṭanga lo chhuak chu ka va be daih. 

"A ngaiah mi?" Ka tih chuan a khi vur vur a, "Nang pawh i inzêp thei riau mai. Ka hre ve aw" a ti hluk. Zorina nen hian mi hmuh laiin kan la inzui êm êm lo va, kan ṭhenawm te pawh sawn an hriat ka ring lo. Mapuia chu ka nu emaw Mama'n emaw an hrilh a nih ka ring. Pa Muana pawh meeting turin a chhuak a

. Ka nî nen kan ṭhu dun a, nuteii erawh thingpui hâng dawmin tv a melh thung. 

"Ti nge min lo koh!" Ka ti sap a. 

" ..nakinah" a ti ringawt. Nuteii chu a hnawk tih ka manthiam ve mai. Ka ni thusawi tur hi a hre sa ang a, min zuite hi a ni mai lo'ng maw..ka ti. 

Ka nî chuan a be bawrh bawrh tho a, Zorina nen kan lo intext thung. 

"Naktuk zan chu lo en ve kan tum a, ticket engzat man nge?" Ka va ti a. 

"Wow! A va zâmâwm duh âwm ve. 100 man aṭangin a awm " a rawn ti vat a. 

"I chak loh vaih chuan ka ṭap ang" ka va ti vel. 

"I mit i hup tluan zak si ang e aw" a la rawn ti zui! 

"Teber..hei, khatin nui vur vur suh, no hi va seng teh" ka nî chuan a ti a. Ka phu uih. Nuteii lah hian a lo tuihnih ve hman ziah, "Tunlai ṭhalai ho chu an khati ziah..tikhan mi â angin an nui vur vur zel a" a lo ti. No chu choka lamah keng pheiin ka sil nghal rawk rawk a. 

Ka nî chuan, "Khaw nge maw ka lighter kha le. Muana hian a lo keng leh ngawt a niang" tih pahin gas a on a, zial a ṭan hluah. Mei zuk hi a sim hleithei lo. Ka no sil chu min rawn hnaih ruakin, "Haw mai rawh. Saw nu awm chhung saw chuan a sawi chi loh" a rawn ti sur sur a. Ka meng kâwk ringawt. Ani lah chu a let leh vut bawk si. 

Ka ni hian ka buai rûkna hi hriain thurûk , ka hriat châk êm êm kha min hrilh a tum a ni lo maw?! Nuteii hian min zarbuai sek danah ka nî sawi tur chu a hre ve tihna a ni thei bawk ang…hmmm, hma ka sâwn ṭan e. A zûng nen lam phoro hun a thleng vat turah ngai ang…

(Chhingmami/ Tuaimami tih hming hi midangin story-ah an hmang tawh em le? An hman tawh chuan, khawngaihin lo sawi teh u a. 🤗