Zor 10

ZÔR..(10)

Ziaktu : Toni Râlte

Mak ka ti viau mai. Au Bawiha ber kherin ka pa bula thil a lo sawi chu! Mahse, a hmuh miau chuan a sawi ve mai loh nakah. Mahse, khami zan khan a lo hmu ru reng tihna a nia. Khawi aṭangin nge a hmuh ang le..ka buai deuh. Ka nu lo hawn hmain ka pa chu ka chhuahsan a. Thudik ka hriat avang chuan ka âwm a nawm phah sawt hran lo. Mama hian engmah a la hre ve lo a nih hmel a. Hre ve ta se , a hma pawn ka nu lenglâm lutuk kha a sawisel zauh tawh kha a nia, engtin tak dawngsawng ang maw. 

Zorina nen kan intext a, "Tun lawk khan min rawn bia a, Ultimate Fight a awm dawn a. Sumdawng rual intelkhawm huaihawt a niâwm e. I û pawh a tel ve..ka ṭhian ten ka hming an lo thehlut ve leh ngawt a, karleh aṭanga ṭan tur a ni e. Ka inpuahchah ve deuh a ngaih hmel. Hlawh a ṭha" a rawn tih chuan ka hlauthawng nghal ngawt! Mama hi MSP(Mizo sumdawng pawl) -ah General Secretary a ni a. He pawl hi kum 10 kaltaa din a ni. He pawlah hian mizo sumdâwng chiah an tel, hnamdang rim nam hlek pawh an tel ve lo. Hmalakna tam tak an nei a, Sawrkar approved an ni bawk. Rate chungchangah Zoramin a ṭhatpui ti mai ang, mizo sumdawng tam zawkte telna a nih miau avangin an duh duha rate tisan te kha a awm thei ta lo va. Chutianga mimal anga rate tisang fâl an awm chuan an vaia inthurualin hma an la ṭhin. An pawl ka chhuan vena riau chu an pawl hminga Mizo ṭawng an hmang hi a ni. Mizorama pawl ding tam zawk hi chu hnamdang ṭawng vek an ni. 

"Engzat nge? Lawmman" ka ti vat a. 

"Pakhatna khan 300000, pahnihnain 100000.." a rawn tih chuan ka thaw hawk. A tana hnar a harsat turzia ka hrethiam ve bawk si, tel lo mah se; pawi tihna êm êm chu ka nei lo. Mahse, a tel dawn tih a chiang. A û lah phai lam panpui a hun ruai chu a ni tawh a, a natna dang avangin an la inpuahchah thei rih lo mai mai a ni. 

"A hlauhawm e" ka va ti ringawt a. A hmaa an insualte kha chu kan inngaihzawn tak tak hma kha a nia, ka la en ve ngam a. Tunah chuan hmuhnawm ti taka ka en theih ka ring tawh lo. 

"Hlauhawm hian min tichak thei alawm" a rawn tih chu a awmzia ka hre ve lo. Kei mi nung pawh ni tawh lo, mitthi hlaua û te bula la mu kûk ṭhin tan hlauhawmna ṭangkaina chu hriat ngaihna a awm lo. 

"A ṭha alawm, mahse, i ruhte tliak ta se.." ka ti hrâm a. 

"Ruh tliakte chu a la zia zawk alawm.." a ti leh mai. Ngaihsam ve bawk sia maw..

"I nuteii chu a la tlan em ni?" A rawn ti zui zat a. Nizana an inbiakna vel ka ngaihtuah let nghal, ka khi sak a. "Aw..naktuk zingah bungraw lak an tumin ka hria" ka ti a. 

"A âwm ve reng, Pu Hmaa hi a rui thiam lo ve êm a. Ka pa a tluk lo tlat " Emoji nui vak vak lai a rawn dah tel bawk. Ka nui ve ringawt, "Nia, a ruih hian a sual vak zel, a mak ka ti..Nang zu i in ngai em?" Tiin ka pakai ta daih a. 

"In ve zeuh zeuh, mahse, tun hnaiah ka insual zin deuh avang hian ka insûm..nang?" A rawn ti a. Tunlai khawvelah hmeichhia pawh zu in thei kan tam ta êm mai a, a zawhna chu thil âwm lo pawh a ni hran lo. 

"In lo, a tui lo si" ka va ti a. 

"In loh kha a ṭha ber..chuan, ka û ka'n thlak lawk ang e.." tiin a ngawi ta rih a. Kei hi a û anga che thei lo ni ta ila, ka u te hian a enkawl ang sawn min enkawl ve thei ang em aw..an tenchhe ropui sia, an theih pawh ka ring lo. 

Ka nu a rawn hawng a, Nuteii pawh a rawn chhuak ve ta bawk. Ka pa erawh an roomah a la tawm char char, a thil ziah lai kha eng nge tih ka va en miah lo va, a pawimawh viau a ni maithei. Ka nu leh nuteii te chuan thingpui an in a, an hriat phak tawk tê têin an titi nasa mai. Va hriat ve kher ka tum lem lo. 

Tihtur êm êm awm ta lo chu ka mu ta daih a. Zorina ka mangṭha hram. Ka vannei a, ka damdawi ei kha a thawk chak bawk aniang, nâ ka nei khât tawh. A rawn nat ve pawn a hma ang êm êm khan a na tawh lo. Ka chaw ei pawh a tui chho ṭan a, mut nise ka duh riau bawk. Ka thau dawn te pawh a niang. "Naktuk zing aṭangin ka gym leh tawh ang" ti rilru chungin ka chhing ta vang vang a. 

A tukah ka lo tum lâwk angin dar 5:30 ah ka tho a, ka inthlak hnuah tuilum ka in leh zuai a. In hnuaiah ka chhuk thla ta a. Au Bawiha pawh tun lai chu a inthlahdah a niang, exer a a tawh ngai miah lo. An hnaah hian an buaiin an thawkrim ve bawk nen. Ka squat laiin ka nu a rawn chhuk a, "I nuteii bungrua kan la dawn a, Viteii khi i lo pui dawn nia" a tu a. Ka chhang lo. Nuteii te chu inṭhen ta se, kan bulah eng emaw ti chhung vel chu a khawsa ang ka ring. A fate erawh sawi tawh ang khan Pa Hmaa te lama bet an ni deuh bawk a, Nuteii chuan a chhuahpui ka rinh chiah lo. Ka nute kal hnu lawkah ka chho a, tuilum bawk ka in leh. Viteii a buai êm êm lo naa ka pui ve tho. Class kal a ngai ka insiam a, keimahin tukṭhuan ka bar..ka u te hi an la tho lo a ni maithei. 

Desy lah chuan, "Vawiin chu kan department hnatlâng neih an tia..ka kal dawn lo mai" a rawn ti a. Ka hrethiam viau tho e. Keimahin ka tlan thla a, Tanhril pelh hlekah ka beisei loh deuhin Mapuii leh hmeichhe pakhat hi kawng sirah scooty bulah an lo ṭhu a. Ka ding chawt. Ani pawh chuan min la hre khawp mai. Ka mimal nunah buaina neuh neuh ka neih ve deuh reng avangin Mapuii chu ka lo hrechang lutuk tawh lo. Mama ka hmuh erawh chuan ka hrechhuak tho. Kan ina an rawn pawm luh aṭanga ka hmuh lehna hmasa ber a ni. 

"In chhia mi?" Tlangnel takin ka ti a. 

Nui sâng chungin, "A nih hi, a zia lo tak tak a ni. Hei ka nau hi ka thlah dawn a" a ti a. A bula ṭhu a nau chu ka hmu tawh, mahse, khawiah nge ka hmuh ka hre thei mai tawh lo. Mapuii ai mahin a san zawk hmel, mahse, a hmelchhe zawk. 

"Englai nge chhia in hre si lo a ni maw? ".ka ti a. 

"Umm..mahse, ka ṭhianpa ka bia a, a rawn kal dawn. Pawi i tih loh chuan ka nau hi lo phur ve mai teh a.." inthlahrun hmel lek lek hian a ti a. 

"Lo kal rawh se.." ka lo ti vat. A nau pawh chu a rawn chuang tharh a. A rit zêk lehnghal. Mapuii chuan, "I lo tlan hlauh chu a tihzia e, midang lahin phurh an rawn nei zel sia" a ti a. Ka buk khum nghat a, kan tlan zui ta nghal. Ka rin aiin a nau chu a lo ṭawng duh a. A û bulah khan a ngawichawih hmel tehlul nen .."Engtin nge ka û nen khan in inhriat?" A ti a. Ka sawi a. Kei chu min lo hre sa tawh a lo nia..ka lar loh tehreng nen chuan. English department a mi a lo nia. A hming pawh Dinsangi. 

"Mapuii khan eng nge a thawh?" Ka ti satliah a. Ka hre châk thut a ni ber. 

"Govt. Aizawl collegeah sawn Librarian a nia" a ti a. A hmel zawng zawng nen a inhmeh phian mai.

Vawiin chu Lawmsanga nen canteenah kan inzui thla a, kan lam zir aṭang khan kan innêl ka ti mai, bakah a bialnu kan veng ami a lo ni kher bawk nen. Puipuii a rawn kal lo nen, kawm tur ka nei lem lo bawk a. Eitur an rawn dah hma chuan, "Enteh, Teber, thil pawimawh deuh zawh che ka duh a. Bsi kha maw.. ih, a chanchin i hrechiang em?" A tih chuan nuam lo ka ti ru deuh. 

"Hrechiang vak nang, ti nge?" Ka ti a. 

"Mi sawi ka hriat danin call girl ang type deuhthawin a khawsa an tia. Officer chin lo chu a kawp ngai lo tihte..chu chu a nia, awih harsa ka ti bawk sia, eng emaw thleng lo se an sawi ka ring bawk si lo" a ti ta mawlh mawlh a. Ka chil ka lem khawlh. Ka rilru a insual nasa khawp mai. Lawmsanga chu ka ṭhian hnai tak a ni lo naa, kan class mipaah Ruata nen kan innêl ve bakah mipa fel tak a nih avang hian Bsi tan chuan ka ui ka tih tawh kha. Mahse, hrilh ta vek ila kamtam nih ka hlawh daih thei tih ka hre ve kar. 

"Chutin ka hrechiang lutuk lo naa, i sawi ang chuan a hrechiangte chuan an sawi chu a nia lawm" ka ti ta tawp a. A hmel a danglam nghal. A lo duh ve viau tawh êm ni ang? Bsi a hmelṭhain inchei a thiam a, zirsang lo mah se, ningkhawng a hriain rual a pawl thiam phian bawk nen, Lawmsanga te ang rilru sakhat ve tak tan chuan duha atchilh a awl ve bawk dawn a ni. Mahse, an inbum thui hmaa inthlah chu tha ka tihpui tho. 

"A dik ang, ni e, chutin dawt muhlum an sawi ngawt lo vang. Kei pawn ka ngaihbel ru deuh, zanah hian an ina len a remti ngai tlat lo va, ka putea a strict a ti mai a. Chhunah lêm ka leng tho sia..bakah chhuahpui a awlsam lutuk dan aṭangte pawn a chhût ve theih" a ti duah a. Mi â nilêng ni ta lo nafam chuan a hrethiam chho mai ang chu maw. 

"Chuan engtin nge tih i tum?" Ka ti a. Rice ka chawk mawlh mawlh bawk. 

"Ka hre lo. Fiahna neih phawt ṭha ka tia..amah pawn sawi tur leh mahni insawifiahna a nei thei lo bawk ang a. Kei chu maw Teber, ka lan ang hi a ni lo, ka nêm lutuk. Ka bula ṭap zawih zawiha an thiamthu an sawi chuan awih vak lo chung pawn ka pawm leh nge nge zel..ka tisual tawh a, tihsual leh ka duh tawh lo" a ti mawlh mawlh a. A ni maithei, A mihring mihrinna pawh a ṭha êm a, thinlung nêm tak chu a nei êm êm ang. 

"Ni e, finfiah phawt rawh. Kei pawh an sawi ka hriat ve tho a nia. Mi hi kan ṭawng peihin kan buaina ni lova inrawlh kan ching tawh bawk si, fiah phawt rawh" tiin ka fuih ve mawlh mawlh bawk. 

Physics lam an rawn lang leh a. Rinpuii pawh a fel leh hiam hiam viau. Mahse, Valpuia chuan Mathematics nula neihchhun kei ang bawka tê fel rin ren,Ngaihi a rawn kalpui tlat mai. Rinpuii mitmeng chu danglam hneh tak a ni. Ṭhutna awl a awm mai tawh lo nen, valpuia te chuan kan bula ṭhut an rawn dil a. Kan lo remti nasa. 

Rinpuii chuan mei nei zet zetin Ngaihi chu a tawng a tâwng mai a. Ka nuih a za ru hle. "Tunlaia 5ft pawh tling ngawr ngawr ho hi chu an tetlaia an ei chhiat vang ka ti lo thei lo. An vanduai ngawt mai" tih vel…Ngaihi pawh chuan a hrethiam nge, Valpuia melhin, "A va hauh na che ve" a ti sap a. 

"Lo rak ve mai mai teh se. Min bialpa chei ringawt ṭhin hi a buaithlak" a ti hmuk a. 

"Bialpa chei tur chein i awm a ni mai lawm" Ngaihi'n a ti..Valpuia a ner suk a, "Hetiang mihring hi an awm ve hrim hrim, whatsapp group vela han nawiho changa pvt thlenga min umzui ching ang hi.." a ti duah a. Dik ka lo ti! Kei pawn ka hre nual. A ruka an lo vei sa chu nise ka la hrethiam, groupah vawi hnih khat an han nawi ho va, pvt-a va ngampa nghal viau te hi.. kei tak hi chu ka nawi khat bakah groupah hian ka awm tam ve lo va, tiang hi ka la tawng lem lo. 

Ban velah ka haw nghal nal nal. Desy nena haw dun ziah chuan nikhat a kal loh pawh hian a hrehawm hman. Au Bawiha'n Parvula damdawi min chah ka lam tih loh chu khawiah mah ka peng kawi lo. In ka thlen chuan Viteii chiah a lo awm. Ka nute chu an kalna a hre lo, ka pa erawh a thawhpui hlui, rei tak a hmuh tawh loh damlohna avanga hmunpui rawn pante kan turin a chhuak tih a sawi thung. Zingkara nuteii bungrua an va la kha an rawn lêt hmain ka kal ta sia, Viteii ka zawt a. "In hnuaiah a bungrua chu an dah.." a ti. An va la ve tak tak a nih awm chu. Ka nu nen an ṭangrual sia, ka chêp sawt ka hlau deuh. Mahse, ka nuteii tak tak a ni lo tiin ka inhnem leh thuai a. A engahmah hmaa mil loh ngawt erawh ka duh miah lo thung. Ka inbual hmain Viteii ka pui zawk zawk a,a Telhâwng kan ka tem chu tui ka ti nasa mai a, ka tem ka tem mai. Mahse le, ka hrawk an thak tak tak mai a! A va hrehawm ber tak, tui ka in thul, chini, chi thlengin, a reh hleithei lo. Ka inbual a. Ka inthlak laiin ka nute ṭawng thawm ka hria.. ka sam ka chhem ro laiin ka nu a rawn lut a, "I pa hi call teh,ka call a chhang thei lo, a la thinrim a niang, a rei em mai " a rawn ti a. 

Ka call ve mai bawk. Mahse, a la thei bik chuang lo. Ka û te rawn hawn hnu pawn ka pa hmel hmuh tur a awm si lo. Call tal la se a ṭha tur. Mama chuan khawi damdawi inah nge a kal ka nu a zawt a, "Ka hre lo, ka lo zawt sî sê si lo va" mangan hmel tak hian a lo ti a. 

Viteii chuan, "Phone-a an inbiak lai kha chuan Civil Hospital an sawi ri tlatin ka hria" a lo ti var a. Mama chuan, "Ka han lam ang e, ani hi ke-a lo hawnte a tum a ni pek ang" a ti a. Au Bawiha scooty a chian loh avangin taxi a hire kha a nia. Mama chhuah hnuah pawh vawi tam kan call, a la thei ngang lo. Ka nu lah a vei sek bawk. Au Bawiha pawh chuan, "Ani hi a bp te hi a sang thut ang a, engtin emaw a han awm em mawni le" a ti a ti ve mai. Dar 7 a ri lek lek tawh, chutianga rei engmah sawi lovin tumah kan thang ngai lo. Kan chin tur kan hrilh hram hram zel..

Mama chu ka mangan deuh avangin ka call ta ngawt a. 

"Ka thleng chiah, ka hmu lo reng reng..Dr. Hminga number kha i nei tiraw? Lo call teh, a ṭhianpa a nia, a lo hmu te a ni thei" a ti zung zung a. Ka call vat. 

"Ka pu, Teberi kha ka nia, ka pa a lo kal mial em?" Ka ti a. Pu Hminga hi Civil Hospital doctorah chuan a senior pawl a ni tawh, zah pawh a kai hle. 

"E ni maw? Chawhnu dar 1 bâwr velah khan a rawn kal a, a ṭhian hlui damlo rawn tlawh ang khan a insawi a. Rei pawh a awm lo, a chhuak leh vut a" a lo ti dam duai a. Ngaih a ṭha ta vak lo hle. 

" Call a la thei si lo va, a chanchin engmah kan hre bawk si lo, kan mangang deuh a, khawngaihin a chanchin i hriat hlauh chuan min lo hrilh ta che" tiin ka ngen ta ngawt a. Ani pawn, "Tehreng mai, hei ka haw dawn mêk a, word lamah te ka lo en kual chhin dawn nia" a ti a. Kan dah ta rih. 

Nuteii chuan, "A ti mak êm mai, U Thanga chu a.." a lo ti ve sek. Mangang hmel pawh a pu pawn ka hre lo. 

Ka kekawra tui ka tihbuak avangin ka va inthlak a, chutihlai mêk chuan ka pa call ka dawng ta! Rang lutukin ka la a. Mahse, hmeichhe aw hian, "Miscall ka hmu a, hei i pa nge i pu hi tunah nikhaw hre loin a awm mêk a. Greenwood hospitalah kan dah lut tawh. " A rawn ti fiah kâk a. Ka ding khawng lah, "Awii! Ka pi, a fanu ka nia, ka pa chu engtin chiah nge a awm?" Ka ti chûl a. Ka chiâi takzet. 

"Hei doctor ten an en mêk e. Stroke niin ka hria. A rang lamin rawn kal ula, hei kan lo awmpui rih ang" a ti a. Hmanhmawh zetin ka va chhuak a, ka nute bulah thil awmzia ka sawi nghal. Ka nu chuan a hmai a hup a, A insût nghal hlawp hlawp, Au Bawiha pawh a phâwk hle. Viteii tak pawh a lo thlabar ve hmel kher mai. Mama ka call leh ta a, chanchin ka sawi ta a, "Ka rawn haw lo vang, ka va tlang nghal ang e. Bawiha hoin lo phei mai r'u,..duh leh chaw kha ei phawt u la" a rawn ti nghal zung zung. Chaw kan la ei lo tih ka hrechhhuak chiah. Ka ril a ṭam êih lo. Mama thusawi chu ka hrilh a. Au Bawiha chuan, "Chaw ei châkna pawh ka nei tawh lo e a" a ti nghal. 

Nuteii chuan, "Kei ka ril a lo ṭâm tawh asin. Bar zawk zawk ila, Mama a kal tho chu..eng chen nge kan thang dawn kan hre si lo" a lo ti vat a. A sawi dik tho mai. Zanriah chu kan ei ta sawk sawk a, kei phei chuan bar hnih emaw lek ka bar. Ka châk ngang lo a ni. Ka pa thichhawnga a lum lai renga chaw lo ei tuam tuam kha ka kâ hian a phal lo a ni mahna le. Kan ei kham veleh Au Bawiha hoin ka nu leh nuteii te nen Greenwood lam chu kan pan ta a. Au Bawiha pawh a tlan chak fia fia e. A mangang ve tih loh rual a ni lo. 

Kan va thlen chuan Mama'n engkim a lo tifel diam tawh a, Cabin a lo la awl hlauh a, chutah chuan an lo sawn lut dawn mêk. Lo awmpuitu te pawh an lo la awm. Nu hmelṭha leh sar vêng vâwng tak a ni a. A pasal niawm tak amah aia u hlek tur zaidam hmel zet nen an lo awm. Ka pa chu oxygen an hîp tir a, engmah a hre lo, a la harh lo tih a ni tawp mai. 

Lo awmpuia damdawi ina lo hruaitu te nupa chuan ka pa hetianga a awmdan vel te chu an sawi ta a. 

"Saw lai lawk kawng ânah sawn Restaurant kan nei a. Kan nupa hian kan nghak mai zel.Kan riahchilh bawk. Dar 5:30 a la ri lo deuh ang, chu mi bâwrah chuan i pa hi a rawn chawl a, mi nghah a neih thu a sawi nghe nghe. A hnu lawkah hmeichhe pakhat, hmel pawh chhe lo tak hi a rawn lut a, i pa nen chuan an inkawm ta a. Thlang lam tukverh bula ṭhu an nih avangin eng nge an sawi kan va hre lem lo. Eitur an ei pah bawk. 10 mins vel zet an inkawm hnuah i pa chuan a thil ei lai chu a hak ta bawrh bawrh a, hmeichhia khan rang takin a hnung a va chumsak a, a zia mai theih tak loah chuan kan pa hian a va pawm kang a, engtin tin emaw a sawngbâwl... A thaw hrâwp hrâwp kha a reh tawh nain a zawi vek a, engmah a hre ta lo ringawt mai a ni. Mangang takin damdawi in hi kan pan ta a. An lo ngaipawimawh bawk a, tun hi tihian kan thleng ta chu a ni mai..hmeichhia pawh kha a awm ve ren râwn a. Call a dawn avangin hmanhmawh takin a chhuak ta a nih kha.." tiin..

Au Bawiha'n rang lutukin, "Tu nge chu nu chu ni ta ang le?" A ti a. Kan melh ṭhap ringawt. Mama'n, "Engpawhnise, nunna êm kan inchân lo va, a lawmawm lamah ngai ang u. Ka pa pawh a ṭha chho mai ang" a lo ti lûam a. 

Ka nuteii chuan, "U Thanga hian hmeichhe dang a kawp te hi a ni thei ang em? Dam lo kan tur anga chhuak si, helai daih daiha hmeichhia a va hmu leh daihte chu.."..a lo ti khanglang. Rum zeta melhin, "I rilru chu leh!" Ka lo ti hmak. 

Mahse, ka nu chuan, "Malsawmsak, khatin ṭawng hmuk zel suh. I nuteii khan a sawi dik lo hran hleinem. Damlo kan tura chhuak, hmeichhe hmuha kawm, a hnu lawka nikhaw hre lo va awm te chu rindan tâwk kan nei vek" a lo ti ram hmak hmak a. Ka thinn a va rim tak. Ka ṭawng hmain Au Bawiha'n, "Ngawi hmak rawh u. Ka pa hi chutiang mi a ni lo tlat..Nute, i pasal nen tehkhin buangbar duh suh, i pasal nen chuan lei leh van ang vel an ni.." a lo ti chang fak..Mama erawh chutihlai chu a phone hman lai a nia, kan thusawi a rawn hre ve lem lo. Pi Masiami leh an pate chu lawmthu kan hrilh mawlh mawlh a, an ni chu awm lo se ka pa hi kan chân maithei a ni. Khawi emaw kawmkarah te tlu ta thut se…ka ngaihtuah ngam lo. Pi Masiami te hawn hnu lawkah Mama chu a rawn phei a. "Engtin nge ni ang? Tuin nge riahpui dawn, Nurse te sawn an hre duh a" a rawn ti a. Keiman tih ka tum lai takin Au Bawiha bawkin rang fahran hian, "Keiman..Mam, nang chuan in lo uap rawh. Keiman a damloh chhung zawng ka awmpui dawn" a lo ti vat. Mak ka ti deuh naa engmah ka sawi lo. Ka nu chuan, "I ti âng lo êm mai, keiman le..nang chu in hna a laklawh kha..bakah kei berin ka awmpui lohte chuan mawi pawh a mawi nang" a lo ti duam duam a. 

"Aw..ka nu nen kan awmpui mai ang..hna chu Zorama te kutah ka dah thei alawm" Au Bawiha chuan a lo ti leh hmiah. Awmpui a tum ruh lutuk chuan ka ngaih a tiṭha mang tlat lo. Mama pawh chuan, "Nia, mipa tu emaw zawk zawkin kan awmpui tel a ngai ang, eng emaw thulhah" a lo ti bawk. 

Ka nu chuan,"Bawiha, i mangang mai mai a nih kha..keimah chauh pawn ka awmpui thei lutuk, i nuteii pawh a awm a..Teberi erawh class a kal a ngai sia..i hna ngaihtuah zawk rawh" a lo ti sasawi a. Ka pa nena kan thil sawi dun kha ka hrechhuak, Au Bawiha ngeiin midang nena ka nu a hmuh dun thu ka pa a hrilh a, chuvang chuan ka nu chuan Au Bawiha nena ka pa awmpui chu a hreh a nih ka ring. Mahse, keimah sawi angah khan a ngai tho bawk si. 

Au Bawiha lah chuan, "Ka pa aia pawimawh a awm hleinem. Hna tih vel mai mai..a ho lutuk" a lo ti awlsam êt si. Hnial ngaihna a hre ta lo nge ka nu pawh a ngawi ta hle hle a. Tihtheih engmah kan nei si lo va, mamawh eng eng emaw kan lo ken lâwksa avangin Au Bawiha leh ka nu chu an riak nghal dawn a. Kei leh Nuteii erawh Mama rualin kan haw ta thung. 

Rilru a nuam thei thlawt lo. Ka pa chu engtin emaw a awm thut ang tih ka hlau ngawih ngawih. Stroke a nih chuan a hma a pha tawh dawn miah lo va, amah upa lam a lo ni ve bawk nen..ka ṭawngṭai reng mai. 

Zorina pawh ka hrilh ve a, "A va pawi êm êm, Zunthlum a nei sa mi?" A ti a. 

"Nei nang..a bp pawh a normal ṭhin. A pension hnu hian ram hna a thawk zauh zauh a, bakah zing karah a walk thin bawk nen..tiang ang hi chu a nei lo" ka tih chuan,"Doctor ten test te an nei nghal rup rup em?" A ti leh a. A mi zawh dan chu mak ka ti deuh. 

"Nu Masiami te sawi dan kha chuan neih pawh ka hre lo, stroke angah khan an ngai tawp a nih ka ring. Ngati nge?" Ka ti a. 

" a..ka ti mai mai, chutianga zunthlum te a neih loha a BP te a ṭhat si chuan, han stroke ngawt kha ka hrethiam lo deuh a, mahse, medical term lam hi chu zir mi nih loh chuan kan hre lo ve êm a.." a ti nuah nuah. Ka pa nat danah ngaihṭhat lohna a nei tih ka hrethiam mai. Ni e, kei pawn mak ka ti, ka pa hi BP sang, zunthlum, thisen sang nei ngai lo a ni a. Mei a zu lo va, eng emaw châng hian ṭhenawm te thlawr tuibur han hmuam zauh a ching ve. A tlangval laiin chhiatpui khawp zu a in ngai hek lo, pa a nih hnu phei chuan a sim ta daih kha a nia. A insawisel ngai mang lo. Hmanni deuha a aw chhang thut leh a chaw helh zeuh zeuh vangin an han inentir kha a ni mai a, kha pawh a aw bâwm lam an lo puh daih bawk si. 

"Enteh, Zôr,.ka ngaihtuah ang hi i ngaihtuah ve mi?" Ka ti thâwr a. 

"Eng nge i ngaihtuah chu ka hre lo naa, kan rilru a inang maithei" chu a rawn ti lawi a! 

"Ka hrethiam lo, Doctor ten engmah an sawi si lo va" ka ti ringawt. 

"Nia, bakah nangni lamin rinhlelhna in nei si lo va, report in thehluh bawk si loh chuan hmalak ngawt ngaihna a vân hmel. Doctor ten a kawchhung lam zir chiang se a ṭha ngawt ang. " A ti ve leh duah a. Nu masiami te kha chuan kha lam kha an sawi vak lo va. A stroke chhan hi a BP emaw zunthlum neih vang emawah an ngai nghal a ni maithei. A tlangpuiin Stroke kan tih hi thisen sang, Zunthlum leh BP sangah hian a thleng duh a. An ni deuh vek ang tih theih tur a ni. Chutihrualin khatia a thil ei lai a han thaw hrâwp hrâwp leh a thil ei a hak te, a hnu lawka nikhua a hre lo zui ringawt kha a mak dangdai êm a ni. 

"Naktukah test neuh neuh chu an nei dawn, an hre maiin ka ring. " Ka ti a. Kan inbe rei angreng. 

"Insual chu i tum ta maw?" Ka tih chuan, "Tum ta mai. Ṭhian ten min phurpui bawk a, bakah ka mamawhna i hriat kha" a rawn ti chuai raih. Ni e, ka hre mah mah zawk a ni. Chutihrualin an insualna lamah eng emaw thleng palhin amah ramtuilêilo ten awmzui ta se..a û leh a pate tan chuan vanpui a chim a ni ringawt dawn..chutiang thleng chuan ka ngaihtuah lo thei lo. 

"Ka pa a lo rui haw leh a, ka'n buaipui lawk ang e" tiin a dah ta rih a. A pa ruih thu pawh a zêp ta bik lo. Ka va hmu ve vek bawk nen. Kei pawh awm nuam lo ru fêin ka tei ka tei. Viteii pawh a rilru a hrehawm tih ka hre thei. Desy a rawn lang ta a. "Sawtah Lalnui te inah chaw kan ei phei daih a, chanchin min rawn hrilh ve tur che lawm" a ti mawlh mawlh a. Ka hamhaih atalângin tumah ka ṭhiante ka la hrilh lo. Boruak a uap deuh vangin bathlarah kan va ṭhu chhuak a. Ka pa natdan leh tuna a dinhmun te ka sawi ve bawk. 

"Pa Thanga chu a va'n mak ka ti, pa hrisel ve tak niin ka hria asin. Sawta an chawlhnaa an eiturah khan a huat zawngte a awm em mawni le..mahse, nikhaw hre lo va han awm tawpna tur êm chu a nih ka ring si lo" a ti nuah nuah a. Zorina nena kan inbiakna erawh ka sawi ta rih lo. Desy ka rin loh vang ni loin kan rinhlelh ang kha a nih loh chuan a buaithlak. 

"Des, thil hrilh tur che pawimawh deuh ka nei tak asin" zawi sap hian ka ti a. 

"Sawi la, i hmelah khan eng emaw inkap ṭûn chu a awm rêng a ni" a lo ti vat. Ka aw ka thian tê tê a. 

"Englo a nia, mak i ti maithei. Fa lâk ka lo nia.." ka ti ta a. Desy hi chuan a hriat ve ka duh tlat a ni. Ka laizâwn ang kha a ni miau a. A ngawi dat a, a melh ngai a melh ngawt ngawt. A ṭhawng ve deuh niin ka hria. 

"Tu nge sawi?" A ti sap a. 

Ka nu aṭanga ka hriat dan leh ka pain thudik min hrilh dan zawng zawngte chu ka hrilh fai ta vek a. A heh a pet a, min rawn enin, "I ṭha tiraw?" A ti a. Ka bu nghat. 

"Te, ih maw, kei pawn hei hi ka rinhlelhna a rei tawh alawm. U Bawiha nen in kum inthlauhzia te, bakah i chhungkua te zingah tumah i chhun miah lo te hi..I tê lutuk bik te…mahse, adopt ni tur êm chuan ka ring phal ngai lo che a. Tunah thudik i hre ta chu a nia. I danglam phah em? I û ten i hria tih an hria em?" A ti mawlh mawlh mai. 

Ka nu leh pate chiahin an hriat thu leh ka u ten ka hria tih hre ve lo se ka duh thu ka sawi ve nghal a. A bu nghat nghat mai. 

"Engpawhnise, mi te pawh an tam alawm..fa lâk te chu, tikhawp hian an hmangaih che a..tiraw" min hnem tum takin a ti a. 

"Nia, ka nu diktak pawn min enkawl se tiang dinhmun hi ka thleng zo kher lo maithei zawk a ni. Ka vannei letling ka ti" ka ti ve a. 

A nuin a rawn call a. "Hei Zara te an lo kal, lo phei rawh" a rawn ti. 

"Ka phei phawt ang. Naktukah dam chuan i pa chu kan va tlawh dawn nia, min lo nghak la aw..ka scooty zawk kan keng dawn nia" a ti a. Kan inmangṭha ta a. Kei pawh mu turin ka inbuatsaih a. Viteii erawh tv a la en, Tleirawl tih takah Korean a atchilh a. A la en ngat ngat mai. Au Bawiha'n min lo call a, "Tei, Siama te an lo kal dawn a, ka roomah khan ka helmet hlui zawk kha a awm, lo pe lawk ta che. An hawh duh a" a ti a. 

"Zan zanah" ka ti hlak. 

"Zinga rawn kal aiin an ti a nih kha..lo pe lawk mai rawh aw. " A ti a. 

"A pa chu a la mu reng a mi?" Ka ti vat. 

"Umm, a ngai reng. Ngaihṭha deuh khan lo awm rawh u" a ti a. Kan dah. Muangchâng lovin in chungah ka chho a, Au Bawiha roomah lut nghalin a helmet chu ka la, ka chhuak nghal. Ṭhutkhawmna pindan ka thlen chuan ka hma zawn chiah bathlara Mama ding leh phone-a tu emaw a be mawlh mawlh chu ka va hmu a. Ka rilruah eng nge lo lut ka hre tawh bîk lo. Ka nu nena kan laka thup an tum ka hriatchâk luatah thawm dim takin ka phei ṭhem ṭhem a. Darthlalang chhan aṭang chuan a hriat hleitheih loh, a chhah ve bawk a. A ṭawng tui bawk a tiin darthlalang chu ka nawr tawlh hret hret a, ka hre thei ta e. A biak ka hre lo naa, "Ka farnu hi ka hmangaih a, ka nau tak tak nen ka en dan a inang reng. Thil kal tawh sawi chhuaha dik lo taka min puh in tumna hi bansan rawh u. Engmah tihsual ka nei lo. Ka pa dam loh mangan laia min lo tibuai sek hi ka kham tawh. " A ti chhum hmak hmak a. Keima kaihhnawh bawk maw?! A va hahthlak tak êm. Ngaithla zawm ngam lovin ngawi rengin ka chhuk leh ta a. U siama te pawh kar lovah lo kalin helmet ka pe a, an chhuak nghal. 

Ngaihtuahna buai tak nen khumah ka mu meng kar a. Phone pawh ka khawih peih lo. Ka hriat loh kârin ka lo muhil ve hram. Zinga ka harh pawh chuan mut ka kham bawk a, ka harh vâk mai. Ka rilruah ka pa a rawn awm hmasa ber. Khumah ṭhuin ka ṭawngṭai a. Atheist kan ni lo nawmna pakhat chu kan mangan vawrtawpah pawh auh tur leh ngen tur kan la nei a, kan thla a la muangin beiseina kan la nei thei ve tlat. Atheist ho chuan chhel tawp bak kawng dang an nei lo. Kan hlêp vena ka ti mai. Kei pawh Pathian thuawih tak tiin mi ten min sawi kher lo maithei, mahse, ṭawngtai kher kher hi chu ka theihnghilh ngai bik lo. Mama pawh a lo tho tawh a. Kei chu hrehawm ka ti, engkim hi ka ngaihtuaha ka vei zui chuan ka buai telh telh. Ka nu leh Mama ber kha ka buaina an ni ṭhin a. Ka laka an zêp thurûk kha chhui chhuah ka duh ve hle a nih kha..mahse, ka tan chetlak ngaihna hlawl a awm lo. Ka pa heti hi a ni leh ta bawk si. Damdawiina ka awm hnuhnun zawka ka nuin a biak hmeichhiate kha hriatchhuah tum pawh ni ila a ngaihna a awm ngang si lo. Mama biak fô lah hmeichhia nge mipa tih ka hre si lo. A laklawhah ka thên a, ka kual ka kual chu a nih hi a..

Class ṭhulh ngawt khan awmzia a nei lem lo bawk a, ka insiam sawk sawk. Desy pawh a rawn phei hma angreng. Nizana a bula ka han inbunruah khan ka zia hawk chuan ka hria. Falâk ka nih avang khan min ngaihsak thar thut ang tih ka hlau mah zawk, a pangngai ang vekin thil hi awm se ka duh ber. Tlan pahin Zorina, Ultimate fighting-a a tel tur thute ka sawi a, "Awii, a tawk den thei bawk sia ..i bialpa hi chu aw" a ti vawng vawng. 

"Nang pawh Timothy hi i va sawi khât ta ve..boruak in nei zui lo nge?" Ka tih chuan, "Chu chu lawm hrilh che ka tum..kha i hria anga, min lo nghak rawh a tih vel kha..ngaihṭha deuhin ka lo awm ve a. Nizan khan ka mut tawh hnuan a bialnuin min lo call pek a! Ka zahzia chu aw..ka rawn call dawn ut ut che a, mahse, i mut tawh takin ka tia" a ti bawrh bawrh a. Mak ka lo ti viau. 

"Chuan.." ka ti vat a.

"Ka block vek tawp..ka na, ka zak, ka thinrim bawk. A ṭha nghah nan emaw spare part-a min lo hmang kual kha ka lawm lo, amah Timothy pawh ka ten phah vek" a ti hmarh hmarh a. 

"I huata i hlat theih chuan a ṭhat nasat chu..dik tak chuan kha kha ka rinsa a nia" ka ti ve hmiah. 

"Nia, tunah chuan mi thar hlak ka melh tawh dawn..hmu zo lo pawh kan ni bik hleinem tiraw?" A ti ham ham a. Desy mize dik tak ka hmu leh ta bawk a, ka awm a nuam sawt e. 

Ka pa chuan ka rilru kap deuh tho mah se; exam a hnai chho ṭan nen, Lecture pawh ka ngaithla uluk ve viau. Lawmsanga a rawn kal lo. Puipuii nen kan inkawm a, kawm a nuam ve reuh phian. A hlim thei bawk si. Banah Desy nen ka pa tlawh turin Greenwood Hospital lam kan pan ta a. Au Bawiha ka be sa bawk. Kan va luh chuan ka pa chu a lo meng kuau a, mahse, a mitmeng buai leh â ruai mai avang chuan ka lawm tur ang pawn ka lawm thei lo. Min lo melh vung vung ringawt. Ka nu intifai leh mamawh lam pahin a haw lai a ni a, Au Bawiha pawh kan awm lai chuhin zial zu turin a chhuak vat. Ka pa kut chu ka vuan a, "Pa, min hria em?" Ka ti sap. En chu min en ve, mahse, min hre lo niin a lang. Ka hrilhhai hmel chu Desy chuan a hrethiam nge, "Pa Thang, lo dam vat rawh aw..kha i hmel hmuh pawh a nuam lutuk" a lo ti ve zung zung a. 

Au Bawiha zial zu zo rawn let chu, ka pa test result te ka lo zawt vat. "A Bp leh engkim a ṭha vek sia, a thawhah zeuh zeuh ṭhin bak kha chu engmah ṭhat lohna a nei lo, Doctor te pawn mak an tia.." a tih chuan ka lungphû a rang hle. 

"Chuan, eng vang ber nge hetia a awm le?" Ka tih chuan, "An la en chho zel turah ka ngai ringawt. CT scan result an la sawi thei lo va..kan hre vat ang" a ti a. Ka thaw hawk ringawt. 

"A nih, Amah hi a ṭawng tawh em?" Ka tih chuan a lu a thing nur nur..beidawn hmel zet hian, "Hriat pawh min hre lo " a ti sup a. Ka hnuk rawn ulh avang chuan ka ṭawng tur pawh ka ṭhulh leh daih. Ka rilru a hah thar thut a ni ber. 

Desy chuan, "Phai lam vel engmah an la sawi lem lo maw?" A lo ti ve a. An la sawi loh thu ka u chuan a sawi. Ka nu rawn thlen hmain kan chhuak a, "Ka lo riak ve tawh dawn mi? I chau awm sia" ka tih lahin a phal der si lo. Amah ngei riah a duh tlat pawh hian chhan eng emaw a neih ka ring tlat. 

Mama te nen kan pathum tlawnga Zanriah kil chu a nawm dan a nuam lo. Eitui pawh a har. Viteii pawh a zia a zâwi kher mai. Zorina rawn len a tum bawk a, Mama chhuak pawh chu ka lawm ru viau. Dik tak chuan ka ipik êm mai a, ka bialpa bula awm chu ka thlahlel lo thei bîk lo. A rawn thleng har lo ani pawh. Kan inngheng chat a. Ka pa chanchinte min zawt ve luam..kei pawn a u dinhmun ka zawt ve bawk, a ṭhat thu leh a pa zawk a ngaihtuahawm thu a sawi. Tun hnaiah zu a in nasa zual a niawm e. A hrehawm ngawt ang. 

Viteii nen pawh an inbia an inbe ve tawh a. A lawmawm. Bathlarah kan ṭhu chhuak a, juice kan in pah bawk, boruak a lum deuh bawk a,chutia kan ṭhuchhuak chu kan dai sawng sawng mai. 

"I pa chu aw..kei engin emaw min mawlh run tlat nia..ka sawi thiam lo" a ti leh thin a. Chutitaka ka pa a vei leh enghelha a nei chu ka lo lawm ve tumhrang. 

"Zirtawp zan aṭangin Ultimate kha kan ṭan dawn a. Ka tumpui tur hi a huphurhawm angreng, a chak ngawt ang" a tih chuan rilru tihzangkhai nan ka sawipui zui ta zel a. A bitum tur chu Ramhlun North ami Remsanga a ni a, ka la hre ve lo. Boxingte pawh lo khel ve hrep tawh a niawm e. Knock out system an hman dawn avangin a tir phat aṭanga ṭan a pawimawh dawn viau. Chutia a field tak taka a zuanluh ve dawn takah chuan ka phurpui lo thei lo, support lo ringawt ila a tum a ṭhulh phah dawn lo va, ka hrehawm mai mai zawk dawn. 

"Tun hi tel la, a hnulam chu thildang ti zawk tawh rawh" ka ti a. 

"Nia, ka tum alawm. Sum hlawm ka neih theih hunah keima pualin workshop changtlung ve deuh siam ka tum" a ti ve a. 

"I u hi a kal leh theih i ring em?" Ka tih chuan, a ngawih vang vang hnuah, "Aw..ka beisei, mahse, a bulah chuan beisei sang lutuka awm ka duh lo, ka tina dawn a" a ti nghut a. 

"I û hi i hmangaih ê..i fel ka ti" naupangchhia deuhin ka ti a. 

A nui suk, "Ka tan nu leh û chan a chang a, ka rulh ve a ngai alawm" a ti a. 

"Zôr, sawi nuam chu a ni lo maithei a, mahse, i nu kha engtia boral nge?" Inthlahrung deuhin ka ti a. 

Ka beksam rawn zût pahin, "Ka hming i thlûk vangin ka sawi hram ang" tiin a nui hak a. Ka lo nui ve bawk. 

"Ih, ka hre vak hman lo kei chuan, kum 2 ka tling âwrh a, hnute pawh ka la nghei lo..a khawsik a thluakah a lut an tia.." a ti bân chhalh a. La sawi zo lo nia ka hriat avangin ka lo ngaichâng, "Chu zawng chu..ka nu chanchin hi sawi ve vak tur ka hre lo..ka la tê êm a. Engmah ka la hrethiam lo alawm" tiin min rawn en a. 

Falâk ka nih thu hi a hria ang em le tih ka ngaihtuah. A nu a boral avangin vanduai tak niin a inhre maithei, mahse,ani chu a û leh a pate nen thisena inzawm an ni. Kei erawh ka chhungten min hmangaih êm êm chungin ka hrang bik bawk si. 

"Thihna hi chu a na êm alawm..i pa hian nupui dangte neih ve leh mai tur alawm le" ka ti duah a. Ṭawng sual erawh ka hlau ru viau. 

"A duh lo a niang, nei rawh kan ti reng" a ti ve mai. 

Kan ngawih rauh rauh laiin min rawn fâwp thut a, zanin chu kan free bawk a, kan duhthawh dun ve hle. Ani pawh a danglam tih ka hai lo. Chutia kan inkuah vawng vawng lai chuan, "Malsawmsak.." Mama ṭawng ri chuan min tiphu chiang kher mai. Tukverh bulah chuan a lo ding run mai a. A lungawi lo tih chu a mitmeng hriam hraih danah a lang chiang kher mai. Kan tho vat a, Zorina erawh hlauthawng hmel a pu lo. 

"Zorin, ka nau hi a falin ka lo be lawk ang e. " Mama chuan a ti chhum leh hmak. 

Zorina pawh chu in chhungah lutin, "Te, ka va haw ang. Ka rawn bia ang che.." tiin min rawn melh zauh a. A kal tur chu Mama chuan, "Lawkin Zorin, rawn be tawh miah lo turin ka duh che a ni" a ti leh hmuk. 

Zorina a ding chawt a, rawn inher lehin, "Ka ṭhen dawn lo ka tih kha" a ti nghet ve charh. Hlauthawng takin an pahnih chuan ka melh tawn zak zak a, "Ani hian a ṭhen thung dawn che a ni.." inringtawk zeta Mama'n a tih lai chuan rang lutuk hian, " A teuh lo" ka lo ti tuar..

"I ti tho vang" Mama'n a ti hluk. Zorina chuan Mama chu melhin, "Ka kal ang. Engpawhnise, Teberi hi i kut hmawr pawhin khawih miah suh. Upa zawk mah nila, ka bialnu a ni tih theihnghilh suh" a ti nghet leh charh charh a. A kal zui hmiah. 

Mama nen kan inmelh ngat ngat. Ka hlau miah lo. Ka thinrim tawh lutuk zawk. A chhan fak sawi tur nei miah si lo va, Zorina a hmumawh lutuk hi amah chawp chawp hian ka hua..

Ka pindana ka lut tur chu min rawn pawt lawp a! 

"Eng nge?" Ka ti fiak ṭhak. 

"I nat ka duh lo. Chu chu nangtê reuh hian i hrethiam phak miah lo a nih hi" a ti tuar. 

"Ka na lo vang, ani khan min hmangaih" ka tih lai chuan za fê hian a nui a. Mi run lutuk chu ka ṭap lek lek tawh. 

"Min hmangaih a?! Wow! Nang hi hmanrua chauh i ni. Hmanrua..Zorinsanga hmanrua..a chiang em?" A ti khur khur mai. Ka ding mar awt a, hrilhhai zetin ka melh tlawk tlawk..

"I sawi awmzia pakhatmah ka hre lo" ka ti zawi sap. 

"Lo kal teh.." tia in chunga min kaih chhoh a tum laiin ka nuteii a mu tawh emaw ka tih kha a rawn lang thut a. 

"Mama, i pa Hmaa'n min rawn vau leh a, ka hawn loh chuan, intihhlumah min rawn vau leh tawh..khawngaihtakin min va kalpui hram teh, a ti leh duh tak tak ang" tiin a ṭap pur mai..

Mama a ner sawk..min chelhna chu a thlah a , chiang taka min melhin, "Va mu la..inngaihtuah hah suh ang che. Ka rawn kir vat ang.." a ti dam thlup..a hmaa a sakeizia kha hmuh tur pakhatmah a awm lo. 

Ka nuteii nen an inzui chhuak lai chu thlir liamin ka phone ri ral ral chu ka lek kang a. 

"Aw..Zôr.." ka ti zawi sap..