Zor - 1

ZOR.. (1)

Ziaktu : Toni Râlte

Min rawn kuai her sawk a, makti zeta ka melh laiin, "Sangbera nau kha i ni tiraw?" A ti fiah kâk a. A mi vawnna kut zût thlak pahin, "Ni e. Ti nge?" Ka ti nghat a. A polite vak lo chu ka ngei deuh. Nula lian leh hleitling, sam buang thâng, hmelṭha zet mai a ni a. A dress pawh class rem rem tak a ni. 

"A lo la haw lo em ni?" A ti leh a. 

"Naktukah a rawn haw ang" ka ti ve mai a. Khi leh sak chungin, "Ka hre duh a, ka lawm e..ka nau tur i la nih hi" tih pahin ka chhipsam a rawn tuai thuak a. A kal nghal daih. Enzui vawng vawng chungin, "Mama bialnu i nih si chuan, ti nge a lo hawn hun tur pawh i hriat loh theih!" Ka ti sap a. 

Malsawmsaki ka ni a. Mahse, ka hmingpum hria hi an tam lo. Tupawn 'Teber' tia min koh vang a ni. Û pahnih ka nei a, kan upa ber chu tuna nulain min zawh Malsawmdawnga kha a ni a, ani pawh kan unau zingah a len leh san ber vang nge ni dawn ni, 'Sangbera' tia koh a ni ṭhin. Ka û chiah leh ka nu leh pate nen chuan, 'Mama' kan ti thung. A chhang chiah hi Malsawmtluanga a ni a, "Bawiha" tia koh vek a ni ve thung. Kei chuan, "A û' ka ti. Kei hi ka piang tlai hle a. Ka û chiah nen hian kum 6 laiin kan inthlau. Kum 23-na ka hmang ve mêk a, MZU-ah Grography zirin 3rd sem kan kal mêk. Kan upa ber hi kum 32 a ni tawh a, a nau chiah hi 29 a nih chu. Mama chu a graduate hnu lawkah a ṭhianpa nen sumdawnna bul an ṭan chho a, mite anga hlawhtling erawh a la ni lo. U Bawiha erawh zirna lam a tui hlawl loh avangin Class xii a pass ve hram a. A kut a themthiam hle a, ka pa puihna leh loan puk belhin kan in aṭanga hla lo takah furnature workshop a nei a, Mama hian a thil siamchhuah te chu ram dangah leh Mizoram hmun hrang hrangah a thawn chhuahsak ṭhin. Kan chhungkaw sumbâwma lut khawm vek a ni bawk a, ka û te pahnih thawhchhuah ringawt paw'n ka zirna senso hi chu a tum thei var var awm e. Ka pa chu Lalsawithanga a ni a, High School zirtirtu niin nikumah khan a pension ve tawh a ni. Ka nu erawh Lalthanpuii niin , engmah a thawk lo va, pangpar khawi leh chin a tuichilh nasa, hralhchhuah chângte pawh a nei ve fô. Ka nu leh pate hi an kum a inthlau viau a nih ka ring, ka nu hi a la valaiin amah inenkawl uluk mi a lo ni bwk nen, pafa te pawh an âng dawn lek lek zel. Ka tleirawl chhuah phat aṭangin ka û nena kan inthlau lutuk chu mak ka ti ṭhin a. Ka nu ka zawt hial, "I û nena in inkarah hian nau ka chhiat a, ka hriselna lam dinhmun avangin Doctor ten in dang rih turin min tia, mahse, hmeichhia kan awt ve si..tihian kan nei leh ta che a ni" a ti siam siam a. Teber tih takah ka tê êm êm a, zêp thu a cheng lo. Teberi min tih chhan pawh hi kan unau zinga ka tet ber vang pawh a ni vek lo, ka rualpuite ka tiat lo deuh vek a tin ni. Ka û te pahnih an len tehlul nen, U Sangbera phei chu mizo zingah mipa sang thlang dawn se top 5-ah a lan ka ring. U Bawiha erawh a vantlang a ni a, a te chhe hran lo. Ka sam hi siamchawp ni miah loin a kawi deuh niaih a. Sam han enkawl vel ka zeihawi lo bawk a, a dum tawp mai. 5 ft chu ka tling ve ngawr ngawr. Ka tet avangin ka thau chuan barrel ka ang dawn tih ka hriat ve kar avangin Mama gym-ah zingkarah ka chhukthla ve ṭhin. In hnuai hi luah theihin kan siam ṭhin a, mahse, Mama hian home gym siam a duh avangin kan tiruak a. Chutah chuan ani chu tlai tin exercise a la ṭhin. U Bawiha nen zingah kan ti ve thung a. U Bawiha erawh a regular lo, kei erawh Mama hian piannalh a ngaisang êm a. Tê mah ila, ka body shape siam a ngaipawimawh si. Ka thawhrimna zara ka neih ka kawng fêk rât leh ka mawngbawr vâwng lah te, ka hnutê kawh lahte avang chuan ka tet ang aia piannalha sawi ka ni ve tho. Model erawh ka ni ngai lo vang, ka height hi a ngaihna a awm lo. Nih pawh ka châk hek lo. Ka vun chu ba êk ngo an tih ang deuh, var hlung kha a ni ṭhin a. Mawi lo ka tih êm vangin inbual hma hian in chungah ka inpho ṭhin. College ka zawh aṭang khan ka tawpsan ve chiah. Tunah chuan vun eng leh ti sen te ka nei ve ta deuh e. Ka nu hi hâng ngaihnobei kan tih ang kha a ni leh daih a, ka pa erawh a êng lam chu a ni ve. U Bawiha hian ka pa chu hmelah zawng zawng nen a chhun fai vek. Mama erawh u Bawiha ai chuan a hâng deuh, mahse, mawi lo khawpa hâng a ni lo. A inenkawl uluk bawk a. Kei erawh ka nu leh pa ka chhun kawp nge chhun zawk ka neih âwm pawh ka hre lo e a. 

Kan unau hminga 'Malsawm' a awm vek hi a mak in lo ti maithei a ni. Ka pa hming sak vek kan ni. Pathian malsawmna dawng a inti deuh a ni mahna. A ni ve bawk a, Pathian zarah mite aiin neinungin hausa lê lû lo mah ila, vantlang chin kan ni ve a. Kan veng Bethlehem vengah phei chuan a khawsa thei pawl kan ni ve ta a. Mama leh U Bawiha ten thawhchhuah an lo nei ve ta bawk nen. Nikum hmasaah khan kan in piaha kan ramah tho tuna kan chenna in hi kan sa bawk a, Mama design vek a ni bawk a, ani mit lerh leh hetiang lama rual êl ta chu kan in pawh a nalhin a dangdai a, western kan ngaisang bawk nge , a western zaih mai. Kan in hlui erawh ka pa farnu ka nî Zaui nen an luah thung a. An ni hi vanduaithlaktakin an in leiminin a hnawl pek a, Ka pa hian man chawi lovin a luahtir ta a ni. 

Ka pate unau hi pali an ni a. Ka pa hi a upa ber a ni. Farnu pakhat neiin, Kan in hlui luahtu te kha an ni a. Lungleiah ka pa nau ka patea te erawh an nupui fanaute nen an khawsa thung. Ka nute erawh an zik a bul ve hle mai a. Laizawn pakhat a nei a, nuteii te chu Tuikualah an khawsa ve thung. Ka nu leh pate aṭanga ka pi leh pute ve ve an dam tawh lo bawk. Chutiang chu kan chhungkaw chanchin tlangpui a ni. Ka pa hi a pension takah khan zep nâk emaw a tar bâwih ni maiin ka hria. Chuvang chuan Mama hian a ngaihtuah deuh nge, Tanhril lamah ram zau vak lo a leisak a, tah chuan an taksa ngeih tawka hnathawk turin a ti a. An nupain kar khatah vawi thumte an zu feh ṭhin a. An nun pawh a hlimin an hriselna pawh a ṭha sawtin ka hria. Awmpui neih hi ka nuin a duh ngai lo naa, chutia an feh tak fô avang chuan kei lah class kal ngai bawk nen, U Bawiha zawkin awmpui lak a lo rawt ve a. U Bawiha hnathawk zing ami U Vana te chhungkhat Ngûr khua ami kan awmpui ta a. Tleirâwl mawngzâng leh taima zet mai a ni a. Viteii kan ti mai zel a, ka nu a chhawk zângkhai khawp mai. 

Ṭhian kawm nuamti ve tak ka ni a, ka mizia hi min hrechiangtute sawi dan chuan, Harhvâng ve tak, nuih heh, thawveng, thil phal ve tak, lerh ve tho zei si lo an ti ṭhin. Lerh tih tak khi chu ka tleirawl chhuah ti ila college kan kal lai khan bialpa pathum lai ka nei hman pek a! Chuvangte chu a ni ta ve ang. Zei lo pawh hi an sawi dik. Zakzum ni si lo hian lâi ṭût chi ka ni roh a. Ka confi loh vang te pawh a ni mahna. Mahse, ṭhenkhat chuan inringtawk min ti ve leh viau thung a, ngaihzawng lamah ka inringtawk lo a niang. Ka ṭhianṭhaber chu Desy a ni. Kan in piah lawkah an awm nghe nghe. Tette aṭanga inkawm, zirna in khata zir tlang zel, keimah vanga Geography lak tum ve ngawt, mahse, a tlin tak loh vanga Education la ta kha a nia. MZUah pawh class kan kal lai tih lohah chuan kan inzui reng tho. Kawm ve tho, thurûk engkim hrilh lem loh ṭhian dang pawh ka ngah tho. Desy erawh laizawn anga ka en a ni. Ngaihzawng lamah sawi tawh angin college life kha ka zo lo deuh nge, bialpa ka nei ka nei ve ta a. Mahse, ka tluang viau lo. Min lo kawp loh leh kan duhdan leh ngaihdan inang lo lutuk an ni zel a. Kan inṭhen leh nge nge zel. Ka bialpa tawh zinga ka rilru la luahtu leh a hunlai pawha ka duh ber erawh Lâna a ni. Tuithiangah an awm a. Class xii aṭanga inzuia inngaizawng chho, college thlenga inzui kan ni a. Kum khat leh thla 2 kan inkawp ve hman. Kan kum pawh a inrual chiah. Mahse, A cousin Zodini nen an lo flirt a, ka manchhuak leh ta si. Ka na êm êm a, ka thau phah hle nghe nghe, thil ei lamah ka ramṭang a. Mama phei chuan, "Lâna vanga vawkpui anga awm kher i tum em ni? Han inen teh" min ti khawl khawl ṭhin. Thla 3 hnu velah chauh ka move on thei a ni. Tun thlengin a hmel ka hmuh chuan ka la danglam tho, eng emaw chânga min rawn biak zauh hi a la ching bawk nen. A bak ka bialpa dangte kha chu ka vei zui hran lo. Inhmuh châng pawn ka be bawrh bawrh thei. Tunah tak hian ka single thung. Ka ngaihsak vak peih lo. 

Vawiinah khan Desy û pasal neihnaa hak tur kawr ṭhuitir turin kan chhuak a, dawrah khan kha nula khan ti khan min rawn ti ve tawp a ni. Thilmak a ni hran lo. Mama hi nula lamah a tla na angreng a, a sumdawnna huang a zauh belh zel bawk nen, sum a neih piahlamah amah a chhe loin a pian a nalh si a, a cool an tih ang kha a lo ni chhap nen, a single lai ka hre ngai miah lo nachungin kawp ngawrh, rei tak han zui a nei ngai lo thung. Playboy a ni ti tawp mai ang. Nupui nei rual zawng a ni ve tawh, mahse, "Dinhmun ka la siam nghet tawk lo" a ti deuh tlat mai a! Ka nute pawn an tir hleithei lo chu a nih hi. Desy hi designing tui tak a ni a, a zir lo hi mak ka ti viau. Kan kawr hak tur pawh chu aman a design vek mai. Kan nalhpui êm ang chu maw. Kei aiin a sang zawk a, mahse, a thau lek lek avang hian kan inchen ang hian a lang ka ti mai. Vawi tam indiet a tum ṭhin, eitur a hmuh chuan "A ho êm mai, thau hi a mawi zawk" ti leh thei mai kha a nia. Kei pawh ei leh in hi ka duh viau naa, Mama hian min control khawp a, buh hi bowl khat bak ei a phal ngai lo. Chawhmehah ka inhnangfak mai zel, chuvangin buh, chaw kan tih mai hi ka ngaina tehchiam lo. Ka pa ka chhun nge ei ngai lo ang hrim hian sa hi ka duh êm êm a, sa rim nâm lo va chaw ei chu a da lupin ka hre zel. Vawksa ka duh ber bawk. 

Dawr aṭanga chhuakin a chhak lawk Restaurant an hawnna pawh la rei lem loah chuan inhnawhpuar turin kan chho a. Scooty hi kan neih ve ve avangin class kal dawn hian kan inken chhawk ṭhin. Dawra kan luh chuan an lo tam viau mai a. Thlanglam tukverh bulah hmeichhe pahnih an ṭhu a, an bula chair pahnih bak chu âwl a awm tawh hauh lo. Kan pan ve ta thâwr a. Hawihhawm takin ṭhutna chu min lo kawhhmuh vat mai. Keini ai chuan an phanchang tawh awm e. 

Eitur kan nghah laiin, Desy chuan, "U Sangbera chu naktukah maw a lo haw dawn? Sana ka chah kha a lo hawn ang em le?" A ti niah niah a. Mama pawh hian kei nen min en hrang tehchiam lo. 

"Hawn ang, a hriatrengna a ṭha ve lawm" ka lo ti mai a. Ka bul chiaha ṭhu sam tawi, hmel hmuh nuam zet hian, "Sangbera chu Bethlehem veng ami kha ni em?" Nui sâng chung hian a lo ti a. Ka rilruin, "milar û ka nei a ni ringawt" ka lo ti sap. A ri chuan, "Aw ni e, i hria mi?" Ka ti vat a. 

Khi leh sakin, "Hre mah mah.. a naute em ni in nih?" Tiin Desy nen min melh dun a. 

"Aw hei hi a nau" Desyin a lo ti vat. Samtawi lo zawk, hmai sîn lam chuan, "I û chu a lo hawn hunah, "Mapuii , Khatla ami i hria em?" I lo ti dawn nia" a ti sar sar a. Nichina min rawn be ve ngawttu ai chuan an ni lakah chuan polite a nuam deuh. An ṭawng dan leh hmel landan a ngeiawm si lo va. 

"Tehreng, ka lo zawt ang" ka tih rual chuan, "A ngai lo. A ṭul lo..min hre tawh lo vang. I û chuan" Mapuii chuan a lo ti vat a. A nui mawi ka ti kher mai. Min kalsan hnuah Desy chuan a star kumhlun, Timothy chungchang a sermon leh ta. Huiham..a tui ve hliam hliam thei sia maw. Desy hi a hmelchhe miah lo, hmel zaidam chi, hmai hlai phek phuk a ni a. A ngo bawk. A thau dan lah khal râwng a kai deuh bawk si. Bialpa pawh a nei chhe lo thei fû. Mahse, ani pawh a tluang tehchiam lo,.mipa ṭhenkhat cheap deuh an awm, Desy tawn aṭanga ka hriat, hmeichhe neih eisak tum tlat ang hi. Khatiang kha Desy pawn a tawng ve tawh. An zahtheihlohzia chu phone te zuk ngen ngam a! Ka ṭhentir vang vang. Desy te nen hian kan khawsak a inang thuak âwm e. A nu hi Lecturer a ni a, a pa erawh contractor niin Desy hian û pahnih hmeichhia leh mipa a nei a. Nau hmeichhia lerh zet mai Ruati a nei bawk. A û hmeichia chuan kumin kumtir khan pasal a nei. An lo harsa bik lo bawk nen, Desy lah thilphal mi lo ni bawk chu a bialpate hian an ei an ei zel a. Kei hian ka lo ngaithei ṭhin lo. 

Tuna a star Timothy hi MA (Pol.sc) a zo tawh. Ni e, a chhe lo. Mahse, ka duhzawng a ni lem lo thung. Star tur hi ka melh ve pawn ka la hmu thei lo. Nikum leh kum hmasa lamah Pandemic vangin class kan kal regular hleithei lo va. A tu amah hi kan la inhmu chiang hlawm lo te pawh a niang e. 

"Te, zanin chu hla zir ve ila, min phût ve riau a nia aw. Engmah kan ti ngai chuang lo" ka hnunga ṭhu chung chuan a ti sar sar a. Kohhran hi a rualpawl tawkin kan bel ve a ni mai. Mihring kan tam bawk a, keini pahnih chu eng pâwlah mah nihna nei lo, member rinawm tak kan ni. Mahse, kan duh zawk, kan nep dun ropui si. 

"Pawi hleinem..ka lo sawm dawn che nia" ka ti a. Lehkha zir lam chu lang lo hah hah tak a ni. Desy ka va thlah leh tê tê a, Kan in ka luh chuan U Bawiha uipa lian zet Parvula chuan mi rawn zuan leh thuak thuak a, a lian tawh si a, hah deuh chuan a ninawm ṭêp zel. U Bawiha thu chiah hi a la âwih zui a! Mama phei chu a nêl hlawl lo. Viteii'n, "Ka rin aiin i lo haw hma, thingpui i duh em?" A lo ti var a. Viteii hi va hmuhsit thil ni lo vin a ṭawng hi a khamphei deuh a, a rawn awmtirh chuan ka nuih a za thei tawp. Mahse, kan hre ṭhang a, ngaiah kan nei tawh. 

"Duh lo ve. Anute an lo la haw na nge?" Ka ti a. Min hrethiam u la, mi te chuan 'Ka nu, ka pa' tiin an ko thlap zel naa, kei zawng hmeichhe awmchhun leh nautê kha ka la ni miau a. Ka nu ka pa tih hi a mihrang riau hian ka hre pek a, midang bula ka sawi chuan ka nu ka pa ka ti ve tho a nia. Ka pa ṭhianpa nupui an va râl kha a nia, an rei zêk mai. 

"An lo haw ve ṭêp ang." Tih pahin fridge a hawng a, chawhmeh siam tur a la chhuak nghal. Eirawngbawl hi thiam lo tawp chu ka ni lo, ka siam tui fahran ṭhin lo a ni zawk. Chuvang chuan ka chhungte hian min ring duh lo ni berin ka hria. Ka roomah ka lut a, kan in hi mizopa chhiara chhawng 3 a ni a. Sawi tawh angin a hnuai ber chu Mama Gym kha a nia, a laiah hian ka nu leh pate leh keima pindan bakah mikhual pindan a awm bawk. In chung hi kan awmna aiin a tê hlek a, Ka nuṭa te pahnih pindan bâkah Meeting leh mikhual pawimawh a bikin Mama sumdawnpui ṭhinte ṭhutkhawmna tur pindan a awm bawk. In chunga awm ve ka dil reng a, ka nu ten an remti tlat lo. A lum deuh avangin ka inbual nghal sar sar. 

Ka inthlak laiin Desy'n min rawn call, mi hi a ngai thei mai siah. "Min va ngai hma ve" bra hren pahin ka ti lâwng lâwng a. 

"Chupawh a ni lo, enteh, Laldami û kha i hria em? Zosanga kha, a boral an ti" a rawn tih chuan ka phu zawk. Zosanga chu keini aiin a û hlek a. Dami te nen kan inzui ve dat dat zel avang hian ka hre ṭha ve viau. Tlangval pangngai tak ti ila zu han in ve zauh zauh a ching a, chubak chu han sawiselna tur vak ka hre lo. 

"Ngati nge?" Ka ti hû a. 

"A inawkhlum an ti lehzel a" zawi deuh sap hian a rawn ti a. Ka thinphu a rang zual sawt. Eng dang a ni lo,.thildang zawng zawng aiin mitthi hi ka hlau tlat a tin ni, mitthiah rau rau pawh ka mi hriatchian te a hnu hmanah mahni intihlumte ngat phei chu kar khat dawn mutmû ka tuah ṭha leh thei dawn lo tih ka chiang tlat. Tunah pawh ka hawi kual keh ruk ruk tawh. 

"Hey..i hlau leh mi? Dâwih sia maw..chu chu zaninah va menpui ve ila ka tia" a la rawn ti ta deuh deuh. Mahse, lumennaa ka kal loh pawn keimah chauh chuan ka muhil leh thei dawn lo tih ka hre leh zel. 

"Aa..aw..a ṭha alawm. Min lo sawm la" ka ti bah nak a. A dah ta nghal. Ka la pangngai hleithei lo. Engvanga inawkhlum tak ni ang maw? Mahni nunna la duh hial khawpin eng thilin nge tibuai ang le..

Ka nute an lo hawng a, chanchin ka hrilh ve zung zung. Ka pa zawk chuan min melh vung vungin, "I U Bawiha bulah em ni i riah leh ang?" A ti sup a. A fanu hi min hrechiang zet mai. Za vak lo va nuiin "Kan tlaivar ve dawn" ka ti a. Nia, kan veng chhungah mitthi an awm chuan ka hlauh a reh hma chu U Bawiha bulah ka mu ṭhin. Ka nu te bula han inthawlh kûk kha chu ka hreh ve deuh a, Mama chuan min riahpui duh ngai ṭhak lo. "Dâwihzepna hi a hneh theih. I pangchan vang a nih kha" a ti hluk hluk zel. Mahse, U Bawiha hi chu a fel, min khawngaih leh zel a. Tlangval pui e ti lo chuan min riahpui ve mai zel. Mahse, a hnar ring thei sia, ka mu ṭha vak ngai lo. Hlauh vanga men tlaivar ai chuan a zia zawk tho. 

U Bawiha lo hawn aṭanga reivakloah zanriah kan ei a. Viteii specialist-na bai uih thak kan hmeh tel leh ta a, U Bawiha hian a'n ngaisang mai mai khawp a! A hâwp leh nghek e. Kei hmarcha hi ka ngam ve zawng tak a nia, Viteii bai thak pawh chu a la thak tâwk lo tiin hmarcha hmui ka'n thlak belh leh hram kha. Ka nuin, " Êm êm zel che hian aw, i pum ngaihtuah rawh" a tih hlak kha. Ka nuih tlawn ta vel ringawt. Chaw eikhamah hi chuan tlai lamah thleng ka sil ngei ngei, zing lam erawh class kan kal avangin Viteii'n a khawih thung. Thleng seng fel aiin thleng sil tawrh hi ka duh zawk. Chet neuh neuh hi ka thiam meuh lo. Ka sam a la huh avangin thleng sil zawhah ka chhem ro thuak thuak a. Dami te hi Tuikuala awm an ni. Desy a rawn thleng a, kei pawh kan inthlak sawk sawk a, ka hman a ni mai e. Body fitness lama taima viau si hi make up lam hi ka ngah ve vak ringawt a, ka inchei mawipui thiam meuh lo. Ṭah ve thut takin tiin Romol te pawh a var leh rawng dang ka pai ve thlap kha. Ruang hi sawi tawh angin ka hlauh miau avangin ka en duh lo lui tlat ṭhin. Ka mitthlaah a cham zui zel si a, vawi khat erawh kan in piah lawkah pick up hian pitar a chil tawh a, loh theih loh avangin a ruang râpawm zet kha ka hmu lo thei ta lo. Thla khat dâwn kha ka buai nia! Mama takngial paw'n khami ṭum kha chuan min awihsak ve hial. Pianthar loh vang pawh hi a ni lo, hlauh zawng hi a dang ve êm a ni. 

Ṭhian dangte nen kan incontact sa tawh a, Dami te in penthlakna bulah kan innghak khawm ve a. Kan vaiin paruk kan ni. Kan zu thlenthlak chuan an lo khat hmur tawh a. Ruang va hmuh ve hrim hrim chu ṭha an tih tlat avangin tîm ru zetin ka zui ve a. Zosanga chu a tê chhe lo bawk a, a kuang pawh a sei viau. Ngam leh ngam lovin a ruang chu ka zuk melh ve a, a damlai hmel ang tho kha a la ni. Tui taka muhil hmel a pû. Dami chuan a ṭhiante min han hmuh takah chuan a ṭap hawm hawm a. Ṭhian ṭhenkhat tuidûl deuhte pawn an ṭahpui ve liam liam. Kei erawh ka hul dêr. Ṭahbelh tak ka ni lo ve bawk a, ka mittui erawh chhungten min kamkhat hlek pawn a tla zung zung lawi a! Ruang kil duh an awm kan rin avangin kan lo tam ve deuh nen, rei kil lovin kan ṭhu sawn ta vat a. Ruang sir bang thlanglam ngheng tâwkin kan ṭhu ta a. Tlaivar dawna nghenchhan awm lo va ṭhut hi chu a hrehawm ve ṭhin êm a, thutna kan chang fuh ka ti ngei mai. 

Zai pawh rin ai daihin a nuam. An rawn lut zel a, ṭhalai hlang deuhthawin kan khat ta. Ding zeuh zeuh tawk an awm naa, an sawi rei lo va , a zia. Thusawi rei lutuk hi chu hneawm lamah a kal ṭhin. Mi vêngte a ni bawk nen, ka hawichhuak ngam meuh lo va. Hawi kual chiam chi lah a ni hek lo. 

Zing dar 1 rik hma deuhin eitur an rawn sem a, kan ei vat vat. Mawng a kham tawh si a, zunram thiar paha chhuah kan châk zek zek tawh a ni ber. Kan va chhuah chuan pawn lam boruak chu a lo vawt sûk mai. Kan va zung kan lêt leh chu an thingpui lumna zawn kan thlen lai chuan an ri deuh hak a, an inhnial buai deuh niawm tak a ni. 

Kan hma zâwn êngin a chhun fuhna laiah tak chuan tlangval sa ṭha ve lam, mitmeng sen rêm rûm hian, "Zawnga le..min cho ve tak tak a ni maw? Ka hlau chhetê lo che..lo kal rawh. Fair fight in aw" a ti sehchilh nawk nawk a. Han en reng reng paw'n a harhfim lo tih a lang reng mai. Mahse, tu nge a cho ber pawh a hriat loh. Hruaitu niawm tak hian a va kai a, "Insum rawh, a zahthlak, kan veng chauh helaiah hian kan awm lo a nia. Va hruai haw rawh u, Dinpui" a ti sawk sawk a. Dinpuia niawm takte ṭhian chuan chu zurui chu an va chelh a, Chupa lah chu a rui lungpuam tawh nen, "Khanglang a..a.ve mai mai a. Kei aia naupang hian ka cho e min ti a maw..min thlah rawh u. Ka hnek hma chu ka haw dawn lo" tiin chelh tumtu te kut chu a vai nghek nghek a. Kan pheina tur zâwnah tak a ding si a, kan ding khawm ṭaih ringawt. Bakah miin an thlir ṭhup a, khatihlaia va kal tlang kha a zahthlak. Dami te in nen a inhnaih lutuk lo hlauh a, mahse, a inhrosa thawm chu an hriat phak tho ka ring. Hruaitu bawk khan, "Lawmkim, i va ninawm ve. Miin ka cho lo che an ti mawlh mawlh a. Nanga zu chhe rui khan buaina siam hlek suh. Haw rawh" a hma aia nelawm loh leh vin deuh hian a ti ṭhak ṭhak a. 

"Pu Rin, vawikhat tal min hnektir ula ka haw ang" khawngaihthla la lek lek hian a ti ta roh a. Desy beng bulah, "Hnek nat hmel mai mai" ka ti sap a, nui hakin "I ninawm" a ti hlak. Kei zawng ka nuih a za deuh tlat a tin ni. 

Dinpuia ten an va hnaih leh rual chiah chuan thingpui lumnaa tlangval rualkhat ṭhu thim khup aṭang chuan mi pakhat hi a rawn ding chhuak ta a. Zawimuanga Zuruipa lam chu pan chhat chhatin, a hmaah tak a va ding a. Min hnungchhawn zawnga a din avangin a hmel erawh ka hmu thei lo. "Ti la..min hnek rawh le" a tih sup erawh ka hria. Chutia a hnek châk êm êm a hmaa saruak leh inhawngsaa awm ta si chuan a tihamhaih leh roh êm mawni. Zuruia chu a meng pâwng hlawt ringawt a, a heh a hawl kual vak vak ringawt. Mahse, inla thinrim leh thutin, "Min va tham lo ve a, kawngpuiah chho ila insual ang. I ngam em?" A ti leh tûn tûn a. A va ṭhing tak. Tunlai chhana la insual ṭûng ṭung hi kan hmu changkang tawh lo, ruih vanga buaina siam ching ngat phei chu. 

Chupa a hmaa ding chuan, "Zaninah chuan ni lo ve. Haw phawt la, rui lo hai lovin naktuk zanah le" a ti nghut nghut a. Hnunglam aṭang chauha hmu kan ni si, Tlangval vantlang tak, U Bawiha nen an inchen vel âwm e. Lu buk lam, dar pharh ve tak, a fuke sei thlurh mai a ni a. Kawr dum a ha a, Cotton rawng uk lam a ha bawk, a va hmuh chian theih loh deuh a. Zuruia chuan pawr fê hian, "Zorinsang, min va hmusit ve, chatthla dâwn khawp pawn rui ila nang hi chu ka cho reng che..i hria em?" Tih leh a hmaa ding chu nam a rual a, mahse, a chechâng eih lo. A'n nam leh vak a, a tawlhsawn duh dêr si lo, a hmaiah a hnek ta a. Tlem chuan a che ve hret. 

"Umm, min hnek ta bawk a, i duhtawk thei tawh em? Mipui kal khawm hi zah ve ila tiraw? Han haw tawh rawh le" Zorinsang tia a koh chuan a ti dam thlup a. Dinpuia ten an chelh nghal vat. A la phun zui nang nang naa an hruai lui thei ta hrâm. Zorinsanga chu a ṭhiante awmna lamah lêt lehin keini pawh chu muangchângin kan phei a. An zâwn kan thlen chuan keia mit râwp ta pek chuan ka va melh zauh a, Zorinsanga nen chuan kan mit a intawng sak! A hmel ka hmu chiang hman miah lo. A mitmeng a hriam a, a vawt hle tih chauh lo chu..Mitthi inah kan lut leh ta dial a. 

Mama hian min zilh nasa bawk a, lumenna ka kal hi chuan zunram thiara vawi hnih vel ka chhuah bak hi ka chhuak ngai lo. Tin, mutthluk loh hram ka tum ṭhin bawk, hei vang hian eitur thur lamte, sweet hmuam rek rek turte ka pai ṭeuh zel. Hla ka hre lo a nih ngawt loh chuan ka zai ve zel bawk. Ka mutthlûk ve ngai loh bakah ka zai tlaivar ṭhak hi chuan a chauhthlak ka ti ve êm a, mahni ina pangchanga no ve ta rêng rêng chu a tukah hian nilêng deuhthawin ka mu ṭhin. Ka chhungte pawn, "Veng a zau a, nula dangte pawh an awm ang, inchhawk ve hi a pawi lo" tiin min hau ngai bîk lo. Chu chu a nia mihring tlemna, a bikin thingtlang lama cheng ṭhalai te hi an fakawm ka tih êm êm ni, tlaivar zak mah se; a tukah eirawngbawl, thingpui lum leh sem, thlan laih engkim an la ti vek zel a. Tlawmngaihna pawh hi Thingtlângah chuan la par chhik chhek awm tak pawh a ni ve rêng e. 

Zosanga kan lumennaah pawh ka muthlu lo tluan ṭhak. Mahse, ka mit a thîp avangin mit chhing chungin ka zai a. Zaithiam hi zawng ka ni mawlh lo mawle..ka bê ve mai mai a ni. Khawvar dawn lamah pa pakhat hi a ding a, kei pawh ka meng zui ve zat. Ka rin loh tawpin ka hmazâwn kawngka bulah chuan Zorinsanga te ṭhianzaho kha an lo ṭhu ṭhap mai a. Khawvar dawnah meuh chuan kan tam tawh lo hle tak a, kan thawl reng rawng viau. In ep chiaha ṭhu kan nih avangin kan inhmu chiang nasa mai si. Zorinsanga chu ka tum vang êm êm pawh ni loin ka lo en chîk ve chiam. 

Sawi tawh ang khan a lu a buk a, a sam chu a dum niin a chhip lam a chhah ṭha viau. A mitmeng chu a vâwt tih hian a sawifiah ber ang, a rum angreng bawk si. A hnâr chu a bang a sang pangngai, mahse, tribal ta na nâ na hi chu tlemin a lang lo thei lo. A hmui a chhah lek lek a, hmul a ngah vak bîk lo nge a hmaiah eng hmul mah a zuah awm ka hre miah lo. A mithmul a buk a, mawi viau tur a nih laiin a mitmeng ren run chuan a châwi zo lo ka ti mai. Ka rin danin kan inrual loh paw'n kei aia a upatna a tam lo vang. A la upat hmel vak tlat loh. Ka en reng tih hria niawm hrimin mi rawn melh ve sak a, ka mit ka la rang teh e. Thusawitu lah chu a ding rei zêk a, a sawi pawh kha ka hre mumal lo e a. Kan han zai leh a, Kan epa ṭhu mipate chu an zai ve pawn ka hre lo. Hla an hre lo pawh a ni mahna. 

Ka bul chiaha ṭhu Dingi chuan, "A pa reuh tiraw?" Sikhar ka phêna hmuam rûk pah chuan a ti sep a. A tu ber nge a tih pawh ka hre si lo, "Teh ngawt a. Tu chu..thusawipa kha maw?" Ka lo ti hû a. Nuihzat hmel zeta min melhin, "Chhaw vah zel suh, kan hmaa ṭhu kawr dum ha saw" a ti ta a. A sawi chu ka hre chiah. A pa pawh ka hre lo e a. Mahse, nichin an intihbuai lai vela a chetdan kha chu a 'man' ve phian! Tin, a hmel aṭang pawn mi luhlul ve tak ni chuan a lang. 

Kan bang ve ta hrâm e. Kan chhuak dam dam a, kawngka bulah chuan a lo ding ve run a. A lan dan aiin a lo sang! Kei ka tê ve bawk êm a, a koki pawh ka chen lo, flat ka bun bawk nen,. Ngaihtuah zui lem loin Desy nen kan inphur phei a. Dami a khawngaih thu leh Zosanga inawhhlum chhan a hriat châkzia a sawi phei char char, a chau ve lo em mawni..ani te chu a muthlu nasa êm alawm. A hnar hialin ka hria. In ka luh chuan tumah an lo la tho lo. Keimahin ka pindanah ka mu ngam ang em aw..tîm zetin ka lut a, khua var tawh mah se, thawm a la rehin kan veng bâwr lai vel phei chu kan tho tlai hlawm si. Ka ṭî hrû thei nia. Ka inthlak sawk sawk a. Ka mu ve thuai a, mahse, ka maimichhing ngam si lo. Ka maimichhin chuan ka hmai bulah Zosanga'n min lo melh kur turah ka ngai zel..a va hrehawm tak ê aw. Phone te ka han hmet sasawi a, ka mit a thîp si. Darkar chanve dâwn chutianga ka inleh ka inleh hnuah Viteii thawm ka hre ta a. Tlêmin ka thla a muang deuh. Mutchhuakin min nawr nasa bawk nen, ka lo muhil ve thei ta hrâm a niang. Ka nuin min rawn kaihthawh chuan ka lo la mutui viau. Tukṭhuan ei turin min rawn kaitho a lo nia. Chaw ei loh mai mai hi an remti si lo. Ka ril pawh a ṭam lo asin aw. Ka tho a, Tukṭhuan chu phak zetin ka ei ve. Vawiinah Mama a rawn haw dawn avangin ka nuin Viteii bulah in chung lam tifel turin a hrilh malh malh a. 

"Engtin nge i awm dawn? I va kal leh dawn em?" Min rawn melh pahin a ti a. 

"Ka hre bîk lo. Desy tihdan dan a ni mai" ka ti ringawt. 

"I tlaivar sia, i peih ka ring chiah lo zawk a" a ti ve mai. Ka pa erawh pa ṭawngtam lo tih takah engmah a sawi lo. Chaw eikhamah Viteii pawh ka pui ta lo mai. Ka êk a chhuak tawh bawk si. 

Ka inthiar laiin Desy'n min lo call a, "Va lan leh i ti em?" A rawn tih chuan, "Ka hre lo..kei chu ka peih vak tawh lo ê, duh leh zaninah kal zawk ila" ka ti a. 

"Ṭha lawm, kei pawh ka insu dawn" a rawn ti ve mai. Tlaivar hi chuan kan ni chuap zel mai a. Ka balh hmel riaua inhriain tuilumin ka intleng thuak thuak a. Ka zâng ta deuh. Ka inthlak hnuah ka rooma thinthi lo deuha mut ai chuan tiin living room ṭhutthlengah ka va mu ta daih a. Mak an ti lo! Ka nu te pawh vawiin chu an chhuak dawn lo. Ka hriat loh karin ka lo muhil leh daih. 

"Ka nautê, ehe! I chilthli te chu aww..a mak duah duah ṭhin..hei Teber" Mama aw zangkhai zet avang chuan ka harh hlawl. A zin haw thlak pawh inthlak lovin ka mutna bulah chuan a lo ding run a. Mit nuai chawt chawta han melhin, "I lo thleng tawh law" ka ti sap a. 

"Min lo hmuak mang bawk si lo,..chhunah muhil ziah suh..ka tih kha" tih pahin ka chhipah a rawn tuai zauh .

"Eng nge min lo hawn?" Ham bai bâi chungin ka lo ti daih thung. 

"Engmah..thil lei hmain kan khawsa lo. Hetah i bazar mai dawn nia" a ti nghut a. 

"I phakar" ka lo ti hmak. Intifai tura in chung a pan lai chuan "I bialnu lah kha polite lo ropui si" ka ti lâng lâng a. Nui hukin, "Tumah an awm lo..tunah chuan" a rawn ti a. Ka ner khum nghek ringawt. Mut ka kham thawkhat tho bawk a, ka tho ve ta a. Viteii ka pui. Puih êm em pawh a ngai lem lo. 

Chhungkaw kima zanriah kan han kilho leh thei chu a hlimawm mang e. Zosanga chungchangte ka sawi ve siam siam a, Mama'n, "A va huaisen bik ve..a inawkhlum ngam a" a lo ti zauh. 

"Huaisen vang a ni lo " ka lo ti nghat a. 

"Dawihzep vang pawh a ni thei bik chuang lo" a lo ti ve hmuk. Han chimawm hi a ching ve leh zauh ṭhin. 

U Bawiha'n "Mam, vawiinah tv bâwm chu kan peih fel a, hmun a chêp deuh si a, thawn chhuah vat kan ngai a nia" a ti a. 

"Umm, zaninah ka'n hahdam ang a, naktukah kan tifel thei mai ang" Mama'n a lo ti vat. Midang unau pawh hi in nih ve tho ka ring. Unauah pawh hmeichhia leh hmeichhiate hi chu an inkawm theiin an inbe bawrh bawrh zel a. Mipa te erawh an ni reng lem lo. Ṭawng tam lo ve ve phei chu an inbe mang ngai lo tihtheih a ni. Mama te pawh hi an inbe tam vak lo, ka u hi a ṭawng duh zawk a, mahse, sawi tur hi a hre tlem ve lulai ṭhin êm mai pawh a! 

Thleng ka sil zawhah ka insiam nghal. Mama a rawn lut a, "Ka zin chhungin i workout lo a ni maw? Kha i dul a kiar ṭêp" tiin ka dul a rawn kawk zauh. 

"Au Bawiha rualin zing 2 chu ka kal" ka ti ringawt. Mama awm loh chuan ka inthlahdah zel. Ka nu leh pate ai maha min controla min zilhhautu ber, mamawh ka neih pawha ka hrilh hmasakna ber a ni bawk a, a kut ka ni ve tih hi a chiang bawk a niang, min ngaihtuah ve ṭhin viau. 

Desy a rawn thleng a, Mama'n sana a rawn hawnsak loh vangin thupha a lo chawi nghal. "Pawi lo, chutia bazarna tur min pek dawn chuana ṭha daih zawk" Desy lah chuan a ti hlut a. Kan chhuah hmain, "Au Bawih, i room kalh suh aw. Ka rawn mu maithei" tiin Parvula chaw a siamsak lai chu ka va au a. 

"Aw.." a ti sup. A fel thei ania aw..keima u hi chu. 

Dami te in kan va thlen chuan an lo la tam vak lo. Dami chuan min lo dawngsawng vat, a mit a bui lâk mai. Dami hi kan ṭhian zingah rau rau pawh nungchang ṭha leh ze zâwi ber a ni a. A zaidam ber bawk. Kei aiin kum khatin a upa. Kan han ṭhutho takah chuan, kei a naupangber leh la â tih takah, "Dam, i u chu ti nge a intihhlum le?" Ka ti pek a! Desy'n ka bânah a rawn sik nghal vâwt. Ka sawi zo vek tawh si. Dami pawh chuan ka zia a hriat tawh vangin mak ti hmel a pu lem lo. 

"A bialnu vang mawle" a ti sap a. Ka hre châk sawt. Kan ṭhutna lai chu a fâl deuh bawk a, zawitê tê hian, "Kha a bialnu chu U Hruaii kha..Bawngkawn ami kha..a rai a. Mahse, a û fa a ni si lo a. Kha kha a û khan a tuar na êm a ni" a ti ta sa sa a. Mak ka ti viau. Inngaihzawn lai renga mi dang fa han pai daih mai chu! 

"A va mak ve leh" ka ti ve hluai. Desy pawh chuan, "Engtin nge in hriat? A va'n mak êm êm" a lo ti ve vat a. 

"Sunday zanah khan amah ka u khan a sawi alawm. A rui ve deuh a. " Dami chuan a ti ve mai. Zawh zêl ka inthlahrung si, a kim loin kan hria ka ti mai. Hriat belh a châkawm mang e. Zai pawh a nuam leh phian. Eng nge ka hriat pawh ka hre lo, Zorinsanga kha ka lo zawng deuhin ka hria. Ka inhriatchhuah chuan ka rilruin, "I va â tak " ka inti mawlh mawlh. Ka nuihte pawh a za deuh. 

Nakin deuhah chuan bottle ruak a rawn khawm ta a. Remchângah lain, "Dam, saw pa saw nizanah khan tu emaw nen an intibuai a,. In veng ami mi?" Ka ti a. Dami pawh chuan a en ve vat, "Zorina a nih saw..tibuaitu hi a nei thei ania. An cho sual ziah lehnghal" a ti sap a, a sawi danah chuan a chhuan hmel deuhin ka hria. 

"Amah pawn a zir lo ve aniang, chutianga an tihbuai reng chuan" ka ti hrâm. 

"A tirah a dawh ve bawk a, mahse, a dawhtheih loh tâwpah chuan chintawk a hre tawh ngai si lo va, hmanah pawh Venghlui ami a sawisa hlum ṭêp alawm" a la ti zui! A sual hmel zual sauh. Ka zawt zui duh tawh lo. 

Pathian zarah kan chhungkua hi kan dam ruih ti mai teh ang, kei leh ka nu hi kan thinchhe ve deuh a, Mama leh Au Bawiha pawh hi in chhangbung mah nise la, vawikhatmah kut inthlak khawpa an intihbuai ka la hre lo . Au Bawiha ka fak vena lam a ni , Mama hi a hlau thiam êm a, Mama a thinrim tawh chuan a chhang let tawh ngai lo. Chuvang chuan kut inthlaka inrîkrâpna h ka ngaina lo. Chutihrualin mi insual te, intibuai te hi chu ka enliam thei viau tho. Tin, chutianga intibuai ṭhinte chu ka hmu pangngai thei vak lo. Kan chhungkaw dinhmun vang a ni ngei ang. Zorina pawh chu tharum thawhna lam ngaina a nihnaah ka hmu eng emaw nghal. Awmzia a neih vak erawh ka ring hran lo. 

Dar 9 rik hmain kan bâng ta a. Ṭhu khawmuang tawh lo va hawn kan tum. Dami chuan scooty kan dahna thleng min rawn thlah a, Ka scooty la chhuak tur chu Bullet pakhat hian min dal tlat mai a. Ka phun nang nang mai. Dami'n, "Zorina bike a niin ka hria..lawk aw" tih leh hawi kual a rual a. A va hmu fuh nge ,"Zorin, Zorin, lo kal lawk mai" a ti lang lâng a. A rawn lang ve zat bawk. 

"Hei i bike a ni em? Teberi te hi a dal a" a lo ti vat a. 

"Pu Vena bike a nih hi.." tih pahin Bike chu a nawr a. A rih dawn tehrêng nen, a nawrkal ve mai. Chhuahna khawp a âwl takah chuan, "Aw..ka chhuak thei tawh ang" ka lo ti ve vat a. Min rawn melh thuak. A ṭawng lo. Ka nawr chhuak a, Dami lam hawiin, "Naktuk chu class kan zu kal ve leh phawt ang..zanah rawn lan leh hrâm kan lo tum dawn nia" ka ti khawmawi a.

"In fel ee. Nia, zuk kal r'u..karleh aṭang chauhin kei chu ka kal ang" a ti ve mai a. Inmangṭhain kan tlan chhuak ta nghal.

"Te, a chhe lo ka ti. Zorina kha" Keiman ka phurh zawk hian a titi nasa ve ziah. 

"I lerh sia aw" ka lo ti ringawt.

"Nge Tomothy bak ka ngaihtuah tak tak chuang lo" a ti leh daih. Ka nui var var mai. An in thleng ka va thlah leh thlap. Garage aṭanga ka chhuah rual chiah chuan garage hnung lam ka nu pangpar ṭiak a hralh tur dahkhawmna aṭang chuan ṭawng ri ka hre ta thut. Ka ding dat a. 

"Engmah ti suh. I ngam ngam ka ngam e. Hrereng rawh" tih thu sawitu chu ka nu a ni. In chhunga a sawi chu nise a makna a tam lem lo maithei..mahse, a rûk arâl niawm taka zan thim hnuaia chutianga a han bia chu a mak riau! Invauna lam a la ni zui a. Thawm ka neih takah chuan ani pawh a rawn lang zui a. Hmel pha dâi hian, "Pangpar ṭiak ka dah belh lawk a. Lut ila" a ti a, a nui sâng bawk. 

Eng nge a tih ka zawt miah si lo va… aa a ho êm mai. 

Au Bawiha chu a lo mu tawh a, a mutna erawh a la rei vak loh thu ka nuin a sawi. Ka inthlak vat vat a, hlauthawng ru saa mahnia mut ai chuan in chunga chhoh ka thlang leh ta mai. A pindan kawngka chu zawitêin ka hawng a. Thawm dîm tak hian a khum kil lamah chuan ka bawkvâk phei dûn dûn a. Maimichhing chung chuan, "Dûn dûn che chuan..min khan tawh suh aw. I chilthla pawh thlauh tawh suh. Bed sheet ka thlak a nia" tih mual mual pahin a inlet thawk a,. A hnunglam aṭanga nuih tlawnin, "Au Bawiha hi a fel ber..a hmel pawh a ṭha ber" ka ti a..a nui huk.."Muhil rawh" a ti hluk a. Kei pawh ka insiamrem sawk sawk a. Lehlam hawi vein, "Au Bawih, miin an tihbuai reng hi mi ṭha an ni bîk lo vang tiraw?" Ka ti sap a. 

"Ngatan" a tih daih avang chuan, chek hlakin, "Ngatanmah. Muttui" ka ti hlak a. Ka maimichhing nghal…