ka savate Last

KA SAVATÊ (last)

Ziaktu : Toni Râlte

Nilaini a ni a, khua a thiangin van pawh a thiang pawl ruih mai. Mood fuh zetin ka zi iai ian a. School kal ka nin theih nen, buaina chinfel a han nih takah chuan ka phur thei ṭhin a nia. Nimin khan Pu Ramthara chu bail-in chhuah a ni a. A farnuin a bail a niawm e. Sangpuii a rawn bia a, kar thar lama a rawn hawn tur thu leh in leh lo chungchanga chinfel tur thil a awm thu te a rawn a sawi a. Zopui khuaa khawsak a tum tawh loh thu te nen lam. Engtia khawsak nge maw a tum tak ang le. 

Savatê'n min lo call a, "Chaw i ei tawh em?" A rawn tih chuan ka la ei loh thu ka sawi a. 

"Ka rawn biakna chhan che chu, apain min lo be leh a, vawiinah ka nî te nen an rawn kal dawn a niang. Zanah lo kal ve la a tia.." a rawn ti a. Schoolah hian inhmu tho mah ila, han inbiak deuh luam hi thawhpuite bakah naupang mitmei ven a na ṭhin. 

"Ê..a va hmanhmawh leh si ve, nia ka lo chhuk ve dawn nia" ka ti a. Mahse, zaninah Hriatpuia inpuanna ngaihthlak kha kan tum deuh sia, sawn leh a ngaih hmel. Pu Thara chuan ka awm ve a duh chhan tur âwm ka hre mai lo. Engpawhnise, ka bialnu pa a nih angin a ngenna chu ka ngaihpawimawhsak mai a niang chu. Tun hnaiah in luah tur ka dap ṭan a, tun atanga ka insawn vat loh chuan nuam ka ti lo telh telh dawn. Pa Zawma lah hian a sarhu laia min haw mang si lo min be duh ta miah lo va, ka inhnamhnawih thûk ve bawk a. Nu Tlani erawh chuan min hmaizah nge ni zawk ni, a hma ai mahin min be ṭha zawk. A fanu Hriati thattu dik tak a hriat takah phei chuan Hriati chanchin sawipui tur hi a duh ṭhin a. Inah a awm tlem phah rêng a ni. A lungngaihna hi a la zual dawn chauh a nih hmel. A lainatawm takzet a ni. 

Exam a hnai ve tawh bawk a, kan zirtir vak tawh lo. Byheart ngai angte kan vawntir a, kan test deuh sek bawk. Kan thawhhona a la ṭha zel a, Thana leh Asangi pawh ri rêt rêt a awm ve ṭan. Asangi zawkin a nawr mah tawh a niawm e, a chhan chu nula mahnia quarter luah a ni si a, eng emaw thilah mualpho palh te hi a awl êm mai a, a fing ka ti viau e. Higher lam nen pawh kan la inpawh reng a, Sir Peka pawh mipa pangngai a ni a, min huat leh boruak eng emaw kha a nei hran lo. Mahse, a hma boruak erawh phak a har ve a. Miss Puii hi chu ka ngaipawimawh lem lo, Education subject-ah a la a, Savatê hian Educationah mark a hmu ṭha ngai lo, an test paper check sak dawnin Puii hian a pe let tawh ngai si lo va, an classah a hmu hniam ber pawl a ni ziah. A mak angreng. Mi mal nun ,pawnlam leh eizawnnaa tihlan kual hi a professional lo ve thlâwt ka ti. Mahse, Board exam hmachhawn tur an ni tho va, hnual lo turin ka fuih nasa. Ludy te ṭhianho pawn an tibuai ta mang lo, Mamawii phei kha chuan a kawmngeih titih daih. Lehlamah an la naupang a, an rilru a thianghlim rih bawk nen, hlim taka an inrem theih tluk a awm lo ve. 

Zan lam programme ka neih avangin U Kaia leh Zoa te chu zan lama kan thil ngaihthlak tur chu a tuk zan atan ka sawn tak thu ka hrilh a. An sawi nawi lem lo. Kei atak pawn hre châk tawh tak ka ni. Mahse, Pu Thara a ngaihpawmawhawm ve bawk sia. School hours chhungin Muansangzuali ka hmu lo reng reng. Tiffin a pai ṭhin hi ka khawngaih avangin Canteenah lo ei tawpa thla tawpa ka pek tur thu ka hrilh a, a duh teuh lo. "Chaw hi ka kaah chuan a tui ber, bakah a puar theih ber" a ti deuh tlat zel. 

Kan bâng ve ta hrâm e. Sangmuana pawh chaw a duh bawk a, a lian ve ûak tawh. A harh lutuk hi chauh deuh chuan ka zo lo lek lek zel. In ka thlen aṭanga reivak loah Samua'n min lo call tehmial a! Simcard kha ka buaipuitir leh ta lo law law kha a nia. 

."I nau hi lo hau ve teh, tun lai chu a danglam lutuk, min vin reng a, a thikthu a chhe bawk si. Kan hlim thei thlawt lo. A chang leh a thinrim hi a inâng ṭap a, tihngaihna pawh ka hre tawh lo, nichinah pawh a nuamsam si lo va tiin eitur ka va leisak a. 'I hneawm, lo lang sek suh. I hmuihmulte kha ka hmu hne' a lo ti leh zêk a..midang hi a nei mawni" a rawn ti hluam hluam mai a. Ka nui hawk. 

"A va mak dawn ve. A pms te a ni lo maw? Tawrh deuh châng a nei ṭhin a.." ka lo ti a. 

"Eng nge Pms chu?" A la rawn ti hû zui a! Ka'n hrilhfiah tê tê a, hmeichhiaa a thawh dan hrang hrang ka hriat ve ang angte chu ka hrilh a. Kei pawh pms hi Mary aṭanga ka hriat a nia. Hmeichheho hi zawng an buaithlak a nih hi a. Samua chuan, "A ni chiang lutuk. Min hrilh ṭhat ve mai tur a nia..ka deal thiam tawh ang" a rawn ti a, a thawven hmel leh ta deuh. "Hna a laklawh ve reuh lutuk a, thla tharah chuan lo zin theih kan tum tawh ang" a rawn ti a. 

"Nia, lo zin vat teh u. A khawharthlak" ka lo ti ve vat. 

Zanriah ka ei laiin Savatê bawkin min rawn bia a. "Apa chu a lo thleng tawh a, anî erawh a rawn tel ve lo" a rawn ti a. Pu Ramngaia te inah a innghat ve mai niawm tak a ni. Pu Ramngaia te hi an felin an rilru a ṭha ka ti khawp mai. Malsawmna pawh an la dawng ngei ang. Muangmarin ka intihfel zawhah Pu Ngaia te in lam chu ka pan ta a. Ka va luh chuan Pu Thara chuan chaw a lo ei kham chiah nge ni Savatê chuan thleng a lo sil mêk a. Tleipuia'n a pa chu a lo ngheng talh talh mai. A ngai ve tawh ngawt ang, ani naupanga thuchâng, engmah a hre ve lem lo va. A pa hian a û ai ngawt chuan a lo duatin a lo ngaihsak ve bawk a. Pu Thara'n min hmuh chuan, "Ekhai! Sangzual, i lo dam maw? Lo ṭhu rawh" a lo ti sawt sawt a. Ngawi rengin ka ṭhu ve mai. 

An inpeihfel hnuah Pu Thara chuan thupui fun tak mai hian, "Hei le..Ngaia te nupa bakah Sangzuala te in zahawm ka ti khawp mai a. Rawn lang leh ngam tawh lo tur ka nih laiin rawn lan leh hi a ṭul miau si a. Pehhel kual loin ka'n sawi nghal zung zung ang e. In leh lo, huan leh ram saw Bawihpuia hmingin ka dah tawh a. Tihdanglam ka tum lem lo. Mate, i nau hi a puitlin hma loh chu i kut a ni a, nang chu ngaihtuahawmah ka dah lo che. Tin, ni e, Sir Sangzuala a awm bawk a, amah vang pawn ka ngaihtuah lo che. I nau ber hi i ensan loha i chhawmdawl zel a ngai dawn a ni. Heta kan ina kan pafaa chenho pawh ka duh viau naa, ka thubuai hi chinfel a la ni si lo nen, bakah Mateii hi engkim hrethiam rual a ni tawh a, hlim takin kan inpafa thei zel ang em ka hre lo. Champhaiah i nî te bulah ka thubuai chinfel a nih hma chu ka han khawsa rih ang a, inhlawhna te pawh a awm ka ring a, pawisa te pawh inthawn dan a awm ang. Ngaia te tak pawh in harsatzia ka hria a, hetia ka fate in lo tuamhlawm thei hi ka lâwmin, in tan tihtheih ka nei lo hle a, ka inthahrung. 

In chu Mate, i nau nena luah i hreh loh chuan i pute tihbuai reng hi a inthlahrunawm si a, pawisa chu thla tin ka rawn thawn ve thei turah ngai ila..sawtia luah lo va a awm reng chuan a dik lo..mahse, i thu thu a ni" a ti ta dap dap a. 

Ka tan lo ṭawng vena chi a ni lo va, ka ngawi tawp. Pu Ngaia'n inthlahrun a ngaih loh thu te a sawi ve luam a. Sangpuii kan ngaichâng ta deuh. Chhuat lam a melh vang vang hnuah, a pa chu melhin, "Pa, kan pafa hoin awm leh mai zawk ila..nang lo pa kan nei chuang lo va, Nu Diki a awm tawh lo va, kan hlim thei êm êm ang. Kan unau ringawta awm chu miin min zuam ang" a ti ta a. A pa chu thinlung takin a haw thei ngai dawn lo tih ka chiang. A thutlukna engpawh kei chuan sawisel ka tum lo. Chutia a han tih chuan Pu Thara chu inngaihtuah niawm takin a ngawi vung vung a, a hnu deuhah, " ..mate, hrehawm ka ti êm a ni. In hmel rawn hmu ngam tur pawh ka nih loh laiin inthlahrung chung chungin ka rawn kal a. Ka thiltih avang khan hrehawm ka ti êm a ni. Khatiang tur kha a ni tih ka hre lo tak tak asin" a ti ta ngawih ngawih a. A hmel zawng zawng leh a ṭawngkamte chuan khawngaihthla an la hliah hliah mai. 

Savatê chuan, "Nih pa, thil pakhat chiah ka zawt che ang a, thudik takin min chhang rawh aw" a ti sap a. A pa a bu nghauh.

"Anu kha tuiah khan i nam thla em ni?" A ti sin rât a. A aw pawh a khur deuh. 

Pu Thara chu a khi sak a, lungawi lo hmel erawh a pu lo. "Namthla miah lo. Mahse, i nu kha ka chhanchhuak lo a ni. Tualthat tluk chu ka ni tho" a ti ta a. Muansangzuali a ngawi ta hmak. A rilru a na takzet tih ka hai lo. Pu Ngaia zawk chuan patling takin, "Thara, ka farnu avang chuan ngaihdam harsa ka ti chein ka damchhunga hmuh tawh lo che hi ka duh ngei mai. Mahse, hun kal tawh siamṭhat theih a ni tawh lo va. Tin, i fate avang pawhin ngaihdam loh ngawt che hi a dik si lo. Kei chuan ka ngaidam che. Mateii thutlukna erawh ka zahsak ang" a lo ti ta hlauh a. Ngaihsanawm ka ti mang e. A chhan chu Pu Thara hmelah a inchhir takzet tih a lang reng mai si. Muansangzuali chuan min rawn en a, ka lo melh ve chiah, min râwn niin ka hria. Mahse, keia lo sawi ve leh thutlukna lo siam ve ngawt chi a ni si lo. A chil a lem khalh a. A aw thian lehin, "Nia, a pu sawi ang khan hun kal tawh a ni a. Ka rilru chu a na..mahse, pa, nang lo pa kan nei bawk si lo va. Chuvang chuan ka ngaidam che. Chuan, kan pafa hoa kan chenho ka beisei bawk" a ti fiah ta kâk a. Ka lo thaw huai, ka insangmar nasa hle a lo ni. Chumi zan chu Pu Thara tan zan hriatreng tlak a ni tawh ngeiin ka ring. Ka thinlung takin ka lawmpui a, tin, hei hi ka hriatchian phah. Thisena inzawmna thûkzia leh chakzia hi. Muansangzuali pawn a nu kha a hmangaih êm êm, la dam se a duh ngawih ngawih. Chutihrualin a pa lakah lungawi lohna, natna leh tawrhna te dawng mah se; a pa chu a pa a nihna a bo thei chuang si lo va, ngaihdama pafa diktak nih leh a zir chhunzawm dawn chu a nia. A ngaihdam rualin khang a natnate kha an bo vek tihna erawh a ni lo. Chu tak chu hneh a zir chho dawn chu a nia. 

Kan inpawh ta sa sa, kei pawhin ka tum dan, ka ruahmanna, pawl 12 a pass huna neih mai ka duh thute pawh ka sawi ve ta hial a! Zah ṭût kha ṭul ka ti tawh lo. Pu Thara chuan, "Sangzual, i zahawm mang e. I hnenah hian lawmthu sawi sen loh ka bâ a ni. Chutihrualin I thiltum kha zah viau mah ila, Mateii hi zep nâk emaw ka innghahna a ni rih a. Ka ui dawn hlein ka hria..ka hnial dawt ngam lo che a, mahse, a hunte thleng se remruatna ṭha zawkte pawh kan la siam thei maithei asin tiraw?" A tih ve tak luam kha. Chu bak chhanna dang ka phût chuang lo. 

Pheikhai zâng takin ka haw ta a. Ngaihngam takin ka muhil dâwn niin ka hria. U Faka leng haw nen kan haw rual a. A nau ang tak tak hian min en ve tawh a, kei pawn ka en hrang lo. "Diktea'n 'Apa, nupui nei rawh' tih a ching roh a. U Zaii hian a lo fuih ru ṭhin em mawni..a buaithlak tak tak a ni" tiin a nui huah huah a. 

"Chu! Neih vat a ngai a nih chu.." ka lo ti vat a. 

"Tuin nge maw kei ang te min han duh ang le.." a ti sup a. A inngaitlawm ṭhin lutukte hi ka ngainat chhan a ni fô. 

"I sawi tawh kha, mipa an hlawhchham ngai lo i tih kha. Tunah te chuan thudik an hre vek tawh a, i tan buaina tur a awm tawh lo. " Tiin ka lo fuih ve ngial a. 

"Ni ngawt tak mai tiraw? Ni e, Fapaten nei rawh an tih sek te chuan kan tlangval ṭha leh mai aniang chu" a ti ve ta sauh sauh a. 

A tukah chuan naupang vaccine lak a ngaih avangin chawhnu kan chawl hlauh mai a. A zia tak tak. Kei pawh insûkna hun ka nei leh ta. Sangmuana ka bual fai bawk. Putua chengdun reng ta na nâ na chu ka train ve e ka tia, a fin em êm chu ka hre hran lo va, ṭawng erawh a hre viau. Ka thinrim leh rim loh a thliar thiam chuan tawk ka ti mai. Khawhar hi zawng a hnem ve tâwk a ni. Zaninah U Kaia leh Zoa te zanriah min kilpui turin ka sawm a. Hmannia ka vawksa lei ka rêp chu ka chhum a, bawkbawn leh samṭawk ka bai pawlh leh a, dailuah kan a la awm bawk. A tawk viau e. Ka inbual fai zawhah an rawn thleng ve mai. Kan helhhawlh nge ni kan ni hrû mai a., Nuih te pawh a za lêk lek dawn e aw. Zanriah chu kan ei ta a, mipa pathum, chaw lak ṭha ve pangngai tak kan ni bawk a, chaw bêl pawh a ruak hiau mai. A manhla viau e. Zoa'n thleng a sil a, keiin hmun ka phiat thung. 

Thingpui sen hâng kan han dawm ve leh phawt a. Kan in zawhah kawngka va kalh hmakin, Zêla zâra ka neih, Hriatpuia inpuanna ngaithla tur chuan ṭhuthmun kan rem ta ṭhap a. 

HRIATPUIA…

Ka pain nuthlawi min fan san tak hnuah khan kan khawsak a harsa zual zel a, ka nu leh ka naute innghahna ka ni si, Ka tum loh leh ka rilru pawhin a suangtuah ngai loh, mihring hmanga sumdawnna kawng chu ka zawh lo thei ta lo va. Lianpuia inhlawha ka va riahna lamah Thansanga, Champhai nen intawngin ani hian thlem chitinin min bei ta a, sum mena meng ta nafâm chu an sawi awlsamin man chhuah a hlauhawm lo bawk nen. An team chu ka zawm ve ta a ni. Hetiang buaina kan neih hma khan tleirawl pahnih leh nula pakhat kan hralh hman a. Chung sumte chu Thansanga leh Champhai lama Agent te nen kan pathumin kan insem ṭhin. Pawisa ka han nei thut chu ka nu te pawn mak an ti a, mahse, a hnuah loh theih lohin ka sawi ta a. Rualpâwl ve kan duh piahlamah ka pa te nupain min hmuhsit loh nan pawh chung dan lo anga sumdawnna pawh chu kan hnualsuat phal ta lo a ni ber mai. Kan buaina bul hi ka'n sawi tawh ang e. 

Hlimi aṭanga inṭan kha a ni. Kir leh lawk ila, kan sumdawnnaah khan thawhpui kan mamawh belh ve zel a, ka bialnu Baby ka hmin thei a. Lianpui PHC -a hnathawk kan mamawh avangin Johna kha hneh kan tum nasa a. Mahse, mak deuh maiin a duh tlat lo. Kan mamawh bawk si, kan vehthlêm a. Hlimi nen an mutdunna video kan nei thei ta hlauh a. Chumi hmang chuan vauin Hriati hrilh kan tum takah chuan loh theih loh vangin kan pawl a rawn zawm ve ta a. Vanduaithlak takin Hlimi kha a rai ta a! Johna leh Hlimi te chetsual hun lai hi Hriati nen an inṭhen ve lai, a rilru nat leh mumal loh lai a ni. He thilah hi chuan kei aiin Baby in hna a thawk tam zawk. Johna mangang chuan Hriati a hrilh ta tawp mai a, a ka kan hup theihna ber tur chutia a fel ta duak mai chu pawi kan tiin kawng dang hmanga kaw hreuh tir kan tum ta a. Hlimi chu Johna anga biain kan ko chhuak ta a. 

Thlanmualah Hlimi chu rawn kalin kei leh Baby te chuan Johna tal awhtir nan Hlimi chu rukbo tumin ruahmanna kan siam vek tawh. Thansanga te pawh an lo inring vek tawh. Hlimi chu kan phuar hman tawh tihin a che thut a, a tlanchhe ta mai a. A au bawk. Hlauthawng taka umin ka umphak rualin a ka ka hup nghal. mahse, nula tê chhe lo tak a ni ve a, phuar chung khan a la che thei viau. Kan inbuaipui nasa ta mai a. Baby dawhthei ta lo chuan lungin a rawn chhu ta mai a. Kha kha a thihpui ta hmak mai a ni. A tukhum dûp ul a chhung ten complain an siam lo kha kan tan vanneihna a ni. Mahse, thawm kan hriat avangin kan biru nghal a. Vanduaithlak kan ti dawn nge vanneihthlak zawk, Johna a rawn lang ta hlauh mai. A hnua kan hriat leh danin Johna nen khan an lo inbe tak tak a lo nia! Johna'n a sawi leh danin, "Nau tihtlakna tur pek ka tum" a ti. Johna'n a han hmu chu a hamhaih a, kaihthawh tuma a buaipui lai tak chuan kan va lang ta a. "I that ringawt a nih kha" tiin kan ti thei ta. Ani chiâi mangang tawh si chuan sawi tur reng reng a hre lo. Terini te inah Hriati'n a lo nghak ve mêk bawk. Kan him ta emaw kan tih laiin kan chetdan zawng zawng kha U Faka'n min lo hmu ru vek a niawm a. Hlimi ruang kan khai zawha in lam kan pan dawn chuan a rawn lang ta a. Chutihlai chuan Johna hlauthawng leh hamhaih khan thlanmual a chhuahsan tawh. Ani an khaw lamah a lo va tlan haw nal nal a niawm e. U Faka chuan police hrilh a tum thu te a sawi ta a. Kan mangang ta kher mai. 

A tawi zawngin khami zan Hlimi lumen zanah khan U Faka chu Thansanga te nen kan hruai hrang a, a lo rui ve deuh bawk a,. Thlem chitin rênga a thil hmuhte sawi lo tura kan ngen pawn awmzia a neih tak loh avangin a fapa chungah kan ṭuan lo thei ta lo a ni. Hlimi an phum fel a, U Faka fapa Diktea school bâng kan lo châng a, eitur nen kan han thlem chho a, Heng kan thiltih zawng zawng hi U Faka'n a hriain a hmu ve vek zel bawk. "Mi tu emaw bula khang i thil hmuh leh hriat i sawi a nih chuan i fapa i hmu tawh lo vang" tiin kan vau ta a. A fapa vang chuan a lo nêm khawp mai. A ngawi ta rih. Tin, kan tihlauthâwngin kan rîkrâp fô a, Hlimi thla ang ten kan tibuai ṭhin. Ani zu lo in nasa bawk nen, a rilru pawh a buai chho ta viau a nih kha. 

Tichuan, buaina dang kan nei leh ta. Hriati kha..Johna'n a dinhmun leh Hlimi chunga thil thlen dante a lo hrilh ve a, chu chuan a nun a tibuai. Johna khan keini kha min rinhlelh nachâng a hre miah lo. Mahse, Hlimi chhungten Johna an rinhlelh rûk vangin thlahrâng lem siamchawpin kan chawkbuai a, vawiin thlengin an reh ta a nih hi. Tin, boruak danglam siam kan duh bawk a, in sâwi leh thaw ri te kha keimahni siamchawp vek an ni. Khaw mite kha thlabârin ṭi takin awm se la; tu emaw tlafâl rûkbo kan duh vang a ni. Mahse, chutiang a thlen hma chuan Hriati kha Johna khan a hmaa Hlimi hmanga kan vau avanga kan pawl a zawm vel kha a lo hrilh ta vek si. Engkim sawi chhuah a tum ta a, mahse, a û khan a uap hneh êm a, a duh angin a la awm hleithei lo. A rilru ipik lutukin Sangzuala hnenah pehhel takin a inbunruak nghe nghe. Chu pawh Babyin a hre leh vek a, a û anih ve miau avangin Hriati pawh khan Police han hrilh êm chu a hreh deuh niin a lang. Tichuan, a rilru tibuai zuala rilru fim a put theih loh nan, Thlahrâng angin kan tibuai leh ta a. Mak deuh chu keini pawhin kan hriatthiam phak loh a thleng a. Hriati kha tu emaw thlâ chuan a tibuai tak tak niin a lang, a rilru kawm nasat lutuk pawh a ni thei. Johna lah a mumal lo chho bawk si. Tikhan Aizawlah te hial an han inenkawl ta a. Damtêa rawn hawin a rilru pawh a fîm ta. Kan tan a hlauhawm ve leh chiah. 

Hlauh ang ngeiin U Faka thudik hretu a ni tih hre kâr chungin, U Faka chu hmuh a tum ta a. Baby'n a phone a lo hack sak hman avangin kan hre ve leh ta zel. Sawi tawh angin tuikhura U Faka nena inhmu tura an intiam kha, U Faka chuan a lo nghak ngei a. Mahse, Baby'n a nau tui in turah mut duhna a telh avangin Hriati chu tui takin a muhil ta daih. U Faka hawn hnuah Baby te inah chuan ka lut a. A hma pawn an inah hian ka riak fô, ka riah dawn hi chuan Hriati hi mut duhna kan pe mai zel a, a pa te nen an room a inhlat avangin engmah an hre ngai lo. Chumizan pawh chuan kan mu dun khât tawh nen, Baby nen kan riak dun leh a. Mahse, Hriati harh khan min rawn hmu ta si a, a pa te hrilh tuma au a tum lai takin a ka ka hup a, khumah nam thluin ka rek zui ta a ni. Ka tum vang êm êm pawh ni lovin ka rêk hlum ta si a! Mangang takin an bathroomah Baby nen kan va khai ta a ni. Baby hian a thinlung zawng zawngin min hmangaih a, kan la inneih loh chhan pawh Sum khawl hlek kan la duh vang a ni. Hriati chu vuiliam a ni leh ta. A hmaa Sangzuala bula a lo inbunruah tawh avangin Sangzuala ngaihṭha lo hian Johna thleng thlengin a va chhui zui ang tih hlauin Hriati ziah angin Baby'n a ziak a, Sangzuala chu lehkha a pe ta a ni. Khatah khan Hlimi chu Johna leh Hriati te thah angin a ziak a, Sangzuala pawn a lo awih ve mai nge, engmah a sawi zui lo a nih kha, Hriati thih thu Johna'n a lo hriat chuan mi pangngai a pha ta lo zui a! Ani chu hnawk thamah kan ngai zui ta lo bawk. U Faka ber hi kan venthawn ber a la nih avangin engtin emawa khungbo emaw phumbo dan kan ngaihtuah leh ta a. Ṭul miah lovah tual kan thah tawh avangin thihna êm hi chu thlentir kan duh tawh bîk lo. Terini hi Thansanga nen lo inhmelduhin Tsa chuan ani pawh a lo hmin tawh a,. Phai lam aṭangin nawrna a nasa tawh a, kan chet vat a ngai ta. 

Terini hian Diki bekbawrin Muansangzuali an tana a la hnawksak theih turzia leh thawnbo se an tan a ṭhat zawk tur thu hmangin a thlem ṭhin a. Diki lahin îhê lovin a lo pawm ta. Chutak chu Ufaka kan hupbeha kan venthâwn tawh lohna tur niin kan hre ta a. Offer kan siamsak ta a ni. Sangpuii a rûkbo chuan Terini te lamin a buaina an chinfesak dawn tiin ruahmanna kan siamsak ta a. Sawi hmaih pakhat chu Hriati thattuah khan kan puh tih kha, Hriati'n a biak hnuhnunber thu te amah bakin an that lo vang tih thute hmang khan kan vau ṭha leh a. Ani sawi tawh angin ngaihtuahna tawi tawh, zu leh a fapa chauh ngaihtuah tawh si chuan, kan rawtna chu a pawm lo ngam ta lo va. A rubo ta rêng a nih kha. Sangzuala'n a chhanchuak leh ta si. U Faka chu kan thukru ta a. Ruahmanna dang kan siam leh ta a ni. 

Kei chu inlamlêt leh hetiang thil duh tawh lo anga awmin Sangzuala kha ka kawmngeih chho a, Hriati thih sarhu lai aṭang khan ka hnaih tawh rêng rêng a, a chhan pawh Hriati lehkhathawn hnuhnung avang khan engtia chet lak nge a tum tih hriat ka duh vang a ni. Tichuan, U Faka ka bia a. "Ka sim tawh a. Mahse, Police kuta ka inpêk chuan ka thiante hlauthawng hian min tihhlum dan an zawng dawn a. Chuvang chuan inpuitawn ang. Sangzuala bulah kal la, ka sawi ang apiang hian engkim sawi la, aniin a tih ang ang chein awm la, kan inkawmngeih tawh bawk a, puih theih dan che a hre ngei dawn a. Keiin ka lo ṭawiâwmin i sahimna tur leh thiam i chan theihna tur hmanrua ka lo dap ve ang' tiin. Bihrûk reng kha a lo ning ta bawk nen, ka sawi ang chiahin Sangzuala a pan a. Ka sawi dan ang chiahin engkim a sawi ta bawk. Ka fak teh asin. Mahse, kha kha kan tâwpna hmanrua a lo ni zawk si. 

A zawng zawnga sawi a rem lo a, a ṭul ber hek lo. Diki khan Muansangzuali dahboa sum ṭhahnem tham tak dawn kha a la thlahlel reng a. Tin, hnawk a ti bawk, a chhan chu Sangzuala nen an inngaihzawn tak avang khan an nufa dinhmun a nghin a hlau a ni ber. A vawi hnih nana rûkbo dan kawng kan zawn laiin Johna a bo ta a nih kha. Khami a bo hma zanah khan Thansanga a lo han bia a. "Hriati thlarau a chawl hahdam thei lo. Nangmahni vang a ni. Chuvangin engkim hi ka puangzar ang a, kei pawh ka thi ve ang" a lo han ti a. Mahse, a ât bual avangin eng hê hûah a lo ngaihsak lo. A han bo takah khan kan buai leh ta si! Keiin a zawn hna ka thawk leh ta. Phulraw mual lam panin a kal an tih avangin chutah chuan ka lo nghak a. Johna kha chu a awlsam viau. Sahimna duh tawh bawk si nen, ani mi â tawh chu a chhungte tan a uiawm tawh chuang lo tih rilru puin ka that a, rem takin thingkung nghengin ka ṭhuttir ta a. Kawngpui zuk pawh ka tum laiin Sangzuala leh Sangpuii te inkuah lai ka zu hmu fuh pek a! Ka inveng zo ta lo. An thla ka laksak ta a. He thlalak hi tihdarha mualpho taka siama an inkawp chhunzawm tawh loh ka beisei a ni. A chhan chu Muansangzuali rukbo kan tum si a, Sangzuala nen an inhnaih zel si chuan remchâng kan hmu dawn lo tih ka hria. Mahse, ka thil vawn a tliak a, ka lum thla ta pek a! Kha kha kan vanduaina bul a ni ta a ni. Mi pangngai nafâm chu Sangzuala'n min ringhlel ta a nih kha.. tichuan, ka ruahmanna leh tumna te chu kan rin phak loh lutukin a lo man thiam zel a, a rûkin min lo veh char char zawk a lo nia! Kan duhâm leh pawisak kan neih loh luatah a tawpna kan thleng ta chu a nih hi..ka thiltihte hremna tuar tlak ka ni a, ka chantawkah hian vuina ka nei lo ve" …

Hriatpuia leh a ṭhiante chetdan rapthlak tak hi hetiang thingtlâng khaw lian lutuk si lo aṭanga lo chhuak tan chuan a makin a dangdai te pawh a tihtheih âwm e. Ka ngaihtuah fô, Pathian hian hetah hian min hûng ta lo se, he buaina hi a tawp kher ang em le..tleirâwl tam tak rukbo va awmin sumdawn nan an hmang zel te kha a niawm si a! Ka inchhuan vang pawh ni hran lovin he khuaa ka thawk hi ka lawm fô!..a thlawn lo ve. 

Savatê te pawh an in an luah lut leh ta. Pu Thara pawh hmuh theih khawpin a danglam a ni. A tirah kha chuan hnathawka chhawr duh an awm meuh lo va, mahse, a han awm rei a. Hna a thiamin a kuthnu a mâm ve bawk nen, chhawr loh theih loh a ni ta si, thawh tur chu a haihchham leh lo ta viau mai. An khawsak pawh a kâng ṭan e. Ka sawi hmaih loh tur chu khang inrûkbona kawnga an hotu ber ti mai ang, a bultumtu kha Tsa patea, Ukil kha a lo ni reng mai! Ani pawh jailah a ṭhu ngui ve lûp ang chu. Tenawm lutuk mai. Tin, Maêngi kha Lianpui khuaa ka chhungte anga ka neih Pa Vana fapa khan a rawn hêl ve tlat mai a! Maêngi a û hlek naa, innâwk ta reng na nâ na chu an ruak lo ve ta hial a! A hautak lo thei ang berin mi pawh sawm tam lem lovin an in hruai ve ta kha a nia. A mak mang e. Mahse, Maengi kha chu a fihlim vek a, Baby te pawh a dem ve hle a nih kha. Amah kha misual a ni lo ve hrim hrim. Tin, Tluanga U Kaia nau te pawh kum thar tir lama innei turin thu an thlung ran tawh. Innei an tam dawn mang e. 

Ni e, Zoa te inneih ni chuan a bula dingin ka ṭawiawm a. A hlim lutuk chu ka thîk lek lek hial! Ka lawmpui bawk si. Thlengi pawh an han chei chuan a hmuhtlak ve viau. Nu Zaii hlim lutuk hnukulh lek lekte chu a hmuhnawm asin aw. Ka Savatê pawh a rawn nalh khawp mai. Kawrfual ka chahsak ngei mai kha a rawn ha a, nitin hian a hmelṭha telh telh ni maiin ka hria. Ka lak aṭang hian a thlawna engmah dawn hi a duh ngai lo, Gold digger tih te chu hlat tak a ni. Phone pawh kha , "kum tawpah ka pe ang che" a la ti ve ṭang ṭâng. A va ho mai mai tak. A pa a fel tawhin amah Sangpuii kutah chhungkaw pawisa engkim a lut tawh a. Thla hnih khat lekah pawh Diki awm lai ai chuan an in chhung bungrua a changkang chakin a zahpuiawm lo chho viau. Hetianga hmeichhe khawsak ṭha hi alawm mipa te duhthusam chu..

An rawn zin châk bawk a, ka nu remtihna thlapin Samua leh Tei te pawh an rawn zin ta a. Kan va hlim mai mai tak. A tuk tlaiah Sangpuii chaw eiah ka sawm a, ka nau nen inkawmin inhnaih se ka duh a ni. Ani pawh zak viau mah se; a â lo va, phur takin a rawn kal a. Heleni ka sawm tel naa ani an chhungte inneihnaah Tlângteah a lo kal daih si a. Mahse, Tei fel bawk, Sangpuii fel bawk. An inngaina nghal sârh mai. Tei a upa deuh naa, in chhunga kan naute a lo ni ve bawk nen, an titi a rual viau mai. Hlim takin zanriah kan ei a.

Tei phawk a chhuak pek a" Mama hian mawng kawm a la hrat em?" A ti zauh a. Muansangzuali a meng phar deuh, "Ka hre miah lo, a hrat thin mi?" A ti ha a. 

"A piansual vena chi khat a nia, mi awm ṭha hle hle lai mawngah te hian a kawm tâwk zel a, buaina pawh a tawh phah fô zel alawm" tiin Tei chuan lainat hmel angreng tak hian min rawn melh a. Ṭawng ka tum lai takin Samua'n, "A la sim lo a nih hmel, ka inbual zo kha a rawn kawm ka mawngah" a lo la ti zui! An nui duh der si lo. Savatê chuan a awih lek lekin ka hria. 

"A va'n mak..a ni mi? I va inzêp thei" tiin min rawn melh a, mak tihna hlirin a khat bawk. 

" I va â tak" ka lo ti hluk a. Tei a rawn nui chhuak ta hawk a, thil awmzia a hriat takah chuan a nui uar ber berah a ṭan kha maw..ka thlah haw a, ka leng zui nghal. Insi rialin kan ṭhu dun a, A zirlaibu va phawrhin, "Enteh, ka tidik vek sia, engtin nge 20 marks ah 7 chiah ka hmuh theih le ka ti" a ti nang nang a. Miss Puii thiltih dan hi felhlel ta deuhin a hria. Board exam an face dawn tihah hian innghah ngawt chi pawh a ni ber lo. Internal marks an nei vek dawn a, Education bikah Internala a fail chuan tihngaihna a awm lo. Lo pass mial pawh nise mark a hmu ṭha thei dawn si lo va, a grade a pawthniam ngei ngei dawn.

"Naktukah Office-ah kal la, va complain rawh. A ṭha em? A lo namnul che chuan Principal i hmu dawn nia" ka ti ta nghut nghut a. 

"Umm..ka ṭhiante pawn complain rawh an ti reng " a ti ve a. Puii chu ka hmelhuat deuh tlat. A ṭhing ṭha ve êm alawm, naupang chunga lo inhrikthlak daih kha. 

Ka phone a check leh malh malh mai. A thu thei a nia. 

"Hei hi ti nge a rawn biak ve reng che a?" Tiin Vengthlang ami Aizawla awm bo reng, tun hnaia rawn haw Nancy number chu min rawn hmuh a. 

"Chutiangin inngaihzawnna lamhawiin min biak loh kha" ka ti mai a. 

"Chupawh nise, a taima ê, i reply loh pawn a rawn ti reng peih a" a ti hlak a. Ka chhang lem lo. A phone zawk chu a rawn ri a, ka va en thuak chuan 'Martina' tih ka va hmu. An class ami lian thelh thawlh kha a ni. 

"Aw Martin" a ti zangkhai vah a. 

"E..aw le, chutiangin ka nei ṭha bîk lo, mahse, aw..i copy dawn nia..aw le..ummm muttui le" a ti zung zung a. 

"Ka Pol.sc note hawh min rawn dil a nih kha" a ti sep a. Ka ngawi reng. Ka thîk hran lo. 

Thingpui a lum hlanin a phone chu ka lo en ve mai mai a. Sir Peka nen an intext na chu ka chhiar a, ka mit tikham ka hmu lo. Peka hian a la ngaizawng hle tih chu a lang, ka mit ang mit a lo nei ve a niang e. Mahse, chantir ka tum lo ve chiang e. 

Benjamin tia a save nena an inbiakna chu ka en leh a, ka mit tikham pakhat ka hmu ta tlat. 

"Ka lo hawn hunah eng nge ka lo hawn ang che.." a rawn ti a. Sangpuii'n, "Ka duhzawng chu i hriat kha.." tiin a chhang. Chutiang mai maia lungawi loh chu in ti maithei. Kan pahnih inkarah thurûk a awm ngai lo va, chutiang khawpa a duhzawng hrechiang êm êmtu he khua ami ngei ka hre lo chu na ka ti a ni zawk. A rawn ṭhut leh chuan ka lek ve vah a. "Sawifiah i duh em?" Ka ti nghut. 

"I mak thei sia aw. Nuteii fapa a nih hi..Aizawlah a awm ve a, hnathawkin.." a ti ta ṭhak a. Ka thêp leh ta suai suai e. Ka inthiam lo deuh si chu lâi zetin, "I sawi si hleinem" ka ti ta ringawt a. A sawi miau si lo alawm le. A pa rawn hawn hnu lawkah ka haw chho ve ta a. Zoa te in piah ruam ka kal lai chuan hmana Savatê nena kan thil tawn kha ka hrechhuak leh ta. Hriatpuia khan kha thil kha a sawi ri miah lo va, tin, Hriati te awm loh hlana in chunga rawn che te, Hriati te ina kan riah ṭuma mi pakhat rawn lut te kha a sawi tel miah lo bawk. Amah Hriatpuia tih dâwnin ka bulah a mu ve kûk bawk si. Eng emaw tak zawng a la awm ngei a ni. Mahse, hriat tumin ka buai peih tawh lo. Min tihbuai loh phawt chuan lo che ve mai mai teh se. 

Samua'n a châk bawk a, U Kaia nen, Zoa nen kan paliin zan len deng turin a tuk tlaiah chuan kan chhuak ta a. Tei erawh Zoa te inah a lo awm rih dawn a ni. Amahin ka inah awm ngam hek lo. Thil ṭhenkhat kha a lo hre ve ting tang si a. Hlim leh phur zetin lui lam chu kan pan ta a. Bleeching tlem kan keng a, lenkhang zar tur nen. Thlen veleh lenkhâng kan zar nghal a. Lui hnar lamah lên erawh kan dêng dawn a ni. Hlawhtling lo pawh ni ila a nuam ve hrim hrim. Ramhnuaia chaw ei a châkawm nen, kan chhuak hma bawk a, U Kaia nen tumbu leh chakawk eng ilo kan vâi a, Zoa leh Samua te'n mei an lo nun thung. Kan lenkhang zar kha chu hawn dawna enah kan ti a. Kan innghahna chhak lawka li lian vak lo chu bleeching kan phul ta a. Sangha an tam lo naa, zanriah hmeh khawp a ni dawn tho a, a zia. Khua a thim lek lek tawh tihin sangha kan chhum chauh a, thil hmin har a ni lo bawk a. Ṭâm hnêp hnâwpa ei hi a manhla zawk daih. Tumbu kan chhum bawk a. Meichher hnuaiah zanriah chu kan ei ta a, Samua phei chu kaihthawh a ngai, ani ram lama chaw ei lo thlahlel zek zek tih takah a duh aiin a load hnem deuh a ni ngei ang. Kan han ṭhu hahdam deuh a, zialte zuin kan titi liam liam a. 

A hmunin a zir bawk nge, Tuma bula ka la sawi loh, Savatê nena Zoa te in bul ruama kan thiltawn te, Hriati te awm loh hlâna an ina lut leh a thawmte bakah Hriati thih hnua an ina kan riah laia mi pakhat rawn lut te kha ka sawi ta mai mai a. Mipa rual kan ni bawk a, tumah chuan kan hlau hran lo niin a lang. 

U Kaia chuan, "Hriatpuia inpuannaah kha chuan khang thil kha a sawi tel miah lo mai a. Eng emaw tak hi chu a thleng ve reng reng niin ka hria"a ti nuah nuah a. Zoa pawh chuan luia kan kal ṭuma a patea leh Hriati a hmu dun ngawt mak a tih thu te chu a sawi ve luam a. Kha kha kei pawn mak ka la ti reng. Misual leh khang buaina thlentute kha kan man fai vek tawh emaw tih lai hian thildang eng emaw hian min la uap rûna hriatna te pawh ka nei lek lek zel. Mahse, ka vei run duh lo thung. 

Lenkhang kan zar chu kan zuk en a, Zoa leh Samua ten lui hnâr lamah lên an deng thung. Ka beisei ai daihin Sangha chu an lo tam ve reuh a, lenkhang aṭanga kan man ringawt pawh mi pathum insem khawp zân chu a niawm e. Kan chaw eina hmun kan thlen chuan Samua te an la rawn lêt lo va, dar 10 a pel thuak tawh. Hun hi a kal chak ve riau a. Zial zu pahin kan lo nghak a. 

U Kaia chuan, "Sangpuii nu leh Faka hi an nulat tlangval laiin an inzui ve tawh ṭhin tih i hria em?" A tih chuan mak tiin ka âng phuau mai. Ka rin loh lam daih a ni. Ka hmel landan vang chu ni maw.."Nia, tu'n an sawi tawh lem lo a nih hi. Hmingteii thih te khan Faka hian a tuar nâ alawm. Nupui a nei tawh nain hai rual a ni lo" a ti leh nuah nuah a. 

"Sangpuii a rukbote khan hrehawm a tiin a ṭhianten sual an tum pawh khan a phal lo rêng kha a nia. A chutih vang a lo nih chu a" ka ti ve luam a. 

"Ni e, tun thlengin Ngaia te nen pawh sawn an la intimihrang hran lo. Thara tak pawh hian Faka hi chu a zah asin. " A ti sup a. Ka hrechiang châk deuh. "Ti nge an inṭhen a?" Ka ti ta khauh a. A aw a thian kharh a, "Thara tê hian a rûkin kua a lo hreuh a, Faka inhlawha a zinbo hlanin Hmingteii bulah Faka chuan nupui ru angin a lo sawi pek a. Phone te la nei ve hek lo, Faka lah rawn haw har bawk si kha zawi zawiin Hmingteii kha a hneh ta ni tur a ni. An inru ta ringawt a. Faka chu thla 2 hnu velah a rawn haw ta chauh a. A rilru a na teh asin" a ti ta mial mial a. U Faka ka mitthla a, a vanduai theihzia ka ngaihtuahin nâ ka tihpui, ka khawngaih bawk. Thudang kan sawi leh hmain Zoa te thawm kan hre ta a, hmanhmawh fê hian an rawn chhuk a, an tlan titih. Êngin a han chhun takah chuan thlabâr hmel an pû a, Samua phei chu a hlauhlawp tih hriat zetin a mitmeng pawh a dava ruai mai. U Kaia chuan, "Eng thil nge ni ta?" A lo ti vat a.

"Ih..englo, lungin min rawn vawm ur ur mai a, kan hma zelah hniak tharlam a lo awm zel bawk. Kan rawn hlawhchham chiang khawp mai" Zoa chuan thaw hlawp hlawp chung hian a ti a. 

U Kaia a ding uaih, "Han fiah ila" a ti nghet charh a. Mahse, zan a rei tawh bakah hetiang huai leh hrâng vel hi ka kham tawh a, ka khap ta vat. Insem tham kan man tho tawh a, haw mai ka rawt ta a. Sawi nawi bîk loin kan haw ta hnak hnak a. Kawngah pawh sawi tur dang an hre lo. Mahse, ka ngaihven duh lo lui tlat! Awmzia a awm lo. Ka hlauh vangah an ngai a nih pawn pawi ka ti lem lo. 

In kan thleng a, Zoa te inah sangha pawh kan insem nghal. Tei pawh a lo la meng kar a, Thlengi nen an innêl nghal viau chu ka lawm hle. Awm khawmuang tawh loin kan haw chho ta a. Samua bulah an thil tawn kha Tei hrilh lo turin ka hrilh sa vek, a awm a nuam dawn si lo va. 

Chutiang chuan rilrua mawlhtu nei rûn chung chuan Samua te lo zin chhung chu ka awm a. Ka nuin Tei a ngai tawh nen, ni 4 bak an cham lo. Mahse, an châm chhung khan an hlim a, nuam an ti tih ka hria. U Kaia te lo vah an zu feh thul. Ram lam ngawtin an lung a lên a ni teh chêk ang chu, a ṭha vek mai e. Sangpuii pawh ka naute avangin ka rim em êm lo. Khaw hmun kan ni a, nakin lawka ka nupui ni mai tur a ni bawk nen, ka ngaih ka tiṭha viau mai. 

Tei te an haw ta chu a reh ve dûk thei, Ka rin ang chiahin Sangmuana an hawn daih lehnghal. Khua a tihar reuh mang e aw. School pawh kan kal nitin leh ta a. Sangpuii khan ka sawi angin Misa Puii hnenah complain chu a siam ta ngei a, a test paper en a dil a ni. Mahse, "Keiin ka pek loh che u chuan in lo en ve a ṭulna a awm lo" a lo tih khum hmak a. Kawlh leh a diknaa ngawih duh ta lo rêng rêng Muansangzuali lah chu tlawm duh bik hek suh, Principal a luhchilh ve ta rap mai. A mark hmuh dan zawng zawng leh a chhanna a dikzia a sawi ta hmiah hmiah mai a. Pu Nghaktea lah pa ṭha leh thil dik tak duh mi a lo ni ve bawk nen, Miss Puii a ko ta a. Muansangzuali test paper chu phawrh turin a ti ta a. Sangpuii'n a complain ngam a rin loh vang nge a lo la thambo hman si lo, Miss Biteii'n a dahna a lo ensak ve vat bawk si. An inphawrh ta a. An han en ṭha chu le..Muansangzuali chuan full mark thuak a lo hmu deuh zel a lo nia. Mahse, a chhanna dik vekah pawh 5 markah 2 marks te a lo pe ṭhin a lo ni. Hei zawng a mimal thil mah mah tawh e a. Puii chu zilh a ni a, tun hnua a thlen leh chuan Board-ah an thlen tawh ang. A mimal taka a zirlai a hua leh hleih a nei pawh hi zirtirtu ni tlak a ni chiah lo. Ni e, Zirtirtu han nih hian ṭhenkhat ni ve lem lote hi chuan, "Duhsak bîk neih loh tur" an ti fô tak naa, Lehkha thiam, zir peih, thuawih bawk si hi chu eng anga zirtirtu fair inti pawn han duhsak bikna deuh hi kan neih vek ka ring. Kei ngei pawn ka nei. Chutihlai kara thiam si lo, zir peih bawk si lo, school kal thatchhe bawk si hi chu melh no rengte pawh an har ve bawk. Mihring ve mai kan nihzia a lang. Puii erawh a bul chu keimah ka ni tih ka hre tho va, tin, Ludy te nen hian an pate lamah an lo inchhungkhat ve a lo nia. Chumi vangte pawh a ni tel thei ang chu..a zia lo êm mai. 

Exam chawlh laiin Aizawlah ka chhuk ve leh zuai a. Lung a lêng hle ringawt. Nakkum la nghah thlen a ngai dawn si a, a ninawm. Ka pa lung pawh ka chawlh chhungin kan phun thei ta a. Chhungkhat leh ṭhenrual ṭha te nen chawhlui kan ei ve thei a, kan tihtheih tâwkah ka pa pawh a lungawi ngei ka ring. Darlâwn lamah pawh zin a khât ta vang vang hle mai. Savatê nen kan inneih hunah honeymoon hman nan ka hual lâwk vek tawh. Ram dang leh state dangah te kan hmang ve thei dawn si lo va, man chawi ngai lo, hmun nuam bawk sia hman kha a tawk reng mai. 

Pathian zarah buaina leh harsatna êm êm tawk loin kum tawpte pawh kan lo thleng ve leh ta reng mai. Hun a kal muang ka lo ti ṭhin tak naa, kan ti nek nek a , a ral ve zel mai. U Faka case pawh chinfel a ni ta a, thiamchangin a chhuak thei ta. A ukilin theihtawp a chhuah bawk a, ka lawmpui takzet. Pu Thara case erawh a la fel hleithei lo. A âwm ve bawk a, a lo intatlut thûk ve hman êm mai a, insawi fihlim a har ve bawk ang. An pafazain an la khawsa ve zel a. An awmho tirh kha chuan amah Pu Thara pawh a felin inhlawhna awm ang angahte khan a inhlawh ve reng kha a nia. Kum a lo tawp dawn meuh chuan, zu in a ching chho leh ṭan a. A fate rîkrâp zawng chuan khawsa lo mah se; sum lamah an hasat phah lo thei lo. Sangpuii pawh a mangang ve ṭhin. Kei hi awm ta lo ila chuan an rethei unau leh ngawt ang. Mahse, an tan khua a var ve ṭêp tawh tiin ka hnem tawp zel. 

Kum thar kan chuangkai a, Sangpuii te pawh study camp nei chhoin an bei ngawrh hle mai. Christmas kha Aizawlah ka hmang a, Kumthar erawh Zopuiah ka hmang thung. Ṭhian mipa han kawm ngawrh ka nei lem lo va, Zoa leh U Kaia an ni deuh tlawng. An ni lah nupui nei an ni tawh si, Muansangzuali nen kan innghen nasat phah hle. Mahse, kan vannei a, thlemna kan hnar thei zel a, inneih hun atan kan khek thei viau. Kan pahnih inkar a buai ngai lo tihtheih a ni. A pa vanga a rilru hahna erawh chuan a zirna thlengin a nghawng lo thei lo. A tawi zawngin Sangpuii te exam zawh thleng ka nghak a, keini lam chu kan zo tawh. An han zo chu a zir ngawrh bawk a, a chau hnêp mai. Eitur leh chakna lam ka leisak ṭeuh a. A ṭha chho leh turah ngai ang. Ruahmanna tam tak siam a ngaih avangin kei pawh Aizawlah ka chhuk leh ta rih a. Neih mai ka duh tawh si a, ani pawhin an dinhmun leh a nau vang pawn min hnial hreh tawh. Zirna chhunzawm erawh a châk ru hle tih ka hre ve kar a. BA chu regular class kal lo va zawhtir dan a awm mai ka beisei. Ka nu te nen palai tirh dan tur leh ṭul dangte kan han sawi ho va..ka phur kher mai. 

Zopui atanga ka hawn thlak zan 4na dar 10:43ah chiah U Kaia'n min lo bia a. Tun ang hunah min lo call ngai si lo va. Mak ka ti deuh. 

"Aw, U Kai" ka tih chuan, "Sangpuii Pa Pu Thara a boral" a rawn ti ta mai a! Ka tho nghal zawt. 

"Maw?" Ka ti tuar a. 

"Aw..a zia lo khawp mai. Nichin mai khan an kawmthlang lui kawrah a ruang chhar a ni" a rawn tih lehzel takah phei chuan, mak ka tiin ka phâwk kher mai. Ka savatê ka mitthla a, engtin tak awm ang maw..Zopuia ka chhoh nghal a ngai tiin ka nute ka kaitho sawk sawk a. An ni pawh a ṭhawng takzet tih a lang. A zan azanin ka insiam zung zung a. Bike-a chhoh êm chu ka nu chuan a ngaingam lo deuh nge, Samua kan bia a, a bialnu û ka nih piahlamah Tei pawh a kal tel ve dawn vang a ni pakhat ang a lo tlawmngai thei hlauh mai. Zopui chu kan pan ta vang vang a. Muansangzuali nen kan inbe naa, a ṭah nasat êm vangin biak buai sek kha ka duh lo. 

Pu Thara ruang chu vuiliam a ni ta a. Vui kha kan nang hman a. A ruang kha postmortem turin Lianpuia phurh phei an tum a, Doctor awm loh lai a lo ni si! Postmortem loin an phum ta ngawt mai a ni. Sikul kâwn venga heta ka awm tirha a nupui sûn khan a chengkawl chhitna lamah pu Thara ruang hi a hmu hmasa ber a niawm e. A taksaah hliam hmuh tur a awm lo. Tui nen inchiahpiah deuh nuaihin a lo awm bawk. A rapthlak mang e aw. Savatê erawh ka beisei ai daihin a tuar thiam ti mai ang. A hmel hmuh pawh a hrehawm hran loh. Va chimbuai sek kha ka duh rih lo va, a chhungte leh ṭhiante nen han inkûal ve deuh se ka duh a ni. 

Pu Thara thlan nghah nî chuan kei pawh ka kal ve a. A thih dan mak an tih thu leh rinhlelh tur âwm an hriat loh thu an sawi nak nak mai. Ṭhenkhatin Hriatpuite ho khan lamṭang an la nei ang a, an thahtir a niang te an ti a! Ṭhenkhatin a nupui hmasa thih dan avanga a nupui hmasa chhungte lungawi lo hian an lo khawih mai a niang ti tawk an awm bawk. Pu Ngaia te lam hi chu rinhlelhna chhetê mah a nei lo. Han chhui dawnin a damlai hmu hnuhnung bertu chu a fate an ni. Khami tlai thim hlimah khan zanriah ei hmain a vei sek a, vei nei niawm takin a phi sek a niawm e. Zanriah pawh ei ta lo chuan khaw thim tawh hnu siah a chhuak ta nulh a. "Sawtah ka va kal lawk ang e" tih bak a sawi lo. Tikhan a ruang an hmu zui ta mai a ni. Thingtlang khuaa thil thlengah chuan kan thil lo tawn tawhte kha a rapthlak ka ti. 

Zanah mi nawlpui aia hma deuhah ka chhuk a. Savatêin, "Rawn chhuk hma teh aw. Pawimawh a awm" a tih vang a nia. 

Ka zu thlen chuan âwm tawk erawh an lo awm nak nak a. Savatein min hmuh rual chuan min hui zauh a. A pindan lamah kan inzui lut nghal. Mak ka ti deuh a, mi dang awm laia a pindana min luhpui duh chu..tukverhah a dâk vang vang a. Chutah min rawn enin ka kutah hian lehkhathem hi a rawn hmehbel ta a. Chu lehkhathem chu ka han kai pharh a, thu tlemtê chiah a inziak. He thu hi..

"Phubâ chu lâkin a awm ta e. Ka fanu, i kâwl te chu hlihin a awm ta, I zalên ta" tih thu hi…ka ding mar thut a, ka khur lek lek bawk. Ka hmaa mitmeng lian kel kawla min melhtu ka nupui la ni mai tur, Muansangzuali chu melh lêt vawng vawngin…

"U Faka.." ka ti zawi sup a..Hmâna ka mumang khan awmzia chu a lo nei takzet mai..

A TAWP TA..