ka savate 9

KA SAVATÊ (9)

Ziaktu : Toni Râlte

Mak ka ti hle. Kei ber kher a lehkha hnuhnung min han thawn chu..! A mak tih loh rual a ni lo tlat a ni. Ka in luahna te chu an ni ngei a, mahse, Baby nen zawk mah hian kan inpawhin kan inkawm nasa zawk. Hriati hi chu Terini avanga ka kawm ve leh chauh kha a ni zawk a, mahse, hriatchhuah ka nei. A thurûk a hrilh awmchhun kha ka ni ve tlat. Hmanhmawh takin bungraw eng emaw khai ṭûn chung chuan ka chhuk ta a. Ka inah chuan bungraw ho chu ka'n hung rem tê tê a. Tui lum nghalin a so hun nghah pahin Hriati lehkhathawn hnuhnung chu ka chhiar ta a. Ka rin aiin a lo ziak tam daih. A ziah dan ang angin ka'n dah ang e. 

"U Sangzual, he lehkha i chhiar meuh chuan kei chu mitthi ka ni tawh ang. He lehkha hi Aizawl aṭanga kan lo haw zan aṭanga ka ziah a ni e. Thil tam tak sawi tur a awm a. Hriatthiam loh pawh tam tak i nei ang tih ka ring. Sawifiah ka'n tum dawn ang e, khawngaihin min demin min lo diriam lo hram rawh aw. Ka chan tur tâwk ka chang tawh a, ka thlarau chungah tal chuan zahngaihna lantir hram ang che aw. 

Ni e, Ka bialpa ka hmangaih êm êm, a fa ka pai mêk Johna chuan Lalhlimi lakah sâwn a lo thlak ve leh ta si a. Khami zan Lalhlimi thih zan kha Johna nen inrûk kan tum zan a ni a. Nang chu sa chângin i kal daih nghe nghe kha. Mahse, johna nen kan thiltum chu Hlimi khan a lo hre ru nge ni dawn ni? Engtia hria nge a nih erawh ka hre hauh lo thung. Johna chu hmuh a duh thu a rawn sawi a, "Min rawn hmu lo a nih chuan i fa ka pai tih leh Hriati nen in thiltum hi ka sawi darh nghal ang" tia a vau avangin Johna pawh a mangang a, kei pawn engkim ka hriatpui ve. Tichuan, Dar 9 rik hma deuhin Terini te ina kal lawk tur anga insawiin ka chhuak a, U Faka nen kan kal thla rual nghe nghe. Johna min lo nghahna hmun kan thlen thlengin u Faka pawh chu a awm ve a ni. Tichuan, Johna nen Hlimi hmu tur chuan kan kal ta a. An in piah lawk kha thlanmual a nih kha, khatah khan kan lo nghak a. Ka awm ve tih hre loin a rawn kal ve mai a. Min rawn hmu dun ta si. Johna hi ka sawi tawh ang khan a duh ve êm êm a, a laka zah pawh sawi lo va inhlan ta kha a ni rêng a. Chutia kei min hmuhtel tak avang chuan a thinrim leh rilru na bawk si khan, "Ka sawi mualpho dawn che u. Johna, nang pawh pawngsual angin case ka kaltir ang. In hre dawn khawp" tiin min vau a. Kei kha ka dul a len loh bakah thla 2 lek a la ni bawk a, ka chhungte chu sawi loh, ka ṭhiante takngial pawn an la hre lo a ni. Mualpho lo va tlan dun kan duh a, Hlimi hian Johna fa a pai ve tho tih ka chhungten an hriat chuan inneih an remti dawn lo tih ka hre si, kan rilru a buai ta hle mai a. Hlimi lah chuan ṭap pûr chungin, "In pahnih hian jail-ah in tâng ngei ang " a ti thul. Kan hlauh ber chu ka chhungten thudik an hria ang tih chu a ni. A mak ngawt mai , U Sangzual, Johna kha i hriat angin hetia a fa hial ka pai hma kha chuan amah zawkin min thlahlelin min mamawh zawk ṭhin kha a nia. A fa ka pai bakah Hlimi'n a fa a pai lehzel takah phei kha chuan kalsan chu sawi loh, neih loh kha ka hlau hliah hliah a ni ber mai. Mihring thinlung hi a lo mak a nih ber mai hi. Tichuan, Hlimi chu thinrim taka lêt tumin an in lam a pan a, eng nge ka hriat pawh ka hre lo, a hnunglam aṭang chuan lung chang takin a lu-ah ka han chhu ta chawrh mai a. Thisen chu a chhuak lo naa, a tlu bawkkhup der mai a, thih erawh a thi lo. Johna chuan chet rawn la vein Hlimi rawn harh leh tur chu a hrawkah rêk betin a rêk hlum ta a. Kan harh chhuah meuh chuan a tlai tawh si. Tual kan that chu a ni ta ni reng mai. Mangang takin ruahmanna kan siam ta zung zung a, Kan thlang lawka thlan hungna lai a min deuh vanga hrui hmanga an phuar khawm rih chu phelhin thlanmual luh dâwna hmawng zârah chuan kan suih a, Hlimi chu kan khai ta a ni. Tichuan, a rûk thei ang berin kan haw ta a. Inrûk pawh eng emaw palha rinhlelh kan kai loh nan kan ṭhulh leh ta rih a. Terini te ina ka awm laiin Hlimi ruang an hmuh thu kha an rawn sawi ta a nih kha..Johna erawh khatihlai khan an khaw lamah a haw mêk thung. Kan inah pawh haw tawh lovin Terini puan ka hawh a, i hriat ang khan Terini te inah kan lo nghak che u a nih kha. Khami zan khan chhin khat mah ka chhing lo, Terini nena in khawsak dante kha hmaih nei miah lovin ka hre vek. Mutthilhna chi ziazâng ni hek lo le..

Tichuan, Terini phone kha kan lo thambo ta si lo va, A chhungten an han check chuan Johna nen an inbiakna te, ka hming te pawh lam tel a nih zauh zauh dante leh a thih zana Johna nen inhmu tura an inhrilh dante kha an hmu ta vek si a. Johna leh kei chuan rinhlelh kan lo kai ta a. Mahse, Hlimi chhungte kha an â bik lo va, tlâng thantir an duh bîk lo. A rukin hma an la reng tho. Hlimi tukhum lam dûp ûl mai kha Hlimi pa Pu Zaia'n a lo khawih fuh kher bawk nen, a rûkin min dang chêp ka ti mai. Kan rik hluai loh nan ruahmanna dang kan siam ta a, Hlimi thlâ chu hrântir kan tum ta a ni. 

Kan chhungkaw zia i hriat tawh angin ka pa te hi an strict lutuk hran lo va, zanah pawh chhuanlam neih ṭhat chuan kan chhuak ve thei mai zel. Chuvang chuan a harsa lo turah kan ngai, Hlimi nen khan kan intiat angreng a, kan sam a sei ve ve bawk. Ka pa te mut tawh hnu si, la tlai chhe lutuk loah ka û in tur bottle-a mut duhna telh ruin zanah ka relhru ta ṭhin a. Hlimi te âr te ka han khawih a, an in hnuai aṭang ten in riak tlangval te ka han hawlh thul. Fiah ngam an awm ngai loh vangin ka him lel zel a, Ram kal hawin an hmuh theih ngei turin Hlimi thlanah amah ang tak turin ka ṭhu ta fô bawk a. Mahse, ka vanduai asiamin zan khat ka intihhrân hnua ka hawn lamah U Faka nen khan kan intawng leh ta tlat mai a. Chutiang mi thinthî pawha an mut theih loh laia kei a in fâl ber hmeichhia lehnghal, zana ka tei vel a hmuh chuan min ringhlel ta tlat a! A rûkin min lo zir chu niin, min manchhuak titih ta mai a. Mahse, Johna nen bawk intiamrualin a lui kalnaah kan tihṭhaih a, a hlau ve ta hial a nih kha..nge khamini khan keimahni kher lo midang an lo che ve pawh a ni maithei. Boruak danglam siama kan han buai chhoh takah chuan Pu Zaia te lam pawh an chet a khaihlak lo thei lo va, an fanu thlâ a hrâng anga miin an sawi miau chuan, "A hrâng lo" tia lo ṭan ve vak kha sâwt hek lo le..An buai ru ta viau a, Johna leh keima lam pawh an ngaihven hleithei ta meuh lo. Mahse, ka thiltih rapthlak tak avanga Hlimi phuba lakna chu ka tawngbaw chho ta a. Ka hriat miah lohin ka nun min control sak a, ka phalna tel lo vin ka taksa a thunun a, khatiang khan bawrâw takin ka awm phah ta a nih kha. Khang lai khan ka rilru kil khat fim kâr reng chu a awm. Mahse, ka hmangchhuak thei lo a ni ber mai. I hnena sawite pawh ka duh, mahse, khatianga chetlak ka tum apiang khan min dangtu a awm zel si a. Tikhan a châng chuan ka nun kha mumang ang ruaiin a awm a, ka awmdan hriat miah loh châng pawh ka nei ṭhin. Aizawlah khan thawkkhat lai khan min uap rûntu eng emawni chu a chhuak ta a. Ka thawven hman tehlul nen, zing dar 3 bawr velah ka hmaah ngei midangin an hmuh ve theih si lohin Hlimipuii ngei mai chu a lo ding reng mai a. Reifê kan inmelh dun tlawk tlawk ringawt a, chutah a hmui phun miah si lovin rilru lam aṭangin kan inbia ti mai teh ang. Hlimi chuan, "Heta ṭang hian dam viahin i chhuak ang a. Mahse, hun ka tih hunah nangmah ngeiin i nunna kha i chhat tur a ni. A nih loh chuan i damchhung nun hi hremhmunah ka chantir ang." A ti ta a. Ka hlau a, mahse, ka ṭawng thei si lo. Sawi hmaih loh tur chu nau ka pai tih kha Doctor te bulah ka chhungte hrilh rih lo hram turin ka ngen a, vaccine tal la ṭha tur leh keiman ka chhungte hrilh ngei tura min intiamtirin min zêpsak ta kha a nia. Ka thih ni thleng pawn nau ka pai tih ka chhungten an hre dawn ta lo. Tichuan, a tawi zawngin Aizawl aṭangin kan rawn haw a, dam ṭha hle angah mi zawng zawngin min ngai a nih kha..kei pawn ka dam ṭha tak tak emaw ka ti. Mahse, zantin ka mut dawnah ka bula mu ve ang maiin ka beng bulah Lalhlimi hian min rawn phun khum ṭhin a, ka chhungril nun a tâwt telh telh a, Johna lah Hlimi avangin ka hnaih thei tawh si lo. Ni e, Johna huatnain ka khat a, amah vanga ka nun chhe ta vek avang chuan hmuh pawh ka duh lo va, ka haw takzet a ni. Mahse, ka thih ni thlengin ka hmangaih tih erawh ka chiang e. A hun a thleng ta a, U Sangzual, ka chhungte hi i kutah ka dah a. Mi puitling tak i ni tih ka hria, an rilru damna turin eng emaw tal lo sawi rawh aw. Hetianga ka tih chhan pawh hre kumkhua lo tur an nihnaah erawh ngaihdam ka dil mawlh mawlh e. He lehkha hi i chhiar zawhah halral vek la, a vâp pawh paih darh vek rawh aw. Ka ngenna hnuhnung a nih chu, ka thurûk kawltu i ni tih hi i damchhungin theihnghilh ngai suh ang che. Mangṭha le..'Hriatsangi"..

Ka chhiar zo chu ka lo insangmar nasa hle nge ka hah vek thei mawle. Ka ṭhu ngawi vang vang a, in chung lam erawh an ri nak nak thung. Hriati te huntawn leh an thiltih dan tehhrep chu aw! Eng emaw tak a nih kha ka ring deuh rêng a..a mi ngenna ang khan lehkhathawn chu ka halral ta vek a, a vâp erawh commode-ah ka paih lut a. Kha thurûk rapthlak tak kha khawvelin an hre ngai dawn lo a nih hmel e. Keiin ka sawi a nih ngawt loh chuan, ee..Johna hian a hriatpui ve ngei bawk ang a, aniin a ka a âng a nih loh chuan tuman an hre thei dawn lo tihna a nih chu. Ka lo hre ve kher kher pawh chu pawi ka ti. Hriati sawi hmangah Hlimi thlahrâng anga an sawi chu amah Hriati lek a lo ni tihna a nia! A ni awm teh tak e. Khang hunlai khan amah Hriati hi ka hmu tam lo hrim hrim a, an inah ka chuangkai khât bawk nen. Mahse, hriatthiam loh dang ka la nei kuh ṭûn tho. An zin hlana an ina teia bathrooma tui herh hawtu kha tu nge ni ta ang? Kan in sâwitu te, thaw hulh hulh te leh rûama mihring rawn tlan thla puat te kha le..Hriati khan a rawn sawi tel hauh si lo. Eng emaw thil dang hi chu a la awm chiang a ni. U Kaia ramsa kah tum hmêla Hlimi hmel rawn lang ngawt te kha thih pangngaia a thih loh vangin a rawn inlar tihna a ni thei ang em? Huiham, ngaihtuah tur a tam si, keia thluak ngawt zawngin engmah a ngaihtuah chhuak tak tak thei lo e a. Ka inphih harh a, thlak pawh inthlak hran lovin in chung lama buai mêkte pui tur chuan ka chho leh ta a. Baby'n min lo hmuh rual chuan, "Eng thu nge inziak?" A ti sap a. A lo chhiar ru hman lo ka lawmzia chu aw. A laizawn thiltih rapthlak tak a hre lo ringawt pawh kha a lawmawm. 

Namnûl tum deuh tak hian, "A damloh hma daiha a ziah tawh a lo nia, Terini ṭhat tawk lohna vel a nia, ka tan a lo duh bik vak lo a nih dawn kha" ka ti ta ringawt a. A awih nge awih lo tih zawng ka hrethiam tawh bik lo ve. 

Eirawngbâwlna te kan siam zawhah kan bâwl nghal a, khualkhua aṭanga rawn kal tur an awm ve nualin a rinawm. Pa Zawma te hi Ngûr khaw chhuak an ni hrim hrim a, a nau chiah nen he lamah eizawnna lamah a remchâng zawk e tiin an pêm a niawm e. An vannei a, in hmun pawh VC ten an sahthlaksak nghal a, ram an nei zau phian mai. Kan che nak nak a, Zoa pawh kan bâwl zawh lamah a rawn lang ve hlawl mai. An huanah a lo zu riak leh daih a lo nia. An serthlum huan a lo hnim deuh tawh nen, mahse, chanchin a hriat veleh a rawn haw nghal nal nal a ni. "Ka nuin min lo hrilh a. " A tih chuan, an huana kan kal nîa signal ka neih ve miah loh dan ka lo hrechhuak daih. Mahse, engmah ka sawi hran lo. Ngûr khua leh Lianpui bakah, Tlângte lam aṭang pawn mi ṭhahnem tam an rawn kal a. Mikhual an zi nuk nuk mai. Chaw ei hman lo an awm nual avangin chawhmeh pawh kan lei belh leh nual. Tichuan, engtin tin emaw tukṭhuan chu kan nuai liam ve ta mai bawk a. 

An in hnuai luahtu ka nih ve miau avangin thlan va laih daih thu awm bîk hek lo, in lamah ka awm ve ta renrâwn a. Bakah ka in chu lûn mep mep tak a ni. Lut chhuak an indawt zut mai a. Ka bathroom pawh a hîng rum rum khawp mai. Mahse, hengte hi chu ka dâwl ve tur rêng a ni tih ka hai bîk lo. Baby leh a nu ṭap bang thei lo leh a chânga Nu Tlani ṭap khawng buaipui ngai bawk chuan lung a tizîng zual a. A âwm ka ti lutuk, an fapa neihchhun accident vangin an chân tawh a, tunah an fanu naupang zawk, a vanglai hmang ṭan mêk chu ama nunna ngei chhatin nunna nei tawh lovin a let bal chu a ni si a. Pu Zawma tak paw'n insûm har a ti ve ngang a niang, a kuang an laksawn dawn meuh chuan awrâwl chhuahin a ṭap ve hawm hawm mai a, a bul vela awm nu ho pawh an inhru sap sap mai. Zopui khua ka awm ṭan kum hi kum chhiat kum chu a nih ngei dawn hi, nge ka awm vang hian tiang hi a thleng zawk le tihte thlenga ngaihtuah a awl duh khawp mai. Chutiang chuan Hriatsangi, kum 25 mi lek chu a lei taksa vuiliamin thlan khur chhungan zalh a ni ta..

Min ngen angin in chung lamah rawngbawlin chaw pawh ka la ei ve zel a. Makpa chetin ka che a ni ber ang chu. Hmelhriat thar pawh ka ngah phah hle. Chung zinga ka ngainat fâl deuh chu kei aia û hlek tur Hriatpuia chu a ni. Tlangval sa nghet tlet tlawt, ngo lam deuh, hmel pawh chhe lem lo, a vai hmel lek lek tihtheih tur a ni a. Zing kar aṭang khan amah nen hlir kan che dun a, kan inkawp zel a nih ber chu. Zan a lo thlen meuh chuan ka ngainain ka nêl tawh viau. Zoa bialnu Thlengi te kawmthlang lawka awm an lo ni nghe nghe a, a tlawmngaiin a che fel êm êm a, a hnuhma chhui a ngai lo reng reng. A tawk lekin a ṭawng duh bawk a, thil a sawi ve mai mai lo tih a thusawia a chian ngam danah a hriat mai. Zan lamah pawh chaw eikhamah a zu inthlak zawk a, rawn chho lehnghalin kan ṭhu dun leh ta nghe nghe. Ṭhalai thi a ni bawk a, Hlimi ai mah khan lenpuitu an tam, amah Hriati hi Kohhran leh Khawtlangah a rualpâwl tawka inhmang a lo ni ve bawk nen. Zai pawh ka beisei ai daihin a nuam e. Hunserh hmangtuin a hman zawh hnu hla hnihna vel kan sak lai tak chuan pawn lam aṭangin Terini ngei mai kha a rawn ṭap lut ta hawm hawm mai. Baby leh a nu te nen inkuah khawmin awrâwl tâwp tâwpin an ṭap ta a, zai pawh a zai ṭhat hleihtheih loh. Nula lam hnuk a lo ulh ve bawk nen. Vawiin lamah khan Terini chu a rawn lan ve ka lo ring zawk a, mahse, buaina eng emaw an nei te pawh a ni mahna. A ruang awm tawh loh hnuah a rawn lang ta hrâm a, a tiṭha rêng rêng e. Tsa khan khatiang boruak a awm hnu pawh khan a la pawm duh tihna a nia, a lawmpuiawm takzet a ni. Tsa tak pawh a zahawm lek lek zawk. 

Terini te thawm daih hnu deuhah chuan Hriata chuan, "Rualhlui te lo lang chu i zai ri ka hre pha tawh lo" ka beng bulah a rawn ti sup a. Zai lai laiin ka nui suk. A lo hre ve ngei a nih dawn hi, rin aiin kan lar zêk em mawni dawn ni. Ka ngaihbel vang nge ni bawk dawn ni, Terini rawn lan aṭang khan ṭhalai lengkhawm ho chuan min en duh riaua hriatna ka nei zui ta bawk. Mahse, engah mah ngaih loh ka tum ve tlat! Ka bialnu a ni tawh lo a, lo buai viauna chhan tur ka nei tawh lo. Ban ruala haw vut kha thil tihchi a ni lem lo va, riahpuite pawh an ngai dawnin ka hria. Khawpuiah chuan khawhar ina riah hi a in neitu te duhthlannaah a innghat titih tawh a. Zep nâk emaw mi kan sual tawh si a, rukrûk hreh lem lo lah kan lo inphûm ru ve keuh zel si, Khawhar in riahpui e ti lo va khawhar chhungte thil neih eng eng emaw lo puanhnuai duh tawk an awm ṭhin avang hian khawpui lamah chuan inriahpui hi an ti vak tawh lem lo, an demawm loh ka ti bawk. Thingtlângah erawh nun a la thianghlim deuh zawk bawk a, an la inriahpui dial dial a, riah chhung erawh a rei tawh bîk lo. Hmanlai hunah kha chuan a kuma kum inriahpui te pawh an awm ṭhin. Ṭhenkhat pasal sûn, an i riakte nena han innei ta mai an awm ve bawk. Tumah hi an dinhmuna kan din ve phawt loh chuan indem ngawt thei kan lo ni lo. Eng nge kan hmalam hunah kan tawh dawn kan hre si lo. Ka pa boral hnu lawk hian kan ṭhenawmte in hnuai luahtu nupa reka khawsa te kha an pa zawk kha a boral ta thut mai a! Nupa a zawnga inzui nasa leh inthlahlel, an awmdun pawha insi lo va awm hleithei miah lo kha an nia. An nu pawn a tuar ngiang reng a, tupawn kan khawngaih niin ka hria. Mahse, an pa thih aṭanga thla thum pawh a liam hmain a ina riak an chhungkhat deuhte ti ila an inlaichinna erawh a hla tawh deuh, chu pa nen chuan nupa angin an awmzui ta daih mai a! Ṭhenkhat chuan, "A tenawm, an pa mitmu êm pawh a la keh lo va. Mipa a va mamawh hma êm êm ve leh" tiin an sawisel bâwng bâwng a. Ka nu erawh chuan, "Kei zawngin ka dem hauh lo mai. Pasal sûn chu e..dar lehlam sahthlak ang a ni an lo ti mathlawn lovin, kei hian ka tawng tawh a, ka fiah. Kei chuan fa ka nei hlauh zawk a, ani fa la nei bawk si lo tana tawrh a hrehawm dan tur chu e, demna pakhatmah ka nei lo. Hnemtu hi kan zawng ruai reng mai a ni" a ti hmiah mai. Ka'n sawi kai ta daih a, ka sawi chhan zawk chu an pheikhawk buna an kal tawhna kawng kan zawh ve te a nih ngawt loh chuan tumah hi indema insawisel thei kan lo ni lo tihtê mai hi..

Tichuan, nula lamin hmunte an han phiat fai a, an felin an mawng a zâng hlawm takzet. In riak tur pawh an rawn lang ṭan ta a. Hriatpuia pawh ka mutbu kan inṭawm mai dawn nia ka tih tlat avangin a zuk inthlak zuai a, a rawn chho leh nghal zat. Zan rei tak tak hmain mutna te kan han phah a. An in a fâl ve bawk nen, Ṭhalai thi chutah pawh inawkhlum lo ni kher bawk si nen, râwlthar deuhte chu ka ngaihbel em mawni an ṭi hrû hlawm hian ka hria a. Thlamuana uap ve deuhte pawh an ngai dawn niin a lang. Hriata nen kawngkapui bulah kan mu ta a. An in a lian ṭha viau a nia, inriak an tam bawk a, kan khat dul mai. Khawhar chhungte tan a thlamuanthlak dawn mang e. Vawiin lamah che hah lutuk lo mah ila a boruak uap hi a na ve ṭhin êm a, ka'n mut takah chuan ka chau nghulh mai. Mut pawh a chhuak deuh nghal a ni mai e. Light kan off hnuah Hriata nen pawh inhnungchhawn ve vein mutthilh tumin ka maimichhing ta vang vang a. 

Mut chu a chhuak, mut pawh ka muhil. Mahse, thinthi diaia mutthilh erawh a va har sî êm. Engdang a ni lo, ka hlauh vang nge ka ât vang pawh ka hre lo, eng emaw tak rawn thleng turah hian ka ngai run mai a, chu chuan mi kaiharh leh nge nge zel. Mahse, mak takin zan khatna chu engmah thawm riva leh phe veih pawh hmuh leh hriat tur awm lovin kan muhil tluan thei ta a. Hriatpuia ka thawh khalh lo chiang hle. Ka thawh ve meuh chuan thingpui a lo lum so der tawh. Ka khan lo hle a ni. 

Taka sawi hmaih loh tur chu Hriati ruang ni kha Buangi te man inhlan ni kha a ni a. Vawiin hi an inneih nî a ni. Man hlanna lamah khan chhiat kan tawh avangin ka lang ve thei ta bawk si lo va, an inneih nî tal chu hmanpui ve hrâm ṭha ka ti hle. Thlan nghahni a lo ni ve bawk si, rilru a inkhâp a inkhâp mai. Mahse, tukṭhuan kan ei laiin, Pa Zawma chuan, "Sangzual, vawiin kha Buangi te inneih ni a ni lawm ni kha'h? I zuk lang ve ang chu..he lam chu ngaihtuah suh, kan thahnem alawm. Kan khuaa i lo awm tirh ata lo buaipuia lo ngaihventu che an nih kha..i lan loh zawng a mawi lo vang" a ti ta hlauh mai a. Thawk khat a veng huai e. Sir Fela khan School zawng zawngah inneih sawmna a sem chhuah avang leh amah zirtirtu a lo nihnaah School chawlh kan puang hrim hrim kha a nia. Buangi te inneihnaah chuan tel ve ka tum rilru ta a. Dar 11-ah a ni a, inneih inkhawm zu hmanpuia he lama chawhnu lam chu puih leh ka tum tho a ni. 

Ka thawmhnaw neih ṭhat ber nen ka inṭam ve at a. Suit hi ka nuin , "Tlangval tan chuan pakhat tal neih ve a ṭha" tiin ṭul ka ti vak lo chungin a lo ṭhuitir a. A pawk duk dak hlarh mai niin zep thu a chêng lo, ka vun rawng ten a lo zir ve bawk a, ka inhmeh ve viauin ka hria. Kamiz var chungah ka ha a, nectie pawh ka awrh ve zân mai. Ka sam hi chu tih vak ngaihna a awm lo, a kawih ang ang hian ka dah tawp a, style a ni vek mai e. Bike ka silfai tawh bawk a, confi ru ve deuhin ka tlan thla a. Hriati kha la dam se zawng kan inphur thla maithei a ni. Terini te in thlen hma deuhin Muansangzuali leh Tleipuia bakah Tleipuia school kalpui ve ziah ṭhin mipa naupangte kha hnathawh kawr hain an lo kal ve rak rak a, ka ding lo thei lo. Sangpuii chuan kamiz sen duk , hlui tawh lam lian lek lek hi a ha a, lukhum parh grey rawng hlui tawh lam tho khumin, kekawr dum a ha a, puan pheikhawk ṭet tawh ṭhui ṭhat leh par da zet tawh a bun bawk, paikâwng a darbah bawk. Chutiang khawp chuan ka chîk a nih chu! Min lo en ṭhap mai a. Mi inneih nia hnathawk tura an han chhuak chu ka lainat a zual, ka ni nghulh maiin ka hria. 

"Khaw nge in kal dawn?" Ka ti nghal thâwr a. Sangpuii chuan zak hmelpu lek lek hian, "Thing kan phur dawn a" a ti zawi raih a. 

Tleipuia chuan, "Sir, tlaiah ruai an ṭheh dawn tiraw?" A lo ti hmanhmawh a. Ka nghing lawih thei. Za lo zeta nuiin, "Ṭheh dawn chiang, in rawn ei ve ang chu tiraw?" Ka ti nghut a. 

A ṭhianpa nen chuan, "Ruai ṭheh ve ang aw" an ti rual nghal ṭhawt. Sangpuii chuan, "Bawihpui, Apa ten an phal loh kha" a lo ti vat a. Ka thinin a tuar ta lo, "Engvang teh ngawtin nge an phal loh a? Va phur vat vat ula, tlaiah ruai ṭheh dawnah ka rawn sâwm ang che u" ka ti hmiah. Hrihhai hmel taka min thlir reng lai chuan ka tlan liamsan ta a. Pu Thara hi Muansangzuali pa ni lo se chuan ka hnek tawh maithei a ni. Heti êm êma ril arah fate laka hlei han len mai chu! Ka pa nen ka khaikhin lo thei lo, an inang lo lutuk hi. Pu Ramtea te inah ka lut kawi a, an lo buai nuaih nuaih a, khualkhua aṭanga rawn ṭawiawm an ṭhahnem ve bawk nen. Nu Mawii'n, "I rawn lan theih pawh kan lo ring ngam chiah lo va, i va tilawmawm êm..a zia lo êm mai, Zawma te pawh chhiat an tawh laia hetia hlim ni lo hman bîk hi inthlahrunte pawh a awl dawn dawn alawm le" a ti bawrh bawrh a. A dik ang, khawtlâng nu leh pa an lo nih vena laiah chhiat tawh laia ṭhat ni lo hman kha a nawm dan a famkim chiah loin ka ring. Mahse, tuman hmalam hun kan hre miau lo va, an demawm hran loh. Buangi pawh an chei hmelṭha kher mai. Amah hi a senior ve deuh tawh e tih mai lohah chuan a hmelchhe hran lo bawk a, a ngo bakah a hmaifang a dik riau tlat. A ṭhiannu tura a hman hi Terini chungchang lo sawitu Vani a tih ngei mai kha a lo ni. Ani pawh a hâng hlek tih mai loh chu a face cut a dik reuh hle. A nui mawi hrep lehnghal. Biak in lam panin kan kal ta dam dam a. Dan thianghlim ngeia nupui pasal inneih hi chu a ropui dan a thianghlim bîk. Mahse, kan tunlai khawvelah hi zawng puanhnuai thil pawm ṭûn chung hian khawvel ngaiha ropui leh lan mawi nan dan thianghlim / dan puitling/ dan khatna tih te hi tlin lo chung paw'n kan han mualpho pui thâwr zel mai a! Kei zawng ka inthiam thei hian ka ring meuh lo. Pathian lah a zahawm ropui si. Dan puitling kan tihte pawh ropui viau mah se; inneih hlenna leh nghehna pawh a lo ni ber chuang lo, inrûk ka sawi mawina lam erawh a ni hauh lo thung. Nulat tlangvalna kawngah hian kan harh hma tulh tulh tawh si a, tlin tak tak aram pawh hi kan tam tawh lo maithei a ni. Mahse, a tlin tak takte erawh ka ngaisangin ka ngai ropui takzet. A tluante pawh an tluan bîk ka ring hial ṭhin. 

Inneihtirtu an pastor hi a thiam riau, hun rei tak a la lo va, a boring hman lo. In khawm banah thla an han lakpui neuh neuh a, kei erawh ke a kham tawh bawk nen, Pu Ramtea te in lamah ka inkhalh phei ta daih a. Hriatpuia ka hmu miah lo, a fatu daih a ni maithei ni. U Kaia pawh a nalh ve khawp mai. Suit nena induan zuih reng chu khua a lum ta deuh bawk nen, ka ning ta deuh a, ka haw leh ta phawt. In chungah ka peng kawi a, "Puih an ngai lo, vawiin na nâ na chu enghelh nei lovin inneihna lamah i rilru pe rawh" min lo tih tlat hlawm avangin ka tlawmngai duh ta bîk lo va, ka inthlak a, ka chhuk leh ta mai. Min hrethiam ve tho chuan ka hria. Zoa pawn ruai tal a rawn ṭheh tur thu a sawi tak kha mawle. Kan titi kan titi a, chawhnu chu a ni ve leh ta ruai mai. Min kam tlattu a awm avangin Vengthar lamah ka tlan phei ta a. Pu Thara te in kawt zawnah ka ding hmak. An vawk chaw chhumna tuala thingṭang lo let rum ka hmuh chuan Sangpuii te an haw tawh tih hrilh ka ngai bik lo. Ka lut ve ta thâwr a. Sangpuii chiah a lo awm! A lo inbual zo deuh chiah a niang, a sam a lo hru hul mêk a. Min hmuh chuan a laih hmel lek lek. Mahse, he tleirâwl hi a inthunun thei hlein ka hria..

"A pa te an awm lo va" a lo ti sap a. 

"I pate rawn hmuh ka tum hleinem" tih pahin ka ṭhu thla nghal. 

"Tu nge hmuh i tum?" A ti leh ngat. A va chimawm reuh e. 

"Nang leh i nau" ka lo ti ve sup a. 

"Min biak duh tawh loh kha" a ti dam thlap a. Kha ka thutlukna ve tehlâm kha, Diki khan a rawn thaibo leh vek alawm le..bakah ka ngaihtuah lêt leh hian awmzia a awm lo ê ka ti, a pa sual vanga a fate han biak duh loh ngawt kha a pa vak lo. Bakah a inchawbê lutuk lo tlat. 

"I nau khaw nge?" Ka ti leh a. 

"Ka hre lo" a ti tawi tak. Lungawi lohna a nei em mawni chu aw ka ti hman rum rum. 

"Hre ta che" ka lo ti hluk a. 

"Ka vêng hleinem" a ti ve hmak. Kan va inchhang tâwk dun tak. 

"Insiam rawh" ka'n ti ngawt a.

"Ruai ka ṭheh ve peih lo. A pate an kal a, a tawk reng" a tih chuan, "Chu lehnghal, va insiam vat rawh. Mahnia chaw ei chu a tui duh lo" ka lo ti vut a. 

"I ninawm" a ti ta daih. Ka nui hawk ringawt. A mitmengah min ning tak tak lo tih ka chiang ve tlat! Tleipuia a rawn lut ta a, min hmuh rual rual chuan, "Sir, bike-ah min phur ve rawh aw" a ti thar thar a. A phur sârh mai chu ka khawngaih letling. A û chuan, "Bawihpui, apa te an kal tho sia, kan unauin hetah ei mai ila" a ti dêk dêk a. 

"Sa ka ei ve châk alawm" a lo ti hlar si. Sa an hmeh khât tihna em mawni le. 

"Sangha ṭin kan lei ang a" a û chuan a ti leh hram a.

"Ka duh lo, a thâng si" a lo ti hmuk. 

"I nau a kal chuan i kal ve ngei a ngai tihna..va insiam vat rawh" ka lo ti nghut a. Ka ṭawng dan vel chu a neitu ka ang mang e. Ka ta a ni der bawk si lo. A pindanah a lut ve mai bawk a, reipawh a insiam lo. Jocker pants dum a rawn ha a, a chungah Tshirt var, a hmaa a duma eng emawni lem print awm a ha bawk. Chapal kaih dum a bun zet tawh naa, va hlip lehin crocs a grey thar hmel vak tawh lo hi a rawn bun chhuak ta zâwk a. A nau pawh a kawr a va thlaktir..a shampoo rimin min ur apiangin ka nau ka hrechhuak ziah lehnghal. Mi te angin incheina manto leh mawihnai inbel ve lo mah se; a mize ṭhatna leh a rilru thianghlimna chuan min hneh daih zawk., Midang ni lovin , 'Ka savatê' kha ni miau hek le. A sam chu a la huh avangin a lai taka bari ṭhenin a thlah hniang a. A va duhawm chungchuang tak. A hmaiah makeup sulhnu hmuh tur awmchhun chu lip gloss nude deuh mai a inhnawih chu a ni mai awm e. A inhmeh êm êm lehnghal. Tichuan, rilru thawveng zetin an unau chuan ka chhawm chhuak a, ka bike hnungah chuantirin ruaiṭhehna tur hmun lam ka panpui ta a. Tlema in tlem deuhna kan tlan lai chuan, "Ka zak ê, miin min sawi duh ngawt ang, bike-a ka chuan vawikhatna a ni bawk si" a ti lâng lâng a. Tleirawl an ni tawh a, ngaihzawngte pawh hre rual an ni ve tawh, miin an sawi dan tura ka rin leh a rin a inang lo chuan a rilru thianghlimzia a tarlang chiang hlein ka hria. He nau hi duh viau pawh ni ila, ngaihzawng la nei miah lo a nih danah zirtir chawp chunga ngaihzawn a ngai dawn sia, kei lah a zei lo chi ka lo ni bawk nen..ram ropui kan thlen hmel loh. Mahse, midang tan ka phal lo bur bawk si. A buaithlak ê. 

Chaw eina tur hmun kan va thlen chuan an lo awm nual tawh a. Pu Ramtea te leh Fela pate inthurualin tihian ran an intalh sem a, khawtlang an hrai dawn a nih hmel, a tihchi phian ang. A hautak lo zawk bawk ang. Fatu ho pawh an lo zi hut hut a, Hriatpuia'n min rawn hmuh chuan a rawn kal nghal vat. Sangpuii erawh a classmate lo kal vete bulah a kal tawh a, a kal dawn khan, "Sir, ka kal dawn. A pa ten min hmu palh ang" a ti kha a nia. Tleipuia pawh a ṭhiante a hmuh rual rualin a va pawh nghal. Kei ka mi chuang hawi leh ruk ruk tawh zawk. 

Hriatpuia chuan, "Kan peih ṭêp, i ril a ṭâm tawh em?" A ti var a. Ka lu ka thing ringawt. Zial kan zuk dun lai takin hnung lam aṭangin, "Hriatpui, i fatu ve law?" Hmeichhe aw fiah fai leh no deuh tak hian a rawn ti puam ṭâlh a. Kan lehhawi rual ṭhawt. Ka hmaah chuan nula sanghet leh hleitling lam, ngo zet mai, sam uk lam, a vun râwng nena inchawih zet mai, hmaifang dik leh hlai phuk, 'A hmelṭhat dan hi a zaidam' kan tih tur ang chi kha a lo ding ran a. Kawrfual senno, a par a ha a. A inhmeh kher mai. Chapal kaih a bun bawk a, a keṭhiah pawh mawi tak a ni. 

Hriatpuia chuan, "Ehe! Lal Julie chu! Engtikah nge i lo hawn?" A ti chul a. Julie!..mi hriatchhuah ka nei, Baby'n a sawi kha ni ngeiin a lang. 

Julie chuan, "Niminah khan, Hriati ruang ka rawn nang hman hrâm" a ti zangkhai vah a. 

Hriatpuia chuan "I va fel ṭhin tak, chuan engtikah nge i kal leh dawn" a ti zui zat a. 

"Ka awm ve deuh rih ang, thla khat vel chu..i ṭhianpa hi High School zirtirtu thar chu em ni!" Tih pahin min rawn melh ralh a, a mitmu a lian sia, a melh pawh a na zêk mai. A tilang zahawm bawk si. 

"Nih hi, inhmelhriattir nachâng che u pawh ka lo hre lehpek lo a nih hi..Sangzual, hei hi Julie a nih hi, kan khaw nula chhuanvawr" Hriatpuia chuan a ti duah a. Ka lo nuih vat, Julie pawh a nui ve sak a. 

"Baby khan a sawi chiam tawh a, ka hmuh che khan i nih ka ring rêngah" Julie chuan a ti siam siam a. A nelawm nghal mang e. 

A ṭhiante an rawn lan takah chuan, "Ka kalsan ang che u. Saw an lo kal tawh sia, nih u,..Sir, i rawn leng ve ṭhin dawn nia" tih pahin min rawn nuih leh sak a, a kal zui nghal. 

Hriata lah chuan, "Rim rawh aw. Kan rim ang. A melh dan che aṭang khan a haw vak lo che tih a lang reng mai" a ti nghal chiam a. 

"Aa..i ho mai mai. Rim te pawh kan la rim ang chu..eng nge a thawh reng reng a, hetah a awm ngai lo mi?" Ka lo ti ve vat a. 

"Awm vak lo, sawtah Lianpuiah sawn Clerk hna a va thawk ve alawm..a vannei a, PHC an rawn dah tirh lai kha a pa hi unit lama a chet nat lai a nia, a thun ve thei ta hlauh a, tunah chuan hlawh ṭha pui a nei tawh..i tifuh viau ang..a fel bawk sia e" a ti leh zuah zuah a. A thil sawi vel dan chu amah a ang lo vel tawp. 

"Aa..Lianpuiah a hûng ṭha awm êm mai" ka lo ti nghut. 

"Teuh lo, a lerh lo a maw..ka hriat chinah ngaihzawng pakhat chiah a la nei mawle. Chu lah chuan an inzui ve lai rengin sâwn a thlaksan pek a! Ta ṭang khan ngaihzawng hi a ngaihsak ta lo reng reng niin ka hria. " A ti leh duam duam a. Sawi tur dang a vân êm vangin ka zawt thui mai mai zawk a ni. Chaw dawh a lo hun tawh a, a hma lamah intlarin a dawh hmasa pawlah ka va ṭang a. Ka ril erawh a ṭam êm êm hran lo. Sangpuii te unau pawn an dawh ve mêk a, hawn dawnah ka thlah ve leh mai ang chu maw..

Zoa a rawn lang ta bawk a, kan pahnihin kan ei dun a, a bialnu a fatu ve bawk sia, inzui thei pawh an ni bîk lo. 

"Zoa, Tleirâwltê ka bem dawn asin" ka ti thut chu, a chaw hmuam lai a hak ṭhelh a ni. A rin loh deuh thil ka sawi tih a lang reng mai. 

"Tu..?" Tiin a khuh zui nghal bawrh bawrh a, a hnungzângah ka chum vat. Tui a in nghal bawk a, a zia leh deuh mai. 

"Saw saw" tia ka hmaa min hnungchhawn zawnga ṭhu chu ka va melh zauh a, a va en ve leh nghal. 

Nui sûng chungin, "Ber kher a, mahse, a hmeltê hi a ṭha reuh asin. A zakzum rih êm zawk a.." a ti ve ta sûrh sûrh a. Terini kha chu a sawi ri khât khawp mai. A ṭha daih zawk. Chaw pawh kan ei puar viau e, bawng sa ei a khât bawk a, vawksa ai mahin ka ei hnem zawk âwm e. Zoa chuan, "Lo han haw mai rawh, ka'n nghak ve lawk ang e. Zanah chuan kan rawn kal ang" a tih avangin hawn lam ka hnaih ta a. Muansangzuali te unau ka melh deuh a, ka hmu mai si lo. Ka bike hunna lamah ka chhuk a, ka lo nghak ringawt. 20 mins vel lai a kal tawh ang tihin hmeichhe thinrim âng thawm ka hre ta a, ka hawi kual vat. Ka chhak lawkah chuan an lo awmkhawm deuh laih a, tu ber nge âng pawh ka han hre thei lo, a aw erawh kha chu ka hriat hnu a ni. 

."Naktuk zinga eirawngbawl ngai lo turin tlaiah in unauin rawng lo bawl r'u ka ti mawlh mawlh sia, ti nge in rawn kal ve ngawt..haw nghal ula, va bâwl rawh u. Ka bawl peih teuh lo a nia" a ti hlawih hlawih a. Tu nge tih chiang takin ka hre ta. 

Ka pen chho pâwk pâwk a, mi inkarah chuan inzepin a laia Muansangzuali leh Diki lo indinchilh rân chu ka va hmu ta a. Eng sawi set set lo va Sangpuii va kaih pahin, "Keiman ka hruai a nih kha, tirawh, Sangpui, haw ang u. I nau i hmu em!" Ka ti liam puat a, Diki'n ka hmel a hmuh takah chuan a thinrimna te chu thup bo a tum ve nge, a danglam ve ta deuh. 

"Ee..aw nang i ni maw? Ka lo hre lo a nih chu..nia, Sangte, va haw rawh u. Keini pawh kan rawn haw ve ṭêp ang" a ti nghal zat zat a. A va tenawm thei tak. Ngawi rengin bike panin kan inzui phei a. A nau chu a zawng kual tih ka hre thei. "Khaw nge maw an lo kal hman le? A va hahthlak tak" tiin a phun hlak hlak a. 

5 mins vel zet kan din dun leh hnuah Tleipuia chu a rawn lang ta hlawl a, a nui var var reng mai. A puarzia thu a sawi chamchi reng chuan min tina leh ṭhin. Chaw kawpuar pawh ei ngam lo khawpa fate han siam theih mai chu aw…a mit tuamsaka Pu Thara hi hnek hrep ka va châk tak. Chhungkaw thila lo inrawlh ve lah ka duh bîk si lo. 

An in kan thlen chuan kei pawh ka chawl khawmuang ve zui a. A chevel chu ka lo thlir reng ringawt tawp. Thingpui hâng a rawn dah lai tak chuan a bânah ka lo vawnsak vat a, ka bul chêt-ah pawt ṭhuin, "Sangpui.." ka ti thâm ṭuak a. A hamhaihin a hrilhhai hmel kher mai. 

Kei a tak pawh ka lai deuh hû mai. Mahse, tun aia hun remchang ka hmuh tawh loh takin bawhbelh ka tum bik dêr lo thung. 

"Ka rilru i hria tiraw?" Amah en chungin ka ti ta a. Ka mitah a en ngam miah lo. Ka kut chu phihthlak a tum char char ringawt. 

"Ka zawhna i chhan phawt a ngai" ka ti ve tlat si. 

"Eng zawhna?" A ti sep a. 

"Ka duh che a, min duh ve em?" Ka ti tlang ta hrâk a. Pehhel kual vel kha ka peih tawh lo. A ngawi rauh rauh a, a biang a rawn tai nghal têk mai. 

"Mawh..vatin " tiin ka nawr leh salh a. 

"Zirtirtu leh student an induh thiang lo. A zahthlak" a ti ta hmak a. Mahse, a rilru dik tak hi chu hriain ka inhria a ni. 

"Ka duh che a ni mai. Mahse, ka nawr lo vang che. Ka lo ngaichâng ang che" ka ti nghet charh a. Ṭawng tuma a ka a ân zuai lai chuan kawngka chu na zeta rawn intheh hawngin Pu Thara chuan rui tih hriat zet hian, "Muansangzual, engvangin nge ruai in rawn ṭheh ve ngawt a?" A ti pawr huar a. A rawn pailut chhar chhar bawk. Mahse, min hmuh rual chuan a ding khawng reng a , "Keiman ka hruai a nih kha" ka lo ti var..

Pu Thara chuan, "A ni maw? I va tilawmawm ve aw.." a ti hluai a. A sehchilh deuh nak pawh kha a insûm ve nge a zia deuhin ka hria. A pa a lo hawn takah chuan kei pawh hawn lam ka hnaih ta a, Pu Thara bathroom kal hlanin ka kai sauh sauh a, kawngka bula bangah chuan nem betin ka fâwp ta a..mahse,. 

Kawngkapui rawn hawn paha Diki awrâwl ngeiin, 

"Ar pawh in la lawi na nge " A tih ri chuan min tiharh zawk mai. A ranga rangin Sangpuii chu ka thlah a. Ngawi rengin ka bike dahna lam ka pan ta a..keimah vangin tawrhna a hmachhawn leh ang em? A hmachhawn leh a nih ngai chuan keima thiam loh bawk a ni leh ang. Mahse, ka venghim tawh ang. Tuman an tinâin hliam an siamsak tawh tur a ni lo. Chu chu Muansangzuali laka ka thutiam, ka mawhphurhna anga ka ngaih tak chu a ni…eng nge maw kan an zel ang le?! Fawh lah kha a nuam zêk a..a hmui nem zet mai kha aw..