Ka savaté 8

KA SAVATÊ (8)

Ziaktu : Toni Râlte

Canteena ka awm chhung chuan thil dang reng reng ka ngaihtuah thei chuang lo. A hrilhhai dan tur ka ngaihtuah a, Ka na ru veng veng mai. Ti nge maw a pa vang maia an ni unau lehzel ka hnungchhawn ringawt le..mahse, Pu Thara'n min ṭawng khum dan leh duk vek khawpa a fanu a nghaisa tih ka hriatna hian ka thinlung a tikhauh ve tlat si! Ka awmdan chu nuam lo tak a ni. Kan lêt leh chuan Thana'n, "Ṭhianpa, vawiin tlai chu chaw rawn ei ta che. Nizanah ka û ten sanghal an rawn kap a, inhleh tham a nei meuh si lo va" a ti a. Eirawngbawl ngai lo va chaw ei chhuahte chu tlangval tan te chuan hnâr phal chi a ni lo. "A va lawmawm awm ve" ka lo ti var a. Thawhpui dangte pawh a sawm naa, chhungpuinu lam chu an kal theih a rinawm loh. Sir Thianga nen kan va chhim ve dawn a nih awm chu. Kan haw lamah kan hmaah Muansangzuali leh Heleni te an kal a. Midang kal ve tam tak zingah a langsar bik fô. Miss Puii te ho nen kan haw rual bawk a, kan titi kawng tluan mai. 

"Tun lai kan khua chu a ralṭi hle mai, Sunhlu veng lamah thaw ri an hriat leh tawh kha" Miss Biteii zawk chuan a ti lâng lâng a. Sunhlu vêng hi veng hmawr lam deuh a ni. Sunhlu kung a tam a niang chu ka ti deuh. 

Thana chuan, "Thaw ri han tih ngawt, ramsa thaw ri pawh a ni ve thei tho a" a lo ti khauh a. 

"Aih, chhungkaw khat chauhin an hre tlat lo alawm, in hnuaiah a rawn thaw ri hulh hulh an tia" Biteii bawk chuan a ti leh a. Tlem chuan a mak ve deuh. Muansangzuali nen Zoa te in thlen hma rûama thaw ri kan hriat nen khan inang tak ang maw? Ka sawi duh lem lo. Ni e, thilmak leh danglam thleng a awm ta fô mai, kei ngei pawn ka tawng zing ta e. Fiah ngei ṭha ka ti, mahse, engtia han fiah tur nge tih erawh ka la ngaihtuah chhuak thei lo. 

In ka thlen chuan in chungte an lo la thleng lo va, chaw han ei chhuahsan daih pawh chu ka ti rilru a. Baby ka call ta a. Khaw ṭhenawm an rawn thleng tawh a, "Thana ten chaw eiah min sawm sia, engtin nge maw ni dawn le?" Ka tih chuan, "Va ei rawh, ka nî te in lamah kan tlang ang. Chaw min lo chhum kep dawn a" a rawn ti awlsam êt a. A zia viau e. 

Khawchhunga teivah nan pawh two wheeler hi chu la ngaihtuah ve tur a ni tiin ka ngaihtuah a. Aizawlah khan ka nu khan, "Lei rawh" min ti ve reng ṭhin a. Bike pakhat man na nâ na kha chu a huphurh bik lo a ni teh chêk ang chu. Mahse, ka mamawh ber nia ka hriat loh avangin ka lei ta lo kha a nia. He lai khaw chhungah hian 2nd hand lei mai mai turte awm zawk se ka ti deuh, Zin nan chuan two wheeler chu a tihchi chuang loh bawk nen. Melh deuh tur a ni ka ti rilru a. Ka inbual fai a, Thana te vêng a hlat ve deuh vangin tlai lutuka va thlen ka hlau ve deuh. Ka inthlak sawk sawk a, Mipa hi chu kan awlsamin skin care tih vel hian min tibuai ve lem lo khawp a. Kei pawh he lam hi ka ngaihven loh zawng tak a ni. Mahse, ka kal dawn khan Tei'n, "Sunsreen hi i chhuah dawn apiangin inhnawih ziah la, mousturiser pawh nghei suh" tiin bur lian deuh deuh min leisak pek a. Ka han inhnawih ve lei luai a, ka ṭhatpui êm êm pawh ka hre lo e a. 

Ka chhuak tur tala ka lak thlak rual chuan call ka dawng a. Pu Ramthara a ni. Lak loh ka tum zet a, eng emaw tak te pawh a lo ni thei tiin ka la ta hram a. 

"I buai em?" A rawn ti a, a aw ah inthlahrunna ka hre thei. 

"Chaw ka ei chhuak dawn a, kal ka tum chiah" ka ti nghut a. Ka ṭawng pawh a nêm hran lo. 

"E a nih chu, zanah ka rawn bia ang che aw..i remchan hunah" a rawn ti dam leh thlup a. Kan dah ta a. Eng thu tak rawn sawi tum ang maw? A rawn inchhir leh vel dawn em ni ang? A tirah khan Terini thusawi a hriattirh khan kei min rawn be nghalin thudik zawng nise tiang hian hmelma ang maiin kan inep lo ni mai tur. Pawisawi miah lo a faten an tawrh phah zui lehnghal. Ka ngaihtuah thui chuan ka thin a rim dawn zel. 

Lapuii dawra zial ka lei laiin Terini a rawn lut leh chat. Mahse, melh pawh ka melh duh lo. Ani pawh a zum dâk mai. Lapuii nen hian kan innêl ve angreng tawh bawk a, "Sangzual, vawiina ka dawra thil rawn leite titi i hre duh em? 'Sir Sangzuala hi chu a va man tak..' an ti mawle..i luck riau ania aw".tiin a nui bâwk bâwk a. 

"A va lawmawm si ve. Min lo biak nghal lo nia" ka lo ti let ve zat a. Terini ner sak chu ka hmu reng. Ka runluih pawh a ni hran lo, a remchâng êm a ka sawi ve mai a ni. Ka inlei zawhah thildang sawi zui lovin ka chhuak ta nghal a. Thana te in ka panna kawngah ringawt pawh betu leh min chibai nawlh nawlhtu an awm nual mai. Ka kal khât ve bawk a ni. Thana te hi an vengah na nâ na chuan a khawsa thei pawl leh in leh lo pawh changkang pawl an ni ve a. A pa hi Lianpui khuaa PHC-ah Lab technician a ni a, kar tluanin Thana nu nen Lianpuia an quarterah an va awm a, kar tawpah an rawn haw ṭhin. Thana te hi unau pathum chauh an ni a, amah hi a milai niin a û hian nupui nei tawhin fa pakhat an nei tawh a. An la khawsa ho vek bawk a ni. An naupangber hmeichhia hi Manuni a ni a, Tei ai chuan a û hlek ang. Te taktê ṭawng duh leh mawngzâng zet mai a ni. Ka va lut pawh min lo be nghal bawrh bawrh a, "He lamah i rawn kal ngai si lo, rawn len phei ve ṭhin tur alawm" a lo ti nghal bawrh bawrh a, ka tlangnêl sawt mai. An monu chu Chhani a niawm e. Sam tawi mât mai, la naupan hmel zet mai a ni roh a, a zah pawh a zahzum hmel. An pa nen an inthlau ve viauin ka ring. An fapa kal thei têrh têrh chu ka chhawnchhaih a, a nui duh bawk a, chhaih a nuam ngei mai. Thana û hi Hminga a ni a, ka û ta lem lo. A nute Lianpuiah an la awm bawk a, an unau ringawt chuan an zahawm lo e tihna ni loin âwm a nuam daih zawk. Thianga pawh a lo thleng ve a, veng inang an ni bawk a, an innêl hle. Thana ṭhianpa tho Lawma an tih a lo kal ve bawk a. Ani pawh Thana anga ṭawng tam lem lo, a ṭawng ve chhun nuihzatthlak deuh mai a ni a. Kan inkawm thei nghal viau e. Zanriah pawh an peih thawkhat ta bawk a. Hminga'n ṭawngṭaina a neih zawhah kan ei ta nghal a. 

Mi in duhsak taka chaw eia min sawm hi chuan puar êl euha ei tur hi a nia, kei pawh ka inthlahrung duh teuh lo. Ka'n lim leh nghek kha. Ei khamah ka dul ka zût ru ka zût ru mai. Puar lutuk te ṭâm lutukte hi a lo nuam miah lo, a tawk chin hi a lo awm ve tlat! Ka leng khawmuang ve a. Thana hian bialnu a neih âwm ka hre miah lo, an chhaih ka hre ngai bawk si lo. Mahse, a ṭhianpa Lawma'n, "Lungte pawh a lêng tawh alawm, Sunday chawhnu chu va lêng ve tawh ila..Hei Sangzuala te nen" a tih takah chuan ka beng ka chhi ru ta deuh. 

Thana chuan nui huah huah chung hian, "Pakhati i hmuh châk vang zawk a ni lo maw?" A lo ti ve a. 

Manuni chuan, "Eh..tihian inti ve reng a, nupui neih pawh a thiam loh hi" a lo ti zat zat a. An unau chu an inngam hmel khawp mai. 

Thana chuan, "ka nei thut palh ang a, in buai hle mai tur asin" a ti a. Kan nui dar dar mai. Kei chuan, "I lo va inthup thei ve..khawilam mi nge?" Ka ti a. 

Lawma zawkin a lo chhan khalh a, "Nurse han tih mai chuan eng khua nge i hrethiam tawh mai em?" Tiin a mitko a san âk a. Khai aw! Ṭhianpa Thana chu a va thing fuh bîk awm ve aw. Nurse hi chhungpuinu atan pawh hian an ṭha ka tiin, dammawh hritlan nikhuaah pawh an ṭangkai nge nge. 

"La rim a ngai a nih chu, Taka! Lawma, two wheeler 2nd hand han lei mai turte hi in hre lo maw? Khaw chhung han teivah nan ka mamawh ve ta riau mai" ka ti a. Sawi hun tak nia ka hriat vang a ni. 

Lawma chu a ngawih deuh dat hnuah, "Ngawi rawh aw, Pu Lawmsiama te khan an tiral tawh em le? An fapa khan bullet a ngen a, a bike kha hralh an duh tak asin..Apache 180 a nia, khaw chhunga hman atan chuan a la ṭha viau, an hmang rim lo bawk a" a ti ta zung zung a. Zawt fuh ka inti kher mai. Thingtlangah chuan Apache ang chu a ṭha viau tak ang le. 

"Chu! He lai veng tho hi an nih chuan tlawmngai la, min han zawhsak mai teh" ka ti ta ngawt a. 

Thana chuan, "Lawk, Pu Siama chu ka'n call ang e." Tih leh a phone hmeh a rual a. Manuni lah chuan, "U Sangzuala chu Bike i neih chuan i lerh sawt ang a" a lo ti vel.. he nula hi a bula awm a hahdamthlak riau. La kawmngeih tur a ni. Thana chuan, "Aw..hello, Pa Siam, in bike kha inti ral tawh em? Aw..hei ka thawhpui, Aizawl aṭanga lo awm khan a duh deuh a mawle. E..aw le, a nih chu..duh leh amah thlah pahin kan rawn en ang a a ni mai lawm" a ti ta zung zung a. Ka beisei aiin a awlsam dawnin ka hria. 

A dah hnuah, "An la tiral lo a nih chu, a la ṭha ve riau a, 40000 lo chuan an phal bik lo a niawm e. Mahse, Pa Siama te chu ka ngam alawm, kan dil tlawm dawn nia"a ti leh hmawk hmawk a. Ka helhhawlh deuh ngawt lehnghal. 

Thingpui hâng kan in laiin Manuni inlêng tur niawm tak tlangval pahnih an rawn lut a, keini pawh chu hnawk dawna inhriain thingpui kan in zawhah bike en tur chuan kan chhuak ta a. Thana te in aṭangin a lo hla lem lo. Pa ber leh an fapa râwlthar an lo awm a. Bike chu a dum niin a la thar ṭha hle tak mai a, an hmang rim vak lo a nih hmel. A engine lamah harsatna a awm loh thu te an sawi luam a. Sing li chuan a na vak miah lo. Mahse, Thana chuan, "Pa Siam, mi hrang pawh kan nih loh hi, ani rawn awm thar ve chauh a ni bawk nen, tlawm ve r'u,. " Tiin a nawr sek sek a. Tuna la nghal mai turte pawh ka ang alawm le. Nuam lo ka ti letling. 

Pu Lawmsiama chuan, "Ni e, mi naran a ni lo bawk a. Sing thum sang nga in kan lo hniam ang e..engtikah nge i rawn lak ang?" Tiin min rawn en a. 

"Aa..tunah hian pawisa fai chutiang zah kawl lai ka nei miah lo va, hetah ATM a awm mai bawk si lo, engtin nge ni ang? In account-a thun in remtih chuan a harsa chuang lo va" ka ti ta duah a. A lu hiah nuah nuah pahin a fapa bulah, "Mama, account-a dahte chu a ṭha daih zawk lo'm ni? Aizawla i chhuk hunah i la chhuak mai ang a" a tih chuan, a fapa chuan, "A him daih zawk alawm" a lo ti ve thên a. A remchang leh ta sawt mai. Tichuan, awlsamtêa inberemin naktukah a fapain a rawn dah dawn a ni. Han khalh haw nghal pawh duh ru viau mah ila, pawisa ka la thawn si lo va, nuam ka ti lo. 

Thana'n a car-in min thlah a. Terini te kawt zawn kan tlan lai chuan, "In inṭhen leh hma sia" a ti sup a. An hre lo emaw ka tihte pawh hian an lo hre ve zel mai. Mak pawh ka ti lo e a. 

"Nia, a dang zawn a ngai" ka ti ve ringawt. 

"Zêp loh chuan Terini ber kher i han bawhzui chat kha chu mipa chu ni lo ila, ka khak ang che ka tia. Mahse, sawi hi a nuam lo ve a, i tan chuan ka iai..a aia ṭha leh belhchiandawl hi an kuh ve ṭûn a nia aw. Kan veng lamah te sawn rawn tei phei ṭhin rawh. Hmeichhe fel chu kan hai bik lo teh mai a nia" a ti ve mawlh mawlh a. 

"Nia, chu..lirthei ka neih tawhte chuan ninawm khawpin ka rawn vei ang. Ka awmna hmun zir loh a leiah ṭhian pawh duh angin ka la siam hleithei lo a nih hi" ka ti ve mai a. Ka in pawh kan thleng ta. A rawn peng ve zuai a, Lawma bialnu rimpuiah Lawma'n a lo la nghah avangin min hawnsan leh ta a. Kei pawh ka inthlak a, in chungte an lo la thleng lo nge, khitah an chaw eina hmunah an la awm zawk, an la reh ṭhap mai. Ka nu ka bia a, bike chungchangte chu ka sawi a. 

" A ṭha alawm, tlangval nih ve chuan a ngai ve. Hei i nau lah chu Samua hian a rawn birh tlut tlut mai si a, ani lah hian a ngei tlat bawk si..a hahthlak ṭhin khawp mai" tih pahin a nui hak hak a. 

"Ngah nge maw a ngei tlat ni..Samua te chu a fel tehlul nen" ka ti luâm a. 

"Ka hre bîk lo, nei ngai loa thuchâng..a chebuai ve rihah ngai ang. Chuan, Mama, Nimin khan i patea te nen kan inbia a, i pa lung hi phun ve tawh ila kan tia..eng nge i ngaihdan?" A rawn ti a. A thutak deuh bawk. 

"Ṭha in tih ang ang kha ka pawm vek e. Mahse, kan phun dawn a nih chuan ka hlawhte pawh hi inkhawl ve hlek se la, ka thawk ve chauh a ni si a, kan phâng lutuk ang e" ka ti a. 

"Nia, a dik alawm. I pa lungphunna tur na nâ na hi chu hun rei tawh tak aṭang khan ka lo inkhawl ve bêk bek tawh alawm. Kha lamah chuan lungngai suh, tin, i pate leh i nî te ho pawh an inkâu ve khawp a nia" a rawn ti dap dap a. Thla a muang ṭhin e. Ka pa chhungte lam hi an tunhma hunah ka pa kha kal hrang mah se; tunah min en hran chu sawi loh, min ngaiin zin tur te hian min chah reng reng ṭhin. Aizawlah rawn zin se, chhungte dang inah aiin kan ina thlen an thlang zawk zel bawk. An fel ve ngawt mai. 

Ka nu nen kan inbiak tawp lamah in chung lama thawm ri hak ka hria a, an lo thleng tawh a nih hmel. Kan inbiak zawh veleh ka han chho ve a. An chhungkaw bakah midang pawh an lo awm ve nual a. Hriati chu ka hmuh tum aiin ka hmu changkang daih. Cher erawh a cher kûam a. A mitmeng a fiahfelin tibuaitu a nei ta lo niin a lang. A biakte pawh kan inbe bawrh bawrh a, Baby pawh chau viau mah se; hlim hmel pu tak chungin tupawh a chhâwn thei zel a, a fel ngawt mai. An chauh deuh dawn vangin men reng pawh ka ti a, ka chhuksan leh ta rih a. 

Ha ka nawh laiin kawngka an rawn kik dat dat. Dar 9 a ri dawn hnai tawh a, inleng neih hun chu a ni chiah tawh lo. Ka va hawn chuan ka rin loh lutukin Pi Diki a lo ni reng mai. 

"Teh hlawl che chuan..lo lut rawh" ka ti a. A rawn lut ve nghal. Eng thu tak rawn pai ang maw?

In epin kan ṭhu dun rân a. 

"Eng nge i duh ve takmial?" Ka han ti a. 

"Englo a nia, Sangzual, kan pa rilru hrehawm lutuk vangin ka rawn kal chawt mai a ni. Khatia Terini dâwt sawi vanga kan buai tak chiam hnua thudik a han hre leh kha, Sangpuii laka a inthiam loh nen, i laka a ṭawngkam lo neih tawh vanga a inchhir nen, zu te khu a in leh phah ang tih ka hlau riau a. A rawn be ngam tawh bawk si lo che a. 

Chuvang chuan nangmah ngei rawn lêng lehin, Bawihpuia pawh i sawi ang khan Aizawlah chuan hruai chho la ka duh a ni. I bulah a pain a sawi ngam tawh si lo. I hriat angin kei chu an nu tak ka nih lohnaah an laka thutlukna lo siam ve ngawt kha a fel ber lo va, khawngaihin vawikhat chauh chu rawn kalin rawn be nawn leh hrâm la ka duh a ni. Bawihpuia chu duh leh i nute pawn fa tak tak angin la se, he lai hmun chengker leh khaw te taktêa awm ai chuan Aizawla a damchhung hun hmantir kha a ṭha daih zawk. Chung vel chu a nia ka lo kal chhan" a ti ta dap dap a. Ṭawngkam pawh a thiam narawh e. Min hneh lek lek dawn alawm le. A zia ka hriat hnehsawh tawh êm avangin chutianga lo khûk pui hluah erawh ka tum lo. A mi ngenna erawh kan la ngaihtuah ṭha ang chu. 

" A va pawi ve aw. Ni e, ka lo la leng leh dawn nia" tih bak han sawi vak tur ka hre lo. Ani pawh rei awm lovin a chhuak leh ta vut a. A chhuah dawn chuan, "Terini kha ka nau mah nise, a thiltih dan kha ka haw khawp mai. Lo hrethiam hram hram rawh aw" a ti hrâm. Terini hming hi ka beng hriatah tuman lam ri tawh lo mah se pawi ka ti lo. Ka hne..

Muthmunah ka inngaihtuah nasa hle. Diki min ngenna kha ka bawhzui ang nge? Tihian ka la luhlul zel ang? Muansangzuali ka be hmasa leh phawt zawk dawn em ni ang? Rilru a buai ve hle mai. Tleipuia chu Aizawlah awmin ka nute nen inrem takin khawsa se, zirna lamah pawh a ṭha thei ang ber tihsak ve bawk ila, Diki duhdan anga kan bula awm hlentir erawh ka tum lem lo. A û vang pawhin..Mahse, a u kha chuan ro tih vel kha engah mah a ngai tehchiam lo kha a nia. Thutlûkna siam a harsa angreng khawp mai. Engpawhnise, Muansangzuali ka biak leh a ngai a nih hi ka ti rilru ta a. Vawiin lama ka chet dan aṭang khan min lo be duh tawh kher lo maithei bawk. Ka hriat loh kârin ka lo muhil ta daih a. Ka harh chuan dar 6 a lo pel tawh. Ka muthilh leh chuan thawh ka hai ka hlau si a, ka tho ta nge nge a. 

Intifaiin rawng ka bawl nghal a. Zopui khua hi lo neia eizawng hi a tam zawk an ni a, thlai hmun neite pawh an awm tho a, chawhmeh tak hi chu a vâng êm êm hran lo. Sa tak erawh vawk talh an awm paw'n hauh lawk loh chuan chan a har riau a, kei lah tho hma vak lo ka lo ni bawk nen, vawksa tak hi ka ei khât angreng. Mahse, U Kaia te zarah Sakhi sa rêp ka la kawl khiau a, eng emaw bai nan te ka han hmang a, a chang leh ka han bâwl thul. Sa rim namin ka ei ve thei deuh reng a, a zia viau. Bakah mipa na nâ na chu hmeh awm vak lo mah se, a tih ve theih naw naw zel e. Kei pawh tukṭhuan ei khamah ka insiam nghal a, in chungah ka peng zuai. Hriati chu a lo la tho lo va, a mutui sia an lo kaitho duh rih lo a lo nia. A ṭha, mut tam a mamawh viau ta ve ang. 

School ka thlen hma deuhin Sikul kâwn veng aṭanga School han kal pawhna pêng aṭanga U Faka min tawk zawnga lo chhukthla chu ka han hmu a, Ngûr khuaah a inhlawh leh dawn emaw ka tia. Ka bul a rawn thlen chuan, "I kal leh ta lo a ni maw?" Ka lo ti var a. 

Nui vur vur chung hian, "Nizanah ka rawn haw leh nghal alawm. Rajua inah ka riak pek a, hei ka haw ang a, chawhnu lamah ka phei leh ang" a ti suam suam a. A hmel hmuh a nawm rualin a ṭhing rim a nam ther ther mai. Zu hi a in nasa ve viau em mawni dawn le. 

School ka thleng a, naupangho test paper ka check nghal a. Thiam fâl bik an awm hran lo va, an la nau ve bawk nen, inelna chang hi an hre vak lo va, hei hi a zia lo deuh. Ṭhahnemngaih a na ve angreng si. Midang pawh an rawn kal kim ta a. Ka bike lak tur kha tlai lamah zawk an rawn dah tur thu an rawn sawi leh a, A ṭha vek zel e. Class kan han ṭan a, a zângkhai viau. Short break laiin Higher section lama kan principal a rawn lut a. Ani hi Sir Nghaka kan ti mai a. Kei aiin kum 2 vel chauhin a upa awm e. Nupui neiin fa erawh an la nei bîk lo. Pa tawi tip tep, thau lam deuh, nelawm zet si a ni. 

An school nena sports a rawn rawt pek a, naupang hoin a hmain an lo sawi thawiin ngen te pawh min lo ngen ve reng reng tawh a. A mak hran lo. Lehlamah a school bîlin han sports dawn ila a nuam tham dawn hauh lo, Higher nena han inel emaw inthlanpawlh te chu kan tam tham dawn a, a nuam ve viau ang chu. Keini lam pawh kan lo phur ngei mai. Kar tawp lam kan tinzawn ta a. Kan naupangte an la nau bakah an têt ve deuh vangin house pahnih siama inthlanpawlh mai kan rêl ta a. Kan awlsam angreng phian. Naupang hoin an lo hria chu an rak nuai nuai a, an lawm kher mai. A ṭha vek zel e. Zopui khaw field hi Damdawi in veng lamah a han awm teh daih a. Kei phei chu ka la kal lo. 

Lunch break laiin ka rin loh deuhin Muansangzuali leh Heleni te an rawn chawl ve hlawl mai. Ka piah lawkah an ṭhu nghe nghe. Sangpuii chuan min en duh ṭhak lo, min en duh miah lo tih hre tur khawpin ka lo en zing mah mah bawk a nih hmel. Ngawi rengin eitur a ei mial mial a, an ei zawhah ei man pein ngawi rengin an chhuak zui daih. School a la kal ve zel tih hriatna chuan min la tihlim tho mai. Ka lawmna te chu a ho mang tak e aw. 

Kan bang hma zawk a, nghah ngawt chi a ni si lo. Heleni phone aṭang khan zan lamah biak pawh dan ka zawng mai a niang chu. Ina chhuk tlang lovin in chungah ka peng leh a, Terini leh Mateii an lo awm ve. Mahse, engahmah ka ngai tawh lem lo. Hriati pawh a hma ang chiah kha a ni leh tawh a, kei pawh min lo be ve bawrh bawrh mai. Kan awm lai rengin a phone a ri sek a, a off zel si. Tu tak ni ang maw? Amah zawk chuan, ka hriat phak lek hian, "Johna nih kha. Ka be duh rih lo va" a ti sep a. Inzawmna chu an lo la nei zel chu a niawm a. Mahse, engvanga khatia Hriati kha buai ta tlat nge maw a nih ang le? Tin, hriatthiam loh tam tak ka la nei chêu, an zin hlana an ina zanlaia tei tei kha tu nge tih te, in sâwitu kha tu nge tih leh Zoa te in hnuai aṭanga lo chhuak u Faka anga ka ngaih kha tu nge ni ang tihte a ni. Mahse, mi dang tumah ka hrilh lo va, a thleng nawn leh a nih tawh loh phei chuan chhui zui vak ṭul ka ti lo. A ṭangkaina ka hre lem lo bawk. Kei pawh Terini te hawn hmain ka chhuk a, an rawn kal leh nulh ang tih ka hlau deuh. Mâi sakhal ka kang a, kei mâi hi tui ka tia, a hrisel bawk nen. Ka rin loh deuhin Zoa a rawn lang heu mai. Hna a thawk lo ve tehkhiah a nih awm hi. 

"I âwl ve a ni maw?" Ka lo ti vat a. 

"Ka ke hi ka tina deuh a, vawiin chu ka chawl ve.."a ti mai a. 

"U Faka kha a rawn haw em?" Ka tih chuan, "Haw e, tunlai chu zu a in nasa riau mai a. Ka pa ngaihdan pawh a ni vak tawh lo" a ti a. Nia, a tlân ve malh malh riauin kei pawn ka lo hria. 

"Terini bialpa thar kha i hre tawh em?" A ti leh nghal zat a. 

"Hre ve deuh e" ka ti mai a. 

"Khawih châk deuh deuh an awm nual tawh an tia sin. A chapo an ti tlat" a ti leh a. 

"A fel hmel viau khan ka hre sia" ka ti mai a. 

"Zopui khaw tlangval ho hi ka dah nîl dawn che u tihte a ṭawng duhdan a niawm e. Khawtual vâl tan chuan a ngaihamawhawm riau" a ti puat a. 

"A ngeiawm ve bawk a nih chu mawle..Terini nen pawh an inhmeh khawp kha' ka lo ti daih a. Pu Siama fapa kha a rawn lut a, nui var varin, "Ka rawn dah fel tawh e aw" tih leh chabi min pek a rual a. 

" A lawmawm hle mai. Tikhan i pa account-ah naktukah pawisa chu an rawn dah lut ang aw" ka lo ti var a. 

"Aw le..nang pawh i tilawmawm e. Ka kal leh nghal mai dawn" tih leh chhuah a rual vut. Auh zui hman pawh zuk ni lo chuan. Zoa chuan, "Ṭang ṭan ve a. Mahse, a lawmawm..i rualin ka kal ve thei tawh ang a" a ti mawlh mawlh a. 

Kei chuan thutak deuh hian, "Zoa, enteh, inzawh nuam chu a ni miah lo va, mahse, hman zana i bo ringawt kha chu ka ngaihtuah zawng pawh hian mi la râp reng mawle. Mak ka ti e..hriatchhuah engmah i la nei lo maw?" Ka lo ti daih a. A ngawi vung vung a. 

"Mak tak a ni..ka hrethiam tawh bik lo" a ti sup a. A ngawih leh vang vang hnuah, "Hriati leh Patea lo awmdun ringawt kha ka ngaihtuah lêt leh pawh hian ka la hrethiam thei chuang lo. Anmahni ngei an ni bawk si" a ti leh a. Zawh thui dawn lahin engmah a sawichiang thei tawh bawk si lo. A buaithlak. Rawng ka bâwl zo ta bawk a, Zoa thlah pahin ka bike thar chu ka han belchiang a. Tuikhur thleng hi a tlan ve theih a, ka va tlan pur pur a, khah pawh a nuamin a la thar tha viau mai a, khawchhung ringawta hman atan chuan duhthusam a ni e. 

Zanriah ei khamah ka tum lawk angin Heleni number chu ka hmetchhuak a. A ring fê hnuah a rawn la hrâm. "Helen, Sangpuii biak theih ka va duh, a pawimawh riau a" ka ti nghal thâwr a. 

"Aa..lawk aw, an inah ka kal dawn a, tunah chuan Apite thingpui ka lumsak lawk a, ka phei veleh ka lo call ang che" a rawn ti ta reuh a. Ka lawm hle. Heleni hian Sangpuii hi a hmangaihin a lainat ve hle pawhin ka hria. An khawsak dinhmun ka hre hauh lo naa, Sangpuii te ai chuan an khawsak theih deuh ka ring. Ka lo nghak ta ngat ngat a. 7:30 pelh hlekah a rawn call ta a. 

"Aw Sir, kha amah nen inbe r'u" tih leh phone pek a rual a niang. Sangpuii aw ngei mai hian,"Hello" a rawn ti ta a. Ka zâng sawtin ka hria.

"Aw..Sangpui, keimah Sangzuala,. Ih maw..inbiak ṭhat a ngaiin ka hria a. Nizanah i nu kha a rawn kal a, ngaihdamte min rawn dil a, i nau pawh i pa bula sawi ṭha leh turin min rawn ngen a" ka ti ta zung zung a. 

" aa..ani te chuan awmbotir dan ngawt a zawng alawm. Chuan, Sir, kei pawn ka rilru ka thlak a, ka nau hi khawiahmah kaltir ka phal leh tawh lo. He mite nufa tana hnawksak ve tur hrim hrim pawn ka nau nen hian kan awmdun zel dawn" a rawn ti nghet charh a. Ka dang deuh, sawi tur ber pawh ka hre lo. 

"A nih chu a..nia, i thutlukna chu i thu thu a ni e. I pa nen in inkar a ṭha tawh em?" Ka tih chuan, "Ṭha lo" a ti hmuk. 

"Ngati nge? Thudik a hriat vek tawh kha" dawhthei lo lek lek hian ka ti a. 

"A hriat vang alawm kan inkar a ṭhat loh. Ka lakah a inchhir a, ngaihdam min dil hreh siin inhlat deuhin kan awm ve tawp" a ti ta a. Ka manthiam ta deuh e. 

"A zia lo khawp mai, a bul chu keimah zel a ni bawk sia" ka tih mêk laiin, "I ni lo. Keimah alawm. U Terini nen in inkar tibuaitu pawh keimah ka nia. Min hua pawh hi ka dem lo. Min haw sa bawk nen" a ti ve duah a. 

"Sangpui.." ka ti a. Ka ngawi leh dat, ka rilru diktak hi hrilh mai chi a ni ang em tih ka hrethiam lo a ni. Mahse, ka awmdan aṭang pawh hian a hriatthiam ve chu ka ring deuh, chutihrualin a la naupan bakah a rilru a thianghlim êm a, a hrethiam kher lo ve thei bawk. 

"Naktukah school kal rawh aw" ka ti ta ringawt a. 

"Nia, dam chuan" a ti sep a. Sawi mai tur ka hre tawh si lo, ka dah ta ringawt a. Hmeichhhe zei leh hmel pawh chhe lo ve tak tak te hmaa lâia zâm ngai hlei lo kha, ka farnu ai pawha la naupang zawk lakah ka zâm chhe dêr chu a ni mai sia. Ka innuihzat letling. Han lenchhuah leh dawnin a tlai laklawh leh tawh si. Mutchhuak lo zetin ka maimichhing ta kur a. Mut reng na nâ na chu ka lo chhing ve hlek a niang. Eng emawni thâwm hian min tiharh a. Ka'n ngaihthlak chian chuan ka in hnuai ni maiin ka hria, Hah emaw hlauh vang emawa thaw ri hulh hulh ka hre leh ta. Ka inbengkâng vat a, ka'n ngaihthlak chian chuan in hnuai ber pawh chu niin ka hre leh ta lo. Ka in dinglam sir ni ten ka hre thul. A mak mai mai mang e. 

Kan tet lai ti ila, râwlthar chhuah tirha Darlawna kan zin ṭum hian ka pa nuteii, tar ve tawh tak hian an nulat laia an khuaa 'Thawliana' a awm thu hi a sawi ṭhin a. Zanah hian in tinah kal kualin ring deuh deuhin a thaw ṭhin a, nunau phei chu an thlabâr ṭhin hle niin a sawi. Khatiang deuhte pawh kha tuna thaw mêk hi a ni ve maithei a ni. Ka pi khan pawi a khawih hran loh thu a sawi thung a, chuvang chuan a thâwk peih chen chen lo thaw hulh hul rawh se ti rilru chungin ka chhing leh ta vâng vang a. Ka harh chuan 7: 30 a lo ri tawh. Ka inperh tho nghal vat a, thawh ka hai chu a mak ka ti, ka mu tam hle sia. Mahse, School ka hnaih tho bawk a, ka hmanhmawh khu ruai duh hran lo. Ka hma ber ni a tam ve êm mai. Ka insiam zawhah ka sam hûih leh thuak thuakin ka chhuak ta a. In chungah pawh ka pêng ta lo mai. Bike-a kal nan a hnai tho sia ka hâwl chhuak ta lo bawk. Vawiin chu Sports atan house inthlanna kan nei dawn a, chawhnu lamah class off-in kan zi nuai nuai a. Higher lam ho chu kan School hall-ah rawn kal vein kan ṭhu ve ṭhup mai. Kan miss leh madam te'n an lo ṭhen hrang thiam khawp a, a felfai ta thlarh mai. Muansangzuali leh Heleni te pawh blue house-ah awmdunin, vanneihthlak takin kei leh Sir Peka bakah miss Biteii te chu blue house incharge atan min dah ta a. Hun remchâng bawhpelh tum lo ru rânin pheikhai zâng takin ka haw ve thei ta. 

Baby puan pho lo seng chuan, "Cheng engzata râl nge i duh..cheng khat thir ka nei a nia aw" a lo ti sar sar a, a nui ṭha duh miah lo lehnghal. 

"Eng nge a awmzia?" Ka ti hû. 

Nuih deuh hak hak pahin, "An inru daih" tih pahin a mitko a san âk a, Terini te a sawina a ni ngei ang le. 

"A va ṭha ve, ka lawmpui e" ka lo ti var a. Nia, ka lawmpui piah lamah min tibuaitu hlîng lakbo a ni chuan min tilawm viau. Mahse, an inru hma deuh em aw chu ka ti ve. An inngaizawng deuh chauh khan ka hre sia. 

"Thingpui rawn in kawi la" a ti naa ka hnial ta mai. Eirawng bawl a ngai lutuk lo bawk a, ka inbualfai hmain ka bike thar test tur chuan venglai lamah ka tlan thla ta a. Khalh a la nuam par par hle. Pu Ramtea te inah ka pêng a, U Kaia insiam mawlh mawlh ka hmuh chuan, "Khawi lamah nge?" Ka ti thuphung a. 

Thutak deuh hian, "Ka thianpa khan min peih lohsan ta nge nge a nih chu! A natna kha a na êm mai a, a chhel ngawt zawk mai" a ti a. 

Anmahni hian pickup an nei a, Tluanga hian scooty a khalh chhuak ve ṭhin bawk. Buangi scooty a ni mah zawk ang chu. Scooty chuan a kal dawn a nih hmel. Naktukah Zuali te leh Buangi ten an va ṭawiâwm ve ang. A zia lo hle mai. 

Nu Mawii chuan, "Kumin chu kan chhiatkum a nih dawn hi a. Chami pa lah kal mai thei dinhmunah a ding bawk si, nizan phei chu an lo buaipui riau a niawm e" a ti suam suam a. Nia, ka awm ve aṭang pawn mitthi pahnih lai an nei tawh. Thingtlangah chuan kum khata 10 chu tam tak an ni ngei ang. 

"Chu pa chu eng nge a natna?" Ka lo ti luam a. 

"Pumpui cancer mawle, a daihrei tawh angreng, a chhel êm zawk a" a lo ti ve mai. U Kaia chu a kal a, a hmel thutak danah a ṭhianpa chu a ui hle tih a lang. Kei pawh rei awm lovin ka chhuak a, Thana te in lamah ka va tlan a. Thingpui hâng ka va in leh hman hram. Manuni a fel êm a, a bula awm a nuam tak tak a ni. Thana te veng piahlam, Lungdawh veng lam ka la kal lo va, ka va thleng phei ve leh hram. Pem khawm ho awmna deuh a niawm e. A tlangpuiin he khua hi an in leh lo a ṭhain a pangngai hlawm viau, fai pawh a fai. Ka lêt leh lamah vengthar pengah Muansangzuali leh a nau chawhmeh zuar haw niawm tak ka tawk a. Tleipuia chuan min lo nuih a, ka nuih lêt ve suk. Sangpuii erawh êm a phur a, a rawn hawi chhuak lo. Ka ding ta det a, "Chawhmeh in zuar leh em ni?" Ka tih chuan a rawn hawi chhuak vat a. 

"Aw a nih hi"a ti sap a. 

"In hralh zo tawh mi? Min va rawn zawrh lo ve" ka ti puat a. 

"I awm hleinem" a ti nghat a. 

"Nia, ka chhuak lawk a. " Ka ti ringawt. An kal zui tak avangin ka tlan zui ve nghal. In ka thlen veleh ka inbual a, ka zawhah chawhmeh tilumin chaw ka chhuang nghal bawk. Chaw hi tlangvala pumpa no khat pawh hi ei zawh loh chang ka nei pek a, ka nêp ngawt mai. Mahni chuan ei tui hi a har ve bawk a ni e. Ka ei khamah tihtur êm êm ka nei lo nen, In chungah ka leng ve a. A hrana han len ka la nei lo bawk nen. Bakah inleng neuh neuh an lo nei ve reng bawk a, ka'n inthiarfihlim ve deuh a ni. 

Hriati nui hawk hawk hmel hmuh chu a nuam ta hle. Dik lohna engmah a nei tawh lo niin ka hria. In leng dang an awm lo bawk a, Terini pasal ûm chungchangah min chhaih unau reng mai. A ninawm lek lek zawk. 

Baby chuan, "Lungngai miah suh, kan khaw nula fel leh hmelṭha ka tihpui ang che. Kar tawpah a rawn haw dawn alawm" a ti sauh sauh a. Hriati chuan lo man vatin, "U Julie a rawn haw dawn maw?" A lo ti hâ a. 

Baby chuan, "Dawn chiang e. Chawlh a la alawm. A pa hriselna a tlahniam ve deuh nen" a lo ti var a. Tu nge Julie pawh ka hre der si lo. 

Hriati chuan min rawn enin, "U Sangzual, U Julie i hmuh chuan i duh dawn chiang sa, a hmelṭhat chu thuhran a fel bawk sia maw. Kan khaw nula chhuanvawr alawm..ih, kan vcp nau fanu khu alawm" a ti siam siam a. Ka khi suk ringawt. 

"Ngaihzawng neih zut pawh hi a..lerh min ti palh ang" ka ti nghut a. An unau chuan an nui awr awr a, "I lerh sa reng alawm le" an ti a. Nu Tlani pawh a lo khi ve vur vur mai. 

"In va ho unau tak e aw" ka ti ka ti ringawt mai. Thingpui no hnih zet ka in hnu chuan dar 10 pawh a lo hnai kuar mai. Ka haw thla ve ta hnak hnak a. Khawpui a ri dur dur a, thli a thaw vûk vûk bawk. Chhun lamah khua a ṭha uar sia, ngati ringawt nge mawni dawn ni ka ti rilru a. Mut a nuam ting ti rilru chungin ka mu nghal hmak. Kâr lo vah ruah chu a rawn baw ta tlâwrh tlâwrh a, in hnuaia awm ni mah ila; a sur tam vang nge a thawm a ring hle. Kei rangva in chung neih nawmna chu ruah sur ri hian min awi ka tia, nuam ka ti riau tlat! Ka mutui angreng hle chuan ka hria, mahse, zing dar 4 rik hma deuhin Baby call ka dawng ta hlawl mai a, ka chhan rual rualin, "Lo chho vat teh." Thlabâr hmel zet hian a ti a.. Ṭap thawm niawm takte pawh ka hria. Ka inbeng kâng a, "Ti nge? A va mak êm" tih ri te ka hriat avang chuan ngaihṭha lo zetin ka tho a, inthlak sawk sawkin ka chho ta nghal a. Ka han luh chuan Pa Mawia te nupa leh bakah an chhungkua deuh tlawng an lo awm a, Pa Zawma chuan phone in tu emaw a be mêk bawk. Baby'n min lo hmuh rual chuan, "Awii, Sangzual, a mak êm mai. Hriati a awm tawh lo" a ti ta mai! Ka nghilh dup ni maiin ka hria. A rang teh thut lutuk a, âwih pawh a harsa lam deuh chu a ni. Engkim mai kha mumang ang ruai ni maiin ka hria, Hriati chu an bathroomah a lo inkhai a nihawm chu! Ka chhoh hma khan Pa Zawma leh Pa Mawia ten an lo la thla tawh a lo ni. Hriati chu khumah an lo zalh tawh a, damdawi in kalpuina chi a ni tawh lo. A thi tawh. Ka va sawi nawk nawk a, a âwmah te ka nem nawk nawk, a zawi nên a, a thihna a la rei lo tih a lang mai, a pangti pawh a kil khawr lai chu a la lum thar thar mawle. Engtin nge mitthi a nih ngawt theih? A mak lutuk a, a ruang hmu kur mah ila, ka la awih thei chuang lo. A hmel lah chu muhil hmel ang maiin a lang dam raih a, han siamfel ngai lai pawh a awm hauh lo. Nu Tlani leh Baby te an ṭap bâng thei lo va. Ka chhoh aṭanga 5 mins velah mi dang pawh an rawn lang ta ṭak ṭak a. Kan in awmna a fâl êm avangin a sarhu laiin tumah an rawn lang hman lo a ni ber, bakah a thih dan hi min ṭhawng chi a nih piahlamah zing lam muttui hun lai tak a lo ni chhap nen. Mahse, information mike aṭanga an puanzar meuh chuan ka rin loh takin ṭhalai an rawn lang ta khup khup a. An che ta sung sung mai. Kei erawh tlangval mah ni ila chet nachang pawh ka hre lo. Ruang bulah ka ṭhu a, Hriati chu ka melh tlawk tlawk ringawt mai a ni. Nula a ni bawk a, ṭhenrual te an lo ngah ve bawk nen, an rawn ṭah hawm hawm hlawm a. Mateii pawh a ṭap nasa pawl tak a niawm e. Tupawh mai chu min ṭhâwn hlawm êm avangin kan ni hrû vek mai a, hmanni lawkah Damdawi in veng nula ngawichawi tak a lo inkhai tawh bawk nen, tunah an rin loh lutukin Hriati a lo ni bawk. A mak khawp mai. He khawtlang hi an tih dan takah an kum chhiat kum a nih hmel ta hle. Khua pawh a rawn var zui ta mai a, Baby te nufa tan erawh chu khawvâr chu a thlakhlelhawm loh ngawt ta ve ang. 

Pa Zawma'n Hriati thih dan chu a sawi ta a. 

"Damdawi in aṭanga kan rawn haw hnu kha chuan a ṭhain amahah ngaihṭhat lohna tur engmah kan hre lo. Thil pawh a ei ṭha a, mut pawh a mu ṭha niin ka hria. A û nen hian room an inṭawm mai a, khum erawh a hrângah an mu thung. Nizanah pawh hei Sangzuala hi rawn lêng chhoin an unauin an fiam a, an nui bâwk bâwk reng kha a nia. Sangzuala hawn hnu lawkah kan mu a. Zing dar 4 rik hma dar 3:40 bawr vel kha a ni maithei, kan hamhaih atalângin sana en nachang pawh kan lo hre lo va, a û hi a zunchhuakin kai harhin a tho a. A nau khum lo ruak hiai a hmuh chuan a zung ve thoah ngaiin bathroom kawngka bulah a ding rên râwn a, "I va zung rei"a tih ri pawh ka mang hriat ruai ruai. Chutah a rak ta ṭhawt a, min rawn kaitho nghal. Ka va thawh chuan Hriati chu bathroom ceiling thir khamah hrui lo thlungin a lo inkhai reng chu niin, ka va pawm kâng vat a, mahse, kan tlai tawh. Baby a hamhaih lo hlauh a, A pa Mawia te hi phone nghalin an rawn tlan phei nupa a, hrui kha a lo suihngheh bakah a fân chi a lo ni kher nen, Pa Mawia nen kan phelh thei ta hrâm a. Chutiang chu thil awmdan a ni ta a. Kan fanu boraldanah hian keini a chhungte tan chuan sawi tur a vâng duh khawp mai a, engvanga hetiang thil hi ti nge a nih kan hre bawk si lo. Rapthlak kan tiin hrehawm kan ti a, rilru lah a dam thei bawk si lo. Khawtlang pawh in zahawm khawp mai" tiin. Ni e, sawi tur a vâng ngawt ang. Hriati, i vanglai hun i la hmang dawn chauh asin mawle..i hmanhmawh mah mah a ni e. 

Khawvar chian hnua an bungraw ṭhenkhat ka ina dahthlak tur keng chunga chhuk ka tum lai tak chuan, Baby'n min lo chelh ding a. Mi dang hriat hlauh hmel taka min melh zak zak chungin, "Kha hei hi a lukham hnuaiah ka hmu a. I hming a chuang sia" tih pahin lehkha inthlep hi ka kutah a rawn hmehbel ta chawt a..

(Comment lam uar ve deuh ang aw. Invau ang zawng chuan ka ti ve lo naa, ka reply ngai lo chunga blog emaw group lama comment chhiar hi a ziaktu tan a nuam ve êm êm ṭhin a, chhiar mawl tawpa dah leh hmak hi chu a next ziah lehzel hi mood a zirin a châkawm vak loh ve ṭhin. Midang pawh an nih vek ka ring 😊