Ka savate 7

KA SAVATÊ (7)

Ziaktu : Toni Râlte

Ka lehkha kha a hmu ang em tih ngaihtuah rauh rauh chungin rawng ka bâwl a. Nu Tlani te nupa Aizawlah an kal ve daih a. An pi ber erawh Nu Tlani laizawn te inah a lo awm rih dawn a ni. In chungte awm ta lo chu a reh ngawih ngawih hle. Mahnia rilru kawm melh melh chunga rawng ka bawl rek rek lai chuan Mateii a rawn lût hlawl mai a. Mak ka ti viau. A nelawm ngaiin a la nelawm reng naa a mitmeng chu a buai deuh. 

"Lo ṭhu rawh..thingpui ka'n lum ang e aw" ka ti vat a. 

A lu a thing mai a. "Len rei pawh ka tum lo. Thil rawn sawi ka duh ringawt chauh" a ti a. Ka ngaithla tih ka mitmei zauh. Thawk la leh hawkin, "Terini chungchang bawk mawle. Nizanah a rawn riak a, Sangzual, a hmangaih ve tak tak che a nih ka ring. A ṭap nasa lutuk a. 'Thih ka duh' te a ti thul. I pawm leh thei mai lo em ni?" Ngenngâwl zet hian a ti a. 

Za lo zeta nuiin, "Mate, min hrethiam teh. Ka rilru a lêt fai vek tawh a ni. A awmdan leh nunphung hian min hnâr tlat a tin ni" ka ti ta hmiah a. 

A ngawih vâng vâng hnuah, "Nia, ka hrethiam tho che. Mahse, eng emaw te thleng palh ta se, i rilru a hrehawm viau lo'ng maw? Terini hi pawisak nei lo zet mai a nia, a sawi ang hian a awm duh tak tak maithei a ni" a ti leh a. 

"Awm se, a duhthlanna a nia, tel vena ka nei tawh hleinem. Ka let thei tawh lo. Chu chu ka thutâwp a ni tawp mai" ka ti ta a. Ka mitmeng aṭangin ka nghehzia a hmuthiam a ni chêk ang chu..

"A nih nimina Sangpuii chungchang i sawi kha tak tak em ni?" A ti a. 

"Ni lo ve. Terini hnar nana ka sawi a nih kha.." ka ti liam puat a. A nui hak. A ding a, "Ka zu hawng tawh ang e. Ni e, tihngaihna a awm ngang tawh loh chuan tiang kha a ni mai. " A ti a, min haw hran lo tih ka hria. Kei pawn ani hi chu huat ngawt chhan tur ka nei lem lo. A chhuah hnu lawkah ka inbual fai a. Dar 6 rik hma deuhin zanriah ka ei a. Ei tam a har mang e aw. 

Pu Ramtea te in bak len luh ngamna êm êm ka la neih loh avangin an ina lêng turin ka insiam a, mahnia in nghah tlawk tlawk hi chu a ninawm ve êm a ni. Zoa te kawt ka thlen chuan a rawn chhuak ve luau a, "Kan va inhmu khât ve" ka lo ti var a. 

Nui vur vur chungin, "Nia mawle, saw tah Ngûr khuaah thingzai thiarin ka va inhlawh daih alawm, tlaiah khan ka rawn thleng chiah. " A ti ve mai a. A nih ka ring rêng ah. 

Kan kal thla rual ta a, "I patea hi ka va hmu ngai lo ve. A awm leh tawh lo mi?" Ka tih chuan, "Aw, Lianpui - ah huan sâmin a va inhlawh ve leh daih alawm. Eng nge tunlai in nu nen in ṭha zel maw?" A ti a. Ka nui hak ringawt. Engmah a la hre lo, nia, ka la hrilh lo ve bawk a. Mipa leh mipa intext leh in call reng thu awm hek lo. Bakah kei chu hmaichhan ngeia thil sawi dun hi ka duhdan a ni ṭhin. 

"Kan tâwp tawh alawm" ka ti nghut a. Ding meuhin, "Maw?! Ngati nge?" A ti hluai a. 

"Ka hrechiang telh telh a, ka iai tulh tulh a ni ber" ka ti ta hmiah a. 

"A va mak dawn ve aw. I duh ve riau khan ka hre sia. Ti nge belhchian a lo dâwl vak lo em ni?" A ti hû a. 

"A ni deuh mai. Nakinah a hranin ka la hrilh ang che" ka ti a. Pu Ramtea te in ka thlen chuan lenpuiah min sawm nasa teh mah se; ka hnial ta hram a. An nu nen an inkawm laia lo ṭhut ve kur kha nuam ka ti lo a ni. Pu Ramtea te in ka va lut chu Zuali leh Buangi chauh an lo awm a. 

"Khaw nge midang?" Ka tih chuan,.

"U Kaia chu section an meeting dawn a, ka nu te chu Pu Zabuaia damlo kanin an kal" Zuali chuan a lo ti sawk sawk a. A fate chu ka chhawnchhaih zui a. Buangi chuan, "Sangzual, karleh nilai kha man hlan a nih tawh kha aw. Chawhnu dar 2-ah hunserh a nia. I rawn lang ve ang chu tiraw?" A lo ti mawlh mawlh a. 

"A nih chu..nia, rawn kal ka tum dawn nia. Pasal i nei mai dawn chu a ni sia..la nula ve reng la a ṭha tur a nia" ka tih chuan, "over lo mai teh. Ka lengrei tawh aw" a lo ti ve a. 

Zuali chuan, "Hman zan in sâwiah khan i in an sâwi ve em?" A lo ti a. 

"Sâwi ve e. Mahse, a rei lo" ka ti mai a. 

"Kei chu ka hlau e, kan pa pawh ramvah leh a tum a, ka phal tawh rih lo. Hlimpuii thlâ lah hi hmu an awm deuh reng bawk si" a ti niah niah a. 

"An hmu tak tak em mawni le? Fiah ngat se engmah hi a nih ka ring vak lo" ka lo ti satliah a. 

Buangi chuan, "Tluanga ṭhianpa Lalrama kha chuan hmu chiang a intih viau kha..an chakai chhit haw lam, an in panna stepa a lo ṭhu kha ka pal deuh nawk a, ka'n ên chu Hlimi a lo nia kha a tia..a hlau vak lo em mawni a sawi teh puat a" a lo ti ve bawrh bawrh a. Huai leh hrâng lam sawi chu ka phur tehchiam lo. Ka hawna tur bakah in chungte an awm bawk si lo. 

Terini nen kan inkar te an sawi chhuak a, Zuali'n, "Nimin tlai ka nute ina naupang ka va lam kha Taia te inah a lo awm a. A lo nuih awr awr kha, Taia te mikhual saw a hope leh ṭan tawh em mawni" a ti zung zung a. Ka nui vak ringawt. 

Buangi chuan, "I lo ṭhen hi lawm hle rawh. Hrechiangtu te chuan tuman an duhpui lo vang che. Vani reng khan a sawi chiang êm mai. " A lo ti ve a. Ni e, ka lawm khawp mai. Ka lo ṭhen hi. 

"Terini ngawt sawi teh suh u. A hneawm..bialnu thar min zawnpui r'u " ka tih chuan, an nui hawr hawr a. Kei pawh ka nui ve tho. Pu Ramtea te rawn hawn ka nghak ru deuh naa an rei tak zêk avangin thingpui no 2 ngawt ka in hnuah ka haw chho ve ta a. School pêng ka thlen chhoh lai chuan School lam aṭanga mi pahnih rawn chhuk thla hi thla êng hnuaiah ka han hmu ruai ruai a. Tu te tak ni ang maw? Tun ang hun mi zawng zawng ṭit hun laia School tlânga han chhoh chu ka ti rilru a. An rawn hnaih deuh chuan an ṭawng ri te pawh ka hre thei ta a, hmeichhe aw chu ka hriat hnu a ang hle. Mi enthlak leh an thusawi ngaihthlak rûk hi ka chin ngai loh mah nise; engin nge min mawlh pawh ka hre lo, chumi te chu enthlak châknain ka khat ta tlat mai a! School pêng bula hnimbuk phênah chuan ka ṭhu tlum ta thân a. An rawn hnai zel a, mipa chuan, "I pa te an mu tawh ang em?" A ti sur sur a. A aw chu ka la hre ngai lo. 

Hmeichhia chuan, "Mu daih tawh ang. Ho lutuk" a ti sar sar a. Ka ding chhuak ṭêp a ni. Chu hmeichhia chu tudang ni lo vin, Terini a ni tlat! Ka din chuan min hmu dawn bawk si. 

Mipa chuan, "Ka lo riak mai dawn mi?" A ti leh a. 

"Tunlai chu ka pa a strict lutuk a. Chi loh. Naktukah kan free dawn chu" Terini chuan a lo ti leh zung zung a. Min kalpelh tak avangin an ṭawng ka hre zui thei ta lo. Thîkna chhetêmah ka nei lo nain khatianga mipa dang laka inphal leh êm êm tur si chu engvanga Muansangzuali kha tawrhtira dâwt muhlum kha sawi nge a nih le..ka va chhipthlak bur châk tak. 

Zoa te in pawh a lo thim ṭhiap tawh a. Ka kal pelh dawn lai takin an in hnuai aṭangin U Faka hi a rawn chhuak hlawl mai a! Ka va han phu chiang kher êm..

"I lo haw ni maw?" Ka ti a. Min melh run run a, a hmel landan chu mak ka ti ru hle. A harhfim lo deuh pawh a ni maithei. Ka zawhna pawh chhang ta lo chuan in chhungah mi luhsan ta daih a. Mak ka tiin ka hrilhhai hle. Zawi muangin ka phei leh ta hnak hnak a. In ka lut a, a reh lutuk chuan khua a tihâr reuh. 

Ka mu nghal a. Ka rilruah hmeichhe naupang a rawn lang a. Mahse, ngaihtuah zui loh hram ka duh. Ka inlet thawk a. Ka muhil dawn siar siar tihah in chung lama bungbêl tla ri rum rum avang chuan ka meng chiang nghal kâwk. Ka ṭhu chhuak vat a, in chungah tumah an awm si lo. Tu emaw lutin rawk a tum a ni mai lo maw? Tih ka ngaihtuah a. Peih leh peih lo va tho vin, tawnzau leh boxer nen ka chemtum hum chungin ka han chho ta a. Pawn lamah tala lianpuiin a lo inkalh rûn bawk si. Thawm chu ka'n ngaichâng leh vâng vâng a, a reh leh tlawk tlawk bawk si. Ka chhuk leh ta hnak hnak a. Dar 12 a la ri lo deuh. Ka mu leh ta a, ka lo chhing sek hman âwm e. Zawitêa ke pen thawmin min tiharh leh ta a. In chung lam tho a ni. Slab a nih loh avangin zan reiah chuan thawm hi a ring duh viau zel a. Chhuat chu a chîk deuh ṭhawt ṭhawt a. Ka ngaithla reng ringawt. Bathroomah a lutin ka hria. Tui herh haw thawm ka hre zui ta nghal, "Baby te hi an lo haw mawni dawn le?" Ka ti rilru a. Mutchhuah tawh nen ka chhing zui leh daih. Ngaihṭhat lohna pawh ka nei hran lo. Mahse, ka mumang avangin ka harh leh, dar 4 a ri thuak tawh. Ka mumangah chuan ka in hnuai Nu Tlani ar in hluihlâwn tawh bulah hian Hriati hi puanchei leh vawr var sâr ha hian a lo ṭhu a. A hmai pawh a chei nasain a hmui pawh sen tak a ni. 

"U Sangzual, ka thurûk kha vâwng reng rawh aw" tiin min lo ngen lawm lawm a. Makti taka ka en reng laiin ka thaw a rawn hah thut a, ka lo thaw vak vak a, ka harh ta a ni. Ka rizai zantira ka tlawh hlawm mai mai, a sin pawh ka sin loh khan ka nghawngah ka lo invêt chiam chu niin..ka dah thla ta vat a. Ka thaw huai huai mai. Tui ka in khawlh khawlh a. Mut pawh a chhuak leh tawh lo e a. Zial te ka han zu leh rih a. Ka âwm a nuam ta deuh. Mumanga mi inchei deuh hmuh hi a ṭha lo an tih vangin ka ngaih chu a ṭha lo ru khawp mai a, mahse, tumah hrilh ka tum hran lo. A tuk inrinni a ni bawk a, thawh ka hai pawh pawi ka ti hran lo. Zoa min sawm angin an huan bul luitêah tui kan thehkang dawn a ni. Chaw ei khama chhuak tur kan ni tho a, hmanhmawh lem loin ka che a. Chaw ka ei khamah Zoa ka bia a, a insiam mek thu a sawi. Ka insiam zui ve ta nghal a. 

Ka phei hmain in chung chu ka han enchiang leh ngat a. A lo la inkalh ṭhap! Nizana tei vel kha tu nge ni ta ang le? Ngaihtuah loh tum pawn min mawlh tlat! Ka hlau chu a ni hran lo, mahse, thil thleng hi a dik chiah lo chu a ni. Zoa te in ka va thlen phei chuan, "I patea kha nizanah khan a lo haw ni maw?" Ka ti satliah a. Makti zeta min rawn melhin, "Awihawm loh e. Kar leh pawh a la châm dawn" a ti ta mai a! Ka hmel landan a hrethiam ang tih hlauin lehlam ka hawi ta ringawt. Nizan khan u Faka kha ka hmu chiang lutuk. Biak erawh min be lo. In hnuai aṭangin a nih kha a rawn chhuah..ka ngaihtuahna ka kawm tui a talângin min biakna pawh ka lo hre chang lo a ni teh chêk ang chu..

"Heii..Terini hlir ngaihtuah suh. Ka biak che chuu, chaw i fun em?" Zoa chuan ring fê hian a ti a. Ka phu zuk, nuih tlawn titih hian, "Fun ve e" ka ti a. A phun zui sup mai. 

An huan kawngah chuan kan inzui thla a, Thlengi chungchang a sawi mawlh mawlh a, mahse, sawi chhawn leh dawnin hriat alawi ka nei hauh lo thung. Thil thleng hi ka hrethiam lo telh telh, Nizan khan u Faka kha ka hmu asin le..a lo haw loh thu an sawi bawk si. A nih in chunga tei vela bathrooma luta tui te herh hawtu kha tu nge ni ang? Ka buai ru ta hle. Mahse, han tlangzarh hluai chi a ni bawk si lo. 

Zoa ka su ṭêp, a ding thut ve bawk a ni. Ngaihṭhat loh hmel taka min melh rûn rûn chungin, "Sangzual, eng nge thleng a? Ka thusawi kha pakhatmah i hre lo. I ngaihtuah miah lo bawk"a ti ta a. Mi pangngai tan ka awmdan chu hai chi rual a ni lo ve bawk a ni. 

Ka aw ka thian a, "Engmah a ni lo. Ka rilru a hah a" tiin dâwt vâr ka sawi ta ngawt a. 

"Eng lam nge?" A ti ve leh mai a. 

Terini nen kan inṭhen chhan, a mizia ka ngaihtheih loh dan bakah a dâwt sawi avanga pawisawilo Muansangzuali'n a tawrh ve dante, engkim zawng zawng chu ka hrilh ta vek a. Ka ipik zualpui chu zuk kiang ve duak a mawle..ka lawm hle. Zoa pawh a chek hluk a, "Terini zet chu aw..mi hi ka lo chîk vak lo nen, ka lo hrechiang lo hle a nih chu..i ṭhen chu a ṭhat nasat chu" a ti ve mawlh mawlh a. Kei pawh ka rilru kap rûntu kha phumbo riha thildanga rilru pek ka tum bawk a, ka ngaihtuah zui ta vak lo. Lui kan thleng thla ta bawk a. Zoa lî hual lawk tawh lam chu kan pan nghal a. A lian lem lo naa, sangha lian vak lo chu an lo lêng ve nak nak mai. Sangha hi chu a tui bakah a man vel lai boruak hi a nuam hranpa ve rêng rêng a, kan han ṭhu chawl leh tê tê phawt a. Zial te kan zuk hnuah tui luan chhuahna tur kan sial lawk phawt a. Kekawr kan hlip ve ve a, underpant nen tui thehkang tur chuan kan han in ready ta a. 

Titi pah chung zela kan han thehkang chu a sâwt ta phian mai. Sawi tawh angin a len loh bakah a luanchhuahna kan siam kha a ṭangkai kher mai. Darkar khat leh a chanve âwm velah chuan kan thehkang zo titih ta a. Sangha ho pawh an lo tal aih aih mai. Kaikuang leh chakai lian vak lo te nen lam kan rût fai ta vek a. Nge mawle lui lam sa ei a khât ve êm mai. Thei lî lian vak lo khat lai a ni kan man ve ni. Kaikuang leh chakai lah chu, "Hawn vek rawh. Diktea hian a hua a, kan ei ve thei lo. " A ti mai a. A tam angreng sia, ka inthlahrung letling. Chawhnu lamah chuan ril pawh a ṭâm ta râih mai. An huan thlamah kan chho a, an huan chu a lo puitling tawh viau mai, nakinah chuan an sum hnâr ber tur a la nih ngei dawn hi. Huan puitling neih hi chu manhla deuh a ni. Mizo hi chu kan teirei peih ṭhin lo va, vawi leh khata hlawk thut, sum lakluh nghal thut hi kan duh leh thlakhlelh ber a ni fô ṭhin. Miin taima tak leh a hlâwkna pawh a tel theih hmaa a lo beih ṭâng ṭângna avanga huan emaw thlai hmun emaw a puitling an han neih takah chuan kan han tlai lam ûm pâwngpar ve leh hnuhnawh a. Thawhrimna leh teirei peihna tel lo hi chuan eng thilah mah hlawhtlinna hi a lo awm lo. An thlam pawh a nuam reuh khawp mai. Mei a chhêm a, kan sangha hawn chu a ṭhen a chhum a, "Ka nu maian ka'n sik ru ang e" tia nui huah huahin a chhuak a. 

Mei ka lo vil thung. Sangha te chu thil hmin har ni hek lo le..ka suan hnuah pawh chuan Zoa chuan rawn lan tik a nei thei ta rêng reng lo mai. Namthlak aṭang chuan ka han thlir kual a, a nu maian hmun zimtê chu ka va hmu mai. Zoa hmel reng reng hmuh tur a awm ta lo mai. Chhei! Ka ṭhiana hi khawmu hian a chawi te a ni lo maw? Tihte thlengin ka ngaihtuah hman mawle. Nizan thil vanga lo thlabâr sa tawh nen, ka hlauthawng lutuk chu ka lung a phu dup dup mai. Ka chhuak vut a, maian zâmna bâwr velah te chuan va pheiin ring mangkhênin, "Zoa, Zonunnnn" tiin ka han au piap piap a. Thehmeh ang maiin a reh tlawk tlawk. Han lum theihna tur hmun âwih a awm der bawk si lo, kut ruak maia kal kha a ni a. A hnu han chhui dawn lahin a hniak pawh hmuh tur a awm bawk si lo. Ka mangang chu ka thaw a sa phat phat tawh. A khât tawkin ka ko reng bawk a. Luiah te chuan ka zuk kal leh ringawt ṭhin. A reh hian a reh ngawih ngawih a ni ber e. Phone hman kan tum lah chu signal de eih pawh a awm si lo. Ṭah hi a chhuak ut ut tawh mai, rilṭâm pawh ka hrechang tawh lo. Rilruin ka ṭawngṭai mawlh mawlh bawk. A vawi hnih nana luia ka kal leh chu hmuh nei hek lo, beidawng zetin ka chho leh a. Khua a thim thet thet tawh. Thlâm ka va lut chu ka tawlhkir dâwrh. Zoa chu thlâm bang chhak lam ngheng hian a lo ṭhu ngawi rûn mai. Chhuat lam a lo melh daih bawk. Ka tha a khur thei nia! Pa lo min ti a nih pawhin ka pawisa lo ve. Intipachangin ka va pan a. 

"Zoa, hei Zoa, i harh em?" Tiin ka sawi nawk nawk a. A mitmeng â ruai chuan min rawn melh kuau a. Mi râp lek lek. Mahse, kei tal ka harhfim a ngai tih ka hria. 

"Zoa..harh teh, khaw nge i kal daih a?" Ka ti leh vak a. Ka sâwi pah reng bawk. 

"I lo hmu ve em?" A ti ta daih a. Min tihrilhhai kher mai. 

"Eng chu maw?" Ka ti a. 

"Patea leh Hriati te kha" a tih chuan ka khawng lo chauh. 

"Zoa, i hmuhsual mai mai a nih kha..chaw ei ila, haw ang aw. " Ka ti mawlh mawlh a. Ka biak ka biak takah chuan a mitmeng pawh a rawn fîm chho ṭan ve ta deuh a. Chaw ei ka siam mawlh mawlh a. Kan chaw fun pawh a dai diak tawh mai. Khua pawh a thim fel ta. Zoa chhung te chuan min ngaihtuah tawh ngawt ang le. Phone lah a hman theih der si loh. Chaw chu hmanhmawh zetin ka bar sawk sawk a. Zoa erawh rilṭam hmel zet hian a bâr hlawih hlawih a, sangha chhumte chu a hmawm zung zung mai. A ṭawng miah lo bawk. Kan ei kham hnuah ka sengfel leh vek a. Kan sangha hawn pawh an inah insem mai ila ti rilruin thei chu ka ak vek a. A iptepui chu ka ahtir a, Meichher ka siam leh chuan kan tlai lutuk dawna ka hriat avangin thla a ên bakah phone light nen a ṭan kawp theih ang tiin Zoa chu thlam aṭang chuan ka chhawm chhuak ta a. An huan kawng pangngai zawk aṭangin kan haw ta a. Kawng a bel deuh zawk vang a ni. Ngawi reng chuan kan inchhawm zel a, ka be leh zauh ṭhin a. Ṭha tak chuan min chhang ve zel bawk. Dar 8 rik hma deuhin an in kan thleng ta a. Pa Mawia unaute bakah midang an lo awm ṭiai mai a. Min zawn an lo tum mêk a niawm e. Min han hmu chu phung hmu ang mai hian an mengphâwk rêng a. Kan han innghat fel a, thil awmzia min zawt a. 

Zoa erawh inkiltawih deuhin bang kil lamah a ṭhu tawm châih a. Sawi vek law law ṭhaa ka hriat avangin engkim chu ka sawi ta vek a. Mak an ti ve hle niin ka hria. Mahse, a mi hmuh a sawite kha chu ka sawi duh lo. Eng emaw zawnga sawi a awm ka hlauh vang a ni. Pa Mawia nen sangha chu kan sem ta a. Kaikuang leh chakai pawh min pe ta vek a. Hlawhtling viau mah ila, ka ṭhianpa avang chuan lawmna leh phurna engmah ka nei lo. Rilru nuam lo zetin ka hawnsan ta a. 

Baby nen kan inbia a,naktuk an châm leh ang a,Mondayah an rawn hawn tur thu a sawi chuan ka thaw huai. Hriati pawh a ṭhat tawh thu te a sawi leh lek phei chuan hlim tak ka ni. An in luahtu ka nih piahlamah Pa Zawma te hian an fapa neihchhun an lo chân tawh a, an fanu lehzel chân tur chuan ka phal lo a ni ber. An khawngaihthlak dawn lutuk. 

Tuilumin ka inbual a. Chhungrilah hian ka khua a sik er erin ka hria. Nachhawkna ka hmawm ta tawp a. Mut hmak mai ka duh. Ka chau bawk a. Khum ka deh rualin ka muhil a ni deuh mai. Eng thil mahin a tihbuai leh a tihharh zawh loh khawpin ka'n muhil tehreng a nih kha. Ka harh chuan dar 6 a lo pel tawh a. Mahse, harh ṭha vêk vâwk tak ka ni. Khawsik pawh ka nei tawh lo. Ka tho a, ka che pawh ka zangkhai angreng hle. Zoa chu eng tak ang ang maw tih erawh ka ngaihtuah ve reng. Ka sangha hawn kha nizan khan ka chhum nghal kha a nia. Kaikuang ka fry sen ṭhap a. Chakai erawh ka khawi ta vel mai mai. Chawhmeh ka ngah dawn lutuka ka hriat vang a ni. Inkhawm loh mai ka ti tawh a, mahse, tu te emaw hmuh peih loh vang emaw tu emaw ei loh vang ringawta Pathian biak ka ṭhulh hian a tuartu chu keimah tho ka ni tih ka hria, chuvang chuan ka insiam ta a. Ka sam ka khawih mawlh mawlh lai chuan, "Sangzual, i la hman lo mi!" Zoa hian a rawn ti lut a. Ka phu zawk. Ka va chhuak a, a lo inchei nalh ngei mai. A lo nui var var bawk. Zoa a ṭha tih ka hriatna chuan min va tihlim kher êm..

Biak in kan pan lai chuan nimin lama thil thleng chu a sawi sur sur a. Maian sih tuma a va kal kha maian hmun aṭanga lang thei lui kamah a patea leh Hriati te lo ṭhu dun a zu hmu a, a zu pan ngawt a niawm e. A bak engmah a hre miah lo lehnghal. Ka auh vak vak lai pawh a hre lo. A hriat leh hmasak ber chu an in kan lut kha a ni daih. Mak hi ka va ti nasa tak, a tider tih dawnin tlangval ve a pumpa, khatiang zawng khera uan kha a mizia a ni lo tih ka chiang bawk si. Thilmak hi kan la tawng fô dawn niin a lang. 

Biak in kan thleng a, kan lut nghal. Terini te pawh platformah dingin hla a lo hril leh dap dap tawh. Ka chet tum dan ka thlak phah dawn lo. Mahse, Pathian erawh ka zah khawp mai. Mihring rilru hi a lianin a chak ve fô bawk si a. Pastorin thu a sawi a, an pastor hi la ṭhalai tak, fa pawh pakhat chiah la nei a ni a. An nu pawh hmeltha leh no nalh zet mai a ni. Thusawi pawh a thiam khawp mai, Ka ngaithla uluk bawk a, "A châng chuan Pathian hi kan duh dana awmtira kan duhdan min ṭawmpui tur atan chauh kan sawm fô, kan duh dan hi min hnialsak lo se tih te hi kan thupui zu ni fô a" a tihte chu keimahah hian a dik a ni tih ka chiang. Ni e, Pathian engkimtithei hi a siam mihringte hian kan ngainep nge mihringpui ang lek hian kan treat a, kan kalpah mai mai fô. Kan nat leh kan lungngaih hunah namên lova nasain kan au leh a, thu kan tiam kur dup a, hlim nîah chuan kan thutiam te chu kan vawmbo leh duak a, ṭawngṭai te hi ṭhenkhat chuan ngaiah neiin kan thu chham leh kan dil te hi kan duh tak tak em tih pawh hriat loh khawpin kan Amen rualin kan duhdanin kan nung zui lehnghal a. Pathian rilru hi chu kan tibuai ve ṭhin ngawt ang. 

Kan ban chuan haw nghal mai bîk lovin kawtah chuan ka ding khawmuang ve a. Ka hriat ngai lem lohte pawn nelawm takin min be ve bawrh bawrh hlawm a. Ṭhian ka nei lo si tia Kohhran leh khawtlanga ka lo zum dûk ṭhinte kha a ho mang e. Keima lam ka inhawn phawt chuan tupawh hian ka ṭhian nih an duh ang tih tur khawpin min ngaihven si a. 

Muansangzuali leh Heleni te ding dun pawh ka va hmu reng. Mahse, ka biaka ka hnaih a rem lo. Ka tan hmelhriat loh a nih a ngai rih tlat. Terini leh mi pakhat ding dun pawh ka va hmu, hman zana School tlanga a tawmpuipa kha a nih ngei ka ring. Ka hriatchian a ngai. Ka va pan ta thâwr a. 

"Terin, chhunah chuan i rawn kal dawn em?" Ka va ti teh ngawt a. An hmela maktihna chu ka hai der hram hram. Terini chuan, a bula ding vengthawng ru tak hian, "Eng nge ka rawn tih ang?" A ti hâ a. 

Nui suk chungin, "Rawn len i tum kha mawle..ka lo nghak ang che aw. " Tiin ka kiai sak a. Mipa lam chu hawiin, "Kan nu lakah hian ka thikthu a chhe viau ania aw." Nelawm si, thutak hmel deuh si hian ka ti leh zauh a. Ka kalsan hmak. Engtin emaw zawng a thawk ve ngei ang le. A thawk a ni tih chu in ka thlen ruala Terini call ka dawn chuan a rawn tichiang ta chiah. Ka nui var var mai. 

"Hello" ka tih rual rual chuan, "Hmela, eng nge i awmzia? Engvanga khatianga rawn awm ringawt nge i nih a? Ka bialpa kha a thinrim a sin" a rawn ti ngei. Hmm, min ṭhen thei lo emaw ka tia..hehe. 

"Aw..eng nge ni vak. Ka fa paia titlatu kha i ni lawm ni kha'h? I bialpa pawn kha thu kha a hre vat ang" ka tih chuan a ṭêk teh e. 

"Min duh lo va, min kalsan tawh a, ti nge min la tihbuai reng a. I eng pawi nge ka sawi " te chu a la ti ta deuh deuh. Ka pawi hi tam tak a sawi tih a inhre lo tak tak em mawni dawn ni? 

"Ka sawi sual em ni? Dâwt hmanga pawisawilo Muansangzuali i tawrhtir ang zat tal tawrhna i hmachhawn ve loh chuan ka awm mai mai ring duh suh" ka ti ve ta hmak a. A ngawih dat hnuah, "Khami chungchang kha chu hun kal tawh a nih kha..theihnghilh rawh. U Thara pawh ka lo hrilh ṭha dawn nia" a hma aia nêm zawk chuan a ti a. 

Ka nui lui nghek, "Ni lo e. Fair takin le" ka ti a. A ṭawng leh hmain ka dah. Tunah chuan a bialpa number kha ka mamawh ta. Mateii ka hrechhuak zawk, mahse, min pe phal kher ang em? 

Chawhnu lam chu tihtur awm hek lo, ka thawmhnaw tlem nimin lama ka sûk hman loh ho ka va su a. A reh lehpek hle. Zep loh chuan chhun ên lai mah nise, ka thil lo tawn tawhte avangin âwm a nuam zawk zawk hauh lo. Ka inlapa ve mai mai zawk a ni. Ka insu thuai thuai a, sil pawh insil lovin ka zawh veleh ka phei nal nal. Insûk ka zar laiin U Faka hi an in kawng aṭangin a rawn phei thoh thoh mai a. Ka lo thlir reng. A hma anga mûk rûn ang kha chu a ni tawh miah lo. Ruih nei hmel pawh a pu hek lo. 

Min rawn hmuh chuan, "I lo dam maw? Kan va inhmu khât ve" a ti ve nghut a. A hmaa ka lo hmuh tawhna kha mitthla loh hram hram tumin, "Ka dam alawm, i reh vâng vang hle mai. Khaw nge i kal dawn" ka tih chuan, "Khu lai kawrah khuan anchiri a awm a, ka zuk la lawk ang e, Diktea damdawiah" a ti ve mai a. Chemtê lian vak lo a keng ran bawk. 

"Engtikah nge i lo hawn?" Ka ti leh a. Kal pahin, "Chawhma khan ka rawn thleng ve chiah. Naktukah ka phei leh nghal ang" a ti a. A kal liam zui nghal. Kei pawh inah ka chhuk a. Tihtur hi a va vâng ṭhin tak. Ka awmna hi a fuh lo a ni ka ti rilru ve ta hial. Ṭhian ngaina tak ni lo mah ila, mahnia awm reng chu a lo nuam hauh lo tih ka hrechiang tawh. In luah tur dang melh ruk deuh ka rilruk ta hial a. In chungte erawh an zahawm dawn khawp mai. 

Eirawng lah bawl ngai bawk si lo chu ka ninhlei thiltihin Mateii ka call ta a. Zangkhai vahin min lo chhang. 

"I ṭhiannu bialpa thar chu a va fel hmel ve …kha" ka han ti kual a. Nuih har har pahin, "I thîk leh deuh si a ni maw?" A rawn ti ve a. 

"Ka lawmpui zawk, tu nge a hming ni reng reng? Ka van hmu ngai lo" ka ti leh vel a. 

"Mikhual ve tho a nih kha..Champhai ami a nia, Tsa a nih kha. I ṭha zel maw?" A rawn ti a. Nula vengva tak zawng a ni e. A hmel ve âi ka ti mai. 

"Ka ṭha alawm. Hriati te pawh naktukah an rawn hawn dawn kha" ka ti lûmlâm a. 

"Zanah kan rawn kal ve dawn nia" a ti ve lûam bawk. Tsa number chu ka dil ngam ngang lo a ni. Tlawmthlak riauin ka hre tlat. Mahse, amah Terini ber hi thudik ka puantir dawn hrim hrim. Ar talh dan chi khat chauh a awm hleinem mawle. Zanah kei leh kei lo ang takin ka inkhawm ve mial a. Ina tawm kûk reng ai chuan a zia hrim hrim..bakah ka thlamuang lo. Nuam ka ti lo a ni ber. Terini pawh a inkhawm leh ngei. Ban veleh gate sir deuhah ka lo ding rân a. A phone hmet mawlh mawlh chungin a rawn phei ve zel a. 

"Thingpui tui deuh lum la" tih leh a bula kal ka rual nghal chu a phu chiang kher mai. Ka lo nui hak hak a. Midang an awm ve si avangin insûm hram hramin, "Aw nia lum ang" a ti liam puat a. A hmel hi ka ten..

An ina ka zui lut a nuin min lo hmu chu a meng râng teh e. Mahse, a bialpa Tsa kha a lo ṭhut ve kûk avangin engmah a sawi ngam lo nge a ngawi kar a. Nuam ka ti telh telh thung. Terini inthlak zo chuan thingpui a va lum nghal a. Tsa leh Terini nu te nen inbe miah lovin kan ṭhu ngawi kâr..Terini chu rawn pheiin Tsa bulah a ṭhu chat a. 

"Min lo nghak rei tawh em?" Te chu an ti velah..ka thêngthâwngah a thawk der si lo. 

"Rei lo ve. Ka rin aiin in bang hma" a lo ti ve mai a. 

"Ts, champhai khua maw in nih?" Ka lo ti nghut a. Min rawn melh zawkin, "Aw , ti nge?" A ti nghat a. 

"Eng ni lo ve, Zopui khua hi nuam deuh a nia, châm ve reng rawh. Mikhual tlangval râl pawh an awm nual a nia" ngeiawm zetin ka ti a. Ka ṭawng mei nei chu an hrethiam ngei turah ka ngai. 

"Nia, châm ve deuh ang, a hîptu a chak bawk a" tih pahin Terini a melh ralh a. Ka nuih a za. Hrechiang ve ta se a hlat ve ngeiin ka ring. Mahse, inṭhentir kher ka tum hran lo. An inhmeh dun viau a, induh rawh se. Mahse, Terini hian thudik puang se ka duh. A bak a awm lo. Sana ka bih zauh a, Terini pawn thingpui a rawn dah ve zat. Lem thum vel ka lem hnuah kawngka a ri rak a, Pu Thara chu a rawn lût ta zân zân a. Pi Sawmi chuan, "Eng nge ni ta?" Nelawm vak lo hian a lo ti a. 

"Ka rawn lut lawk mai mai. " Tih pahin a ṭhu ve hmak a. Min rawn melh zawk, "Sangzuala chu i tuhrah i seng a ni maw? I chang pha tawh der si lo" tih pahin a nui hak hak a. 

Terini chuan, "Eng maw? Eng nge a awmzia?" A rawn ti hâ a. 

"Aa..i bialpa hlui thisen hi a sâng ka ti êm a. A la rawn leng lut ngam hi zak thei lo ka ti lutuk a.." pu Thara chuan zâm map lo hian a ti leh phar phar a. Thingpui ka lo dâwt ri khalh thung. 

Terini ṭawng tum a ân mek lai chuan, "Ni ngawt mai tiraw? Pu Thar, ka fa paia titlatu ka la rim tluk tluk chu a nia" tih pahin ka nui huk a. Thingpui ka in leh nghal hmak. An pathuma an men phâwkzia leh mak an tihzia chu ennawm a va tling tak êm. Nuam hi ka ti hliah hliah. Tsa chuan Terini melhin, "Eng nge a awmzia?" A ti hmuk a. A lung a awi lo tih chu mi mawl ber tan pawh hai rual a ni lo. Terini dâng a âwk zo ta, "Ka..ih, engmah a ni lo. A ṭawng ve mai mai a nih kha. Sangzual, min hawnsan la a ṭhat ka ring, i hriat angin kei chuan nun thar neiin mi thar nen bul kan ṭan tawh a. Min tihbuai hi sim tawh rawh. Khawngaihin" inla khawngaihthlak kual a apply leh ta. nkaderthiami hi a..

"Sawi sual ka nei em ni? Ka fa i paia titla tura ka tih che angin i titla tih Pu Thara bulah hian i sawi a ni lawm ni khah? A dik em?" Tiin chiang kel kawlin ka melh a. Ka melh hi a na ve thawkhat bawk a. 

Terini ṭawng hmain Pi Sawmi'n, "I va zakthei lo ve a. Khati khawpa ka fanu duh lo va hnâr si, mi dang a neih veleha dâwt hmanga kaw hreuh i rawn tum leh tak?" A ti hlak hlak a. A aw khurh danah a zâm ru tho tih ka hria. Pa ber a awm lo bawk a, zalên takin ka che dawn a ni ringawt. 

"Ka pi, i fanu hi ka kut hmawr pawn ka khawih lo. A awmzia chu ka mutpui lo. Chutichunga ka fa paia a titla thei lai tak hi a awmzia ka hre duh mai a ni. Pu Thar, i bulah khan a sawi ngei tiraw? " Tiin Pu Thara chu ka melh kâwk a. Zâm hmel lek lek hian, "Thudik a ni lo em ni? A sawi ngei alawm. Ka fanu pawh ka vuak duk vek phah nghe nghe asin" a lo ti zawi sup a. 

Tsa a ding hluai, "Eng nge a awmzia? Sawi chiang rawh. Hetiang hi ka duh miah lo a nia" tiin Terini a melh ngar ngar. Terini hmela zâmna, pawi tihna leh zak hmelte chu hahdam zetin ka lo thlir veng veng thung. Ni e, a thiltih leh a dâwt tenawm vang khan hmeichhe naupang rilru thianghlim leh pawisawilo khan nâ a tawrh phah a, a thinlung hliam a ni bawk. Hei zawng a phutawk leh a tawrh tur ve rêng a ni e. 

Terini chuan a kut tiche vak vakin, "Ts, min ngaidam rawh. Ih, ka sawifiah thei. Sangzual, nang pawh min ngaidam rawh. Ni e, dâwt ka sawi a nih kha, ka thinrim êm vang a ni. Sangzuala nena inṭhen kha ka duh loh êm vang leh Muansangzuali ka huat vangin tikhan a fa pai leh titla angin ka insawi a nih kha..ka sawi zawng zawng kha thudik a ni lo. Ka tihpalh takzet a ni. Min ngaidam hram rawh u. Ka thinrimna ka thunun thei lo a ni" tiin a inhnît faih faih a. Pi Sawmi meuh pawn sawi tur a hre lo nge, ngawi rengin a fanu chu a melh tlawk tlawk ringawt. Ka tho vut a, "Ka duh ka hmu ta e. Ts, hlim rawh u. Ngaidam la, theihnghilhsak rawh. Thudik puang se ka duh avangin hetiang hian ka rawn che a nih hi..mangṭha phawt u le" ka ti a. Ka chhuak zui nghal. 

Pawn boruak chu ka hîp vang vang a. Ka beisei aia hmaa ka hlawhtlinna avang chuan thim zingah ka khi sak a. Ni e, Pu Thara kha keima koh a ni. A ṭawngkam ngeiawm tak tak te pawh kha ka tihtir vek a ni. Inkhawm hma khan ka call a, Inkhawm ban hnua Terini te ina rawn kala thudik rawn hre turin ka sawm a, ka sawmna ngaipawimawhin a rawn kal ta rêng a nih kha. Tikhan awmze nei lo va a fanu pawisawilo kut a thlak chiam avang khan inchhir ve rawh se. Ni e, a fapa pawh ka ngaihven zui hek lo vang. Thudik hriat hmasak tum lo va a nupui bâwih nih thlangtu mipa hi ka zah theih ka rin loh avangin a fate pawh ka tan mi thar leh mikhual an ni tawh ang. Ka duhsakna leh ka lainatna te hmusita rap hrualtu chunga tlâwm zel thei thinlung ka neih ve loh avangin ka savatê Muansangzuali ngei pawh harsa taka ka mangṭha a ngai dawn a nih hi..keimah avangin buaina erawh a tawk leh tawh ngai lo vang. Ka lawmpui e. 

In lam panin ka haw a. Ka rilru pawh a zângkhai ta. Ka nute ka be pah a, Tleipuia chungchang chu ngaihven zui lo tur leh sawi pawh sawi tawh lo turin ka hrilh a. A chhan erawh dâwt ka phuahchawp ta mai. In ka thleng a. Ka inthlak fel a, hahdam zetin ka mu zangthal ta ar a. Ka mut a chhuah vak loh avangin phone chu ka bih ve mai mai a. In ni ve em ka hre lo, taken lai hian betu tu emaw kan han nei ve nawlh nawlh a, Single tak chiah hian khang min duh ve deuh emaw kan tihte thleng khan an reh duak zel nia mawle..tunah pawh betu ka nei hlawl lo. Ṭhiante nena intext zut zut thu awm hek suh. Mipa ngat phei chu mipatpui text zut zut chi kan lo ni bawk si lo. Groupah te ka lut kual vak a, a engahmah chu ka chhiar tak tak peih chuang si lo. Msg pakhat erawh a rawn lut ve zauh..ka open vat a. 

"Sir, keimah. I lehkha ka lo hmu e. Chuan, ka ngaidam che. Ka ring bawk che. " Tih thu a lo ni. A phone neitu erawh Heleni a ni thung. Ka save hmak mai. Mahse, ka reply lo. Reply chu ka chak lutuk. Mahse, a pa avang chauha ka hlat a ngai a, ka biak leh chuan he tleirawl duhawm lutuk hian ka thinlung sak tawh hi a tinêm leh vek dawn tih ka hai lo. Eng dang a ni lo, khawngaihna leh lainatna nen ka enkawp a, ka ngaizawng tel bawk si hian amah ka duhna hi a tifamkimin min tichak lo zual êm em a ni. Chuvang chuan ka inthunun ve a ngai rih tlat. 

Ka khum mawng lama ngawi renga lo ding ka hmuh chuan ka rak ṭhawt a. Ka ṭhu chhuak nghal. Ni lo, ka mumang a ni lo kha kha..a tak a ni. Ni e, mumang ka lo nei a, thlan vûng thar tak mai chungah ka lo ding a. Vawi leh khatah chu thlan vûng chu a rawn che lawih lawih a, thlan hungna te chu vuanin mangang takin ṭanpuitu ka lo zawng a. Hla tak aṭanga min au thawm ka hria, 'U Sangzual,. Thurûk kha..' tia min au ruai ruaitu kha..khua a lo thim thut a. Mangang taka thlan aṭanga chhuah tuma ka beih laiin a rawn vawt nghal sung sung a. Ka khumah ka lo mu a, ka khum mawngah kha hmeichhia, hmannia inawkhlum Lalhlimi an tih ngei mai kha a thih zana an in banga a thlalak lianpui an tar ang chiaha inthuama lo ding run chu ka zuk hmu a…tunah hian a awm leh tawh si lo. Ka dangro lutuk chu tui ka in khawlh khawlh a. Ka tha khur tihreh nan zial ka ṭan vat a. Ka hîp kâwk kâwk. Light ka on nghal bawk. Mahse, in chung chhuata tilui tih hriat fahrana ke thai kual ri ka hriat chuan ka zial zuk lai pawh hrechang lêk lovin ka ngaithla ta ngawt ngawt a. Ka sawi thiam dan berin cheraw an kana buh chil lâma an lam ang khan ka in chung chhuatah chuan lam se, chutiang chu ka tehkhin ber. Ka dawhtheihnain a tlin ta lo, ring zet hian, "Tu phiangsen nge maw i nih ziah le?" Ka ti tuar a. Vawi leh khatah ka hlauh rûkna te chu vawmbo ang maiin an reh nghal duak thei nia! Thawm pawh a reh nghal tlawk tlawk. Ka thinlungah , "Min vengtu chu Lalpa a ni" tih thu a rawn lang nghal zat. Pathian ka nei tih hre lovin keima chakna leh huaisenna hmanga lo hmachhawn ka tum ve ngawt a, mumang ram aṭanga kaih harhin ka awm phah ta hial a nih kha..ka ṭawngṭai ta nghal a. "Lalpa, min pui rawh. Huaisenna min pe rawh" tiin. 

Ka muhil leh chu khawvar thlengin ka harh ta lo. Ka lawm e..Lalpa..

School kal turin ka insiam a, ka inchei ve deuh. Eng nge ka hriat pawh ka hre lo e a. School kawngah Tleipuia te ṭhianzaho ka hmaah an kal a, en bîk loh hi chu a va har si êm. Mahse, be miah lo va ka kalpel chu min lo thlir ṭhap, ka rilru chuan, "Ka pawisawi ve hauh lo naupang, a pa tihsual vang maia hmelma ena ka en ta mai hi ka tisual ang em aw..min ngaina ve si a" ka ti..mahse, Pu Thara hian hrem a phû a ni. Nakinah ka khawngaihna ngena ka laka tlawm tura siam ka duh tlat si a ni. 

Lunch break- dawnah Pu berin hna min pek lawk avangin ka phei tlai deuh a. Office aṭanga ka chhuak chiah chu ka sir lam aṭangin, "Sir.." tia min kotu avangin ka ding chawt a. 

A sam a ṭawn a, a hmai a dâng lep bawk. Lehkhabu a pawm a, min lo melh kiau mai. 

"Sir, hei hi ka lo…" tih paha a lehkhabu pawm lai a rawn lek kan lai chuan, ka phone a rawn ri a. En pawh en chiang hlei lo chuan, "Aw duatpui" tia ka benga vuahin Muansangzuali chu ka kalsan ta a..hawilêt erawh ka va châk si êm…