Ka savate 5

KA SAVATÊ (5)

Ziaktu : Toni Râlte

Office ka luh hnu thleng pawn ka rilru a kap ṭeuh reng a. Tihlan chiam lah chu a rem der si lo. Kan bang har hi ka'n ti khawp a'h! Kan bang ve ta hram e. Khawmuang lovin ka haw nal nal, ka thawpik lutuk chu keipawn mak ka ti deuh. Tui ka neih tlem deuh tawh avangin lei leh ngawt ai chuan tiin tuikhur ka hnaih tho a, thawmhnaw tlem sûk pahin inbual turin ka inkhai phei a. He lai tuikhur hi tuihna a ṭhat tehlul nen, a fâl deuh vang leh a chhak thlanmual a nih vang hian mi hian an pan hreh a nih ka ring. Tunah pawh keimah chauhin a ni ka awm leh rek rek tawh ni. Ka kekawr ka sûk laiin hmannia ka thawm hriat kha ka ngaihtuah chhuak a, mahse, lu thin nur nur pahin thildang ngaihtuah ka tum ta daih a. Terini leh Muansangzuali ngaihtuah chhâwka ka insûk mial mial lai chuan tuikhur mawng lam aṭanga aw rawn thian kharh ka hriat chuan ka phu chiang ngang mai. Tu dang ni lovin u Faka a lo nia! Iptepui a ak a, huanah a kal tih dawnin an huan kawng a ni bawk si lo. A huh hluam bawk nen,. "Teh hlawl che chuan, min tiphû alawm le" ka ti ta vat a. Hah hmel fê hian thawk a la hawk a, a mitmeng chu dik lo riaua hriatna ka nei. Ka ngaihbel pawh a ni maithei. A kawng a dawm a, min melh run run bawk si, "Khaw nge i kal reng reng a?" Nui titih hian ka ti leh a. Thlanglam hawi leh daihin, "Chakai ka khawrh a" a ti zawi sup. A zo leh der. 

"I man em?" Ka ti leh hrâm a. 

"Man nang aw. Min lo hai khalh zeltu a awm phiangsen a, chhun chhunah kan inum zak zak mai mawle" a ti a, midang a sawina angah ka ngai a, ngaihṭhat lohna pawh ka nei hran lo. Mahse, thlanglama lung lum niawm tak thawm a rawn awm takah chuan rang lutuka chhuk lehin a chempui a phawrh sauh sauh a. Thinrim engphiar hian, "A tu chu nge maw i nih a? Hetia mi rawn tihbuai sek le. Rawn inlan rawh, hmaichhanah sawifel ang" a ti ta chhar chhar mai le. Ka insûk chhunzawm tawh lo chiang kher mai. U Faka hmel thutak lutuk leh thinrim vanga sen ṭûl chu ngaihṭha taka enliam chi a ni tlat lo a ni. Thawm lah chu chhun khaw ên lai e ti lo chuan a awm leh rawk rawk fô bawk si. 

"U Fak, eng thil nge a?" Ka ti dêk dêk a. Zep loh chuan ka inthlahrung ve deuh a ni.

"Ka hre bik lo, hmuh theih si lohin thawm mi neih khum reng a. Ka hne tak tak a ni" pangngai tak chuan a ti ve leh mai a. Mak ka ti hle tih erawh a hriat tho ka ring. 

Ka bulah rawn ding lehin, "I insu a ni maw? Ka va haw ang e, i lo hlau ang e, engmah hlauh tur a awm lo a nia" a ti liam puat a, amah a ang lo tawp. A kal zui a ni mai. Ka enzui ve tawp ringawt. A kal liam hnuah chuan khua a rawn hnîm ṭan deuh nen, ka eng emaw ti awm nawm loh deuh, ka hlau chu ka ti duh chuang bik miah lo. Ka insûk te chu ka tleuh puat puat a, ka inbual pawh nidang ang chuan ka in uluk lo khawp mai. Hmanhmawh zetin ka haw ve ta a. Chaw ka chhuang nghal a, Madam Zuali min rawn kensak ṭam-um ka chawk mawlh mawlh. Ka tui tih berte zing ami a ni ve tlat a, dawlṭawm te hi tui ka ti nasa. Khaw thim hnuah pawh chaw ei châkna ka nei lo reng reng, chhunah khan ka ei hnem bawk êm a ni. Inthiar thawl ka'n tum thin, ka thei bawk si lo. Pum a hàm tlat a, a mar ṭung mai si a, chaw ei châk ngaihna a awm lo ve bawk a ni. Khawhar in kal hun a tawp tawh tho bawk a, chhuahna tur nei hek lo, ka hmanhmawh duh ta bik lo. Dar 7 rik dawnah zanriah chu ka ei ve ta chauh a. 

Thleng ka sil laiin Hriati a rawn lut a. A hmel a ngui hle, Terini vang a nihte chu ka lo ring ngawt a! An inkawmngeih ve êm vang hian a tawrhpui a nih dawn hi ka ti rilru a. Ka sil zawhah ka tih ṭhan tawh avangin thingpui hâng ka chhuang nghal zat. Hriati chu a la ṭawng miah lo lehnghal. 

"Ti nge?" Ka'n ti ngawt a. Ka zawhna awmzia chu keipawn ka hrethiam chiah lo. A melh ngai a melh ngawt ngawt hnuah, "Ka rilru a nâ" a ti sep a. A hmelah pawh a lang thei hial. 

"Ti nge? In inṭhen em ni?" Ka ti ve mai a. Ka hnem thiam dawn miah lo tih pawh ka chiang nghal. 

"Thilmak deuh a thleng a. I rin loh lutuk a niang, ka chhungte bulah ka sawi ngam si lo va, inbunruahna ka mamawh lutuk a" a ti ta mawlh mawlh a. Ṭawng a harsat ta vak lo. 

Ka thingpui lum a so avangin ka va suan a, ka inthlit nghal, Hriati chuan a duh ve lo thung a. Ṭhut leh pahin, "Han sawi la" ka ti a. Hmeichheho thilmak tih hi chu mipa tan a hoh ve deuh ṭhin vangin chutin ka serious êm êm lem lo. 

"Terini pawh ka hrilh ngam lo, ani chu thurûk a zêp thei lo êm a" a ti leh a. A ṭhiannu ngei pawn a mizia chu a lo hrechiang ngang a nih awm chu! A thurûk takngial pawh a hrilh ngam lo chu a nia, keite kha engvanga min duhpui viau si nge maw an nih chu le..mahse, Hriati tak hi chuan ngaizawng tur khan min nawr ve vak lo, Baby zawk khan min hmehbel chawpchilh nghal zawk kha a nia. 

"Ka ngaithla e" ka ti sup a. Thingpui hâng ka dâwt ri khulh bawk. Ka zopa hliah hliah hian ka inhria. A ṭhut dan a siamrem hlek a, a aw thian leh kharhin, "Tuma bulah sawi suh aw. Min tiam rawh. Ka tan pawh a zahthlak bakah rinhlelh te hial ka kai thei tlat a. Ih maw,. Tuna boral Lalhlimi khan John-a sâwn a lo pai reng alawm, kha vang khan a niang a inawhhlum" a tih takah chuan ka thutak ve ta deuh. John-a a tih chu Ngûr khuaa a bialpa, kartawpa rawn rim ve ziahtu ka tih kha a ni. Tun hnaiah a reh ta deuh a, an inṭhen a nih ka ring a, ka zawt buai duh ta lo kha a nia. 

" A va mak dâwn ve..engtin nge i hriat?" Ka tih chuan, "John-a'n min hrilh alawm, Hlimi thihna chhanah ngaiin tunah hian Hlimi chhung ten hmalak an tum ru mêk a niawm e. A chumi mangang chuan min rawn hrilh ta tawp a ni" a ti ta a. Mak ka ti, Johna chu a va nîkhua awm lo ve le. 

"A bul aṭangin sawi teh, Johna chuan a lo kawp che u nge? " Ka ti ta hmiah a. Min tilaklawh rûn tlat a tin ni. 

A chil a lem khalh a, mi pawh en chuang lovin, "Englo a nia, Aizawl i zin hma kar khan kan intithiam lo ve deuh a. Hlimi nen an intext-na ka manchhuah vang tho a nia. Chutihlai chuan ama lamah chuan han rinhlelhawm tur êm êm erawh a awm hran lo, ka thîkthu a chhiat êm vang hian ka thîk ve mai mai a ni zawk, Hlimi erawh kha chuan a be nasa ngang mai. A hmain Aizawlah College an lo kal ho tawh a, ta ṭang daih chuan a lo star tawh a niang. Mahse, Johna nen hian class xii kan nih lai aṭanga inzui tawh, mi zawng zawngin innei tur anga an ngaih kan ni tawh a. College a zawh hnu pawh khan keimah vang a nia a zir zawm loh, min hmu phâk lo va awm kha hrehawm a tih vang a ni pakhat a. A chhungte pawn tihngaihna an hre tawh lo, mahse, a vannei a, an khuaah tisawn an khaw damdawi in-ah clerk hna a hmu ta hlauh a, nghet lo mah se; a lawmawm hrim hrim tho. Chuan, chutia ka be ṭha duh lo chu titauin Hlimi nen chuan an lo inbe ṭha aniang. Tlanchhiat nan a hmang zui ta a. An lo chesual hman a ni ngei ang, kar hmasa khan ngaihdam min rawn dilin a rawn lang leh ṭan a, reitak inkawp tawh kan ni a, inṭhen hlen chu keipawn ka ngaihtuah ngai lo, ka lo pawm veleh mai a. Mahse, tikhan Hlimi a rai ta sia, Johna nen kan ṭha leh tih a lo hre ve bawk nen, a inawkhlum ta a nih kha. Johna thiamloh chu a ni tho. " A ti ta dap dap a. Chil pawh lem ṭha ngam lovin ka lo ngaithla a. Mak ka tiin ka beisei loh lam daih a ni. Sawi tur a bar pawh ka hre lo. 

Amah bawk chuan, "Chung vel chu a nia, ka pa te hian hria se chuan Johna nen kan inkar tihchah an tum ngei dawn a, dik tak chuan kha chen lo inzui tawh kan ni sia, ṭhen hi a harsa ve êm a" a ti khur dar dar a. 

"Johna thah pawh a ni hran lo va, action an la ngawt thei dawn em ni? Hlimi chhungte pawn" ka ti a. 

"Ka hrethiam tawh lo, Johna mangang lah hian inrûk a rawt chhên a, kei lahin Hlimi thih sarhû laia tlandun chu ka duh bîk si lo. Bakah ka rilru hi a lakah a la dam fel bik lo bawk nen, awmdan tur pawh ka hrethiam lo " tiin a insût hraih a. 

"Engpawhnise, Hlimi chhungte hian sawi chhuah hun emaw khawtlangin an hriat hun a la awm ka ring a, chuvang chuan Johna chu la nei rih lo phawt rawh. Ani pawh rilru fim hmang thei lovin nang chân che a hlauh luatah tiang chuan a sawm che a nih hmel..mi kâ aṭanga an hriat ai chuan nangman i pate chu hrilh mai la" ka ti a. A nui lui sak a, a lu a thing nar nar bawk. 

"Ka ngam teuh lo, ka û pawh ka hrilh ngam lo a nia. Nia, i sawi ang chuan tihian ani pawh rawn kal tawh rih lo se ; Hlimi chhungte pawh an zahawm ka tia..tihian awm rih phawt mai ang" a ti a. A thutlukna chu a ṭha viauin ka hria. 

"Ka han chho phawt ang e. Nang pawh Terini nen chuan in tâwp ta maw?" Tiin min rawn melh a. 

"Tâwp ta chu a nia, ama lam hi engtin nge a chet ang ka hre lo" ka ti a. A nui hak a, "Zêp loh chuan ka ṭhiannu a ni naa, ka duhpui vak lo che. Mahse, khatiang zawnga sawi kha a nuam lo ve a" a ti ta nge nge a. Inhrethiam zetin kan innuih ta ringawt. A chho ta a. Kei pawh chutia zankhua hun han hman ngawt chu ka peih loh deuh avangin Zoa te ina leng turin ka chhuak ta a. U Faka kha kawmchian ka châk deuh a ni bawk ang chu. U Kaia a lo la haw bawk si lo nen, an ina zu len pawh ka châk teh huam lo. 

Zoa nu Nu Zaii chuan min lo dawngsawng vat a, Diktea leh a papuia ten TV an lo en dauh dauh a, Zoa ka len chhan emaw tiin Nu Zaii chuan, "Zoa chu i rawn kal hma lawk khan a chhuak, a rawn kal dawn emaw ka tia" a ti suam suam a. 

"Aa, ka rawn teilut mai mai. U Faka a awm na nge?" Tih pahin ka ṭhu a. 

Pa Mawia chuan, "Kha a chakai khawrh kha a rawn haw a, a inbual sawk sawk a, a chhuak ta daih a. Chaw pawh a la ei lo" tih pahin sana a melh zauh a. Diktea chuan, "Apa chu tlaia kan inkhelh ban khan Sikul kâwn ami Pu Rajua te inah ka hmu reng" a lo ti reuh a. Nu Zaii chuan, "Rajua te ina a kal chuan chaw pawh a ei leh nghal dawn chu..zu an in leh a nih chu" a lo ti vat a. Lungawi lo hmel erawh a pu hran lo. An ni nupa hi ram hnathawk tih takah zo nu zo pa ve tak mai an ni a, Nu Zaii paw'n pawnfen par da lam tawh, chul rup mai a fêng a, kekawr a hak awm ka la hmu miah lo. Hna an thawh nasat vang nge ni an kum aiin an lang upa a, Pa Mawia phei chu a ngo vak bik lo nen, a patê reuh bawk si, thingpui sen hâng a heh hmel ngawih ngawih. Chutiang an nih avang chuan ka hmusit tihna erawh a ni lo a nia. Zoa te hi unau pathum an ni a, a û te pahnihin pasal an nei tawh a, amah chauh hi a ni deuh tlawng mai. A duat pawh an duat vein a thu leh hla pawh an ngaichâng ve ṭhin viau. Tv te chu ka'n thlir ve tak naa, moodah a chen tak tak theih loh. Ngaihtuahna a thawlêng hulh mai a, khawhar rûknain min tuam ka ti mai, Nu Zaii titi pawh ka um e liam ta vel mai mai a. Thingpui hâng kan in laia a thusawi erawh chuan beng a verh ta deuh. 

"Kha kan nula thlâ lah kha a hrâng an ti lehnghal a, kei ka hlau riau a ni. Kan in lah hi a fâl roh si, zun zunga zanreia chhuah pawh ka ngam meuh lo" tih thu chu a ni. Pa Mawia'n, "Ta mai mai ṭhin hian aw, helamah a rawn hrâng tawp nang. I â mai mai e a " a lo ti duh lek a. 

"Engtin nge an sawi a?" Ka lo ti ta vat a. Nu Zaii chuan, "An in riak te pawh a tihṭhaih nasa a niawm e. An ar ina an ar te pawh an âi nasain zingah a lu bung ten an lo awm leh nawlh zel a, an in riak tlangval pakhat phei chu in hnuai aṭangin a hawlh a niawm e, a tukah a inpuchhuak vang vang e an tia lawm" a ti ta mawlh mawlh a. 

"A va mak dawn ve aw. Mahse, kei hetiang huai leh hrâng lam hi ka rin loh vangte pawh a niang, ka awih hreh deuh ṭhin" ka tih rualin U Kaia nena kan ramsa kah tum kha ka hrechhuak nghal. 

Pa Mawia pawh chuan, "Ni chiah e, awih duh reng reng loh tur..han fiah ngam se thlahrâng thiltih pawh a lo ni lo ve thei, tam tak hi chu kan fiah loh vangte pawh hi a ni ve" a lo ti ve leh chuar chuar a. 

Nu Zaii lah chuan, " Ringawt zel a che. A ni ngawt lo. Bakah Hlimi kha a rai an ti tlat ! Kha vang khan a inawkhlum tihte sawi a awm lehzel a, A fa paina erawh hria an awm lo nge ni, an sawi thawm ka hre tlat lo. A lainatawm rualin nunna lak nan êm chuan a holam deuh em aw ka ti, marawhchu, an dinhmuna din ve phawt loh hi chuan hriatthiam a har a " a ti duah a. Eu! Chu! A rai tih hria chu an lo awm a nih awm chu a. Hriati khan thurûk ang mai khan a sawi si a,. 

Nu Zaii bawkin, "Sangzual, Terini nen khan in inṭhen tawh em ni? I va rim lo ve " a ti leh hliai a. Ka nui huk ringawt. Pa Mawia'n nui sûng chungin, "I ho mang tak e, thil hi i sawi phawng phawng zel a " tiin an nu a en a. Nu Zaii lahin engahmah a lo ngai lem lo. 

Ka kawm tum ber awm ta si lo chu ka haw phei ta a. Dar 9 pawh a lo ri hnai ve leh ta reng mai. Mut tuma ka intintuah laiin kawngka kik ri ka hre ta tlat! Ka beng chhe ri emaw ka ti a, ka ngaihsak duh lo lui a, mahse, a rawn kik leh dawt dawt. A tu tak chu ni ang maw ti rilru chungin ka va hawng a, ka beisei loh lutukin Terini a lo ding rân mai. A la nui sen sen zui! 

"Ka lo lut thei ang em?" A ti sap a. Ka bu nghut. Ṭhutthlenga ṭhut hnawk pahin, "Min hrethiam rawh aw. Sangzual, kalna tur dang ka hre si lo va " tih leh a hmai hup a rual a, a inhnît ta faih faih a. A awmdan maksak zet chu hrilhhai zetin ka lo melh reng ringawt. Rawn hawi chhuak lehin, "Ka pa nen kan inhnial thinrim a, min hnawtchhuak a" a ti ta mai a ! Ka va awih hreh tak. Mahse, a mittui te chu a tling ve pam bawk si. 

"Eng nge a awmzia ?" Ka ti nghut a. Ka âw aṭang chuan ka lâwm tehchiam lo tih a hriatthiam ka ring. 

"Ka sawi chu! Ka pain min hnawtchhuak a, ka rawn pan tawp che. Kalna tur dang ka hre lo va " a hma aia ringin a ti leh a. A zat loh êm avangin ka nui nghek. Min rawn melh kâwk a, "I ṭhiante pan tur pawh i hre lo a ni maw?" Tiêl lek lek hian ka ti a. 

"I mak ka ti. Min khawngaihna chhetê pawh i nei na nge? Miin mangan vawrtawp kan thleng tawh a, i lo mak khawp mai" pangchang zet hian a ti nghat nghat a. Ka nuih a za tak tak ta.. a mize lem lutuk avang chuan. 

"Ngati nge a hnawhchhuah che a ?" Ka ti leh a. 

"A tam mai. Nangmah vangte pawh a ni tel, ka pa hi chuan min ngaithei lo hrim hrim alawm.." a ti mai a. Thil nih dan diktak hriat a châkawm mang e. 

"Hriati ka biaksak ang che aw. Hetah chuan riahna a awm bawk si lo va" thutak deuh zawkin ka ti ta a. A ner sak, "Ṭhutthlengah hian ka mu mai ang " inla khawngaihthlak fahranin a ti a. A ṭhutna bula filter in chungten an hman hlui min peka tui ka va thli chuan zu rim ka hre ta a. Ngaihdan ka nei thiam ta deuh. Lehlam hawiin ka khi suk. 

" Rizai pawh a chuang ka nei lo " ka ti a. 

"A pawi lo, a vawt hleinem " a ti leh mai a. A luhlul dawn hrep mai. A zu ruih vangin a pa nen an inhau a ni ngei ang. Pu Thanga kha pa fair leh rilru tluang tak niin ka hria a, a fanu zu in pawh a pal liam mai mai lo vang tih ka hria. Ka din vang vang hnuah, "Aw le, pawi i tih loh a hnu. Mangṭha le " ti hmukin pindanah ka luhsan ta daih a. Invên erawh ka ngai dawn, ka bula rawn inthawlh duh mai tur mitmeng pu hek..

Tei'n min lo call teh mial a, tun angah chuan an mu thân tawh zel sia. 

"Mam, enteh, U Samua hi min bem ve ringawt a nih chu" lâwm loh hmel zet hian a rawn ti tân tân a, ka khi suk. A la â mai sia maw. 

"Aw, nula i ni ve tawh a, an bêm ve bawk ang che chu, i duhzawng a ni lo mi?" Ka ti a, ka nui vur vur mai. 

"I ti ang lo êm mai a, ṭhenawm ngaihzawn ka duh teuh lo, zanin pawh a lo leng a, ka ning tlat " a ti leh hmawk hmawk a. Ka nui chhuak ṭêp a ni. A thinrim ka hlauh vangin ka insûm hrâm hrâm. Samua chu kan in luahna te ṭhenawm an in saknaah pawh ka inhlawh ṭhinna te fapa upa zawk a ni, kei ai chuan kum 3 velin a naupang maithei. A sual hran lo va, a hmel pawh a chhe lo, zirna lam a tui hlawk bik loh avangin an in piah lawkah two wheeler workshop a hawng ve a, a kalna lam a ni teh chêk ang chu, a tui ta phian a. Tin, dawrtu pawh an awm ve laih reng ṭhin. Tei hi a nau en ve ṭhin kha a nia, chutia a lo bêm thut chu keipawn mak ka ti deuh tho. 

"A chhiat hran loh kha, tlangval hausa a ni bawk a " ka ti leh dêk dêk a, "I ninawm, ngaihzawng ka nei peih lo. Nupui sual deuh i nei ang a, anu a tiduhdah palh ang" a ti duah. A sawi fô ṭhin a ni a, nupui ka nei fuh lovang tih hi ka nu ai pawn a hlau zawk awm e. Ka farnu avang pawh hian nupui tur chu ka thlan uluk hle a ngai dawnin ka hria. 

Ka nu âw hian, "Khatin i û bulah va vui zuah zuah suh, mu ang" a rawn ti lâng lâng a. 

"Chu! A rawn ṭawng leh tawh chu, ka dah rih aw. Muttui " tih leh ka chhanna pawh nghak ta lo chuan a dah leh daih. Ka farnu tak hi chu aw. Tei hian ka nu a chhun a, a ngo a, a lian lem lo bawk. A hmel hi chu ka nau a nih vang nge ṭha ka ti a, a cute kan tih ang tur chi lam a pâwl zawk mah. Kei ang lo takin nulat tlangval kawngah a lerh ve lem lo va, ngaihzawng a neih leh mipain an rim hi khang ka awm chhung zawng khan ka hre lo. Amah hian a ngaihsak loh hrim hrim vangte pawh a ni mahna. Ka farnu ka ngaihtuah tui a talângin kawngka kîk ri pawh ka lo hre lawk lo va, ka pindana rawn luh paha Terini'n, "Kawngka an kik chu " a rawn tih tak hluaiah chuan ka harh zawk. Ka ṭhu chhuak rang kher mai. Kawngka chu hmanhmawh zetin ka va hawng a. 

Zanin hi ti nge maw ka beisei loh hlir an lo lan ni, Terini nu leh pate an lo ding rûn mai. Hamhaih lek lekin, "Nangni in ni maw? Lo lut r'u " tih leh inher ka rual a. An rawn lut ve mai. Pu Thanga chuan ṭhut pawh ṭhu khawmuang lovin, "Khaw nge Lalrinpuii chu " a ti nghal thâwr a, a âwrâwla lungawi lohna kha ka hai mawlh lo. 

"Pindanah sawn a niang. " Tih pahin ka kawk zauh a. Pu Thanga chu a va lut ve nghal zat, Kei pawn ka va thlêk dâk dâk a, an rawn lang chu lehlam zawng tak chuan ka thaw huai mai. "Lalrinpui, min tizak tur hlirin maw i khawsak leh tak? Rawn haw vat rawh, tho rawh" tih leh sitting rooma rawn phih chhuah a rual a. A chetdan bawrh bawrh chuan min tihrilhhai ve deuh. Terini chuan, "A na a nia, min thlah rawh. Misualpa" tiin a talchhuah a tum a. A pa pawn a sama a kehna chu a thlah ve mai. Pi Sawmi zawk chuan, "Paa, i ti lutuk a ni. Nula tlangval induh an nia, an inru ve a ni mai a, mi tih loh dan pawh a ni hleinem" ka rin loh lutukin a rawn ti ta daih a. Ka melh nghek ringawt. 

Pu Thanga chuan, "An inru lo, amah hian a han pan chawng chawng a nih hi " a lo ti ta hlauh a. Ka thaw deuh huai. 

Pi Siami erawh chuan, "Mipa mitmei hmu hmasa lovin hmeichhiain a chenna inah a pan ngam awzawng lo vang. Sangzual, sawi ve ta che. " Tiin min rawn melh a. Buangi thu min chah kha a thleng dik ta zel mai. 

Insangmar ṭeuhin, "Ka pi, kan inru lo. Ani nen hian kan inṭhen tawh alawm. Zanin khan a rawn lut tawp a, riah min dil a, puih ngai na nâ na chu tiin ka lo riahtir ta mai a nih kha.." ka ti ta nghut nghut a. A rin loh lam ka sawi vang nimaw a meng phâr awn awn mai. Min huatna mitmeng râng pawh ka hmu telin ka hria. 

"A va mak awm ve. Chutia a mualpho tawh hnua kan fanu i phatsan leh si te chuan a va lungawithlak loh ve leh " a tih leh mêk laiin Terini chuan, "Nu, a sawi hreh a nih kha, tihian inru kan ni mai. Ka luhkhung angah ngai mai rawh u" a lo ti hem mai. A mipa pahnihte chu maktiin kan ding khawng reng ringawt. An nufa thisen sanzia ka hmuh chuan ka lo ṭhen kha ka tihfuhzia ka hrechiang telh telh, ka lawm bawk. 

Za lo zeta nuiin, "Terin, min hrethiam la, luhkhung ka duh lo tlat! Tin, nang nen inzawmna kan nei tawh lo bawk. Min hawnsan u la ka lawm ngawt ang" tih pahin a pa pawh chu ka mitmei a, mi pangngai a ni a, ani hi chuan an nu rilru ang a pu dawn lo tih ka hria. Ka thil tawn zet chu aw, a zahthlak piah lamah a maksak rawngte pawh a kai alawm le. 

Pu Thanga chuan, "Haw ang u. Min va tizak ngai êm..Sangzual, min hrethiam rawh aw. Zanin tlaiah zu a in avangin ka kamkhat a, a hua a. A rawn chhuak tau ngawt a nih kha. Lo hrethiam la, lo sawi darh lo hram la ka lawm ngawt ang" tiin thupha a chawi mawlh mawlh a. A pangngai si a, ka khawngaih lek lek zawk. 

An inkaichhuak ta chawn chawn a. Pi Sawmi âng zui hlak hlak chu eng nge a sawi ber ka hriat loh avangin ka ngaihven duh lo law law. An reh hnuah kawngka ka kalh hmak a, ka khum lam ka pan nghal. Terini mizia tehreng chu aw. Belhchian a dâwl lo lutuk chu a mak letling zawk. A tirah ṭhuro nunnem tak angin min nuih sen sen a, tihian a tawpah chuan sakeibaknei ang maiin min seh tumin a za ruai chu a ni si a. Lo nei ta ila, Tei hlauhthawn êm êm kha a thleng lo vang tih a sawi theih loh. 

A tukah pawh thawh ka hai phah. Mood fuh lo zetin ka tho a; chaw ṭhing ka herlum ta mai. Ka chhum buai peih vel lo. Ka eikhamah muangchangin ka insiam a. School pana ka chhoh bek bek lai chuan Tleipuia leh a ṭhianpa hi an veng lam aṭanga School panna kawng aṭangin an rawn lang ve hlawl. Min rawn nuih var var a, "Sir, lehkhabu kha ek inah a rûkin ka chhiar a, a ngaihnawm lutuk, a û-in min thuhrûksak a" a ti nghal sar sar a, min nêl leh min ngaina ve phian chu lawmawm ka ti. 

"A ṭha, lo chhiar zel rawh. I û a kal dawn em?" Ka tih chuan a ding chat a. Lungngaih hmel deuh hian a kun ta chhal a. Ka ngaih a tiṭha lo reuh hle. Rawn dakchhuak lehin, "Ih,. Apa ten bântir an tum a. " A ti ta a. Mi dek zawk mai. 

"Ngati maw?" Ka ti tak naa, a chhan tur âwm chu ka rin hriat mai. 

"Kan rethei si, an ti tlat a" a ti zawi sap a. A ṭhianpa hriat chu a hlau ve deuh a niang. Keipawn ka zawt zui duh ta bîk lo. Ka mood chhe tawh sa a rawn chhiat belhchhah. Muansangzuali te kha an in leh lo en kha chuan rethei bakberh tak chu niin ka hre thei lo. A pa pawn zu chu in tho mah se; tunlaiah mistiri hlawh tam tawhzia ka hre ve kur, Sangpuii thla khat fee ₹300 lek chu an neih loh ka ring hauh lo. An thawh ai thawka in chhungkhura che turin an duh tihna a ni mai. Heng zawng zawngah hian Diki te nufa ai mahin a pa kha a ni ka dem ni. Patling inti ve ngam tur ni pawn ka hre lo, mahni rîr arah fanau te thlavâng pawh hauh ngam lo, chutakârah an nu la hlau êm êm zui. Diki hmelchhiat tehreng nen. Ka ngaihtuahna mai mai chu aw. A rang lama Tleipuia chungchang pawh chu sawipui vat a ngai niin ka hria. A nau tal hi chu chhanchhuah theih hram dan kawng zawnsak a ngai a ni. 

Nilêngin ka ni nghulh mai. Thil pawh ka ei tui lo. Miss Puii lah hi min biak teh a tum a, ninawm lamah a kal ṭêp ṭhin. Sangpuii a lo puih tawhna avang erawh chuan a ngaihsanawm ka ti. Canteen-a kan awm lai bawkin Biteii zawk chuan, "Fees te chu awl ve mai ila, kei ka ui riau asin. Lehkha a thiam thei sia, kan School tihmingṭhatu a la ni thei tlat" a ti lâng lâng a. Tu a sawina nge tih ka hrechiang ngang mai. 

Sir Peka pawh chuan, "Nia, kan Principal hi lo haw se; sawiho a ngai a ni. A khawngaihthlak êm mai, zirnaah a tuiin rual a awt ve sia" tiin a lo tuihnih a. "A fee chu ka lo tumsak ang e" tiin ka ṭawng chhuak hman ṭhelh a ni. Mahse, ka insûm ta hram. Nizana thil thleng vel tumah hria anga an awm loh avangin tlemin rilru a thawl deuh. Tu emawin a hriat palh vaih chuan Thingtlâng phei chu thil a darh chak si a, inru thânin kan thang vak ang tih ka hlau. 

In ka thlen hmain Buangi'n min lo call a, ka ngaih a ṭha lo leh ringawt tawh. Mahse, "Hei U Kaia a rawn haw phei lamin sakhi a rawn kap nawlh mai a, chaw lo ei thla la, kan lo hleh bawk ang che" a rawn ti ta daih a, ka thaw huai huai thei.

"Tehreng mai, ka hnar phal teuh lo" tiin ka nui huah huah a. Ka mood pawh a rawn ṭha ṭan e. Ramsa hi ei reng a râlah chuan ka duh chuang lo naa ngaihsanna chen hi a awm ve tlat. Khawpuiah phei chuan hmuh fuh loh chuan kan ei ngai lo tluk a ni. Thingtlâng awm nawmna pakhat chu a ni ve chiang alawm. Eirawngbawl a ngai lo bawk a, muangchangin ka inbual a. Ka inthlak zawhah ka nu ka han be leh tê tê a, sakhi sa a ei ve châkzia te chu a sawi siam siam a. A hriselnain hma a sâwn ve zel a, a lawmawm tak tak a ni. Chawhmeh erawh zuar rih lo tur khan kan inchah kha a nia, thu a awih êm ang chu maw. Tleipuia bawk a rawn sawi leh, a vei ngang a nih dawn hi. Muansangzuali ka biak vat a ngai. 

Dar 5 rik hma deuhin Pu Ramtea te in chu ka pan a. Lapuii dawra Sikret ka lei laiin Terini a rawn lut ve, ka hmu lo der tlat! Ani pawh a zia a zâwiin min be bîk hauh lo. Pu Ramtea te in ka va thlen chuan an lo ri laih laih a, Zuali nu leh pate an lo phei ve bawk nen, Buangi pasal hual Fela a rawn tel bawk. 

"U Kai,i va vannei ve mawle, engtin nge i kah mai theih a?" Ngaisâng zetin ka ti a. 

"A âi ka ti mai, hawna tur motor pawh a awm reng, mahse, a tir aṭanga ka tumsa a nih avangin silai nen ka thawkchhuak kha a ni rêng a. Kein a hla lo bawk a, chawhnu dar 1 velah khan ka rawn chhuak a, kan sih chânnna thlen hma sunhlu rah a lo tlan chu niin, 'A ngampa bawk a' tiin ka kap ta mai a ni. Ka rawn hrechhuak vang vang che asin" a ti charh charh a. A ṭhianpa pawh a ziaawm thu a sawi zui nghal zat bawk. 

"La inzui leh ang aw. Vawikhat na reng reng chu" ka la ti ta hrâm. 

"Ka zui ngam tawh dawn che mawni le" a ti fiamthu hlut a. Khami zan bawk kha ka hrechhuak leh. Mahse, hun a liam ve leh deuh bakah eng thil hlauhawm mah ka tawn zui tak loh avangin ka hlau tawh hran lo. Dar 6 ah chaw ei an siam a, Zuali pain ṭawngṭaina a nei a. Kan ei zui nghal. Sakhi chek mawlh chuan ka chaw lem a va tinuam chiang tak. A tui a ni. 

Chaw eikhamah an sa min hleh chu min pe a. Ka hnâr ṭâng ṭâng naa min hnawn lui tlat si. Ka va vannei tehlul e aw. Ka leng ve ta reng a. Kan nula boral ta thlâhran dante an sawi hlut a, Nu zaii sawi dan nen khan a inang deuh vek. A thlan bula an hmuh thute an han sawi takah chuan ka haw lehna tur ka ngaihtuah a, a nuam ta vak lo. Mahse, mipa alawm ka nih le tiin ka han inthlamuan ve sasâwi a. Buangi pawn Terini chungchang min zawt lo, Fela a awm ve bawk nen. Kan titi kan titi a, ka hawn meuh chuan dar 10 a pel duai tawh. Thla erawh a ên lai tak a ni a. Khawlai chu a reh dûk tawh. An sa min hleh khai phên hlawp hlawp chung chuan ka pên pâwk pâwk a. School pêng leh Vengthar inrîna zawn ka thlen lai chuan current a rawn thim ta hmuk mai. Lung a phu ve dut thei nia! Thla a êng hlauh zawk a. Ka kal zel a, mahse, ka hmalam hlam 10 velah chuan tu emaw kal ka han hmu ta tlat! A kal châk hran miah lo naa, ka um phak hleithei miah lo. Zoa te in thlen hma kawr ruam lai deuh zawnah phei chuan a lang chiang hle. Hmeichhia a ni! Ka tukhum a za ta mer mer mai. Mahse, mihring pawh a ni thei tih ka ngaihtuah chhuah rualin hmeichhe pakhat hming ka hrechhuak nghal. Muansangzuali..! Ehe le!

Chak mangkhêna kalin ka tlan titih ta hial a. Ka hnaih ta hle. Kekawr tlawn rawng thim lam a ha a, kawr var lam a ha bawk. A sam a thlah leh hnâp mai. Thlahrâng awzâwng a ni lo. Ka um pha ta nge nge a. 

"Sangpui,." Hah vanga thaw hlawp hlawp chung hian ka ti a. Min rawn en vat. Thla êng ringawtah chuan a hmel pawh chiangkuangin ka hmu thei bîk lo. 

"Khaw nge i kal dawn?" Ka ti leh a. Hmalam a en leh daih, "A ngaiah" a ti sap a. A bânah ka va vuan chawt, a ding ve ta chat a. 

"Kal lo vang" ka ti hlur a. Min rawn thlêk hâ danah mak a ti a nih hmel. 

Ka vuan nghet bawk a, a talchhuak thei lo, ka kut lehlamin sakhi sa ka khai bawk nen, ka kai dâwr dâwr a, a ṭang bîk miah lo. Kâr loah ka in bul kan thleng ta a, Pu Zawma te pawh an thim ṭhap tawh. Ka in lama ka kaih dawn lai chuan, "Sir,." Tiin a ding ta dat a. 

"Lo kal rawh. Engtinmah ka ti dawn lo che. Vatin, miin min hmuh hma hian " ka ti a. Ka aw pawh a zâwi hle. Min zui ta nge nge a, ka thlah duh miau si lo alawm le. Ka inah chuan kan inzui lut ta. A hmel pawh ka hmuchiang ta e. A mit a sen râm a, a ṭap nasa tih a lang reng. Thuawih hmel zetin ṭhutthlengah a ṭhu ngil at a. Hnuailam a melh rân bawk. 

"Ti nge thlanmualah i kal fô le? Kal tawh suh aw. Engmah a sâwtna a awm lo , a hlauhte pawh i hlau lo'm ni?" Hau titih hian ka ti bawrh bawrh a. Min chhang lo. 

"School kal an phal lo em ni" zaidam deuh zawkin ka ti a. 

" Aw " a ti tawi tak. 

"Engvangin?" Ka dilchhût mah mah tih ka hre ve reng. 

A nui hak a, "Kan rethei a " a ti satliah a. 

"Thil sawipui che ka duh tak asin" thutak fê hian ka ti leh a.

A bu nghat ringawt. Chutah ka thiam ang tâwkin ka nuin Tleipuia an bula awm tura a duhzia te chu ka sawi ta mawlh mawlh a. Ani pawh a nau chungchang ka'n sawi meuh chuan a bengkhawn ta viau. Ka sawi zawh chuan, "Mahse, Sir, Ka pain a phal dawn lo hul hual.." a'n ti tê tê a. Harh thut niawm takin, "Tihdan ka hria..ih maw.." a ti leh rih. Ka lo bûk khum zauh a. 

"Ka pa bulah amah chauha a awm laiin ka nau chu i bula awm tura i duh thu leh a zirna senso pawh i tumsak tur thu te, i ngainat bakah i khawhar thu te vel i sawi ang a. Nang chu zirtirtu i ni a, a zah ang che. Bakah zu a nghei ve rih bawk a. "A ti ta sar sar a. 

"In unauin lo awm u la" ka lo ti hmanhmawh, a ner sak a. 

"Kei chu engti kawng mahin min kaltir lo vang. Min mamawh alawm. Ka nau chu ka nuhrawn pawh hian awmbo mah se; pawi a ti lo, a chhan chu tun aṭangin ro chungchangah a buai tawh a. Ka nau bak fapa ka pain a nei si lo va, ka nau hi a hmumawh alawm. Ka pa ro tih vel vang mai maia ka nau hrehawm tawrhtir ai chuan zirna chhunzawm zel se, eizawnna nei se ka duh daih zawk " a ti ta reuh a. He nau hian a nau hmakhua a va thlirsak thiam si êm. Ṭhenkhat ang chu nise, a nau chu ro luahtir ngei tumin an fuih ang a, awmbotir an phal miah lo vang mawle. 

"Ni e, ka lo sawipui dawn nia, i pa chu..chuan nangmah hi inngaihtuah rawh. School hi kal leh la ka duh, i fee chu ka peksak ang che" ka ti nghet charh a. A mitmeng a danglam zawk a, mahse, rei a awh lo. A ngui leh daih. 

"Kei chu ka inngaihtuah thei alawm. Bakah min tirethei ngam vak tawh lo. Apa rilru hi hneh thei ila chuan engkim a kal dik mai tur a nia. A nêp êm a ni " a ti ve hmiah. Ka khawngaih takzet. 

"Phone i nei em?" Ka lo ti daih pek a. A hawihai deuh, "Nei lo. " A ti nghat a. Ani ang rual hi chuan an hum far tawh asin mawle. Êm êm a na. 

"I pa biakpawh theihna ka hre duh deuh mawle. Pawi lo, tihdan a awm mai ang. Chuan, Tleipuia ka bula a awm chuan a rûkin Aizawlah ka thawn dawn nge..engtin zel?" Ka ti duah a. Ka bangbo deuh atin ni. 

"Aw..a ni leh bawk sia tiraw? Engtin nge niang le? Aizawla awmtir chu dil tawp chhin la.." inthlahrun hmel zet hian a ti a. 

"Dil hrim hrimte chu a pawi hleinem, ka lo dil ang. A rûk arâla thil tih chu nakinah nangmah thlengin i tuar palh ang. Mahse, i nau hi i tel lo chuan a awm duh dawn em ni?" Ka ti ta khauh a. 

"Duh e. Vawi tam ka zawt tawh alawm. Tin, thil hrethiam rual a ni ve tawh a. Kan dinhmun chhiatzia a hre ve vek alawm. " A tih chuan ka thawl ta deuh. A lam chu hawiin, "A nih tun ang hunah te thlanmualah khan eng ber nge va tih i tum a?" Ka ti leh ta daih a. 

A kun a, "Inbunruah ka duh alawm " a ti sep a. 

"Sangpui, min en rawh. Ih e, i dinhmun ka hria a. Inbunruahna i mamawh emaw harsatna i tawk a nih chuan min hrilh zel tawh rawh, i hria em? Ka tih theih a awm a nih chuan ka tlanchhe ngai lo vang. Min ring thei ang. Thlanmuala i kal fô a ṭul tawh lo aw.." ka ti dam thluam a. Ka rilru dik tak ka sawi bawk. 

A ngawih vang vang hnuah, "Ti nge min ngaihtuah vak a? Kan in chhung bawk si lo" a ti sap a. 

"Thisena inzawmna hi inhmangaihna te, inkhawngaihna te a ni vek kher lo a nia. Kei pawh pa nei lova kha chen hun hmang ka ni ve tawh a, ka hrethiam che u alawm. " Ka ti ta a. 

Sana a han melh zauh a, 11 a pel tawh. A ding thut a, "Sir, ka haw tawh ang. Ka lawm e aw. Engkim avang khan. " Tiin min rawn melh a. A mittui tling pam leh a chalsam lo uaithla hnawk deuh niaih te chuan a tilang duhawm takzet. Het! Kei hi ti nge tiang zawnga ka awm ziah le! 

"Ka lo thlah ang che" tiin ka ding ve vat a. 

"A ngai lo.." tia kal mai a tum chu ka inrin hmain ka pawt lêt dâwrh a. Hnai set sawtah kan indinchilh ta rân mai. Hlau hmel a pu deuh a, engtinmah ka tih zui tak loh avang chuan a inthlahdul leh ta deuh niin ka hria. 

"Min thlah chuan U Terini'n min hmu ang a. In inkar a chhiat phah palh ang. " A tih chuan ka nui hawk. 

"Terini nen kan inṭhen tawh. " Ka ti hmuk a. 

"Chuvang a nih chu min…" a ti a, a tawp leh daih. A hmui a hup vat bawk, a hmui hupna chu ka lakthlaksak a. Melh rûn chung chuan, "Engtin nge a tih che? Sawi teh..sawi rawh" ka ti ta sek sek a. A tirah chuan a sawi duh lo. Mahse, ka zawh nawn sek takah chuan..

"Kan inah a lo kal a, apa te awm laiin min rawn ânkhum hrep a, 'Nangmah vanga ka chân vaih chuan ka chansawm vek ang che' te min tia..apain thil awmzia a zawh khan, "Ani kir ker hian kan awmdun lai min lo enthla a, a ṭhiante bulah a lo sawi darh a, ka pa beng a thleng ta hial a, min hau hrep a, Sangzuala pawh a rawn leng ngam tawh lo. Amah vang vek hi a lawm " a tia. Tu bulah mah ka sawi tawp si lo va. A haw hnuah Apain min vuak phah a, School kal pawh a phal lo chhunzawm nghal ta a nih kha.." a tih takah chuan ka thinrimzia leh ka satzia chu aw..Terini chu ka bulah awm se hmeichhia e chhia lo e ka sawi lo vang, ka ben loh pawn ka hnek duh ang. Chuti êm êma dâwt a han sawi thiam mai chu! Muansangzuali hi a lo thîk zawk te hi a ni hial lo maw le..nge khami zan aṭanga ka ṭhen tak avang khan Muansangzuali a mawhpuh ringawt zawk. Ka va ten tak. 

"Sir, i khur a nia" thlabar hmel fêa min tih chuan ka harh zawk. Inthunun vatin, "I pa ngei ka lo sawipui dawn nia. Terini chu ka hmeichhe duhzawng a ni lo. A lo hauh leh che chuan lo chhang let tawh rawh, hlau miah suh. Thiam lohna i nei lo reng reng" ka ti sauh sauh a. A ngawi reng. 

Thlah ka tum tlat avangin min hnial thei ta lo va. Kan inzuichhuak leh ta nge nge. Mahse, Zoa te in thlen hma ruam thim laia kan thil tawn dangdai tak avangin ka inah bawk kan kir leh a, Ka khumah Muansangzuali chu muin kei ṭhutthleng seiah ka mu thung. Mahse, zing dar 3 rik hma deuhin min rawn sawi harh a. Hmai dâng lap hian, "Sir, ka hlau" a rawn ti khur dar dar a..