Ka savate 4

KA SAVATÊ (4)

Ziaktu : Toni Râlte

A awrâwl kha ramsa dangte awrâwl ang a ni tlat lo! Mihring awrâwl, mangang taka rûm thâwm te pawh a pâwl lek lek mai. Mahse, mihring awrâwl han tih ngawt dawnin a ni chiah bawk si lo, ṭap leh nui ri inpawlh te pawh a ang dawn dawn. U Kaia chuan, "Haw ang, vatin" a rawn ti leh a. Ka harhchhuak chiah. Ka che sawk sawk a, U Kaia bul ka thlen meuh chuan kha ramsa kha hmuh tur a awm tawh lo. A thawm pawh hriat tur a awm tawh hek lo. Ngawi rengin thlâmah kan lut a, chaw ei châkna reng ka nei tawh lo. U Kaia pawh chu engin emaw a mawlh tih hriat takin a melh ngai a melh leh ngawt ngawt ṭhin. Ani mi ramvachal meuhin a kah ngam loh chu eng emaw tak a nih loh reng ka ring lo. 

"U Kai, chaw hi engtin nge?" Vawi hnih lai ka tih hnuah min rawn melh hû chung hian, "Ni dawn tak, i ril a ṭam viau tawh em?" A ti a. A aw pawh a khur deuhin ka hria. 

"Ṭam tawh lo" ka lo ti nghut. 

"Kei pawh, chuti chu haw mai ang hmiang. Zualko thu kan dawn vat ka ring bawk" a ti ta mai a. A tho vut a, a chhuak zui daih. Ka zui ve ta vat a. Kawng pangngai kan pawh hma chu kan kal mawp mawp a ni ber e. Ani lah ṭawng hek suh, kei lahin biak vak ka hreh bawk si, zawhna erawh ka ngah ngang mai. 

Kawng kan pawh takah chuan kan kal chak bawk nen, hah vangin kan thaw dun hlâwi hlâwi a. Zial kan ṭan nghal. Muangchângin kan inzui leh ta a. Ṭawng ka tum lai takin u Kaia chuan, "Kah mi a ni lo" a rawn ti ta khauh a. Kha ramsa a sawina kha a ni tih ka hria. 

"Eng nge thil awmzia?" Ka tih mêk laiin u Kaia phone a rawn ri ta a. A ding dat a, a la ta nghal. 

"Aw..ka ring rêngah..hei kan lo haw mêk e" a ti nghal zung zung. Ka lo ngaithla mawl ve tawp. A dah hnuah, "Ka sawi rêng kha, mitthi kan nei a nih chu..i hre kher lo vang, Damdawi in veng ami nula a boral" a ti ta a. Hlauh nei ngai lo inti ve kha tukhum a za mer mer thei nia! Mahse, intipachangin, "Engtia boral nge?" Ka ti lâwi rût a. 

"Inawkhlum" a ti leh tawp. A zo der. Inbe lo bawk chuan kan kal leh mawp mawp a, khaw chhung pawh kan thleng rang kher mai. An in lamah kan lut phei nghal a. Pa ber tih loh an lo awm ṭhap, Tluanga pawh a lo awm ve tehmial a. Zuali chuan, "In hlawhtling em?" A lo ti vat. Mahse, kan hmel landan mûk lutuk vang nge mitmenga zawhnaa khat hian, "Eng nge thleng a?" Tiin min melh tawn zak zak a. U Kaia ka va melh vak ringawt. 

"Chaw pawh kan ei lo, Lo siam teh u, Sakhi rêp kan la neih kha lo thukphum ula, Sangzuala lah kan hleh ve ngai si lo. A ei châk ang" u Kaia chuan a ti zung zung. Zuali leh Buangi te an che nghal zung zung. Nu Mawii chuan a fapa melh rân chungin, "Mama, eng nge dik lo a awm em ni? In awmdan kha " a ti ta nge nge a. 

"Nia mawle. A mak khawp mai, tun ṭum chu, Sangzuala ka ramchhuahpui ber kherah tiang kha kan tawng a. Pa thinphût nei ngai lo ka inti ve a nia, kan ramsa chân ka zuk ên kha min rawn thlir chho chu tuna thi ta Lalhlimi chiah chiah hi zuk ni a mawle! A taksa erawh ramsa ni si khan. Kah mi nia ka hriat loh avangin kan rawn haw ta vang vang a ni" a ti chu kan ri nghal hak mai. U Kaia chuan dâwt a sawi lul lo vang. Buangi leh Zuali choka lama awm te pawh rawn tlan phei nghalin, "Awii, mi râp lutuk,.a thla a hrâng ngei ngei ang" an ti chûl a. 

U Kaia chuan nui ruh ruh chungin, "In ho mai mai e a. Amah leh amah a rawn inzualko veah ka ngai mai. Tak tak ana engvang bera inawkhlum nge maw a nih le?" A ti ta duah a. 

Nu Mawii chuan, "Kan hriat bik loh hi..nula awm mual mual, nungchang ṭha tak kha a ni si a, a mak mai mai ngawt mai" a lo ti dap dap a. 

Buangi ta pek chuan, "A rai a niang" a lo ti zauh. Nu Mawii'n a melh no lo khawp mai. Chaw ei an peih hnu chuan kan ei ta a, ril a ṭam tawh bawk a, in luma ei kan ni bawk nen, kan chaw lak a ṭha dun kher mai. 

Mitthi ina kal ka tum leh tum loh min zawh chuan, "Ka haw chho ve phawt ang a, ka han intifai ve phawt ang e" ka ti ta ringawt. Zêp nâk emaw kan ramkalnaah khan kan kal chak si a, ka rawl ṭhûm mai a, ka za viau lo. Chaw ei khamah ka haw chho zui a, tui ka lum nghal. Tuilum sa ver vawr ka mamawh tlat. Zoa'n min lo call a, ani pawh tlaiah khan an ram riak an lo haw tawh a. Kalpuiah min rawn sawm a, lo phei phawt tura ka hrilh hnuah kan dah ta a. Tuilum sa ver vawra ka han inbual takah chuan ka zia deuh hawk mai. Zoa pawh a rawn thleng phei a, a bialnu a zin daih vanga a lunglen thu te a sawi ve nuap nuap mai. Ka nuih liam ringawt. Thlengi nen khan an lo inngaizawng ta nge nge chu a niawm a. A lawmawm lamah ngai ang. A fel roh êm mai. Ka insiam zawh chuan kan inzui chhuak a, Terini leh Hriati ten min lo nghak bawk. Kan pali chuan Damdawi in veng lamah chuan kan inzui chho ta ṭhâm ṭhâm a, mi teivak an awm tawh mang lo, kei ka tlai deuh avangin kan kal tlai ve bawk nen, kan han thlen pawh chuan pawn bak kan chang tawh lo va, Ṭhalai boral a ni bawk a, kan ṭhahnem kher mai. Ṭap thawm a khât tawkin a ri reng bawk a, zai erawh a nuam tehchiam lo. Pawn aṭang chuan zai tui a har ve bawk a. An in pawh in pangngai tak a ni. Zawi tê têin Zoa te chu tuna thi ta chanchin ka zawt a. 

"A pa hi sipai pension a nia, Lalhlimi hi an fanu neihchhun leh an tê ber a nia, unau panga niin a û te pathumin nupui an nei tawh. Amah Hlimi hi a piang tlai ve deuh bawk a, nungchang zawiawi deuh, pawisawi lo deuh mai a ni mawle. A inawhhlum chhan hi ka hre châk ngawt mai. Kohhran erawh a bêl êm êm lo, an in hi a hla ve deuh bawk nen. Mahse, a sual hran lo. Ngaihzawng a neih ngai pawh ka hre lo reng reng, a mak tak tak a ni" a ti sur sur a. Tunlai khawvela mahni nunna lak mai kan awlsam ta lutuk te hi aw..nunna hi a hlut tehlul nen, ṭhenkhat lahin tual an lo that thul. Thih thut thutna hi a mikhual hauh lo. Chuvang chuan thi tura nitin kan inbuatsaih hi a ngai tawh takzetin ka hre ve. Kei pawh ka bâng bîk lo, ka thlarau nun hi a chuti teh lûa si lo va, ka ṭha mawl ve tawp ni mai hian ka hria. 

Terini chuan a shawl hnuaiah ka kut a rawn hum leh vâng vâng ṭhin a. Ka lo humsak ve mai. Ka beisei aiin min thlahlel. An eitur siam chu Terini te'n, "Ka pumin a ngeih ve lo" an tih tlat avangin Hriati cousin , chulai vênga awmte in lam kan pan ta poh a. Dawr a lo ni nghal bawk nen, Noodles an chhum ta a. Pu Zawma farnu te in a lo nia. An fanu pasal nei kir leh chumi fanu ka hmu thut chu Sangpuii emaw ka ti dawn alawm le, an inang riau. Engtin nge an awm tak zel tih ka lo ngaihtuah tawh miah lo va. Ka la hre chhawm ve mai ang chu maw. Noodles kan ei zawhah, "Pawnah kan ṭhu reng a, ka ning, a ruh si. Tah hian awm rih ang u" Terini te chuan an ti leh tlat. A in neitu te an mu vek tawh chungin an sofaah chuan kan tluzâl ta hlawm a. Kei ka chau deuh bawk nen, ka lo chhing sek hman chu niin ka beng bula thaw ham ham avang chuan ka harh ta zawk a. Terini chu rem vak lo hian ka bulah a rawn inthawlh ve a lo nia! Ka ep chiaha mu Zoa lah chu a lo hnâr bur bur mai. Ka hawi â deuh a hmuh chuan, "An muhil vek tawh" a ti sar sar a. 

Thawh ka tum chu min nem mu leh nghal. Chuti na nâ na chu tiin a tukhumah na vak loa ṭhâmin ka pawt hnai a, ka fâwp ta mawlh mawlh mai. Ani pawn min chhang let rang kher mai. A shawl ken chuan kan inhliah ve tak naa a len loh êm avangin kan infawh lai rengin a puan bih lai chu a kek thla sauh sauh a, kan sin ta thên a. A tawp thlen a pawi ti miah lo tih mipa ka nih angin ka chiang. Hriati bak venthawn tur an awm lo naa, ani pawn hria se min fiam nan bak a hman ka ring lo. Mahse, Buangi thusawi ka bengah a rawn ri leh a. A tâwp thlenpui ta ila, Siami ang bawk khan ka tâng nghet leh tlut kha a niawm sia, thudik pawh hre mah ila, nâ ti ru chung chungin ka pawm lo thei si lo ang a tihte ka ngaihtuah a, ka zawi nghal rawih rawih thei nia! A mak khawp mai. Ṭhenawm maia an zai thawm ngaithla kur chung chuan, "Tunah chuan a rem teh ṭeuh lo êm mai, i mualpho ka duh lo" ka ti ta ngawt a. A rûk chuan pa lo min ti ngawt ang. Ni e, keimah pawn ka rilru lehlamah chuan, "I va nêp ê, a hnu leh dâwn vanga han mutpui ngam loh.." ka inti ve mawlh mawlh tho. Mahse, Siami aṭanga ka lo zir chhuah tawh kha tawn leh ka duh tawh lo. Sex hi a slave-a tan tawh chuan chhuah mai a harsatzia ka lo hre tawh a, hmangaih leh mamawh êm êm vang pawh ni lo va ka thinlung taka ka lungdum vak loh neih chu damchhunga jail tâng ang mai ka nih dawn avangin ka inthunun mai zawk a ni. Bakah a mi sawngbâwl dan teh huam hian mi tihêng tlat! Ka sawi thiam lo, mi ngam salh salh lutuk a, ka tui lo ni maiin ka hria. 

Tho ta chuang lo chuan min kuah chungin a mu ṭha ve mai a. Ka bêng a khal niap niap bawk. Kei erawh ka lo muhil leh daih a niang, "Sangzual, hei..harh rawh" a rawn tih takah chuan ka harh leh zawk. Khua a lo êng ṭan tawh a. Zaizirin 'Kal ang u' a ti a. A lo inbih ṭha diam tawh. Thophang zetin ka zui a, ka ni chuap mai. Zoa pawh a meng sen rûm..Ban hla chu kan va nang ve leh hram a, nuam ka va ti lo e aw. Mitthi lumen tura kal ve si, chutia kalboa ban dawntêa va inlan ve leh ringawt chu. Zah a sawi theih tawh bawk si loh. Terini te vang vek. 

Damdawi in veng lam thlanmual hi ka in piah ami kha a ni lo va, a hma zana ka hun tawnin a zir loh vang nge ka ni nghulh bawk nen, thlan pawh ka lai ta lo ringawt. Rilru chu a inthiam vak lo, tlangvala pumpa, zirtirtu ve lai bawk si chu min lo beisei san ve dawn nen. Mahse, ka za lo ngang a niang, tukṭhuan pawh tihtham ka ei lo. Intihfai pawh intifai loin ka mu leh nghal thlawp a. Dar 2 velah ka harh chauh. Mut ka mamawh a nih ngei dawn kha. U Kaia khan kan thiltawn kha khawiahmah sawi chhuak lo tura min tih avangin tumah ka hrilh lo, hrilh khan ṭangkaina awm hek lo. Ka harh loh êm vangin ka intifai a, eirawng ka bawl zui nghal. Anṭam tlak ka chawh mawlh mawlh laiin kawngka an rawn kik dat dat a. Lut tura ka tih rual chuan Muansangzuali leh Heleni te kha an rawn lut hlawl mai. Ka lo melh hû ringawt, bag khai a ak puar lâng a, zum zet hian, "Sir, mitthi buhfai kan lo khawn a, ih, pawisa nen" a ti niah niah a. Ka harh zawk. Buhfai a rawn dawh laia a shampoo rim chuan ka farnu min hriatchhuahtir, an shampoo hman a inang chiang ka lo ti rilru hmanhmawh. Pawisa ka va lak pah chuan, "Sangpui, inah in haw tawh em?" Ka ti lûng lûng a. 

"Aih, kan haw tawh lo maithei" a ti sap. 

"Nia, nakinah i nau chungchang hi sawipui che ka duh deuh a. Lehkhabu pawh ka rawn hawnsak tak asin. Mondayah office-ah rawn la rawh se aw" ka ti leh zung zung. A hrilhhai hmel chu a duhawm zêk, ngawi teh, kei hi tunah khan duhawm ka ti em ni khah? A va zia lo ê.."Lerha, naupang a nih hi" tiin ka rilruin keimaha keimah chu ka hau nghal mawlh mawlh. 

"Aw le , Sir,.kan lawm e aw" ti leh sepin an chhuak zui ta nghal a. Ruak sawta ka inhriat ve ringawt chu a! Kei hi ka dik miah lo. Ner suk pahin, "Tlansangzual, lerha" ka inti leh a. Zoa nu min thartem bean chu fry turin ka chan ta daih a. Zanriah ka ei laiin Terini'n min lo call a, "Zanin chu kal lo mai ila, ka nute kal an tum sia, naktukah kal zawk ila, ka pain hun a hmang dawn a" a rawn ti a. A pa hi rawngbawltu a ni tak e. 

"I tihdan a ni mai mai" ka ti ta ringawt a. Nia, chawlh ve zauh pawh a pawi lo. Terini chuan a chance chu bawhpelh a tum loh hmel hlein ka hre ve ringawt. Mahse, ka khawih lo vang. Keimahah phurna a awm miah lo. Hei hi alawm ṭhenkhatin kan hriatthiam loh fô ! "Mi nunhlui chu hriatreng sak loh tur" an ti ṭhin tak naa, kei ngei paw'n ka lo ti ve tho. Mahse, a taka han tawn chuan a mi den dan a dâng ve riau tlat. Inṭhenna khawp a lo tling lo a nih pawhin; tui lohna chhan zawng a tling. Hei tak hi a ni, nun uluk a lo ngaihzia chu. Siami kha chu nuthlawi a ni tih hresa veka ngaizawng ka nia, a nunhlui kha ka va thîk hran miah lo. Nula lakah hian mipate hi kan thîkthû a chhe zual bîk tih nula hnahkhat te hian hrethiam se a ṭha ngawt mai. Mi nundan turah duhthlansak theih kan nei hauh lo naa, khawvel hi a zîm khawp a, engtin tin emaw han intawn nulh te hi a awm ve duh tlat a nia. Sawi tam lo teh ang. Hmeichheho an sa leh vak palh ang. Hehe..

Thatho vak lo chuan dar 7 pelh hlekah Terini te ina lêng tur chuan ka chhuk ta a, Zoa patea nen bawk kan kal rual leh. Ani chu khawhar inah a kal dawn thung. U Faka hi kei ai chuan kum 5 velin a upa awm e. Zoa sawi hmangin a vanduai a, an nu nen fa pahnih an neih hnuah an inṭhen a. An inneih lai chuan Zoa te in bulah in sa vein an khawsa ve a, mahse, an nu te hi Ngûr khua an nia, a nuṭa ten nupui neia a nu leh pate upa ve lam tawh an chhuahsan takah chuan Faka te nupa hian an va chhawmdawl a, mahse, kum 1 zen zâwn an awmho hnuin a nupui chuan a zia a chhuah chho ta nge, Faka chu a chhiahhlawh chei ta riau a. Chutakarah a nuṭa naupang zawkte an rawn lut leh ta bawk si. A mi chuang ta riau a, Helama phei leh a sawi lahin an nuin a duh bau si lo va, a beidawng chuan a rawn hawnsan ta ringawt a. Hna a thawh nasat bakah makpa chhungkhung ang a nih avangin a inthlahrung ve tho bawk si, a pizawn lah a tar atar e ti lo chuan a ân a chhe phian a niawm e. Kar khat hnuah Faka chu a bungrua rawn la turin an rawn chah ta hlauh zawk a, a mipa zawk chuan a bungrua a va khawm leh ta a. A nupuite bula khawsak leh ai chuan inṭhen mai a thlang ta a ni. A fa û zawk a enkawl ta bawk a, A in hmun hralhin, Zoa pa a û te kutah dahin a fapa enkawl nana hmang turin a ngen a. A fapa pawh Tleipuia te nen an inrualkhat vel awm e. Amah U Faka chu khuaah a awm ngai mang lo, a u te huana a riah loh leh khaw ṭhenawmah a inhlawh reng zel a, a fapa Diktea pawh Zoa nu hian a enkawl a ni deuh mai, Zoa te chhungkua an rilru a tluang a, an duat hle pawn ka hria. 

"Khawhar inah i kal dawn nge? I rim dawn?" Zial ṭan pahin a ti sup a. 

"Zanin chu ka chawl ang, ka'n rim ve lawk ang e" ka tih chuan a khi suk a. Pa ṭawngtam lo a nih bakah a nui hmel hmuh pawh hi a khât viau. 

"I lut thûk dawn riauin ka hria" a ti duh lek a. 

"Mipate chu kan tâng tak tak thei lo" ka lo ti sasawi a. 

"A ni ngawt lo a nia. A thuhrimin kan khaw nula ho hi rim kim vek phawt la, duh thlang ta che" a tih chuan ka nui hawk hawk a, "Min ngai luck êm mai a, U Fak" ka ti a. 

"Tlangval tana nula rim a thiang a, ngaihzawn pawh a thiang vek alawm. Khata min lo hnar tak leh midangah pakai leh mai tur..mipa kan hlawhchham ve thei tak tak lo" a tih chuan a hmel a thutak deuhin ka hria. An inṭhen aṭanga thla 6 pawh a ral hmain an nu khan pasal a um ve leh daih bawk nen, a fanu erawh a hruai ve hram a niawm e. Mahse, chutiang a hmachawn tawh chung pawha hlawhchhama a la inngai lo chu a ngaihsanawm riauin ka hria. Nakinah kawm tak taka la kawm a ngai a ni, ka kawm mi tak a ni dawn tlat. Terini te in kan thlen takah chuan ka pensan ta a. 

A inbual zo hlim a niang, a lu a lo la tuam hlân a. Kawrbah dum a ha a, bra pawh a hrêng lo. Kekawr tlawn thawl hek hawk a ha bawk. "I va rei" a la ti zui!

"Awihawm loh" ka ti hmuk a. 

"Tun hnai hi lungawi lohna i nei deuh em ni? Min ngaihsak ṭha duh lo riau" a ti ngher ngher a. Ka nui lui vak ringawt. 

"Awm se, ka ṭhen ang che chu" ka ti deuh teh tawp chu keipawn mak ka inti. 

"Aizawlah hian midang i nei a niang, kei chu heta awm nawmna mai mai ka nih ka ring" a ti leh a. Tlemin ka khawngaih ta deuh a. 

Va hnaih deuh pahin, "Chutiang tumah an awm lo. Ka buai ve deuh a, hna thilah..chu mai mai chu" ka ti ta ringawt a. Fawh cho zeta min rawn melh hâwin, "Midang nei suh aw" mitmeng de sar sar hian a ti sap a. Ka hmu duhawm leh bawk si, a va buaithlak. Ka hnaih leh rûak a, ka kuaidâk sauh sauh a, ka'n fâwp buan buan mai a nih kha. Min chhanlet rual chuan ka phur loh rûkna te kha lakbo ang mai an ni leh tawh. Ṭhutthlengah ka bawhbet a, a lu tuamna chu a siamṭha hman tawh si lo va, a tla daih, a kawr ka hlim a, ka kut hian tihtur a hai bîk lo, a meng sî sap tawh a, a thaw lum hiam hiam bawk. Kei pawn he ti taka min ngam chu tiin ka thutlukna bawhchhiat pawiti lo chuan ka kalpui zel a. A kekawr kawng chelha pawhthlak ka tum mêk lai tak chuan, "U Terin, pa te an lo…awii..tihpalh" tih ri chuan ka kawng a lo dang ping ta hmiah mai. Kan hawi chhuak dun rang teh e. Ka beisei loh lutukin Muansangzuali chu hrilhhai leh hamhaih zetin kawngka bulah a lo ding khawng lah a, mit la lêk lo vin min rawn melh dun ngawt ngawt bawk. Terini chu a harhchhuak hmasaah a ṭang ta a. Kei pawh ka tho a, ka insiamrem nghal sawk sawk, "Kawngka kik nachang i hre na nge? I va mawl ve" Terini chuan aw khur dar dar hian a ti a. 

"A lo inhawng deuh tho sia, ka tihpalh lutuk. pa te an lo kal ka ring a. " Tih leh chhuah leh mai a tum chu, "Kan inah vawikhatmah rawn kal tawh suh. Inleng atan pawh kan duh lo che, mawl lutuk mai. Chhuak vang vang rawh" Terini chuan a ti leh hram, Sangpuii chu rawn hawilêt ve leh hram bawkin, nuih sak pahin, "Tehreng mai" a ti ve sak a. A chhuak nghal. Kei chu ka awm a nuam lo nghal rawih rawih thei. Muansangzuali hmuh lai khera a nu cousin Terini ka lo suasam chu ka zak takzet a ni. Terini lahin a hau hrep bawk si. Terini thleng thleng chuan ka haw hlur mai. Kawngka chu a va kalh ta hmak a. Mahse, phurna chhetê mah ka nei tawh lo. Ka bula a rawn ṭhu tur chu, "Thingpui va lum la" ka lo ti lawi rût a. Tum bûr chungin a va lum ta a. Zial ka lo zu thung. Ka rilruah Sangpuii hlir a awm. A pate bulah a lêt leh tawh nge ti nge a pa te a zawn tak ni ka ti rilru a. Thingpui kan in laite chuan Muansangzuali a rêl char char, "Naupang nghal lutuk mai. Min hmu ru reng tawh ang, Min tihzah a tum ve hrim hrim a nih kha" a ti kual a. Ka ngawi ngul ringawt. 

Min rawn enin, "Ti nge i ngawih kûr reng a. I zak ami?" A ti nghat a. 

"A zahthlak ve êm alawm" ka ti hmiah. A hmui tipawrhin, "Muansangzuali te mai mai laka lo zahte chu a. Sawtiang fahrah akâra thuawih lo, eng atan mah ka ti lo " a tih hlawih hlawih chuan ka îp châwih. Ka mood a chhe hlawm tawp a ni ber, ka ding vut a, "Ka han haw ang e. Nih phawt" tih leh kal ka rual a. A rawn ding ve hluai, "Sangzual" a ti dat a, ka ding lo, ka chhuak nal nal. Kei atak pawn ka awmdan chu ka hrethiam tehnuai lo. Terini ka duhna leh min hîp vena zawng zawngte kha lakbo ang huai vek an ni tawh. A ân hla te, ka laka a easy lutuk vangte pawh kha a ni ta ve ang. Ka kal chak kher mai, khawi dangah mah pengkawi lovin ka in lam ka pan a. Ka thlen chuan ka thaw hlâwi hlâwi mai, ka hah hle ringawt. Ngah nge maw ka kal vûk vûk kher ni. Khumah ṭhuin zial ka han zu leh tê tê a, Terini'n a lo call sek avangin ka phone chu ka off a. Titau deuh titih hian a zangthâl zawngin ka mu chawrh a, ka hmel pawh a tûm vûauin ka ring a ni. Inthunun tum takin ka zial zuk lai chu ka han hîp kâwk kâwk a, Ka zia deuh hawk e. Terini ze dik tak hre taah ka inngai. Sangpuii a hmusit lutuk khan min tilunghnûr ngawih ngawih. Zahte kha a zak ṭhak lo lehnghal a. Kawngka an rawn kik dat dat chuan ka phu zuk, ka ṭhu chhuak nghal vut a. 

Hriati aw hian, "U Sangzual, lo hawng lawk teh" a rawn tih chuan ka thaw hawk. Tun ang hunah te eng nge maw a rawn tih dawn ni..kawngka chu ka va hawng a, awmhmun kawr nen a rawn lut a, khawhar inah a kal bik lo a nih hmel. An la bângin ka hre si lo. A rawn luh rual rualin, "Terini nen in intithinrim ami?" A ti nghal a. Ka manthiam chiah. 

"Chutiang a awm pawh ka hre lo" ka ti nghut a. 

"Min rawn call a, i phone i off bawk sia, i haw tawh leh tawh loh a hre duh a. Eng nge thleng reng reng a?" Ṭhut pah chuan a ti a. 

"Engmah a thleng lo, ka mut a chhuak a, ka haw a nih kha.." ka ti a. 

"Ka awih lo, a rawn ṭap titih a, i thinrim a tia, i thinrim nachhan a hre bawk si lo va" a tih chuan ka nui lui nghek. Mai mai chuan a. 

"Aâ..Hriati, Terini hi ka type a ni loin ka hria. Kan kal thui hmaa tihtawp mai hi ka duh a ni" ka ti ta hrâwk mai. 

Hriati pawh a meng tâl tap tap, a ngaihna hriat loh hmel zet hian, "Thildang a awm zawk a ni lo maw? A duh ve êm che hi, chuti ringawta ṭhen te chu a" a ṭhiannu thlavâng hauh takin a ti a. 

"Thildang chu a awm lo, midang pawh an awm lo, i bulah ka sawi ang a, a tawk, hrilh kher pawh a ngai lo. Ka hrechiang telh telh a, min hîp lo tulh tulh a ni ber" ka ti ta bawrh bawrh a. Ka rilru tak tak ka sawi. Ani pawh chu a hamhaih deuh nge a ngawih vang vang hnuah, "A va mak awm ve, a fel hle sia, mahse, nia duh loh na nâ na chu intihluih ngaihna a awm si lo va. Mahse, in inkar chu nangman hrilh rawh, kei chuan ka hrilh duh lo a nia" a ti ta a. Min hrethiam a, ka lawm viau. Rei pawh awm loin a chho ta a. Kei pawh ka mu leh nghal. Ngaihtuahna buai nuaihin ka muhil zui ve ta hram. 

Sunday a ni bawk a, tho vak lo chungin inkhawm turin ka insiam a. Terini te nen kan lawina a inang nen, ka hmu châk teh huam lo deuh a ni. In chung nula te chu an insiam rei theih êm vangin ka nghak buai peih lo, Zoa ka sawm phei a, Biak in lam kan pan ta a. Thlengi a rawn haw tawh a, a mood a fuh ngang mai. Ka awt lek lek hial, A bialnu hi a hmel chu a ṭha hauh lo. Mahse, a felin kan vawikhat lennaah pawh khan min titlangnêl thiam êm em a, mi rilru tluang tak a nih ngei pawh ka ring. Terini te hla hruai thla a la ni zui a! Zai pawh ka tui hleithei lo. Mipa ve si chutitaka duh loh ka tinâ chu ka ngaihtuah chianin nêp ka inti a, ka titawp thei ngawt bawk si lo. A bul chu Muansangzuali niin ka hre ta. Ani kha ka lo ngaizawng ru reng em ni ang? Khatitaka hmusittu ka huatsak thei leh Terini nen kan awmdan min hmu hrehawm ka ti ngawih ngawih kha. Tleirawl ho ṭhutna lam ka va hawi a, hnunglam aṭang pawn ka va hre nalh thei. Kawrfual dum simple tak a ha a, a pheikhawk bun erawh ka hmu thei lo. A sam a thlah bawk. Chutiang chuan eng emaw ti ti chuan inkhawm kan bâng ve ta hram. Ka thaw huai thei. Ban veleh Zoa pawh nghak khawtlai lovin ka haw nal nal, an nu nen an inbekbawr ve si a, a zui haw ka rin vang a ni pakhat. In ka thleng chiah tihin ka nuin min lo call a, an lo bâng ve chiah a lo nia. 

"Engtin nge Sangpuii chu i be tawh em? Ruahmanna te in nei tawh em?" A rawn tih chuan ka lo zak chem chem ringawt. 

"Biakna hun ka la nei hleithei lo va, remchang a awm veleh ka lo bia ang" ka ti ta ngawt a. Ka nu hi zawng a pasal neih hma zawng rethei leh fahrah reng rengin hun a lo hmang a ni bawk a, a vei leh ngut ngut tawh a ni ngei ang. 

"Sangzual, thingpui rawn in rawh" Baby'n a ti lâng lâng a. Ka lum peih lo bawk a tiin tawnzau leh boxer nen chauh ka han chho a. Ka mi hmuh avang chuan ka lêt leh ṭêp a ni. Terini a lo awm ve kur! Ka lut ta tho a. Zo chhang an lo nei chu niin, ka lawm ru hle. Zo chhang hi ka duh bawk a. Dawhkan kil chuan kan ṭhu ṭhap a, Pa Zawma te an lo la haw lo a nih hmel. Terini chuan min melh ngat ngat tih ka hai lo, ka en lo lui tlat. Mahse, chutiang ringawt zawng a sâwt dawn lo ve tiin, "Terin, thingpui in zawhah hian inbe lawk ang aw" ka ti ta a. Baby leh Hriati hi chuan engkim an hre bawk a, ka zahpah duh lem lo. 

"Aw le" a ti ṭha ve mai a. A zia a dangin, a ṭawng ṭha duh lo hle. Ka awmdan avanga danglam tur kha a ni ve hrim hrim bawk a. Kan inei puar zawh chuan, "Ka inah chhuk ila, Pa Zawma te an lo haw takin" ka ti sup a. A tho ve nghal mai bawk. Kan inzui chhuak ta a. Ka in kan luh rual chuan, "Inṭhen ka duh lo a nia" a ti nghal chawt. A va mak hmanhmawh e aw. 

Kan ṭhut fel hnuah, "Ngun takin ka inngaihtuah a, kan mizia hi a inang lo bawk nen, kan thurual zui zel theih ka ring lo a ni. Chuvang chuan kan kal thui hmain tawpsan law law hi ṭha ka ti ta a ni" ka ti ta dap dap a. Ka aw a khur lo va, ka inringtawk hle bawk. Chhuat lam a melh ngar ngar a, a hmui a pet bawk. A ṭap mai ang tih ka lo hlau deuh naa a ṭap ta êm lo. 

"Engvang ber nge?" Thawk la hawkin a ti sap a. Ka sawifiah vek tawh sia, a mak ṭâng ṭâng ṭhin. A ruhlanga sawi khawl khawl chi pawh ni lo chuan a..

"Englo a nia, ka sawi tawh ang khan, i mizia hi ka type a ni lo a ni. Pawi ka ti lutuk, mi dang i treat dan hi ka nihna a ni ve lo va, hei hian i lak aṭangin min pawtsawn a ni ber, hrethiam hrâm ang che. Ka haw hran lo che, mahse, inngaihzawnna boruak chu awm tawh lo se ka duh a ni. " Ka ti ta tawp a. A dawnsawn dan tur lam ka chhûtpui buai duh lo, eng chhuanlam pawh hmang ila a na dawn tho tho. 

Ka rin ang ngeiin, "Min duh lo leh tur si chu ti nge min bem a, bul min ṭanpui?" A ti ta chiah a. Hei chu a sawi dik lo hran lo, a thiamloh vek a ni bik lo tih lah ka chiang. 

"Nia, ka hmuh tirh leh ka hriat tirh che khan chhe lo ka ti che a, fel ka ti viau bawk che. Mahse, kan inhrechiang zel a, rilru hi a lo danglam ve zel sia" ka ti ta ringawt a. A ner sak, "Nizana Muansangzuali ka ânkhum vang khan a ni tiraw? I hriatchian loh vang mai mai a nih kha.. ka la ânkhum na lo zawk a nih kha " a ti ta tâwn tâwn a, ka rilru tê têin, "Min chelh i tum dan chuan min hnar telh telh mai sia" ka ti neuh neuh mai. 

A langah erawh, "Kha vang pawh kha a ni ber chuang lo, ka sawi thiam bîk lo, bakah maid i nih laia i awmdan te ka lo hre thawi ve bawk nen" ka tum loh deuhin ka ti ta hlauh mai. Chhuanlam tur dang ka ngaihtuah chhuak thei miau rih lo a ni. 

A nui lui sak a, "Engtin nge ka lo awm a? A lo ni maw? A hrilhtu che pawh ka hriat ka ring. I danglam ka ti rêng a ni..engtin tak nge min lo sawi a?" A ti ta khar khar a, a confi hmel viau lawi a. Buangi khan a sawi dik lo pawh a ni ve thei tho. 

"Engtin i va awm hran pawh ka hre lo. Chiang takin ka hre bîk lo va, tin, sawi pawh a ṭul hek lo. " Ka ti nghut a. 

"Mi hi an sawi peih sia maw? Dâwt an belh ziah bawk. Engtinmah ka han awm lo ve, min îtsîk vang mai mai a nih kha.." a ti bawrh bawrh a. Sawi tur vâng ka ti ṭan. Ka aw ka thian a, "Engpawhnise, keini pahnih inkar chu tawp rih phawt rawh se,. Chu chu hrethiam la ka duh" ka ti tawl mai. 

"Bul min ṭanpui tawh a, a tawp min thlenpui ngei a ngai ang, i duh leh min ṭhen rawh, ka ṭhen ve dawn chuang lo che" a ti ve hmiah bawk. A tumruh hmel kher mai le. Ka ṭawng leh hmain a tho tharh a, "Zanah ka lo nghak ang che, min lo sawm rawh aw" tih leh chhuah a rual zui. Min tihrilhhai lek lek alawm le. Lehlamah khatiang taka a tumruh kha a âwm tihna chen ka nei. Kan duh a, bul kan ṭanpui a, eng emaw thil vangin kan han kalsan leh tawp a! Hmeichhe zingah pawh an awm. Khawvel a ni miau a, engmah hi a kumhlun thei tak tak si lo, Terini chuan ka nun a khalh buai ka remti lo naa, a boruak hap a sân deuh avangin pawisak a neih vak ka ring lo nen, nuam ka ti vak lo. Mahse, in ni ve thoin ka ring a, hnaih dawn pawha tihluih theih hlawl loh, min hîpna leh phurna min siamsak thei thil awm hlawl lo chuan bei a tidawng ve thei tlat a tin ni. Kan inngaizawng thiang a, kan inṭhen thiang bawk tih chu ka thutlukna a ni deuh mai e a. Nupui ka nei a nih erawh chuan phatsan ka tum lo bur thung. 

Artui ka kan laiin Buangi call ka dawng a, ngaihṭhat lohna riau ka neih avangin ka la ta vat. Aw khur dar dar hian, "Terini nen kan inchhal hrep, min rawn luhchilh ngam nia mawle" a rawn ti ta mai a. Kha maw! Terini boruak hap a sâng ka tih tawh kha, amah ka duh theihna tur a phumbo zel e. 

"Engtin nge a rawn tih?" Ka tih chuan, "Zanah rawn kal la, ka hrilh ang che, tunah chuan ka thinrim lutuk a, ka sawi thei lo, ka pa te lahin min lo hau bawk nen, zahthlak bawk si" a ti hlawp hlawp a, a ṭap lek lekin ka hria. Ni e, inchhuahchhalh te hi thil zahthlak a tling ve bawk a, Buangi chu keimah vangin zahna kâwnah a ding tih ka hai lo, ka inthiam lo takzet a ni. Singapore kha sawi tel lo tur ka nia sin mawle. 

Chaw pawh ka ei tui nek lo ve. Helhkam lianpui ka nei ṭûn reng mai a, a hrehawm, thaw a veng hlawl lo. Chaw eikham veleh ka inthlak a, awmhmun thawmhnaw nen Buangi hmu tur chuan ka chhuk ta nal nal a. Terini sawm te chu ka-ha-se a ni ringawt. Ka va luh chuan an lo eikham ve deuh chauh nge an lo insenghawi mêk a, Pu Ramtea te nupa pawh ka zah thar thut. Min lo be bawrh bawrh nain chhungrilah nuam ka ti lo, keimah vangin an fanu an chhuan rûk ve êm êm, thla thar maia pasal nei tawh turin chhuahchhalh a tawk ta rep mai si a. U Kaia erawh tukin zingah Ngûr khuaa a ṭhianpa damlo, rei tak damdawi ina awm tawh lo chhuak va kan turin a lo kal daih a lo nia. An inneih pawha a dinpui a lo ni bawk nen, a ngaipawimawh khawp mai. Buangi thleng sil nghakin ka ṭhu ta ran a. Nu Mawii leh an pa erawh inkhawm turin an chhuak tawh. Zuali'n a fate pahnih kaiin, "U Buang, ka nute inah kan va leng ve lawk aw, ka nî a lo zin ve bawk nen" a ti lâng lâng a. Buangi pawn, "Aw, in leng khât si, va kal r'u, Duatpui, nang chu kal lo mai la, ka khua a har dawn asin" tiin a nau zawk chu a bia a. 

"Aih, balhla ka ei châk alawm" a lo ti ve tlat. Zuali te chhuah hnu lawk chuan Buangi pawh chuan sil zo vin, ka bulah ṭhuthmun a rawn rem ta chat a. 

"Engtin chiah nge?" Ka ti thawt thawt. 

Thawk la halhin, "Rawng ka bawl lai a nia, a rawn lut thâwr a, thinrim hmai sen ṭeuhin, "Vanlalsang, engvangin nge Sangzuala bulah dâwt dâwta mi lo sawi a, i va ṭawng thei ve, min thîk vang a ni tiraw?" A rawn ti nghal bawrh bawrh a. Ka hamhaih hman deuh a, mahse, ka hrethiam leh vat. 'Eng nge ka sawi a?' pangngai deuhin ka ti ve mai a. A kut zungchala mi kâwkin, "Singapore ka awm lai kha i lo sawi vel a, engmah i hre lo, miin ni lo pui puiin min sawi a, thutakah in lo ngai a, a thuhrimin eng nge Sangzuala i lo hrilh chhan hi? I lo ngaizawng ve tiraw? Pasal nei mai tur si, i zahpuiawm khawp mai" min ti leh ta zêk a. Ka pain a khap dai ta hram. Kei chu ka ṭawng ve hman meuh lo, a âng thiam si a, a ṭawng char char a ni ber, ka zak a ni tawp mai. Ka pa mawlh kha ka zah. A haw hnuah thil awmzia min zawt a, dik takin ka sawi ta vek a. Min zilh naa 'Sangzuala chu la hrilh ka lo tum ru tho alawm, Terini ber kher zawng ka iaisak deuh' a ti ta a, ka thaw huai alawm..a nawm lohzia chu aw" tiin a thil tawn chu a sawi ta mawlh mawlh a. Ka chil ka lem khawlh ringawt. 

"In inṭhen ami?" A tih chuan, nizan lama kan chetdan leh Muansangzuali a tihdan te, vawiin lama ka ṭhen thu ka hrilh dante chu ka sawi ve ta vek a. "I ṭhen chuan a ṭhat chu, tikhan eng mi nge a nih i hrechiang tawh ang chu, Sangpuii te unau te saw an hmusit nufa a nia. A hrechiang apiangin Terini chu an hlat zel, a langah chuan an ṭha duam duam nufa lutuk, mahse, an ze dik tak a lang lo thei ṭhin si lo va, miin an hre leh nge nge zel" a ti ta sak sak a. Terini a ngei ve bawk a, a ṭawngkam pawh a na ve thawkhat viau mai. 

"Invêng rân ang che, a nu te sawn hma a la lakpui ka ring, ngaihzawng dang pawh nei rih suh, an kal chilh leh duh ang. Tikhan awm tawp la, ngaihven lo la, a rei ang a, ngaiah an nei ve mai ang" tiin min fuih pah a. Ni e, ngaihzawng ṭhen rual ruala midang melh nghal ruai mi ka ni hran lo va, kha lamah kha chuan ka buai lem lo. Thingpui ka in zawhah muangmarin ka haw chho ve leh ta hnak hnak a. Mood a inthlak kual reng mai chu a nih hi a. Rin ai tak chuan ka mutui phian lawi a! Ka mumangah Tleipuia ka la hmu zui, ka nu nen kan inbiakna kha ka mangphan deuh a ni maithei. 

Monday hi chu a va hneawm thei tak. Tho lo zetin ka insiam a, tukṭhuan pawh tihtham ka ei lo. School ka thleng a. Pawna Tleipuia te infiam chu ka va hmu ta hlauh, ka ko ta vat a. Zum zet hian a rawn lut a, lehkhabu ka leisakte chu ka pe a. "Sir, engtikah nge ka lo pek leh ang che" a ti a. Nui chungin, "Pek leh a ngai tawh lo, i ta tura ka rawn lei a nih kha. I pa te inah in haw leh tawh em?" Ka ti nghal zat a. Hawihai deuh tak hian, "Aw haw tawh. Mahse, Sir, pain mi thilpek lak loh tur a ti sia" a ti ta nuah nuah a. Ka fiah kuar mai. Ka va lainat tak e aw. 

"I thukru mai dawn alawm" ka ti hram a. 

"Umm, a û ka thuhrûktir daih ang" nui ver ver chungin a ti a, a phur hmel leh ta deuh. 

"I û school a rawn kal em?" Ka tih chuan a aw rang ngei mai. Ka awm zuk nuam sawt a mawle, ve ringawt chuan a. Class x ka test tir laiin canteen bul ṭhutnaa Heleni leh Sangpuii te bawk ṭhu chu ka va hmu lehpek a. Ka lungphu a rang dat, ngati ringawt zel nge le..ka ngaizawng tih dawnin amah aia hmelṭha leh no nalh zawk an class-ah pawh an awm nual ang, a mizia lah ka type niin ka hre bawk si lo. A mak mang e. Heleni nen chuan mûk fê hian an inkawm niin a lang, Heleni hi a best friend a nih ve ngei ka ring. Chhun chawlh dar a rîk rualin naupangho an phi leh sek tawh. Kan chhuah rual rual hian an han tlanchhuak nghal a, an rilte hi a ṭâm ṭhin teh a nia. Keini pawh canteenah kan inzui phei hlawm a. Tukṭhuan tihtham ka ei loh vang khan ka pum pawh a ri rawk rawk tawh. Nu Nghaki paratha hi zawng a tui a ni,. Chana nen per thum ngawt ka'n ei pek kha, ka puar leh lutuk roh si, ka dul ka zût ka zût mai. Muansangzuali hmel ka hmu leh tawh hauh lo, ni e, a pa ten pawisa an paitir ka ring hauh lo va, canteenah chuan a rawn kal lûl lo vang. School lam pana kan inzui phei lai chuan Higher section lama ri deuh hak avang chuan kan va thlêk dûk dûk hlawm a. Class xii ami, a harh leh thawven êm vanga keini lam pawhin kan hriat hmasak pâwl Hriata chuan hmeichheho a lo chhaih kawlh leh nge ni, thinrim zeta , "Min pe vat rawh" hmeichhe âw in a tih ri chu kan hria a. Chu aw chu ka hriat fô hnu a ni tlat. Ka ding ta dat a, midang erawh nui hak hak chungin an kal zui mai. Verandaah Hriata chu a rawn pai chhuak nawk nawk mai a, "Zawngi" a ti nghal tuar! Muansangzuali ngei mai chu chartin bung sei vak lo hum chungin a rawn chhuak ta thoh thoh a, "Ka sam ṭawnna kha min pe rawh, min pe dawn lo a nih chuan.." tih leh a tiang chu lek a rual a, Hriata chuan tlanchhe titihin, a thil hum lai chu Sangpuii bulah a va theh phei a, a sam ṭawnna a lo laksak ni ngei tur a ni. Sangpuii pawn a sam a thlah hniang tak alawm. Mitmeng tûr zeta Hriata melh chungin, "Vawikhatmah min tibuai tawh suh" a ti ram hmak a, a inher a, luh a tum mêk laiin Hriata chuan, "Fahrahnu, ve khanglang a che" a ti tuar a, engtik laiin nge Hriata bula ka va din hman ka hre lo. A kawr âwmah ka lo ṭhâm reng tawh. Makti zeta naupang dang ten min lo en ṭhup pawh chu ka hre ve chiah..

"Khatianga i koh leh chuan, i pian hma ngai rum rum khawpin ka siam ang che. I hria em?" Tih pahin ka thing nawk a. A ngaihna hre lo zetin Hriata chuan min melh kul ringawt. Kan office pana kal tuma ka inher pahin Muansangzuali ding khawng reng chu ka va melh zauh a. A mitmenga zawhna kha kei pawn ka chhang thiam lo tih a hrethiam hauh lo vang, Hmeichhe naupang tih mai theih tur khawpa naupang a la ni si a..!