Ka savaté 3

KA SAVATÊ (3)

Ziaktu : Toni Râlte

Zemabâwk kan thlen takah chuan kan kalna tur ka hre ta. A hmaa Siami nen kan inzui laia a ṭhiannu, khal leh tuihnai zet, mahse, han lem ve thei mai inah kan kal dawn tih ka hre thei. He hmeichhia hi Nunui a ni a, a fate pahnih awmpuiin Bawngkawnah thawmhnaw dawr changtlung tak a nei nghe nghe. Siami nen hian best friend niin, kawm nuam zet leh thilphal tak a ni bawk. Kan inzui lai khan a inah hian kan leng fô a, fianrial hun hman nana remchang tak a lo ni bawk nen, a in kha kan hmang rim angreng. Kan va thlen chuan Siami'n a lo be lâwk tawh tih hriat takin min lo dawngsawng a. A hmel hmuh a nuam leh hle. A fate hostelah a lo dah daih a lo nia. A free halh halh ngei mai. Kei erawh hnulam chhui lêt mi ka ni hran lo bawk a, Siami pawh ka chu ê kha ê duh lem lo. Ex chu ex, next chu next ti chi kha ka ni ve bawk a. Ṭhian nih erawh thil ṭha tak a niawm e. 10mins vel kan ṭhuthoa kan titi hnu chuan, Nunui chuan, "Ṭhenawm putar damlo ka va kan lawk ang e, nizanah pawh kan buai tawh" tiin a chhuak ta nulh mai. Chance min pe tih mi pangngai tan hai chi rual a ni lo. Mahse, Siami duh ang ngawt chuan ka awm lo vang. Ka kut a rawn vuan nghal chat a, ka thingthla duh bik hran lo. 

"I ngaihawm mang e" a ti sap a. Ka nui ringawt. 

"Nui ringawt suh, ka ngaihzia che hi aw. Lalawma ka lo inrûktir kha ka tihsual lian ber a ni. Ka rilru hah kha ka mang vek a, nang lahin min neih i tum si lo, ka pasal hlui hnena kir leh ai chuan tiin ka ruih lungpuam laiin kan tlandun ta ngawt a nih kha" a ti leh sar sar a. Tunah pawh hian zu rim a nam deuhin ka hria. Remchang a lo zawng rân a nih awm hi. 

"I ho êm mai a..thil hlui sawi tawh suh" ka ti hluk a. 

"A mak! Min ngai ve miah na nge?" A ti nghat a. 

"Bialnu ka nei tawh alawm, ka hnathawhna hmun ami" ka ti ta nge nge a. 

"Ho êm mai, neih a tan i duh tak tak lo vang. Thingtlang nula te chu" a ti liam puat a. A ngaih lah hi a sam angreng sia. 

"Hmalam hun kan hre hleinem" ka ti ringawt. Dar 9 a ri hnai tawh a, hawn lam hnaih ka duh tawh viau. Ham bâi bâi chungin, "Haw tawh ila..ka mut a chhuak ve riau, ka chau ve deuh bawk nen" ka ti a. Titau lek lek ang hian a awm naa ka nawrlui tlat si a, Nunui a call a, a rawn lut vat. Kan inthlah liam ta a. An ina peng kawi tura min sawmna pawh ka hnar ta mai, a zeiin pawisak a nei tehchiam si lo va, ka tâng leh palh ang tih ka hlau tlat. Ka mu fel chiah tihin Terini call ka dawng zat. Kalkawngah khan kan chanchin chu ka hrilh thuak thuak a, pawi a ti ve hle. 

Kan inbe rei vak lo, ka chau tih a hrethiam a niang. Whatsapp lamah pawh kan inbe rei lo. Kei pawh mumang bo ṭhakin ka muhil ta a. Ka harh chuan dar 7 a lo pel hlek. Ka haw tawh tho a, Siami te tihbuai fô ai chuan tiin rawng ka bawl a. Ka parawl a ni bawk a, rawngbawl chu ka hnehsawh tawh phian. Tei nen kan inbia a, ka nu pawh a thawhharh ve deuh thu a rawn sawi a, a lawmawm e. Sunday mah nise, inkhawm ka tum lem lo. Tiffin ka siam zawh veleh kan ṭhenawm te taxi hmangin damdawi in lam kan pan ta a. Ka nu lo ṭhu chhuak ka hmuh chuan ka lawm hle. Chaw an ei chhung zawng ka awm ve a, "Damdawi in hi ka ning êm mai, naktukah chhuah ka dil ang" ka nu chuan a ti leh ṭhin. Tei nen, "I â êm mai, dam ṭha ver vawrin kan chhuak ang chu..hmanhmawh suh" kan ti ngial a. 

"Tei, zuk haw ve la, chhun lam chu ka lo awmpui dawn nge, zan pawh ka tlang thei tho a" ka tih chuan, "Keimahin ka mu ngam hleinem" a ti bawk si. A van buaithlak ṭhin tak. A awm ve tho mai, hmeichhe tan chuan mahnia awm rek rek chu a ngamawm bîk loh ve bawk a ni. Inbual fai a duh avangin taxi chuan a zuk hawng leh a, tlaiah tiffin nen a rawn kal leh zawk dawn a ni. Ka nu pawh a muhil deuh reng a. A ṭha lamah ka ngai mai. Chawhnu lam dar 2 pelh velah ka nu thaw chu a rawn hah leh deuh a, mahse, chutia nasa a ni lo. Nurse hoin an rawn buaipui ta vat a; a zia leh deuh. Kan neihchhun a ni tawh bawk nen, rilru a kap rûn reng mai a, rilruin kan ṭawngṭai mawlh mawlh reng mai a ni. Terini nen kan intext zauh zauh, Muansangzuali ka rilruah a rawn lang ve leh zawk zel bawk. He tleirawl hi eng emaw tak chu a niang e, rilru a mawlh ve tlat reng mai. Tleipuia lah kha ka lehkhabu a hawh sia, naktukah a lo submit ve êm ang chu maw. Tei chu dar 5 rik hmain a rawn thleng der tawh. Kei pawh awm khawmuang lovin ka haw thla ve ta a. In ka thlen veleh ka inbual fai sawk sawk a. Ril a ṭâm ve tawh nen, chaw ka ei zui nghal. Vawksa rêp a lo chhum hluah a lo nia, ka'n ei nghek kha. Ka dul ka zût ka zût mai. Tihtur êm êm ka nei leh ta lo. In chungah ka leng peih bawk si lo. 

Terini inkhawm bangin min rawn call a, "Hei U Diki a rawn tlan leh a. A buaithlak tak tak a ni" a tih chuan beng a verh deuh. 

"Ngati lehpek nge" ka ti nghut a. Diki hmel ka mitthlaah a rawn lang nghal. A fanu Kimi hmel pawh a rawn lang ve zat bawk. 

Terini chuan, "An pa zuruiin a lo vua a niawm e. A chhan tak ka hre bîk lo" a ti a. Muansangzuali te nen a inkaihhnawih leh vek tho ka ring. Ka zawt zui duh ta lo va. 

Kan inbe zo chu Pu Ramtea'n min rawn be mial a, chanchinte kan han inhrilh a, an felin an bengvar ngawt mai. Pu Biaka te leh thawhpui dangte nen pawh kan inbe ve deuh reng. La hma viau mah se; mut lam ka tintuah ta a. Zial ka zuk pahin phone ka khawih a, Buangi msg chu mak ka ti deuh, "I tân thuk hmain Terini hi kalsan rawh. Mi ṭha a ni lo a nia" a rawn ti a nih chu! 

"A va mak awm ve aw. Eng nge a awmzia?" Ka ti vat. Terini nen pawh kan inbe pah reng tho. 

"A tam mai, phone aṭanga sawi chi pawh a ni lo" a la rawn ti deuh deuh. 

"Sawi ṭha ve mai la" ka va ti leh a. 

"I lo haw hunah aw. " A rawn ti daih. Hmm, min tivir tingtang. Tiang hi ka ngei zawng tak a ni, hriat chakawm deuhin an sawi a, an sawi tluantling leh tawh ngai si lo. Buangi chuan eng a hria chu nimaw? Terini chu ka hriat chinah a ṭhat tawk lohna ka hre mai bawk si lo. Ngaih a tiṭha lo ve deuh. Mahse, ngaihtuah zawm duh loin ka nu te lam ka ngaihtuah ta daih a. Chhungkhat nei lo ta na nâ na chu kantu pawh kan nei vak lo, Ka pu nau fate kha an rawn lang ve zuai a. An milian tawh angreng a, kan inlaichinna a thûk thei vak tawh lo, ka pu ber a boral tawh bawk nen. Darlawn aṭang erawh chuan ka nî te leh patea te hoin an rawn ngaihven ve reng tho. 

A tukah Tei'n min lo bia a, "Chhuah a ngen reng mai sia, hei a zia ve deuh tawh tho bawk nen, Doctor hi ka lo dil mai dawn mawni le. In lamah inenkawlzui mai ila" a rawn ti a. Ka hrethiam lo angreng, mahse, ka nu ka khawngaih ve bawk si. 

"Lo dil chhin ta poh che, chanchin min rawn hrilh la" ka ti a. Nizanah a tuk zingah chaw pek an ngaih loh thu kha a rawn sawi a, rawng pawh ka bawl kep ta lo mai. Tukṭhuan ka ei khamah an lo hawn takin tihthuah in te chu ka han tifel ve sasawi a, tihfai vak pawh a ngai lem lo. 

Tei nen kan inbia a, an chhuah tur thu a rawn sawi ta. Ka inbual vat vat a, pawisa lakchhuahte a ngai dawn bawk nen, ATM hnai ber ka pan ta nghal a. Lirthei neih ve loh hi chuan chet a buaithlak vek zel. Ka la tuak ve ang chu. Pawisa ka lakchhuah zawhah damdawi inah ka tlang a, Tei te chu an lo insiam zo thawkhat tawh. Damdawi te kan han lei vat vat a, taxi ka biaksa tawhah chuan lutin in lam kan pan ta nghal a. Ka nu ber a ziaawm takah chuan rilru a thawveng ta deuh e. Zanriah chu in chungten in chhuah lawm nan tiin min lo bawl kep vek mai a, a fel hi zawng an fel a ni. Hnial ngaihna awm hek lo le, kan eiho ta a. Chaw ei pawh a tui leh viau e. Siami nen kan inkarah engmah a thleng leh ta lo,Lalawma pawh a rawn tâp leh ṭan nge, zanriah kan ei kham an insengfel laiin a rawn thleng der tawh. Kan inbe ve luam tho mai. Ka haw hran lo bawk a. 

Ina kan chhuk hnuah kan nufa chuan kan titi a, Zopui khaw mihring chanchin tlangpui leh an khaw thlêng te ka sawi mawlh mawlh a. Tei'n, "Bialnu i nei tawh em?" Nui rah rah chungin a lo ti a.

"Nei ve deuh, a chhe lo reuh a nia aw" ka ti a, ka nu nen an inmelh zauh. 

"E taka! Maw Nu, Tleirawl unau lainatawm deuh an awm tak asin, Muansangzuali a nia, zan laiah a nu thlanah a kal ṭhin. Nuhrawn an hrawn a, a ṭha vak lo nge, a nau mipa nen an khawngaihthlak lutuk a" ka ti hluai a. Ka nu hi hman ata tawh kan dinhmun aia chhe ve lehchhawngte lainata a theih ang anga pui ṭhin mi a ni ve a. Kan neihin a tlin lo êm zawk a, duh angin kan inpui thei ṭhin lo. Chutia nu thihsan a fate chungchang ka han sawi pawh chuan a bengkhawn hle nghe nghe. 

"An va lainatawm tak ve aw. Inpuih dan te awm se" a ti leh rêng a. 

"Nia, mahse, a pa hi a la dam ve bawk sia, puih vak pawh a inthlahrunawm" ka lo ti vat. 

Tei chuan, "Eirawngbawl tur te, insu tur te i mamawh tho sia, awmpui daih la ni mai lawm" a lo ti hmanhmawh. Chutiang ringawt a ni thei bik si lo. Zan a lo rei ve ta deuh bawk a, mutzai kan rêl ta a. 

Ka nu min nawrna angin Thawhlehni ka châm ve ang a, Nilaini-ah Zopui lamah ka chho ve leh ang. Kar khat tal châm pawh pawi ka tih loh nen, "Chawlh reng kha a uiawm, i thawhpuite lakah pawh a inthlahrunawm" a ti miau mai si. Mamawhte ka lam khawm leh a, Terini tan tshirt ka lei ve, U Kaia min chah Chempui pawh ka hawnsak e. Lehkhabu dawr ka kalpelh dawn lai tak chuan Tleipuia'n lehkhabu a ngainatzia kha ka mitthlaah a rawn lang a, ka let leh vut. Naupang thawnthu 5 ka leisak ta a. A û tan erawh han hawnsak tur âwm chi ka hre mai lo. Bakah inzawmna kan nei hran si lo va, lo hawnsak ve ngawt kha ka inthlahrung deuh. Zanah Siami a rawn leng a, ṭhenawmte nupa an rawn leng bawk. Ṭhenawmpa Pu Luaia chuan, "I han awmna Zopui khi a boruak a zo si, nuam tak a ni. Thingtlang pilril lutukah i awm lo va, i vannei ngawt mai" a ti mual mual a. A ni teh tak e. 

"Nia, a boruak chu nuam tak a ni, an vun pawh khi a dik riau asin" ka lo ti ve vat a. 

An nu chuan, "Kan nau pakhat hi a han awm ve tawh alawm. Ngaihzawngte pawh a han nei ve hman a, an sawn ta daih sia..nang pawh nupui nei lo rual i ni tawh lo, nei ve tawh rawh" nui chungin a ti duah a. Ka nui ringawt. 

Siami chuan, "Thingtlang nula chu nei lo vang, awmdan chintawk an hre ngai lo" a lo ti hlak hlak a, a kai leh tawh mawni le. 

Pu Luaia'n, "Kei Thingtlang nula hi ka iai lo mai pawh ni loin hei kan nu pawh Thingtlang tho a nia. Ka nei lovang tih hi ka hlau ṭhin a nia" nui huah huah chungin a ti a. An nu hmel pawh a nung sar mai. Titi dang ka vawrh ta daih a, Siami sawi kha ṭhenkhatah chuan a dikna chen pawh a awm ve âwm e. Ka hmelhriat pakhat pawn Thingtlang pilril ve deuh ami nupuiah a nei a, ka hmelhriatte chu an awm theiin an in leh lo lah a changkang pawl a ni ve a, a nupui chu a tirah fel viau mah se; a rei a, a nu leh pate an lo upa ve tawh bawk a, a zia a chhuah ti mai ang. Lal a hrawt bakah sum hmanna tur a hre êm êm a, an khaw mi Khawpuia rawn kalte lah a lo zahpuiin a lo hre lo der thul. Rethei bakberh taka seilian chhote zingah hausak thut dawl zo lo an awm ve leh khut ṭhin. Mahse, a tlangpuiin Thingtlang nula te hi an iaiawm loh bakah an lo taima nge nge zel. Kei chu ka tia, dinhmun inchen lo lutuk inneihte hi a fuh lohna chen a awm ka ti ve tlat! Hmangaihna vang chu a ni ngei ang, mahse, dinuhmun hniam taka awm dinhmun sanga an han awm thut hian an zawh loh chin leh an tawrhhlelhawm chin a awm ka tia, chutiang bawkin dinhmun ṭha tak aṭanga a hniam lama awm pawh a tawpna a hlimawm hleithei ṭhin lo. Hei zawng mihrinh rilru azir te pawh a niang e. Mary nuin min tihdan kha ka hrereng ṭhin a. Chuvang chuan kan dinhmun mil tawk, ka nu leh ka farnu min hmangaihpui thei tur hmeichhia hi ka melh ta ber zawk. Hausa deuh ngaihzawn chu inthlahrun a na duh êm mai. 

Tichuan, A tukah chuan Zopui khaw lam panin kan tlan leh ta vang vang a. Tun ṭum passenger te titi chuan beng a verh riau mai. Muansangzuali te unau chanchin a ni an sawi ni, an ṭhenawmnu niawm tak chuan, "Nimin tlaia Diki te nufa rawn haw khan Sangpuii chu an ânkhum leh phiar phiar a, a pa bula hêk angin an sawi leh a. Kut te pawh an inthlakin ka hria, an khawngaihthlak ṭhin a nia. Tleipuia te saw chaw kawpuar ei ngai lo tih takah a rualpuite ai pawn a thu thet a, a vunte hi a nung ve sârh lo. Han inpuih dawn lahin khawsak harsa ve tê tê kan lo ni bawk nen, pa ber lah rui reng bawk si..a hahthlak a nia" a ti bawrh bawrh a. Nu valai ti ila, nu tir han tih mai tur chi a ni. 

Driver chuan, "I sawi takah chuan hmanni deuh khan Sangpuii insu nen kan haw rual a, 'U val, Bawihpuia hi Aizawla fa anga la duh tur awm se ka ti ee..lo ngaihven teh a. Mahse, ka pate hrilh miah lo la" a ti reuh tak asin" a tih leh phei chuan ka sa zak mai. A nau hi a lo hmangaih ve hle a nih dawn hi. 

"Awii! Hmuhsak mah la, Diki te sawn an phal dawn teuh lo, a pa an fuihpawrh leh ang a, tunah pawh ka û Remi te sawn awmpui an hreh hleinem, Mama a boral hnu phei chuan fapa nei hek lo, mahse, a pa sawn a phal teuh lo. 'A pa ka la dam ve alawm, min timualpho mai mai' a ti deuh tlat! Diki te rilru bawk a ni leh ang. An thatchhe nufa si a, an thawh ai zawng zawng thawk turin an unau sawn duh hek..khawchhungah pawh awmpui hreh lo an awm nual ang,." Nichin ami bawk khan a lo ti ve leh mawlh mawlh a. Diki te chu a ngei ve hle a niang, ṭawng a sumkar loh danah. 

A hmaa ṭhu tarmit vuah, nu thau lam chuan, "Tunlaiah nuhrawn pahrawn an sual duh tawh loh nen, an vanduai unau a nih saw. Pa ber zir loh a nia. Puii'n ,'Sangpuii chu a zirlaibu pawh a lei thei si lo va, ka leisak ringawt' a tih bawk kha..chungte êm êm chu tihsak ve awm" a lo ti ve hlak hlak mai. Kan thinrim ru ṭûn hlawmin ka hria. Zirlaibu leisaktu Miss Puii chu min mitmei ve deuhtu kha a nih hmel. A nih chuan a hmaa ṭhu hi a nu a ni ngei ang, an pawh an inang ve deuh alawm. 

Khua kan lut a, Vala chuan, "Sir, ka thlah ang che. Midang ho hi drop lawk ila" a tih avangin Venglai aṭanga inkhai chhoh ai chuan tiin ka thlah kualpui hlawm a. Kan pahnih chauha ka in lam pana kan tlan dun lai chuan, "Vala, Tleipuia kha ka nuten an awmpui duh ka va ring êm, zaninah ka nu ka lo bia ang a, ruahmanna la siam ang hmiang" ka ti ta thâwr a. Mak tih hmel angreng taka min rawn melh zukin, "A va lawmawm awm ve, Ni e, kan sawi ṭha dawn nia aw. A û sawn a ngaihtuah ve si a" a ti ve hluai a. In kan thleng a, Baby a rawn chhuak vat. Chawhmeh ka hawnsak chu ka pe a, thingpui pawh in kawi lem loin ka in lam ka pan ta a. Baby ten chaw min lo chhum kep tho a, muangmarin ka intifai a. Ka inrem fel hnuah ka chho ta a,.zanriah kan ei zui nghal. 

Hriati'n, "Zanah i leng dawn em?" A ti a. Ka bu nghut. Nu ber chuan, "Terini saw a fel reuh a nia, nei daih rawh" a rawn ti roh a. Ka khi suk. 

Baby'n, "Nia, kan la ti huk ang chu" tiin chaw min rawn khawrh belh. 

Chaw eikham thingpui hâng ka in leh hnuah inah chhuk leh phawtin ka insiam ve deuh a. A tshirt ka leisak chu ka keng bawk. Ka nu te pawh an ṭha a, pheikhai zang vahin ka bialnu te in chu ka pan ta a. Ka va luh chuan amah chauhin a lo awm. Min lo dawngsawng ṭha khawp mai. Hah pawh a dam ve sawng sawng thei alawm. Ka thil leisakte chu ka han pe ve a, a lawm thiam ngang mai. A inhmeh phian lehnghal. A nu leh pate chu an inkhawm a lo nia, ani erawh ka hawn avangin a ṭhulh ve ngei. Tumah venthawn tur an awm lem lo bawk a, ka fâwp vâwng vâwng reng mai. Inkiss a zei lutuk ber hi mak ka ti deuh ṭhin. Siami meuh paw'n a tluk hauh lo. A zei mi an awm ve hrim hrim a niang e. A nute pawh an lo bang a, min be ve hlut mai. Min biak dan velah hian min iai bik lo ni chuan ka hria, lehlamah High school zirtirtu kha ka ni ve miau a. Mahse, Terini nen kan ṭhutdun lai reng paw'n Buangi thil sawi kha ka hrechhuak leh ṭhin. Dar 9 rik hma deuh chuan U Kaia thil min chah pek pahin tiin ka chhuahsan ta a, Terini chu a titau lek lek mai. Mahse, Buangi thusawi ngaihthlak ka châk tlat tawh a ni. 

Pu Ramtea te in ka va thlen chuan an nupain damlo an lo kan daih a, U kaia te nupa leh Buangi an lo awm a, an tlangval hi khuaah a awm ngai meuh lo a niang, ka hmu khât khawp mai. Min lo be nghal bawrh bawrh a, U kaia chu ka chempui hawn ka han pek chuan a en uluk ngang mai. "Ka duhzawng tak a nih hi, ka chem pakhat zawk saw tah rei a ngai tawh lutuk a..a lawmawm e, engzat man nge?" A tih chuan, "Tikhan ka lo hawnsak ve che a ni mai" ka lo ti thuai a. An nupain ṭul lo an ti viau naa, ka laksak duh bik miau loh avangin lawmthu min hrilh sek mai. Buangi thingpui lum kan in laiin u Kaia chuan, "Zirtawpniah ka pu Zaua te vau-a sih ka zuk chang teh ang ka tia, lo kal ve ta che" a ti ta hlauh mai a. A hma pawha ka zui châk kha a ni bawk a, ka aw rang kher mai. 

An nuin, "Ka putea silai i hawh dawn nia, a ui lo lutuk" a lo ti vat a. An bengvar chhungkua ngawt mai. Buangi erawh han titi ve luam mah se; a mitmeng a thutak riau mai a, a thil sawi tur vangte pawh a ni maithei. U Kaia te fa tê ber a nawmsam meuh loh avangin an nu chuan a mutpui ta a, U Kaia pawh chuan a farnu a awm ve reng vang nge, "A la tlai chhe lo bawk a, Ramngaia te lui kal an lo haw tawh em ka va dak lawk" tih leh chhuah a rual ta a. A remchang ta phian e. 

Buangi thingpui no sil rak rak thawm ngaihthlak pahin Terini msg ka chhiar a, "I la haw lo mi? Leng rei suh aw. U Buangi kha i rim ami?" Tih vel a ni. A thikthu hi tihchhiat a tum chho ve a ni maithei. 

"Ka haw ṭêp, u Kaia nen kan la inkawm" tiin ka reply a. 

Buangi chu ka hmazawn ṭhutthleng seiah chuan a rawn ṭhu a. Chhuat lam a melh ran mai. A pa te an lo haw mai ka hlauh avangin, "Terini vel chu sawi tawh la" ka ti ta a. A aw a thian kharh a, ngawi leh datin, "Ka ṭhiannu Ngûr khua ami Vani hi Singapore-a reitak han awm ve tho a nia, amah aṭanga ka hriat ve tho a nia. Terini hetitaka a che thei leh in te hial a din theih chhan hi chu a awmna pa nen nupa ang thawthangin an awm a tia, chu pa chu putar hausa deuh a nia, a hlawh bakah bonus a dawng ziah a tia, tin, an agency lama an hruaitute sawi pawh a hlawh viau a niawm e. Tuna a awm tawh loh chhan pawh a awmna pa faten an hnawtchhuak a tia..chung vel chu mawle..nakinah midang ka aṭanga i hriat chuan i na dawn a,." A ti ta mawlh mawlh a. Ka chil ka lem khawlh ringawt. 

"Singapore te chu a him viau a ni lawm ni?" Ka tih chuan, "Nia, kei pawh a him hlein ka hria a. Mahse, tianga sawi tur tawk hi an lo awm ve zel aniang, bakah chutin in chhunga an awmdan an va hre kîlh kêlh lo va" a ti ve mai bawk. 

"I ṭhiannu chuan dâwt a lo sawi ve te pawh a ni thei tho asin" ka ti leh hram. 

"I va duh tawh awm êm êm, a tleirawl chhuah tirh pawn sawi a kai hat tawh alawm. Keini aiin an nau deuh a, mahse, tun hnuah a inthup theih bakah Kohhran te an bêl leh a, an hmingchhe lo mai mai alawm" a ti leh ta zel a. Buangi chuan dâwt sawi hmel a pu si lo. Zoa te leh Baby ten Terini chu an fak hle bawk si, ngaihtuah dan tak pawh ka hre lo ve a. 

"Hetia ka hrilh che avang hian ka thîk emaw te kha i lo ti rawk ang e..pasal nei mai tur ka nih hi, Kan ina i lo awm tawh bakah chhungkhat anga ka ngaih vang che a nia" a ti leh zung zung a. Ni dawn tak, Buangi hi thla thar maia pasal nei tur a ni tih ka lo la sawi lo tak a, Hetah Zopui khaw tui liak tho, Primary School teacher pathlawi ti ila a nupuiin a boralsan tak, fa pakhat nei a ni a. A fel viau, Buangi tak pawh a lawmpuiawm, Thingtlangah phei chuan sawrkar hnathawkte hi an to lo thei lo ve bawk a. Fela nen chuan a kawmte pawh kan inkawm thei fû.

Ka nui hawk a, "Chutiang rilru ka pu teuh lo mai. Nia, ka lo inngaihtuah dawn nia, a duh thuah chuan ka duh huam lo" ka tih mêk laiin Pu Ramtea leh Nu Mawii te an lo lut a. Min rawn be nghal chûl mai, ka nu a ziaawm thu ka sawi chuan, "Kan lo ṭawngṭaipui ve reng alawm. A lawmawm nasat chu" Pu Ramtea chuan a ti chuar chuar a. U Kaia a rawn haw ta bawk nen, phei mai ka tum laiin, U Kaia chuan, "Dikzuali te nufa tak hi chu aw. Ramthara reng reng pawh hi, Sangpuii te unau an hnawtchhuak leh ringawt a nih awm kha. A pute inah an riak dawn a niang. A rawn ṭap lut fap fap mai a, an lainatawm unau tak tak a ni" a tih ri chuan din ka tum tawh chu min ṭhulhtir leh rih a. Buangi chuan, "U Ramngaia te inah maw an riah dawn?" A lo ti var a. 

"Aw ni mai ang chu. An lui kal lah chu an hlawhtling phian a, saw fun khat ka rawn hawn saw, zingah a man in va pe dawn nia, sangha ei a châkawm..Ehe! Sangzuala hi rawn lakkep nachang ka hre miah lo. I ei ve châk awm nen" a ti hluai a. 

Nu Mawii chuan, "Aw..kan ta tur i rawn lak saw hawn se la, zingah Ramngaia faten min rawn pe leh se a ni mai alawm, kan inhlat lo êm mai, Sangpuii te unau chu engtizia lehpek nge mawni le?" A lo ti bawrh bawrh a. 

"Sangha ei chu a châkawm ve reng, hawn pahin an in min hrilh ula ka peng phei mai dawn alawm. " Ka lo ti var a, Muansangzuali ka hmuh duh vang a ni pakhat. 

U Kaia bawk chuan, "Ka call mai dawn alawm, kan ta tur saw hawn rawh. Sangpuii te unau rawn ṭap lut nen, an la buai nuai ang. Ramngaia pawh a thinrim ve viau kha, 'Tun ṭum zawng ka ngawi mai mai tawh lovang' a tih kha. Dikzuali suahsual leh Ramthara zu ngawlvei vang a ni leh êm êm ang, Tleipuia kha chuan, 'Apain a û a kek vak a, A zirlaibu kha miss Puii'n a lo leisak a, chu chu a thinrim ' a ti mai a. A zah pawh saw a zak lo mawni, fate zirlaibu pawh leisak nachang hre lo" a ti tûn tûn a. A thinrim hmel angreng. Thudang an sawi kai takah chuan a lo tlai ve tawh bawk nen, hawn lam ka hnaih ta a. Sangpuii pute in chu ka la hre chiah lo naa ka zawng rilru deuh, mahse, ka zawn ang pawh chu ka hmu lem hlei lo va. 

Terini kha Buangi nen kan titi lai khan ka mangṭha tawh a, haw tawh angah min ngai ngei ang. Mi thusawi ring nghal chawt chi ka ni lo nângin, Buangi'n thutak zeta min hrilh takah chuan dâwt vek a nih sen ka ring bîk lo. Chuvang chu nimaw Terini chu ka tui lo chho deuh ringawt. Mipa hi zawng kan mak nge kan tenawm ka ti zawk dawn, mahni fihlim mang si lo hian kan duhtui ve phian zel a, mi chûl hnu lo rih te chu tlawmah kan han la ve khanglang a. Kan sual ngawt mai. 

A tukah harhvâng takin School ka kal a, Tleipuia lehkhabu ka leisak kha ka keng bawk. An unau tan hian ruahmanna eng emaw chu la siamsak an ngai tlata hriatna ka nei. Ka mawhphurhna an nih loh tehlul nen, ka lo inrawlh ve sek a, ka zak leh deuh ṭhin. Office aṭangin Higher section lam chu ka melh zauh zauh reng a. Sangpuii hmel reng reng hmuh tur a awm lo. Tleipuia pawh ka hmu chuang lo. Chhun chawlh laiin Thana'n, "Taka! Sir Sangzual, monday khan Sangpuii'n lehkhabu a rawn dah a, a nauin a hawhsak che niawm tak a ni" tiin a dawhkan ami chu min kawhhmuh a. Library-ah an la dah lo a nih dawn chu. Hawn pahin ka dah mai aniang chu. Terini nen kan inbe lumlâm vak lo, a buai ve deuh a niang. Buangi thusawi kha tak tak a nih chuan Terini nen chuan kan kal thui hmaa kal hran ka duh a, mahse, tak tak a nih leh nih loh ka hrechiang bîk si lo. Chutia a pâwng ataka mi thusawi lo khûkpui chiama Terini han ṭhen rup rup chu ka hreh ve tumhrang bawk si. Awmdan a lâi ru riau. Banah ka va insu zuai a, a tam lem lo bawk a, ka zo thuai mai. Ka insûk zawh tawh dawn lamah thlanmual lamah ngik feih feih thawm ka hre ta a. Ka hawi kual nghal vut. 

Rin dan ka nei sa naa ka ring ngam lutuk lo tho. Ani kha chu zan lamah a kal ṭhin si a. Ka'n ngaithla chiang deuh a, zawitêa phun sêp sep thawm niawm tak leh insût leh hraih ṭhin niin a lang. Tuikhur chu hêlin thlanmual lam chu ka pan chho leh ta a. Mahse, tumah ka han hmu miah lo nia! A va mak dawn ve aw. Hrilhhai zetin ka chhuk leh ta hnû hnû a. Tuikhur ka thlena ka bucket ka khai kan rual chiahin a rawn ri leh ta. Tlai dar 4:05 chiah chiah a ni. A tu tak chu ni ang maw? Min fiam mai mai a niang ti rilru chungin ka kal ta daih a. Ka ngaihtuah zui hran lo. Rawng ka bawl zui nghal a, Ka nu nen kan inbe pah bawk. Muansangzuali te unau bawk chu ka sawi leh a, a nau awmna tur a duh thu te ka sawi chuan, "Hetah i nau nen khawhar êm êmin kan awm a, lo awm daih se la a ni mai lawm, Ani zirna tur lek zawng i nau pawn a thawkchhuak ve tawh lutuk alawm" a ti awlsam êt a. An chhungkaw dinhmun ka lo zirchian tur thu leh Sangpuii pawh ka lo biak tur thu sawiin ka dah ta rih a. Fahrah chu ni chiah lo mah ila, pa tel lova reitak kan lo khawsak tawh vang nge keini unau anga chavai ka hmuh hian kei pawn rilru dang ka pu hleithei meuh bîk lo a ni. Len a hun tawh hnu pawh chuan ka la tluzâl vel mai mai a, Terini call ka dawng ta chiah bawk. 

"Lo len i tum lo mi?" A rawn ti nghal zat a. 

"Tum loh pawh a awm lo, ka buai ve deuh a" ka ti ringawt. 

"Hmm, rawn sawi ve ṭhin ta che, Aizawla i haw aṭang hian i dang tlat" a'n ti nghal ngei ah. Ka ner suk mai. 

"Awihawm loh, ka lo kal ṭêp..hei School thil ka la khawih a" ka ti zung zung a. Ani pawn a dah ve nghal. Eng pawh nise, ka bialnu a ni a, hetia tawpsan ngawt chu a pa lo deuh tihna rilru nen, thudik te pawh hriat dan a la awm maithei asin tih beisei bawkin Terini rim tur chuan ka chhuak leh ta nge nge a. Zoa te in ka kalpelh hnu lawk, leiminna zawn ka thlen chuan thlang lam in lang thei hmasa ber zawna min tawk zawnga tu emaw lo chho chu ka zuk hmu ral ral a. Zoa hi an huan lam an ṭul deuh vangin kartir lamah khan a lo riak daih a lo nia. Sawi tawh angin Zoa te leh pu Zawma te bak hi kan vengah in a awm lo va, Zoa te ṭhenawm hnai ber chu a thlang School pêng bula in awm chu a ni leh mai. Chuvang chuan Zoa te leh Pu Zawma te hi chhungkhatah an innei ve reng reng a ni. Zial ṭanin ka zu hlat hlat a, a thim deuh lek lek avangin flash light ka on bawk. Min tawk zawnga rawn chho nul nul kha in awmna ka thlen thleng pawn tawh tik ka nei ta reng reng lo mai a! A rawn êng chho ve pap pap kha a ni sia, khawi laiah mah pen kawina tur kawng pêng a awm lo hrim hrim. Mahse, chutin ngaihṭhat lohna ka nei hran lo. 

Terini te in ka zu thleng thla chu kekawr bul chhing angreng tak hain a ke tin a lo hnawih mêk a, a ngo ve bawk nen, a tuihnai kher mai. Mahse, ka luh rual deuhthawa Diki rawn lut avang chuan ka mood a inthlak nghal hmiah. A hnungah a pasal niawm takin a rawn zui a, zu rim a nam thur thur bawk. Terini pa Pu Thanga ar chaw hmet mêk chu ṭhutchilh nghalin, "Ka pa, Sangteii te unau chu min va kohsak mai teh. Ramngaia te nupain ka phal lo ve an ti ve khanglang a, a hma zawnga enkawl duh tawp si lo" Diki chuan a ti leh buan buan a. An pa erawh a zum dûk hian a lang. Pu Thanga chuan muangchang hian, "In duh lo va in hnawtchhuak a ni lawm ni? Ngati nge koh leh in tum?" A lo ti hmiah mai. 

Chuveleh Terini nu Nu Sawmi'n, "A mak! Nang lah hi, fate nen chuan innghirngho chang a awm lo thei lo alawm, Sangteii te unau hetia an chhuahte chuan Diki bawk asin mualpho dawn. Thara, nang pawh zu hi nghei hmak rawh, nangmah vang vek a nih hi" a lo ti tâwn tâwn a. A awrawl chu mak ka ti deuh, min biak chânga a aw nêm leh dam deuh ang kha a ni tawh teuh lo. 

Sangpuii pa, Pu Ramthara chu a la upa vak lo ang, mahse, zu a in nasat vang nge a lang chul rup mai a, han en mai pawn zu seh a ni tih a hriat ngawih ngawih. A aw a thian khurh a, "Nia, in tawh loh ka tum alawm,. Ka fate hnenah pawh ngaihdam ka dil ang. Kimi a dam ṭha bawk si lo, Sangteii tel lo chuan kan buai lutuk a. Min va tlawmngaihsak hram u la a lawmawm viau ang" a ti thâm ṭûak a. Muansangzuali khan a nu a chhun a nih ka ring, a pa nen inanna an nei vakin ka hre lo. 

Terini chuan, "Tihian in buai apiangin min rawn chawk buai ve vek zel a, a ninawm zozai tawh. Insiamṭha r'u,." A lo ti ve a. Pu Thanga pawh an nuin a nawr nasa bawk nen, an nupa chuan Muansangzuali te unau ko tur chuan an kal ta a. Diki nu te leh Terini nute unau an ni bawk a, an intihṭhat hmel khawp mai. 

Pu Ramthara, ka û rual vel lek ni mai awm chuan, " Sir Sangzuala chu, Bawihpuia i lehkhabute i lo hawhtir a, i tilawmawm hle mai" tiin min rawn melh zauh a. Diki leh Terini mitmengah mak tihna a lang zawk. 

Nui chungin, "A ho êm mai, a chhiar duh phawt chuan ka lo hawhtir zel ang. Lehkhabu chhiar tam hi a ṭha a nia" ka lo ti ve mai a. 

Diki chuan, "Sir, Pi Tlani te in hnuaiah khan tiraw i awm tak kha" a lo ti nem duai a. Ka bu nghut ringawt. 

"Kan fate hi zawng a buaithlak a nih hi, tuna an chhuah nachhan pawh engdang a ni lo. A pa hian, "Ti nge i zirlaibute chu in miss i lo leitir, a mualpho zawng hian min chhuah ziah mai a" tia a han khak kha a ngai haw ta êm êm ringawt a, kei phei chuan a pa ka hau zawk a nia" hrilh bîk pawh nei hran lo chuan a ti leh mawlh mawlh a. A ze inthlak rang lutuk avang chuan nu rilru tluang leh nghet tak zawng niin ka ngai thei lo. An pa erawh a ngawi reng thung. Terini thingpui lum laiin a nute pawh an rawn haw ve a. Pi Siami chu a rawn âng lut nghal bawrh bawrh. 

"Ramngaia zet zawt saw alawm, "Tihduhdahna tuar reng turin ka tute ka phal lo" a lo ti vel a, an ni unau lahin hawn an tum lo bur bawk si, kan rawn hlawhchham" a tih rual rual chuan, Diki ze diktak a lang leh ta. A ling ta phat mai, "Khanglang chuan, an tet lai a nu boral hnua ka enkawl lai zawng zawngin ka ui ka ar an rawn ti ngai lo, tunah an tha chhawr theih a nih veleha ka enkawl ang te lo tih kual vel, ngawi tak rawh u, ka va luhkhung ang e. Muansangzuali têreuh pawh ka va hnuk haw ang e, zahpuiawm unau lutuk" a ti ta hlawih hlawih mai. 

Pu Thanga'n, "Insûm teh, ri nghal buan buan zel suh. A dik tak chuan Sangpuii te unau in enkawl dan hi mi ten an hai hleinem, chhungkhat kan nia, in thlavâng kan hauh lo thei lo va, a zahte pawh zahthlak tak a ni. " A lo ti ve ta hmak hmak a. Ka ṭan ru angreng hle. 

Pu Thara chuan zaidam deuh hian, "Ka thiam loh vek a nia, keiman ka va hmu ang e, pa te awm ve renga mi dang ina awm te chu a thangtlawmthlak lutuk" tih leh thawh a rual a. Diki'n, "Rawn hruai haw ngei ngei ang che. Nangmah vang zel hi a nia, chet ka peih tawh teuh lo a nia, Kimi lah a dam ṭha si lo" a tih zui buan buan pawh chu hre lo ang maiin hmanhmawh zetin a chhuak ta a. Kan boruak chutiang teh hrep a nih vang chuan len pawh a nuam thei lo. Terini te lahin Diki te hlir an ṭan si. 

"Muansangzuali pawh hi a thak ve ṭan a, khuahkhirhna hnuaiah a awm peih tawp nang, tisawn a pute bula a awm te chuan a zalên ang a, nuam a ti viau ang chu..a rai har miah lo vang" Terini ṭawng duh dan chuan ka thin a khei zak mai a, mahse, lo ṭawng vena chi a ni mang si lo. A pain a rawn khap ta hlauh a, Pu Thanga hi chuan rilru tluang tak a puin ka hria, amah a zopain a dam ruih mai bawk nen, an nu nen an zia a inang lo hle a ni. 

Thingpui in zawhah, "Naktuk thawh hma ka ngai a, ka han haw ve tawh ang e" tiin chhuanlam ka siam ta tawp a. Min chelh bik lo. Nuam a ti bîk lo a niang. Ka haw chhoh mêk laiin current a rawn thim a, thla a êng tehchiam lo nen, phone flash light ka on vat. Thli lah chu a rawn thaw nghal vûk vûk a, a eng emawti nawm loh riau. Mahse, sawi tawh angin mihring tih loh ramsa an nih ngawt loh chuan hlauh nei lo inti ve ngam ka nihna chuan min uap bawk a, chak zetin ka kal fua fua mai. Ka vannei ka ti dawn nge Zoa patea an ina awm ve leng haw nen kan haw rual ta hlauh a, pa ṭawng tlem tak a ni naa kan titi tui ve phian. 

Ka muhil tui leh ngang mai. Zinga ka harh rualin tlai lamah u Kaia nen sih châng turin kan ramvâk dawn tih ka ngaihtuah chhuak nghal a. Ka khi vur vur mai. Ka nu chu awm se a remti leh kher lo vang. Chaw ka ei sawk sawk a, School lamah ka liam chho leh nghal. Vawiin chu chawhnu lamah ball kan bêng leh a, Muansangzuali ka la hmu ta chuang lo. A nau pawh chuti tho chu. An la buai rih deuh vang a ni mahna. Kan ramvah turin min luah hneh bawk a, ka ngaihtuah zui vak lo. Terini bulah kan ramvah tur thu ka sawi chuan, "In zuk chesual vel ang e aw. Ka nu vaihlo zial ka lo pai ang che, lo pêng kawi la aw" a rawn ti. A care hi chu min care ve reng mawle. Ban rualin ka insiam nghal sawk sawk a, Chaw fun tur ka chhum nghal bawk. U Kaia'n , "Hmanhmawh uchuak a ngai lo a nia" ti mah se; ka che reng reng chu ka ti zung zung a ni ber, phur vang ni tak ang maw. Chaw ka fun a, iptepui, Zoa nu min ṭhuisak akin chemtum ka ak tel bawk a. Faifûk rût rût chungin ka in ka chhuahsan ta a. Terini te inah pêng kâwiin vaihlo zial tam ve deuh mai chu min pai a, "Fimkhur la aw" a ti sap bawk. Kiai sakin ka kalsan ta a. U Kaia pawh a lo inpeih thawkhat, ka silai hman tur pawh min lo laksak diam tawh a. Ka han tin vel chhin a, Darlâwna ka zin chang hian ka pu silai upa ve tawh tak hi hawl chhuah ka ching ve ṭhin a. Air gun te pawh ṭhiante ta hawhsakin Vahrit pawh ka kap ve ngei tawh. Ka kut a hmui tehchiam lo aniang, ka chhuah tam ngaihtuahin tihtham ka kap ve mang lo. 

U Kaia nen chuan kan inzui ta hnak hnak a, Pu Zaua te lo chu khua aṭanga mel 3 vel a niawm e. Ka rin aiin a hla lo zawk. Thlâm kan thlen chuan khua a thim fel tawh a. Chaw kan bar dun hlek tawh bawk a, ril a ṭam rih lem lo. Thlâmah zialte zua reitawk fang kan ṭhut hnuah an vau sih lam pan chuan kan inzui thla leh a, chân khân remchang a hre khawp mai. Kei pawh rem takin ka ṭhu rân a. Dar 9 a ri lek lek tawh, ka pum pawh a rawn ri ruk ruk ṭan. Mahse, eng han sawina chi ni hek lo. Kan sa chân chu kan nghak ta ngawt ngawt a. Dar 10-ah pawh a lo la chhuah loh chuan kan hawsan dawn nia a tih sa avangin mawng a za sek tawh. Chutah leh thawm kan hre ta. Kan hnuai lawka sih tui tlan tur niawm tak ke pen thawm ngei a ni. Lungphû a rang duh kher mai. U Kaia'n chet a lak phawt loh chuan ka ti khawlo zo ang tih ka hlauh avangin chet ka la ngam lo. Tui dâwt ri khalh thawm niawm takte chu ka hre ta a, phur namên loin ka phur tawh. U Kaia lah chu a hmanhmawh lo ka ti takzet. Chutah le U Kaia chuan a sihdêt cell 3 ngei mai chuan sih tui tlan mêk chu a zuk ên ta pup mai a, Chu ramsa pawh chuan êng lam chu a hawi ve nghal vat. Min hnungchhawn zawnga a din avangin a hmai ka zuk hmu ve thei lo va, a pianhmang erawh ui lian tâwk tak tiah vel ni maiin ka hria, Sihal lian ṭha ve pangngai tak nen a inang zawk awm mah e. U Kaia silai chuan thawm a chhuah ta hauh lo mai, ka silaia ka tin rual chuan, U Kaia aw hian, "Kap suh. Haw ang" a rawn ti ta mai. Ka phu zawk mai, chutihrual chiah chuan chu ramsa chuan van lam hawiin maksak deuh tak hian awrâwl a'n chhuah ta mai a! Ka hmulthî a ding nghal ur ur thei nia..a mak êm a ni.