ka savate 20

KA SAVATÊ (20)

Ziaktu : Toni Râlte

Heleni lah chu a reh ta veng veng a. Mahse, a la tlai chhe lem lo bawk a, ka hmanhmawh khu ruai duh hran lo. Hriatpuia te inah ka peng thla a, Mapuii a lo awm. "Pu Zira ten hmanhmawhthlak deuhin thing an lo thliartir leh sia, thlan pawh a rawn lai hman ta lo a nih kha. Tunah khaw nge a kal ka hre miah lo" a ti a. Ka chhuak leh nghal daih. Kalkawngah chuan ka zawng ru deuh naa ka hmu ta chuang lo. U Kaia te ina pen ka tum chuan Julie ka va hmu a, ka let leh nal nal. Mi in min dem bel a vang hian ka hmu hne a ni mahna, ka sual ve khawp mai. Mahse, thil palluiha tawruih vel hi ka peih lo. Mi ka huat paw'n hnaih loh tawp mai ka thlang, a langa biak ṭhat dera nuih kual vel kha ka zaidamna hian a tlin ṭhin lo. Zoa'n an kawt hnim a lo sam fai a. 

"Min rawn sawm tur che nia" a ti lûng lûng a. 

Nuih huk pahin, "I hnâr tui suk sûk em mai a. Ka kaitho duh ta lo che a nih kha" ka ti a. Ka ding ve dat bawk. Zawi sup hian, "Zanriah ei kham veleh rawn phei lawk rawh aw. Pawimawh a awm" ka ti a. A bu ve nghut mai. Ka pheisan ta rih a. Eirawngbâwl a ngai lo va, a zia e. Recorder kha ka bih zauh a, a lo la bet ran. Engtika lak nge maw an tum le..helham nei ṭûn chungin ka inbual sar sar a. Ka mut kham loh vanga ka mit thial leh ka lu ni deuh bûr te pawh a zia ta hawk e. Sana ka bih sek reng mai a, Heleni chu call mai ka duh ta. Ka call ta a. 

"An motor hman tur a lo la thleng lo va. Kan inah ka la awm rih. "A rawn ti a. 

"Diki chuan a la veng run em ni?" Ka tih chuan, "Ka hre bîk lo. Ka phei leh daih tawh sia. E lawk, Saw Tleipuia a lo kal , ka'n zawt lawk ang e" tih pahin Tleipuia a ko lâng lâng a. 

"Engtikah nge in kal dawn?" A tih ri chu ka hre thei, Tleipuia chhanna erawh ka hre chiang thei lo, a ri nuai nuai bawk nen. A hnu lawkah ,"Zanriah ei khamah law law an kal dawn a nih chu.." a rawn ti ta a. Ka che deuh lawih. Ka rilrua ka lo zeldinna kawng chu a la inzam fuh zel e. Thil phurawm zawk zawk a ni hran lo va, mahse, loh theih loh avanga ti tur ka ni. Zêla ka be leh nghal zat. Mahse, pâwnah ka chhuak daih, Recorder kha a la awm si a. 

"Ka rin dan ang khan thil a la kal zel e. Biak theih khan lo awm reng la aw" ngamtlak zet hian ka ti a. Kei aiin a û awrh bawk a, ka û duh bîk lo, mahse, a hna leh nihna avang chuan ka zah ve tho. Ani pawh chuan, "Aw le, ka lo ngaichâng ran ang che u" a ti ve bawk a. 

Dar 6 rik hma deuhin zanriah chu ka ei ta a. Nu Zaii'n dawlzîk bai min rawn suah a, tui ka ti si, mahse, Râlte tih takah ka hrawk a thak leh ringawt tawh. 'Râlte hrawk thak' an tih ang deuh hian, heng telhawng, bâl leh dawl, baibing tih vel hi tui ti viau mah ila; ka ei tam ve thei dêr lo. Puar takin ka ei a. Ka insengfela ka insil zawh vek hnuah hahdam zetin zial ka zu ta hlat hlat a. Dar 6:24 a ri ta. An chhuak tawh ang em aw? An chhuah ruala min lo be nghal tur khan Heleni kha ka chah kha a nia. A pawimawhzia a hrechiang a, a lo thlithlai ve reng ka ring. Zoa a rawn lut ta a. Ani pawh a hmelhmaiah mawlhtu nei rûn hmel a pu. A ṭhut rual rualin, "Eng thil…" a ti chiah chu ka lo khap vat. Ani pawn a hrethiam ve nghal ni tur a ni, "Eng thil nge nichina puak dup kha" a ti ta daih a. 

"Ka hre lo, bomb an vawm a niang, nih loh pawn silai an kap a niang" ka lo ti vat. Ka in panna stepa rawn pen thla thlep thlep thawm avangin kan ngawi a. Kawngka ka kalh lo bawk a, Baby a rawn lut a. 

"Zanin kal in tum em? " Tih pahin Recorder an vawmbeina ṭhutthlengah chuan a ṭhu nghal a. 

"Nizan ka tlaivar kha ka muthlu ve si lo va, thlan ka lai leh bawk nen, kal pawh ka lo tum chiah lo. " Ka lo ti a. 

Zoa pawh chuan, "Thlengi ruhseh a chhuak leh a, kei pawh ka zuk ngaihven loh chuan" a lo ti ve vut. 

Baby chuan,"Thlengi hi i ti ṭuah hum reng mai a! Nang aiin a upa a ni lawm ni?" Tiin Zoa a melh ralh a. 

"A ho êm mai, kumte chu number an tih kha.." Zoa chuan awki sâng lek lek hian a lo ti a, a lungawi lo hran lo tih erawh a nuih sûng danah a hriat. 

"Thingpui hâng ka in châk tlat..in duh ve em?" Tiin ka tho hluai a. Baby chu chance pek vata chhohtir vat ka duh a ni ber. Ka rilru a hmanhmawh tawh si a. 

An duh ve ve avang chuan no thum ka lum a. Ka phone hmet mual mualin gas bulah ka ding a, "Zoa, lo en lawk, enteh, hei hi lawm la ve rawh ka tih chu, huana feh nan pawh a ṭangkai dawn. In huan kawng an laih zawh chuan nuamsain i kal thei tawh ang a" tiin engmah awm lo napui chu ka hmet kual a, Zoa chuan ka rilru hrethiam takin ka phone chu a rawn bih ve a, " A to awm êm mai" tih pahin tuidehna lam a hawi a, "Ka kuhva ei chu a..a al deuh a ni" tih lehin a kâm a ṭhuah rawk rawk. Kei pawh inherin gas ka off ve zat. Chulai kan hnungchhawn lai tak chuan Baby chuan an thil tê reuhtê kha a lo puanhnuai hman ka beisei. An ngaihthlak hunah an thinrim loh paw'n an hrilhhai ve viau ta ve ang. Thingpui hâng ka thlit dawn lai chuan, Baby chuan,"Ka in leh lo mai teh ang. In kal dawn loh ve ve chuan ka han insiam ang a, ka pa rualin ka kal mai ang" tih pahin a tho ta nalh a. Zoa nen inman zetin kan inmelh ralh. A chhuah hnuah inthurual ang hrimin kan la nui huk zui! Kan beisei ang ngeiin recorder chu a lo awm tawh lo. 

Heleni call a lo thleng ta. "An chhuak chiah aw. Sangpuii chu a titau emaw a ṭap a niang, mi pawh a bye bye lo, ka hmu hman lo hmuh pawh" a rawn ti a. 

"Eng motorin nge an kal a" ka ti vat. 

"Eco van, pu Zolawma te ta kha" a rawn ti ve zat a. 

"Leni, tikha chuan engmah ngaihven a ngai tawh lo. I pindanah lut la, lehkha zir tawh rawh. I fel lutuk a nia" ka ti zung zung a. A rawn nui leh chiam. Nuih lah hi a heh reuh siah. 

Thingpui kan in zo ta a. "A hma lama kan chhuk loh chuan kan risk fuh nge fuh lo kan hre dawn si lo va. Chhuk teh ang" ka ti a. Thil awmzia engmah ka la hrilhchian loh avangin a hawi â deuh. "Kan chhuk ang a, i hrethiam mai ang" ka ti a. A tho ve mai. Hmanhmawh over si lo, muangchang lutuk si loin Venglai pan chuan kan tlan thla ta a. Vengthar pengah chuan ka ding dat a, mahse ,ngaihtuahna dang nei lehin Pu Ramtea te in lam kan pan leh phawt. Zoa chuan mak a ti tawh hle tih ka hrethiam, mahse, hun ka tih hunah ka hrilhfiah mai ang. Pu Ramtea te nupa chu khawhar inah an lo kal a. U Kaia pawh ka hmu lo. Mahse, ka buai lo. Zuai chuan thingpui min lum a tum naa , ka hnial ta rih. Zoa signal zauhin kein vengthar lam chu kan pan ta a. 

"Eng nge kan tih dawn?" Zoa chuan lâwm loh hmel lek lek hian a ti a. Ka ngeiawm ve bawk ang, engmah ka sawi duh bawk si lo. Hun ka la tih loh vang pawh a ni lo, remchâng a awm leh tawh rih lo a ni. Heleni te in kan thlen chuan ka ding deuh naa, ka tiphâwklêk ang tih ka hlauh avangin Muansangzuali te in lam ka pan leh nghal. Min zui ve dat dat reng a, sangpuii te in chu a lo thim ṭhap mai. A reh vawng vawng bawk. Khawhar in lam zai thawm pawh a ṭha viau e. Kawngka bulah chuan ka ding ran a. Zoa erawh an kawta tuizêm bulah a lo ding thung. Tala lian tâwk takin a inkalh bur mai a, thawm ngaichângin ka ding vang vang. Eng thawm mah ka hre lo. Mahse, ka thluak leh thinlungin min hrilh hi ka ring tâwk. Zoa dinnaah ka va kal leh a, "Kawmthlang lamah chhuk ang" ka ti sup a. Phâwk zeta min melhin, "Eng nge maw i hriat le?" A ti sup. Ka khi ṭhâw a. Dawhthei deuh se ka ti khawp mai. Ka chhukpui ta tho a, an kawmthlang hi a sang lem lo va, Sangpuii a zuanthlak pawh khan hliam engmah a neih loh kha. Savatê pindan zâwnah chuan ka ding a, ka han thlêk chho vang vang a. Ka kekawr iptêa ka ah ka phone a rawn nghawr dawt dawt. U Kaia a lo nia. 

Ka la ta vat a.

"A rawn chhuak chiah e." A rawn ti sup a.

"Rawn lehkhalh rawh aw. " Ka ti ve nghut a. 

"Aw kawng hnuai atangin ka rawn kal dawn e. " A rawn ti a. A dah nghal. Hmanhmawh a ngai tih ka hai lo. Mahse, lehlamah veivak an la awm ve nak nak a, khawhar ina la kal chauh turte ṭawng nak nak thawm pawh kan la hria, chuvang chuan hmanhmawh luatah kan chesual ang tih ka hlau tho a. Fimkhur chu ṭha ka ti. 

"Zoa, i kokiah ka chuan a ngai, tukverh aṭang khian in chhunga ka luh a ngai" ka ti thuai thuai a. A hrilhhai letling tawh zawk. Mahse, "Hmanhmawhin ka ṭhian" ka ti leh a. A ṭhu hniam ta nghal a. Kei pawh a kokiah chuan rapin min zo bawk a, ka han din mar chuan tukverh chu ka han ban pha ta. "I ding hlek thei ang em?" Ka ti sa sa a. Ngawi rengin a ding ta a, ban a chelh pah bawk. Parda an zar avangin in chhung a hmuh theih loh. Mahse, thawm ka hre thei ta. Thei leh thei lo va ke hrût thawm a ni. Ka thaw kâwk a. Ka tha a khur der der..tukverh darthlalang chu inngaihtuah lawk miah lovin ka hnek keh ta rawp a. Thawm ngaichângin ka ngawi leh vang vang. Ka darthlalang hnek thawm chu tu'n an hre lo nge eng mah thil danglam a thleng ta lo bawk a, tukverh kalhna hnuailam chu ka zuk pawt chho a. Mahse, chunglamah kalh a nih tho avangin thei leh thei lo vin Zoa kikoah chuan ka dingdihlîp a, hnuai lama U Kaia ṭawng sup thawm, "Ka lo vuan ang che" a tih ka hriat chuan ka thla a muang suai suai thei. Zoa hi a chak bakah a taksa hi a hlai a, hna a thawh reng tho avangin a fit viau bawk. Chuvang chuan ka dim duh vak lo. Tukverh chunglama darthlalang chu ka hneh keh leh ta a. An in bul chiaha ṭawng ri niawm tak ka hriat avangin thâwk pawh thaw ṭha ngam loin ka ngawi leh hle hle a. 1 min hnu velah tukverh kalhna chu ka hawng leh ta a. Ka hawng thei ta. 

In chhung chu a thim vek a. Thla êngin a chhun lohna lam a ni kher bawk si, ka phone phawrh vatin flash light ka on ta a. Ka beisei ang tak va hmu mah ila, a mi nghawng dan erawh a dang tho mai. Khum mawng lam ban rinchhana an phuarbeh hmeichia, a ka an plaster vekin hlauthawng leh thlabâr tih hriat ngawih ngawiha min rawn en chuan ka thinlung a na nghal vawng vawng thei nia! Mahse, keimah ka ni tih a hria nge, a mitmenga hlauhna chambâng zawng zawngte chu vawmbo ang duak an ni. 

"Lut vat teh, i rit ropui si" Zoa'n a rawn tih chuan ka harh zawk. A rang a rangin tukverh aṭang chuan Muansangzuali te unau pindanah chuan ka lut ta vat a. Light erawh ka la on ngam lo. U Kaia koki rinchhanin Zoa chu a rawn lawn chho ve zat a, Ukaia erawh hmanhmawh taka Sangpuii ka phelh zawhah an phuarna hruiin Zoa nen kan khai chho ta a. Kan kim a, nghah kan nei ta ṭhap mai. Sangpuii chuan eng emaw sawi a duh, ka la remti si lo. Kan ti nek nek a, dar 9 rik nan 5 mins a la awm tih velah chuan khawlai thawm pawh a reh ta dûk a. Kan mi nghah pawn tun hun reh lai tak hi remchângah a rawn hman ngei ka beisei tlat a ni. Zoa thil awmzia hre lo lah chu a phâwk hrû reng mai a, a mitmeng virzia chu ka hai lo. Ṭawng rik lûng lûngna chi a ni tawh der si lo. Thawm ri rak tak kan hre ta. Rang takin birukna kan zawng nghal a. Zoa chu Almira phênah a bet thlawp, UKaia erawh khum lu lama space awm hlekah chuan leng leh leng lovin a va inhnawh a. Kei pawh kawngka rawn inhawn ruala min hliah theih turin kawngka sîr ah ka va ding ta bawk. Muansangzuali erawh a ṭhutna ngaiah khan a ṭhu ran a. Phuar a ni tawh lo thung. 

Muansangzuali te kawngkapui chu a rawn inhawng ri ta rak a. Thawm chu a dim ve hle mai. Light pawh a on ngam bîk lo ni tur a ni. Flash light a hmang ve a, thawm dim êm êma penin Sangpuii te pindan kawngka chu a rawn hawng ta riai riai a. Kei pawh a hawn zawng khan kawngkhar chuan min hliah bo ta hmak. A rawn lut zel a, Muansangzuali lo ṭhu reng hmaah chuan a ding ta ran a. 

Sangpuii chuan, "Eng nge i duh?" A lo ti ban chhalh a. 

"Nangmah mawle" a ti sup. Chet lak mai ka duh tawh, pen chhuah ka tum rilruk lai takin tukverh kha kan lo khar leh loh bakah parda kha kan zar leh si lo, a va hmu ta mai. A va dâk thuai a, chu chu remchanga kan hman loh chuan a zuang chhuak thut ang tih hlauin ka theihtawpa chakin ka pen a, a rawn hawi let rualin ka bawh ta rawp a! Kan ri ta bawrh bawrh mai le. Savatê lah chu hmeichia e ti lo chuan thawm engmah zuk chhuak miah lo va..a fing ka ti mai. "Sangpui, light on rawh" ka ti vat a. A inring lo lai bawh ka nih avangin talchhuah chu a harsa ve det ang. U Kaia leh Zoa te an rawn lang ve ta bawk nen. Pindan chhung chu a rawn êng ta pup a.

Hriatpuia chuan, "A tawpa tâwpah chuan maw" a ti zawi ta raih a. Ka kai tho a, talchhuah pawh a tum lem lo niin ka hria., Mahse, fimkhur thuhlaah U Kaia chuan a phuar ta tho a, Zêla ka be nghal, "Kan kutah a awm tawh e.." ka ti a. 

"Lianpui aṭangin report ka dawng zo ve chiah e. I mi sawite kha an awm e." A rawn ti ve kalh a. An lo kal nghal tur thu sawiin kan dah ta rih a. Hriatpuia chu a ṭhu ngawi ran a, zâm hmel emaw han thlabar hmel emaw a pu lo hrim hrim. Engvangin nge a put ang? Mihring rukbo hmanga sumdawng ṭhin chuan thinphut zuk pawh a nei tawh nang.. he pa ka lo hrechiang har lutuk hian thil pawi a thlen ṭêp chu a nih hi..

Ni e, mak in ti em? Nizana Hriatpuia ka hruai hawna Terini'n a rawn biak aṭang khan ngaihdan hrang hrang ka nei ka tih tawh kha..Hriatpuia bulah ka awm tih a hriat vanga khatiang thu kha rawn sawi a nih rinna ka neih kha ka sawhsawn thei hlawl lo va, Zu ruih der thiam tak Hriatpuia'n min lo châng tih hriat taka kawngsir atanga min lo bia te, an ina hruai hawn emaw kan awmdun kha a ngai tlat! Tichuan, call a dawng a, amaha phone phawrh thei lo tur khawpa rui der thiam phone kha ka phawrhsak ta ngei a, hriatchian ka châk theih nan Terini kher kherin a rawn call bawk. An inbiakna chu hriat ka tum ru dawn tih an hre lâwk a, engkim kha plan a ni. An duh ang ngeiin pehhel ru si, ka hriatthiam theih tur siin Muansangzuali chungchang a rawn sawi ta chiah a nih kha. An ngaihdan chuan Ngûr khuaah inrukbona thleng tura ka ngaih an ring. An duhthusam a ni chiah bawk a. Ngûr khuaah kei hi va kal vea Sangpuii va venhim ka tum turah an ngai. Mahse, khatianga inbumna ṭhing leh lang tlang lutuka buaia chiâi mai mai chi ka ni bîk lo. Ka ngaihṭhat loh phah ta daih zawk rêng a. Ka duhdan ang zela thil kalin Heleni aṭangin khua an chhuahsan hun leh A ṭhiannu Sangpuii hmel a hmuh loh thu te, a bye bye loh vanga a vui rûk thu ka hriat aṭang khan tuna kan thil tawn mêk hi a thleng dawn tih ka man thiam nghal vek. Ngûr khuaa Sangpuii ka va venhim chhunga Zopui khuaa anmahni in ngei aṭanga ka savatê chu ruk chhuah an tum zawk tih kha..ni e, hei a chiang reng a ni lawm ni? 

Buai rûkna erawh ka la nei. Engtin nge Muansangzuali a kal ve lo hi Diki'n an pa bulah a sawi mâmsak dan tih hi..nge Sangpuii pa hian a hriatpuiin an pahnih remruatna zawk? Chu zawng kan hre thuai ang chu maw. A vawi khat nan ka ruahmanna a dik avangin ka nui suk mai. Hah pawh a dam huai huai e. Hriatpuia hi a tawhkhirh viau maithei, mahse, ar talh dan chi khat chauh a awm hleinem. A kâ zawng a âng ngei ang. Thil sawifiah tur leh puanchhuah tur an ngah tawh lutuk. Amah aṭangin a thurualpui te zawng zawng kan rût fai vek thei tawh ang a, Champhaia an hotu lû ber, ruahmanna engkim siamtu pawh kan hmachhawn thei tawh ang chu. 

Ṭhutkhawmna pindan lamah Hriatpuia chu kan kuah phei a. Luhlul hmel viau angin lang mah se; han tlanchhuah emaw tum dang nei ru âwm hmel a pu lem lo. Kan ṭhuttir fel hnu lawkah a phone chu a rawn ri ta a. 'Thansanga' tihin a rawn call..a mitah tak melhin, "I sawi tur chu i hria e. " ka ti charh charh a. A mitmengah engmah a lang lo. Phone chu a hmui bulah ka va dah ta a. 

Mipa aw thum lam hian, "Engkim a ṭha maw?" A rawn ti a. Hriatpuia chuan min rawn melh zauhin keiin ka lo buk khum thung. 

"Aw a ṭha e. In awm tawh em?a " a ti ta a. Lehlam ami chuan, "Aw..Khaw kawtchhuahah kan awm tawh e. " a rawn ti nghut a. Rinhlelh tur a hre lo nge a dah ve leh mai bawk a. Hriatpuia chu ka melh vang vang a, kan inkawm tirh aṭanga tun thleng pawh hian keima lamah demna tur ka hre vak lo. Ka laka a awmdan leh a thil sawi zawng zawngte kha ka ngaihtuah lêt paw'n huat tur awmin ka hre lo. Muansangzuali bialpa ka nih miau avangin tuna an ruahmannaah hi chuan ka tel lo thei lo mai zawk niin ka hria. 

Zawitê hian, "Le..ṭhianpa, mi nâwlpuiin an hriat zau hmain thudik chu puanchhuah a hun tawhin ka hria" ka ti sup a. Hnuailam a bih ran a. Sawi chhuak duh mai hmel pawh a pu lo. Mahse, a ka a ân zauh lai chuan kawtah motor a rawn inhung dawt, Parda keuin ka va bih zawk a, Police motor a ni tih ka hriat tâkah chuan ka thaw huai a. Kawngkapui chu ka hawng thuai a, Zêla leh constable pahnih hi an rawn lut ta a. 

"Engtin nge ni ang? Ani hi kan hruai nghal a va ngai âwm ve, a thurualpuite nen kan hmehmit nghal loh chuan" Zêla chuan a ti a.

"Nia, kha lam kha chu in tih dan dan aw. Mahse, thudik engkim hriat ve vek kan duh khawp mai. A bul aṭangin" ka lo ti vat a. 

Hriatpuia phone a rawn ri leh ta ral ral a. Ka lo laksak leh vat. Kima a ni. Kha sam khuihpial pa kha ..Hriatpuia hmui bulah ka dah leh nghal vat, "I va rei ve, buaina i tawk ami?" Kima hian a rawn ti a. 

"Tawk lo ve. An in kawngah teivâk an awm ve neuh neuh a, ka rawn chhuahpui ṭêp" Hriatpuia chuan zangkhai tak hian a ti a. Phakar chhuah tum lo taka chutia thu a awih ta viau chu mak ka ti letling, fin zâwngah chuan kei aiin a fingin ruahmanna pawh a siam thiam zawk ngei awm si a, awmzia a awm lo a ti ve te pawh a niang. 

Baby aw hian, "Rawn hmanhmawh rawh. Khawhar in lam pawh an bâng ṭêp a nia. " A rawn ti lâng lâng a. 

"Aw hei kan rawn chhuak dawn chiah. In awmna ngaiah in la awm em?" Hriatpuia chuan a ti a. 

"Aw..awm" an rawn ti a, ka off nghal. Zêla ka melh a, "Hriatpuia kaltlangin an vaiin kan rût theih a rinawm ka ti.." ka ti nghut a. 

A ṭawng hmain U Kaia a rawn ṭawng ve ta khauh, "Tihian Hriatpuia leh Sangpuii te hi inzui se, an hnungah zui ru ila, Lianpuia anmahni lo nghaktu te hnen an va thlen rualin che huk ila a ni mai lawm" a lo ti a. Mahse, remruatna fing tak a ni em tih ka hre lo. A risk a sang dawn lutuk. 

"Hriatpui, khawiah nge Baby te chuan an lo nghah che" ka ti vat a. 

"Sikul pêngah" a ti sup. 

"Sir, in rawn kal ta sa sa, an ni pawh chu in va hlîng nghal thei mai lo em ni?" Beiseina sang tak nena en chungin ka ti a. Zêla pawh chuan, "Tir'u le..kan vaiin motorah khuan inhnawh dan a awm ang. Kal ila, ruahmanna chu a awm leh mai ang" a ti a. Kan che nghal sang sang. Chêp angreng tak chuan kan inhnawh thei ta a. Savatê chu ka pawm a, ka bula a awm tak vang nge mipa dangin an hual ve bawk nen, hlau leh thlabâr hmel a pu tawh lo. Kan tlan mêk laiin a beng bulah, "A tawp kan thleng ṭêp aw" ka ti a. 

Bu ve nghatin, "Ka lawm" a ti ve sap . Sikul pêng veilam sirah chuan Car a lo ding ran a. He lam hi chu zan dangah pawh veivak an tam lo hrim hrim ṭhin a, a hmun an thlang thiam khawp mai. Ka buai rûkna erawh Hriatpuia khan Muansangzuali rûkbo a tum kha a nia, an in aṭanga helai thleng hi engtin nge midang hriat loh leh Sangpuii avang pawha hlauthawng lo va kal theih a inbeisei tih lai hi, chu zawng amah bawkin a la sawifiah ang chu. Zêla chuan, "Hriatpui, lo chhuak rawh le.." a ti sur sur a. Car kha rinhlelh kan kai loh nan kan tlanpel a, a chhak Zoa te in pawh lan theihna, in erawh awm si lohna bulah kan ding ta a ni. Hriatpuia pawh a chhuk ve vat a, "Phakar i chhuah emaw ngawltâwt i chhuah a nih vaih chuan ka kap hreh dawn miah lo che u a nia..i hrethiam em?" Zêla chu aw chang bêng bâwng hian a ti hmak hmak a. 

Hriatpuia chu a bu nghut a, ṭawng erawh a ṭawng lo. Police pahnihte khan an hnungah an rawn zui bawk a. Zêla idea angin Kima te chu kan biaktir leh ta phawt a. 

A lak rual rualin, "He lam dinglamah khan rawn kal lawk mai teh u, Sangpuii hi a dik chiah lo" Hriatpuia chuan a ti a. Engmah an rawn sawi lo. Hnim leh thing phênah te kan biru hlawm a, Hriatpuia leh Sangzuali te chauh an ding lang ta. Car aṭang chuan Baby leh Kima te chu rawn chhuakin Hriatpuia te lam chu an rawn pan ta a, kan lo thlir ran mai. Hriatpuia te nen pen 5 velin an in hnaih tawh ang tihin Zêla ṭawng fiak ṭhak kan hre ta a. 

"Che tawh suh u. " Tiin. An hamhaih atalângin chet an tum lo, an ding khawng lah ringawt. Rang taka va kal pheiin Sangpuii ka va kai hrang ta vat a. Engtin emaw chetlak an tum ka hlau a ni. An hrilhhai leh makti hmel chu hmuh nuam ka ti hle. Zêla te chuan an handcuff mawlh mawlh a. An kha a chih a niang, ṭawng zai pawh an rêl lo reng reng. Lianpuiah anmahni lo nghak ve lehchhawngte kha va hlin ve law law an ngai si a, Constable pakhat chuan Baby te lo chuanna car chu khalhin tah chuan keini ho chu kan chuang a. Police motorah Hriatpuia te leh Zêla te an inhnawh ve bawk. Lianpui khaw lam chu kan pan ta vang vang a. A hla lem lo bawk a, khaw dai kan thleng chu a ni mai e. 

Fimkhur takin kan thlir kual a. Kawng pêng bulah Bolero chu a lo ding ran mai. Zêla ruahmanna ang zelin, Thansanga inti kha Hriatpuia chuan a bia a, an car chian loh thu sawiin rawn kal turin a ti ta a. Police motor an hmuh a hlauhawm avangin tlan let lehin hmuh phak lohah a va dah ta a. Kar lovah Terini pasal Tsa ngei mai kha mipa pakhat ka la hmuh ngai loh nen an rawn phei ta hnalh hnalh a. Kan awmna lai vel an rawn thlen hmain a hma ang bawk khan Zêla'n che tawh lo turin thu a pe ta ṭhawt a. An ni erawh man tawk thei an ni tih an hre sa nge an lo inring ru deuh ni dawn, An tlanchhe ta thut a. Zêla te an che ve phat, Tsa zawk chu Constable pakhat zawk khan a va bawh rawp a, pakhat zawk erawh kha chu kawng sir aṭang chuan a zuangthla ta mai a! A âwih leh awih loh erawh ka hre lo. Zêla te chuan an zu ên vat a, a chek hluk. Ka zu dak ve chu kei pawh ka phâwk viau. Kham bakbahai a lo nia. Engtin tak zuk awm ang maw? A thawm hriat tur lah a awm hek lo. A lum hlum ta mai a nih ka ring. Ngaihven zui vakin awmzia a neih rih loh avangin chung an mimante nen chuan chêp zeta inhnawh lehin Lianpui khua kan pan ta a. An VCP in kawtah dingin, mi nawlpuiin an hmuh kan duh bîk loh avangin hliah deuh zuk zuk chung chuan VCP inah chuan kan inchhawm lut ta hlawm a. Lianpui khuaa hetia nghah an ni hi an tan chuan a lawmawm letling ang. Zopuiah chuan thleng se, Police pathum ringawt chuan an khap hneh lo vang, tlangval thaza leh pawisak nei lem lo an kuh ve ṭûn dawn si a. 

Vcp Pu Laia chu thil awmzia kan han hrilh a, a lo hrethiam viau. Zêla'n an department lam biain motor lo tirh belh turin a ti a. Kan lo nghak dawn a nih hmel. Keini hian kan zui ve zel ringawt a, mahse, a ṭul ve bawk a. Sangpuii hmatheh zel kha a ngai si a ni. Police station te a ni lo bawk a, an ni lam pawh zawhna zawh an ni vak lo. Zawt mah se; an sawi duh a rinawm bîk loh a. Terini tel ve lo chu mak ka tih rualin tlaiah khan Lapuii'n Champhai lamah chawhnu lam khan a chho niin a sawi a. A hmun nghâkah an dah a ni mahna. Khâma zuangthla kha Lianpui khaw vcp bulah Zêla chuan a sawi tho a, a zan azana va ngaihven nghal rum rum a ngaih loh thu a sawi naa, vcp chuan a ngaingam lo deuh nge tlangau autirin thalai tlawmngai eng emaw zâtin khâm lam chu an va pan ta tho va. Ama duhthua zuang tha kha a ni miau a, tih vak ngaihna a vâng. Police ho chu kan lo nghak ngat ngat mai. An rawn thangrei hrep lehnghal a! Haw dawn lahin a tu amahin motor kan khalh thiam si lo. 4 wheels hi khalh zir ve a ngai a ni. Bike te kha chu zir lem lo khan ka khalh ve thei mai a, motor pawh a har lutuk lo turah ngai ang. An rawn tlan châk ve thawkhat a niang, dar 1 rik hma deuhin an rawn thleng ta a. Mi nâwlpuiin an rawn luhchhuah tak tak hmaa an inla fel thei chu a lawmawm viau e. Keini tangkhâng ho erawh Lianpui vcp bengvâr a zârah an ṭhenawm tlangvalin min thlah thei dawn hlauh mai. Lehlamah heng khaw pathum, Zopui, Ngûr leh Lianpui te hi chu khaw inhnaih tak an lo ni bawk a, a mi chengte pawh inhmelhriat ṭhûm vek leh in en mihrang lo tak an ni a. Mahni in ngeiah mutmu kan tuah thei dawn a, a lawmawm ngawt mai. 

Kal kawngah pawh a tlai tawh nen, kan ṭawng tam lo kher mai. Sangpuii chu ka kuah a, ka kokiah a lu rawn nghatin a muthlu ta char char a, a rilru hmang nasa nen, a taksa thlengin a nghawng lo thei lo va, a chau tawngkhawng ve a ni maithei. Kei tak pawh ka chau ve nghulh mai. U Kaia pawh a muthlu deuhin ka hria, Zoa erawh a harh hrû reng a. "Patea chu a zalên ve ṭêp ang chu maw" a ti leh boh ṭhin. A patea hi a lo ngai hle a nih dawn hi. 

Zopui kan thleng a, Savate pawh ka inah riak mai rawh se ka ti. A hreh bik lo bawk a. An inah tumah awm hek lo le. Diki te nupa pawh Police koh hmabâk an la ni dawn, an hmabak a duhawm vak loh. Kan thiltih ang zela hremna hmachhawn ṭhin kan ni si a. Chunglam hian kan tihsual hremna hi directin min rawn pe ṭhin ta zawk se, dam alawi pawh hi kan awm tawhin ka ring lo. Min la dim mah mah a ni. 

Zoa pawh a chhungte an mu tawh si a, ka inah a rawn riak ve dawn. Pawi ka ti lo. Puanthuah hi ka nuin, "Mikhual neih thut te pawh a awm ve thei" tiin min kentir ve nual a, Terini rawn riah a tum ve ngawt zanah kha chuan ka phawrh duh tlat lo a nih kha. Ka va phawrh a, chhuatah Zoa nen mut kan tum a ni. Savatê chu a chau ngang a niang, khum a deh rualin a muhil leh nghal. Tleirâwl thanglai, mut duh rual a la ni bawk a, mu nghek se ka duh. Keini pahnih erawh zialte kan han zu leh rih a, mut chhuak a awm lo. 

"I lo hre sa vek a ni maw?" A ti sup a. 

"Ka risk ka tih kha..ka risk fuh ta hlauh a nih kha" ka ti mai a. 

"An inpuanna hi ka hre ve châk. A bul aṭanga a tâwp thlengin" a ti hluai a. 

"Kei deuh. Kan hre ve nel nual turah ngai ang. Hriati thattu kha ka hre châk ber kei chu" ka ti a. Ka ṭawng a sehchilh deuh, ka insanmar vang a ni maithei. 

"Kei pawh, chuan Johna hi chu Hriatpuia thah a nih ka ring" a ti a. Kei pawn ka lo ring ru deuh. Khami zan johna bo zana kan bike chhiatna bul lawk a rawn chetsual danah khan..ngaihbel tur tingin a awmna piah lawkah Johna ruang an hmu bawk nen. Mahse, engvanga that nge a nih ang aw? Hlimpuii aṭanga chhuia an inpuan pawh a ngai ang. Hlimi kha chu U Faka khan Johna thah a ni tih a sawi tawh avangin ka ringhlel lo va, a thah chhan lah a fa a pai bakah Hriati nen an inkar chawhbuai a tum vangah ngai ta ila, mahse, Hriatpuia te nena an inzawm dan lai tak hi ka ngaihtuah thiam ta lo a ni. Tin, mita hmutu U Faka'n Hlimi kha Johna thah a nih thu a sawi laia Hriati lehkhathawna lunga chhu thlu ve anga a insawi kha a mak ta bawk. Baby ziah pawh lo ni ta tehreng se engvanga Hriati kha hnuhtel tum ve tlat nge a nih ang? Tin, Hriati ber a thih tawh chuan an team zinga ngaih theih Johna kha sawitel loh âwm tak a nia..âaa..Baby te hoin ka buaina hi an rawn sawifiah mai turah ngai ang aw..

Sunday a ni tho a. Kan mu rei tlâng teh e. Inkhawm pawh ka tum ta lo law law. In chungten engmah an la hriat ka rin loh vangin han hrilhhriat ṭulin ka hria a. Phak chuapin ka han chho a. Pa Zawma pawh a tho ve chiah nge a lo ṭhu tum vuau mai. Han sawi ṭanna tur ka hre mai lo. Nu Tlani zawk chuan, "Baby lah hi rawn sawi lâwk lo hian a ṭhiante inah a riak ngawt zel a. Ka call tlang thei dêr lo lehnghal" a ti hlak hlak a. Remchângah hmangin, "Nia, Nu Tlan, Baby chungchang rawn sawi ka tum a, nizanah khan Police in Muansangzuali rukbo an tum vangin an man a" ka ti ta a. An nupain phâwk fahranin min rawn melh.. a nuam lo khawp mai. 

Nu Tlani chu a chiâiin mak a ti a, engmah a hriat lawk loh vang a ni pakhat. Pa Zawma erawh ka lo rindan ang chiahin a tira a phâwk vak bak kha han hamhaih leh chiâi hmuh tur a awm lo. Thaw huai hmel a pu zawk mahin ka hria. Nuam ka tih loh êm vangin ka chhuk leh ta daih a. Zoa'n a hmai a lo phih mêk. Sangpuii chuan Alu a lo vêl thung. A eirawngbawl ei ve pawh a chakawm alawm le. Tihian haw tawh lo mai se la a ṭha ang..

Zoa chu chaw eiah ka sawm naa a hnial a. Eikham veleha rawn chho leh tura intiamin a chhuk thla ta a. Thil thleng hi tu vak mahin an hriat a rinawm loh. Hre rih lo mah se, a pawi hran lo. Eirawng a bawl zawhah hmun a phiat a, a khum siamte chu mut ngamawm loh hial khawpin a mar ṭha. Ka mit a va tlung tak e aw. A la naupan nen, in chhungkhur thil engkim a khawih nasa êm mai a, pasal pawh nei se a buai miah lo vang. Ka hriat loh kârin ka lo melh leh vawng vawng ṭhin ni tur a ni, "Vûng vûng a che. " A ti nghat a. Ka lo nui ringawt. 

Hmun a phiah zawha chhuat nawh a tum chuan, "A balh loh hi..ka ril a ṭam , chaw ei tawh ang" ka lo ti vat a. Min hnial lem lo. Chaw chu kan ei a, ka rin ain ka ei tam daih. Chaw eikhama thleng ka sil ṭuih ṭuih zel hi mahnia khawsak ka ninna ber pawl a ni a, tuk khat lek min han chhawk pawh chu nuam ka ti takzet. Hahdam zetin amah thlir chungin zial ka lo zu hlat hlat a, a sil zawha a kut a hrukhul lai chuan, "Lo ṭhu la..i pate bia ang aw" ka ti a. A bu ve nghat. Ka bulah a rawn ṭhu ta chat a. Pu Thara ka call ta nghal. 

"Hello" a rawn ti a. Savatê ka pe nghal. 

"Pa, keimah.. " Sangpuii chuan a ti dat a. Pu Thara chuan, "Ngati nge?" A rawn ti hluai! Kha a ṭawngkam phênah khan, 'Ti nge Champhaia awm tawh tur i ni asin' a ti niin ka hria. 

Sangpuii chuan zangkhai zet hian, "Mak i va ti âwm ve. Ka la dam ve aw. Phuarbeha in kalsan i fanu hi a la dam..i lawm em? Pa" a ti kalh kalh a. A mitmeng a de sawr sawr bawk.

"Eng..eng nge i sawi awmzia?" A rawn ti bah nak a. 

Runluih tih hriat zeta nuih hak pahin, "Police hmel in hmu thuai ang, in nupa khan" a ti leh nghat a. 

"Mate,. Eng nge a awmzia? Engmah ka hrethiam lo" a rawn ti a, a ṭah a chhuah hmel hle. 

"Pa, in ngaihdan leh tum san kha chuan tunah hian champhaiah u Terini te kutah ka awm tawh tur a nia. Mahse, khang misual ho kha an man vek tawh. In nupa pawh in him dawn lo. Inpe zawk mai rawh u. Ka nu i thah avang hian maw pa, ka damchhungin ka ngaidam ngai lo vang che" a ti charh charh a. A heh petin phone chu a hmet hlum nghal. A lungchhia tih hriain ka kuah nghal vat a. A hnungzângah ka chûl bawk. A ngik faih faih a. Ka lainat ngawih ngawih. Nizana a chhungten an kalsan dan leh phuara an hnutchhiah dan kha engmah sawina hun a neih loh avangin kei pawn ka zawt lo. 

"I sawi thei a nia aw" ka ti sup a. Inlahrangin a mittui a hru mawlh mawlh a. Hmui khur dar dar hian, "Anu mangan dan tur kha.." a ti tham ṭiak a, a hmai a hup a, a ṭap leh ta hlawp hlawp..kei pawh eng teh ual ka ni bîk lo. Ka duh êm êm Muansangzuali ṭah zawih zawih laia lo nuih vur vur thu awm hek lo. 

"Nimin khan chhunah pawh motor kha a kal hman reng. Zana phei an tih tlat takah khan ngaihṭhat lohna ka nei ṭan a. Mahse, ka sawi duh lo. Lo biak ngaihna che a awm loh bakah Heleni te ina kal takngial pawh an remti tawh lo. Lumen zana kan inhmu kha engtin nge an lo hriat ka hre lo, an risk pawh a ni thei tho. 'Tum rûk in nei, kan hmuh phak loah i kal tawh dawn lo' an ti bur mai a ni. Chuan chaw eikham hnu fêah ka nau kha dawrah an tir a, chumi hlan chuan an nupain roomah khan min nawr lut a, ka hmui an bel phui a, ka kut leh ke an phuar ta mawlh mawlh bawk. Ka pa chuan , "Min timualpho a, men ngaihna pawh hre lo khawpin min siam a, Sangzuala nen inrûk in tum bawk. Chuvang chuan hmun hla tak, in inhmuh phak lohna turah kan dah dawn che a ni. Nakinah Hriatpuia'n a rawn hruai ang che. Thu awih la, kum khat vel i awm hnuah ka rawn hruai leh ang che. I nau lehkhazirna tur i thawkchhuak dawn ka tih tawh kha..luhlul chhuah miah suh" a ti ta hmiah hmiah a. Ka chhang ve thei tawh si lo. Ka mittui a tla zawih zawih ringawt. Ka nau a rawn let tawh dawn avangin min chhuahsan a, Diki'n an chhuah hmain, "I bialpa chuan engtikawng mahin a chhanchhuak thei tawh lo vang che" nuihsawh zetin min ti bawk. Ka nau rawn thlen rual deuhthawin min chhuahsan ta a ni. Engtin nge ka nau bulah an sawi ang ka hre lo. I rawn kal kha ka thinlung hian a beisei a, ka ṭawngṭai ngat ngat bawk. I rawn lang a, ka lawmzia kha.." tiin a han inhnît leh hlawp hlawp a. Ka pawm vawng vawng mai. Tunah chuan tuman an tibuaiin dinhmun hlauhawmah ka awmtir leh tawh ngai lo vang. 

Zoa pawh a rawn lang ta a. Zêla ten min la rawn be lo va, an buai deuh a nih ka ring. Zoa lo thlen hnuah Pu Thara'n min lo call a, Sangpuii ka biaktir ta mai. Mahse, amahin min biak a duh thu a rawn sawi chuan mak ka ti deuh. 

"Sanzual,..engmah tihsual ka nei lo asin" a rawn ti nghal deuh tâwng a. A mi lo ṭawngkhum tawh dante ka chhuikir a, ka be châk vak lo. Mahse, "I tisual alawm, i fanu ngei rukbotir i tum a nia" ka ti hmuk a. 

A thaw hawk a, "A ni lo. Rukbotir angah ka ngai lo. Amah khan Champhaiah mi ina awm a tum loh êm vangin kha bak kha kawng dang ka hre lo a ni. Tikhan Terini ten an lo buaipui ang a, a awm thei ve mai ang ka tih vang a ni" rilru hah tih hriat zet hian a rawn ti a..

"Phuarbeh chung khan maw" thinlung na vawng vawng chung hian ka ti a. 

"Kha chu Diki min tihtir a ni" a ti chuai raih a. 

"Sangpuii nu chungah khan eng nge i tih? Thudik sawi la, inpuih dante pawh a awm ang" ka ti ta hluai a. Dik tak chuan ringhlel ngawt mah ila a that ngei tih kan hre bik lo tlat a. 

"Engmah ka ti lo. Mahse…" tiin a ngawi dat a, nghakhlel zetin ka lo ngaichâng. 

"Ka tihsual lian ber erawh a tui tla lai ka va hmu leh chhan tum lo va ka en liam kha a ni" a ti ta a. A mi den dan a dang ta zak e. Muansangzuali chuan thingpui a lum mek a, Zoa'n a phone a kheuh mawlh mawlh bawk. 

Ka ding hluai a, pindanah lutin, "Chuan" ka ti nghut a. 

"Chu chu Diki hian a hre si a, min vau nan leh a thuhnuaia min dah nan a hmang ta chiah a ni. Kei pawh hi talbuai tak ka ni asin, Sangzual" a ti hnual rawih a. Khawngaih ka duh, ka thei lo. 

"A ni reng ang chu..Tualthat ang tluk tho i ni miau a" ka ti hmak. Sual ka inti reng, mahse, nupuite chhan ngai ngawih ngawiha an awm laia enliamtu chu pasal ni tlak a ni lo va, hrem a phû a ni. 

"Tual ka that lo" a rawn ti tuar a. 

"Police te bulah sawi mai rawh" ka lo ti hluk, phone ka dah nghal. Mihring ve bawk ka ni a. Zahngaihna hi Pathian angin ka ngah tawk lo pawh a ni ang e. Muansangzuali hringtunu thihsual lai enliam thei mihring lakah hian tih ve tur reng reng neiin ka inhre lo. Thihna hi a na asin.. 

Zêla'n min rawn bia a.. "Hei kan kawm dawn mêk e. Sangpuii nu leh pate pawh kha rawn la turin kan intir tawh e. Chawhnu lamah chuan engkim kan hre tawh turah ngai ang" a rawn ti a, ka thaw huai mai. 

A tawi zawngin aw..Diki te nupa pawh Police kutah an awm ta a. Baby te an man thu pawh Zopui khawtlangin an hre ta bawk. Ka nuin, "Mama, ka lawmpui che. Tunah chuan thlamuang takin ka muhil thei tawh ang" a rawn tih chuan ka nui hawk. Pathian hnenah pawh lawmthu ka sawi. Baby leh a ṭhiante chu IPC section 307 leh IPC section 370 hmanga thiam loh chantir an ni a. District jail-ah dah niin, a hnu deuhah Tsa leh Hriatpuia te chu Central jailah thawn liam an ni ta bawk. Khâma zuangthla kha a ruang hmuh a ni a, a chhung ten a ruang an rawn hlawm a ni. Diki pawh IPC section 370 hmangin thiamloh chantir a ni a. Pu Thara erawh a case a kal mêk thung. Zopui khawtlâng mak tih a tliang a, khawi hmunah pawh an sawi reng mai. 

Muansangzuali te unau chungchang chu ngun takin ka ngaihtuah a. A pa hian thiam a chang kher lo thei, lo chang ta pawh nise an chengho thei kher ang em ka hre lo. An unaua an ina han awmtir ngawt chu ka ngaihtuah si. Ka bangbo ta riau mai. Neih dawnin amah hian ngam lohna chin a la nei ve rûn a. A la naupang ve deuh bawk nen, ka nu nen vawi tam an chungchang kan ngaihtuah dun hnuah Sangpuii duhthlannain thutlûkna kan siam ta a. A pu Ramngaia leh a nuteii te pawh kan râwn thlap. Nakkumah kum a tling chiang tawh dawn a, inneih mai kan tithlu ta a ni. Class xii tal pass a duh ve nen, a zirna senso chu aman remti chiah lo mah se, ka tumsak ang. An unau ringawta an ina awmtir ka hreh si, bakah eizawng turin an la naupan bakah zirlai an ni bawk nen, pawisa khawlsa engmah a pa ten an nei bawk si lo. An in chu an kalh a, Apu Ngaia te bulah kumin chhung chu an khawsa ve rih dawn a ni. Kan inneih hunah erawh Tleipuia chu ka nute bulah awm se tiin ruahmanna kan siam a. Kei pawh kan innei a nih chuan ka in luah hi sawn ka tum, dik tak chuan Pa Zawma te lakah pawh inthlahrunna chin ka nei lo thei lo. Baby te an man chhanaah khan ka inhnamhnawih vein an man theih nana a fawng vuantu ka nihna chen a awm a. Hriati thattu diktak hriat phah tho mah ila, an fanu dam zawk jailah a awm tho a ngai bawk si. Chuvang chuan inhmuh fô loh ka duh. An tan pawh a nawm ka ring chuang lo. Tin, Sawi hmaih hauh loh tur U Faka kha bail phalsak a ni ta bawk a, keimah ngeiin ka bail ta bawk, ani pawh thiam a chan ngei beisei ang. Court hun chhung hi a rei ve lo thei lo va. A û te bulah khawsa lehin inhlawhna pawh a hma ang tho khan a hmu leh thuai mai. A fapa nen an infiam leh thei ta chu thinlung takin ka lawmpui a ni. 

Hriatpuia inpuanna erawh a hnu khar nan hmang zawk teh ang. Tunah chuan ka savatê nen kan la hlim a, rilru tibuai thei thil emaw kaipeng thei thil hmuh leh hriat ka duh rih lo. A ngaitein School kan kal leh a. A sarhu laia zawhna ka dawn sek te, min en duh bik riaute kha ngaiah ka nei chho a, kar hnih vel a liam leh chuan nunphung pawh a pangngai leh thei ta. U Kaia te nen kan inhnaih leh zual a, Ka tan chhungkua an ni fô dawn a nih hi. Julie pawh ka rin ang ngeiin a lo fihlim a, mak a tiin a ṭhiante thiltih chu awih harsa a ti khawp mai. Lianpuiah a phei leh tawh a, a chanchin ka hre zui lo. Kan inbe ngai tawh lo ti ila min rawn text zeuh zeuh ṭhin, kei ni lovin ka savatê'n tum bâr chungin a reply ṭhin bawk. Ka thikthu chhiat kha chu neptê, a thikthu chhia a rawn lantir ve tak tak chu ka lerh ngawih ngawih ten ka inhre hial zel. Chuvangin inhnial thinrima tihtauh ai chuan tumah hmeichhe dang ṭhian ṭha tih loh chu ka be lo tawp mai a ni. A pawi lo, ka zalên a, ka hlim zawk bawk. Hmangaih tan chuan rinawm hi a lo harsa lo mang e..bakah Zopuiin kan chungchâng an hre vek tawh a, tuman min beisei lo ve ve tawp tawh. A nuam letling. Zoa pawh palai an tir ta rup mai le..harsatna awm lovin an inrem thei ta a. A ṭhianah min hman a tum hmak bawk. Ka dinpui dawn chiang lutuk. 

Pu Ngaia te inah Zirtawp zan atanga sunday zan hi ka leng thla ngei ngei. A bak zan dang zawng erawh lehkha zirna hun siamsak a ngai ve si a. A tum bawk a, zirna lamah pawh amah han ter pha tur an awm meuh lo. Keiin ka pui ve bawk a. Inrinni chhunah ka in piah tuikhurah kan insu ziah bawk, Leni pawh kan tan a la hlu zel a. Ka tan a ṭangkai êm vangin Summer suit nalh zet mai ka chahsak a, a va lawm thiam tak. He hmeichhia kher kher Muansangzuali'n ṭhian atan a lo nei hi kan tan vanneihna a ni ka ti lo thei lo.

Zanriah ei khamah ka insiam a, ka savatê hmu turin ka tlan thla leh ta nal nal. Ka thleng hma deuh nge thleng a lo sil mêk a. "I sil laklawh em mai, kuhva ka va lam lawk," tiin ka chhuak leh a. A pu Ngaia te pawh hian engkim an hria a, ka chungah an ṭha hle. Khawsak harsa ve tê mah nise, an nupa hi hian Pathian an ṭihin naupang an enkawl dan pawn ka mit a tlung viau.

Lapuii dawrah ka ṭhu ren râwn a. "Sawi ka hreh viau naa, ṭhianṭha tak takah ka nei tawh che a. Ka sawi mai ang. Nizan hmasa khan dar 11 velah U Nunga te fapa khawsik san deuh vangin nachhawkna an rawn lam a. (Lapuii te hian damdawi dawr an nghak tel tho a ni). Ka va pe a, thli kha a thawt deuh avangin kan puan pho kan seng bak kha ka va seng nghal a , chutihlai tak chuan Peka leh Sangpuii te hi an rawn kal phei ral ral a..ka lo be lem lo bawk a, ngawi rengin min kal pel a, mak ka ti deuh a. Zan a rei tawh si. Bakah Peka hian a hmain a lo ngaizawng ve tawh ṭhin an ti tlat mai a. Hrilh loh che ka tum zet a, amah Sangpuii ka rin loh vang pawh ni loin mualphote pawh a hlauhawm ka tihpui ve a. Ka sawi ta mai a nih chu" a ti ta mawlh mawlh a. Ka thin a phu nghal dawt dawt a. Hei chen kan inzui tawh a, rinhlelhawmin a awm ngai lo. Schoolah nise nungchang mawi ber pawl a ni bawk. Peka chuan a bansan daih tawh turah ka lo ngai a, a phone ka khawihsak ngai lo va, ṭul ka tih lem loh vangin..kei hi bum te hi ka lo ni reng a ni lo maw le? A thikthu chhe lutukte hi ama dik loh em ni ang?! 

"A va mak dawn ve aw..ka lo ngaihven dawn nia" ka ti mai a. "Ka sawi tih sawi suh aw. A nuam lo ve a nia" a ti a. Sawi kher ka tum lo. Muangchangin an inah chuan ka phei leh ta a. A lo sil zo tawh, ka ṭhut rual rualin thingpui hâng a rawn hung nghal. Tleipuia' Paruk hmun a vawng lauh lauh a,. Pu Ngaia te nupa chu ka ṭhut aṭanga reivak loah, "Hei Feli nu hi a ṭha rai lo va, kan va leng ve lawk ang e, kan leng khât si a.." Pu Ngaia chuan a ti a. An fate erawh hruai an tum lem lo a niang. 

An chhuah veleh, "Nizan hmasaah chuan eng nge thleng?" Ka ti nghal tâwng a. A hawihai hman deuh, mahse, ngai awh leh vatin, "Engmah" a ti nghat a. Chiang zeta melhin, "Peka nen khan eng nge khatiang zan tlai tawhah in tih?" Ka ti chang fak. Hnuailam a bih a. Hlauthawng hmel erawh a pu hran lo. Ka ring chhe phal lo naa ka lakah zêp a neih ka duh lo. 

"Nuteii te inah chaw ka ei a, a dam loh vangin eirawng ka va bawlsak a. Ka rawn hrilh duh lem lo che a nih kha, i ngaihtuah leh vak ka hlau a. Chuan, Sir Peka te nen an inhnaih êm kha..ka awm tih a hriat chuan a rawn lêng a. Nuteii lah a tho harh peih si lo, Patea'n min chelh ve ta rih a. Buhhawpte ka siamsak leh a, tuilumin a kâwngte ka dehsak a. Riak ve mai tura min tih avangin riah ve mai ka tum a, apu te pawh ka be vek tawh. Mahse, Piteiin min lo be leh a, Bawihpuia ruhseh a chhuah thu leh a châwn vel nâ a tihzia a rawn sawi a. Hetianga a awm chuan awmngaihna a hre ngai lo. Nuteii a zia ta tho sia tiin ka hawng leh ta a. Sir Peka khan ka thlah ang che a tih tlat avangin ka rawn inthlahtir ve mai a ni. Engmah induhna lam a sawi lo..i thîk leh dawn avangin ka sawi ta lo ringawt a nih kha" a ti ta nghat nghat a. Ka thaw huai e. Dâwt a sawi lo tih a mitmeng aṭangin ka chiang bawk nen. 

Buaina kan nei tawh lo bawk a, lungmuang zetin insi riâlin tv kan en dun a, ka kham thei lo leh ka hne thei miah lo chu mak ka inti..hei ngei hi hmangaihna chu a lo nih dawn hi..