Ka savatê 2

KA SAVATÊ.. (2)

Ziaktu : Toni Râlte

Tihtur awm hek lo, umzui pawh tum ta lo chuan ka in lam ka pan leh ta zawk a. Tu tak ni ang maw? A sam kha a sei lutuk lo va, kawr uk lam chu a ha ngei mai a. A bak a inthuam dan ka hrechhuak zo tawh lo. Ka han mut leh hnu pawh chuan ka muhil thei lawk lo, ramhuai ni si lo, hmeichhia lehnghal mahnia thlanmuala han kal tawp mai chu a huaite pawh a huai reng reng ka tia. Mipa ṭhenkhat pawn thlanmual hi chu an ṭih ṭhin kha a ni ngai a. Eng emaw tak zawng a ni ngei ang. A tukah Office-ah a thuphungin ka sawi a, Pu Biaktea chuan, "A tu chu ni maw? A va huai reng reng ve le" a ti hlut a. 

Madam Sangpuii'n, "Kei thlanmual hi ka ṭih riau, chhunah pawh mahni chuan ka kal hreh" a lo ti ve bawk. 

Madam Zuali chuan thutak fê hian, "Hmeichhia a nih si chuan rin ka nei, Tlem lai khan kan pate lui kal haw hian an hmu ve tawh a. Mahse, amah a ni ngei em tih erawh ka sawi ngam lo" a lo ti a. Kan bengkhawn hlawm hle. 

Thana chuan, "Tu nge inpa te hmuh chu" a lo ti vat a. 

A ngawih det hnuah, "Saw lai Vengthara ami Muansangzuali saw a niawm e. A nu thlanah a lo ṭhu a, a lo ṭap a niawm e.." a ti ta a. Muansangzuali ka hre ve lem lo. 

"Eng ang rual nge " ka lo ti a. 

"Tleirawltê mawle, Class XI pawh nikum kha chuan a rawn kal ve tak kha mawle, class xii hi rawn kal a tum ta lo nge mawni dawn ni, lehkha pawh a nu boral hma kha chuan a thiam, kan school aṭanga matric pass kha a nia, English leh Ss-ah pawh letter a hmu ve hial asin. A khawngaihthlak reuh e" a ti vawng vawng a. 

Madam Sangpuii chuan, "I sawi takah chuan ka hrechhuak ve chiah, nia, thlana a kal hi hmu an awm zauh zauh tak asin. A nu kha a ngai êm a, a nuhrawn lah saw fel mawlh hek lo, a lainatawm ngawt tak asin" a lo ti ve bawk a. Ka bangbo viau. 

"A nu chu engtikah nge a boral a? A va mak ve aw. Amah a nih chuan a khawngaihthlak êm tak a nih chu" ka ti ve hluai a. 

Pi Zuali'n, "Nikum lawkah khan mawle. An fehnaah lui kan a ngai a, tuiah a tlahlum alawm mawle, an pa a kal tel si lo va, a thi deuh thut nen, Sangpuii leh a nau Tleipuia bak saw fa an nei lo va. A pa hi mistiri a nia, marawhchu, zu a duh ve lutuk a, an nu boralna a la rei loh tehlul nen khaw ṭhenawm nuthlawi a nei leh nghal mai bawk sia, Sangpuii aia û awrh tur a fanu a rawn chhawm lehzel bawk si, an rethei unau a nia. Thawkkhat lai phei kha chuan a fahrawnte a vaw nasa lutuk kha an ṭhenawmpa Pu Tlana va tlan lutin an intibuai deuh titih tawh alawm. A pa ber saw a nep lutuk a, Sangpuii tê chu lehkha a thiam thei sia, kal zel se ka duh asin le aw" a ti ta mawlh mawlh a. Ka mi hmuh kha amah a ni tih hre chiang lo mah ila, an sawi hmangah a nih duh hmel viau bawk nen, ka lo ralkhat lainat ve tawp. 

Lunch break-ah canteen-ah kan phei dial a. Canteen hi School tinin an dawr ve vek mai. A nghaktu Nu Nghaki hi nu phawk leh fiamthu duh tak a ni bawk a, a hnathawk Lawmi lah nelawm leh dawr nuam tak a lo ni bawk nen, an lun ve thei phian. Canteen-a paratha hlai hlep hlawp leh chana ka ei mêk lai chuan Thana'n min rawn nghawk zauh. Pawn lam a melh pah bawk, ka va hawi ve vat a. Canteen bul ṭhutna an siamah chuan tleirawl sam dum hlap, hmai tung lam deuh, a ngo nge a dâng ka ti zawk dawn, a vun zawng a êng hrim hrim e, chu leh a ṭhiannu niawm tak thau lam deuh hi an lo ṭhu a. Thana chuan zawitê hian, "Zinga kan sawi kha, Muansangzuali kha a nih saw" a ti sup a. Ka en nawn leh kher, Kekawr dum thawl hek hawk a ha a, chapal kaih a dum a bun bawk.Tshirt grey a ha a, tlereuh engmah a inbel lo, a sam a thlah mawl tawp a, a hmaiah pawh make up sulhnu a awm hran lo. Mahse, tleirawl hmelchhia zawng a ni mawlh lo mai. A hmel ngui tak avang erawh chuan a lang duhawm lo lek lek thei. A mitmeng a lian a, a hnar ngûl pawh a sang pangngai, a hmui chu a pan lam deuh mah nise, a sen hiam a, zuk leh hmuam a ti lo a nih ka ring nghal. Chutiang khawp chuan ka lo en ngun. Nizana ka mi hmuh kha a nih ka ring nghal thlap bawk. 

Thil chu kan ei zo va, ei man kan pek hnua kan chhuak chu Thana chuan, "Sangte, School i rawn kal leh dawn em ni?" Tiin a be ta hlauh a. A chhan hriat si lohin Thana'n a bia chu ka lo lawm ve ngawt bawk. 

Thana melh pahin, "Aw, hei admission ka rawn la ve leh dawn a" a ti sap a. A aw chu a fiah fai kher mai. 

A ṭhiannu chuan, "Sir, kan thiam loh kan lo zawt ṭhin ang che aw" nui chungin a ti a. Thana pawh chuan, "Tehreng mai" a lo ti ve vat. Kan School lam kan pan ta nghal a. Nilengin Muansangzuali chu ka rilruah a awm nia mawle! Ka star pawh a ni lo. A chanchin ka hriat tlemtê avang leh nizana zan rei tawha thlanmuala a kal hial avang khan ka ngaihtuah deuh a ni maithei. Kan haw dawnah Terini msg ka dawng a, "Zanah lo leng la" tih tê chauh. Mahse, ka tan a tawk viau mai, sawi lo mah se, len ka tum hrim hrim. Eirawngbawl a ngai lo va, a zia viau e. In ka tifai e ka tia, mipa hi zawng kan che phut phut a, hmeichhia angin kan sulhnu a mam ve vak thei lo. Ka farnu Tei ka ngai hle, ani hi zawng che fel thlarh reng mai kha a nia. Kan in kha englaimahin a bal ngai lo tihtheih a ni. 

Zanriah ka ei a, kei hi thil chin ṭha lo deuh ka nei pek a. Chaw ei paha phone en hi ka hrat tlat! Facebook video ka en ngei ngei. Sim a tan a duhawm ngawt mai. Ka ei khamah ka insiam a, dar 7 velah Terini te ina leng tur chuan ka chhuak ta a. Zanin chu hlawhtling turah ka inngai bawk a, ka ke pen pawh a zang haih haih viau. Ka va thlen chuan an lo awm ṭhap a, a nau mipa chu ka hmu fô tawh, Terini nau tih ka hre lo mai mai zawk a ni. Ka luh hnu reivakloah a chhuak ta daih a. A pa nen pawh kan inkawm thei viau mai. Thingpui sen hâng kan in zawh hnuah Nu ber chuan, "Chami pa damlo chu i va kan ang hmiang" tiin an pa a melh a, a zei tlat. An pa pawh chuan meizial chu akin, "Nia, kan lang tam lo êm mai, tirawh, i va kal ang" tiin a tho nghal vut. An chhuak a ni nghal mai. Hei bak baka golden chance..!

Terini chu ka ṭhut hnaih a, a lai ve deuhin ka hria. A kut lain ka hmet neuh neuh a, a la sawn bîk lo. 

"Chuan" ka'n ti hluai a. Min rawn melhin, "Eng nge?" A ti vei hmak. 

"Kan ni dawn ta em?" Ka ti thawr a. 

"Awii! Sir, i ti tak tak ami?" A ti deuh hliai a. 

"Ti tak tak lo ila ka lo leng dawn mi? Chuan, Sir min ti tawh suh, ka student pawh i ni lo. " Ka ti nghut a. 

A nui var var a, "A nih Sangzual.., min duh tak tak ami?" A ti a. A kut ka hmer na salh. 

"Aw ka duh che. Min duh ve tho tiraw?" Ka ti a. Ka confi lutuk chu ka innuihzat lek lek. 

"Kei ni ang te chuan kan phû lo che e, nakinah kei aia ṭha leh lehkhathiamte i hmu ang a, min kalsan leh daih ang" thutak angreng fû hian a ti ta a. 

"Chutiang a ho. Sawi chiang la" ka ti a. 

Chiang zeta min rawn melhin, "Ka duh che alawm" a ti sap a. Kawngkhar lam melh zukin, ka lamah ka kuai hnai a, ka fâwp ta a. A zei kher mai. Ka fawh tawhah a la zei ber awm e. Min ti zauthau thei takngial dawn alawm mawle. Kan infawh zawh chuan sawi tur ka ngaihtuah rauh rauh, a vâng angreng. Ani pawh a ngawi reng a. 

"Ka inah lo la leng ve rawh aw" ka ti a. 

"A zahthlak e, mi an ṭawng thei si" a ti niah niah a. 

"A ho lutuk, engtin kan va awm dawn pawh ni hlei lo" ka ti a. 

"Nia, lo la leng ang, tak taka hmeichhe khawih tur chi a awm chuan min hrilh hreh suh aw. Insuk te, rawngbawl angte pawh" a ti zung zung a. Ka lawm hle. 

"Insuk hi zep loh chuan ka ning thei tawp" ka lo ti hmanhmawh a. 

"A nih ka ring, mipa tan chuan a ninawm ve lawm" a ti ve mai bawk. 

Sawi leh mai tur ka vân bawk nen, "I û kha engtia boral nge?" Ka ti a. 

"A nerve vang a nia, i lo hre ve ni maw?" A ti a. 

Zoa'n min hrilh thu ka sawi a. A nu leh pate lo hawn hnu lawkah ka haw ve ta a. Ka hlim phei vur vur khawp mai. Bialnu ka nei leh ta chu a nia. Heta ka awm reng dawn phei chuan kan inneih mai te pawh a la rinawm. Kan inhrechiang chho zel ang chu. Ka in ka luh hmain thlanmuala kal a lang leh ta tlat! A lo awm leh maithei asin ti rilru chungin thlanmual lam chu ka pan ta a. Lo awm leh se tih ka duh a ni ber mai. Ka phei ṭhem ṭhem a, mak tak maiin a lo awm leh tlat! Sana ka en a, dar 10:15 a ni. Min hnungchhawn zawngin a lo ṭhu leh a, thawm dim vak tawh loin ka inpal phei bawrh bawrh a. 

"Mami, eng nge i tih?" Ka ti leh ta thâwr mai. Tun ṭum chu a phu ta lo ve. Ka thawm ka dim lo bawk nen. Rawn hawilet a tum lo nia ka hriat avangin a hma lamah chuan ka va kal a, amah hmachhawn zawng chuan ka ṭhu ta hmak mai. Umm, kha tleirawl ngei kha a ni chiang e. Muansangzuali an tih ngei mai kha. A hmalam a melh ngar a, a hmel a ngui vek bawk. Ka va ṭhut hnaih deuh a, "Buaina i nei em ni?" Ka ti sup a. Min rawn melh ve ta chiah. 

"Buaina i nei zawk em ni?" A ti let ta khauh mai. Ka hrilhhai ngei mai. 

"Zana hmeichhia thlanmuala kal chu a him lo asin" ka ti ta a. 

"Eng nge pawi? Thi daih mah ila eng nge pawi?" A ti leh ta a. A awka erawh a sang hran lo. 

"I thih daih ten, i nau engtin nge a awm ang, i khawngaih lo mi?" Ka ti ta hmiah a. Mak tih hmel deuhin a meng kâwk a, "Nau ka nei tih i hria maw?" A ti hâ a. Ka bu nghut ringawt. 

"Haw tawh rawh, i chhungte pawn an ngaihtuah tawh ang che. " Ka ti a. A nui lui nghek, "Ngaihtuah a! Eng atanmah min ti lo. " A ti sehchilh nak. A hmel pawh a dur deuh khap. An sawi kha tak tak a lo nih dawn hi le. A va lainatawm reuh tak. 

"Hawh, ka thlah ang che. Hetah chuan zurui te pawh an lo kal thei..a ṭha lo" ka ti leh hram a. 

"Sir, keimahin min awmtir rawh. Anu thlanah hian ka him tawk alawm. " A ti dam thlap. Ka pa boral ta ka hrechhuak zawk mai. Chu tleirawl chu ka lainat zual sauh. Engtia han tih chi nge ka hre bawk si lo, miin min rawn hmu dun ta se, eng emaw angah te an ngaih ka hlau deuh bawk si. Kalsan ngawt chu dikin ka hre bawk si lo.

"A nih chuan ka lo ṭhutpui ve ang che. " Tiin ka ṭhut dan ka siamrem sauh sauh a. A ngawi reng. A melh ngai a melh leh tlawk tlawk. Thlan chunga hming inziak chu ka phone flash light-in ka han ên a, 'Lalrinmawii, kum 41' tih leh a thih ni leh kum a inziak a. A la naupang hle mai. 

"Mami, kei pawn pa ka nei tawh lo asin. Mahse, hetia indawmkun hian awmzia a nei miah lo a nia. Hmalam pan hi a ṭha ber, kan lungngaih avangin an rawn nung leh thei tawh lo" ka ti duah a. 

A ṭhen sak a, "Ka hria alawm. Ka thih ve phawt loh chuan Anu hi ka hmu thei tawh dawn lo tih chu, mahse, tihian ka chanchinte ka hrilh ṭhin a, a hre ve thei ang tiraw?" Mittui tling pam chung hian a ti a. Sawi tur a vâng duh ngei mai. 

"Aw a hre ve turah ngai ang aw. Mahse, ka sawi tawh angin hetia thlana kal hi a sâwtna a awm lo..a him lo, hmeichhia i ni bawk si" ka ti a. 

"Kan in saw a nuam lo êm alawm" a ti sep a. 

"Hetah i kal ṭhin tih an hria em?" Ka ti vat. A bu nghat a, "Ka nau muthilh hnuah ka kal ṭhin. Mahse, an hria..engahmah an ngai lo, Apa pawn" a ti a. Ka thinrim thut, a pa hi nep ka ti lutuk. 

"Chhungte dang in nei lo mi? I nu chhungte pawh..chutah chuan awm daih ula.." ka ti a, nge maw ka lo buaia ka lo inrawlh ve chiam ka hrethiam tawh bik lo. He tleirawl hi venhima a tawrhna aṭanga chhanchhuah ka duh ngawih ngawih a ni ber mai. 

"Anuteii leh apû te chu an awm a. Mahse, an harsa ve lutuk a, bakah Nuteii chu a pasal te inah a la awm bawk sia, apu chu an chhangchhe sia, piteii pawn awm tur chuan min ti reng, an rethei ve êm a, ka tibuai ngam lo alawm. Bakah Anu leh Apa te in hi chhuahsan ka duh lo, ka chhuahsan chuan ramhuai pahnihte sawn nuam an ti dawn lutuk a, anmahni tibuai tur hrim hrim pawn hrehawm mah se, ka awm ve tlat dawn" a ti ta nghat nghat a. A la naupan nen a rilru a puitling reuh hlein ka hria. 

"I pa bulah in sawi ngai lo mi? I nuin a tih dan che u chu" ka tih rual rualin, "Nu a!? Nu ka nei tawh lo, misualnu saw engtikahmah ka nu a ni ngai lovang. Apa maw hrilh ngai loin a hre vek alawm, mahse, keimahni zawk min hau zel a. Kei hi chu engtin pawn min ti rawh se, ka tuar thei. Bawihpuia an tiduhdah ve zel hi chu…" a insum zo ta lo nge a hmai a hup a, a ṭap ta hlawp hlawp mai. Ka lum pup pup a, engtin emawni ka awm. Kei a hriat ngai pawh ni lo lakah tiang khan a inbunruak a, a nun chu a hrehawm thawkhat ve dawn a ni tih ka manthiam nghal. Ka va kuah ta thâwr a, a lu-ah chûlin, "Ṭap bawrh bawrh rawh. Ka hrethiam che aw." Ka ti dam thlup a. Mahse, a ṭap rei lo. A mit chu a sên râm a, "Haw tawh rawh aw. Naktukah School i kal dawn si. Thawh i hai ang. Hawh, ka thlah ang che" tiin ka kaitho a, a tho ve mai. Min hlau lo va, ka bulah a thla a muang tih hriat taka a han ṭap mai te khan min lainattir zual a, engtin emaw ṭanpui dan la ngaihtuah ngei pawh ka tum nghet hmak mai. Vengthar hi kan School panna kawng peng piah lawkah a pan thlakna a awm a. An in pawh a lo hla lem lo, Assam type niin a ṭha ve pangngai, a lo thim ṭhap tawh a. Veranda light erawh an on thung. A luh hma chuan, "Sir, ka lawm e. Ka zak lo tiraw? Tuma bulah sawi suh aw" a ti sar sar a. 

"I ho lutuk, nakinah kan la inkawm chiang dawn nia. Muttui aw" ka ti a. 

Muthmunah chuan Muansangzuali, Sangpui tia an koh ṭhin hmel hlir chu ka mitthlaah zu châm a mawle! Ka khawngaih takzet a ni. Ka nu ka hrilh chuan a khawngaih ve ngawt ang. Engtin nge ka puih ang aw tih ka ngaihtuah a, ka bangbo deuh. A nau te chu awmpui an phal chuan awmpui ta mai ila tihte ka ngaihtuah a, a tlachawpa ngaihtuah turin ka dah ta rih. Kan inkawm tak daih avang kha  phone ka lo en si lo va, Terini msg a lo awm tuar mai. Mahse, a thinrim lo chuan ka hria. A tukah phak chuapin ka tho a, zing lam hi chu chaw ei hi a va tui lo thei tak. Chaw nghei erawh ka duh ṭhak lo. Ka thawhpuite hi an inchei êm êm lo bawk a, kei pawh hak nuam nuam ka ha ve mai zel. Vawiin pawh Tei min chahsak chapal kaih nen ka kal ve leh thawr mai. Golden card renew leh siamtir a ngaih avangin chawhnu kan off dawn a, a zia hle. Insûkna chance a ni mai. Tui hi lei tur a awm a, 1000 lts hi ₹400 in kan lei. Ka heh lo khawp a, ka ring rei thei khawp mai. Insûk tak hi chu tuikhur ka hnaih bawk a, ka va insu mai zel. Sangpuii ka zawng ru deuh a, ka hmu mai lo. A kal lo a ni maithei ni. Kan bang a, kei pawh tuikhurah ka va insu. Zoa nu a lo insu ve a, ani hi a ṭawng duh bawk a, a titi ka ngaithla a ni deuh mai. An pa chhungte sualzia te a sawi tak bawrh bawrh a, hmeichheho tak hi chu aw. Mak tak an ni, Mo tiduhdahtu pawh hmeichhia, pasala chhungte ngeih lotu pawh hmeichhia tho. Pathian hian a siam danglam bik te pawh a nia nge. Thawmhnaw ka zar laiin Terini a rawn lang heu mai. Mak ka tih rualin ka lawm bawk si. 

"Hengte chu min suktir tur alawm. I va â tak" a ti bawrh bawrh a. Min duat ṭan hle mai. Siami aṭang khan ka bialnute laka pangchan vel hi ka ching dawklak a, ka care ve tho rualin an lakah ka beisei a sang zawk tlat tawh. Nuthlawi zûna uai tawh kha ka ni ve miau a, a awm lo hran lo. 

In chhung kan luh chuan a hawi hrek hrek a, "I va han rem thiam lo tak" tih leh ṭhutthleng te chu siksawi a rual nghal a, ka bel dahna leh bawlhlo dahna burte chu a sawn kual ta vek. "Ka room pawh saw va en teh, a dik lo em?" Ka lo ti. A va lut a, a chek hlak a, "Lo kal teh, khum hi hung sawn ang, i almira dahnaah hian dah ang" a ti nghal. Thuawih takin a sawi ang ang chuan ka ti ve zel a. Hmeichhua na nâ na chu an lo thiam deuh nge ni, kan han rem ṭhat hnu chuan kei pawn ka hmu dik thlup mai. Thingpui a lum rak rak a, "I lo kal chu ka va lawm" ka ti deuh sek. A nuteii a tlan a, a hman ve deuh a lo nia. A tihzia fû mai. Thingpui kan in zawhah inhnaih zetin kan ṭhu dun a, fawh leh ngawt mai loh chu tih vak tur a awm lo. Kan infawp rei telh telh a, Ṭhutthlengah chuan ka nam mu a, a chungah ka bawk nghal zat. Ka kut pawh a hlei ṭan, min dang eih lo. Thaw a rangin mipa tih takah kei chuan a tawp thlen mai ka pawiti tawh lo, ani pawh a chhing diar diar a, a thaw halh halh bawk. Ka sam pawh a ṭham nghet nget nget viau..ṭawng lo va chutia kan chet mawp mawp lai tak chuan kawngkhar rawn kik paha, "Sangzual, Sangzual" Baby'n a rawn tih takah chuan kan tho nghal zawt. Terini chu a insiamṭha nghal mawlh mawlh a, kei pawh ka sam ka tuai puat. Kawngka chu ka va hawng a, zêp nâk emaw Baby chu ka hmel huat titih, a rawn kal hun hi a timing lo ve thlawt. Nui vur vur chungin, "Ehem! Ka lo tibuai che u em? A pawimawh sia..Sangha i ei châk thu kha i sawi reng sia, U mawia ten an lo zuar a, i duh ve dawn em ka ti..phone i la thei malêk sia" a ti zung zung a. Tuin nge bialnu nena hmangaihna lipuia zuanthlak tum laia phone hmang zut zut ang le..

"Eng sangha nge? " Ka ti tham ṭuak a. 

"Nghalim ṭhah, an ti ṭha khawp mai" a ti a. Terini a va be daih. 

"Hetah lo zuar ve se la" ka tih chuan, "Kan inah an awm, han chho lawk mai rawh" a ti liam puat. Ka wallet kengin ka han chho a, A tuihnai viau, fun khat chu ka lei ta a. Ka ei châkna a rei tawh bawk a, lim nghek ila a ni mai lawm. Baby te lah chu an lo inkawm tui phian a, mahse, Terini chu an rawn call a, "Ka zuk hawng tawh ang e, min lo ko sia" tih leh din a rual a. Kan inthlah chu a ni nghal mai. Baby lah chuan, "Nuam inti bik siah" a ti deuh sek. Baby hi nula senior lam a ni tawh naa mipa hi a ngaihsak vak lo nge inleng a neih ngai pawh ka hre lo, Kohhranah hian a inhmang hle ringawt a. A hmel phei chu a chhe vak lo asin le. Hriati erawh an khaw ṭhenawm Lianpui ami nen an ni vein ka hria, kar tawpah hian a rawn kal ve ziah zel. Zanah ka bialnu ka rim leh a. A nuteii nen kan inkawm a ni mah zawk, a ṭawng duhin zawhna a ngah si, a ninawm lek lek. Khal zet mai, ngo ve tawk tak nuih heh zet mai a ni a. Kan vawikhat inhmuhna aṭangin min nel nghal hle. A lawmawm lamah ngai ang. 

Ka len laiin Terini pa chu an rawn call a, an inbe zo chu biak bik pawh nei lo chuan, "Diki te lah hi aw an buai ve reng mai a. Kha an pa zurui sual vangin a nih kha min lo biak leh ni, rawn tlan an tum deuh emawni" a ti hluk hluk a. An nu chuan, "Tlan lah hi an awlsam lutuk a. Thara pawh zu hi a duh ve lutuk a, kha Pu Thangzaua te ina a thawk pawh a thawh zawh meuh chuan hlawh lak tur mumal pawh a neih loh kha..zu manah a tlakral zel sia" a lo ti ve bawrh bawrh a. 

Chumi hnu darkar chanve chu a la tling lovang tihah Diki an tih te niawm tak chu an rawn lut ta a. Ka hmuh vawikhatna an ni lo naa kan la inbe ngai lo. Hâng lam deuh, sam kir bup mai, kum 35 bawr vel tur a ni a. A hmui duk deuh chu a chhah tup bawk. A zaidam vak lo tih en reng reng pawn a hriat. A fanu niawm tak chu Muansangzuali te nena inrualkhat awm vel, a nu nena inchhun deuh, a nu aia ngo hlek a ni thung a, a sam a tawi a, a sen thar bawk. An rawn luh rual rualin Diki chu a âng nghal buan buan a. "Ninawm lutuk, a rui sual ve ziah. Pawisa lah kan nei si lo, chawhmeh zawng zawng a paih darh a, chaw ten mi vawm thul. Ka nei peih tawh lo" a ti hlak hlak a. Terini pa chuan, "Zu a in ṭhin tih hresaa nei i nia, chutin inṭhen hlen ngawt a dik nang. A rawn hruai leh vat ang che u, a thuhrimin tunlai chu a nghei emaw ka tia" a lo ti chuar chuar a. 

"Awiii, nghei awzawng lo, A inhlawhna te hi ka hmu ngai hleinem, zu manah a hmang nghal zel a. Chhawr pawh an chhawr duh hlawm tawh loh hi. Muansangzuali lah School ka kal leh e a ti kual a, kan retheih rapthlak nen, a pa lahin a hnial ngam lo a niang chu, a school fees te saw ka pe dawn awkawng lo, duh leh aman tuak ve rawh se" Diki chuan a ti hlawih hlawih a. Ka harh kuar, he nu hi Muansangzuali pa nupui chu maw lo ni?! A engahmah hmain ka ngei deuh ringawt. Mipa ka ni hlauh zawk a, hmeichhia angin ei loh ka pe na ve lo mai zawk a ni. 

Feli chuan, "Sangpuii chu lehkha a thiam êm a, School chu kaltir hram hram zawk rawh u, nakinah in tan vek tur a nia" a lo ti dêk dêk a, Diki a ṭêk hle, "Awii, khawi lamah mah a hlawhtling lovang e. Zan reiah ka nu thlanah ka kal e a ti thul. Min timualpho zawng ngawt hian a awm a. Kimi pawn a zir tawh lo, awm ve mai mai rawh se. Thingtlang aṭang chuan sawrkar hna a hmu lul lovang" a lo ti leh chiam. A fanu chu Kimi a nih awm chu maw. Terini pa chuan min vengthawng deuh nge ni, "Insûm teh, kha Sir pawh inti hrilhhai alawm. A thuhrimin nang pawn i zir lo ve bawk,. Zingkarah kan la sawi ho dawn nia, Bawiha roomah va mu r'u, Khawhar inah a la riak a. A mut theih ang" a ti ta sawk sawk a. Diki te pawh chuan min rawn melh zawkin Terini nau pindanah chuan an lut ta a. Terini nu chuan, "Nang pawh i dik lo hi ti ve ziah suh. Thara thiamloh vek zawk a ni. Bakah Muansangzuali te unau pawh an sual ve tho alawm,." A lo ti hmak hmak a. Terini'n, "In ninawm, va mu r'u" a lo ti vat. An sawi zui ta lo. Ka hawn hnua kan intext-in Diki te nena an inlaichinna ka zawt ta a. 

"Ka nu te unau zinga upa ber fanu a nia..hrethiam rawh aw, lehlamah U Diki te nufa hi an khawngaihthlak ve lutuk a, Pa Thara fate hian an tiduhdah ve bawk sia maw" a rawn tih chuan ka ner sawk. Awih nge awih loh tur pawh ka hrethiam tawh lo. Mahse, Muansangzuali mitmeng fiah kâk kha ka mitthlaah a rawn lang a, ani ang rual lekin dâwt muhlum tawp chu a sawi ka ring lo. Diki chu Terini te chhung an nih avangin an ṭan a ni mai. Ka sawi zui duh ta lo va. Nakinah chiang zawkin ka hre tho ang. 

Zirtawpni hi chu ni zawng zawnga nuam ka tih ber a ni a. School kal pawh ka phur ve deuh. Chawhnu lamah hna kan thawhpui ṭhin a. Kei pawh ka inchei tehchiam lo. Class X -a class ka lak lai takin Canteen bula Muansangzuali ding chu ka va hmu fuh a, ka lungphu a rang ve ringawt. Class ka lak zawh chuan a lo awm tawh lo. Uniform a la ha lo va, a langsar deuh. Higher lama kan lecturer te hi chu ṭhalai vek an la ni ve a, kan inkawm thei phian zawk, mahse, sawi leh sawi hnu ka in awmna hian a zir lo va, in lama han inkawm tur paw'n veng kar a hla ṭhin sia, kei lah ka tuallim êm êm bawk si lo, kan inkawm thei vak lo zawk. An miss Puii hian min star deuhin ka hre nghe  nghe, mahse, ṭha ka tih zawng a nih loh piahlamah mipa a ngam danah ka ngaina tehchiam lo. Amah ai chuan Miss Biteii hi ka ngaina zawk mah, mahse, ani lah hi patil tia sawi theih ni si lo hian a pa thûng mai a. A kawngkal te reng reng pawh a nu ve zîm zêm lo. Kawm erawh a nuam phian zawk. Sports lam hi ka tui ve viau a, ka ti ve thei zûl. Volleyball hi nuam ka ti zual a, Break lai hian naupang ho nen a remchan chuan kan beng ve ṭhin. Vawiin pawh hnathawh tur a tam lem lo bawk a, ban nan a la hma si, kan beng leh a. Min lo thlir ve ṭhap mai. Kan inkhel zo, thlan hluama kan office-a ka lut tur chu office kawngkhar bulah Sangpuii leh a ṭhiannu Heleni te an lo ding a, Heleni chuan nui var var chungin, "Sir hi i van thiam êm êm" a lo ti ngei. Nui chungin, "Thiam loh kha.." ka lo ti ve a. Sangpuii erawh a ngawi ngal thung. Biak duh viau mah ila; Heleni ka venthawn vang zawkin ka be ta lo. In ka thlen hnuin ka thlan nasa bawk nen, ka inbual a. Inbual zawhah eirawng ka bawl nghal. Zoa te min thartem ve maian ka hih mawlh mawlh lai chuan kawngka an rawn kik a, lut tura ka tih chuan Muansangzuali leh mipa naupang ngo veng hi an rawn lut a, Sangpuii chuan êm a phur bawk. 

"Sir, ih, chawhmeh kan lo zuar a" a ti a. A lai deuhin ka hria. Ka tho vat a, "Eng chawhmeh nge" tiin a êm chu ka chawithlaksak vat. 

"A hrang hrang" a ti mai a. Bawkbawn te, tomato te, zikhlum tih vel a lo nia. 

"Tomato hi ka lo lei ang, engzat man nge?" Ka tih chuan, "60 man a nia" a ti a. A nau chuan ka ṭhutna pindana dawhkana ka dah naupang thawnthu ka hawh ho chu va en vatin, "Û, hei a ngaihnawm hmel lutuk" a ti chûl a. A û chuan zah hmel lek lek hian, "Dah rawh, mi ta a nih kha" a lo ti vat. 

"A ho lutuk, pek a la hun chuang lo, hawh rawh se. Mondayah i rawn keng mai dawn nia" ka lo ti a. A nau lah chu a lawm khawp mai, a pawm hlu hlu mai a, lehkhabu chhiar a lo ngainat ve vang nimaw ka ngaina sawt mai. Tomato man ka pek hnua chhuah mai an tum lai chuan, "Heng chawhmeh hi in kharchhawng ve mai mi?" Ka ti a. Min melh zak zak chungin, "Aw..Ka pa nupuiin an khua ami a chah ṭhin a," a ti a. Ka nu tih chu a hreh ve ngâng ngâng khawp mai. 

"A lo haw tawh mi? A tlan khan ka hre sia, nizan khan" ka tih chuan za lo zeta nuiin, "Zingah an rawn haw lehnghal" a ti sap a. A nau chuan, "A pu, lehkhabu chu i phal tak tak maw?" A lo ti a. 

"Umm, tikhan va chhiar la, thawhṭanniah i û hi i lo kentir dawn nia" ka ti a. 

"Keimah pawn ka lo keng thei, middle schoolah khan ka kal ve reng alawm" a tih chuan a luah ka tuaisak a, "Aw le aw le,." Ka ti a. An chhuak zui nghal. Diki chu leh! Ka nei peih tawh lo te kha a tia, zingah a haw leh tho sia ka ti rilru a. Engtin emaw Muansangzuali te unau hi la ngaihven a ngai dawnin ka hre tlat. Aizawlah pawh fahrah rethei leh lainatawm tak tak ka lo hmu nual tawh, mahse, hemi te unau hian min dek bîk tlat. A ngaihna pawh ka hrethiam tawh lo. 

Zanah Zoa a rawn kal a, "In nu i rim ziah bik a, zanin chu kan nu rim ve tawh ang" a rawn ti a. Zu rim a nam thar thar bawk. Kei hi ka vannei a, ruihhlo hian min tibuai ve lem lo, zu erawh MA ka zir lai khan ka in ve tawh a, eng emaw chaw eikhawm leh picnic nikhua velah ka in ve thei mai bawk. A bak erawh ka ti ngai lem lo. Zial erawh ka heh khawp a, ka nu min hauh tamna ber a ni. Kuhva pawh ka ei nasa lo, chaw eikhama ei hi ka duhtawk deuh mai. 

"A pawi hleinem..kan rim ang a a ni mai lawm" ka ti a. A bialnu pawh ka hre chuang lo. 

"Tak taka kan nu pawh a la ni chiah lo, kan inbe ṭan ve deuh mêk zawk, sawtah Venglai ami a nia" a ti a. Ka ring rêngah. 

Ka insiam zo a, kan chhuak ta a. Terini pawh ka va hrilh, a rawn titau lek lek lehnghal. Inrim tlut tlut pawh inhne a nâ a, ka duh bik lo. Venglai kan kal tak rau rauah chuan Pu Ramtea te ina penkawi ka rawt a, ka kal khât angreng a, chhungte anga ka neih ve te kha an nia. Tlawh ve hrim hrim ka duh. Kan va luh chuan Buangi'n min lo be nghal sawt sawt a. U Kaia a lo ramvak daih chu niin, pu Ramtea chuan, "Kar hmasa Ningani khan sakhi a rawn kap a, rawn hleh che kan tum tehlul nen, ṭhenawm hnai an rawn lut a, an chan an chan a, kan ei tur pawh awm lo lek lekin an lei ta hlawm sia, a pawi tak tak a ni. A rawn kah leh chuan ka rawn be tawh dawn che nia" a ti chuar chuar a. Sakhi sa ei a châkawm tehlul nen, ka ui ve angreng. Buangi'n, "Thil ka hria a nia aw." Nui tet tet chungin a ti a. Ka nui ve ringawt. Amah bawk chuan, "Nakinah lo la leng la, hrilh duh che ka nei a nia aw" a ti leh a. A hma aiin a thutak deuh bawk. 

"Sundayah rawn len ka tum dawn nia" ka ti a. Zoa'n min tur ve sek bawk nen, kan chhuak leh ta phawt a. Step thui vak lo kan zawh leh hnuah a star te in chu kan thleng ta a. A nu nen chauh an lo awm a. Tleirawltê kan rim dawn emaw tih nak alaiin keimah nen kan inrual vel ang tih tur a lo nia. Zoa hi kei aiin a nau zawk bawk. Engti tiha Zoa hian duh nge maw a nih ka hrethiam lo. A hâng reuh si, a sam lah a la tibuang ve deuh lehnghal a, a pian chu a intiat thla pût ni maiin ka hria, a tawi reuh bawk si. Mahse, ṭha tihzawng inang hek lo le. Zoa lungdumtu a nih miau chuan sawisel sak ka duh lem lo. Fel erawh a fel khawp mai, kei pawh rei tak inhre tawh ang maiin min be nghal siam siam a, a nu pawh chuti tho chu. Thingpui pawh vawi hnih ngawt kan in. Kan haw lamah Zoa chuan, "Eng nge ang i tih?" A ti ta a. 

"A fel khawp kha.." ka ti ringawt. A hmel lam chu ka sawi hreh ve deuh. 

"Nia, a hmel hi chu a ṭha hran lo, a fel êm a, hei hi ka duh chhan" a ti ve mai a. 

"Eng nge a thawh" ka tih chuan, "Sahdah a nuai ṭhin a, Aizawlah te pawh a thawn ṭhin, kan khuaah pawh a sahdah vek alawm an hmuam" a ti a. Mahni phak tawk hnathawh hi a lo zahawmin a lo ṭha ber mai. Thlengi pawh chu a chhuanawm ka ti hle. Tikhan hah êm êm lovin sum a lalut dawn tihna a ni mai a. 

Ka mut rualin Terini call ka dawng nghal zat. Khik vur vur pahin ka pick up a, "I haw tawh em?" A rawn ti a, lungawi chiah lo awrâwl a ni. 

"Ka mu chiah" ka ti a. 

"Zan dangah chuan hmun dangah leng tawh suh" a ti vei hmak a. 

"Aw le boss" ka'n ti ngial a. A hlim hmel leh ta deuh, "Ateii pawh a haw ve leh tawh a, naktukah eng nge i tih dawn?" Inzawm lo zet hian a rawn ti hluai a. 

"Ka hre mai lo, Zoa khan an huan kalpuiah min sawm a, tihtur êm êm a awm lo bawk a, ka zuk kal ve dawn mawni ka ti" ka ti a. Zoa te hian huan puitling a tih theih tawh ang chu, chu chu an nei a, sum pawh an lalut ve nual tawh a ni. Ina awm tlawng ai chuan tiin kal ve ka rilruk deuh. 

"Hmm, lo leng zawk la" a rawn tih chuan, "Chhun chhuna nula rimte chu" ka ti vat. 

"A ho e, tumah an awm dawn lo" a tih chuan ka ina a rawn len ṭuma kan puitlin hman loh kha chhunzawm ka châk deuh thut. Mahse, huana kal ka châk ve deuh bawk si,. " a, ka hre lo le, khua te var phawt se aw" ka ti ta ngawt a. Ani pawh a aw ve leh diam tho. Duh aia inhnaiha tum lawk miah loha inneih thut te hi a la ngai ang tih ka hlau ve deuh. Zirtirtu ka ni a, ka awm thar ve chauh bawk nen, han neih nghal rup emaw sâwn han thlak deuh ngawt kha zahthlak ka ti ve deuh a ni. Kan inbiak zawha ka ṭawngṭai zawhah whatsapp-ah ka lut a, groupah ka lut kual vak. Taka ka sawi theihnghilh a, Baby sawi Ziri a tih khan min lo be tawh. Ṭha takin ka chhang ve mai a, tunah chuan Terini nen kan nih vel a hria a ni maithei, min rawn be tawh lo. La hmuh ve hrim hrim a ngai a ni. 

Ka kawmthlanga theihai kung lian ve tak mai zara mi pakhat inkhai reng chu ka zuk hmu kur a, ka che thei der bawk si lo, thawh ka han tum ṭhin, ka tho thei thlawt bawk si lo. Mangang zetin ka insawh ka insawh a, auchhuah ka tum a, ka aw a chhuak thei bawk si lo. Maimizialin ka awm tih ka hria, ka theihtawpin ka ke zungpui chu tihchet ka tum ta a. Ka tiche thei ta hlauh, ka harh ta mial a. Ka mut erawh chhuah namên lohin a chhuak thung. Tui in tuma bottle ka  ban mêk laiin ka phone a rawn nghawr ta dat dat a. Tun ang zanlai pelh tawha call dawn chu phut zawk a awl duh riau. Tei a ni. Hlauhthawnnain min tuam nghal hlup, tun angah chuan zualko bak mi pangngai chu kan incall ngai lo. Ngaihṭha lo zeta ka lak chuan, "Mam, ka nu hi a thaw a hah a, hei damdawiinah kan chhohpui dawn mêk,." A rawn ti ta chiah a. Ka thlaphanna a rawn belhchhah chiah. Ngaihṭha lo fê hian, "Engtin nge a awm?" Ka ti thuai a. 

"A la hah angreng a, hei ka  kal dawn, kan thlen hunah ka lo bia ang che" a ti sawk sawk a, a dah nghal, ka ṭhuchhuak a, zial ka ṭan bawk. Ka nu hi thawhah nei ṭhin a ni a, ka pa boral hnu hian a nasa zual. A inentir ve fô naa, doctor te hian a natna an hre fuh lo nge an damdawi chawh pawh a ngeih thei meuh lo. A pum lam hi a nih ka ring deuh a, thil a ei ṭhat loh deuh te, kawruaka a awm rei lutuk te hian a thaw a hah ṭhin. Damdawi ina kal ngai khawp chuan a la awm ngai lo. A hah hle a ni ngei ang, nebulizer kan lei a, a hîp mai ṭhin kha a nia. Kei ka awm bawk si lo, Tei chuan hrehawm a ti ngawt ang le. Ka muhil leh mai thei si lo, an chanchin a zirin haw lawk te pawh a ngaih hmel. Tei chuan min rawn be leh a, Oxygen an pek thu a sawi a. An lo admit bawk. 

"Ka rawn haw mai dawn mi? Nangmah ringawt chu, i buai dawn êm mai" ka tih chuan, "Lo haw thei la chu ka duh khawp mai. Awmpuite a ngai dawn sia, in lam pawh a ngaihtuahawm" a ti a. 

A tlai tawh si, sumo service han biak dawn pawn, ka rilru a hah angreng hle. Hma tawkah tho ila châng risk ve tawp mai ang ka ti ta a. Alarm ka set a, ka mu leh ta rih. Ka mutchhuak a bo vek, a chhe ber thlengin ka ngaihtuah a, ka nu hian zan khat mit chhin te lo tawk ve ta se; ka nau nen ringawta hringnun chhiar chu harsa ka ti khawp ang. Pa kan nei tawh bawk si lo. Ka'n ṭawngṭai ṭha leh thul. Zing dar 3 velah chuan ka mut pawh a rawn chhuak ṭan a, ka alarm rik thlengin tui takin ka muhil ta a. Ka insiam sawk sawk a, mipa hi chu kan awlsam bawk a, ka insiam rei hran lo. Dar 5 pelhah Venglai lamah chuan ka chhuk ta nal nal a. Sumo hi dar 6 velah a chhuak tlangpui. Kal pahin kan Headmaster Pu Biaka ka call a, a la mu tih hriat zetin a rawn chhang a. Ka chin chu ka hrilh ta zung zung a, engtianga rei nge ka châm dawn ka hriat loh avangin leave te pawh a hrana ka lak a ngai maithei a ni. Damlohna lam a ni bawk a, Pu Biaka pawh chuan a lo hrethiam khawp mai. Ngaihṭha takin ka dah ta a. In chungte chu nakinah ka be mai ang ka ti. An la tho dawn si lo va. Sumo counterah chuan ka ṭhu ran a, veivak pawh an la awm mang lo. Rei tawkfang ka ṭhut hnuah a hmaa ka kalna kha a rawn lang ta a. Driver hi Patêa a ni a, ka lo be ta vat. Vanneihthlak takin seat ka chang ve hlauh mai. Kal hmain counter bula thingpui dawrah ka inhnawh puar a, sumo-ah ka ṭhu ta vâng mai. Tichuan, helhkam nei rûn chungin Aizawl lam kan pan ta vang vang a. Tei nen kan inbe bawk, ka nu chu a âwm a lo na lehzel nen, a khuh nasat thu leh chu chuan a thaw pawh a tihhah tel thu a sawi a, ka va khawngaih tak. Chaw eia kan chhuk tih loh chu peng khawmuang loin kan tlan a, titi pawh ka titi peih meuh lo. Mamawh lama ka haw zawk thu ka sawi mai zel a, zan lamah mut ka hmu ṭha lo nen, ka muthlu ta lûp lûp a. A zia phian. Aizawl chu dar 5 rik hma deuhin kan thleng ta a. Damdawi in tlawh chu duh viau mah ila, in thlen phawta ruahmanna siam ka ti ta zawk a. In chunga chabi ka lam chu Siami a lo ṭhu rûn mai a, ka hmu thut chu ka phu ve zawk mai. Kan inhmuh lohna a rei ve deuh tawh nen, "Eirawng ka bawl kêp che aw. Zuk intifai la, i lo chho mai dawn nia" a la ti zui. A fel hi zawng a fel ve a ni. Ka intifai thuak thuak a, ril a lo ṭam ve tawh bawk nen, ka chho ta a. Pa ber a hna thilah a lo zin a, Siami leh a nu bakah Siami fa hmasa chauh an lo awm. Midang zawng chu inneihnaah an kal a niawm e. Nuber chuan, "I nu chu a zia lo tak tak a ni. Tei nen chauh an ni bawk sia" a ti mial mial a. 

"Nia, in lo awm a, a vanneihthlak..in lo buaipui a" ka ti a. 

Siami chuan, "Tihian ei kham ila, chaw kan han pe dawn nia. " A ti a. Ka melh vak, "Chaw te in lo han pe a ni maw? In va zahawm ve aw" ka ti a. Ka rilru tak tak ka sawi. 

Nu ber chuan, "Damdawi in chaw zawng a tui lo êm mai. A hautak lo êm mai, mi hrang pawh kan nih loh hi" a ti a. An fel ka ti takzet. Nia, an in hi kan luahna a rei tawh khawp a, kan pian hmaa ka pa ten an luah pawh khan an in an sak ṭhat hnuah pawh an luah leh mai a. Chhungkhatah hian kan innei deuh tawh tak tak a, kan tih ve theih tawk tiin a chawhmeh zawrh tur te hi ka nu hian a pe ṭeuh zel. Eng emaw hna rum lam thawh an ngaih paw'n hlawh nei lem loin ka pui ve lâwp lâwp bawk. Mi nun tluang an ni bawk a, ṭhenrual pawh an ngah. Kan ei khamah Siami chuan tiffin chu a siam ta zung zung a, a scooty-in kan kal ta a. Kan inngaihzawn lai pawh khan a hmeichhia zawk hian min phur ṭût zel a, ka khalh chang erawh a awm ve tho. Kan thleng a, kan lut nghal. Female ward lamah ka nute chu an awm a. Kan va luh lai chuan ka nu pawh a lo harh ve hlauh mai. A cher riauin ka hria, ka ngaihbel emawni. A sam a thûr bâm a, Chaw chu an ei zui nghal. Ka nu erawh chuan a ei tam lem lo. "Siami hi kan tibuai ṭhin teh e, Mama a awm tawh tho a, a bawl ve thiam vek a, naktuk aṭang chuan aman min rawn pe zel tawh rawh se" ka nu chuan a ti a. Siami lah chuan, "A bawl tui awm lo êm mai" a la ti zui. Kan han nui leh rih a. Nurse hoin chhuah tawh tur an rawn ti sek sia, dam vat tura inthlahin kan chhuahsan leh ta a. 

"Ka lo khalh ve tawh dawn mi?" Siami bula ka tih chuan, "Ngai lo" a ti deuh tlat. Kan inkhalhchhuak a, in lam kan pan dawn emaw tih nâk alaiin Bawngkawn lamah kan liam phei ta daih. "Khaw nge kKA SAVATÊ.. (2)

Ziaktu : Toni Râlte

Tihtur awm hek lo, umzui pawh tum ta lo chuan ka in lam ka pan leh ta zawk a. Tu tak ni ang maw? A sam kha a sei lutuk lo va, kawr uk lam chu a ha ngei mai a. A bak a inthuam dan ka hrechhuak zo tawh lo. Ka han mut leh hnu pawh chuan ka muhil thei lawk lo, ramhuai ni si lo, hmeichhia lehnghal mahnia thlanmuala han kal tawp mai chu a huaite pawh a huai reng reng ka tia. Mipa ṭhenkhat pawn thlanmual hi chu an ṭih ṭhin kha a ni ngai a. Eng emaw tak zawng a ni ngei ang. A tukah Office-ah a thuphungin ka sawi a, Pu Biaktea chuan, "A tu chu ni maw? A va huai reng reng ve le" a ti hlut a. 

Madam Sangpuii'n, "Kei thlanmual hi ka ṭih riau, chhunah pawh mahni chuan ka kal hreh" a lo ti ve bawk. 

Madam Zuali chuan thutak fê hian, "Hmeichhia a nih si chuan rin ka nei, Tlem lai khan kan pate lui kal haw hian an hmu ve tawh a. Mahse, amah a ni ngei em tih erawh ka sawi ngam lo" a lo ti a. Kan bengkhawn hlawm hle. 

Thana chuan, "Tu nge inpa te hmuh chu" a lo ti vat a. 

A ngawih det hnuah, "Saw lai Vengthara ami Muansangzuali saw a niawm e. A nu thlanah a lo ṭhu a, a lo ṭap a niawm e.." a ti ta a. Muansangzuali ka hre ve lem lo. 

"Eng ang rual nge " ka lo ti a. 

"Tleirawltê mawle, Class XI pawh nikum kha chuan a rawn kal ve tak kha mawle, class xii hi rawn kal a tum ta lo nge mawni dawn ni, lehkha pawh a nu boral hma kha chuan a thiam, kan school aṭanga matric pass kha a nia, English leh Ss-ah pawh letter a hmu ve hial asin. A khawngaihthlak reuh e" a ti vawng vawng a. 

Madam Sangpuii chuan, "I sawi takah chuan ka hrechhuak ve chiah, nia, thlana a kal hi hmu an awm zauh zauh tak asin. A nu kha a ngai êm a, a nuhrawn lah saw fel mawlh hek lo, a lainatawm ngawt tak asin" a lo ti ve bawk a. Ka bangbo viau. 

"A nu chu engtikah nge a boral a? A va mak ve aw. Amah a nih chuan a khawngaihthlak êm tak a nih chu" ka ti ve hluai a. 

Pi Zuali'n, "Nikum lawkah khan mawle. An fehnaah lui kan a ngai a, tuiah a tlahlum alawm mawle, an pa a kal tel si lo va, a thi deuh thut nen, Sangpuii leh a nau Tleipuia bak saw fa an nei lo va. A pa hi mistiri a nia, marawhchu, zu a duh ve lutuk a, an nu boralna a la rei loh tehlul nen khaw ṭhenawm nuthlawi a nei leh nghal mai bawk sia, Sangpuii aia û awrh tur a fanu a rawn chhawm lehzel bawk si, an rethei unau a nia. Thawkkhat lai phei kha chuan a fahrawnte a vaw nasa lutuk kha an ṭhenawmpa Pu Tlana va tlan lutin an intibuai deuh titih tawh alawm. A pa ber saw a nep lutuk a, Sangpuii tê chu lehkha a thiam thei sia, kal zel se ka duh asin le aw" a ti ta mawlh mawlh a. Ka mi hmuh kha amah a ni tih hre chiang lo mah ila, an sawi hmangah a nih duh hmel viau bawk nen, ka lo ralkhat lainat ve tawp. 

Lunch break-ah canteen-ah kan phei dial a. Canteen hi School tinin an dawr ve vek mai. A nghaktu Nu Nghaki hi nu phawk leh fiamthu duh tak a ni bawk a, a hnathawk Lawmi lah nelawm leh dawr nuam tak a lo ni bawk nen, an lun ve thei phian. Canteen-a paratha hlai hlep hlawp leh chana ka ei mêk lai chuan Thana'n min rawn nghawk zauh. Pawn lam a melh pah bawk, ka va hawi ve vat a. Canteen bul ṭhutna an siamah chuan tleirawl sam dum hlap, hmai tung lam deuh, a ngo nge a dâng ka ti zawk dawn, a vun zawng a êng hrim hrim e, chu leh a ṭhiannu niawm tak thau lam deuh hi an lo ṭhu a. Thana chuan zawitê hian, "Zinga kan sawi kha, Muansangzuali kha a nih saw" a ti sup a. Ka en nawn leh kher, Kekawr dum thawl hek hawk a ha a, chapal kaih a dum a bun bawk.Tshirt grey a ha a, tlereuh engmah a inbel lo, a sam a thlah mawl tawp a, a hmaiah pawh make up sulhnu a awm hran lo. Mahse, tleirawl hmelchhia zawng a ni mawlh lo mai. A hmel ngui tak avang erawh chuan a lang duhawm lo lek lek thei. A mitmeng a lian a, a hnar ngûl pawh a sang pangngai, a hmui chu a pan lam deuh mah nise, a sen hiam a, zuk leh hmuam a ti lo a nih ka ring nghal. Chutiang khawp chuan ka lo en ngun. Nizana ka mi hmuh kha a nih ka ring nghal thlap bawk. 

Thil chu kan ei zo va, ei man kan pek hnua kan chhuak chu Thana chuan, "Sangte, School i rawn kal leh dawn em ni?" Tiin a be ta hlauh a. A chhan hriat si lohin Thana'n a bia chu ka lo lawm ve ngawt bawk. 

Thana melh pahin, "Aw, hei admission ka rawn la ve leh dawn a" a ti sap a. A aw chu a fiah fai kher mai. 

A ṭhiannu chuan, "Sir, kan thiam loh kan lo zawt ṭhin ang che aw" nui chungin a ti a. Thana pawh chuan, "Tehreng mai" a lo ti ve vat. Kan School lam kan pan ta nghal a. Nilengin Muansangzuali chu ka rilruah a awm nia mawle! Ka star pawh a ni lo. A chanchin ka hriat tlemtê avang leh nizana zan rei tawha thlanmuala a kal hial avang khan ka ngaihtuah deuh a ni maithei. Kan haw dawnah Terini msg ka dawng a, "Zanah lo leng la" tih tê chauh. Mahse, ka tan a tawk viau mai, sawi lo mah se, len ka tum hrim hrim. Eirawngbawl a ngai lo va, a zia viau e. In ka tifai e ka tia, mipa hi zawng kan che phut phut a, hmeichhia angin kan sulhnu a mam ve vak thei lo. Ka farnu Tei ka ngai hle, ani hi zawng che fel thlarh reng mai kha a nia. Kan in kha englaimahin a bal ngai lo tihtheih a ni. 

Zanriah ka ei a, kei hi thil chin ṭha lo deuh ka nei pek a. Chaw ei paha phone en hi ka hrat tlat! Facebook video ka en ngei ngei. Sim a tan a duhawm ngawt mai. Ka ei khamah ka insiam a, dar 7 velah Terini te ina leng tur chuan ka chhuak ta a. Zanin chu hlawhtling turah ka inngai bawk a, ka ke pen pawh a zang haih haih viau. Ka va thlen chuan an lo awm ṭhap a, a nau mipa chu ka hmu fô tawh, Terini nau tih ka hre lo mai mai zawk a ni. Ka luh hnu reivakloah a chhuak ta daih a. A pa nen pawh kan inkawm thei viau mai. Thingpui sen hâng kan in zawh hnuah Nu ber chuan, "Chami pa damlo chu i va kan ang hmiang" tiin an pa a melh a, a zei tlat. An pa pawh chuan meizial chu akin, "Nia, kan lang tam lo êm mai, tirawh, i va kal ang" tiin a tho nghal vut. An chhuak a ni nghal mai. Hei bak baka golden chance..!

Terini chu ka ṭhut hnaih a, a lai ve deuhin ka hria. A kut lain ka hmet neuh neuh a, a la sawn bîk lo. 

"Chuan" ka'n ti hluai a. Min rawn melhin, "Eng nge?" A ti vei hmak. 

"Kan ni dawn ta em?" Ka ti thawr a. 

"Awii! Sir, i ti tak tak ami?" A ti deuh hliai a. 

"Ti tak tak lo ila ka lo leng dawn mi? Chuan, Sir min ti tawh suh, ka student pawh i ni lo. " Ka ti nghut a. 

A nui var var a, "A nih Sangzual.., min duh tak tak ami?" A ti a. A kut ka hmer na salh. 

"Aw ka duh che. Min duh ve tho tiraw?" Ka ti a. Ka confi lutuk chu ka innuihzat lek lek. 

"Kei ni ang te chuan kan phû lo che e, nakinah kei aia ṭha leh lehkhathiamte i hmu ang a, min kalsan leh daih ang" thutak angreng fû hian a ti ta a. 

"Chutiang a ho. Sawi chiang la" ka ti a. 

Chiang zeta min rawn melhin, "Ka duh che alawm" a ti sap a. Kawngkhar lam melh zukin, ka lamah ka kuai hnai a, ka fâwp ta a. A zei kher mai. Ka fawh tawhah a la zei ber awm e. Min ti zauthau thei takngial dawn alawm mawle. Kan infawh zawh chuan sawi tur ka ngaihtuah rauh rauh, a vâng angreng. Ani pawh a ngawi reng a. 

"Ka inah lo la leng ve rawh aw" ka ti a. 

"A zahthlak e, mi an ṭawng thei si" a ti niah niah a. 

"A ho lutuk, engtin kan va awm dawn pawh ni hlei lo" ka ti a. 

"Nia, lo la leng ang, tak taka hmeichhe khawih tur chi a awm chuan min hrilh hreh suh aw. Insuk te, rawngbawl angte pawh" a ti zung zung a. Ka lawm hle. 

"Insuk hi zep loh chuan ka ning thei tawp" ka lo ti hmanhmawh a. 

"A nih ka ring, mipa tan chuan a ninawm ve lawm" a ti ve mai bawk. 

Sawi leh mai tur ka vân bawk nen, "I û kha engtia boral nge?" Ka ti a. 

"A nerve vang a nia, i lo hre ve ni maw?" A ti a. 

Zoa'n min hrilh thu ka sawi a. A nu leh pate lo hawn hnu lawkah ka haw ve ta a. Ka hlim phei vur vur khawp mai. Bialnu ka nei leh ta chu a nia. Heta ka awm reng dawn phei chuan kan inneih mai te pawh a la rinawm. Kan inhrechiang chho zel ang chu. Ka in ka luh hmain thlanmuala kal a lang leh ta tlat! A lo awm leh maithei asin ti rilru chungin thlanmual lam chu ka pan ta a. Lo awm leh se tih ka duh a ni ber mai. Ka phei ṭhem ṭhem a, mak tak maiin a lo awm leh tlat! Sana ka en a, dar 10:15 a ni. Min hnungchhawn zawngin a lo ṭhu leh a, thawm dim vak tawh loin ka inpal phei bawrh bawrh a. 

"Mami, eng nge i tih?" Ka ti leh ta thâwr mai. Tun ṭum chu a phu ta lo ve. Ka thawm ka dim lo bawk nen. Rawn hawilet a tum lo nia ka hriat avangin a hma lamah chuan ka va kal a, amah hmachhawn zawng chuan ka ṭhu ta hmak mai. Umm, kha tleirawl ngei kha a ni chiang e. Muansangzuali an tih ngei mai kha. A hmalam a melh ngar a, a hmel a ngui vek bawk. Ka va ṭhut hnaih deuh a, "Buaina i nei em ni?" Ka ti sup a. Min rawn melh ve ta chiah. 

"Buaina i nei zawk em ni?" A ti let ta khauh mai. Ka hrilhhai ngei mai. 

"Zana hmeichhia thlanmuala kal chu a him lo asin" ka ti ta a. 

"Eng nge pawi? Thi daih mah ila eng nge pawi?" A ti leh ta a. A awka erawh a sang hran lo. 

"I thih daih ten, i nau engtin nge a awm ang, i khawngaih lo mi?" Ka ti ta hmiah a. Mak tih hmel deuhin a meng kâwk a, "Nau ka nei tih i hria maw?" A ti hâ a. Ka bu nghut ringawt. 

"Haw tawh rawh, i chhungte pawn an ngaihtuah tawh ang che. " Ka ti a. A nui lui nghek, "Ngaihtuah a! Eng atanmah min ti lo. " A ti sehchilh nak. A hmel pawh a dur deuh khap. An sawi kha tak tak a lo nih dawn hi le. A va lainatawm reuh tak. 

"Hawh, ka thlah ang che. Hetah chuan zurui te pawh an lo kal thei..a ṭha lo" ka ti leh hram a. 

"Sir, keimahin min awmtir rawh. Anu thlanah hian ka him tawk alawm. " A ti dam thlap. Ka pa boral ta ka hrechhuak zawk mai. Chu tleirawl chu ka lainat zual sauh. Engtia han tih chi nge ka hre bawk si lo, miin min rawn hmu dun ta se, eng emaw angah te an ngaih ka hlau deuh bawk si. Kalsan ngawt chu dikin ka hre bawk si lo.

"A nih chuan ka lo ṭhutpui ve ang che. " Tiin ka ṭhut dan ka siamrem sauh sauh a. A ngawi reng. A melh ngai a melh leh tlawk tlawk. Thlan chunga hming inziak chu ka phone flash light-in ka han ên a, 'Lalrinmawii, kum 41' tih leh a thih ni leh kum a inziak a. A la naupang hle mai. 

"Mami, kei pawn pa ka nei tawh lo asin. Mahse, hetia indawmkun hian awmzia a nei miah lo a nia. Hmalam pan hi a ṭha ber, kan lungngaih avangin an rawn nung leh thei tawh lo" ka ti duah a. 

A ṭhen sak a, "Ka hria alawm. Ka thih ve phawt loh chuan Anu hi ka hmu thei tawh dawn lo tih chu, mahse, tihian ka chanchinte ka hrilh ṭhin a, a hre ve thei ang tiraw?" Mittui tling pam chung hian a ti a. Sawi tur a vâng duh ngei mai. 

"Aw a hre ve turah ngai ang aw. Mahse, ka sawi tawh angin hetia thlana kal hi a sâwtna a awm lo..a him lo, hmeichhia i ni bawk si" ka ti a. 

"Kan in saw a nuam lo êm alawm" a ti sep a. 

"Hetah i kal ṭhin tih an hria em?" Ka ti vat. A bu nghat a, "Ka nau muthilh hnuah ka kal ṭhin. Mahse, an hria..engahmah an ngai lo, Apa pawn" a ti a. Ka thinrim thut, a pa hi nep ka ti lutuk. 

"Chhungte dang in nei lo mi? I nu chhungte pawh..chutah chuan awm daih ula.." ka ti a, nge maw ka lo buaia ka lo inrawlh ve chiam ka hrethiam tawh bik lo. He tleirawl hi venhima a tawrhna aṭanga chhanchhuah ka duh ngawih ngawih a ni ber mai. 

"Anuteii leh apû te chu an awm a. Mahse, an harsa ve lutuk a, bakah Nuteii chu a pasal te inah a la awm bawk sia, apu chu an chhangchhe sia, piteii pawn awm tur chuan min ti reng, an rethei ve êm a, ka tibuai ngam lo alawm. Bakah Anu leh Apa te in hi chhuahsan ka duh lo, ka chhuahsan chuan ramhuai pahnihte sawn nuam an ti dawn lutuk a, anmahni tibuai tur hrim hrim pawn hrehawm mah se, ka awm ve tlat dawn" a ti ta nghat nghat a. A la naupan nen a rilru a puitling reuh hlein ka hria. 

"I pa bulah in sawi ngai lo mi? I nuin a tih dan che u chu" ka tih rual rualin, "Nu a!? Nu ka nei tawh lo, misualnu saw engtikahmah ka nu a ni ngai lovang. Apa maw hrilh ngai loin a hre vek alawm, mahse, keimahni zawk min hau zel a. Kei hi chu engtin pawn min ti rawh se, ka tuar thei. Bawihpuia an tiduhdah ve zel hi chu…" a insum zo ta lo nge a hmai a hup a, a ṭap ta hlawp hlawp mai. Ka lum pup pup a, engtin emawni ka awm. Kei a hriat ngai pawh ni lo lakah tiang khan a inbunruak a, a nun chu a hrehawm thawkhat ve dawn a ni tih ka manthiam nghal. Ka va kuah ta thâwr a, a lu-ah chûlin, "Ṭap bawrh bawrh rawh. Ka hrethiam che aw." Ka ti dam thlup a. Mahse, a ṭap rei lo. A mit chu a sên râm a, "Haw tawh rawh aw. Naktukah School i kal dawn si. Thawh i hai ang. Hawh, ka thlah ang che" tiin ka kaitho a, a tho ve mai. Min hlau lo va, ka bulah a thla a muang tih hriat taka a han ṭap mai te khan min lainattir zual a, engtin emaw ṭanpui dan la ngaihtuah ngei pawh ka tum nghet hmak mai. Vengthar hi kan School panna kawng peng piah lawkah a pan thlakna a awm a. An in pawh a lo hla lem lo, Assam type niin a ṭha ve pangngai, a lo thim ṭhap tawh a. Veranda light erawh an on thung. A luh hma chuan, "Sir, ka lawm e. Ka zak lo tiraw? Tuma bulah sawi suh aw" a ti sar sar a. 

"I ho lutuk, nakinah kan la inkawm chiang dawn nia. Muttui aw" ka ti a. 

Muthmunah chuan Muansangzuali, Sangpui tia an koh ṭhin hmel hlir chu ka mitthlaah zu châm a mawle! Ka khawngaih takzet a ni. Ka nu ka hrilh chuan a khawngaih ve ngawt ang. Engtin nge ka puih ang aw tih ka ngaihtuah a, ka bangbo deuh. A nau te chu awmpui an phal chuan awmpui ta mai ila tihte ka ngaihtuah a, a tlachawpa ngaihtuah turin ka dah ta rih. Kan inkawm tak daih avang kha phone ka lo en si lo va, Terini msg a lo awm tuar mai. Mahse, a thinrim lo chuan ka hria. A tukah phak chuapin ka tho a, zing lam hi chu chaw ei hi a va tui lo thei tak. Chaw nghei erawh ka duh ṭhak lo. Ka thawhpuite hi an inchei êm êm lo bawk a, kei pawh hak nuam nuam ka ha ve mai zel. Vawiin pawh Tei min chahsak chapal kaih nen ka kal ve leh thawr mai. Golden card renew leh siamtir a ngaih avangin chawhnu kan off dawn a, a zia hle. Insûkna chance a ni mai. Tui hi lei tur a awm a, 1000 lts hi ₹400 in kan lei. Ka heh lo khawp a, ka ring rei thei khawp mai. Insûk tak hi chu tuikhur ka hnaih bawk a, ka va insu mai zel. Sangpuii ka zawng ru deuh a, ka hmu mai lo. A kal lo a ni maithei ni. Kan bang a, kei pawh tuikhurah ka va insu. Zoa nu a lo insu ve a, ani hi a ṭawng duh bawk a, a titi ka ngaithla a ni deuh mai. An pa chhungte sualzia te a sawi tak bawrh bawrh a, hmeichheho tak hi chu aw. Mak tak an ni, Mo tiduhdahtu pawh hmeichhia, pasala chhungte ngeih lotu pawh hmeichhia tho. Pathian hian a siam danglam bik te pawh a nia nge. Thawmhnaw ka zar laiin Terini a rawn lang heu mai. Mak ka tih rualin ka lawm bawk si. 

"Hengte chu min suktir tur alawm. I va â tak" a ti bawrh bawrh a. Min duat ṭan hle mai. Siami aṭang khan ka bialnute laka pangchan vel hi ka ching dawklak a, ka care ve tho rualin an lakah ka beisei a sang zawk tlat tawh. Nuthlawi zûna uai tawh kha ka ni ve miau a, a awm lo hran lo. 

In chhung kan luh chuan a hawi hrek hrek a, "I va han rem thiam lo tak" tih leh ṭhutthleng te chu siksawi a rual nghal a, ka bel dahna leh bawlhlo dahna burte chu a sawn kual ta vek. "Ka room pawh saw va en teh, a dik lo em?" Ka lo ti. A va lut a, a chek hlak a, "Lo kal teh, khum hi hung sawn ang, i almira dahnaah hian dah ang" a ti nghal. Thuawih takin a sawi ang ang chuan ka ti ve zel a. Hmeichhua na nâ na chu an lo thiam deuh nge ni, kan han rem ṭhat hnu chuan kei pawn ka hmu dik thlup mai. Thingpui a lum rak rak a, "I lo kal chu ka va lawm" ka ti deuh sek. A nuteii a tlan a, a hman ve deuh a lo nia. A tihzia fû mai. Thingpui kan in zawhah inhnaih zetin kan ṭhu dun a, fawh leh ngawt mai loh chu tih vak tur a awm lo. Kan infawp rei telh telh a, Ṭhutthlengah chuan ka nam mu a, a chungah ka bawk nghal zat. Ka kut pawh a hlei ṭan, min dang eih lo. Thaw a rangin mipa tih takah kei chuan a tawp thlen mai ka pawiti tawh lo, ani pawh a chhing diar diar a, a thaw halh halh bawk. Ka sam pawh a ṭham nghet nget nget viau..ṭawng lo va chutia kan chet mawp mawp lai tak chuan kawngkhar rawn kik paha, "Sangzual, Sangzual" Baby'n a rawn tih takah chuan kan tho nghal zawt. Terini chu a insiamṭha nghal mawlh mawlh a, kei pawh ka sam ka tuai puat. Kawngka chu ka va hawng a, zêp nâk emaw Baby chu ka hmel huat titih, a rawn kal hun hi a timing lo ve thlawt. Nui vur vur chungin, "Ehem! Ka lo tibuai che u em? A pawimawh sia..Sangha i ei châk thu kha i sawi reng sia, U mawia ten an lo zuar a, i duh ve dawn em ka ti..phone i la thei malêk sia" a ti zung zung a. Tuin nge bialnu nena hmangaihna lipuia zuanthlak tum laia phone hmang zut zut ang le..

"Eng sangha nge? " Ka ti tham ṭuak a. 

"Nghalim ṭhah, an ti ṭha khawp mai" a ti a. Terini a va be daih. 

"Hetah lo zuar ve se la" ka tih chuan, "Kan inah an awm, han chho lawk mai rawh" a ti liam puat. Ka wallet kengin ka han chho a, A tuihnai viau, fun khat chu ka lei ta a. Ka ei châkna a rei tawh bawk a, lim nghek ila a ni mai lawm. Baby te lah chu an lo inkawm tui phian a, mahse, Terini chu an rawn call a, "Ka zuk hawng tawh ang e, min lo ko sia" tih leh din a rual a. Kan inthlah chu a ni nghal mai. Baby lah chuan, "Nuam inti bik siah" a ti deuh sek. Baby hi nula senior lam a ni tawh naa mipa hi a ngaihsak vak lo nge inleng a neih ngai pawh ka hre lo, Kohhranah hian a inhmang hle ringawt a. A hmel phei chu a chhe vak lo asin le. Hriati erawh an khaw ṭhenawm Lianpui ami nen an ni vein ka hria, kar tawpah hian a rawn kal ve ziah zel. Zanah ka bialnu ka rim leh a. A nuteii nen kan inkawm a ni mah zawk, a ṭawng duhin zawhna a ngah si, a ninawm lek lek. Khal zet mai, ngo ve tawk tak nuih heh zet mai a ni a. Kan vawikhat inhmuhna aṭangin min nel nghal hle. A lawmawm lamah ngai ang. 

Ka len laiin Terini pa chu an rawn call a, an inbe zo chu biak bik pawh nei lo chuan, "Diki te lah hi aw an buai ve reng mai a. Kha an pa zurui sual vangin a nih kha min lo biak leh ni, rawn tlan an tum deuh emawni" a ti hluk hluk a. An nu chuan, "Tlan lah hi an awlsam lutuk a. Thara pawh zu hi a duh ve lutuk a, kha Pu Thangzaua te ina a thawk pawh a thawh zawh meuh chuan hlawh lak tur mumal pawh a neih loh kha..zu manah a tlakral zel sia" a lo ti ve bawrh bawrh a. 

Chumi hnu darkar chanve chu a la tling lovang tihah Diki an tih te niawm tak chu an rawn lut ta a. Ka hmuh vawikhatna an ni lo naa kan la inbe ngai lo. Hâng lam deuh, sam kir bup mai, kum 35 bawr vel tur a ni a. A hmui duk deuh chu a chhah tup bawk. A zaidam vak lo tih en reng reng pawn a hriat. A fanu niawm tak chu Muansangzuali te nena inrualkhat awm vel, a nu nena inchhun deuh, a nu aia ngo hlek a ni thung a, a sam a tawi a, a sen thar bawk. An rawn luh rual rualin Diki chu a âng nghal buan buan a. "Ninawm lutuk, a rui sual ve ziah. Pawisa lah kan nei si lo, chawhmeh zawng zawng a paih darh a, chaw ten mi vawm thul. Ka nei peih tawh lo" a ti hlak hlak a. Terini pa chuan, "Zu a in ṭhin tih hresaa nei i nia, chutin inṭhen hlen ngawt a dik nang. A rawn hruai leh vat ang che u, a thuhrimin tunlai chu a nghei emaw ka tia" a lo ti chuar chuar a. 

"Awiii, nghei awzawng lo, A inhlawhna te hi ka hmu ngai hleinem, zu manah a hmang nghal zel a. Chhawr pawh an chhawr duh hlawm tawh loh hi. Muansangzuali lah School ka kal leh e a ti kual a, kan retheih rapthlak nen, a pa lahin a hnial ngam lo a niang chu, a school fees te saw ka pe dawn awkawng lo, duh leh aman tuak ve rawh se" Diki chuan a ti hlawih hlawih a. Ka harh kuar, he nu hi Muansangzuali pa nupui chu maw lo ni?! A engahmah hmain ka ngei deuh ringawt. Mipa ka ni hlauh zawk a, hmeichhia angin ei loh ka pe na ve lo mai zawk a ni. 

Feli chuan, "Sangpuii chu lehkha a thiam êm a, School chu kaltir hram hram zawk rawh u, nakinah in tan vek tur a nia" a lo ti dêk dêk a, Diki a ṭêk hle, "Awii, khawi lamah mah a hlawhtling lovang e. Zan reiah ka nu thlanah ka kal e a ti thul. Min timualpho zawng ngawt hian a awm a. Kimi pawn a zir tawh lo, awm ve mai mai rawh se. Thingtlang aṭang chuan sawrkar hna a hmu lul lovang" a lo ti leh chiam. A fanu chu Kimi a nih awm chu maw. Terini pa chuan min vengthawng deuh nge ni, "Insûm teh, kha Sir pawh inti hrilhhai alawm. A thuhrimin nang pawn i zir lo ve bawk,. Zingkarah kan la sawi ho dawn nia, Bawiha roomah va mu r'u, Khawhar inah a la riak a. A mut theih ang" a ti ta sawk sawk a. Diki te pawh chuan min rawn melh zawkin Terini nau pindanah chuan an lut ta a. Terini nu chuan, "Nang pawh i dik lo hi ti ve ziah suh. Thara thiamloh vek zawk a ni. Bakah Muansangzuali te unau pawh an sual ve tho alawm,." A lo ti hmak hmak a. Terini'n, "In ninawm, va mu r'u" a lo ti vat. An sawi zui ta lo. Ka hawn hnua kan intext-in Diki te nena an inlaichinna ka zawt ta a. 

"Ka nu te unau zinga upa ber fanu a nia..hrethiam rawh aw, lehlamah U Diki te nufa hi an khawngaihthlak ve lutuk a, Pa Thara fate hian an tiduhdah ve bawk sia maw" a rawn tih chuan ka ner sawk. Awih nge awih loh tur pawh ka hrethiam tawh lo. Mahse, Muansangzuali mitmeng fiah kâk kha ka mitthlaah a rawn lang a, ani ang rual lekin dâwt muhlum tawp chu a sawi ka ring lo. Diki chu Terini te chhung an nih avangin an ṭan a ni mai. Ka sawi zui duh ta lo va. Nakinah chiang zawkin ka hre tho ang. 

Zirtawpni hi chu ni zawng zawnga nuam ka tih ber a ni a. School kal pawh ka phur ve deuh. Chawhnu lamah hna kan thawhpui ṭhin a. Kei pawh ka inchei tehchiam lo. Class X -a class ka lak lai takin Canteen bula Muansangzuali ding chu ka va hmu fuh a, ka lungphu a rang ve ringawt. Class ka lak zawh chuan a lo awm tawh lo. Uniform a la ha lo va, a langsar deuh. Higher lama kan lecturer te hi chu ṭhalai vek an la ni ve a, kan inkawm thei phian zawk, mahse, sawi leh sawi hnu ka in awmna hian a zir lo va, in lama han inkawm tur paw'n veng kar a hla ṭhin sia, kei lah ka tuallim êm êm bawk si lo, kan inkawm thei vak lo zawk. An miss Puii hian min star deuhin ka hre nghe nghe, mahse, ṭha ka tih zawng a nih loh piahlamah mipa a ngam danah ka ngaina tehchiam lo. Amah ai chuan Miss Biteii hi ka ngaina zawk mah, mahse, ani lah hi patil tia sawi theih ni si lo hian a pa thûng mai a. A kawngkal te reng reng pawh a nu ve zîm zêm lo. Kawm erawh a nuam phian zawk. Sports lam hi ka tui ve viau a, ka ti ve thei zûl. Volleyball hi nuam ka ti zual a, Break lai hian naupang ho nen a remchan chuan kan beng ve ṭhin. Vawiin pawh hnathawh tur a tam lem lo bawk a, ban nan a la hma si, kan beng leh a. Min lo thlir ve ṭhap mai. Kan inkhel zo, thlan hluama kan office-a ka lut tur chu office kawngkhar bulah Sangpuii leh a ṭhiannu Heleni te an lo ding a, Heleni chuan nui var var chungin, "Sir hi i van thiam êm êm" a lo ti ngei. Nui chungin, "Thiam loh kha.." ka lo ti ve a. Sangpuii erawh a ngawi ngal thung. Biak duh viau mah ila; Heleni ka venthawn vang zawkin ka be ta lo. In ka thlen hnuin ka thlan nasa bawk nen, ka inbual a. Inbual zawhah eirawng ka bawl nghal. Zoa te min thartem ve maian ka hih mawlh mawlh lai chuan kawngka an rawn kik a, lut tura ka tih chuan Muansangzuali leh mipa naupang ngo veng hi an rawn lut a, Sangpuii chuan êm a phur bawk. 

"Sir, ih, chawhmeh kan lo zuar a" a ti a. A lai deuhin ka hria. Ka tho vat a, "Eng chawhmeh nge" tiin a êm chu ka chawithlaksak vat. 

"A hrang hrang" a ti mai a. Bawkbawn te, tomato te, zikhlum tih vel a lo nia. 

"Tomato hi ka lo lei ang, engzat man nge?" Ka tih chuan, "60 man a nia" a ti a. A nau chuan ka ṭhutna pindana dawhkana ka dah naupang thawnthu ka hawh ho chu va en vatin, "Û, hei a ngaihnawm hmel lutuk" a ti chûl a. A û chuan zah hmel lek lek hian, "Dah rawh, mi ta a nih kha" a lo ti vat. 

"A ho lutuk, pek a la hun chuang lo, hawh rawh se. Mondayah i rawn keng mai dawn nia" ka lo ti a. A nau lah chu a lawm khawp mai, a pawm hlu hlu mai a, lehkhabu chhiar a lo ngainat ve vang nimaw ka ngaina sawt mai. Tomato man ka pek hnua chhuah mai an tum lai chuan, "Heng chawhmeh hi in kharchhawng ve mai mi?" Ka ti a. Min melh zak zak chungin, "Aw..Ka pa nupuiin an khua ami a chah ṭhin a," a ti a. Ka nu tih chu a hreh ve ngâng ngâng khawp mai. 

"A lo haw tawh mi? A tlan khan ka hre sia, nizan khan" ka tih chuan za lo zeta nuiin, "Zingah an rawn haw lehnghal" a ti sap a. A nau chuan, "A pu, lehkhabu chu i phal tak tak maw?" A lo ti a. 

"Umm, tikhan va chhiar la, thawhṭanniah i û hi i lo kentir dawn nia" ka ti a. 

"Keimah pawn ka lo keng thei, middle schoolah khan ka kal ve reng alawm" a tih chuan a luah ka tuaisak a, "Aw le aw le,." Ka ti a. An chhuak zui nghal. Diki chu leh! Ka nei peih tawh lo te kha a tia, zingah a haw leh tho sia ka ti rilru a. Engtin emaw Muansangzuali te unau hi la ngaihven a ngai dawnin ka hre tlat. Aizawlah pawh fahrah rethei leh lainatawm tak tak ka lo hmu nual tawh, mahse, hemi te unau hian min dek bîk tlat. A ngaihna pawh ka hrethiam tawh lo. 

Zanah Zoa a rawn kal a, "In nu i rim ziah bik a, zanin chu kan nu rim ve tawh ang" a rawn ti a. Zu rim a nam thar thar bawk. Kei hi ka vannei a, ruihhlo hian min tibuai ve lem lo, zu erawh MA ka zir lai khan ka in ve tawh a, eng emaw chaw eikhawm leh picnic nikhua velah ka in ve thei mai bawk. A bak erawh ka ti ngai lem lo. Zial erawh ka heh khawp a, ka nu min hauh tamna ber a ni. Kuhva pawh ka ei nasa lo, chaw eikhama ei hi ka duhtawk deuh mai. 

"A pawi hleinem..kan rim ang a a ni mai lawm" ka ti a. A bialnu pawh ka hre chuang lo. 

"Tak taka kan nu pawh a la ni chiah lo, kan inbe ṭan ve deuh mêk zawk, sawtah Venglai ami a nia" a ti a. Ka ring rêngah. 

Ka insiam zo a, kan chhuak ta a. Terini pawh ka va hrilh, a rawn titau lek lek lehnghal. Inrim tlut tlut pawh inhne a nâ a, ka duh bik lo. Venglai kan kal tak rau rauah chuan Pu Ramtea te ina penkawi ka rawt a, ka kal khât angreng a, chhungte anga ka neih ve te kha an nia. Tlawh ve hrim hrim ka duh. Kan va luh chuan Buangi'n min lo be nghal sawt sawt a. U Kaia a lo ramvak daih chu niin, pu Ramtea chuan, "Kar hmasa Ningani khan sakhi a rawn kap a, rawn hleh che kan tum tehlul nen, ṭhenawm hnai an rawn lut a, an chan an chan a, kan ei tur pawh awm lo lek lekin an lei ta hlawm sia, a pawi tak tak a ni. A rawn kah leh chuan ka rawn be tawh dawn che nia" a ti chuar chuar a. Sakhi sa ei a châkawm tehlul nen, ka ui ve angreng. Buangi'n, "Thil ka hria a nia aw." Nui tet tet chungin a ti a. Ka nui ve ringawt. Amah bawk chuan, "Nakinah lo la leng la, hrilh duh che ka nei a nia aw" a ti leh a. A hma aiin a thutak deuh bawk. 

"Sundayah rawn len ka tum dawn nia" ka ti a. Zoa'n min tur ve sek bawk nen, kan chhuak leh ta phawt a. Step thui vak lo kan zawh leh hnuah a star te in chu kan thleng ta a. A nu nen chauh an lo awm a. Tleirawltê kan rim dawn emaw tih nak alaiin keimah nen kan inrual vel ang tih tur a lo nia. Zoa hi kei aiin a nau zawk bawk. Engti tiha Zoa hian duh nge maw a nih ka hrethiam lo. A hâng reuh si, a sam lah a la tibuang ve deuh lehnghal a, a pian chu a intiat thla pût ni maiin ka hria, a tawi reuh bawk si. Mahse, ṭha tihzawng inang hek lo le. Zoa lungdumtu a nih miau chuan sawisel sak ka duh lem lo. Fel erawh a fel khawp mai, kei pawh rei tak inhre tawh ang maiin min be nghal siam siam a, a nu pawh chuti tho chu. Thingpui pawh vawi hnih ngawt kan in. Kan haw lamah Zoa chuan, "Eng nge ang i tih?" A ti ta a. 

"A fel khawp kha.." ka ti ringawt. A hmel lam chu ka sawi hreh ve deuh. 

"Nia, a hmel hi chu a ṭha hran lo, a fel êm a, hei hi ka duh chhan" a ti ve mai a. 

"Eng nge a thawh" ka tih chuan, "Sahdah a nuai ṭhin a, Aizawlah te pawh a thawn ṭhin, kan khuaah pawh a sahdah vek alawm an hmuam" a ti a. Mahni phak tawk hnathawh hi a lo zahawmin a lo ṭha ber mai. Thlengi pawh chu a chhuanawm ka ti hle. Tikhan hah êm êm lovin sum a lalut dawn tihna a ni mai a. 

Ka mut rualin Terini call ka dawng nghal zat. Khik vur vur pahin ka pick up a, "I haw tawh em?" A rawn ti a, lungawi chiah lo awrâwl a ni. 

"Ka mu chiah" ka ti a. 

"Zan dangah chuan hmun dangah leng tawh suh" a ti vei hmak a. 

"Aw le boss" ka'n ti ngial a. A hlim hmel leh ta deuh, "Ateii pawh a haw ve leh tawh a, naktukah eng nge i tih dawn?" Inzawm lo zet hian a rawn ti hluai a. 

"Ka hre mai lo, Zoa khan an huan kalpuiah min sawm a, tihtur êm êm a awm lo bawk a, ka zuk kal ve dawn mawni ka ti" ka ti a. Zoa te hian huan puitling a tih theih tawh ang chu, chu chu an nei a, sum pawh an lalut ve nual tawh a ni. Ina awm tlawng ai chuan tiin kal ve ka rilruk deuh. 

"Hmm, lo leng zawk la" a rawn tih chuan, "Chhun chhuna nula rimte chu" ka ti vat. 

"A ho e, tumah an awm dawn lo" a tih chuan ka ina a rawn len ṭuma kan puitlin hman loh kha chhunzawm ka châk deuh thut. Mahse, huana kal ka châk ve deuh bawk si,. " a, ka hre lo le, khua te var phawt se aw" ka ti ta ngawt a. Ani pawh a aw ve leh diam tho. Duh aia inhnaiha tum lawk miah loha inneih thut te hi a la ngai ang tih ka hlau ve deuh. Zirtirtu ka ni a, ka awm thar ve chauh bawk nen, han neih nghal rup emaw sâwn han thlak deuh ngawt kha zahthlak ka ti ve deuh a ni. Kan inbiak zawha ka ṭawngṭai zawhah whatsapp-ah ka lut a, groupah ka lut kual vak. Taka ka sawi theihnghilh a, Baby sawi Ziri a tih khan min lo be tawh. Ṭha takin ka chhang ve mai a, tunah chuan Terini nen kan nih vel a hria a ni maithei, min rawn be tawh lo. La hmuh ve hrim hrim a ngai a ni. 

Ka kawmthlanga theihai kung lian ve tak mai zara mi pakhat inkhai reng chu ka zuk hmu kur a, ka che thei der bawk si lo, thawh ka han tum ṭhin, ka tho thei thlawt bawk si lo. Mangang zetin ka insawh ka insawh a, auchhuah ka tum a, ka aw a chhuak thei bawk si lo. Maimizialin ka awm tih ka hria, ka theihtawpin ka ke zungpui chu tihchet ka tum ta a. Ka tiche thei ta hlauh, ka harh ta mial a. Ka mut erawh chhuah namên lohin a chhuak thung. Tui in tuma bottle ka ban mêk laiin ka phone a rawn nghawr ta dat dat a. Tun ang zanlai pelh tawha call dawn chu phut zawk a awl duh riau. Tei a ni. Hlauhthawnnain min tuam nghal hlup, tun angah chuan zualko bak mi pangngai chu kan incall ngai lo. Ngaihṭha lo zeta ka lak chuan, "Mam, ka nu hi a thaw a hah a, hei damdawiinah kan chhohpui dawn mêk,." A rawn ti ta chiah a. Ka thlaphanna a rawn belhchhah chiah. Ngaihṭha lo fê hian, "Engtin nge a awm?" Ka ti thuai a. 

"A la hah angreng a, hei ka kal dawn, kan thlen hunah ka lo bia ang che" a ti sawk sawk a, a dah nghal, ka ṭhuchhuak a, zial ka ṭan bawk. Ka nu hi thawhah nei ṭhin a ni a, ka pa boral hnu hian a nasa zual. A inentir ve fô naa, doctor te hian a natna an hre fuh lo nge an damdawi chawh pawh a ngeih thei meuh lo. A pum lam hi a nih ka ring deuh a, thil a ei ṭhat loh deuh te, kawruaka a awm rei lutuk te hian a thaw a hah ṭhin. Damdawi ina kal ngai khawp chuan a la awm ngai lo. A hah hle a ni ngei ang, nebulizer kan lei a, a hîp mai ṭhin kha a nia. Kei ka awm bawk si lo, Tei chuan hrehawm a ti ngawt ang le. Ka muhil leh mai thei si lo, an chanchin a zirin haw lawk te pawh a ngaih hmel. Tei chuan min rawn be leh a, Oxygen an pek thu a sawi a. An lo admit bawk. 

"Ka rawn haw mai dawn mi? Nangmah ringawt chu, i buai dawn êm mai" ka tih chuan, "Lo haw thei la chu ka duh khawp mai. Awmpuite a ngai dawn sia, in lam pawh a ngaihtuahawm" a ti a. 

A tlai tawh si, sumo service han biak dawn pawn, ka rilru a hah angreng hle. Hma tawkah tho ila châng risk ve tawp mai ang ka ti ta a. Alarm ka set a, ka mu leh ta rih. Ka mutchhuak a bo vek, a chhe ber thlengin ka ngaihtuah a, ka nu hian zan khat mit chhin te lo tawk ve ta se; ka nau nen ringawta hringnun chhiar chu harsa ka ti khawp ang. Pa kan nei tawh bawk si lo. Ka'n ṭawngṭai ṭha leh thul. Zing dar 3 velah chuan ka mut pawh a rawn chhuak ṭan a, ka alarm rik thlengin tui takin ka muhil ta a. Ka insiam sawk sawk a, mipa hi chu kan awlsam bawk a, ka insiam rei hran lo. Dar 5 pelhah Venglai lamah chuan ka chhuk ta nal nal a. Sumo hi dar 6 velah a chhuak tlangpui. Kal pahin kan Headmaster Pu Biaka ka call a, a la mu tih hriat zetin a rawn chhang a. Ka chin chu ka hrilh ta zung zung a, engtianga rei nge ka châm dawn ka hriat loh avangin leave te pawh a hrana ka lak a ngai maithei a ni. Damlohna lam a ni bawk a, Pu Biaka pawh chuan a lo hrethiam khawp mai. Ngaihṭha takin ka dah ta a. In chungte chu nakinah ka be mai ang ka ti. An la tho dawn si lo va. Sumo counterah chuan ka ṭhu ran a, veivak pawh an la awm mang lo. Rei tawkfang ka ṭhut hnuah a hmaa ka kalna kha a rawn lang ta a. Driver hi Patêa a ni a, ka lo be ta vat. Vanneihthlak takin seat ka chang ve hlauh mai. Kal hmain counter bula thingpui dawrah ka inhnawh puar a, sumo-ah ka ṭhu ta vâng mai. Tichuan, helhkam nei rûn chungin Aizawl lam kan pan ta vang vang a. Tei nen kan inbe bawk, ka nu chu a âwm a lo na lehzel nen, a khuh nasat thu leh chu chuan a thaw pawh a tihhah tel thu a sawi a, ka va khawngaih tak. Chaw eia kan chhuk tih loh chu peng khawmuang loin kan tlan a, titi pawh ka titi peih meuh lo. Mamawh lama ka haw zawk thu ka sawi mai zel a, zan lamah mut ka hmu ṭha lo nen, ka muthlu ta lûp lûp a. A zia phian. Aizawl chu dar 5 rik hma deuhin kan thleng ta a. Damdawi in tlawh chu duh viau mah ila, in thlen phawta ruahmanna siam ka ti ta zawk a. In chunga chabi ka lam chu Siami a lo ṭhu rûn mai a, ka hmu thut chu ka phu ve zawk mai. Kan inhmuh lohna a rei ve deuh tawh nen, "Eirawng ka bawl kêp che aw. Zuk intifai la, i lo chho mai dawn nia" a la ti zui. A fel hi zawng a fel ve a ni. Ka intifai thuak thuak a, ril a lo ṭam ve tawh bawk nen, ka chho ta a. Pa ber a hna thilah a lo zin a, Siami leh a nu bakah Siami fa hmasa chauh an lo awm. Midang zawng chu inneihnaah an kal a niawm e. Nuber chuan, "I nu chu a zia lo tak tak a ni. Tei nen chauh an ni bawk sia" a ti mial mial a. 

"Nia, in lo awm a, a vanneihthlak..in lo buaipui a" ka ti a. 

Siami chuan, "Tihian ei kham ila, chaw kan han pe dawn nia. " A ti a. Ka melh vak, "Chaw te in lo han pe a ni maw? In va zahawm ve aw" ka ti a. Ka rilru tak tak ka sawi. 

Nu ber chuan, "Damdawi in chaw zawng a tui lo êm mai. A hautak lo êm mai, mi hrang pawh kan nih loh hi" a ti a. An fel ka ti takzet. Nia, an in hi kan luahna a rei tawh khawp a, kan pian hmaa ka pa ten an luah pawh khan an in an sak ṭhat hnuah pawh an luah leh mai a. Chhungkhatah hian kan innei deuh tawh tak tak a, kan tih ve theih tawk tiin a chawhmeh zawrh tur te hi ka nu hian a pe ṭeuh zel. Eng emaw hna rum lam thawh an ngaih paw'n hlawh nei lem loin ka pui ve lâwp lâwp bawk. Mi nun tluang an ni bawk a, ṭhenrual pawh an ngah. Kan ei khamah Siami chuan tiffin chu a siam ta zung zung a, a scooty-in kan kal ta a. Kan inngaihzawn lai pawh khan a hmeichhia zawk hian min phur ṭût zel a, ka khalh chang erawh a awm ve tho. Kan thleng a, kan lut nghal. Female ward lamah ka nute chu an awm a. Kan va luh lai chuan ka nu pawh a lo harh ve hlauh mai. A cher riauin ka hria, ka ngaihbel emawni. A sam a thûr bâm a, Chaw chu an ei zui nghal. Ka nu erawh chuan a ei tam lem lo. "Siami hi kan tibuai ṭhin teh e, Mama a awm tawh tho a, a bawl ve thiam vek a, naktuk aṭang chuan aman min rawn pe zel tawh rawh se" ka nu chuan a ti a. Siami lah chuan, "A bawl tui awm lo êm mai" a la ti zui. Kan han nui leh rih a. Nurse hoin chhuah tawh tur an rawn ti sek sia, dam vat tura inthlahin kan chhuahsan leh ta a. 

"Ka lo khalh ve tawh dawn mi?" Siami bula ka tih chuan, "Ngai lo" a ti deuh tlat. Kan inkhalhchhuak a, in lam kan pan dawn emaw tih nâk alaiin Bawngkawn lamah kan liam phei ta daih. "Khaw nge kan kal dawn" ka ti a. 

Nuih hak hak pahin, "Sulhnu kan fang dawn..nuthlawi ka ni leh tawh alawm" a ti ta a. Ka meng phar vak ringawt. He nu zûnah hian ka uai leh teh a nih chuan…

an kal dawn" ka ti a. 

Nuih hak hak pahin, "Sulhnu kan fang dawn..nuthlawi ka ni leh tawh alawm" a ti ta a. Ka meng phar vak ringawt. He nu zûnah hian ka uai leh teh a nih chuan…