Ka savate 18

KA SAVATÊ (18)

Ziaktu : Toni Râlte

Engmah hi ka ngaihtuah chang tawh lo. Bike pawh ka khalh chak narawh e. Vengthar pêng chu ka thleng hma kher mai. Pêngah bike ka dah a, ka phei nal nal. Sangzuali te ṭhenawm khawiah zawk nge an awm ka hre si lo. Thim chinah ka ding a, ka call ta a. Zawitê hian, "Hêtah Sangpuii te in kha rawn kal pel la, chuktuah huan sîrah khan kan awm" a rawn ti ta sar sar a. Vanneihthlak deuhin Sangpuii te kawngka chu a inkhar a. Chuti chung pawh chuan ka tlan titih, min hmuh kha ka hlau ve êm êm tawp mai. Heleni sawina hmun ka va thlen chuan inkuah rial hian an lo ṭhu dun a, an awmna lai chu a thim deuh bawk nen, tin, in a khât deuh a, veivak pawh an awm lo. Zantir mai a la ni bawk a. 

"Ka inah chho ang u " ka ti sup a.

"Min hmu ang, apa ten" Savatein a lo ti vat. 

"Kawngka a inkhar" ka lo ti thung. Heleni chuan "Saw lai deuh aṭang sâwn hêlna a awm alawm, Apu Mawia te in sîrah a chhuah chhoh theih. " A ti zung zung a. Zoa te kawmthlang lawkah kan awm tih ka hrethiam chiah. "Mahse, bike ka keng asin. Tikhan chho u la, ka rawn tlan chho ang. Leni, nakinah ka thlah leh mai ang che" ka ti a. A bu nghat. An kal zui nghal. Kei pawh lêt leh vutin ka bike dahna lam ka pan a. Muansangzuali te in ka kal pel fel tihah chuan thinrim âng thawm ka hre zui zat. Sangpuii a awm lo tih an hrechhuak ta a ni ngei ang. Ka tlan ta vat a, Ka in lama tlan ta lo chuan Venglai lam ka pan ta daih. Ka in an han en ngei dawn tih ka hre ve tlat a tin ni. 

Sumo counter piah zun in bulah ka ding a, Heleni ka call nghal. 

"A awm lo tih an hre chiah, ka in lamah an rawn zawn ka ring, Venglaiah ka phei rih. Zoa te in hnuaiah khan lo tawm lawk r'u ka rawn chho har lo vang" ka ti zung zung a. 

"Apu Mawia ten min hmu ta se" a ti hap a. 

"Hmu lo vang. An awm lo, an inkalh" ka ti vat a. Hriatpuia ka lam pana rawn phei mêk ka hmuh avangin ka dah nghal rawp. Ṭul ûk loin ka chhuk a, ka va zung ta ringawt. 

"Khaw nge i kal dawn?" A rawn ti a. 

"Khawiah vak mah, Johna vel kha ka rawn ngaihven ve deuh mai mai" ka ti thâm ṭuak a. Êng lam ka melh lo lui hrâm hrâm. 

"A zia lo tak tak a ni..kha..a ruang an hmu bawk sia" a ti sup a. 

."Khaw nge i kal dawn zawk?" Ka lo ti vut a. 

"Kei pawh ka rawn ngaihven deuh mai mai. A zawngtute ho an lo la thleng lo deuh a ni maw?" A ti ve mai a. 

"A nih hmel, Ê taka! I silai kha i va hmu ta em?" Ka ti hluai a. 

"Hmu ta e. Raw hûng sîrah mau hnah zingah a lo awm ran alawm. Torchlight erawh ka hmu zo tawh lo" a ti suam suam a. Sawi leh mai tur ka haihchham lai takin, "Thlalak vel kha engtin nge ni ta? A thuhrimin ka lo en ve chhin..A camera aṭangin a phone model te pawh a hriat theih ang chu" a ti ta a. Ka phone ka phawrh ve mai, rilru erawh a hmanhmawh hle thung. Thlalak chu ngun zet hian a bih a. 

"A va mak ê, engmah a lang lo. A set lawk vek a nih dawn hi..a camera chu a ṭhat hmel hle mai a" tiin thlalak chu a'n zoom kual a, "Danny lak a nih theih lohna chhan chu thlalak kha a chung aṭanga lak a ni. Tin, Danny te rawn thlen hnuah kan inkuah tawh lo hrim hrim" ka lo ti hmawk hmawk a. Ka sahâl deuh a tin ni. 

Mitmeng thîp lam lek leka min melhin, "Chu! Keima lak angah chuan i la ngai tho a ni maw? A va mak dawn ve ṭhianpa.." a ti khur dat dat a. A lungawi lo hmel chu hmuh a nuam fahran lo hle. Ka inthiam lo lek lek. 

"Ka ringhlel che pawh a ni lo. Ka rilru hi a buai rih êm a ni. Sawi dan pawh ka thiam lo" ka ti hawk a.

"I inah kan chho dawn mi niang.." a lo ti zui zat. Mahse, tun dinhmunah chuan Hriatpuia hi ka ringngam rih lo. Ka thinlung zawng a nêm naa ka thluakin hnehna a chang zawk tlat! Ka thluak thu ka awih a ngai. Chhuanlam tur dapa ka ngawih dat laiin Mi bo zawng ho , Zopui ṭhalai te an rawn thleng chawpchilh a, ka va lâwm êm. Keini pawn rang takin kan va pan ve nghal a. Thu chiang tak kan la hre bîk lo kha a nia. Ka beisei loh deuhin Zoa pawh a rawn haw ve nulh! A pawr êm êm lehnghal. 

Hruaitu zinga pakhat Zautea an tih chuan lo nghaktuten kan beisei chhanna chu a pe ta zung zung a. Hetiang hian Johna an hmuh dan chu a sawi ta a. 

"Hei, Lawmkima hian a nia a ruang hmu hmasa ber. Saw mi Ngûr khua leh kan ram inrîna lai Pu Lianngaia te chûl lamah khan keini group hi kan vak a. Kawi hrui lo inzam nuaih kan kal pelh sung sung laite khan a tu aman kan lo hmu miah lo va, a hnung lama rawn kal Lawmkimi hian kawi hrui inzamna hnuaia Taitaw kung la tuai deuh phên titiha a lo ṭhu mu hi a va hmu ta a ni. A tir chuan a la dam turah kan ngai a. Kan han khawih kha a let tawp mai a. A lo khawng vek tawh. A thihna a rei tawh a niang, rim pawh a nei lek lek tawh. A bân veilam banrek hi a kak duai a, thi khârin a lo bawh vek bawk. Chuan, a tukhum a dup bawk. Rin dan chuan mi kut tuar a nih loh chuan a tukhum sawhin a tlu ang a, a banrek chu mau bul emaw eng emaw zum lai takah a zuk ât zui niawm tak a nia. Mahse, khatia lo ṭhu fel ât kha a mak angreng, a khawng vek tawh si avangin zawn pawh a har..a taksa siam a har tawh sia" tiin. Johna thih dan chu a râpawmin a lainatawm kher mai. Ka rilruah erawh, "Amaha tlusual palh a ni thei lo" tih thu hlir a awm nia! 

Zoa chu a chauh hmel bawk a, Hriatpuia chu zawi zawia hlat hrat hratin Zoa chu ka signal zauh a. Ka bike chu a piah deuhah ka nawr phei a, "Haw phawt ang" tiin ka mitmei leh a. Tumah be zui tawh lovin ka in lam kan pan ta vang vang a. Ka savatê chu engtin tak lo awm maw?! 

Ka in kawt kan thlen chuan Heleni ka call nghal. "Pu Mawia te in hnuaiah kan la awm" a rawn tih chuan ka thaw huai. Zoa chu a chhungten an in an kalh si a, lut thei hek lo. "Ka inah rawn chhuk ve phawt rawh" ka ti a. In kan luh hnuah " Lo ṭhu lawk rawh aw..ka rei lo vang" ka ti a. Ka chhuak zui lehnghal. Mak min ti maithei a ni. Hmanhmawh zetin Zoa te in hnuaiah chuan ka chhuk ṭhem ṭhem a. Thingzai phênah an lo tawm kâk mai. Ka kai chhuak a, hawi zuk zuk pahin kawng aṭang chuan ka hui chho a. Tumah veivak leh min hmu thei awm an awm lo nia ka hriat hnuah ka in lam chu hmanhmawh takin ka panpui ta a. Zoa mengphâwk hrû chu mitmeiin ka khap a. Kawngka ka kalh nghal khap. 

Heleni chuan, "Apa ten min lo call nasa tawh lutuk" hlauthawng tih hriat ngawih ngawih hian a ti a.

"Ka thlah haw ang che. Sangpui, Zoa a awm hi..lo hlauthawng suh aw. Zoa, tupawh rawn kal se, ani hi khawiah emaw hian lo thuru ang che. Nakinah thil awmzia chu ka hrilh vek ang che" ka ti zung zung a. Sangpuii chu ka pindanah ka nawr lut bawk. An ngawi ṭhap a, ka chetdan chu a maksak deuh pawh a ni maithei. Heleni chu chhawm chhuak lehin bike bawk chuan ka tlan thlakpui leh ta a. 

"Miin engpawh min zawtin an zawt thei che, i chhanna tur chu, "Sangpuii awmna ka hre lo" tih a ni mai. Tuna min hmu dunte ho bulah pawh, "Sir nen kan zawng" tih kha a ni leh mai. I hrethiam em?" Ka ti a.

"Umm" a ti nghat nghat. He nau hi awm lo se, ka savatê hi a him tawh lo maithei, Heleni hi ka tan a hlû a, eng emaw tak ka la tihsak ngei ang. Ṭhianṭha nihphung a hria a, ṭhianṭha tak a ni tluan parh mai. Ka thlah zawhah khawmuang loin ka tlan chho lehnghal. Rilru a buai viau naa, Muansangzuali chu thlahthlam ka tum lo bur. 

Zoa'n kawngka a rawn hawng a. A la phâwk hle reng mai. A âwm ve tho bawk a. Sangpuii chu pindan kilah a lo ṭhu ran a. A ṭap tawh lo naa, a thla a muang hlawl lo tih a lang reng mai. A hmasa berah ka nu ka biak a ngai. Ka nu ka call ta nghal a. Thil awmzia ka sawi thuak thuak, a tir aṭanga sawi chuan a rei dawn lutuk, chet hmanhmawh kan ngai si. Ka nu pawh a buai ve hle tih a lang. 

"Kum a tling tawh em?" A ti sap a. Thla leh ni 21-ah kum a tlin tur thu ka sawi chuan, "Tunlaiah mi kan sualin kan khirhkhiap tawh si a, a pate chuan case te an file duh mai lo'ng maw? Inru anga in kal phei chuan" a rawn ti ta khauh a. Kei aiin ka nu rilru hi a lo fim zawk a nih hmel. 

"Ni e, bakah amah pawh hian inrûk êm êm chu a la ngamin ka ring lo. Eng nge ka tih ang aw" ka ti vâwng vâwng a. 

Ka nu, Zonu mawl vetê, zirna lamah pawh sang lo tak chuan, "Mama, tun lai in boruak kal vel dan thlirin Sangpuii aṭang khan engkim chhui chhuah a awlsam zawk ang em aw ka ti ta mai mai. An duh leh tum ang ngei chuan sumdawn nana hman chu han tum chhin se la; nangin mitmei bawk la, police te a rukin hrilhhre bawk la, tuna inbuaina kha a zûng nen lam in kar phawng thei zawk lo'ng maw?" A rawn ti ta dap dap a. Rilru a insual nasa hle mai. Pawn lam ngun taka ka va thlêk dâwk dâwk hnuah kawngka ka khar a. Pindanah Zoa chu kuahlutin thil awmzia, Muansangzuali chunga thil thleng leh thlalak chen chuan ka sawi fai ta vek a. A makti hmelte, a ringhlel lek lek hmelte aṭang chuan a ngaithla uluk tih a hriat khawp mai. Ka sawi zawh chuan, "Thil hi ka rin aiin a ril..Sangpuii nen hian a inzawm vekin i ring a maw?" A ti ta a. 

Ka bu nghut. "Zoa, i ngaihtuahna han tizâu teh aw. Ka rawn awm hma khan in khua emaw in khaw chhehvelah mi bo an awm tawh em? Pahnih khat tâl.." ka tih chuan, a ngawi vung vung a. Hrechhuak zawk niawm tak hian, "Ka hria, Lianpuiah damdawi ina awm a bo tawh, tleirawl tho. Mahse, kum 5 vel a liam tawh ang. Chuan kum 2 liamtaah khan Tlangtê-a pêm thar an tihte fanu nula pangngai a bo bawk. Mizo an nih chiah loh vang nge a lar vak lo va, pasal a um a niang an ti tawp ringawt. Lianpuia bo kha chu ni 7 kan zawng a, kan hmuh loh avangin kan vûi tawp" a ti ta zung zung a. 

Sangpuii pawh a rawn ṭhu hnai ve a. Zoa chu a rilṭam dawna ka hriat vangin chaw va ei phawt turin ka ti a. A pate biaa heta a riah tur thu ka sawitir bawk. Riak se ka duh tlat. Nakin zêlah Savatê ka inah a riak tih midangin an lo hriat hunah pawh engmah a thleng lo tih min hriatpui turin ka mamawh tlat! Tin, ka nu thurâwn kha kan kalpui lo vang tih a sawi theih loh bawk. Muansangzuali inhuamna erawh a ngai dawn thung. Zoa chaw ei chhung chuan, savatê chu a rilru hahin buai viau mah se, ka kawm a ngai tlat si a. Zawhna ka nei ta a. 

"I nu boral hma khan i pa hi rinhlelhawmin a awm ngai em? I nu nen inhauhna emaw eng emaw boruak an nei ṭhin em?" Ka ti a. Ka thutakzia a hmu bawk a, ṭha takin min chhang. 

"Nei ve zeuh zeuh, zu kha a la in vak lo va, in ve zeuh zeuh ang kha a nia. Chuan, Ngûr khuaah a inhlawh reng zel, kar hnih tawp riah chângte a nei thin. " A ti felfai thlarh a. 

"Diki nen sawn sawi an kai tawh em? Chunglai vel chuan" ka ti a. A lu thingin, "Aih, kan hriat lai chuan tuman an sawi ngai lo. Mahse, Anu thih hnu lawka an inneih khan mi ṭhenkhat chuan, "An inngaizawng sa' an tia. Awih tur pawh ka hrethiam lo" a ti niah niah a. 

"A nih, Sangpui, a harsa maithei a, mahse, khawngaihin han ngaihtuah lêt vang vang la, i hriat theih zawng zawng min hrilh rawh aw. I nu thih nîa thil thlen dan leh i pa khawsazia zawng zawng te " ka ti ta a. Mak tih hmel tak hian, "Chu! Apa chuan anu kha a that i tihna em ni?" A ti hê hâw a. Ka lu thingin, "Ni lo ve, thil nih dan ka hre duh mai chauh a ni. I pain Diki a hlauh êm êmna chhan saw ka hre duh" ka ti nghut a. 

A chil a lem khalh a. A inngaihtuah vâng vâng hnuah tihian a sawi ta a. 

"I sawi tak vang pawh ni lovin, kei pawn hei hi vawi tam tak ka ngaihtuah tawh ṭhin. Mahse, fiahna ka nei lo va, tin, ka pa bak pa dang ka nei leh tawh dawn lo va, ka hmangaih tlat bawk. Mahse, a nupui a hlau leh a thu anga a awm hmiah hmiah hi chu mak ka ti ṭhin. Ka nu kha khamini khan 'Hna a laklawh lutuk, kan ṭul sia' tiin amahin a feh a. Ka pa erawh Ngûr khuaah a ṭhianpa nu vuinaa kal turin a chhuak a. Diktak chuan ram hna hi chu ka nu thawh deuh vek zawk a nia. Ka nu kal hma lawkin Leni pa hi hreipui hawhin a rawn kal a, "Feh lo mai rawh, lui kan in ngai bawk si, nimin lam ruah a sur nasa bawk si a, tui a lian an tih kha" tiin ka nu pawh a hrilh. Mahse, ka pa zawkin, "A kâm leh vek tawh ang. Luite tui a lian tak tak thei lo, kei pawh chawhma ka va awm ang a, chawhnuah Ngûr aṭangin ka rawn peng haw ang" a lo ti zung zung a. Hna a laklawh an tih miau avang leh thlai rah leh hnah vel lak a hun tawh si avangin ka nu chu a feh lui ta a. Keini unau pawh school kan kal. Tichuan, School kan ban hnu eirawng pawh ka bawl zawh vek hnuah pawh ka nu chu a rawn haw thei si lo. Ka pa lah ni bawk. Ka nau lahin a sawi sek bawk sia, Apu Ngaia te inah va kalin kan va sawi a. Chawhnu lamah ruah kha a sur hlek avangin an ngaih a ṭha ta lo nge ni, ṭhenawm hnai ho nen kan lo lam an pan ta a ni. An va then chuan ka nu chu lui an kanna thlang lî lian ve takah an zu hmu a. A lo thi tawh. (A ngawi dat a, a hnuk a ulh tih ka hriat avangin a hnungzângah ka chûl a)..an rawn zawn haw a. Ka pa erawh ka nu in an rawn thlenpui hnu fêah a rawn haw ve chauh..Leni pa khan a hnu deuhah, 'I rawn pêng haw ta lo a ni maw?" A ti thuphung a.

"Aw..ruah kha a rawn sur leh ta si, nihliap ka nei lo nen, ka lêt leh ta mai a nih kha" a tia. Mahse, mak deuh tun hnua ka hriat chhuah tak chu ka pa kha a kal dawn khan kamiz dum a ha a, kekawr pawh chhawhchhi rawng, a ruka ṭial a ni. A rawn hawn leh khan Tshirt senduk nghawng nei leh kekawr dum a rawn ha haw thung. A sarhu lai khan engmah ka ngaihtuah thei lo va, tun hnua ka ngaihtuah lêta ka chîk leh hian a thawmhnaw kha engvanga thlak nge a nih ang? Tu thawmhnaw nge a hak ve ngawt kha tihte ka ngaihtuah ve ṭhin. " Tiin. 

Kan ngawi dun ta vâng vâng a. Zep miah lohin Pu Thara chu ka ringhlel tlat! He khuaa ka awm aṭanga a nungchang leh mizia zawng zawngte ka thlir hian, Diki salah a tâng a, Diki hawina lam chu a hawina lam a ni a, a ke penna lam chu a kalna tur a ni tih hi ka chiang ve tawp. Chuvang chuan Pu Thara hian Sangpuii te nu kha tuiah khan a namthla emaw Diki nen an va namthla emaw a ni thei. A hnu lawkah an innei zui mai bawk a, an inneih hma an nu boral hmain Ngûr khuaah hna a thawk nasa bawk. Hei zawng Ngûr khaw lamin min chhang theiin a rinawm. Pu Vana te ka mitthla nghal zawk. Mahse, Pu Thara chetdan chu engpawh nise, tunah rih chuan a pawimawh nêp rih, tuna kan buaina ber zawk chu Muansangzuali hmang hian heng sahuai rualte hi engtin nge ka kah thluk vek theih ang tih a ni. 

"A nih leh zanin khan eng thu chiah nge i hriat? I pindan aṭanga zuangthla tur khawp khan" ka ti a. Hei hi pawimawh tak a ni. 

"Ka chungchangah an inhnial a. Ka pa chuan Champhaia ka nî te bula min dah a duh a. Ka nî te nen hian ka hriat theih chinah vawi 2 chiah kan la inhmu. Ka nu thih nî leh Ka pa leh a nupui te an inhruai zan khan..nêl chu sawi loh, a fate hming pawh ka hre mumal lo. Chutiang mite bula awm ai chuan rethei deuh chunga ka nau nena indan pawh ka duh zawk. Chutiang mite bulah chuan min awmtir a tum chu a nia. Mahse, a nupuiin "Singaporeah kal ve rawh se. Lehkha zir mah se; college a kal thei dawn chuang lo. Awmzia a awm lo, Singaporeah han awm ve se, Terini'n engkim a tifel thei ang" a ti hlawng hlawng a. An offer pahnih kha ka duh lo ve ve tawp. Khawiah emaw zawk chuan min dah dawn tih ka chiang. Chuan, ka pa kha tu ten emawn an rawn call a, a va biak laiin a nupui chuan phone a hmang ve bawk a. An pindanah a luhpui a, a ṭawng zawih danah ngaihṭhat lohna ka neih avangin dimtêa thoin bang phên aṭangin ka va ngaithla ru ta a ni. 

"A pa chu ka hneh thei mai ang. Singapore lama kaltir tur angin ka ti phawt ang a, a hnu lamah chet inla mai dawn nia. Accident angah an ngai mai dawn a ni" a ti ta a. Ka him lo tih ka hre ta a ni. A hma anga rukbo ka ni leh dawnin ka hria a. Ka hlauhthawn êm avangin tukverh aṭangin ka zuangthla ta a ni. A sang lem lo bawk a, nâ ka nei lo. I phone min pek kha an kawl daih avangin Heleni emaw nang emaw biakpawh ngaihna ka hre si lo va, ṭhenawmte ina ka nau leng ka han ko a, Heleni ka va kohtir ta a nih kha. Bawihpuia pawh tunah hian an ṭim leh nek ka ring. Mahse, engmah a sawi lo vang. " A ti ta dap dap a. Awmhmunah ka lo ṭang ve ṭeuh mai. 

Zoa chaw ei kham a rawn lut ve ta bawk a. Thupui vai a ngai tain ka hria. Tunah chuan Zoa, Savatê leh Heleni te chiah rinngam ka nei tawh. Mi rintlak ni tura ka ngaihte pawh ngaihbel theih tur tinga rinhlelhawmin an awm zel si a. Kan fimkhur pawh a ngai dawn khawp mai. 

Tichuan, ka nu thurâwn chu ka sawi ta a. Sangpuii chu hawntir leh a, an duh anga thil kalpui a nih theih nan. Police lam hrilh bawk ila, kei ni'n a rukin châng rân bawk ila, Savatê'n engtin tin emaw a chin min hrilh theih nana hmanrua eng emaw neih ni bawk se..chutianga ka han sawi chuan Sangpuii chuan, "Min hralh hman ta se, emaw min rubotute khan min pâwngsual ta se" a ti khur dat a. A hlauthawng tih ka hai mawlh lo. Ka lainat lutuk, mahse, tunah chuan amah hi kan kawng neihchhun a ni tlat! 

Zoa chuan, "Police lam pawhin he lama inhnamhnawih a bultumtu ber an rêk thei tawh bawk ang a. Hriati thih chhan dik tak leh Johna thattu te kan hre thei tawh ang a. Patea pawh a zalên thei bawk ang" a lo ti ve mawlh mawlh a. Ka lo bu nghut. 

Sangpuii kuta vuanin, "I hlau em ni?" Ka ti sup a. 

"Aw. Ka hlau a ni. Keimah chauh chu ni ila thih pawh ka hlau lo, ka nau avang hian dam ka la duh a ni" a ti hniam raih a. Hmeichhe naupang tia sawi theih mai tur thuchhuakah chuan a rilin ngaihtuah a tithui kher mai. 

"Engtin nge ni ang aw..Engtin nge heng misual intêlkhawm, in khaw tithlabârtute hi kan hlin theih ang?" Tiin chunglam ka melh vang vang a. 

Zawitê hian, "Keimah vanga mi dang an him dawn a nih chuan, in thu anga tih pawh chu ka hreh lo. Mahse, tlai lo hrâm ula" a rawn ti ta a. A mitmeng tak ngâkah chuan tumruhna ka hmu thei. Chhuang zetin ka melh vang vang a. Mahse, kan buaina tur chu engtin nge tunah hian a haw ang? Eng chhuanlam nge a neih ang? Tihah a ni. Mahse, amah zawk chuan, "Ka nu thlânah ka kal a. Min awmbotir in tum si a..ka han kal leh zuai a.." ka ti mai ang..a tih lai chuan kawngka an rawn kik ta dawt dawt mai le. Kan inmelh hrek hrek a. Baby aw hian, "Sangzual, i muhil tawh mi? Lo hawng lawk teh" a rawn ti lâng lâng a. Baby kher chuan Sangpuii a hmuh ka remti lo. Hmanhmawh lutukin khum hnuaiah ka nem lut rawk rawk a. Zoa pawh khumah a mu nghal. Kawngka chu ka va hawng ta a. Chiang deuha min en chung hian, "I muhil tawh mi a?" A ti nghat a. 

"Umm, ka chau deuh a niang..ka lo muthlu titih a" ka ti ve mai a. Ṭhutthlengah chuan a ṭhu hnak a. 

"U Diki ten min lo bia a, i ina Muansangzuali a awm leh awm loh en turin min tia" a ti nghal teh tawp a. Ka lo hrilhhai lek lek alawm le. 

"Teh daih a! Ngati nge ka inah chuan a awm daih ang" hriatthiam loh hmel fê hian ka lo ti a. 

"Ka hre bik lo, in thlalak te kha a darh sia, chuvang vel chu a niang" a tih chuan, "E..i lo hmu ve law? Tu nge lo thawn che" ka ti vat a. A dang a âwk thut, mahse, a aw thian derin, "Terini'n mawle.A lo thîk ṭhin kha thîk âwm tak a lo ni chiah a nih kha" nui sâwng chung hian a ti a. He ta ka awm tirha amah ka ngainatna te kha a reh vek tawh, a chezia, a mitmeng, a ṭawngkam engkim chu ka hmu lem ngawih ngawih. 

"Terini nen kan nih laiin engmah a la awm lo, chuan Sangpuii chu in aṭangin a chhuak tihna mi? " ka ti hmuk a. 

"Chuan, Julie ai pawhin i lo thlang zawk tihna a lo nia!" A ti hak a.Ka zawhna hnuhnung zawk chu a chhang duh ṭhak lo. Min nuihsawh deuh tlata hriatna ka nei. Inringtawk zet hian, "Thlang e mawle. In khuaah amah han ter pha tur khawpa duhawm ka hmu lo va" ka ti ve ta hmak. A nui pawh a tâwp chiang ngei mai. Lungawi hmel vak loh hian, "Tleirawl satliah mai, chhungkaw dinhmun lah harsa si,. A eng khu nge i duh chhan?" A ti nghat a. 

Nuih suk pahin, "Ka hmangaih vangin ka duh mawle..ka hmangaih duh chi tak a nia.." ka ti leh hmiah. 

"Julie nê pawh a ek lo ve"a ti hlak a. 

"Hehe, In Julie hi kei zawng ka duhzawng a ni tlat lo. Ṭhian atan chuan a ṭha. Min hîp hlawl lo a ni ber e." Ka ti ve leh a. Kan inchhang tawk viau zel e. Zoa'n a aw a rawn thian khurh pek a! Pindan lam a hawi vat. 

"Tu nge?" A ti hâ a. 

"Zoa mawle. A chhungte an awm si lo va, ani mi bo zawng ho rual khan a lo haw ve sia, a rawn riak dawn a nih saw" ka lo ti liam puat a. A hmelah eng emaw a rawn lang zawk. An in luahtu mah ni ila, tlangval pindan êma luh chu a hreh ve deuh nge ni dawn ni. A melh hrek hrek ringawt. Zoa chuan min chhan a ngai tih a hria nge, "Sangzual, zial i la nei em? Ka nei tawh der lo" a rawn ti lûng lûng a. 

"Lukham bulah khan ka dah kha" ka ti ve mai a. Baby hmel landan pawh a zia ta deuh e. Ka hâm der vak vak a, inthlahrun nachâng a hre ve a ni ngei ang. "Ka han chho ang e. I mut a chhuah hmel êm mai" a ti ve ta nge nge a. Ka ding ve nghal zat, "Vawiinah Thana nen a bialnu kan va rim a, ka chau ve deuh nguai ringawt" ka ti luam a. Kan inmangṭha a, kawngka ka kalh zui nghal. Reivak lo kan ngawih ṭhap hnuah Sangpuii pawh a rawn tho chhuak ve leh a. Ṭawng rin erawh a ngam tawh lo a niang, zaizir titihin hawn a duh thu a sawi ta a. Dar 9 a pel hlek chauh a ni. 

"Thlânah kan rawn en che a, i awm si lo" ti ta se' ka tih chuan, "Ka biru a nih kha" ka ti mai ang' a ti sep a. Kut an thlak leh vak ka hlau si a. Zui ve ka tum ta tlat. Keima lam min venthawn avangin a phal meuh lo va, mahse, ka tum lui ve tlat si. Min hnial hneh ta lo va. Thawm dim takin kan chhuak a, Baby te room lam aṭangin min hmu thei lo hlauh a, a zia e. Bike pawh ka ti ri ngam tawh lo va, ke in kan chhuk thla ta a. Heleni ka call bawk, an inah a lo awm thân tawh a, Pu Thara te chuan an lo zawt ngei rêng a, mahse, engmah a hriat loh thu a sawi ve tlat! Bakah zêp nâk emaw an ṭhenawm te ho hian a dinhmun an hre ve bawk a, an lo khawngaih bawk nen, lo hmu tâwk pawh awm se tuman an sawi duh ka ring lem lo. Kawngka chu ka kik ta dat dat a. 

Diki'n a rawn hawng. Kan pahniha min han hmu chu a meng phâwk teh e. 

"Sangpuii ka rawn hruai haw..thlanmualah a lo awm a. " Ka ti dam thlup a. Pu Thara a rawn lang ve nghal zat, a fanu sama keh tumin a rawn ban a, Muansangzuali hmaah ka ding hmak. 

"Kut i thlak a nih chuan, Police ka hrilh ang, an pa i nih avang khan i nawm a mâka kut thlak theihna i nei lo. Chuan, i fanu hian engmah tihsual a nei lo. Ani leh kei hi kan induh a, kan inngaizawng. Saw laiah khan chance kan va zawng lo va, bike a chhiat vanga ding kan ni. A kuahte chu kan inkuah ve bawk ang chu,. Eng pawi nge kan tih? Kan thla lo latu pawh kan hrechhuak tawh e. Police lamah ka thlen tawh bawk" ka ti ta bawrh bawrh a. Diki meng tâl tap tap chu ka va mitsir bawk. Khatianga ngam leh huai taka ka din ve loh chuan min zuam mah mah dawn tlat. 

Sangpuii chu melhin, "Va mu rawh. Kut an thlak leh che a nih chuan hma ka la tawh ang." Ka ti nghet charh a. Zep loh chuan ka nihna ka hria, ka bialnu pa chuti taka ka han ṭawngkhum pawh chu rilru kil khatah nuam ka ti bîk lo. Kei aia upa zawk a lo ni bawk nen. Mahse, savatê hi thawk a phita kutthak hnawih nana an hman tur a ni lo. Mihring a ni a, fanu chanvo nihna neitu a ni bawk. Tihsual lah a nei hek lo. 

Pu Thara chuan ngên hmel zeta min melh râm râmin, "Tu nge maw i nih a? Ka in chhunga thuneih rawn tum nge maw i nih le?" A ti ta chiah a. 

"Tumah ka ni lo. Mahse, i thu hriat zawng zawng te a dik lo va, heti taka i nupui i hlau hi a chhan pawh hriat ka la tum ngei ang. I thisen i rilarah i fate pawh hmangaih zo lo khawpa i nupui kaihkuala i awm hi harhchhuak la ka duh mai a ni" ka ti leh charh charh a. 

Diki a rawn ling ve phat, "I va zak lo ve, eng nge ka kaih kualna chu sawi teh. Zakthei lo lutuk mai. Muansangzuali hi ka pasal fa a nih avangin ka theihtawpin fanu anga enkawl ka tum ve aw. A koh pawh min ko ngai hleinem, nang hian engmah i hre lo" a ti tuar tuar a.

A ngawi reng thei ta bîk lo nge Muansangzuali chuan khur dawt dawt chungin, "Ka nu tia koh theih che hi ka duh ve êm êm asin. Mahse, in inneih tirha ka pa a zin hlan khan kan unau chungah eng nge i tih kha i la hria em? Khumah pawh kan mut ve phal loin chhuat ruhah puan hlap min sintir a, thlasik khawvawh lai lehnghalin..In bula chaw ei min phalsak lo va, in chaw ei nawi tawh ka nau nen min eitir a. Ka tui chawisa ngeia kan inbual pawh phal loin tuikhurah min nam liam a. Ka pa bula kan sawi hlauin a rawn thlen phat atangin dâwt hlirin min hêk a, ka pain kut min thlak apiangin i nui ṭhin. Ka nau i hmumawh a, awmbo daih se i duh, a chhan chu ka nu leh paten an lo din kan in leh lo chan i duh avangin..a bak ka sawi leh dawn em? Nikum kum tawp lama ka pa inhlawha a riah bo laia mipakhat rawn riak fô te kha..engkim hi sawi chhuak law law ang u. Min puakkehtir tawh mai rawh u. Nunkimi leh Pa Hmaa pawh nangma tihpui, Pa Hmaa ram zimtê saw i awt a, in lama pawh hnaiha i fanu nen inneihtir daih i tum..engkim hi ka hre ve, mi mawl ka ni lo. Ka pa avang chauhin ka ngawi ṭhin. Vawi tam a kut tuara chhe thêihtawpa min puh lai pawn i dik lohna ka sawi ngai lo. Mahse, ka lo ngawi reng ṭhin kha ka tisual tih ka hre tawh. Ka pa hi ka pa pawh a ni tawh lo, i fapa ang mai a ni tawh.." a ti ve ta hmiah hmiah mai. Chutitaka tihduhdah leh nghaisak a lo tuar thin tih ka hriat chuan ka chhungril a na vawng vawng thei mawle. 

Diki chuan thinur êm êm hian, "Dâwt chuan mi puh suh aw. Tenawmnu, khaw nge na lua awm loin ka'n sawp teh ang che" tih leh va bawh a rual a. Pu Thara'n a lo nam sawn vat. 

"A tawk..Diki, ngawi rawh. Ka fanu sawi zawng zawng kha thudik a lo nih chuan i lo va rapthlak êm..engtin nge ka lo hriatchhuah loh theih zawk? I lemchanna kha duhtawk hmiah rawh. Naktuk khawvar rualin he in hi chhuahsan ang che. I hria em?" A ti ta hmak hmak mai. An nu chu a hlau lo leh viau bawk si. Eng nge maw an awmzia hi le?! 

Diki chuan hmai thal hâ hian, "Mi hnawtchhuak a maw? Ranthar, hmela..ka nei duh che hi lawm hle rawh. Nanga zu rui reng, thawhchhuah pawh in zo nghal zel ka lo nei reng che hi lawmthu min hrilh zawk rawh. Chuan, Ka ṭawng chhuah chuan a pawi hle ang" a ti ta chiah mai. Chawplehchilhin Pu Thara hmel chu a danglam nghal. Aw le..ka man chho ṭan e. Thil eng emaw tak zawng a awm chiang e.

Mahse, inrawlh thui zel ka duh rih lo. Hmabak a la kô lutuk. Pu Thara chu pan hnaiin, "Ka phone kha min lo pe lêt leh mai ta che u. Muansangzuali'n a hman dawn loh chuan ka lo lalet leh zawk mai ang e" ka ti nghet churh a. 

Diki a melh zawk, Diki hmel chu a davâ deuh. "Va la rawh" Pu Thara chuan a ti nghat a. 

An pindanah lutin an lo fun tha diam a, khawiah emaw thawn an tum a nih hmel. A fanu Kimi thawn a ni ngei ang. "Kha, nanga phone hlui mai mai hi ngahmah kan ti lo ve" a ti hlak a. Ka nui suk. 

Sangpuii melhin, "Online class in neih dawn hunah i kawl dawn nia..ka chho ang. Muttui u" tiin ka inher a. 

"School a kal dawn tawh awzâwng lo" Diki tih sap erawh ka chhang zui tawh lo. An duh ang chuan kal mawlh teh se..kua kan hreuh ve thiam tho alawm. Zoa leh Heleni ka la nei ve e.  

Zoa nen rei fê kan titi a. Ani pawh Ngûr-ah phei tawh lo mai turin ka ti a. A patea kaihhnawih a ni bawk a, theihtawp chhuah a tum ve tlat. Hriatpuia chungchang kan sawi nual bawk. Ka ngaihdan nemnghet turin, "Mak ka tih chu, Hriati nena inchû khâ viau ang khan a insawi a, tuman kan hre ve miah lo hi. Thingtlângah te chuan kar khat lek inngaihzawn paw'n khua a khat titih nghal zel a nia. Chutia inru hial si tu khaw khain an sawi miah lo chu mak ka tihzâwng tak a ni. Chu ai mahin Baby nen zawk hian sawi an kai hat zawk a. Chutihlai chuan Hriati leh Johna pawh an inngaizawng fê tawh. Mak i ti ve em?" A ti nuah nuah a. 

"Nia, thudik a nih leh nih loh kan hre chho zel dawn alawm.. a nih Terini, Julie leh Baby te hi an inkawm hona a rei tawh em?" Ka ti a. 

"Kei Kohhranah hian ka tal tam lem lo va, ka hre vak lo. Bakah Julie leh Terini hi hmun danga awm reng reng kha an ni ve bawk a. An rawn haw hi chuan khawhar in kal leh eng emaw nikhua chuan an inzui ve deuh zel chu a nia. " A ti mai a. 

"Nih, Zo, Hriatpuia te saw an khawsa thei reuh zêk a, a workshop saw a hlawk ve phian tihna a ni ang maw?" Ka ti leh a. 

A hnar a tum dat a, " aa..ka hrethiam lo, mistiri nih ve loh chuan..Kan khuaah hian Hriatpuia hi chu an chhawr mang vak lo va, khaw dangah hian a inhlawh a tam zawk. Workshop saw chu kum 2 kaltaa a din kha a nia. Saw mi hma daih sawn an in saw an sa tawh" a ti a. 

"An inte chu in sak ṭanpuina an la a ni lawm ni?" Ka ti vat a. 

"Awihawm loh eee, in sak ṭanpuina an lak ve loh vangin A nu pawn VCP a ânkhum hrep tawh alawm. An lak âwm ka hre lo reng reng" a ti ta tlat a! Thil ka chhuidawn thiam ṭan e. 

"A nih Zoa, i rilru dik tak sawi la..Julie hi an buainaah hian a tel ve i ring em?" Ka ti ta chawt a. Zêp nâk emaw Julie kher kher hi chu rinhlelh ve harsa ka la ti tho. Ka hriat theih chinah misual leh phakar rilru pu a ni lo miau a. Ama fel fela fel ve tawp, a hriate leh a chanchin sawi apiangten fel an tih zel kha a ni ve a. Rinhlelh chu a har deuh a ni. Zoa pawh chuan, "Ring lo, Julie hi chuan engmah a hriat ka ring lo. A fel bakah rilru khekrek pu chi a ni lo. Julie hi inphen nan an hmang zawk ni ten ka hria" a ti ve ta duah a. Tu te emaw ṭawngkam takin engkim a zung nen lam kan phoro hunah a chiang mai ang chu maw..

Ka harh chuan School kal a ngai tih ka theihnghilh ṭêp. Zoa erawh a la hnar sûk sûk a. Mut a hmu ṭha lo em mai a, a âwm ve tho. Zawitêin ka tho a. Ka che ta rak rak a. Ka nu nen kan inbe zuai, a ruahmanna ka kalpui tih a hriat chuan, "Mama, fimkhur rawh aw. I tan kan lo ṭawngṭai reng a nia. Sangpuii pawh chu him dam takin chhanchhuak la, he lamah rawn awm daih se la, a nau nen "a rawn ti a. Ka nu hi chu a rilru hi a va ṭha tak e aw. Ka hmangaih zual sawt mai. 

Zoa pawh a rawn tho a. A inphihfai hnuah an inah min chhuksan ta a. Kei pawh insiam sawk sawkin school ka kal. Savatê a rawn kal ka ring lo va, a chanchin leh a pate ṭawngkam vel ziaka Heleni lo kentir tur khan ka hrilh a. A rawn tih ngei pawh ka ring. 

Ka beisei ang ngeiin short break laiin Heleni chuan ka zung tur chu min rawn ko vatin a rûk deuhin lehkha chu ka kutah a rawn hmehbel a, a hmel a hlim lo hle. Kan buai rûkna hi engmah a hre ve lo va, Muansangzuali avanga buaina chiah hi hria se a tawk rih. Ani tleirawl rilru tihthlabâr ka duh lo. A ṭul tak leh hrilh hunte chu a la awm ang chu. Toiletah lehkhathawn chu ka luhpui a. 

"Mut hnuah an inhnial leh a. Diki'n, "Ka kâ ka ân chuan a pawi ang. Tikhan min ti ve tawh suh" a ti a. Ka pa chuan, "Thiam lohna ka nei lo, engmah ka ti hek lo. I duh duh danin min puh suh' a tia. Mahse, an sawi zui zel kha ka hre pha tawh lo. Chuan, tukṭhuan ei laiin ka pain, "Kan harsain tunah i mualpho bawk si a , chuvang chuan I u Terini'n Singapore-a kal êm êm ngai loin Champhaiah awmna tur a lo hmuhsak che a. Mi ina hnathawka awmna tur. In zirna senso a hautak tawhin, pawl 12 pass mah la, College hi kan inkaltir theih a rinawm bawk si loh a, i nau zir zelna tur tal hi min tuakpui a ngai a ni. Kar lehah Terini te an inhruai dawn a, chumi rual chuan i chho ve ang a. Fel takin i han awm dawn nia" min tia. Engmah ka sawi lo. Kei chu maw, ka thinlung hi a sak vek tawh a. Ka pa pawh hi ka hmangaih tawh loin ka hria..in kutah ka innghat e" tih thu a ni. Ka thaw hawk a. Hmabak kôzia ka ngaihtuah. He buainaa ka inrawlh hi ka tisual nge tisual lo tih erawh ka hrethiam tawh lo. Savatê hi ṭhâm tel ve lo nise chuan a nih nih ni teh se tia ka tâwpsan chu ka ring. Engpawhnise, Pathian kan lamah a ṭang ngei ang. 

Chawhnu lamah School bul hnim kan sam faitir a. Kan vil laiin Zêla'n min lo be teh nawlh. Nia, U Faka chungchang pawh engmah ka la zawt leh lo tak a. 

"Sangzual, Eng nge ruahmanna te a kal tluang em? Monday khi court kha a ni tawh a " a rawn ti a. 

Ka kalsawn hret a, zawitê têin ka ruahmanna tlangpui chu ka hrilh ta a. 

"A ṭhat nasat chu, engpawhnise, dikna hi lalber se ka duh ber a ni. Ka rawn biakna chhan che chu, an thurualpui zinga i ngaih kha a ruang an hmu ta mai sia, ka lo ngaihtuah thui deuh a" a ti charh charh a. 

Kei chuan, remchângah lain, "Chuan, U Faka chu venhimna lam kha engtin nge?" Hawi kual zuk zuk pahin ka ti a. Tumah hi rin ka tum tawh lo ka tih kha. 

"Aw..a ṭha vek e. Warden ka bia a, an lo thlithlai uluk dawn e. Hlauthawng suh, khalamah chuan" a rawn ti a. Dik tak chuan Investigation kal laia hetianga Case IO -in thil thlen dan civil hnena a hrilh hi a dikhlel ve tho a, mahse, min ringtawk tih a lang. Khawiahmah ka sawi chhuak dawn lo va, bakah a tir phat aṭangin U Faka kha a rin zawng tak a lo ni ve bawk a. Kan ṭang dun thei hlauh a nih hi. 

Mizoram Police te hi ka fak viau ṭhin a, fak an ngaihna laia fak mai hi a ṭha. Chutihrualin an kut phuarsak theih mi dawihzep leh mi depde hi an inphum ru ve ṭhup a. A thunei ve pha lo chin hi dik in rinawm viau mah se; pu nei an ni miau a. An pute thu an zawm a ngaihna lai a awm tlat si a! An dinhmun aṭangin an pute han têra han chhui zui ngam tur an awm meuh bawk si lo. Kan Zoram zet hi zawng..a luhaithlak ṭhin teh e. Case chinfel loh lah a awm nghêk nghûk a, ṭhenkhat tih dan takah, "An kut phuarsak an nih lohnaah chuan sap ram police te ai pawhin an che rangin an chhui chhuak rang zawk fô" ..khapbeh leh bawhbeh an nih chiah hian an ṭuan a fûm a, Thil lang chiang reng, mipui zawkte paw'n chhui vak ngaia kan ruat loh te pawh an ngawihbopui ta mai emaw tih mai tur hian reh vung vung châng an nei a. A hnuah lah an chhuichhuaha misual an man tak kan hre ve leh tawh si lo. Hei zawng an department lam ai mahin Zorama roreltu, ram hruaitu te thiamloh hi a ni zawk mah âwm e. He lam hi sawi zui ṭeuh a chakawm viau naa.. Romantic lam aim ngawr ngawr tan a ninawm ṭhin. 

Kan bang ta a. Ka va insu leh zuai. Nu Tlani'n Hriati thlan a lo chei mêk a lo nia. A hmel a ngui hle. A chei zawhah tuikhurah rawn kal vein ka bulah a rawn ṭhu a. 

"Sangzual, a mak a ni tiaw? Mateii kal ta mai hi" a ti hap a. Sawi tur a vâng duh ṭhin. 

"Ni ngawt mai" ka ti ringawt a. 

"Kei zawng amah leh amah intihlum a nih hi ka ring thei lo. Ka thinlungah hian mawlhtu a awm tlat, a pa leh a û lah hian min khap zel a. Ti nge a ruangte kha kan lo postmotem loh le ka ti" a ti chuai raih a. Ka hrethiamin ka va lainat tak êm.

"Nia, ngaihṭhat nan tal postmortem u la a ṭhat nen. " Ka ti sup a. 

"A pa bawk mawle.."A mualphothlak mai mai" a ti tlat a. Nizan chu maw Sangzual, ka mangah Mateii chu ka lo hmu a. Damdawi in veng thlanmualah zawk sawn a lo ding a..va pan ka tum lahin phal lo tih hriat tak hian min hnar zel mai si, Johna kha ka mangphan ve bawk nge, Johna nen a hnuah phulraw tlâng chhip zâwlah sawn an lo awm leh daih a. Mateii chu a lo nui var var tawh mai. Zan danga ka hmuh hi chuan a ngui nghiai zel kha a nia, a hmangaih êm êm Johna nen an inhmu chu a lawm ve tawh a niang ka ti..kei zawng ka ngai êm mai" tiin a insût faih faih a. Mipa e ti lo chuan hnuk a ulh ve thei tlat! Tin, a thusawi zawng zawng kha ka thinlung phêkah ka ziak hmak bawk. Nu Tlani hi nakinah Hriati chungchang a hriat ang ang la zawh tur a ni ka ti nghe nghe..

Min kalsan hnuah pawh chuan ngaihtuahna mûk tak nen ka insu mawlh mawlh a..ui bauh ri ka hriat chuan ka hawi chhuak vat..Sangmuana lo ding reng ka va hmuh chuan ka tho nghal uaih! 

Ka rilrua rawn lang hmasa ber chu, "In ka kalh a, tukverh engkim ka kalh vek. Engtin nge Sangmuana hi a rawn chhuah theih." Tih hi a ni…