ka savate 17

KA SAVATÊ (17)

Ziaktu : Toni Râlte

Makti zeta ka melh ngat ngat lai chuan a rawn ding chhuak a, "Ṭhianpa, he laiah eng nge a awmzia?" A ti thâm ṭuak a. Makti hmel a pu bawk. Sangpuii pawh a rawn kal phei ve vat a, "U Hriat..nang maw?" A ti ve hliai a, a hmaa a lo hlauhthawn rûkna a hmelhmaia chambâng kha a bo nghal duak bawk. Nui lui hakin, "Sa ka chang ve e ka tia, tibuaitu ka nei pek alawm mawle" a ti nuah nuah a. 

"Chuan" ka lo ti ringawt. Ka rilru a mang hman deuh a tin ni. 

"Khi lai tlâng Phulraw tlânga sunhlu rah tlan ka châng e ka tia, mahse, tlâng huai nge ni dawn ni, thawm a rawn chhuah reng a, min rawn vawm thul. Tlangvâla pumpa ka silai pawh ka thlauh phah ta hial a nih hi..nangni in lo awm teh hlawl chu mak viau mah se; thla intimuang e" a ti charh charh a. 

Muansangzuali'n ka bân a rawn vuan chat. Huai lam pang sawi chuan hmana kan thiltawn kha a hrechhuak ṭhin em mawni, a thlaphang nghal zel. Hriatpuia bawk chuan, "Sangzual, ti nge hetah teh daih?" A ti nghut a. Harh chhuak thutin heta kan awm ngawt chhan chu ka sawi ta zung zung a.

"A va zia lo ṭhin ve aw. Tluanga te pawh an rawn thlen har dawn loh chu.." tiin ka bike lam a pan a. 

"Engin nge i kal hrim hrim?" Ka tih chuan, "Ngûr khaw pickupah ka bei phei a. Hawn lam chu pumpelh aṭangin ka haw tawh mai ang ka tia. " A ti mai a.

"Engtin nge niang aw. Kan inpathum thei maiin ka ring. Lo thleng phawt se. Chuan, i silai chu kan han zawng dawn em niang" ka ti sauh sauh a. 

" a.. zan thimah chuan êng kan nei ṭha si lo, ka torchlight pawh ka lumna lamah a tawlh chhuak daih sia, naktuk zingkarah ka va zawng mai ang. Bakah Sangpuii amaha heta awmtir ngawt chu" tiin Sangpuii a melh zauh a. Sangpuii pawh chuan, "Nia, ka awm ngam lo.." a lo ti ve thuai. Tluanga te an rawn lang ve ta chiah bawk nen, kan sawi zui ta lo. Tluanga chuan amah ang rual vel tur a rawn phur tel ve bawk a. Ka la hmuh âwm pawh ka hre lo. Bike chu an han en vat vat a, ka lo thlir reng ringawt. A chhung an han hawn chuan a timing chain a lo peh chu niin, "Aw..a va ho leh si ve" ka lo ti a. Ka hawn khan ka lo hmu miah lo pek a! Ka inthiam lo deuh. Tluanga chuan a han bei ngar ngar a, a zawm leh thei ta hrâm a. Ani hi a ṭawng tlem viau a, tunah pawh eng vak a sawi lo. A nih dan a nih avangin mak pawh ka ti lêm lo. A ṭhianpa pawh a ngawi reng mai. An han siam zawh chuan a han start chhin a. A dik ta thlap e. Ka thaw huai mai. 

"Khuaa i lo awm chu a va lawmawm tak..ka mangan hman alawm" ka ti mawlh mawlh a. 

"A ho êm mai, tiangte chu a awm ve fô alawm" a ti nghut ringawt. Hriatpuia pawh chuan, "Ni ngawt mai. Kei pawh ka vannei tho mai,." Awmze nei zeta nui chung hian a lo ti ve bawk a. Kei chuan remchângah lain, "Nia, Tluanga, hei Hriatpuia hi a sa châng a rawn chhuk a, a silai a thlauh palh daih lehnghal, tihian Sangpuii hi lo awmpui ula, kan pahnihin kan han zawng lawk dawn em mawni le?" Ka lo ti var a.

"A pawi hleinem, a va zia lo ve" Tluanga'n a tih lai chuan, "A ngai lo ka tih kha..Ṭhianpa, naktukah ka va zawng mai ang. Tunah chuan a thim bawk si. Bakah Tluanga te pawh an zahawm alawm" Hriatpuia chuan a lo ti vat a. Chuti na nâ na chu tiin Sangpuii dinhmun ngaihtuah bawk nen, hawn lam kan hnaih ta a. Tluang takin khaw chhung pawh kan lût thei ta e. Sangpuii chu an in thleng ka thlah thlap. Diki chuan min zah zo ta lo a niang e. Kan luh rual rual chuan a lo kek nghal bawrh bawrh a. 

Ka pawt ṭhen nghal lawp. "Tenawmnu, zahpuiawmnu, tun ang rualah tlangval i chhuahpui ngam a maw? I lo va nasa reuh ve" a ti ta daih a. Mak ka ti nasa mai. Sangpuii tak pawh a meng phâwk viau. Pu Thara rawn lang vein, a fanu chu rum êl âwla melhin, "I pindanah lut nghal rawh. Chu chen chen in thang chu le! Bike chhia kha in chhuanlam mai mai a nih kha.." a ti vin ṭhak ṭhak a. 

Hrilhhai zeta ka en reng laiin min rawn hnaih a, "Sangzual, a hmaa i lo chhanchhuah tawhnaah ka lawmin i zahawm viau naa, khatiang vanga ka fanu laka remchanna i lo zawng ve sek hi ka lawm tehchiam lo aw. Zirlai naupang a nih bakah min tihmualpho ka remti lo. I rilru a dik lohzia ka lo hre tawh e. Min hawnsan la, tun a chinah chuan ka fanu hi lo hnaih tawh lo la ka lawm viau ang. E chuan, Muansangzual, khawi phone kha..pe let rawh. Kan mamawh lo ve, midang ta hlui kan lo la fel tawh e. "A tih tak bawrh bawrhah chuan kei râlte thin a thawk ve ta tlat! 

"Pu Thar, eng ang pa chiah nge maw i nih le? Muansangzuali pa chu ni lo la, ka hnekna che hi a rei tawh ang. Hetiang taka patling nêp leh nupui hlau hi ka vawikhat hriatna a nia. Mak ka ti hle che a ni. I sawi zawng zawngte kha thu belhchian dawl lo vek an nih kha.. " ka ti ram hmak hmak a. Sangpuii va hnaih hratin phone min pek a tum chu nawr lêtin, "Phone hi min pek lêt a ngai lo aw. Tikhan ka pe che. A man a ngai lo. He phone hi i ta liau liau, tuma chuhpui theih loh che a ni e. " Ka ti dam thlup a. Mittui tling piaua min melhin, "Sawi vek rawh. Pawi ka ti lo" a ti ta sap a. 

Mahse, tunah rih chuan kan inlaichinna chu sawi chhuah chiah ka ngai rih lo thung. A nu leh pate an thin a rim êm mai. Pu Thara chu melhin, "Ka haw ang e. Khawngaihin i fanu hi kut lo thlak lo hram ang che. Engmah tihsual a nei lo, lo inngaihtuah fîm zawk la ka ti khawp mai. I fanu thusawi nge i awih dawn, i nupui tih chu" ka ti a. Ngawi rengin ka chhuak. Diki'n, "Zirtirtu nih vanga chapo êm êm ringawt, eng atanmah ka ti lo ve. "A tih zui sak chu ka hre pha . Ka nui suk ringawt. Pathian hian min hunna tur a hre khawp a..ka tette aṭangin chapo thei ve lo tur khawpa dinhmun harsa leh ka pa boral hnuah phei chuan rualpâwl phak loh khawpa tlachhiain ka awm a. Min hretute hian vawikhat pawh " A chapo' tia min sawi hi ka la ring lo. Mi nun tlâwm tak erawh ka ni lo maithei, mahse, chapona chhan tur ka neih miau loh avangin chapo ka inti ngai miah lo. Diki mithmuhah ka lo chapo deuhte pawh a niang e. A fahrawn phone ka pek vangte pawh kha a ni maithei. Mak ka tih zawk chu Pu Thara khawsazia hi, mipa nêp tak a ni nge, Diki hi hlauh chhan a nei zawk? Heti êm êma a hlaua a thu a kawi a ngîla a zawm ṭhin hi. Nunkimi thil tih dik loah erawh a pawr fû lawi bawk si! He khuaa chengte hi a! A mi nâwlpui an fela an polite tehlul nen, ṭhenkhat ka hnaiah awmte hi an maksak tlat! Kei hian ka tawng fuh lo hlawm a ni ngei ang. Ka in luahna zir loh vangah te ka han puh dâwn dâwn a. Niin ka hre bawk si lo. 

Ka ril pawh a ṭam hrep lo ve a. Zanin chu ei lo law law mai teh ang ti rilruin pu Ramtea te inah ka peng kawi a. U Kaia chhuahchhalh ve hrim hrim ka duh pah bawk. Ka beisei ang ngeiin a lo awm a, a lên a lo ṭhui ṭha mêk. Ngampa zetin Zuali bulah, "Thingpui thlum min lo siam ve teh, chaw pawh ka la ei lo" ka ti nghal thâwr a. 

"Ti nge? Chawhmeh i nei lo ni maw?" Tih paha nui chungin Thingpui a chhuang nghal a. 

"Ni chiah lo, ka pum a dik lo va, ka luak a chhuak ul reng a. Ka ei châk hlawl lo" ka ti duah a. 

U Kaia chu enin, "Nge nimin in sa chângte chu min sawm ve loh?" Tiin ka chhâl a. Khik vur vur pahin, "School in kal dawn sia, kan tlai ka hlau. Bakah Hriatpuia min sawm zawk a ni sia,." A ti zung zung a. 

"In kap lo mi?" Ka tih rual chuan Hriatpuia'n ka msg a la reply lo tih ka hrechhuak chiah. 

"Kap nang, tlema tlemah kawng kan bo lo chauh alawm. Hriatpuia nikhua lo lutuk a" a ti ta mai a. Ka hre thui châk ta riau, "Ngati nge?"ka ti vat a. 

"Sunhlu rah tlan a awm e tiin min hruai a, Ngûr khua kan lut lek lek alawm. A sunhlu kung alah kha a zawng hmu leh ta mai si lo, reifê kan zawn hnuah kan hmu a. Mahse, an lo tlan awzâwng si lo, kutbêngin kan rawn haw leh ta hnak hnak alawm" a ti bawrh bawrh a. 

"Min hruai loh vang a nih chiah chu" nui ṭhâw chungin ka lo ti thung. 

Thutak deuh zawk hian, "Ngawi tak rawh, kar tawp lamah kan ramvak dawn nia, zan khat riakin. Saw tah Lianpui nena kan inrîna mual dûngah sawn sanghal an chhuak ṭhin an ti tlat! Midang hruai lovin kan va vak dawn nia." A ti sauh sauh a. Zan riah phei chu ka châk zawng tak a lo ni bawk a, ka phur kher mai. 

Zuali'n thingpui min rawn pek pahin, "I bike chu a ṭha thei maw?" A ti a. 

"Aw..a lawmawm tak tak a ni. Tluanga te lah khan pawisa pek ka tum khan an la duh ṭhak lo lehnghal a" ka ti duah a.

"Khatiang leka pawisa an lak zel te'n kan hausa lutuk anga sin" U Kaia'n a lo ti zauh. Pu Ramtea te nupa an meeting ve ve a lo nia. An awm lo chu a reh deuh, Buangi lah a awm tawh bawk si lo. Naupangho lah an reh diak a, an mu tawh nge mawni. Thingpui thlum tui zet ka in zawh chuan, "Nizan mut ka kham mang lo va, ka han haw ve ang e" tiin ka hawn san ta a. Muansangzuali ngaihtuah chung zelin in ka thleng a. 

Ka ril a ṭam zui lo bawk a, a ṭam thut tak leh Lapuii chhangthâwp ka lei kha a ngai ngaiiin a la awm bawk a, ka keih liam tawh mai ang chu.Sangmuana erawh chawṭhing ka hmehsak a, a ei ve mai. Zo ui ho hi chu dal chawm ringawt pawh an ei duh mai zel a, a zia viau. A eikhamah chîk ngher ngher chungin a bawk ta hle hle a . Mut nan la hma tho mah se; zing lamah ka inbual mai teh ang tiin inbual pawh inbual ta lo chuan khum lam ka pan a. Phone ka hmet malh malh, Savatê tia ka save hnen aṭangin eng thu mah ka la dawng lo. Ka ngaih a ṭha ta vak lo va, "I mu tawh em?" Tiin ka text a. 

Hriatpuia msg ka hawng nghal bawk. "Ṭhianpa, Johna bo thu kha i lo hre ve tawh em?" A rawn ti a. Ka hriat tawh thu ka zuk hrilh chuan, "Ani hi Hriati ang khan a thi ve ringawt ang âww. " A rawn ti a.

"Mahse, ani te chu an lamṭang a ni lo'm ni?" Ka ti vat a. Ngaihṭhat lohna vak ka nei lo, Johna chu a thihna chhan tur ka hre tlat lo a ni. 

"Ni tho mah se; an hlauhthawn vangin a ka an hup ve thei thi asin" a rawn ti a. Awmzia a nei ta deuh. 

"I silai kha miin chhar ta se" ka va ti teh daih a! 

"Chhar lo turah ngai ang. Ekhai! Sangpuii a awm ve vang khan engmah chiangkuangin ka sawi duh lo a nih kha..tlangvala pumpa hlauhlawpa min awmtir thei chu a bon viau ang tih i hriatthiam ka ring" a rawn ti duah a. Nia, tibuaitu kha a nei ngei tak a! Heng lai ram vel hi ramhuai ten an zuam nge huai leh hrâng an tam riau mai. A la ngaw ve bawk a ni. 

."Naktuk zanah lo chho la, kei pawn sawi tur ka nei" ka tih chuan, "Kan tum dawn nia" a rawn ti ve a.

Thana'n min lo call , vawiin lama kan thusawi kha ka hrechhuak chiah, "Aw , thianpa" ka ti a.

"Naktuk chu engtin nge ni dawn ta" a rawn tih chuan, "I motorin mi kan kal ang?" Ka ti vat a.

"Ni mai rawh se, Kawng an lai ve ṭan a, two wheeler chuan a buaithlak ang" a rawn ti zangkhai vah a. 

Dar 10 vela chhuak tura inhrilhin kan dah ta rih a. Savatê-in min la chhang lo. Ani hi phone kha an lo chhuhsak em ni ang? Nge a pain kut a thlak zawk. Eng nge ni vei le ti rilruin ka call ta hmiah a. Rei fê hnuah aw thâm chhil chhel leh hnar ping aw deuh mai hian, "Hello" a rawn ti a. Ka chhing sawk. 

"I ṭap em ni!" Ka ti vat a. 

"Aw" a ti hmiah mai. Aih pawh ti se a ṭap tih a aw aṭangin a chiang tih a hrethiam a ni ngei ang. 

."Engtin nge a tih che?" Ka ti hlur a. 

"Naktukah" a rawn ti ringawt. 

"Naktuk chawlh alawm.." ka tih chuan, "Ni tak e. Msg-in ka lo sawi ang. " Tih leh dah a rual daih. Whatsappah ka lut nghal a. A hming zawna typing awm ka hmuh chuan ka thaw huai mai. Ka lo nghak ta ngat ngat a.  

"I haw hnu khan apa chuan min hau hrep a, nangmah nena fawr kual turah min ngai a. A nupuiin a hrilh dan a ni mai. Chuan, U Tluanga te lo kal thu leh U Hriatpuia pawh a awm ve thu ka sawi a, zawt turin ka ti bawk. An zawt ngam tak tak si lo. A nupui lah a âng reng a, ka phone kha a fanu tan a lo ît êm êm a lo ni. Chhuhsak min tum a, ka ṭang ve tlat si,.Kan inchuh buai laiin ka nauin min lo chhan ve a, Nu Diki kutah a sehsak a, kha kha Apain Bawihpuia chu a hlap a. Eng anga a thinrim paw'n Bawihpuia kher hi chu kut a thlak ngai lo, mahse, tikhan ṭap zawih zawihin kut a thlak a, ka thinlung hi a puakkeh mai dawn. Ka nau nena chhuah kan tumin an phal bawk si lo. Apa khan zu a lo in leh hrim hrim alawm, ka rindanin a nupuiin a hrai a nih ka ring" tiin. Ka sa zawk zawk thei. Pu Thara ka huatna leh nêp ka tihna chu a inchen hial âwm e. Ka bialnu pa chu a ni ve tak si a aw! Ka sawi tawh ang khan Diki hi hlauh chhan a nei a nih ka ring ta ber mai. Heti êm êma a rilarah a fate thlavâng hauh chu sawi loh, a nupuiin ti tura a hrilh ang a piang a ti zel mai hi. Hei hi ka hriatchhuah a ngai niin ka hria. 

Ka va reply leh chuan a lo online tawh lo. A ṭap muhil nge buaina lian zawk a tawk tih lah ka hre si lo, awmhmunah hah hnêpin ka lo ṭâng ve a. 'Ka ru daih mai dawn em mawni le' tih te thlengin ka ngaihtuah hman nia! Rilru ka siam sauh sauh a, Class xii a pasa veleh ka nei hmak ang tiin. Ani pawn min hnial ka ring lo. A nau nen ka bulah awm se, an him a ni mai. Ka hriat loh kârin ka lo muhil ve daih a, ka harh chuan dar 8 a lo pel tawh. Tun lai hi thawh ka hai deuh reng mai. Mut ka mamawh te pawh a ni ta ve ang. Ka tho a, niminah ka inbual ta si lo nen ka inbual ta phawt a. Zing kara inbual hi chu a nawm dan a danglam bîk. Ka zâng ta vah mai. Tukṭhuan ka rêl a. Thana nen kan inbe zuai bawk. Engpawhnise, rilru tihthawven nan Lianpuiah chuan va leng ve reng reng teh ang ka ti rilru a. Savatê ka wishna kha a rawn chhang ve tawh bawk. Ka chin turte ka sawi chuan, "Umm, va kal rawh. Kei pawh Heleni nen insûk kan tum a. Hei apa nen kan la inbe miah lo" a rawn ti a. 

"Pate chu eng ang pawn lo thinrim se, do loh a ṭha zawk. Tunah chuan i pa bak belh tur i la nei chuang lo va, tlawm zawka ṭan tum hram hram rawh" ka ti ve ngial a. 

"Nuhrawn kan hrawn tirh aṭangin vawi tam tak tihlawma hneh ka tum ve..ka hlawhchham tawh. Apa hi a â vek tawh a niang" a rawn tih chuan ka lainat takzet, Diki te nufain an kheuh thiam mai si a. Ka'n insiam khawmawi ve a, inchei tehchiam erawh ka duh lo. Thana'n min lo sawm a. Rilrua vei nei ru ṭûn chungin kan chhuak ta a. 

Kalkawngah kan titi ve luam mai. Julie chanchin ka zawt ta ngei a, "A fel, sawisep a kai ka hre ngai lo, a lo hmelchhe lo bawk nen. Thawkkhat lai khan Doctor nen pawh sawi an kai ve hat a, mahse, engtiza chu ni maw..Doctor khan inṭhenna mumal pawh awm lovin nupui a neihsan ta ringawt a. A tuar ve hlein an sawi. Kan veng a inhlat deuh a, ka hrechiang tehchiam lo" a ti mawlh mawlh a. 

"Hriati kha i hrechiang em? A thih khan mak i ti ve viau lo maw?" Ka tih chuan, "E! Mak ti tehreng e a. Hriatsangi chu min rual pha lo deuh naa, A û ai mahin Kohhran leh Khawtlangah a inhawlh lawr zawk a, ṭawng tam lo viau e ti lo hian a nelawmin luck pawh kha a luck ve reuh asin. Mahse, a ngaihsanawm reuhna riau chu a bialpa i hria anga Johna kha..kha nen khan class xii vel an nih aṭangin an inzui ṭan a. A la naupang viau a nia, mahse, rinawm dun reuh tak an ni. Tuman kan khaw tlangval chhe lo ti vetu te pawn beisei enah an en tawh lo tawp alawm. Tihian mitthi chu a ni ve leh ta mai chu a nia, a bialpa lah kha an sawi hmangin Hriatsangi thih aṭang khan a mumal lo chho te kha an tia..a lainatawm tak tak a ni" a ti ve ta duah a. Beng a tivâr hle mai. 

Thudang pawh kan sawi nual. Baby chungchang pawh a hriat ang ang a sawi ve bawk a, "A inla senior hma êm a, a la upa vak lo chutiangin. Pasal nei rualte chu a ni ve tawh reng a. Hriatpuia nen pawh sawi an kai ve deuh tawh alawm, mahse, hei tun hnuah an inum ê leh ta vak si lo va. Baby hi chu awm ve tawp chi ni maiin ka hria. A lerh lem lo viau bawk" a ti sur sur a. Zawhna han ngah vak kha ka hreh avangin thudang kan sawi ta daih a. Ludy chanchinah te kan pêng chho a, "A hmelṭhat hi a chapopui ve deuh a nih hmel. Mak ka ti, heti taka a rawn ṭha chho leh a rawn ngo chho hi. Class x -ah te chuan a chenbeh ve thei lutuk mawle. An neihin a tlin ta bawk a, a rawn mâm chho a nih hmel.." a tih chuan, "Ngona te a hmang ve a niang chu" ka lo ti vat a. Tei ṭhiannu pakhat ngo-na a ei ve ngawt a, a hmai a var hlung a, a nghawnga ung si, a va han nuihzatthlak tak. Tun laiah chuan tumah hi an hâng beh duh tawh lo. Khawpui lam phei chu an inkhai ngo fur tawh mai a, vun dik leh ngo pangngai chu awm tho mah se; a hmaa ngo tehchiam lo, tuna rawn êng ta phuk ho hi chu a tlangpuiin an inkhai ngo ti ila kan sawi sual âwm lo ve. Hmanlaiin "Hmel a siam thei loh, nungchâng chu a siam theih" an ti ṭhin. Mahse, tunlaiah chuan hmel pawh a siam ṭhat theih vek tawh chu a nih hi a..a ṭha vek mai ka tia, miin hmelṭhat vea ên ve phek a châk a nih chuan ama sum sêngin a inti hmelṭha a ni mai a, kan sum tlâng a hek lo bawk a. Lo sawisel chiam ka duh hran lo. 

Lianpui pawh kan lut ta. Ka rin aiin a kawng a kual, a khua han hmu tawh si khan kan kual kan kual mai. Ngûr aiin an khaw thleng a zauin a pharh ṭha zawkin ka hria. Kawng bula awm te pawh an awm nual mai. Khawi danga pêng kawi lo vin damdawi in lam chu kan pan ta a. Quarter pahnihna kawtah kan ding chat. Horn a'n pe lauh lauh a, kawngka chu rawn inhawngin, nula hleitling zet zawt, vun êng tak, sam dum hlap mai, mitmeng nung sârh mai hi a rawn chhuak ta a. Thana bialnu Asângi chu a ni ngei ang le. A nui mawi viau bawk. Ka ṭhianpa chuan a phu lo lek lek zawkin ka hria, Thana hi a hmelhmai tak chu a chhe hran lo naa, a vun a thim ve a, bakah a hmulphurh a lo ṭha vak bîk lo nen..mahse, mipa hi chu mipa kan ni miau a, bakah a fel ê, ruihhlo engmah a ti lo va, kohhranah a kul atâiin rawng a bawl bawk. Hei bak baka pasal atana ṭha le..

Kan lut ta a. Inleng a lo nei lo hlauh. Thana chuan min han inhmelhriattir a. Ka ṭawng hma hmain, "I thlalak chang kan hmu zing a, a tawpa tawpah chuan a takah ka hmu ta che lawm" a tih chuan mak ka ti deuh. 

"Eng nge awmzia?" Ka ti hû a. 

Nuih har har pahin, "Aww..in nu phone-ah i thlalak te chu a tlar del dul alawm. Tak taka rawn hruai ve tur che u alawm, a chawl rei tawh sia, ka ngai riau asin" a ti tak deuh deuh. Mahse, ka man thiam ta deuh, Julie a sawina a ni chiang mai. Ka nui ve ta ringawt. Julie nen inngaizawng angah min ngai nghet hmiah tihna a nia. Julie leh Baby te kha an lo va inbe nasa âwm, ka chungchângah..ka la hmuh ve hma hauhin min lo seprawtui chiam tawh tihna a nia. Chutiang êm êm tur khawpa hmelṭha leh fel ka ni si lo. A ngaihṭhatthlak loh letling e a. 

Asangi chu a felin mi biangbiak a thiam kher mai. Kan vawikhat inhmuhnaah ka ngainain ka nêl nghal viau. Mahse, an pahnih bula lo tâp ve reng chu dikin ka hre si lo,saw leh ram chen aṭangin a bialpain a va rim ve hram hram a, lo ṭhut ve kur chu nuam ka ti chiah lo. Thingpui hâng kan in zawh chuan, "Ka rawn kal vawikhatna a ni sia, ka'n leng khawthawng teh ang" tih leh chhuah ka rual a. Thana'n hawn dawnah min rawn be mai turah ka ngai. Tumah hmelhriat ka nei bawk si lo va, lenna tur ka hre chuang lo. Damdawi inte chu ka va lut thuak thuak a, damlo pawh an awmin ka hre lo. Damdawi in chhak chu tlâng sang lutuk lo, phul hmun a ni a. Ni a sa lem lo bawk nen, hawi khawthawn nan a chi dawn e tiin ka han pan a. A chhip zawl ka thlen chhoh hma deuhin Zoa'n min lo call a, nizan khan ka call a, a ring quit zel kha a nia. A buai a nih ringin ka ti duh ta lo a ni. Hah deuh bawk nen ka thaw hlawi hlawi a, "Nizan khan ka ph ka lo silent daih a, bakah kan buai nen ka lo hre lo alawm"a rawn ti tê tê a. 

"A nih ka ring deuh a. Eng nge chanchin? " Ka ti vat . 

"Kan la hmu lo. Kan tlaivar deuhthaw a, tunah pawh ka tho deuh chiah alawm. Kan khaw lam pawh an rawn hrilh tawh kha, Lianpui khawtlâng nen kan zawng dawn a niawm e" a rawn ti a. Mak ka ti, Johna bo ringawt chu! 

"Engtin tak nge a bo dan an sawi?" Ka ti a. 

Thawk la halhin, "Hriati boral aṭang khan a lo chiangkuang vak tawh lo hrim hrim a niawm e. Mu leh mal nei vak loin a khawsa chho a, mahse, chutia mahni intihnat tum ang zawng chuan a awm hran lo. Nimin chawhnuah khan thingpui an in laklawh laiin, "Min ko" tih leh tlanchhuah a rual a, ramhnuai lamah a tlan ta vak a. An umzui naa, a tlan chakzia leh thahrui a neihzia chu mak an ti hle a niang, Chul pakhat thleng an va ûmzui a. A mawng phe takngial pawh an hmu ta si lo va, midang sawm khawma zawn an ti ta a, an hawnsan ta a ni" a ti ta dap dap a. Johna awmdan chu a mak angreng hle mai a!

"Hei, thil kan han ei ve ang e. Keini chuan kan zawng tawh lo vang, hnain min hmuak sia.." a rawn ti a. Kan dah ta a. 

Tlâng zawlah chuan ka ṭhu vang vang a. Lianpui khua chu a hmuh thui theih viau, Zopui pawh a lang thei. Ngûr erawh tlâng lian ve tak hian a hliah daih nge ka hmu zo tlat lo. Tlângte pawh rangva in chung tlêm chu a lang ve iarh mai. Ka lung te a lêng dawn dâwn a. Ka hun hman tawh dante ka chhuikir ta mai mai. 

Zopuia ka awm a ṭanga ka nunkhaw danglam chhoh dante ka'n ngaihtuah neuh neuh chuan, heta awm tur hian Pathianin min hûng a niang a ka tih rualin awm ta lo ila buaina thenkhat hi a thleng lo zawk ang em? Tih te thlêngin ka ngaihtuah. Hlimi thih zana U Kaia nen kan ramvah aṭang chiah khan buaina khan min uap chho ṭan a nih kha..Hriati ka bulah rawn inbunruakin, Johna rinawm lohna te a rawn puangchhuak a. Hlimi chhungte laka Johna a hlauhthawnna te,.Chumi hnu lawkah Hriati chu tibuaitu nei niawm takin a buai chho a. Baby vekin a buaipui bawk. Aizawl aṭanga an rawn hawn aṭanga zan thumnaah a inawkhlum ta kha a nia. Baby'n a lehkhathawn min pe a! Lawkin..he thil hi ngaihtuah chian a ngai mang e. Baby hian kha lehkhathawn chhiar hmasa lo khan engtikawng mahin lehkha kha min pêk ka ring lo. Mi ṭhenkhat mahni nunna la ten tu emaw tan lehkhathawn an hnutchhiah châwk, chhiarsak hmasa lo va a dawng tur hnena pe hmiah thei hi an awm lo ang chu ka ti ngam lo va, thawnthu leh movie-ah chuan a awm mahna. Mahse, ka farnu hi intihlum ta se; A thian tu emaw tan lehkha hnutchhiah se ka chhiar phawt ka ring. A chhan chu kan hmangaih kan lungduhten an nunna an lak chhan hriat châk lo chu kan awm ka ring lo. A nih chuan Baby khan kha lehkha kha a chhiar hmasa a nih loh chuan amah ngeiin a ziak tihna a ni mai. Hriatpuia nena Hriati kutziak en kan tum lah kha buaina neuh neuh kan tawk ve nen, kan la puitlin thei ta lo kha a nia. Keimah ngeiin vawiin tlaiah ka en ang..Hriati lehkhathawn kha ka mitthla nghal bawk, a kutziak kha hmeichhe kutziak tih takah a sinin a zum sal mai a, a nalh viau. Lungmuang tak leh tibuaitu nei miah lo kutziak ni mai âwm a ni. Thih tum rilru reng, a thih hun tur bithliah thlap kutziak atan chuan a mâm deuh chu a ni. 

Tin, Hriati a boral a, a bialpain a ruang a rawn kil lo. Vawikhatmah a la rawn lang lo. A chhan chu Johna a chiangkuan loh vangah dah ta ila..Hriati thih sarhu lai takin Julie a rawn lang a, Terini te lah Hriati thih hma lawkin an inru bawk. U Faka kha Hriati khan engvanga hmu duh nge a nih ang? Khatilai bâwr vel aṭang khan ka buai deuh tlat! U Faka khan dâwt a sawi lo tih a lanna chu Baby khan vau nan a hmang tlat si! Hriati phone kan hmu zo lo tlatte kha a mak a ni. Baby bakin a kawl ka ring lo bawk. Aaâ..ka ngaihtuah thui dawn chuan ka â hûih zel..ka ning. Ka savatê ka'n be daih teh ang. 

Ka rin aiin a rawn la rang. "I insu ta mi?" Ka ti vat a. 

"Umm, hei kan insu zo tawh a, kan la haw peih lo" a rawn ti a. 

"I nau i hruai ve em?" Ka tih chuan, "Aih, Papuia te nen tui kan thehkang dawn an tia,. In lo haw dawn tawh em?" A rawn ti zui zat a. 

"Ka hre lo, hei tlângah ka chho daih a. Min ngai tawh mi?" Nui chungin ka ti a. A rum nghat, "I lerh thei ê" a'n ti ngawt a!

"Lerh lo ila kan inngaizawng nang" ka ti mai si. 

"E..ih maw, U Baby nau U Hriati bialpa kha i hria em? Kha kha a bo an tia, kan khua pawn an zawng ve dawn asin" a rawn ti hliai a. 

"Ka lo hria alawm. I bo ve leh ang e aw. Haw tawh r'u" ka lo ti nghut a.

"Bo tawh lo vang. U Faka a tân daih tawh kha.."a tih mêk laiin Heleni aw hian, "Sir, Sir Peka'n nichinah a lo bia a nia aw" a rawn ti lâng lâng a. Muansangzuali'n, "I mawl ami? A thinrim vaih chuan aw" a ti sar sar a. Ka nuih a za hle. 

Mahse, intimitak deuhin, "Ngati nge a lo biak che a? Mawh?" Ka ti khur khur a. 

Tim dâi hian, "Aa..ih, Test tur min rawn hrilh nawn leh ringawt alawm.." a ti niah niah a. Kan Sir Peka ṭanlak dan mai mai chu aw! 

"I number i pe mi a?" Ka ti leh a. 

"Pe nang, Leni'n School groupah min lo add alawm" a ti mai a. 

"Umm, a lo biak che pawn a rul tawk bakin chhang suh ang che. A chiang em?" Ka ti kalh kalh a. 

"Chiang chiang chiang, i ninawm..i upat tawh nen nen ti nge i thik vak a?" A ti hlak hlak a. A thintê hi chu aw..

"Ka ta chauh ni la ka duh alawm" ka ti sup a. Romantic tawka min chhan let ve chu khawilamah, "Tiang ṭawngkam kha hmang ziah suh. Ka zak zel" a rawn ti! A va hahthlak e aw. Naupang ngaihzawn zawng zei a har dawn riau mai a. Kei lah tu tu te emawin min khalh chul hnêp tawh si. Dawhthei zel phawt ang.

Kan inbiak zawha zial ka ṭan lai takin Thana'n min lo call a, ka rin aiin ka lo awm rei daih. Ka inngaihtuah tui atalângin hun ka lo ngaihtuah lo a lo ni. Hawn a rawt takah chuan ka chhuk ta hnak hnak a. Thingpui kan in leh hrâm. 

Asangi chuan, "Sangzual, in nu chu eng thleng nge a chawlh dawn?" A ti a. Teh sek a! Ka nui hawk a, "Julie nen hian min hmehbel vek hlawm a. Kan inngaizawng hleinem. Ṭhian angin alawm ka en" ka ti ta a. Mak a ti tih a hmelah a lang, "A va mak! I zêp zawk em ni? I ho êm mai aw" a ti nghat a. Ka thutakzia a hmu ve kur si. 

"Tak taka i thlalak vel kha kan hmu ve deuh reng sia, kan lo ring ve tawp alawm..Mahse, ni ula, Julie chu a fel asin. A hmelṭha bawk si"a ti siam siam a. 

"Bialnu hi ka ngaihsak vak peih rih lo..nia, a nihte pawh kan la ni ang chu" ka ti ta ngawt a. Sawi kual vak kha ka peih lo bawk. Tichuan, Thana nen chuan Zopui lam panin kan inkhalh phei leh ta a. 

"Thana, ti daih ila, Muansangzuali nu kha tuia tlahlum an tiin ka hria, a dik em?" Ka ti hlawl mai a. Ka thu zawh ber kher chuan a ṭhawng ve deuh nge a meng zau kâwk mai. 

"Tehdaih che chuan, Umm tuia tlahlum a nia. An lo hi lui ral lehlama awm a nia, tui dai kai ngai chiin, a feh ni ber kher kha a hma niin ruah a sur nasa a, tui pawh a lian ve deuh a niang. Kal lam chu a dai kai mai a. Mahse, chawhnu lamah ruah kha tlêm a rawn sur belh ta bawk nen, hawn lamah a inphur rit ve bawk si kha, tui rawn hawrh nasa lutuk khan a lên a niang. A taka hmutu kan ni si lo va..ka hrechiang bik lo. Lui mawng lamah a len thla an tia. " A ti suam suam a. Ka rilruin thildang daih ka lo ngaihtuah. 

"An pa a feh ve lo em ni?" Ka ti sup a. 

."umm feh lo..Ngûr-ah an chhungkhat chhiat tâwk an awm a, a kal a niawm e" a ti liam puat a.

"A vanduai hle mai. Ani pawh an pa kal loh nî chuan kal loh mai awm" ka lo ti ringawt. "Nia, mahse, an ṭul vanglai a ni ve a, Sangpuii nu hi kan tet lai pawha naupang pâwla kan hotu ṭhin a nia. Kohhranah a inhmang hma bawk a, a fel ania aw. Chuan a taima lutuk bawk, U Thara nena an in leh lo pawh saw a thawhchhuah aṭanga an sak a tam zawk ang..a thih pawh khan ui lo an vâng viau asin" a ti ta duah a. Ka hmuh hman tak loh ka bialnu nu chu ka khawngaih takzet a ni. 

"Nih chuan U Diki leh Pu Thara hi an innei hma viau niawm khan an sawi a" ka tih zel chuan, "I va ngaihven ve, Sangpuii hriatchian i châk chiang" a ti ta khauh a. 

"Châk ve tho, mi sawi hmangah hian U Diki sawn a ngeih vak lo niawmin an sawi tlat a" ka ti ta hmiah a.

"Umm, an sawi dik alawm. Hrechiang apiangin Diki an ṭan lo. Aw..an innei hma angreng, U Hmingi unaute pawh an rilru a na rêng alawm, a mitmu êm pawh a la keh hmain an in hruai a..kamtam deuh phei chuan an lo inngaizawng sa te an ti hial asin. Sangpuii te unau lah an ngeih si lo, pu Thara nêp vang a nia. Ka unaupa chu nise a nuamsa hauh lo vang" a ti tûn tûn a. Kei pawh awmhmunah ka lo insangmar ṭeuh. 

Khua kan lut a. Ṭhalai hmuh tur an vâng pharh mai. Eng dang a ni lo, Mi bo zawn hna an thawk a tin ni. Kei pawh kal ve tur ka nih laiin ka tangkhâng ta si a nih hi. An la hmuh loh fô chuan ka zawng ve ngei ang. In chungah ka pêngkawi a. Nu Tlani te nupa an lo awm..

"Baby khaw nge?" Ka ti lut a. 

"Mi bo zawng ho eirawngbawlsak turin a chhuk ve ta a nih kha..a zia lo êm mai..Johna chu" Nu Tlani chuan a lo ti bawrh bawrh a.

"Nia, a pawi tak tak a ni. A mak ringawt êm mai a. Rukbo niawm pawhin a lang si lo" ka ti ve nuah nuah a. Pa Zawma chuan, "Mateii thihna a tuar lutuk, a buai te hi mawni ka ti rum rum asin. A thih aṭang khan a chiang tawh lo kha an ti bawk sia" a lo ti ve a. Rei awm loin ka chhuak lehnghal. Ei rawng bawl thar a ngai si a. 

Ka inbual zo, Ṭhutthlenga tlukzâl pahin phone ka khawih a, Savatê miscall a lo awm. Ka charge avangin ka lo hre lo a nih hmel. Ka call vat a, "A pawi lutuk" a rawn ti teh ngawt a. 

"Eng nge a awmzia?" Ka ti vut. 

"Kan school groupah nizana sawta kan chhiatna laia kan inkuah lai thlalak Ludy'n a rawn dah a! Ka zak ngawih ngawih..kei chu School ka kal ngam pawh ka ring tawh lo" a rawn ti ta mai! Eheu! A va mak dawn ve leh!

"Maw?! A va mak ve. Khawi thlalak chu min lo thawn teh" ka ti chung chung a. "Aw..lo en rawh, an sawi zui nasa sia, ka thi a ni tawp..ka zak êm mai" a rawn ti a. A dah nghal. Thlalak chu a rawn thawn ta ngei a, fiah lo ruaia bike nghenga kan inkuah lai chu a ni chiang, vanduaithlak zetin kan awmna lai kha thim deuh rûn mah se; thla êng khan a rawn reflect a,.zoom chuan keimah zawk chu keimah ka ni tih a hriat tlat! Thla latu camera hi a ṭha thawkhat viau tih a chiang bawk. Ka lum ve pup pup thei..keima tan ka hlauthawng lo, Ka savatê mualphona tur leh a zahna tur siamsak hi ka duh lo bur..

Sangpuii ka call leh, "Groupa Ludy'n a rawn post chuan engtin nge a comment?" Ka ti a. Ka aw pawh a khur lek lek.

"Ṭhenkhat hi chu nuam ti fâl an awm alawm, bike chhiat chhuanlama golden chance lo neite.." tih vel a nia, chuan an sawi zui nasa lutuk. "A ruka lerh hle si, nungchang ṭha âwmte hian ka awm e a tia..Zirtirtu te lo ngaihzawn vel..a nasatthlak e" tih te..awii a tam lutuk..Miss te pawh an rawn ṭawng ve, Ka zak a ni. Thih daih ka châk" a rawn ti ṭiau a. 

"Duatpui, khatin inngaihtuah suh. Kan inkuah avang khan eng thil sual mah kan ti hleinem. I bulah ka ding tlat dawn alawm..chuan, Ludy number min lo pe lawk rawh le, thlalak hi khawi aṭanga a neih nge ka hriat a ngai" ka ti dap dap a. Ka chiâi loh hram hram a ngai tih ka hria. A rawn sawi ve mai a. 

Ludy chu ka call ta. Zangkhai vah hian min rawn chhang a. "Ludy, keimah Sangzuala,.thlalak kha khawi aṭanga i neih nge le aw?" A dam thei ang ber hian ka ti a. A ngawi dat a. 

"Mi min pek"a ti sap a.

"Tuin? " Ka tih chuan, "Ka hre bîk lo, a number ka save lo va" a ti ringawt.

"Ludy, hei kan lawm lo viau mai a. Intihmualphona râwng a kai avangin kan ngawi mai mai dawn lo va, a thawntu che chiang taka i sawi loh chuan nangman i tuar dawn a nia" ka ti ta nghut nghut a. 

Hlauthawn hmel deuh hian, "Ka hre lo tak tak,Min rawn thawn ve tawp a, 'Sir Sangzuala leh a bialnu' a rawn tia, Muansangzuali ka huat avangin tikhan groupah ka dah chhuak ta mai a ni" a ti ta zung zung a.

"Khawi a number chu rawn sawi rawh le" ka ti chang rût. Engkim a chinchhuaka hailan a ṭul tawh tlat. Number a rawn sawi chu ka save ta hmak a. Kei pawn ka lo nei bîk lo. Tu tak ni ang maw? Thlalak chu ngun lehzuala ka'n en chuan a chhak raw hung vel aṭanga lak a ni tih ka hre thei ta a, chutiang ti thei tur chu mi pakhat chauh a awm. A number hmetchhuakin ka call ta nghal a. 

"Hello, Thianpa" a rawn tih rual chuan, "Ṭhianpa, i lo mak hle mai a! Nangmah vangin Pawisawilo leh tihsual nei lo Muansangzuali a mualpho tih i hria em?" Ka ti khawl khawl mai. Ka thin lah chu a rim êm êm bawk a. 

"Maw?! Eng nge a awmzia?" A rawn ti hû a. Inbengdai hretin, "Kan thla i lo lak rûk, Ludy i thawn kha an school groupah a upload a. Muansangzuali a mualpho viau a nia" ka ti a. 

A chek hluk a. "A va mak ve leh! Sangzual, in thla awzâwng ka la lo e. La ni ila engvangin nge Ludy daih daihte ka va thawn ang a? Bakah eng atan nge in thlalak chu ka tih ang?" A rawn ti ve nghut nghut a. A lungawi loh hmel kher mai. 

"Ka hrethiam lo a ni. Nangmah bak kha lai hmunah khan i awm si lo va" ka ti ringawt a, ka rilruin kil tin a dap kual bawk.

"E taka! Tluanga leh Danny te an rawn kal kha, Danny kha Ludy û a ni tih i hria em?" A rawn tih chuan ka vir zawk. 

"A nih chuan…" ka ti zawi raih a. 

"Aw. Amah kha a niang, Tluanga bike siam lai pawn kawng chhakah a va zun kha" a rawn ti hluai a. 

Mahse, thlalakah khan mi dang tumah an lang ve tlat si lo. Edit theih a nih tho rualin Tluanga te rawn thlen hnuah Savatê nen kan inkuah tawh lo hrim hrim. 

"Engpawhnise, Ludy thawntu number te chu dil la..hriatchhuah tum ang" a rawn ti zaw mah a. Ka buai zo vek mai. Ka ṭhu ngawi run a. Chhuat lam ka melh ran bawk. Thawk la hawkin ka phone ka hmet leh a. Tu nge? Tia ka save chu ka call ta a. Ring chu sawi loh, out of service a rawn ti zawt zawt. Ka phone ka paih lo chauh a ni. Mahse, he thil leh kan buai rûkna te hi a inzawm vek ka ring a, ka beisei bawk. Ka chhui chhuak ngei tur a ni. 

Samua ka bia a, thu dang kan sawi duah hnuah, "Samu, i puihna ka mamawh a ni. Tunah hian number ka hriat loh hi a neitu ka hriat ngei ngei a ngai a. I ṭhianpa kha Airtel-ah a thawk thoin ka hria a. Khawngaihin min pui thei ang em?" Ka ti ta tawp a. 

"A harsa hleinem, a pawimawh hmel bawk siah..number chu lo thawn la aw..ka lo entir dawn nia" a rawn ti awlsam êt a. Ka thaw huai e.

Chaw ei zâi pawh ka rêl thei lo, mibo lam pawh ka ngaihtuah thei hek lo. Savatê ka call leh, a pain a rawn la ta tlat mai. 

"Hei, nizan lama in awmdan te ka lo hmu a, ka lawm lo takzet a ni. Nang pawh zirtirtu ve si, i va tenawm ve. Naupang a la nih hi..vawi khat mah rawn be tawh suh.. " A rawn ti ta hmak hmak mai. A hma lawkin a ka pawh zen ila min seh lovang tih tur khawpa ka laka ṭha kha keipui ang maiin a hrâng leh ta chu a ni si a. Thil hi a va thleng zut zut si êm, a tâwp kan hnaih tawh a ni ngei ang. 

"Lawk, Pu Thar, lawkin, aw le..i ruahmanna chu ka zahsak ang che. Mahse, thil pakhat chiah ka zawt ang che. Kan thlalak kha engtin nge in lo hmuh ve theih? School groupah chiah an post sia" ka ti sawk sawk a. 

"Ka nupui phone-ah ngei an rawn thawn e. Kan hmakhua ngaitu a ni ngei bawk ang. Ka hriatthiamna sâng ber nen, pawngsual case ka file lo va vannei inti hle rawh. I hmel pawh kha kan hmu duh tawh lo ve" ti ngal ngalin a dah ta hmak mai. Ka sahâl a ni ber e. Mahse, thil pakhat chu a chiang ta. He kan thla latu leh Baby te hian inzawmna an nei a, Hriati thihna te, Hlimi thihna bakah Johna bo lehzelna te nen hian a inkungkaih kual vek..a hmawr ka bâwk fuh rih lo mai mai a ni. 

"Tlansangzual, hmachhawn rawh. Zâm hlek suh" tiin ka phun chhuak ta hial a! 

Pu Ramtea te ina chhuk tuma ka chhuak tur chu Zoa call ka dawng a. Ka ding chawt. 

"Aw zoa," inthunun hrâm hrâm hian ka ti a. 

"Johna chu an hmu tawh. Thiin" a rawn ti zawi sup a. Mak ka ti lo. Mak ka ti rêng rêng lo, damin hmu nise mak ka ti hial zawk ta ve ang. 

Inah ka lût leh a, Police Zêla kha ka call ta a. 

"Sir, U Faka kha venhimna hnuaiah awmtir u la ka duh a ni" ka ti nghal thâwr!

"Eng nge a awmzia?" A rawn ti nghek a. 

"An ṭhuihhruai zing ami emaw kan tih kha tunah a ruang an hmu a ni. U Faka pawh kha a him lo. Khawngaihin" ka ti thâm ṭuak a. 

"Aw le..kan lo ngaihven nghal ang. Warden ka'n bia ang e" a ti ta sawk sawk a. 

Ka phone chu ka hum ngawt ngawt. Tuna ka dinhmun pawh hi a va him si lo êm.. Savatê ka mitthlaah a rawn lang a. Ani hi tawng lo ila emaw ani hian min tawng lo nise heng buaina hi kan hmachhawn lo mai tur..an mi duh ve ve kan lo ni dun si hi a pawi a ni. In chhungah ka lut leh ringawt. Ni e, tu nge rina rin loh tur ka hrethiam tawh lo. Ka hah hluah hluah. Ka nu bula awm a, a mal chunga lu nghata mut veng veng tluka thlakhlelh ka nei ta miah lo. 

Ka pum a rawn ri ruk ruk a, ka rilṭamzia ka hrechhuak chiah. Ka tho hluai a, mahse, phone call a rawn kal leh ta..lak loh ka tum zet a, Heleni a ni tlat! 

"Aw Leni" ka tih zawh hma hmain, "Sir, thawnbo an tum, hmun hla deuhah awmbotir an tum.." ṭap teuh chung hian a rawn ti ta..

"Tunah khawiah nge a awm?" Ka ti tuar a. 

"An ṭhenawmte huanah kan pahnihin kan awm..an pindan aṭangin a rawn zuangthla a.." a rawn ti. Hei zawng ka mawhphurhna a ni lo ti eng ang mah ula, chhantu leh pui ngai êm êm, keimah vanga a hmangaih êm êm a nau lak aṭanga pawhṭhen an tum mêk hmeichhe naupang hi ka venghim ngei tur a ni. Tin, hmun dang hla takah an thawn dawn lo, a hma ang bawk khan hmeichhe thianhlim, hmelṭha leh duhawm tak si chu tu emaw sumdawnna atan an hmang dawn a ni zawk. Ka tihtir ang maw? Hnai lo ve..

"Lo awm tlat rawh u . Ka rawn chhuk e.." ka ti nghet charh a. kawngka hawng rawpin ka chhuak zui nghal.