ka savate 16

KA SAVATÊ (16)

Ziaktu : Toni Râlte

Sir Thana'n Ludy rawn invai chu lo pawt dâwrhin, "In va zahpuiawm ve a. Mipa pawh an insual loh laiin.." a ti vin ṭhak. Ludy han nasatzia chu'h, "Min thlah rawh, kan zirtirtu pawh i ni lo" a ti a nih chu! Thinrim tak zawng ni se la, a ben pawp ka ring. A chaltlai reuh êm mai. Muansangzuali erawh a ding mar at a, Ludy a melh ngat ngat bawk. Kan Head Pu Biaktea'n, "Le..duhtawk r'u le. Infiamna mai maia lo intihbuai, inrem taka awm tur,. Volleyball kan khel dawn. Lo inring r'u " zaidawh deuh tak hian a ti a. Pavillion lam kan pan ta nghal. Boruak chu a nuam lo chho ti mai ang, Higher lama an senior lecturer Madam Ruati chuan rilru kawi a pu deuh nge ni, 'Higher section lam chu keimahni'n kan lo zilhhau ang e. Lo inrawlh ve lo law law r'y?u" a ti chhum deuh hmak hmak mai a! Mak ka ti hle. Rilru zau awm pui si. Mahse, Madam Zuali insûm zo ta bîk lo chuan, "Ludy tê kha a chaltlai reuh hrim hrim, tih tak êmah te chuan kan school aṭanga zirchhuak tho alawm a nih. An zirtirtu hlui a ṭawngkhum dan kha a mawi lem lo khawp mai" a ti ve ta hmak hmak a. Ani hi pu Biaktea a awm loh pawha Headmaster incharge la ṭhin a ni a, a senior thawkhat tawh viau. A School ang zawnga feelings a kal kan hlauh vangin Thana nen chuan Volleyball chu bentir vat vat tumin kan che nghal zung zung a. Ludy ṭan chu a tlem zawk an ni. A ṭawng theih piahlamah mi hmuhsit a tina reuh êm mai a, mil a har. Sangpuii pawh a thinchhiat ve bâkah, tlawm zawka ṭan mai tur a nia te chu ka ti rilru naa, tlawm tur anga ka ngaihtuah chuan ka phal meuh bawk si lo. 

Kan inpeih hnu chuan hmeichhia zawkin an beng hmasa dawn ta a. Boruak a alh leh phat ang tih erawh ka hlau deuh. Ka bialnu kaihhnawih a ni ve zel bawk si. Awmhmunah ṭan a lo na lo thei bik bawk si lo va. An han beng ta a. Savatê fing ka tihna chu a thinrim duh miah lo hi a ni. Ludy erawh titau chungin a khêl a, a tifuh hleithei dêr lo. Heleni service hun a ni a, Ani a khal ṭhain a kutthlak a na bawk a niang, ball chu kawh zetin a ving phei fua a. Mamawii bekah tak a va fuh a, a pai nawk mai. A bek chu a dawm vang vang a, Ludy'n ring ṭha fê hian, "Ngawi tak rawh. Ka hun a thleng ṭêp" a ti ṭeng chhuai a. Ka nuih a za deuh. Blue lam an point a sang zawk zel a, Saroni service kai loh azarah Ludy service hun a rawn thleng ve a. Tum bîk a nei tih hriat zetin net bul dinglama ding Muansangzuali chu a ball ben chuan a rawn bitum ta chat mai. Mahse, ka savatê chuan hlah a tum bik hauh lo. Mawi zetin a lo la a, lehlamah a tla mawl tawp. Tuman lak nachâng an hre lo. Savatê service tur chuan a uluk ngang mai. Kawh zetin a ving phei leh ta cher cher a, Êngi'n la fuhin Sangpuii nen an inpass ta chat chat mai a, a hnu deuhah Helei'n a lo fingering a, Hlap rem fahran a nih vang ni maw..Savatê chu a zuang kâng zawk a, a theihtawpa nâ hian a hlap ta a, Net bula ding Mammawi chhipah tak a zu fuh leh ta si. A ṭhu hnawk a, Ludy chuan va bawihsawm vatin thinrim engphiar hian, "Muansangzual, eng nge Mamawii chu in bitum zel a? Zawngi" a ti hlawih hlawih a. Sangpuii lah chuan, "Thlaktir daih r'u, a inla no êm mai" a lo tihsan. A ngeiawm thiam ve bawk si lai hi..

An thlak ta rêng a. Blue house lamin set khat chu an la ta phawt. An ṭan leh hma deuh si hian Ludy bawk chuan, "Kan hlahthlem mai mai che u nih kha, lâwm ve vak su" a ti leh hrâm. A chauhthubarawh tawh êm vangin Blue lam pawh an nui tawp ringawt. An han ṭan chho a, boruak a ṭang ṭha kher mai. Êngi service chu a na bawk a niang, Hruaii'n lo la pial palhin hnung lamah a invawrh phei a, center-a ding Sangpuii chu chak zeta tlanin a inbin zawng hian a rawn pet kai hrâm. Tumah lak tum pawh an lo awm lehpek lo. Mahse, Refree-in Muansangzuali te lam service tura a han tih chuan Ludy chuan ring zet hian, "A pêt kha.. volleyball a pet theih loh" a rawn ti ta! Chu zet zawng nuih loh a har bawk a niang e, Thana nen, An Sir Zawna te nen kan dir char char. Blue house lam pawh an khi ṭhaw hlawm a. Red lam lah an thinrim nasa si! Red lam leader Papuia chuan, 'Nang nu kha i mawl si, chhuak teh. Azir, va lut rawh" a ti lûng lûng a. Kan boruak zet chu a! Rei pawh an inkhelh hmain Blue lam an chak ta a. Ludy erawh a titau kual kha ngawi rengin a ṭhu a. A hriat tawk lek lekin a phun hlak hlak bawk. A indah zero telh telh mai. 

Items a tam lo bawk a. Kan haw hma thei dawn e. Result puanna neiin lawmman semna pawh kan nei ta nghal a. Best girl chu tuma chuhbuai theih lohin Muansangzuali'n a chang ta. Blue house thawm a ṭha kher mai. Ludy hmel landan erawh ṭap mai tur te pawh a ang. A khawngaihthlak letling zawk. Ṭhuihhruai a ngah ve phian si a, Savatê tan ka lo hlauthawng deuh. Mahse, eng êm an ti lo turah ngai ang. 

Sports chu mangṭhain kan haw ta dam dam a. Sumo an lo thleng ṭan dawn bawk sia, Nu Zovi dawrah ka lo nghak ta law law a. Thingpui te ka'n in leh rih kha. Vala pawh a rawn thleng ve ta hrâm a. Parcel lian lem lo tak, ka hming chuang ngei chu min pe ta a. Lawmthu sawiin ka tlan haw ta vang vang a. Phurna hlirin ka khat a ni ber e. In thlen rual rualin ka hawng nghal a. Kei leh kei lo ang takin ka ri ve hlut mai. Sangmuana pawh ka lo ngaihsak hman lo ni tur a ni, a lo e nual a. A rimchhe si, nakinah bathrooma inthiar zel tura la hrual a ngai dawn a nih hi. Ka phone chu ka han buaipui leh tê tê phawt a. Ka reset vek a, Muansangzuali hman nghal mai theih turin ka dah ṭha ta vâng a. Zanriah pawh ka ei har angreng,. Ka phur luatah. Ka eikham meuh chuan dar 7 a pel tawh. Ka nute nen inbe leh phawtin chanchin ka hrilh a. Helhhawlh leh chhungril phurnaa khatin Muansangzuali te ina chhuk tur chuan ka in chu ka chhuahsan leh ta a. Thawm nei lem lo va ka chhuah chhoh vang nge an tuizêm bul pangpar pawh an khawi dulna sira Baby phone lo hmang chuan ka awm ve tih hre miah lo hian, "Ani lehzel a thih chuan engkim hailan a ni dawn..lo chelh hram hram rawh" a ti sar sar a. Ka ding chawt. Ka lung a rawn phu nghal dup dup. 

A ngawi leh dat hnuah, "Lungngai suh, Jail-ah chuan an lutthla tawh e. Tsa kutah khalam chu.." a ti leh a. Che lo châng lovin ka ding khawng reng. 

"A bulṭanna ho viau mah se, a tawp thleng lo thei lovin min zîm tâwt tawh si a nih hi..Naktuk zanah thil chu tihfel vek ni rawh se..boruak a alh zel loh nan.." a ti hriam hraih a. A che san san a, an in lam a pan ta nge, a reh ta vang vang a. Thâwk ka la ve thei chiah. Thawk pawh ka lo thaw ṭha ngam lo a nih dawn kha. Ka thu hriatte kha a pawimawh takzet. Ka la remkhawm thiam lo mai pawh a! U Faka dinhmun a derthawng tih erawh ka chiang viau e. Eng nge ka tih ang aw? Muansangzuali avanga ka phurna te kha lakbo ang duak an ni leh vek tawh. Mahse, phone hi ka hmantir vat a ngai. Bike lam ka pan ta chhat chhat a. 

Ka zu thlen chuan Kimi pawh a lo awm a. An ko hawng leh tawh a ni maithei. Sangpuii chuan a a kheimit chu a nau a lo zûttir ve nasa mai a. Pu Thara'n min hmuh rual chuan, "Lo ṭhu rawh" a lo ti var a. Ka ṭhu zui ve zat. Diki chuan, "Phone chu a rawn thleng ta mi?" A lo ti ve bawk a. 

"Aw..hei a hlui chu ka rawn keng a. Online class an kal dawn te kha in ti si a. A hmanhmawhthlak êm a" ka ti duah a. 

Muansangzuali chu ka pe a. A la vat. Pu Thara chuan, "Simcard kha han vuah chhin teh le" a lo ti a. Tleipuia lah lo phur, "A û, games min khelhtir ve rawh aw" a lo ti sauh sauh a. Ka lainat zawk e a. Pu Thara chuan, "Games khelh nan hman ka remti lo, ka phone hmasa pawh i games dah nasat lutuk vang a nih kha a chhiat" a lo ti ve bawk. Sim card chu a vuah ta a. Hman theih a ni nghal mai. Pu Thara chuan an nu chu melhin, "Pawisa chu va la la, pek nghal a ṭha" a ti a. 

Diki chuan, "Kimi thil chah khul nan ka lo hmang ṭhen tawh asin. A rawn thleng chawpchilh ve bawk sia" a ti a. Pu Thara rik hmain, "A hmanhmawhthlak chuang loh a nia. In neih hunah Sangpuii hi rawn kentir mai rawh u" ka lo ti vat a. 

"Thil ka chah e hi inti zen zel a. Engahmah ṭangkai tak tak si lo. Vawikhatmah chah tawh suh u. Thawmhnaw phei chu hak sen loh in nei. Sangzual, lo nghak lawk la, kartawpah chuan ka rawn thawn hman ang. Naktuk leh a tukleh hi Pu Vunga in kan sethlâm dawn alawm" a ti mawlh mawlh a. 

"Aw le, hmanhmawh uchuak a ngai lo" ka lo ti ve nghut a. Muansangzuali te chu naupang tih takah an unau chuan ka phone hlui chu an khal an khâl mai a. Pawimawh hman nghal mai theih kha chu ka dahsak sa vek bawk. A number erawh ka la hre lo. Amah zawk chuan, "Sir, i number lo sawi rawh, number save tur ka nei tlem tawp" nui chung hian a ti a. Ka lo sawi nghal zar zar. A pa kha chuan a nei tawh chiang a. 

"Whatsappah khan min lo text nghal la, i number pawh ka la nei ve hleinem" ka ti a. A bu nghat. 

Diki'n thingpui min rawn thlit ve mial a. Zah theih loh chhuahin, "U Diki hi Lianpui nge Ngûr kha in khua kha'h?" Tiin ka melh a. 

"Ngûr zawk..hei va zin a ngai lehnghal, ka nu a ṭha râi lo va, Thara hi a hna a la laklawh deuh sia, chawlhni hmangin kan va zin lawk maithei a ni" a lo ti luam a. Ngûr khuaah Johna a cheng ve tih ka ngaihtuah zui nghal. 

"Lianpui hi ka la kal lo va, Ngûr khua nge heta ṭangin hla Lianpui" ka ti leh a. Sawi tur a vâng ve êm bawk a ni. Pu Thara chuan, "Ngûr a hnai zawk. Lianpui pawh a hlatna a tam hran lo" a lo ti ve mai a. 

Chutihlai tak chuan kawngka pawh kik khawmawi lo chuan Diki aia naupang hlek tur, hmai hriam lam, ngo erawh ngo ve pangngai, bra a hren loh vang nge ni dawn ni hnute fual lam hi a rawn lut a. Eng sawi set set lo chuan Kimi chu va pan nghalin, a chhipsamah a va ṭhâmsak ta a. Mahse, an bula ṭhu pu Thara chuan a lo ṭhelh vat. 

"Rini, eng nge thil awmzia?" A ti tuar. Thinrim hmel erawh a pu lem lo. 

Rini an tih chuan khur hlawk hlawk chung hian, "He Zawngchhenu hian kan pa a rawn be leh alawm, inrûkpuiah te zuk sawm ngam a! Zahna hi a bosal ve chiang khawp mai, ka lungawi lo rapthlak a nia" a ti tân tân a. Diki a sa ve leh ta phat, "Rinzual, in pa leplerh chu engvangin nge ka fanu chungah hrikthlak i tum a? In pa pawh a fihlim bik em ni? Ka fanu thiam loh vek hi a ni awzâwng lo aw. Kan in chhungah ngei min rawn kalchilhin ka fanu kut i rawn thlak a maw? Ngawi tak rawh, ka report dawn khawp mai che" a ti hlawih hlawih a. 

Mahse, Rini chu a zâm lo nasa mai. "Nangnu kha ngawi hmak rawh. Nangmah pawh hi i tel ve aw, nangman a ni lawm ni tihpuia remruatpui? Hmeli, engkim ka hre vek aw. Zakthei lo nufa lutuk" a ti ve ta hmiah hmiah mai. 

Pu Thara chu a hrilhhai hmel viau, an nu melhin, "A sawi kha a dik em?" A ti chang fak a. 

Diki lah chuan, "A sawi kha i awih zawk a maw? Engvangin nge ka fanu chu mi pasal ngaizawng tura ka tih tehlul ang? He mihring hian dâwt a phuahchawp mai mai a nih hi" a ti tuar tuar a. An awrâwl a ring hlawm si, a va nuam lo tak e aw. Haw dawnin ka laklawh kual ka ti mai. Lo ṭawng vena chi lah a ni mang si lo. Kawngka chu a inhawn sa avangin nupa niawm tak leh mi pakhat an rawn lut a, "Rini, lo haw rawh. A zia lo êm mai. A mualphothlak" nu zawk chuan a rawn ti a. 

"U Khum, ka rilru hi a na ve zozai tawh êm a ni. Lalhmangaiha pawh khan a sawi thei ang chu..nichin mai khan a phone ka check a, Nunkimi hian, 'Kan khaw lamah tlan dun daih mai ila," a rawn ti kual a. Kan pa angin ka chhang ve zel a, "Zan reiah ka rawn chhuak ru ang a, Tlângah kal leh ila" te a rawn ti! Hmeichhe nasa tak zawng a ni. Hman zana kan buai aṭang khan Hmangaiha'n vawikhatmah a biak zawm tawh lo. A phone pawh kawl rawh te min ti zawk. Ni e, kan pa hi a thiam e a dik e ka ti lo. A hma pawhin Nunkimi kher loah pawh kan lo buai tawh, mipa lerh nupui kham lo a ni ka hria. Ka fate avang chauhin ka la dawh a, ka tuar hram hram a. Nunkimi bulah pawh ṭha takin kan fate avanga lo kiansan turin tlawm zawka ṭangin ka ngen tawh. Mahse, kan pa a ngawih tawh hnuah pawh amah zawk hian a rawn zâi leh zel a. Ka lung a dam tawh lo. " A ti ta bawrh bawrh a. An thu leh hla a ṭang chuan Kimi zawk chuan a va zâi hmasa leh tih a chiang reng mai. Mahse, kei ngaihdan nghet tak ka nei ve a, Nupui pasal neih tawh hnua mi dang kawp chingte leh an va kawpte ah hian kawppui nei chunga rinawm lo zawk hi a thiam lohna a tamin a sang zawk ka ti ve tawp. Rinawmna thu tiamin Pathian leh Kohhran hmaah thutiam an chham tawh a, chu an thutiam bawhchhhia rinawmna vawng zo lo chu mihring nêp tak, mi hlawhchham, mi tenawm ka ti lo thei lo. 

Eng ang pawhin midangin lo zarin lo chul heuh heuh mah se; kawppui a neiha fa a neih tawh hial phei chuan a hnâr thei tur a ni ringawt. Mihring kan nihna chhuanlama hmang teivet te hi a tlangpuiin mi hlawhchham an ni. Mi dang rinawm tak tak, thutiama ding nghet tlat heti zozai an awm lai hian ti nge an lo hnip bik a, zuamawm leh beisei theiha an lo awm bik? An rinawm lo a ni tawp mai. Chhuanlam a awm theiin ka hre ve tlat lo. Ṭhenkhat hian chhuanlam siamsakin mi nupui pasal lo ngaizawng vete kan han dem rawn ngawt zel a. Nunkimi pawh hian a tirah Hmangaiha hi a va beisei dâwk dâwk a rinawm loh. Inṭhenawm hnaitê an la ni zui a! Hmaa zawk hian va dêkin a chak lohna zâwnah a va thlem heuh heuh tih hriatreng, bakah Nunkimi hma pawha buaina a lo neih tawh danah mi rinawm lo tak a ni ve hrim hrim tihna a ni mai. Hetiang mipa te hi mak deuh chu an pianthar loh chuan an tar hunah pawh 'Tar hur' an ni tho tho..dem ngam ila, chirhtheh ngam ila,. Ṭhenkhat hi chu an zum ve deuh mahna. Rini pawh hi ka ṭan vek bik miah lo. Nu nasa ve thawkhat tak a ni tih a lang reng, chutihrualin Hmangaiha a reh hnu pawha Nunkimi'n a va zâi kual leh erawh Nunkimi pawh a tidik hauh lo thung. 

Diki chuan, "I va ṭawng thei per pur tak e aw. In pa thiam loh vek a nih kha, in pa ṭhen ngam si lo hian tihian a ngaihzawngte lakah i inhrithla vak vak a..in pa zawk hi hneh tum la, midang beisei tawh lo turin, tichuan in hlim ve mai ang" a lo ti hlang hlang a. A sawi dik vei phian bawk sia. Pu Thara chuan, "Ngawi tawh rawh u, Rini, nang pawh va haw rawh. A zahthlak êm mai, inṭhenawm hnai kan ni lehnghal a. Nunkimi pawh naktukah a pi te bulah a phei vang vang ang. Hetianga buaina neih hi ka duh reng reng lo. " Patling takin a lo ti charh charh a. 

Mi pakhat chuan Rini chu va kaiin, "Lo kal rawh. Hetia va intihmualpho hian kawngro a su lo. Pu Thar, lo hrethiam teh u. An thinrim hian khua an hmu tawh si lo va..tirawh, Rini" tiin an kai chhuak ta a. Boruak chu a reh duk mai. 

Pu Thara chuan min rawn enin, "A zia lo ṭhin mang e, i rawn len ve ṭumin tiang kha i tawng ziah a.." inthlahrung deuh hian a ti a. 

"A ho lutuk, han buai ram ram changte chu a awm ve tur a lawm. Inthlahrung suh u" ka lo ti ve luam a. 

Diki chuan, "Nunkimi pawh a dik lo tho, mahse, Rini pawh a ti lutuk deuh a ni. Keite kha min sawikai ve daih lehnghal a. Thawkkhat laia Hmaa zu ruiin kut a thlak vak ṭuma a tlan lai khan Hmaa hian Kimi a rawn hêl a. Ani tleirawl â tih takah a thusawite kha a lo âwih ni tur a ni. Hmaa lahin an nu a hruai tawh loh turzia a sawi reng bawk si. Amah tak kha chuan a va hruai lo rêng a, Buanga te nupa va hruaisak a ni nghe nghe a. Khatiang kual vel kha kan ni..ka fanu a nih vang pawh ni loin engkima burbun fai vek zawng a dik ka ti bîk lo" a lo ti ve hmarh hmarh a. A sawi dikna chen a awm. Kimi erawh a thiam vek e tihna a ni lo. An inhruai hawn leh hnute chuan ṭhena biak tawh miah loh tur a ni a. Tuna an mualphona pawh hi an cho chhuah ve ve a ni. 

"Aaa..engkim a ṭha leh vek mai ang. Kei pawh ka han haw tawh ang e. Kan sport hi eng êm êm ti lo mah ila, ka rawl ve ṭhûm mai" tiin ka tho ṭuah ṭuah a. Sangpuii ka melh zauh bawk. Ani pawh rawn ding ve hluaiin, "Sir, ka lawm lutuk aw. I zarah phone ka nei ve thei a. A man pawh apa hlawh lak veleh ka rawn keng ang" tih pahin min zui a. Nui chungin, "Phone ringawt kha i lo ngaihtuah ang e, 1st term in exam ṭêp tawh kha" ka ti a. 

Nui chung bawk hian, "Teuh lo mai, Saw Bawihpuia sawn a khawih tam leh zawk ang" a ti ve mai a. Kan inmangṭha a, kei pawh peng khawmuang lo vin in lam ka pan ta nghal a. 

In ka thlen rualin Baby chungchâng ka rilruah a rawn lang nghal. A sawi hmangah khan chet hmanhmawh an tum viau mai a. Tu emaw tak an target nge, U Faka nuaibo an tum? A sawi dan takah, a tirah thil hotê avangin he buaina hi a rawn irhchhuak a nih a rinawm a. Tunah an hmanrua U Faka chu Police kutah a awm si a, a thil sawi bakah a evidence ṭhenkhat te avangin an awm a nuam tawh lo tih a chiang reng mai. Chuvanga phumbo hmaka a evidence neih vete pawh nuaibo an tum niin a lang."Ani lehzel a thih chuan" a tih tak erawh ka bangbo viau. Tu a sawina nge ni ang ka hrethiam hauh lo. An thawhpui zinga pakhat nge , an mi chhawr lai zawk? U Faka thawhpui thingzaite kha em ni ang? Mahse, an ni kha chu U Faka pawh khan an hming a sawi tel ve lo nge an man thu sawi a awm miah lo va, a bul rât aṭangin engmah an hre ve lo a ni maithei. Hriatpuia biak a ngai niin ka hria. Ka call ta a, a ring quit ṭhak ṭhak mai. A muhil tawhin ka ring chiah si lo, a buai emaw a phone a keng lo a ni maithei. Ka miscall a hmuh chuan min lo call ve mai ang chu maw. Ka lehkhabu hawh ka la chhiar loh ka chhiar ta mai mai a. Kar loah ka mut rawn chhuakin ka mu ta daih a.

Zinga ka harha ka phone ka en chuan Hriatpuia msg ka hawng hmasa ber." Nizan khan U Kaia nen sa kan châng daih a, phone ka lo keng lo alawm" a rawn ti a. Hmm, U Kaia chu min sawm ve âwm, ka châk tehreng nen, thil eng emaw kan tawn leh a hlau a ni ngei ngei ang. 

"In kap em?" Tiin ka chhang a. A la online lo thung. 

"Morning.." tih ringawt lo thawntu chu nui ver ver chungin ka chhang let ve nghal a. Nizan khan a number ka save nghal a, mahse, ka hawn khan, "Bawihpuia'n games a khel dawn" a tih avangin mangṭha pawh kan inmangṭha ta lo kha a nia. Kei lah ka lo muhil ve deuh thut bawk nen. Min rawn wishna chu dar 6 ami daih tawh a ni. A tho hma hle mai. Kei pawh thoin eirêl ka buatsaih a. Bathrooma luh hi ka hreh vek tawh, kha rul chimawm deuh vang khan. Ka hawi kual vek phawt a, ka lut chauh zel. Chaw eikhamah ka insiam nghal a. Sport a zo tawh bawk a, lehkha zirna lamah ṭanlak a ngai chho leh dawn a ni. School ka thlen chhoh rualin dar a ri nghal. Thawh kha ka hai miau a.

Chhunchawlh laiin Ludy te ṭhianho an rawn lut ve a. An thawm a na angreng sia, an hneawm ṭêp. 

Muansangzuali'n nu Nghaki te chu chi tlem a rawn dil a, an lo pe ve mai bawk. A chhuak tur chu Ludy chuan, "Canteen-a thil ei pha lo chin hi chu a luh pawh rawn lut lo mai se" a ti ar ar a. An nui hak a. A ṭawngdan reng reng hi a hnuaichhiah zawng ngawt hian a ni zel a, a chapo ve riau a nih ka ring. 

Sangpuii lah hi han ngawih mai a thei ṭhin bîk lo nge, "Hmelṭha mâwl an tih ang hi an lainatawm" tih leh chhuah a rual a. A ṭawngkam kha huat theih nisi, Ludy'n inngaihbel dawn se hmelṭha a va inti âwm êm êm tihtheih ni bawk si ang a ni a. Hei tak hi Muansangzuali finna chu a ni. Ludy te pawh chu an phun zui sap sap hnuah an chhuak ve ta a. 

Kei leh Thana chiah kan la hnufual lai chuan Nu Nghaki'n no vel rawn senghawi pahin, "Ludy te ang chi hi chu mi hmuhsit an tina thei si a, ka fanu chu nise ka hnuk hrep tawh ang" a ti nang nang a. Remchângah hmangin, "Khawi laiah nge Ludy te hi an awm ve " ka lo ti vat a. 

"Vengthlangah mawle..an khawsak te chu a pangngai reng, a rûkin zu an zuar e te kha an tia..ka hrechiang ve chiah lo va" a ti ve mai a. Thana chuan, "Nia, sawi a awm tlat! A pa sawn a leilet lamah a bilh a, burma thingzaiho chhawr pahin a thlawrtir ṭhin an ti tlat! An leilet aṭang ringawt chuan sawtiang in leh lo chu din a harsa ang. Kum hnih khat lekah phei chuan" a lo ti ve sur sur a. Thana hi chuan a hmaa Ludy'n a ṭawngkhum tawh dan avang khan a mil tehchiam tawh lo. 

Lawmi chuan a thleng sil sa rem rawk rawk pahin, "An zuar âwm êm mai, A hmate chuan Ludy te pawh incheina a neih loh ve theih êm kha, tunah te chuan a û-in bike a nei a, pickup pawh an lei dawn an tih kha" a ti ve lâng lâng a. Savatê khan a lo sawi dik a nih hmel viau. Engpawh chu nise, nunhonaah hian chapona hi a hnawksak berin ka hria. Mil an har êm êm a ni. Hmeichhe hoin, 'Hepa hi ka ten lutuk" an tih rûk fô pawh hi belchiang ta ila, a lo chapoin a lo insawithei sur sur duh viau! Hmeichheho hian mihring nun hi an zirthiam phian asin..

Canteen kan chhuahsan hnu chuan Thana chuan, "Naktuk chu holiday a ni bawk a, Lianpuiah va lêng ve ila..kan nu pawh i la hmuh loh kha" a ti nuah nuah a. A bialnu kha Asangi ni tain ka hria. 

"A pawi hleinem, tihtur a vâng leh awm sia" ka ti mai a. Zana sawi ṭha tura intiamin class la turin kan kal hrang leh ta phawt a. Zirtirtu te hi zawt ta ila, chawlhkar khata nî awmah hian mi tam tak weekend hmang nuam deuhte chuan Thawhṭanni hi 'Ni sakei' an ti châwk a! A nihna chen pawh a awm ve reng. Mahse, Thawhlehni leh Ningani hi ni a rei duh bikin ka hria, Zirtirtu dang te pawh hian han ngaihtuah chiang se an ti ve deuh vekin ka ring tlat. Vawiin erawh Nilai a la ni hlauh a, a zia deuh e. Higher lam an bâng hmasa a, kei pawh in ka thlen veleh chawhmeh siam thar a ngaih avangin ka che nghal vat vat. Artui hi a plate-in ka lei mai zel a, siam a awlsam nen. Huana an phuihnam chu ka zuk la a, keia ei khawp ringawtte chu a tam lo bawk nen. Ka chhum ta nghal a. Ka phuihnam thenna ka chharkhawm mêk laiin Savatê a rawn lut hlawl mai. A hmel a dik miah lo. A mitmeng a alh phat a, mittui te pawh a parawl deuh kiang niin ka hria. A biang chu a tai hlar a, nui hmel hmuh tur a awm lo. 

"Sangpui" ka tih rual rualin, "Phone kha Nunkimi'n an khuaah a lo hawn phei daih" tih leh insût hraih a rual a! Kei pawh min den dan a dang zar mai. 

"Engvangin?" Ka ti tuar a. Ka awrâwl pawh a ring viau. 

"A phone hman lai kha a lo dah a, a nuin, 'School naupang tan chuan hei hi a tawk chiah, pakhat kha i u in hmang zawk rawh se. ' a tia lawm. Apa a lo la haw bawk si lo va, ka thinrim a, ka rilru a na bawk a. Ka lo chho" a ti a. Ṭah êm chu a hreh tih ka hria, mahse, a ṭap châk si. Ṭhutthlengah ka nam ṭhu a, ka kuah zui nghal. Ka âwmah pawm betin a insum zo ta lo chu a ṭap ta hlawp hlawp a. Hun tam takah tihduhdah leh ṭawngkam dengkhawng tak tak hmachhawn fô mah se; a mittui far khat pawh a tla ngai lo. A chhan chu a rilru natna aiin a thinrimnain a hneh zawk ṭhin vangin. Mahse, tunah erawh a lo awh ve ngawih ngawih, a rualpui leh a classmate ten an hum vek tawh hnuah kei a bialpa phone hman lai ngei chu hmang ve tain a hlim a, a phur êm êm bawk. Zan khat lek a kawl tihah a nuhrawn fanuin ama phone hlui tawh, chhe tawh lam nena a lo thlengsak hmak chu ani thil thar lawm rual lek tan chuan a na dawn lutuk. Kei pawh ka thinrim. Diki te nufa thiltih dan chu ka lawm hlawl lo. 

A inbun thawl deuh hnu chuan, "Ngûrah chuan kan va kal dawn em ni?" Ka ti sup a. Min rawn melh chho a, a mitmeng ka chhiar thiam lo. 

A bek tawn tawna vuanin, "I hman tur atan liau liaua ka pek che a nia, chhiatna engmah a la nei lo va, midang nise ka pe lo vang, thlak pawh ngai ka la ti hek lo..nangmah i nih vang a nia. Chutia Nunkimi'n a hman leh mai mai dawn ai chuan ka la let leh zawk mai ang e" ka ti nghet ta charh charh a. 

A heh pet fan fanin, "Umm, Ngurah kal ang. Mahse, apa ka hrilh phawt ang" a ti sap a. Ka phone phawrhin, "I pa chu call rawh" ka ti a. Ka pe nghal. A dial ve nghal zat a. 

A pain a rawn lak chuan, "Pa, ka phone kha Nunkimi'n a lo hawn phei daih a, ama phone kha a lo dah a, ka lungawi lo, Sir nen kan va la dawn" a ti nghal hmawk hmawk a. Speaker a on zui bawk. Pu Thara chuan, "A va mak bawk ve mawle, i nuin a hriatpui em?" A rawn ti a. 

"Hriatpui e , 'School naupang tan chuan hei hi a tawk lek' min tihsak a. Pa, Sir pawh ka hrilh a, a lawm lo a nia. Kan va la nghal dawn" a ti leh tân tân a. A pa a kar ngam viau tawh chuan min tilawm deuh. Zu a han in tlem tak vang a ni tih lah ka chiang. A pa chuan, "Kimi phone kha a chhe viau tawh em ni?" A rawn ti dam duai a. 

Muansangzuali chuan, "Chhia chhia, a lcd a ṭha tawh lo va, a touch a chiang tawh lo. A che mur mur zel..khatiang hman ai chuan neih loh ka duh zawk. Chuan ka phone atana min leisak a ni lawm ni? Chutiang a nih vanga Sir pawn min leitir phal a nih kha" a ti nghat nghat a, a thinrim hmel chu hmuhnawm tizetin ka lo thlir thung. 

"A nih chu mawle aw..sir chuan a kalpui dawn che mi? " A rawn tih chuan min rawn melh zauh a, ka lo buk khum. "Aw, kalpui dawn" a ti a. 

"Va kal u la, a nih chuan, mahse, buaina va siam lo zawng khan aw" a rawn ti ve ta a. Dar 4 a ri lek lek tawh a. Mahse, Ngûr chu a hnaih bakah two wheeler phei chuan kan thlen vat a rinawm. Ka bialnu chu ni lo se ka kal kher lo maithei. Gas ka off a, kekawrbul nen, tshirt awmhmun hak nen ka chhuahpui ta a. Inchei vak a ngaihna ka hre lem lo. An veng panna pêngah ka lo nghak a, Kimi phone kha a va la zuai. A rawn thlen chuan, "Chawhmeh zuar turin min tia, mahse, Heleni ka va sawm lawk ka tia, ka rawn chhuak daih" a ti niah niah a. Kan tlan chhuak ta nghal. 

Zopui khawchhung pelh mel khat velah hian IB a awm a. Maêngi khan a sawi tak a, a nau hi a thawk ve a. Hmuh erawh ka la hmu lo. Ka rin loh deuhin IB kawt tanky lian ve deuh chungah chuan Ludy leh Mamawii te hi mipa pahnih nen an lo ṭhu ho va. An hlim hmel hlawm viau. An ni pawn min rawn hmu ve, Ludy chuan ring zetin, "In fawr dawn ni maw?" A rawn ti pek a! Ṭawngkam thlawn ba duh ngai lo ka naui lah chuan a aia ring zawk hian, "In riak dawn ni maw?" A va ti ve. Ka nui hawk ringawt. An inchhang tawk thei lutuk hi lawmawm lamah te pawh a kal lek lek dawn e a. Motor kan tawk vak lo. "Min rawn kuah rawh" ka ti nghut a. 

"Aih" tiin a ṭhu khawng lah a. "Reuh che hian aw" ti supin ka speed thlakin ka'n tlan chak pui mai a! Min rawn bawh deuh titihin, "I rapthlak lutuk..hey, tlan muang rawh, ka zuang thla mai ang aw" a ti tuar tuar a. Ka inthlahdul leh ta hret. Han tihmangan te , han tihthinrim te hi a nawm dan a dangdai ve a. Kan tlan pangngai deuh hnuah chuan, "Khatianga chak khan vawikhatmah tlan tawh suh. A nih loh chuan i bikeah ka chuang tawh ngai lo vang" a ti hmak hmak a. A la lungawi chiah lo a ni. 

Ka ngawi reng a. " tunah pawh i la tlan chak ka ti, haw tlai i va hlau awm, lenna tur i nei mi a?" A ti leh hlak hlak a. Ka thinrim miah lo naa, runluih nan muang theihtawpin ka tlan ta a le..a lir chang chang a ni ber e. 

A ngawi ta hmak mai. A awmdan ka hrethiam reng, min sawisel ngam chiah tawh si lo, thinur bawk siin a awm mêk. A tawpa tawpah a insum thei ta ngang lo nge, "I va han sual êm êm " a ti ta a. Ding datin, "Hawn tlai ka hlauh lohzia lanna a nih kha..chuan, eng anga chak pawn tlan ila ka accident pui duh che i ring em ni? " Ka ti dam thlup a. 

"Nih tihpalh" a ti ta sep a. Ka insum zo leh ta lo, rem leh rem lo va hawiletin a biangah ka chuk ta zauh a. Pangngai takin kan tlan ta a. Ngûr khua pawh kan thleng ta. Diki te in chu veng chhak lam, step zawh chhoh ngaiah a lo awm a. Bike chu kawng sirah ka tung a. Kan chho ta a. Assam type hlui ve lam tawh, lian lem lo tak a lo ni a. Kawngka a lo inhawnsa avangin kik khawmawi lovin kan lut ta mai. Kawngkhar hmachhawn zawnga ṭhutthleng sei an hunah chuan pitar , vun chuar tawh lam, hâng lam deuh hi a lo ṭhu a. Choka leh ṭhutkhawmna chu a inzawm nghal. Ṭhutthleng pakhat zawkah chuan mipa naupang Tleipuia nena inrualkhat vel tur hian dawhkan lian vak loah eng emaw ni hi a lo ziak mawlh mawlh bawk. 

Savatê chuan, "Ka pi, khaw nge midang hi an awm le?" A ti a. Mahse, pitar chuan a rawn thlek hâ ringawt. A beng a ṭha tawh lo tih a lang mai. Mipa naupang chuan, "A beng a chhêt tawh a, a hre lo vang. Ih, anu chu huanah khuan a awm a" a lo vat reuh a. Sangpuii chuan, "Mama, I u Kimi hi khaw nge a awm le?" A ti a. 

"Ih, khitah Ani Remi te inah a kal" a lo ti ve mai a. 

Kei chuan, "A hla em? I nî te in chu" ka tih laiin a nu niawm tak nu tê lam, ti hnikhnektê, hmel fel tak hi Ṭawktê a kawra pawm chung hian a rawn lut a. Min hmuh chuan mak a ti deuh niin a lang. 

Sangpuii chuan, "Nu Sai, min la hria em? Muansangzuali kha..pu Thara fanu kha" a lo ti var a. An lo inhmu tawh a ni maw. 

Chuveleh Saii a tih chuan, "Ehe! Sangte, i va ṭhang duh ve, ka hai dawn che lawm, kan inhmuh lohna a rei tawh êm a. Eng nge in rawn tih dawn?" A ti chul a. 

"Ih, u Kimi rawn hmuh lawk kan tum a. A lo awm bawk si lo" a ti sap a. 

"Khitah a nuteii te inah alawm a thlen? Keini chu min rawn tlawh zuai ringawt. Ngati nge?" Mak ti deuh tak hian a ti a. Chumi rualin, 'Thingpui in r'u aw' a ti a. Chhuan nghal mai a tum laiin, "A ngai lo, ti duh suh, kan let leh nghal dawn a..bakah kan rawn in tawh" ka lo ti vat a. A thingtlang nu hnek hnek naa a felin a bengvar khawp mai. 

Pitar chuan, ring zet zet hian Sangpuii chu a lo be ve bawk a. Engmah a hre hleithei bawk si lo. Sangpuii'n Saii bula thil awmzia a hrilh thuak thuak takah chuan, "Chu chu a nih dawn chu, "Phone thar ka nei a, kan khuaah chuan nei an la awm lo vang' tia a lek larh larh ni..a va ti ang lo ve aw. Eng nge a rawn hawn chhan ringawt te hi le" a ti ve duah a. Chu erawh Sangpuii chuan a sawi bik lo, "A rawn zin ve zuai châk a niang" a ti ringawt. A bo lai velte kha an han sawikai leh rih a, kan rei ta phian. A nuteii te in chu a lo hla lem lo bawk a, kan han pan leh ta a. Kan chhuah hmain Mipa naupang chu a fel reuh manah tiin ₹ 50 nawi ka neih si loh vangin ₹100 ka pe ve a, ka rilruah a lan tlat vang a ni. A nu chuan, "Awii, a ngai lo,i ti zahthlak" a ti chul naa..ka pe laklawh tawh. Tikhan, nakin zelah Ngûr khuaa zin thut hunah pawh chhungkhat an ni tawh mai. 

Nunkimi nu Diki chhang chiahte in kawtah chuan kan ding ran a. An in khar ṭhap mai. Kawngka chu ka kik dat dat a, "Lo lut rawh" hmeichhe aw sin lam hian a rawn ti a. Kan lut ta a. Min hmuh chuan a hamhaih deuh. Diki nen unau nisi an inang lo ngawt mai. A hmai a sin bakah a vun pawh a êng a, hmelchhia tia sawi theih a ni lo, a hmelṭha vul chûk lo a ni mai. Min lo dawngsawng vat vat a. Sangpuii chu a lo hre sa bawk nen, an inbe ve chul a. Kimi awmna a zawh chuan a inbual thu a sawi a. Kan lo nghak ta hmiah mai. Sangpuii chuan thil awmdante chu a sawi bawrh bawrh a. Kimi nuteii Marini an tih chuan, "A va timak ve aw. Ka nuin min leisak a ti ve si..a lo hawn chhan lah a sawi ṭha duh bawk si lo. A pite bulah lah thleng tâng e a ti si lo va, mak ka lo ti rêng a" a ti ve hmiah. 

Reivakloah Kimi inbual zo pawh chu a rawn lang ta a. Min hmuh chuan mak a ti hle tih a lang. 

Sangpuii chuan, "Va inthlak phawt rawh" a lo ti hmak a. A va inthlak a, a rei phian lehnghal. Kan haw lam chu kan thim lut ngei ang le. A rawn chhuak ta nge nge a, Sangpuii chuan, "A tlai tawh si a, tifel vat ang, khawi ka phone kha lo la la, hei i phone ka rawn keng nghal bawk" tih leh pek a rual a. Kimi chuan, "I zak lo e a. Ka nuin ka tana min leisak a nih hi" a lo ti hlar a. 

"A man a la pe awzawng lo ve a, ka pain ka tan liau liaua a lak, a man tur pawh vawiinah a thawk..khawi lo la vat mai rawh, i zak thei lo lutuk" a ti ve ta hrep a. Pi Marini chuan, "Kimi, pe rawh, ngah nge mi phone te chu i rawn hawn daih ? Zahpuiawm lutuk" a lo ti ve bawk nen, "I châk lo viau ang, anu ka be dawn hre rawh" tih pahin titau tih hriat zet hian phone chu a pe a. Sangpuii chuan a simcard phawrhsakin a pe a, "I duhtawkin be rawh. Nu Marin, kan kal ang, kan tlai tawh sia.." tiin Pi Marini chu a va melh a. An kaiṭen thleng min rawn thlah a, nu fel tak niin ka hria, pasal a nei fuh viau te pawh a niang e. Peng khawtlai tawh lovin kan tlan nghal a, Pu Vana te pawh tlawh a ṭha viau naa, kan tlai tawh si. Khaw chhung kan pelh hnu lawkah Sangpuii phone chu a rawn ri ta ral ral a, "Hello" a ti a. Speaker on lo mah se, a volume a san vang nge Diki lah a rawn au ring bawk nen, ka hre pha ve vek, "Zawngi, engvangin nge khatah daih daihte chuan i va kal a? I va nasa reuh ve. Kimi phone atana ka leisak a nih kha, i lo va chhuhsak ngam reuh le, rawn haw teh, i châk lo khawp ang" a rawn ti hlawih hlawih a. 

"E.." tih leh hmeh hlum a rual. Muansangzuali hi a tir thlanmuala ka hmuh aṭanga vawiin thleng hian nitin a danglam niin ka hria. A ṭha zawng leh ṭha lo zawng pawhin. A chhan nia ka hriat chu a hma kha chuan nghenchhan tur leh amah hum thei tur Heleni bak a nei lo, Heleni lah a rualpui lek a lo ni bawk si. Tunah kei nen intawngin kei lahin duh namên lohin ka lo duh ta si a, zirtirtu ka lo ni ve kher bawk nen, keimah min rinchhan leh him nia a inhriat tlat avang hian a hma anga an tihduhdahna tawrh liam mai mai chu a tum ta bik lo niin ka hria. A ṭhat êm êm rualin duh aiin a kal fawr ang a, Diki te aiin dem a hlawh daih ang tih ka hlau tho, ka venpui deuh a ngai dawn niin a lang. Tin, tleirawl lunglen lai, mahni thuduh ve hun lai ngang a ni a, ani lah kha chen inrîkrâpna hnuaia seilian ni bawk si chu a lung a lian zual a, a huaisenin a kawlh hrâ mai bawk si. Mahse, siamṭhat harsa lo tur chiin phung a thlu êm êm lawi a! Ka sawi hmaih tak Miss Puii'n a zirlaibu a leisak te khan a hnuah Puii te huan a va thlawhfaisak ve leh vek a niawm e. A thlawn ngawta midang thil a beisei lo ngam pawh hi a ze mawi tak zawng a ni mawlh e. 

Ka tlan chak thawkhat viau a, kan tlai deuh tawh êm vangin ani pawn engmah a sawi tawh bîk lo. Zopui khua pawh a lang thei tawh tihin ka bike chu a thi ta thut mai! Kan han chhuk a. Petrol chu nimin lawkah ka thun a, a la zo lo nasa. A eng lai nge chiang lo tih ka hre ve thiam ta hauh lo mai le. Kei a hmaa two wheeler nei ngai miah lo, a chinchâng hre mang lo zet ka ni si. Ka buai ru mang e aw. Dar 6:20 a pel hlek. Khua pawh a thim tawh, kan chhiatna lai ber kher lah chu a chhak lawk chu na ngaw deuh khup vangin a thim zual bik lehnghal a. Ka hlau hran lo naa, Ka bula ding savatê dinhmun ka hriat avangin ka bike chhia chu pawi ka ti hluah hluah. Signal chu chhetê a lo awm hlauh a, chinchâng hre ber tura ka ngaih U Kaia te ka bepawp ta ngawt a. Tluanga awm lai a nih hlauh chuan ani motor bakah two wheeler lam pawh vuan tam tawh a ni a, a hriat ka beisei tawp mai a ni. Vanneih asiamin Tluanga chu a lo awm remchâng mial a. Mahse, Aidu vengah an uite man a va lam lawk thu an lo sawi, a lo thlen veleha an rawn tirh tur thu an sawi chuan ka lawm viau. Sangpuii chu ka ngaihtuah deuh avangin a pa ka biaksak ta a. 

."Pu Thar, hei a zia lo tak tak a ni. Ka bike a chhe thut mai a, Tluanga a rawn kal dawn a, engchena rei nge kan thang dawn ka hre lo va, ka rawn hrilh che a nih chu" ka ti a. 

Keimah chu ni lo ila a sat viau ka ring. Mahse, an lakah ka ṭha ve êm mai a, "A ni maw..a va zia lo ve aw..in ril a ṭam tawh viau ang a..aw le..in siam theih loh chuan lo sawi leh la, rawn lam tur che u ka lo ngaihven dawn nia" a rawn ti thlup mai a. Ven khat chuan kan veng ta e. Diki lam chu eng he hûah ka ngai lo. A duhtawkin lo bauh ve mai mai teh se. 

Motor veivak lah chu a'n awm lo khawp a, 407 pakhat chu a rawn tlan ve. Kan lo phar naa a ding hauh lo. Lehlamah veivak tam viau tura beisei chi a ni hran lo va, Ngûr khua hi khaw tâwp a ni mai a. Han kal zelna tur khaw dang a awm tawh lo, Lianpui lah Zopui khaw luh hma aṭanga pêng a ni a. A hnai zawk bawk si. 

Kawngpui fai laiah chuan kan ṭhu dun ran a. Zoa'n min lo call teh hlawl a, Ngûr khuaah khan khawchhunga hna an thawh loh vangin ka be ta lo law law kha a nia. 

Hmanhmawh hmel angreng deuh hian, "Ṭhianpa, thil hi a mak riau! Johna a bo" a rawn ti ta mai a! Muansangzuali chuan a phone a hmet malh malh naa, a hriat ka hlauh tho avangin bike bih pah chhuanlam chuan ka ding sawn ta daih a. 

"Eng nge a awmzia?" Ka ti hrâwk a. 

"Chawhnua ramhnuaia a chhuak kha tunah a la haw lo. A chhungte an mangang riau a niawm e" a ti a. 

"An zawng dawn em?" Ka tih chuan, "Hei an inaukhawm mêk..keini pawh kan kal ve dawn" a ti a. An bengchheng deuh nuai nuai bawk "Nakinah chanchin ka rawn hrilh leh ang che" tiin a dah ta a. 

Phone ka hmeh thim mêk laiin ka hnung aṭangin Muansangzuali chuan min rawn kuah chawt mai. Ka hamhaih deuh, mahse, insiamrem vatin, "Ngati nge?" Ka ti nghut a. 

Kawng chhak lama raw hung lian angreng tak han melh zawk zawk chung chuan, "Mi tu emaw a awm?" A ti sep a. Ka han en a, tumah ka hmuin thil che veih pawh ka hmu bawk si lo. "I ngaihbel a niang" ka ti sup a. 

Ka inher rem a, ka kuah ta hle hle a. Ramhnuaiah tuma hmuh phâk lohah kan awm a. Mi mitmei veng reng renga rem leh rem lo va ka lo fawh ṭhinna te phuba lak tum niawm takin ka fâwp ta mawlh mawlh a. Ani pawn a thiam ang tawkin min chhang ve. A zei lo tih reng ka ngaihtuah chang tawh lo. Bike chu ka nghentir a, ka veng pah tho bawk. A hnutê lian tehchiam lo chu ka khawihsak a, ka kut a la rang teh e. "Aih" a ti hmuk a. Min nam pah bawk. "Nih khawih loin" ka ti thâm ṭuak a, ka fawp zui leh hmak. 

Mahse, chutia inthlahlel taka kan inkuah vawng vawng lai tak chuan raw hûng aṭang chuan eng emaw ni hi a rawn lum thla bawp bawp mai! Kan inṭhen phawk, kawngsir hnim hmuna thil dum run chu ka phone-a va ên ka tum a, Savatê'-in min lo pawt, "Hlau suh, mihring a niang" ka ti zawi sup a. Ka pan phei ta a. Chu thil dum pawh chu a rawn che ṭial ṭial a, ka phone flashlight-a ka zuk ên chuan a hmaiah tak ka zu ên fuh a, ka tawlhkir dâwrh..

"Khai aw! Ṭhianpa" ka ti hrâwk a. Zawimuanga rawn ding Hriatpuia chu ka melh ta ngut ngut a..