ka savate 15

KA SAVATÊ (15)

Ziaktu : Toni Râlte

Ngaihtuah zui buai peih lovin in ka thlen rualin ka mu nghal thlawp. He khuaah hian ka awm rei ve leh deuh a, a mi chengte ka la hre vek lo nain, thilmak deuh deuh ka tawng chho a. Ka duh loh leh tum loh danin min kai kual chu a ni ta reng mai. Ka nu ten hria se min ngaihtuah ata lângin chawlh dil turin min nawr leh hial maithei a ni. Mahse, mipa ka nih angin leh he thil hi ka bialnu Muansangzuali nen a inkaihhnawih tlat avangin ka hmachhawn ngei tur a ni. 

Tei a la mut ka ring lo deuh a, ka call ta a. 

"Tei, Samua a lo lêng em?" Ka tih chuan, "A haw chiah, ti nge?" A ti hâ a. 

"Ka phone hi a bty a chiang tawh lo lutuk a, thlak ka duh deuh mawle..min leisak la" tlawn titih hian ka ti a. Dik tak chuan ka thawk ve chauh a, zirtirtu ka nih hmaa ka inhlawh vena te lah ka nu kutah a bo a bâng awm lovin ka thehlut vek zel a, ka hman duhin ka dil leh mai a. Sum khawlsa ka nei mang tlat lo. Bike pawh ka nu in min thawhbelhsak ve chauh vanga la thei kha ka ni a. Tunlaiah phone ṭha ve pangngai chu a to ve tawh angreng si.

"Hmm, i phakar ê, sawrkar zêm zen zawk i nih kha" a rawn ti ngher ngher a. 

"Hlawh engmah la khawl ve hek lo, neih ka nei lo a nih hi, mawh, i fel êm kha. I hausa tawh si" ka ti kual a. Ka farnu a nih vang pawh a ni tho ang chu..private-a thawkte ka va hmuh hniamna ni lo se, khang ho ai khan Tei hian a account-ah sum a khawl tam fê tawh ang. A inren thiam bakah ṭhahnem a ngai êm êm a, a sumdawnna lah a huang zauh ve zelin, Shillong bawng sa rêp nen, ar puahsa leh vawk sa rêp bakah uisa thlengin a zuar tawh a. Ui hi a talh ngam chiah loh avangin hlawhfa a la mai zel a. Mahse, la hlêp ṭha tak a ni. Mizo te zingah uisa ei duh lo pawl an awm nual tawh nain, a duh tawk hi an la inhung ve fur a, a man lah a to chho ve zel bawk nen, ṭhenkhat tan chuan ka farnu eizawnna chu a nunrâwnthlak maithei. Tin, ar leh vawk vun bâwl a zuar tel lehzel a, hei phei hi chu an in chan lo zawk. Ṭhenawm hnaiah a ral nghal vek zel. 

"Anu ka lo zawt phawt ang" a ti daih a. Ni e, sum tam tham lakchhuah dawn chuan chhungkaw lû ber hriatpuina a ngai tlat a ni. 

"Mate, naktukah min lo ensak la, Samua ṭhianpain dawr a neih kha, Samua kaltlangin a awlsam ang..payment lo pawn..tuesdayah min lo thawn nghal thei la.." inthlahrung lo zeta ka tih chuan, "I va chhe tak..hlawh i lak leh hmasak berah puan min lei ve ang" a rawn ti hlak hlak a. 

"Chiang sa" ka ti nghut. Ka hlawh hi ka account-a a luh avangin kan Headmaster hi a fel hlauh a, Lianpuiah va kalin a staff te hlawh a va lachhuak ṭhin. Tunah chuan lirthei ka nei ve ta bawk a, keimah pawn ka la thei ve tawh ang chu. Ngaihṭha zetin ka mu ta vang vang a. Muansangzuali nena kan inlaichinna chuan buaina ṭhenkhat chu a hliah khuh titih. Mahse, rilru kil khatah erawh a riak ve reng tho a. 

Zingkar boruak ka'n hîp vang vang a. Vawiin aṭanga kan sports dawn vangin ka helhhawlh nge ni dawn ni, zing dar 6:30-ah ka harh tawh a. Mut ka kham thawkhat nen, zangkhai takin ka tho a. Ka tih fô angin tuilum, nimbu tui pawlh ka in mêk a ni. He thil hi kum 10 zet chu ka kalpui ta a, mi ṭhenkhatin cherna an ti naa, a ni ber lem lo. Mahse, thau chhia a paih bakah kan thau lutuk tur a vêng. Tlak dâwk dâwkna chu a ni hran lo ve. Miss Puii'n min lo call tehmial a, ani pawh a tho hma hle. 

"Ka scooty a nuar lehpek a. Min lo sawm mai ta che, phurh tur i neih loh chuan" a rawn ti a. Sangpuii te khan duh se phurh chu ka châk reng naa, an duh dawn si loh avangin, "Aw le" ka ti ve mai. Miss Puii te hi Terini te in piah lawkah an awm a. A luh erawh ka la lêng lut lo. Terini nen kan chungchâng a hriat aṭang khan min hnimhnâi ta vak lo va, mahse ,hetia pasal a ûm leh tak siah chuan a theih dan kawng kawnga min hnaih a tum niin ka hria. A hmel zawng a chhe hran lo mawle. Duh zawng hi an awm ve a. 

Muangchângin chaw ka ei a. Ka inpeih meuh chuan dar 9 a lo ri hnai kuar tawh. Ka insiam nghal sawk sawk. Puii sawm tur chuan ka tlan thla ta a. A lo inpeih at tawh a, a nuin min lo be ve luam mai. An hulhar bawk a, an in pawh a felfai viau e. Ṭhu khawmuang tawh lovin field lam panin kan tlan chho ta nghal a. Kan han thlen chuan an phur tlâng bawk nge an lo kim deuh titih tawh.pavillion kan pan lai chu min lo thlir ṭhap a, ka lai lek lek a ni. Roll kan call zawhah infiamna chi hrang hrang nei tur chuan kan inpuahchah ta a. Blue house leh Red House chu a hrangin an ṭhu ve ngei a. Kei pawh incharge ka nih angin Blue house lamah ka ṭhu ve ran a. Sir Peka chevel ka mitmei pah bawk. A phur bawk a, a ṭawng pawh a chak e. A hmasa berah intlansiak neih tur a ni a. Mipa lamin an han nei hmasa a, an au ve nasa mai. Sangpuii leh Heleni te pawh an au ring ngang mai. Miss Puii ka phurh vang ni maw, Sangpuii chuan min biak chu sawi loh melh pawh min melh duh lo mawle. Mahse, ka thinrim lo. Ani tleirâwl lungmawl thikthu chhe ve bwk si tan chuan , an miss ngat chu thîk âwm tak a ni ve rêng rêng a. Miss Puii lah a zeihawi chi, miin an inngaizawng a ni maw tih theih tura awm thiam a ni reuh a. Kei lahin ka sawisel lem chuang si lo. 

Hmeichhe tlan hun a rawn thleng ve leh a. "Kei chu ka tlan duh lo, tlan lam chuuu" an ti deuh vek mai. Sawi tawh angin a lerh rual an ni a, chetchhiat an hlau tih a lang reng mai. Ka ding hluai a, "Sangpuii, Saroni leh Chhuani te kha in tlan chak ka ring tlat, in body enin..insiam r'u le.." ka ti zangkhai vah a. Muansangzuali mi melh rumzia chu aw. Ka pawisa lo lui ve tlat si! Hreh zetin a insiam a. Kekawr bul tight lam lek lek a dum a ha a. Jersey pawl leh a vara inṭial, simple deuh tak a ha bawk. A hnunga a hming inziak ka hmu ve chiah, "Sangzuali" a inti kalh a. Jersey no. 34 a ha..ber kher chuan a. Heleni nen an order ve ve a nih hmel, an kawr a inang chiah. Engtin nge maw a order ve theih zawk ni, Diki te uikawm nen nen..a ho thei ka thil ka ngaihtuah hi. Sneakers hlui tawh lam, a dum a bun bawk a, mawza ṭial a sei a bun leh bawk. A duhawm a, a khal mawi tawk a. A nalh a ni tawp mai. A sam chu a phiar kâk a, lukhum dum hmathlawk a khum bawk. Ka lo va chîk ṭhin êm. Tlan tur chuan an phei hnak hnak a. Ka thlanchhuah ho te hi an thau hran lo va, an tlan theih mai ka rin vang a ni. Thau ho an tlan chak lo e ka tihna a ni lo a nia. 

Thana'n whistle a ham rik rual chuan an che zawk hlawm a, a tirah Reh house lam ami higher naupang zinga hleitling leh hmel pawh chhe lo tak, an boss en ve deuh Ludy a fawr nalh a. Ani leh a ṭhiannu Mamawii te hi a nia a hmaa chhe lo ka lo tih rûk te kha..mahse, tunah chuan ka thinlungah an lang pha tawh teuh lo. Chutah le mual chanve an thleng ta maw tihin Muansangzuali'n a lehpel ta mai. A va tlan chak tak e aw. Pakhatna a ni chiang hle..ka lo nuih ve vur vur kha. Hah hmel pawh a pu vak lo, a biang erawh a tai têk mai. Sir Peka thawt thawt lah chuan a bânah kaiin , "I va fit rem rem ve" a ti hluai a. Ka mit a lo kham leh hman tawh. Tihlan a rem ṭeuh si lo. Jump lam pang kan han ti chho leh a. Muansangzuali an hre pawp laklawh tawh a, engkimah chhuahtir vek an tum tawh a ni ringawt. High jump an zuang a, ka rin aiin an zuang sang daih hlawm mai. Muansangzuali paw'n thei zak zak tak a ni. Awmhmunah ka lo lawm ve êm êm tawp. High jump-ah pahnihna niin, Long jump-ah erawh amah ter pha tur an awm lo. Individualah chuan shot put tih lohah a tel vek a, nihna a hauh zel bawk. A lo timi reuh phian a nih dawn hi. Chhun chawlh a lo nih chuan naupangho chuan tiffin an ei sap sap a. Keini erawh chuan dawr ami kan order a, an rawn dah tawh. 

Kan ei mêk laiin Red house lam ami Ludy khan Sangpuii te bula din pahin, Ring angreng tak hian, "Awii, Muansangi chawhmeh neih lohzia hi..tikhan chaw eikhamah vitamins in ei ve leh tawp zel ami?" A ti lâng lâng a. A ṭawng rin deuh vangin kan hawi phei ṭhap. Mamawii leh a ṭhian dangte chu an lo nui dar dar a. Muansangzuali chuan nui sâng chungin, "Heng ka ei vang hian alawm nang pawn min um phak loh" a ti ve ta sak mai. Ludy hmel a dur deuh tak avangin boruak ṭha lo a awm palh ang tih hlauin Miss Biteii a va inrawlh ta vat a. Kei erawh awmhmunah ka lo ṭang ve ṭeuh. 

Chawhnu lamah chuan team work lam kan ti ta deuh a. Football leh Volleyball erawh naktuk lam atan kan khêk thung. An han inhruipawh chu Red House lamin an sir pa lian zet Sir Siama leh Miss Puii an pawt a, chuveleh Blue house lamin kei leh miss Biteii min rawn pawt ve chat. Sir Peka hi chu a cher zawr ve deuh bawk a, chak hmel an ti vak lo ni tur a ni. Chuti na nâ na chu tiin Miss Biteii nen chuan hrui chu kan han vuan ve ta chawt a. Ka hma chiahah Sangpuii a ding ran bawk, a nihna takah chuan a hnung chiah kha ka chuh ve deuh bawk a. 

"A hniam zawnga pawh tur aw.1, 2, 3 lo chhiar ula, kan pawt thut thut dawn nia" ka ti lauh lauh a. Kan la inpawh hma deuh, hrui vuan chunga kan din lai chuan a beng bulah, "Hmelṭhanu" ka va ti sup a. 

"I lerh" a ti hmak. Midangin an hriat a hlauhawm bawk si avangin ka chhang duh ta rih lo va. Kan han inpawt ta, kan va ṭang tak êm, inhruipawh hi chu ṭan a na bawk a. Kan chak ta hram e. Pavillion lam kan pan mêk laiin Ludy ṭhiannu Mamawii khan, "Sir Sangzuala awm ve vang mai mai a nih kha" a ti lâng lâng a. Ka nui ringawt. Ka chak lohzia an hre lo chu a lawmawm angreng. A tawp ber atan in ball vawm kan ti a. Kan tel ve tawh lo. Sangpuii te'n an vawm hmasa zawk a, ka lo ṭang ve vak zel chu ka innuihzat, naupang infiamna mai maiah pawh. 

Muansangzuali te an luh ve hnu chuan thil pakhat a thleng ta a. Kawng a chin hnuai lam vawm fuh tur kha a ni a. Sangpuii chu Class XI ami, Hruaia'n a kawng chung hretah a vawm fuh a, out turin an ti a, "Ka kawng chungah alawm a fuh, hei a pâwt hi pâwt pawh" tih pahin a kawr a kawk a. An inhnial ta tlat mai, a chhan chu Ludy'n a ball ken laia Muansangzuali khêlah tak a va vawm dawt vangin. An inhnial laklawh lai leh tumah an inrin loh lai a nih avangin blue house lamin a fair lo an ti si, Red lamin chhuak turin an ti bawk si, an ri ta nuai nuai mai. 

Sangpuii'n, "Ka thi lo, ka chhuak lo vang" a tih mêk laiin Ludy a va kal phei tawrh tawrh a, Muansangzuali chu a theihtawpa namin rin bial pâwnah a namchhuak ta a. Ka rin aiin Muansangzuali hi a lo kawlh a! Ludy chu a nam lêt ve hmak. A petek nawk nawk mai. an house leader te ve ve an va inrawlh ta vat a. Ludy a la thinrim tlat! 

"Hmeli, ve khanglang a che. Min ngam ve law" a ti vin ṭhak a.

Sangpuii chuan, "Ngam thuah chuan ngam e a. Mahse, insual kher chu ka duh lo" a lo ti dam thlap a. Ludy erawh chuan va hnaih leh phatin, "I dinhmun leh nihna hi hre rawh aw. Lehkha i thiam ve deuh vang hian chapo khanglang suh, engmah i ni lo. Mistiri fanu ve mai mai " a ti hmarh hmarh a. Ludy te chhungkaw dinhmun ka hre hauh lo naa, a pa hnathawh vanga Sangpuii a hmusit chu nasa ka ti ru viau. Sangpuii chu a khi sak a, "A ruka zu zuar, zuar lo anga lan tum, mi fel ber anga lan ai chuan mistiri fanu nih chu ka thlang chatuan ang" a ti ve hmak. 

Miss Puii'n, "A tawk, ngawi tawh r'u, in va zahpuiawm ve. Muansangzual, nang pawh a vawm fuh che kha, eng nge i sawi buai ṭâlh a?" Tiin an pahnih chuan a melh râm râm a. 

Sangpuii chu a ngawi mai a. Ludy erawh a la âng zui hlak hlak mai. Amah an Schoolah a lo langsarin a lo chhe lo ve deuh ber bawk a, sports lam pawh a tithei viau naa, Muansangzuali'n a lehpel zat zat si a, a chumi îtsîk chu a ni maithei a ni. Nge a hmain boruak an lo nei tawh zawk ka hre lo va. Sangpuii chu a chhuak ta nge nge a. Ball vawm chu an chhunzawm lehnghal. Sangpuii tui in tur Pavillion-a a phei mêk lai chuan ball chu duh aiin an vawm na nge, a lamah ball chu a lir phei a. Mamawii khan, "Muansang, rawn vawm phei teh" a ti lâng lâng a. 

Rawn lehhawi zawkin ngeiawm zet hian a kut a vai a, a kal leh nghal daih. Lehlamah an house lam tan chance a ni ve zel si a, Mamawii chu a phun zui hlak. Mipa tê lam hian ball chu a va chhar a. An zawh chuan Blue house an chak ta zawk rêng a. Khatiang kha an boruak a nih teh nuaih vang nge Blue house lam chu an au ring ngang mai, Ludy an runluih ve deuh bawk niin a lang. Hawn hmain roll kan call leh vek a. An la kim ṭhap mai. Miss Puii bawk ka phur haw leh a. Bike ka start lai taka Ludy te lo kal phei chuan, "Naktukah volleyball-ah kan sawp hrep dawn nia, Muansangi ka bitum ang. Sports hi zo se ka kek hrep ang" a ti ham ham a. Ka ner sawk. A hmelṭhat reuh nen, a rilru a hrisel lo tlat! A hmelchhe ta sawt bawk. Ni e, hmelṭha kan teh dan hi a inang lo thei viau âwm e. Face cut dik, vun êng lam hi physically chuan hmelṭha tih an hlawh tlângpui a. Inchei thiam tak te pawh an lang hmelṭha hma. Chutihrualin fel êm vang te, lehkhathiam vangte pawh hian mi hi a hmuh hmelthat theih ve tlat zu nia! Tin, kei ka tehna pawimawh ve tak bawk chu hlim hmel pu reng theite hi mi hmelchhe tak tia sawi an ni ngai mang tlat lo. Tum bûr reng, nui ngai mang lo chu a face cut dik viau mah se; miin an ngaina lo va, an lansarh tur angin an langsar thei lo . 

Puii ka thlah zawhah peng khawmuang lovin ka tlang a. Mahse, Pu Ramtea'n min lo au ding a. Ka peng kawi ta a. 

"Kan uipuiin no a nei a, i khua a har âwm sia, pakhat hi ka puichhuah ve dawn che em mawni ka tia.." a tih chuan ka phur kher mai. Ui vulh tur awm se ka lo ti rilru reng ṭhin kha a nia. In nghaktu mai bakah khawhar hnem atan a ṭha dawn riau. A pâ ka thlang a, a hmelṭha ber bawk. Zuali'n thingpui hâng min lo thlit laklawh ve nen, ka ṭhu ve leh ta reng a. U Faka chungchangte an sawi a, a inpuanna erawh ka la sawi lo. Ka rin loh vang ni lovin hretu tam lo se ka duh rih a ni. 

"Terini te an lo hawng em ni?" Tiin zuali chu ka zawt satliah a. Nui rah rah chungin, "Haw chiang e, amah chauhin a nia. Man an inhlan dawn nge ka hre lo" a ti liam puat a. An pa a awm loh chuan enthlak pawh a hautak lutuk lo turah ngai teh ang. Mahse, hnaih leh kual vel hi ka peih tawh lo ê..

"Faka lah chu a tâng rei zêk maithei lehnghal a. A timak ve bawk êm a ni, a engvanga han rubo ngawt nge maw a nih ang aw.." Pu Ramtea chuan a ti vawng vawng a. Mitin mai hian u Faka chetdan hi awih harsa an ti niin ka hria. 

"Ni ngawt mai, a zia lo tak tak a ni. Ti daih ila, Hriati bialpa ṭhin Johna te nen khan in lo inchhungkhat reng a ni maw?" Ka tih chuan, "Julie nu û fapa ania, keini lam nen chuan in chhungkhat hran lo" a ti a. Chet pawh a nuam sawt dawn e. Pu Ramtea te kaihhnawih thila buai kha ka châk vak lo, ka lakah an ṭhain fapa ang thawthângin min en ve bawk si a. 

Zuali'n, "Julie chu i rim tawh em? Innei teh u, i inchhir miah lo vang" a ti bawrh bawrh a. 

"Kei aia ṭha a hmu tam âwm êm mai. Bakah nupui neih hi ka hmanhmawh vak lo" ka ti ta ngawt a. 

In ka thlen meuh chuan ril a ṭam ta râih mai. Ka uite thar kha ka paw chho kha a nia. Thlang lam bathroom kawngka bulah parcel ka hûng a,buara chungah ka tshirt hlui ka phahsak a, ka dah ta rân mai. A hmingah eng nge ka phuah ang aw ka ti rilru a, Sangpuii hrilh leh atan tiin kan pahnih hming lakawpin, 'Sangmuana' ka ti pek a! A common lo viau ang. Chawhmeh siam thar a ngai lo bawk a, chaw ka chhuang nghal vut. Ka inbual zui ta bawk a. Ka lu ka hrûk thuak thuak laiin Tei'n a rawn call a. Phur zetin ka la. 

"U Samua ṭhianpa chuan instalment-in a phal a. Thla 3 chhunga rulh turin. I duh zawng i sawi bawk si lo va, Realme x50, pro ka la ringawt, a zuartu khan a fak bawk sia..u Samua'n 'Sangzuala hman chi tak a nih kha' a lo ti ve sek bawk nen" a rawn ti lâng lâng a.

"Nau ṭhabernu, i va fel tak..hlawh lak veleh i duh ber ka lei ang che" ka tih chuan, "Puan aiah khan cake urna set hi min lei ve ang che. Cake ur ka tui thar a. " A rawn ti a. 

"Tehreng mai, lo chah nghal rawh" ka ti chung chung a. Naupang thil thar nei ang deuhin ka mood a fuh nghal ngawih ngawih. Muansangzuali nen emoji love chhemphei chuai chuai pawh kan inthawn ve thei ṭêp e. Chaw pawh ka eitui hle. Thleng ka sil rak rak laiin Baby a rawn lut a. 

"Sil zo la, Julie te inah min han kalpui lawk teh. 2nd hand bale a hawng a, mi dang en hmaa en ka duh" a ti sar sar a. Zâm lo ve bawk sia maw..mahse, tihtur pawimawh ka nei hran lo bawk a, pawi ka ti lutuk lo. Awmhmun thawmhnaw nen ka chhuahpui a. Ani pawh a inchei lem lo. Kan tlan mêk laiin, "Sangzual, zêp miah lohin bialnu i nei mi!" A ti hlawl mai a. Ka nuih a za deuh. 

"Umm nei ve e" ka ti ta a. Ka mitthlaah savatê a rawn lang nghal. 

"Kan khua mi maw!" A ti a. 

"Ka sawi duh lo" ka ti kual vel a, min ngei ngawt ang. 

"Rin ka nei" a ti nghat a. Ka hlauthawng deuh. 

"A tu chu" ka ti hlut a. 

"Miss Puii kha..vawiin pawh in inphurh kha" a tih chuan ka thaw huai mai. 

."I ho e a" ka ti ringawt. A ni lo tih chiang taka ka sawi chuan savatê tan a him lo thei. Tikhan Puii nen kan ni ka ti lo naa an rinhlelh tur tawka chhan khan thil an chhui vak tawh lo ang a a ṭha mai. Julie te in kan thlen chuan an sitting roomah an lo dah nghûk a. Fiamthuin, "I hna bansanin sumdawn i tum ni maw?" Ka ti a. A nui ar ar mai. 

Baby chuan a thing nghal mawlh mawlh a. Hmeichhe kawr leh kekawr an ni tlangpui a. A la thar ṭha hlawm viau. Rilruin tu emaw leisak ka châk a, mahse, ka dawr tur nu hian hriatchian a châk ngei dawn si. A engah chuan nge maw Julie mitmei chu ka han ven tehchiam ang le? Inzawmna engmah kan nei azeng pawh a ni lo va. Kawr mawi ka tih deuh ho chu ka lo thing pharh ve nasa mai a, min nuih min nuih mai. 

"Ka nau thawnah ka ti deuh a..mahse, a tawk loh khan a buaithlak" ka ti a. Ka dah leh daih, eng dang a ni lo. Muansangzuali ka leisak chuan a ha chhuak lai an hmu ngei ang a, engkim a langfiah dawn. Ka la vengthâwng fan e. A vawi hnih nana rukbo a nih leh chuan ka tuar zo tawhin ka ring lo. Ka beisei loh lutukin Terini a rawn lut ve hlawl, Msa nen khan an ni nghe nghe. Min hmuh chuan makti âwm pawn a awm lem lo. A ngai reng. A hre sa emaw tih mai tur a ni. 

Julie chuan a lo be bawrh bawrh a, a thing ve nghal chawt. Julie nu chuan, "Terin, engtik nge in insuih ve dawn tak?" A lo ti luam a. 

"Thla thar ni 17 an ti ta a nih kha. Tsa pi khi a ṭha lo lutuk a, an ngaichâng lo thei si lo va" a ti zat zat a. 

"Eng nge Tsa te chu an khawsakte a an reng reng.." Julie nu pawh chu a dilchhût angreng. 

"A pangngai a ni mai. A vantlang tawk ti mai ang" Terini lah chuan a chhang ṭha phian a. Msa'n, "Sir, zial i ak lo maw? Lalterini hmanhmawh cheng chawng vangin engmah pawh ka lei hman lo va" tiin min rawn melh a. Sir tia min ko ziah hi ka duh lo mang e. Ka pe ta vat a. Julie chuan zawi sap hian Baby bulah, "Nizan chu " tiin awmze nei zetin a melh ralh a. Nizana Hriatpuia nena an inkaih hnak hnak lai kha ka mitthla nghal. Hriatpuia nen vawiin nilêngin kan la inbe lo bawk. Ngaihven âwm lo deuin zial ka ṭan ve zat a, mahse, ka bengkhawn ru hle thung.

."A fuh viau.." Baby chuan ṭawngsual hlauh hmel zet hian a ti sap a. Thildang an sawi daih. Terini lah a titi nasa vel tawp. Min ngaihven loh tum sateh mah se; min rawn melh leh zauh ṭhin chu ka hmu ru ve reng si. Phone ka khawih ta daih a. An rei ta phian lehnghal. 

Heleni'n, "Sir, Ludy kha kan ngei lutuk..Sangpuii phei chuan insual a duh a nia aw" a rawn tih chuan ka nui hawk a. Julie ten makti fêin min lo melh ṭhap.

"Fiamthu ka chhiar a" ka ti ta ngawt. 

"Insual êm êmte chu a ṭha lo. Lo hnêm rawh" ka va ti a. 

"Nang lah Miss Puii i phur vel bawk sia.." a rawn ti..Sangpuii ang chiah hian a ṭhiannu a hmangaih luatah a thikthu pawh a chhe ve vek tawh. 

"Min lo sawm ve bawk sia lawm..in awmdun em? Tunah khan" ka ti a. 

"Aih, Tleipuia lehkha a zirtir a. " A rawn ti a. 

Baby'n, "Chho tawh mai ila, ṭhalai hruaitu te rawn len an tum sia, hei a ri ṭêp" tiin a sana a en a. Ka tho ve nghal vut. Julie chuan veranda thleng min lo thlah a, "Rawn len i tum si lo, i induh ve ê.." min melh chungin a ti a. 

"Chu pawh ni lo, tunlai chu ka chhuak vak lo hrim hrim, lehkhabu chhiar lam ka ti leh deuh a" tiin dâwt ka sawi tawp. 

In kan thlen chuan, "Lo chho ve la, tihtur i neih chuan loh chuan" a ti a. Nia, in hnuaia awm renga han lan loh kha thil mawi ni pawn ka hre chiah bîk lo. "Ka zuk inthlak ve lawk ange" tiin ka chhuksan a. 

Ṭhalai hruaitu te pawh an rawn ṭhahnem phian e. An felin an titi ngaihthlak pawh a nuam. An sum vawngtu Apuia chuan, "Sangzual, U Faka kha eng nge a chanchin ni ta? Jailah an dah tawh em?" A ti teh hlawl a. 

"Aw, an dah tawh an tiin ka hria" ka ti vat a. 

Rinawma chuan kuhva hmawm zauhin, "U Faka hi kei chu mak ka la ti reng. Kohhranah tal tam êm êm lo mah se; misual niin ka hre thei lo. A tlawmngaiin, a nun a tlâwm si, mi pawi a sawi lo bawk si, kei ka rilrua awm mai mai chu..tu te emaw hian khatianga ti tur khan an vau êm mawni aw te ka ti. Mahse, kan rin loh lam daih pawh a ni ve thei tho va" a ti bawrh bawrh a. Ka rilru ang a pu ve chiang mai. 

Baby chuan, "Kei chu miin an tihtir ka ring lem lo, Zu kha a duh ve êm mai a, inhlawhna a hmu reng bîk lo nen, Sangpuii kha khawiah emaw hralh a tum a niang ka ti" a lo ti nghal zat a. 

An leader Pu Mafaka chuan, "Zu hi chuan ṭhatna hi a va pai tam lo tak tiraw? Faka pawh ṭha tê tê khan han awm nise, tiang hian a awm lo mai tur. An nu nen an inṭhen kha a pawi êm a ni " a lo ti ve charh charh a. 

Thingpui kan in aṭanga reivak loah an Secretary Mama'n ṭawngṭaina a nei a. An la ṭhu khawfual naa ka kawng kham chhuanlamin ka chhuksan ta mai. Ka in kawngka bula Hriatpuia lo ṭhu tung ut ka hmuh chuan ka phu ve zawk, a hahdam hmel phian a. "Ka rin aiin i rei" a ti sup a. 

"Min lo biak mai tur alawm" ka tih rualin ka phone ka charge daih tih ka hrechhuak nghal. Nui suk chungin kawngka ka hawng a. Kan lut ta a. Ka kalh nghal hmak bawk. Tlangval ṭhankin pahnih kan meeting leh dawn miau alawm le. 

"Kha zarda i duh ve em?" Tiin a rawn phawrh a. Ka lo la ve nghal zat. Zarda tak hi chu tui ka ti ve tlat. Ka ṭhial rik bup bup lai chuan, "Nizan kha" a ti nghut a. 

"Umm, eng nge i an?" Ka ti vut a. 

"A ṭha ti ila, thil thar a awm rih lo. Mahse, U Diki'n a lo call" a ti leh nghut a. 

"A chhang em?" Ka ti ve vat a. 

"Aw, mahse, 'Nakinah ka lo call ang che" tih chiah a sawi. A fimkhur ve riau" satliah zet hian a ti a. 

Ka zialzûk vâp pen per pahin, "Terini hi keiin ka lo veh dawn em ni ang? Nge U Diki te zawk" ka ti a. 

"Diki hi bitum rawh. A awlsam ka ring, Muansangzuali nen hian in ṭha pangngai tawh em?" A ti duah a. 

Nuih huk pahin, "Ṭhaah chuan ka inngai a" ka ti mai a. Mahse, kan inlaichinna tarlan a la rem chiah loh avang hian ka ngai satliah deuh êm aw ka ti. Amah Sangpuii ka va duh loh vang ni lovin. Tlangval puitling ka ni tawh a, ngaihzawng ka neih pawn zêp emaw a rûk a râla kalpui kha ka thiam chiah lo a ni maithei. 

"Sangpuii i hmin theih chuan a nu chu a vil thei ang" a tih chuan, rang zetin, "Buainaa hnuhluh ka duh hauh lo mai" ka lo ti hmuk. 

"Mahse, hnuklut lo mah ila, a lut tawh sa chu a nih hi..ti nge amah kher an bitum? " A ti ta khauh a. 

Ka chek hluk, "Tihhlauhthawn ka hreh a ni" ka ti zawi sup a. Ka rilru tak tak ka sawi. 

"Engtik nge U Faka te hi an court dawn le!" A lo ti daih. 

"Ka hre miah lo, Pa Mawia te a zawh theih ang" ka ti a. 

"Zoa hi kan thurualpui ve dawn mawni ka ti. Naktuk aṭangin Ngûr-ah U Ruata te kawng siamnaah a zui ve dawnin ka hria, a kal hlauh chuan Johna a lo thlithlai thei ang" a ti leh zung zung a. Kei aiin a thluak a sêng nasa bawk a, rem pawh a hre zawk viau e. Kei chu savatê avangin ka inconcentrate tak tak thei lo a ni ber. 

"A rintlak ang tiraw?" Ka tih chuan, "I hre zawk ang chu, in inkawm ve ṭhin kha. Bakah U Faka û fapa a nia" a ti mai a. Zoa te chhungkua hi chu rinhlelh tum ṭâlh dawn pawn a harsa tlat! An mawlmang vein an rilru a thianghlim ropui si a. Zoa chu naktuk maia an kal dawn chuan zanin ngeia kan biak chu tihmakmawh niin a lang ta tlat! Mahse, ka ding deuh hluai a, "Ṭhianpa, detective pawh kan ni lo va, Police chhawr pawh kan ni hek lo. Hetianga kan tana hlawkna awm miah loah hian eng nge maw kan inrawlh ve vak le ka ti" ka ti ta hluai a. Ka rilru a kalding laklawh bawk a ni. 

A nui hak a, "Sangzual, i theihnghilh tawh em ni? Hriatsangi kha ka hmangaih a, ka fa pawh a pai mêk asin" a ti sup a. Ka thin tâwt,pik muk mai kha a kiang nghal duak. Hriatpuia hmela nguina chambâng avang chuan ka rilru pawh ka thlak fel der. Ka ṭawng leh hmain, "Tin, i i bialnu Muansangzuali bitum chattu te an ni bawk. Hei hi a chhan hriat i châk lo em ni?" Tiin min rawn challenge a. 

"A ni teh tak e..âaa, ka rilru hi ka sawi thiam lo. Dik tak chuan a hmain ramhuai nge huai lo nge, tikhan a khât tawka tihbuai ka ni reng a. Tunah buaina bawk..ka chhangkham deuh tawh pawh a ni maithei. Zoa chu ka'n bia ang e" tih leh ka phone ban ka rual a. Zoa chu ka call nghal. 

"In nu i rim em ni? I rawn hawn pahin rawn tlang lawk teh a. Thil pawimawh deuh a awm a" ka ti zung zung a. 

"A va pawimawh hmel rem rem ve, nupui ruk i tum te chu a ni êm lo maw..haha. aw le, hei ka lo haw ṭêp e" a rawn ti zui ve zat a. Kan dah ta rih. Hriatpuia chu choka lamah kalin , "Thingpui ka'n lum teh ang. A thlum ka in châk tlat" tih leh ka thingpui bel vawn a rual a. Tei call ka dawn avangin ka ngaihven zui lem lo. 

"Naktukah phone chu ka rawn thawn ang. E chuan maw, U Samua'n, 'Thla tharah han zin ang hmiang' a tia. I phal em?" A rawn ti sar sar a. Samua nen an inngaina tawh hle tih a lang, ka lawmpui e. 

"Phal nasa e..ka nuin a remtih phawt chuan rawn zin tak teh u..a khawharhthlak loh deuh ang" ka ti var a. 

"Nia, Anu pawn a phal ve reng. Kei pawh zin ka châk ve tho bawk si.. a hun lo thleng phawt se aw" a ti leh puat a. A sumo rawn thawnna tur te ka hrilhchiang a. Kan dah leh ta a. Sumo driverah chuan Vala hi a felin a tlawmngai berin ka hria a, bakah kan lo innêl ve tawh bawk nen, a kal regu bawk a. A tihchi ber ang. Thingpui kan in zawh tawhah Zoa chu a rawn lang ta a. Ka rin aiin a rawn haw hma zawk. Naktukah a zin dawn bawk nen, an nu nen an inthlah ṭha hman êm ang chu maw. 

Zin tur a ni tih hrerengin, kei aia ṭawngkam thiam zawk Hriatpuia chuan a han thawi kual vel phawt a. A patea chungchangah chuan ngaihdan nghet tak a nei, "Tu emawin an tihtir a nih loh chuan a rilru a buai a niang" tih hi. Chuvang chuan rintlakah kan ngai a. Engkim a chinchhuakin kan hrilh ta vek a. A changin a meng phawk a, a changin thinrim mitmengin a meng rum leh ûl thul,.a mood a swing char char a ni hawt e. Kan sawi zawh rual rual chuan, "Ka pa sawn a hre ve em?" A ti nghal a. Makti ru deuh takin a hriat ve thu ka sawi a. 

"Chuvang a nih chiah chu, nidangah pawh sawi ngai hlei lo, Terini chungchang te, U Diki te vel mi zawh mi zawh ni. Chuan, in chungah khian a tal tam hle bawk, a kut a lo tina bawk nen..ka nu nen kan lakah a lo zêp tlat a nih dawn chu" a ti ta mawlh mawlh a. Pa Mawia kha chu a rûkin kan buaipui tur thu leh lo inrawlh ve lo mai turin ka hmin tawh a, ka sawi lang lo mai mai a nih kha. Thil awmzia a han hriat takah chuan Zoa chu a sa phat phat mai a, "Patea'n dâwt a sawi thiam lo, a sawi kha thudik vek an ni ngei ang. Eng nge ka lo tih ve tur chu le" a ti sûrh sûrh mai a. A phur zaw mah emaw tih mai tur a ni. Hei hian a patea nen an inlaichinna ṭhatzia a pholang kan ti thei âwm e.

"Johna enthlak hna i va thawk pah ang. A theih phei chuan Hriati hmathehin va kawmngeih daih la a pawi vak lo" ka lo ti a. Hriatpuia paw'n, "Ni e, I patea vel a sawipui che paw'n a chhe lam hlirin sawi mai rawh" a lo ti var a. Mi â nilêng a ni bîk lo bawk a, sawi âwm leh âwm lo chu a hrethiam ve bawk ang chu maw. Tichuan, ṭhian pathumte chu hmabâk kô tak nei ṭheuhin kan inmangṭha ta hlawm a. Ka mutui leh hle. A lawmawm ṭhin e. 

Zinga ka harha ka rilrua rawn lang hmasa ber chu, 'Vawiin tlaiah phone a lo thleng ang a, zanah savatê te inah ka kal ang' tih a ni. Ka khi suk bawk. Phur zetin ka che a, inthiar tura bathroom ka lut chu ka lêt leh chiang lutuk, Ventilation ka lo khar lo pek a! Comode bulah chuan rûl dum lian fû mai hi a lo inkual rûih mai a! Ka thin a phu dawt dawt, ni e, rul hi ka ngaina hlawl lo. Mi râp lutuk tlat. Chempui ka va la a, mahse, ka va sahchilh ngam chiah si lo, amah lah chu tlanchhiat nachâng a hre lo nge, a chechâng duh ṭhak lo. Mai mai a ti rilru chungin bawlhhlawh bâwm bula chartin bung bân chen vela sei chu ka va la a, hlau ru deuh chungin ka va hawlh ta nawk nawk a, a eng laiah nge ka chhut pawh ka hre hleithei lo. Ka sawh ngheng ngheng ringawt. Ka'n en leh nak chuan a lu chu a lo per bâwih tawh a. A thi chiang hle. Thaw a sa ve phat phat alawm le. Indem chi a ni lo aw..Kan veng pa ramvak pawn pangrêm a hmu a, a silaiin a kap hmiah ve tho. Hlauh zawng inang hek lo le..

Ka thawm a ring deuh nge ni Pa Zawma a rawn chhuk hlawl mai a. Rûl chu a rawn hmu ve a, a chek hluk mai. Ka in aṭangin a hnuk chhuak a. Hlam hnih chu a tling lo hlek, sei thawkhat tak zawng a ni. Rulhlai a lo nia! Ventilation pawh ka khar piahlamah perek te'n ka kilh bur bur tak kha. Ka khatih nuaih vang khan field-a ka kal dawn meuh chuan dar 9 a pel thui tawh hle. Puii'n min rawn biak loh danah a kal tawh a nih hmel. Ka tlan thla ve ta nul nul a. 

Field ka thlen chuan roll an lo call zo chiah. Ka tlai chhan erawh ka sawi ta lo law law mai. Football an khel hmasa ber dawn a. An ṭang ve angreng si a, an lawmawm mang e. Sangpuii pawh min melh rum tawh bik lo. Biteii'n, "Nizana Opi an zawng tak tak kha chu ka lo hlauthawng leh vek pek a! U Faka ber a tâng daih bawk si, rukbo a ni leh ang tih kha ka hlau a nia aw" a tih chuan ka beng a verh ngang mai. 

"Eng nge a awmzia?" Ka ti vat a. 

"Kan ṭhenawmte nau ti ila a tleirâwl ve tawh. Opi dawr kal kha a rawn haw har ta sia, an va zawng a mawle..ani a pute inah an uinote dilin a lo han kal daih chu niin, an buai hman alawm" a ti siam siam a. Keia tak pawh ka lo hlauthawng alawm le. Uite sawi takah chuan ka uite thar Sangmuana kha Sangpuii ka la hrilh lo tak e. 1st half a ni ta. Blue house leader Class xii zirlai Martina an tih, lian thelh thawlh, hmel fai vang mai chuan Sangpuii melhin, "Tui chu" a ti sup a. A lo pe var bawk. Student êm thîk chu ka duh hauh lo. 

Martina lah chu an bulah a ṭhu ve zui a, thil ho tê tê bak a sawi lo naa, Muansangzuali bulah hi chuan hmeichhia bawk ṭhu zel se ka ti, keimah tih chauh lo chu. An ṭan leh ta maw tihin Sangpuii te bulah chuan ka va ṭhu ve a. Chhuanlamah "Sangpui, phone chu vawiin tlaiah a lo thleng dawn a, engtin nge niang" ka ti a. A bulah tak ka mawng ka hûng ve chat. Tu mitmei mah hi ka veng tawh dawn lo. 

"Tak tak maw..apa te ka lo hrilh ang aw" a ti ve vat a. A phur hmel sawt bawk. 

"Zanah ka rawn kal mai ang" ka tih chuan, "Umm.." a ti mai a. 

 A hmaa ṭhute an au lai takin amah hnaih deuh pahin, "Uite thar ka nei a, Sangmuana a nia..a awmzia i hria em?" Ka ti sup a. A va naupanchhiat theih tak e aw. Nge mawle, tleirawl ngaihzawn miau chuan..

A ngawih vâng vâng hnuah, "Ka hria. Kan pahnih hming" a ti hliai a. Ka nuih sak a, ani pawh mawi zetin a nui sen sen. Inkhel chu kan en pah a, ka ruckshack ka pawm a, ani pawn a bag a pawm bawk. Bang nghen pahin kan bag leh bag inkarah chuan ka kut ka va rawlh a, a kut chu ka va humsak zui bawk. A paihthla bik lo. Ka khawih neuh neuh reng a. Hre lo âwm takin inkhel lam chu a melh ngat ngat, ka nuih a za deuh. Mahse, a nawm ve reuhzia aw. Kan school naupang ni lo mah se; kan school a inhnaih piahlamah midang zawng pawn an zirtirtu te ang thoin min treat a, savatê tan pawh an sir ang tho ka ni, chuvang chuan kan inzawmna hi puanhnuai ngai thil a nih avangin a nuam a, a danglam a, a hlu bîk. A hnunglam aṭang pawn ka en ning hleithei lo. A mithmul er tan leh sei sal maite chu mascara te han hmang ve phei se chuan a mawipui zual ang chu aw..biangsum a nei lo naa, a nui mawi êm êm tho. A kuttin bul mât te chu ka sik nawk nawk a, a na bik lo a niang, engmah a sawi lo. 

Inkhel a zo ta. Red house lam an chak ta tlat! Hmeichhe lam an inkhel ve dawn ta. Kei pawh ka ṭhutna ka sawn vat a. Thana'n, 'Va hamsak ve lawk la. " Min lo ti a. 

"A pawi hleinem" ka lo ti ve mai. Ṭangkai theihna zâwnah hi chuan ṭangkai ve zel tur. Ka rin loh deuhin Savatê chu a keeper ta daih. Heleni lah hi a lawmawm thei, "Hruaii, i chhah deuh, va defence rawh. Kei chu a pet goaltu , eng nge kha..mid field ni lo zawk kha..ee aw..ka striker dawn" a ti zung zung a. A thu lah chu an awih phian a! Lehlam pâwlah Ludy a keeper ve bawk. Sangpuii a keeper vang nge phei zawng ka hre lo. An han ṭan ta a, hmeichhe inkhel hi zawng ball pawh a hmuh hleihtheih loh. An bawr luih luih zel mai a. 1st half-ah an inhneh. 2nd half kan ṭan aṭanga reivak loah Red house defender Malsawmi chuan Heleni ball khalh lai chu, a va nam thlu deuh tawp mai a, Helêni khup a pilh nghe nghe. Ham loh theih loh a ni ve tlat! Free kick an chawi ta, an thinrim khawp mai a, Ludy phei chuan, "Blue house i ṭan a nih kha..an lam ami i ni hrim hrim bawk a. " A ti tân tân a. Dan ang thlapa ham ve tho a ngaih thu ka sawi pawn an titau laklawh tlat. Lo ham malêk tur hi a nia. Heleni'n a pet a..Saroni'n lo dawng fuhin, a pet goal ta hlauh mai. Mahse, hun tawp dawnah Blue house lam last-a ding khal zet Thanpuii chuan ball a beng thla ve leh ta. Penalty an chawi lo thei ta bîk lo.. Chak hmel zet, Êngi'n a pet kawh purh a, An indraw ta. 

Hun a tawp a, penalty an pet dawn ta. Panga ve vein kan ti phawt a. Muansangzuali'n a vêng hmasa, a save ta khauh. An au nasa mai. Heleni pet ve hun, Ludy chuan a chhuah. An ti zel a, Muansangzuali'n Êngi pêt chiah a chhuah, a bak a save fai vek. A huai reuh tlat a! A dive pawp pawp mai a, Êngi kha chu a pêt kawh bakah a han sâng deuh hlek a, a ban pha lo deuh a ni. Blue lam an chak ta. Pavillion lama ka phei mêk laiin an rik laih avangin ka hawi lêt a. Ludy leh Muansangzuali lo inkêk chawt chawt chu ka va hmu ta mai, rang takin ka tlan lêt a. Ka va pawt ṭhen vat. 

"In va zahpuiawm ve. Eng nge a awmzia?" Ka ti ṭhat a. Sangpuii pawh ka melh no hran lo. 

Mamawii'n, "Sir, Muansangi khan Ludy a nuihsawh a nih kha..a chapo man a nih kha" a lo ti hlak hlak a. Heleni a ter ve at, "Ve a che. Ludy zawkin, 'Mistiri fanu chu a dive vel, a inla pa vel e' a ti kual a. Sangpuii insûm zo tawh lo vin, 'Zu zuar fanu kha ngawi hmak la, i tan a ṭha ang" a ti ve ta a nih kha..Ludy hian bul a ṭan hmasa zawk" a lo ti ve bawrh bawrh. Zirtirtu dang an rawn phei ta bawk a, Kan kai hrang ta a. Mahse, Ludy chuan, "Ngam leh ngam, cho leh chote chu min insualtir mai ta che u. He zawngsennu hi ka hlau awzâwng lo, sports lam a tih ve theih deuh vangin min hmusit ringawt a. Ka sawp hrep dawn" a ti hlawih hlawih a, Sangpuii aiin a sang zawk a, a lian zawk bawk. Ka lo hlauthawng deuh. 

Savatêin, "Zawngsen chu a hmu hnai leh bik mai mai" a tih zawih sap chu a lo hre pha leh ta si, an chelhna chu thing thlain a rawn pan a, a inrin loh lai takin a bawhthlu ta tawp. Thana'n zuk pawh thawh a tum lai tak chuan, Ludy chu a kang zawk a, Muansangzuali a rawn inlet zawk, a chung zawkah a ṭang ta. Mahse, thawhsanin, "Tho la, fair takin aw" a ti ta chher chher mai. Muansangzuali mitmeng chu a alh phat a, mi nunrâwng leh misual tam takte angin a thinrim lai ber chuan nui hmel a pu tlat nia! Tin, a ṭawngkam leh a awrâwl a dam thlap bawk. Ka savatê hi eng ang mi chiah nge maw a lo nih le?!