Ka savate 14

KA SAVATÊ (14)

Ziaktu: Toni Râlte

Diki chuan a phone a kheuh nghal var. Pu Thara chu a thinrim hmel êm avangin a do ngam lo te pawh a ni ta ve ang. A benga phone hmehbel vang vang chung chuan, "Khaw nge i awm a?" A ti vin ṭhak a. Kimi rawn chhanna chu kan hre pha ve lo. A ngawih dat hnuah, "Rawn haw vat rawh. I pa a thinrim teh mai a nia. " Diki chuan a ti pawr leh hlar a. A dah zui nghal. An pa chu enin, "Puii te inah a lo va kal a nih âwm chu" a ti nghat a. Pu Thara erawh a mitmeng a rum ûl mai a, lo ṭhut ve reng pawh chu nuam lo tak a ni. Sangpuii lah a ṭhu ngawi hle hle a, boruak a rit ru hle. Ka awm a nawm tak loh êm avangin, "Ka han haw ve tawh ang e." Tiin Sangpuii ka melh zauh a. 

Pu Thara zawk chuan, "A zia lo hle mai, Sir chu i rawn len zan ber kherah tiang hi kan tawng a. Lalnunkimi awmherh vangin kan buai ta si a. Hun remchang dang a la awm leh mai ang. Kan la inkawm ṭha dawn nia aw. Chuan, naktuk tlai kha chaw ei tur chuan kan lo ring dawn che a nia aw" a ti sawk sawk a. A inthlahrung hmel pawh ka zuk hmu thei. An thiam loh a ni tawp si lo va. Diki zum dâk pawh chu a lawmawm letling e a. Sangpuii a ding ve tharh a, kawngkabul thleng min thlahin, "Muttui" a ti sep a. Ka chhang let ve a. Ka chhuahsan ta nghal a.

A la hma angreng sia ina han hawn ngawt chu tiin Hriatpuia ka call a, "Lo biak che ka lo tum mêk a. Hei in ka thleng chiah, chakai kha i ei duh tiraw? Ka hawn nual a, rawn la ve rawh" a rawn ti nghal zung zung a. Lui lam sa hi chu hnar enah ka en lo bawk a. Inngaihtuah miah lovin ka kal nghal hmak. Zoa han kawm dawn lah hian an nu rimpui zel a ngai a, an pahnih bula lo tâp ve reng kha nuam ka ti bîk si lo. 

Hriatpuia te in ka va thlen chuan a nuin a thil hawnte chu a lo bun chhuak mêk a. Sangha a hawn tam vak lo naa, chakai erawh a hawn nual mai. Aifiar deuh vek an la ni zui! Aifiar hi a thau deuh chu a tui zual bik ka ti. An lian vak ngai lo nain. Hriata nu hi Nu Zovi an ti mai a, ka la sawi lo tak a, Hriata te nufa pawh hian chanchin ngaihnawm leh lungchhiatthlak tak an nei ve a ni. Zoa min hrilh zawk a nia. Hriatpuia te hi keini ang bawka unau pahnih chauh an ni a. Hriata kum 14 a nih kumin a pa hian nuthlawi a fan san a. Chu nuthlawi lah chu Nu Zovi nulat lai ṭhianṭha tak, an puarakah pawh lo ṭang ve zak zak tawh ṭhin a niawm a. Ani nuthlawi pawh chuan a pasal hmasa lakah fa pahnih a nei ve tho a, a awmpui nghe nghe. Engtin lêk nge an lo inzem thluk hriat va ni suh. Nu Zovi te nufa chu an hrilhhai hle a niawm e. Mahse, Pathianin a ensan lo va, Nu Zovi hi khaw dang aṭanga pasal nei a nih avangin chhungkhat bulfuk tumah a nei lem lo, a pazawnte an ni deuh tlawng a. Mahse, a pazawnte hi an khawsa thei hlauh a, an peizâwn ta a. In sak ṭanpuina te la vein in pawh ṭha tak an din ve a, Nu Zovi hi eisiam thiam tak mai a ni bawk a, a pazawnte puihnain an khaw sumo counter bulah dawrtê nghak vein thingpui dawr a siam ve a. Chu chu an eibêl ber a ni chho ta a. Hriata hian pawl 10 a pass ve hram a, an khawsak dinhmun hriain a farnu zawk chu kal zel se tiin a bansan a. A rem remah a inhlawhfa ṭhin. Mahse, hun a kal zel a, An kawmchhakpa mistiri zui vein kum 2 hnuah chuan ani pawh mistiri pangngai rawn ni vein, a kuthnu a mâm phian lehnghal a, a tlawmngaiin hlim hmel a pu reng ṭhin bawk nen, a inngaihtlawmna nen zawng zawng mi a hîp êm êm a, thawh sen loh a nei ṭûn reng mai. Tichuan, kum 3 liamtaah khan an in bulah workshop chhete siam vein bul a ṭan chho a. Hmanraw ṭha lei te a lo ngai a, an kawrawk phah hle a niawm e. Mahse, beidawng lo va a beihna chuan tunah rah a chhuah chu a ni ta der mai. Khawsa thei pangngai tak an lo ni ta a. Mahse, an vanduai asiamin a farnu khan sâwn a pawm ve ta hlauh mai a, a fa paina lah chuan titla tur ten a ti a niawm e. Hriata nen pawh khawlaiah an insual phah hrep tawh a ni. Naupangtêa fa pawm a ni bawk a, tunah chuan a fapa pawh tualchai rual a ni tawh a, Mapuii pawh nula pangngai ang mai a ni leh tawh a ni. 

Mak deuh chu Pathian hian phuba lak dan hi a hria ka ti mai a, Hriata pa pawh a nupui fanaute phatsana nuthlawi a pawm tak hnu kum 8-naah a hrawk cancerin a nupui leh faten an la hnawtchhuak zui a! An hnawhchhuah chhan pawh a in leh lo, Hriata te chenna hi a nupui chuan a hminga dah turin a lo nawr a niawm e. Mahse, Pu Chunga chuan a duh bik si lo va, Hriata hming vekin a dah si. Chuvang chuan enkawl peih lovin an hnawtchhuak ta a ni. Chung hun lai chu Hriata te khawsak harsat vanglai a lo ni kher bawk nen, mahse, an hringtupa chutia chavai leh rethei taka natna a han hmachhawn chu lainatin an inah a thih thlengin an enkawl a niawm e. Nu Zovi ngeiin a dawm hlum a, A nupui Seni leh a fate chu an va lang eih lo bawk a niawm e. Mihring rilrua sum a lalber tawh hi chuan pawisak hi tuman kan nei thei tawh lo a nih ber hi. Mahse, phuba chu phuba a ni zel. Nikum lawk khan Seni chuan pasal nei lehin a pasal chuan nupui dang a neihsan ve leh khauh pek a! Seni chuan a tuar viau a niawm e. A fate lah chuan pasal an han nei fuh lo lailêng khawp a. An duk cher chur reng mai a niawm e. Hei hi a ni hringnun chu. Kan nunhona leh chenhonaah hian duhthawh lutuk ṭhin lo teh ang u. A ṭul ber lo ve. 

Hriatpuia chu amahin len den pahin chakai a chhit chu niin. Chakai chu min pe nual mai. Sunday chawhmeh ka nei tihna a ni leh mai. Ka ṭhu ve ta reng a, aman, "Lo ṭhu rih la, i inah kan chho dawn nia" a ti miau si a. A la tlai chhe hran lo bawk. A farnu Mapuii chuan thingpui min rawn thlit a. A zahzum hmel riau. Kan inbe tehchiam lo. Hriatpuia inpeih hnu chuan ka in lam panin kan inkhalh chho leh ta a. Baby te inah pawh lêng an awm leh a ni ngei ang, mi hi an ṭha khawp a. Ina kan luh chuan kawngka a kalh deuh hmak a, a chetdan chu mak ka ti lek lek. A thutak leh tawh kher mai. Ka ep chiaha ṭhut pah chuan, "U Faka khan sawi a nei em?" A ti sup a. Hriatpuia chu ka melh vâng vâng ringawt. Rin chi a ni ang em tih ka hrethiam rih lo, ka ngaina a, ṭhianṭha tak ni pawhin ka hria. Mahse, U Faka thil sawi zawng zawng kha hrilh vek chi a ni ang em ka hrethiam lo a ni. A chhan chu ani nena kan inkawm ṭanna te ka han chhuikir a, Hriati thih sarhû laia intawnga inkawm chho kan ni a. A hma zawngin ani pawn min be ngai lo, Hriati thih lai bâwra min han kawm ta chat khan a tirinhlelhawm lo thei bik lo a ni. Ka inngaihtuah reng lai chuan, "Sangzual, min ringhlel em ni? Zaninah hian min mawlh tlattu thil sawi ka duh vanga zui haw che ka ni asin" a rawn ti dam thlup a. Ka harh kâwk. Thildang mak pui puiin min hual nasa lutuk a, tupawh mai chu rinhlelhna mitin ka lo en tawh tih ka hai lo. Keima lam rilru kalsual vang liau liau a ni e. 

"Sawi chu a nei alawm..tam tak" ka ti nghut a. 

"Ka ring a ni. U Faka hi danchêp nia hriatna ka nei rêng a! Mahse, han sawi chat dawnin finfiahna ka nei si lo" a ti hul hak a. 

"Thil hi maw a mak riau. A kual nuaih mai. Police lam pawh an la ngawih rih tawp hi" ka ti ve ta zel a. 

"He thila inhnamhnawih hi mi pahnih khat chauh an nih ka ring lo bawk. Hriati kha amah a intihhlum tak tak i ring em?" Ka mitah tak en chung hian a ti thawp sup a. Ka zâm lek lek mai. Ka heh ka liak zauh a, "Ring hauh lo" ka ti ta a. 

"Kei pawn ka ring miah hleinem. A chhan chu tu bulah mah ka la sawi loh thil ka hrilh dawn che a ni. A thih hma zanah khan kan inhmu asin" a ti ta a. Ka melh nghek ringawt. Hriati nen an inrûk lai khan a sawi ang tak takin Hriati kha kum 17 lek a la ni a, ani Hriatpuia lah kum 24 lek a la ni bawk. An kum chu a inthlau viau naa, A hunlai chuan an induh viau ngei ang le. 

"Eng nge a sawi?" Ka ti nghut a. A ṭhut dan a siamrem a, farstar phawrhin a ṭan nghal zat bawk. Si leh vang vangin, "Engmah a sawi hman lo" a ti teh tawp a! Ka lo hrilhhai nasa mai. 

"Sawi duh a nei a, mahse, a sawi thei lo. Hlauh a nei a, a thlabâr êm êm tih ka hria" ngaihtuah lêt niawm takin a chhing vang vang a. 

"Ṭhianpa, zanin chu riak ve mai ta che. Sawi dun vek law law teh ang" ka ti ta hluai a! A dik adik chuan ka phur hi a rit tlat! Keimah chauhin he thurûk leh thilmak hi hriata vawn reng ka thei tawh lo, tu emaw phungbawm ka neih a ngai. Keimah mai chuan ka chingfel theiin ka ring lo, ka mi rinhlelh te lah ka hnaiha awm te vek an ni bawk si. 

"Ka nu ka'n bia ang e" tih leh a phone phawrh a rual a. A nu a call ta nghal. Harsatna a awm ta lo ve. Thingpui ka va chhuang a. Ka nuin min lo call ve chiah bawk. "Mama, Sawmi te accident kha i hre tawh em?" A rawn ti khur dat dat a. 

"Hre nang? Engtin nge an awm?" Phâwk zetin ka ti a. Ka phone ka khawih lo bawk nen, ka lo hre miah lo. 

"Aâ..an vannei ti ila, Sawmi tak hi a ke ruh a tliak a, Lalawma erawh a na êm êm lo thung" a rawn ti a. 

"A va zia lo ve aw..a pawi hle mai" ka ti ringawt. Dik tak chuan Sawmi tih velin ka rilru an luah pha mawlh lo a ni. A ke tliak erawh pawi ka tihpui viau mai. Ka nu chuan thutak zawkin, "Nizan chu thil ka ngaihtuah nasa mai a, Keini tan he lama i awm theih nana hmalak ve ngaihna a vâng si, khatah khan i awm reng hmel si a. I nau hian pasal chhia ṭha te pawh a la nei ve ang a. I pa lu nghahna hmun chhuahsan hi kei zawng ka hreh êm mai" a rawn ti dap dap a. Ka nu chu ka ngaihven ta deuh, a ngaihtuah thui deuh êm aw chu ka tia. 

"Nu, i ngaihtuah thui lutuk a nih chu, Pathian zarah khalam awm hunte pawh a la awm êm êm ang. Chutiang a nih loh pawn kan in kha chhuahsan kher a ngai hleinem. Aikal te pawh ka dah ve mai ang chu" ka ti duah a. Ka nu rilru erawh ka hrethiam tho. 

"A thuhrimin nupui neih lamte pawh hi ngaihtuah ve ṭan tawh teh, tu hmel hmuh pawh a châkawm tawh alawm. Nei lo rual pawh i ni tawh hek lo" a rawn tih leh chuan ka nui naa ka chhungril a tâwt deuh. 

" a..nia, neih hunte pawh a la awm ve ang chu" ka ti ringawt. Ka bialnu la naupanzia leh pasal neih a la ngam dawn lohzia ka ngaihtuahin ka ipik thut. Ka nu lahin tu hmel hmuh a châk bakah a damlai ngeia nupui nei turin a hma pawh khan min nawr fo tawh hrim hrim. Ka nauin ka nu chu a rawn auh avangin kan dah ta rih a. Thingpui ka thlit laiin Baby a rawn lut hlawl! A vawt lem lo bawk a, kawrbah sen a ha tawp a, bra pawh a hreng loin ka hria. Hriatpuia bulah a mawng a hûng nghal chat bawk. 

"Ti nge nizan kha i rawn kal duh ṭhak loh a?" Lungawi hmel vak loh hian a ti a.

"Ka peih vak lo va" Hriatpuia'n a lo tihsan hmiah. Ka lo lai letling zawk. 

Ner sak chungin, "I induh ve hrim hrim a nih kha" Baby chuan a ti a. 

"Mahni tal kan induh ve lohin" a lo ti ve si. Hriatpuia chuan a kawm châk lo tih hetia ên mai pawn a hriat hliah hliah. Baby chu a lainatawm letling zawk.

Hriatpuia chuan a phone a kheuh neuh neuh a, min rawn melh zawkin, "A buaithlak thei ee..a thikthu hi a chhe ve sia maw..ka'n thlem lawk ang e" tih leh pindana luha phone hman chu a rual nghal. Ka lo hrilhhai thung. Baby pawh chu a awm a nuam hlek lo tih a lang, "Tu nge a biak?" Tiin min rawn melh a. 

."An nu a niang, a thikthu chhe lutuk a" Hriatpuia rilru ṭawmsakin ka lo ti ve hmiah. 

Engah mah ngaih loh tum lui tih hriat zet hian, "Tu nge an nu? Lalhriatpuia hian bialnu a neih ngai ka van hre lo" a ti hâ a. Chhanna a hriat châkzia chu a mitmeng bakah a hmelhmai zawng zawngah a lang chhuak vek, sawi mai tur lah ka hre der si lo. Ka dang titih, "Aa..amah zawt rawh. A nuam lo" ka ti ta ngawt a. Hriatpuia pawh a rawn chhuak ve leh tawh. 

Baby chuan engdang sawi set set lo vin, "Tu nge i bialnu chu!" A lo ti nghat. Nui hmel put tum viau mah se; a hlawhchhamzia a chiang tulh tulh thung. 

Nuih hak pahin, "I hre chuang lo vang, kan khua ami a ni lo" Hriatpuia chuan a ti a. Sawi tur a vâng ta hle. Vanneihthlaktakin Baby chu an rawn ko ta hlauh a, phun hlak hlak chungin min chhuahsan ta a. Kawngka ka va kalh leh ta hmak. Rawn chhuk tawh lo hram se a lawmawm viau ang. Kan thupui vai tur a pawimawh ropui si. 

U Faka inpuanna zawng zawng ka sawi zawh meuh chuan ka dang a ro hle, tui ka va in khawlh khawlh a. U Faka inpuanna aṭanga ka thil hriatchhuah pakhat erawh ka la sawi lo. Hriata chuan, "U Faka hian dâwt a sawi lo vang. Ka lo zeldinna nen a inrem deuh vek. Hriati kha la dam se min pui thei tur hi a nia..mahse, ani pawh kha a thil hriat tam luat vang leh a hnawksak tak avanga thah a ni ngei ang" a ti ram hmuk a. Hriati aia hmangaih a la neih theih loh thu kha a sawi tawh a, Hriati hming sawi rik chuan a danglam deuh tlat zel. 

"Thil pakhat a la awm a..chuvang chu a nia, Hriati thihdan kha ka rinhlelh ni. Hriati a thih khan ka tana a hnutchhiah lehkhathawn chu Babyin min pe a, chutah chuan Hlimi kha Hriati chuan a tukhuma lunga chhû angin a insawi a, chumihnuah Johna'n a rehhlum thu a sawi. Mahse, U Faka hmuh danah kha chuan Johna'n a rekhlum nghal kha a ni si a, a inkalh ta tlat a ni" ka ti ta a. A bu nghut nghut a, "Hriati lehkhathawn chu i la kawl em? A kutziak a ni ngei a maw?" A ti a. Ka halral tawh thu ka sawi chuan pawi a tih hmel hle. 

"Aa..kawng dang a awm tho vang. I la mitthla thei turah ngai ila, naktukah Hriati te inah a kutziak hmuh tumin kan luh mai a ngaih hmel" a ti a. Ka pawmpui viau. Kan chetdan chu kan spy ṭan riau mai. 

"Hriati nen in inhmuh ṭum chuan eng thu mah a sawi lo maw?" Ka ti leh ngat a. 

A zat vang ni miah si lo hian a nui hak a, "Kan inhmuh aṭanga 10 sec pawh a ral hmain Babyi a rawn lang ve nghal alawm" a ti hmuk a. 

"Eng nge a sawi, Baby chuan'" ka ti vat. 

" A tih fô dan angin, 'Johna'n a hriat chuan i mualpho ang. A fa i pai bawk si..a tihmualpho che chuan khua i hawi ngam tawh dawn lo. ' tiin a nau chu a kai hawng mai mawle..mahse, Sangzual, lo phu hlê lo la. Hriatsangi naupai kha Johna fa a ni lo ti ta ila, mak i ti âwm" a ti ta mai a! A sawi lâwk tho nain ka phâwk hrû mai. 

"A awmzia chu i fa maw..?" Ka ti ṭial rûan. 

A bu nghut a, "Hman zan khan a kimchangin ka sawi hman si lo va. Kan chanchin hi sawi tur a tam alawm. Ih e..Hlimi'n Johna fa a pai tih Hriati'n a hriat khan Johna kha a ṭhen nghal vang vang a. Kei nen bul kan ṭan leh mêk kha a nia.." tiin a ngawi dat a. Hriat zawm zel châkin ka lo melh kûr ringawt. 

"Dik tak chuan a tleirâwl chhuah phat aṭanga a duh ve, a mit latu kha ka ni ve a. Kei lahin ka lo vei ve hle bawk si. Tikhan a rûkin kan inngaizawng a, a la naupan êm vangin rim pawh ka rim ngam lo. Mahse, ka thlakhlelh leh hmuh ka châk ngawih ngawih ṭhin avangin Baby rim niawm takin Hriati chu ka rawn hmu ṭhin. Lehkha a zir loh zanah zel ka leng bawk. Baby khan ka rilru hrethiam hauh lovin amah chu ka rim tak tak emaw tiin min lo duh ve ta mai si a! Kan buai zo ta a nih kha. 

Sunday tlai khan kan leng dun kha kan lo inthlahlel deuh nge khuain min thim hnan ta si a. A nu leh pate a hlau bawk si leh kei rilru la puitling bawk si lo, inngaihtuah fîm hman ta lo chu inruk ka rawt a, a hnial ngam miah lo. Tichuan, kan inah ka hruai haw a, ka nu hian kan lu chunga kut nghatin min lo ṭawngṭai zui! Hnar a lian duh ania aw. Khum khatah pawh kan mu dun lo. A tuk varṭianah Baby'n a rawn lam a, a nu leh pate a la hrilh loh thu sawiin an hriat hma ngeia haw turin a rawn ti a. Hnial ngam hek lo, an inhruai haw ta a. Inru hming pu ve siin kan mudun ta miah lo tihna a nih chu..Baby chuan a nau nen kan inhmangaih zawk tih a hriat tak avang chuan kawng dangin hma a la ta a. Hriati lo duh ru ve êm êmtu a ṭhiannu Julie cousin Johna leh a nau chu an inngaihzawn theih nan ruahmanna a siam ta a ni. Kei lah kha ka vanduai asiamin Tlângtê-a ka nî boral avangin ka nuin min ngen angin ka va zin a. Kar khat dâwn ka va châm a, chumi chhung chuan Hriati rilru hneh tumin nasa takin hmâ an lo la a, Tlângtêa nupui va ru angin min sawi darh a. Ka rawn haw phei chuan fiam ka hlawh nasa si a, ka hrilhhai teh asin. 

Hriati lah la naupang â tih takah a rilru a lo na khawp mai a. Julie piancham lawmnaa a û in a hruai ve zanin a in turah damdawi pawlhin Johna nen chuan an lo mutduntir a nih chu! Mahse, an mudun lai thlalak bak ka hmu lo, sex an hman leh hman loh ka hre lo. An thlalak kha Johna min lo thawn a ni nghe nghe. Ka kehchhe ta vek a, Hriati chuan min phatsanah ngaiin kei mahni tawka inla pa ve bawk si chuan, ka kalsan ve ta a. Thu dik tâwk lo hmanga phuar ve ve kan nih avangin engmah thu han inzawh leh pawh awm ta loin kan inṭhen ta tawp mai a ni. 

An sawi hmangin Baby hi an in chhungah a thu bawk a, Johna pawh a tlatlum ta hle a niawm e. A nu leh pate pawn an lo duhpui hrep a, Hriati zawk hi chuan Johna chu chuti tehchiamin a duh hran lo. Kei min runluihna ni pahfâwmin a kawp lui vel mai mai a ni. Kei lah ka rilru nâ kha ka nî te khuaah tho chuan inhlawhna a awm avangin ka va zin leh ta reng bawk si. Thil kha a kal dik lo a ni tawp mai. Hmeichhia chu dawhthei rengtu lakah chuan an lo nêm ve leh nge nge zel tih takah Hriati pawh chuan a kuma kum an han inzui tâkah chuan Johna pawh chu a duh chho ve ta hle a. Johna lah a inngaitlawm thiam si. A tawi zawngin, tikhan i lo zin hma lawk khan sawlai tuikhurah sawn mutbu leh parda vel suin Mapuii nen kan rawn kal a. Kan insûk mêk laiin ka nuin Mapuii a rawn bia a, Golden card siamtir a ngaih thu leh document dahna safe chabi Mapuii'n a lo ah daih avangin haw lawk turin a rawn ti a. Mapuii zu hawn zawk chhung chuan Hriati hi an doormat vel sûin a rawn kal ve ta a. Kan inṭhen hnua a fâla kan inhmuh leh hmasak berna a niawm e. Mipa ka nih angin palliam ka tum a, "In innei hnai tawh em?" Tiin ka zawt a.

"Ka hre lo" tih chiahin min chhang. A hnu deuhah amah chuan, "Nupui nei ang khan an sawi si che a, ka va'n hmu ngai lo " a ti ta a. Chutah chuan tu te emaw ruahmanna avanga inṭhen kan ni tih ka hrethiam ta a. Johna nen an thlalak ka hmuh ve tho thu te leh khanglaia ka hun tawn zawng zawngte kha ka hrilh ta vek a, tlai tawh mah ila thudik hre ve hrim hrim se ka duh a ni. A rilru a na hle tih a lang. A ûin min beisei thu te thlenga ka hrilh takah chuan engkim a hrethiam ve ta a, a thinrim a, mahse, a tlai tawh. Amah ngeiin tihian a sawi. "U Pui (U Pui ti hian ani chauhin min ko ṭhin), kan va inhrechhuak har ve le..kan chapo dun vang vek a ni. Tunah chuan a tlai tawh, ka chhe vek tawh. Ka thianghlim tawh lo. Johna tan ka inhlan tawh a, i tan ka tling tawh lo" tiin. Sawi tur ka hre bîk lo. Ngaihzawngte leh han zui rei te pawh ka nei ve tho, Hriatsangi ang êm êma ka vei leh ka ngaih erawh ka la tawng bik lo. Mahse, ni e, Johna tan a taksa a hlan tawh a, keia mipatna rilru khan a pawm thei tawh bîk si lo. Baby chu ka haw takzet a ni. 

Mahse, khata ṭang khan mak deuha han intawn fuh nawlh nawlh kan nei ta fô a. I rawn awm hma thoa Vengsânga mitthi an awm zanin tuna kan buaina bul hi a thleng ta a ni. Ka inhrethiam bik tawh lo. Hriatsangi chu ka text a, lo chhuak lawk turin ka ti a. I hriat tur chu kan inngaihzawn lai leh inṭhen lai khan Hriatsangi'n phone a la nei lo, Baby phone aṭanga biak kha ka duh bîk si lo va, khatihlai khan phone te chu nei tawh nise, kan inṭhen ka ring lo. 

Hriati chu a rawn chhuak ve mai bawk a. Ka chhungte mut tawh hnuah ka pindanah (ka pindan hi in hnuaiah a awm a, in hnuai atanga luh theih a ni) ka hruai lut sauh sauh a. Kan inngaihzawn laia ka khawih chhiat phal ngai loh kha, a thianghlim tawh loh hnuah ka mutpui ta a nih chu..a bak chu i hrethiam tawh mai ang. Nau a pai ta a. Min rawn hrilh zan la la khan ru ni ila a la dam tur..nau hial a pai takah chuan kan inneih tho ringin dinhmun siam deuha pawisa thawhchhuah leh hret ka duh a, ka tisual ta a nih kha. Baby'n ka fa a pai tih a hriat khan Johna nen inthurualin chet an la ni turah ka ngai. Hlimi'n Johna fa a lo pai ve kher bawk nen..U Faka sawi dan aṭanga ka ngaihruat hian Johna leh Baby te khan an vau bet ang a, Khamizan khan Hriati ka hup nan leh thunun nan Hlimi thih lai khan an awmtir ve a ni ngei ang. Ani rilru dâwih chi, thunun awlsam lutuk a lo ni bawk nen, Johna leh a û ṭangrual chuan an kai kual ta ni turah ka ngai. Kei lah i rawn awm tirh lai te khan khuaah ka awm lo hrim hrim. Lianpuiah in kan va sa daih kha a nia. Hriati'n min rawn be ngai ta lo va, a hnu fêah nau a chhiat thu leh Johna neih a tum thu min rawn hrilh a. A tirah Baby te tihluih vangah ka ngai a, mahse, ka rawn haw a. 

Johna nena hlim hmel taka an awm dun lai leh Julie ngeiin Johna ten palai tirh an tum mêk thu a sawi a. Ka rilru ka siam ve ta a ni. Baby fin kherek zia lah chu, khatiang boruak hun lai khan bialpa angreng ve deuh neiin kei chu chhhetê mahin min ngaihven lo. Fihlim an tumna hmanrua a ni ang tih tunah ka ngaihruat thiam chiah…khami zan a thih hma zanah khan eng thu nge min hrilh a tum ni ang aw..Baby khan Johna fa pai ang khan a rawn sawi ta bawk nen..ka thinrim leh rilru nâ khan ka umzui duh ta bik lo kha a nia..mahse, Hriatsangi tawpna chu heti mai hi a ni ta si" …tiin a sawi fai ta vek a. Chil pawh lem ṭha ngam loin ka lo ngaithla.

"A nih Hlimi thih sarhu laia a thlâ leh in sâwi te, thaw ri te engkim kha Hriati khan a lehkhaah Johna nena an thiltih vek a nih thu a sawi a. Eng nge a awmzia ni ta ang le" ka ti a. 

"Hriati chuan a ti lo tawp ang. Mahse, Hlimi kha a thlâ a hrâng tak tak alawm. Kei ngei pawn ka tawng. Ka sawi lo mai mai zawk a ni. Hlimi thlâ khan Hriati ngei pawh a luhchilh ve a ni thei" awmze nei vak lo hian a ti a. Ka bangbô rih. Ramhuai tih vel chu dah ṭhat rih phawt a ṭha. A hneawm. Tunah chuan Baby te hian engtin nge Hriati hmanga kua an hreuh tih leh engtia chetlâk zel nge an tum tih kan hriat a ngai. Terini kan hmaih thiang lo bawk. Hriati ruang takngial pawh rawn kil lotu a bialpa Johna hi dâwp deuh se chuan engkim hailan a ni thei ang mawle. Police te hian chet an la hâr a nih teh chuan, boruak a dai leh ang a, pressure a awm loh chuan a thâmral leh mai mai ang tih ka hlau hlel lo ve. Case chinfel loh hi a la tam ropui si. 

Hriata chuan, "Sangzual, hmalak theihna kawng awlsam ber chu pu Zawma hi titipui la, Hriati thih dan i rinhlelh thu sawitir la; report thehluhtir mai rawh" a ti nghut nghut a. 

"Thil ṭha ber a ni lo. A fanu tho Baby a kangkai dawn asin. Baby te sawi tel loin Hriati thihdan ka rinhlelh thu engtin nge ka sawi theih ang?" Ka ti ve si. Kan buai dun ta hle mai. Mipa e ti lo chuan khum khatah kan mu dun a, kan phun bul bul reng mai. Police te hnena Terini te nupa hlîng tura ngen emaw case siamsak bak tihtheih kan neih loh hmel. Terini te chiah hi Police tan pawh man awlsam an ni, U Faka an vauna msg kha U Faka'n a la kawl ve tlat a! 

"Thil a chiang reng tawh a, a bultumtu hriat kan duh tih vanga tun thleng thlenga Terini te an la man lo pawh chu thil danglam tak a ni. Tsa patea kha ukil a lo nih tak tak chuan, engtin tin emaw Police ho hi an kut an phuarsak te a ni thei ang em?" Lungawi loh hmel zetin Hriatpuia chuan a ti bul bul a. Ngaihdan ka lo neih rûksa, ka sawi lan duh lem loh kha a ni a. Kan sawi dun leh ta hrep. Kan muthilh meuh chuan dar 3 a pel duai tawh. Mahse, ruahmanna eng emaw zawng kan siam ve nêl nuâl kha..

Thawh pawh kan hai ta rêng a. Sunday zing a ni naa, inkhawm ka tum lo, ani pawh a tum bîk lo a nih hmel. Chaw ei ve nghal turin ka ti si, sawm a nuam angreng. A ṭha, mipa chu awlsam tur. Chakai kha ka chhum hluah a, a lo thau ngiang mai. Chaw pawh ka bâr hman meuh lo a ni e. Chakai leh chengkâwl hmeh hi chuan chaw aiin ka ei tam zawk ziah. Chaw eikhamah tih êm êm tur awm hek lo. In chunga Hriati kutziak en dawn lahin an inkhawm vek bawk si. Mut kan kham vak lo nen, thutthleng seiah kan muhil leh ta bawrh bawrh a. Tlai lamah Sangpuii te inah chaw ka ei dawn si a, ka harh veleh ka inbual fai a, Hriatpuia pawh a haw thla ve ta a. Inchei vûr ni si lo, mawihnai leh hmuh nuam tawk vela incheiin dar 4 pelh hlekah Muansangzuali te in lam chu ka pan ta a. 

Ka va thlen chuan an lo ri ve laih laih a. Heleni te chhungkua pawh an lo sawm ve a lo nia. A hlimawm ṭan e. Englai pawha kan buai rûkna ngaihtuaha zeldin reng kha ka hne ve tawh bawk nen, vawiin tlai chu a thawveng leh phur zawnga hmanral ka tum ve tlat. Sangpuii chuan kawrfual a khup aia fual hlek, a bân bûl, a par chhiai mai hi a ha a. A va inhmehin a va duhawm kher êm. A sam chu a chhipah a zial khawm leh bawk a. A inchei miah lo chung pawh hian a hmelṭha a ni. Mahse, puitling an awm ve nual vang nge min ngaihven ṭha ngam meuh lo. Diki erawh a mood a fuh lo tih chu en mai pawn a hriat..a hmui pawrh tûrh chu a tûm kawh lûk mai a, hmelchhiat tawh sa nak alaiin a chhiat belhchhah. A fanu amah chhun deuhtu erawh ka hmu ve miah lo. Nizan khan an inkhak na deuh ang a, a nu ang deuh hian a tlân ve te pawh a ni mahna. Mi nupa a inṭhentir te kha an tia! Kan tunlai khawvel zet hi chu a! Kawppui nei chunga midang kawp hi khawtinah hmuh tur leh sawi tur an awm ta. An zak ṭhak lo lehnghal a. Kan khawvel changkanna hi a ṭha lo zawng leh a la lâp zawng hian kan lo chên ve a, a tawpah kan chhe leh duai ṭhin. 

Heleni pa chuan, "Faka chu district jail lamah an thawn thla an ti kha a nia. A inchhir ve tawh fû ang" a ti chuar chuar a. Engkim a hre ve lo va, hrilh kher pawh ka tum chuang lo. 

Pu Thara pawh chuan, "An court hun chu Mateii pawh a va inlan ve a ngaih hmel..engpawhnise, kan tu kan fate him zel nan hetia jail-a a tân hi chu a ngai si a ni" ka mitmei vêng ru zet hian a ti ve a. Ka la ngawi tlat! Sawi tur ka hre ve miau lo a ni. Thildang sawi se ka ti,.ka sawi hne tawh ka tih kha. Kalna lam apiangah U Faka chungchâng hlir..tunah ka bialnu ep chiahah ka ṭhu mêk a ni a, heng puitlingho hian chance min pekna châng hria se aw..ka thil ngaihtuah mai mai chu a! Atthlak hian..

Pu Thara bawk chuan, "Sir, 2nd hand phone lei mai turte hi i hre lo maw? Mateii hi online class an kal pah tawh dawn a, phone a la nei ve tlat lo mai a" a tih chuan ka phu deuh zawk. Muansangzuali tan hian eng nge ka tih theih loh min zawt zawk se a ṭha tur..awlsam zet hian, "Ka phone hi tihral ka lo tum ve mêk asin. A thar lei ka lo rilruk a" ka ti nghal hmak. Ka va che rang tak. Ka innuihzat lek lek. 

Sangpuii meng zau kâwk chu ka va hmu reng. A pa chuan, "Ekhai! A va tihzia dawn ve. Mahse, a la ṭha sia..a man a to âwm" inthlahrun hmel lek lek hian a ti a. 

"To lo vang. A ṭhat chu a la ṭha angreng. Bty hi ka duh aiin a tlo tawh lo deuh a, mahse, Sangpuii te chuan an hmang rim dawn lo va.." ka ti nuah nuah a. Heleni mitmeng awmze nei vel lutuk chuan ka nuih a tiza. He nau hi a zeihawi tlat. 

"A nih chuan engzatin nge i phal ang" a pa bawk chuan a ti a. Chutia inzawh thut arâlah chuan ka sawi thei îkhaw ta si lo.."Aa..ka va hrethiam mai bik lo. In ngamna zat ang kha a ni mai lawm" ka ti a. Dik tak chuan ka phone hian ṭhat lohna êm êm chu a la nei hran lo. Phone lawm tak ka lo ni lo bawk a, games ka khel ngai bawk si lo. Mahse, kum 2 pumhlum ṭhak chu ka hmang tawh a, Muansangzuali ka biak pawh theihna a nih dawn phawt chuan ka ui lo a ni ber mai, a thlawna pek daih pawh ka phal, mahse, a pate awm laia sawi chi a ni rih si lo va. 

Diki chuan, "A hlui a ni bawk a, tlawm deuhin min ve pe ve la, 6000 velin i phal lo'm ni?" A mood fuh loh ngaihtuahin a ṭawng nêm phian mai. 

"Nia, a hlui a ni bawk a. In duh chuan 6000 chuan in la dawn nia..ka hmang rim lem lo va, a tlo viau ang" ka ti puat a. Muansangzuali mitmenga nung sârh ka hmuh chuan ka hlim vêng vêng thei. 

"Mahse, a thar ka chah hi a rawn thlen hma chuan ka la kawl a ngaih hmel a. Tuesday velah chuan a lo thleng thei mai ang" ka ti a. Ka la chah tawp si lo. Mahse, Tei ka be mai a niang chu. Samua a ṭangkai ang, a ṭhianpain phone dawr changtlung deuh a nei tak alawm..a fuh chho viau e. Kan titi kan titi a, chaw ei pawh a lo hun ta der mai. Fatu atan Heleni nuteii leh a pasal an lo hmang a niawm a, an ni eisiam lam timi deuh an ni bawk nen. Vawksa anṭam nena chhum pawlh, arsa fry leh bai eng emaw a ni a. Insûm hauh lovin ka'n ei leh ngheng kha. Puar hian rilṭam a hlauhawm loh ber. Eikham an insengfêl chhungin an kawtkaiah zial ka va zu hlat hlat a. Pu Thara nen kan inkarah hnawk a awm ta lo bawk a, Diki chu ngaihmawh thamah ka ngai lem lo. Kan chhui tur listah awm mah se, ani hi chu a fin loh roh êm avang hian thil zawng zawng an hrilh ka ring lo. Terini kaihluh pawh a ni ve thei. 

"Sir, thingpui hâng" Muansangzuali'n in chhung aṭangin a rawn ti lâng lâng a. Ka lut vat. Puitling ho bulah ka va ṭhu zum leh dûk a. Haw vat vat se ka ti mang e. Diki chu ka ngaihbel em mawni a za ruai mai a, a phi chêng a ni ber e. A tawpa tawpah , "Ka nuteii te inah ka va kal lawk ang e. " Tih leh chhuah a rual a. An pa chuan engah vak a ngaih hmel loh. Diki kal chhung chuh niawm takin Heleni nu chuan, "Thara, mi hrang kan awm chuang lo va, Sir pawn a sawi chhuak chuang lo vang a. Kimi te chu eng nge maw an awmzia reng reng le?" Tiin Pu Thara a melh a. A ha kherna bawlhhlawm bâwma thlak zauh pahin, " aa..sawi tawh ang khan, Hmangaiha nen an lo inchûkhâ ve deuh niawm tak a ni. Rini'n a hre leh ta si kha, Hmaa nen an inhau ta chiam a. Rini lah a lo huaisar ve bawk a, Kimi chhâl a rawn tum a, mahse, tikhan an indang bet thei a. Buanga te pawh an zahawm khawp mai. " A ti ta mawlh mawlh a. A tu amah ka la hriat ve loh avangin ka bo hû mai. 

Heleni pa chuan, "Hmaa hi chu a nih dan ṭhin a ni hrim hrim alawm..lerh hi a sim hleithei lo. Rini hian a dawhthei êm zawk a. Kimi reng reng pawh mi pasal a ni tih a hrechiang hle si a, engah nge maw a mualphopui duh ni.." a ti chuar chuar a. 

Pu Thara bawkin, "A hma deuh pawh khan Buanga fapa û zawkte pawh sawn an kawmthlanga an chetla dun chu an lo phâwk titih tawh a niawm e. A nu bulah an sawi a, mahse, Buanga thinrim a hlauh vangin Khumi pawn a lo zêp a lo nia. Mahse, tikhan an inmanchhuak ta hlauh sia, Kimi lah hauh hma hmain ka tlân e a tia. Naktukah an khaw lamah haw rih se a ṭha ang" a ti nghut nghut a. A fanu bona khan a siam puitling ta sawt nge chhungkua a hmangaih ta sawt zawk, hmuh theih khawpin pu Thara chu a danglam tlat nia mawle. 

An ṭhenawm te niawm tak nupa leh an fanu, Tleipuia te aia nau hlek tur te hi an rawn lut ve a. Titi dang an vawrh zui nghal. 

Heleni'n ,"Sir,dawrah kal lawk ang u. Test note pawh lei ka ngai, Nu, khaw maw 50 min lo pe, ka'n lei nghal ang e" a ti zung zung a. He nau hi a zei ka tih tawh kha..kei lah chu ka ding nghal vut a, ka phur hmel lutuk chu ka inthiam lo leh deuh. Sangpuii chuan, a pa enin, "Pa, Leni te inah assignment kan ti nghal dawn a nia aw. Hetah chuan in tam sia" a ti a. 

"Aw ..nang test note chu lei ve i ngai em?" A lo ti var a. 

"Ngai rih lo ve.. ka la nei" a lo ti thuai a. Kan chhuak chu a ni deuh mai, haw tlang law law turin ka insawi nghal bawk a, Pu Thara chuan min rawn thlah nghe nghe. Ka bike-ah kan inpathum a. Sangpuii a laiah a ṭhu. Min kuah ngam chiah si lo hian ka kekawr ipte pawrh lai chu ngam leh ngam lo hian a vuan ve chat a. Ka nuih a za deuh. Vengthar a ṭanga kan chhuak dawn mêk tihin kâwng pâwng laiah chuan dim vak lo hian ka tlan a, a balance a buai ta ngeni ka nâk nêmah chuan a rawn vuan ta nge nge a. Heleni ṭawng lâwng lâwngte chu ka lo ngaithla miah lo. A va ho e aw. 

Dawr piah deuhah min dintir a. An mamawhte chu an va lam a. Kei erawh chuan Lapuii dawra Terini niawm tak chu ka lo thlir daih. An rawn zin tihna em ni? Amah chauhin nge an pa nen. Man leh mual an la inhlan lo naa nupa ang thoin tihian an awmzui ta chu a ni mai a. Mante chu inhlan vat mai awm..a ho êm mai, ka buaina tur pawh a ni lo. Sangpuii te pawh an rawn lêt vat a, Heleni te in lam kan pan leh ta a. Sangpuii te in leh Heleni te in inkarah in pahnih a awm a ni. Tumah an awm lo bawk a, ka zalên sawt. Heleni lah ka zah nêp ve tho si. Sangpuii erawh in chhung kan luh phat aṭang khan a lai nghal êm em a, ṭawng pawh a ṭawng tawh lo. Heleni te chaw ei dawhkanah chuan an lehkhabu pharh duaiin Assignment chu an ziak ta zung zung a. An hriatthiam chiah lo, belh ngai site chu ka tihpui zeuh zeuh bawk, nuam ka ti. Inngaizawng tih vanga fianrial hun hman reng tumte, infawh leh inkuah deuh chawt reng mai te hi ka mizia a ni lo. Sangpuii a la naupan chu thu hran nise, hetia inpawh leh ṭhian ang thawthânga awmho mai mai hi nuam ka tiin, mi mitmei ven êm êm a ngai bawk si lo. "An va innêl êm" tih kha min comment dan tur a ni mai a. Kum thuhlaah kan inthlauh ve deuh vang leh zirtirtu ka nihna angin Muansangzuali nen chuan min hmehbel vak ka ring lo. A bo chhanchhuaktu ka lo ni ve kher bawk nen..engkim chu a fuh vel vek a ni mai e. 

"Awiii, ka vawih dawn emaw ka tia, ka e daih" Heleni'n din hluai pahin a ti pek! He nau hi aw. A frank reuh si. Bathroom panin a kal kamki ṭuau ṭuau a. Sangpuii nuih a za ngang mai. "Chhiate, i va ṭawp tak" a ti zui lâng lâng a. Heleni kawngka khar tur chuan, "Golden chance" tih pahin a kutzungpui a rawn ti pir vâ zui! A nghal dan hi nghal dan ṭha chi a ni. 

Ka ṭhut hnaih nghal rûak. 

"Savatê" a beng bulah ka ti sup a. A phû nge a za ti zawk a che lawih.

"Khatiang a zahthlak..inkoh duat vel" a ti hlak a. 

"A nih, Muansangzual" ka ti a. Ka nui duh miah lo bawk. 

"Eih..Tlansangzual" a la tizui! 

"Sir min tih ai chuan dawnsawn a nuam zawk.." ka ti ve mai a.

"A changin i naupangchhia a, a changin i upa leh bawk si" a ti niah niah a. Ka mitah hian a en ngam ngai vak lo. Ka hrethiam reng mai. 

"I bula ka awm chuan ka naupang thutin ka hre ṭhin" ka ti ve leh mai a. 

"Kei chu miin an hria ang tih ka hlau ê..min ngai lerh dawn si" a ti leh daih. 

"Khatiang care zel suh. Lo sawi mai mai ang hmiang.." ka ti nghut a. A ngawih tak daih avangin ka kun hniam a, a khabe chawikansakin ka fâwp leh ta phawt. Min chhang let ve naa, a thiam hlawl lo. A ang phiau ringawt a, mahse, ngaih hi a ṭha êm êm mai a ni. Engkimah a hmasaber mai ni lo a awmchhun nih ka duh. 

"Innei ila" ka tih chuan phâwk fê hian min melh a. 

."I â mi!" A ti hlar.

"Ka nuin nupui nei turin min ti tawh a. Class xii hi pass la, innei daih ila" ka tih chuan, "I lo upa tawh kher kher hi a pawi êee.. " a ti daih. Kei pawn pawi ka ti ve ṭêp..mahse, ka ta a nih tho chuan eng nge pawi?! Heleni a rawn chhuah takah chuan, "Tikhan lo ti r'u, ka han haw tawh ang e. Thawh ka hai leh palh ang. Naktuk kha kal hma tur a nih kha aw" ka ti zung zung a. Phurh chhoh pawh duh viau mah ila; an duh ka rin si loh vangin ka sawi ta lo law law. Tibuaitu leh hnawksak tham khawpa che an la awm lo bawk a, thaw a veng halh mai. 

Vengthâr pêng aṭanga kan in pêng ka tlan chho, School kâwn veng lam aṭanga inkai riala Hriatpuia leh Baby te rawn kal phei ka va hmuh chuan ka ding lek lek..min hmu ve lo nge keimah ka ni tih an hre lo zawk. Baby hmel lah kha a hlim sârh mai a.. eng emaw tak a dawng nge, hmuh ṭha a hmu nge? A bêng tivar hawk thei thil a hre zawk..?! Ka hre lo vek…