Ka savate 13

KA SAVATÊ (13)

Ziaktu : Toni Râlte

Nidang ai chuan kan bâng hma ta deuh, U Faka avangin kei phei chu in thlen vat a ngai. Sangpuii kha rawn kal turin ka ti naa, a rawn kal ka ring chiah lo. Amah chauh phei chuan a ngam lo vang. Ṭhiante ka pensan a, in chungah pawh pêng lovin ka chhuk tlang a, a lo la inkalh ṭhap e. Ka hawng nghal rawk rawk a. Police ho pawh an rawn thlen vat ka beisei. Ina ka luh chuan U Faka chu ṭhutthleng seiah a lo mu bal a. A muttui hmel kher mai. Ka'n en ṭhin, ka lainat ngawih ngawih nia mawle. Zuin a taksa a ei chhe ṭan ve tawh bawk nen. A cherin a dawldâng êm êm a. Mut a hmu ṭha ngai lo tih a lang reng mai. Tihharh hlau takin ka che a, Police ho bulah khan thil nihdan tak kha ka sawi thuak thuak tawh a, keimah ber kher min rawn pan nulh danah ka thusawi pawh an tan rinhlelh a har ve deuh nge ni, engmah sawi nawi an nei lem lo. Tui ka lum laiin a rawn harh a, a mit nuai chawt chawt chungin, "Ka damchhunga ka la muttui ber a niang a" tiin a ham bâi bâi a. Ka lo nuih ringawt. A rilṭam ka rin vangin thingpui ka chhuang nghal a. 

"An rawn thleng tawh dawn ang em? " A ti leh a. 

"Aw..khua an lo lut ṭêp e" ka lo ti mai a. 

"Kan kal hmain ka û te tlawh zuai ka duh mang e. Ka fapa pawh ka hmu ve duh khawp mai" inthlahrun hmel zet hian a ti a. Ka hrethiam lutuk tlat! "Ka dilsak dawn che nia, an phal êm êm ang. Pa Mawia te pawh ka'n be nghal ang e" ka ti a, ka phone ka kheuh nghal. Zoa number chiah an chhungkuaah ka neih si avangin ka call ta a. Pu Lawmkima te vawk in a lo sa daih a lo nia! A pate be mai tura ka tih hnuah kan dah ta a. Kan inbiak aṭanga reivak loah Pa Mawia'n kawngka chu a rawn kik ta dawt dawt a, ka rin aiin an che rang daih mai. Ka va hawnsak a, hmel pangngai takin a rawn lut ve mai. Thinrim leh lungawi lo hmel a pu hauh lo. 

."Hna i thawh ka lo ring zawk a. " Ka lo ti var a. 

"Nia mawle, ka banrek hi ka ti ulh pek a, hna han thawhpui hleihtheih pawh a ni lo" a lo ti ve mai bawk a. A banrek chu a tuam ve hlûn tak alawm. U Faka bulah chuan ṭhuin kei erawh chuan kawngka ka lo kalh leh hmak thung. Thingpui ka siamsak ve ve a, "Tikhan lo titi r'u aw..ka'n intleng thuak thuak ang e" ka ti a. Inbual turin ka luhsan ta rih a . An unaua hun thawl siamsak kha a ngai ve tlat a ni. Ka inbual zo, ka inhruk hul mêk laiin kawngka an rawn kik ta a. Police an ni tawh ngei ang le..

Ka rin ang ngeiin Police civil thuama inthuam mi pahnih an lo nia. Ka la hmuh ngai loh ve ve an ni. Civil thuama an inthuam chhan pawh miin an lo notice a hlauhawm a, tunhnaiah buaina neuh neuh a awm reng bawk nen, Chimbuai an nih vak palh kha a hlauhawm ve thei tlat. Ka inthlak sawk sawk a, an ni lam pawn, "Motor kan rawn keng nghal bawk a, khawi danga pêng kawi tawh lovin kal nghal mai a ṭha ang" an ti ve bawk a. Tichuan, U Faka chu Police motor lam panin an chhawm chho ta a. Pa Mawia nen kan zui ve bawk. In chungte kawtah chuan Baby te chhungkua bakah an ina leng nu leh pa ṭhenkhat an lo awm hung mai a. Inthup hlen chu a theih dawn ta lo a nih hmel. U Faka an hmuh chuan an phâwk hle hlawm a, zawhna an ngah hle tih a hriat bawk. 

U Faka chuan an kal dawn chuan,,"Sangzual, Diktea ka hmu hman ta bawk si lo va, nakinah engpawh ka lo tawk a nih chuan ka ngaihtuahzia hi i lo hrilh hre ve hrâm dawn nia. Chuan, ka ring che aw.." a ti mawlh mawlh a. Ka bu nghut a, "Lungngai suh ka tih kha. Police te bulah zêp nei lovin engkim sawi la, thil tisualtu te pawh an hlîng har lo vang" ka ti nghet charh..an tlan ta a. 

Keimahin inah ka chhuk thla leh hnak hnak a, Baby'n min rawn umzui chat. 

"Sangzual, eng nge a awmzia? U Faka kha" a hmela engmah tilang miah si lo hian a ti hâ a. 

"I hmuh ang khan Muansangzuali a rukbo avangin an man a nih kha" ka lo ti nghut a. 

"Ka sawi awmzia zawk chu engtin nge i inah a lo awm daih theih?" A ti leh a. Ka ngawih dat hnuah, "Ka hre bîk lo, School ka ban khan a lo awm ringawt a, Police kuta inpek a duh thu a sawi a, ka biaksak ta a nih kha" ka ti ta a. A awih ka ring miah lo naa, tlem tâla a rilru tihbuai ve theihna a nih ka beisei vang a ni. 

"Ti nge inpek chu a duh thut ang le!" A ti sap a. 

"Ka hre tawh bîk lo le..tlanchhiat reng a ning tawh a niang chu ka ti mai " ka lo ti awlsam êt a. 

"A tâng rei ang em" a ti leh a. A va dilchhut tak, "Rei ve maithei a ni..ka chiang bîk lo" ka ti leh tawp. Baby lakah ka fimkhur a ngai tawh dawn a, invêng reng renga hun hman hi kei ka nin zawng tak a ni a, ka huphurh lâwk angreng. A nuin a rawn koh avangin a chhuak leh ta a. 

U Faka chu a ngaihtuahawm êm lo vang chu maw..a thusawi te kha thudik a nih phawt chuan, Police te tan hna a tiawlsam sawt dawn tih ka hria. Dâwt a lo sawi a nih hlauh erawh chuan, a chan chuan maian chan pawh a tluk zo ngût lo vang. Anṭam ka tlak a. Alu ka fry leh a, hmarchate hring sehhmeh tur a awm tho bawk a, ka duhtawk der mai. In chungte pawh khualkhuaa an chhungte ho an haw tawh hlawm a, an thawm pawh a zâwi ta viau. Len luh châkna pakhatmah ka nei lo naa, Zan lamah chuan han lan ve pawh a ṭha viau ang. Phûngthlûk ve loh hi chuan kan thiltih ṭhat tam tak aiin kan tihsual pakhat kan larpui zawk zel si a. Bakah Baby chu chîk lehzuala ka veh a ngai dawnin ka hria. Pa Zawma pawh a fâla la kawm ka duh, Hriati kha postmortem a ni lo va, mi kut tuara boral a ni ka ti ngawt ngam lo naa, U Faka thusawi ka ngaihtuah lêtin ngaihtuahna a tibuai zui tlat. U Faka khan Hlimi kha Johna rehhlum a ni tih chiang takin a sawi a, Hriati lehkhathawnah lêm Hlimi chu lunga a tukhuma chhû angin a insawi lawi bawk si! U Faka thusawi kha dikah lo ngai ta ila, Hriati chuan kut a thlak ve miah lo tihna a ni dawn a, a lehkhathawna telve leh bulṭantu ang hiala a insawi danah lehkhathawn kha ama ziah a ni lo thei tlat! Mahse, ka buaina erawh ama ziah ni lo pawh nise, Johna'n a rehhlum thu kha ti nge a sawi tel kher? Johna laka FIR thehluh a hlau lo nge? Kei hian ka tih tak tak ngam a ring lo zawk. Ka ti ta lo rêng bawk a, a chhan pawh min ngenna anga a lehkhathawn ka halral tak vang kha a ni pakhat, evidence engmah ka nei tlat lo a tin ni. He buainaa langsar takte chu Baby, Johna leh Terini te an ni. Terini pasal pawh kha a ni ve thei bawk ang chu. Tunah chuan Police beng a thleng tawh a, kei ka lo chet ve chiam pawh a ngai kher lo vang. Rilru erawh chuan a vei run lo thei si lo va. 

Zanriah ka ei a. Sa kan hmeh ai khan ka ei hnem daih zawk. Thleng ka sil rak rak laiin call ka dawng a. A number chu ka save miah lo. Julie a lo ni teh daih a! "Vawiin hi ka birthday a nia. Baby nen khan rawn kal ve r'u aw. Baby'n be rawh a ti sia, ka rawn bia che" a rawn ti dap dap a. 

."A ni maw? Happy Birthday" ka ti hluai a. A nui hawk hawk. 

"Lo kal r'u aw.." a ti leh a. 

"Nia, ka lo tum dawn nia" ka ti ve mai. Zan tumtâwi nan chuan a ṭha viau tho e. Savatê lah rim tham a la ni meuh si lo. Nitin hi school kal reng zawk ila tihte pawh a awl rûm rûm mai. Ka insiam mêk laiin Baby a rawn lut ta a. A lo insiam diam tawh a lo nia. Kan chhuah dawn chuan, "U Faka kha engtin nge i inah a luh ngawt theih le? I kalh lo mi?" A ti leh ta a. Lehlam hawiin ka khi suk. 

" Ka bathroom ventilation aṭang sawn a lo lut a niawm e" ka ti ta ngawt a. A awih nge ni engmah a sawi zui hran lo. A lawmawm lamah ngai ang. Julie te in lam pan chuan kan inkhalh thla ta vang vang a. Dawrah nepnawi kan lei phei bawk. Chawl khawmuang tawh lovin Julie te in lam kan pan zel a. Julie te in pêng kan thlen chuan, Diki te nufa leh Terini nu pi Sawmi te kha kan tawk a. Baby chuan, "Ding lawk teh" a ti sap a. Ka ding ve mai. 

"U Dik, call i va la thei lo ve..englo, chawhmeh i la thar leh tawh em tih rawn zawh che ka tum a" a ti nghal zung zung a. Ka hnunga a ṭhut avangin a mitmeng ka hmu thei si lo. Diki ringawt chu ka melh ngur ngur a, ka ngaihbel pawh a ni maithei, a mitmenga eng emaw lo lang zawk leh pi Sawmi nen an inmitsir zawk chu ka hmu hman. Mahse, pangngai tak hian, "Naktukah a rawn thleng ang, tlaiah ka rawn zawrhtir dawn nia" a ti a. Kan tlan zui lehnghal. 

"U Diki hi an dem vak ringawt a, Muansangzuali pawh hi a luhlul an ti ve tlat..koh pawh a ko ngai lo an tia sin, tiangte chu nuhrawn tan chuan ngeih a har ve viau ang" a ti mawlh mawlh a.

"A va ti âng lo ve, nu ang tak takin en se a ṭha mai tur" ka ti ve lûam a. An lama ṭang anga lan a ngaih chang awm leh thin hian min tiâwm nuam lo lek lek zel. Mahse, Muansangzuali chuan ka nu tia koh a lo duh tak tak lo a nih chuan a thiam bik lo ka ti ve tlat! Mihring hi hotê anga langah hian kan lungawiin kan lunghnûr hma êm êm zel a. Mo ṭhenkhat pasala nu leh pate ko ngai miah lo te hi an pasala chhungte nen inpawh tak an awm ngai mang lo. Fak pawh an hlawh nêp deuh, hei hian inkohna mai mai pawhin inlaichinna a tihngheh leh ngheh lohzia a hril âwm e. Kan sawi ta sa sa, tunlaiah makpa te'n pizawn leh puzawn 'Ka nu/ka pa' tia ko an awm ta nual a. Ṭhenkhat duh fîr deuh ten, "A dik lo, thaibawih tih âwm tawk.." tiin an sêl fô, kei pawh a hma chuan a ṭang na pawl ka ni ve ṭhin. Mahse, ka nu ṭhiannu a hmeithaipui ti mai ang, hei hi a fapa pahnih ten in hrang an chansan tawh si a, a fanu chauh chu a neih a ni tawh mai, a fanu chuan pasal a nei a, makpa chhungkhung erawh an ni lo. A makpa bulah, "Ka dinhmun i hria a, ka fapate aimahin min hmangaihin min ngaihsak zawk a, chuvang chuan ka pi ti hi chuan min ko tawh suh. Ka nu ti ve mai rawh. Ka fapa te aiawhtu i ni sia" a ti a. Ka nu tiin a ko ta a, an inpawhna pawh a ṭha sawt ni te pawn a lang. Tin, nu leh pa nei tawh lo ten nupuia nu leh pate hi, "Ka nu ka pa" tia ko an awm bawk. An duhthlanna a niha an inzawmna a ṭhat zel phawt a hnu lo duh fîr vak pawh a ṭul ber lo. Chutihrualin nupui ten, " ka nu ka pa tiin ko rawh" an tih vang maia ko nulh nulh hi chu nupui chhungte tihlawm hlauh loh vang an tih pawhin a mawh hran lo, an nupui chhungte lam an ngheng tlangpui bawk. Sangpuii paw'n, Diki chu, 'Nu" han ti ve mawlh mawlh se, a dinhmun hi a danglam ang em aw te chu ka tia. Chutihrualin Baby hian dâwt a sawi ve thei tho. Ka nu tih duh lo tur khawpin Muansangzuali rilru hi Diki'n a lo tihel vek tawh pawh a ni thei. Engpawhnise, Diki hi mi fel niin ka hre thei lo.

Julie te in kan thlen chuan Maengi leh tlangval pahnih ka la kawm ngai loh an lo awm a. Julie nu leh pate chu Tlângtê-ah inneihnaah man an ei avangin an va kal daih a lo nia! A remchang kan ti tawh mai a niang chu. Mipate chu a cher zawk, sam khuih pial zet chu Kima a ni a, pakhat sa ṭha ve lam hmul phurh ṭha vak bîk lo chu Ms tiin an ko thung. An fel ve phian a, Cher zawk chu Maengi nen an inkheuh neuh neuh danah an inzû-râ ve deuh niin a lang. Julie chuan, "Cake pawh ka ûr hman tawh lo, ar hem hmin mai ila ka tia" a ti sar sar a. 

Msa chuan, "Cake ai chuan a tui fê" a lo ti hluk. A nuam ṭan dawn e. Baby chuan, "Hriatpuia chu i sawm ta lo mi?" A ti a. 

"Sawm e, a rawn kal ṭêp ang" julie chuan a ti mai a. 

"Nia, rawn kal ve teh se, nula rim tur pawh a hre leh tawp nang" ka lo ti vat a. Julie leh Baby in melh ralh chu hmuhhmaih ka tum lo chiang hle. Zanin hi spy deuh roh ka ngai dawna hriatna ka nei. Chuvang chuan Julie pawh ka biak ṭhat ve chu a ngai ngei ang. Call ka dawng ṭût pek a, Police lam aṭangin a la ni zui. Din pahin, "Ka'n be lawk aw..a pawimawh a niang" ka ti khawmawi a. Hawi zuk zuk chungin ka va be ta a. 

He Police hi Zêla a ni a, U Faka avangin kan lo inbe tawh kha a nia. 

"A inpuanna zawng zawng chu kan record fel a, mahse, buaithlak deuh chu khang a sawiho man theihna tur evidence kan nei tlat lo. Tin, an lakah reports thehluh a ni lo bawk nen. Engpawhnise, Faka kan la tawh tih an hriat chuan hnuhma min hnutchhiah ngei ang, an che phuailuai dawn ngei ngei a. I inrawlh ve ta sa sa, ṭhahnem min lo ngaihpuiin i mit lo lên ve deuh la aw. " A rawn ti dap dap a. U Faka kha chu Muansangzuali a rukbo avang khan man theihna order kha a chhuak tawh hrim hrim a, an man a ni mai. Midang hming lam tel mah se, U Faka khan engmah show theih a nei lo. Terini te'n an zuk vauna kha a ni mai a. Mahse, Police lamin man nghal vut lo va, enthlak leh tê têa mihring rukbo kawnga an sangâwizâwnpui te hriat an duh tlat. Chu chu thiltih âwm reng pawh a ni ve a. U Faka nunna thuhlaah erawh eng emaw ti kawng zawnga a kâ hup an tum tâkin tih thuhlaah venhimna erawh an uluk a ngai hle ngei ang. 

"Aw le, theihtawp ka lo chhuah dawn nia, he thil hi a bulṭhut aṭangin lepse vek ula ka duh khawp mai" ka ti sur sur a. U Faka a ṭhat thu leh thu a awih thu te a rawn sawi luam a. Kan dah ta a. Hna ka nei ta niin ka hria. He lai khuaa Pathianin min hun chhan pawh hi a lo ni maithei asin. Ka va luh leh chuan, Julie hian tu emaw a lo be mêk a, "A mak thei ê! Lo kal ve rawh. Chutiang chhuanlam a tling lo, Sangzuala pawh a rawn kal hi" a ti lâwng lâwng a. Hriatpuia a bia a nih ka ring. 

A phone a dah hnuah, "Lianpui aṭangin a ṭhiante an rawn kal a niang, a rawn kal theih loh thu a rawn sawi a nih kha" a ti nghat a. Baby ka melh vat, a ngui rawihin ka hria. A lo ngaizawng tak tak a nih awm hi a. 

"Ar chu puah tawh ila" Kima chuan a lo ti a. Julie pawh a vir nghal vat vat. Kima leh Msa ten an puah vek a, an hnehsawh dun khawp mai. Julie te in sira an vawk chaw chhumnaah ar chu kan hem ta a. Kei pawh an bulah ka ṭhu ve ran. 

Kima chuan, "Sir, i lem ve duh hlek em?" A ti sup a. Rim dang an nam khan ka hre rêng a'h. 

"Duh hran lo ve" ka ti mai a. 

Msa chuan, "Ti ve rawh, kan bilh ngat a nia, a ṭha teh mai a nia,." Nui huah huah chung hian a lo ti a. 

"Ka ti vak lo va, ka rui thiam lo lutuk kei chu" tiin ka hnar leh hrâm. Julie te pawh an rawn chhuak a, boruak chu a nawm bakah thla chu êng viau lo mah se; Julie te in piah lawka street light êng zet avang chuan kan awmna lai chu a êng nuam tawk hle. Ka bulah tak Julie chu a rawn ṭhu chat a, ka hriatsual nge ani pawh a nam ther thera ka hriat chu! A mitmeng pawh a ti deuh riai mai. Baby chuan sehchih lek lek hian, "Naktuk chu luiah kal ang u, Kim, kei chu intihthawven ka châk" a ti a. 

Kima chuan, "Bleeching tlem ka la kawl tak asin. Ms, Pangkai luiah kan zu kal mai mai dawn mi? Eng nge tih i tum?" Tiin Msa a melh a. 

"Engvak mah ka ti lo vang. Kal ila ni mai lawm, picnic pah a ni mai a" a lo ti ve mai a. 

Maengi'n, "Lalhriatpuia pawh a thei ve tawh ang chuu" a lo ti ve vat. An ṭawng tak liam liamah chuan keimah chiah rui lo hâi loin ka awm tih ka hrethiam ta. Kan nulate chu mak ka ti angreng. Zopui khawtlângah pawh nula chhuanvawr leh langsar pawl tak an ni vek hlawm a. Chutia an lem ve thei mai chu! Mahse, mi rilru zîm leh ngaihdan siam nghal thawt thawt mi ka ni bîk lo va, khawpuia nula mahni tawka kei ka ni inti chinte khawsazia ka ngaihtuah chuan, a âwm lo hran lo ve ka ti ve leh thei mai. An tan venthâwn êm êm tur a awm tawh lo va, mahni inchawm thei ṭhah an ni bawk nen. Maêngi hi an khaw puanṭhui thiamah an pan nasat ber a ni a, sum chu thawkchhuak tak a ni. Baby lah Anganwadi-ah thawkin an hlawh a ṭha ve pangngai tawh ropui si a. An in lama lal chin ṭhah tawh an ni bawk nen. An fianrial leh an zalen ve huna han awm thawven te chu an tihmakmawh ni veah ka ngaihsak thei ta viau,. Zu an lem hlek avang khan zuamâwm leh buaina siam zawngin an va awm kher lo bawk a. Tin, an rui tih pawh a hriat loh. A ṭawng nuam tawk vel a ni mai a. Ka en dan a danglam phah lem lo. Baby erawh chîk zui zel erawh ka tum ru fan thung. Ar pawh kan hem hmin ta a. In chhungah kan lut ta hlawm a. 

Msa leh Kima te chuan zu nen an sehhmeh a, kei chu coke min intir thung. Mahse, dik tak chuan an ṭawng nuamin an awmdan a nawm hmel angreng si a, coke-ah chuan tlêm ka pawlh ve ta a. Ka pum a sa hat hat mai. In vak ngai lo ta na nâ na chu ka ni ve deuh nghal chhû a. Mahse, ṭawng tur hre vak lo ang chi ka nih avangin an ṭawng ang êm êm chuan ka ṭawng ve lem lo. 

Dar 10 a ri dawn ta hial a, "Julie, i nute hi an lo haw dawn lo mi?" Ka ti hû a. A nui sak a, "An riak dawn alawm. Chuvanga birthday lawm ka nih hi" a ti a. 

A birthday tak tak pawh a ni ngût dawn mawni le. Zawh kher erawh ṭulin ka hre lo. 

Msa'n, "Tihian riak khawm ila ni mai lawm" a ti thur thur a. Maêngi'n, "Chi loh, Valtea a rawn haw a, a siṭik ve lutuk a maw" tiin a nui har har a. Valtea chu a nuṭa a nih hmel. 

Baby chuan min rawn enin, "Sangzual, kei chu ka haw ngam tawh lo a nia. Riak mai ang hmiang" a ti sap a. An zingah rau rau a lem hnem deuh nge ni, han en mai paw'n a tawlh pûr tawh a, a rui tih hrethiam lo pa chu a rilru a thianghlim viau a nih loh chuan a â ve hle tihna a ni ngei ang. 

"Riak la, nang chu, kei chu chi loh" ka tih rual rualin, Amah bawk chuan, "I haw bîk te'n, ka pa ten an hrethiam dawn asin" a ti hlar a. Ka ngawihsan ta rih. Awmzia a awm dawn chuang lo. Tihian chatthla se, a mut hnuah ka haw mai ang ka ti deuh. Riah chu ka tum îkhaw lo mai. 'palh' a awm thei tlat! Ka la fîm ve deuh lai hian fel taka ka ngaihtuah lâwk a ngai tlat. In belh pawh ka tum tawh hek lo. He ta ka awm hmaa ka ṭhianpa nau Tharteii nen zu kan in rûk ṭuma ka chetchiat teuhzia ka ngaihtuahin thlen nawntir ka duh lo. Nia, Tharteii nen a rukin an in chungah zu kan in dun a, ka pa boral hlim deuh, Siami nena langsar taka kan la inzui hma si a ni. Zu hnathawh kha a hur zawngin a rawn lang pek a! Kan inzût heuh heuh a, ṭhianpa nau mah nise, hmuh taih kha a awl riau! Ani lah îtawm taka han dawrh leh han men diar diar kha a thiam fû roh si. Mahse, ka bawhbeh hmain ka harh chhuak hrâm a. Ka ṭhianpa nau a nih vang chauha khawih lo ka niin ka inhria. Ka ṭhianpa ka zah vang a ni ber ang chu. Mahse, ka vannei phah ta ka ti mai. A hnu lawkah a rai ta roh a! Khami zan khan chesual ta ila, min puh theihna chance sanzia ka hai miah lo. Khata ṭang khan ngaihzawng pawh ni hlei lo laka ho taka tâl chu ka tum tawh lo bur mai a ni. 

Kima leh Msa chuan an in thei zet mai. Kei erawh ka mut a chhuak ṭan. Dar 11 rik hma deuhin Baby chu a chatthla ta nge nge a. Kei pawh hawn lam ka hnaih ta. Mahse, Julie ngaihdan a ni ta awzâwng lo mai. 

"I kalsan daih te'n..zingah engtin nge niang!" A ti a. 

"A ho ê, a rawn haw ve mai ang chu" ka ti mai si. 

"I mak ê..riak ve mai rawh" a ti nghat a. 

"Aih, naktukah Zoa nen hnathawh kan tum a" tiin dâwt ka sawi tawp. Min melh kal a, a hmel chu a pherh ka ti mai, a hmelchhiat phah lo naa, a rui ve chhâ tih a hriat reng. Bakah ka mut a chhuak a, ka khumah ngei muthilh bawrh bawrh ka duh. 

"Ka haw phawt ang. Tui deuhin mu r'u" tia buk khum nghutin koh hman lohin ka chhuahsan ta nal nal a. Ka polite vak lo tih chu ka hria, mahse, ka ning deuh tlat a tin ni. Rilruah savatê a awm ve rûn reng bawk si. In ka thleng a, in chungte pawh an lo thim ṭhiap tawh. Thawm erawh ka dim ve deuh, Baby ka hawnpui si lo va. Ha ka nawt sawk sawk a, ka mu hmak. Tibuaitu ka nei lo. Hetia kan ramhuai ber a reh ta thut hi awmdan ka thiam lo lek lek! Eng emaw thleng tura beiseina neih tlat hi ka la sim hleithei lo. Tibuaitu neih loh tluk erawh a awm lo thung. 

Ka mumang zet chu a! Ka zu in ve vang nge mawni..zahpuiawm deuha ka chêt pek chu! Mangpui mang ngai miah lo, a bikin mipaah hian an awm ka ring lo. An lo awm hlauh a nih pawhin sex an hmang nasa hle a ni ngei ang. Kei pawh ka hriam ka hman khât tak vang nge ni dawn ni, ka duh leh ka thlakhlelh êm êm Muansangzuali nen damlai par kan lo chen dun tehreng a nih kha! Mumanga thuchâng, Sangpuii lah chu a zahzûmna kha hmuh tur reng reng a lo awm tawh lo va, khumlaizawlah chuan a che na ve hrep mai. Ka chaw ei dawhkan bul tukverh ka lo kalh lo nge ni, thli thawin a rawn chhem ri chhawk mai a! Ka harhsan ta a. Rizai ka lo pawm nghet ngang mai. Ka uia ka uizia chu aw..thinrim ṭûnin tukverh chu ka va khar a, ka taksa dik hek lo le, tui ka'n in khawlh khawlh a. Ka va zung a, Zialte ka zu leh tê tê a, darkar chanve hnu velah ka muhil leh ta chauh. Ka harh leh meuh chuan dar 8 a lo ri vah tawh. School chawlh nî a ni tho bawk a, pawi ka ti lem lo. Ka thaw rim chu ka tih hleitheih loh avangin ka tho ta nge nge a. Zu ah pawh local hi chu a rim hi a lo chhe zual a ni. Ha ka nawt sawk sawk mai. Chaw ka chhuang a, chawhmeh siam a ngai lo bawk a. In te chu ka phiatfai a. Ṭawp vang ni lem loin mipa hi chu kan lo inthlahdah ve deuh bawk nen, hmun hi ni khat danah te ka phiat! A bal vak ngai bîk lo bawk a. Inrinniah bak chhuat ka nawt ngai lo bawk. Tuman in chhung felfai thlarh chu hmuh an inbeisei bîk lo turah ngai ang. 

Inrinni a ni si a, ina han awm nilên ngawt aia eng emaw thawh mai mai tur awm se ka ti hle. Zoa lah râwng kâpin a inhlawh leh daih bawk si. A âwl hman meuh lo chu a ni e. U Kaia ka bia a, Ani pawh an lo lam an ṭul deuh nge a feh dawn a. Ka zui ve mai mai dawn mawni ka ti rilru a, mahse, an thlawhhma kawng chhoh ulhzia an sawi kha ka hrechhuak a. Ka peih leh ta lo. Chhun chhuna nula rim thu lah awm hek lo. Ka mutbu ṭhenkhatho chu a rimtui vak tawh loh vangin va suk ka rilruk ta a ni. Chaw ka ei khamah mutbu ho chu ka'n singsa a. Tei hian mutbu rimchhia leh bâl hi a ngaithei ṭhak lo va, kartin ka bed sheet te hi a thlak ṭhin. Kei erawh heta ka awm ve aṭangin vawi khat chiah ka la thlak, Tei chuan hria se a sa leh ngawt ang. Ni e, mutbu thianghlim lo hi chu hriselna atan pawh a ṭha lo vang. Ka rizai pawh nisâah ka pho ve ta at a. Surf ka lo nei tawh lo chu niin, a va laklawh thei tak e aw. Hmanhmawh angreng takin surf lei tur chuan ka tlan thla ta a. 

Lapuii dawr aṭanga ka chhuak chu Baby leh Julie rawn inzui phei nen kan intâwk chiah. Chutihmêk laiin Muansangzuali a rawn lang ve mêk bawk. Baby chuan rum lek leka min melhin, "Nge nizanah min hawnsan daih a? Ti âwm ang lo lutuk" a ti nghat a. 

Ka nui ringawt. Sangpuii rawn hnaih lai takin, Julie chuan, "Luia kal tur chuan i insiam em? I lo ṭhulh daih ang e aw" a ti a. Ka îp deuh. 

"Insûk ka lo tum a, bâl ka lo ngah tawh riau a" tih pahin ka surf ken lai chu ka lek vâ a. 

Baby a ner sak, "Ṭhing suh, nizanah kan sawifel vek tawh. In nu awm lai na nâ na hi chuan hun awl insiam ve rawh" a ti hlak hlak a. Kher kher chuan aw! Muansangzuali awm ve vanga khatianga ṭawng kha a ni chiang lutuk. Ka zahpah duh ta lo va, "I ho e a. Tu nge kan nu? Nupui ka la nei lo" ka ti hluk a. Julie chu a zak deuh nge Baby chu a nghawk dat dat mai. 

Sangpuii chu dawr aṭangin a rawn chhuak a, thingpuifê leh amul gold a rawn khai chhuak. 

"Sangpui, vawiin eng nge i tih dawn?" Ka lo ti var a. Bike ka dinchilh bawk. 

"Engvakmah ka ti lo vang" a ti mai a. 

"Chawhnuah ka rawn lêng lawk ang,.i pa kha lo hrilh la aw" ka ti sup a. Ka mitsîrin Baby ner nawk lai ka va hmu. A pawi reng reng lo. 

."Aw le" Sangpuii chuan a ti hap a. Hmanhmawh takin a kal ta nghal a. Kei pawh Baby te lam ngaihven tawh miah loin ka tlan chho nghal daih. Khatiang Terini nun over ang kha Baby te pawn an rawn nei dawna hriatna ka nei a. Ka peih kual lo. Muansangzuali hi ka bialnu a ni tih vantlâng hriata puanzar mai ka duh tawh. Amah ka venthawn vang zelin khawlaia inhmuh nikhua pawn biak lohah te ka tlak a, ka lakah beiseina te hi a lo nei sang ru ve viau maithei a, hetianga ka pumpelh ṭhin hi amah ka venthâwn vang a ni tih a hriat loh chuan, "Sir chuan min duh tak tak lo, min fiam kual mai mai a nih hi" a ti ang tih ka hlau tlat tawh. Chuvang chuan ka duhna te hi a remchan ang zela tihlan ka tum zel tawh dâwn. 

Bâwr angreng takin tuikhur lam ka pan ta hnuk hnuk a. Tui a tam bawk a, midang awm ve hek lo. Nuamsa zetin ka insu thei ta a. Ka insûk pahin U Faka puih theih dan tur ruahmanna ka siam zut zut a. Ka ngaihdan chuan Johna hi hlîn hmasak ber tur niin ka hria. A dawtah Terini leh a pasal. Inrûkbona hi engtianga thui nge an lo kalpui tawh ang? U Faka an vauna kha thu tling ni mah se; an tawmbuk thlenga luhchilh an duh miau avangin hre miah lo anga an awm a la ngai tlat bawk si. A dik alawm, misual tak tak hi chu manin dâwp hrep pawh nise, an aia thiltithei leh an hotu te man an la nih ve loh chuan beiseina an la nei ve tlat a, an beisei ang ngeiin an chung ami ten an rawn chhanchhuak ngei zel bawk a, chuvang chuan heng inrukbona te, inrawkna te tih velah hi chuan an hmanrua te ai mahin an kuta rul kaw zentu ngei hi hlin chat a fuh ber. An hotu lû ber an hlin miau chuan an naute tan vanpui a chim a, an hmeh mih theih mai zel. Terini te nupa hian hotu an la nei leh ngei ang, an ni pahnih ringawt khan engtikawng mahin sumdawnna rapthlak tak hi an kalpui theih ka ring hlawl lo, an finna pawn a phâk ka ti lo. Ka ring sual ve thei tho bawk. He khua Zopuiah hian he thil maksak leh kikawi zeta inhnamhnawih zawng zawngte ka hriatchhuah a ngai a ni. U Faka kha chuan tu khawkha a hre lo vang. Ani kha chu hmanraw pakhat mai chauh a ni. 

"Nupui nei tawh mai rawh, insu tu tur i mamawh a nih kha" tih riah ka harh kâwk. Zoa nu, Nu Zaii a lo nia! Bal bâwm khat ṭân mai a rawn phur ve lûk mai. 

"Neih tur min han kawhhmuh ngawt mai teh" tih pahin ka lo chawithlaksak vat a. Nui var var chungin, "An tam alawm. Baby ṭhiannu Julie te pawh" awmze nei zeta min melh ralh pah chuan a ti a. Ka nui hawk ringawt. Ti nge maw a ka kaw nazawng hian Julie hi min hmehbel an tum sek mai le..

"Min duh ve nang,kei te chu" ka ti uang a. 

"Ngah nge maw nang ang tlangval, sawrkar zêm zen, hmelṭha bawk si chu a duh loh ngawt ang che. Zoa'n a neih khalh maithei che a nia aw" a ti bawrh bawrh a. Nu ṭawng duh ve tak mai hi a ni a, a khawharthlak loh viau zel. 

."Chu! Zoa chu neihsak in tum hnai em ni?" Ka ti ta vat a. 

"A sawi ve deuh a, mahse, a patea heti hi a ni leh ta si a, a pa thu thu hi a ni mai ang chu. Mo hi chu kan mamawh tawh reng mai" a ti suam suam a. Hrawn huphurhawm tak hi zawng a ni lo. A taima lutuk hi nula mawngrit tan chuan a huphurhawm deuh mahna le. 

"Nei rawh u, Thlengi chu a fel êm mai, in hah nupa si a, in lama che tur an lo awm pawh kha a hlû" ka ti ve luam a. 

" A dik chiah, ka hah ve thei lutuk e a. Diktea buaipui ngai bawk, hnathawh hawna chet leh nghal ngai ber hi a ninawm a. Mo kan nei a nih pawhin ram hna hi chu kan thawhtir dawn lo hrim hrim, in lo nghak se, Diktea lo buaipui se ka lawm tawk" a ti siam siam a. A rilru tak tak pawh a sawi ngei a rinawm. 

"U Faka chu a zia lo ngawt mai. Pa Mawia ngaihdan a ni lo viau em?" Ka ti a. An ni nupa hi chu rinhlelhna chhetêmah ka nei lo, hmuhsit thil ni lo se, zo nu zo pa an ni ve a, khatiang ang ngaihtuahna kha an put phâk ka ring lo hulhual. 

A ngawih dat hnuah, "A rilru a na hle tih chu ka hria. I la hre lo maithei a. Zoa pa te hi an fahrah ve a, Faka nen chiah hian pa hmun an nia. An û te dang hi chu an pa a hrang a. U Mawia te pa lah hi a damrei lo lulai bawk si, Faka nen hian an inla bîk lo thei lo va, U Mawia enkawl seilen ti ila ka sawi sual tam lo vang. Hmangaih pawh a hmangaih, Faka pawh hian a phak tâwk ang chuan a zah ve hle asin. Mahse, an nu nen tikhan boruak an han nei a, a rilru nâ tal buai kha zu lamah a'n ṭuan chho va, U Mawia hian khangte khan a kamkhat duh ngai lo. A khawngaih êm avang khan..Faka lah a buaina siam zawngin a khawsa ngai hek lo. Diktea ka kutah an awm chho a, khangte avang khan Faka pawh hian min zah phahin ka sawi leh tih tawh chu tihhlawhtlin lohte hi a hreh ngawih ngawih zel. An û te lah hian ngaihsak chu sawi loh, tuna an boruakah pawh vawikhat pawh U Mawia hi an rawn be eih lo. Chu chu a nia U Mawia rilru nat zual chhan pawh..Sangzual, Faka hi misual zawng a ni mawlh lo mai, hmanruaa hmangtu an awm a ni" a ti ta dap dap a. U Faka te chanchin ka hre thui leh ta sawt mai. Tin, U Faka'n Pa Mawia bula thil awmdan a sawi thuak thuak kha Pa Mawia'n an nu a la hrilh lo tih a lang. Engtin tin emaw amah hian a lo chhui ve ang a, kan ruahmanna a tlawlh ka hlau thar thut. Biak vat a ngai dawn a nih hi. 

"Ni e, misual a ni hauh lo. Eng emaw hi chu a awm a ni tiraw?" Ka lo ti ve a. A û nupui meuh pawn misual a ni lo tia a ṭan tlat danah U Faka hi ama rilru puakchhuak leh miziaah a sual lo tih chu a lang chiang ta hle. 

Nu Zaii pui roh lah chuan kan titi kal lai zawm eih lo hian, "Sangpuii hi i kherawlai deuhin ka hre tlat! I va chhanchhuah danah te khân" a ti ta pek a! Ani hi mawl hmel viau e ti lo chuan a sawi dik leh chut ṭhin. Ka nui ṭhâw a, "A ni maithei a ni. A la naupang lutuk a mawle" ka ti ve mai a. 

"Ekhai! Naupang ti reng reng suh. I pa Mawia nen hian kum 14 in kan inthlau asin. Mak i ti em? Ka tleirâwl chhuah ngaihzawng a nia, kan innei nghal ringawt a. Nulat vanglai sawi turte hi ka nei ve reng reng hleinem. Khawsak a harsa a, hna ka thawk nasa ta êm a, ka lang tar ta zawk a nih hi. Bakah inenkawl taima lo mi ka lo ni ve bawk nen..i pa Mawia erawh amah a tê chi a nia, chaw a heh bawk a, hna thawk mah se, a lang tar har chi a nia, kan inrual emaw tih mai tur kan nih leh tawh hi..chuvang chuan kum thuhlaah chuan buai suh" a ti zung zung a. Min hnêm phian mai. Julie min sawipui a, tunah Sangpuiiah a pakai leh a. Nu ho tak hi chu aw…

Ka insûk ka zar laiin Baby a rawn kal a, "I mak ve thlâwt..Julie rilru pawh a na a nia" a rawn ti teh ngawt a! 

"A engvang chuan nge a lo nat ve ngawt?" Ka ti si. 

"I ngaihsak lo ê, ka tan pawh a nuam lo, ka lo sawi ve vek tawh a. Hrethiam lo rual pawh i ni tawh lo" a ti leh nghat a. 

"Aâ..Baby, min hrethiam teh u. Ngaihzawng lam hi ka buaipui peih rih meuh lo a ni e. Julie pawh a fel, a chhe lo..kei aia ṭha a hmu êm êm ang. " Ka ti ta duah a. Sangpuii ka sawi rîk loh chhan chu Baby te hi ka chhui lai an ni si a, Sangpuii lakah thil ṭha lo a thlen loh nan a ni. 

"Hmm..i ho êm mai a. Nangmah vangin chawlh te a la ve em êm a" a tih chuan, "Ti nge chawlh te a lak ngawt?la rawh pawh ka ti lo va. Bakah ka duh thu vawikhat pawh ka la sawi lo. Ti nge chutia min beisei san viau" ka ti a. Dik tak chuan ka hne lek lek tawh. Ka luck viau emaw tih mai awl tak si hian ka luck dan hi a ngaihṭhatthlak vak loh. Julie pawh hi an team zing ami a ni lo vang tih a sawi theih loh..mahse, thawk ho, ṭangrual ni ta se eng nge an duh ber ni ang? Engmah rohlu ka nei lo va, zirtirtu ka ni satliah ve tawp si. 

Ka inpho zo a, ka chhuksan daih. Mood a tichhe mai dawn alawm le. Ka hman bawk a, in ka tifai leh vek a. Hmuh a nuam ta sawt e. Nidang ang lo takin dar 3 rik dawnah ka inbual a, ka inziat fai vek bawk. Ka lang thar ta vûk mai. Ka khabe hmul pawh ka cut ve hlek kha. Savatê te inah ka lêng dawn miau a. Mahse, zanah law law kal mai teh ang ka ti, eirawngbawl a ngaih bakah zan kha a remchâng zawk daih. Lenna tur dang ka nei azeng pawh a ni lo va. Phur takin rawng ka bâwl suah suah a. 

Tei alu bai dan style ngeiin ka bai a, ka ei châk ve deuh bawk a. Alu hi tui taka bai tur chuan alu kan bai duh zat kha a pumin chhum phawt ila, a hmin hnuah dip lutuk si loin râwt hlek ila, chutah chuan purunsen leh var duh ang tawk, ajinomoto tlem, chi, hmarcharêp a laia tan hmawk hmawk kan ngam tawk, sawhthing tam vak lo, bahkhawr tlem leh purun hnah duh ang tawk hi thlak nghal vek ila..a so bawrh bawrh hnuah dawra an zawrh, kaikuang ûm ka ti mai a, orange rawng ₹5 man lek hi bawm khat a tawk viau, chu chu a tiuih ve hlektu atan thlak ila.., tel tlem ka leih ṭhin bawk , a so leh hnua suan kha a ni tawh mai. Tui inti lo a nih chuan Alu in ngaina lo emaw uih in ei ngai lo tihna a ni mai. Lo ti ve chhin teh u. Chutiang chuan ka bai a,, anṭam tlak a la awm bawk a, bean ka fry bawk nen, sa hi ka mamawh bîk lo reng reng. Zanriah pawh puar êl euha ka ei tak kha..

Dar 7 a pel ta maw tihah Muansangzuali te in lam chu ka pan ta a. Ka zâm tawh miah lo. An ei tlai deuh nge mawni, Sangpuii'n thleng a lo la sil a. 

"Lo ṭhu rawh. Mateii khan chawhnuah a lo kal dawn kha a ti sia" pu Thara'n a lo ti var a. 

."Nia mawle, ka insu rei reuh lutuk a, ka rawn hman ta ngang lo a nih kha..min lo nghak em ni!" Inthiam lo ru deuh tak chuan ka ti a. 

"Nghak hran lo ve, vawk in ka thawm ṭha e ka tia, ka awm reng zawk. Kimbawih, thingpui hâng kha sir hi lo thlit ve rawh " tiin Diki fanu chu a va en a. A rawn thli ve mai. Diki erawh ka hmu lo. 

"Khaw nge in nu!" Ka ti thuphung a. 

."Kuhva a lam lawk a nih âwm kha.. " a lo ti a. Tleipuia a rawn tlan lut a, min hmuh rual chuan, "Sir, lehkhabu kha ka chhiar zo vek tawh asin" a ti hlut a. 

"I va chhiar rang ve, a dang kan hawh leh ṭeuh dawn nia..mondayah aw" ka lo ti vat a. 

Pu Thara'n, "Lehkhabu chhiar te hi a ngaina reuh zêk a! Writer ka la ni dawn e a tia, kha.." a lo ti ve luam a. A ṭha hle mai. Writer nih hi kei ka châk ṭhin a, ṭawngkam ka thiam hlawl si lo va, tihngaihna a awm ve lo. Sangpuii thleng sil zo pawh a rawn ṭhu ve a. A hmel chu a ni sârh maiin ka hria , a fiah kâk a, a sam chu a la huh hlap a, make up engmah a inbel lo tih hriat takin a fresh ngawih ngawih. Tshirt sakhi rawng a ha a, a vun a va kap êng tak, kekawr dum arh hlei hluai a ha bawk a. A va famkim tak e aw. Uniform a hak loh hi chuan nula te pawh a ang ve reuh,. Mahse, a hmelhmaiah a la upa lo tih erawh a hriat tho a. Tunlai ṭhangtharte hi zawng an ṭhang duh êm a ni. 

Thutak deuh zawkin, "U Faka an man thu kha chu in lo hre tawh ang a tiraw?" Ka ti sup a. 

Pu Thara pawh chuan, "Hria e, mahse, engmah a chinchhuakin kan hre lem lo va" zawhna mitmenga min melh chung hian a ti a. 

Kei chuan an hriat tura ka duh chin ka hrilh thuak thuak a, Johna leh Baby te, Hriati tih vel engmah ka la sawi ri duh lo. Diki ngei pawh ka black list-ah a chuang si a.."Tirtu nei angin a insawi a, thudik a ni ang e maw..Police lamin an chingfel ang chu"ka tih mêk laiin Diki a rawn lut a. Ka thusawi a rawn hre hman ni tur a ni. 

"Fakawma chungchang em ni in sawi? Tirtu nei ang ten a insawi vel a maw? A zaktheilo êm mai a. A hurherh leh tenawm vang mai mai a nih chu, an nu hluiin a hawi tawh si lo mangang tâl vel tih hriat reng reng" a ti nghal hlawih hlawih a. He nu hi a fing viau emaw tih dawn paw'n a â leh roh tlat zel! Ka tana rinhlelhawm turin a khawsa leh miah miah mai chu a nia! Pêng pûng a. 

Pu Thara'n, "Buan buan ṭhin a che. Engmah kan hriat loh hi, tihah te chuan Faka te chu misual a ni hleinem, ama rilru puakchhuaka ti a ni lo tak tak ve thei tlat" a lo ti ve hmak a. 

Diki lah chuan, "Hmm..ka awih thertê lo. Sangteii a khawih châk vang a nih kha..Sangteii pawh hi kan entir lo va, min khawih lo a ti ngawt tak naa a vau a nihte ka ring rum rum, kha chen rukbo chuan a khawih âwm êm mai" a ti leh ta bawrh bawrh a. 

Ka insûm zo lo ṭêp, Muansangzuali a rawn ṭawng ve ta khauh a, "Min khawih lo tih ka chiang e. Vawiin thlengin ka la virgin chiangbal, Pathianin engkim a hria" lungawi hmel vak loh hian a ti a. Ka thawl hawk. Chutihlai tak chuan mipa naupang pakhat hi a rawn lut a, "Apu Thar, Apa ten lo kal lawk teh u an ti" tiin a chhuak leh vut. Pu Thara chuan, "Kan Muansanga chu aw..engmah pawh zawh hman loha a chhuah leh tak nulh le..Sir, lo lêng rawh, kan va kal lawk ang e, kan rei lo vang" a ti mawlh mawlh a. Diki mitmeiin an chhuak chu a ni ta mai. An chhuah aṭanga reivak loah Kimi chuan phone a hmang a, a chhuak ve daih bawk. Tleipuia lah kha ka hmu leh tawh hauh lo. An ni unau hi zan lamah hian an chhuak tam deuh em aw..lehkha hi an zir ngai meuh lo em mawni.

Chance kan nei leh ta. "Lo ṭhu teh" ka ti nghut a. 

"Ngatan" a lo ti daih. A va zei lo e aw. Keimah zawk chu ka va insawn thurh a. A hmel a thutak leh ran tawh.

"Ka duh che ê" ka'n ti ngawt a. 

" I ninawm aw" a lo ti leh hmak. 

"Min ning tak tak maw..nih ka haw dawn" ka tih ruala min rawn melhna mitmeng mawizia leh takzia kha..

"Kha..min ning tak tak lo" ka ti a, ka nui bawk. A nui ve ta nge nge a. Mahse, tum leh hmakin, "U Julie te inah nizanah pawh i lêng" a ti leh ta. Engtin nge a lo hriat ṭhin le..

"Engtin nge i hriat?" Ka tih chuan, "Tukin zinga in thusawi kha ka hre vek alawm" a ti mai a. 

"A birthday kan lawm a. Julie hi ka ngaizawng lo aw. Sawi tawh suh" ka ti nghal duah. 

"I ngaizawng pawh ka ti lo. " A ti lawi si. 

"Inthup reng hi ka peih tawh lo. Ka bialnu i nih thu ka sawi zel tawh dawn" ka tih chuan rum zeta min melhin, "Ka la naupan êm hi" a ti nghek. Ka nuih a za bawk si,. "Sir Peka bulhnaiah awm tawh suh aw.." ka ti leh hrâk a. 

"Ani kha ka duh bawk lo e a" a ti sak. Kimi ṭawng thawm ka hre tawh lo, kawgka ka va melh zauh a, a inkhar phui tih ka hriat chuan, ka kuah thawk a, a inrin hmain ka fâwp ta chawt a. A zei hlawl lo, a dawh mawl tawp. Ka hmui ka phawi chuan, "I zei lo si" ka ti hluk a. 

"Ka lo inzir ang" a ti vei hmak, "Hey..lerh miah suh" ka'n ti ngawt a. A nui sak a, chiang taka min en ngam ve takah chuan, "Duhawmnu" ka ti rilru mawlh mawlh mai..eng emaw sawi a tum lai takin ke pen thawm kan hria a, min nam thoin a hmaa ka ṭhutnaah ka ṭhu leh vat. Diki te nupa an rawn lut a, "Khaw nge Nunkimi kha..min tizak lutuk" a ti nghal hmarh hmarh. A ngaihna hre mang lo zeta kan lo en hû lai chuan, Pu Thara'n, "Mi nupa a inṭhentir ringawt alawm..phone nghal rawh. A châk lo khawp ang" tiin Diki a melh hrâwk..