Ka savate (12)

KA SAVATÊ (12)

Ziaktu : Toni Râlte

Hriatisangi thihcham a lo ni ve bawk nen, kei pawh thawhpuiten min hrethiam tho a, School ka chawl dawn a ni. Khawpuiah chuan sawi leh sawi hnu thihcham te pawh hi a hming maia hman a ni deuh tawh, ṭhenawm hnai tak tak leh chhung leh khat bakin an ṭâwiâwm tawh meuh lo a ni. Mahse, dem chi an ni lo, mitinte hi kan buai tawh a, eizawnnaah nen engkimah hun thawl neih chu a harsa tawh êm êm a ni. Thingtlâng erawh buai ve tho mah se; la inlâwm tawnna nun kha an la nunpui ve a, a zawng zawng tel thei lo mah se; Vawiin pawh Pa Zawma te in khat tlatin an rawn lêng leh hlawm a, khawhar chhungte tan pawh a thlamuanthlak ve viauin a rinawm. Zoa te nen nula thingpui lum kan pui a, Hriatpuia erawh a nau fapain an inkhelhnaah a bân a lo ti na pek a, Lianpuiah an va kalpui a niawm e. Nizana thil min hrilh kha ka rilruah a châm reng mai. Hriatbelh a châkawm. U Faka te chanchinthar kan la hre rih lo va, an man vat turah erawh ka ngai. Ṭhenkhat ngaihtuah tawi deuhte chuan, "A mi bo-a ber an hmu tawh a, him dam takin, a rubotute chu ngaihdam ve mai tawh tur alawm" an han ti ngawt a! Mizote mutân pakhat nia ka hriat chu, sual ngaihdam kan awlsam lutuk hi a ni. Pathian pawhin misual a ngaidam ngawt ngai lo, misual sim a ni a ngaihdam ṭhin ni. Zoram khawvelah eng emaw issue lian tham, heng tualthahna emaw, pawngsual emaw te thleng se, a tuartu ni ve lem lo, kristian ṭha êm êm, Pathian thu âwih fâl uchuak tak ten an lo ngaidam thuai thuai a, "Sualna nei lo chuan denghlum rawh u" te an han ti vel a'h! Nunna meuh chu a hlu a, kan siam leh kan din ni miah lo nunna chhattu nih hi thil rapthlak tak a ni. Hetianga thil tisual, tual hial that te, pawngsual ching te, ruihhlo zuar te kan ngaidam thuai thuai zel leh ngaidam ve thei lo te chu Pathian ring lo hial anga sawi chinga demrawn kan chingte hian sualna a tipung ka ti lo thei lo. Fiamthu pakhat, 'Ṭhenawmpa nupui uire te chu ngaihdam a awlsam alawm" tih ang deuhin mahni chunga a tlak ve zet loh hi chuan mi rilru leh thutlukna hi i dem chiam chiam lo teh ang u, kan chungah tla ve ta se: an ni ai ai khan kan nasa maithei a ni. Pathian rinah pawh hian chintawk a awm ngai e, kan bula awmte tana kan nun bengchheng khawpa Pathian rin te hi thil awm thei a nia, thlaraubô hnuhhnaih chu sawi loh kan hnawt darh zawk fô ta ve ang. Engkimah a over chin tawh hi chu tenawm rawng a kai tawh ṭhin. U Faka te pawh ṭhenkhat chuan lo ngaidam ngawt mah se; tunah man ta lovin zalên leh ta se, nakin lawkah kan tu leh fate hi an rubo leh lovang tih tu nge sawi thei? Khawtlang ṭanrual hunlai tak a ni zawk e. 

Vawiin chu lêngkhawm hla an sa a, an zai tui ta phian mai. Hlimsâng pahnih khat an lo awm ve bawk nen, ka rin aiin an zai rei a, Zira'n, "Sa ngen zai a nih saw" tih pahin a nui ruh ruh a. Kan nui dar dar mai. Chaw pawh kan chhum belh ta nge nge a. 

Zoa'n, "Ka nu a hlim rui ve lo hi kei ka lawm.. kan khua hi kan vanduai nge mawni, kan hlimsâng neih ve te hi a tawpah an che nawi leh khut zel a, ka ring thei tawh thlâwt lo" a ti nang nang a. Ngaihtuah a tithui duh fû..an sawi hmangin a tira hlimsâng, Kohhran bêla hlim êm êm te pawh a lo rei chuan Kohhran huang chhunga leng lo va inngaiin Kohhran an hlat tial tial a, chhungkuaah lah pa ber aia thuneih tum an ni fur bawk si. Chhungkaw kehdarh ta pawh an awm hial a niawm e. Hetiang zawnga thawk tlat hi keini thlarau lama chang sang ve lem lo tan chuan pawh a har bakah thlarau thianghlim hnathawh a ni lo vang tih mai a awl rum rum zel. Khaw thim thet thetah chaw kan ei thei ta chauh. In lama haw hleithei lo khawpa ṭul nasa te kha chu chaw ei dawn meuh chuan an harh leh kâk tawh thung. Zira fiamthu ka hrechhuak ram ram mai. Mahse, eng lo sawi vena chi a ni hran lo va, chaw puar takin ka ei a, eikhamah kan senghawi leh vek a. Ka inah kan chhuk ta rih a. 

Muansangzuali rim ka châk hle, mahse, zirlai naupang a nih piahlamah zu inlan ve sek kha ka zak thar deuh tlat a, an hre miah lo nain mi mitmei ka veng ṭan ringawt. Julie te ina han len lah ka peih meuh tawh si lo. Dik tak chuan tunlai khawvelah chuan Thingtlângah pawh nula han rim tluk tluk ang kha a awm tawh meuh lo va, ṭhianṭha emaw ngaihzawng emaw an nih ngawt loh chuan kan inrim vak tawh lo bawk nen, inrim hming put ve si chuan sawi tur te hi ngaihtuah lawkte a lo ngai a, kan nula rim chhungte venthâwn lo ngai lehzel nen, ka tih mi a ni vak lo. Ka nu te nen kan inbia a, Tei'n, "U, U Samua chu ka chhang ve tawp..ka ning tawh lutuk a" a rawn ti a. Ka nui chhuak hawk. Hmeichhia leh uitê a chulnêl peih peih tih hi chu a lo dik takzet a nih dawn hi. 

"I ning tak tak lo vang" ka tih chuan, "Ka ning aw. Ka hau hrep zel..mahse, maw min dawhthei tawp..a chhungten pawn an hre vek tawh" a rawn ti har har a. A mood chu a fuh hmel kher mai. Ka lawmpui e. Ka nau chuan nula tlangval inlaichinna kawng a rawn zawh ve ṭan dawn ta chu a nia, ka nuin a hriat tur ṭul chu a la hrilh turah ka ngai e. Ka nu hi nu mawl ni hek lo le. Kei a û hi nulat tlangvalna kawngah ka fihlim tawh teuh si lo va, ka farnu tal chu thianghlim takin a nun hmang se ka ti khawp mai. Samua chu ka makpa tur anga ka han mitthla pawn ka iai hran miah lo. Ruihhlo a ti lo va, kohhranah erawh kei ang bawkin a inhmang lutuk bîk lo. An khawsak a ṭhat bakah an chhungkua mi rilru tluang tak an ni bawk a, ngaihṭhain ka awm thei ang chu. 

Heleni msg a rawn lut zuk a, ka open vat. "Sir, Sangpuii hi maw..Sir Peka'n a star ve ania aw" tih thu a ni. Ka phâwk hrû ringawt. Sir Peka chu Higher Schoola an Political science lecturer a ni. Kei aiin a naupang a, Zopui khaw tuiliak a ni bawk. Aidu vêng lamah an awm a, an in leh lo ka la hmu lo. 

"Engtin nge i hriat? " Ka va ti vat a. Ka lung pawh a rawn phu leh ta dup dup mai. Ka savatê hi midangin an lo melh ve hlek pawh ka remti lo asin. 

"High School a kal lai aṭang khan a star tawh alawm. Class x kan pass tirh khan a bem a" a rawn ti ve zel a. Mak ka ti hle, Sir Peka chu harhvâng ve tak, ṭawng duh ve tak mai a ni a. A thawhpuite zinga ka nêl hmasak ber pawl a ni nghe nghe. 

"Chuan, Sangpuii'n a duh lo mi?"ka ti a. 

"Aw..a duh lo a niang, a bem lai phei kha chuan a hlau thei lutuk" a ti a. Tlêmin ka thawl deuh. 

"Tunah a rawn bem leh ṭan mi?" Ka ti leh a. 

"Class velah hian a tilang thei tawp a, midang chuan an hrethiam lovang, mahse, kei leh Sangpuii te chuan kan hrethiam vek a. Vawiinah pawh kan insûknaah a rawn kal ve a. Chuvang a nia ka rawn sawi..Sir, Sangpuii hi i duh ami?" A rawn ti duah a. Ka duh tih a hrechiang ngam lo chu mak ka ti lutuk lo. 

"Aw ka duh alawm. Mahse, class xii ka pass hunah a ti tlat a" naupangchhia zetin ka ti a. Smiley a rawn dah tuar a, a hnuaiah, "A sawi ve reng danah che hian a duh ve chein ka hria. Ngaihzawng a nei ngai lo va, a thiam lo alawm" a rawn ti a. 

"Phone a nei bawk si lo va, engtia han tih chi nge mawni le ka ti. Lo sawipui ve chhin la, min rawn hrilh leh la" ka va ti a. Kei aia an naupan fê vangin kei atak pawh chu ka young ta riauin ka inhria a, ka rilru pawh a harhvâng sawt mai. 

"Nia, mahse, a zak thei lutuk a, a sawipui vak theih ngai loh" a rawn ti a. Ka nui ringawt. Tun aṭang chuan mi pahnih kan inel tawh dawn chu a nia! Sir Peka chu ka haw hran lo, huat ngawtna chhan tur ka nei lo bawk a. Mahse, ka savatê a lo zarbuai ve a nih erawh chuan engtiang chiahin nge ka hauh nat ang ka hre hauh lo thung. Eng emaw ti tiin dar 11 ka meng thleng ta reng mai. Zanin hi engtizia chu ni maw? Ka mut a chhuak thei reng reng lo mai a! Mawlhtu ka neih awm pawh ka hre lo. A chhuak lo ve tawp a ni ber. Ka va zung sur sur a, boruak pawh a nuam viau e. Ka mu leh tur rizai ka pawhchhoh mêk lai chuan zawitêa kawngka kik thawm ka hre ta a, ka bengchhe riah ngaiin ka'n ngaichâng leh deuh a. A rawn kik leh takah chuan ka tho vat a. Tun ang hunah chuan tumah ka beisei lo asin le. Kawngka ka hawn chuan tumah ka va hmu lo! "Huai lam bawk em mawni chu le" ti rilru chunga khar leh mai ka tum lai tak chuan, "Sangzual" a rawn ti zawi sup a. Ka aw hriat ṭhan tak a ni. Rang takin ka hawi let a, Ka hmaah chuan a rawn ding thim ta hmuk a. 

"U Fak, eng nge i rawn tih dawn? An zawng…." Ka tih rualin, "Lut phawt ang, khawngaihin" a rawn ti hniam raih a. Min tihnat tum âwm hmel a put loh avang leh kut ruak maia awm nia ka hriat avangin kawngka chu ka hawng zau deuh a, a rawn lut ta a. Kawngka pawh ka kalh leh nghal hmak. Ṭhutthlengseiah chuan chauh hmel fê hian a ṭhu hnawk a. A melh ngai a melh vung vung bawk. Ka lo ngaichâng tawp mai a ni. Ka duh chuan khawtlang hruaitute ka call nghal thei, ka inah ngei an mi zawn mêk a awm tih Police pawh ka hrilh thei, mahse, U Faka hmelah chuan min kam rûntu a awm tlat! Amah a ang lo ka ti dawn nge, a mitmeng te chu a dava riai a, a ngui takzet tih a lang reng mai. Chuvang chuan a thusawi ngaithla turin min duh niin ka hria a, A chhungte pawh awm renga kei an kut ata Sangpuii chhanchhuaktu zawk min rawn pan chawt hian chhan a nei ngei ang. Chu chu ka hriat ngei pawh a ngai a ni. 

A tho vut a, tui a in khawlh khawlh. Ka lo la ngawi ngat ngat thung. A ṭhut fel leh hnuah muangchanga min rawn melhin, "A mak tiraw?" Tiin a nui lui hak a. Hrethiam lo fêin ka lo melh nghek ringawt. 

"Min hua em?" A ti leh a. 

"Haw lo, mahse, a chhan ka hre châk a ni" ka ti ta a. 

"Chuvang alawm ka rawn pan che. Kawng kual lamah ka rawn kal si a, ka chau ve hle a ni" a ti a. A aw a khur lo va, a chezia hrim hrim chu a rawn luh tirh ai khan a danglam leh vek tawh. A harhvâng leh riau tawh ti mai ang. 

"Chuan, min hrilh tur eng emaw chu i nei a tiraw?" Ka lo ti khauh a.

Buk nghut pahin, "Aw. Engkim kha a chhan hria la ka duh a ni. Ka damrei tawh dawn chuang lo bawk a" a tih chuan ngaihṭha lo fêa melhin, "Eng nge a awmzia?" Ka ti hluai a. A kutin ṭawng ring lo turin min rawn khap vat. Kei pawh ka inthunun leh vat a. 

Thawk la hawkin, "Hetiang mi nih hi ka duh ngai reng reng lo asin, mahse, khawiah pawh min dang chêp vek tawh si a ni. Mihring chauh chu nise ka hneh thei ang a, Huai leh hrâng an tel ve zel avang hian ka mihring chakna hmang hi chuan ka do hneh ngang lo a ni. Sangzual, khawtlang pawh hian min hua ang tiraw? Ka phutâwk chiah a nih hi.." A ti leh mawlh mawlh a. A hmaa U Faka ka lo hriat ṭhin nen chuan danglam tawh tak an ni e. Chutiang taka a ngui hmel ka hmuh chuan ka khawngaih ta êm êm a. Sawi ve mai tur lah ka vân bawk si. 

"U Fak, tuman an haw lo che, mak an ti hle tih erawh zep thu a cheng lo va, thil awmzia chiang taka min hrilh theih chuan inpuih dante pawh a awm maithei asin" tiin hnem ka han tum ve a. A chek hluk a, beidawn hmel zet hian, "Awmzia a awm tawh chuang lo vang. Ka hun tawp a hnai tawh alawm" a ti chuai raih a. 

"Chutiang sawi suh. I dam rêng dawn" ka lo ti nghut a. 

Ṭhutthleng nghenchhan nghen dawt pahin, "Lo ngaithla rawh aw. Sangzual, Ka dâwihzep vanga ka tawrhna leh mi â ang maia ka khawsak dan hi ka kal hma ngeia tu emaw talin an hriat ka duh a ni" a ti leh sûp sup a.

"Ka ngaithla e" tiin ka ṭhutdan ka siamrem vat a. Ka inpeih tih a hriat hnuah hawi kual leh ruk rukin a ngaih a ngam ta a ni ngei ang. A aw a thian kharh a. Hetiang hian U Faka chuan kan hun tawn mak tak chanchin chu a sawi ta a.

"Ka sawi ṭanna tur ber chu Hlimi kha a ni ang chu. Ni e, Hriati leh Johna te chanchin hi chu ka lo hre ve tawh a. Khamizan Hlimi thih zana Hriati nena kan chhukthla dun, Johna'n a lo nghak pawh kha mak ka ti hran lo. Inngaizawng an nia, hmun fianriala inhmuhte pawh an thlahlel ve angah ka ngai. Kei pawh Rajua te inah zu in turin ka pensan a. Kan vanduai asiamin Rajua hlawhfa chhawrte an lo la haw tlat lo. An ni hi Zopui khuaa zu zuar zingah an zu zawrh hi a ṭha a, yeast an pawlh ve mang lo. A man pawh a to rêng bawk a, mahse, zu chhe tak tlawm taka lei ai chuan, taksa tichhe nghal mai lo tur zu pangngai a to zawka lei kha duh kan tam zawk zel. Bakah keini chu zanah kan han in a, a tukah thlan tlain hna kan thawk lehzel a, kan taksa a chhe ve tak tak thei lo ti mai ang. Tichuan, Rajua hlawhfate chu kan be ta a. An lo rui lutuk mai a lo nia, ṭawng pawh an ṭawng ṭha thei lo. An zu thlawrna lai hi Rajua nupui chhungte ram chhung, mahse, fianrial deuh tak a ni a. Khua a ṭangin a hla miah bawk si lo. Chuvang chuan Rajua chuan kei leh Sawmthanga chu "Va hruai mai r'u, in duhtawkin in in dawn nia" a ti a. Kan phur khawp mai. Kan chhuak ta a. Mahse, Pu Zanghinga a zual an tih avangin Sawmthanga kha a makpa a ni si, "Ka lo kal ve lo mai ang, a nuam lo êm mai" a ti a. Keimah chuan ka kal ta a. Ka zu thlen thlak chuan an lo chatthla phung tawh a. Hawnpui rual an nih tawh loh avangin 10 lts bur chu khaiin ka hawnsan ta daih a. YMA lam hi an duty ve leh chut ṭhin avangin thlanmual lam aṭanga hêla khaw hrûla kal ka tum ta a. Thlanmual chu ka thleng chho a, thinrima inhnial thawm ka hre ta a ni. Hriati leh Johna bakah Lalhlimi te kha an ni a, Hlimi chu a ṭap pur mai a, an thubuai tak chu ka hre lo. Kal ta mai bik lo chuan ka enthla ta a. Eng nge ka hriat pawh ka hre bik lo. Hlimi hawn tum chu a hnunglam aṭangin Johna chuan hruiin a hrawkah a vêt ta ngat ngat a, Hlimi mangang tal vel chu ka lo thlir reng ringawt, khatihlai khan engin nge min mawlh ka hre lo. Ti nge khati taka nula mangang leh thlabâr kha ka lo chhanhim loh tia vawiin thlenga ka inzawh paw'n a chhanna ka hre chuang lo. Ka hlau pawh a ni si lo va. Tichuan, Hlimi chu a thi ta a. Inawkhlum anga lantirin an khai ta a. Thlanmual an chhuahsan hnuah pawh reifê ka la tâp, mahse, Rajua'n min lo call avangin ka kalsan ta a. Hlimi a thi tih hre chung si khan ka rilru mang vang zawk nge engmah thleng tak tak lo turah ka ngai tlat zu nia! Kalkawngah zu chu ka in phei ta bawk a, Zu chuan ka thluak a'n fan chho a, Hlimi lam reng reng ka ngaihtuah chang ta lo. Ka thawveng halh mai a ni. Khami zan khan Rajua inah ka chatthla ve nghe nghe. A tukah Hlimi a thi tih harhfima ka'n hriat takah chuan ka mangang leh ta si! Tualthat tluk hialin ka inngai a, tumah ka hmu ngam lo a ni ber e. A tawi zawngin Hlimi thla chuan min tibuai zui ta a. Zantin mai hian mumang rapthlak tak tak ka mang a, ka beng bulah, "Tualthattu i nih hi.." ti ten an rawn phun ṭhin. Zu ka in nasat phah a, mu leh mal ka nei ta vak lo. 

Chakai ka khawrh ni pawh khan ka sawi ang khan min tibuai char char a, chhun pachan lai a nih avangin ka intipachang thei mai mai zawk a ni. Mahse, ka chhungril hi hlauhna leh mahni inthiam lohnain a khat tawh a. Nun hlimna reng reng ka nei thei tawh lo a ni ber. Awmngaihna rêng ka hriat tak loh avangin Hriati kha engkim ka hria tih ka hrilh ta hmiah a. Johna a lo hrilh ve nghal bawk. Thudik puanga Police hnena inpe tura ka tih chuan za êm êmin min nuih dun a, ka hrilhhai kher mai. 

Johna chuan, "Zu i in nasa tawh lutuk a, i thluak a buai vek tawh a nih kha. Tunah hian kan kâ kan âng a nih chuan Hlimi thattu i ni tih hi mi zawng zawngin an hria ang. I kut ngeia i rekhlum lai kan hmu alawm..i rui êm a, i hre tawh lo a nih kha..Hlimi te nen inhmu tura kan intiam avangin kan rawn kal a, mahse, Hlimi chu nang hian i lo rekhlum mêk a ni. Kan rawn pawh ngam lo che a, Hlimi nunna nei tawh lo te kha i pawngsual duh a nia..keini te min puh hlauh zawk a" a ti ta daih mai a! Sangzual, zu chu ka in ka zêp lo, ka hriatna zawng zawng hloh tur khawp chuan ka la luhchilh tawk lo. Engkim kha ka hria..thinrim êm êmin Johna te bulah chuan Hlimi chhungte ka hrilh vek tur thu leh Police pawh ka biak nghal tur thu ka sawi ta a. Ka kalsan ta a ni. Mahse, kan in pana ka kal chu thlâ bawkin min tibuai leh ta a. Ka hmaah ngei Hlimi ngei mai kha sam thlah hnûang hian a lo ding a, rum êm êmin min melh bawk. Zu ka lo lem sek tawh avangin hlau lo ang deuhin ka awm lui a! Mahse, ka chhungril a khur a ni. Kan in piah rûamah khan min namthla ta a. Ka vanneih asiamin hnim pik zingah ka tla hlauh a, hliam ka nei lo. Mahse, Keia zu in kha a lo ṭha vak lo nge ni, thawh ka tum chu ka petek zel mai a. Hlimi lah khan min rawn dinchilh zel bawk si. Pa ve tâwk tak inti ka ni ṭhin, mahse, ka hlau a ni. Ka hlau takzet. Au chhuah ka tum lai takin ka tukhum a ri dawp a, a thim ta vek a. Ka harh leh chuan leilung a rawn lang ṭan tawh a. Thei leh thei lo va thoin kan in lamah ka bawkvâk phei ta a. In chhungah pawh lut ngam lovin in hnuaiah thingzai chungah ka mu ta tawp mai a ni. Ka nun khan awmzia a nei lo telh telh a, kan khua chhuahsana Ngûr khuaa ka va inhlawh lahin ka inhlawhna hmunah pawh tihbuai ka ni zui ta zel a. Johna te laka ka thinrimna kha a la tawp mai bîk lo, dâwt muhlum lutuka min puh avang khan ka tihtheih lantir chu ka la tum ve reng. Mahse, ka han ngaihtuah ṭhin a, evidence ka nei miah lo. Ka hmu ti ngawt ta ila, Hlimi an thah lai hmu reng sia ka va chhan lo kha min chhalna tur hmanrua niin ka hria a, dan leh hrai lam hi ka hriat loh lam tak a ni bawk nen. Chutakârah pahnih an ni a, kei pakhat chauh. Ka hneh zo ang em? An ṭang dun dawn si a..ti ten ka ngaihtuah ve nasa. Chutia ka buai ve êm êm lai chuan Hriati damdawi in awm thu ka hre ta a. Ka rilru tê têin, "A phutawk a hmu a nih chu" ka ti hmiah. Khawngaihna pawh ka nei hek lo. Mahse, Aizawl aṭanga a rawn hawn hnu, a thih zan khan tlaiah min rawn bia a. "Zaninah ka chhungte mut reh tawhah inhmu lawk ang hmiang, a pawimawh lutuk a" a rawn ti a. Kei pawn Hlimi kaihhnawih a nih ringin ka lo hreh bik lo. Khatihlai khan kan khua kha a râlmuang lo êm êm a, in sâwi tih te, thaw ri tihte kha a lar êm êm a nih kha. Kei tak pawn khatiang boruak kha ka ning tawh a, reh tawh se ka duh takzet a ni. Tichuan, Hriati chu tuikhurah khan ka lo nghak ta a. Mahse, dar 1 thleng ka nghah hnu paw'n rawn lan tik a nei si lo va, beidawngin ka haw ta ringawt a ni. Ka call lahin a ring quit ṭhak ṭhak bawk si a, Taka! Sangzual, Hriati phone kha an hmu zo lo tak tak em ni?" A ti thut a. Ka lo phu uih. 

"Aw, kan zawng nasa a, mahse, kan hmu zo ta ngang lo kha chu a nia" ka ti a. A sawi zawm leh ta a. 

Tikhan kan inah haw lovin Rajua in lam bawk ka pan a, ka û nen kan inkhik khak tak zauh zauh avangin inah khan ka zum ta deuh a ni. Zing tawka Ngûr khuaa phei ka tum nghe nghe. Mahse, Hriati thih thu ka hre ta si a, Rajua lahin an nu tlân lai lo ni bawk nen, min lo chelh ve bawk si a, nilêngin zu kan in a. Ka hmel hmuh tur pawh a awm lo rêng a nih kha. A tawi zawngin ka'n sawi tawh mai ang e. Ngûr khuaah ka phei a, buaina dang ka tâwk leh ta a ni. Terini leh a pasal te khan min rawn be pawp hlawl mai a! A hma zawnga inbe ngai mang si lo. Mahse, ka beisei loh deuhin Terini chuan, "Hriati khan a intihhlum hma khan in inhmuh thu leh a thi ta a nih chuan mawhphurtu i nih tur thu a rawn sawi a. A msg pawh i duh chuan ka rawn thawn ang che. Tunah hian Hlimi thihna avang leh a thlâin a tihbuai che avangin buaina i tâwk mêk tih kan lo hria a, he buaina lak aṭanga i him theih nan leh Hriati thihnaa i hming a lan loh nan puih che kan duh a ni. Mahse, thil pakhat min tihsak ve thung ang" a rawn ti ta a. A tirah chuan, "Min hnuhluh tum suh u. Telvena ka nei lo, engmah ka ti dawn lo" ka ti hmak hmak a. 

Mahse, Ngûr-a ka awm lai thoin Baby hian min rawn be ta a. "U Fak, Hriati hmuh hnuhnun ber i ni a, kan duh chuan FIR kan thehlut thei a nia. Tin, Hlimi chunga i chetdan pawh Hriati ka aṭangin ka hre bawk, heng thil lak aṭanga him i duh chuan Terini te thu kha lo awih rawh. " A rawn ti ve leh ta a. Danchêp ka va ni tak êm. Terini te chuan, "Kan pa patea hi ukil a ni a, Johna tal âwhtir dan ruahmanna kan nei tawh a, chutianga kan tih chuan i damchhungin tuman an tibuai leh tawh lo vang che. Tin, tuna thil min tihsak turah pawh hian pawisa tam tham tak i hlawh bawk ang" tiin min thlem ta heuh heuh a. keia harhfim ngai lo, pawisa mamawh bawk si leh buaina neih reng ka hne tawh lutuk khan Terini te chu ka lo ring ta ngawt pek a! Inremsiamna kan nei ta a ni. Muansangzuali ruboa Terini te kuta hlan turin..Sangpuii kan rukbo hun tur te pawh kha anmahni remruatna vek, ka inhlawhpui ṭhinte chu ka thurualpui thei ang tih min hrilh bawk a, tikhan ka sawm ta a, an lo duh nasa khawp mai. I hriat tawh angin tikhan Sangpuii chu a thingpui in turah damdawi pawlhin engmah a hre ta lo va, kan rubo ta a nih kha. Mahse, Sangzual, misual leh mi tenawm tak ni mah ila, kan khaw tleirawl azawnga nunnêm leh nungchang mawi tak kha an khawih chingpen hlauin ka veng ve ngat ngat asin. Terini te'n engtin nge an thehthang dawn ka hre lo naa, ka bula a awm chhung kha chu him se ka duh ve tlat..a hun takah i rawn chhanchhuak a. Khamizana in birûkna leh inkalna zawng zawng kha ka hriat loh ring suh. Ka hre lo der a nih kha, ka thawhpuite khan an hmuh che u hlauin a ni lo lam kawng ka zawhpui ta daih a. Buaina chu duh leh ka hmachhawn leh mai ang, hetiang thil tih leh ai chuan ka ti ta a ni. Mahse, Tun thleng hian Terini leh a pasal ka ti mai khami te khan min la vau kal reng a, min umzuiin min enthla reng bawk. Ka ṭawng chhuah vaih chuan ka nunna ka chân tur thu thlengin an sawi a. Mahse, tâwk ka ti tawh. Ka hne tawh. Ramhuai thlahrâng tih vel te, mihring rukbo tih leh inawhhlum tih vel boruak hi ka chhangkham tawh êm a, ka mi rin ber hnenah ka rawn inbunruak a nih hi. Heng ka sawi zawng zawngte hi dâwt pakhatmah a tel lo va, i duh chuan min rawn vauna te pawh i en thei ang. Tuna ka manganna ber erawh ka fapa hmanga min vau hi a ni. 

Diktea a him theihna a nih dawn phawt chuan engpawh tih ka huam dawn tih an hre ve kar a, ka û te bulah engmah ka sawi ngam bawk si lo. Zu hian min lo bâwih hneh mah mah a, ka thluak a tinûin buaina lian zawkah min hnimpil ta chu a nih hi. Min pui turin ka ngen dawn lo che a, mahse, ka nunna hi laka a lo awm ta a nih ngai chuan heng thudik te hi khawngaihin ṭul i tih angin i lo puangzar dawn nia aw" a thusawi tawp lam phei chu a ri chang chang a ni ber e. 

Thawk ka la hawk hawk a, ka thu hriat mak leh rapthlak tak tak te chu ka chauhpui lek lek hial! Engvangin nge kei kher? Ti nge he thil hi ka chungah a tlak bik? Hretu nih ka duh hauh hleinem. U Faka chu ka'n en ṭhin. Ka khawngaih hliah hliah mai. Patlinga pumpa buaina a tawk nasa lutuk chu. A zu ruihna hmang ṭangkaiin a thluak nu but tawh saah hlauhna an tuhsak a, mahni inhaikuak chu sawi loh, an salah tângin a tih duh ngai loh tur thil an tihtir leh a. Tunah Diktea hmangin an vau leh tawh bawk. Ani hian dik lohna pakhatmah a lo nei reng reng lo a lo nih hi. Zoa sawi, "Miin an tihtir a niang" a tih kha a dik ta chiah e. 

Mahse, zawhna ka ngah lutuk a, zawh tur ber pawh ka hre thei lo. 

"U Fak, zawhna ka nei. Baby kha a tel ve tihna em ni?" Ka han ti thâwr a. Ka thaw te chu a hah lek lek mai. 

A bu nghut a, "I rin aiin a inrawlh thûk ang" a ti sup a. Baby hmel ka mitthla nghal. Pawisawilo hmel a pû ve tho si a. A mak a ni. 

"A nih U Fak, in sâwi leh thaw ri te kha i tih a lo ni na nge" ka ti leh hmiah. Makti fêa min melhin, "A teuh lo mai, engvangin nge ka tih ngawt ang? A peih pawh ka peih teuh lo mai" a ti pawr hlur a. A ṭan nat danah a tih a ni lo vang tih ka ring thiam nghal. 

"A nih in huan bul luia tui kan thehkang ṭum khan Zoa'n Hriati nen a hmu dun che u a. Kha kha eng nge a awmzia?" Ka ti leh a. A meng â vek! 

"Eng nge i sawi awmzia?"a ti ta hû a. A bo hle tih ka hriat chuan ka sawi zawm duh ta lo. A buai telh telh palh ang. Pakhat chiah a ngai ta. 

"A tawpna atan U Fak, in inhnuai aṭanga i lo chhuak ka hmuh chea ka biak che khan min chhang miah lo va, tin, Zoa'n khuaa i awm loh thu a tukah a sawi bawk. Kha kha eng nge a awmzia?" Ka ti leh ta a. A kun lup a. Nui ruh ruh chungin, "Tlaiah khan thim hnuah ka rawn thleng a, Rajua in kha YMA ten an check dawn tih kan hriat avangin a zu kha kan in hnuaiah ka zu thukru a nih kha. Ka chhan loh chhan che kha chu ka û ten ka haw tih an hriat ka hlauh vang a nia. Kha khan inah ka lut lo, i kal hnu lawk khan School lamah ka chho daih" a ti ta a. A fiah ta e. Mahse ,hnawk a la awm tho. 

"E leh lawk, U Fak, Hriati te Aizawla an awm chhung khan an inah khian i lut tiraw? Zanah" ka ti leh hluai a. Thinrim hmel lek leka min enin, "I va ho e aw. Eng nge ka tih ang? Khitah chuan" a ti hlur a. U Faka a ni lo tih a chiang leh ta. 

"Hriati thlan nghahnî zanah khan i rawn lut em?" Tlawn titih hian ka ti leh a. 

"Sangzual, i harhfim maw?" A tih ram hmak takah chuan U Faka chu engahmah ka ringhlel ta lo. U Faka phêna awmte chetna a ni ngei ang le. He thil hi a rîl ta riau mai. Ka duh vang ni miah lo va ka inrawlh ve te pawh a la ngai dawn a nih hmel. 

"Chuan, tunah hian eng nge tih i rilrûk?" Ka ti ta a. A ngawih vang vang hnuah, "Ka beilet ang nge ka tlanbosan ang tih thutlukna ka la siamfel thei lo. Ka fapa vang chauhin" a ti zawi raih a. A mitmeng pawh a ngui leh vek tawh. 

"Ka pui ang che" ka ti nghet charh a. Makti zetin min rawn melh. 

"Aw, a dik alawm, ka pui ang che. Kan bei let ang. Hetiang taka i nunkhua tibuaitu te hian hremna an hmu ngei tur a ni" ka ti leh nghut a. Ka inringtâwk kher mai. 

"Mahse, i rin aiin an fingin thil an tithei a nia aw. Terini pasal patea kha ukil a ni tak tak a, min hêkna tur thil a siamchawp thiam viau ang. Kei lah hi pawl 8 pass tih takah ka mawl si a…" tiin a chal a dawm vang vang a. 

"Lungngai suh, dan hremi nei lo kan ni bîk hleinem. Hlimi thattu diktak pawh an hlîng har lo vang. Hriati pawh kha amah leh amah a intihhlum ka ring ta miah lo mai" ka ti hluai a. Rawn hawi chhuak zawkin, "I ni ve tho maw?" A ti duh lek a. Kan rilru a inang ta hle mai. Mahse, a la hnawk dawn chauh a nih hmel,. A chhan chu he buaina maksak takah hian mihring chauh ni lo huai lam pawh an rawn inrawlh ve tih a chianna êm êm chu Zoa'n luia Faka leh Hriati a hmu kha a ni. Zoa khan dâwt a sawi a nih ngawt loh chuan, an pahniha khuaa an awm loh ve ve laia hmuh dun ngawt thu kha a awm lo. Ramhuai thiltih a ni mai. Hriati te awm loh hlâna in chunga che te, in sâwi te leh thaw ri te kha chu mihring pawn an tithei. U Faka zimbuaitu te zing ami a ni lo thei lo. Hriati kha aw..a damlai khan ka lo kawm chiang deuh lo a ni. Mahse, hun thâwl kha a awm ngai tlat lo va. Han ngaihtuah chian chuan Baby'n a venzia leh a enzui zel zia te kha ngaihbel thuhla vang pawn ka hrechhuak ta zel mai. Tin, Hriatpuia thusawi, "Baby hian min ngaizawng ve bawk sia" tih thute kha thu awmze nei a ni ta. Terini'n Muansangzuali kher rubo tura a tih chhan lah keimah vang a ni thei a, Diki te nen an ṭangrualin an thawkho vek thei a ni bawk. Baby pawn a hriatpui vek tih a lang a, tunah nasa theihtâwpin Julie min hmehbel a tum bawk. Chhei! Julie pawh hi a lo fihlim bik miah lo a ni thei ang em? Chawlh laa a châm ve ta reng te hi..! A va ril sâwt ta ve le'h! Keia thluak ve ngawt zawngin a hleuh kai zo leh dawn ta lo. 

Ka ding thut a. "Engpawhnise, mu phawt teh ang. Naktukah ruahmanna kan siam dawn nia. " Ka ti a. 

"Hetah ka riak thei lo vang, min rawn zawng hmu vat ang" a ti sup a. 

"Lungngai suh. Khum khatah kan mu dun dawn alawm. Chuan, zu in tawh suh u. Harhfima ngaihtuah ngai thil a nih hi" ka ti duah a. A ngawi reng. Ka kaih thawh luih tlat takah chuan a tho ve mai a, ka pindanah inzui lutin ka khum 4ft 6ft -ah chuan kan mu dun ta kûk a. Ka ina a riah vang nge phei zawng ka hre lo. Eng thil mahin min tibuai lo. Ani pawh a muhil tui khawp mai. A lawmawm e. Chetlak dan tur ngaihtuahin kei erawh zing dar 3 thleng ka meng..

Zingah U Faka chu a muttui êm vangin ka kaitho duh rih lo. Pâwna a chhuah chuan man a ni nghal dawn si a, in leng pawh ka mamawh ta vak lo. U Faka chu ka venhim a ngai letling tlat. School kal a ngaih si avangin chaw ka bar thuak thuak a. Thleng ka sil laiin U Faka pawh a rawn tho ta a. Kha chen thinthîa mutmu tuah tawh lo a nih vang a niang, a muttui êm êm ni. 

Ka insiam chhungin a lo ṭhu ngawi ve rûn a. 

"Police ka be tawh a. Chawhnuah kan rawn bân hnuah la tur chein an rawn kal dawn a ni. Hlau miah suh, i himna tur kawng awmchhun zawk a nih hi. Ka hnena i sawi zawng zawng kha i sawi ang a, a bak chu keiman ka lo ngaihtuah fel vek ang" ka ti mial mial a. A ngawi reng. Lungngai leh thinrim hmel erawh a pu hran lo. A hnu fêah, "Bawihtea a him ang tiraw?" A ti zawi sup a. Eng anga zu rui nasa leh a fapa ngaihtuah miah lo anga lang ṭhin pawh nise, a fapa a lo hmangaihzia chu ka fiah hle, pa mawhphurhna kengkawh zo lo pawh nise, Pu Thara te ai thlawt chuan dahsang tak ka ni. 

"Tehreng mai, a him ang. Ka lo venghim tlat dawn alawm" ka ti nghet charh a. Min ring tih hriat takin ka mitah tak a rawn en a, "Ka lawm e, Sangzual, ka nau rual mah ni la, ka hmuh hmasak ber che aṭang khan i rintlak tih ka hre tawh a ni. " A ti dam thlup a. Dawnsawn a nuam ve hle. School ka kal chhungin inah a lo tawm ngawt ngawt dawn a ni. Pawn lamah ka kalh hnan bawk ang a. 

Ka chhuahsan a, Baby rawn chhuk tur nen kan la intawk zui! "Ehe! I va rang ve, chaw rawn ei rawh tih ka tum a" a ti hliai a. Ka mitmenga engmah tihlan loh hram hram tum takin, "Zing lam hi chu a tih ve naw naw theih..bakah thawh ka hai a, ka hmanhmawh ve deuh nen" ka ti liam puat a. Lehpelh ka tum lai takin, "Nizan kha inleng i va nei rei ve, in ṭawng bul bul reng a" a ti a. Ka kut ka lo humruh hman, ka inthunun leh vat a, "Nia mawle, Han titi hi chuan sawi tur a tam ve duh riau a..Ka kal dawn, nih aw" tiin ka nuih sak a. Enghelh nei lo niawm takin ka hnungchhawn ta a. Ka awm erawh a nuam chiah lo. Baby hi zuam ngawt chi niin a lang lo, nula senior ve tawh lam, fing ve tawk tak kha a ni tlat a. Amah ber hi venthawn ngai chu a ni dawn ta hialin ka hria. School ka thleng a, an lo thleng vek tawh. Thana'n, "Nimin chu in va zai tui awm ve" a lo ti var a. 

"Aw..an zai tui ta phian a" ka ti ve mai a. 

Madam Sangi'n, "An zai tui luat vangin Hmunsiami pawh a tlan leh ngawt an tih tak kha" nui hak hak chungin a lo ti a. 

Mawl hmel fê hian ka lo melh kul thung. Thana bawk chuan, "Nu tê lam, hâng rin ren hlimsang kha i hre lo mi? Nizan khan a haw tlai lutuk vangin an pa in a lo kamkhat a, chu chu huain a tlan daih alawm" a lo tih takah chuan ka fiah ta kuar. A va hahthlak ṭhin e aw. An pa chu nge demawm an nu zawk chu tih pawh ngaihtuah tham a tling âwm e. Ka ngaihtuah peih ta lo law law, an awm awmin lo awm ve phawt teh se a. Ka nuin min zilh fôna ṭhin erawh ka hrechuak, "Nupui pasal hi thlan fimkhur a ngai êm êm a nia. Mama, nulat lai aṭanga rau sang bik changte, Kohhran leh khawtlanga zan khaw tai rêk rêk thlenga inhmang te hi sakhuana ang zawng chuan an îtawm fû maithei, mahse, an khirh duh phian a nia, tin, fa te an hulhar ta maw tihah an nulat lai anga in chhuahsana Kohhran an atchilh leh chuan Pathian rawngbawlna alawm ti reng chung si hian chhungkuaah khî a awm duh teh mai a nia. Chuvang chuan fimkhur hle ang che. Pasal fanaute tana nu leh nupui ṭha tak nih thlang tawp ṭhin hmeichhia te hian chhungkua an siam nuam nge nge zel..Pathian rawngbawl a ṭha lo ve tihna ni lovin, a âwm tawk a awm ka tihna a nih chu. Tei pawh, Mipa englai pawha i bula tâp chawt thei, be reng theitu che chu pasala tan thlang reng reng suh. Hna thawk ngai lo, mi hman êm êm chuan engtin tehlul nge a châwm ang che, tin, pasal kohhran leh khawtlanga phar buai reng, chhungkaw uap hman lo khawpa rawngbawlna ngaipawimawh pawh chhungkaw hlimna aiin innghirnghona a tam duh. Thlang uluk ang che" tih thu hi..Ka nu hi nu mâwltê mah nise, a thu hi a finzia leh a ngaihtuahna rilzia tun hnu hian ka hre fiah kuar zel..ka nu a ni hi ka va lawm tak. 

Chawhnu lamah volleyball practice an rawn dil angin phalsak an ni a. Zirtirtu te pawn kan va thlir ve a. Sir Peka'n, "Sangpui, va tel ve r'u, Helen..lo kal r'u " a tih lai chu ka lo melh vûng vûng a. Peka chu thîk ka duh bik hauh lo, mahse, an inhnimhnai zawk a, an zirtirtu a ni si, ka thik hun a la awm ngei dawn tih ka chiang. Muansangzuali leh Heleni te chu an lut ve ta a. A pawnfen leh a mawza inkara a kaihza var hai pawh chu ennawm a tling thei nia! A sam chu a lum deuh vangin a chhipah a bawk khawm a, a hnawk niah chu a inhmeh zual bik. Hmeichhe ṭhenkhat chu an intino kual nge ball a rawn kal pawn no zetin an lo la a, a kai lo ngei a, hmai hupin, "Ka thiam lo ka tih khaa…" an han ti ngher ngher a. Muansangzuali erawh a ni ve lo. 

A zawna ball lo kal chu a thiam ang tawkin a lo dâwm ve a, a dik tawk loh paw'n, "Ka va tidik tawh awm e" a ti ngat zel. Hmasawn tur zîa khatiang kha. A service dawn chuan ka mit tikham thil ka hmu ta pek a! Peka chuan a hnunglam aṭanga va vawnsakin tihdan tur a hrilh pah mawlh mawlh a, ka duh aiin an inhnaih deuh chu a ni. Ka sa zak mai. A kai lo ngei a, Sangpuii dara hmer pahin, "Next-ah a dik tawh ang. I thiam lutuk a nia" an ti ngei ah! Mai mai a..ka ding thut a, Thawhpuiten min lo en hû si, "Ka mawng a kham a" zahzelah ka tih tak ngawt kha. Hmannia Lalnuni an tih kha lehlam pâwlah a awm thung a, a service dawn chuan ka va pan ve ngat, A hnunglam atangin, "Tihian ti la, i kutzungpui ruh kha hmang ṭangkai la, ball a kal nghet a, lak a har duh" ka ti kual duah. A lai tih ka hrereng. Muansangzuali ka va melh zauh a, na fê hian min lo melh ve. Ka inthiam lo leh roh si, ka va ṭhu leh ta daih a. Muansangzuali han nghalzia chu, Lalnuni kher chu point box ah rawn hmang zel a mawle! Lalnuni lah inla no chi, lerh paha khel a ni si a. An game chuan Muansangzuali chuan, "Sir Peka kan coach a ni tlat a!" A'n ti kher a'h! Ka va pen châk tak. Ka mood thup ngai nen, a nuam lo a ni tawp mai. Mipa lamin an ben takah chuan Sangpuii te chuan kan School toilet rawn hmangin an va zung a. A bula sintex chu herh hawin an kut an sil bawrh bawrh a. Heleni nen chauh an ni bawk a tiin zung tur niawm takin ka phei nghal hmak. En pawh min lo en duh lo. Heleni chuan hrethiam takin inkhel lam chu a en daih a. 

Zawitê hian, "Suali" ka ti sup a. 

"Lerha" a ti ve thung. 

"Bânah rawn peng rawh aw" ka ti a. U Faka vang pawn a lo pen chu a ngai ka ti tlat. 

"Lalnuni'n min thîk ang " a ti hram. 

"I va â tak, Peka sawn a kut hmawr pawn a khawih tawh tur che a ni lo" ka ti hluk a. 

"Ka thu a nia mi? " A ti hlar a. 

"I mizia hi a danglam sâwt riau, i zak lo tawh" ka ti dêk dêk a, "Ka lerh ve châk alawm" a ti hmak. Ka inrin hmain a kut ka va hmersak nghek a, a rak chhuak êm bik lo. 

"Ka remti lo tih hre sa la" a mitah tak melh ngur chungin ka ti hniam raih a. 

"Miin min hmu ang e" a lo ti daih. Ka thlah ve mai a. 

"Kan kal dawn, an ṭawng thei si.." tih leh kal a rual a. A hnunglam aṭanga melh zui vawng vawng chungin, "Ka nei dawn khawp mai che" ka ti zawi sup…