Ka savaté 11

KA SAVATÊ (11)

Ziaktu : Toni Râlte

Engtin nge ka awm ve tih a hriat theih? U Faka hi ka ringhlel sa miah lo, mahse, a aw ka hriat khan mak ka ti hran hauh lo. A hmaa a awmdan mak leh danglam tak tak ka lo hmuh tawhna avang khan eng emaw tak hi chu a awm ang tih ka ring daih tawh. Chuvanga kawm chian châk ka ni rêng a. Mahse, hmeichhia rubo tur khawp chuan ka lo ring phak lutuk lo. Hetia a chet chhan hi engvang tak ni ang maw? Ka ngaihtuah thiam ṭhak lo. Thaw dêp dêpin thing bulah chuan kan ṭhu dun a, a khur der der mai. Kei erawh ka huaisen e tihna ni loin ka bula chhan ngai êm êm a awm takah chuan mipa ka nih angin ka lung ka tilian a, ka inla huaisen chawp thei mai. Engpawh huama Muansangzuali hi ka chhanchhuah a ngai a ni. Thingkung hnuai chu thla êng chuan a chhun ve riai riai chauh a, zawitê têa tawlhthla turin ka mitmei a, a zawm vat. Chul mawng tâwp chuan a hmaa ka zawh tawh kawrtê tui awm lohna kha a zuk pawh a. Kawrtê chu zawhpui ngawt a fuh lo, kan inzawng hmu hma dawn lutuk. An niin ram chin an hre dawn nasa si. Khaw luh dan hi hria ila chuan lut thâwr mai ila, ṭanpuitu pawh kan hmuh mai ka ring. Mahse, khawi lam nge pan tur tih ka hrethiam der si lo. Kawr lehlam chu hnahthial leh anchiri hmun a ni a, changel pawh a khât tawkin a ding ve zeuh zeuh. Chu lamah chuan ka pheipui ta zawk a. Êng chhit a rem meuh si lo, kan inpal nawk nawk reng mai. Awrâwl erawh kan chhuah ngam lo ve ve. U Faka te thawm pawh a reh hmak a, thawm nei hauh lovin min zawng ru mek tih ka hriatna thazâm ten min hrilh mawlh mawlh mai. Ram chinchâng kan hriat loh êm avangin kan bo thui zel hlauin Lawng thing lian zet lo dinna bula hnim pik karah chuan Sangpuii chu ka nam lût a, kei pawn ka zui ve nghal. Rannung min seh thei apui an tam angreng bawk si, fimkhur a ngai ngei mai. Ramvachal ka ni lo nasa bawk nen, khua var vat vat se tih ka duh takzet tawh. Ngawi rengin hnimbuk hnuaiah chuan kan bawkkhup hle hle a, kan thaw ri pawh a ring mah mah ka la ti. Darkar chanve zet kan bawh phêk reng hnu chuan thawm kan hre ta a. Sangpuii'n a hmui a hup vat. Kei pawn ka chemte fawng ka hum nghet kher mai. Ke pen tlut tlut thawm chu a lo hnai zel a, amah pawh kan hmu zui ta nghal. U Faka chu niin ka hre lo, a thawhpui tu emaw zawk kha a nih hmel. A hawi kual vat vat a, Thingkung lam te chu a han hawi vang vang a, kan tawmna hnimbuk lam pana a rawn pen chhat chhat lai chuan, "A ṭul a nih chuan a hrawkhrui ka zai chat mai ang chu" tiin rilru ka siamfel vek tawh. Kan vanneih asiamin chutihlai tak chuan thla chu chhumin a rawn hliah ta hlauh mai a! A thim ta hmuk mai. A chek hluk a, chempui bak hmanrua a keng bik loin ka hria. A rawn pen leh tur chiah chu kawr aṭangin châng an rawn tum raih a, hmanhmawh zetin a lêt leh ta a. Kan thaw huai mai. Mahse, chhuah ngawt chi a la ni chuang lo. Chulai hnimpik zingah chuan zan kan tum tawi dawn nge pawh ka hrethiam tawh lo. Mahse, darkar khat vel hnuah chuan a reh tak êm avang leh kan awmdan a hrehawm tawh êm avang chuan ka che chhuak ta ṭhem ṭhem a. Sangpuii pawh zawitêin a rawn tho chhuak ve nghal. A beng bulah, "Khawi lam hi nge Ngûr khaw kawng lam?" Ka ti a. 

A lu a thing nar nar a, a hre lo tihna. Kawr hi zawh chho zel ila chuan khawilai hmun emaw tak chu kan pawh mai ka ring a, mahse, a tihchi ber ang em tih erawh ka hre lo. U Faka te hlat thei ang bera kan kal chu a ngai tih ka hria. Muansangzuali chu ka kai a, kawr chu ka zawhpui ta tawp a. Engpawh tawk ila hmanrua kan nei ve tho a, kan thi dawn a nih pawhin mi pakhat tal chu thihpui ve ka tum bur mai a ni. Phone lah signal a awm bawk si lo. Pathianin ka ṭawngṭaina a chhang ka ti mai, kawrtê chu kan la zawh thui lo hle nain tuikhur kan pawh ta hlawl mai le! Zing dar 3 a pel fel tawh a. Khua erawh a la êng lo. Tuite chu kan in khawlh khawlh a, kan taksa chau leh kham ṭhêm ṭhûm te chu kan han tihuh thuak thuak a, hmaite kan han phih tak hnuah chuan tlemin kan harhvâng leh ta deuh. Sangpuii tak pawh chhel ka ti viau mai. 

Tuikhur ber kan pawh tawh chuan khua a hla tawh lo tih ka hrethiam ve kur. Tuikhur kawng chu kan zawh ta a. Thawm kan la dim tho nain a hahthlak deuh avanga han heih ha chang ka lo nei leh ṭhin a. Kawng a chho ulh reuh êm a ni. Kawi hnih thum kan pelh hnuah kawng chu a zâwl ve ta deuh a, kan kal zel a, a tawpa tawpah Ngûr khaw dai kan pawh ta hlawl mai. Kan piah lawka an khaw signboard avang chuan kawtchhuah a nih ka ring ve deuh ngawt a ni. Kâr lo vah in pawh kan pawh ta a. Mi muttui hun lai a nih avangin thawm a awm lo ngei mai,. An khaw laili deuh ni awm tak kawng pawh zau ve deuhna lai kan thlen chuan in pakhat aṭangin ui pahnih hian min rawn bauh chiam mai a. A neitute an rawn thawh mai ka ring a, an rawn tho mai bawk si lo. Tunah chuan ṭanpuitu, an ina min riahtir thei tur kan zawn a ngai. In lian ve tawk tak, lei rinchhana an sak, compound pawh zau ve tak neite in lam chu ka panpui a. Kawngka ka kik ta kauh kauh a. 2 mins hnu velah , "Lawk aw" chhung lam aṭanga rawn tiin kawngka chu a ri rak a, a rawn inhawng ta a. 

Patling kum 65 bawr vel tur, thau lam, dul pawh kiar ve deuh luah hi a ni a. A hmel erawh a nelawm phian. Min hmuh chuan mak a ti deuh bawk. Min hruai lut ta poh a. A hnu lawkah an nu niawm tak kum 54 bawr vel, sam kir chuat mai, sa ṭha lam hi a rawn chhuak ve bawk. 

Kan chanchin tlangpui ka sawi ta zung zung a. Muansangzuali rukbo a nih thu leh Zopui khua kan nih thu ka sawi lai khan an nu chuan, "Ee..an mibo kha maw? Kan lo hre ve alawm" a lo ti nghe nghe. Khaw inṭhenawm mai an ni bawk a, an khawtlang pawhin Zopui khua chu puih an tum ve danah naktuk lama chet chhuah an tum ve dante nen lam chuan an sawi ve a. Kan mitmeng leh kan awmdanah kan chauhzia an hrethiam ni tur a ni. Chaw ei turin min ti phawt a, mut kan mamawh zawk fê si, kan hnial ta phawt a. Min tilui bik ta lo chuan an fapa hmun danga awm pindanah chuan mu turin min ti ta a. Kan inlaichinna lam engmah min zawt lo naa, inngaizawng ni turah min ngai sa deuh nge pindan pakhata muttir min tum danah. Mahse, Muansangzuali nakin hun zel ka venpui avangin, "Ṭhutthleng seiah hian ka mu ang e, ani hi khumah chuan mu se la" ka ti a. An hrethiam ta a niang. "A hrehawm loh ang maw!" An ti a. Mut ka tum tlat avang chuan min hnial zui ta bîk lo chuan puanthuah min va laksak ta zawk a. Sangpuii pawh thuawih takin a pindan lam a pan ta bawk. Puan ka han sin luma pangngai taka ka han mut tak âr ah chuan namên lova ka mut rawn chhuakin enghelh nei miah lo chuan ka muhil ta bawrh bawrh a. 

"Bengchheng suh u, in tiharh palh ang e" nu berin a fate nge a tute zawk a hrilh sar sar lai chuan ka meng riai riai a, khua a lo êng ut tawh. Banga sana lian an khai ka han melh chuan dar 8:30 a lo pel tawh a. Mutchhuak châmbâng la awm tho mah se, Sitting rooma mu ka nih avangin ka hnawk ang tih hlauin ka tho ta ringawt a. Nu berin min rawn hmuh rual chuan thingpui min rawn pe nghal var a. A ṭawng duhin a titi siam siam reng a. Nu Mâ tiin ka ko mai a, pa ber erawh Kohhran upa ngat, pu Vanhnûna a ni thung. An fel chhungkua kher mai. UPC kohhran an ni a, Ngûr khuaah hian UPC hi in 40 vel lek an ni awm e. Mahse, Zopuiah pawh an sawi ka hriat fô chu, "Ngûr khaw tinuamtu chu upc ho saw an ni, mikhual lakah an ṭhain mikhual an hnawng ve ngai lo va, Presbyterian lam khawmpui leh tihpui nikhuaah lah a mikhual thleng tam tam an ni thei zel bawk a, kohhran dang paw'n an ep lo, tisawn khaw inlungrual tak an ni" an ti ṭhin. Keini pawh kan thleng fuh hlein ka hria. Kei Kohhran hi ka bêl lutuk lo bawk a, ka dahlau vang emaw chu a ni bik lo a nia, Kohhran dang heng Bapstist, UPC, Salvation leh a dangte pawh ka va en hrangin ka va ep viau ngai lo. Kohhran thurin a lo hrang a nih pawhin mizoram ang ram tê leh mipui tlemna hmuna kohhran ang zawnga lo inbeiha lo inteitê vak vak hi ṭul ka ti tehchiam lo. Tun hnaiah Kohhran thurin inân loh vanga inepna hi a tamin, social mediaah ringawt pawh insawiselna, indeusawhna rawngkai hmuh tur a tamin, Kohhran hruaite lahin an beramte bulah, "Tiang tur a ni lo ve" tih a hnêkin a ep ber berah an ṭang bawk si a. Hei hian rah ṭha aiin rah chhia a chhuah ka ring zawk. Mihring tak pawha inerna leh inhawisanna hial hi a la thleng lo vang tih a sawi theih loh. Khawpui lama awm ṭhenkhat ten, "Thingtlângah hetiang indiriamna hi a tam" an ti châwk a! Zopuiah pawh Kohhran pawl pali lai a ding a, an inenhranna leh fiamthu leh uangthuanga an inchhaih nawmnah ve vak vakna ka la hre miah lo. Thingtlang hi an lo inpawh zawkin an rilru a lo thianghlim zaw mah a nih dawn hi..Chhim lam saw Baptist lalram tih theih a ni ve bawk a, mahse, Kohhran dang an sawisel chiam chiam hi ka hre tam lo khawp mai. Chutihrualin haider theih miah loh chu Mizorama Kohhran pawl lian pahnih Presbyterian leh BCM te iner tawnna hi a niawm e. Chhim lamah Presbyterian nekchêp kan ni lek lek a, Hmar lamah Baptist lam an lian thei hek lo. Chutiang a nih laiin an member tlemna ve veah hmun pawimawh Hospital, Pathian thu zirna tih luklak an han hûng chat zel mai a! Mihring rilru hi chu a lang deuh ka ti fô..a mi nâwlpui te hi kan in era kan inep vak loh laiin kan hruaitu lû te ve ve lam hi tisa takin an lo ṭang hle em ni chu aw tihtheih a ni tlat! (A ziaktunu hi Baptist nula ka nia ..haha..tumah ka sawisel bîk lo a nia aw. ) Kohhran lam chu sawi zui vak lo teh ang..hetiang lam hawi zawnga sawi hi a la na duh tan na thei tak a ni tlat si a. 

Pu Vâna te chuan fa panga neiin a upa lam pathum ten nupui pasal an nei tawh a lo nia. Naupang pahnih an awmpui te erawh an milai fate an ni. Vanduaithlak takin kum 2 liam ta khan an fanu chu raichehin a lo boral tawh a. A fate pahnih mipa leh hmeichhia te chu an pate lam khawsak harsat vangin an ni hian an enkawl a lo nia. An fanu boral ta chhang chiah hmeichhia upa ve tawh lam chuan fa angin a tuamhlawm tawp mai a, pasal neih pawh a tum tawh lo an ti mai a. Lehlam zawng tak chuan naupangte tan chuan pasal neih a ngaihsak lo pawh a lawmawm viau zawk ang. An fa naupang ber mipa chu kei aiin a nau hlek ang. A ṭawng tlem êm mai a, kan inbe mang lo. An nula Mapuii an tih mai erawh a felin Sangpuii te chu a titlangnel thiam ngang mai a. A thawmhnaw te pawh a pek tak nual kha..Zopui khaw lam ka be pawp ta vat a, Pu Ramtea ka be hmasa ber, thil awmzia ka sawi vek a. Mak an ti hle niin a lang. Tukṭhuan ei khama min lo hruai tur thu sawiin kan inbiakna kan titawp ta a. Tikhan chanchin an lo inhrilh darh ve tawh mai ang chu maw..

Tukṭhuan kan ei khama kan ṭhut khawmuan lai chuan Pu Vâna chuan Sangpuii chu thil thlen dan a zawt ta a. Sangpuii pawh chuan felfai takin hetiang hian a bo dan chanchin chu a sawi ta a. 

"Ih,. Vawk chaw la tura ka kala thlam ka zu thlen khan, thlâmah khan apu Faka leh mi pakhat ka la hmuh ngai loh hi an lo awm ve a. A pute thlâm hi chu kawng aṭanga a hlat loh avangin mi feh hawng emaw te hian chawlh nan an hmang fô a, mak pawh ka ti lem lo. Thingpui hâng an lo in rêng bawk a, kei pawh chu 'A thlum hi in ve rawh' min tia. Zep loh chuan, engmah ka ei lo, ka ril a ṭâm ve tho sia. Chuan, thingpui thlum chu ka in ta a. Apu Faka khan, "Kei pawh ka haw dawn alawm, vawk chaw chu kan lakpui che ang a, kan haw rual dawn nia" a tia. Dik tak chuan Apu Faka hi a hmain inbe vak ngai lo mah ila, misual nia ka hriat loh avangin ka thla a muang ve êm êm ringawt. A kalpui pa kha chu a ṭawng ve pawh ka hre lo, Pu Faka khan, 'Ka hnathawhpui ṭhin a nih hi, mizo ṭawng a thiam vak lo va" a ti mai a. Kei pawn biak ka tum bik lo. Thingpui ka in zawha changêl la tura ka chhuak tur chu 'Kan zuk la ang e, lo awm rawh, thlam te kha lo phiatfai zawk la' a tih tlat avangin ka lo awm a. Thlam pawh ka phiatfai. Mahse, ka phiahfai lai chuan ka lu a rawn hai nasa lutuk a, ka pai dâwrh nghe nghe, ka lu ka dawm a, namthlak bulah chuan ka ṭhu ta ringawt a. A hnu lawkah kut ruakin an rawn lut a, 'Ti nge engtin nge i awm?"min tia. Ka sawi a. Mahse, khami hnu lam kha chu ka hre mumal tawh lo. A thim riai riai a, ka zawi ngawih ngawih bawk. Ka harh leh chuan thlâmah tho min lo phuarbet reng tawh. Chaw min eitir a, mahse, ka ei kham veleh a hma ang chiah khan nilêngin ka muhil leh tho..chuan a bak chu Sir hian a hre tawh ang" tiin. A thil in leh ei turah damdawi eng emaw tak an pawlh tih chu a lang reng mai. Ka hriatthiam loh, hriatchian ka châk êm êm chu U Faka hian engvangin nge hetiang thil hi a tih tih hi a ni. 

Pu Vana te nupa pawh chuan U Faka chu an lo hre khawp mai a, a nupui hluite khua a nih bakah heta inhlawha awm reng reng a lo ni bawk nen. Mak an ti ve hle, ni e, U Faka kan hriatdan kha chu pa zaidam, ṭawng tam lo, mi pawisawi ngai lo, zu a ruih ve pawha inthlahrung daih chi ang kha a ni si a! Hetianga a lo danglam ṭanna tak nia ka hriat chu tuikhura ka insuk ṭuma tibuaitu a neih vanga a chakai khawrh a rawn haw ta mai kha a niin ka hria. Ramhuai hnathawh vanga mi a rukbo erawh ka ring chiah bawk si lo. Inthawi nan te hian an lo ru bo te a ni thei ang em? Ni lo, Mizoramah hetiang thil chu thil thleng ngai lo a nih piahlamah thingtlâng aṭang chuan a thlen theih ka ring pha bawk si lo. Buai ru tak ka ni. Sangpuii lahin an rûkbo chhan engmah a hre bik der si lo. Engpawhnise, U Faka an man hunah thudik chu kan la hre mai ang chu maw. 

Dar 11 rik hma deuhin Zopui khawtlâng hruaitu te pawh an lo thleng ta a. Police hnena an thlen tawh thu leh Faka leh a ṭhuihhruaite an zawn nghal tur thu an sawi chuan thla a timuang e. Zopui ṭhalai rual thaza rual ten an lo zawng ve ang tih erawh a hlauhawm deuh, chuvang a ni pakhat ang, Pu Ramtea te pawh chuan Muansangzuali rubotu chu a hre tur china ngaih bak tumah an hrilh rih loh ni. Khawtlâng hriata puanzar chi a ni rih lo tlat a ni. Tichuan, thingpui te kan han in leh tê tê hnuah muangmarin Zopui khaw lam chu kan pan leh ta a. Ngûr khua chu khaw dung a sei vak lo naa, a hmun a rualrem bawk nen an inzarpharh hlein ka hria. Khaw nuam tak pawh a nih ka ring. A mi chengte an felin an polite bawk si, an vun pawh a êng viau e. An tuitlan a ṭha a ni teh chêk ang chu. 

Zopui khaw kawtchhuahah ṭhalai rualin min lo hmuak a, ka beisei aiin an ṭhahnem daih mai. Muansangzuali chuan zawitê hian, "Sir, ka zak ê..tianga inhmuah kher hi ka duh lo sin le" a ti niah niah a. Ani ang rual tan chuan a zahthlakna chen a awm ve khawp ang. Pu Thara kha Ngûrah khan a rawn tel ve a, mahse, Sangpuii nen an inbe tam lo viau mai. Kei phei chu min hlau emaw tih mai tur hian min pehhel dan ngawt a zawng a, ka be vak duh ta bik lo kha a nia. Tleipuia'n a û a'n hmu leh a lawm lutuk hnukulh bawk si chuan nula ho mittui a kaichhuak nasa mang e. A kuah chawt reng a, "A û, bo tawh suh aw. Zanah pawh ka muhil thei lo, a û, i hlau lo mi? Khaw nge i kal daih a? I ril te a ṭâm lo mi?" Tih vel a zawt sek sek reng a. A û pawn chhan ber tur pawh a hre lo, a nau chu a kuah bet chial reng a, a mittui a khap per sak sak reng mai. Engpawhnise, Muansangzuali, him dama kan hmu leh thei chu a lawm ber ka ni hial awm e. A va hmuchhuaktu ka nihna laiah zawhna eng emaw ka dawng ve reng bawk a, ṭhenkhat tan chuan ka va hmu bîk kha ka rinhlelhawm thei hial awm e a. Mi mut reh tawh hnua zan thim hnuaia ka va zawng leh ngat kha 'A chhan' ngaihtuah âwm tak pawh a ni ve tho,. Chutiang lam hawi zawhna chu ka dawng tam ber bawk. Mahse, "Ka mumangah Sangpuii hi phuarbeha awmin ka lo hmu a, Ngûr khaw ram a ni tih ka hre bawk. Ka harh khan min mawlh ut ut reng sia, mumang han rin ringawt pawh ka ti naa kal tura min nawr et ettu a awm tak zelah chuan midang tibuai lo vin ka kal ve ta tawp a nih kha..kei pawn beisei ka nei sang bik lo, mahse, bei nge sei rûn dung tiin ka chhuak ve tawp a, tihian kan va inhmu ta hlawl mai a ni" tih chu ka chhanna awmchhun a ni. 

Chutiang ni lo va, "Sangpuii hi ka ngaihtuah êm a, him dama hmuh ka duh si avangin mi mut reh tawh hnuah ka chhuak leh ta a ni" ti ringawt ila, "Sir in Muansangzuali a ngaizawng" an tih loh pawn, "An inngaizawng a, an plan vek a nih hi. Chutia va hmuh ngawt thu a awm lo. ".tih vela an sawi kha ka hlau ve bawk si a ni. Muansangzuali mualphona siam thei thil sawi chhuah hlau takin ka chhanna tur pawh uluk takin ka duang fel ta vek kha a nia..an awih emaw awih lo emaw ka pawisa tawh lo mai a niang chu..

Pu Ramtea ten chaw eiah min sawm zui ta bawk nen, inah haw phawtin ka inbualfai a. In chungah ka han lang leh zawr, An chhungkhat bakah khawtlang nu leh pate an la leng nak nak reng a. Ngaihngam takin ka chhuahsan leh ta a. Zoa te chhungkua hmuh ka hreh ru deuh. U Faka tel vena thilah ka inrawlh miau si a. Mahse, Pa Mawia zawkin min lo ko dingin lêng lawk turin min ngen a. Chuti na nâ na chu tiin ka lut ta a. 

Diktea a awm lo bawk a, U Faka velte chu min zawt chîk ta vak a, kei pawn a nihna ang takin ka chhang ve zel. Pa Mawia chuan ka sawi zawh vek hnuah beidawn hmel angreng tak hian, "Diktea nuin pasal a neih aṭang khan zu hmun sa hmun hi a ngaina zual a, hetia khaw danga a inhlawh te hian a inhlawhna hmunah an bilh a, an chhuang mai zel a, a nghei ngai lo tluk a ni. Mahse, patling an ni tawh a, hna a la thawk thei tal alawm tiin ka khak duh ngai lo. A inhlawhna te hi kan hmu ve ngai lo, mahse, kan nu hi a fel êm zawk a, khatiang kha a beisei ngai lo hrim hrim. Hetia a mizia thlenga a danglam ṭanna nia ka hriat chu Lalhlimi thih sarhu vel lai kha niin ka hre tlat! Ka ngaihbel pawh a ni thei tho. Ka sawifiah thiam si loh hian amahah hian danglamna riau a nei. A fapa takngial paw'n a lo haw chânga a bula mu tura a sawm pawn a duh tawh ngai miah lo. Eng emaw tak hi a tawng ang a, chu chuan a tibuai zui ta em mawni aw ka ti hial asin. Chuan, kha i hria ang a. Kan khaw in sâwi a nih chiam laite khan mak deuhin kan in hi a âwngrawp tawh tehreng nen an sâwi ve miah lo. Khami in an sâwi zan khan Faka hi zanriah ei kham hlim âwm velah a rawn haw a, a tuka a hnathawhnaa phei leh a tum thu a sawi a. Chaw pawh a ei lo, a za sek ka ti mai. A tei a tei a, a awm hle hle thei lo, kan mut tawh hnuah thawm dim taka a chhuak hi ka hria a, zu a in leh tawh dawn a niang tiin ka ngaih ka tiṭha ringawt a, mahse, a tukah khan tikhan in sâwi tih vel kha an sawi ta chiam sia. Kan in a kân daih chhan kha ka hrethiam lo. Kan Fakawma hi in sâwitu te kha a lo ni thei hial ang em tihte thleng ka ngaihtuah mawle.." a ti ta chuar chuar a. Ka lo ngaithla tui ngang mai. Thil chu a mak sâwt ta riau mai, ngaihbel tur apui lah a tam. Hriati khan Hlimi thlâhrang anga an lantir thu a sawi ngei tak a. In sâwi vel chungchang erawh a sawi hlek lo, tin, in an sâwi lai khan Hriati chu damdawi inah a awm daih a nih kha..hmm, U Faka hi a harhfim lai taka kawm chian fê a ngai dawn tlat mai. 

Pu Ramtea te in ka zu thlen thlak chuan Buangi te nupa pawh an lo awm ve a. Kan inhmu chu kan hlim hle. Pu Ramtea chuan ka thla hual nan arpui tuilai a lo talh a niawm e. Ka thlâ hual ngai pawhin ka hre lo asin le aw. Nu Mawii'n, "Zum leh hriam karah zan thim hnuaiah saw leh ram chenah i va kal a, him dama in rawn inchhan chhuak thei hi a lawmawm êm mai" a ti duam duam a. Lehlamah chuan a lawmawm khawp mai, fapa ang tak takin min en ve bawk a, kei pawn nakin thlengin nu leh paah ka la nei zel dawn niin a lang. Tluanga pawh a lo awm ve khiah a, a ṭawng tam loh nen, "U Sangzual, Sangpuii kha an pawngsual em le!" A ti ta khauh mai a. Buangi'n, "Thantluanga hi chu aw..ri phawng phawng zel suh" a lo ti hlak a. 

Nui chungin, "Pawngsual bik lo turah ngai ang aw" ka ti ta ringawt a. 

Amah bawk chuan, "Muansangzuali tê hi chu mi hausa fanu chu nise a luck reuh ngawt ang, a hmel hi a ṭha reuh a nia aw. A vun a nalh bawk si" a ti leh sûrh sûrh a. 

"I star a ni maw?" Ka tih chuan, nui vur vur chungin, "Au Buangi hi a nei chawng chawng a, kuminah neih ka tum ve tehreng nen" a tih chuan kan nui hawk hawk hlawm a. Ni e, Tluanga hi Champhai lamah hnathawkin a zin nasa bawk a, champhai nula nen an inngaizawng ve a, kum 2 an inzui ve tawh a niawm e. A bialnu hi amah aiin kum 4 laiin a upa a, mahse, a felin Tluanga nun hi a kaihruai nasa a, Pu Ramtea te pawn an iai phah lo khawp mai. Kum thuhla hi mizote hian kan chhuanlam fô a, mahse, a tam zawk hetianga buai tlat ṭhinte hi chu 'emaw' tihna rilru an put sa rûn avangin anmahni aia upa nupuia an neihte khan lerhsan tur emaw ti pawl an awm tlat! Kha an thinlunga riak reng kha a takin hmangchhuak mah se, a nupui a upat zawk avangin khawtlângin an dem lo dawna inhre tlat te pawh zuk awm a! A pawimawh ber chu hmangaihna a ni. Ka mi hriatchian êm êm pawh hian a nu aia kum 3-a upa nupuiah a nei hem mai a! A chhungte pawn a tirah an hauin an zilh nasa, mahse, a hmangaih tlat. Fa an nei thei tawh lo nachungin, a nupui fate fa lehchhawngte pawm seilianin a duat êm êm a. Mipa ṭhenkhat chua pa lo, nêp pawh an ti mahna. Mahse, mi thusawi vangte ,mi nuihzat vangte khan an nghing nupa eih lo. An inhmangaih a, an hlim a, retheih pawn hausak pawn an inṭawiawm zel a, kha bak baka nupa nun duhawm te chu ka ti mai. Hmeichhe tam tak pawh hian anmahni hmangaiha thlahlel êm êmtu an aia naupang si te lakah hlauhthawn an neih ruk tlat avangin duh ve tho mah se, an hnawl a, an nun a hlim tak tak chuang lo. Kei ka ngaihdan chuan nun hi vawikhat chiah kan tem dawn a, tuman tawnhriat kan nei thei lo. Kan piang a, kan dai ve tawp a, dinhmun inang kan tihte pawh a mihring azir a ni zel bawk si a, chuvang chuan vawikhat pian ve manah kan hlim dan, kan nuih theihna kawng chu thianghlim takin zawh mai ila, midang sawi leh sêl kan dâwna kan ngaihchân zel chuan kan hun ṭha kan khawhral zel dawn a ni mai. Pathian nena hringnun thim leh êng han dai pawlh nawk nawk te hi nakin zela keimahni tan chauh ni lo, midang tan pawha malsawmna hmanrua a ni ve thei. Chuvang chuan sawi neuh neuh, zeldîn thubawl ang chi ngat phei hi chu hnawl ngam ila kan nun a nuam a ni mai tih hi ka ngaihdan a ni ve tawp mai. Ka'n pêng leh duah zel a, zanriah pawh chu an peih thawkhat ta bawk a. Kan kil ta ṭhap a. Nu Mawii'n ṭawngtaina a nei a, puar takin kan ei tlâng ta a. 

"Sangpuii tê reuh chu ka lainat êm mai, ani ber kher han rukbo tlat chu mak ka ti" Buangi chuan a ti niah niah a. Zuali pawh chuan, "Kei pawh ka lo tia, u Diki te nufate sawn an tihtir em mawni ka ti hial" zawitê hian a lo ti ve sap a. 

U Kaia'n, "In â mai mai ê mai. Khatin rilru siam ngawt zel su, hmeichhe thu dâwn tih takah" a lo ti hluk hluk. 

Pu Ramtea chuan, "Faka te lah chu an la zawng hmu si lo va, khawiah tak kalbo ang maw? Faka mawlh hi a ni mak ka tih chu, a pangngai tehlul nen" a lo ti ve nuah nuah a. Mi zawng zawngin U Faka chetdan chu mak an tih ka ring. Zoa paw'n tlaiah khan min rawn text a, "Patea chu mak ka ti tâwp thei lo, tihtirtu an awm ka ring tlat" a rawn ti a nih kha. Hei hi keipawh ka ngaihdan a ni deuh. 

Thingpui hâng kan in laiin Buangi'n, "Julie te saw rim ve la, a rawn hawn lai a nih saw. Kan khaw nula fel a nih saw, a hmelṭha bawk si" a ti ve leh ta. A va buaithlak ṭhin e aw. 

"Min duh ve tawp nang" ka ti hmuk a. 

"Duh ang, a zeihawi lo ve a, tiang lamah hian. Pasal nei lo rual a ni tawh bîk lo bawk a, a iai miah lovang che..ka nau chu a ni naa, makpa atan ka iai lo che tihna a nih chu" a la ti tak deuh deuh. Muansangzuali ka veizia leh ka thinlunga a lenzia hi an hre si lo, kei lahin ka sawi chhuak duh bîk bawk si lo. Julie chu ka sawi tawh ang khan nula fel tak zawng a ni ngei ang le..an la fak zel mai a. Ertu pawh a nei leh maithei a ni. An inah ka la kal lo va, zan khat na nâ na chu va len ve pawh a ṭha viau e. Zanin erawh Muansangzuali te ina len a lang tlat. Ka tihtur ve rêngah ka ngai bawk. 

An in kawt ka thlen chuan inleng an nei ve nual nge ni, an ri ve mam mam mai. A zawng hmutu ka nia lawm le tiin inthlahrung duh bîk lo chuan ka va lut ve ta râwih a. Min lo en ṭhap a, ka lai lek lek. Ṭhenawm hnai ho an lo ni a. Pu Thara chuan, "Eee..sir, lo ṭhu rawh. " A lo ti sawk sawk a. Ka ṭhu ve mai. Ka ṭawng ve hmain, Diki chuan, "Sir chu awm lo la aw, Sangteii hi kan hmu leh kher ang em tih a sawi theih hauh loh. I zarah chhungkua kan kim leh ta a, kan lawm takzet a ni. Zanin tlai khan chaw eia sawm che kan tum rilru deuh a nia, mahse, Pu Ramtea te'n ar an talhsak che tih kan hre ta sia, naktuk tlaiah i rawn ei ve mai a niang chu" a lo ti zat zat a. Ka lakah hi chuan sual ngai hauh lo mah se; ka ei lo laklawh tawh a, mahse, ka tilang bik hran lo. 

"Chutiang tiang a ngai hleinem, engmah tih a ngai lo, him damin kan hmu leh a, a lawmawm a ni mai. Khatiang kha ka beisei miah lo a nia" ka lo ti ve sasâwi a. 

Pu Thara chuan, "Ni lo ve a, misual kut aṭangin ka fanu i chhanchhuak a, A thim a vâr thlu lovin kha leh ram chenah i va kal a nia. I lo ei ngei tur a ni" a rawn ti ve luam a. Ka hnial duh ta bik lo, Sangpuii bula awmna chance a lo ni ve tho bawk nen. 

Heleni pa Pu Zara chuan, "Sir, han inzawt ta mai mai ila, Faka kha i lo ringhlel sa tawh nge, tiang khan i va hmu ta mai sia..sawi chi te a ni em?" A ti charh charh a. Ni e, hei hi ka zawhna dawn tam pawl tak kha a ni a, mi nâwlpui bulah kha chuan ka mumang avanga zawng risk ang khan ka insawi ve tawp kha a nia. Mahse, heta awm ve te hi chu tumah mi hrang an awm lo bawk a tiin, "Aa..u Faka kher kha chu rinhlelh ngaihna ka hre bik hauh lo. Mahse, sawi leh sawi hnu, ka mumang vang kha chu ni pakhat mah se; Pu Zaliana feh hâwngin thlama awmpui a neih thu a sawi aṭang khan ngaihṭhat lohna ka nei deuh tawh sa a, a êm leh a chem thlâma kan han hmuh leh tak siah leh changêl hmuna kan kala hnuhma engmah a awm loh danah te khan thil ka zeldin kual ve a, tin, a tuk chhun khaw ên laia thlâm chhung ka han belhchian leh deuh khan tap sira no pakhat fanghmirin an lo bawm deuh lûk kha ka hmu a. A hma daiha pu Ramngaia te thingpui inna chu nise a thlum an bawm da vek tawh ang tih ka ring deuh a. No chhungah khan thingpui nâwi tlemtê a la awm bawk. Tin, thlâm kha phiah fai ni si khan kawngka sîr lamah khan bawlhhlawh a thal phung a, hmunphiah kha phiah zawh hman loh niin a lang bawk. Khatiang a nih takah chuan thil ka zeldin ta vak a, Sangpuii hian ama thua thingpui a lum a rinawm loh a, a chhan chu a kal hun kha a hma vak tawh lo tlat. Changêl lak vata haw kha a tum dan a nih ngei a rinawm. Tin, thlâm phiahfai phei kha chu a ngaihtuah hman vak lo vang. Chuvang chuan Pu Zaliana sawi ang khan thlama a awmpui khan thingpui a in tir emaw aman a in emaw a ni thei, tichuan, Thlam an phiahfai lai emaw takin hmanhmawh taka kal thut a ngaih si avangin bawlhhlawh an phiahkhawm pawh an rûtfai hman ta lo a, a awmzia chu Sangpuii hi tu emaw chuan a ru bo tihna a ni thei mai ang a tiin ka ngaihtuah ta mai mai a. Kha ka zeldinna kha ringin a hmaa kan zawn lohna lam kawr hnâr lam kha ka zawh ta ngawt a nih kha..ka rindan tak zawk chuan Ngûr khaw dâi emaw tu te emaw thlawhhma thlâmah emaw an awmpui ka ring a. Khawtlângin kan zawn tawh avangin kawr kam leh ramhnuai khawi emaw laia awmhmun an khuar kha chu ka ring vak lo. Ka beisei ang ngeiin chul thlâmah an lo awm ta kha a nia.." ka ti ta duah a. Ka sawi thui bawk a, ka dang a ro ṭêp a ni. 

Muansangzuali ka va melh a, min lo melh kiau mai. A hmelhmaiah thlaphanna a la chambâng bawk. A âwm ve tho mai. Va nang hman ta lo ila, engtia tih zui zel nge an tum ang aw..U Faka sawi hmangah khan a tuka tu ten emaw an rawn lam tur thu leh a hriselna dinhmun pawh an exam vek tur thu te kha a sawi a. Sangpuii hi hralh an tum chu a ni êm lo maw..?! U Faka chauhin min hrilh thei ang chu. 

Muansangzuali thingpui lum ka in leh thei ta ngawt pawh chu ka hlim veng veng. Aman aw min la pawh chiah lo mah se; kei chuan ka bialnu angah ka ngai nghet hmiah tawh. Tu tan mah ka phal lo bur..titi hrang hrang an vawrh a, len rei lutuk ka duh lo, Sangpuii pawn hahchawlh a mamawh ve dawn lutuk tih ka hria. Midang haw hma deuhin ka haw ta a, veranda thlengin Diki zawkin min rawn thlah hlauh a! A va ṭul lo tak. Lunghnûr rilru zetin ka haw chho ta hnak hnak a. Ka taksa a chau tawngkhawng bawk a niang, khum ka deh rualin ka muhil ta bawrh bawrh a. 

A tukah School kal a ngai tawh si a, ka insiam malh malh. Vawiin aṭang chuan keimaha inbâwlhran ka tum ta bawk. Sa ka ei nasa deuh a, ka hne deuh tlat! Thlai ngei mai ka ei châk tawh. Muansangzuali pawn School a rawn kal mial e. A la kal ka ring vak lo a nia. Thawhpui ten zawhna an ngah ngang mai. A tawi thei ang berin ka chhang mai zel a, min ngaihsan hmel sawt ten ka hria. A âwm ve tho, an khaw tleirâwl rukbo chhanchhuaktu kha ka ni miau a! Ka ngaizawng êm êm tih erawh rin ngaihna an hre kher lo vang, a pawi lo daih zawk. Muansangzuali bo avang khan sports pawh an lo ṭhulh rih a. Vawiin lamah rêl ṭha lehin a tuk kha Hriati thihcham a lo nih lehzel si avangin ningani leh zirtawpnia sports chu nei mai turin kan rêl thlu leh ta a. Naupangho pawn an pawm thiam viau. 

Hawn kawngah Sangpuii te hnungah ngawi rengin ka kal a, ka zui ve zel tih an hre lo nge ni, An ṭhiannu pakhat sam tawi, pharvar ve hmel deuh hian ring angreng tak hian, "Sangpui, Sir nen chuan in tlanchhe nasa awm sia, in insi reng dawn sia..a nuam em?" A ti lâwng lâwng a. Ka nui vur vur mai. 

Sangpuii chhanna a zawi deuh a, ka hre pha lo. Samtawii bawk chuan, "Kei chu ka châk ve letling, Sir khan min han kai vel se, hmm..thingkung hnuaiah te khan min kuahbet vel se..awiii" tiin a nui awr awr a, ka lo lâi lek lek, an ṭhiannu sang deuh mai hi a rawn hawi let zauh a. Min hmuh rual rual chuan, "Lalnun, Sir a awm ve reng khi" a la ti zui! Lalnuni an tih chu a rawn hawi zawk a, zak lutuk maiin School kawngah chuan a tlan thla chan chan a. Sangpuii pawh a rawn hawilet zuai, a rei lo. Ka pensan ta a. Ka awm nuam ta sawt chu a awmzia pawh ka hrethiam lo. Tuna Sangpuii nena kan boruak hi tleirawl laia kan boruak ang kha niin ka hria a. Star neih hun lai, hmuh chânga lai leh ṭût bawk si, min duh ve deuh anga hriatna, confi hleihtheih bawk si loh lai boruak ang kha..ni e, khang hun lai khan kan rilru a thianghlim a, nawm pawh a lo nuam ber maiin ka hria. Inkiss chu sawi loh kut han invawnsak mai mai te kha kan hrehin kan zak ngawih ngawih kha a nia. Kei erawh sawi leh sawi hnu nuthlawi zûnin min phuar hma êm mai a, ka tal na hma hlauh zawk a.. 

Mahnia eirâwng inbawl ka han tum chu in chung ten an remti lo nasa mai a. A thihcham thleng tal chu ka eipui ve leh a ngaih hmel. Ka nin vang lam ai mahin alu fry mai mai pawh ka ei châk tawh êm a ni. Chumi chu siam ila tih lah inthlahrung mi lo nih si chuan a nuam vak si lo. Zanin tlai pawh arsa buhchiar leh anhlîng tlak leh samṭawk pumchhum tlawng kan hmeh a. Samṭawk ka ei tak nghek kha. Arsa phei hi chu hne a awl zual ka ti. Mizo hrawkah chuan vawksa hi a tui rei thei berin ka hria, uisa te pawh hi a tui a tui ti ve mah ila, a ṭhin vawi 2na angah hi chuan kan ei ṭha peih meuh tawh lo. Sa heh mi hi chu an awm hran ve hrim hrim tho a. Riah erawh ka inah ka riak thla tawh a, kan khati ta nuai bawk nen, an ni lam pawn min chelh zui bik lo. Hriatpuia nen Julie te ina va len ve kan rawt a. Sangpuii chungchang ka hrilh vek tawh naa, a kamtam lo bawk a, khatiang inlaichinna lam hawi zawngin zawhna a neih belh tawh lo reng reng, ṭul ka tih huna ka hrilh ve mai hun a nghak a niang e. Ṭhian ṭha tak a ni. 

Ke-in ka chhuk a, Lapuii dawrah min lo nghak a, Kuhva leh zialte kan lei zawhah Julie te in lam chu kan pan ta a. Julie te hi Damdawi in veng ep chiah Vengsâng an tihah an awm a. An vêng hi in a tlem ber maithei. Julie te in tak phei chu ka rin aiin a lo fâl a, kal kawngah chuan Hriatpuia chuan, "Kei pawn thil hrilh tur che ka nei ve asin. " A ti hul hak a. Zanin a awmdan leh a chezia hrim hrim hi a zângkhai lo ka ti dawn nge a thutak riau a, mak ka lo ti ru sa tawh rêng a. 

"Sawi la" ka lo ti sup a. 

Kal kawng melh ran chung chuan, "Baby hi chuan a hria ang, Hriatsangi nen khan a tleirâwl chhuah tirh Johna nen an inngaihzawn hma khan zan khat chu kan inru ve tawh asin. Mahse, Baby hian a nu leh pate bulah a thupsak hneh êm a, tuman an hre ve ta lo zawk a ni" a ti ta mai a. Ka rin loh lutuk lam a nih vang nge ka phâwk hrû mai. 

"A va'n mak teh daih ve! Ṭhianpa, chuan in reh zui nghal daih em ni?" Ka ti hluai a. A nui hak a, "Kei chu reh lo ve, mahse, Baby kha Hriati khan a hlau sia, a û khan a lo vau ve bawk nen, min hlat ta a. Johna nen an inngaizawng zui ta kha a nia. A la naupang ve êm bawk a, kum 16 emaw lek a la ni ang" a ti a. 

"Chuan?" Ka ti teh ngawt a. A awmzia a hrethiam tho ang.

"Kei chuan Hriati bak kha hmangaih ka la nei lo hrim hrim..ka nei leh thei ang em pawh ka hre lo. Baby vang vek a nia, amah pawh khan min ngaiin han inhmuh châng pawn min en dan a la danglam ṭhin tih ka hai lo. Baby khian min ngaizawng ve tlat si a! Hriati lahin a û a hlau sia..kan tawp lo thei ta lo a nih kha" a tih lehzel takah phei chuan mak ka tihzia ka hmelah a langchhuak hialin ka ring. 

"Baby'n a…" ka tih mêk laiin, "Kan thleng" a lo ti nghut a. Julie te in kan lo thleng der tawh. Sawi zui chi ni hek lo le, kawngka kan kik a, kan lut zui ta nghal a. An in chu a lian lua lo naa, a tawk tiu teu reuh hle. Julie û hian pasal a nei tawh a, a nau hmeichhia hi Aizawlah zirna avangin a awm mêk bawk. Amah lah an inah a awm khât si, a nu leh pate chauh chu an ni deuh tlawng a nih hmel. Tv an lo en ṭhap a. Min hmu chu a hamhaih deuhin ka hria. Kan khi lut sâng thung. Min lo be sawk sawk a, a nu pawh chu ka hmu tawh a, ka lo hre lo mai mai zawk a ni. A pa chu Pu Ramtea nau a ni naa an inang vak lo. An hmel hmuh erawh a nuam hle. Khaw mi ṭhenkhat te min zawh ang tho Muansangzuali ka chhan dan chu min zawt leh ta a, he zawhna hi ka hne titih der tawh. Ṭha tak chuan ka chhang ve mai bawk a. kan ṭhut aṭanga rei lutuk loah pa ber chuan a kawng kham chhuanlamin mut a rawt ta hlauh a. Min dîp ve run reng a, mu daih se kan zalên deuh ang chu..Julie thingpui lum pawh a tui khawp mai, Savatê a tluk lo hlek tih mai chauh a ni. Kan titi tui ta phian a, Julie chuan a thawhna hmun chanchinte a sawi ve luam a, Thana bialnu kha a hming ka hre lo naa, Hriatpuia zawkin, "Asangi kha a la thawk tiraw? Thana nen hian an innei ve hnai tawh ang a" a ti ta hlauh a. 

Julie chuan, "La thawk e. Asângi hi chu a felin a mang a zâng sia, Thana hian a tifuh dawn khawpin ka hria, innei vat vat se" a ti ve bawrh bawrh a. Hei tak hi Julie ka ngainat chhan, hmeichhia hi ka lo kawmin ka lo titipui ve nual tawh a. "Chumi khami chu i hria em?" Han ti ila, "Aw hria e, a fel alawm..mahse.." tiin an ṭhat tawk lohna emaw an tlin tawk lohna emaw hi an sawi zawm fô mai. Julie erawh a ni ve hauh lo, kan inhriatna chu la rei lo mah se, mi chanchin ṭha lo lai a sawi vawikhatmah ka la hre lo. A rilru a ṭha tih a hriat mai, hei vang hi a niang an khaw mite pawn an faka an chhuan ve êm êm ni. Ngaihzawng tur atan ka en lo a, mahse, tihian ṭhian tha tak ni zui zel ila ka duh khawp mai. Thurûk hrilhna atan pawh a rintlak ngawt ang. Veng kâr a lo hla ve deuh bawk nen, kei lahin bike ka keng si lo va, dar 9 pelhah kan haw ta a. Chutia kan pahniha kan han kal dun leh takah chuan a hmaa kan sawi bawk kha rilruah a rawn lang leh a. Mahse, aman bul a ṭan loh chuan zawh sek chu ka duh bîk lo. Ṭul a tih chin chu min la hrilh mai turah ka ngai. Mak ka tih zawk erawh Baby'n Hriatpuia a lo ngaizawng ve daih chu! Kha tak kha hriat thui a châkawm. Hriata lah a ngawi leh run tawh si a, ka zawt ta bik lo. Ani pawh khawhar inah a riak tawh bik lo va, an in pengah kan inmang ṭha a, ka in lam panin ka chho leh ta hnak hnak a. Kalkawngah U Faka ka hrechhuak, an la hmu lo tih bak chanchinthar kan la hre lo va, khawiah tak tlanbo ang maw? Khaw chhungah te hian a lo awm ru rêng ang em? Ka ring chiah lo.

Zingah ka tho hlim ha ka nawh laiin Sangpuii leh Heleni te'n chawhmeh an rawn zuar leh. Hahdamna hun pawh a nei ve thei lo a nih hi a! Antam leh Behlawi hnah ka leisak a. Pawisa ka va lak chhungin Heleni chu pawnah a lo chhuak daih. Pawisa ka pek pah chuan, "Sawi tawh la" ka ti sup a. A hun lo tih chu ka hre tho a, hun remchang kan nei thei lo êm a ni. Thutak zeta min melhin, "U Julie i rim kha..nizanah pawh" a ti ta sap a. Ka meng kâwk..Julie a thîk..ka nui hawk a. 

"Ka duh che. Ani ni lovin" ka ti nghut a. Ner sak chungin, "Class xii ka pass phawt ang" tih leh chhuah a rual nghal!..mahse, hei hi ka chiang, Muansangzuali hian min duh ve tho tih hi..a nuam dawn e. 

(An inngaizawng ṭêp aw 😂😂