Ka savate 10

KA SAVATÊ (10)

Ziaktu: Toni Râlte

Zanah khawhar in lenpuitu an rawn ṭhahnem leh hle. Zai lah a nuam viau zel bawk a. Julie pawh kha a ṭhiante nen rawn kalin a hnuah Baby nen an ṭhu dun ta daih a. Ka lo ring dik chiah a nih dawn kha. A naupangchhia vak tawh bîk lo chuan ka hria, kei ai chuan a la nau tho ang a. Hlawh nei a ni bawk a, a langsar vuah mai. Tunlai nula ho atchilh skin care lam a tuichilh ve hle a nih ka ring. Mak ka tih deuh chu Pathian hian mipa hi chu min lo siam hraw deuh nge ni, hmeichheho angin in tuai ve hliau hliau lo mah ila, hmai duk leh bawl tih angreng, vun chhe hrep hrup hi kan nei bik tlat lo zel hi..vun mam leh no tak erawh beisei ngam tur kan ni lo a, ni sa lah kan tuar ṭhang, Mipa kan nih vang hian Pathian hian inenkawl ve vak ngai lo turin min siam uluk bîk a ni ngei ang. Nizan ai chuan kan bâng har ta deuh e. A khât tawkin Nu Tlani a han ṭap leh râwih râwih ṭhin a, tawrh thiam hi zawng a harsa dawn hian ka hre êm mai. Ka lainat ngawih ngawih. Thi vek tur kan la ni si a, kan ṭhian, kan unau te an han thi a, a tirah chuan thi ve thut thei kan ni tih inhriain kan han inngaihtuah ngei tak naa, a rei a; Pathian thilsiam danglam tak kan nihna hi a lang leh ṭhin ka ti fô, naktuka thi mai thei tura inbuatsaih hi chu a ṭhat rualin kan thih hun turte hi hre lawk kûr ta ila..tu hi nge hlima nui thei awm ang le? Hei hi a ni, min siamtu ropuina chu. Mahse, thih thut thutna hi a tam tawh si a, kan thlarau tana kan inbuatsaih erawh a hun tawh takzet thung. 

Banah chuan Hriatpuia nen ka inah kan inzui thla a. Thingpui hâng kan lum a, Zoa pawh a rawn lut thla ve. Baby'n min rawn call a, "Inah kan awm a, eng nge ni ta?" Ka tih chuan, "Ee..kan lo kal ang" a ti ringawt a. A dah leh nghal daih. A hnu lawkah Julie nen, a ṭhiannu nen an pathumin an rawn lut ve a. Chep zetin an ṭhu ta hlawm a. Kei erawh stoolah ka ṭhu thung. Baby chuan kan lo inhmu tawh tih a hre lo nge min han inhmelhriattir ṭha leh a, Julie nen chuan kan innuih var var mai. A ṭhiannu chu Maengi a lo nia, nula phanchang ve lam, zaidam hmel zet a ni thung. Thingpui te chu ka chhuan belh leh a. An ṭawng duh hlawmin an bula awm a nuam phian. Baby rilru ipik lutuk pawh an chhawk zangkhai ngei ang le. 

Maengi chuan, "Kan Sir chu i lênglâm lo riau mai. Aizawl lamah i hung ṭha deuh a niang a" a han ti nghal pang a. 

"Hun tur pawh kan hmuh zawh ve loh hi" ka lo ti vut. 

Julie chuan min rawn melh ralh hian, "Mawina, damlai lû a sûn mêk a, râl a ngai zawk" a lo ti sap a. Terini nen kan chungchang hi hre lo pawh an awm lo a nih ber hi a. Ninawm. 

Titi dang vawrh ka duh avangin, "Julie, Lianpuiah chuan nangmahin i khawsa ve mai nge?" Tiin ka melh a. 

"Aw..quarterah ka awm ve mai, kan khuaah zawk hian PHC hi awm zawk se a ṭha tur" a ti a. Lianpui khawtlâng hruaitu hmasate hi an fing deuh nge ni, Zopui aiin an lian miah lo naa an khuaah hmun pawimawh a awm nual. High School exam centre pawh an khuaah a awm a, Police outpost pawh tunah hian an sawi ri ṭan mêk tawh. Bank pawh nikkumah khan an bun tawh bawk. Hetiang a nih zel chuan Zopui aiin an changkang zawk zelin a rinawm. Hruaitu hmasate bengvar loh zâr an zo ta a ni ber e. 

"I hlau lo mi?" Hriatpuia chuan a lo ti vat a. 

"Hlau ve ṭhin tho e, kan thawhpuinu fapa hi ka riahpui mai zel"a ti liam puat a. Nula mahni maia damdawi in hnaiha han awm rek rek chu huaisen pawh a ngai ve hlein ka ring. Damdawi in hi chu a hrân duh hmel bawk nen. Sana a bih zauh a, "Kan va haw ve tawh ang e, a tlai zel..in riak ho pawh an thawm ka hre ṭan" Julie chuan a ti a, a ding nghal hluai bawk. Kan ding ve nghal zat a, inchelh khawmawi chi nia a lan loh avangin kan thlah ta nghal a. Lêng turin min sawm leh tawh. Baby hian engtin chiah nge maw a bulah min lo sawi ni..kei lahin rilru dang ka pu thei der si lo, ka thinlungah savatê chiah a awm tawh si a. An haw tak hnuah chuan keini pawh mutzai kan rêl zui titih. Zanin chu tlangval ṭhenkhatin games an khel a, kan muhil har deuh. Kei phei chu thingpui ka lo in hnem deuh nge ni ka zun a chhuak sek mai a, a inthlahrunawm letling. 

Kawngka kalhna ri rak thawm ka hriat rual chuan ka harh zawk a, mahse, tu emaw zun zûng turah ngaiin ka maimichhing lehnghal. Ka ep chiaha mu val senior U Rema chu a hnâr bur bur a, a chang leh a ka a tep ang chuap chuap a. Zan reiah chuan a bengchheng ṭêp a ni. Mutchhuakin min zêm leh chiai chiai tihin mawlhtu nei niawm takin ka meng leh kâwk a, light hi choka lam kan on avangin kan awmna lai vel chu a ên pha ve deuh a, êng lutuk erawh a ni lem lo. Ka dinglam hawi zawnga saisir ka ni a, a awmzia chu kawngka piah lawka mu ka nih avangin bang thlang lam hawi zawngin ka saisir tihna a nih chu. Ka han meng chu ka ep chiaha mu hnâr thlurh thlurh U Rema ke zawnah chiah chuan mi pakhat ding hi ka va hmu ta a. A mutpui pa a nih ringin engahmah ka ngai hran lo, kawngka kalhna kha a ri rak bawk nen. Mut ve a tum ni turah ka ngai a. Chhin leh ka tum lai takin chu mihring ding chuan a bân lekkângin U Rema chu a kâwk ta mai a. Mutchhuak a bo duak thei nia! Hmuh fiah loh hlauin ka meng zau nghal kâwk bawk. Chu pa ding run chuan light a hnungchhawn tlat avangin a hmel ka hmu mai thei si lo. Ka che ngam mai tawh bawk si lo, thaw dêp dêpin ka melh ta reng a. Chutah le U Rema hnâr chu a reh nghal duak a, thawm dang reng reng hriat tur a awm ta hauh lo mai. Kei hian mumang ka nei leh em ni zawk..a la ding kur bawk si, vanneihthlak zetin bang kil lama mu Zara an tih mai, tlangval lian leh bumro ve tak mai chu a rawn khuh ta hlauh a. Chuveleh mihring ding run kha a che zawk a, thawm nei hlek lovin keini kawngka bula mu te chu min rawn kân zauhin a bo zui leh ta mai a! Kawngka a ri miah lo. Mak hi ka ti nasa khawp a! Mihring ni ngei chuan ka hre bawk si, amah kha palian lam, lu pawh buk ve lam a ni tih ka hria. Mitthla tur âwm ang ka hrethiam miah lo thung. Sana ka en zauh a, zing dar 2: 23 chiah chiah a ni. Thawk ka la hawk hawk a, ka lung pawh a lo phu rang leh hman ngei mai. Ti nge hetiang thil naran ni lo hi ka tawn ziah bîk le aw. 

Mutthilh leh mai theih ni tawh hek lo le, Hriati chungchang bawk ka ngaihtuah leh lo thei lo va, a ruang kha Johna khan rawn kil chu sawi loh a hmel hmuh tur vawiin thlengin a la awm lo hrim hrim te hi mak ka ti deuh. Khati khawpa inzui nasa, innei mai tura mi ten an rin vek tawh, a bialnu ruang takngial pawh rawn hmu lo va a awm thei chu mak ka tih bakah a pangngai lo tih ka hre bawk. Ka buaina tur chu a ni hauh lo naa, Hriati'n min lo rinngam tawhna te avang pawn Johna lakah pawh ka lunghnûr deuh. Tihtheih erawh ka nei vak lo thung. Hun hian tuna thilmak te hi a rawn chingfel thei êm ang chu maw..ka hriat loh kârin ka lo muhil ve leh ta hrâm a. 

Sawi tâk ang khan kan school leh Higher lam te nen sports kan tum kha a nia. Kartawp lam kha kan tinzawn sa mah nise, ni khat thil thua zawh mai theih a nih bîk loh avangin kar thar aṭang law lawa nei turin kan rêl ṭha leh ta a. Zirtawpni chawhma chhung lehkha kan zir hnuah chawhnu lamah chuan house pahnihte chu items neih dan leh neitu tur siam rem nan hun kan pe ta a. An phur kher mai. Sangpuii leh Heleni te pawh an houseah lungawi hmel takin an ṭhu ve ran a, incharge mah ni ila, va inlan zut leh va ṭawng ve zuah zuah kha ka hreh avangin ka va kal ta rih lo mai. Kar tharah chance a awm tho vang. Nimin tlaiah lah khan ka fawp ngawt a! Diki lahin min phâwk ṭêp lehnghal. Ka fawh avang khan Sangpuii hian min ngei viau ang em le? Nge ka rilru ka sawi kha lawm takin a lo dawngsawng ve zawk ang? Engmah a sawi si lo va, awmdan thiam a har. Phone tal nei ve se a ṭha mai tur. Heleni kaltlanga han biak sek lah kha ka inthlahrung ve deuh bawk si. Hun thawl vawikhat chauh tal chu kan la mamawh a ni. Nimin tlai khan a pa khan a hau zui lo ni turah ka ngai, School a rawn kal ve leh danah. 

Ka in ka chingfel e ka tia, in chungte bungraw ṭhenkhat an rawn dah thla bawk nen, a hnawk rum mai a, ka awm thiam vak lo. In chungte inah zel chaw ka la ei a, han inbâwl hran kha nuam ka la ti lo deuh a ni. Pa Zawma unaute an la châm bawk a, a cham thleng an awm dawn a niawm e. A âwm ve reng mai. An tu leh fate ho erawh an haw tawh thung. Pa Zawma te hi an khua a la har dawn chauhin ka hria, fa sûn hi a na ngawt ngei ang, an ni phei chu an fapa neihchhun an lo sûn tawh bawk si, an vanduai ka ti ngawt mai. A remchan zawk avangin Pa Zawma kêl lei chu ka inah kan sâwngbâwl ta a. Kel sa hi chu sâwngbâwl nasat a ngai ve bawk nen, ka thiam vak lo. An makpa ti mai ang, Pa Zawma farnu fanua pasal Zira an tih mai hi chawhmeh eng ilo siam bâwl vel peih tak a ni hlauh a. Amah nen, Zoa nen kan pathumin kel sa chu kan siam ta a. Kan ri ve laih laih mai. 

 Zira chuan kan chhuankai tawh hnuah zial ṭankai pahin, "Nizana lo lût kha in hmu ve em?" A ti zawi sup a. Ka lo phu deuh zawk hman. Keimah chauhin ka lo hmu emaw ka tia,. A lo hmu ve a nih awm chu. 

"Tu chu?" Zoa chuan a lo ti hû a. Zira chuan min rawn melh zawkin, "Ka hre lo, a hmel ka hmu thei bîk lo va, palian lam, lu buk ve tak zawng a ni. A chhuak leh nulh bawk sia, ka umzui ṭêp a, mahse, midang ka tithlabâr ang tih ka hlau a, ka umzui ta lo a" a ti sur sur a. 

"Ka hmu ve alawm, mahse, a chhuah dan tak kha ka lo hmu lo va" ka tih chuan Zoa chuan makti fêin kan pahnih chuan min melh tawn a. Engmah a hre ve lo tih a lang reng mai. Baby a lo luh avangin kan sawi zawm duh ta lo va. Baby chu tukverh bula chair-ah ṭhuin a dak vang vang a.

"Johna rawn lang miah lo hi mak ka ti a ni. Lo inṭhen pawh nise, kha chen lo inzui tawh, hetianga a ruang takngial pawh hmu lo va a awm thei hi " a ti sêp sep a. 

Zira chuan, "Nia, mahse, engkim hi pawm thiam a ṭha. Johna pawh rilru hrehawm takin a lo awm ve reng maithei asin" a lo ti var a. 

"Hriati tak chu aw..Aizawla kan awm chhung reilotêah te khan, 'Kan khua ka ngai tawh. Ka inkhawm châk tawh' te kha a ti reng a, kan haw ta chêng a, tiang hi a ni leh ta si. Kei chu engtikahmah ka hriatthiam theih ka ring lo. Engvanga hetianga ama nunna hi la ta mai nge maw a nih ang le ka ti" a ti leh mawlh mawlh a. Sawi ve tur a vâng duh viau. Ka thu hriat zozaite kha a chhungte bula sawi chhuah chi rual a ni der si lo. Khatiang thurûk ril zet ka lo hre ve ta te kha pawi ka ti rum rum mai. 

Zoa'n thingpui hâng a va thli a, min rawn pek pah chuan, "Zanin hi a tawp zan tiraw?" A ti sup a. Ka lo bu nghut ringawt. Tlaivarpui a nih chiah loh avang khan leh pa Zawma te ngenna avangin zan thum an lenpui dawn a ni. Pa Zawma te tan chuan an thlakhlelhawm ve bawk a. 

Baby chuan, "Naktukah In kan singsa dawn a, Zoa, hna thawk bik suh aw. Sangzual, nang phei chu ka ring che a nia. Julie te pawh an rawn kal ang" a lo ti zung zung a. Khawi danga kal chi pawh la ni lo chuan a. Julie nena min hmehbel an tum deuh erawh nuam ka ti lo. Han iaina chhan tur ka nei miah lo naa, Savatè bakin ka rilru an luah thei meuh tawh lo a ni. Julie chuan kei aia ṭha a hmu thei tih lah ka chiang. 

"Julie hi tihpui i tum chiang" Zoa pawh chuan a lo ti var a. A nui ruh ruh bawk. Baby pawh chuan nui chungin, "An inhmeh i ti ve tho em? " A lo ti daih a. 

Zoa chuan, ka rilru a lo hriat thawi tawh avangin ka mitmei vêng ru deuh si hian, "Nia, hmeh ve reng, mahse, duhzawng leh duh loh zawng hi an awm ve a, hmehbel chawt chawt chi an ni vek bik lo a nia" a ti a. 

Zira'n, "Kei Julie hi a hmel chu ṭha ka tih rualin a chut lek lek em aw ka ti deuh, a zeihawi vak lo tlata hriatna ka nei tlat zel mawle" a lo ti ve bawk a. Ṭhalai awmkhawm tih takah ngaihzawng tih vel chuan kan titi laimu a la luah hneh ve hle a nih hi. Kêl sa ka chawh rawk rawk laiin kawngka chu a rawn inhawng dêk dêk a. Ka beisei loh lutukin Sangpuii leh Tleipuia te'n chawhmeh an rawn zuar leh ta. Anṭam leh tomato leh zikhlum chiah an lo nei tawh a. Baby chuan, "Naktukah kan chang leh awm si lo va, a vai khan la law law ila a ṭha ang. Anṭam phei kha chu sa pawlhah" a lo ti sawk sawk a. An hralh zo chu a ni ta der mai. Muansangzuali pawh a lawm hmel kher mai. Lawmthu pawh a sawi ngun teh e. Hlim taka an chhuak dun chu ka en zui vang vang a. Baby chuan min lo chîk deuh nge, "Terini'n Sangpuii a thîk ve ngawt kha mak ka la ti reng" a ti hap a. 

"Nia, a â ngawt mai" mahni inbum chungin ka lo ti a. 

"Thîk awm tak pawh a lo ni ve thei tho bawk" a ti ta khauh a. Zoa nuihza insûm chu ka melh rum ngang mai. Mi zawng zawng bulah Muansangzuali ka duh tih sawi kher ngaiin ka hre lo. A ṭul ber lo bawk. 

"Chutiang a awm lo' ka lo ti hluk a. 

Zanriah kan ei kham aṭanga darkar chanve hnu velah ka pum a rawn na riai riai a, ka zuk inthiar a, ka kua chu a dik reng, nahse, ka pumna chuan zia lam a pan thei der lo mai. A rei telh telh a, a na tulh tulh bawk si. Eng emaw ei sual ka nei a niang ka ti a, kan chawhmeh ka mitthla nghal zut zut. Kêlsa bakah chakawk tauh leh bawkbawn bai, dailuah hâng chhum kha a ni mai a. Hmarcha nise thak hi ka ngam vak lo va, ka ei tlem ropui si. Ka thaw te a sa phat phat a, thlanfîm a rawn bâwl ṭawk ṭawk ṭan ta bawk. Mi bula ka ṭhut theih ngang loh avangin Hriatpuia leh Zoa te bulah ka chin chu sawiin ka chhuak ta a, inah lutin khumah ka bawk thlawp a, a hnuah phei chuan ka vial ta ngawlh ngawlh mai. Tawrh nuam tak zawng a ni mawlh lo mai. Zoa leh Hriata te an rawn chhuk ve a, tui min lumsakin chi an al a, chungte chu ka'n in sasawi a, ka luak a chhuak êm êm ringawt. "Luak rawh, a ṭha zawk" an tih avangin ka va luak ta bawrh bawrh a. Thawl khat chuan ka thawl deuh huai naa, ka pumnâ chu a reh thei chuang si lo. Ka mangang ve deuh, aieng tui an ti, soda te chawk tuiin min intir thul. Eng ka ang thei hauh lo. Khawhar in lama kal te pawh an bâng ta hial a! Kan la inbuaipui kal reng bawk si. Baby leh Julie te an lo chhuk ve a, A hnuah Nu Tlani a rawn chhuk ve bawk. A zahthlak viau naa zah sawi hleihtheih pawh a ni tawh lo. "Damdawi inah kan kal mai dawn mawni le" an tih ri ka hriat chuan, "A ngai lo vang, ka zia mai ang. Nachhawknain in jection ila" ka lo ti ṭâwk ṭâwk a. 

Hriata chuan, "Chutiang ringawt a ni thei nang, ei sual eng emaw pawh i nei a ni maithei asin" a lo ti vat a.

Julie chuan tlaia kan chawhmeh a lo zawt a. An han sawi chuan, "Chakawk chu i ei sual em mawni dawn le..eisual a awl ve riau a, avil ei phawt teh. Jection chu nakin lamah" a lo ti var a. Avil chu Baby te'n an allergy avangin an lo kawl hlauh a, an han la vat a. Ka ei ta a. Ka rilruin ka ṭawngṭai nasa ve khawp mai, ka nu ten hria se a mangang leh ngawt ang. Nachhawkna injection chu Zoa'n a zuk lei vang vang a, a tlawmngai khawp mai. Avil ka ei hnu darkar chanve velah ka khèlah an health worker pu Duha'n min chiu ta a. Kar loah min chhawk ta a, a hmate khan lo inchiu daih tawh ila ṭha tur, kan buai ta hrep ringawt a. Ka inthlahrung hle mai. An fel êm zawk a. Ka damfel hnuah chauh Julie pawh a haw. Zira leh Zoa ten an zu thlah tain ka hria. In chungah chhoin mutna pawh an lo phah diam tawh a. Pum hi chuan min khawih na thei khawp a, ka chau ngang a niang e, ka mutna ka deh rualin ka muhil a ni deuh mai e. Tibuaitu nei miah lo va ka muhil thei chu lawm tak ka ni. Ramhuai leh thla vel tihbuai chi pawh ka nih mai mai loh hi a..ka chau êm mai.

Baby lo sawi tawh ang khan a tukah chuan in chu kan siksawi ta a. Inriak tlangval tam zawk an in pu chhuak ta bawk nen, Hriata leh Zoa te nen kan pathum erawh chuan min la chelh a, mi pali dang an la riak ve dawn bawk. Ka pum nâ pawh a rawn awm leh ta rih lo. Julie pawh a rawn lang leh a, kan inkawm nêl telh telh a, ka ngaina tawlh tawlh. Ka ngaina ka tih hian inngaihzawnna boruak ang zawng chuan a ni lo thung. Ṭhian atana fel leh inpe zo tak, midang puih nuam ti tak a ni tih ka hriatna hian min ngainattir a ni ber. Ka ngaihbel emawni amah hi chuan ka rilru ang lo deuh hi a pu nia hriatna ka nei deuh ṭhin, min han biak leh melh vel danah hian. Mahse, ka sawi fô tawh angin ka thinlung hi tu emaw lakah a tâng tlat tawh si a. Julie chu Muansangzuali la tawng lo ni ila, nupui atan hial pawh iaiawm loh tak, rilru tluang tak niin ka hria. Mi dang chanchin a sawi dan hrim hrimah pawh Terini nen chuan lei leh van ang vel an ni. Ka ṭhianṭha tak ni reng se ka duh ngawt mai. Nilêng deuhthawa kan chet hnuah chuan an in pawh a felfai ta kuar mai. Ka ina an bungrua pawh kan dah chho vek tawh a. An in hi a te chhe lo bawk a, chhiat an tawh pawh khan an ṭhiat êm êm lo a ni.. an chhung leh khat bakah keini ṭhianho nen tlaiah chaw kan eiho leh a, inriak tlangval pawh an sawm tel naa, an tlawmngai deuh nge an rawn lang lem lo. 

Chaw kan ei mawlh mawlh laiin Hlimi thih zana Terini te nena kan mut ngawtna ina an nuthlawi ka tih Mami khan, "Sir chu Hlimi lumen zan kha chu i theihnghilh tawh lo vang a" a rawn ti lâng lâng a. Midang an tam lo hlauh a, ka zak nêp deuh. Lâi ru zeta nui chungin, "I ho mai mai" ka lo ti a. 

"Ka zun tum pawh ka ṭhulh ringawt alawm..in bei laklawh ve ropui si" a la ti zui! A va nghal tak e aw. Julie chuan, "Ehh..sawi chiang law law teh" a ti a. 

"Ka ngam lo, Sir hian min ngei palh ang. Bakah pakhati lahin pasal a nei tawh dawn si" Mami chuan a ti leh lar lar a. A nuin a rawn ko hlauh a, ka thaw huai mai. Julie mitmenga zawhna lo lang chu chhansak kher ka tum hran lo. Ka bialnu a ni lo va, ka insawifiah a ngaihna ka hre lo ve. 

Zanriah ei khama kan insengfel leh vek hnuah ka inbual chauh a. A vawt lem lo bawk a, a nuam daih zawk. Ka lu ka hrûk hul mêk laiin Heleni call ka dawng hlawl mai a. Zauthau ru zetin ka la a. Thaw hlawp hlawp hian, "Sir, Sangpuii kan hmu zo lo, a awmna i hria em!" A rawn ti ta mai! Ka bìng mup ni maiin ka hria. 

"Eng nge a awmzia?" Ka ti hluai a. Ka aw pawh a khur deuhin ka hria. 

"Ih,..englo, chawhnuah khan vawk chaw la turin a chhuak a. A pu Ramngaia te huana changêl la tur ang khan a insawi a, mahse, khaw thim hnu thleng pawn a rawn haw ta si lo va, hei a pa te ngaih a ṭha tawh lo va, zawn an tum mêk" a rawn ti ta a. Ka lungphu ranzia leh hlauhthawnzia kha aw. Hetiang tak hian he tleirawl hian ka nunah pawimawhna a lo nei tawh a ni maw?! 

"Ka lo chhuk ve dawn..khaw nge i awm?" Ka ti vut a. Sangpuii te ina a awm thu a sawi a, a dah zui nghal. Kei pawh ka insiam sawk sawk a, chanchin chu midang han hrilh thawt thawt kha a kamtamthlak ka tih deuh avangin a tu amah hrilh lo chuan, "Venglaiah ka zu kal lawk ang e, ka rei lo vang" tiin Baby ka hrilh hrâm a, inleng an la ngah tho bawk a, ka awm leh awm loh a hriat êm êm bîk loh ang chu maw. Bike in ka chhuk a, A vawk chaw zawng chu chen chen thang thu a awm lo hrim hrim. An ngaih a va ṭha lo har zawk e aw tihte ka ngaihtuah a. Tunah dar 7 a pel tawh chu a nia. Mawhpuh tur ber hre si loin ka thinur hlur a, ka tâwt up up a ni ber mai. Tun hnaiah thil danglam tak tak a thleng zeuh zeuh bawk si, Thawliana kan tih ve tak mai te khan a lo ru bo daih em ni ang? Nge in sâwitu te zawk khan..aaa, ka ngaihtuah thui ngam lo. A pate leh amah zawn tumtu te chu an veng panna kawngpêngah ka tawk hlawm a, mahse, ka tlan tlang ta phawt. An inah ka lut nghal a, Heleni a lo awm vâng mai. A mit a sen râm danah a ṭap a ni ngei ang. Tleipuia pawn a mittui a lo hru fap fap a. Diki te nufa erawh chuan tv an lo en! 

"A nu thlan en nachang ka lo hre miah lo va, a lo awm rengte hi a niang e" ka tih chuan, Diki chuan, "A pain a rawn en tawh alawm, a awm lo. Bakah a kalna lam a ni lo va, a pute huan pana a kal lai chu hmu pawh an awm ngei a niawm e" a ti lawi bawk si. Ka lakah hi chuan ṭhat hi an chhuah ve hrâm hrâm zawk a, ka rindan tak phei chuan Muansangzuali bô hi a rûk tak chuan an lawm phian maithei a ni. Rilru chhe zet han put mai pawh a awl rum rum mai. 

"Helen, i lo kal ve duh em? Va kal ve ang hmiang" tiin Heleni chu ka sâwm a. 

"Apa ten kal ve lo mai rawh min ti tlat a! " Ngui zetin a ti a. Muangchang hman ka nih loh avangin ka tho vut a, nichina amah zawngtu te pawh vat thei turin chak zetin ka tlan chhuak leh ta a. Ka va pawh ta thuai. Pu Ramtea te in kawtah ka bike ka dah a, ka zui ve ta ringawt. 

"Sir chu engtin nge i lo hriat ve? I va che rang ve" ka la hriat ngai lo, pa ruakhau deuh hian a lo ti a. 

"Heleni khan min lo hrilh a,." Ka ti ve mai. Chutitaka ka ngaihven chu mak an tih ka hlauh vangin, "A hmain a nu thlâna a kal hi ka hmu ṭhin a, a nu thlâna a awm leh awm loh min rawn zawh takah chuan thil awmzia ka lo zawt a, a rawn sawi ta vek mai a nih kha" tiin ka tlip leh ta hrâm a. Pu Thara chu a ngawi ran a, a hmel a thutakin lungngai leh eng emaw ngaihtuah hmel a pu a, biak pawh ka tum bik lo. A fanu meuh chin hriat loha a han awm takah chuan a rilru a hah ve ta pawh a niang e. A pute huan chu a lo hla lem lo va, balhla leh changêl a awm nual bakah eng eng emaw chu an ching ve bawk. Zan a nih vangin engmah chiang takin ka hmu thei bik lo va. Huan lû aṭang chuan, Sangpuii chu an han ko lauh lauh a , thehmeh ang maiin a reh dûk mai. Thlam ṭha vak loah chuan kan chhuk a, a êm leh a chem an lo let ngât mai. Changêl hmunah chuan kan lut phei ta nghal a. Kan ko pah reng bawk. .Mahse, Muansangzuali hmel reng reng hmuh tur a awm si lo. A hnuhmâ han chhui dawnin a hnîak takngial pawh hmuh tur a awm hauh lo. Huanah chuan a kal ngei tih lah a êm leh chem aṭangin a chiang si. Khawiah tak chuan kal ang maw..ka mangang ta riau mai. Khawmu chawi te hi a lo ni hlauh ang em? Nge mihringin an ru bo zawk ang? Rukbo a nih ka hlau mah zawk. Kha hmeichhe tleirawl rilru chauh ni lo, taksa thlenga thianghlim kha rukbo atan chuan ka phal hlawl lo. Ngaihtuahna chi hrang hrang nen ka theihtawpin ka zawng kual a, thim leh êng lam pawh sawi theih a ni tawh lo. Ka kal ṭhang lo a ni bawk a, ka tawlhthlu zing khawp mai,. Dar 10 a rik thleng pawn Muansangzuali chu hmuh a nih tak loah chuan beidawngin khua kan pan leh a, Khawtlang hruaitu te kan pun ta tawp mai. Mizo tlawmngaihna a rawn inlar leh ta. Information mike aṭanga mi bo awm thu an puan zawh rual chuan khawlaiah mi bo zawng tur an tlim hmûr tawh. Thla an va timuang tehlul êm.

Kei pawh mutthilh ka tum bîk awzawng lo. Ka haw phawt a, tlaivar huamin ka thawmhnaw te ka han thlak tê tê a, chaw tlem ka bar bawk. Ramhnuaia ṭamchhawl a hlauhawm ka tih deuh vang a ni. Zoa leh Hriata te pawh an rawn inṭam at mai. Zoa hi chuan ka rilru a hre tawh a, Hriata tak erawh Sangpuii chungchang ka la hrilh lo. Ka chemte lei ve, ka roh ve êm êm chu ka pai rân a. Kan chhuak leh ta ṭhâm ṭhâm mai. Dik tak chuan in sâwi tih te, thaw hulh hulh te, Hlimi thlâ te avangin khawtlang a ralṭi mêk a, Hriati a lo inawkhlum ve lehzel nen, chuta kara Muansangzuali a han bo lehzel chuan mitin mai chu min titâwtin sawifiah thiam si loh hian kan ni hrû hlawm vek mai a. Boruak chu nuam lo tak a ni. Hotu te'n pâwl hrâng hrângah min ṭhen hrang ta thluah hlawm a. Pu Ramngaia huan leh a chhevel chu kan pâwng dap tawp mai dawn a nih hmel. Kawng dang awm miau hek lo le. Rilru thabâr leh rilru chhungril rit ngawih ngawih chunga ka ngaihzawn êm êm Muansangzuali han pawngpaw zawn chu a nawm loh dan tur in hriatthiam ka ring e. 

Pu Ramngaia huan sir dinglamah kan kal a, a thlang lawk hi luitê a ni a, tui pawh a tam hran lo. A khawkrâwk ve viau lehnghal a. Chu kawrtê chu kan zuk pawh ta law law a, lengkir a awm nual an tih avangin chulai lengkirah te chuan a lo tla palh mai em ni ang ti rilru chungin ṭhahnemngai êm êmin ka zawng a. Ṭhiante zâi pawh ka ngai thei meuh tawh lo, mak min ti ru viau maithei a ni. 

"Lalpa, him damin min hmuhtir hrâm rawh aw" tih thu ringawt pawh hi ka rilruin vawi engzat nge ka chham zozai ka hre thei tawh lo. Ka mangang takzet a ni. Kawrtê chu engtianga thui nge kan zawh pawh ka hre hek lo. Khua a rawn vâr a, Pâwl hrang hranga ṭhen ten Muansangzuali kan hmu lo vek! A mak a ni! Heti ringawt zawng. Khua a rawn vâr takah chuan tha thara zawng leh turin khaw lam kan pan leh ta phawt a. Chauh reng reng ka hre lo. In ka thlena ka inbualfai hnuah ka hah leh chauhzia ka hre thei chauh. Mahse, chawl thei niin ka inhre si lo. A thi nge a dam tih tal hria ila aw..ni lo, a thi thei lo, thi tur chuan ka ngaihtuah ngam thlâwt lo a ni e. Tukṭhuan ei khamah khawm pawh inkhawm lovin ṭhalai zawng zawng tihtheih deuhthaw te chu kan chhuak khawm leh ta a. Tumah chau leh peih lo hmel reng reng ka hmu lo. Mizo nih hi chu a nuam ṭhin a, a nuam zel bawk turah ngai ang. Group hrang hrangah min ṭhen darh leh a, khaw ên lai te a ni ta bawk a, beiseina sâng tak nen kan kalna tur lam ṭheuhah kan kal leh ta sung sung mai. A classmate te ho pawh ṭhahnem an rawn ngai hle. Muansangzuali te unau chanchin leh an chhungkaw dinhmun hre vek an ni hlawm bawk a, lainatna nen hmuh ngei tuma zawng vek kan niawm e. 

"Sangzual, i lungngai lutuk a nih kha. Damin kan hmu leh êm êm ang" Midang hriat ve loh turin Zoa chuan min hnem mawlh mawlh a. Chhan dan tur ka hre hlawl lo. Hriatpuia bulah pawh Muansangzuali nen kan chungchâng chu ka hrilh ta vek a, khatia ka inbunthâwl khan ka zia ve hawk thei. Chawhnu lamah kan chawfun ṭheuhte kan han bar hawng hawng a. Ka ka chu tui lo teh mah se; chakna ka mamawh avangin ka ei lui hrâm hrâm a ni e. Chawhnu thlangherah pawh kan la hmu ta chuang lo. Bei a va dawng teuh si êm…khua a rawn thim ṭan a, khaw lama lêt leh tawh tura tih ni mah ila lêt ka tum lo bur. Engtikawng zawng mahin ka muhil thei dawn chuang lo. Aidu hmun kan thlen chuan lêt mai ṭha an tih thu an sawi nak nak a. Ka ngawi reng ringawt. Ka tlatfal an phal dawn loh avangin engtia chet lak chi nge ni ang aw tih ka ngaihtuah rauh rauh a, idea ka nei thei mai si lo. 

Kan hruaitu pakhat hian, "Engpawhnise, khaw thimin min nang leh ta bawk si nen, khuaah lêt leh phawt ila, ruahmmanna ṭha zawk te pawh kan siam ang a. Hetia pâwngrin zawn ngawt pawh a dik ber lo" a tih tâkah chuan ka tum dan thlakin an ruala lêta a rûka zawn ṭhat leh mai chu ka tum ta a. Relhbo ta ngawt ila, "Sangzuala pawh a bô" tiin an buaina ka belhchhah thei tih ka hai lo. An thu chu awih ve phawt ṭha ka ti a ni. 

Tichuan, khuaah kan kir leh a, "Khaw ên veleh zawn leh nghal tur" an ti ta chiah a. Dik tak chuan khaw chhung pawh hi a ralmuan tak loh êm avangin mipa zawng zawng deuhthawin khaw chhung han chhuahsan vek pawh kha a rem ṭeuh bik lo a ni. Zan thim thamah chuan inhmuh a lo harsa bawk nen. Kei pawh inah ka chho a, ṭhiante bulah chuan, ka chauh thu leh mut bawrh bawrh ka châk thu ka sawi a. Min rawn tibuai lo se ka duh vang a ni. Chaw ka chhum a, tlêm ka bar sawk sawk a, chawhmeh pawh in chung ami ka han la. Chaw chu ka fun ta bawk a. Mi reh lai tak nia ka rin dar 8 pelh hlekah chuan Muansangzuali zawng tur chuan ka chhuak leh ta ṭhem ṭhem a. Hetia ka tih chhan hi a tira min kap tlattu vang ni pakhat mah se; Muansangzuali hmu hnuhnungbertu Pu Zaliana feh hawngin, "An thlam ka kal pelh lai hian tu emaw nen an inbe lâwng lâwng a, vawk chaw a lak fô avang hian amah Sangpuii a ni tih ka hre nghal mai a, a titipui erawh ka hre lem lo. Ngaihṭhat lohna pawh nei lem lovin ka rawn hawnsan ta mai a ni" a tih khan beiseina leh beidawnna min pe kawp ka ti mai, eng emaw tak a tâwk nia rin theihna hmanrua min siamsak a, rukbo a nih rinna min neihtir a nih ber mai chu. Miin min hmuh pawha ngaihdan danglam an neih loh nan thawmhnaw pawh pangngai tak ka inbel a. Tuma rinhlelh kai lovin pu Ramngaia huan chu ka thleng phei leh ta hrâm e. A hmaa kan kal lohna lamah ka kal ta a. Lui kâwr bawk ka zawh leh ta. A chhengchhe reuh si, ka pilh pheng phung tawh. Mahse, Muansangzuali thlaphâng leh mangang hmel ka mitthla ṭhin a, ka chak thar leh ṭhin. Hlauh ka hre lo va, ramhuai e huai lo ve engmah ka ngaihtuah lo. Muansangzuali hi him damin hmu ila tih chiah ka duh..

A tir aṭanga ka rilrua riak reng rukbo a ni thei ang em tih kha min mawlhtu lian ber a nih tak avangin rukbo a lo nih thut takin tiin auh pawh ka au duh tawh lo, ngawi rengin beng chhi ran siin ka kal ve tawp tawp a ni mai. Beiseina ka neih hi a dik ngei ka beisei a, chuti ni lose ka beidawnsan tawh ang. Zan dar 10 a pel ta. Ka kal thui ta khawp mai. He lui kâwr hian Ngûr khaw lui pakhat a pawh tih an sawi tawh a. A ṭul a nih leh Ngûr khua thlengin kan inzawng tawh aniang chu..

Kawrtê tui a tlem tial tial a, a tawpah phei chuan a hul ta diak mai. Kawng pêng ka pawh ta hlawl bawk. Thla a êng hlauh a, torch light pawh hman êm êm a ngai hran lo. Mahse, hnimbûk leh eng emaw ṭul pik laite ên nan chuan ka hmang tho. Kawng pêng chu ka zawh ang nge zawh lo vang tia ka inngaihtuah fê hnuah zawh ve chawm mai ang tiin ka insangmar a, ka zawh leh ta a. Kawng chu a zâl nuam phian. Zawh ṭhan a ni tih pawh a chiang e. Mel chanve âwm vel ka kal hnuah chul niawm tak ka thleng a, ka bengchhe ri nge mawni ṭawng thawm niawm tak ka hre ta bawk. Ka ding chut a, ngun êm êmin ka beng chu ka chhi ta a. Umm, ṭawng thawm a ni tak tak..a chhak deuh aṭanga lo ri chhuak nia ka hriat avangin han pawh vat tuma hmanhmawh takin ka pen pâwk pâwk a. Chul thlâm niawm tak hi ka han hmu ruai ruai. Thawm dim deuh ṭulin ka hre leh ta thut a, engvanga chul thlâma awm ringawt nge an nih ang tih ka ngaihtuah vang a ni. Ka lungphu lah chu ka duh aiin a ring! Mihring hian hlauhawm lo thleng tur emaw thil eng emaw tak lo thleng tur emaw hriat theihna kan neih hi. Chutiang hriatna nei ang chuan ka awm mêk a ni. Zawi tê têin thawm nei lo thei ang berin ka pan chho ta hriau hriau a, "Lalpa, eng pawh thleng se, min pui rawh aw" ka ti sup. Khatihlai ang reng renga Pathian ka mamawh kha ka la hre ngai lo. Thlâm pawh ka hnaih sawt viau e. 

Tap mei an chhêm chu bang kar atang chuan ka han hmu sen zuai zuai a. An thlamuan hmel hle. Pawih thingzai vel an ni maithei a ni. Thlam sir dinglam bang thlanglam a niang chu, chumi lamah chuan ka tawlh chho ta a. An ṭawng pawh a hriat theih ta deuh. Mi pathum niin ka hria. 

"An hre chuang lo vang, nizanah pawh i remti tawh lo va, zaninah chuan ka khawih dawn hrim hrim" pakhat chuan a ti bawrh bawrh a. A ṭawng chu tlemin a pai deuh. Thingzai chu an ni deuh tak tak em mawni le. 

Chutah ka aw hriat ṭhan zet mai hian, "A ṭul lo, him piala hmuh an duh alawm. An exam leh vek dawn. Chuvang chuan i khawih tur a ni lo tawp" a ti a. Ka khur der der mai le..

Pakhat chu hriat hleihtheih loh hian a phun nang nang a. Pakhat la ṭawng ve lo khan, "Naktukah chuan an rawn kal dawn tak tak em? Hetia kan kawl reng chuan kan him reng dawn lo a nia" a ti a. Ha pa âw pawh hi ka hriat hnu a ang ka ti. Mahse, ka chiang ngam lo thung. Chutih lai tak chuan rum det det ka hre ta a, ka aw hriat ṭhan tak khan, "I zun a chhuak leh tawh mi?" Tih pahin chhuat chu a ri ṭuah ṭuah a, a tho chhuak a ni ngei ang. "Khawi, lo kal rawh. Zung la, a tam thei ang ber mutthilh tum rawh" a ti a. A kai tho ni ngei tur a ni a, an ri rawk tawk mai. Thlâm luhka chu a ri phei ṭhep ṭhep a, "Tah khan zung mai rawh" tih ri ka hre leh. A zung ta nge ni, a zun zawh tawh âwm velah chuan, "Engmah i ei duh bawk si lo va, i chau dawn lutuk. I ril a ṭam em?" Zaidawh deuh hian a ti leh a. Ka thaw ri te chu an hriat hlauin ka kâ leh hnar te ka hup a. Rilru a saisa nuaih nuaih bawk. An rawn luh leh hnu reivakloah , "Mei kha leih hlum r'u, muhil tawh ang u. Thawh hma kan ngaih kha" a rawn ti leh a. Thlam chhuat chu a ri san san bawk. Mei pawh an timit ta. A thim ruk mai. Ke mu vek khawpa ka nghah hnuah a tu emaw ber nge tih ka hre lo, a rawn hnâr ta bur bur a. A thla a muan hmel hle mai. Thlâm hnuaiah bawkvâkin thawm chhuah lo hrâm turin ka vâk a, thlam luhka hnuai aṭangin thlam kawngka chu ka pawh ta phawt. Kawngka chu nawrtawlh ang chi kha a ni a, a phui tawh lo hle bawk. Luhka chu ka rah rîk ka hlau si, ka rap lo thei bawk si lo. Kawngka chu ka theihtâwpa dimin ka nawr ṭan ta a. Zan reiah chuan a ring duh si. A va hahthlak tak êm..ka taksa lêng âwm vel chu ka nawrtawlh thei ta. Ka va dâk dêk dêk a. Namthlak bulah pakhat a mu a. A mut dan loh ang zawngin ka zawn mêk, hei leh ram chena ka kal phahna ngei hmeichhia chu a mu bawk. A ka chu an bel phui niin ka hria, ka hmu chiang vak thei lo va,mi pahnihte erawh tap lamah rualrem lo zetin an lo mu a. Ka lut tawp dawn nge, heng mi rubotu te lûng leh thin hi ka khei nghal mai dawn tih ka han ngaihtuah leh tê tê a, himdama ka hmuha ka chhanchhuah theih chuan a rubotu te chunga chetlak kher erawh ṭul ka ti lo, an rûk bo chhante pawh ka hriat a la ngai dawn si a. Bawkvak titih bawkin thlam chhungah chuan ka tawlh ta hriau hriau a. Mahse, thawm chu ring duh tak a ni. Ka va kaihharh tur ber lah a mutna lai chu a va hla si. Tapa an leihhlum tawh thingfak lian vak lo chu ka pawt phâwi a. Zawitêin Muansangzuali mu hlawm reng nâkah chuan ka va hawlh ta a. A che hrut a, a duhtawk der. Beidawng lovin ka va hawlh leh dêk dêk a. Phâwk zeta mengin ka lam a rawn hawi ta a. Thla êng chuan ka hmel a rawn chhun fuh em ni dawn ni, au chhuah tum niawm taka a meng kâwk chu a ṭhulh nghal a. Ka va bûk khum zauh. Rang zetin namthlak bula ṭhu chu a zuk melh a, a mutui hle tih a hmuh vang chu nge zawitêa chein a inherrem a, a inbengkâng ta. A han ṭhu hle hle phawt a, kei pawh pawna amah lo nghak turin ka tawlh chhuak leh ta a. Reitawk fang ka nghah tlawk tlawk hnu chuan kawngka chu a rawn tawlh riai riai a, Muansangzuali chu a rawn lang ta pheu mai le..

Mahse, vanduai asiamin a chhuak tur chuan a ke hmawrin hnâr bur bur lo zawk châwnah tak chuan a va tlawh em mawni..a rawn harh ta a, mahse, a tep chuap chuap a, a phun zui nuah nuah. Thlâm luhka a rîk hmain a rawn chhuah rual rualin ka lo pawm thla ta vat a. A rit ve zêk lehnghal a! Thawm ngaichânga kan din dun leh vang vang hunah a kut an phuarna chu ka phelhsak sawk sawk a, a hmui belna plaster pawh chu ka hihsak zui nghal. Ṭawng a tum chu ka khap vat a. Thlâm hlat zawngin chul chu ka zawhthlakpui a, kawng mumal awm hek lo, kan tawlh pur pur chângte pawh a awm. Thlen dawn ṭêpa a tawlh chu mau bulah tak a ngum a zuk sawh ta a, a insûm hman tawh lo a ni teh chêk ang chu, a râk ta ṭhawt a, zan reiah chuan a ring ropui si! Ka hlauh ang ngeiin Thlâm chhung chu a ri nghal khut khut. Chuveleh Muansangzuali tawlhna lamah chuan tawlh thla vein a thawh hma hmain a kutah ka chelhsak lawk a, ka khaichhuak ta a. An ṭawng thawm kan hriat tak avangin chul mawng lamah chuan ka tlan thlakpui ta nghal a, kan tlan pawh a ni chiah lo, kan tleng thla a ni ber..kan lo invuan ding hman tawh lo nen, chul mawnga Khiang lianpui mai lo ding zurah chuan ka zuk intauh dawt a, Muansangzuali rawn intauh tur chu lo nam sawn hlekin, mau bul a vuan hman ta hrâm a. Awrâwl erawh a chhuak tawh bîk lo. 

Boruak a reh dat lai tak chuan thlâm namthlak aṭang chuan, "Sangzual, in kal thui thei dawn chuang lo. Tlanchhe duh tawh suh u" U Faka aw ngei mai chuan a rawn ti ta lûng lûng a…