KA SAVATÊ (1)

KA SAVATÊ..(1)

Ziaktu : Toni Râlte

Ka nu chuan a mit nuai chawt chawtin, "Mama, ka va lawm tak êm, kan nufa tan kâwl a êng ve dawn ta a nih hi le.." a ti tham ṭiak a. Kei pawh ka hnuk a ulh lek lek mai. Ka farnu Tei pawh ṭawngṭai niawm takin a chhing vang vang. Engdang a ni lo, Hmelhriat ṭha leh sawipuitu nei miah loin Pathian vang liau liauin zirtirtu hna ka hmu ve tlat a tin ni. Ka pa boral hnua kan lawm ber ṭum a niawm e. Ni e, Pathian bel tlattu ka nu ṭawngṭaina rah pawh a ni tel bawk. 

"Mahse, Mam, i awmbo daih chuan kan khua a har awm" Tei chuan a ti sap a. Ni dawn tak, min post-na kha Thingtlang pilril ve tak Zopui khuaah a ni daih tak a, Vawikhatmah ka la zin lo bawk. Hig school-a thawk tur ka ni. 

Ka hming chu Tlansangzuala a ni a. Kum 30-na ka hmang ve mêk a ni. Kum 10 liam taah khan ka pa duhtak chuan Thin cancer vangin min boralsan tawh a. Ka pa kha P&E Department-ah 4th grade in a thawk ve a, a damlai kha chuan harsa bakberhin kan awm ngai bik lo. Ka farnu neihchhun Tei nen hian kum 7 laiin kan inthlau a, ka nu hian vawi 3 lai nau a chhiat a, doctor ten fa pahnih bak neih an phalsak ta lo a ni. Ka nu leh pa te hi Darlawn khawchhuak an ni a, Chanchin ngaihnawm tak an nei ve awm e. Ka nu hi fahrah tih theih mai tur, a nu leh pa te an innei lo va, Sâwn a nih chu. Kum 3 lek a nih laiin a nuin pasal a neihsan ta bawk nen, a piin a pawm seilian ta a. A pi leh pute thih hnuah a putea te bulah a awm ta a. A putea hi zu ngawlvei, ruihsual ching tak a nih bakah a piteii lah ka nu hmusita ngaithei lo êm êm a lo ni bawk nen. A rethei ṭhin hle a niawm e. Ka pa te erawh chhungkaw awm thei ve pangngai tak niin, an hûng viau bawk. Ka pa chuan ka nu hi a tleirawl lai aṭangin a lo duh tawh a. Ka nu erawh pawl 8 a pass ve ṭâwk a, ram lam hna a thawk zui a, a dinhmun hriain inleng neih pawh a ngam ngai lo. Thingtlangah chuan an nula tlangval hma a, ka nu pawh kum 17 a nih chuan nula enin an en vek tawh. Ka pa hi Aizawlah zirna avangin a awm ṭhin a. Ani pawh pawl 12 a pass ve ṭâwk chauh, a zir zawm peih tawh loh avangin an leiletah a feh ṭhin. An leilet kawng leh ka nute lo kawng a inan avangin kal rual chang an nei fô a, chutaṭang chuan inkawm chho vein ka pa chuan ka nu chu a dinhmun zawng zawng nen a khawngaihin neih hial a lo duh ta a. Mahse, ka pu ten ka nu chu an duh tlat lo. Chhungkaw pangngai tak an nih avangin nula pangngai leh chhungkaw pangngai aṭanga zi chhuak nei se an duhpui a niawm e. Mahse, ka pa rilru an hneh thei lo. Ka pu chuan ka pa chu a nau Aizawla awm te hnena dahbo a tum ta hial a. Chu thil a han hriat chuan ka pa chuan ka nu duh vak lo chung chu a ru ta hmiah a niawm e. An inru tih an hriat chuan a tu lam ve ve pawh an thinrim kher mai. Ka nu putea chuan chempui nen a zawng thur thur a, ka pu pawh a sa hle bawk. Ka pa te chu an inah haw ngam hek lo, thawmhnaw tlem an ken ve nen Aizawlah ka pa patea te bulah an tlan dun ta a. 

Ka pa pa chuan, "Ka in chhung hi vawikhatmah rawn rap tawh suh ang che. Tihian kan intuithlar a ni mai". A ti hmiah mai. Ka pa unau te leh ka pi te erawh chuan ka pa chu an lainat a, a rukin an inbe ve fô. Tin, an tlan dunna ka pa patea pawh chuan a lo lainat a, a lo tuamhlawm ti mai teh ang, chutihlai chuan party lama a chet ve theih lai tak a ni bawk a. Ka pa hna pawh chu ama sawisakna azarah a hmuhsak thei ta a ni. Tichuan, ka pate chuan in an luah ve a, an rethei hle naa an hlim ve tlat. Kum tam a liam hnuah erawh thisen chu thisen nge nge a lo nih angin ka pa leh a chhungte pawh an inpawh lehin ka pu a boral ta bawk a, an inthlunzawm leh ta a ni. 

Ka pa a boral pawh khan Darlawn aṭangin chhungkhat rawn kal an ṭhahnem hle. Ka pa hna lah thawh chhunzawm theih a ni ta si lo va, college ka kal ṭan ve tawh a. Kan hautak ve bawk si. Ka pa râlna sum tlingkhawm hmangin zirna kha ka chhunzawm a tihtheih ang chu. Tichuan, ka nuin a tihtheih ang ang a ti ve chho a, chawhmeh a khar chhawng a, veng chhungah a zuar kual ṭhin. Chu chu kan ei bêl ber a ni a ni. A hnu deuhah phei chuan kan in luahna te thil phal zar zovin an kawtah ka nu chawhmeh dawr tur kan sa ta a. Zuar kual tawh loin chutah chuan a nghak ta a, an rawn pan ve mai zel. Ka nau khan pawl 10 a fail hlauh mai a, a kal zawm duh ta tlat lo. Kan tihluih ngial pawn a duh der lo. A bâng ta ringawt a. Mahse, a awm mai mai lo. Ar a vulh a, Vawksa a rêp bawk a, chutiang chuan sum a thawkchhuak ve ta a, a kalna lam chi tak a lo ni nge ni a hlawk ve ta phian. Kei erawh ka nu innghahna ka nih avangin zirna ka la chhunzawm zel a. MA (Pol.sc) ṭha taka ka zawh hnuah in chungpa min sawi hmuhna zarah B.ed ka training leh nghal a. Ka zawh aṭangin a dil theih ang ang hna ka dil chho ve char char, hmuh tik a awm thei si lo. Sawipuitu ṭha leh hmelhriat ṭha neih ve miau loh chuan kan ramah hi zawng hna chu vana rah ang mai a ni si. Keini hmeithai akara mi in hnuai luah, harsa tak chu Kohhran leh khawtlangah kan langsar mawh bawk nen..Ṭawngṭaina bak tihtheih kan nei meuh lo. Tichuan, tuna hna ruak hi beisei sang lem loin ka dil ve leh ta râwih a. Result pawh ka lo ngaihven tawh lo. Kan ṭhenawmte insakna lama ka inhlawh lai a ni a, chhun chawlh laiin ka nauin min rawn call a, a rawn sawi a, ka mumang emaw ka ti rum rum hial a ni. Tunah chuan ka nu duhthusamin sawrkar hnaah pawh hna zahawm tak zirtirtu ka lo ni ve dawn ta reng mai. 

Sawi tawh angin kan dinhmun avang pawn veng chhungah hian a engkimah kan inhawlh lawr lo unau angreng khawp a, ka nu erawh a dam ṭhat phawt chuan inkhawm pelh ngai miah lo a ni. Kei hi ka pate lam ka chhun a, mizo tlangvalah chuan a vantlang han ti ila, 6'1 ft ka tling pha ve a, hna ka thawk nasa ve bawk nen ka taksa pawh a phiar ve fat a, a hranpaa gym kal ngai lem loin ka fitness lam chu a ṭha phian. Vun rawngah pawh ka pate lam bawk ka chhun a, ka ngo hran lo, hâng chhe tak erawh ka ni lem lo thung. Hmelah erawh min hmutu te a zir a niang chu, ka lu hi englaimahin a kawng ngai lo. Ka nu sam kir ka chhun ve thung a, kir bup si lo hian a kawi ve deuh a, hmeichhehoin an awt thei phian. Ka hmui chunglam rual deuhthaw hian khuavang chhinchhiah ka nei a, ka nau hian, "Nangmah tihmelṭhatu" a ti deuh ngei zel. College ka kal tirh khan bialnu ka nei ve chauh a, zep loh chuan ka lerh tehchiam lo. Dinhmunin a zir lo bawk nen..chumi ka bialnu nen kan inngaihzawn reng lai chuan kan in luahna te fanu pasal nei a rawn tlan a, a hma pawha inhmua inkawm bawrh bawrh si kha min ngaizawng ta tlat mai a. Amah lah fa pakhat chauh nei tih takah a la ṭhalaiin a khal reuh bawk si. A fanu hi kum 4 chu a ni tawh awm e. A pasala farnu nen an insual vanga inṭhen an ni nghe nghe. An ina leng tur hian mi ko chho zut reng mai a. Min kawm thiam si, kei pawh a zunah ka uai ṭan titih der mai. Ka bialnu pawh chu ka ngaihsak ta vak lo, ani lah chuan min lo kawp ve tho chu niin, amah zawkin min ṭhen a. Tichuan, Siami nen chuan inngaizawng angin kan awm chho ta a. Ka nu hian sawi dawt lo mah se; a lawm tehchiam lo tih ka hria. Neih atan ka ti pawh a ni lo. Mahse, ka tâng laklawh ve deuh a ni. Zêp nâk emaw an hausa a, pawisa te hi min pek a ching a, a tirah ka la duh ngai lo naa, College-ah da deuha awm reng ai chuan tia han laksak changte pawh ka nei ve.,tin, thawmhnaw leh engilo ka mamawh tur te hi min lo chahsak tawp tawp zel a. Kum 1 tehmeuh kan inkawp ve lai khan ka nuamsa viau. Pathian thu zawm zo lovin sex hial kan hmang a, ka virgin hawngtu a lo ni chhap nen, sex kan hman hnu phei chuan a zunah uai nghet tawh tak ka ni. Zan khat lek pawh hmu lo chuan ka awm thei tawh lo. A chhungte pawn an hre vek tawh a, min duh ve nge mitmei chhia min hmuh ngai miah lo. Ka la naupang ve bawk nen, Siami chuan min kuaiher hneh tak a ni. Ka pa boral te khan amah ber hi min hnemtu leh min tihlimtu a ni. Ka tan chuan a hlû. A nat chhung zawngte khan a rawn tlaivar ve fô a, a mawng a zangin thingpui lum bakah eirawng te hial min bawlsak chang pawh a awm. Chunglai chuan kan la inkawp nghet lutuk lo zawk. Ka pa boral hnuah khan hriat theih khawpin kan inkawp ve chiah zawk a ni. 

Ka nuin vawikhat chu, "Mama, hmeichhia avangin i tum ram i thleng lo hlauh ange aw".tiin min khak tawh a. "Ka nei dawn tihna pawh a ni hleinem" ka la ti ve ṭâng ṭâng. Mahse, BA ka chhuah dawn kumah Siami pasal chuan ngaihdam rawn dilin fa hial an lo neih tawh si avangin an rawn ko leh ta tlat mai a. Amah chuan haw leh a duh tawh lo bur, mahse, a paten a fanu an lainat vang leh chuti taka an rawn ṭahawh si avang chuan haw leh mai turin an ti ta a. Keimah pawh min vengthawng tho. Kei pawh chuan, "Hawng leh mai rawh. Kei chu nupui nei thei ka la ni bawk si lo va, in fanu a khawngaihthlak, a pa a ngai thei bawk si" ka ti a. A harsa ve khawp mai. Amah lah chu a ṭap deuh reng bawk si, thawh lawka ruk mai te kha ka rilruk ut ut hman. Mahse, mi nupa kara tlakzeh chu ka hreh ve bawk si, tin, ka nu ka zah bawk. Chutia kan buai lai chuan mak deuh maiin Siami chu tlangval dangin an rawn ru ta daih! A rutu lah chu a cousin Lalawma a la ni zui! Lalawma hi a rawn leng ve ziah a, a cousin a nih avangin rinhlelhna chang ka lo hre lo va, a mak ka ti ngei mai. Midang zawng pawn mak an ti, a chhungte hlei hlei an hrilhhai. A pasal hnena a kir leh aiin Lalawma nen an inruk avang chuan kar hnih dawn chu ka tuar ve, nâ ve deuh mai a ni. Khata ṭang khan ngaihzawng ka ngaihsak ta vak lo va. B.ed ka training lai khan kan batch ami Hlimpuii nen kan ni ve leh a, mahse, ka rin loh deuhin zu han in mai te a hreh lo va, ka type nia ka hriat loh avangin kan inkar ka titawp leh daih. Hna ka zawn chhung khan kei aia upa tho kan veng ami Mary nen kan inzui ve leh a, mahse, a nuin min iai-na thu leh 'Hmeithai fa mai mai, chawhmeh zuar fapa te chu' tih ṭawngkam hial a lo neih avangin keia tlawmngai khan ka ṭhen leh ta a. Ka love line hi a tluang vak lo chu a ni. Tihian hna ka hmuh thlengin ngaihzawng chu ka nei ta lo. Pawi pawh ka ti lo. Siami te kha an innei zui a, an rawn len chang hian keimah zawk hi ka lai ṭût zel..nupui nei rual chu ka ni ve tawh reng, ka thawhna hmun tur lamah hian ka va hmu ang e mawle..

Zopui chu Aizawl aṭanga nikhat kal vel a niawm e. A hriate sawi hmangin Thingtlang khaw lian ve pangngai tak, a hmunhma pawh nuam ve tak a niawm e. Engtin nge ka han khawsak ang tih kan han rêl chho a. Ka nute kalsan chu hreh teh mah ila a ṭul miau si. An VCP ka han be pawp thei ta a, tin, High school Headmaster nen kan incontact thei ta bawk. Vcp chuan, "Aa..thla hnih khat te chu kan hnenah i khawsa ve ang a, in luah turte pawh kan lo dap ve ang a, chutiang chuan kan ti mai dawn nia" a lo ti awlsam êt a. Zêp nâk emaw ka zirna vang nen khualkhuaah hian ka zin khât a, Darlawn bak hi khaw danga han zin ka nei tehchiam lo. Mikhual nih hi nuam ka ti ngai lo, mi inthlahrung chi ka lo ni ve kher nen. Mahnia in luah vat vat theih chu ka duh khawp mai. Aizawl nena kartawn sek a buaithlak dawn avangin bungrua pawh in ken âm deuh pawi ka ti lo. Ka nu bulah, "Kan vaiin pem law law ila" ka ti thul. A nui mai a, "E..i thawh rei tawh hunah te chuan kan rawn fin lovang che tih a sawi theih loh. Engpawhnise, he lama insawn dante pawh ka lo ngaihtuah ve dawn nia.." a ti ve mai a. Tei phei chuan ka awmbo tur hi a huphurh ngawih ngawih, unau pahnih chauh kan ni bawk a, kan inngai ve êm bawk a ni. Ka duat ve bawk nen, tin, mipa uap loh in chhung hi chu a zahawm mawh ve bawk nen, eng êm an ti lo turah ngai ang. 

Tichuan le, Joining report pek a lo hun dawn ta der a. Bungraw ṭhenkhat leh ka thawmhnaw nen Zopui sumo service-ah ka chuang ta ran mai. Kan han tlan ṭan a, mikhual chan ka chang bawk a, ka chanchinte min han zawt chho a, ka sawi ve mai. High school zirtirtu thar ka ni tih an hriat takah chuan min be ṭha sawtin ka hria. Kei pawn eng emaw ka zawt nual mai. Chutianga muthlu lâwp lâwp paha kan tlan chu tlai dar 5 rik hma deuhin Zopui khua chu kan lut ta a. An awmna a san deuh vang nge boruak a vawt sawtin ka hria. VCP kawtah min drop a, min lo hmuak ve deuh bawk a, an lo awmkhawm ve laih mai. Ka bungrua pawh an lo senghawi sawk sawk hlawm a, VCP te in chu an khaw laili vel tak a nih duh hmel. A zau ṭha ngei mai. VCP in niawm reng a ni e. Hah pawh a dam ta deuh. Kan han inchibai hlawm a, an felin an nelawm viau mai. Vcp chu Pu Ramtea a ni a, an nu hi pi Mawii a ni thung. Fa pali an nei a, an upa ber chuan nupui nei tawhin fa pahnih harh zet zet an nei tawh a, an la chengho vek bawk. An fapa chu U Kaia a ni a, an nu hi Zuali a ni. U Kaia chhang chiah hmeichhia pawn pasal a nei tawh a, chumi nau hmeichhia erawh a la nula a, Buangi an ti mai a, a hmingpum ka hre lo. An tê ber mipa chu Tluanga a ni a, kei ai chuan a nau deuh ang a, mahse, kan inkawm thei maiin ka ring. Ka inbual fai phawt a, Ka inbual zawhah zanriah kan ei ta a. Ar an lo talh chu niin a lawmawm viau naa, ar talhsak ka phû êm êm pawn ka hre lo. Ka ei ṭeuh mai. Chaw eikham lamah thingpui hâng dawm pahin kan titi ho va, an khaw chanchin tlangpui leh ka chanchin te kan sawi pawlh nuk mai. Ka Headmaster te nupa pawh an rawn chuangkai ve a, An ni hi Zopui khua an ni bik lo va, an khaw ṭhenawm Ngûr khua an ni. Mahse, hetah in hmunte leiin an nupain an rawn awm ta law law a, an fate erawh Aizawlah lehkhazirin an awm thung. Kan Headmaster chu Pu Biakliana a ni a, a zahawmin a sar vuah mai. 

"Kan in lamah i rawn thleng zawk lo va, kan nupa tlawng kan nia, a remchang daih zawk asin mawle" a ti chuar chuar a. Pu Ramtea'n, "A khai! Tihian min rawn tiphuisui ve alawm.." a lo ti vat. 

Nu Mawii'n, "Tihian i han awm rei ang a, nupui tur pawh ṭha deuh deuh an awm a nia" a lo ti ve hlut a. Ka nui ringawt. 

U Kaia'n, "Nia, kan khaw nula tlangvalte hi a tlangpuiin chhe tak hi an awm lo, han ṭha fâl lah an awm chuang lo bawk" tiin a lo tuihnih ve zat bawk. An sawi ṭhin kha mawle, "Thingtlanga hnathawh hi chu a tirah tuman min phû loin kan ngai a, han awm rei deuh chuan tumah kan phû tawh lo zawk e" an tih ṭhin tak kha mawle. Kei pawh ka inla Aizawl tlangval ve ngawt a, kum hnih khat a ral meuh chuan a tu amah ka phû tawh lo maithei a ni. 

VCP te in aṭang chuan kar khat lai School ka kal ve ta tlauh tlauh a. An School hi tlangah han awmin, Middle School, High School leh an khaw ṭangrualin an din Higher Secondary School kan awm tlâng a. A nuam ṭhin hle. Hmelhriat ka la nei vak lo zawk a, nuam ka ti chho ṭan viau tho. Ka Schoolah hian zirtirtu panga kan awm a, Mipa pathum leh hmeichhe pahnih. Kan hmeichhiate hi nu ve ve an ni tawh a, an ni pawh hi Aizawl aṭanga awm, Zopui khaw mi pasala nei an ni. Nuih an hehin an bula awm a nuam hle. Naupang kan ngah angreng. Zopui khua hi sawi tawh angin khaw lian ve pangngai tak a ni a, in 500 bawr vel an niawm e. Thingtlang khua e ti lo chuan an changkang riau, an in leh lo pawh an phak ang tawka ṭha vek a ni a. Tin, an khua a fai hle bawk. An inrelbawlna a ṭha tih a lang mai. Pu Ramtea kha term 3 a zawna VCP ni tawh a lo nia! Opposition-a an awm lai pawn a tling zel tho. Mi ṭha a ni tih a lang reng mai. Mi khuain zirtirtu an indaih loh êm êm laiin hetah chuan khawtlang hruaitu te bakah Unit hruaitute lam an mawng a zang deuh nge, kan indaih viau. Party politics chhiain a tuam ve lo chu a ni phawt ang a. Hetiang tur hi a ni. Zan lamah inleng neuh neuh kan neih ṭhin avangin ka la leng chhuak lo va, bakah ka châk tehchiam lo. U Kaia titi ngaihthlak ka châk ṭhin, ani hi a ramvachal a, a sa pelh vel chanchin a sawi chu ngaihnawm ti zetin ka lo ngaithla dauh dauh zel. Tin, sawi hmaih phal loh chu chaw eia min sawmtu an kat nuk mai hi a ni, ka thleninah chaw ka ei ngai mang lo. Mikhual chungah an ṭha takzet a ni. A hmingin zirtirtu kan lo ni ve bawk nen..min chawm hneh ngang mai. 

Vcp ina awm reng chu thil tih chi a ni lo bawk a, in luah tur pawh ka melh ve ṭan a, an ni pawn min lo melhpui ve tho a. Kan School aṭanga hla vak lo ni thei se ka duh avangin School aṭanga hla vak lo, Pu Zawma te in hnuai chu kan mitmei ṭan ta a. An in hnuai hi a hmain an lo luah tawh ṭhin a, mahse, tunah luahtu an awm loh avangin hnawmhnawk dah nan an lo hmang rih a lo nia. An ni pawn phal takin min luahtir thei dawn ta. Pu Zawma te in aṭang hian kan School a han lang phak a, an in hi a fâl deuh bawk. An in piah lawkah tuikhur tuihna ṭha deuh a awm a, a thlang chu kawr a ni mai. An ṭhenawm hnai ber pawh 5 mins kal vel a ni daih ang. Mi phunglung leh huau huau ngaina mi ka ni lo bawk a, fâl deuh leh reh raih mai chu nuam ka tih zawk ka ring. An in singsak chhungin ka mamawh zualpui ho lamin Aizawlah ka zin leh phawt a. Ni 3 ka châm nghe nghe. Ka bungrua nen Zopui lam ka pan leh ta a. Tunah chuan ka parawl ve tak tak dawn e. Bungrua ka ngah lo bawk a, insawn pawh a buaithlak tehchiam loh, ka in luah hi nupa reka awmna tur tawk vel a ni a. Ka tan phei chuan a la zau mah mah zawk ang. Ka vannei a, Pu Zawma ten khum leh ṭhutthleng sei pahnih min hmantir hlauh mai a, in tak tak te pawh a ang ve ta. VCP te bakah ka thawhpuiten bungraw hrang hrangin min indan ve a, ka lawm takzet a ni. Chutiang chuan ka han awm hrang ve ta rup chu a nia. Pu Zawma te hi an pi tar tawh tak bakah a fanute pahnih leh an nupa an ni tlawng a. An fapa neihchhun hi kum 2 liam taah khan an lui kalnaah chesualin a lo boral tawh a ni. An fanu û zawk chu kan inrual vel awm e, Baby a ni a, a nau hi Hriati a ni. An zakzum ka ti dawn nge, min be ṭha ngam lo nge peih lo, kan inkawm tam lo khawp mai. Pu Zawma nupui Nu Tlani hi kuhva heh zet, englai pawha hmuam kan tih ang kha a ni a, a ṭawng duh êm êm bawk. A bula awm pawh a nuam. Ani hi chu awm lo se ka lenluh peih pawh ka ring vak lo. Zopuiah Thla khat ka awm tling ve ta ṭêp e. Kohhranah ka inlawmluhtir tawh a. YMA -ah pawh ka inziak lut tawh bawk. Zan khat ka chaw eikham kâm ka ṭhuah laiin Chhiat tawh thu an rawn puang ta tlat mai. Ka'n ngaithla chiang a, kan School letliam lam veng Sikul kâwn an tih lama mi boral thu a lo nia. Kan awmna veng hi Aidu kâwn an ti a, Aidu a tam ṭhin a niawm e. VCP te awmna veng erawh Venglai a ni. Veng hi ka la fang chhuak lo hrim hrim, hun ka neih pawn ka peih lo a ni deuh ber. Tin, vawikhatmah nula ka la rim lo. Ka indan hnu phei chuan ṭhian kawm tur ka vân riau, ṭhenawm tlangval Zoa hian inkhawm turin min rawn sawm ve ṭhin a, kawm tak takin kan la inkawm mang lo. Lehkhabu chhiar ka ngaina a, Kan School kawngah Library a awm bawk nen, ka hawh ṭeuh a, ka chhiar deuh reng zel. Tlaitin ka nu leh ka naute nen kan inbe bawk. 

Ka awm aṭanga mitthi an neih vawikhatna a ni a, kal ve ngei ka tum. Hmelhriat zawnna a ni pah mai. In chungah ka han chho a, Baby'n thleng a lo sil mêk, "Kal ve in tum em?" Ka ti a. 

"Hriati a kal ang, kei chu ka period a, ka peih lo" a lo ti a. 

"Hriati, min lo sawm ve rawh aw, kal rual ang" tiin room lama awm Hriati chu ka au a. "Aw" a rawn ti lâng lâng. Nu Tlani'n thingpui hâng min lo thlit leh tawh si, ka ṭhu leh ta nge nge a. 

"Ruati chu ka khawngaih mang e, mahse, a tuar rei tawh a, a tan chuan a ṭha zawk. " A ti suam suam a. Thingpui a in lai pawh hian kuhva hi a ṭhial thoin ka hria. 

"Eng nâ nge ni a" ka lo ti a. 

"Hnute cancer mawle, an hriatchhuah meuh chuan a lo ṭaidarh nasa tawh lutuk a..a pasal leh fate an lainatawm khawp mai, an fanu a la tê bawk si.." a ti leh zung zung a. Ka la hre ngai lo naa, ka lo khawngaih ve tawp. 

Baby thleng sil zo chuan, "An pa lah sawn zu in a ching lehnghal a, an fate an khawngaihthlak ee..mahse, nu, U Ruati chhungte hian an enkawl ka ring kei chu" a lo ti ve bawrh bawrh a. 

"Nia, Ruati chhungte hi an awmthei deuh a, an fate chu an lak mai ka ring. Zuia saw chuan a enkawl thei lovang. " nu Tlani chuan a lo ti ve a. Thingpui ka in zo a, insiam turin ka chhuk ta a. Sawi hmaih loh tur chu tuikhur piah lawkah thlanmual a awm a, ka room tukverh aṭang hian thlan ṭhenkhat chu a hmuh theih riai riai. Mi huaisen tia sawi theih ni lo mah ila, huai leh hrâng lam hi ka hlau tehchiam lo, a awm ka rin loh vang pawh a niang. Ka insiam zo va, ka phone lain ka chhuak ta nghal a. Hriati insiam ka nghak ve leh. A rei zêk lehnghal, hmeichhe ho tak hi chu aw. 

Mahse, lumen tur a nih avangin hmanhmawh vut vut pawh a ngai chuang lo. Kan va thlen chuan an lo ṭhu hmur tawh a, luh pawh a zahthlak deuh alawm le, YMA hruaitu ten min lo dawngsawng vat a, Hriati nen chuan kan inchhawm lut ve ta a. Mipa ṭhutna lam ka pansan a, vanneihthlak takin Zoa bul a lo la awl hlauh mai a, aman min lo mitmei ve bawk nen, ka mawng ka hung ve ta a. An in a lian lem lo bawk a, kan khat ṭha hle. Ruang kil ho chu an han ṭap leh râwih râwih a, hmeichhe ṭhenkhat pawh an inhru zauh zauh mai. Ka mit ka han len zau deuh a, nula zingah chuan han ṭha fâl êm êm ka hmu lo. An ṭhat dan a inang pût ka ti mai, a tlangpuiin an vun a êng a, an khaw boruak vangte pawh a ni maithei. Hriati bula ṭhu chu a langsar ta deuh. A sam a dum a, a hmui chhah lam lek lek chuan a tilang sexy ka ti mai, a hnutê a lian viau bawk. A thau lem lo naa a khal mawi tawk. Min rawn en ve chiah a, ka mit ka la rang kher mai. Zai a nuam phian. Eitur an rawn sem hnuah mawng a kham tawh bawk a, zial zuk pahin kan chhuak ve ta rih a, zial ka zuk hlat hlat laiin Hriati te pawh an rawn chhuak ve a, a ṭhiannu ti tawh mai ang ka melh ngun deuh nen khan an ni. An va zung a, an zun zawhah kan bulah an rawn ding ve a. Zoa chuan, "Terini chu i lo haw nimaw? Engtik nge i lo hawn?" Tiin kha hmeichhia kha a be ta a. A hming chu ka lo chhinchhiah vat. Terini chuan, "Nimin piahah khan..i lo dam a maw?" Nui sen sen chungin a lo ti ve a. Ka hmu hmelṭha zual riau lehnghal. Kei hi ka lerh ṭan tlat! Terini chuan min rawn melh a, nui chung bawkin, "Kan sir thar kha i ni chiang" a ti a. Ka lo lai ṭût, a va ṭhing tak. 

"Ni ve e, khuaa i awm loh vang a nih chu ka hmuh ngai loh che" ka lo ti ve vut. Kan inpawh ta phian a. Kan lut ho leh ta a. Ṭhut erawh kan ṭhu ho lo. Mahse, chutia nula ka han hmelhriat ta chu ka awm a nuam sawt mai. Nakinah chuan a rimte pawh kan la rim ve ang chu. Khua pawh a var har lem lo, leilung a rawn lan dêk dêk takah chuan kan mitthi pasal ni turah ka ngai mai a, kan inrual khat vel maithei, towel-a a hmai hupin awrâwl chhuah meuhin a ṭap hawm hawm mai a. Mahnia inchan chuan mipa e ti lo chuan hnukte pawh a ulh lek lek thei hial alawm le. Hriati leh Zoa te nen kan in lam kan pan ho a, tlaivar ṭhak hi chuan chauh a na ve deuh ṭhin. Thlan pawh laih loh mai ka duh. Hetia khaw chhunga mitthi an awm hi chuan School kan chawl mai turah ka ngai. A la hma tho tiin ka mu leh ta rih a, ka mutui viau a niang, ka harh chuan dar 9 a lo pel vah tawh. Ril a ṭam ta hle, tlai lamah hian zing chawhmeh tur ka bawl kep nghal ṭhin. Mahnia awm chuan inthlahdah a awl nen, zing hi ka tho hma ngai vak lo bawk. School ka hnaih bawk sia, Aizawla ka awm lai nen chuan a inang ta lo kher mai. Ka thawhpuite hi tlangval awmchhun Thana nen hian kan awmna a inhlat mah mah a, Schoolah tih loh chuan kan inkawm êm êm lo. Midang hi chu kawppui nei an ni vek bawk a, titi a rual vak lo. Ṭhian bulfuk siam vat ka ngai, U kaia kha ka kawm chi tak a ni a, mahse, ani pawh nupui fanau nen a ni tawh si a, Kan inkawm ṭha hman meuh lo. 

Zanriah ka ei khamah Zoa'n min lo sawm a, Hriati leh Baby te nen khawhar ina kal turin kan chhuak ta a. Rin aiin an la tam lo. Terini pawh ka va hmu e, mi thar chan a chan ve deuh vang nimaw ka hmu hmelṭha telh telh mai. Awm nawm nan la rim ve zeuh zeuh tur a ni. Ani pawh chu ka ngaihbel emawni min rawn melh ve deuh rengin ka hria. Zai a nuam viau mai. Marawhchu, Nizan lamah kan tlaivar si a, kan bang hma ta deuh. Terini chu nghak pah deuhin ka'n muangchang kual a, Zoa bulah, "Terini kha a tihtlak dawnin ka hria, belhchian chi a ni ang em?" Ka ti ta nge nge a. Nula lam ka sawi ngai loh avangin mak a tih hmel angreng, a nui hak bawk. "Nia, a fel ve riau asin. He lamah a awm ve tawh dawnin ka hria, kan la rim dawn nia" a ti a. Terini te pawh ka va hmu nghal, nizan lamah kan inbe tawh tho a tiin, "Terin, i rawn lang leh a ni maw? I va fel ve" ka ti ve ta tawp a. 

Nui sâng chungin, "Fel lam pawh a ni lo, nang pawh i fel " a lo ti ve a. Kan kalho chu a ni der mai. A ṭhiannu chuan, "Kan sir thar hi i lenglâm lo riau mai" a lo ti hlut a. A hming pawh ka hre chuang lo, "Lengah min sawmtu awm hek lo" ka lo ti fiamthu ve a. 

Terini chuan, "In haw tlang dawn mi? Lo peng kawi ula, thingpui te kan in dawn nia, a la hma hi" a ti a, ka lawm ru viau. An in pawh a lo hla lem lo va, kan inzui lut ta. An in pawh a lian ve pangngai a, a fai hle bawk. A nuin mei a lo zial a, Midang ka hmu lo. Min lo be hlut a, a fel siam siam khawp mai. Terini chuan thingpui a va lum ta rak rak a, Zoa chuan, "Nu Sawm, ka pa Thanga hi a la zin ami?" A ti a. 

"Aw vawiinah rawn haw a tum kha a nia, mahse, kan mitthi neih vangin sumo a service ta si lo va, naktuk lamah chuan a rawn haw thei tawh êm ang chu maw" a lo ti duah a. 

"Terini pawh he lamah awm ve reng tawh rawh se, awmbo reng mai" Zoa bawkin a tih laiin Terini chuan thingpui a rawn chawi lut a. Ka bulah a ṭhu ve chat bawk. 

"Nia, a awm ve rih tawh ang, a pain kal leh a remti chiah tawh lo va" Pi Sawmi bawk chuan a lo ti ve a. Terini pawh chuan, "Ka peih tawh lo hrim hrim, kei pawn..a hahthlak êm mai" a ti a. 

"Khaw nge i awm a?" Ka lo ti chut. A awmna hre miau hek lo le. 

"Singapore-ah maid in ka han awm ve alawm. Kum 4 ka awm tawh. " A lo ti mai a. Ka rin loh lam daih. Lehkha zirin a awm bo emaw ka lo tia. Maid nih hi a hahthlak viau ang, chhel a ngai dawn khawpun ka hria. 

"A zarah kan in pawh hi kan sa ve thei a, hahdam ve tawh rawh se kan ti a nih kha" a nu chuan a lo ti a. Terini chu a ngaihsanawm hle mai. In leh lo a din thei a nia. Nula chhuanawm tak a ni. "Khai a! I va ngaihsanawm ve" ka lo ti nghut a. 

"Awihawm kher loh ê..tak taka in leh lo pangngai tak hi tunlai khawvelah chuan a pawimawh tawh sia" a ti ve siam siam a. Ka duh sawtin ka inhria. Kei hi ka vanduai leh khut mai ang a. Ka tluang lo ve ropui si. Thingpui pawh a lum tui kher mai. A che vel reng reng chu a zei thlarh mai a ni. Kan titi chhungin dar 10 a lo ri dawn ta mai a, ṭin zai kan rel ve ta phawt. Kan in lam kan pan pah chuan Terini te chhungkaw chanchin chu a tlangpui ka zawt a. A pa hi zo pa ve tak mai, taima rumrût ang chi kha a nia, a nu pawh a taima tho. Lo neia eizawng an ni ve mai a, Terini te unau hi pali niin, Terini u chiah hi a boral tawh a, Terini te upa ber erawhin pasal a nei tawh a, a nau mipa hi naupangtê niin mistiri a ni ve a, tunah phei chuan an ei bêl ber a ni mah tawh. Terini hi kum 27 vel bawr chu a ni ve tawh awm e. Iaina chhan tur te a awm em tih ka zawh uan vel chuan thutak angreng tak hian, "Kan khaw nula ho hi ka hrechiang ve hlawm a, mi khua te chu tluk lo mahila a tlangpuiin kan nula te hi an felin an taima khawp mai, Terini tak hi chu Singapore lama a han kal avang khan ram lamah hi chuan a tei lutuk lo. Mahse, in chhungkhur chet leh khatiang lamah kha chuan a fel khawpin ka hria..bakah Kohhran leh khawtlangah a active bawk a maw..i tifuh ang ka ring" a ti ta mawlh mawlh a. Kei pawn Terini chu chhai mai ka rilruk ta deuh, a number dil nachang ka hre ṭhak lo lehnghal a, nge mawle tlangval ka nia, ka rim fô dawn tho tiin ka inhnem a. Mut pawh ka mutui viau e. 

A tukah hna ngai bawk thawk turin School lam ka pan ta a. Thana a rawn kal lo, a mit a nâ a niawm e. Kan indaih tho bawk a, class lak pawh a nuam leh viau. Kan naupangte hi Zopui khuaa Private English medium chhuak an ni deuh vek bawk a, khawpui naupang ho aia an thiam loh bikna ka hre vak lo. Tunlai naupang hi chu an lian tawh khawp a, kan naupangte pawh an kum an ṭhansan fur mai. Hmeichhe lamah pawh an lerh chhoh hun lai a ni ve a, ka thawh tirh te khan min hmuh ruala han inhrilh ru sap sap ang chi te pawh kha an awm ve ngei..Zirtirtu star hun lai kha a nawm theih êm kha maw..mahse, kan school naupang ngaihzawn êm chu an naupang ve lehzual lutuk a, ka duh bik lo. Higher section lamah hian tleirawl pahnih chhe lo deuh chu ka hmu tawh. Mahse, han biak lumlam vel kha ka hreh a, an ni lah min hmuh chang hian an zak thei bawk si. Higher lam hi chu tlemin an kumte pawh a lo tam ve deuh a, ngaihzawn rual zawng an ni ve tawh reng mai. Mahse, tunah chuan Terini ka ngaina tlat tawh. Belhchian lehzual ka tum ruh hle bawk. 

Ban rualin ka haw nghal a, chawhmeh a thar siam a ngaih vek avangin ka hmanhmawh ve deuh. Che muang chi ka lo ni ve bawk nen, dailuah chhuma thlak tur purunsen ka chan mawlh mawlh lai chuan Baby a rawn lut a, Anṭam tel a keng bawk, "Kha anṭam aw. An lo zuar a, kan lo lei kep che. Mahse, a man a ngai lo a nia" a ti nghal zung zung a, Hriati ai chuan a ṭawng duh ve deuh. "A va lawmawm ve, aa..engzat man nge? In leisak ngawt te chu a" ka lo ti vat a. Ka dailuah chhum liam tum mêk chu a va chawk rawk rawk, "Taka! Star i nei chiang" a ti ta daih a. Hmeichheho antena châk zia hi aw. 

"Awihawm loh" ka ti sup a. 

"Nizanah pawh in len kha" nui rah rah chungin a ti a. 

"Hmm, ka star tihna ni kher lo" ka ti ve tak naa, a awih hmel lem loh. 

"Terini chu a fel alawm, a puitling bawk sia, ni ru" tukverha a sahdam hmuam pen per pah chuan a ti a. 

"Min duh ve tawp nang" ka lo ti! 

"Duh awm êm mai..i rin aiin startu i ngah aw" a tih chuan ka lawm ru ve hle. Startu neih chu nuam ve deuh mai a nia. 

"Hmm, tuman min star pawh ka hre lo. Rim tur pawh ka hriat loh hi" ka ti a, ka lai deuh tlat. 

"Venglai ami Ziri pawn i number min dil tawh..a rawn be tawh lo che maw?" A ti a, min melh hâ bawk. Number hriat loh aṭanga min rawn be nawlh hi chu an awm ve leh zauh zel a, "Ka hre miah lo, be lo a niang" ka ti mai a. 

"A rawn be mai ang che" tih pahin hmanhmawh fêin a chhuak daih. A va mak ṭhin e aw. Alu ka kang a, heta ka kal dawn khan ka nuin center fresh bur khat vawksa hriak min kentir a, ka la ring ta reng a nih hi. Chaw ei a titui ve phian a, a ṭha tak tak. Bai hi ka thiam vak lo a, mahse, Pu Ramtea te min pek behlawi hnah chu a ṭawih chhe mai dawna ka hriat avangin ka bai ve ta a. A tui ange mawle.

Ka inbual zawhah chaw ka ei a, khawhar in kal leh a ngai dawn sia, ka che hmanhmawh ve ta deuh. Baby'n min lo ko lâng lâng a, ka insiam zo ve chiah bawk. Kan inchhawm leh ta a, Zoa kan sawm phei bawk. Terini pawh a lo ṭhu leh vâng tawh, hla a hril lehnghal, a aw te chu a fiahfaiin hla hril pawh a thiam khawp mai. Ka rin aiin kan bang har , a tawp zante a lo ni bawk nen, Terini te ina penkawina chance neih loh ka hlau hle. Dar 9:30- pelhah kan bang ve hram. Ka lunghnûr viau. Kan chhuak sang sang a, Terini ka lo nghak leh deuh. Ani pawh a rawn lang ve ta thuai a, "Ka lo nghak che a" ka lo ti hmiah. 

"Ka ring rêngah" a ti ngei. Ka zak vak duh tawh bîk lo, zak rual lah kan ni tawh hek lo. Baby te nen chuan kan phei ho ta a, "Lo penkawi duh viau mah ila, a tlai tawh sia, a inthlahrunawm. " Ka ti a. 

"A ho êm mai, a la hma" a lo ti naa, a nu leh pate mitmei ka ven vangin kan peng ta lo. A number erawh ka nei tawh e. Ka mut rualin ka call nghal. A lo mu ve deuh chiah a, 5 mins vel kan inbia. 

"Bem che ka tum asin" ka tih chuan a nui hak a, "Frank mai siah" a ti sap a. 

"Min chhang dawn em?" Ka ti lehzel, ka ngam laklawh a, ka zaktheilo tulh tulh mai. "Ka hre nang, min bem phawt la" a ti ve ta zel a,.

"Ka duh che a, ni ila" ka ti a. Ka lei ka chhuah zauh bawk. 

"I la lâp ee, hmaichhanah min hrilh dawn nia" thutak zawkin a rawn ti a. Hei hi chu inhnarna pawh a ni lo. Ka beisei dan a ni hrim hrim. Kan inmangṭha hnuah kei pawh midang be tawh loin ka muhil zui ve ta nghal a. 

Sazu thawm niawm takin min tiharh a, a ri ṭek ṭek reng mai. Ka khum mawng lam bangrelah te chuan a tlan em mawni, a ri leh dawt dawt ṭhin. Ka ning ta deuh a, ka tho a, chhuat chu ka han per deuh ṭhak ṭhak a. Thawm chu a reh ta hmak. Mut leh ka tum lai takin ka tum êm êm pawh ni lovin thlanmual lam chu tukverh aṭangin ka va melh zawk a, parda ka lo zar lo a nih pek hi..ka melh chiang leh kâwk, hmuh ka nei tlat! Ka in aṭanga thlan hnai ber bulah chuan mihring ding ka va hmu a ni. Min hnungchhawn zawngin a ding niin ka hria, thla chu a êng viau lo naa, a sam a sei tih erawh ka va hmu thei ruai ruai. Tukverh ka hawng sauh sauh a, chiang zawkin ka va thlir leh ngat. A che lo va, a ding ngil ût ringawt. Ka hmuh sual ti dawn ila, a hma paw'n chulai hmunah chuan thing emaw eng emaw ding a awm ngai hauh si lo. " Ka va fiah ngat teh ang, ramhuai chu a ni lo ang. Hmeichhia lehnghal tun ang huna thlamuala awm ngawt chu chhan ṭha tak a awm ang" ti rilruin ka chapal ka bun sawk sawk a. Ka phone lain ka chhuak nghal. A hla vak lo nain ka thleng phei rang viau, ka tlan titih bawk a. A lo la ding reng. 

"Ṭhiannu" ka ti nghut a. A che deuh zawk mai, ka tiphû pawh a ni maithei. 

"Hetah eng nge i tih? Zan a rei tawh sia..i.hlau lo em ni?" Ka ti leh a. Ka hlau miah lo. Mihring pangngai a ni tih ka chiang miau a. Mahse, chu hmeichhia chu rawn lehhawi eih loin a hma zawnah chuan a tlan ta daih mai..ka hamhaih deuh avangin auh zui nachang ka hre lo lehnghal..ka harh chhuah meuh chuan hmuh tur reng reng a lo awm tawh lo. Thil mak tak a ni. 

(Hlauhawm lam a tel zeuh zeuh dawn aw. Mahse, hrâng over lo ang kha..)