mistake

MISTAKE (LAST)

Ziaktu : Toni Râlte

A tukah chuan Magie chuan chawhnu lamah hawn hma a dil ta a, Cindy nu kha a lo tiam ve tawh tingtang si, bakah eng thil nge sawi a duh tih a hre châk ve reng reng. Zorema paw'n a lo remtihsak a. Cindy nuin a lo nghahna hmun tura a sawi lamah chuan a tlan ta vang vang a. Tuna an inhmuhna Restaurant hi a dangdai reuh viau mai. In hnung lam huan zau hek hawk, thingkung lian vak lo leh pangpar zâm chiin a hual velna hmun a ni a, boruak a nawm bakah a hmun hrim hrim chuan mi hîpna mak tak a nei ve tlat a ni. An eitur siam a tui chu thuhran, a to pawh a to fâl nalh a ni. Huan kil lam, dawhkan fâl ve deuhah chuan Cindy nu chu a lo ṭhu ran a. A va pan ve nghal. A lo ding a, nui sâng chungin, "I lo kal chu ka lawm hle mai. Ṭhu rawh" a lo ti a. A aw pawh a nelawm viau. Waiter a rawn kal ta vat a, Maggie chu a rilṭam lem lo bawk a, Cold drinks a chah a, engmah han chah loh kha nuam a ti lo a ni. In tur an rawn dah hnu chuan, Maggie chuan, "Eng nge min hmuh duh chhan ni ta le?" A ti sap a. 

Pi Zaii chu a ṭhu ṭha a, thupui fun tak hian, "I puihna ka ngen duh che a ni" a han ti tê tê a. Maggie chuan sawi zawm turin a lo mitmei a. 

"Englo a nia. Ka fanu Cindy chungchang a ni. I hriat angin pa tel lova ka enkawl seilen, a duh apiang nei thei khawpa ka theihtawp chhuahna a ni ve a. A tawi zawngin sawi ang. Mampuia hi a tleirawl chhuah phat aṭanga a hmangaih tawh a ni. Kei hian chiang takin ka hriatpui bawk. Mahse, Mampuia hian farnu ang maiin a en tlat si a, hmeichhia a nihna angin chet han lak tawp kha a hreh ve bawk si. Tichuan, vanneihthlak takin Mizoramah hna a rawn hmu ta hlauh a, Ka best friend Puii ṭhatna azarah a mipa hmangaih êm êm bulah awmhmun a khuar thei ta a. Mahse, hma a sawn thei lo. Mampuia hian a hua a ni lo, a farnu anga a enna hi a bansan thei lo a ni zawk. Tichuan, tun hun hi kan thleng ta hial a, An in kan chhuahsan dawn zan khan ka fanu chuan mangang takin min siam ta a ni. 'Nu, ani hi ka nei thei lo a nih pawhin a fa tal ka duh a ni. Chu chu kawng min dapsak rawh' tiin. Chutiang êm êma ka fanuin mipa a âtchilh tih ka hriat chuan ka thinlung hi chhun angin a nâ a ni. Magie, nu i nih ve hunah i hrethiam ve mai ang. A duhthusam hi Malsawmzuala bulah sawi ta ila; a lo thinrim emaw a lo hnar fithla ṭhak dawn tih ka hria. Nang hi a hmangaih che tih ka hre bawk..Nangin min ngensak chuan a rilru a thlak ngei ka beisei tlat a ni. Enteh, Magie, khatin mak ti hmel pu lo hram rawh. A nu ka nih avang chauha hetia ti hi ka ni. Ka fanu duhthusam theih awmchhun hi kei a nu hian ka tihlawhtling thei lo a nih chuan, nu ni tlakah ka inngai lo vang. I hriat tur chu Cindy hi a tette aṭanga ka enkawl dan dik tawk loh avangin mi luhlul leh tumruh tak a ni a, hetia mawihnai leh zahawmna ka zawn hram hramna hi a thlawn a nih pawhin mualpho pawiti miah loin amah hian kawng a dap dawn tho tho. Nu maksak tak angah pawh min ngai mai rawh, ka fanu hian pasal a nei tawh dawn lo tih ka chiang, chuvangin a hmangaihber fa chu pawmin a damchhung hun hmang se ka duh ber a ni. Magie, min pui hram rawh" Pi Zaii chuan a ti ta dap dap mai le..

Magie chuan a lo melh tlawk tlawk ringawt. A nu a mitthla tel bawk, a nu nen an inang a tih vang a ni mahna. An fanute tan chuan tlawm leh zah an sawi thei lo chu a nia. Nu hmangaihna hi a thûk viau a nih loh pawhin ât khat a cheng a ni maithei. Sawi mai tur a haihchham deuh a, Pi Zaii lahin a ṭawng hun a lo nghak ve kar si. A aw a thian kharh a. 

"Sawi mai tur pawh ka hre lo. A mak hle mai" a ti thawp sat a. 

Pi Zaii chuan, "Ni e, i tan a mak ang tih ka hria alawm. Mahse, Magie, hetiang hian i hnenah ngenna siam lovin Cindy hi a duh anga a chet phalsak ta ila, Malsawmzuala hmin lo chung lo mutpuiin nangin lo hre leh si ta la..i nâ ang a, Mampuia pawh a damchhungin hrehawmnain a bawm ve tawh ang. Fim takin ngaihtuah teh, i bialpa hi neih i duh takzet a nih chuan hmangaihnain a bual ât vek tawh ka fanu ngenna hnuhnung hi tihhlawhtlinsak hram rawh" a ti leh mawlh mawlh a. 

Magie a thaw hawk ringawt. "Chu! Min vau deuh tihna em ni?" A han ti fak a. 

Nui chunga a lu thingin, "Vau lo, thil thleng thei ka hrilh ringawt che a ni. Cindy i la hrechiang tawk lo hle bawk" a lo ti a. 

Magie chuan, "A thuhrimin keiin engmah ka ti thei hleinem, Malsawma'n a duh tlat loh chuan tihtheih ka nei bik lo" a ti a. 

"I nei. Malsawmzuala'n a hmangaihzia che leh a tana i danglamzia hi ka chiang tawh alawm" a lo ti hmiah. Magie chu a rilru a buai êm avangin sawi mai tur pawh a hre tawh lo. Pi Zaii phone a rawn ri ve leh bawk nen, "Hello, aw..maw?! Engtin chiah nge a awm a? Aw . Ka lo haw nghal e" mangan hmel deuh hian Pi Zaii chuan a ti mawlh mawlh a. Magie pawn a lo melh ve reng ringawt. Magie chu rawn enin, "Ka hawn vat a ngai, ka hlauh ang ngeiin Cindy chuan ama nunna ngei lak a lo tum a nih chu! Maggie, ka fanu hringnun hman zel dan tur hi i kutah a innghat aw. Khawngaihin.." ti sawk sawkin a bag a la a, Bill dahin Magie chu hmanhmawh takin a kalsan ta a. Maggie chuan a thlir zui vawng vawng mai. Lehlamah chuan kha nu kha a khawngaih, khatiang khawp khan a nu hian hmangaih ve se tih duhna rilru pawh a pu ve nghal. Thil ṭha ber ni lo mah se; fanu tana a hmelma ang tur thawthang laka khawngaihna ngentu nu chu nu satliah a ni lo tih a hrethiam ve tlat! Ngawi renga 5 mins vel a ṭhut hnu chuan muangchangin chulai hmun chu a chhuahsan ve ta a. 

Zanriah pawh mumalin a ei lo, a nu paw'n, "Magie, thil dik lo a awm em ni?" A ti hial. A nui lui hram hram a. Midang bula sawi chi lah a ni mang si lo. Cindy nu sawi kha a dikna chen a awm ve tlat, A ngenna kha lo hnawlsak ta pawh nise, Cindy hian engtin emaw chet a la dawn tho. Chu chu hrechhuak leh ta si se, a thinlung a dam thei ang em? Mahse, mahni bialpate sâwn thlak tura han ngen rup mai chu tu hmeichhia hian nge ti ngai ang le? A ngaihtuah zawng paw'n a zak! Malsawmzuala phei chu a thinrim hial maithei. A hrilh ang nge hrilh lo vang tihah a inkhâp buai char char a, Tetea leh a nute inhnialna paw'n a ngaihtuahna aṭangin an kaiharh zo lo. A tawpa tawpah a thaw kâwk a, "Ka ti ngai lo vang" a ti sep a. A âwm a dawm vang vang mai. 

Cindy nu nen an inhmuh aṭang pawn kar khat a liam leh tawh a. Chanchin engmah an la rawn sawi lo. Mampuia pawh a hna lamah a insawrbing leh ta deuh nen, an inhmu khât angreng. Mahse, a ringtawk a, ani pawh a rinawm bawk. Zan lama inrim hi an ti vak lo bawk nen. An mizia hi a inang kan ti dawn nge, tlawm an hreh dun zawk nge..inngai vak lo ang hian an han awm ren rawn a, an inhmuh ve chhunah erawh an inthlahlel viau lawi si. 

Zan khat Mampuia rawn leng chuan Cindy te haw thu a sawi ta a. "A hna aṭangin a bang a, Shillong lamah an chhuk leh ta a nih kha..kan zalen lehzual ta e" Mampuia chuan a ti sur sur a. Magie erawh a ngaih a ṭha chiah lo. Cindy chu a hriselna lam dinhmun a ṭha ang em tihte a ngaihtuah ve deuh. 

"I nu ten hrehawm an ti em?" A ti ta daih a. 

"Tih awm pawh ka hre lo, Nu Zaii nen an la inbe ṭha reng tho alawm" a lo ti mai a. 

"A nih, i ni Mawii khan Biteii chu a la sawipui che em?" A ti leh a. Khik suk pahin, "A beidawng ve ta a niang, a sawi ta vak lo. " A ti sup a. Magie pawh a ngaih a ngam ta deuh. Thingpui a va lum a, an in dun mêk laiin A nu hi hmanhmawh zetin a rawn lut a, in hnuaiah a leng kha a nia. A pa erawh an meeting a. Thlabâr hmel zet hian, "Maggie, I û a buai, tunah hian nikhaw hre lovin a awm" a rawn ti ta a. Magie pawh a phâwk kher mai. "Engtin?"a ti vat a. 

"Ka hrechiang rih bîk lo, tunah damdawi ina rawn phurh phei an tum mêk a, Durtlang Hospital-ah kan tlan chhoh nghal a ngai, i pa lah Chairman a ni si, Engtin nge niang le? I nau lah a leng leh daih bawk si" ṭahchhuak insûm zet hian a nu chuan a ti a. 

Mampuia'n, "Ka awm alawm, va insiam r'u, kan chho dawn nia" a lo ti vat a. Magie pawh a tlan chho nghal. A inthlak sawk sawk a, chutiang thu thin ṭhawng chu a beisei hauh lo asin le..a û chu engtinmah awm lo hram se a duh takzet a ni. An inpeih hnuah hmanhmawh takin Malsawmzuala car chuan Durtlang lam chu an pan ta a, Hmuni erawh in nghakah an dah. Mampuia pawh a tlan chak fia fia ngei mai. A thlen pawh an thleng hma viau. 

Angeli awmna lama an hotute chuan an lo dawngsawng vat a, "Doctor te'n an en mêk e" tiin. Va hmuh nghal theih pawh a ni lo. A nat dan chu an han sawi a, "Bible study nei tura a rawn kal loh avangin kan va kohtir a, a room a kalh tlat bawk si. A muhil a nih ringin kan ko vak vak a, khum aṭanga tla thla thawm niawm tak kan hriat avangin hmanhmawh takin kawngkhar chu kan tichhe ta a, Angeli hi chhuatah a lo mu zangthal a, chutihlai chuan a la harh. 'ka pangkhing dinglam zawng hi a zâwi vek" a lo tia. Kan pawm kang a, kan han hmet nawk nawk a, 10 mins velah , 'A na lutuk' a rawn ti a. Nikhua a hre lo zui ta nghal a ni" tiin. Maggie chuan thil hriatchhuah a nei, Zonuna te in hnuaia a awm laia a taksa pangkhing zâwi vek kha.. Angeli pawn khatiang kha a lo nei ve a nih dawn chu! Mak a ti hle. Sawi chhuah erawh a tum lem lo. Doctor a rawn chhuak a, Pi Thanpuii'n a lo be vat. 

"Ka pi, tun dinhmunah chuan tihtheih kan nei lo, a nerve niin kan hria. Stroke chi khat a ni bawkin a lang.." a lo ti a. 

Darkar chanve awm velah pa ber leh Tetea te pawh an rawn lang ve a. A pa pawh a rilru a hah hmel hle. Angeli lah a mu chiah chiah reng mai si. A zeng ang em tih chu an buaina ber a ni ta. A hma deuh hetia a tal bawraw hma deuh pawh khan hetianga tluk hi chu vawi hnih khat a lo nei tawh thin a lo nia. An entir a, damdawi an chawh a, an ngaih a ṭha mai zel kha a nia. Tunah erawh natna khumah a mu ta bal si. A lainatawm ngei mai. 

Malsawmzuala pawh a la ṭhu ve reng a. Chutia awm tlawk tlawk chu awmzia awm hek lo, A pa chuan Tetea leh Magie te chu, "Zuk haw rawh u, i nu nen kan lo awmpui ang e. Eng êm a ti lovang. In nghaktu awm lo zawng a fel lo ve" a tih si avangin an haw thla ta a. Ngaihtuahna erawh a buai duh khawp ang. 

A tuk zing a harh rualin Magie chuan a pa a call nghal. "Pa, eng nge a an? A harh tawh em?" A ti var a. 

"Zing dar 4 velah khan a rawn harh a, tunah chuan a muhil leh tawh. Hei kan rawn haw lawk dawn.. " a rawn ti a. Magie pawh thoin eirawng a bawl nghal a. Hmuni a rawn tho ve nghal zat bawk. A pa te rawn hawn hnu lawkah chaw an ei a, A pa chuan, "Durtlang daih chu kan tan pawh a buaithlakna chen a awm si a, i nu nen han kal leh u la, he lamah refer turin han dil ang che u. Vawiin chu nang pawh chawl mai rawh aw. I nu pawh hi a chau ngawt ang" a ti a. Magie pawn a pawm thlap. Angeli chu a rilru tak takin a lainat ve a ni. Thisena inzawmna hi zawng a lo thûk nge nge a nih dawn hi. Eikhamah an insiam nghal a, Tetea a chawlh theih loh avangin Kawla hoin Durtlang lam chu an han pan leh a. A nuin doctor a va hmu nghal. Magie te erawh Angeli chu an lo awmpui a. A la harh lo. A nu pawh chuan Doctor a va hmin thei ta a niang, bakah hmanraw ṭha zawk awmna na nâ na chu doctor te paw'n an lo duhsak lo thei lo va. Angeli chu an phurthla thei dawn ta. Dar 11:30 velah a rawn harh a, a rilṭam thu a sawi hmasa ber. Magie chuan a zu lamsak vat a, tam erawh a ei thei chuang lo. Damdawi in dangah an phurthla dawn tih an han sawi chuan ngaihṭha lo hmel a pu deuh a, mahse, a remchan zawk vang a ni tih an hrilh leh ta vat. Amaha kal thei a nih loh avangin an zawn ta a. A nu chuan a rukin a mittui a hru zauh zauh mai. A fate hi damdawi ina awm ngai khawpin an la awm hlawm miau lo va, a mi den dan a dang ve viau ang le. 

Cabin ruak a lo awm remchang si lo va, Female ward-ah chuan an in zawn lut ta a. A nu chu chau dawna a hriat êm avangin haw turin Magie chuan a ti a. A awmpui ve thei tho bawk nen, a nu pawh a haw ve ta mai. Angeli chu nerve damdawi pek nghal a ni a. Nurse te mit men dan leh Angeli an rawn melh zauh zauh danah Magie ngaih a ṭha chiah lo hle. Angeli erawh chu a maimichhing daih a. Mut erawh a muhil lo. Apple a velsak a, "Angel, kha ei rawh" tih pahin a hmui bulah a va dah a. Mittui tling pama a nau rawn melh chungin, "Meg, ka zeng tiraw?" A ti sep a. Maggie a lum pup mai. Intipachang hram hramin, "Zeng nang, i zeng lo reng reng, an enkawl dam vat dawn che lawm" a ti vat a. Apple chu a ei luihtir a. 

"Ka sual man ka hmu a nih hi. Ka taksa dinglam hian engmah nâ a hre lo,." A ti hul leh hak a. Maggie a chhing sawk. Hnem vak dan a hre si lo. A inngaihtuah buai lai takin Mampuia leh Zomuana te an rawn lut hlawl mai. A lo chiau au ta vat a. 

"Kha, Angel, i va ṭha tawh awm ve" Mampuia chuan a ti dam thlup a. 

"Nia, hei ka harh ṭha reng" a lo ti ve mai a. A mitmeng erawh ngui tak a ni. 

"I ṭha leh vat mai ang. Theihtawp an chhuah ang a" Mampuia bawk chuan a ti leh a, "Ni rawh se" a lo ti ringawt. Nurse a rawn kal a, "Nâ i nei em?" A rawn ti a. Angeli chuan a lu a thing ringawt. 

"A ṭhat chu, nâ i neih chuan rawn sawi vat tur aw" a ti a, a kal leh ta mai. 

"Na thei ila ka duh zawk ngawt mai" Angeli chuan a ti sap a. Maggie thin a dek zawk, . A û kut chu a chul a, "Inngaihtuah vak vak suh..engkim a ṭha leh mai ang" a ti dam thliam a. 

Angeli pawh chu a chau ve bawk nen,kar loah a muhil ve leh ta a. Mampuia te pawh rei mawi tawk an ṭhut hnuah an chhuak ve ta a. An chhuah dawnah, "Cindy'n a rawn be tawh che em?" Magie chuan a ti sap a. Malsawma chuan, "Be lo..min be tawh lovang" a lo ti chang rût a. A zawt tuitam duh ta lo. 

Ni 3 zet Angeli a han damloh takah chuan a pa te pawh an buai ve hle mai a. Doctor te paw'n phai lam an refer ta nge nge a. Ka nu leh ka pa te'n an kalpui dawn a, kei leh Tetea'n in kan lo nghak dawn a ni.

Ka nu te an kal aṭangin karkhat a liam leh tawh a, helamah chuan buaina em em a awm tawh lo, Mampuia nen erawh kan hna ve veah kan buai em avangin kan inhmu khat hle a, zingkara Morning wish kan inthawn leh mut dawna muttui kan tih hi kan inbiak chhun a ni mai. Kan inkar erawh a hma zawng aiin a ṭha ka ti mai, tibuaitu kan nei tawh lo bawk a, kan thla a muang a ni ber mai.

Tlailama workshop aṭanga ka haw inchhung ka luh ruala ka thil hmuh avang chuan sawi tur hrelo in Tetea leh Diki lo ṭhu chu ka melh ngar ringawt. Tun ang hunah an pahniha kan ina an lo awm ringawt hi ka hrethiam lo em a ni. Tetea'n min hmuh rualin a ding hluia a, "Umagie," atih chuan zawhna mitmenga melhin an bulah chuan ka ding ran a, Diki erawh a kun chhal a, melh pawh min melh eih lo. 

"Tete nga ti nge tun ang hunah hetah in awm, Diki chaw ei i sawm em ni?" ka tih chuan an in melh a, a mak em alawm. Kan in aṭanga a chhuah aṭangin vawikhatmah kan inchhung a rawn rap tawh lo kha ania. Tun ataka a rawn lenpui hi an inkar hre vek tu tan chuan a mak bawk em a ni. Ka nu leh pate awmloh remchang chuhin chaw ei a sawm pawh a ni se mahna le. 

"Im engpawh nise ka han inthlak a nga, chaw kan ei vat dawn nia." tia kalsan mai ka tum chu Tetea ṭawng chuan min ti ding chiang kher mai. "Umagie Diki nen hian kan inru." a ti teh tawp anih kha. Ka kalsawn zet chu hawiletin, "Engmaw" ka ti hluai ringawt. An inkar engkim hriatpuitu ni mah ila, Kan Tetea hi nupui nei tur chuan ala naupang mah mah a ni. 

"UMagie ka nu leh pate min biaksak mai rawh." Tetea bawkin a tih leh chuan, "I thiltih hi i hrechiang maw, tunah Angeli damloh avangin kan buai em em a, nang la school naupang chauh i ni bawk, innei thei ta pawh ni ula engtin nge i chhungkaw chawm i tum?" ka tih chuan, sawi tur a hre biklo nge a ngawireng ringawt. Diki zawk rawn ṭawngin, "Keima thiamloh vek a ni. Ka lo fimkhur tawk lo a ni." a tih sap chuan a awmzia hrelo zetin ka melh tawn a. "Eng nge awmzia?" zaidam zawka ka tih chuan, "Diki hi a rai a." Tetea zawkin a tih chuan sawi tur ka hrelo. A mak bawk em a ni. 

An inngaihzawnna kawng bumboh in ka nu in harsatna siam sak reng mahse hetiang thleng an kal dun erawh pawi ka tihpui takzet. Tetea ala naupang si, tin, kan chhungkaw boruak ṭhat loh lai lo ni nen sawi tur pawh ka hrelo. Mahse U zawk leh ka nu leh pate an awm miau loh avangin ka kut an ni rih mai si a, "Engpawh nise thleng tawh chu thleng tawh a ni a, ka nu leh pate pawh kan be dawn ania, ka intifai nga chaw te kan ei phawt dawn nia," tiin ka pindanah ka chhoh kalsan ta rih a. Ka nu khan harsatna siam sak reng lo se hetiang thleng hian an kal kher angem ti te in ka ngaihtuah a, mahse a thleng vek tawh miau a, siamṭhat leh theih pawh a ni tawh lo. Ka nu leh pate'n an hriat hunah engtin tak ngai ang maw.

Zanriah kan ei a, tumah kan ṭawng lo, sawi tur a vang ve em bawk a ni. Thu inhrilh chiam na hun la a ni heklo, kan eikhamah erawh ka pa ka be ta a, ka pa pawhin sawi tur a vân a ni ber e. Ka nu erawh a thinrim leh kher mai, mahse thinrim a sawt viau lo bawk nen ka pa in a bengdai thei a ni mahna, a ang hluai na in, Tetea te erawh a be ve lo. Ka pa chuan, awm phawt a, an haw huna rel fel mai tura thu min chahin phone kan dah ta rih a.

Angeli erawh a dinhmun ala ngai reng tih a sawi tel hram anih kha. Thil sual tam tak a ti a, a nuam tih dan leh ruihtheih thil tiin a nun a hmang a, tunah a taksa in a zawhloh thil a thleng ta a,. ataksa a zeng chu a ni ta reng mai. A pawi tih hian a pawi zia a hrilhfiah zo mawlh silo. Ka thisen zawm ka unaunu a ni a, ka lakah sual viau ṭhin mahse hetia a nat takah chuan khawngaihna tam tak ka nei a, dam takin awm leh thei se ka duh takzet.

Zanlama Mampuia nen kan inbiak in Tetea te chanchin tlangpui ka hrilh ve a, Ani erawh a aw a ngui rawih nia, a chhan a sawi erawh ka nuih a za, "I nau te an inneih chuan inchhung hmun khata kum khata lut chhuak a ṭha lo an ti sia, laklawh zawk an ni si a kumin chu ka nghah a ngai leh dawn anih hi..." a ti anih kha. Inneih a nghakhlel lutuk hi ka khawngaih zawk, ti ila Keipawh hian ka ngaihtuah neuh neuh chang hi chuan ka chak ve ṭhin tho mai.

Thla a ral leh meuh chuan ka nu leh pate pawh Angeli telin an rawn haw tawh a, Angeli erawh a damchhungin wheelchair a aṭhut a ngai tawh dawn anih hmel. A pawi ka ti vawng vawng mai, a tuar thiam lo viau ang tih ka ring mahse mak tak maiin an rawn haw nia ka hmuh tum Angeli erawh ka hmu hauh lo. A hma zawng aiin a hmelṭha in a hmel hmuh a nuam a, a nui sang reng a, a hlim hmel hmuh nuam lutuk hian min ti hamhaih hial zawk a ni. Min ngai em em a, ina ka awm tawh chuan kan inkawm awm chawt zel.

"Laizawn neih ka chak ṭhin a, mahse eng ka ti nge khati khan ka awm tlat a, mahse hei Pathian vang liau liau in, tunah chuan ka hlim a, ka chhungkaw bulah ka chak em em laizawn neiin ka awm bawk, nuam ka ti emai." Angeli mu tir tuma a mutna ka siam laia a thusawi chuan min ti hlim veng veng. Kan titi naa Pathian vang chauh a, damchhuak a nun thar nei thei anih a sawi hmasak ber khan ka mittui a tla hial anih kha. A ti der mai mai lo, a nun chhungril hlimna hi a bula awm ten kan hmu vek miau a ni. 

Mi tam tak chuan an sel mai thei, a ṭhat lai leh a damlaia Pathian hre mang silo natna khumah chiah Pathian a hria a, a piangthar a tiin. Mahse engkim hi Pathian hian kan ṭhatna tur zel hian alo ruat a, kei chuan ka ti ve tlat, ṭhat lai huna Pathian hrelo pawhin a thih dawn darkarah tal a hriat a, Pathiana piantharna aneih aia hlu a awm chuangin ka hrelo. Chutiang chiah chuan Angeli pawhin a duhdanin a nun a hmang a, sual lam kawng a zawh a, tunah Pathianah piantharna a chang a, mahse Amah leh a chhungkua hi kan hlimin kan lawm miau si a. Hetiang hi nilo in a natna te hi indelh beh tir ta se, beidawng leh na in awm se keini Amah hmangaih tu a chhungkaw tan leh Ama tan ngei pawn khawvar tik a awm dawn silo. Pathian hi chuan engkim hi a hun takah a rel fel mai a ni tih hi, ka ngaihdan a ni.

Tetea chungchangah pawh ka rinloh deuhin ka nu in a pawm thlap nia. Khatia damdawiina an awm lai khan Ka nu sawi danin Pastor leh missionary awm hnai te'n an lo kan ṭhin a, chuta an inkawmna aṭang chuan Angeli pawh piangthar ta kha ania. Anni ṭanpuina zarah Pathian hnathawh ropui a lang a, tin, ka nu pawh a inhmuchhuak ti mai teh ang. Ama sawi danin a, Pathian rawng a bawlna kawnga adiklohna te a hre thar a, Diktei te chhungkaw laka a chetdan leh a rawngbawl pui te laka a khawsak danah a inchhir takzet a ni tih a nitin nunah kan hmu zel chu ania. 

Mahse Tetea te bik erawh a pawl ala hniam in, nupui nei tur êm chuan ala nau ve nen a zirlai a zawh a, eizawnna eng emaw tal a neih hun nghah an ti tlang kha ania. Diktei pawh an inlamah a haw leh rih a, ka nu leh pate erawh in an ngaihsak mah mah chu a ni. Nitin ei tur ṭha ṭha leisak in an hna ban apiangin an tlawh awllo a, chanchin an zawt reng bawk. Mite chuan hria se an Over nupa an ti mai thei mahse ka nu sawi dan takin, "Ka tu lo piang tur hi hrisel tak leh hmelṭha ni se ka duh." a ti miau alawm. Tunah chuan chhungkuaa inkawm hlimna hun kan ngah tawh in, Tetea fa lo piang tur pawhin kan chhungkaw titi a luah tam ber ta. Hetiang chhungkua hi a ni lawm ni hman ata tawh ka awh em em a, neih ka chak ṭhin kha, tunah a tak ngeiin ka nei ta a, ka hlim a ni. A chang chuan mumang mai mai a ni ang tih ka hlau leh ṭhin. 

Angeli te lo haw aṭangin Angeli hian inleng a nei zeuh zeuh a, chung zingah chuan hmana Dina Amah ngaizawng em em tu kha a ni. Angeli hi chuan a be ṭha teh huamlo na in, Dina erawhin a rim tluk tluk mai chu ania. Hepa hi ka rin ai daihin a serious dawn a ang. Kei erawh min zah tak tlat avangin Dina te an rawn len hi chuan ka pindanah ka awm daih zel. Mampuia bula Dina te lo len ṭhin thu ka sawi chuan, "Keipawh naktuk zan aṭangin ka rawn leng ve tawh dawn." a ti leh hmiah. Min rawn rim kherlo pawh hian ka hmin em em tho sia. Mahse rawn kal rawh se, inhmuh a khata ngaih te pawh ka ngai ve tho alawm.

Workshop lamah pawh a ngai tê bawkin kan buai leh ngar ngar tawh. UZorama te pawh kan sawi chhuak tawh ti mai teh ang, an innei ve ta rawih a, an inrem phian mai. Kan hna pawh uluk leh zualin kan thawk thei tawh a, workshop boruak pawh nuam leh tawh tak a ni. UZorama'n zu in zeuh zeuh a chin lai kha chuan a tu a te pawh khan nuam lo kan tiin kan ngaihtuah em em kha ania, tunah chuan a neitupa ber pawh hmuh a nuamin biak a nuam leh tawh hle a, kan hna ṭheuhah nuam ka ti em em anih hi.

Kan hnathawk kan ban tlai deuh avangin in ka thlen chuan khua a thim tawh a. Zan Dar7p.m a ri chu a ni mai. Inchhung ka lut a, ka chhungte leh patling pahnih ṭhutkhawmna lama lo ṭhu te ka hmuh chuan mak ka ti viau tawh. Ka thawm hriaa Angeli ka mitmei zeuh chuan alo nui var var a. Ka pa in min rawn koh avangin, a ngaihna hrelo zetin. an bulah chuan bet lo zetin ka ṭhu ve ta a. Ka pa chuan, "Bawihi, hei i palai te an rawn lang a, mitih dan tho ania, chhungkua te in rawn khawm ve phawt a, Zirtawp zana lokal leh turin kan ti anih hi." a ti dam dap a, ka mengphawk chiang kher mai. Palai maw, mahse Mampuia'n engmah min hrilh ve bawk silo. Palai an chhuah hnu chuan ka pa chuan, "Palai an rawn tir dawn tih i sawi lawk silova, chhan dan tur kan buai ṭep alawm," tiin a nui suk a, midangin min fiam zui laih laih bawk a, mahse Anni ai hian ka hamhaih daih zawk. "Ka pa keipawn engmah ka hre bik miah lo." ka tih chuan mak an tih hmel. Mahse ka nu zawk chu harhchhuak vatin, "Ehe in pa tur chu a che romantic thei viau dawn a nih hi, palai a surprise che nia," tiin an nui dar dar a, keipawh ka nui ve tawp.

Zana Mampuia nen kan inbiak chuan, thinrim ngail ka tum a, Surprise a ti tlat sia thinrim vak pawh a theih loh. Ka chhungte pawn an ṭawngkam velah remlohna an sawi lo bawk a ngaihṭha takin ka awm ve leh tawp mai. Inneih a hmanhmawh tawh bawk a, hnial chiam lo mai ang,. aduhdanin a kal tlang dawn tho. 

Palai te an inrem tawh a, Thla thar ni15 a inneih an ti tlu a, chupawh Malsawmzuala duhdan leh bawk. Inbuatsaihna hun a tam lo bawk a, kan nufa thumin kan bazar ta zeuh zeuh a, mahse hetia chhungkuaa hmeichhia kan han chhuak hrang vel hi a nawm dan a danglam. Angeli hian lei tur a hre ngang mai, keichu engmah ka hrelo. Thawmhnaw bakah mamawh tur engkim hi ka nu ai pawhin lei tur mawi leh ṭha a hre zawk. Thuam chhawm a ngailo tiin Mampuia te lamin sawi mahse ka nu erawh in a mawihnai tawk leh a awm tawk a hre hneh kher mai. Mo kawr erawh Mampuia nen kan en a, ka duh ho si, Ani la in a duh ropui nasa mai si kan inhnial leh bap bap a, kan thu inhmu thei thlawt lo in, ka hak chhin apiang phone-ah Angeli kan thawn a, Ani in a rawn thlang. A thlang thiam leh khawp mai, a chunglam zahawm tak ni siin a hnuailam lang mawi hnai tak a thlang a. Keipawh in a thlan chu inhmeh ka inti, Mampuia pawh in mawi a tih ve kha.

Inneih nan ni thum chiah a awm tawh a, Sawm tur ang kan sawm kim tawhin, ka chhungkaw hlui ti tawh mai ang, Anni pawh rawn tel ngei turin kan sawm ve a, tin, Sangtei'n min dinpui dawn bawk. Ka thawhpui te hi an phur hle a, Inneih zawha ka thawh zawm loh erawh an hlau, chutih rualin kan sawi lawk tawh angin fa kan neih hma chu ka la thawk dawn a ni. Ka phone-a message lo awm va va chu melhin, Mampuia'n bachelors party an neih tur thu min rawn hrilhna a ni. Call hran tawh lovin, Zu in vak lo la ti ringawtin ka reply. Kan buai ve tawh a, inneih hmang turin Lunglei lam leh hmun dang aṭangin chhungte an lo thleng ve tawh hlawm nen kan ri ve laih laih mai. 

Sangtei pawh kan in lamah a rawn awm phei a, engkimah ṭhian nih a tlin khawp mai. Man inhlan zan a ni a, man ei tu leh ṭhianṭha te tan chaw eikhawm kan buatsaih bawk nen kan ri laih laih a, Mampuia leh a Zomuana te pawh chaw an rawn ei ve a. Mu tura kan inbuatsaih meuh chuan dar10:30p.m a ri der tawh. Riah ho an tih avangin Angeli room-ah chhuatah kan mu khawm a, Kan cousin ṭhenkhat ho hi chu ka hre vaklo na in, a tu mai pawh hian min nel em em vekin ka hria, Angeli la an ngaihsakin hetia riah khawm pawh hi Anmahni rawt ania. Sangtei ka vengthawng deuh na in Amah hi nuam ti berah a ṭan avangin mutna kan phah dul a, kan mu ta hlawm a. 

Hmeichhe awmkhawm tih takah thawmhnaw hak tur ṭhenkhatin an sawi laiin ṭhenkhatin an star te an titi pui a, kan ri luih luih na in muthilh chu a harsa. Ka message tone riah chuan Mampuia anih ringin ka en vat a, mahse number hlang ringawtin video min lo thawn hi ania, ka hawng erawh khawvela ka thil hmuh duh loh ber ka hmu. Ka chhungrila rawn na veng veng chuan awm ngaihna min hriattir lo. Ka awmdan buai ru zetah chuan Sangtei chuan ka phone chu rawn la vatin a en ve nghal a. "Awi Lalpa leh," a ti rualin Angeli message tone a ri ve nghal. Pindan chhunga hmeichhe ho chu an ang hlaih hlaih a, ṭhenkhatin min rawn hnem nghal mawlh mawlh a, mahse eng nge an sawi ka hrelo. Ka hriat zawng chu, kha video a hmeichhe pakhat leh Mampuia sex hmang lai ngialngan taka lang kha a ni mai. Ka phone ka en tawh lo chung pawn mitthlaah a cham a, ka tawt lutuk ringawt. Ka ṭah a chhuak a, mahse ka mittui a hul vek si. Angeli'n min kuah a, "Mag Ṭap rawh," a tih te chu mumalin ka hrelo. Hetiang taka hmeichhe derdep hi ka ni ngailo asin, mahse Malsawmzuala video ṭenghneng tak ka hmuh meuh chuan keimah hi Keimah ka ni thei ta lo anih hi.

Kawngkhar an rawn kik a, ka nu leh pa hmel ka hmuh rualin, kan cousin a mi pakhatin, "Social Media-ah an post darh ania." a rawn ti ve nghal. Chhungkuaa inbiak hun tih hrethiam takin midang zawng an chhuak a, kan chhungkua zawng kan awmkhawm, ka nu a ang hlak hlak a, Angeli'n min kuah bet ran bawk a, ka ṭap theilo. Hetiang em em hi chu a tih duh ka ringlo asin le. Ka pa chuan, "Bawihi, i mangangin, i hrilh a hai ang tih ka hria, mahse naktuk in inneihni a ni tawh a, i paltlang thei ang tiraw?" a tih rual chuan, ka nu zawkin, "Inneih hi ṭhulh rawh se, heti taka tenawma a khawsa duh anih chuan engvangin nge hetianga na hian ka fanu hi a siam, hetiang mipa bulah hian thlamuangin ka fanu hi ka thlah theilo ang." a ti hmak a, mahse ka pa in a khap vat. 

"Bawihi, i thu thu a ni e." a tih chuan, engtin mah ka chhanglo. Rei tawk tak an awm hnu chu min chhuahsan ta a, midang lo lut pawhin engmah an sawizawm lo chu ka lawm. Ka phone ka en a, call a rawn luh ka beisei a ni. Keipawhin ka hria anih chuan Malsawmzuala te chhungkua pawn an hriat ngei ka ring. Engtin emaw tak a rawn sawifiah ka beisei a ni. Zankhua in ka nghak a, mahse Mampuia a ni emaw, a nau call takngial pawh ka dawng lo. Khua a var a, ka chhungte ho pawh awmdan an thiamlo, inneih ka kaltlang pui dawn nge dawnlo tihah an rilru a awm vek. Malsawmzuala hi ka ringtawk pawh ti mah ila, engmah a sawifiah lo leh a ngawih hmakna hian min ti na a, ka rinna hi a diklo anih te ka ring rum rum tawh. Dar8 a ri a, mipa lam an la reh vung vung chuan ka pa ngaih ti ṭha tawh lovin Malsawmzuala pa a call ta a, chuta a thusawi erawh in min va ti na zual si em. 

"Inneih hi ṭhulh hrih mai ang u," a ti a ti nih kha, a chhan engmah a sawi lo a, tin, eng in sawifiahna mah Malsawmzuala hnen aṭangin ka dawng heklo. Keichuan a rawn insawifiah tal ka nghak kha ania, mahse thil thleng hi a dik ngei a ni tih a chiang. Kha Bachelors party zan kha anih ngei pawh ka ringnghet hmiah. Thleng pawh nise ka hmangaihna hian in sawifiahna tal a phut asin. Mahse thehhmeh angin a reh tlawk tlawk si a.

Inneih kan ṭhulh mai hi hriatthiam a har ka ti a, Keimah zawk hian duhlo in ṭhulh ngen ila awm ka tih rualin a tisualtu lamin ṭhulh an ti hi na ka ti zual. Ka natna leh zahna chuan min ti chau zo a, heti tak hian a ni maw Malsawmzuala hi ka lo hmangaih a. Kan chhungte pawh an la cham ve rih a, mahse ka engtih mah hi a tuilo. Tumah ka be peih lo a, ka pindanah ka tawm tlawk tlawk mai. Ka unau te chuan min tihhlim an tum viau a, mahse a der a nuih a, na lo anga lan kha ka thiam ve lo. 

Inneih kan ṭhulh aṭangin karkhat lai a liam tawh, Malsawmzuala te lam an la reh vung vung a, tuman min rawn be lova keipawn tumah ka be pawp biklo. Hetiang taka mualphona a nei chunga keiin ka tuar ve lehzel hi ka hua a, ka dem takzet. Keimaha luhlulna a cho chhuak tawh ka ti mai. Ka thinrimna te min lem zo tawh a, Malsawmzuala ngaihtuah lova awm chu ka tum ber a ni tawh. Kan chhungte pawh an haw tawh a, keipawh workshop lama kal leh ka tum tawh. Ka pa te chuan an la remti chiah lo na in, intih thawveng ka mamawh ka tih miau avangin min kaltir kha ania. Hna han thawh leh takah chuan rilru ka kawm tam lova, inngaihtuah na hun ka nei em em lo nen a zia phian mai. 

Tlailam kan bang ka haw tur erawh Malsawmzuala leh Cindy in phur ka hmu a, mak ka tih rualin an nui hmel chuan min ti na takzet si a. Malsawmzual hetiang mipa hi maw ilo nih a, hetianga min bum kual mai mai tur hian i eng pawi nge maw ka sawi le. Min duhlo anih te chuan ṭha taka min hnawl mai tur ania.

I thiltih avang hian ka ngaihdam theih che ka ring tawh lo, tiin ka phun chhuak sap a.

Malsawmzuala te ka hmuh aṭanga ni hnihna chiah a ni, Workshop ka kalloh avangin Angeli nen kan in awm a, Movie en in kan titi luam a, nuam pawh ka ti ve hle mai. Chhun a ka nu leh pa te rawn haw avang chuan mak tiin kan lo en ha a, an rawn luh ruala an hnunga Malsawmzuala rawn kal ve ka hmuh rual chuan ding phatin ka melh ling nghal hlar a, mahse engmah ka sawi hma in ka pa in, ṭhu tura min tiin Anni pawh an ṭhu ve nghal a, kei erawh ka ṭang ṭun mai. Theihnghilh tuma theihtawp ka chhuah laia Ani a rawn hruai lut hi ka lawmlo em bawk a ni. 

Malsawmzuala chuan min melh vung vung a, hmun dang ka hawisan hmak thung. File pakhat rawn la chhuakin ka pa a pe a, "khang kha ka mualphona kara thudik chu anih kha, tin, hei hi video original kha a ni a, kha video kha siam danglam a ni a, heng zawng zawng phenah hian Cindy alo inrawlh vek a, chung zawng zawng zawngchhuak tura hun ka duh rei deuh avangin min hrethiam dawn nia." atih chuan ka ri ve nghal phat. "Dawt a ni emaw, puhna pawh nise inneih ṭhulhna tham a tling em ni?" ka tih chang fak chuan chiang zetin min en a. Keipawhin ka melh ve ngar mai.

"Ka pu i remtih chuan Magie hi a falin ka be lawk thei angem?" a tih rual chuan ka pa chuan min melh vutin a lu a bu nghauh a, ṭhutkhawmna pindan chu na chhuahsan ta dial a. A hmel tlak dak leh mut a hmu ṭhalo tih hriat taka a mitmeng dul ruih te chu ka hmuh hmaih lo, mahse tun dinhmunah erawh Amah huatna hlirin ka khat chu anih hi. 

"Mag ka thusawi hi ring rawh, kha zan kha zu chu ka in ngei a, mahse tumah ka mutpui lo, chuan kha video kha siamchawp ngei a ni tih finfiahna nen lam ka neih hi, min awisak hram rawh." Malsawmzuala'n a tih chuan, "Inneih i ṭhulh phahna kha maw." ka ti hul hak. 

"Anih khatianga kan inneih dawn zan aṭanga buaina nei chung khan innei ta ila, inneih zan inhau chunga hman i duh em ni? Keichuan chhe taka bul ṭan ka duhloh avangin thudik ka zawn chhuah huna sawifiah ka duh zawk." atih chuan dikna chen a awm, mahse vawikhat tal thudik a nilo tiin sawi se ka ring em em tur, a ngawi hmak a, engmah a sawi heklo chu chuan min ti na em a ni.

"Engtik laia pawha engkim in share ṭhin khan engmah sawi lovin min ngawihsan a, ka nat loh i ring em ni? I ngawih avang khan engkim a fel mai i ring zawk tihna maw? Nge ni a kei hian mawl takin ka lo nghak tawp ang che. Ni lul love, i ngawih reng avang khan ka rinna che i ti chhe zo tawh a tawk." ka ti hmak.

"Engkim kan in share a, mahse Cindy-i nu nen in inbiakna kha ka lakah i zep chu a ni si kha. Kha zan khan rawn biak che ka tum ngei alawm, mahse video ka hmuh rual khan, Nangmah ngei hian Cindy nu hnênah ka fa pai turin phalna i pe a, tih i voice record ngei ka dawng asin. I duh duha i bungraw hman theih ka ni em ni?" sehchilh zeta a tih chuan mak ti zetin ka melh nghal ha mai. 

A phone a phawrh a, eng emaw hi a hmet a, Cindy nu nena kan inbiak laia a ṭawngkam leh ka aw ang zetin Cindy-in Malsawmzuala fa pai ka phal thu a sawi lai a ri nghal a. Kan aw in ang viau mahse keimah ka nilo, mahse ka nilo tia ṭan chhan tur engmah prove ka neilo. "Kha kha keimah ka nilo..." ka ti chhuak thei ṭawk. Ka hmel buai deuh nak chu a hmu tih ka hria, "Ni e, i nilo, thudik engkim ka hailang vek tawh. Mahse ka biakloh chhan che i hre tal alawm." a tih chuan sawi tur ka hrelo. Engtin nge hetianga hemite nufa hian chet an lak theih zawk le.

"Bawihi, engmah ka sawifiah loh avang khan min ngaidam la, ka thinrimna leh ka mualpho avanga i laka ka inthiamlohna te kha buk dawn ila a rit zawk ka hrelo ang, ka inthunun theilo a, tin, kha video vanga insawifiahna tur engmah ka neih siloh avang khan ka ngawi tawp anih kha. Tunah chuan thudik engkim ka hre tawh a, tin, ka mualphonaah pawh thudik ka hailang tawh pawh a, kan inkar erawh i kutah a innghat tawh e." atih chuan sawi tur ka hrelo. 

Ka tuar viau emaw ka tih laiin Ani pawhin a natna sawi kherlo mahse a hmel leh landanah a na ve hle tih ka hrethiam miau si a. Rawn kal hnaiin, ka kut vawn a tum chu ka tawlhsawn vat a, na tih hriat zetin min melh ngawt ngawt ringawt. "Ilo kal hma in i inbual em?" ka tih chuan mak ti zetin min melh a. "Kha Cindy-i i khawihna kut kha, ni7 chhung nitin i inbual hma chuan ka taksa khawih suh ang che." ka tih fak chuan, a kut enin a nui nghal hawk a, min ban thutin, ka kawngah a rawn chelh a, "Kan inneih ka tih khawtlai avangin min ngaidam rawh, mahse keimah hian ka tuar ber aw," tiin, ka chhan hma hauhin min rawn fawp ta vawng vawng a.

THE END....