mistake 9

MISTAKE (9)

Ziaktu: Toni Râlte

Maggie chuan nui sak chung hian, "Ka pi, i pasal ka kawp lo tlat! Min hai a niang" a ti fiah kák a. Chu nu lah chu luhlul hmel zetin a ding khawng lah a, "Daw suh, pha buai duh lo mai teh, in inbiakna zawng zawng ka hmu vek e" a ti khar khar a. 

"Khaw maw kan inbiakna chu, min lo entir teh" Magie chuan cho zetin a ti ve a. Apuia te hoin an lo thlir ṭhap ringawt. 

"Kan pa phoneah a awm daih alawm, engtin nge ka entir theih ang che" a lo ti hlar a. 

."Tu nge i pasal hming chu!" A han ti leh a. 

"I hre mah mah, sawi kher a ṭulna a awm lo, lo be tawh lo a ni mai, mualpho i duh loh chuan" a ti leh hram a. Magie chuan va din hnaih deuh pahin, "Ka pi, ka number ka pe che ang a, i pasal nena inbe ṭhin number chu min lo thawn teh aw. Thil hi fiah zel ka duh tawh a ni" inringtawk zetin a ti a. Chu nu chu a hawihai deuh, Maggie chuan a number a sawi ta zar zar a, a lo chhinchhiah ve mai bawk. Eng êm êm ti lo chuan an in ṭha ṭhen ve leh ta tawp. Apuia'n ,"Meg, engkim hi fiah zel tawh tak teh, a ninawm riau..i dikna hi lantir zel tawh rawh" tiin a lo fuih a. Magie pawh a bu ve nghat mai. 

Buaina dang tawk tawh lem loin ni a vuiliam a. Tlaia a bang in a thlen chuan a nu leh Hmuni te rawng an lo bawl a, In hnuainu a lo ṭhu ve bawk. Magie a hmuh rual chuan Pi Rini chuan, "Maggie chu Angeli maw ka ti thut che lawm le..Taka! Enteh, Magie, i thawhna workshop-ah sawn hna ruak a la awm mial em? Ka nau a rawn kal dawn a, he lam hi a tui ve sia, thawhtir dan ngaihtuah ve teh" a lo ti hluai a. 

"Ka va hre bik lo ve aw, a daih saw chu kan indaih lutuk lo va, Rinpuia saw an khaw lama hawn a tum deuhin ka hria a, U Zorema ka lo be dawn nia" a ti ṭha ve mai a. 

A nu chuan, "Ni e, thawhtir dan hram lo ngaihtuahpui teh, an khawsak pawh a ziaawm ve phah mahna.." a lo ti ve suam suam a. Magie chuan chhang tawh lem loin a room a pansan a. A inbual zui nghal. A zu chhuk leh chuan pi Rini chu a lo awm tawh lo va. A nute puih ve pah chuan, "Nu, Nu Rini te nen hian engtia in chhungkhat nge in nih?" A ti a. 

"Rini pa te leh ka nute hi 1st cousin an nia..anmahni hi an fel riau a, min rawn intichhung thiam khawp mai" a nu chuan a ti a. 

"An pa khuan eng nge a thawh ve ber a" a tih leh chuan, "Tlem lai khan taxi a khalh ve a, mahse, a hlawk vak lo nge, Mistiri a zui ṭhin a. Mahse, sawi leh sawi hnu a bawrhsawm riau a, an harsat phah a nih khu" a nu chuan a ti mial mial a. Hmuni chuan, "Pi, tlaia kâwna min tirh khan Tetea leh hmeichhe pakhat an lo inphur asin" a rawn ti teh daih a. Pi Thanpuii a meng rum nghal, "Kan Muanzuala hian a la thlah lo tawp a ni maw? Ngawi tak rawh se, Diki te inah hian ka la leng ang" a ti ram hmak a. 

Magie ngaihdan ni vak lo chuan, "A chi loh êm mai. Kohhran khata lawi dun kan nia, chutia zu kalchilh chu an hmuh dan che a nêp vek ang, i hauh reng hian i tihel mai mai zawk" a lo ti ve hmiah. 

A nu pawh chu a ngawi zui ve leh ta mai a. Angeli a rawn haw a, a mizia a dang leh daih, Magie pawh chu a be ve bawrh bawrh mai. An rawn hawn kim hnuah zanriah an ei a, Hmuni chuan chawhmeh siam a thiam em em lo tlat! A hâng hle ringawt hlawm a, Ajinomoto a uar fâl hle a ni. Mahse, tuman an sawisel bik lo va. Ei khamah Magie chuan Hmuni a pui a, a zawh felah tv a en ve leh zuai a, a roomah a chho lehnghal daih. 

A room bathlarah chhuakin khua a chuan vel a, boruak a nuam hle. Malsawmzuala'n a rawn call a, "Ka papuia a stroke a, hei damdawi in kan panpui dawn mêk, chanchin ka rawn hrilh leh ang chu, i theih chuan rawn kal ve la a pawi miah lo" a rawn ti a. Magie paw'n, "E a ni maw? Nia, ka pa ka lo dil dawn nia" a ti ve a. A la hma tho bawk a tiin a pa dil tur chuan a chhuk a, a han sawi chuan a nu chuan, "I û nen va kal rawh u, chhiat lamah hi chuan inṭawiawm a ṭha ngai" a lo ti vat a. Angeli pawh chuan, "Papari kan sawm phei ve bawk ang a, ka han insiam ang e " a ti nghal zung zung. Magie tan pawh han hnial chi a ni bîk lo bawk a, ani pawh insiam turin a chho ve nghal a. Eng emaw tawk thut thei an ni tih hriain tlaivar inringsa in a thawmhnaw pawh a ha a. Zing lamah hi chuan a vâwt ve deuh tawh bawk nen. Angeli nen car-in Papari te in lam an pan phawt a. Papari pawh a lo inringsa tawh bawk a, an nghak rei hran lo. An pathum chuan Damdawi in lam chu an pan ta a. An va thlen chuan chhungkhat laina bakah ṭhenrual te an lo tlim hmûr tawh mai a , Malsawma ber pawh an va hmu lo. An ṭhu ve ta chawt a. 

A hnu lawkah Malsawmzuala a rawn lang ta a, an bulah rawn kal nghalin, "In va fel ve" a ti nghal hlut a. 

"Fel vang pawh a ni êm êm lo,.a ngai tlat sia" Magie chuan a lo ti ve a. Papari'n, "Engtin nge âpu chu a awm a?" A lo ti var a. 

"Eng a la ang thei lo, nikhua a la hre lo hrim hrim..eng nge kan an dawn ni?" Mampuia pawh chuan a lo ti ve var a. 

"A mak e, a hrisel tehlul nen" Papari chuan a ti ringawt. Malsawmzuala chuan Magie melhin, "Coffee zuk la lawk ang hmiang" a ti sup a. Magie pawn a lo hnial bik lo, an kal ta a, Angeli leh Papari te chuan an chhuk lai chu en pahin, "Tenawm dun e" an ti a. Angeli phei chu a thin a ur leh tut tut tawh. Mahse, insûm a tum ve nasa. Magie te coffee zuk la pawh an rei lem lo, an chhoh lamin, "Nakinah ka nu leh pate ka hmelhriattir dawn che nia" a ti nghut a. Maggie pawn a hnial lem lo. Angeli te bulah an ṭhu ve leh rih a..Eng em em pawh an sawi hran lo. Angeli pawn chhiatna lam a ni bawk a, a ze ṭha lo a lantir vak bik lem lo. Malsawma erawh a be deuh reng thung. Chutia an ṭhut deuh ṭhap lai chuan Magie û ni ṭhin Remsiama kha a ṭhianpa nen an rawn lang ve hlawl mai a, an ṭhianpa a lo awm ve a lo nia. Remsiama'n Magie te a rawn hmu chu a en tawn sek a, Magie zawk chuan, "U Remsiam" a lo ti ta hlauh a. Remsiama chuan Magie chu melh run runin a chhipsamah a ṭhamsak ta mai a, Magie lo inring lo bawk nen, chhuatah chuan a paih thlu ta chawrh a, "Hmel varung, nangmah vangin ka damchhungin fa ka nei thei dawn lo tih i hria em? Hmuh che hi ka duhna a rei tawh, ka chungah i tih ang chiah khan ka ti ve dawn che a ni. "A ti bawrh bawrh a. Malsawmzuala a rawn inrawlh ta vat, Remsiama chu hnehsawh zeta nekperin Magie chu a kaitho a. Remsiama rui tawh bawk si lah chu a thinrim tulh tulh nge, ring zet zetin a âng ta buan buan a, Malsawma te chhungkhat ṭhu ve an tam ropui si. Chungho te chu melh kualin, "En rawh u, he mihring tenawm lutuk hian ramtuileiloin min siam asin, amah vangin fa ka nei ve thei ngai dawn lo. " Tiin a au nghek nghek a. An rawn hawi hrâ hrâ hlawm mai. Malsawmzuala nu a lo awm hnai remchang bawk a, a rawn kal ve a, a fapa bulah, "Mampui, eng nge maw thleng le? A zia lo êm mai" a rawn ti a. 

"Nakinah kan inhrilhfiah dawn nia" a lo ti ringawt. 

Magie chuan Remsiama chu melh vein, "Ka chungah thil tenawm tak tih tum lo ni la chuan, fa i la nei thei ngei ang" a ti chang rât a. Remsiama chuan nuihsawh hmel lek lek hian, "Ka mutpui duh lo e te min ti vel a, sex video te i siam ngam leh tho sia , mi pasal pawh i kawp hreh lo bawk..i tenawm lutuk hi ka luak mai dawn" a ti lûng lûng a. Magie a nui sak, Angeli erawh a kimki deuh, "I ngaih ngaih khan lo ngai rawh. Zolianthanga inah haw vang vang rawh" hnehsawh zet hian a lo ti ve a. 

Remsiama chu a ṭhianpa in a kai lui a, a chhuahpui ta a. Magie chu mite mit fûkna ber a ni ta. Zia lo a ti ve viau, a bialpa chhungkhat kualte an lo ni kher bawk nen. Mahse, Malsawma'n a la hrilhfiah hlawm turah a ngai. An ṭhut fel leh hnuah chuan Angeli chuan, "Pawngsual a tum che pawh ni se, pa thei lo khawp khawpa han siam kher? A damlaiin hremhmunah i tlaktir a ni ringawt alawm" a lo ti nghat a. 

"I khawngaih viau chuan nei daih la, nang pawh hi fa nei thei lo tura siam i ngaiin ka hria" Magie chuan a lo ti hmak. Dik tak chuan Angeli vang hian a la mualpho zel a, phir an ni tih an lo hre vek bik bawk si lo. Angeli chu a haw ve tawh êm a ni. Angeli chuan , "I va zak lo tak, ka nu bulah ka sawi dawn khawp" a lo ti tuar a. 

"Sawi ngei ngei rawh" a lo tihsan. Mahse, an inhnialna chu Malsawmzuala papuia thih tak thuin a rawn chhilh bo ta hlauh a. Ṭap riin damdawi in chu a khat nghal a, Malsawma pawh a papuia an dahna lamah a kal ve ta vat. Chutia thihna hial an tawh takah chuan han hawnsan chi ni tawh bik hek lo le, ruang chu a zui haw ve ta a. Magie erawh Malsawmzuala carah a chuang ta thung. Angeli chu an pawisa zo vak tawh lo a niang e. Malsawmzuala te inbul lawk chu a papuia te in a ni a, a lian ṭhain a mawi viau. Malsawma te in a la nalh zawk lehnghal. An veng chhunga pa lar leh challang ve tak a nih avangin mi pawh an tam chak kher mai. An in a len tehlul nen, an khat hmûr thei. Angeli leh papari te pawh an ṭhu dun a, Magie erawh Malsawmzuala bulah a ṭhu, Malsawma ṭhianpa Dinpuia û, Danmawia nen pawh an inkawm thei viau. Dina te pawh Vanlala te ho nen an rawn lang ve a, Angeli te bulah ṭhuthmun an rem ve tak kha..An lo inbe tawh a ni mahna. Magie chu beisei enah a en tawh lo nge a zah tawh tih hriat va ni suh. 

Zai a nuam phian a, Magie pawh a zai ve nasa mai. Zai lam hi a chikat viau nain a zai ring ve thiam viau. Malsawmzuala'n, "Naktukah hnaah i kal dawn tho sia, tlaivar ve kher a ngai hran lo a nia, i chau lutuk ang" a ti a. Magie pawh chuan zep loh chuan tlaivar êm chu a hreh deuh,.hnathawh hi zan lama tlaivar chuan a hahthlak ve thei êm a. 

"Min va thlah dawn tihna mi?" A ti a. A lo bu nghut. An chhuak zui ta nghal a, Angeli te pawh a sawm khawmawi naa, "Kan tlaivar dawn" an tih avangin a hawnsan ta a. Malsawma nen an pahnih chauha car-a an han chuan takah chuan a eng emaw ti zâm deuh, "Ka bulah hian insangmar vak zel suh" a rawn ti sup a. 

"Ka insangmar lo e a" a ti nghat. 

"Ka nu te kha a hrana hmelhriattir che ka tum ta mai a nih kha..kan ruaibut êm rih a" a ti a. 

"Nia a ṭha reng alawm" a ti sap. Magie te in an va thlen chuan an lo reh ṭhap tawh mai. Zing dar 1 a pel duai tawh a. Kawtah chuan reivaklo an ding a, an infâwp..infawh bak kal theih ni hek lo le, thawchham lek leka an infawh zawhah Magie chu a chhuk ta a. An inmangṭha zui nghal. 

A mut a chhuak tawh bawk a, a muhil nghal bawrh bawrh. 

A tuka hnaa a va kal chuan Zorema a rawn kal lo va, inleng a nei a ni maithei. Chhun chawlh laiin Apuia chuan, "Zorema hi ka khawngaib eee, Tlani nau khuan nei duh mai se, an fate an la tê bawk si" a ti ta roh a. Midang pawh chuan, "Ka lo ngaihtuah ve lai tak, kei pawh innei mai se ka ti..thil awm lo pawh a ni chuang lo va" an lo ti sap sap a. 

Magie chuan, "Zawmi khuan a iai hran miah lo vang ka ring, u Zorema zawk hian a nei thei ang em tih zawk a ni" a lo ti ve a. A awm loh hlanin a chungchang chu an lo rêlsak ve vak a nih ber mai chu! An lainat vang a ni ve bawk a. 

Hna pawh an thawk chak phian. Ni khatah hian an lun deuh chuan 10000 dawn lakluh changte pawh an nei ṭhin. Zorema hian a loan puk a rul zo ve tawh bawk a, an khawsa thei ve ṭan viau tawh kha a nia, Tlani'n hun lo takah a lo boralsan ta si. An vanduai ngawt mai. Nidang aiin an bang hma a, Magie scooty start tum mêk lai chuan, "Magie" rawn ti lauh lauhtu chu a va en a, Hluteii a lo nia. An awmho lai ai khan a cher tawh zawkin a dâng tawh zawk bawk. Zu a in ve ṭhin a niang tih theih turin a dul bawr chu a lian luah a, a mawng erawh a dêp leh lawi si. Magie chuan, "Tehdaih che chuan" a ti ringawt a. Rawn pan hnaiin ,"I number ka nei tawh si lo va, lo biak dawn chein. Thil pawimawh deuh sawi tur ka nei a" Hluteii chuan a ti a. A hmelhmaiah pawh a serious tih a lang . 

Magie chuan, "Sawi la" a ti sap a. Hluteii chu a hawi kual a, "Hetah lo hian sawi dun ila" a ti a. Magie pawh chuan, "A ṭha alawm..lo chuang la..saw lai cafe-ah sawn kan sawi dun dawn nia" a ti ve ta a. Hluteii pawh chu a chuang ve nghal mai a, Cafe lam chu an pan dun ta a. Tlema dawhkan fâl deuhah chuan ṭhuin Coffee an chah a, Hluteii chuan, "A hmasa berah chuan kan ina i awm laia kan lo treat danah che khan min ngaidam la ka duh a" a ti phawt a. 

Magie chuan, "Hun kal tawh a nih kha a ho lutuk" a ti sap a.

"Chuan, i phirpuinu khan min rawn bia a. Thil eng emaw tihsak tuin min rawn ngen a, pawisa pawh min pek a tum nghe nghe"a ti a. Magie beng a verh ta deuh, "Eng thil maw?" A ti vat. 

"Ih, englo a nia. Nangmah hi nau titla tawh ang leh sâwn pai tawh anga sawi tur chein min tia, Social mediaah post mualpho tur chein min duh a ni. Chutianga ka tih chuan pawisa tam tham tak min pek tur thu a sawi a, ka ti lo a nih chuan ka eizawnna puansarhsakah min vau bawk. " A ti ta mial mial a. Magie chuan mak a ti vak lo, Angeli kaw hreuh tum dan erawh ṭhing a tih chi tak a ni thung. 

"Chuan" a ti leh nghat a. 

"Chu chu a nia..sawi ka tum chuang lo naa, tun hnaiah sum lamah ka tlachhe lutuk a, ka pate hriat loha ho taka chet mai te ka chin phah a, mahse, tunlai chu kumpuan duty an hrân bakah customer an vâng thei sia..pawisa min puktir thei mial lo maw ka tia" inthlahrun hmel ru tak, beiseina sâng tak nei siin a ti ta a. Magie chuan Hluteii idea chu a man ta chat, a khi ta sak a. 

"Angeli'n pek che a tum reng chu, a duh ang chu tihsak la, pawisa i hlawh ṭeuh dawn asin" a lo tihsan a. A rin loh deuha Magie'n a chhan takah chuan Hluteii zahzel chu a hawi a hawi ringawt. A tum dan kha chuan Magie hian a ka hup nan sum pe se, Mahse, Angeli duh anga thil kalpui tho va Angeli hnen atang pawha sum dawn kha a nia..mahse, a rin aiin Magie chu a khirh tlat. Mualphote chu a hlau ve miah lo em mawni le..

"I â lutuk, i mualpho nasa dawn asin. A hma ang khan" a ti hluai a. 

"A ho e, ka ni lo tih hretu mi panga an awm chuan a tawk" a lo ti hmiah. Magie chu a hmin zo dawn lo va inhriain , "Ka post mualpho che chu i duh tak tak a maw!" Vau titih hian a ti a. Magie chuan rawn hnaih sauhin a mitmeng tak ran chuan a rawn melh kiau a, "I thu thu alawm. Mahse, defamation case ka file ve ngei a ngai dawn a" nui lek lek hian a ti dam thlap a. Hluteii chu a khur ru deuh, Magie hi an ina a awm lai pawh khan a pa te awm loh chuan a tiduhdah ngam ngai lo, hlauh rûkna hi a nei tlat ṭhin. A thil tum rûk Magie bula a lo phawrh thawt thawt leh a lo duhâm lutuk chu a inchhir ṭan ta. Fake Ac - hmanga post kha a tum dan a nia, tunah bui chhia laih loin a inpuang a ni ringawt. Tunah chuan lo post pawh nise eng fake ac pawh hmang se, Magie chuan amah a ni tih a hai dawn ta lo reng reng chu a nia, a dinhmun a laklawh ta hle mai. Angeli lahin a rûka a eizawnna ve ber phawrh mualpho a tum bawk si. Thaw a la hawk a. "Aw ka post lo vang..mahse, ₹ 1000 tal chu min puktir la, ka rul vat ang che" tiin inohah hniam takin a han dawr leh a. 

"Engvanga mamawh nge i nih sawi phawt rawh" Magie chuan a lo ti a. 

"Karlehah kan college in week kan hmang dawn a, pheikhawk bun tur mawihnai ka nei tawh lo va..ka pa hlawh lah kan chang tawh si lo, ka nuin puan a tah tawh bawk si lo va" a ti mawlh mawlh a. 

Magie chuan a bag a zen rak rak a, 500 tlang pahnih chu Hluteii hmaah a va nawr phei a, "Puk loin ka pe mai ang che. Mahse, pheikhawk chu lei ngei ngei ang che" a ti a. Ni e , Hluteii vauna kha a hlauh vang a ni lo, kha leh chen in khatah an lo cheng ho tawh a, Hluteii chu a lakah ṭha vak lo mah se, a lo awm tlei tawhna te a han ngaihtuahin tlemin khawngaihna leh lainatna thinlungin a en ve lo thei lo a ni. Hluteii chuan lawm em emin pawisa chu a la a. "Lei dawn chiang, naktukah ka va lei ang e" a ti chul a..

"Kan sawi zawh tawh chuan ka kalsan ang che. Ka nu chu min lo biak dawn nia" tiin coffee man chu dawhkanah a dah a, a chhuak ta nghal. Hluteii chu hmuh nawn fô pawh a duh lo. Remsiama lahin nizanah khatiang khan a lo tâwng hrep tawh bawk si..an hnawksak unau ve khawp mai. Buanga hi a chhuah aṭangin a la hmu miah lo va, engtin tak la awm ve zel ang maw? A sual ve mai ang tih a hlau viau, Hluteii kha Buanga number a lo dil lo a ni a ti rilru mawlh mawlh mai. 

In a thlen chuan Hmuni chuan rawng a lo bawl zo tawh a, tv a lo en a, a nu erawh a hmu lo. Tetea pawh a lo bang tawh a; tunlai a hmel hlim lo lutuk hi a lainat ngawih ngawih..tih vak dan a hre bawk si lo. Dikteii tak pawh a khawngaihthlak. Angeli chu a pindanah a lo mu a, a tlaivar ve bawk a, a chau ve viau ngei ang. Hluteii bula a thil ngente kha a ngaihtuah let a, Amah leh amah a intimualpho mai dawnin a lang. Malsawmzuala vang êm êm pawh hi a ni zozai tawh lo vang, a sual ve hrim hrim leh a thîkthu vang a niang, Magie chu amah aia lansarhtir a phal lo bur mai a ni. Magiein lansarh an châk loh tehreng nen aw. A nu chu in hnuaiah a leng a lo nia ,a rawn haw a. Magie a hmuh rual chuan a meng thîp nghal vâwt vâwt mai. "Margareth,nizanah i û i lo tizak hle a ni maw?" A han ti ta chiah a. Nizana an in chhan dan kha a hrechhuak nghal zawk. A nui lui nghek a . 

"Ama cho chhuah a ni tlat.." a lo ti hmiah. A nu ṭawng leh hmain a pindanah a chho nal nal. Chhungkua ka chhar e ti lo chuan indona a ni ringawt alawm le. Mahse, hnehna chan a la tum ve zel ang chu. Zanriah ei laiin a nuin a rawn sawi chhuah leh a rin nen , a sawi ta lo hlauh. A pa zawk chuan, "Maggie, Malsawmzuala in tih kha eng maw a eizawnna ?" A ti a. A hrilh a, "Mi ṭha tak a nih dawn kha, a ngaihtuah dan che lah kha a duh ve tak tak che a ni ngei ang" a ti bawrh bawrh a, a nui bawk. A nu leh Angeli te a tum nghal hmân a, a pawisa duh lo. 

"Nia, kei aia ṭha leh fel a hmuh dawn tehlul nen, a mak ngawt mai" Magie chuan a lo ti ve a. Hmuni lah hi a rilrua awm ang ang sawi ve bawl chi a nih bakah a pi leh angeli te tlawn reng renga khawsa a ni bawk a, "Kei chu U Angeli nen an inhmeh ka ti zawk" a lo ti! 

Tetea'n, "Nang chu kan kawmthlang vawkpa nen khuan" a lo ti sup. Tetea hian Dikteii ai a rawn awh tak vang nge Hmuni hi a mil hlawl lo, bakah a zak thei lo phawr phawr thin lutuk hi Tetea te ang tan chuan a ngeiawm ve duh bawk ang. In hnuai nu leh a pasal an rawn lut ve leh a. An thutak hmel ngang mai. 

"Chaw in ei tawh em ni?" A pa chuan a lo ti vat a. Pu Liana chuan, "Aw ei tawh e..in chaw ei lai mahnise sawi mai ang. Englo a nia, Numami'n pasal a um ve a niawm a. Engtia chet han lak chi nge mawni dawn le?" A ti chuar chuar a. Pu Liana hi pa tê lam, ti deuh khet khet chi, a remchan chuan zu pawh lem ve thei mai, mahse, pa rilru ṭha leh nelawm tak a ni thung. Numami a tih chu kar hmasa lawka rawn zin, A nupui Pi Rini fa bîk a ni a, kum 17 bawr vel chauh a niawm e. 

Pi Thani chuan, "Khai aw! Pasal a um i tia law? A la naupan nen, a va mak ve" a lo ti hluai a. 

Pi Rini chuan, "A duhthlanna a nih vak pawh ka ring lo, a bialpa khan a tilui ve deuh mawni ka ti" a lo ti hram. An pain, "Duh lo chung a tlan luihpui lovang, i â lutuk" a lo ti hluk a. 

Pu Ruata chuan, "A va zia lo ve aw. Khawilam mi nge a pasal um chu ni reng reng a? Eng ang rual nge?" A lo ti a. Pu Liana'n ,"Chawlhhmun lam daih a niawm e, kei phei chuan vawikhat bak ka la hmu lo, Numami aiin a û ṭâwk ang, a la naupang ve lutuk ani pawh" a ti a. 

"Awii, an inngaihzawn rei loh hmel sia, han inruk ringawt" Angeli'n a lo ti hlak. Pi Rini chuan a fanu na nâ na chu a ṭan ve deuh ni tur a ni."Aa..a rawn zin chhan pawh a bialpa nena inhmuh an châk vang kha a niawm zawk asin, a hma aṭangin an lo inbe ve nasa tawh a." A lo ti vat a. 

Chaw an ei kham a, Magie ten an tihfel laiin Pu Ruata chuan, "Zaninah zuk hruai ila a ni mai lawm, rei an inkawl hma chuan pawh ṭhen a harsa lo vang. Nupui pasal nei rual an la ni lo, nakin lawkah nuthlawi pathlawiah an insiam leh ringawt anga. A ṭha lo" a ti dap dap a. A sawi dik zet mai. Zoram khawvel hi phak ang tawka han chhût han chhût hian nuthlawi pathlawi heti taka kan tam chhan hi naupangtêa nupui pasal kan inneih vang hi a ni deuh pakhat a, tikhan tleirawl thazat lai, induhna a nasat laiin an han innei ve ngawt a, nupui pasal neih hi tih mai mai a lo ni tawh bik si lo, mawhphurhna an han nei chho a, kum lama naupan na nâ na chuan zawh loh hun an lo nei nge nge a; tin, nulat tlangval an kham lo fô bawk a, a tu emaw zawkin ngaihzawngte an han nei a, inrem reng chu thil harsa a lo ni tawh ṭhin. Tichuan, a tawp chu inṭhenna a lo ni leh ta mai zel a, fa an lo neih hman tawh phei chuan naupang an khawngaihthlakin broken family aṭanga chawrchhuak chu ṭha taka nung zui awm mah se, a tam zawk hian an seilenna chhuanlamin sual kawng an zawh duh viau bawk. Hei hi kan ngaihtuah chiana awareness campaign te hial neih pawh hi a ṭul takzet tawh niin a lang. 

Pu Ruata thu chu an pawm lo thei lo va, Pu Ruata te nupa leh Pu Liana te chu chawlhhmun lama kal tur chuan an insiam ta a. Pi Rini erawh Magie te inah chuan a la ṭhu a. Numami felzia, a taimakzia thu hlir a sawi suam suam a, Numami hi a tleirawl fa ti mai ang, a pai hian tuman nulaah an la chhiar meuh lo. Numami pa lah an cousin a lo ni bawk nen, innei ta loin Numami chu a pate lamin kum 5 a nihin an enkawl ta a, an khawsa thei zawk bawk a, a tan pawh a ṭhatna chen a awm. School erawh a kal tawh lo a niawm e. A pate lam a chhun a, tleirawl hmel fai ving veng, chhe lo ve tak a ni a, a nu hian a chhuang ve êm êm mai. Ni e, fate hi chu nu leh pate mitah an lo ṭha ber nge nge zel a ni. Malsawmzuala papuia te ina ve lan ve pawh ṭha viau mah se; Numami te case avang chuan a ṭhulh ve ta rih. Hluteii nen an inbiakna te pawh hmaichhana sawiah a khek rih. A pate lo nghah pahin TV a en a, Angeli erawh Papari nen an va leng leh dawn a nih hmel. A ṭha ve reng mai. Tetea pawh a chhuak a,. 

Hmuni chuan, "Kan khuaah chuan tun ang hunah hian an mu deuh vek tawh zel mawle" a ti a. 

"An tho hma thung alawm" maggie chuan a lo ti ve a. 

Pi Rini chuan, "Maggie, i nu leh Angeli te hi an khirh ve angreng sia, hrawn an nuam vak lo em?" A ti ta a. Chotuah a tum dan vel chu Magie lahin a lo man nasa mai si, "Mahni nu leh laizawnte chu tuin nge hrawn ngai?" A lo ti nghat. Pi Rini a dang titih..

"Ka sawi awmzia chu a hmaa i chhungkua te nen an inang awm si lo va ka ti mai mai" a ti leh hnuhnawh a. Magie a nui hak, "I tan phei chuan an ṭhat êm hi, rêl rêl suh. " A ti ta hmiah a. Magie nin ber chu mi chungchang ngaihvena virbuai ho hi, Mizo society-ah a mikhual lo viau lehnghal a, Ṭhenawm khawvengte hi an hnawksak duh fô, an hlawkna tur leh an buaina tur ni miah loah hian an lo buaiin an lo phili ve vak zel a. Mo nei se an lo chîk ve êm êm a, Nuhrawn hrawn awm se, an hmangaih vang pawh ni miah loin nuhrawnin a fahrawn a zilhhau vena te chu an lo vuipui kual thul. Mi chhungkaw inrelbawlnaa kan inrawlh thûk ṭhin lutukte hi pawi tak a ni, zawi zawia mi chhungkaw tihkehdarhna a ni thei tlat. 

Pi Rini pawh a ngawi ta hmak mai. Dar 9 velah A pa te chu an lo haw ta a. Numami pawh an rawn hruai thei e. Magie chuan thingpui a lo lumsak vat a, Numami chu zak leh kimki ang pawn a awm lem lo. A pa chuan, "Tikhan an ni lamin palai te an rawn tirh chuan chhungkua te pawh kan inrâwn ve ang a..in innei lovang tih pawh a sawi theih loh" a ti a. 

Numami chuan thawveng zetin, "Min nei duh awm êm mai, palai chu an rawn tir vat ang" a lo ti. 

Pu Liana chuan, "Kei nuam ka ti vak lo khawp mai. I pain min rawn bia a, 'Ringngam takin kan rawn zintir a, in veng hneh leh si lo. Khatiang tur tih hriata rawn zintir malêk loh tur a nia' a rawn ti zêk a. I pa pawh a demawm loh, a tan chuan nautê kha i la ni ve tlat a, mawhphurhna hlen zo lo te pawh ka ang dâwn dâwn alawm le" a lo ti ve a. An nuin, "Aa..a ho êm mai, U Sanga te pawh an hauh hlur zel a, a nu a hringtu ngei ka la dam a, min rawn tlawh tur pawh a ni ve lawm mai mai a" a lo ti hmak hmak a. 

Thingpuite an in zawhah an ni pathum chu an haw thla ta a. Pi Thani chuan, "kei chu mipa nu leh pate kha an phur vak lo a ang ka ti.. kan zuk hruaite kha an lawm hmel riau tlat" a ti a. A pa pawh chuan, "I lo ti ve maw? Bakah an chapo riaua hriatna te ka nei deuh mawle, an ṭawng duh dan hrim hrim te pawh kha min chaldelh tum an ang ka ti, Innei malêk se la a ṭha zawk ang" a lo ti ve bawrh bawrh. 

Dar 1:36 chiah chiah a ni. Magie chuan call a dawn avangin a harh a, a phone a en vat, Zan tlai tawha incall hian a tihlauthawng ṭhin. Zualko an nih duh êm vang hian. "Hello" mutchhuak aw deuh hian a ti a. 

Hmeichhe aw hian, "Ka pasal leh i û chu an lo inkawp ngei e,hei ka va manchhuak a, Hotelah an lo riak dun chu niin,.an thla pawh ka laksak e" a rawn ti a. 

Kha nu, a pasal ngaizawng anga rawn chhaltu kha a ni tih a hre nghal a. "A ni maw? Tikhan min ring tawh ang chu tiraw" a ti sap a. 

"Umm ring tawh e, ngaihdam rawn dil che ka duh a, tlai tawh viau mah se; ka rawn call che a nih hi. I û pawh a rawn haw mêk ang, i hming kha ti nge a hman tlat le aw ka tia.. i hriat loh hian a lo timualpho fê tawh maithei che a ni" a rawn ti duah a. Magie pawh chuan, "Chhan ṭha tak a nei a ni mahna..i pasal chu ṭhen daih rawh, a sim ka ring lo. Ka û lo pawh kawp a nei ang" a ti a. 

"Nia, naktukah ka ṭhen ang. Court-ah ka khing bawk ang. A nih ka rawn tibuai che a, min lo hrethiam dawn nia, mangṭha le" a rawn ti a. An dah ta. Angeli che chhe zel chu Magie chuan a unaunu a nihnaah a lainatin pawi a ti a, mahse, Ama hming hawha mipa a mutpui kher hian a run êm a, manchhuah a ni chu a lawm tho mai. 

A tuka Workshop pana a tlan lai chuan a nuin a thil chah lamsak tura a tih kha hrechhuakin hawn lamah ka theihnghilh takin tiin a ding a, Pangpar zawrhna dawr bul chu a nu bungraw thlenna hmun a ni. Bungrua a lam zo a chhuak chiah chu Pangpar dawr aṭanga Malsawmzuala leh nula hleitling zet zawt, ngo zet mai, hmel pawh ṭha tak lo chhuak dun chu a va hmu ta a. A ding chawt, an ni erawh chuan kawngpui lam ngawt an en avangin an rawn hmu ve lo, Hmeichhia chuan Mampuia bânah a kuah hnâp a, an nui dun har har mai. Magie rilruah thîkna meipui a rawn alh nghal hluai a, Cindy a tih kha em mawni le a ti rilru a. A papuia thih zan khan a hmu miah bawk si lo. Malsawmzuala car dahna an thlen chuan kawngka a hawnsak thlap a, Ngaizel kawng lamah an tlan ta vang vang. Magie chuan a phone a phawrh vat a, Mampuia chu a call ta. A ring ral ṭhak a, a call nawn leh ngat. A rawn la ta hram a. 

"I kal tawh mi?" A ti satliah a. 

"Vawiin chu ka kal dawn lo, mi tlawh tur ka nei a" a rawn ti a. 

"Tu nen nge in kal dawn a?" A hrechhuak ang tih hlau ru takin a ti a. 

"Cindy nen kan nia, a chhungte ho ka tlawh kualpui dawn a nih hi" a tih mêk laiin, Cindy aw hian, "A va zawt dilchhut che ve, dah teh..ninawm" a rawn ti hlak hlak a. Magie a ner sawk, "Aw le" ti hmakin a dah ve ta hmak a. Workshop lam a pan ta vang vang. A hlim hlawl lo, Cindy hian Malsawmzuala a ngaizawng niin a hria, chhungte pawh an nei ve reng a, Malsawma te ina a awm ve kher te hi remchang a zawng tih a lang reng mai. Ni e, a chhelo a, a changkang a, hna nei a la ni cheu bawk. A elphak rual niin a lang lo naa, An in el dawn chu a nih hmel sia..in khata chendun chu chance a ṭha zawk ngei dawn tih lah a chiang. 

Chhun chawlh laiin Apuia chuan a tih fô dan angin a bialnu a be leh zâwrh zâwrh a, a nui huah huah reng mai. Rinpuia chuan, "Kan Apuia lah hi aw..di rial lova ti tawh ila a ṭha ang, hun awlah pawh kawm ve theih loh, a be nghal chawng zel a" a ti hlut a. Apuia te an inbe zo chu rawn nui sûng chungin, "I ti ve mai mai a nih chu..I ṭawngṭai tam na nâ na chuan Pathian nen in inpawhna a ṭha zual ang, chutiang chiah chuan kan inbiak tam poh leh kan inhmangaihna a pung deuh deuh alawm" a ti lûng lûng a. Magie a harh chhuak ta zawk mai. Ni e, Mi zeihawi tak a ni lo va, bialpate tihlawma han inngaihtir dante a thiam lo. A hun awlah pawh Malsawma'n a rawn biak loh chuan a be ngai lo tluk a ni. Zing thawh hlim leh mut dawna in wish kha a lo duhtawk mai zel a, a ngaih lah a ṭha thin. Mahse, mihring hi kan inang lo va, inbiak tam na nâ na chuan Apuia sawi ang deuh khan induhna te a pungin, ngaihsakna kan lantir vena a ni bawk nen. Magie pawh chuan a rilru te tein, 'Ka be tlem êm mai a, lo pelhe deuh pawh nise a awm ve tho, hmeichhe dangin englai pawn an be peih bawk si, kei lah ka tlei em em a, min duhkhawp lo ve thei. Tun aṭang chuan ka'n be ve tak tak ang e' a ti mawlh mawlh mai. Zahtheih lohna a ni lem lo bawk a, Malsawmzuala hi chân a duh loh chuan a lama hîp beh lehzual a ngai dawn niin a hria. A thiltum thar vang chuan a mood pawh a ṭha sawt mai. Chawhnu lam an ban hma deuhin Malsawmzuala leh Cindy te chu an rawn lang hlawl mai a. 

"Ka rawn tlawh kawi hram che, kan inhmu khât sia, chuan Hei Cindy chu, Cindy, Magie chu aw" tiin nelawm takin a inhmelhriattir a. A langah chuan an nui dun ve ve naa chhungrilah indona an ṭan nghal pang mai. 

"I sawi aiin a tê, mahse, a cute reuh a nih hi" Cindy chuan a ti a. A nui sâng bawk. "Vanlal cute-i alawm..mahse, a man teh mai nia aw" Mampuia chuan a ti a. Magie chuan inti neitu zetin Mampuia chu a banbulah a hnek dawt a, "I sual" a ti hlak bawk. 

"Chhunah thil i ei em?" Thutak zawk hian a ti a. 

"Umn tiffin ka pai alawm" a ti a. 

"Naktukah chuan pai suh, eitur ka order sak che, a rawn thleng ang. Tui lutuk a, ei ve la ka tia" a ti a. 

Cindy mitmeng râng chuan a tiphur ta deuh nge, "Mi duatpa, ka lawm e" nui var var chungin a ti ve a. Awm rei hman an ni lo bawk a, an haw ta a. Magie te pawh an bang zui a ni deuh mai. In a thlen chuan in chhung lama thawm ri hak chu a hre nghal a, engtak thleng leh chu ni maw ti rilru chungin a va lut a. A rin loh deuhin nizana rawn betu, a pasalin bialnu a neihsan ta leh pa pahnih zahawm hmel deuhte hi an lo ṭhu ṭhap mai. Magie chu an lo melh hû hlawm a, Nu chuan, "I lo haw ta maw? Hei i chhungte hian kan chungchang hre ve reng reng se ka duh a, ka rawn kal a nih hi" nelawm tak hian a lo ti a. 

Angeli leh a nu chu an tum bûr a, a pa erawh zah hmel deuhin a ṭhu. "In inthen ta em ni?" A ti ve a. 

A bu nghat a, "Aw, in aṭangin a chhuak zawk a. Court lamah ro chungchang pawh kan la tifel ang,. Kan va haw phei tawh ang e. Chuan, Angel, nakin zelah pawh mi pasal kher kher hi chu kawp tawh lo hram rawh aw. I nau hming i la hawh zui a, i nau pawisawi ve miah loin a tawrh phah zel bawk asin. Ka pasal a dik lo zawk tih erawh ka pawm thlap e, mahse, Nang kher hi chu phone kaltlangin mi rawn vau nasa êm a, i chhungte hian hre ve se ka duh êm vanga lo kal ka ni. Tunah chuan ka pasal nen pawh zalen takin in inkawp thei tawh e" a ti ta charh charh a. Angeli a ngawi reng. An chhuah fel hnuah Angeli chuan, "Hmingthansiam, nizanah kan awmna i lo hrilh a ni maw?" A ti nghal tuar a. 

A ngaihna hre lo zet hian, "In awmna pawh ka hre reng reng hleinem" a ti a. 

A pa chuan, "Malsawmhlu, min tizak zozai ta, naktuk khua lo var se, Home-ah ka dah lut dawn se, kum khat vel va awm la, khami chhung ringawt pawh kha kan tan a hlû, min tihmualpho bak thiam dang i nei lo em ni? I pa hi ka zaidam mah mah ta e..i awm chiang khawp ang" a lo ti ta hmiah hmiah mai le. 

A nu chuan, "U Ruat, insûm rawh. Pathianin kan enkawl turin fanau min pe a, midang kuta dahte chu Pathian pawh a zahawm alawm le. Mateii hi a dik lo ka hria. Mahse, a suahsual vang hrim hrim a ni lo. Magie rawn awm ve aṭang hian engkim a danglam..a mipa duh leh vei ve ngawih ngawih a chhuhsak a, Mateii hian tawrh dan a thiam chhunin a inhrithla ve mai a ni e. " A rawn ti hlawk hlawk a. Magie a ter ve ta at mai .

"Nu, a tawk e. Duhtawk rawh, ka hming in lam ri ve sek hi ka hne zozai ta e. Ka chhuak mai ang e. He inah hian chanvo ka nei ve lo a niang e. " A ti thâm ṭiak a, a lung a chhe deuh. 

A pain, "I chhuah dawn ai chuan an nufa hian chhuak zawk rawh se. " A lo ti bur mai.. 

Chutihlai tak chuan Magie phone a ri a, Sangteii a ni. 

"Magie,i phone kha en teh, facebookah lut vat teh, i mualpho nasa a nia. Ka thinrim lutuk" ṭap pur chung hian a rawn ti ta a..