Mistake 8

MISTAKE (8)

Ziaktu : Toni Râlte

Malsawmzuala car-ah chuan hlang lutin, A pa nen chuan hmanhmawh takin damdawi in lam chu an pan ta a. A khalh chak fua fua kher mai. A nu leh Angeli te erawh an rawn lang ve lo, Mampuia chuan mak pawh a ti lem lo. Casualty-ah lut nghalin doctor in a han en vel sawk sawk a, "Ei sual a nei a nih hmel" tiin damdawi chi khatin a jection a. A sawi ang tak takin Magie taksa chu a rawn vualin a ûak bârh bârh reng bawk, luak chhuah tur erawh a nei tawh lo. A chau khawp mai, a zawi nen bawk nen..a men pawh a meng ṭha peih meuh lo a ni e. Malsawmzuala chuan a vil rûn reng a, A rilru tak takin a ngaihtuah tih a lang. Pu Ruata pawh chu a vei tuak sek a, darkar chanve hnu vel-ah chuan Magie pawh chu a rawn harh chho ṭan a, Drip an khaisak bawk nen, a hmel hmuh pawh a nuam ta deuh e. Admit êm chu an ti ta lo va, in lama ei tur damdawi tlem azawng an chawh a, an haw thei chu a ni mai. Dar 12 a ri thuak tawh awm e. An in thlengin a va thlah leh a, a pa nen an kuah lut leh a. Pi Thanpuii leh Angeli pawh an lo ṭhu ran mai. Angeli chu a meng phelh phang mai a, a tum bûr bawk. 

"Tikhan han mu hahdam rawh. Naktukah ka rawn kan ang che" Mampuia chuan a ti sup a. Magie pawh thuawih zetin a pindan lam a pan ve nghal. A room a luh chuan a ner sak, a luak chu a ngai ngaiin a lo la awm a. Peih leh peih loin a thian a. A insilfai leh thuak thuak hnuah a mu thlawp mai. A chau hluah hluah. Chauh bawk nen chuan a muhil ta thuai mai. Zingah pawh a harh hma naa a tho duh rih lo. A taksa chu a na ṭhûm mai. Nimin tlaiah khan chakai an hmeh a, kha kha a lo eisual nge, Angeli fing phakar hian a ei turah eng emaw a lo pawlh zawk ni? A ngaihtuah buai peih vak lo. A nu leh Angeli te tawrhhlelhawm ṭan chu engtia hmachhawn chi nge ni ang tih a ngaihtuah neuh neuh a, engpawhnise, a rilru an tihel laklawh tawh a. Malsawmzuala chu a ṭul tawpkhawk a nih loh chuan ṭhen a tum lo bur mai. A bula a din chhung chuan hlauh êm êm a nei hek lo. 

Vawiin hi huana kal an tum ni kha a nia, mahse, tihian a taksa lam dinhmun vangin an kal thei ta lo chu a nia. Tukṭhuan chu a zuk ei ve hram, Chakai pawh a ei duh ta rih lo. A pa chuan, "Inenkawl ṭha la aw, in hna in ṭan ṭêp tawh bawk si" a ti mawlh mawlh a. A pa hi hna avangin Lawngtlaiah a zin dawn a, chaw eikhamah an chhuak dawn a ni. Dikteii nen tlawng in an nghak leh ta chu a nia. Mahse, chawhnu lamah Malsawmzuala a rawn leng ta hlauh a, a zia ta deuh. Dikteii nen te chuan a inhmelhriattir ve a, hlim takin an inkawm ho ta. 

Dina chungchangte chu an sawi dun a, Magie thusawi chu a ring thlap mai. Angeli hian a phirpui hi a nasa thei ang bera tihmualpho a tum tih a lang ta phawt a, "Engpawhnise, a duh dan ang chuan che zel rawh se. Thudik chu a bawhbet thei dawn chuang lo, a rang lama ka chhungte nen in inhmelhriat a ngai" Malsawmzuala chuan a ti mawlh mawlh a. A nu birthday-ah hruai ve a tum ruh hle..a chhan chu Angeli a nasa si a, a chhungte rilru a pawt her ang tih a hlau ve deuh a ni maithei. Angeli te nufa rawn hawn hmain Mampuia chu a haw ta a. Dikteii nen rawng an bawl dun a. 

Tetea rawn haw chuan chocolate a rawn hawnsak ve ve a, a zei ve reuh phian mai. Maggie'n bai tur a chan laiin Tetea chuan, "Dikte, lo chho lawk..ka room hi min lo chinfelsak lawk"a rawn ti lâng lâng a. 

Dikteii pawh a hna a laklawh lo bawk a, hmanhmawh takin a han chho a. 20 mins vel lai an reh dun hnuah Pi Thanpuii a rawn haw ta thut mai. Magie chu a lo hlauthawng khawp mai a, A rukin Tetea a call nghal. A nu inthlak chhung chuan , "ka nu a lo haw, rawn chhuk vat ru" a han ti a. Dikteii a rawn chhuk ta vat. Boruak ṭha lo a thleng êm lo ve. A nu mizia hi mak a ti fô, mi sawi hre tho mah se; mak a ti tho. Nizan te, zan hmasaah te khati khawpa hmumawha mitmei ṭha hmuh duh si lo kha Magie chu a be ṭha leh huam huam a, awmdan pawh a thiam lo lek lek hial. Angeli pawh a rawn haw ve a, a mood a zia a nih hmel. Dar 5:30-ah Dikteii chu haw turin a inbuatsaih a, Pi Thani chuan, "Tikhan rawn kal a ngai tawh lo vang aw. Maggie a awm tho va, Mali pawh a rawn haw ṭêp tawh bawk nen..chuan kha i hlawh" nelawm vak lo hian a ti a. An phâwk deuh, Tetea insûm zo lo chuan, "U Magie te chuan a hna a ṭan ṭêp tawh sia, kan va buai awm ve" a lo ti vut a. 

"Kan buai leh kan buai a ni mai ang chu,He hmeichhia hi kan in chhung rap tawh lo turin ka duh a ni mai" Pi Thani chuan a ti chang fak mai. Dikteii zak leh inthlahrung chu a ding zum zût ringawt. Magie pawh chuan a nu ṭawng dan chu makti zetin a lo ngaithla ve a. 

"Ngati maw? Engvangin maw a rawn rah tawh loh ang" Tetea awki pawh chu a sang ve hret. 

"A chhan chu nang nen inlaichinna in lo neih vang a ni. Hetiang hmeithai fa akara rethei bakberha khawsa hi ka mo atan ka duh lo bur" Pi Thanpuii chuan a ti ta nge nge a. Engkim a lo hre vek tawh a nih dawn hi, mahse, Engtin?! A va mak ngai êm. 

Dikteii kutah a hlawh chu a hmehbel a, "Tikhan chhuak vang vang la, rawn dîkdâk tawh suh ang che" a ti chang leh ta fak a. Dikteii chu mittui parawl kuangin a chhuak zui ta nghal. Tetea a tlan chhuak ve a, A nuin a umzui bawk. 

Angeli chuan, "Phutawk hriat loh chu khati kha a ni mai. Magie, nang pawn i phutawk hre rawh aw" a rawn ti sak a. 

"Khawvelah phû loh an awm lo, hmangaihna a pawimawh zawk" a lo ti ve khauh. 

Angeli chu a nui lui nghek ringawt. A nu leh Tetea te an rawn lut a, Tetea chu a naupan ngaihtuahin a thinrim chu hlauhawm rûkna riau a nei. A nu chu a âng zui hlak hlak a . 

"Lalmuanzual, ka lung i va tiawi lo êm, engtin nge khatiang hmeichhe ṭhing lutuk te kha i lo duh theih a?" Ti ten..Tetea a ngawi ngal mai a, a tumruh hle tih erawh a lang. Angeli chuan, "Ka ringhlel reng a, zana i chhuah hian i lo zuk leng ziah tihna a nia, i mit a hniam lua e ka nau" tiel zet hian a lo ti ve a. 

Magie chuan lainat zetin a lo melh thung. A nu bawk chuan, "Thlah hmak ang che, i thlah lo a nih chuan he inah hian chanvo engmah i nei lo vang, a ṭul a nih chuan an inah pawh ka zuk kalchilh hreh lo a nia. I neih bak a duh lo..nang aiin a upa fê bawk" a ti leh hlawih hlawih a. Tetea thik a thawk ve ta nge, "Mai mai a che u, in nufa hi ka ten che u. Mi rethei hmusit si, mi hausa tlawn leh huam, Nu, Kohhran hmeichhiaah OB i ni a ni lawm ni? I va piangthar lo ve..Ka u, nang phei chu ka lakah engmah sawi theih i nei lo, mi hur i nih kha" a ti ve ta piap piap mai. Chutia a chhang let ve ngam chu a nu leh Angeli chuan mak an ti deuh nge, an hrilhhai hmel hle. Magie erawh a lo ṭang ru ve ṭeuh thung. 

"Khatiangtea min ṭawngkhum ngam chu le..ngawi tak rawh, i pa rawn haw se i châk lo vang.." a nu chuan a ti leh a. "Rawn haw vat teh se, ka pa chu nangni ang a ni ve lo" Tetea chuan a lo ti hmuk. An ngawi tlang ta rih a. 

An boruak a nawm loh êm avangin Magie pawh ṭhu reng peih loin a mu ta daih a. Malsawmzuala'n meeting a neih avangin an inbe lo. Phone khawih neuh neuh hi an peih vak lo bawk nen, phone aṭang hi chuan an inbe tam vak lo khawp mai. A la chau rau ve deuh bawk a, a muhil ta thuai mai. A tukah Dikteii a rawn kal tawh dawn bawk si lo, a harh rualin a tho nghal a. 

A che nghal mawlh mawlh, Dikteii chu ngaihawm a ti ve reuh hle. Kawmte kha a nuamin titipui kha a nuam riau asin le. Khatiang khan a bialpa chhungten ti ve ta se, a zak ngawt ang. Tetea chu a ruka fuih a châk hial, mahse, fuih vak ngai paw'n a ring lo, Dikteii kha a duh ve êm mai. A chet mawlh mawlh laiin in hnuai nu Pi Rini a rawn chho a. An chawhmeh bel a rawn hawng zut zut.

"Anṭam tlak hi ka'n suak teh ang, antui tel lo chuan i Pa Hnûna'n chaw a ei hleithei lo" tih leh bowl lak a rual a. Pi Thanpuii a rawn tho ve mêk bawk. 

"Rini, in nau chu engtikah nge a rawn thlen dawn? Karlehah Magie hian a hna a ṭan leh dawn sia, kan buai dawn riau ania" a mit nuai chawt chawt chungin a ti a. 

"Vawiin chawhnuah an rawn chhuak dawn..Mali chu a rawn phei tawh dawn lo mi?' Rini chuan a ti a. 

"Aw..lo phei tawh lo law law mai rawh ka ti a nih kha..a bungrua erawh a rawn la ang chu. A buaithlak, hawn a tum reng zel a" a nu chuan a lo ti a. Pi Rini te chhungkhat awmpui thar an nei dawn tihna a nih chu, Magie chuan a hre ve chiah. A ṭha reng alawm a ti rilru a. Awmpui an neih loh chuan aman a tuar ber zel sia..a buaithlak. 

Tetea chuan tukṭhuan a ei lo phawt. A titau a ni ngei ang. Koh an tum chuang hlei lo va. Angeli erawh, "Lalsavunga park-ah kan kal dawn" tiin a phur khawp mai a. Nitin maia a chhuak reng hi a nu te hian an hau ngai lo chu a ni phawt mai a. Pawisa lah a heh si..A buaina tur a ni lo ve..a pa te an hausa alawm, a ho êm mai. 

Inrinni a ni bawk a, a room a siksawi kual a, a thar ang mai a ni thei a, a zia khawp mai. A nu erawh in hnuaiah a leng a, Tetea a la rawn tho chhuak miah lo. Maggie chu a ngaih a ṭha lo ta deuh a, Tetea pindan kawngka chu a kik ta kauh kauh a, a reh tlawk tlawk mai. "Tete Te-a" tiin a au lauh lauh a, reifê hnuah a rawn hawng ta hram. A pawr phang mai a, mut a hmu miah lo niin a lang. A meng sen rûm mai. 

"I ṭha lo a nih kha..thil ei rawh aw, ka siam ang che" a ti nghal siam siam a. 

"Engmah ka ei châk lo" beidawn hmel zet hian a ti chuai raih a. 

"I intihchak a ngai alawm. Khatia i beidawn mai ten, ka nau"tiin a han fuih a. 

"Awmzia a awm lo, Dikteii'n engkimah min block fai vek tawh" a ti leh nghut. 

"Kei pawh ni ila ka block ang che. A huat vang che a ni lo a nia, a tan chuan kha kha a ṭul tlat a ni. I nuten an ṭawngkhum dan kha ngaihtuah la..a tan chuan a zahthlak dawn êm asin" a ti mawlh mawlh a. 

"Nia..ka khawngaih lutuk, u Magie, nang tal chuan min support rawh aw..nangmah bak innghahna ka nei lo a nia" a ti hluai a. A thisen zawmpui, a nau chu a lainat thar hle. 

"Lungngai mah ta che, i lamah ka ṭang tlat dawn alawm..Dikteii pawh lo biak ka tum dawn nia, tunah chuan thil ei phawt rawh" tiin a thlem a. Tetea pawh chu phur fahran loin a tho ta a. Magie chuan chawhmehte tihlumsakin a siamsak vek a, a ei lai mêkin a nu a rawn haw a. 

"Magie, tlaiah kan awmpui thar tur a rawn thleng dawn a, Mali room saw a luah a ngai dawn sia, i lo chinfelsak loh chuan" a ti a. 

"Aw ka lo ti dawn nia, khawi ami nge ?" A lo ti ve mai a. 

"Darpui khua ami a niawm e. I nu Rini pa te nena in chhungkhat an ni a niawm e. " A lo ti a. Tetea chaw eikhamah Mali room chu a va chingfel ta a, a hnawk lem lo bawk a, a tifel rei hran lo. A intihfel zawh meuh chuan rawngbawl a lo hun leh ruai tawh a. A bawl leh nghal char char..eirawngbawl hi chu hahthlak a ti lem lo bawk a, nuam ti takin a tithei mai zel. A bawl zawhah a inbual fai a, Malsawmzuala nen an inbe zuai. Ani pawh a patea te insakna lamah a va pui ve a niawm e. 

Khua a thim lek lek tawh tihin an awmpui thar chu a rawn thleng ve ta hlawl a. A paw thûr mai. An khaw kawng a khu ve hle a nih hmel. Tetea nen an inrual khat vel awm e, a upa hret maithei bawk. Hâng lam, sa nghet tlet tlawt, hmui chhah tep tup, meng zek zek mai hi a ni a. Lalhmunsangi a ni a, Hmuni tia koh mai tur a nih hmel. Magie chuan a lo buaipui a, a inbual fai zawhah zanriah an ei a. An geli an eisan. Pi Thani chuan an chhungkaw kalphung leh thil tihfel ngai leh hunbi te a hrilh nghal bawrh bawrh a. Hmuni pawh chu a bu ve nghut nghut mai. A aw lah chu a chher lek lek lehnghal, Tleirawl â phuangte pawh a ang. Angeli a rawn haw a, Hmuni chuan Magie nen a entawn sek mai. Magie chuan, "Hmuni, phir kan nia, min hriat hran dan tur chu maw..kan sam hi en la, Angeli sam chu a sei hlek, tin hei a banah tatoo a nei bawk. I hrethiam em?" A ti chat chat a. Hmuni pawh chuan, "U Angeli a ngo hlek bawk a nih hi.." a lo ti ve a. Angeli pawh a khi ve vur vur mai. 

Tetea chu ngawi rengin chhuah a tum a, a nuin, "Muanzual, khaw nge i kal dawn? Chhuak suh" a ti hlar a. 

"Ka chhuak awm e" tih leh chhuah a rual hmiah. Pi Thani a meng no lo teh e. A nu bengdaih nan, "Nu, engtin nge Tetea leh Dikteii te kha an ni tih i hriat? Kei chu ka lo hrethiam ve lo reng reng" tiin a nu bulah a ṭhu a. 

Tum hmak chung hian, "I nu Rini hian kan awm loh hlana an tawm dun a lo hmu pek alawm. Chubakah mi dang pawn min hrilh zauh zauh tawh. Mali a awm loh ruala Diki a rawn sawi nghal chat danah khan ka ringhlel tawh hrim hrim" a ti nghat nghat a. Magie chuan, "Tetea hi a rilru a len hmel sia, buaina eng emaw hi kan tawk ang em le?" Ngaihtuah hmel fê hian Magie chuan a ti a. 

"I pa rawn haw se, aman hrilh se, Tetea chuan a pa a hlau êm, a ṭhen mai ang" a nu chuan a lo ti a. 

Hetih lai mêk hian Dina leh Zuala te chu Magie te ina leng turin an rawn inkhalh phei ve mêk a. Magie'n a call a la duh tawh si lo chu hrehawm a tih êm avangin va lenchilh tawp mai a tum a ni. Magie tia an in an zawn avangin an lo hre mang lo va, Magie hria an la tam vak loh vang a ni. Mahse, an vanneih asiamin Magie te in chhaka dawrtê ah chuan lutin an zawt leh ta tawp a, an lo hre ve tawh nasa si a, an kawhhmuh ta a. Phur leh huphurh ru tak chungin an zuk pan ta a. 

Door bell ri tlang tlang a hriat chuan Magie chu a tho vat a, Malsawmzuala em mawni le ti rilru chungin a va hawnsak a, hmanni deuha a number diltu, rawn call sektu nen an indinchilh ran mai. A hamhaih ve deuh, mahse, insûm chungin, "Lo lut rawh u, eng nge ni ta?" A ti khawmawi a. An rawn lut a. Angeli erawh a inbual daih. Pi Thanpuii chuan, "Bawihi, tu te nge ni a?" A lo ti vat a. Magie chuan chhan ngaihna a hre mang lo. 

"Angeli thiante an niang" a ti ta ringawt. Dina chuan a lo melh uluk kher mai, "Dina ka nia, hei ka ṭhianpa hi Zuala..Maggie nangmah i ni tiraw?" A ti ta a. 

"Aw ni e, mahse, kan inhria em ni?" A lo ti hâ a. Dina a hrilhhai deuh. "Hriat kha mawle, i va theihnghilh hma ve, call i la duh tawh bawk si lo, kan rawn lenchilh tawp che a nih hi" Dina chuan a lo ti hmiah. Pi Thanpuii chuan thil awmzia a hrethiam niin a lang, mahse, "In va fel ve aw. Magie hi zawng a haihawt khawp a, a nikhualo tak tak a ni" a lo ti ve luam a. Magie erawh a ner ru sak. Buaina hmachhawn leh hi a ning tawh asin le. 

Pi Thani a ding uaih a, In chung lamah a pen chho thlep thlep, Magie chuan a nu thiltum chu hriaiin a inhria. Angeli rawn lang ve lo tura hrilh a tum a ni ngei ang. A thinrim zek zek mai. Mahse, tihlan chi a ni si lo. Malsawmzuala a va text ta ngawt a. "Dina i tihte kha an lo leng.." a va ti. 

Rilru inpawh lo zet chuan an inkawm ve zel a, a rin ang ngeiin Angeli a rawn dîkdâk duh miah lo. A rawn lan vaih chuan Dina ten an hre nghal dawn si a. Dina chuan rawn ṭhut hnaihin, "Maggie, hei leh chen kan rawn pan tawh che a. Ka rilru chu i hriatthiam ka ring" a han ti tê tê a. 

"Eng i rilru maw?" A lo ti hû. 

"Hrethiam lo der suh, engkim i hria, ka sawi tawh kha, khatia i awm avang khan ka hnualsuat phah lo che" Dina chuan a ti sur sur a. 

"Min hrethiam la, ka sawi zing tawh,i mi hmuh kha keimah ka ni lo, ka u ka phirpui ka tih kha. Lawk aw" tih leh a phone hmeh a rual a, Angeli nen a hma sundayah an thlalak dun chu a entir ta a. Dina a mengphawk ngang mai. "Zawng fian phel chu nêptê" a ti sup a. 

"En vang vang rawh, khami zana i mutpui khan a bânah tatoo a nei tiraw? Min en la, ka nei ve lo..a âwm bawrah pawh a nei, ka nei ve lo. Tin, nula virgin ka ni" inringtawk zetin a ti ta a. Dina chuan a chil a lem khawlh ringawt. A mak a tih bakah a hamhaih êm a ni.

"A nih i û hi khaw nge tunah a awm?" A ti thâm ṭuak a. 

"A pindanah. A lo chhuk thla lo vang. Nakinah engkim i la hrefiah mai ang. A number i duh chuan ka pe thei che" a ti a. Dina chuan, "Khawi vat" a lo ti. Angeli no chu a pe leh ta hmiah. Eng nge mawni vei le, amah vanga tlangval nazawng leh tar hur nazawngin an pal reng hi a duh lo. A beilet ve zel tawh dawn. Malsawmzuala'n a rawn call a, a la vat.

"Kan tui kawng kan siamṭha a, ka hman ve chiah, eng nge chanchin?" A rawn ti a. 

"Ka hrilhfiah vek tawh e. Engkim a ṭha" a ti sap a. 

"Ka ringtawk che alawm..a nih chuan ka'n inbual ve lwk ang e, min lo mutsan lo la aw" a rawn ti a. A dah zui nghal. Dina te tan pawh han len rengna chi ni hek lo le, thingpui pawh in loin an haw ta a. Magie chu ngaihdam te a dil hnuhnawh. Mahse, a kal dawn chuan,"Nangmah i lo ni lo a nih pawhin ka duhzawng tak i ni" a ti sup a. Magie chuan rang zetin, "Bialpa ka nei" a ti sep. Kawng a khar zui hmiah bawk. Dina kha a demawm êm êm hran loh, mahse, palliam nih a duh lo. A hnu lawkah a nu a rawn chhuk a, "Kha..i inlengte chu an haw tawh ni maw?" A rawn ti a. 

"Aw..Angeli inlengte zawk an nia, a rawn chhuk duh si lo va, beidawngin an haw ta a nih kha" a ti nghat a. A nu pawh chuan a chhang tawh lo. Mu tura a intintuah mêk laiin A nu âng thawm a hre ta a, a lo hnai zel a, Tetea pindan bulah a âng ri chu a tawp ta a. 

"Pawl 12 lek i la nia, ka rui e te i tia maw? Naupang tê si, min va zah lo ve. I pa ka'n be nghal ang e" a ti hlawk hlawk a. 

"Be rawh. Be nghal rawh, ka bialnu ṭhen ai chuan in ka chhuahsan anga a ni mai" Tetea chuan sehchilh deuh hian a ti a. Magie chu awmhmunah a lo hah ve hle ringawt. Tetea chu ruihhlo lamah tlan lo se a duh viau asin mawle. A la naupang si a, a hmalam hun a chhiat a hlau. 

A nu chuan a pa chu a be ta nge, in hnuai lama a chhuk leh daih avangin a ṭawng ri a hre phak ta lo va. A pa chuan eng thu tak rawn nei ang maw? A inngaihtuah buai laiin Dikteii call a dawng ta a, a la vat. 

"Tetea kha a rawn haw tawh em?" Thlabar hmel angreng deuh hian a rawn ti a. 

"Aw haw chiah, a rawn kal em ni?" A ti a. 

"Pawnah min nghak ngat ngat sia, ka nu remti lo chung ka chhuak a, zu te kha a rui lehnghal a. Awii, Magie, a hrehawm ê..ka lo duh ve tawh bakah ka khawngaih si, mahse, i nu min ṭawngkhum dan kha ka bengah a ri reng bawk si" a rawn ti bawrh bawrh a, a âp ve hle tawh a ni mahna. 

"Ka hrethiam alawm, nia, a zia lo khawp mai. Mahse, beidawng lo u la; hun ṭha a la awm mai ang, ka nau hi lo fuih char char zawk rawh. Sual kawng a zawh a hlauhawm êm mai" a ti a. 

."Nia ka hau char char alawm, a rilru a ipik ve êm a nih kha, kei lahin ka lo be duh lo kual ve nen, amah ka huat vang a ni lo a nia" a rawn ti a. 

"Lo be rawh, inbiak loh ngawt hi chinfelna a ni lo. Ka nute pawh hmin ka lo tum ve dawn nia" Magie chuan a ti a. Reitak an inbia, Dikteii chu a khawngaih hle, tihtheih a nei tam lo bawk si. 

Phak chuapin a tho a, Hmuni a lo la tho lo! A chau ve deuh a niang tiin a che nghal zung zung a. A inbawl zawh tawh hnuah Hmuni chu a rawn tho ve chhak mai. "Ka mutui lutuk a, thawh ka hai a ni maw" a ti lûng lûng a. A chhang lem lo. Inkhawm tur an ni bawk a, tukthuan chu an ei hma ta deuh. Magie vawksa chhum chu Hmuni chuan, "Kei chu vawksa hi chu anṭam nena thlakpawlh hi tui ka ti ber, U Maggie, ti nge i thlak loh? Zikhlum hi chu a" tiin a ner nâng a. 

Magie chhan hmain Tetea'n, "I thisen a sang e a. Naktuk aṭang chuan thawh hai tawh suh" a lo ti hmuk. A nu chuan mitmeiin a khap naa, engah vak a ngai lo a nih hmel. Eikhamah Magie chuan a sengfel leh vek a, thleng sil erawh Hmuni kutah a dah. 

Inkhawm turin a insiam san ta a, an kal dawn chuan Hmuni leh bawk chuan, "U magie, ka kut hi ka tipem a, thleng hi ka sil theih pawh ka ring lo. " Tiin a kut zungpui a lo pir vâ a. Chhang tawh lem loin a kal..dar a ri tawh bawk si nen. Angeli a inkhawm lo thung. Dikteii pawh a va hmu a, a hlim lo tih a hriat ngawih ngawih. Ban veleh awm khawmuang loin a haw a, in a va thlen chuan thleng sil tur kha a lo la vûm thûr mai. A thin a thawk deuh thut naa, a insûm leh ta zawk a.,Zorema te ina leng turin a insiam nghal mawlh mawlh. Va len ve leh hram loh chu a ti deuh a ni. In hnuaia a zu chhuk chuan a nu chuan, "Ti nge thleng saw sil loha a la awm a?" Tih bik pawh nei lo chuan a ti a. 

"Ka hre nang, Hmuni hrilh rawh" Magie chuan a ti hmuk. 

"A kut a tipem tak alawm, Magie, han nuai zuai la..i kal hma khan" a nu chuan a ti a. A sa ve phat. 

"Tuk pumin ka buai a, thleng lehzel chu ka sil lo vang. Kut pem tih mai mai,. A ho lutuk" ti ve hmakin chabi a la a , a chhuak nal nal. Angeli leh a nu inmelh ralh chu a hmu hman lo. Zorema te in a va thlen chuan inleng pawh an lo nei vak tawh lo va. Ṭhenawm hnai an ni deuh mai. Liansanga a lo awm ve kûk bawk. Zawmi nen an ṭhu dun a, Zawmi hi sawi tawh angin a mawng a zângin naupang enkawl pawh a thiam riau a, Tlani fate pawn an ngaina bawk a niang, an ngheng chial reng mai. Tlani chhungte ho an haw ta bawk si, an khua a har ve ngawt ang le. 

Zawmi chuan, "Drama i rawn nang lo chiah chiah a, i chân ropui tawp" a ti sar sar a. 

"Eng ?" A ti vat. 

Liansanga va melh zauh chungin, "An nu kha a rawn kal a, an inhau hrep mawle. An fa kha an nuin a awmpui a, mahse, a fawrsan reng avangin an va la ta daih a, chung vel chu fa hmangaih ber niawm takin a rawn ankhum ta vel a.." nui chungin a ti a. 

"Ehe! Hmanni khan an lo inṭhen tak tak a ni maw?" A ti hliai a. 

"Ṭhen chiang e mawle..mahse, enteh, U Zorema nu leh pate chuan U Liansanga zawk an thiam lo daih, ka ten ee..an mo nuin hlawh chhete a neih vangin an han tlawn huam huam a, A û kha ka lainat hnuhnawh" Zawmi chuan ngui zet hian a ti a. Magie ngaihtuahna pawh a kal thui hle. 

Zorema'n chaw ei turin a sawm ve leh tlat a. Malsawmzuala pawh sawm ve turin a nawr a, Vawiin lamah an Kohhranin mikhual an neih vangin a buai deuh tur thu kha a sawi a, lenpuiah pawh a sawm ngam lo kha a nia. Chaw tal chu a rawn ei hman ang tiin a call ta a. 

Hmeichhe aw tliang lam fiahfai zetin a lo chhang a. 

"Mampuia a awm lo em ni?" A tih mek laiin, Malsawma aw hian, "Tu nge a?" A rawn ti a. Hmeichhia chuan, "A buai rih a, nakinah lo be mai ta che.." a ti a. 

Magie chuan dah ta lo chuan phone chu a bengah a la vuah ran a, Malsawmzuala aw ngeiin, "Chhuak phei ila, ka nu te pawh an lo haw tawhin ka hria" a ti a. Hmeichhia chuan no zet hian, "Aw le, Ka duat" a ti ngher ngher a. Maggie chuan a ranga rangin a hmet hlum nghal. A thinphu chu a rang kher mai. Zorema'n a lo en reng chu niin, "I ṭha em?" A lo ti vat a. 

"Ka ṭha e. Malsawmzuala chu a rawn ei dawn lo" a ti zawi sap a. Apuia te ho an rawn thleng ta bawk a, eirawng an bawl a. Magie tih loh chu an hlim hlawm viau..ani erawh a langah a nui naa, a chhungril nun a so buan buan a ni mai e. Kha hmeichhia kha tu nge a nih ang? Angeli sawi kha a lo dik tak tak em ni ang? Nupui hual chu a lo nei tak tak tihna em ni? 

Chaw pawh chu bar hnih khat bak a ei lo. A ril chu a ṭam, mahse, a kaah chaw tuina a awm lo. A awmdan chu a ṭhianten an hriatthiam a hlauh êm vangin a inthunun nasain a insangmar nasa a, chu chu a hahpui a ni ber mai. Chaw eikhamah Zawmi a pui leh char char a, dar 8 rik hma deuhin a hawng phei ta a. A kal tur chu Zorema'n, "Dik lo chu a awm a ni. I û ka ni a, ka bulah engmah zêp nei suh" a ti a. 

"Nakinah aw. Ka la chiang ngam lo alawm" a ti ringawt. Vûng takin a inkhalh haw a, in a luh rual rualin a nuin a lo ankhum nghal bawk. "Chhuah ve apianga chaw ei ziah, i thlen tawpna apiangah i ei nghal chawt zel a, zah pawh i zak lawm ni? Mi te pawn eng ngaihin nge an ngaih ang che. Nikhua lo lutuk" a lo ti hlawih hlawih mai. 

"Nia, Workshop-a thawkte ho khan eikhawm an ti tlat a" a ti ve mai a. 

"I chet peih loh chhuanlam mai mai a nih kha. Awmpui nei tih vanga awmpuite chhawr rim lutuk te hi thil mawi a ni ngai lo" a ti leh hram a, "Nu, ka chet lohin tu nge maw che ngai chuang le? Awmpui aia ka sanna vak a awm em ni?" A ti ve ngat. A nu chu a dang titih a. 

"Kan in hi nuam i ti lo a nih chuan i duh hun hunah i chhuak thei a nia" Pi Thanpuii chuan a ti fak a, Tetea zawkin, "Fanu ṭheuh ṭheuh in va inlal hleih ve, tiraw? U magie.." tiel rawngkai hian a lo ti a. A nuin Tetea chhan a tum lai takin, "Ka ngaithla peih lo, Kohhran hmeichhe OB nu" tih leh chhuah a rual daih. A nu chu thinrim tîk têk tak a ni. Magie pawh muangchangin a room a pan a. Tetea'n a nu a biakdan hi ṭha chu a ti miah lo, mahse, zah tlakin a awm miau lo va, a fate leh a chenpuite hian an lo hrechiang em em si a ni. Inngaihtuah harh nante hmang ve se a lawmawm ngawt ang. A chau , a zawi. A ṭahte pawh a chhuak lek lek. Malsawmzuala'n a la rawn be miah lo bawk. A ringhlel telh telh a, a zeldin kual lo thei bik si lo. Engvanga ngawi ta hmak nge maw a nih ang le? Angeli a inrawlh chu a ring chiah si lo. 

A chau tawngkhawng muhil siar siar tawh chu a call dawnin a tiharh a, Amah a lo ni. A ring raltir ta ṭhak a. A rawn call leh, a reject hmak. A vawi thumnaah chuan êm êm a tiin a la ta hram a. 

"Eng nge" a ti nghat. 

"Ti nge min rawn biak i tum miah lo va" a la rawn ti zawmah a. 

"Hehe, ka lo be miah lo che a nih tak chu" a lo tihsan. 

"I buai a niang tiin ka rawn be ngam lo che lawm..kei pawh ka buai tho nain..i ngawi thei ṭhin lutuk hi a ṭha lo" a rawn ti duah a. Magie a ner nasa, "Kha hmeichhia kha tu nge a? I tan eng nge a nih?" A ti ta a. 

"Tu maw? Eee..Cindy kha mi le..ka ṭhiannu kha" a rawn ti kual vel chu a ngei lutuk a, "Aw..hun nuam tak hmang r'u, bye" tih leh dah a rual a, a rawn call leh hmain a switch off nghal hmiah bawk. Thinrim ṭeuhin a maimichhing a, a inngaihtuah thui vak duh lo, a thinrim telh telh dawn si a. 

Zingah a harh hma viau naa, a mu lui ve tlat. Dar 7 rik dawnah a tho ve ta chauh a. In hnuaia a zu chhuk chua tum nghal hmak. Tumah an lo la tho lo. "Khanglang hlawm chuan" tih leh a rooma luh a rual lehnghal a. A mu lui ve ta ngat ngat. A duhnaah chuan a luhlul bawk a. Hmuni leh Mali an treat dan a inang ta lo hle, engdang a ni lo Hmuni chu a nute chhungkhat hla ve tawh tak a nih vangte pawh a ni mahna. Mali kha chu tuk khat lek thawh a hai ve paw'n nasa theihtawpa ankhum a ni ṭhin. Dar 8 a rik takah chuan a nu âng thawm a hre ta a. A khi sak mai. A zu chhuk a, Hmuni chuan chaw a lo chhuang mêk chauh. Tetea hi dar 8:30-ah chuan in atanga a chhuah ngei ngei a ngai tawh ṭhin a, a nu pawh a class neih dan a zirin dar 9-a college a thlen hman a ngai ṭhin. A nu chuan a rawn hmuh rualin, "Ti nge i thawh loh a? Hei kan buai vek hi" a lo ti a. 

"Ka harh hleinem" a ti hmak. 

Han tih leh vak dan a hre tawh si lo, Hmuni chu a han hau ve ngial a, Mali te angin a hau na duh teuh lo. Hmuni lah chu a tum ang bêr reuh a, a hmelchhiat a zual ngawt mai. Tetea te class an ṭan tawh dawn si , uniform nen a rawn chhuak a, "Khaw nge ka tiffin?" A rawn ti. A nu chuan, "Kha zing thawh nachang an hre hlawm si lo va, chaw pawh a la hmin lo" a lo ti hlar a. 

Tetea chuan Hmuni chu melhin, "Awmpui ve si ti nge thawh i va hre lo ve, kan awmpui hmasa te chu zing dar 6-ah an tho ṭhin. Tun hnuah chuan alarm set tawh ang che. I hria em?" A ti bung nghut. A nu chuan, "Tleirawl ṭhanglai an nia, mut an âm ve a nih kha..I U magie te pawh thawh ve mai tur a nia, awmpuite kuta engkim dah hi ṭha ka ti lo" a lo ti leh hram. 

"U magie chu kan awmpui a ni lo, ka û, Angeli phirpui a ni. U Mali kan awmpui laiin engkim a kutah i dah vek, a thawh tlai ve hlek pawn i hau hrep zel, Awmzia nei teh" Tetea chuan a ti leh ta hmiah hmiah. Magie chuan a nau chu a lo ṭan ru kher mai. Lehlamah a nu hi han âng vak vak thin mah se, a ze ṭha ve deuh chu a inâng thawl a, a thinrim a reh daih zel. Maggie pawh a hnu lawkah ṭha êm êmin a be leh ṭhin tho. A zia ve reng a ni mahna. 

Tetea chu chaw pawh ei lo, tiffin pawh pai loin a kal ta ngawt a. Angeli a rawn tho a, chaw an ei zui nghal. An ei laiin Rini a rawn chho leh a, "Ka u, naupang monthly fees thla thum lai kan pe tawh lo, kan pa dam thei lo nen, min lo hmantir lawk mai teh, bill a la ve ṭêp a, ka rul vat ang che" a rawn ti a. 

Angeli'n, "Pawisa hi in pûk reng mai a, nang pawh ina awm huat huat reng lo khan a thawh theih ang ang thawk ve ta che. A thlawnin kan in in luah a, pawisa in puk reng bawk a, in hneawm" a lo ti zêk mai. 

Pi Thanpuii pawh chuan, "Ni e, Rini, inpa damloh chhuanlam reng lo hian chawhmehte khar ve la, veng chhungah ringawt pawh i hralh thei êm êm ang, I U Ruata'n a hriat phei chuan a lawm hlek lo vang, tun hi a tawpna ni rawh se" tiin pawisa chu a pe ta tho a. A chhuah hnuah Angeli chuan a rêl zui hrep, Magie erawh a inveng rân a, Pi Rini leh a nu intihthiamzia a hria a, fimkhur kha ṭha a ti a ni. Eikham veleh a insiam nghal a, Hmuni chu puih a tum lo hul hual. Workshop a va thlen chuan a rin loh lutukin Malsawmzuala a lo ṭhu run mai. A lai deuh, mahse, nimin lama thil thleng a hrechhuak nghal a, a tum nghal hmak. 

"Ka lo nghak che a" a lo ti a. 

"Eng atan" a ti chang fak. 

"A mak hmuk hmuk thei..hawh coffee in lawk ang" tih leh an workshop thlang lawka coffee dawr lam chu a panpui a. Tal a sâwt lo tih hriain a zui mawl ve tawp. Mi an lo tam lo va, thlang lam dawhkan kil chuan an ṭhu dun a. 

"Eng berin maw i thin chu tirim?" Zaidam zet hian a ti a. Magie chuan nem leh mai a hlau hle. 

"I hria" a ti ringawt a. 

"Hria ila ka zawt nang che. Mawh, han sawi vek teh, ka naute" a rawn tih leh thlup phei chuan Magie a hnip ṭan. Mahse, insangmarin, "Kha hmeichhia khan i phone kha engvangin nge a kawl a? " A ti ta a. 

A ngawih dat hnuah, "I lo call em ni? Ka call log-ah ka hmu si lo che a" a ti a. Dâwt sawi hmel a pu der si lo. 

"Kha nu kha tu nge a nih sawi phawt teh" a ti leh a. 

"Umm, Cindy ka tih kha, a nu leh ka nu hi best friend an nia, kan chhungkaw ṭhian an ni tihna a nih chu..Shilong-ah an awm ṭhin a. He lamah hna a rawn thawh dawn avangin kan inah a rawn awm rih dawn a. Niminah khan Shillonga ka zin ṭuma kan thlalak a inthawn a, chu chu i lo call lai a ni maithei..a fiah em tikhan" a ti dap dap a. 

Magie a mangang deuh, "In inah a awm dawn a maw?" Awki sang lam hian a ti nghek. Dawr neitu pawh a rawn hawi hû mai. 

"Aw..a nu û a pute chu an awm naa, a pu nupui nen an inngeih vak lo va, ka nuin a lo sawm ve sek bawk nen, a rawn awm rih ang. Chu chu a pawimawh viau em ni?" Mampuia chuan a ti a. 

"In khatah in cheng dun dawn tihna a nia. Nimina ka lo call che pawh a hrilh lo che a, tichuan,.." mei nei fê hian a ti nghat a. 

Malsawmzuala a nui hawk, "Chu! Cindy chu i thîk tihna em ni?" A ti hluai a. Thu thluaithlum thiam ve ta lo chu "Aw ka thîk..in chendun dawn phei chuan inthen law law ang, ngaihṭha lo deuha awm ka peih lo" a ti ta hmak mai le. 

"A va buaithlak e aw..tihian ti ang..nilaini kha ka nu birthday kha a nia, khatah khan chhungkaw ho hmaah ka bialnu i nih thu ka sawi ang, tichuan, i ngaih a ṭha thei ang em?" Malsawmzuala chuan a ti ta a. Magie chuan rum fê-a melhin, "A zahthlak" a ti bawk si. Magie kut chu va vawnsakin, "mi thikthu chhe pahnih inlaichinna chu a hahthlak chang a tam dawn a nih hi, mahse, Meg, ka nghing lo vang. Chutiang mipa ka ni lo. Cindy pawn unau angin alawm min en,.a ṭha em?" A ti dam thlup a. 

Magie pawn han thinrim leh vak dan a hre tawh lo, thil chu kal ve zel phawt se, an awmdan tur chu a hriat theih mai ang chu maw..ṭha tak chuan an inthlah liam ve leh ta phawt chu a nia.

Chhun chawlh laiin nu ti ila, kum 48 bawr vel tur, la ṭhalai tak mai hi a rawn lut hlawl mai a. An lo en ṭhap..Maggie lam chu rawn panin, "Maggie i ni ang maw?" A ti a. A lo bu nghat. 

Mitmeng de sawr sawra rawn melhin, "Ka pasal hi i thlah lo a nih chuan, ka pasal phone-a in video hi ka thehdarh dawn a ni. I hrethiam em?" A ti ta mai a..